នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រជាពលរដ្ឋត្រេកអរនឹងសមិទ្ធផលអាកាសយានដ្ឋានថ្មីដែលត្រៀមបើកដំណើរការ
ពុទ្ធបដិមាធ្វើអំពីស្ពាន់ទម្ងន់៩តោន ត្រៀមធ្វើពុទ្ធាភិសេកនៅរសៀលថ្ងៃនេះ
សម្ដេចធិបតីបញ្ជាក់ជាថ្មីទៅប្រធានអាស៊ានប្តូរវេនចំពោះការប្ដេជ្ញាចិត្តរបស់កម្ពុជាលើការដោះស្រាយបញ្ហាជម្លោះព្រំដែនទាំងអស់ជាមួយប្រទេសជិតខាងដោយសន្តិភាព និងច្បាប់អន្តរជាតិ
គណៈកម្មាធិការអន្តរក្រសួងចុះពិនិត្យ និងវាយតម្លៃការស្ថាបនាផ្លូវក្រួសក្រហម១ខ្សែ ក្នុង​ស្រុកបាកាន ខេត្តពោធិ៍សាត់

នយោបាយ​ និង ការអភិវឌ្ឍន៍

ប្រសាសន៍សំខាន់ៗរបស់សម្តេចធិបតី ក្នុងឱកាសជួបជាមួយកម្មករ និយោជិត តាមរោងចក្រសហគ្រាសជិត២ម៉ឺននាក់ នៅខណ្ឌមានជ័យ និងខណ្ឌដង្កោ

