នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេច​តេជោចាត់ទុកពាក្យស្លោក «បរាជ័យក្នុងសាលាប្រសើរជាងបរាជ័យក្នុងជីវិត» របស់សម្ដេច​ធិបតី​មានតម្លៃ​មិនសាបសូន្យ
សម្ដេចធិបតីអញ្ជើញចុះត្រួតពិនិត្យ និងសួរសុខទុក្ខពលរដ្ឋរងគ្រោះដោយទឹកជំនន់នៅបន្ទាយមានជ័យ
សម្តេចតេជោ ហ៊ុន សែន អនុញ្ញាតឱ្យ លោកជំទាវ រ៉េឡែន ស្យ៉ាល់ តាហ្គាឡ័រ លៀវហ្វាឡានី (Raylene Siale Tagaloa LIUFALANI) ឯកអគ្គរដ្ឋទូតតែងតាំងថ្មី នៃប្រទេសនូវែលសេឡង់ ប្រចាំនៅកម្ពុជាចូលជួប និងប្រគល់សារតាំង
សម្តេចតេជោ ហ៊ុន សែន អនុញ្ញាតឱ្យ ឯកឧត្តម ទ្រីសម៉ាន់ អ៉ីហ្គោរ៍ (Driesmans Igor) ឯកអគ្គរាជទូតសហភាពអឺរ៉ុបប្រចាំកម្ពុជា និងជាប្រេសិតពិសេស EU ប្រចាំនៅមីយ៉ាន់ម៉ា ចូលជួបសម្ដែងការគួរសម

នយោបាយ​ និង ការអភិវឌ្ឍន៍

សម្តេចតេជោអំពាវនាវឱ្យសារមន្ទីរ ឬអ្នកដែលកំពុងរក្សាទុកវត្ថុបុរាណខ្មែរ មេត្តាប្រគល់មកជូនកម្ពុជាវិញ

2023/03/17 06:12:05 pm        400
Facebook Telegram Linkin
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានធ្វើការអំពាវនាវដល់សារមន្ទីរ​នៃបណ្តាប្រទេសដទៃ ឬអ្នកដែលកំពុងរក្សាទុកវត្ថុបុរាណខ្មែរសូមមេត្តាប្រគល់ជូនមកកម្ពុជាវិញ។សម្តេចតេជោ បានធ្វើការអំពាវនាវបែបនេះ ខណៈអញ្ជើញជាអធិបតីដ៏ខ្ពង់ខ្ពស់ក្នុងពិធីទទួល រតន វត្ថុ របស់ខ្មែរមួយចំនួនដែលទើបនឹងទាមទារវិលត្រឡប់យកមកវិញពីបរទេស ដែលធ្វើឡើងនៅវិមានសន្តិភាព នាព្រឹកថ្ងៃទី១៧មីនានេះ។សម្តេចបានមានប្រសាសន៍ថា កម្ពុជាកំពុងបន្តស្រាវជ្រាវប្រមូល​ភស្តុតាង​នៃសម្បត្តិវប្បធម៌​ដែលត្រូវបានលួចចេញពីកម្ពុជាដោយខុសច្បាប់ និងដំណើរការ​ទាមទារ​ដោយសហការជាមួយ​សហគមន៍​អន្តរជាតិ និងគ្រប់ភាគីពាក់ព័ន្ធតាមគ្រប់មធ្យោបាយចរចាដំណើរការកាទូត រដ្ឋបាល ឬតុលាការក្នុងករណីចាំបាច់។ក្នុងន័យនេះសម្តេចក៏បានយកឱកាសនេះអំពាវនាវដល់សារមន្ទីរ ឬអ្នកដែលកំពុងរក្សាទុកវត្ថុបុរាណ​ខ្មែរមេត្តាប្រគល់មកជូនកម្ពុជាវិញ។គួរបញ្ជាក់ថា រតនវត្ថុដែលកម្ពុជាទទួលបានពីបរទេសវិញទាំងធំ និងតូច គឺមានរាប់ រយគ្រឿង ក្នុងនោះមានធ្វើពីថ្ម សំរឹទ្ធ និងមាស។ រតនវត្ថុទាំងនេះ ភាគច្រើនទទួលបានមកពីសហរដ្ឋអាមេរិក និងអង់គ្លេស។បើតាមលោកជំទាវ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈបញ្ជាក់ថា រតនវត្ថុដែល​ដាក់បង្ហាញក្នុងពិធីទទួលក្រោមអធិបតីភាព សម្តេចតេជោ គឺបង្ហាញតែមួយចំនួន​ប៉ុណ្ណោះ ដោយឡែករតនៈវត្ថុមួយចំនួនដែលកំពុងស្ថិត ក្នុង ដំណាក់ កាល ជួសជុលនោះ មិនត្រូវបានបង្ហាញនោះឡើយ៕

ជប៉ុនជួយសង់មជ្ឈមណ្ឌលបច្ចេកវិទ្យាសហគមន៍ នឹងផ្ដល់អត្ថប្រយោជន៍ដល់ពលរដ្ឋជិត១ ម៉ឺននាក់ នៅខេត្តតាកែវ

2023/03/17 05:07:43 pm        159
Facebook Telegram Linkin
ភ្នំពេញ៖ រដ្ឋាភិបាលនៃប្រទេសជប៉ុន បានផ្ដល់ជំនួយថវិកាប្រមាណជាង ១៤ម៉ឺនដុល្លារ ដើម្បី សាងសង់នូវមជ្ឈមណ្ឌលបច្ចេកវិទ្យាសហគមន៍មួយ នៅក្នុងស្រុកបាទី ខេត្តតាកែវ ដោយនឹង ផ្ដល់អត្ថប្រយោជន៍ ដល់ប្រជាពលរដ្ឋនៅតំបន់ប្រមាណជិត ១ម៉ឺននាក់ បានសិក្សាបច្ចេកវិទ្យាឌីជីថល ។ក្នុងពិធីចុះហត្ថលេខាលើកិច្ចសន្យា ផ្ដល់ជំនួយឥតសំណង សម្រាប់គម្រោងទ្រង់ទ្រាយតូចសន្តិសុខមនុស្សជាតិ នៅថ្ងៃទី១៧ ខែមីនា ឆ្នាំ២០២៣ ឯកឧត្តម អ៊ូអិណុ អាត់ស៊ូស៊ី ឯកអគ្គ រដ្ឋទូតជប៉ុនប្រចាំនៅកម្ពុជា បានថ្លែងថា គម្រោងដែលនឹងត្រូវអនុវត្ត​ដោយមន្ទីរប្រៃសនីយ៍ និងទូរគមនាគមន៍ខេត្តតាកែវ នឹងសាងសង់មជ្ឈមណ្ឌលបច្ចេក​វិទ្យា​សហគមន៍​នៅក្នុងសាលារៀនរដ្ឋ ក្នុងស្រុកបាទី ខណៈយុវជនជាច្រើននៅក្នុងសហគមន៍ជនបទ មិនទទួលបានឱកាសច្រើន ដើម្បីសិក្សាបច្ចេកវិទ្យាព័ត៌មាន និងគមនាគមន៍ និងបច្ចេកវិទ្យាឌីជីថល ដោយសារកង្វះហេដ្ឋារចនាសម្ព័ន្ធ និងកម្មវិធីសិក្សាបច្ចេកវិទ្យាព័ត៌មាន និងគមនាគមន៍ ។ឯកឧត្តមបានបន្តថា ពាក់ព័ន្ធនឹងបញ្ហានេះហើយ ទើបរដ្ឋាភិបាលជប៉ុនបានផ្ដល់ជំនួយ សម្រាប់អនុវត្តគម្រោងនេះ រំពឹងថា នឹងផ្ដល់អត្ថប្រយោជន៍ដល់ប្រជាជនប្រមាណ ៨ ០០០នាក់ និងសិស្សប្រមាណ ១ ០០០នាក់ នៅក្នុងតំបន់នោះ។ តាមរយៈការបង្កើតនូវមជ្ឈមណ្ឌល​បច្ចេកវិទ្យាសហគមន៍ដំបូងគេបង្អស់ នឹងផ្ដល់ឱកាស ដើម្បីសិក្សាបច្ចេកវិទ្យាព័ត៌មាន និងគមនាគមន៍ និងបច្ចេកវិទ្យាឌីជីថល ។ក្នុងឱកាសនោះ ឯកឧត្តម វា វណ្ណដេត រដ្ឋមន្ត្រីក្រសួងប្រៃសនីយ៍ និងទូរគមនាគមន៍ មានប្រសាសន៍ថា គម្រោងនេះ ពិតជាមានសារសំខាន់ណាស់ ក្នុងការជួយពង្រឹង និងអភិវឌ្ឍន៍វិស័យអប់រំនៅកម្ពុជា ពិសេសបច្ចេកវិទ្យាឌីជីថល ។ឯកឧត្តមរដ្ឋមន្ត្រី បានថ្លែងអំណរគុណដល់រដ្ឋាភិបាល និងប្រជាជនជប៉ុន ដែលតែងតែផ្ដល់នូវជំនួយជាបន្តបន្ទាប់ ដើម្បីជួយអភិវឌ្ឍន៍ប្រទេសកម្ពុជា ឲ្យកាន់តែមានភាពរីកចម្រើន ៕អត្ថបទ បាន សុខរិទ្ធិ

