នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
កម្ពុជា-រវ៉ាន់ដា ឯកភាពពង្រឹង និងពង្រីកកិច្ចសហប្រតិបត្តិការទ្វេភាគីឱ្យកាន់តែទូលំទូលាយ​
សម្តេចធិបតី នាយករដ្ឋមន្ត្រី ទទួលជួបពិភាក្សាការងារទ្វេភាគី ជាមួយឯកឧត្តមប្រធានាធិបតីរវ៉ាន់ដា
ប្រធានាធិបតី រវ៉ាន់ដា មើលឃើញថា ប្រទេសកម្ពុជាជាប្រទេសមួយដ៏អស្ចារ្យ មានការអភិវឌ្ឍយ៉ាងខ្លាំង
សម្ដេចអគ្គមហាសេនាបតីតេជោ ហ៊ុន សែន អញ្ជើញដង្ហែព្រះមហាក្សត្រ ក្នុងព្រះរាជពិធីពន្លត់ទៀនជ័យ នៃទិវាបុណ្យឯករាជ្យជាតិ ៩ វិច្ឆិកា ខួបលើកទី៧៣

នយោបាយ​ និង ការអភិវឌ្ឍន៍

ចិន និងជប៉ុន ស្តីបន្ទោសគ្នាទៅវិញទៅមក ចំពោះការប្រឈមមុខដាក់គ្នានៅជិតកោះជម្លោះ

2023/12/11 06:36:41 pm        126
Facebook Telegram Linkin
ចិន និងជប៉ុន បានចោទប្រកាន់គ្នាទៅវិញទៅមកអំពីការលុកលុយដែនសមុទ្របន្ទាប់ពីការប្រឈមមុខដាក់គ្នារវាងឆ្មាំល្បាតឆ្នេររបស់ពួកគេនៅក្នុងដែនទឹកជុំវិញកោះដែលមានជម្លោះនៅសមុទ្រចិនខាងកើត។ ឆ្មាំល្បាតឆ្នេររបស់ប្រទេសចិនបាននិយាយកាលពីថ្ងៃអាទិត្យ (១០ ធ្នូ) ថាទូកនេសាទរបស់ជប៉ុន និងនាវាល្បាតជាច្រើនគ្រឿងកាលពីថ្ងៃមុននោះ បានចូលចូលទៅក្នុងទឹកជុំវិញប្រជុំកោះតូចៗដែលមានឈ្មោះថា តាវយ៉ូ (Diaoyu) ក្នុងប្រទេសចិន និងឈ្មោះថា សេនកាគូ (Senkaku) ក្នុងប្រទេសជប៉ុន។ប្រជុំកោះដែលគ្មានមនុស្សរស់នៅនេះត្រូវបានគ្រប់គ្រងដោយប្រទេសជប៉ុន ប៉ុន្តែក៏ទាមទារសិទ្ធដោយប្រទេសចិនផងដែរ។ ឆ្មាំល្បាតឆ្នេររបស់ប្រទេសចិនបាននិយាយនៅក្នុងសេចក្តីថ្លែងការណ៍មួយថា ខ្លួនបានចាត់វិធានការចាំបាច់ស្របតាមច្បាប់ដើម្បីព្រមាននាវាជប៉ុន។ឆ្មាំឆ្នេរសមុទ្ររបស់ប្រទេសជប៉ុនបាននិយាយកាលពីថ្ងៃសៅរ៍ថា នាវាល្បាតដែនសមុទ្ររបស់ចិនពីរគ្រឿងបានចាកចេញពីដែនទឹករបស់ប្រទេសជប៉ុន ជុំវិញប្រជុំកោះនោះបន្ទាប់ពីទទួលបានការព្រមាន។ អង្គភាពនេះបាននិយាយទៀតថា នាវាល្បាតរបស់ខ្លួនកំពុងការពារទូកនេសាទជប៉ុន ដែលត្រូវបាននាវាចិនចូលទៅជិត។ជម្លោះដែនសមុទ្រអាស៊ីដែលពាក់ព័ន្ធនឹងចិនបាននិងកំពុងកើនឡើងយ៉ាងខ្លាំង ខណៈប្រទេសចិន និងហ្វីលីពីន បានធ្វើការចោទប្រកាន់កាលពីថ្ងៃអាទិត្យជុំវិញការប៉ះទង្គិចគ្នារវាងនាវារបស់ពួកគេនៅក្នុងផ្នែកមួយនៃសមុទ្រចិនខាងត្បូង ដែលប្រទេសនីមួយៗអះអាងថាជាការប្រឈមមុខគ្នាលើកទីពីរក្នុងរយៈពេលជាច្រើនថ្ងៃមកនេះ៕

អ៊ុយក្រែនបញ្ជូនរថយន្តដឹកទំនិញដែលប្រើក្នុងការតវ៉ាទៅប៉ូឡូញ តាមផ្លូវដែកតាមព្រំដែនដែលបានបិទ

