នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចអគ្គមហាសេនាបតីតេជោ ហ៊ុន សែន អញ្ជើញដង្ហែព្រះមហាក្សត្រ ក្នុងព្រះរាជពិធីពន្លត់ទៀនជ័យ នៃទិវាបុណ្យឯករាជ្យជាតិ ៩ វិច្ឆិកា ខួបលើកទី៧៣
នាយកប្រតិបត្តិអង្គការ HFHI កោតសរសើរគោលនយោបាយ​អភិវឌ្ឍលំនៅដ្ឋានរបស់កម្ពុជា​
ឯកអគ្គរាជទូតជប៉ុនថ្មី ប្តេជ្ញាបន្តពង្រឹង និងពង្រីកកិច្ចសហប្រតិបត្តិការទ្វេភាគីឱ្យកាន់តែរឹងមាំ និងស៊ីជម្រៅ
សម្ដេចតេជោផ្ដល់អនុសាសន៍ដល់គុនខ្មែរ និងសមាគមខ្មែរនៅជប៉ុនឱ្យខិតខំបន្ថែម ដើម្បីនិរន្តរភាពស្ថាប័ន

នយោបាយ​ និង ការអភិវឌ្ឍន៍

ក្រុមនិស្សិតពេទ្យចុះកម្មសិក្សាកូរ៉េខាងត្បូង នឹងចេញតវ៉ា ជុំវិញកូតាសាលាពេទ្យ

2024/02/20 08:51:27 pm        161
Facebook Telegram Linkin
ក្រុមវេជ្ជបណ្ឌិតចុះកម្មសិក្សានៅតាមមន្ទីរពេទ្យធំៗរបស់កូរ៉េខាងត្បូង សន្យាដើរចេញពីថ្នាក់រៀន នៅថ្ងៃអង្គារទី២០កុម្ភៈនេះ តវ៉ាប្រឆាំងនឹងផែនការរបស់រដ្ឋាភិបាល ក្នុងការបញ្ជូននិស្សិតកាន់តែច្រើនចូលសិក្សាសាលាពេទ្យ ដែលបង្កឲ្យមានក្ដីបារម្ភថា នឹងមានការពន្យាពេលក្នុងការវះកាត់ និងការព្យាបាលអ្នកជំងឺ។ សារព័ត៌មាន Yonhap បានរាយការណ៍នៅថ្ងៃអង្គារនេះដោយសំអាងប្រភពពីក្រសួងសុខាភិបាល របស់ប្រទេសនេះថា និសិ្សតពេទ្យវេជ្ជបណ្ឌិតចុះកម្មសិក្សាកូរ៉េខាងត្បូងសរុប៦.៤១៥ នាក់ នៅតាមមន្ទីរពេទ្យបានដាក់លិខិតលាលែងពីការងារជាការតវ៉ាប្រឆាំងទៅនឹងផែនការរដ្ឋាភិបាលក្នុងការបង្កើនចំនួននិសិ្សតពេទ្យទោះបីជាមានបញ្ជាពីរដ្ឋាភិបាលឲ្យបន្តធ្វើការងារក៏ដោយ។ មុនសកម្មភាពឧស្សាហកម្មដែលបានគ្រោងទុក មន្ទីរពេទ្យធំៗជាច្រើន បាននិយាយថា ពួកគេកំពុងសម្របសម្រួលកាលវិភាគការវះកាត់ និងព្យាបាលអ្នកជំងឺ។ លោកនាយករដ្ឋមន្ត្រីហាន ឌុក ស៊ូ (Han Duck-soo) បានអង្វរករក្រុមវេជ្ជបណ្ឌិតកុំឲ្យយកអាយុជីវិត និងសុខភាពរបស់មនុស្សជាធ្វើចំណាប់ថ្នូរ។ លោកក៏បានបញ្ជាឲ្យមានវិធានការបន្ទាន់ផងដែរ ដូចជាការប្រើប្រាស់ការពិគ្រោះយោប់ផ្នែកវិទ្យាសាស្ត្រពីចំងាយ ការបង្កើនប្រតិបត្តិការនៅតាមមន្ទីរពេទ្យសាធារណៈ និងការបើកឃ្លីនិកយោធាជាដើម។ រដ្ឋាភិបាល គ្រោងបន្ថែមចំនួនចុះកម្មសិក្សាសាលាពេទ្យឲ្យដល់២ពាន់នាក់ដែលនឹងចាប់ផ្ដើមនៅឆ្នាំ២០២៥ខាងមុខ ខណៈមានគោលដៅបន្ថែមឲ្យដល់១ម៉ឺននាក់ នៅត្រឹមឆ្នាំ២០៣៥ ។ ចំនួននិស្សិតពេទ្យចូលសិក្សាប្រចាំឆ្នាំគឺប្រហែល៣ពាន់នាក់៕

អូស្ត្រាលី នឹងវិនិយោគថវិកាក្នុងវិស័យការពារជាតិ១១,១ពាន់លានដុល្លារអូស្ត្រាលីបន្ថែមទៀត ដើម្បីទប់ឥទ្ធិពលចិន