សម្ដេចតេជោ ហ៊ុន សែន អញ្ជើញជាអធិបតីក្នុងពិធីទទួលរតនវត្ថុបុរាណខ្មែរដែលបានត្រឡប់មកវិញ

2023/03/17 04:41:29 pm        513
Facebook Telegram Linkin
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី បានអញ្ជើញជាអធិបតីភាពដ៏ខ្ពង់ខ្ពស់នៅក្នុងពិធីទទួលរតនវត្ថុបុរាណខ្មែរដែលបានប្រគល់ជូនព្រះរាជាណាចក្រកម្ពុជាវិញ នៅវិមានសន្តិភាព នាព្រឹកថ្ងៃទី១៧ ខែមីនា ឆ្នាំ២០២៣នេះ។ការបញ្ជូនត្រឡប់មកវិញនៃសម្បត្តិវប្បធម៌ខ្មែរទាំងនេះ គឺជាកិច្ចសហការយ៉ាងសកម្មបំផុតពីគ្រប់ភាគីពាក់ព័ន្ធ ទាំងស្ថាប័នរដ្ឋ ផ្នែកឯកជន អ្នកជំនាញជាតិ និងអន្តរជាតិ និងទំនាក់ទំនងយ៉ាងជិតស្និទ្ធជាមួយបណ្តាប្រទេសនានា ទាំងក្នុងក្របខ័ណ្ឌទ្វេភាគី ពហុភាគី និងក្របខ័ណ្ឌនៃអង្គការយូណេស្កូ ជាពិសេស កិច្ចសហប្រតិបត្តិការរវាងរាជរដ្ឋាភិបាលកម្ពុជា និងរដ្ឋាភិបាលសហរដ្ឋអាមេរិក ដោយទទួលបានលទ្ធផលដូចជា៖កិច្ចព្រមព្រៀងមួយ នាថ្ងៃទី១៨ ខែកញ្ញា ឆ្នាំ២០២០ រវាងក្រសួងវប្បធម៌ និងវិចិត្រសិល្បៈ ជាតំណាងនៃរាជរដ្ឋាភិបាលកម្ពុជា និងគ្រួសារលោក ឌូគ្លាស ឡាតហ្វដ (Douglas Latchford) បានប្រគល់ជូនមកកម្ពុជាវិញ នូវវត្ថុបុរាណខ្មែរទាំងអស់ដែលកាន់កាប់រក្សាទុកដោយគ្រួសារ លោកឡាត ហ្វដ។បន្ថែមពីលើនេះ សម្បត្តិវប្បធម៌ខ្មែរសំខាន់ៗជាច្រើនដែលកាន់កាប់រក្សាទុកដោយសារមន្ទីរនានា និងអ្នកកាន់កាប់សមុច្ច័យឯកជន (មួយចំនួនរឹបអូសបានដោយសមត្ថកិច្ចអាមេរិក និងមួយចំនួនទៀតតាមរយៈការប្រគល់ដោយស្ម័គ្រចិត្ត) ក៏ត្រូវបានបញ្ជូន ត្រឡប់មកកម្ពុជាវិញជាបន្តបន្ទាប់ពីសហរដ្ឋអាមេរិក និងចក្រភពអង់គ្លេស។ ថ្មីៗនេះទៀតសោត គ្រឿងអលង្ការបុរាណខ្មែរធ្វើពីមាស និងលោហៈមានតម្លៃទាំង ធំ-តូច ចំនួន ៧៧គ្រឿង ត្រូវបាននាំយកពីចក្រភពអង់គ្លេសមកដល់កម្ពុជា នៅថ្ងៃទី១៧ ខែកុម្ភៈ ឆ្នាំ២០២៣ ដោយក្រុមការងារកម្ពុជាដឹកនាំដោយ ឯកឧត្តម ហ៊ុន ម៉ានី ក្នុងនាមតំណាងរាជរដ្ឋាភិបាលកម្ពុជា ក្រោមកិច្ចសហការជាមួយរដ្ឋាភិបាលចក្រភពអង់គ្លេស រដ្ឋាភិបាលសហរដ្ឋអាមេរិក និងការជួយសម្របសម្រួលពីស្ថានទូតកម្ពុជា។ទន្ទឹមនឹងនេះ ក្រសួងវប្បធម៌ និងវិចិត្រសិល្បៈ បាន និងកំពុងសហការជាមួយរដ្ឋាភិបាល​សហរដ្ឋអាមេរិក និងប្រទេសដ៏ទៃទៀត ក៏ដូចជាបន្តការចរចាជាមួយស្ថាប័ន និងអ្នកកាន់កាប់​សមុច្ច័យឯកជន ដើម្បីរៀបចំនីតិវិធីទាមទារ និងបញ្ជូនវត្ថុបុរាណខ្មែរជាច្រើនទៀត ត្រឡប់មកកម្ពុជាវិញ។ក្នុងចំណោមសម្បត្តិវប្បធម៌ខ្មែរដែលទទួលបានមកវិញនេះ មានរូបបដិមាសំខាន់ៗមួយចំនួនផ្នែកព្រហ្មញ្ញសាសនា និងពុទ្ធសាសនា ព្រមទាំងគ្រឿងអលង្ការបុរាណ ក្នុងសម័យមុនអង្គរ និងសម័យអង្គរ ជាពិសេស បដិមាថ្មធំៗដូចជា៖ ព្រះឥសូរ និងព្រះស្កន្ទ, ព្រះស្កន្ទគង់លើក្ងោក និងព្រះគណេស ដែលមានប្រភពដើមមកពី​រមណីយដ្ឋាន​ប្រាសាទកោះកេរ អតីតរាជធានីនៃអាណាចក្រខ្មែរ​នៅសតវត្សរ៍ទី១០នៃគ.ស. ដែលធ្លាប់ជាគោលដៅនៃការលួចទ្រង់ទ្រាយធំអស់ជាច្រើនឆ្នាំនៅក្នុងអំឡុងនៃសម័យសង្គ្រាមស៊ីវិល និងអសន្តិសុខក្នុងស្រុក។ប្រជាជនកម្ពុជាទាំងមូល ពិតជាមានមោទនភាព និងសេចក្តីរំភើបរីករាយឥតឧបមា ជាមួយនឹងការ​អបអរ​សាទរ​អស់ពីដួងចិត្ត ចំពោះការវិលត្រឡប់មកវិញនូវរតនសម្បត្តិវប្បធម៌​ដែលជាព្រលឹង​ដូនតារបស់ខ្លួន និងជាអត្តសញ្ញាណជាតិ ក្រោមដំបូលនៃសុខសន្តិភាព និងការដឹកនាំប្រកប​ដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា៕

ទេសរដ្ឋមន្រ្តី គន់ គីម ដាក់ឱសានវាទឱ្យអភិបាលខេត្តឧត្ដរមានជ័យ ដោះស្រាយបញ្ហាវិវាទដីធ្លី ឱ្យអស់ត្រឹមរយៈពេលខែប្រាំ មុនពេលបោះឆ្នោត