2023/12/11 06:31:02 pm        169
Facebook Telegram Linkin
អង្គភាពផ្លូវរថភ្លើងរដ្ឋអ៊ុយក្រែន អ៊ុយហ្សាលីសនីសា (Ukrzaliznytsia) បាននិយាយកាលពីថ្ងៃអាទិត្យ (១០ ធ្នូ) ថាប្រទេសអ៊ុយក្រែន បានដឹកជញ្ជូនរថយន្តដឹកទំនិញលើកដំបូងដែលដាក់រារាំងផ្លូវក្នុងការតវ៉ា ទៅកាន់ប្រទេសប៉ូឡូញ តាមផ្លូវដែកដោយឆ្លងកាត់ព្រំដែនដីដែលបានបិទរវាងប្រទេសទាំងពីរដោយអ្នកបើកបរជនជាតិប៉ូឡូញ។ការតវ៉ាដោយអ្នកដឹកទំនិញប៉ូឡូញ បានចាប់ផ្តើមកាលពីខែមុនប្រឆាំងនឹងលក្ខខណ្ឌនៃការចូលប្រើរបស់សហភាពអឺរ៉ុបសម្រាប់រថយន្តដឹកទំនិញអ៊ុយក្រែន។ ពួកគេបានបិទច្រករបៀងផ្លូវធំចូលទៅក្នុងប្រទេសអ៊ុយក្រែន ដែលនាំឱ្យតម្លៃប្រេងឥន្ធនៈ និងអាហារមួយចំនួនកាន់តែខ្ពស់ ក៏ដូចជាការពន្យារពេលក្នុងការបញ្ជូនយានដ្រូនទៅឱ្យកងទ័ពអ៊ុយក្រែន។អាជ្ញាធរអ៊ុយក្រែនបាននិយាយថា រថយន្តដឹកទំនិញប្រហែល ៣.៥០០គ្រឿង ត្រូវបានរារាំងនៅផ្នែកខាងប៉ូឡូញនៃព្រំដែនប៉ូឡូញ-អ៊ុយក្រែន គិតត្រឹមព្រឹកថ្ងៃអាទិត្យ ហើយរហូតមកដល់ពេលនេះអាជ្ញាធរមិនទាន់អាចឈានដល់កិច្ចព្រមព្រៀងជាមួយក្រុមបាតុករដើម្បីបញ្ឈប់សកម្មភាពនោះទេ។ តម្រូវការចម្បងរបស់ក្រុមបាតុករដឹកជញ្ជូនប៉ូឡូញទាំងនោះ គឺបញ្ឈប់អ្នកដឹកទំនិញអ៊ុយក្រែនពីការមានសិទ្ធិចូលសហភាពអឺរ៉ុបដោយមិនមានការអនុញ្ញាតជាអ្វីដែលទីក្រុងគីវ និងទីក្រុងព្រុចស៊ែល និយាយថាមិនអាចចរចារបានឡើយ៕

ជនជាតិរុស្ស៊ីដែលហាមប្រាមមិនអោយធ្វើដំណើរ នឹងត្រូវប្រគល់លិខិតឆ្លងដែនឲ្យអាជ្ញាធរក្នុងពេលប្រាំថ្ងៃ

2023/12/11 06:27:42 pm        160
Facebook Telegram Linkin
យោងតាមក្រឹត្យរបស់រដ្ឋាភិបាលរុស្ស៊ីដែលចូលជាធរមាននៅថ្ងៃច័ន្ទ (១១ ធ្នូ) នេះបានឲ្យដឹងថា ប្រជាជនរុស្ស៊ីដែលត្រូវបានហាមឃាត់មិនឱ្យធ្វើដំណើរទៅក្រៅប្រទេស នឹងត្រូវប្រគល់លិខិតឆ្លងដែនរបស់ពួកគេទៅឱ្យអាជ្ញាធរក្នុងរយៈពេលប្រាំថ្ងៃបន្ទាប់ពីការជូនដំណឹង។យោងទៅតាមច្បាប់របស់រុស្ស៊ី អាជ្ញាធរអាចដាក់បម្រាមធ្វើដំណើរលើទាហាន បុគ្គលិកនៃសេវាសន្តិសុខសហព័ន្ធ (FSB) ទណ្ឌិត ឬមនុស្សដែលមានសិទ្ធិទទួលបានព័ត៌មានសម្ងាត់របស់រដ្ឋ ឬ «ព័ត៌មាននៃសារៈសំខាន់ពិសេស» ក្នុងចំណោមករណីដទៃទៀត។លិខិតឆ្លងដែនដែលប្រគល់មកវិញនឹងត្រូវរក្សាទុកដោយអាជ្ញាធរដែលបានចេញលិខិតនោះ ដូចជាក្រសួងមហាផ្ទៃ ឬអាជ្ញាធរក្រសួងការបរទេសជាដើម។ បន្ទាប់ពីការហាមឃាត់ការធ្វើដំណើរត្រូវបានដកចេញ លិខិតឆ្លងដែនអាចត្រូវបានប្រគល់ជូនវិញនៅពេលពាក្យស្នើសុំត្រូវបានបំពេញ នេះបើយោងតាមក្រឹត្យរបស់រដ្ឋាភិបាល។សេចក្ដីសម្រេចនោះបាននិយាយថា ជនជាតិរុស្ស៊ីដែលសិទ្ធិធ្វើដំណើររបស់ពួកគេត្រូវបានកំណត់ជាបណ្ដោះអាសន្នលើមូលដ្ឋាននៃការចុះឈ្មោះសម្រាប់សេវាកម្មយោធា ឬស៊ីវិល នឹងត្រូវផ្តល់បន្ថែមនូវអត្តសញ្ញាណប័ណ្ណយោធាជាមួយនឹងភស្តុតាងថាពួកគេបានបញ្ចប់កាតព្វកិច្ចរួចរាល់៕

លោក Zelenskyy នឹងជួបលោក Biden នៅសេតវិមាន ខណៈព្យាយាមជំរុញឲ្យសភាអាមេរិក អនុម័តជំនួយយោធាបន្ថែម