2024/02/20 08:44:22 pm        87
Facebook Telegram Linkin
ប្រទេសអូស្ត្រាលី បានឲ្យដឹងនៅថ្ងៃអង្គារទី២០កុម្ភៈសប្ដាហ៍នេះថា ខ្លួននឹងវិនិយោគកញ្ចប់ថវិកាក្នុងវិស័យយោធាចំនួន១១,១ពាន់លានដុល្លារអូស្ត្រាលីបន្ថែមទៀត ដល់កងកម្លាំងកងទ័ពជើងទឹកនាពេលអនាគត និងបង្កើនវិស័យឧស្សាហកម្មផលិតនាវារបស់ប្រទេសនេះ។ លោក រីឆាដ ម៉ាឡេស(Richard Marles)រដ្ឋមន្ត្រីក្រសួងការពារជាតិបាននិយាយនៅក្នុងសេចក្ដីថ្លែងការណ៍មួយថា ការបន្ថែមកញ្ចប់មូលនិធិសម្រាប់អង្គភាពកងទ័ពនឹងនាំមកនូវទាំងការអភិវឌ្ឍនជំនាញ និងការវិនិយោគប្រកបដោយនិរន្តរភាពក្នុងវិស័យកងទ័ពជើងទឹក នឹងកើនឡើងសរុបដល់៥៤,២ពាន់លានដុល្លារអូស្ត្រាលី នៅរយៈពេល១០ឆ្នាំខាងមុខ។អង្គភាពងទ័ពជើងទឹកនេះ ក៏នឹងទទួលបាននាវាចម្បាំងពី១១ ដល់២៦គ្រឿង ផងដែរ ដែលជាចំនួនច្រើនបំផុត ចាប់តាំងពីការបញ្ចប់សង្រ្គាមលោកលើកទី២មក។ ប្រទេសអូស្ត្រាលី កំពុងសំឡឹងរកការទប់ទល់សមត្ថភាពការពារជាតិរបស់ចិន ស្របពេលមានក្ដីបារម្ភអំពីការកើនឡើងភាពតានតឹងភូមិសាស្ត្រនយោបាយសកល និងឥទ្ធិពលរបស់ចិនដែលចេះតែកើនឡើងនៅក្នុងចំណោមប្រទេសមួយចំនួននៅមហាសាគរប៉ាស៊ីហ្វិក។ គួររម្លឹកថា ការពិនិត្យឡើងវិញជាយុទ្ធសាស្ត្រនៃវិស័យការពារជាតិរបស់រដ្ឋាភិបាលនេះ កាលពីឆ្នាំមុន បាននិយាយថា ការប្រកួតប្រជែងដ៏ខ្លាំងក្លារវាងអាមេរិក និងចិន កំពុងកក្រើកខ្លាំងនៅក្នុងតំបន់មហាសមុទ្រប៉ាស៊ីហ្វិក ហើយថាការប្រកួតប្រជែងគ្នារបស់មហាអំណាចធំៗបានបង្កឲ្យមានជម្លោះដ៏ធ្ងន់ធ្ងរ៕

អ៊ុយក្រែនសម្លឹងទៅភាគខាងកើត បន្ទាប់ពីការដកថយពីក្រុងអាវឌីវកា ខណៈកាណាដាជំនួយយានដ្រូនជាង៨០០គ្រឿង

2024/02/20 08:25:01 pm        122
Facebook Telegram Linkin
យោធាអ៊ុយក្រែន បាននិយាយកាលពីថ្ងៃចន្ទថា កងទ័ពរបស់ខ្លួននឹងកាន់កាប់ទីតាំងការពារថ្មី នៅភាគខាងកើត និងវាយរុញច្រានការប៉ុនប៉ងរបស់រុស្ស៊ីវាយលុករុលទៅមុខ។ ចំណាត់ការនេះធ្វើឡើងបន្ទាប់ពីការដកថយរបស់ពួកគេពីទីក្រុង Avdiivka ដែលត្រូវបានដណ្តើមយក។ វីដេអូរបស់យោធា ដែលបានចេញផ្សាយផ្សាយដោយអ៊ុយក្រែន បង្ហាញពីទិដ្ឋភាពនៅសមរភូមិ រួមទាំង ទាហានអ៊ុយក្រែន ដែលកំពុងការពារនៅខាងក្នុងអគារឧស្សាហកម្មជាច្រើនកន្លែង។ លោក Andrii Teren មេបញ្ជាការកងពលលេខ ១១០ បាននិយាយថា រុស្ស៊ី បានធ្វើឲ្យអ្នកការពារចុះខ្សោយ។ «យើងពុំមានទាហានគ្រប់គ្រាន់នោះទេ យើងពុំមានគ្រាប់ផ្លោងគ្រប់គ្រាន់ យើងពុំមានលទ្ធភាពគ្រប់គ្រាន់ដើម្បីវាយរុញច្រាននោះទេ។ ប្រសិនបើយើងមានគ្រាប់ច្រើន នោះយើងអាចបញ្ឈប់សត្រូវ ប៉ុន្តែជាអកុសល យើងពុំមានទេ។ វីដេអូ ដែលបានចេញផ្សាយដោយក្រសួងការពារជាតិរុស្ស៊ី កាលពីថ្ងៃចន្ទ បានបង្ហាញពីការវាយប្រហារលើរោងចក្រកូកាកូឡារបស់ទីក្រុង Avdiivka ដែលបច្ចុប្បន្ននេះស្ថិតនៅក្រោមការគ្រប់គ្រងរបស់រុស្ស៊ី។ ការដួលរលំរបស់ទីក្រុង Avdiivka បានផ្តល់ទៅឱ្យវិមានក្រឹមឡាំងនូវការរុលទៅមុខក្នុងសមរភូមិធំបំផុតរបស់ខ្លួន ចាប់តាំងពីខែឧសភា នៅពេលដែលទីក្រុង Bakhmut ត្រូវបានដណ្តើមយក ហើយជាសញ្ញាច្បាស់បំផុត ដែលទំនោរនៃសង្គ្រាម បានប្រែក្លាយទៅជាការពេញចិត្តរបស់រុស្ស៊ី។ ជាមួយគ្នានេះដែរ រដ្ឋមន្ត្រីការពារជាតិកាណាដា លោក Bill Blair បាននិយាយកាលពីថ្ងៃចន្ទថា ប្រទេសកាណាដា នឹងផ្តល់ជំនួយប្រព័ន្ធយានដ្រូនពហុបេសកកម្ម SkyRanger R70 ជាង ៨០០ គ្រឿង ដល់ប្រទេសអ៊ុយក្រែន ដើម្បីជួយក្នុងសង្គ្រាមរបស់ខ្លួនជាមួយប្រទេសរុស្ស៊ី។ ក្រសួងការពារជាតិរបស់ប្រទេសនេះ បាននិយាយនៅក្នុងសេចក្តីថ្លែងការណ៍ថា ចាប់តាំងពីខែកុម្ភៈ ឆ្នាំ ២០២២មក ប្រទេសកាណាដា បានសន្យាផ្តល់ជំនួយជាង ៩,៧ពាន់លានដុល្លារដល់ប្រទេសអ៊ុយក្រែន រួមទាំងជំនួយយោធាជាង ២,៤ ពាន់លានដុល្លារកាណាដា ផងដែរ។

