នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រធានសមាគមក្នុងស្រុក៖ ការធ្វើពាណិជ្ជកម្មកម្ពុជា-អាមេរិក នឹង​មាន​សន្ទុះ​កាន់​តែ​ខ្លាំង​បន្ទាប់​ពី​ចុះ​កិច្ច​ព្រមព្រៀងថ្មីនេះ
ធុរកិច្ចកម្ពុជា-ម៉ាឡេស៊ី បង្កើតកិច្ចសហការផលិតទឹកដោះគោស្រស់ ដើម្បីបំពេញតម្រូវការទីផ្សារ
ផលិតផលខ្មែរជាច្រើនមុខ ដែលផលិតនៅក្នុងស្រុក បាននិងកំពុងដាក់លក់ នៅក្នុងស្តង់ ផ្សារផលិតផលខ្មែរ ខេត្តកំពង់ស្ពឺ
ក្រុមហ៊ុនសាជីវកម្មស្ពាន-ថ្នល់ចិន (CRBC) ចាប់អារម្មណ៍ និងមានគម្រោងអភិវឌ្ឍតំបន់សក្តានុពលទេសចរណ៍តាមដងព្រែកជីកហ្វូណនតេជោ

សេដ្ឋកិច្ច និង កសិកម្ម

ប្រធានសមាគមក្នុងស្រុក៖ ការធ្វើពាណិជ្ជកម្មកម្ពុជា-អាមេរិក នឹង​មាន​សន្ទុះ​កាន់​តែ​ខ្លាំង​បន្ទាប់​ពី​ចុះ​កិច្ច​ព្រមព្រៀងថ្មីនេះ

