នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចធិបតី ហ៊ុន ម៉ាណែត៖ អាទិភាពរបស់រាជរដ្ឋាភិបាល​ គឺ ប្រទេសជាតិ​,​ប្រជាជន, ទឹកដី និង​ ឯករាជ្យភាពជាតិ
សម្ដេចធិបតី៖ យុទ្ធនាការកម្ចាត់ Online Scams ប៉ុន្មានខែចុងក្រោយនេះ បានស្ដារមុខមាត់កម្ពុជាមកវិញ
សម្ដេចធិបតី៖ កម្ពុជាជាសមាជិក WTO មិនអាចហាមឃាត់ការនាំចូលទំនិញពីប្រទេសដទៃបានទេ
សម្ដេចធិបតី៖ ឆ្នាំ២០២៩ កម្ពុជានឹងចាកចេញពីប្រទេសអភិវឌ្ឍន៍តិចតួចបន្តដំណើរទៅកាន់ប្រទេសអភិវឌ្ឍន៍

នយោបាយ​ និង ការអភិវឌ្ឍន៍

រដ្ឋមន្ត្រីការបរទេសរុស្ស៊ី ស្វាគមន៍ជំហររបស់បេក្ខជនអនុប្រធានាធិបតីអាមេរិក លើអ៊ុយក្រែន ក្នុងពេលមានការព្រួយបារម្ភរបស់អឺរ៉ុប

2024/07/18 12:02:24 pm        257
Facebook Telegram Linkin
រដ្ឋមន្ត្រីការបរទេសរុស្ស៊ី លោក Sergei Lavrov បាននិយាយកាលពីថ្ងៃពុធថា រុស្ស៊ីត្រៀមខ្លួនជាស្រេចដើម្បីធ្វើការជាមួយមេដឹកនាំអាមេរិកណាមួយក៏ដោយ ដែលមានឆន្ទះចូលរួមក្នុង «ការសន្ទនាប្រកបដោយសមភាព និងការគោរពគ្នាទៅវិញទៅមក» ខណៈស្វាគមន៍ចំពោះជំហរលើអ៊ុយក្រែនរបស់បេក្ខជនអនុប្រធានាធិបតី មកពីគណបក្សសាធារណរដ្ឋ លោក J.D. Vance ។លោក Vance ដែលត្រូវបានជ្រើសរើសក្នុងសប្តាហ៍នេះដោយលោក Donald Trump ជាអ្នករួមការងាររបស់លោក មានបំណងកាត់បន្ថយការគាំទ្រផ្នែកយោធារបស់សហរដ្ឋអាមេរិកសម្រាប់ប្រទេសអ៊ុយក្រែន នៅក្នុងសង្រ្គាមរបស់ប្រទេសនេះជាមួយរុស្ស៊ី និងបាននិយាយថា ទីក្រុងគីវ ពុំមានឱកាសក្នុងការដណ្តើមយកមកវិញនូវទឹកដីទាំងអស់ដែលរុស្ស៊ីយកបាន ចាប់តាំងពីរុស្ស៊ីចាប់ផ្តើមវាយយលុកពេញលេញរបស់ខ្លួនទៅលើ អ៊ុយក្រែន ក្នុងខែកុម្ភៈ ឆ្នាំ២០២២។លោក Lavrov បាននិយាយទៅកាន់អ្នកសារព័ត៌មានថា លោកគាំទ្រសន្តិភាព លោកគាំទ្រក្នុងការបញ្ចប់ជំនួយដែលត្រូវបានផ្តល់ ហើយយើងអាចស្វាគមន៍ ព្រោះនោះជាអ្វីដែលយើងត្រូវការ ដើម្បីបញ្ឈប់ការទាមទារសព្វាវុធរបស់អ៊ុយក្រែន ហើយបន្ទាប់មកសង្រ្គាមនឹងបញ្ចប់។សម្ព័ន្ធមិត្តសហភាពអឺរ៉ុបរបស់សហរដ្ឋអាមេរិក មានការព្រួយបារម្ភយ៉ាងខ្លាំងអំពីការជ្រើសរើសលោក Vance ជាបេក្ខជនអនុប្រធានាធិបតីរបស់លោក Trump នៅក្នុងការបោះឆ្នោតនៅថ្ងៃទី ៥ ខែវិច្ឆិកា ខាងមុខ។ លោក Trump បានសម្តែងការមិនសប្បាយចិត្តជុំវិញកញ្ចប់ជំនួយចុងក្រោយ របស់សភាសម្រាប់អ៊ុយក្រែន ដែលត្រូវបានអនុម័តកាលពីខែមេសា។ លោក ពូទីន បាននិយាយថា រុស្ស៊ីនឹងបញ្ចប់សង្រ្គាម ប្រសិនបើទីក្រុងគីវ ប្រគល់តំបន់ចំនួនបួននៅភាគខាងកើត និងភាគខាងត្បូងរបស់ប្រទេស ដែលទាមទារដោយទីក្រុងមូស្គូ។