មេដឹកនាំកូរ៉េខាងជើង លោក គីម ជុងអ៊ុន ទទួលបានរថយន្តមួយគ្រឿងជាអំណោយពីលោក ពូទីន

2024/02/20 07:48:33 pm        308
Facebook Telegram Linkin
ប្រព័ន្ធផ្សព្វផ្សាយផ្លូវការបានរាយការណ៍នៅថ្ងៃអង្គារ (២០ កុម្ភៈ) នេះថាមេដឹកនាំកូរ៉េខាងជើង លោក គីម ជុងអ៊ុន (Kim Jong Un) បានទទួលរថយន្តមួយគ្រឿងពីប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) ជាអំណោយ «សម្រាប់ប្រើប្រាស់ផ្ទាល់ខ្លួន» នៅក្នុងអ្វីដែលអាចជាការរំលោភលើបម្រាមរបស់អង្គការសហប្រជាជាតិ ដែលទីក្រុងមូស្គូ បានចូលរួមដើម្បីអនុម័តប្រឆាំងនឹងទីក្រុងព្យុងយ៉ាង។ប្រទេសទាំងពីរនេះបានពង្រឹងទំនាក់ទំនងកាន់តែជិតស្និទ្ធចាប់តាំងពីលោក គីម និងលោក ពូទីន បានជួបប្រជុំគ្នាកាលពីខែកញ្ញា ហើយបានសន្យាជំរុញការផ្លាស់ប្តូរលើគ្រប់វិស័យ នៅពេលដែលភាពឯកោអន្តរជាតិរបស់ពួកគេកាន់តែស៊ីជម្រៅ ជុំវិញសង្គ្រាមរបស់រុស្ស៊ីនៅអ៊ុយក្រែន និងការអភិវឌ្ឍន៍អាវុធនុយក្លេអ៊ែររបស់កូរ៉េខាងជើង។ប្រព័ន្ធផ្សព្វផ្សាយ KCNA បាននិយាយថា ប្អូនស្រីរបស់លោក គីម «បានថ្លែងអំណរគុណជំនួសនាមឱ្យលោក គីម ជុងអ៊ុន ដោយក្តីគោរពចំពោះលោក ពូទីន ទៅកាន់ភាគីរុស្ស៊ី ដោយនិយាយថា អំណោយនោះជាការបង្ហាញយ៉ាងច្បាស់អំពីទំនាក់ទំនងផ្ទាល់ខ្លួនពិសេសរវាងមេដឹកនាំកំពូលទាំងពីររូប»។របាយការណ៍នោះមិនបានរៀបរាប់អំពីប្រភេទរថយន្ត ឬមធ្យោបាយដែលត្រូវបានដឹកជញ្ជូនពីប្រទេសរុស្ស៊ីឡើយ។ លោក គីម ត្រូវបានគេជឿថាជាអ្នកចូលចិត្តរថយន្តទំនើប ហើយលោកមានរថយន្តបរទេសដ៏ប្រណិតជាច្រើនគ្រឿង ដែលគេជឿថាត្រូវបានរត់ពន្ធដោយខុសច្បាប់៕