2023/10/03 09:09:48 am        121
Facebook Telegram Linkin
ភ្នំពេញ៖ សម្តេចធិបតីនាយករដ្ឋមន្រ្តី ហ៊ុន​ ម៉ាណែត នាយករដ្ឋមន្ដ្រីនៃកម្ពុជា នៅព្រឹកថ្ងៃទី០៣ ខែតុលា ឆ្នាំ២០២៣នេះ បានអញ្ជើញចុះជួបសំណេះសំណាលជាមួយកម្មករ និយោជិត តាមរោងចក្រ សហគ្រាស ចំនួន ១៨ ០៩៩នាក់ មកពីរោងចក្រ សហគ្រាសចំនួន២២ ដែលមានមូលដ្ឋាននៅក្នុងខណ្ឌមានជ័យ និងខណ្ឌដង្កោ រាជធានីភ្នំពេញ។ប្រសាសន៍សំខាន់ៗរបស់សម្តេចធិបតីនាយករដ្ឋមន្រ្តី ហ៊ុន​ ម៉ាណែត ដែលមានខ្លឹមសារដូចខាងក្រោម៖សម្ដេចធិបតី ហ៊ុន ម៉ាណែត ថ្លែងអំណរគុណដល់ក្រសួងការងារ និងភាគីពាក់ព័ន្ធដែលបានខិតខំ ក្នុងការចរចាលើការកំណត់ប្រាក់ឈ្នួលអប្បបរមាកម្មករនិយោជិតក្នុងវិស័យកាត់ដេររហូតសម្រេចបានលទ្ធផលចំនួន ២០៤ ដុល្លារសម្រាប់ឆ្នាំ ២០២៤ខាងមុខនេះ។ ដូច្នេះចាប់ពីខែមករា ឆ្នាំ២០២៤ ខាងមុខ ប្រាក់ឈ្នួលអប្បបរមាថ្មីដែលកម្មករនិយោជិតនឹងត្រូវទទួលបាន មានចំនួន ២០៤ ដុល្លារ រួមជាមួយប្រាក់អត្ថប្រយោជន៍ផ្សេងៗទៀតរក្សាទុកនៅដដែល។សម្ដេចធិបតី ហ៊ុន ម៉ាណែត បញ្ជាក់ថា ការប្ដេជ្ញាចិត្តរបស់រាជរដ្ឋាភិបាល គឺត្រូវតែដំឡើងប្រាក់ឈ្នួលដល់កម្មករនិយោជិតជារៀងរាល់ឆ្នាំទោះបីមានចំនួនតិច ឬច្រើនក៏ដោយ។ នេះគឺជាគោលនយោបាយរបស់រាជរដ្ឋាភិបាលដែលបានគិតគូរដល់បងប្អូនកម្មករនិយោជិតតាំងពីអាណត្តិមុនៗ ដែលដឹកនាំដោយសម្ដេចតេជោ ហ៊ុន សែន អតីតនាយករដ្ឋមន្រ្ដីនៃកម្ពុជា។សម្ដេចធិបតី ហ៊ុន ម៉ាណែត ថ្លែងថា ទោះបីជាបច្ចុប្បន្នប្រទេសក្នុងតំបន់ ជាពិសេសប្រទេសដែលមានការប្រកួតប្រជែង ក្នុងការនាំចេញផលិតផលកាត់ដេរទៅក្រៅប្រទេសជាមួយកម្ពុជា គឺមិនមានការដំឡើងប្រាក់ឈ្នួលដល់កម្មករនិយោជិតនោះទេ ដោយសារតែបញ្ហាវិបត្តិសេដ្ឋកិច្ចសាកល។ ប៉ុន្ដែរាជរដ្ឋាភិបាលកម្ពុជា នៅតែបន្តដំឡើងប្រាក់ឈ្នួលដល់កម្មករក្នុងឆ្នាំ ២០២៤ ខាងមុខនេះ។សម្ដេចធិបតី ហ៊ុន ម៉ាណែត អំពាវនាវដល់ម្ចាស់ផ្ទះជួល សូមជួយរក្សាតម្លៃផ្ទះជួលនៅតម្លៃដដែល កុំដំឡើងថ្លៃចំពោះបងប្អូនកម្មករនិយោជិត។ ចំណែកអគ្គិសនីកម្ពុជា បន្តគិតគូរលើការបញ្ចុះតម្លៃភ្លើងដល់បងប្អូនកម្មករនិយោជិតដដែល។សម្ដេចធិបតី ហ៊ុន ម៉ាណែត មានប្រសាសន៍ថា ការទទួលខុសត្រូវរបស់រាជរដ្ឋាភិបាល ក៏ដូចជាបណ្ដាក្រសួងស្ថាប័នទាំអស់ នៅពេលទៅបំពេញទស្សនកិច្ចនៅក្រៅប្រទេស គឺមានគោលដៅចំបងបំផុតធ្វើយ៉ាងណា ដើម្បីទាញផលប្រយោជន៍សម្រាប់ជាតិ និងប្រជាជន។សម្ដេចធិបតី ហ៊ុន ម៉ាណែត សង្ស័យក្រុមអ្នកវិភាគមួយចំនួន មិនហ៊ាននិយាយសរសើរពីសមិទ្ធផលរបស់កម្ពុជា ពីព្រោះខ្លាចគេនិយាយថា លក់ក្បាល។សម្ដេចធិបតី សម្ដែងការសោកស្ដាយចំពោះអ្នកវិភាគនៅក្រៅប្រទេសមួយចំនួនតូច ដែលអង្គុយរកតែចំណុចណាមួយដើម្បីរិះគន់ និងនិយាយអាក្រក់ពីប្រទេសកម្ពុជា ដែលឥរិយាបថ​នេះមិនត្រឹមតែមិនបានជួយលើកមុខមាត់ប្រទេសជាតិនោះទេ ប៉ុន្ដែបែជាធ្វើឱ្យអាប់ឱនដល់មុខមាត់ប្រទេសជាតិទៅវិញ។សម្ដេចធិបតី ហ៊ុន ម៉ាណែត បញ្ជាក់ថា មានវិទ្យុបរទេសនៅក្រៅស្រុកមួយ មិនដែលហ៊ានផ្សាយពីការខិតខំប្រឹងប្រែងរបស់រាជរដ្ឋាភិបាលឡើយ ប៉ុន្ដែខិតខំប្រឌិតព័ត៌មានផ្សព្វផ្សាយ រឿងមិនពិត ដើម្បីវាយប្រហារមកលើរាជរដ្ឋាភិបាល ហើយធ្វើយ៉ាងណាឱ្យពលរដ្ឋខឹងស្អប់មកលើរាជរដ្ឋាភិបាល។សម្ដេចធិបតី ហ៊ុន ម៉ាណែត បញ្ជាក់ថា ករណីការសាងសង់ប្រាសាទនៅប្រទេសថៃ ដែលមានការប្រតិកម្មពីប្រជាពលរដ្ឋ សម្ដេចធិបតី បានណែនាំដល់ក្រសួងវប្បធម៌ ក្នុងការដោះស្រាយ នឹងពន្យល់ដល់ប្រជាពលរដ្ឋ។ ក្រៅពីនេះ សម្ដេចធិបតី ក៏បានយកករណីនេះ ពិភាក្សាជាមួយនាយករដ្ឋមន្រ្ដីថ្មីរបស់ប្រទេសថៃ ក្នុងការដោះស្រាយលើករណីនេះផងដែរ។សម្ដេចធិបតី បានបញ្ជាក់ថា ករណីមួយចំនួនដែលបានកើតឡើង ដូចជាករណីពន្ធដារជាដើម សម្ដេច បានផ្ដល់សិទ្ធិដល់ក្រសួង ស្ថាប័នសាមី ជាអ្នកធ្វើការដោះស្រាយ និងពន្យល់ដល់ប្រជាពលរដ្ឋ ដែលនេះ គឺជារបៀបរបបក្នុងការធ្វើការងាររវាងនាយករដ្ឋមន្រ្ដីជាមួយស្ថាប័នពាក់ព័ន្ធ។សម្ដេចធិបតី ហ៊ុន ម៉ាណែត មានប្រសាសន៍ថា ក្នុងពេលបង្កើតរាជរដ្ឋាភិបាលអាណត្តិទី៧នេះ ការងារសំខាន់ចំនួន៣ ដែលសម្ដេចធិបតី តែងតែគិតគូរដល់ជីវភាពប្រជាពលរដ្ឋជាប្រចាំនោះគឺ ទី១.គិតគូរពីអ្វីខ្លះដែលប្រជាពលរដ្ឋបានទទួលហើយ នឹងត្រូវបន្តផ្ដល់ឱ្យដល់ប្រជាពលរដ្ឋបន្ថែមទៀត។ ២.បង្កើតអ្វីបន្ថែមទៀតសម្រាប់ប្រជាពលរដ្ឋ និង ទី៣.ក្រៅពីថវិកា តើរាជរដ្ឋាភិបាលមានអ្វីខ្លះទៀត ដែលអាចជួយសម្រួលដល់ជីវភាពប្រជាពលរដ្ឋ ដើម្បីមានជីវភាពរឹតតែប្រសើរឡើង។សម្ដេចធិបតី ហ៊ុន ម៉ាណែត បញ្ជាក់ថា ផែនការសកម្មភាពបានរៀបចំរួចហើយ គឺរដ្ឋាភិបាលនឹងចំណាយថវិកា៣៦លានដុល្លារ ក្នុង១ឆ្នាំលើការបណ្ដុះបណ្ដាលជំនាញវិជ្ជាជីវៈ ដល់យុវជន ក្នុងគ្រួសារក្រីក្រចំនួន ១,៥ លាននាក់នាពេលខាងមុខនេះ។សម្ដេចធិបតី ហ៊ុន ម៉ាណែត មានប្រសាសន៍ថា នៅពេលនាយករដ្ឋមន្រ្ដីថៃ អញ្ជើញមកទស្សនកិច្ចផ្លូវការនៅកម្ពុជា សម្ដេចធិបតី និងនាយករដ្ឋមន្រ្ដីថៃ ក៏បានពិភាក្សាគ្នា ក្នុងការពង្រីកបន្ថែមជើងហោះហើររវាងប្រទេសទាំងពីរផងដែរ។ ក្រៅពីនេះ ក៏មានកិច្ចសហប្រតិបត្តិការជាច្រើនទៀត នៅតាមច្រកព្រំដែនប្រទេសទាំងពីរផងដែរ។សម្ដេចធិបតី បានបញ្ជាក់ថា នាខែវិច្ឆិកាខាងមុខ ក្នុងជំនួបរវាងសម្ដេចជាមួយនឹងវិស័យឯកជន សម្ដេចនឹងផ្ដល់ឱកាសដល់វិស័យឯកជន ក្នុងការលើកឡើងពីតម្រូវការ និងការចង់បានរបស់វិស័យឯកជន ដើម្បីយកមកធ្វើការដោះស្រាយ និងបំពេញបន្ថែម ខណៈវិស័យឯកជនគឺជាអ្នកបង្កើតការងារឱ្យប្រជាពលរដ្ឋ។សម្ដេចធិបតី ហ៊ុន ម៉ាណែត បញ្ជាក់ថា រឿងពន្ធដារ គោលការណ៍ដោះស្រាយរួម នឹងប្រកាសនៅខែវិច្ឆិកាខាងមុខនេះ។ ប៉ុន្ដែអ្វីដែលសម្ដេចធិបតី បញ្ជាក់ជូនប្រជាពលរដ្ឋ នាព្រឹកនេះ គឺរាជរដ្ឋាភិបាលអាណត្តិទី៧ នឹងមិនមានការបង្កើតពន្ធថ្មីណាមួយបន្ថែមទៀត ចំពោះប្រជាពលរដ្ឋឡើយ។សម្ដេចធិបតី ហ៊ុន ម៉ាណែត រាជរដ្ឋាភិបាលអាណត្តិទី៧ នឹងបន្តមិនយកពន្ធលើដីកសិកម្ម សម្ភារៈកសិកម្ម កសិផលកសិកម្ម អចលនទ្រព្យតម្លៃថោកជាង ២៥០០០ ដុល្លារនោះទេ ។ ពន្ធការផ្ទេរទ្រព្យពីឪពុកម្ដាយទៅកូន, ពន្ធផ្លូវចំពោះម៉ូតូ ទោចក្រយានយន្ត ក៏បន្តមិនយកពន្ធដែរ។ សម្ដេចធិបតី បានណែនាំដល់អាជ្ញាធរគ្រប់លំដាប់ថ្នាក់ ត្រូវលុបបំបាត់ការយកភាស៊ី ការលក់ដូររបស់ប្រជាពលរដ្ឋ តាមកញ្ច្រែង កញ្ជើ ល្អី គឺមិនត្រូវយកពន្ធទេ។ សម្ដេចធិបតីបញ្ជាក់ថា អាជ្ញាធរគ្រប់ជាន់ថ្នាក់ ត្រូវមើលលើករណីនេះ មិនត្រូវយកពន្ធលើប្រជាពលរដ្ឋឡើយ។សម្ដេចធិបតី ហ៊ុន ម៉ាណែត ណែនាំដល់មន្រ្ដីនៅតាមក្រសួងស្ថាប័ននីមួយៗ កុំអនុវត្តលើសចំពោះនីតិវិធីនៃការណែនាំរបស់រាជរដ្ឋាភិបាល ដែលបានដាក់ចេញឱ្យសោះ ចំពោះការអនុវត្តនីតិវិធីរបស់ខ្លួន។ករណីនេះដើម្បីកុំឱ្យបុគ្គល ១នាក់ ២នាក់ ទៅធ្វើឱ្យប៉ះពាល់ដល់ការខិតខំរបស់រាជរដ្ឋាភិបាល។សម្ដេចធិបតី ហ៊ុន ម៉ាណែត មានប្រសាន៍ថា របៀបធ្វើការរបស់សម្ដេចទោះពេលខ្លះ មិនបានចេញសារដោយផ្ទាល់ជូនប្រជាពលរដ្ឋ ប៉ុន្ដែកិច្ចការងារទាំងធំ ឬតូច គឺសម្ដេចបានពិនិត្យដោះស្រាយ និងបានដាក់បទបញ្ជាទៅដល់អាជ្ញាធរ និងសមត្ថកិច្ចពាក់ព័ន្ធដោយផ្ទាល់ ក្នុងការដោះស្រាយទាំងអស់។ ខណៈពេលខ្លះម៉ោង១២ ទៅ ១ នាទីយប់ សម្ដេចនៅតាមដានព័ត៌មានដែលជាទុក្ខកង្វល់របស់ប្រជាពលរដ្ឋ ដើម្បីរុញទៅឱ្យស្ថាប័នពាក់ព័ន្ធ ក្នុងការដោះស្រាយជាបន្ទាន់។សម្តេចធិបតី ហ៊ុន ម៉ាណែត ថ្លែងថា ដរាបណាប្រជាពលរដ្ឋបោះឆ្នោតជូនកាន់តែច្រើន រាជរដ្ឋាភិបាលនឹងបម្រើ និងដោះស្រាយជូនដល់ពួកគាត់កាន់តែច្រើន ពោលគឺរាជរដ្ឋាភិបាលគិតគូរដល់បងប្អូនប្រជាពលរដ្ឋគ្រប់ជំហាន និងគ្រប់កាលៈទេសៈទាំងអស់ មិនថាសម្តេចទៅបេសកកម្ម នៅក្រៅប្រទេសនោះក្ដី។សម្ដេចធិបតី ហ៊ុន ម៉ាណែត បញ្ជាក់ថា ក្រុមប្រឆាំងខ្លះនិយាយឡើងតែពីវប្បធម៌សន្ទនា ប៉ុន្ដែគ្រប់ពេលពួកគេតែងតែជេរ និងមួលបង្កាច់សម្ដេច និងសម្ដេចតេជោ ដែលទង្វើនេះ មិនបានបង្ហាញពីឆន្ទៈក្នុងការសន្ទនាពិតប្រាកដនោះទេ៕