លោក Maduro មានបំណងបន្តអាណត្តិទីបីនៅវ៉េណេស៊ុយអេឡា ទោះបីសេដ្ឋកិច្ចធ្លាក់ចុះក៏ដោយ

2024/07/18 11:59:39 am        251
Facebook Telegram Linkin
លោក Nicolas Maduro បានក្លាយជាប្រធានាធិបតីស្តីទីរបស់ប្រទេសវ៉េណេស៊ុយអេឡា នៅថ្ងៃទី ៨ ខែមីនា ឆ្នាំ២០១៣ រយៈពេលបីថ្ងៃបន្ទាប់ពីមរណភាពរបស់ប្រធានាធិបតី លោក Hugo Chavez ដោយសារជំងឺមហារីក ហើយ១១ឆ្នាំក្រោយមក លោកបានស្វែងរកការបោះឆ្នោតជាថ្មី សម្រាប់អាណត្តិទីបី នៅក្នុងការបោះឆ្នោតប្រធានាធិបតីដែលនឹងធ្វើឡើងនៅថ្ងៃទី២៨ ខែកក្កដា។លោក Maduro និយាយថា ជ័យជម្នះរបស់លោកនឹងក្លាយជាអំណោយសម្រាប់អ្នកគាំទ្ររបស់លោក។ លោក Maduro ដែលបានកាន់តំណែងរយៈពេល១១ឆ្នាំ បានជាប់ឆ្នោតជាលើកដំបូងក្នុងឆ្នាំ ២០១៣ បន្ទាប់ពីមរណភាពរបស់លោក Chavez ។ បច្ចុប្បន្ននេះ នៅក្នុងការបោះឆ្នោតនៅថ្ងៃទី ២៨ ខែកក្កដា ខាងមុខ លោកនឹងត្រូវប្រឈមមុខជាមួយអតីតអ្នកការទូត លោក អ៊ីដមុនដូ ហ្គុងហ្សាឡេស(Edmundo Gonzalez) ជាគូប្រជែងដ៏សំខាន់របស់លោកមកពីក្រុមចម្រុះប្រឆាំង។ប្រធានាធិបតីអាយុ ៦១ ឆ្នាំ ដែលទទួលខុសត្រូវចំពោះការដួលរលំសេដ្ឋកិច្ច នាំឱ្យមានអតិផរណាហក់ឡើងខ្ពស់ និងការធ្វើអន្តោប្រវេសន៍ច្រើនបំផុតរបស់ប្រជាជនវេណេស៊ុយអេឡា ជារឿយៗហៅក្រុមប្រឆាំងថា «ហ្វាស៊ីសនិយម»។លោក Maduro ត្រូវបានចោទប្រកាន់ដោយក្រុមអ្នករិះគន់លោក ថា ផ្តាច់ការនិយម ដឹកនាំរបបផ្តាច់ការ ចាប់ឃុំឃាំងអ្នកនយោបាយប្រឆាំង ព្រមទាំងការមិនអនុញ្ញាតឱ្យមានការចូលរួមដោយសេរីនៅក្នុងការបោះឆ្នោត ដោយមានបម្រាមការបោះឆ្នោត លើបេក្ខជនដែលគេនិយមច្រើន។សហរដ្ឋអាមេរិក ដែលនៅតែចោទប្រកាន់ និងផ្តល់រង្វាន់ចំនួន១៥លានដុល្លារសម្រាប់ការចាប់ខ្លួន លោក Maduro បានដាក់ទណ្ឌកម្មប្រេងឡើងវិញលើប្រទេសវេណេស៊ុយអេឡា កាលពីពាក់កណ្តាលខែមេសា ដោយចោទប្រកាន់ លោក Maduro ថាពុំបានអនុវត្តពេញលេញតាមការធានាក្នុងការបោះឆ្នោត ដែលលោកបានធ្វើនៅក្នុងកិច្ចព្រមព្រៀងជាមួយគណបក្សប្រឆាំង។

ក្រុមអ្នកគាំទ្រលោក Trump ថាលោក Biden ធ្វើពុតជាមានជំងឺកូវីដ ដើម្បីបង្វែរការចាប់អារម្មណ៍

2024/07/18 11:53:49 am        255
Facebook Telegram Linkin
ក្រុមអ្នកគាំទ្រលោក Donald Trump មានមន្ទិលសង្ស័យចំពោះព័ត៌មានដែលថាប្រធានាធិបតីអាមេរិក លោក Joe Biden ធ្វើតេស្តវិជ្ជមានជំងឺកូវីដ១៩ ក្នុងអំឡុងពេលដំណើរទស្សនកិច្ចរបស់លោកទៅកាន់ទីក្រុង ឡាសវេហ្កាស (Las Vegas) កាលពីថ្ងៃពុធ (១៧ កក្កដា)។ អ្នកនាំពាក្យសេតវិមាន លោកស្រី ខាតារីន ហ្សង់ព្យែរ (Karine Jean-Pierre) បានប្រកាសថាលោកប្រធានាធិបតីបក្សប្រជាធិបតេយ្យ វ័យ ៨១ឆ្នាំរូបនេះវិជ្ជមានកូវីដ១៩ បន្ទាប់ពីលោក Biden លុបចោលសុន្ទរកថាដោយសារតែមានជំងឺនេះ។ ប៉ុន្តែក្រុមអ្នកគាំទ្រលោក Trump នៅទីក្រុង មីលវ៉ូឃី (Milwaukee) រដ្ឋ វីស្ខនស៊ិន (Wisconsin) គិតថានោះជាព័ត៌មានមិនពិត។ អ្នកគាំទ្រលោក Trump ម្នាក់ឈ្មោះ ចេសុន (Jason) បាននិយាយថា «ខ្ញុំគិតថាវាជារឿងក្លែងក្លាយ» លោក Biden កំពុងធ្វើពុតដើម្បីបង្វែរការចាប់អារម្មណ៍ពីការធ្វើមិនបានល្អក្នុងពេលជជែកដេញដោល និងអ្វីៗផ្សេងទៀតដែលកើតឡើង។ អ្នកគាំទ្រម្នាក់ទៀតឈ្មោះ ម៉ូ ហ្សេណេសកូ (Moe Zenezzko) បាននិយាយថា លោក Biden ត្រូវការលេសមួយ ហើយនឹងប្រើកូវីដជាបញ្ហាសុខភាពរបស់លោកដើម្បីចុះចេញពីតំណែង។ជំងឺនេះកើតឡើងនៅពេលវេលាដ៏សំខាន់សម្រាប់លោក Biden ដែលកំពុងបាត់បង់ការគាំទ្រនៅក្នុងរដ្ឋប្រទាញប្រទូងប្រឆាំងនឹងលោក Trump ដែលកំពុងដឹកនាំសន្និបាតដ៏ជោគជ័យមួយក្នុងសប្តាហ៍នេះ បន្ទាប់ពីលោកបានរួចជីវិតពីការប៉ុនប៉ងធ្វើឃាតកាលពីថ្ងៃសៅរ៍។ ប្រតិភូមកពីបក្សសាធារណរដ្ឋនិយាយថា ពួកគេមិនគិតថាជំងឺកូវីដរបស់លោក Biden នឹងផ្លាស់ប្តូរផ្លូវនៃយុទ្ធនាការសម្រាប់គណបក្សណាមួយនោះទេ៕