គ.ជ.ប៖ ១០ថ្ងៃនៃយុទ្ធការឃោសនាបោះឆ្នោតព្រឹទ្ធសភាពុំមានបាតុភាពណាមួយ​កើតឡើងឡើយ

2024/02/20 06:09:35 pm        189
Facebook Telegram Linkin
គណៈកម្មាធិការជាតិរៀបចំការបោះឆ្នោត គ.ជ.ប បានប្រកាសឱ្យដឹងថា គិតត្រឹមថ្ងៃទី១៩ ខែ​កុម្ភៈ ឆ្នាំ ២០២៤នេះគឺមានរយៈពេល១០ថ្ងៃហើយនៃយុទ្ធនាការឃោសនាបោះឆ្នោត ជ្រើស​តាំងសមាជិកព្រឹទ្ធសភានីតិកាលទី៥នេះ ខណៈដែលស្ថានភាពទូទៅគឺបានប្រព្រឹត្តទៅដោយរលូន មាន​សន្តិសុខ សុវត្ថិភាព សណ្តាប់ធ្នាប់ល្អ គ្មានអំពើហិង្សា និងពុំ​មាន​បាតុភាព​ណាមួយ​កើត​ឡើង​គួរ​ឱ្យកត់​សម្គាល់ឡើយ។យោងតាមសេចក្ដីប្រកាសព័ត៌មានរបស់ គ.ជ.ប បានឱ្យដឹងថា ស្ថានភាពទូទៅនៅថ្ងៃទី១០ នៃ​យុទ្ធនាការ​ឃោសនាបោះឆ្នោត ជ្រើសតាំងសមាជិកព្រឹទ្ធសភា នីតិកាលទី៥ ឆាំ្ន២០២៤នេះ គឺ​ពុំ​មាន​ការហែក្បួនឃោសនាបោះឆ្នោតទេ ប៉ុន្តែគណបក្សនយោបាយឈរឈ្មោះបោះឆ្នោត បាន​ធ្វើ​សកម្មភាព​ឃោសនាផ្សេងៗទៀតតាមកម្មវិធីដែលគណបក្ស នយោបាយនីមួយៗបានគ្រោងទុក។តាមរបាយការណ៍របស់គណៈកម្មការរាជធានី ខេត្តរៀបចំការបោះឆ្នោតទាំង ២៥ បានឱ្យដឹងថា គណបក្សប្រជាជនកម្ពុជាបានធ្វើសកម្មភាពនៅគ្រប់ភូមិភាគ ដោយនៅភូមិភាគទី២ មានការ​ចាក់​មេក្រូ​ផ្សព្វផ្សាយ និងនៅភូមិភាគផ្សេងទៀមានការជួបប្រជុំចុះជួបអ្នកបោះឆ្នោត ចែកខិត្តបណ្ណ និង​បង្រៀន​គូសសន្លឹកឆ្នោត។គណបក្ស ឆន្ទៈខ្មែរ មានសកម្មភាពជួបប្រជុំនៅរាជធានីភ្នំពេញ នៃភូមិភាគទី១ និងនៅ​ខេត្ត​ព្រះវិហារ និងខេត្តស្ទឹងត្រែង នៃភូមិភាគទី៨ ហើយមានសកម្មភាពចែកខិត្តបណ្ណ ជួបប្រជុំ និង​ចាក់​មេ​ក្រូ​ផ្សព្វផ្សាយតាមទីស្នាក់ការគណបក្សនៅខេត្តព្រៃវែងនៃភូមិភាគទី៦។ ចំណែក គណបក្សហ៊្វុនស៊ិនប៉ិច មានសកម្មភាព​ចាក់​មេក្រូ​ផ្សព្វ​ផ្សាយ​តាម​ទីស្នាក់​ការ​គណបក្ស​នៅ​ខេត្តកំពត នៃភូមិភាគទី៥ និងខេត្តព្រះសីហនុ នៃភូមិភាគទី៧។ រីឯ គណបក្ស កម្លាំងជាតិ មិន​បាន​ធ្វើសកម្មភាពឃោសនាបោះឆ្នោតនៅថ្ងៃទី១០ នៃយុទ្ធនាការនេះទេ។ គ.ជ.ប បញ្ជាក់ថា «ជាទូទៅការ​ឃោសនា​បោះឆ្នោត​របស់​គណបក្ស​នយោបាយ​នៅ​ថ្ងៃ១០ នៃ​យុទ្ធនាការ​នេះ គឺបានប្រព្រឹត្តទៅដោយរលូន មានសន្តិសុខ សុវត្ថិភាព សណ្តាប់ធ្នាប់ល្អ គ្មានអំពើហិង្សា និងពុំមានបាតុភាពណាមួយ កើតឡើងគួរឱ្យកត់សម្គាល់ឡើយ»។សូម​ជម្រាបថា ការឃោសនាបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ មាន​រយៈពេល១៤ថ្ងៃ គឺចាប់ពីថ្ងៃទី១០ដល់ថ្ងៃទី២៣ ខែកុម្ភៈ ឆ្នាំ២០២៤។ រីឯ​ការ​បោះឆ្នោត​នឹង​ប្រព្រឹ​ត្ត​ទៅ​នៅថ្ងៃអាទិត្យ ទី២៥ ខែកុម្ភៈ ឆ្នាំ២០២៤ ចាប់ពីវេលាម៉ោង ៧:០០ព្រឹក ដល់ម៉ោង ៣:០០​រសៀ។ អ្នកបោះឆ្នោត ជាតំណាងរាស្ត្រក្នុងតំណែង និងសមាជិកក្រុមប្រឹក្សាឃុំ-សង្កាត់​ទាំង​អស់​ក្នុង​តំណែងសរុបមានចំនួន ១១,៧៤៧ នាក់ដែលបែងចែកជា ៨ ភូមិភាគ និង ៣៣ ការិយាល័យបោះឆ្នោត៕ អត្ថបទ៖ វ៉ន ដារ៉ា

សហភាពអឺរ៉ុប បើកការស៊ើបអង្កេតជាផ្លូវការលើ TikTok ជុំវិញលទ្ធភាពនៃការបំពានមាតិកាអនឡាញ

2024/02/20 05:21:35 pm        135
Facebook Telegram Linkin
សហភាពអឺរ៉ុបនឹងស៊ើបអង្កេតថាតើកម្មវិធីវីដេអូកម្សាន្ត TikTok របស់ក្រុមហ៊ុន បៃឌែន (ByteDance) បានបំពានច្បាប់មាតិកាអនឡាញ ដែលមានគោលបំណងការពារកុមារ និងធានាការផ្សាយពាណិជ្ជកម្មប្រកបដោយតម្លាភាពដែរឬទេ នេះបើយោងតាមមន្ត្រីម្នាក់បាននិយាយកាលពីថ្ងៃចន្ទ (១៩ កុម្ភៈ) ដោយធ្វើឱ្យវេទិកាប្រព័ន្ធផ្សព្វផ្សាយសង្គមមួយនេះប្រឈមនឹងការផាកពិន័យយ៉ាងធ្ងន់ធ្ងរ។ប្រធានឧស្សាហកម្មសហភាពអឺរ៉ុប លោក ថឺរី ប្រេតុន (Thierry Breton) បាននិយាយថា លោកបានទទួលយកការសម្រេចនេះ បន្ទាប់ពីបានវិភាគលើរបាយការណ៍វាយតម្លៃហានិភ័យរបស់កម្មវិធីវីដេអូខ្លីនេះ។ច្បាប់សេវាកម្មឌីជីថលរបស់សហភាពអឺរ៉ុប (DSA) ដែលអនុវត្តចំពោះវេទិកាអនឡាញទាំងអស់ចាប់តាំងពីថ្ងៃទី១៧ ខែកុម្ភៈ ទាមទារជាពិសេសលើវេទិកាអនឡាញធំៗ និងម៉ាស៊ីនស្វែងរកទិន្នន័យឱ្យខិតខំប្រឹងបន្ថែមទៀតដើម្បីដោះស្រាយខ្លឹមសារអនឡាញខុសច្បាប់ និងហានិភ័យចំពោះសន្តិសុខសាធារណៈ។ម្ចាស់កម្មវិធីវីដេអូកម្សាន្ត TikTok គឺក្រុមហ៊ុន ByteDance ដែលមានមូលដ្ឋាននៅប្រទេសចិន អាចប្រឈមនឹងការផាកពិន័យរហូតដល់ ៦% នៃប្រាក់ចំណូលសកលរបស់ខ្លួន ប្រសិនបើ TikTok ត្រូវបានរកឃើញថាមានកំហុសពីបទបំពានច្បាប់សេវាកម្មឌីជីថលរបស់សហភាពអឺរ៉ុប៕