2023/12/11 06:21:44 pm        153
Facebook Telegram Linkin
លោកប្រធានាធិបតីអាមេរិក Joe Biden និងមេដឹកនាំអ៊ុយក្រែន លោក Volodymyr Zelenskyy នឹងជួបគ្នានៅសេតវិមាននៅថ្ងៃអង្គារស្អែកនេះ ខណៈរដ្ឋបាលអាមេរិក បង្កើនសម្ពាធលើសភាឲ្យផ្ដល់ជំនួយរាប់ពាន់លានដល់ក្រុងគីវ (Kyiv) ក្នុងសង្រ្គាមជាមួយរុស្ស៊ី។ សេតវិមានបាននិយាយនៅក្នុងសេចក្ដីថ្លែងការណ៍មួយកាលពីថ្ងៃអាទិត្យថា ដំណើរទស្សកិច្ចនេះ ក្នុងបំណងបញ្ជាក់ការប្ដេជ្ញាចិត្តឥតបែកបែររបស់សហរដ្ឋអាមេរិកក្នុងការគាំទ្រប្រជាជនអ៊ុយក្រែន ខណៈពួកគេការពារប្រឆាំងការវាយលុកដ៏ព្រៃផ្សៃរបស់រុស្ស៊ី។ ស្របពេលដែលរុស្ស៊ី បង្កើនការវាយប្រហារដោយមីស៊ីល និងយានដ្រូនដាក់គោលដៅលើអ៊ុយក្រែន មេដឹកនាំទាំង២ នឹងពិភាក្សាពី តម្រូវការបន្ទាន់របស់អ៊ុយក្រែន និង សារៈសំខាន់របស់សហរដ្ឋអាមេរិកក្នុងការបន្តគាំទ្រនៅក្នុងពេលវេលាដ៏យ៉ាប់យ៉ឺននេះ។ការិយាល័យរបស់លោក Zelenskyy បានបញ្ជាក់ថា លោកបានទទួលការអញ្ជើញរបស់លោក Biden ។ លោកក៏ត្រូវបានស្នើឲ្យថ្លែងទៅកាន់កិច្ចប្រជុំនៃសមាជិកព្រឹទ្ធសភាទាំងអស់ ផងដែរ។ លោក Biden បានស្នើទៅសភានូវកញ្ចប់ជំនួយសម្រាប់សង្រ្គាមចំនួន១១០ពាន់លានដុល្លារអាមេរិក ក្នុងនោះឲ្យទៅអ៊ុយក្រែន និង អ៊ីស្រាអែលចំនួន ៦១,៤ពាន់លានដុល្លារអាមេរិក រួមទាំងកិច្ចការអាទិភាពសម្រាប់សន្តិសុខជាតិផ្សេងទៀត។ ប៉ុន្តែសំណើនេះ ត្រូវបានជាប់គាំង នៅក្នុងការពិភាក្សាដេញដោលជុំវិញគោលនយោបាយអន្តោប្រវេសន៍ និងសន្តិសុខព្រំដែនរបស់សហរដ្ឋអាមេរិក ៕

ទីប្រឹក្សាសន្តិសុខជាតិ៖ អ៊ីស្រាអែលត្រៀមខ្លួន ដើម្បីធ្វើសកម្មភាពប្រឆាំងនឹងក្រុមឧទ្ទាមហ៊ូធី ប្រសិនបើ សហគមន៍អន្តរជាតិ បរាជ័យ

2023/12/11 06:00:26 pm        144
Facebook Telegram Linkin
ទីប្រឹក្សាសន្តិសុខជាតិអ៊ីស្រាអែល លោក Tzachi Hanegbi បានថ្លែង កាលពីថ្ងៃសៅរ៍ថា អ៊ីស្រាអ៊ែល ត្រៀមខ្លួន ដើម្បីធ្វើសកម្មភាពប្រឆាំងនឹងកិច្ចខិតខំប្រឹងប្រែងរបស់ក្រុមឧទ្ទាមហ៊ូធី នៅក្នុងប្រទេសយេម៉ែន ដើម្បីរំខានដល់ការដឹកជញ្ជូនទំនិញ នៅក្នុងសមុទ្រក្រហម ប្រសិនបើសហគមន៍អន្តរជាតិ បរាជ័យ។ លោក Hanegbi បានថ្លែងប្រាប់ទូរទស្សន៍ Channel 12 របស់អ៊ីស្រាអែលថា នាយករដ្ឋមន្ត្រីអ៊ីស្រាអែល លោក បេនចាមីន ណេតានីយ៉ាហ៊ូ (Benjamin Netanyahu) បាននិយាយជាមួយប្រធានាធិបតីអាមេរិក ចូ បៃដិន ក៏ដូចជាមេដឹកនាំអឺរ៉ុបអំពីក្រុមហ៊ូធី ដែលកំណត់គោលដៅលើនាវាពាណិជ្ជកម្ម ដែលមានទំនាក់ទំនងរបស់អ៊ីស្រាអែល។ លោក Hanegbi បាននិយាយថា៖«អ៊ីស្រាអែល កំពុងផ្តល់ពេលវេលាដល់ពិភពលោក ដើម្បីរៀបចំដើម្បីទប់ស្កាត់បញ្ហានេះ ប៉ុន្តែប្រសិនបើ មិនមានការរៀបចំជាសកលទេ ព្រោះវាជាបញ្ហាសកល យើងនឹងចាត់វិធានការ ដើម្បីលុបបំបាត់ការឡោមព័ទ្ធរបស់កងទ័ពជើងទឹកនេះ»។ក្រុមឧទ្ទាមហ៊ូធី ដែលគាំទ្រដោយអ៊ីរ៉ង់នៅយេម៉ែន គឺជាអង្គការនយោបាយ និងយោធាអ៊ីស្លាម Shia ដែលបាននិងកំពុងប្រយុទ្ធនឹងសង្រ្គាមស៊ីវិលប្រឆាំងនឹងក្រុមចម្រុះដែលគាំទ្រដោយអារ៉ាប៊ីសាអ៊ូឌីត ចាប់តាំងពីឆ្នាំ ២០១៤។មានការកើនឡើងនូវសកម្មភាពដែនសមុទ្ររបស់ពួកគេ ចាប់តាំងពីការវាយប្រហាររបស់ក្រុមហាម៉ាសលើអ៊ីស្រាអែលកាលពីថ្ងៃទី៧ ខែតុលា ហើយក្រុមនេះ បាននិយាយថា នាវាណាមួយដែលធ្វើដំណើរទៅកាន់ប្រទេសអ៊ីស្រាអែល គឺជា«គោលដៅស្របច្បាប់» ។