ការប្រណាំងសព្វាវុធកាន់តែខ្លាំង ខណៈរុស្ស៊ី និងអាមេរិក គ្រោងពង្រាយអាវុធដែលបានហាមឃាត់ឡើងវិញ

2024/07/18 11:40:23 am        275
Facebook Telegram Linkin
អតីតមេដឹកនាំសហភាពសូវៀត លោក មីកហែល ហ្កូបាឈេវ (Mikhail Gorbachev) និងអតីតប្រធានាធិបតីអាមេរិក លោក រ៉ូណាល់ រ៉េហ្កាន (Ronald Reagan) ក្នុងខែធ្នូ ឆ្នាំ១៩៨៧ បានព្រមព្រៀងរុះរើប្រព័ន្ធសព្វាវុធប្រជែង ក្រោមសន្ធិសញ្ញាលុបបំបាត់អាវុធនុយក្លេអ៊ែរ និងអាវុធធម្មតា ដែលមានមូលដ្ឋានបាញ់ពីដី ចម្ងាយខ្លី និងមធ្យម (INF) ទាំងអស់ ដែលមានចម្ងាយចន្លោះពី ៥០០គីឡូម៉ែត្រ និង ៥.៥០០គីឡូម៉ែត្រ។ប៉ុន្តែគ្រាប់ពូជសន្តិភាពនោះរស់រានត្រឹមឆ្នាំ២០១៩ប៉ុណ្ណោះ នៅពេលលោក Donald Trump ដែលកាលនោះជាប្រធានាធិបតីអាមេរិក បានចាកចេញពីសន្ធិសញ្ញានោះដោយលើកឡើងពីការរំលោភបំពាន ដែលរុស្ស៊ីបានបដិសេធ។ ភាពស្មុគស្មាញដ៏គ្រោះថ្នាក់នៃការចេញពីកិច្ចព្រមព្រៀងនេះកំពុងតែលេចចេញជារូបរាងនៅពេលនេះ ខណៈដែលភាគីទាំងពីរបានកំណត់ផែនការរបស់ពួកគេសម្រាប់ការដាក់ពង្រាយសព្វាវុធជាថ្មី។កាលពីថ្ងៃទី២៨ មិថុនា លោកប្រធានាធិបតី វ្ល៉ាឌីមៀ ពូទីន (Vladimir Putin) បាននិយាយជាសាធារណៈថា រុស្ស៊ីនឹងបន្តផលិតមីស៊ីលរយៈចម្ងាយខ្លី និងមធ្យមបាញ់ពីដី ដោយជាអ្វីដែលលោកខាងលិចសង្ស័យថារុស្ស៊ីកំពុងធ្វើរួចហើយ ហើយនិងធ្វើការសម្រេចចិត្តពីទីតាំងដែលត្រូវដាក់ពង្រាយអាវុធទាំងនោះ ប្រសិនបើចាំបាច់។ក្រុមអ្នកជំនាញផ្នែកសន្តិសុខសន្មត់ថា មីស៊ីលទាំងនេះ ដែលដូចជាប្រព័ន្ធរុស្ស៊ីភាគច្រើនដែរ នឹងអាចផ្ទុកក្បាលគ្រាប់ធម្មតា ឬនុយក្លេអ៊ែរ។ចំណែកអាមេរិក ក៏បាននិយាយនៅថ្ងៃទី១០ កក្កដា ថា ខ្លួននឹងចាប់ផ្តើមដាក់ពង្រាយក្នុងអាល្លឺម៉ង់ ចាប់ពីឆ្នាំ២០២៦ នូវសព្វាវុធដែលនឹងរួមបញ្ចូលមីស៊ីលស្តង់ដារ-៦ (SM-6s) និងមីស៊ីលតម្រង់គោលដៅ ថូម៉ាហក (Tomahawks)។ ទាំងនេះគឺជាប្រព័ន្ធធម្មតាប៉ុណ្ណោះ ប៉ុន្តែតាមទ្រឹស្តី អាវុធមួយចំនួនក្នុងចំណោមនោះក៏អាចបំពាក់ដោយគន្លឹះនុយក្លេអ៊ែរ ហើយអ្នកជំនាញសន្តិសុខនិយាយថា ផែនការដាក់ពង្រាយរបស់រុស្ស៊ី នឹងអនុញ្ញាតឱ្យមានលទ្ធភាពបែបនោះកើតឡើង៕