ប្រធាន IAEA និយាយថា សកម្មភាពពង្រឹងនុយក្លេអ៊ែររបស់អ៊ីរ៉ង់ នៅតែមានកម្រិតខ្ពស់

2024/02/20 05:00:06 pm        169
Facebook Telegram Linkin
ប្រទេសអ៊ីរ៉ង់ នៅតែបន្តបង្កើនសារធាតុអ៊ុយរ៉ានីញ៉ូមលើសពីតម្រូវការសម្រាប់ការប្រើប្រាស់នុយក្លេអ៊ែរពាណិជ្ជកម្ម បើទោះបីជាមានសម្ពាធពីអង្គការសហប្រជាជាតិឱ្យបញ្ឈប់ក៏ដោយ នេះបើយោងតាមប្រធានទីភ្នាក់ងារអាតូមិកអន្តរជាតិ IAEA លោក រ៉ាហ្វាអែល ហ្គ្រូសស៊ី (Rafael Grossi) បាននិយាយកាលពីថ្ងៃចន្ទ (១៩ កុម្ភៈ) ដោយបន្ថែមថាលោកចង់ទៅកាន់ទីក្រុងតេអេរ៉ង់ នៅខែក្រោយនេះជាលើកទីមួយក្នុងរយៈពេលមួយឆ្នាំ ដើម្បីបញ្ចប់សកម្មភាពនោះ។ថ្លែងទៅកាន់សារព័ត៌មានរ៉យទ័រ បន្ទាប់ពីលោកបានពន្យល់សង្ខេបរដ្ឋមន្ត្រីការបរទេសសហភាពអឺរ៉ុបអំពីប្រធានបទនេះ ប្រធានអង្គការឃ្លាំមើលនុយក្លេអ៊ែររបស់អង្គការសហប្រជាជាតិរូនេះបាននិយាយថា ខណៈដែលល្បឿននៃការចម្រាញ់សារធាតុអ៊ុយរ៉ានីញ៉ូមបានថយចុះបន្តិចចាប់តាំងពីចុងឆ្នាំមុនមក អ៊ីរ៉ង់នៅតែកំពុងបង្កើនការចម្រាញ់ក្នុងអត្រាកើនឡើងនៅជុំវិញចំនួន ៧ គីឡូក្រាមនៃសារធាតុអ៊ុយរ៉ានីញ៉ូម ក្នុងមួយខែទៅកម្រិត ៦០% នៃភាពបរិសុទ្ធ។ការពង្រឹងដល់កម្រិត ៦០% នៃភាពបរិសុទ្ធ ធ្វើឱ្យសារធាតុអ៊ុយរ៉ានីញ៉ូម ជិតឈានដល់ថ្នាក់អាវុធ ហើយកម្រិតនោះគឺមិនចាំបាច់ទេសម្រាប់ការប្រើប្រាស់ពាណិជ្ជកម្មក្នុងការផលិតថាមពលនុយក្លេអ៊ែរ។ អ៊ីរ៉ង់បដិសេធការបង្កើតអាវុធនុយក្លេអែរ ប៉ុន្តែមិនមានរដ្ឋណាមួយដែលពន្លឿនសារធាតុអ៊ុយរ៉ានីញ៉ូមដល់កម្រិតនោះដោយមិនផលិតអាវុធទេ៕

លោកណេតាន់យ៉ាហ៊ូ៖ អ៊ីស្រាអែល នឹងរក្សាការគ្រប់គ្រងផ្នែកយោធា ប្រសិនបើមានដំណោះស្រាយរដ្ឋពីរ កើតឡើង