គណបក្សប្រជាជនកម្ពុជា អំពាវនាវយ៉ាងទទូច​ដល់បណ្តាភាគីកំពុងមានជម្លោះព្យាយាមរកដំណោះស្រាយគ្នាដោយសន្តិវិធី

2023/12/11 05:44:23 pm        144
Facebook Telegram Linkin
គណបក្សប្រជាជនកម្ពុជា បានអំពាវនាវយ៉ាង​ទទូច ដល់បណ្តារដ្ឋ និងភាគីដែលពាក់ព័ន្ធ និងជម្លោះនៅ តាមតំបន់នានា គប្បី​ព្យាយាមរកដំណោះស្រាយគ្នាដោយសន្តិវិធី ដើម្បីធានានូវសុខសន្តិភាព ភាតរភាព និងអភិវឌ្ឍន៍​ភាពជាសកលជាដើម។ការអំពាវនាវរបស់គណបក្សប្រជាជនកម្ពុជានេះ គឺបានធ្វើឡើងនៅក្នុងមហាសន្និបាតវិសាមញ្ញ ទូទាំងប្រទេសរបស់ខ្លួនរយៈពេលពីរថ្ងៃគឺចាប់ពីថ្ងៃទី៩ដល់ថ្ងៃទី១០ ខែធ្នូ ឆ្នាំ២០២៣នេះ នៅវិមាន៧មករា ​រាជធានីភ្នំពេញ ​ក្រោមអធិបតីភាពសម្តេចតេជោ ​ហ៊ុន សែន ប្រធានគណបក្ស​ប្រជាជន​កម្ពុជា និងសម្តេច ហេង សំរិន ប្រធានកិត្តិយសគណកប្សប្រជាជនកម្ពុជា។យោងតាមសេចក្តីសម្រេចចិត្តនៃមហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជា នាថ្ងៃទី៩-១០ ខែធ្នូ ឆ្នាំ២០២៣នេះ ​បានលើកឡើងថា នៅក្នុងមហាសន្និបាត​គណបក្ស​ប្រជាជនកម្ពុជា បានបញ្ជាក់ជំហររបស់ខ្លួន ក្នុងការជំរុញអនុវត្តយ៉ាងសកម្មនូវនយោបាយ​ការ​បរទេសឯក រាជ្យដោយផ្អែកលើច្បាប់ លើ​មូលដ្ឋាន​គោរពគោលការណ៍នានា​នៃធម្មនុញ្ញរបស់អង្គការ​សហប្រជាជាតិ​ និងធម្មនុញ្ញអាស៊ាន​ ដើម្បីការពាររាល់ផលប្រយោជន៍គោលរបស់កម្ពុជា និង​បង្កើនការចូលរួមសកម្មក្នុង កិច្ចការអន្តរជាតិ ​ដើម្បបុព្វហេតុសន្តិភាព ​សន្តិសុខ សហប្រតិបត្តិការ និងវិបុលភាពរបស់តំបន់ និងពិភព លោកជាដើម។មហាសន្និបាតលើកឡើងទៀតថា ​ព្រមជាមួយនេះ«ក្នុងស្ថានភាពដែលសភាពការណ៍អន្តរជាតិ​កំពុង​មាន​ការវិវត្ត​ដ៏​ស្មុគស្មាញ ពិបាក​ប៉ាន់ស្មាន ​និងប្រកបដោយគ្រោះថ្នាក់នោះ គណបក្សប្រជាជន​កម្ពុជា សូមអំពាវនាវដល់បណ្តារដ្ឋ ​និងភាគីដែលពាក់ព័ន្ធនឹងជម្លោះនៅតាមតំបន់នានា សូម​ព្យាយាមរកដំណោះ ស្រាយដោយសន្តិវិធីតាមរយៈការ​ចចារ ដើម្បីធានានូវសុខសន្តិភាព​ ភាតរភាព និងអភិវឌ្ឍន៍ភាពជាសកល»។តាមរយៈសេចក្តីសម្រេចរបស់មហាសន្និបាតក៏បានលើកឡើងផងដែរថា ​កម្ពុជាដែលធ្លាប់ឆ្លងកាត់ មហាវិនាសកម្មនៃសង្រ្គាមដ៏រ៉ាំរ៉ៃ ​យល់យ៉ាងច្បាស់អំពីតម្លៃនៃសន្តិភាព បើប្រជាជនបាត់បង់​សន្តិភាពហើយ​ ប្រជាជននឹងត្រូវបាត់បង់​អ្វីទាំងអស់ ​ហើយសន្តិភាពមិនអាចនឹង​បង្កើតបាន​ដោយសង្រ្គាមឡើយ៕អត្ថបទ បាន ចក់

គណបក្សប្រជាជនកម្ពុជា អះអាងជាថ្មីក្នុងការប្តេជ្ញាចិត្តការពាររបបរាជានិយម ដោយមិនអនុញ្ញាតឲ្យជនណាមកបំពានបានឡើយ