សម្តេចធិបតី ហ៊ុន ម៉ាណែត អញ្ជើញចុះជួបសំណេះសំណាលជាមួយកម្មករ និយោជិត តាមរោងចក្រសហគ្រាសជិត២ម៉ឺននាក់ នៅខណ្ឌមានជ័យ និងខណ្ឌដង្កោ

2023/10/03 07:37:15 am        221
Facebook Telegram Linkin
ភ្នំពេញ៖ សម្តេចធិបតីនាយករដ្ឋមន្រ្តី ហ៊ុន​ ម៉ាណែត នៅព្រឹកថ្ងៃទី០៣ ខែតុលា ឆ្នាំ២០២៣នេះ បានអញ្ជើញចុះជួបសំណេះសំណាលជាមួយកម្មករ និយោជិត តាមរោងចក្រ សហគ្រាស ចំនួន ១៨ ០៩៩នាក់ មកពីរោងចក្រ សហគ្រាសចំនួន២២ ដែលមានមូលដ្ឋាននៅក្នុងខណ្ឌមានជ័យ និងខណ្ឌដង្កោ រាជធានីភ្នំពេញ។រោងចក្រ សហគ្រាសទាំង២២នេះ ជាប្រភេទរោង​ចក្រកាត់ដេរសម្លៀកបំពាក់ចំនួន១៨ រោងចក្រផលិតផលិតផលធ្វើដំណើរ និងកាបូបចំនួន២រោងចក្រដេរស្បែកជើងចំនួន១ និងរោងចក្រផលិតឆត្រចំនួន១។នេះ គឺជាលើកទី៥ ដែលសម្តេចមហាបវរធិបតី ហ៊ុន ម៉ាណែត បានអញ្ជើញចុះជួបសំណេះសំណាលជាមួយនឹងបងប្អូនកម្មករ​ និយោជិត តាមបណ្តារោងចក្រ សហគ្រាសនានា ក្នុងឋានៈជា នាយករដ្ឋមន្ត្រី នៃព្រះរាជាណាចក្រកម្ពុជា៕