ប្រភព៖ ហ្វីលីពីន និងចិន បង្កើតបណ្តាញថ្មីដើម្បីដោះស្រាយជម្លោះនៅសមុទ្រចិនខាងត្បូង

2024/07/18 11:29:57 am        296
Facebook Telegram Linkin
យោងតាមឯកសារមួយ និងប្រភពការទូតហ្វីលីពីនបានឱ្យដឹងថា ប្រទេសហ្វីលីពីន និងចិនបានព្រមព្រៀងគ្នាបង្កើតខ្សែបណ្ដាញទំនាក់ទំនងថ្មី ដើម្បីកែលម្អការដោះស្រាយជម្លោះដែនសមុទ្ររបស់ពួកគេ ខណៈដែលទំនាក់ទំនងមានភាពជូរចត់ជុំវិញការប៉ះទង្គិចគ្នាលើដែនទឹកនៅសមុទ្រចិនខាងត្បូង។ប្រទេសទាំងពីរបានចោទដាក់គ្នាម្តងហើយម្តងទៀតជុំវិញយុត្តាធិការនៅក្នុងសមុទ្រចិនខាងត្បូងដ៏ប្រកួតប្រជែង ខណៈហ្វីលីពីន ដែលមានការគាំទ្រពីសម្ព័ន្ធមិត្តការពារជាតិគឺសហរដ្ឋអាមេរិក បានប្រឈមមុខនឹងវត្តមានជាអចិន្ត្រៃយ៍របស់ចិន ជុំវិញដែនទឹកយុទ្ធសាស្ត្រក្នុងតំបន់សេដ្ឋកិច្ចផ្តាច់មុខរបស់ទីក្រុងម៉ានីល។បណ្តាញទំនាក់ទំនងចំនួនបីនឹងត្រូវបានបង្កើតឡើងជាពិសេសសម្រាប់បញ្ហាដែនសមុទ្រ នេះបើយោងតាមប្រភពដែលបានផ្តល់ឯកសារ ជាមួយនឹងការគូសបញ្ជាក់លើ «ការរៀបចំកែលម្អយន្តការទំនាក់ទំនងដែនសមុទ្រហ្វីលីពីន-ចិន» ដែលត្រូវបានចុះហត្ថលេខាកាលពីថ្ងៃទី០២ ខែកក្កដា។អ្នកនាំពាក្យក្រសួងការបរទេសចិន លោក លីន ជាន (Lin Jian) បានប្រាប់សន្និសីទសារព័ត៌មាននៅពេលត្រូវសាកសួរពីកិច្ចព្រមព្រៀងនេះថា «ចិនតែងតែប្តេជ្ញាចិត្តធ្វើការមួយហ្វីលីពីន ដើម្បីដោះស្រាយបញ្ហាដែនសមុទ្រឱ្យបានត្រឹមត្រូវ តាមរយៈការសន្ទនា និងការពិគ្រោះយោបល់»។ ក្រសួងការបរទេសចិន និងហ្វីលីពីន និងស្ថានទូតចិននៅទីក្រុងម៉ានីល មិនបានឆ្លើយតបភ្លាមៗទេកាលពីថ្ងៃពុធ លើសំណើសុំការអត្ថាធិប្បាយលើបញ្ហានេះ៕

ចិនបញ្ឈប់កិច្ចពិភាក្សាលើការគ្រប់គ្រងអាវុធជាមួយអាមេរិក ជុំវិញបញ្ហាកោះតៃវ៉ាន់

2024/07/18 11:22:56 am        196
Facebook Telegram Linkin
ក្រសួងការបរទេសចិន បាននិយាយកាលពីថ្ងៃពុធ (១៧ កក្កដា) ថា ប្រទេសចិន បានបញ្ឈប់កិច្ចចរចាគ្រប់គ្រងអាវុធនុយក្លេអ៊ែរជាមួយសហរដ្ឋអាមេរិក នៅក្នុងការតវ៉ាប្រឆាំងនឹងការលក់អាវុធរបស់ទីក្រុងវ៉ាស៊ីនតោន ទៅឱ្យុកោះស្វ័យគ្រប់គ្រងតៃវ៉ាន់ ដែលទីក្រុងប៉េកាំង អះអាងសិទ្ធិថាជាទឹកដីរបស់ខ្លួន។ក្រុមអ្នកវិភាគបាននិយាយថា ការសម្រេចចិត្តរបស់ចិន អាចជាលទ្ធភាពនៃជំហានថយក្រោយដ៏ធ្ងន់ធ្ងរចំពោះកិច្ចខិតខំប្រឹងប្រែងគ្រប់គ្រងអាវុធសកល ដោយទីក្រុងប៉េកាំង បានចូលរួមជាមួយទីក្រុងមូស្គូ ក្នុងការបដិសេធមិនពិភាក្សាជាមួយវិធានការរបស់ទីក្រុងវ៉ាស៊ីនតោន ដើម្បីទប់ស្កាត់ការប្រណាំងអាវុធនុយក្លេអ៊ែរ។អ្នកនាំពាក្យក្រសួងការបរទេសចិន លោក លីន ជាន (Lin Jian) បាននិយាយថា ការលក់សព្វាវុធរបស់សហរដ្ឋអាមេរិក ម្តងហើយម្តងទៀតទៅឱ្យកោះតៃវ៉ាន់ ក្នុងប៉ុន្មានខែថ្មីៗនេះបាន «បង្កើនភាពតានតឹងដល់បរិយាកាសនយោបាយសម្រាប់ការបន្តការពិគ្រោះយោបល់គ្រប់គ្រងអាវុធ»។ លោក Lin បាននិយាយថា ចិនមានឆន្ទៈក្នុងការរក្សាទំនាក់ទំនងលើការគ្រប់គ្រងអាវុធអន្តរជាតិ ប៉ុន្តែថាសហរដ្ឋអាមេរិក «ត្រូវតែគោរពផលប្រយោជន៍ស្នូលរបស់ចិន និងបង្កើតលក្ខខណ្ឌចាំបាច់សម្រាប់ការសន្ទនា និងការផ្លាស់ប្តូរ»។អ្នកនាំពាក្យក្រសួងការបរទេសអាមេរិក លោក ម៉ាស៊ូ មីលឡឺ (Matthew Miller) បាននិយាយថា ចិនបានជ្រើសរើសធ្វើតាមការដឹកនាំរបស់រុស្ស៊ី ដោយអះអាងថាការចូលរួមគ្រប់គ្រងអាវុធមិនអាចដំណើរការបានទេ ខណៈពេលមានបញ្ហាប្រឈមផ្សេងទៀតនៅក្នុងទំនាក់ទំនងទ្វេភាគី៕