2023/12/11 04:59:44 pm        183
Facebook Telegram Linkin
នៅក្នុងមហាសន្និបាតវិសាមញ្ញរបស់ខ្លួន គណបក្សប្រជាជនកម្ពុជា បានបញ្ជាក់អះអាងជាថ្មី​ក្នុងការប្តេជ្ញាចិត្តការពាររបបរាជានិយម​រាជបល្ល័ង្ក ការពារលទ្ធិប្រជាធិបតេយ្យ សេរីពហុបក្ស ការពារខឿនការពារជាតិ ​ការពារបូរណភាពទឹកដី និងកម្ចាត់​ក្រុមនយោបាយជ្រុលនិយមគ្រប់រូបភាព​ទាំងអស់។យោងតាមសេចក្តីសម្រេចចិត្តនៃមហាសន្និបាតវិសាមញ្ញតំណាងទូទាំងប្រទេសរបស់​គណបក្ស​ប្រជាជនកម្ពុជា ​នាថ្ងៃទី៩-១០ ខែធ្នូ ឆ្នាំ២០២៣នេះ ​បានលើកឡើងថា ​មហាសន្និបាត បាន​ពិនិត្យពិភាក្សា យ៉ាងល្អិតល្អនអំពីបញ្ហាប្រឈមនានា​នៅក្នុងដំណើរការអភិវឌ្ឍ​ប្រទេសជាតិ ទាំង​កត្តាខាងក្នុង ទាំងកត្តា ខាងក្រៅ ​ហើយបានធ្វើស្វ័យត្រួតពិនិត្យចំពោះចំណុចខ្វះខាតផ្សេងៗ ក្នុងការ​អនុវត្តគោលនយោបាយ ក៏ដូចក្នុងការកសាងពង្រឹងគណបក្ស និងបានដាក់ចេញនូវទិសដៅ​ការងារសំខាន់ៗ ដែលត្រូវពុះពារអនុវត្ត ឲ្យបានសម្រេចរួមមាន៖ «ពង្រឹងខឿនការពារជាតិ ថែរក្សា​សន្តិភាព និងស្ថិរភាពនយោបាយ ​មិនឲ្យកម្លាំងណាមកបំផ្លាញ ​បានឡើយ លប់បំបាត់នយោបាយ​ជ្រុលនិយមគ្រប់រូបភាព ពង្រឹងសន្តិសុខសណ្តាប់ធ្នាប់ ​និងសុវត្ថិភាព សង្គម ផ្តល់ភាពកក់ក្តៅជូន​ប្រជាពលរដ្ឋរស់នៅប្រកបដោយភាពសុខសាន្ត​ទាំងផ្លូវកាយ​ និងផ្លូវចិត្ត។ ការ ពាររបបរាជានិយម​អាស្រ័យ​ធម្មនុញ្ញ ការពារ​រាជបល្ល័ង្ក​ និងការពារព្រះមហាក្សត្រជាទីសក្ការៈដ៏ខ្ពង់ខ្ពស់​បំផុត​មិនឲ្យជនណាមកបំពានបានឡើយ»។តាមសេចក្តីសម្រេចចិត្តរបស់មហាសន្និបាតនេះ ​គណបក្សប្រជាជនកម្ពុជា ក៏បានប្រកាសបន្តពង្រឹង​លទ្ធិប្រជាធិបតេយ្យ សេរីពហុបក្ស ​និងលើកកម្ពស់ការគោរពសិទ្ធិមនុស្សតាមគន្លងនីតិរដ្ឋ។ ​ចូលរួម សកម្មក្នុងការ​បោះឆ្នោតជ្រើសតាំងសមាជិកព្រឹទ្ធសភា ​នីតិកាលទី៥ និង​ការបោះឆ្នោតជ្រើសរើស​ក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ ​ដោយគោរព​ម៉ឺងម៉ាត់​តាមច្បាប់​ បទបញ្ជា និងនីតិវិធី ​នៃការបោះឆ្នោតផងដែរ។តាមរយៈមហាសន្និបាតនេះដែរ គណបក្សប្រជាជនកម្ពុជា ​ក៏បានអំពាវនាវដល់បងប្អូនជនរួមជាតិ គ្រប់ទិសទី ​សូមបន្តរួមសាមគ្គីគ្នាជាធ្លុងមួយនៅក្រោមដំបូលរដ្ឋធម្មនុញ្ញ និងម្លប់ដ៏ត្រជាក់​នៃអង្គព្រះមហាក្សត្រ​ជាទីសក្ការៈដ៏ខ្ពង់ខ្ពស់បំផុត ​និងរួមសាមគ្គីជុំវិញរាជរដ្ឋាភិបាល នីតិកាលទី៧ នៃរដ្ឋសភា ដើម្បីថែរក្សា សន្តិភាព ពង្រឹងលទ្ធិប្រជាធិបតេយ្យ និងបង្កើតសមិទ្ធផលធំៗទៀត​ក្នុងការអភិវឌ្ឍ​មាតុភូមិកម្ពុជាឲ្យកាន់ តែរីកចម្រើនបន្ថែមទៀត៕អត្ថបទ៖ បាន ចក់