2025/10/28 11:15:14 am        133
Facebook Telegram Linkin
ប្រធានសមាគមធំៗក្នុងស្រុក ថ្លែងនូវការអបអរសាទរ ចំពោះ​ការ​ឈាន​ដល់​កិច្ច​ព្រម​ព្រៀង​ស្តីពី​ពាណិជ្ជ​កម្ម​បដិការ ដើម្បីពង្រឹង ទំនាក់ទំនងសេដ្ឋកិច្ចទ្វេភាគីរវាងព្រះរាជាណាចក្រកម្ពុជា និង​សហរដ្ឋ​អាម៉េរិក ដែលនេះគឺជាការលើកកម្ពស់ដល់ការធ្វើធុរកិច្ច ពាណិជ្ជកម្ម និងការ​វិនិយោគ​បន្ថែម​នៃ​ប្រទេសទាំងពីរ។ ឧកញ៉ាបណ្ឌិត ហោ សេរីវឌ្ឍន៍ ប្រធានក្រុមប្រឹក្សាភិបាលសមាគមវិនិយោគ នវានុវត្តន៍ និង​អភិវឌ្ឍន៍​ (IDI) លើកឡើងក្នុង កិច្ចសម្ភាសន៍ជាមួយសារព័ត៌មាន ស្តីពីការចុះ​ហត្ថ​លេខា​កិច្ច​ព្រម​ព្រៀង​ស្តីពី​ពាណិជ្ជកម្មបដិការរវាងកម្ពុជានិងអាម៉េរិក នេះថា ចំពោះ ការសម្រេចបានសមិទ្ធផលថ្មី តាម​រយៈនៃការចុះហត្ថលេខាកិច្ចព្រមព្រៀងពាណិជ្ជកម្មបដិការនេះ គឺមិនមែន​កើត​ឡើង​ដោយ​ឯក​ឯង​នោះឡើយ ពោលគឺបានកើតឡើងដោយសារការខិតខំប្រឹងប្រែងរបស់រាជរដ្ឋាភិបាល ក្រោ​ម​កា​រដឹកនាំដ៏ឈ្លាសវៃ និងប៉ិនប្រសព្វរបស់ សម្តេចមហាបវរ ធិបតី ហ៊ុន ម៉ាណែត នាយក​រដ្ឋ​មន្រ្តី​នៃ​ព្រះរាជាណាចក្រកម្ពុជា ដោយសម្តេចបានយកចិត្តទុកដាក់យ៉ាងខ្លាំង ទើបធ្វើ ឱ្យ​កម្ពុជា​សម្រេច​បាន​ផ្លែផ្កាគួជាទីមោទនៈ។ឧកញ៉ាបណ្ឌិត បន្តថា ជាក់ស្តែងការឈានដល់កិច្ចព្រមព្រៀងស្តីពីពាណិជ្ជកម្មបដិការ ដើម្បី​ពង្រឹង​ទំនាក់​ទំនងសេដ្ឋកិច្ចទ្វេ ភាគីរវាងព្រះរាជាណាចក្រកម្ពុជា និងសហរដ្ឋអាមេរិកនេះ គឺ​បាន​បង្ហាញ​ឱ្យ​ឃើញនូវចំណុចច្បាស់លាស់ និងពិតប្រាកដ សម្រាប់ ជាមូលដ្ឋានគ្រឹះ ក្នុងការ​បង្កើន​ទំនាក់​ទំនង និងបង្កើតទំនុកចិត្តដល់ធុរកិច្ចដែលកំពុងធ្វើអាជីវកម្មក្នុងស្រុក និងជាការទាក់ទាញ វិនិ​យោគិនបរទេសមកបណ្តាក់បន្ថែមផងដែរ។ឯកឧត្តមបណ្ឌិត សួន ម៉ិ ប្រធានសមាគមសហគ្រិនវីម៉ូនៅកម្ពុជា មើលឃើញថា កម្ពុជា-អាម៉េរិក​បាន​ជំរុញ​បង្កើត​នូវ​ទំនាក់ ទំនងយ៉ាងកាន់តែជិតស្និទ្ធ និងពង្រីកនូវកិច្ចសហ​ប្រតិបត្តិការ​កាន់​តែ​ខ្លាំង​ក្លា ​ជាពិសេសជំរុញដល់ការធ្វើពាណិជ្ជកម្មទ្វេភាគី ជាក់ស្តែង នៅទីក្រុងគូឡាឡាំពួ ប្រទេស​ម៉ាឡេស៊ី ​ប្រមុខថ្នាក់ដឹកនាំនៃប្រទេសទាំងពីរ បានចុះហត្ថលេខា​លើ​កិច្ច​ព្រម​ព្រៀង​ពាណិជ្ជ​កម្ម​បដិការ​ ដើម្បីពង្រឹងនិងពង្រីកពាណិជ្ជកម្មទ្វេភាគីបន្ថែម។ តាមរយៈនេះយើងរំពឹងថា ការធ្វើ​ពាណិជ្ជ​កម្ម​នៃប្រទេសទាំងពីរកាន់តែមានភាព ខ្លាំងក្លាថែមទៀត ជាពិសេសជាជំរុញ​ដល់​កំណើន​នៃ​ការ​នាំចេញរបស់កម្ពុជាបន្ថែម។សូមបញ្ជាក់ថា នៅថ្ងៃទី២៦ ខែតុលា ២០២៥នេះ សម្ដេចមហាបវរធិបតី ហ៊ុន ម៉ាណែត នាយក​រដ្ឋ​មន្រ្ដី​នៃព្រះរាជាណាចក្រកម្ពុជា និងប្រធានាធិបតីសហរដ្ឋអាមេរិក, ឯកឧត្តម ដូណាល់ ត្រាំ អញ្ជើញ​ចុះ​ហត្ថលេខាកិច្ចព្រមព្រៀងពាណិជ្ជកម្មបដិការ រវាងព្រះរាជា ណាចក្រកម្ពុជា និង​សហ​រដ្ឋ​អាម៉េរិក ដើម្បីពង្រឹងនិងពង្រីក ពាណិជ្ជកម្មទ្វេភាគី នៅទីក្រុងគូឡាឡាំពួ ប្រទេសម៉ាឡេស៊ី។ ជុំវិញការ កិច្ចព្រមព្រៀងអាមេរិក-កម្ពុជានេះដែរ បើតាមផេកផ្លូវការរបស់ សេតវិមាន​សហ​រដ្ឋ​អាមេរិក​ តាមរយៈការចុះហត្ថលេខាកិច្ចព្រមព្រៀង អាមេរិក-កម្ពុជានេះដែរ ក៏ជាការលុប​បំបាត់​ពន្ធ​លើ ​១០០% នៃទំនិញឧស្សាហកម្ម និងកសិកម្មរបស់សហរដ្ឋអាមេរិកផងដែរ៕ អត្ថបទ៖ សុន រ៉ាឌី