2024/02/20 04:51:10 pm        154
Facebook Telegram Linkin
លោកនាយករដ្ឋមន្ត្រី បេនចាមីន ណេតាន់យ៉ាហ៊ូ (Benjamin Netanyahu) បានថ្លែងកាលពីថ្ងៃចន្ទថា ទោះបីជាក្នុងករណីដំណោះស្រាយរដ្ឋពីររវាងអ៊ីស្រាអែល និងប៉ាឡេស្ទីនក៏ដោយ អ៊ីស្រាអែល នឹងរក្សាការគ្រប់គ្រងយោធាលើទឹកដីប៉ាឡេស្ទីនទាំងអស់។លោកណេតាន់យ៉ាហ៊ូ បាននិយាយនៅក្នុងសារវីដេអូមួយថា៖«ក្នុងករណីណាក៏ដោយ ដោយមានឬគ្មានការតាំងទីលំនៅអចិន្ត្រៃយ៍ អ៊ីស្រាអែលនឹងរក្សាការគ្រប់គ្រងសន្តិសុខពេញលេញលើគ្រប់តំបន់នៅភាគខាងលិចនៃទន្លេហ្ស៊កដង់ (Jordan) រួមទាំងតំបន់វេសបែង( West Bank) និងហ្កាហ្សាស្ទ្រីប (Gaza Strip) ។សហរដ្ឋអាមេរិក ដែលជាសម្ព័ន្ធមិត្តដ៏សំខាន់បំផុតរបស់អ៊ីស្រាអែល បាននិងកំពុងអំពាវនាវកាន់តែខ្លាំងឡើងសម្រាប់ដំណោះស្រាយរដ្ឋពីរ ដែលមើលឃើញការរួមរស់ដោយសន្តិភាពរបស់អ៊ីស្រាអែល និងរដ្ឋប៉ាឡេស្ទីន ដោយផ្អែកលើព្រំដែននៃទឹកដីប៉ាឡេស្ទីន ដែលអ៊ីស្រាអែលកាន់កាប់តាំងពីឆ្នាំ ១៩៦៧ គឺតំបន់វេសបែង ទីក្រុងហ្ស៊េរុយសាឡឹមខាងកើត និងតំបន់ហ្កាហ្សា។ទីក្រុងវ៉ាស៊ីនតោន ក៏កំពុងជំរុញឲ្យមានដំណោះស្រាយរដ្ឋពីរដែលជាមធ្យោបាយមួយ ដើម្បីបញ្ចប់ទាំងសង្រ្គាមហ្កាហ្សាបច្ចុប្បន្ន និងជម្លោះមជ្ឈិមបូព៌ាដែលមានអាយុកាលរាប់ទសវត្សរ៍ហើយនោះ។ម៉្យាងវិញទៀត លោកណេតាន់យ៉ាហ៊ូ ដែលជាអ្នកនយោបាយអ៊ីស្រាអែលស្តាំនិយម បានកសាងអាជីពនយោបាយដ៏យូរអង្វែងរបស់ខ្លួនក្នុងកម្រិតធំមួយ លើការប្រកាសប្រឆាំងរបស់លោកចំពោះដំណោះស្រាយរដ្ឋទាំងពីរ ហើយលោកក៏បានរំលឹកឡើងវិញនូវជំហរមានអាយុកាលច្រើនទសវត្សរ៍ កាលពីថ្ងៃចន្ទផងដែរ។

អាមេរិក ជំរុញឱ្យ UN គាំទ្របទឈប់បាញ់បណ្តោះអាសន្នហ្កាហ្សា ខណៈប្រឆាំងការវាយលុកក្រុងរ៉ាហ្វា

2024/02/20 03:58:11 pm        136
Facebook Telegram Linkin
សហរដ្ឋអាមេរិក បានស្នើឡើងនូវពង្រាងសេចក្តីសម្រេចថ្មីរបស់ក្រុមប្រឹក្សាសន្តិសុខអង្គការសហប្រជាជាតិ ដោយអំពាវនាវឱ្យមានបទឈប់បាញ់បណ្តោះអាសន្នក្នុងសង្គ្រាមអ៊ីស្រាអែល និងក្រុមហាម៉ាស ព្រមទាំងប្រឆាំងនឹងការវាយលុកថ្មើរជើងដ៏ធំដោយសម្ព័ន្ធមិត្តរបស់ខ្លួននៅទីក្រុងរ៉ាហ្វា (Rafah) នេះបើយោងតាមអត្ថបទពង្រាងដែលបានមើលឃើញដោយសារព័ត៌មានរ៉យទ័រ។វិធានការនេះកើតឡើងបន្ទាប់ពីសហរដ្ឋអាមេរិក បានផ្តល់សញ្ញាថាខ្លួននឹងវេតូ នៅថ្ងៃអង្គារ (២០ កុម្ភៈ) នេះលើពង្រាងសេចក្ដីសម្រេចមានស្រាប់មួយរបស់អាល់ហ្សេរី ដែលទាមទារឱ្យមានបទឈប់បាញ់មនុស្សធម៌ជាបន្ទាន់ ជុំវិញការព្រួយបារម្ភថាជំហាននោះអាចប៉ះពាល់ដល់កិច្ចចរចារវាងសហរដ្ឋអាមេរិក អេហ្ស៊ីប អ៊ីស្រាអែល និងកាតា ដែលសម្របសម្រួលការផ្អាកនៅក្នុងសង្គ្រាម និងការដោះលែងចំណាប់ថ្នូរ។រហូតមកដល់ពេលនេះ ទីក្រុងវ៉ាស៊ីនតោន មិនពេញចិត្តនឹងបទឈប់បាញ់នៅក្នុងវិធានការណាមួយរបស់អង្គការសហប្រជាជាតិលើសង្គ្រាមអ៊ីស្រាអែល និងក្រុមហាម៉ាសឡើយ ប៉ុន្តែពង្រាងច្បាប់ថ្មីរបស់សហរដ្ឋអាមេរិកនេះបានឆ្លុះបញ្ចាំងពីកិច្ចខិតខំប្រឹងប្រែងក្នុងការសន្ទនារវាងប្រធានាធិបតី ចូ បៃដិន (Joe Biden) កាលពីសប្តាហ៍មុនជាមួយលោកនាយករដ្ឋមន្រ្តីអ៊ីស្រាអែល បេនចាមីន ណេតាន់យ៉ាហ៊ូ (Benjamin Netanyahu)។សេចក្តីព្រាងអត្ថបទរបស់សហរដ្ឋអាមេរិកនេះ «កំណត់ថានៅក្រោមកាលៈទេសៈបច្ចុប្បន្ន ការវាយលុកជើងគោកដ៏ធំមួយទៅលើទីក្រុង រ៉ាហ្វា នឹងបណ្តាលឱ្យមានគ្រោះថ្នាក់បន្ថែមទៀតដល់ជនស៊ីវិល និងការផ្លាស់ទីលំនៅបន្ថែមទៀតរបស់ប្រជាជន រួមទាំងលទ្ធភាពនៃការរាលដាលចូលទៅកាន់ប្រទេសជិតខាងផងដែរ»៕