មហាសន្និបាតរបស់គណបក្សប្រជាជនលើកទី៤៤ ប្រកាសគាំទ្រពេញទំហឹងរាជរដ្ឋាភិបាលនីតិកាលទី៧

2023/12/11 04:46:32 pm        167
Facebook Telegram Linkin
នៅក្នុងមហាសន្និបាតវិសាមញ្ញទូទាំងប្រទេសលើកទី៤៤របស់ខ្លួន ដែលបានប្រព្រឹត្តទៅ នាថ្ងៃទី៩ ដល់ថ្ងៃទី១០ ខែធ្នូ ឆ្នាំ២០២៣នេះ គណបក្សប្រជាជនកម្ពុជា បានប្រកាសគាំទ្រ​យ៉ាងពេញ​ទំហឹង រាជរដ្ឋាភិបាលនីតិកាលទី៧ នៃរដ្ឋសភា ដែលដឹកនាំ​ដោយ​សម្តេចធិបតី ហ៊ុន ម៉ាណែត ហើយអង្គសន្និបាតក៏បានវាយតម្លៃខ្ពស់ចំពោះលទ្ធផលការងាររបស់រាជរដ្ឋាភិបាលសម្រេច បាន​លទ្ធផលល្អប្រកបដោយមោទនៈផងដែរ ​ខណៈការដឹកនាំទើបតែបានក្នុងរយៈពេលខ្លីនោះ។យោងតាមសេចក្តីសម្រេចចិត្តនៃមហាសន្និបាតវិសាមញ្ញតំណាងទូទាំង​ប្រទេស​របស់​គណបក្ស​ប្រជាជនកម្ពុជា ​នាថ្ងៃទី៩-១០ ខែធ្នូ ឆ្នាំ២០២៣នេះ ​បានលើកឡើងថា ​មហាសន្និបាត គាំទ្រ​ពេញ​ទំហឹងចំបោះរាជរដ្ឋាភិបាលនីតិកាលទី៧ ​នៃរដ្ឋសភា​ ដើម្បីអនុវត្តដោយជោគជ័យ នូវ​កម្មវិធីនយោបាយ​ និងយុទ្ធសាស្រ្តបច្ចកោណ ​ដំណាក់កាលទី១​ ដើម្បីកំណើនការងារ សមធម៌ ប្រសិទ្ធភាព ​និងចីរភាព ​ដែលមានការ ​កែទម្រង់ ​និងការពង្រឹងអភិបាលកិច្ចជាស្នូល ដោយ​កំណត់​អាទិភាពជាគន្លឹះ ចំនួន៥ គឺ«មនុស្ស ផ្លូវ ទឹក ភ្លើង និង​បច្ចេកវិទ្យា» ​សំដៅការពារថែរក្សា ពូនជ្រំ​សមិទ្ធផល​ជាតិ ​ជំរុញ​សន្ទុះកំណើន​សេដ្ឋកិច្ច ​ធ្វើ​ឲ្យប្រទេសកម្ពុជា​ប្រែក្លាយ​ជាប្រទេសមានចំណូល​មធ្យម​កម្រិត​ខ្ពស់​ឆ្នាំ២០៣០​ និងកសាងមូលដ្ឋានឆ្ពោះទៅ ​សម្រេច​ចក្ខុវិស័យកម្ពុជា ឆ្នាំ២០៥០ ប្រែក្លាយជាប្រទេសមានចំណូលកម្រិតខ្ពស់។តាមសេចក្តីសម្រេចចិត្តរបស់​អង្គសន្និបាត ​ក៏បានលើកឡើងផងដែរថា ​«មហាសន្និបាតបានវាយ តម្លៃខ្ពស់​ចំពោះ​លទ្ធផល​ការងាររបស់រាជរដ្ឋាភិបាល ​ដែលក្នុងរយៈពេលដ៏ខ្លីនៃការកាន់​តំណែង​របស់ខ្លួន​ បានសម្រេចលទ្ធផលជាច្រើនប្រកបដោយមោទនភាព​ ក្នុងការថែរក្សាស្ថិរភាព​ សន្តិសុខ និង​សណ្តាប់ធ្នាប់ ​សាធារណៈ ការជំរុញកំណើនសេដ្ឋកិច្ច​ និងដោះស្រាយបញ្ហាជីវភាពរបស់​ប្រជាជន ​ជាពិសេសការដាក់ឲ្យ ​អនុវត្តវិធានការគន្លឹះទាំង៥ ចំណុចដែល​ផ្តោត​លើការពង្រឹង​សមត្ថភាព​រដ្ឋបាលសាធារណៈ, ​ការលើក កម្ពស់គុណភាពអប់រំ, ការលើកកម្ពស់គុណភាពសេវា​សុខាភិបាល, ការពង្រឹងការអនុវត្តគោលនយោបាយ ភូមិ ឃុំ-សង្កាត់មានសុវត្ថិភាព, និងការពង្រឹង និង​ការលើកកម្ពស់គុណភាព និងប្រសិទ្ធភាពប្រព័ន្ធយុត្តិធម៌។ ​លើមូលដ្ឋានតថភាពនេះ បាន​ឆ្លុះបញ្ចាំង​ឲ្យឃើញច្បាស់អំពីការគិតគូរជាយុទ្ធសាស្រ្ត​ដ៏ត្រឹមត្រូវ របស់គណបក្ស​ក្នុងការរៀបចំ​កម្លាំងបន្តវេនដើម្បីដឹកនាំប្រទេសជាតិតទៅមុខទៀត៕ អត្ថបទ៖ បាន ចក់

សម្តេចធិបតី ហ៊ុន ម៉ាណែត អញ្ជើញទៅបំពេញទស្សនកិច្ចផ្លូវការ នៅសាធារណរដ្ឋសង្គមនិយមវៀតណាម