ធុរកិច្ចកម្ពុជា-ម៉ាឡេស៊ី បង្កើតកិច្ចសហការផលិតទឹកដោះគោស្រស់ ដើម្បីបំពេញតម្រូវការទីផ្សារ

2025/10/27 11:14:39 am        228
Facebook Telegram Linkin
ធុរកិច្ចកម្ពុជា-ម៉ាឡេស៊ី បង្កើតកិច្ចសហការ លើការពង្រីកប្រតិបត្តិការអាជីវកម្ម និងការវិនិយោគ​របស់​ក្រុមហ៊ុន Farm Fresh Berhad មកកាន់ប្រទេសកម្ពុជា លើខ្សែច្រវាក់ផលិតកម្ម ផលិត​ផល​ចេញពីទឹកដោះគោស្រស់ ដើម្បីចូលរួមបំពេញតម្រូវការ ទីផ្សារ។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា តំណាង​ដ៏​ខ្ពង់​ខ្ពស់​សម្តេចមហា- បវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅ​ថ្ងៃ​ទី​២៦ ខែតុលា ឆ្នាំ២០២៥ បានអញ្ជើញជាអធិបតី ក្នុងជំនួប សម្តែងការគួរសម និង​ពិភាក្សា​ការងារ​ជាមួយ​គណៈប្រតិភូ ក្រុមហ៊ុន Farm Fresh Berhad ដឹកនាំដោយលោក Loi Tuan Ee សហ​ស្ថាបនិក, នាយកគ្រប់គ្រង និងជានាយកប្រតិបត្តិក្រុមហ៊ុន។បន្ទាប់ពីបញ្ចប់ជំនួបពិភាក្សាខាងលើ, ឯកឧត្តមឧបនាយករដ្ឋមន្ត្រី បានអញ្ជើញជាអធិបតី ក្នុង​ពិធី​ផ្លាស់​ប្តូរ​ចុះ​អនុស្សរណៈ លើការយោគយល់គ្នា រវាងក្រុមហ៊ុន Alpha Group របស់កម្ពុជា តំណាង​ដោយ​អ្នកឧកញ៉ា លី ឃុនថៃ ប្រធានក្រុមហ៊ុន ជាមួយនឹង ក្រុមហ៊ុន Farm Fresh Berhad របស់ម៉ាឡេស៊ី តំណាងដោយ លោក Loi Tuan Ee។ អនុស្សរណៈលើការយោគយល់គ្នាបានផ្លាស់ប្តូរនាឱកាសនេះ ត្រូវ​បាន​រៀបចំ​ឡើង​ក្នុង​គោល​បំណង ​ដើម្បីបង្កើតកិច្ចសហការ ក្នុងការពង្រីកប្រតិបត្តិការអាជីវកម្ម និងការ​វិនិយោគ​របស់​ក្រុម​ហ៊ុន ​Farm Fresh Berhad មកកាន់ប្រទេសកម្ពុជា ដែលពាក់ព័ន្ធ នឹងខ្សែ​ចង្វាក់​ផលិត​កម្ម​ផលិត​ផល​ចេញ​ពីទឹកដោះគោស្រស់ ដើម្បីចូលរួមបំពេញតម្រូវការទីផ្សារ៕ អត្ថបទ៖ សុន រ៉ាឌី

ផលិតផលខ្មែរជាច្រើនមុខ ដែលផលិតនៅក្នុងស្រុក បាននិងកំពុងដាក់លក់ នៅក្នុងស្តង់ ផ្សារផលិតផលខ្មែរ ខេត្តកំពង់ស្ពឺ