2023/03/16 09:07:26 pm        595
Facebook Telegram Linkin
ឧត្តរមានជ័យ៖ ទេសរដ្ឋមន្រ្តី គន់ គីម ប្រធានក្រុមការងាររាជរដ្ឋាភិបាល ចុះមូលដ្ឋាន​ខេត្តឧត្តរមានជ័យ ដាក់​ឱសានវាទ​ឱ្យ​អភិបាលខេត្តឧត្ដរមានជ័យ ឯកឧត្តម ប៉ែន កុសល្យ ពន្លឿនការដោះស្រាយបញ្ហាវិវាទដីធ្លីជូនពលរដ្ឋឱ្យអស់ត្រឹមរយៈពេលខែប្រាំ មុនពេល​បោះឆ្នោតជ្រើសតាំងតំណាងរាស្ដ្រ នាពេលខាងមុខ ។ថ្លែងក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០២២ និងលើក​ទិសដៅ​ការងារ​ឆ្នាំ២០២៣ ​របស់រដ្ឋបាលខេត្តឧត្តរមានជ័យ នៅថ្ងៃទី១៤ ខែមីនា ឆ្នាំ២០២៣ ឯកឧត្តមនាយឧត្តម​សេនីយ៍កិត្តិសង្គហបណ្ឌិត គន់ គីម ទេសរដ្ឋមន្រ្តីទទួលបន្ទុកបេសកម្មពិសេស និងជាប្រធាន​ក្រុមការងាររាជរដ្ឋាភិបាលកម្ពុជា ចុះមូលដ្ឋានខេត្តឧត្តរមានជ័យ បាន​រម្លឹកតឿន​ដល់អាជ្ញាធរខេត្ត ក្រុង ស្រុក និងមូលដ្ឋានឃុំ សង្កាត់ ទាំងអស់ក្នុងខេត្តឧត្តរមានជ័យ ធ្វើ​យ៉ាងណា​ត្រូវខិតខំ​ពន្លឿនការដោះស្រាយបញ្ហាទំនាស់វិវាទដីធ្លី ​ដែលនៅ​សេសសល់​ក្នុងខេត្តឧត្តរមានជ័យ ឲ្យបានឆាប់ និងចប់ មុនពេលបោះឆ្នោតជ្រើសតាំងតំណាងរាស្ដ្រ ​នៅពេលខាងមុខនេះ ស្របតាម​យុទ្ធសាស្រ្តកោលនយោបាយរបស់រាជរដ្ឋាភិបាល។ឯកឧត្តមទេសរដ្ឋមន្រ្តី គន់ គីម បានឲ្យដឹងទៀតថា ​បញ្ហាទំនាស់វិវាទដីធ្លី​ នៅតែជាបញ្ហារសើបមួយ​ហើយបញ្ហាវិវាទដីធ្លីដែលនៅសេសសល់ខ្លះៗនោះ នៅតែបន្តមានពុំទាន់បានដោះស្រាយ​ឱ្យអស់​ដែលយើងគ្រប់គ្នា ត្រូវរួមគ្នាយកចិត្តទុកដាក់ក្នុងការដោះស្រាយជាបន្ទាន់ ជូនប្រជាពលរដ្ឋឱ្យអស់ ។​ឯកឧត្តមទេសរដ្ឋមន្រ្តី បានសង្កត់ធ្ងន់ទៀតថា ចំពោះបញ្ហាដីធ្លីនេះ ​ហាក់បីដូចជាមិនទាន់​បាន​ដោះស្រាយ​ ឱ្យបានចប់មួយរយភាគរយនោះទេ​ ។​បញ្ហានេះ​អាជ្ញាធរខេត្ត​ រួមទាំងអាជ្ញាធរនៅ​តាម​ក្រុងស្រុក ឃុំសង្កាត់ ត្រូវយកចិត្តទុកដាក់គិតគូរ​ឲ្យបានខ្ពស់ក្នុងការពន្លឿន​ការដោះស្រាយ​បញ្ហា​ប្រឈមទាំងអស់នេះ ឱ្យលឿន និងឆាប់រហ័ស​ក្នុងរយៈពេលមុនការបោះឆ្នោត ឈានចូលមកដល់។ទេសរដ្ឋមន្រ្តី គន់ គីម ប្រធានក្រុមការងាររាជរដ្ឋាភិបាល បានបញ្ជាក់ថា ការដោះស្រាយ​បញ្ហាវិវាទ​ក្រៅប្រព័ន្ធតុលាការ​គឺជម្រើសមួយដ៏ល្អដែលថ្នាក់ដឹកនាំ​ត្រូវ​យក​ចិត្តទុកដាក់គិតគូរ​និង​ជា​កត្តា​មួយ​ដ៏​សំខាន់ប្រសិន​បើអាជ្ញាធរខេត្ត អាចធ្វើការដោះស្រាយបាននោះ។សូមរំលឹកថា ​បញ្ហាទំនាស់វិវាទដីធ្លីនេះ​កន្លងមក ​ការដោះស្រាយ​ គឺ​មានការ​ស្មុគស្មាញ​និង​ពន្យា​ពេល​អូសបន្លាយយូរ ធ្វើឱ្យ​ប្រជាពលរដ្ឋមានការមិនពេញចិត្ត​ ពេលខ្លះ​ប្រជាពលរដ្ឋ​ត្រូវ​ចាប់ខ្លួន ក៏​មាន​ចំពោះបញ្ហាវិវាទដីធ្លីនេះ៕ 

សម្ដេចអំពាវនាវឱ្យជំរុញឱ្យយុវជនលេងល្បែងប្រជាប្រិយ ឬរាំលេងកម្សាន្តជាមួយបទប្រពៃណីខ្មែរ

2023/03/16 06:05:03 pm        423
Facebook Telegram Linkin
ភ្នំពេញ៖ ខណៈបុណ្យចូលឆ្នាំជិតឈានមកដល់ សម្ដេចតេជោ ហ៊ុន សែន នាយករដ្ឋមន្ត្រី បានអំពាវនាវជំរុញឱ្យយុវជនលេងល្បែងប្រជាប្រិយ ឬរាំលេងកម្សាន្តជាមួយបទប្រពៃណីខ្មែរយើង ខណៈដែលយុវជនបច្ចុប្បន្ន សឹងភ្លេចក្បាច់រាំប្រពៃណី ចូលចិត្តតែបទញាក់ៗជាដើមនោះ។ក្នុងឱកាសអញ្ជើញប្រគល់សញ្ញាបត្រជូននិស្សិត សាកលវិទ្យាល័យបៀលប្រាយជាង ៤ពាន់នាក់ នៅព្រឹកថ្ងៃទី១៦មីនានេះ សម្តេចតេជោ ប្រមុខរាជរដ្ឋាភិបាលបានឆ្លៀតដាស់តឿន​ដល់យុវវ័យ​ឱ្យលេងល្បែងប្រជាប្រិយ ឬរាំលេងកម្សាន្តជាមួយបទប្រពៃណីខ្មែរយើង ដោយមិនត្រូវភ្លេចដែលនាំឱ្យឈានទៅបាត់បង់នោះទេ។សម្ដេចតេជោ ហ៊ុន សែន បានមានប្រសាសន៍បន្តថា ឥឡូវនេះជាសម័យឌីស្កូ យុវជន​គេចូលចិត្តតែឌីស្កូ អ៊ីចឹងគួរតែជំរុញបញ្ហានេះនៅតាមសាលារៀន​និងមិនគ្រាន់តែនៅតាមសាលាទេ ព្រោះមិនមានអ្នកទៅចូលឆ្នាំតាមសាលា ប៉ុន្តែក៏គួរតែបង្ហាត់បង្ហាញអំពីក្បួនខ្នាត​នេះនៅ​តាមសាលាផងដែរ។ សម្តេចបន្តថា ទោះជាយ៉ាងណា គប្បីមានការតម្រង់ទិសសម្រាប់អ្នកដែលទៅលេងកន្លែងនេះ កន្លែងនោះ ឬតាមវត្តអារាមជាដើម ហើយនៅតាមវិទ្យុ និងទូរទស្សន៍ ក៏អាចជាចំណែក​មួយ​ក្នុងការជួយផងដែរ ដូចជាការបង្ហាញនៅក្នុងឈុតឆាកដែលបានលេងដូច​ជាការបោះអង្គុញចោលឈូង ឬស្តេចចង់ជាដើម៕