សម្តេចធិបតី អំពាវនាវដល់ប្រជាពលរដ្ឋឲ្យប្រើប្រាស់ប្រព័ន្ធផ្សព្វផ្សាយសង្គម ប្រកបដោយទទួលខុសត្រូវ

2024/07/18 10:50:40 am        281
Facebook Telegram Linkin
សម្តេចធិបតីហ៊ុន ម៉ាណែត នាយករដ្ឋមន្រ្តីនៃកម្ពុជា បានធ្វើការអំពាវនាវដល់បងប្អូន​ប្រជាពលរដ្ឋ​ខ្មែរទាំងអស់ គប្បីប្រើប្រាស់ប្រព័ន្ធផ្សព្វផ្សាយ ជាពិសេសហ្វេសប៊ុកប្រកបដោយទទួលខុសត្រូវ សូមកុំធ្វើអ្វីទៅតាម អារម្មណ៍ និងដើម្បីគេងចំណេញនយោបាយជាដើមនោះ។សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា ការផ្តល់ព័ត៌មានមិនពិត គឺនឹង​ធ្វើឲ្យមានបញ្ហាដល់សង្គម និងប្រទេសជាតិទាំងមូល ជាក់ស្តែងករណីនៅខេត្តកណ្តាល​នាពេល​កន្លងទៅថ្មីៗ ​ដោយផ្សាយតាមគ្នា ដោយគ្មានជាការពិត ដោយ​ចោទ​ប្រកាន់​ដល់​អាជ្ញាធរថា បិទមិនឲ្យធ្វើការដង្ហែរទីងមោង និងព័ត៌មានជាច្រើនទៀតថា មានបាតុកម្មប្រឆាំង និង​រាជរដ្ឋាភិបាលនៅរាជធានីភ្នំពេញជាដើមនោះ។ សម្តេច បានបន្ថែមទៀតថា ​ការផ្តល់ និងការទទួលមិនពិតនេះហើយនឹងនាំឲ្យប្រជាពលរដ្ឋ​អន្តរាយ និង​គ្រោះថ្នាក់បំផុតសម្រាប់ជាតិ។ជាមួយគ្នានោះដែរសម្តេចធិបតី ហ៊ុន ម៉ាណែត នាយករដ្ឋមន្រ្តី ​ក៏បានណែនាំ​ដល់រដ្ឋមន្រ្តីក្រសួង ព័ត៌មានគប្បីត្រូវពិនិត្យ ​អាជ្ញាបណ្ណដល់សារព័ត៌មានណា​ ដែលមិនគោរពទៅតាមវិជ្ជាជីវៈរបស់ខ្លួន ហើយបន្ទាប់ពីធ្វើការណែនាំអប់រំ​ហើយមិនស្តាប់ត្រូវតែដកអាជ្ញាបណ្ណ​សារ​ព័ត៌មាននោះចូល​បញ្ជីខ្មៅ ដោយ​ឈប់ផ្តល់ដល់ពួកគេទាំងនោះជារៀងរហូតផងដែរ។ការលើកឡើងរបស់​សម្តេចធិបតី ហ៊ុន ម៉ាណែត ​នេះគឺបានធ្វើឡើង​ក្នុងឱកាស​អញ្ជើញ​ជា​អធិបតីភាព ពិធីបញ្ចុះបឋមសិលាសាងសង់សារមន្ទីរ សម្តេចព្រះព្រហ្មរតនមុនី ពិន សែម ស្ថិតនៅវត្តរាជបូព៌​ ខេត្តសៀមរាប នាថ្ងៃទី១៨ ខែកក្កដា ឆ្នាំ២០២៤៕ អត្ថបទ៖ បាន ចក់ 

សម្តេចធិបតី បញ្ជាបន្ទាន់ឲ្យធនាគារជាតិ ធ្វើការជាមួយធនាគារឯកជន ដើម្បីពិនិត្យប្រាក់ដុល្លារដែលពិបាកចាយ