2025/10/25 10:45:16 am        284
Facebook Telegram Linkin
ផ្សារផលិតផលខ្មែរខេត្តកំពង់ស្ពឺ បាននិងកំពុងដំណើរលក់កសិផល និងផលិតផលខ្មែរ ដែលបានដាំដុះ និងកែច្នៃដោយកសិករ ផលិតករ និងសិប្បករខ្មែរ នៅក្នុងខេត្តកំពង់ស្ពឺ នៅរៀងរាល់ថ្ងៃសុក្រ-សៅរ៍នឹងអាទិត្យ ចាប់ពីម៉ោង ៦៖៣០ព្រឹក ដល់ម៉ោង១៨៖០០ល្ងាច ដែលមានទីតាំងនៅបរិវេន វិមានសម្តេចព្រះសង្ឃរាជជោតញ្ញាណោ ជួន ណាត ជិតវេទិកាអុំទូក ខេត្តកំពង់ស្ពឺ។ ស្វែងរកទីតាំងផ្សារផលិតផលខ្មែរ ខេត្តកំពង់ស្ពឺ https://maps.app.goo.gl/WFJH6PVzYaYkh5VH7?g_st=atmសូមបញ្ជាក់ថា ក្រោមការដឹកនាំ និងការគាំទ្ររបស់ក្រសួងពាណិជ្ជកម្ម និងការសម្របសម្រួលផ្តល់ទីតាំងរបស់រដ្ឋបាលខេត្ត មន្ទីរពាណិជ្ជកម្មខេត្តកំពង់ស្ពឺ ក្រោមគម្រោងជំរុញទីផ្សារសម្រាប់កសិកម្មខ្នាតតូច (AIMS) នៃក្រសួងពាណិជ្ជកម្ម បានរៀបចំ និងដាក់ឲ្យដំណើរការផ្សារលក់ផលិតផលខ្មែរ ចាប់តាំងពីឆ្នាំ២០១៩ រហូតមកដល់បច្ចុប្បន្ន។ ផ្សារនេះ មានគោលបំណងផ្ដល់ឱកាសទីផ្សារបន្ថែមដល់កសិករ ផលិតករអាជីវករខ្នាតតូច ជាតំណាងពីក្រុមកសិករផលិត និងជាការតភ្ជាប់ទំនាក់ទំនងទីផ្សារឱ្យកាន់តែប្រសើរ ដល់ក្រុមផលិតដែលអាចរកប្រាក់ចំណូល និងលើកកម្ពស់ជីវភាពរស់នៅពួកគេ។ ការចូលរួមលើកកម្ពស់ និងប្រើប្រាស់ផលិតផលខ្មែរ ជាការរួមចំណែកបង្កើនផលិតភាពផលិតផលក្នុងស្រុក បង្កើនប្រាក់ចំណូល និងលើកស្ទួយជីវភាពប្រជាជន និងជំរុញអភិវឌ្ឍន៍សេដ្ឋកិច្ច-សង្គមឲ្យកាន់តែប្រសើរឡើង។សូមចូលរួមគាំទ្រផ្សារផលិផល ដើម្បីលើកស្ទួយជីវភាពកសិករ និងផលិតករខ្មែរ។

ក្រុមហ៊ុនសាជីវកម្មស្ពាន-ថ្នល់ចិន (CRBC) ចាប់អារម្មណ៍ និងមានគម្រោងអភិវឌ្ឍតំបន់សក្តានុពលទេសចរណ៍តាមដងព្រែកជីកហ្វូណនតេជោ