សម្តេចតេជោហ៊ុន សែន អះអាងជាថ្មីម្តងទៀតថា គ្មានវត្តមានកងទ័ពចិនឈរជើងនៅកម្ពុជានោះទេ

2023/03/16 05:22:32 pm        587
Facebook Telegram Linkin
ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តី បានអះអាងជាថ្មីម្តងទៀតថា គ្មានវត្តមានកងទ័ពចិន ឬកងទ័ពប្រទេសនាឈរជើងនៅកម្ពុជានោះទេ ការដែលកម្ពុជាកំពុងសាងសង់មូលដ្ឋានសមុទ្ររាមនាពេល បច្ចុប្បន្ននេះគឺធ្វើឡើងដើម្បីពង្រីកសមត្ថភាពបន្ថែមរបស់កងទ័ពជើងទឹករបស់ខ្លួនប៉ុណ្ណោះ ខណៈការធ្វើនេះក៏គ្មានការគំរាមកំហែងដល់អ្នកណានោះដែរ។ក្នុងឱកាសអញ្ជើញជាអធិបតីភាពក្នុងពិធីប្រគល់សញ្ញាបត្រជូននិស្សិត នៃសាកលវិទ្យាល័យបៀលប្រាយ សរុបប្រមាណ ៤,៥៦៦នាក់ នៅមជ្ឈមណ្ឌលសន្និបាត និងពិព័រណ៍កោះពេជ្រ នាព្រឹកថ្ងៃទី១៦ ខែមីនា ឆ្នាំ២០២៣នេះ សម្តេចតេជោ ហ៊ុន សែន បានសង្កត់ធ្ងន់ថា សូមផ្តាំទៅបណ្តាប្រទេសមួយ ចំនួនដែលធ្វើយុទ្ធនាការ​បង្ខូច​កេរ្តិ៍ឈ្មោះ​មកលើកម្ពុជា ដោយចោទប្រកាន់កម្ពុជាម្តងហើយម្តងទៀតថា កម្ពុជាអនុញ្ញាតឲ្យកងទ័ពចិនតាំងមូលដ្ឋានលើទឹកដីខ្លួននោះគឺមិនមែនជាការពិតនោះទេ។ជាមួយគ្នានោះដែរ សម្តេចតេជោ ហ៊ុន សែន នាយករដ្ឋមន្រ្តី ក៏បានបញ្ជាក់ប្រាប់ដល់បណ្តាប្រទេស​ទាំង​អស់ដែលជាមិត្តរបស់កម្ពុជាផងដែរថា បន្ទាប់ពីកម្ពុជាធ្វើការសាងសង់ ឬការស្តាកំពង់ផែ​របស់ខ្លួននៅខេត្តព្រះសីហនុរួចហើយនោះ កម្ពុជានឹងស្វាគមន៍គ្រប់នាវាប្រទេសទាំងអស់​ដែលចង់មកចូលសំចតនៅកម្ពុជា ហើយពេលនោះប្រសិនបើចង់ធ្វើសមយុទ្ធរួមគ្នា​ជាមួយកងទ័ព​កម្ពុជាក៏កម្ពុជាមិនបដិសេធនោះដែរ។សម្តេចតេជោ ហ៊ុន សែន ក៏បានឌឺដងដល់ប្រទេសខ្លះបានធ្វើការថតតាមប្រព័ន្ធផ្កាយរណបនៅជុំវិញ ការសាងសង់កំពង់ផែព្រះសីហនុផងដែរថា ការដែលកម្ពុជាសាងសង់នេះពុំមានការ​លួចលាក់​នោះទេ គឺ បានធ្វើឡើងដោយបើកចំហរ ខណៈពេលនេះក៏បានចាក់គ្រឹះរួចដែរ សូមប្រទេស​ដែលបានចោទប្រកាន់ កម្ពុជាលើផ្លូវផ្សេងនោះល្មមបញ្ចប់ការធ្វើយុទ្ធនាការបង្ខូចកេរ្តិ៍​កម្ពុជាបន្តទៀតទៅ។សម្តេចក៏បានពន្យល់បន្ថែមទៀតផងដែរថា សព្វថ្ងៃនេះកំពុងផែរបស់កម្ពុជាតូច ហើយរាក់ ដូច្នេះ ត្រូវតែពង្រីកបន្ថែមសម្រាប់ចូលសំចតនូវនាវាធំៗ មិនថានាវាកម្ពុជា ឬប្រទេសណានោះទេ គឺអាចចូលចត់ បានទាំងអស់បន្ទាប់ពីធ្វើការសាងសង់រួចនោះ៕ អត្ថបទ៖ បាន ចក់