ថ្ងៃទី១នៃការចុះឈ្មោះបោះឆ្នោតឆ្នាំ២០២៣ពលរដ្ឋចុះឈ្មោះថ្មីមានជាង១ម៉ឺននាក់

2023/10/02 03:04:35 pm        135
Facebook Telegram Linkin
ភ្នំពេញ៖ ថ្ងៃទីមួយ នៃការពិនិត្យបញ្ជីឈ្មោះ ​និងការចុះឈ្មោះបោះឆ្នោត ឆ្នាំ២០២៣ ត្រូវនឹងថ្ងៃទី១ ខែតុលា ឆ្នាំ២០២៣ នៅទូទាំងប្រទេស មានប្រជាពលរដ្ឋចុះឈ្មោះបោះឆ្នោតថ្មី មានចំនួន ១០.០៤១ នាក់ ខណៈអ្នកដែលនឹងត្រូវលុបឈ្មោះចេញពីបញ្ជីបោះឆ្នោត មានចំនួន ៧.៧៩៧ នាក់។ នេះបើយោងតាមសេចក្ដីប្រកាសព័ត៌មានរបស់ គ.ជ.ប។ សេចក្តីប្រកាសព័ត៌មានរបស់ គ.ជ.ប នាព្រឹកថ្ងៃទី ២ខែកញ្ញា ឆ្នាំ ២០២៣នេះ ស្ដីពីលទ្ធផល​បណ្តោះអាសន្ន​ថ្ងៃទីមួយ នៃការពិនិត្យបញ្ជីឈោ្មះ ​និងការចុះឈ្មោះបោះឆ្នោត ឆ្នាំ២០២៣ បានឱ្យដឹងថា ពលរដ្ឋ ដែលបានស្នើសុំកែតម្រូវទិន្នន័យក្នុង ពីបញ្ជីបោះឆ្នោតមានចំនួន ៦៧១ នាក់អ្នកដែលបានផ្ទេរទីលំនៅចូលក្នុងឃុំ ​សង្កាត់ថ្មី មានចំនួន ២.០០៦ នាក់។បើតាម គ.ជ.ប ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៣ តាមឃុំ សង្កាត់ ប្រព្រឹត្តទៅ ចាប់ពីថ្ងៃទី១ ដល់ថ្ងៃទី១៩ ខែតុលា ឆ្នាំ២០២៣ គិតទាំងថ្ងៃសៅរ៍ និងថ្ងៃអាទិត្យ។ គ.ជ.ប បានអញ្ជើញប្រជាពលរដ្ឋទៅពិនិត្យមើលឈ្មោះក្នុងបញ្ជីបោះឆ្នោតចុងក្រោយនៅតាមឃុំ សង្កាត់ ឬតាម គេហទំព័រ voterlist.nec.gov.kh ឬកម្មវិធីទូរសព្ទដៃ App-NECKH ។ ប្រសិនបើពិនិត្យឃើញថា មានការកត់ត្រាមិនបានត្រឹមត្រូវតាមអត្តសញ្ញាណបណ្ណ​សញ្ជាតិខ្មែរ​ដែល​មាន សុពលភាព សាមីខ្លួនអាចស្នើសុំកែតម្រូវជាមួយក្រុមចុះឈ្មោះបោះឆ្នោត។ ចំណែកប្រជាពលរដ្ឋខ្មែរដែលមិនទាន់បានចុះឈ្មោះបោះឆ្នោតពីមុនមក ឬអ្នកដែលទើបគ្រប់អាយុ​១៨ឆ្នាំ គិតដល់ថ្ងៃទី៣១ ខែធ្នូ ឆ្នាំ២០២៣ (កើតមុន ឬត្រឹមថ្ងៃទី១ ខែមករា ឆ្នាំ២០០៦) ឬ អ្នកដែល​បាន​ផ្លាស់លំនៅឋាន ឬទីសំណាក់ចូលក្នុងឃុំ សង្កាត់ថ្មី ទៅចុះឈ្មោះបោះឆ្នោតឱ្យបានគ្រប់ៗគ្នា​នៅឃុំ សង្កាត់ ដែលសាមីខ្លួនកំពុងរស់នៅ ឬស្នាក់នៅ៕អត្ថបទ៖ វ៉ន ដារ៉ា

ជប៉ុនប្រគល់សំណង់អគារដ៏ទំនើបមួយដល់មន្ទីរពេទ្យបង្អែកខេត្តសៀមរាប សម្រាប់បំរើសាវាព្យាបាល និងសង្គ្រោះអ្នកជំងឺ

2023/10/02 02:59:52 pm        237
Facebook Telegram Linkin
សៀមរាប៖ នៅថ្ងៃទី២ខែតុលា ឆ្នាំ២០២២នេះ ជប៉ុនប្រគល់សំណង់អគារដ៏ទំនើបមួយដល់មន្ទីរពេទ្យបង្អែកខេត្តសៀមរាប សម្រាប់បំរើសាវាព្យាបាលនិងសង្គ្រោះអ្នកជំងឺ។ឯកឧត្តមបណ្ឌិត ក្រុស សារ៉ាត់ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តសៀមរាប មានប្រសាសន៍ថា អគារមន្ទីរពេទ្យក្រោមគម្រោងធ្វើឱ្យប្រសើរឡើង របស់មន្ទីរពេទ្យបង្អែក ក្រោមជំនួយឥតសំណងរបស់រាជរដ្ឋាភិបាលជប៉ុន តាមរយៈទីភ្នាក់ងារប្រតិបត្តិការអន្តរជាតិ JICA ដែលបានចាប់ផ្តើមសាងសង់នៅថ្ងៃទី០១ ខែធ្នូ ឆ្នាំ២០២១ ហើយបានបញ្ចប់ក្នុងខែតុលា ឆ្នាំ២០២៣នេះ ជាមួយនឹងការ រៀបចំបំពាក់ឧបករណ៍វេជ្ជសាស្ត្រកម្រិតស្តង់ដារមន្ទីរពេទ្យ។គម្រោងសំណង់អគារ រួមមាន៖ អគារមួយដែលទំហំ២៦គុណនឹង៦៨ ម៉ែត្រ កម្ពស់ បួនជាន់ កំពស់២៧,៥ ម៉ែត្រ ដែលសាងសង់ នៅលើផ្ទៃដីចំនួន៣,៨១១ ម៉ែត្រការេ ហើយសំណង់នេះ ត្រូវបានរៀបចំប្រព័ន្ធគ្រប់គ្រង និងព្យាបាលតាម លក្ខណៈស្តង់ដារ មន្ទីរពេទ្យ ។ក្រៅពីការរៀបចំរចនាសម្ព័ន្ធខាងក្នុង អគារនេះក៏មានបណ្តាញទំនាក់ទំនង និងមាន ជណ្តើរថ្មើរជើងចំនួនពីរ និងបំពាក់ជណ្តើរយន្តចំនួនពីរផងដែរ។ អគារមន្ទីរពេទ្យថ្មីនេះ ត្រូវបានដាក់ឈ្មោះថា “ មណ្ឌលផ្តល់សេវាផ្នែកវះកាត់ នៃមន្ទីពេទ្យបង្អែកខេត្តសៀមរាប”៕