2023/12/11 03:25:55 pm        299
Facebook Telegram Linkin
តបតាមការអញ្ជើញរបស់ ឯកឧត្តម ផាម មិញ ជិញ (PHAM Minh Chinh) នាយករដ្ឋមន្ត្រី នៃសាធារណរដ្ឋសង្គមនិយមវៀតណាម សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃ ព្រះរាជាណាចក្រកម្ពុជា បានអញ្ជើញទៅបំពេញទស្សនកិច្ចផ្លូវការនៅសាធារណរដ្ឋសង្គមនិយម វៀតណាម នៅថ្ងៃទី ១១-១២ ខែធ្នូ ឆ្នាំ២០២៣។អញ្ជើញអមដំណើរ សម្តេចធិបតី រួមមាន ឯកឧត្តមឧបនាយករដ្ឋមន្ត្រី ស៊ុន ចាន់ថុល អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា ឯកឧត្តមឧបនាយករដ្ឋមន្ត្រី សុខ ចិន្តាសោភា រដ្ឋមន្ត្រីការបរទេស និងសហប្រតិបត្តិការអន្តរជាតិ រដ្ឋមន្ត្រី និងមន្ត្រីសំខាន់ៗ នៃរាជរដ្ឋាភិបាល ព្រមទាំងថ្នាក់ដឹកនាំវិស័យឯកជននៃសភាពាណិជ្ជកម្មកម្ពុជា។ឯកឧត្តម មាស សុភ័ណ្ឌ ប្រធានក្រុមអ្នកនាំពាក្យនាយករដ្ឋមន្ត្រីបានប្រាប់ដល់ក្រុមអ្នកសារព័ត៌មានថា៖សម្តេចធិបតី ហ៊ុន ម៉ាណែត និង ឯកឧត្តមនាយករដ្ឋមន្ត្រី ផាម មិញ ជិញ នឹងជួបប្រជុំ ទ្វេភាគី ក្នុងគោលបំណងបន្តពង្រឹង និងពង្រីកបន្ថែមទៀតនូវកិច្ចសហប្រតិបត្តិការលើវិស័យជាច្រើន។ដំណើរទស្សនកិច្ចផ្លូវការរបស់ សម្តេចធិបតី ទៅកាន់ប្រទេសវៀតណាមនាពេលនេះ បានបង្ហាញពីការធ្វើឱ្យកាន់តែស៊ីជម្រៅនូវទំនាក់ទំនងដ៏យូរអង្វែង ឈរលើស្មារតី «ភាពជាអ្នកជិត ខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងស្ថិរភាពយូរអង្វែង» រវាង កម្ពុជា និងវៀតណាម ដើម្បីផលប្រយោជន៍ទៅវិញទៅមកសម្រាប់ប្រជាជននៃប្រជាជាតិទាំងពីរ។សម្តេចធិបតីនឹងដឹកនាំប្រតិភូជាន់ខ្ពស់នៃរាជរដ្ឋាភិបាលធ្វើមាតុភូមិនិវត្តវិញនៅប្រមាណម៉ោង៧យប់ថ្ងៃទី១២ធ្នូស្អែកនេះ។

ខេត្តព្រះវិហារប្រារព្ធទិវាពិភពលោកប្រយុទ្ធ នឹងជំងឺអេដស៍ ១ធ្នូ ឆ្នាំ២០២៣ ក្រោមប្រធានបទ “សហគមន៍តែមួយ ដឹកនាំឆ្ពោះទៅបញ្ចប់ជំងឺអេដស៍”

2023/12/08 09:57:10 pm        183
Facebook Telegram Linkin
ព្រះវិហារ៖ នៅរសៀលថ្ងៃទី០៧ ខែធ្នូ ឆ្នាំ២០២៣ ឯកឧត្តម គីម រិទ្ធី អភិបាលនៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជា ​ខេត្តព្រះវិហារ បានអញ្ជើញអធិបតីភាពក្នុងទិវាពិភពលោកប្រយុទ្ធនឹងជំងឺអេដស៍១ធ្នូ ឆ្នាំ២០២៣ ក្រោម​ប្រធានបទ“សហគមន៍តែមួយ ដឹកនាំឆ្ពោះទៅបញ្ចប់ជំងឺអេដស៍” និង​រួម​បញ្ចូល​ទិវាអន្តជាតិនៃជនពិការ ​៣ធ្នូ ទិវាអ្នកស្ម័គ្រចិត្ត ​៥ធ្នូ នៅបរិវេណសាខាកាកបាទក្រហមកម្ពុជាខេត្តព្រះវិហារ។មានវត្តមានចូលរួមនាឱកាសនោះ មានសមាជិក សមាជិកា គណៈកម្មាធិការសាខា ក្រុមប្រតិបត្តសាខា អ្នកស្ម័គ្រចិត្ត យុវជនកាកបាទក្រហមកម្ពុជា​ អ្នករស់នៅជាមួយមេរោគអេដស៍ និងជំងឺអេដស៍ ​ជនមានពិការ មកពីក្រុង-ស្រុកទាំង៧​ ក្នុងខេត្តព្រះវិហារ និងអ្នកពាក់ព័ន្ធជាច្រើន​រូបទៀត។ លោក ពឹង ទ្រីដា អនុប្រធានគណៈកម្មាធិការសាខា បានអានសារលិខិតសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ​ប្រធានកាកបាទក្រហមកម្ពុជា និងជាឥស្សរជន​ឆ្នើមថ្នាក់​ជាតិនៃវេទិកា​ភាព​ជាអ្នកដឹកនាំតំបន់អាស៊ី-ប៉ាស៊ីហ្វិក​ ឆ្លើយតបមេរោគអេដស៍ ជំងឺអេដស៍ និងការអភិវឌ្ឍនៅកម្ពុជា។ មានមតិសំណេះសំណាលនាឱកាសនោះ​ ឯកឧត្តម គីម រិទ្ធី ប្រធានគណៈកម្មាធិការសាខា បាន​ពាំនាំនូវប្រសាសន៍ផ្ដាំផ្ញើសួរសុខទុក្ខពីសំណាក់​ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា ដែលបានយកចិត្តទុកដាក់នូវសុខទុក្ខប្រជាពលរដ្ឋ ទៅលើការឈាន​ឆ្ពោះទៅ​ការ​បញ្ចប់អេដស៍ នៅឆ្នាំ២០២៥ ក្នុងន័យនេះ​មានគោលបំណងទាញការយកចិត្តទុក​ដាក់​របស់បងប្អូន និងក្មួយៗយុវជន ឱ្យបន្តការប្រុងប្រយ័ត្នក្នុងការទប់ស្កាត់ការចម្លងមេរោគ​អេដស៍/ជំងឺអេដស៍។​ ហើយត្រូវចូលរួមអនុវត្តតាមរយៈសារលិខិតសំខាន់ៗទាំង ៦ចណុច របស់​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់​ជាតិនៃវេទិកាភាពជាអ្នកដឹកនាំតំបន់អាស៊ី-ប៉ាស៊ីហ្វិក ​ឆ្លើយតបមេរោគអេដស៍ ជំងឺអេដស៍ និងការអភិវឌ្ឍនៅកម្ពុជា។ក្នុងឱកាសនោះដែរ ឯកឧត្តម បានថ្លែងកោតសរសើរដល់អ្នកស្ម័គ្រចិត្ត ​និងយុវជនកាកបាទក្រហម ដែលតែងតែ​ខិតខំបំពេញតួនាទីរបស់ខ្លួននាពេលកន្លងមក​បានយ៉ាងល្អប្រសើរ ព្រមទាំង​ផ្ដាំផ្ញើ​ជម្រុញដល់បងប្អូនជនពិការភាព និងអ្នករស់នៅជាមួយមេ​រោគអេដស៍​ទាំងអស់ ថែរក្សា​សុខភាព​អោយបានល្អ ឧស្សាហ៍ហាត់ប្រាណ​ ហូបស្អាត ​ផឹកស្អាត លាងដៃជាមួយសាប៊ូជាប្រចាំ។ ក្នុងពិធីនេះ ក៏មានការផ្តល់អំណោយមនុស្សធម៌ ដល់គ្រួសារអ្នករស់នៅជាមួយមេរោគអេដស៍ ​ចំនួន ៥២គ្រួសារ ​និងជនមានពិការភាព ចំនួន ១៥គ្រួសារ ក្នុងមួយ​គ្រួសារទទួលបាន៖ អង្ករ ២៥គីឡូក្រាម មី ១កេស ត្រីខ ១យួរ ​ទឹកស៊ីអ៊ីវ ១យួរ និងថវិកាចំនួន ៥០,០០០រៀល។ បន្ថែមពីនេះ ​សាខាក៏បានឧបត្ថម្ភដល់អ្នកស្ម័គ្រចិត្ត​ ចំនួន ២៥នាក់ ​នូវថវិកាចំនួន ​២០,០០០រៀល ប័ណ្ណសរសើរ១ សាប៊ូម្សៅ ១គីឡូ, យុវជនកាកបាទក្រហមកម្ពុជា ​ចំនួន ២៥នាក់ ថវិកាចំនួន ២០,០០០រៀល ប័ណ្ណសរសើរ១ ​សៀវភៅ២ក្បាល និងប៊ិច ១ដើម៕