ឧបនាយករដ្ឋមន្រ្តី ទៀ សីហា វាយតម្លៃខ្ពស់ចំពោះការរួមចំណែករបស់មិត្តហ្វូនដល់ប្រទេសកម្ពុជា

2024/02/20 03:23:56 pm        249
Facebook Telegram Linkin
ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជា ឯកឧត្តម ទៀ សីហា បានវាយតម្លៃខ្ពស់ចំពោះការរួម ចំណែករបស់ក្រុមហ៊ុន វៀតធេលគ្រុប (Viettel Group)ក្រោមស្លាកយីហោ មិត្តហ្វូន ដែលបានរួមចំណែកក្នុងការអភិវឌ្ឍ ដល់ប្រទេសកម្ពុជា ខណៈក្រុមហ៊ុន បាននាំយកសេវាទូរគមនាគមន៍ បច្ចេកវិទ្យាព័ត៌មានទៅកាន់គ្រប់ទីកន្លែង និងបានជួយ លើកកម្ពស់ជីវភាពរស់នៅរបស់ប្រជាជនកម្ពុជាផងដែរនោះ។ក្នុងឱកាសខួប១៥ឆ្នាំ នៃវត្តមានរបស់ក្រុមហ៊ុនទូរស័ព្ទមិត្តហ្វូនជាមួយ នឹងការបើកសម្ពោធបណ្តាញសេវាមិត្តហ្វូន ក្រោមគំនិត «The Met's Sonata» នាល្ងាចថ្ងៃទី ១៩ ខែកុម្ភៈ ឆ្នាំ២០២៤នេះនៅសណ្ឋាគារសុខាភ្នំពេញ ឯកឧត្តម ទៀ សីហា បានវាយតម្លៃខ្ពស់ចំពោះការរួមចំណែករបស់ Viettel Groupចំពោះប្រទេសកម្ពុជានិងបង្ហាញពីបំណងចង់បន្តអភិវឌ្ឍន៍ទំនាក់ទំនងល្អរវាងរដ្ឋាភិបាលកម្ពុជា និងViettel Group ផងដែរ។ ឯកឧត្តមឧបនាយករដ្ឋមន្រ្តី បានបន្ថែមទៀតថាឯកឧត្តម សូមថ្លែងអំណរគុណយ៉ាងស្មោះស្ម័គ្រចំពោះថ្នាក់ដឹកនាំនៃក្រុមហ៊ុនViettel Group ដែលបានដឹកនាំក្រុមហ៊ុនមិត្តហ្វូន បាននាំមកនូវអត្ថប្រយោជន៍ជាច្រើន រួមចំណែកដល់ការអភិវឌ្ឍសេដ្ឋកិច្ច និងសង្គមរបស់ប្រទេសកម្ពុជា។ មិត្តហ្វូន បាននាំយកសេវាទូរគមនាគមន៍ បច្ចេកវិទ្យាព័ត៌មានទៅកាន់គ្រប់ទីកន្លែង និងបានជួយ លើកកម្ពស់ជីវភាពរស់នៅរបស់ប្រជាជនកម្ពុជា។ក្នុងឱកាសនោះដែរ ឯកឧត្តមឧបក៏បានលើកឡើងផងដែរថា នាថ្ងៃអនាគត ឯកឧត្តមសង្ឃឹមថា​ ទំនាក់ទំនងកិច្ចសហប្រតិបត្តិការរវាងរដ្ឋាភិបាលកម្ពុជា និងសមាជិកនៃក្រុមហ៊ុន Viettel Group នឹងបន្តអភិវឌ្ឍយ៉ាងខ្លាំងក្លា និងស៊ីជម្រៅដោយនាំមកនូវផលប្រយោជន៍​កាន់តែច្រើនដល់​ភាគីទាំងពីរ​ និងរួមចំណែកដល់ការអភិវឌ្ឍ​ប្រកបដោយចីរភាពរបស់កម្ពុជាផងដែរ។ ថ្លែងនៅក្នុងពិធីនោះដែរ លោក Tao Duc Thangប្រធាន និងជានាយកប្រតិបត្តិក្រុមហ៊ុន Viettel Group និងមិត្តហ្វូនបានសម្តែងនូវបំណងចង់បន្តរួមដំណើរជាមួយរដ្ឋាភិបាល និង​ប្រជាជនកម្ពុជា​ដើម្បីនាំមកនូវសុភមង្គល និងវិបុលភាពដល់កម្ពុជា។លោកថ្លែងថា«ដោយមានបំណងចង់បន្តរួមចំណែក និងកសាងប្រទេសកម្ពុជា ជួយប្រជាជនកម្ពុជាឱ្យមានជីវភាពកាន់តែប្រសើរឡើង មិត្តហ្វូននឹងចូលរួមយ៉ាងសកម្មក្នុងការអនុវត្តយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា ដែលការសន្យារបស់យើងចាប់ពី១៥ឆ្នាំមុន និងទៅអនាគតនឹងតែងតែមាន។ ដូចជាទស្សនៈវិស័យរបស់យើងតាំងពីដើមគឺ «អ្នកច្នៃប្រឌិត និងយកចិត្តទុកដាក់»។ រាល់ដំណោះស្រាយ រាល់ផលិតផល រាល់សកម្មភាពរបស់មិត្តហ្វូននឹងខិតខំធានាថា គ្មានប្រជាជនកម្ពុជាណាដែលមិនទទួលបានប្រព័ន្ធបច្ចេកវិទ្យាឡើយ។លោកប្រធានក្រុមហ៊ុន បានលើកឡើងទៀតថា ចាប់តាំងពីការបង្កើតឡើងនៅថ្ងៃទី ១៩ ខែកុម្ភៈ ឆ្នាំ ២០០៩ មិត្តហ្វូនបានបន្តយុទ្ធសាស្រ្ត «ហេដ្ឋារចនាសម្ព័ន្ធដំបូង អាជីវកម្មតាមក្រោយ» នាំយកសេវាទូរគមនាគមន៍ទៅកាន់តំបន់ឆ្ងាយបំផុត និងដាច់ស្រយាលបំផុតនៅក្នុងប្រទេសកម្ពុជា។ ការប្រារព្ធពិធីនេះបានបង្ហាញពីដំណើរការរបស់មិត្តហ្វូនដែលបានរួមចំណែកកសាងសេវាទូរគមនាគមន៍របស់ខ្លួននៅទូទាំងប្រទេសកម្ពុជា ដោយផ្តល់សេវាទូរស័ព្ទដល់ទៅ ៩៨% នៃចំនួនប្រជាជន។ក្នុងរយៈពេល១៥ឆ្នាំមកនេះ ព្រះមហាក្សត្រនៃព្រះរាជាណាចក្រកម្ពុជា បានប្រោសព្រះរាជទាន​ព្រះរាជគ្រឿងឥស្សរិយយសមុនីសារាភ័ណ្ឌ មហាសេរីវឌ្ឍន៍ ដល់បុគ្គល និងសមូហភាពដល់ក្រុមហ៊ុន Viettel Groupនិងមិត្តហ្វូនជាការទទួលស្គាល់អំពីការរួមចំណែករបស់​ពួកគេ​ក្នុងរយៈពេល១៥ឆ្នាំកន្លងមក។ បន្ទាប់ពីការអភិវឌ្ឍ​អស់រយៈពេល១៥ឆ្នាំ​មិត្តហ្វូនក៏បានចូលរួមចំណែកយ៉ាងសំខាន់ដល់ ការអភិវឌ្ឍប្រទេសកម្ពុជា និងប្រជាជនរបស់ខ្លួន ដោយជាង១ពាន់លានដុល្លារបានចូលរួមចំណែកក្នុងថវិកាជាតិ និងជាង ១២០ លានដុល្លារអាមេរិក ឧទ្ទិសដល់គំនិតផ្តួចផ្តើមគាំទ្រសហគមន៍ និងសង្គម៕ អត្ថបទបាន ចក់