ក្រសួងប្រៃសណីយ៍ដាក់ឱ្យដំណើរការផ្លូវការកម្មវិធីអភិវឌ្ឍន៍ជំនាញឌីជីថល

2023/10/02 02:28:17 pm        169
Facebook Telegram Linkin
ភ្នំពេញ៖ ក្រសួងប្រៃសណីយ៍ និងទូរគមនាគមន៍ បានប្រកាសដាក់ឱ្យដំណើរការជាផ្លូវការកម្មវិធី​អភិវឌ្ឍន៍​ជំនាញឌីជីថល ​ដើម្បីចូលរួមអនុវត្តយុទ្ធសាស្ត្របញ្ចកោណ​ដំណាក់កាលទី១ របស់​រាជរដ្ឋាភិបាល។ដើម្បីចូលរួមក្នុងការកសាងមូលធនមនុស្សឌីជីថល ​ក្រសួងប្រៃសណីយ៍ និង​ទូរគមនាគមន៍​បាន​បង្កើត​កម្មវិធីអភិវឌ្ឍន៍​ជំនាញឌីជីថល ដែលជាការគាំទ្រដល់ដំណើរការអភិវឌ្ឍន៍មូលធនមនុស្ស​ឌីជីថល តាមរយៈការផ្តល់ថវិកាសិក្សាដោយមិនគិតការប្រាក់ ​ការប្រឹក្សាយោបល់ដល់និស្សិត ការ​សម្របសម្រួល ការស្នាក់នៅរបស់និស្សិត ​ការសហការជាមួយគ្រឹះស្ថានសិក្សា ​និងស្ថាប័នពាក់ព័ន្ធ និងការអភិវឌ្ឍ ​និងប្រើប្រាស់បច្ចេកវិទ្យាឌីជីថលសម្រាប់បម្រើដល់ការអប់រំ។កម្មវិធីអភិវឌ្ឍន៍ជំនាញឌីជីថលនេះបានប្រកាសដាក់ដំណើរការជាផ្លូវការ ជាមួយគ្នា និងពិធីចុះហត្ថ​លេខា​លើអនុស្សរណៈនៃការយោគយល់គ្នាស្ដីពីកិច្ចសហប្រតិបត្តិការលើការ​លើកកម្ពស់​ការយល់ដឹង​ និងការជំរុញការអភិវឌ្ឍជំនាញឌីជីថល ​នាព្រឹកថ្ងៃទី០២ ខែតុលា ឆ្នាំ២០២៣ ក្រោមអធិបតីភាព​ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ ​និងទូរគមនាគមន៍ និងថ្នាក់ដឹកនាំ​គ្រឹះស្ថានឧត្តមសិក្សាដៃគូចំនួន៦ ​នៅទីស្តីការក្រសួង។សូមជម្រាបជូនថា កម្មវិធីអភិវឌ្ឍន៍ជំនាញឌីជីថល មានដៃគូពីគ្រឹះស្ថានឧត្តមសិក្សាធំៗចំនួន៦​សម្រាប់និស្សិតជ្រើសរើសសិក្សា ដូចជា ​បណ្ឌិត្យសភាបច្ចេកវិទ្យាឌីជីថលកម្ពុជា សាកលវិទ្យាល័យ​ភូមិន្ទភ្នំពេញ ​សាកលវិទ្យាល័យជាតិគ្រប់គ្រង វិទ្យាស្ថានបច្ចេកវិទ្យាកម្ពុជា សាកលវិទ្យាល័យអាមេរិក​កាំង​ភ្នំពេញ និងសាកលវិទ្យាល័យផារ៉ាហ្គន ៕ អត្ថបទ ៖ ប្រាក់ វ៉ាន់ដា

រដ្ឋមន្រ្តីក្រសួងបរិស្ថាន៖ មន្រ្តីរាជការចាំបាច់ត្រូវបុរេសកម្ម និងរៀបចំផែនការឱ្យបានច្បាស់លាស់ ទើបទទួលបានជោគជ័យក្នុងការងារ

2023/10/02 02:08:31 pm        233
Facebook Telegram Linkin
ភ្នំពេញ៖ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានផ្តល់ឱវាទឱ្យមន្រ្តីរាជការគ្រប់ជាន់ថ្នាក់ទាំងអស់ ត្រូវតែបុរេសកម្ម មានការរៀបចំផែនការយុទ្ធសាស្រ្តផ្ទាល់ខ្លួន និងកំណត់អាទិភាពការងារ ទើបទទួលបានជោគជ័យក្នុងការងារ ហើយឈានឆ្ពោះទៅជាអ្នកដឹកនាំដ៏មានគុណភាព និងប្រសិទ្ធភាពនាពេលអនាគត ។ ការថ្លែងឡើងនេះ គឺនៅក្នុងជំនួបសំណេះសំណាលជាមួយមន្រ្តីរាជការ ក្រោមឱវាទនៃអគ្គនាយកដ្ឋានរដ្ឋបាល និងហិរញ្ញវត្ថុ នៅទីស្តីការក្រសួង នាព្រឹកថ្ងៃទី ០២ ខែតុលា ឆ្នាំ២០២៣ ។ឯកឧត្តមរដ្ឋមន្រ្តី បានគូសបញ្ជាក់ទៀតថា ក្រោមការដឹកនាំដ៏ឈ្លាសវៃរបស់សម្តេចមហាបវរធិបតី ហ៊ុន ម៉ាណែត ក្នុងអាណត្តិទី៧នេះ អ្នកចេះពិតប្រាកដ អ្នកមានសមត្ថភាព គឺនឹងត្រូវបាន​លើក​តម្កើង​ឱ្យក្លាយទៅជាអ្នកដឹកនាំបន្តវេន ​នាពេលអនាគត អនុលោមតាមនេះ​ ឯកឧត្តមរដ្ឋមន្រ្តី បាននឹង​កំពុងបង្កបរិយាកាសប្រកួតប្រជែង​ដោយស្មើភាព និងតម្លាភាពបំផុត ចំពោះមន្រ្តីរាជការ​ទាំងអស់ ដូចនេះទាមទារឱ្យមានភាពបុរេសកម្ម ​និងមានចំណេះដឹង ចេះរៀបចំផែនការ​យុទ្ធសស្រ្ត​ផ្ទាល់ខ្លួន និងបែងចែក ចាត់ចែងការងារអាទិភាព (ទាំងបច្ចេកទេស និងទាំងការងារបក្ស) ដើម្បីសម្រេចបានប្រសិទ្ធភាព និងប្រសិទ្ធផលការងាររបស់ក្រសួង។ ជាងនេះទៅទៀត អ្នកដែលមានស្នាដៃ ឯកឧត្តមរដ្ឋមន្រ្តី នឹងដំឡើងឋានន្តរស័ក្តិ រួមទាំងមេដាយ​ស្របទៅតាមពេលវេលា ដែលក្រសួងមុខងារសាធារណៈបានចែងផងដែរ ។លើសពីនេះ ឯកឧត្តមរដ្ឋមន្រ្តី បានបញ្ជាក់ថា ​ក្រសួងបានរៀបចំរួចហើយនូវយុទ្ធសាស្រ្តចក្រា ដែល​ឆ្លើយតបទៅនឹងយុទ្ធសាស្រ្តបញ្ចកោណរបស់រាជរដ្ឋាភិបាលកម្ពុជា ហើយបាននឹងកំពុងដាក់ឆ្លង​ជាមួយ​ថ្នាក់ដឹកនាំ ឱ្យពិនិត្យ និងសម្រេច ដើម្បីអគ្គនាយកដ្ឋាននីមួយៗ យកទៅបំបែក​ជាយុទ្ធសាស្រ្ត​សកម្មភាពការងារទៅតាមផែន និងជំនាញរៀងខ្លួន ក្នុងន័យជំរុញការងារ​សុក្រឹតកម្មបរិស្ថានកិច្ចឱ្យសម្រេចបានជោគជ័យ ដើម្បីឱ្យនាវាបរិស្ថានឈាន​ទៅមុខដោយ​ប្រសិទ្ធភាព និងប្រសិទ្ធផល៕អត្ថបទ៖ទូច សោភ័ណ