បទវិភាគ៖ កន សាវាង្ស បម្រើមហិច្ឆតាបរទេសបំផ្លាញការបោះឆ្នោត

2023/03/16 04:34:19 pm        1050
Facebook Telegram Linkin
ភ្នំពេញ៖ កាលពីពេលថ្មីៗនេះមានប្រភពមួយបានចេញបញ្ជាក់អំពីគំនិតមិនល្អរបស់ កន សាវាង្ស ដែលជាដៃជើងរបស់ជនបរទេសកំពុងព្យាយាមបំផ្លាញប្រទេសកម្ពុជា។ នៅក្នុងការចុះផ្សាយនោះផងដែរបានលើកឡើងថា បន្ទាប់ពីមានរឿងរ៉ាវផែនការទុច្ចរិករបស់ VOD និង CCIM នាពេលនេះមានបុគ្គលិកទម្លាយដំណឹងថ្មីមួយទៀតថា៖ កន សាវាង្ស អ្នកសម្របសម្រួលផ្នែកអង្គេត និងតស៊ូមតិនៃអង្គការខុមហ្វ្រែលកំពុងបម្រើមហិច្ឆតាបរទេសបំផ្លាញការបោះឆ្នោតនៅកម្ពុជា។តើអង្គការខុមហ្រ្វែលជានរណា?អង្គការខុមហ្វ្រែល ជាអង្គក្រៅរដ្ឋាភិបាលមួយដែលតែងមានបំណងមិនល្អ និងត្រៀមខ្លួនរួចរាល់ក្នុងការជួយដល់ក្រុមមនុស្សដែលមានបំណងមិនល្អក្នុងការបង្កចលាចលនៅក្នុងប្រទេសកម្ពុជា។ អង្គការនេះ មានថវិកាគ្រប់គ្រាន់ ដើម្បីអនុវត្តផែនការទាំងឡាយនិងកំពុងតែ​អនុវត្ត​ជា​បណ្តើរៗនូវផែនការដែលបានរៀបចំ ដើម្បីធ្វើឱ្យប៉ះពាល់ដល់ការបោះឆ្នោត​ជាតិខាងមុខនេះ។ អង្គការខុមហ្រ្វែលដែលត្រូវបានដឹកនាំដោយគឹម​ ឈន និងកន សាវាង្ស មិនមែនជាអង្គការឯករាជ្យ ឬជាអង្គការមានវិជ្ជាជីវៈដែលបម្រី ឬត្រួតពិនិត្យការបោះឆ្នោតនោះទេ ពួកគេប្រព្រឹត្តផ្ទុយនឹងច្បាប់ស្ដីពីសមាគម និងអង្គការមិនមែនរដ្ឋាភិបាល។ អង្គការនេះទទួលបានការគាំទ្រមូលនិធិពី​ NPS និង NDI ធ្វើឡើងនៅក្នុងបំណងនាំឱ្យរំខាន ឬនាំឱ្យពហិការបង្ខូចការបោះឆ្នោតជួយគណបក្សប្រឆាំងផ្ដួលរំលំរដ្ឋាភិបាលស្របច្បាប់ដើម្បីសម្រេចបាននូវគោលដៅនៃការបង្កើតកងកម្លាំងនយោបាយរបស់ពួកគេ បានចាប់ដៃជាមួយ CLP CCHR CCIM CENTRAL ជាដើម ហើយ កន សាវាង្សទទួលខុសត្រូវចំពោះការទំនាក់ទំនង និងការសម្របសម្រួលការងារខាងលើ។លោក កន សាវាង្ស និងបក្សពួកការបញ្ចេញសារបែបនេះមិនមែនជាលើកទីមួយនោះឡើយវាធ្លាប់បានកើតឡើងម្ដងរួចមកហើយពាក់ព័ន្ធនឹងលោក គល់ បញ្ញា រួមជាមួយនឹងអង្គការសង្គមស៊ីវិលមួយចំនួនទៀតដែលមានប្រភព និងទទួលការផ្គត់ផ្គង់ពីក្រុមតែមួយ។ ពួកគេមានគោលបំណងមួយចំនួន ពិសេសដើម្បីជួយក្រុមបក្សប្រឆាំងក្រៅច្បាប់ និងស្រោចស្រង់បក្សប្រឆាំងដែលបានដួលរលំឱ្យងើបរស់ឡើងវិញ ហើយបើមិនជោគជ័យទេ គឺបំផ្លាញចោលនូវការបោះឆ្នោតតែម្តង។ រឿងរ៉ាវថ្មីៗនេះក៏មិនខុសប៉ុន្មាននឹងគម្រោងផ្សេងៗរបស់លោក គល់ បញ្ញា នោះដែរដោយមានភាពដូចគ្នានឹងអ្វីដែលបរទេសមួយចំនួនបានគិត ហើយគម្រោងទាំងនោះ អាចជាការរៀបចំរបស់បរទេសដែលកំពុងព្យាយាមបំផ្លាញកម្ពុជាផងដែរ។ ម្យ៉ាងទៀត បរទេសទាំងនោះ ក៏បានត្រៀមបញ្ចេញសាច់ប្រាក់ដើម្បីគាំទ្រលើគម្រោងការនេះដែរ។ យុទ្ធសាស្ត្ររបស់ពួកគេ គឺប្រើប្រាស់អង្គការសង្គមស៊ីវិលមួយចំនួន ដែលគាំទ្របក្សប្រឆាំង ដែលមានមូលដ្ឋាននៅប្រទេសកម្ពុជា និងទទួលបានការគាំទ្រមូលនិធិពីទីភ្នាក់ងារសហរដ្ឋអាមេរិក សម្រាប់ការអភិវឌ្ឍ USAID-IDI (Inclusive Development International) ធ្វើឡើងនៅក្នុងបំណងនាំឱ្យរំខាន ឬនាំឱ្យមានពហិការបង្ខូចការបោះឆ្នោត និងទម្លាក់តម្លៃលើដំណើរការបោះឆ្នោតសកលខាងមុខនេះ។ទង្វើដែលបក្សពួក លោក កន សាវាង្ស​ បានធ្វើគឺដើម្បីតែផលប្រយោជន៍ខ្លួន និងបក្សពួកប៉ុណ្ណោះដោយមិនខ្វល់អំពីផលប្រយោជន៍ជាតិទាំងមូលនោះឡើយដោយតាមរយៈការបំភ្លៃការពិត និងបង្កើតរឿងឡើងដែលសម្រេចបំណងក្នុងការបង្ខូច និងបង្អាប់ប្រទេសជាតិរបស់ខ្លួន។ លោក កន សាវាង្ស ខាងស្ដាំប្រជាពលរដ្ឋនៃប្រទេសកម្ពុជា គប្បីប្រយ័ត្ននឹងបុគ្គលបែបនេះដែលនឹងធ្វើឱ្យខូចប្រយោជន៍ជាតិ និងរំលោភសេចក្ដីទុកចិត្តពីប្រជាពលរដ្ឋ។ រួមជាមួយគ្នានោះ​អង្គការខុមហ្វ្រែលដែលអះអាងថា​ធ្វើសកម្មភាព ដើម្បីឱ្យកម្ពុជានោះ ការពិតបំណងពិតប្រាកដរបស់ពួកគេ​កំពុងតែអនុវត្តផែនការ​របស់បរទេសក្នុងការបំផ្លាញការបោះឆ្នោតនៅកម្ពុជា និងទាញទម្លាក់កិត្តិយសជាតិ ឱ្យធ្លាក់ចុះទៅតាមការចង់បានរបស់ចៅហ្វាយនាយបរទេសរបស់ពួកគេ។ការណ៍ខាងលើនេះជាទង្វើដែលមិនអាចអត់អោនឱ្យបានទេ ហើយការប៉ុនប៉ងបំផ្លាញការបោះឆ្នោត​នេះត្រូវប្រឈមចំពោះមុខច្បាប់ជាតិដែលមានជាធរមាន​ ក្រសួងមហាផ្ទៃ ឬអាជ្ញាធរមាន​សមត្ថកិច្ចគួរតែពិនិត្យមើលឱ្យបានស៊ីជម្រៅដើម្បីកុំឱ្យក្រុមជនបំផ្លាញជាតិ និងបដិវត្តន៍ពណ៌ជ្រកក្រោមអង្គការនេះទៀត៕ ដោយ៖ SK

ប្រសាសន៍សំខាន់ៗរបស់សម្តេចតេជោ ក្នុងឱកាសប្រគល់សញ្ញាបត្រជូននិស្សិត សាកលវិទ្យាល័យបៀលប្រាយជាង ៤ពាន់នាក់