2024/07/18 10:17:27 am        432
Facebook Telegram Linkin
សៀមរាប៖ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានដាក់បទបញ្ជាជាបន្ទាន់ឱ្យធនាគារជាតិនៃកម្ពុជា ធ្វើការជាមួយធនាគារឯកជនពិនិត្យឡើងវិញ លើបញ្ហាពិបាកចាយលុយដុល្លារ ដោយសារមានបញ្ហាលុយចាស់ និងបញ្ហា​បន្តិចបន្តួច ដែលបង្កជាការមិនសប្បាយចិត្តដល់ទេសចរ។ក្នុងឱកាសអញ្ជើញជាអធិបតីភាព ពិធីបញ្ចុះបឋមសិលាសាងសង់សារមន្ទីរ សម្តេចព្រះព្រហ្មរតនមុនី ពិន សែម ស្ថិតនៅវត្តរាជបូព៌ ខេត្តសៀមរាប នាព្រឹកថ្ងៃទី១៨ ខែកក្កដា ឆ្នាំ២០២៤ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា មានប្រជាពលរដ្ឋ និងភ្ញៀវទេសចរមួយចំនួនបានរិះគន់ និងមានការ​ថ្នាំងថ្នាក់​ចំពោះលុយ​ដែល​ពួកគេបានដកចេញ​ពីធនាគារ​ ដោយសារតែលុយខ្លះប្រឡាក់ ​និង​មាន​ស្នាមអ្វី​បន្តិចបន្តួច​ហើយ​ពិបាកចាយ ដូច្នេះខាង​ធនាគារជាតិត្រូវធ្វើការរឿងនេះជាបន្ទាន់ ធ្វើយ៉ាងណាកុំឲ្យ​បញ្ហានេះ បន្តបង្កើតឡើង​ជាបន្តទៀតនោះ។សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ​ក៏បានលើកឡើងផងដែរថា ​ការដោះស្រាយ​បញ្ហា​បន្តិចបន្ទួច​នេះសម្រាប់ភ្ញៀវទេសចរ ​គឺជាការធ្វើបដិសណ្ឋារកិច្ចមួយដ៏ល្អសម្រាប់ពួកគេ ហើយ​ក៏ជាការទាក់ទាញភ្ញៀវទេសចឲ្យមកលេង​កម្សាន្ត​នៅ​កម្ពុជា​បន្ថែម​ទៀតផងដែរ ប្រសិន​បើសេវាកម្មយើងល្អ និងពុំផ្តល់ភាពរកាំរកូសដល់ពួកគេនោះ។ឆ្លៀតក្នុងឱកាសនោះដែរ សម្តេចធិបតី ហ៊ុន ម៉ាណែត នាយករដ្ឋមន្រ្តី ក៏បានឆើ្លយតបចំពោះការ រិះគន់មួយ​ចំនួនទាក់ទង នឹងភាព​ស្ងៀមស្ងាត់​ភ្ញៀវទេសចរនៅខេត្តសៀមរាបផងដែរ ដោយ​សម្តេច បានការពារចំពោះភាពរិះគន់នេះថា វិស័យទេសចរណ៍​ប្រៀប​បាន​ដូចជាវិស័យកសិកម្ម​យ៉ាង​ដូច្នេះដែរ ពោលគឺវា មានរដូវកាលរបស់វា ​ដូចខ្លះ ឬខែខ្លះមានភ្ញៀវតិច និងខ្លះមានភ្ញៀវច្រើនជាដើម ពុំមែនមកពីការដឹកនាំ​របស់ក្រសួងទេសចរណ៍​ ឬស្ថាប័ន​ណា​មួយនោះទេ៕អត្ថបទ៖ បាន ចក់

លោក Netanyahu ត្រូវបានរិះគន់ចំពោះដំណើរទៅកាន់អាមេរិក ខណៈការចរចាចំណាប់ខ្មាំងជាប់គាំង

2024/07/18 09:40:56 am        270
Facebook Telegram Linkin
នាយករដ្ឋមន្ត្រីអ៊ីស្រាអែល លោក Benjamin Netanyahu បានប្រឈមការជំទាស់យ៉ាងដាច់អហង្ការពីបក្សប្រឆាំងនៅក្នុងសភា កាលពីថ្ងៃពុធ ១៧ កក្កដា។ លោកត្រូវបានរំខាន និងប្រឆាំង ម្តងហើយម្តងទៀត ចំពោះការគ្រប់គ្រងរបស់លោកក្នុងសង្គ្រាមរបស់អ៊ីស្រាអែលប្រឆាំងនឹងក្រុមហាម៉ាសនៅហ្កាហ្សា និងជុំវិញការចរចារសម្របសម្រួលដោយអេហ្ស៊ីប និងកាតានៅតែជាប់គាំងក្នុងគោលបំណងដោះលែងជនជាតិអ៊ីស្រាអែល ដែលត្រូវបានចាប់ជាចំណាប់ខ្មាំង ដោយក្រុមសកម្មប្រយុទ្ធប៉ាឡេស្ទីន។លោក Netanyahu បានការពារសមិទ្ធផលរបស់យោធា ដោយនិយាយថា លោកបានផ្គើននឹងសម្ពាធអន្តរជាតិឲ្យបញ្ឈប់ផែនឈ្លានពាន ដែលលោកនិយាយថា ត្រូវតែកម្ចាត់ក្រុមហាម៉ាសឲ្យអស់។មិនមែនតែសម្ពាធក្រៅស្រុកទេ នៅក្នុងប្រទេសវិញ ក្រុមបាតុកម្មអ៊ីស្រាអែល ពេលខ្លះមានរហូតដល់រាប់ម៉ឺននាក់ បានចេញតវ៉ា ឈានដល់អំពើហិង្សា ទាមទារឱ្យលោក Netanyahu នាំយកអ្នកដែលត្រូវបានចាប់ឃុំខ្លួនមកផ្ទះវិញ និងទាមទារឲ្យលោកលាលែងពីតំណែង។ការប៉ះទង្គិចគ្នានៅក្នុងសភារបស់ប្រទេសនេះ កាលពីថ្ងៃពុធ បានកើតឡើងនៅមុនពេលដំណើរទស្សនកិច្ចដែលបានគ្រោងទុករបស់លោក Netanyahu ទៅកាន់ទីក្រុងវ៉ាស៊ីនតោននៅសប្តាហ៍ក្រោយ ដែលលោកគ្រោងនឹងថ្លែងសុន្ទរកថានៅក្នុងសម័យប្រជុំរួមនៃសភាសហរដ្ឋអាមេរិក។មេដឹកនាំបក្សប្រឆាំងលោក យ៉ែ ឡាពីត (Yair Lapid )បានទាមទារឱ្យលោក Netanyahu បកស្រាយថាតើ លោក នឹងប្រើឱកាសនេះដើម្បីប្រកាសថា លោកទទួលយកកិច្ចព្រមព្រៀងចំណាប់ខ្មាំងដែរឬទេ៕