មនុស្សរាប់លាននាក់សម្រុកទៅកាន់តំបន់ទេសចរណ៍នានា របស់ប្រទេសចិន ដើម្បីអបអរបុណ្យជាតិ

2023/10/02 12:27:19 pm        164
Facebook Telegram Linkin
តំបន់ទេសចរណ៍សំខាន់ៗរបស់ប្រទេសចិន ត្រូវបានពេញណែនដោយភ្ញៀវទេសចរកាលពីថ្ងៃអាទិត្យទី១ខែតុលា ខណៈប្រទេសនេះប្រារពទិវាបុណ្យជាតិរបស់ខ្លួន។ អ្នកដើរលេងកម្សាន្តរដូវឈប់សម្រាករាប់លាននាក់ បានធ្វើដំណើរនៅក្នុងប្រទេសរបស់ខ្លួនទៅកាន់តំបន់ទេសចរណ៍ជាច្រើន ដូចជា មហាកំផែងក្នុងទីក្រុងប៉េកាំង ព្រមទាំងបឹងខាងលិច (West Lake) ក្នុងតំបន់សេដ្ឋកិច្ចក្រុង ហាង ចូវ (Hangzhou) អំឡុងថ្ងៃឈប់សម្រាករយៈពេល៨ថ្ងៃរបស់ប្រទេសចិន ដែលគេស្គាល់ថាជាសប្ដាហ៍មាស ឬ Golden Week បានចាប់ផ្ដើមកាលពីថ្ងៃសុក្រទី២៩ខែកញ្ញា។ សារព័ត៌មានរដ្ឋ បានរាយការណ៍ថា ទីក្រុងប៉េកាំង គឺជាតំបន់ទេសចរណ៍ដ៏ពេញនិយមបំផុត បន្ទាប់ពីទីក្រុងស៊ៀងហៃ (Shanghai) និងហាងចូវ។ឧស្យានរបស់រដ្ឋធានីប៉េកាំង រួមទាំង វិមានរដូវក្ដៅ ឬ Summer Palace និងឧស្យានអូឡាំពិក(Olympic Park) បានកត់ត្រា អ្នកចូលទៅទស្សនាចំនួន១,៨៨ លាននាក់ ។ ក្រសួងសាធារណការនិងដឹកជញ្ជួន ព្យាករណ៍ថា ចំនួនអ្នកធ្វើដំណើរកម្សាន្ត២,០៥ពាន់លាននាក់ជាចំនួនបំបែកកំណត់ត្រា នឹងកើតឡើងនៅថ្ងៃឈប់សម្រាកសប្ដាហ៍មាស រួមទាំងការធ្វើដំណើរតាមរថភ្លើង ផ្លូវហាយវ៉េ ផ្លូវទឹក និងផ្លូវអាកាស៕ចំណែកនៅក្នុងដែនដីមួយទៀតរបស់ចិន គឺទីក្រុង ហុងកុង កាំជ្រួចភ្ញីបានបំភ្លឺផ្ទៃមេលើកំពង់ផែវីកតូរីយ៉ា (Victoria Harbour) របស់ទីក្រុងនេះ កាលពីយប់ថ្ងៃអាទិត្យ ដែលបានទាក់ទាញមនុស្សរាប់ម៉ឺននាក់ទៅទស្សនាខណៈទីក្រុងនេះ បានប្រារព្ធទិវាបុណ្យជាតិ លើកទី៧៤របស់ប្រទេសចិន ៕

Zelenskiy៖ ពុំមានអ្វីអាចធ្វើឲ្យការប្ដេជ្ញាចិត្តរបស់អ៊ុយក្រែន ប្រឆាំងនឹងរុស្ស៊ីចុះខ្សោយឡើយ