2023/03/16 03:38:03 pm        595
Facebook Telegram Linkin
ភ្នំពេញ៖ ប្រសាសន៍សំខាន់ៗរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសអញ្ជើញជាអធិបតីភាពក្នុងពិធីប្រគល់សញ្ញាបត្រ​ជូននិស្សិត សាកលវិទ្យាល័យបៀលប្រាយសរុបប្រមាណ ៤,៥៦៦នាក់ នារី ២,០៣២នាក់ នៅមជ្ឈមណ្ឌលសន្និបាត និងពិព័រណ៍កោះពេជ្រ នៅព្រឹកថ្ងៃទី១៦ ខែមីនា ឆ្នាំ២០២៣នេះ ។សម្តេចតេជោ ហ៊ុន សែន មានប្រសាសន៍ថា មួយរយៈចុងក្រោយនេះមានសាកលវិទ្យាល័យ និងគ្រឹះស្ថានឧត្ដមសិក្សាជាច្រើនបានចែកសញ្ញាបត្រដល់និស្សិតជយលាភីរបស់ខ្លួនជាបន្តបន្ទាប់រាប់ម៉ឺននាក់ ដែលកត្តានេះបង្ហាញពីការរីកចម្រើន និងការអភិវឌ្ឍកម្ពុជា។សម្តេចតេជោ ហ៊ុន សែន មានប្រសាសន៍ថា មានគណបក្សខ្លះអះអាងថាខ្លួនជានិមិត្ដរូប នៃការផ្លាស់ប្តូរ តែគណបក្សប្រជាជនកម្ពុជាកំពុងដឹកនាំរាជរដ្ឋាភិបាលឯណេះទេ ដែលជានិមិត្ដរូប នៃផ្លាស់ប្តូរ គឺផ្លាស់ប្តូររបបវាលពិឃាត មកសន្តិភាព, ពីក្រីក្រ មកជាប្រទេសមានជីវភាពល្អប្រសើរ និងរីកចម្រើនជាបន្តបន្ទាប់..[]។សម្តេចតេជោ ហ៊ុន សែន បានលើកឡើងពីអតីតកាលរាជធានីភ្នំពេញ ដែលជារាជធានីគ្មានអគារខ្ពស់ៗ និងរីកចម្រើនដូចពេលបច្ចុប្បន្ននោះទេ ដែលជាក់ស្តែងកោះពេជ្រជាតំបន់ដាំបន្លែតិចតួច និងកន្លែងដងត្រី ក្លាយជាតំបន់ពាណិជ្ជកម្ម និងមានអគារខ្ពស់ៗកប់ពពក។សម្តេចតេជោ ហ៊ុន សែន បានប្រកាសថា ចាប់ពីពេលនេះតទៅ យើងត្រូវការពារភាពត្រឹមត្រូវរបស់គណបក្សប្រជាជនកម្ពុជា ហើយអ្នកគាំទ្រគណបក្សប្រជាជនកម្ពុជា រួមទាំងប្រជាពលរដ្ឋទូទាំងប្រទេស ត្រូវចងចាំក្នុងចិត្តថា «គណបក្សប្រជាជនកម្ពុជា ជានិមិត្តរូប នៃការផ្លាស់ប្តូរពិតប្រាកដ»។សម្តេចតេជោ ហ៊ុន សែន បានប្រកាសជាថ្មីពីភាពជោគជ័យក្នុងការប្រយុទ្ធប្រឆាំងជំងឺកូវីដ-១៩ ដោយកម្ពុជាគ្រប់គ្រងករណីឆ្លងប្រចាំថ្ងៃស្ថិតក្នុងកម្រិតតិចតួច ឬថ្ងៃខ្លះគ្មានករណីឆ្លងតែម្តង។ ទោះជាបែបនេះក្តីសម្តេចក៏នៅអំពាវនាវ ឱ្យប្រជាពលរដ្ឋបន្តការប្រុងប្រយ័ត្នជាប់ជានិច្ច។សម្តេចតេជោ ហ៊ុន សែន ណែនាំឱ្យគ្រឹះស្ថានឧត្ដមសិក្សានានា ពង្រឹងប្រសិទ្ធភាពនៃការអប់រំរបស់ខ្លួនត្រូវ មានគុណភាពនៃការអប់រំដូចគ្នា រវាងគ្រឹះស្ថានឧត្ដមសិក្សានៅរាជធានីភ្នំពេញ និងតាមបណ្ដាខេត្ត ដើម្បីផ្ដល់គុណអប់រំពិតប្រាកដដល់និស្សិត។សម្តេចតេជោ បានប្រកាសឱ្យមានស្មារតីរៀនជាប់ជានិច្ច ទោះជាសិក្សាដល់កម្រិតថ្នាក់ណា ឬមានតួនាទីក្នុងស្ថាប័នកំពូលរបស់ជាតិកម្រិតណាក៏ដោយ។សម្តេចតេជោ ហ៊ុន សែន បានផ្តាំផ្ញើដល់ស្ថាប័នរបស់រដ្ឋចេះពីរបៀបរបបធ្វើការ ជាពិសេសលិខិតបទដ្ឋាននានា ដែលត្រូវចេញផ្សាយជាសាធារណៈ ឬផ្ញើមកនាយករដ្ឋមន្ត្រី ត្រូវពិនិត្យឱ្យបានដិតដល់ និងប្រុងប្រយ័ត្នជាប់ជានិច្ច។សម្តេចតេជោ ហ៊ុន សែន បន្តអំពាវនាវដល់និស្សិតដែលទទួលបានជយលាភី ត្រូវខិតខំបន្តទៀត កុំទទួលបានសញ្ញាបត្រហើយឈប់រៀនសូត្រឱ្យសោះ។ សម្ដេចក៏បានណែនាំដូចគ្នានេះដល់មន្រ្ដីរាជការផងដែរ។សម្តេចតេជោ ហ៊ុន សែន បានប្រកាសផ្តាំផ្ញើដល់រដ្ឋមន្ត្រី សូមកុំខ្ជិលក្នុងការបំពេញការងារប្រចាំថ្ងៃរបស់ខ្លួន ខណៈដែលការបោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣ កាន់ជិតមកដល់ហើយ។សម្តេចតេជោ ហ៊ុន សែន បានប្រកាសអំពាវនាវដល់មន្ត្រី ដែលដឹងថាខ្លួនឯងមានចំណេះដឹងខ្វះខាត ដើម្បីឆ្លងតបនឹងការបំពេញការងារប្រចាំថ្ងៃ សូមទៅរៀនឡើងវិញនៅសាលាភូមិន្ទរដ្ឋបាល ដោយចាប់ផ្តើមពីកម្រិតដែលខ្លួនឯងខ្វះខាតតែម្តង។សម្តេចតេជោ ហ៊ុន សែន បានប្រកាសសម្តែងការសោកស្តាយយ៉ាងខ្លាំងចំពោះព្រឹត្តិការណ៍ នៃការឆាបឆេះព្រះរាជដំណាក់តូច នៃព្រះរាជដំណាក់ខេត្តសៀមរាប ដែលសម្តេចជាមួយអភិបាលខេត្តសៀមរាប ក៏បានឆ្លើយឆ្លងគ្នាជាបន្តបន្ទាប់ពាក់ព័ន្ធការអន្តរាគមន៍ករណីឆាបឆេះនេះផងដែរ។សម្តេចតេជោ ហ៊ុន សែន បានបួងសួង និងបន់ស្រន់ដល់ព្រះអង្គចេក ព្រះអង្គចម សូមបរាមុខ តាមកាច់ អ្នកផ្សព្វផ្សាយបំពុលចោទប្រកាន់គណបក្សប្រជាជនកម្ពុជាថា ជាអ្នកដុតព្រះរាជដំណាក់ខេត្តសៀមរាប ដើម្បីចង់បានដីនៅកន្លែងនោះ។សម្តេចតេជោ ហ៊ុន សែន បានប្រកាសអំពាវនាវដល់ដល់ប្រជាពលរដ្ឋ សូមប្រុងប្រយ័ត្នខ្ពស់ពីគ្រោះអគ្គិភ័យ ដែលបានកើតឡើងជាបន្តបន្ទាប់ នារយៈពេលប៉ុន្មានថ្ងៃជាប់ៗគ្នានេះ។សម្តេចតេជោ ហ៊ុន សែន បង្ហាញមោទនភាពចំពោះសហគ្រិនវ័យក្មេងនៅកម្ពុជានាពេលបច្ចុប្បន្ននេះ ដែលបានចូលរួមបង្កើតឱកាសការងារជាច្រើនដល់ប្រជាពលរដ្ឋខ្មែរ។សម្តេចតេជោ ហ៊ុន សែន បានប្រកាសជួសជុលឡើងវិញនូវព្រះរាជដំណាក់តូច នៃព្រះរាជដំណាក់ខេត្តសៀមរាប ដែលបានឆាបឆេះកាលពីប៉ុន្មានថ្ងៃមុននេះ ទោះជាត្រូវចំណាយថវិកាប៉ុណ្ណាក៏ដោយ។សម្តេចតេជោ ហ៊ុន សែន បានប្រកាសថា នៅថ្ងៃទី២០ ខែមីនា ឆ្នាំ២០២៣ខាងមុខនេះ សម្ដេចនឹងអញ្ជើញទៅខេត្តសៀមរាប យាងព្រះរាជដំណើរព្រះករុណា ព្រះមហាក្សត្រ ប្រទានភ្លើងស៊ីហ្គេម នៅមុខប្រាសាទអង្គរវត្ត។សម្តេចតេជោ ហ៊ុន សែន អំពាវនាវឱ្យមានការយកចិត្តទុកដាក់ខ្ពស់លើសុវត្ថិភាពចំណីអាហារ ក្នុងឱកាសបុណ្យចូលឆ្នាំថ្មី ប្រពៃណីជាតិ ដែលនឹងឈានចូលមកដល់នាពេលឆាប់ៗខាងមុខនេះ ជាពិសេសអាហារតាមដងផ្លូវ ដោយត្រូវរក្សាអនាម័យខ្ពស់។សម្តេចតេជោ ហ៊ុន សែន បានជំរុញឱ្យឯកឧត្តម ថោង ខុន រដ្ឋមន្ត្រីក្រសួងទេសចរណ៍ប្រឹងប្រែង និងក្រសួងពាណិជ្ជកម្ម សម្របសម្រួលជាមួយអ្នកលក់ដូរតូចតាចឱ្យដាក់តម្លៃផលិតផល ឬម្ហូបអាហារដែលបានតាំងលក់ ដើម្បីងាយស្រួលក្នុងការលក់ដូរផង ហើយអ្នកទិញក៏ងាយស្រួលផងដែរ។សម្តេចតេជោ ហ៊ុន សែន បានប្រកាសអំពាវនាវដល់ប្រជាពលរដ្ឋកម្ពុជាគ្រប់រូប សូមកុំមានការស្លន់ស្លោរ ពាក់ព័ន្ធនឹងព័ត៌មាន នៃការដួលរលំធនាគាររបស់អាមេរិក។សម្តេចតេជោ ហ៊ុន សែន បានប្រកាសដល់ប្រជាពលរដ្ឋ សូមទុកចិត្តលើការដឹកនាំរបស់រាជរដ្ឋាភិបាលលើវិស័យធនាគារ និងហិរញ្ញវត្ថុ ព្រោះធនាគារនីមួយៗនៅកម្ពុជា សុទ្ធតែមានទុនបម្រុងរបស់ខ្លួនគ្រប់គ្រាន់ ទប់ទល់នឹងហានិភ័យនានាជាយថាហេតុ។សម្តេចតេជោ ហ៊ុន សែន បញ្ជាក់ថា បញ្ហានៅអាមេរិកនោះមិនបង្កផលប៉ះពាល់ដល់កម្ពុជានោះទេ ហើយ សម្រាប់អាមេរិកផ្ទាល់ ក៏មានការប៉ះពាល់តិចតួចប៉ុណ្ណោះ។សម្ដេច បានបញ្ជាក់ថា ការដួលរលំធនាគារអាមេរិក គឺជាវិបត្តិជ្រាំដែល គឺគ្មានអ្វីត្រូវភិតភ័យឡើយ។ សម្ដេចណែនាំឱ្យពលរដ្ឋជឿទុកចិត្តចំពោះធនាគារនៅក្នុងប្រទេសកម្ពុជា គឺមានទុនវិនិយោគគ្រប់គ្រាន់។សម្តេចតេជោ ហ៊ុន សែន បានប្រកាសដល់បរទេសទាំងឡាយ សូមកុំធ្វើសកម្មភាពបំផ្លាញមុខមាត់ និងកិត្តិយសរបស់កម្ពុជា តាមរយៈការបំភ្លៃ បំភ្លើសព័ត៌មានអកុសលពាក់ព័ន្ធការ​ស្ថាបនា​កំពង់ផែ នៅតំបន់សមុទ្ររាម។សម្តេចតេជោ ហ៊ុន សែន បានប្រកាសថា កម្ពុជាគ្មានវត្តមានមូលដ្ឋានកងទ័ពចិននៅកម្ពុជានោះទេ។ សម្តេចបញ្ជាក់ថា ពេលកំពង់ផែសមុទ្ររាមស្ថាបនារួចរាល់ កម្ពុជាស្វាគមន៍នាវាកងទ័ពគ្រប់បណ្តាប្រទេសទាំងអស់មិនថា ចិន អាមេរិក ជប៉ុន អូស្ត្រាលីបារាំង....[] ដែលមានបំណងចូលចត និងធ្វើកិច្ចសហប្រតិបត្តិការកងទ័ពជាមួយកម្ពុជា។សម្តេចតេជោ ហ៊ុន សែន បានចង្អុលបង្ហាញថា សូមកុំមើលកម្ពុជាត្រឹមកម្ពុជា សូមមើលកម្ពុជាឱ្យបានវែងឆ្ងាយ និងពិនិត្យមើលលើទំនាក់ទំនងរបស់កម្ពុជា ជាមួយបណ្ដាប្រទេសក្នុងតំបន់ និងពិភពលោក។សម្តេចតេជោ ហ៊ុន សែន ប្រកាសអំពាវនាវដល់ប្រជាពលរដ្ឋនាំគ្នាសប្បាយរីករាយ ក្នុងឱកាសបុណ្យចូលឆ្នាំថ្មី ប្រពៃណីជាតិ ដែលនឹងឈានចូលមកដល់នាពេលឆាប់ៗខាងមុខនេះ ដែលជាការសប្បាយដោយគ្មានកូវីដ-១៩៕