ប្រសាសន៍សំខាន់ៗរបស់សម្តេចធិបតី ក្នុងពិធីបញ្ចុះបឋមសិលាសាងសង់សារមន្ទីរសម្តេចព្រះព្រហ្មរតនមន្នី ពិន សែមរាជបូព៌

2024/07/18 09:07:49 am        324
Facebook Telegram Linkin
សៀមរាប៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និង លោកជំទាវបណ្ឌិត នៅព្រឹកថ្ងៃទី​១៨ ខែកក្កដា ឆ្នាំ២០២៤ បានអញ្ជើញជាអធិបតីក្នុងពិធី បញ្ចុះបឋមសិលាសាងសង់សារមន្ទីរសម្តេចព្រះព្រហ្មរតនមន្នី ពិន សែមរាជបូព៌ ដែលមានទីតាំងស្ថិតនៅភូមិ វត្តបូព៌ សង្កាត់សាលាកំរើក ក្រុងសៀមរាប ខេត្តសៀមរាប។ប្រសាសន៍សំខាន់ៗរបស់សម្តេចធិបតីហ៊ុន ម៉ាណែត ដែលមានខ្លឹមសារដូចខាងក្រោម៖-សម្តេចធិបតី ហ៊ុន ម៉ាណែត ថ្លែងថា ព្រះពុទ្ធសាសនាបានដើរតួនាទី យ៉ាងសំខាន់ក្នុងការបណ្តុះបណ្តាលបញ្ញាស្មារតី ហើយជាថ្នាលមួយបណ្តុះនូវបញ្ញវន្ត សម្រាប់ការអភិវឌ្ឍប្រទេសជាតិផងដែរ។-សម្តេចធិបតីនាយករដ្ឋមន្ត្រីបានអះអាងថា សង្រ្គាមមិនត្រឹមតែធ្វើឲ្យប្រជាពលរដ្ឋបែកបាក់កូនចៅ ប្តី ប្រពន្ធ ឱពុកម្តាយប៉ុណ្ណោះទេ សូម្បីតែរូបចំឡាក់ខ្មែរក៏ត្រូវបានបែកបាក់ផងដែរ ទោះយ៉ាងណាពេលនេះប្រទេសមានសុខសន្តិភាពព្រលឹងដូនតាយើងដែលបានធ្វើចេញពីថ្ម ក៏បានកំពុងមកវិលត្រឡប់មកវិញជាបន្តបន្ទាប់។-សម្តេចធិបតី ហ៊ុន ម៉ាណែត បានប្រកាសថា រហូតដល់ពេលនេះកម្ពុជាបានរំដោះគ្រាប់មីន និងគ្រាប់យុទ្ធភ័ណ្ឌមិនទាន់ផ្ទុះដែលសល់ពីសម័យសង្រ្គាមបានចំនួនជាងបីពាន់គីឡូម៉ែត្រការ៉េ ខណៈនៅសល់ជាងមួយពាន់គីឡូម៉ែត្រការ៉េទៀតកម្លាំងជំនាញកំពុងបន្តរំដោះបន្ថែមទៀត ដើម្បីសុវត្ថិភាព របស់ប្រជាជនខ្មែរទាំងមូល។-សម្តេចធិបតី ហ៊ុន ម៉ាណែត រំលឹកជាថ្មីម្តងទៀតថា «កត្តាសន្តិភាព»នៅតែសំខាន់សម្រាប់កម្ពុជា និងមនុស្សជាតិទាំងមូលនៅលើពិភពលោក។ សុខសន្តិភាពបានធ្វើឲ្យប្រទេសកម្ពុជាមានការអភិវឌ្ឍជាបន្តបន្ទាប់។-សម្តេចធិបតីនាយករដ្ឋមន្រ្តីបានអះអាងថា វិស័យទេសចរណ៍ដូចគ្នាទៅនឹងវិស័យកសិកម្មយ៉ាងដូច្នេះដែរពោលគឺមានរដូវរបស់វា។ ការលើកឡើងរបស់សម្តេចធិបតី នេះគឺឆ្លើយតបទៅនឹងការរិះគន់នានាចំពោះភាពស្ងៀមស្ងាត់ភ្ញៀវទេសចរនៅខេត្តសៀមរាប។-សម្តេចធិបតី ហ៊ុន ម៉ាណែត អំពាវនាវដល់បងប្អូនប្រជាពលរដ្ឋទាំងអស់គប្បី រួមគ្នាថែទាំ និងអភិរក្សសម្បត្តិវប្បធម៌ដែលដូនតាខ្មែរបន្សល់ទុកឲ្យ ដើម្បីជាការទាក់ទាញឲ្យកាន់ តែសម្បូរបែបបន្ថែមទៀត សម្រាប់វិស័យទេសចរណ៍នៅកម្ពុជា។-សម្ដេចធិបតី ហ៊ុន ម៉ាណែត បានបញ្ជាក់ថា នៅឆ្នាំទី១ នៃការកាន់តំណែងរបស់សម្ដេចជានាយករដ្ឋមន្រ្ដីនេះ សម្ដេចយកចិត្តទុកដាក់ខ្លាំងលើការរៀបចំរចនាសម្ព័ន្ធតាមក្រសួងស្ថាប័ន និងជំនួបនានានៅក្រៅប្រទេស ប៉ុន្ដែចាប់ពីឆ្នាំទី២ ទៅសម្ដេចនឹងចុះទៅដោយផ្ទាល់នៅថ្នាក់ក្រោមជាតិ ហើយការចុះទៅនេះគឺនឹងមិនប្រាប់ឱ្យដឹងមុនឡើយ។-សម្ដេចធិបតី ហ៊ុន ម៉ាណែត បានចាត់ទុកបញ្ហាដែលបានកើតឡើងក្នុងពេលសម្ដេចកំពុងដឹកនាំនេះគឺជាវិញ្ញាសាដែលត្រូវដោះស្រាយដើម្បីឱ្យបានប្រសើរជាងមុន។សូមបញ្ជាក់វត្តបូព៌ស្ថិតតាមដងស្ទឹងសៀមរាបត្រើយខាងកើត ក្នុងវត្តបូព៌ សង្កាត់សាលាកំរើក ក្រុងសៀមរាប ខេត្តសៀមរាប។ ក្នុងទីធ្លាវត្តមានព្រះវិហារចាស់ ដែលមានគំនូរបុរាណរឿងរាមកេរ្តិ៍ ដ៏ល្អវិចិត្រនៅលើផ្ទៃជញ្ជាំងខាងក្នុង ហើយនៅលើបង្អួចខាងក្រៅ មានចម្លាក់លានដកស្រង់ចេញពីរឿងរាមកេរ្តិ៍ដ៏រស់រវើកដូចគ្នា។ ភស្តុតាងពីការវិភាគរូបថតពីលើអាកាសបានបង្ហាញថា ទីតាំងវត្តនេះស្ថិតនៅទីតាំងចាស់ ដែលអាចមានការប្រើប្រាស់តាំងពីសម័យ បុរាណ។ 