2023/10/02 12:14:07 pm        90
Facebook Telegram Linkin
ប្រធានាធិបតីអ៊ុយក្រែន លោក Volodymyr Zelenskiy បាននិយាយនៅក្នុងសុន្ទរកថាមួយ ដែលបានចេញផ្សាយកាលពីថ្ងៃអាទិត្យ (១ តុលា)ថា មិនមានអ្វីអាចនឹងធ្វើឱ្យការប្ដេជ្ញាចិត្តប្រយុទ្ធរបស់ប្រទេសអ៊ុយក្រែន ប្រឆាំងនឹងរុស្ស៊ី ចុះខ្សោយនោះទេ រយៈពេលមួយថ្ងៃបន្ទាប់ពីសភាសហរដ្ឋអាមេរិក បានអនុម័តលើការបញ្ឈប់រយៈពេលខ្លីលើច្បាប់ផ្តល់មូលនិធិ ដែលលុបចោលជំនួយដល់អ៊ុយក្រែន។ ដោយឡែក រដ្ឋមន្ត្រីការពារជាតិរបស់អ៊ុយក្រែន លោក Rustem Umerov បាននិយាយថា លោកបានទទួលការធានាឡើងវិញអំពីជំនួយយោធាបន្ថែមទៀត នៅក្នុងការហៅទូរស័ព្ទជាមួយរដ្ឋមន្ត្រីការពារជាតិអាមេរិក លោក Lloyd Austin។អ្នកនាំពាក្យក្រសួងការបរទេសអ៊ុយក្រែនបាននិយាយថា ទីក្រុងគីវ កំពុងធ្វើការជាមួយដៃគូអាមេរិករបស់ខ្លួន ដើម្បីធានាការសម្រេចលើថវិកាថ្មី នឹងរួមបញ្ចូលមូលនិធិសម្រាប់ប្រទេសមួយនេះ ហើយការគាំទ្ររបស់សហរដ្ឋអាមេរិក គឺនៅតែដដែល។ លោក Zelenskiy បាននិយាយក្នុងសុន្ទរកថា នៃការប្រារព្ធទិវាការពារជាតិ ដោយមិនបានបញ្ជាក់ពីការបោះឆ្នោតនៅក្នុងសភាអាមេរិកដោយផ្ទាល់នោះទេ ប៉ុន្តែបានរំលឹកឡើងវិញនូវការប្តេជ្ញាចិត្តរបស់លោកក្នុងការតស៊ូដើម្បីជ័យជំនះរបស់អ៊ុយក្រែន។ លោកបាននិយាយថា គ្មាននរណាម្នាក់អាច «បិទ» ស្ថេរភាព ការស៊ូទ្រាំ ភាពរឹងមាំ និងភាពក្លាហានរបស់អ៊ុយក្រែនបានទេ។ ជាមួយគ្នានោះដែរ ប្រធានាធិបតីសហរដ្ឋអាមេរិក លោក ចូ បៃដិន បាននិយាយកាលពីថ្ងៃអាទិត្យថា គណបក្សសាធារណរដ្ឋបានសន្យាផ្តល់ជំនួយដល់អ៊ុយក្រែន តាមរយៈការបោះឆ្នោតដាច់ដោយឡែកមួយ ហើយការគាំទ្ររបស់សហរដ្ឋអាមេរិកចំពោះអ៊ុយក្រែន មិនអាចត្រូវបានរំខាន ទោះជានៅក្នុង «កាលៈទេសៈណាក៏ដោយ»៕

ប្រធានសភាអ៊ឺរ៉ុបគាំទ្រ UN ដែលតែងតាំងបេសកជន ដើម្បីឲ្យជួយចាប់ផ្តើមកិច្ចចរចាសន្តិភាពប្រទេសកោះស៊ីប ឡើងវិញ

2023/10/02 12:05:34 pm        73
Facebook Telegram Linkin
ប្រធានសភាអឺរ៉ុប បាននិយាយកាលពីថ្ងៃអាទិត្យថា លោកស្រី បានបង្ហាញពីការគាំទ្ររបស់ស្ថាប័ននីតិប្បញ្ញត្តិសម្រាប់ការតែងតាំងបេសកជនរបស់អង្គការសហប្រជាជាតិ ដើម្បីវាយតម្លៃឱកាសនៃការបន្តឡើងនូវកិច្ចចរចា ដែលជាប់គាំង ដើម្បីបង្រួបបង្រួមប្រទេសកោះស៊ីបដែលបែកបាក់ជាក្រុមកុលសម្ព័ន្ធ។លោកស្រី រ៉ូប៊ឺតា ម៉េតសូឡា (Roberta Metsola) បានថ្លែងថា លោកស្រី បានទាក់ទងដោយផ្ទាល់នូវជំហររបស់សភាសហភាពអឺរ៉ុបទៅកាន់លោកអគ្គលេខាធិការUN អង់តូនីញ៉ូ ហ្គុយតឺរេស ( Antonio Guterres) នៅទីក្រុងញូវយ៉កកាលពីខែមុន។ លោកស្រីម៉េតសូឡា បាននិយាយថា លោកស្រី បានប្រាប់ ហ្គុយតឺរេស ថាអឺរ៉ុប នឹងមិនអស់ចិត្តទេ ដរាបណាប្រទេសកោះស៊ីបនេះ នៅតែបែកបាក់គ្នានោះ។លោកស្រី បាននិយាយបន្ទាប់ពីកិច្ចពិភាក្សាជាមួយលោក Nikos Christodoulides ប្រធានាធិបតីនៃប្រទេសកោះនេះថា៖«នេះមិនមែនគ្រាន់តែជាបញ្ហារបស់កោះស៊ីបទេប៉ុណ្ណោះទេ ប៉ុន្តែវាគឺជាបញ្ហារបស់អឺរ៉ុប»។លោកស្រី ម៉េតសូឡា ក៏បានចូលរួមក្នុងការដង្ហែក្បួនយោធាកាលពីថ្ងៃអាទិត្យ ដើម្បីប្រារព្ធខួបលើកទី ៦៣ នៃការឯករាជ្យរបស់ប្រទេសកោះស៊ីបពីអាណានិគមរបស់អង់គ្លេសដែរ។ លោក Christodoulides បានថ្លែងប្រាប់អ្នកសារព័ត៌មានកាលពីថ្ងៃអាទិត្យថា ការពិគ្រោះយោបល់នៅតែបន្តលើការតែងតាំងបេសកជនអង្គការសហប្រជាជាតិ។ លោកបានធ្វើការបន្តកិច្ចចរចាបង្រួបបង្រួមជាមួយក្រុមជនជាតិដើមទួរគី ដែលបំបែកខ្លួន ជាចំណុចសំខាន់បំផុតនៃរដ្ឋបាលក្រិកជនជាតិដើមស៊ីបរបស់លោក។ កិច្ចចរចាបានជាប់គាំងដ៏ជ្រៅ ចាប់តាំងពីការកិច្ចប្រឹងប្រែងចុងក្រោយក្នុងកិច្ចព្រមព្រៀងសន្តិភាព បានបញ្ចប់ក្នុងរដូវក្ដៅឆ្នាំ២០១៧។