បណ្ដាញសង្គម

ព័ត៌មានថ្មីៗ

ឯកឧត្តម អ៊ុច បូររិទ្ធ អញ្ជើញជាអធិបតីក្នុងពិធីបើកសិក្ខាសាលាក្របខ័ណ្ឌសភាប្រើភាសាបារាំង  ស្តីពី «អាកាសធាតុ សន្តិភាព និងសន្តិសុខ» នៅវិមានព្រឹទ្ធសភា
11/14/2026 07:11 AM
Facebook Telegram Linkin
កម្ពុជា-រវ៉ាន់ដា ឯកភាពពង្រឹង និងពង្រីកកិច្ចសហប្រតិបត្តិការទ្វេភាគីឱ្យកាន់តែទូលំទូលាយ​
11/13/2026 10:11 PM
Facebook Telegram Linkin
សម្ដេចតេជោ អបអរសាទរ និងកោតសរសើរចំពោះ ចៅស្រី ល្អហួស ដែលបានខិតខំព្យាហាម រហូតសម្រេចក្តីស្រមៃ និងក្លាយជាម្ចាស់មកុដ Miss Teen Icon International 2026
11/13/2026 10:11 PM
Facebook Telegram Linkin
ការវិនិយោគផ្លូវនៅជនបទ ជាការឆ្លើយតបទៅនិងការស់នៅដ៏ចាំបាច់របស់ប្រជាជន
11/13/2026 07:11 PM
Facebook Telegram Linkin
រាជធានីភ្នំពេញរៀបចំកិច្ចពិភាក្សាថ្នាក់ដឹកនាំរាជធានី រដ្ឋធានី ទីក្រុង ខេត្ត និងអង្គភាពជាសមាជិកសមាគម AIMF តាមរយៈសន្និសីទកម្រិតអភិបាល និងតំណាងអាជ្ញាធរមូលដ្ឋានស្តីពី ទំនាក់ទំនងការទូតរវាងទីក្រុង ដើម្បីសន្តិភាព និងការអភិវឌ្ឍមូលដ្ឋាន
11/13/2026 06:11 PM
Facebook Telegram Linkin
ទីក្រុងឌែលី វ៉ាដាច់ទីក្រុងឡាហ័រ ក្លាយជាទីក្រុងមានការបំពុលខ្យល់ខ្លាំងបំផុតក្នុងពិភពលោក
11/13/2026 06:11 PM
Facebook Telegram Linkin
របាយការណ៍៖ ក្រុងវ៉ាស៊ីនតោនទាមទារឱ្យជប៉ុនបង្កើនការចំណាយ ៣ដង ដល់ ១៩ពាន់លានដុល្លារ លើ​កងទ័ពអាមេរិក
11/13/2026 06:11 PM
Facebook Telegram Linkin
ការកាត់មូលនិធិទីភ្នាក់ងារ UNRWA ធ្វើឱ្យជនភៀសខ្លួនប៉ាឡេស្ទីននៅលីបង់កាន់តែលំបាកខ្លាំង
11/13/2026 06:11 PM
Facebook Telegram Linkin
របាយការណ៍៖ រុស្ស៊ីទាមទារឱ្យហ្វាំងឡង់ចាកចេញពីអង្គការណាតូ អំឡុង​កិច្ចចរចា នៅអារ៉ាប់រួម
11/13/2026 06:11 PM
Facebook Telegram Linkin
សម្តេចប្រធានរដ្ឋសភា ស្នើប្រធានាធិបតី រវ៉ាន់ដា លើកកម្ពស់ផលប្រយោជន៍ប្រជាពលរដ្ឋប្រទេសទាំងពីរ តាមរយៈការបង្កើនកិច្ចសហប្រតិបត្តិការរដ្ឋសភា ពាណិជ្ជកម្ម និងទេសចរណ៍
11/13/2026 05:11 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.