បណ្ដាញសង្គម

ព័ត៌មានថ្មីៗ

អនុប្រធានទី១ គ.ជ.គ.ម អញ្ជើញដឹកនាំកិច្ចប្រជុំលើរបាយការណ៍លទ្ធផលការងារគ្រប់គ្រងគ្រោះមហន្តរាយខែមិថុនា និងលើកទិសដៅការងារអនុវត្តបន្តខែកក្កដា
06/29/2026 02:06 PM
Facebook Telegram Linkin
កម្ពុជានឹងរៀបចំពិព័រណ៍អាហារខ្មែរ ដើម្បីលើកកម្ពស់ផលិតផលក្នុងស្រុក និងពង្រីកទីផ្សារដល់សហគ្រិន
06/29/2026 01:06 PM
Facebook Telegram Linkin
មន្ត្រីជំនាញ៖ Online Scams នៅកម្ពុជា កំពុងត្រូវបានបង្ក្រាប​យ៉ាងសកម្ម​ទោះ​មាន​លក្ខណៈ​ស្មុគ​ស្មាញ
06/29/2026 01:06 PM
Facebook Telegram Linkin
ក្រសួងបរិស្ថានរៀបចំកូនឈើ៥លានដើម សម្រាប់ចែកជូនពលរដ្ឋក្នុងពិព័រណ៍ «ពន្លកបៃតង» នៅខែក្រោយ
06/29/2026 01:06 PM
Facebook Telegram Linkin
ក្រសួងមុខងារសាធារណៈ៖ «វិស័យអប់រំ» ជាវិស័យអាទិភាពលំដាប់ទីមួយរបស់រាជរដ្ឋាភិបាល ដើម្បីកសាង និងអភិវឌ្ឍមូលធនមនុស្ស ប្រកបដោយគុណភាពខ្ពស់ និងសុខភាពល្អ ដែលជាទ្រព្យសកម្មជាតិដ៏រឹងមាំ
06/29/2026 01:06 PM
Facebook Telegram Linkin
លោកជំទាវបណ្ឌិត ពេជ ចន្ទមុន្នីហ៊ុនម៉ាណែត អញ្ជើញ​សម្ពោធ​ដាក់​ឲ្យ​ដំណើរ​ការ​សារមន្ទីរ​ព្រះវិហារ​អដ្ឋរស្ស និងពុទ្ធាភិសេកព្រះបដិមាព្រះសម្មាសម្ពុទ្ធអង្គធំ ក្នុង​រមណីយ​ដ្ឋាន​ភ្នំ​ព្រះរាជ​ទ្រព្យ (ឧដុង្គ)
06/29/2026 01:06 PM
Facebook Telegram Linkin
អ្នកនាំពាក្យក្រសួងការងារ៖ គិតត្រឹម ៥ខែដើមឆ្នាំ២០២៦នេះ ចំនួនសហគ្រាស ក្រុមហ៊ុន រោងចក្រនៅកម្ពុជា​មាន​ចំនួន ៤៧ ២៩៩ សហគ្រាស កើនឡើង​ចំនួន ៦៥០ស​ហគ្រា​ស
06/29/2026 01:06 PM
Facebook Telegram Linkin
អាជ្ញាធរខេត្តកំពង់ស្ពឺ សម្ពោធផ្លូវបេតុងក្រាលកៅស៊ូលើខ្នងភ្នំឧទ្យានជាតិសុរាម្រិតកុសមៈគីរីរម្យ ដើម្បីលើកកម្ពស់វិស័យទេសចណ៍
06/29/2026 12:06 PM
Facebook Telegram Linkin
ក្រុមប្រឹក្សាធម្មនុញ្ញប្រគល់ស្តម្ភរដ្ឋធម្មនុញ្ញចម្លង ដើម្បីតម្កល់នៅសាលារាជធានី-ខេត្ត សម្រាប់​ប្រារព្ធ​ពិធីគោរពរដ្ឋធម្មនុញ្ញ
06/29/2026 12:06 PM
Facebook Telegram Linkin
មន្រ្ដីជាន់ខ្ពស់ក្រសួងអភិវឌ្ឍន៍ជនបទ ដឹកនាំកិច្ចប្រជុំបូកសរុបលទ្ធផលការងារប្រចាំឆមាសទី១ ឆ្នាំ២០២៦ និងលើកទិសដៅបន្ត របស់មន្ទីរអភិវឌ្ឃន៍ជនបទខេត្តកំពត
06/29/2026 12:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.