ព្រឹទ្ធសភាលើកទឹកចិត្តរាជរដ្ឋាភិបាលថ្មី បង្កើនសកម្មភាពដោះស្រាយបញ្ហានៅសេសសល់

2023/10/02 10:33:51 am        149
Facebook Telegram Linkin
ភ្នំពេញ៖ ព្រឹទ្ធសភាជាតិ នៃព្រះរាជាណាចក្រកម្ពុជា បានលើកទឹកចិត្តដល់រាជរដ្ឋាភិបាលថ្មី ត្រូវបង្កើនសកម្មភាពដោះស្រាយបញ្ហា ដែលនៅសេសសល់ ដើម្បីពន្លឿនសន្ទុះរីកចម្រើនសង្គម សេដ្ឋកិច្ច ប្រកបដោយចីរភាព និងបរិយាបន្ន ហើយក៏ជឿជាក់ផងដែរ ចំពោះរាជរដ្ឋាភិបាលថ្មី ដែលដឹកនាំដោយសម្ដេចធិបតី ហ៊ុន ម៉ាណែត នឹងបន្តអភិវឌ្ឍន៍ប្រទេសឲ្យកាន់តែរីកចម្រើន ។បន្ទាប់ពីបើកសម័យប្រជុំលើកទី១១ នីតិកាលទី៤ ដើម្បីស្ដាប់របាយការណ៍របស់គណៈកម្មាធិការ អចិន្ត្រៃយ៍ស្តីពី សកម្មភាព និងលទ្ធផលការងាររបស់ព្រឹទ្ធសភា នៅចន្លោះសម័យប្រជុំលើកទី១០ និងលើកទី១១ ក្រោមអធិបតីភាពសម្ដេចវិបុលសេនាភក្តី សាយ ឈុំ ប្រធានព្រឹទ្ធសភាជាតិ នៅថ្ងៃទី២ ខែតុលា ឆ្នាំ២០២៣ ឯកឧត្តម ម៉ម ប៊ុននាង អ្នកនាំពាក្យព្រឹទ្ធសភា បានមានប្រសាសន៍ថា តាមដំណើរបេសកកម្មទៅកាន់មូលដ្ឋាន ព្រឹទ្ធសភាសូមវាយតម្លៃខ្ពស់​ ចំពោះលទ្ធផល និង​សមិទ្ធផលថ្មីៗ​បន្ថែមទៀត ក្នុងការអភិវឌ្ឍសង្គមសេដ្ឋកិច្ច លើគ្រប់វិស័យ ដែលរាជរដ្ឋាភិបាល​ខិតខំសម្រេចបាន ក្នុងការរក្សាស្ថិរភាពម៉ាក្រូសេដ្ឋកិច្ច ​និងសេដ្ឋកិច្ចជាតិបន្តមានកំណើនវិជ្ជមាន ដើម្បីពង្រឹងគោលនយោបាយគាំពារសង្គម ​ដោយធានាបាននូវជីភាពរស់នៅរបស់ប្រជាពលរដ្ឋ និងមន្ត្រីរាជការទូទាំងប្រទេស ។ឯកឧត្តមបន្តថា ជារួមរាជរដ្ឋាភិបាលបានបន្តជំរុញអនុវត្តន៍ដោយសកម្ម​ នូវរាល់កំណែទម្រង់រដ្ឋស៊ី​ជម្រៅរបស់ខ្លួន ​លើគ្រប់វិស័យដោយប្រកាន់យកអភិបាលកិច្ចល្អជាស្នូល ហើយដំណើរការ​អនុវត្តលទ្ធិប្រជាធិបតេយ្យទាំងថ្នាក់ជាតិ ​និងថ្នាក់ក្រោមជាតិ ​ត្រូវបានពង្រឹងពង្រីកឥតឈប់ឈរ និងកំពុងបន្តទៅមុខដោយរលូនតាមគន្លងនីតិរដ្ឋ ដោយឆ្លុះបញ្ចាំងតាមរយៈការបោះឆ្នោត​អាណត្តិទី៧កន្លងទៅ ។ ជាមួយនេះ ព្រឹទ្ធសភាជាតិ បានសម្ដែងនូវការដឹងគុណយ៉ាងជ្រាលជ្រៅ ចំពោះការគាំទ្រដ៏ថ្លៃថ្លា​ពី​គ្រប់មជ្ឈដ្ឋានដៃគូនានា និងគ្រប់ស្ថាប័នជាតិ ​ដែល​ញ៉ាំង​ឲ្យព្រឹទ្ធសភាដំណើរការទៅមុខដោយរលូន ៕ អត្ថបទ បាន សុខរិទ្ធិ

បណ្ដាញសង្គម

ព័ត៌មានថ្មីៗ

ពលរដ្ឋវេណេស៊ុយអេឡាព្រួយបារម្ភពីជម្លោះ ខណៈការដំឡើងយោធាអាមេរិកនៅតំបន់ការ៉ាអ៊ីប
09/07/2025 09:09 AM
Facebook Telegram Linkin
កូនឈើចម្រុះជាង៨ពាន់ដើម ត្រូវបានអាជ្ញាធរជាតិអប្សរា ចែកជូនដោយឥតគិតថ្លៃដល់ព្រះសង្ឃ និងពលរដ្ឋយកទៅដាំដុះកាលពីចុងខែសីហា
09/07/2025 09:09 AM
Facebook Telegram Linkin
ឧត្តមសេនីយ៍ឯក ជួន ណារិន្ទ បញ្ជាឲ្យស្រាវជ្រាវ តាមចាប់ជនក្លែងបន្លំ ជានគរបាលដើរទារលុយពលរដ្ឋនៅខណ្ឌច្បាអំពៅ
09/07/2025 09:09 AM
Facebook Telegram Linkin
កូរ៉េខាងត្បូងសន្យាគាំទ្រពលរដ្ឋកូរ៉េដែលត្រូវបានចាប់ខ្លួននៅក្នុងការវាយឆ្មក់អន្តោប្រវេសន៍របស់អាមេរិក
09/07/2025 09:09 AM
Facebook Telegram Linkin
អ៊ីស្រាអែលបំផ្លាញអគារខ្ពស់ទី ២ ស្របពេលដែលការវាយប្រហារទីក្រុងហ្កាហ្សាកាន់តែខ្លាំងក្លាឡើង
09/07/2025 08:09 AM
Facebook Telegram Linkin
ពលរដ្ឋកហ្កាហ្សា បដិសេធន៍ចាកចេញពីទីក្រុងហ្កាហ្សា ក្រោយយោធាអ៊ីស្រាអែលបញ្ជាឲ្យជម្លៀសខ្លួន
09/07/2025 08:09 AM
Facebook Telegram Linkin
អាជ្ញាធរខណ្ឌចំការមន ឃាត់ខ្លួនយុវជន៦៧នាក់ និងម៉ូតូជាង ៣០គ្រឿង អប់រំណែនាំ កុំឱ្យមានការប្រមូលផ្តុំ
09/07/2025 08:09 AM
Facebook Telegram Linkin
សម្តេចធិបតីនាយករដ្ឋមន្រ្តីនៃកម្ពុជា ក្រើនរំលឹកដល់ពលរដ្ឋគោរពច្បាប់ចរាចរណ៍ឲ្យបានខ្ជាប់ខ្ជួន ពេលធ្វើដំណើរ ក្នុងឱកាសបុណ្យកាន់បិណ្ឌនេះ
09/07/2025 08:09 AM
Facebook Telegram Linkin
កងកម្លាំងនគរបាលខេត្តកោះកុងបានរៀបចំដេីម្បីការពារ សន្តិសុខ សុវត្ថិភាព និងសណ្ដាប់ធ្នាប់ ក្នុងកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) នៅខេត្តកោះកុង
09/06/2025 07:09 PM
Facebook Telegram Linkin
អធិការបតីអាល្លឺម៉ង់ សារភាពថា អឺរ៉ុបមិនអាចដើរតួនាទីជាសកល ដែលខ្លួនចង់បាននោះទេ
09/06/2025 05:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.