សម្តេច ហេង សំរិន ស្នើអូស្រ្តាលីជួយជំរុញពាណិជ្ជកម្មទ្វេភាគី និងបង្កើនអាហារូបករណ៍ ដល់និស្សិតកម្ពុជាបន្ថែម

2023/03/15 10:46:06 pm        403
Facebook Telegram Linkin
ភ្នំពេញ៖ សម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា បាន​ស្នើសុំដល់ឯកអគ្គរាជទូតថ្មីរបស់ប្រទេសអូស្រ្តាលីប្រចាំនៅកម្ពុជា ជួយជំរុញពាណិជ្ជកម្មទ្វេភាគី​កម្ពុជា និងអូស្ត្រាលី និងជួយបង្កើនការផ្តល់អាហារូបករណ៍ដល់និស្សិតកម្ពុជា ឲ្យទៅសិក្សា​នៅ​ប្រទេសអូស្ត្រាលី​បន្ថែមទៀត ដើម្បីធ្វើ​យ៉ាងណាលើកស្ទួយសេដ្ឋកិច្ច និងធនធានមនុស្សនៅ​កម្ពុជា​ឲ្យកាន់តែខ្លាំងក្លាថែមទៀត។នៅក្នុងកិច្ចជំនួបពិភាក្សាជាមួយ លោក ចាស្ទីន ខេវិន វីយ៉ាត (Justin Kevin Whyatt) ឯកអគ្គរាជទូត​វិសាមញ្ញ ​និងពេញសមត្ថភាពនៃប្រទេសអូស្រ្តាលី នាថ្ងៃទី១៥ ខែមីនា ឆ្នាំ២០២៣នេះ នៅវិមាន​រដ្ឋសភា សម្តេច ហេង សំរិន បានលើកឡើងថា «សូមស្នើទៅអូស្រ្តាលី បន្តជួយគាំទ្រកម្ពុជា តាម​រយៈការ​ជំរុញពាណិជ្ជកម្ម ​ទ្វេភាគី វិនិយោគ​ទេសចរណ៍ ​និង​ជួយអភិវឌ្ឍន៍​សមត្ថភាព​ ធនធាន​មនុស្ស ​ដោយបង្កើនការផ្តល់​អាហារូបករណ៍​បន្ថែមទៀត ​ដល់​និស្សិតកម្ពុជា បន្តការសិក្សានៅ​ប្រទេសអូស្ត្រាលីជាដើម»។សម្តេចប្រធានរដ្ឋសភា ក៏បានថ្លែងអំណរគុណដល់រដ្ឋាភិបាល និងប្រជាជនអូស្រ្តាលី ដែលតែង​តែជួយ​ឧបត្ថម្ភគាំទ្រដល់ដំណើរ​ការអភិវឌ្ឍរបស់កម្ពុជា ជាពិសេសក្នុងអំឡុងពេលនៃការ​រីករាល​ដាលជំងឺកូវីដ-១៩ អូស្រ្តាលីបានជួយឧបត្ថម្ភវ៉ាក់សាំង​ និងបរិក្ខាពេទ្យជាច្រើន ដើម្បីរួមចំណែក​ប្រយុទ្ធប្រឆាំងនឹងជំងឺកូវីដ-១៩នេះ យ៉ាងមានប្រសិទ្ធភាព។ ជាមួយគ្នានេះ រដ្ឋសភាកម្ពុជា និងសភាអូស្រ្តាលី ​ក៏មានកិច្ចសហប្រតិបត្តិការយ៉ាងជិតស្និទ្ធជាមួយគ្នា ការផ្លាស់ប្តូរទស្សនកិច្ច ចែករំលែកបទពិសោធន៍ ​និងតែងតែគាំទ្រគ្នាទៅវិញទៅមក នៅលើវេទិកា​អន្តរសភានានា ​ក្នុងតំបន់​ និងសកលោកផងដែរ។ សម្តេចប្រធានរដ្ឋសភា ​ក៏ថ្លែងអំណរគុណដល់រដ្ឋាភិបាល និងប្រជាជនអូស្ត្រាលី ដែលបាន​រួមចំណែក ក្នុងការស្វែងរក សន្តិភាព ​និងបន្តជួយក្នុងដំណើរការអភិវឌ្ឍ ប្រទេសកម្ពុជា លើវិស័យ​ជាច្រើន រួមមាន៖ កសិកម្ម ហេដ្ឋារចនាសម្ព័ន្ធ ការដោះមីនជាដើម។ថ្លែងនៅក្នុងកិច្ចជំនួបនោះដែរ លោក ចាស្ទីន ខេវិន វីយ៉ាត ​បានអបអរសាទរ​ចំពោះការរីក​ចម្រើន​របស់កម្ពុជា ​និងការគ្រប់គ្រងជំងឺកូវីដ-១៩ ​ប្រកបដោយជោគជ័យ។លោកក៏បានអបអរសាទររដ្ឋសភាកម្ពុជា នៅក្នុងការរៀបចំមហាសន្និបាតអន្តរសភាអាស៊ាន (AIPA) នាពេលកន្លងមក​។ ជាពិសេសដំណើរទស្សនកិច្ចរបស់សម្តេច ទៅកាន់ប្រទេសអូស្រា្តលីកាល​ពី​ឆ្នាំ២០២០ ក្នុងការចូលរួមវេទិកាសភា APPF។ លោកទូតក៏បានជម្រាបសម្តេចប្រធានផងដែរថា អូស្រ្តាលី នឹងបន្តការគាំទ្រ ​ពង្រឹងកិច្ចសហប្រតិបត្តិការជាមួយកម្ពុជានៅលើវិស័យជាច្រើនទៀត មាន​វិស័យសុខាភិបាល សេដ្ឋកិច្ច សន្តិសុខ ការប្រយុទ្ធប្រឆំាងអំពើភេរវកម្ម សិទ្ធិមនុស្ស និង​ដំណើរការលទ្ធិប្រជាធិបតេយ្យជាដើម។សូមបញ្ជាក់ថាកម្ពុជា-អូស្រ្តាលី បានភ្ជាប់ទំនាក់ទំនងការទូតជាមួយគ្នា ជាយូរយារណាស់មកហើយ គឺតាំងពីឆ្នាំ១៩៥២។ ​ទំនាក់ទំនង ​និងកិច្ចសហប្រតិបត្តិការរវាងប្រទេសទាំងពីរ កាន់តែត្រូវបាន​លើក​កម្ពស់យ៉ាងជិតស្និទ្ធ និងរីកចម្រើនស្ទើរគ្រប់វិស័យ៕អត្ថបទបាន ចក់