បណ្ដាញសង្គម

ព័ត៌មានថ្មីៗ

អ៊ីរ៉ង់ ព្រមានសងសឹកកាន់តែខ្លាំង ខណៈមានសេចក្តីរាយការណ៍ថា អ៊ីស្រាអែលត្រៀមវាយប្រហារ
11/12/2026 04:11 PM
Facebook Telegram Linkin
ទីក្រុងឌែលី ទប់ទល់វិបត្តិបំពុលបរិស្ថានខណៈខ្យល់និងទឹកមានសារធាតុពុលបង្កហានិភ័យសុខភាព
11/12/2026 04:11 PM
Facebook Telegram Linkin
មេដឹកនាំ៖ កោះតៃវ៉ាន់ ចូលរួមក្នុងកិច្ចប្រជុំកំពូល APEC នៅប្រទេសចិនដោយឈរលើមូលដ្ឋានសមភាព
11/12/2026 04:11 PM
Facebook Telegram Linkin
ប្រាសាទព្រះវិហារ ប្រាសាទតាមាន់ និងប្រាសាទតាក្របី ត្រូវបានរៀបចំដាក់តាំងបង្ហាញនៅ «ភូមិហ្រ្វង់កូហ្វូនី» ដើម្បីបង្ហាញឱ្យថ្នាក់ដឹកនាំ និងភ្ញៀវអន្តរជាតិទស្សនា
11/12/2026 04:11 PM
Facebook Telegram Linkin
លោក Xi បញ្ជាក់​ថា ការបង្រួបបង្រួមតៃវ៉ាន់វិញ​ ត្រូវតែកើត​ឡើង​ ដ្បិត​ប្រវត្តិសាស្ត្រមិនអាចបញ្ឈប់បាន​ឡើយ
11/12/2026 04:11 PM
Facebook Telegram Linkin
កូរ៉េខាងត្បូងឃើញលទ្ធភាពតិចតួចនៃការ​មាន​ទំនាក់ទំនង រវាងអាមេរិក និងកូរ៉េខាងជើង នៅ​ APEC
11/12/2026 04:11 PM
Facebook Telegram Linkin
អង្គការ MSF៖ ការផ្ទុះ​ជំងឺអេបូឡា នៅកុងហ្គោ នៅតែមិនអាចគ្រប់គ្រងបាន​ ក្រោយ​រយៈពេល ៦ខែ
11/12/2026 04:11 PM
Facebook Telegram Linkin
ក្រុមលោក Eisenkot គ្រោងលុបចោលច្បាប់ចំនួន ៥ សម័យលោក Netanyahu មុនបង្កើត​រដ្ឋាភិបាលអ៊ីស្រាអែលថ្មី​
11/12/2026 03:11 PM
Facebook Telegram Linkin
ប្រមុខ​សន្តិសុខអ៊ីរ៉ង់ គំរាមវាយប្រហារមូលដ្ឋានទ័ពអាមេរិក នៅអឺរ៉ុប បើត្រូវបានប្រើសម្រាប់ប្រតិបត្តិ​ការ
11/12/2026 03:11 PM
Facebook Telegram Linkin
នគរបាលចាប់អនុវត្តបញ្ចៀសចរាចរណ៍រថយន្តធុនធ្ងន់ លើកំណាត់ផ្លូវ៦០ម៉ែត្រ ដើម្បី​ធានា​សន្តិសុខ ជូនគណៈប្រតិភូអន្តរជាតិ
11/12/2026 03:11 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.