ឯកឧត្តម ជិន ម៉ាលីន បញ្ជាក់ ៣ចំណុចផ្នែកច្បាប់ ឆ្លើយតបទៅនឹងសេចក្តីថ្លែងការណ៍របស់មេធាវី លោក កឹម សុខា

2023/03/15 08:02:12 pm        516
Facebook Telegram Linkin
ភ្នំពេញ៖ ឯកឧត្តម ជិន ម៉ាលីន រដ្ឋលេខាធិការ និងជាអ្នកនាំពាក្យ ក្រសួងយុត្តិធម៌ បានបញ្ជាក់ ៣ ចំណុច ជាយោបល់ផ្នែកច្បាប់ខ្លះ ឆ្លើយតបទៅនឹងសេចក្តីថ្លែងការណ៍របស់មេធាវី លោក កឹម សុខា ដែលបានចេញផ្សាយកាលពីថ្ងៃទី១៤ ខែមីនា ឆ្នាំ២០២៣ម្សិលមិញ។តាមរយៈ Facebook នៅថ្ងៃទី១៥ ខែមីនា ឆ្នាំ២០២៣នេះ ឯកឧត្ដម ជិន ម៉ាលីន បានសរសេរថា "សូមផ្ដល់ជាយោបល់ផ្នែកច្បាប់ខ្លះឆ្លើយតបទៅនឹងសេចក្តីថ្លែងការណ៍របស់មេធាវី លោក កឹម សុខា"។ឯកឧត្តម ជិន ម៉ាលីន បានបញ្ជាក់ចំណុចទី១ថា បើគ្រាន់តែសុំការអនុញ្ញាតពីព្រះរាជអាជ្ញាបន្តិចទៅ ដូចជាមិនទាស់ខុសអីទេ ព្រោះវាតម្រូវដោយលក្ខខណ្ឌកំណត់ក្នុងសាលក្រមតុលាការ ដែលមានអំណាចតាមផ្លូវច្បាប់។ ប្រសិនបើព្រះរាជអាជ្ញាមិនអនុញ្ញាត នោះទើបជាការរំលោភបំពានសិទ្ធិមេធាវីក្នុងការជួបជាមួយកូនក្តី។ ចំណុចទី២ ឯកឧត្តមបញ្ជាក់ថា សូម្បីតែចូលជួបកូនក្តីខ្លួនក្នុងពន្ធធនាគារ ក៏ត្រូវតែសុំការអនុញ្ញាតពីអ្នកគ្រប់គ្រងពន្ធនាគារដែរ។ ចំណែកចំណុចទី៣ ឯកឧត្តមបន្តថា ដូច្នេះ ប្រសិនបើមានចេតនាជួបជាមួយកូនក្តីពិតប្រាកដមែន គ្រាន់តែស្នើសុំបន្តិចទៅ ដូចជាមិនអីទេ លើកលែងតែមានចេតនាផ្សេងពីនេះ៕

បណ្ដាញសង្គម

ព័ត៌មានថ្មីៗ

តំណាងរាស្រ្តខេត្តបន្ទាយមានជ័យ៖ ទោះបីមានការឈ្លានពានពីប្រទេសជិតខាង តែពលរដ្ឋកម្ពុជា នៅតែមានឱកាសធ្វើបុណ្យទានប្រកបដោយសទ្ធាជ្រះថ្លា
10/04/2026 05:10 PM
Facebook Telegram Linkin
ឯកឧត្តម ឌី វិជ្ជា និងលោកជំទាវ ហ៊ុន ម៉ាណា អញ្ជើញកាន់បិណ្ឌទី៨ និងនាំយកទេយ្យវត្ថុប្រគេនវត្តចំនួន១៣វត្ត និងចែកអំណោយដល់យាយជីតាជី នៅខេត្តពោធិ៍សាត់
10/04/2026 04:10 PM
Facebook Telegram Linkin
មន្រ្តីជាន់ខ្ពស់ធនាគារជាតិ៖ វិស័យធនាគារបានបន្តរក្សាលំនឹង និងមានសុខភាពល្អជាធម្មតា
10/04/2026 04:10 PM
Facebook Telegram Linkin
លោកជំទាវ ចម និម្មល អញ្ជើញសំណេះសំណាល សួរសុខទុក្ខ និងនាំយកអំណោយជូននាយទាហាន នាយទាហានរង និងពលទាហាន នៃបញ្ជាការដ្ឋានកាំភ្លើងធំ កងទ័ពជើងគោក ក្នុងឱកាសពិធីបុណ្យភ្ជុំបិណ្ឌ
10/04/2026 04:10 PM
Facebook Telegram Linkin
ប្រតិបត្តិការបង្ក្រាប Online Scam នៅប៉ោយប៉ែត ឃាត់ខ្លួនមនុស្សជិត៦០០នាក់
10/04/2026 03:10 PM
Facebook Telegram Linkin
ប្រធានក្រុមការងាររាជរដ្ឋាភិបាលចុះមូលដ្ឋានស្រុកស្អាង និងកោះធំ អញ្ជើញជួបសំណេះសំណាល និងសួរសុខទុក្ខគ្រួសារវីរៈកងទ័ព និងគ្រួសារក្រីក្រក្នុងស្រុកស្អាង និងកោះធំ សរុប ១៨០០គ្រួសារ
10/04/2026 03:10 PM
Facebook Telegram Linkin
ការនាំចេញអង្ករកម្ពុជាទៅកាន់ប្រទេសហ្វីលីពីន មានសន្ទុះខ្លាំង ខណៈការដឹកជញ្ជូនអង្ករចំនួន ២០.០០០តោនបានចាប់ផ្តើមចេញដំណើរហើយ
10/04/2026 03:10 PM
Facebook Telegram Linkin
រដ្ឋមន្ត្រីសុខាភិបាល៖ ការតម្កល់សុខុមាលភាពរបស់ប្រជាពលរដ្ឋ គឺជាអាទិភាពចម្បងជានិច្ចរបស់រាជរដ្ឋាភិបាល
10/04/2026 03:10 PM
Facebook Telegram Linkin
អតីតសមាជិកគណបក្សប្រឆាំង ចំនួន៣៩នាក់ សម្រេចចិត្តចូលរួមជីវភាពនយោបាយជាមួយគណបក្សប្រជាជនកម្ពុជា
10/04/2026 03:10 PM
Facebook Telegram Linkin
នេប៉ាល់ប្រារព្ធពិធីរំឭកវិញ្ញាណក្ខន្ធជនរងគ្រោះ និងទាមទារភាពយុត្តិធម៌អាកាសធាតុ
10/04/2026 02:10 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.