2025/10/25 10:32:40 am        296
Facebook Telegram Linkin
ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ អនុញ្ញាតជូនលោក Wang Huan តំណាងក្រុមហ៊ុនសាជីវកម្មស្ពាន-ផ្លូវថ្នល់ចិនប្រចាំកម្ពុជា និងសហការី ចូលជួបសម្តែងការគួរសម និងពិភាក្សាការងារ និងរាយការណ៍អំពីសកម្មភាពវិនិយោគរបស់ក្រុមហ៊ុន ព្រមទាំងស្នើសុំអនុសាសន៍ពីឯកឧត្តមរដ្ឋមន្រ្តីដើម្បីរៀបចំគម្រោងអភិវឌ្ឍន៍ពាក់ព័ន្ធនឹងវិស័យទេសចរណ៍ និងគម្រោងសំខាន់ៗមួយចំនួនទៀត នៅទីស្តីការក្រសួងទេសចរណ៍។ក្នុងឱកាសនៃជំនួបដ៏មានសារៈសំខាន់នេះ ឯកឧត្តមរដ្ឋមន្រ្តី ក៏បានអបអរសាទរ កោតសរសើរ និងវាយតម្លៃខ្ពស់ចំពោះសមិទ្ធផលរបស់ក្រុមហ៊ុនសាជីវកម្មស្ពាន-ផ្លូវថ្នល់ចិនប្រចាំកម្ពុជា (CRBC) ដែលបានចូលរួមចំណែកជាមួយរាជរដ្ឋាភិបាលកម្ពុជាក្នុងការអនុវត្តវិស័យអាទិភាព ជួយជំរុញកំណើនសេដ្ឋកិច្ច និងលើកកម្ពស់ជីវភាពរស់នៅរបស់ប្រជាពលរដ្ឋឱ្យកាន់តែប្រសើរ លើកកម្ពស់តួនាទីយុទ្ធសាស្ត្ររបស់រដ្ឋ ជាពិសេសការចូលរួមចំណែកលើកកម្ពស់ និងអភិវឌ្ឍវិស័យទេសចរណ៍កម្ពុជា។ក្នុងឱកាសនោះដែរ ឯកឧត្តមរដ្ឋមន្ត្រី ក៏បានគាំទ្រ និងលើកទឹកចិត្តដល់ក្រុមហ៊ុនសាជីវកម្មស្ពាន-ថ្នល់ចិន (CRBC) ឱ្យបន្តចូលរួមជាមួយរាជរដ្ឋាភិបាលកម្ពុជាជាមួយគោលនយោបាយលើកទឹកចិត្ត ដោយផ្តោតលើតំបន់ដែលមានសក្តានុពលទេសចរណ៍ តាមដងព្រែកជីកហ្វូណនតេជោ ដោយឈរលើការអភិរក្ស និងអភិវឌ្ឍ ដើម្បីអភិវឌ្ឍន៍ទេសចរណ៍តាមខេត្តជាប់ដងព្រែក សហគមន៍ លើកកម្ពស់ជីវភាពប្រជាជន និងរួមចំណែកការកាត់បន្ថយភាពក្រីក្រ ជាមួយគ្នានេះដែរ ឯកឧត្តមរដ្ឋមន្រ្តី ក៏បានស្នើលោក Wang ទាក់ទាញវិនិយោគិនមកធ្វើការវិនិយោគហេដ្ឋារចនាសម្ព័ន្ធទេសចរណ៍តាមខេត្តជាប់ដងព្រែកបន្ថែមទៀត៕

គណៈប្រតិភូវិនិយោគិនទីក្រុងឆឹងទូ ឈុងឈីង និងម៉ាឡេស៊ី ចាប់អារម្មណ៍​ការវិនិយោគ​នៅកម្ពុជា

2025/10/24 04:25:09 pm        1004
Facebook Telegram Linkin
ទីស្តីការក្រុមប្រឹក្សាអភិវឌ្ឍន៍កម្ពុជា៖ នារសៀលថ្ងៃទី២៣ ខែតុលា ឆ្នាំ២០២៥ ឯកឧត្តម នុត អ៊ុនវ័ណរ៉ា អគ្គលេខាធិការរងគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា និងសហការី បានទទួលជួបពិភាក្សាការងារជាមួយ គណៈប្រតិភូវិនិយោគិនមកពីទីក្រុងឆឹងទូ ឈុងឈីង និងប្រទេសម៉ាទ្បេស៊ី ដឹកនាំដោយលោកសាស្ត្រាចារ្យបណ្ឌិត Tan Yew Kuan នាយកប្រតិបត្តិ Asia Pacific Top Excellence Brand Committee និងលោក Gan Dehong ប្រធានសភាពាណិជ្ជកម្ម Chengdu Machinery Manufacturing។ ក្នុងឱកាសនេះ គណៈប្រតិភូវិនិយោគិន បានចាប់អារម្មណ៍ចំពោះឱកាសការវិនិយោគនៅកម្ពុជា។គណៈប្រតិភូវិនិយោគិនមកពីទីក្រុងឆឹងទូ ឈុងឈីង និងប្រទេសម៉ាទ្បេស៊ីនេះ មានកម្មវត្ថុអាជីវកម្មក្នុងវិស័យកម្មន្ដសាល, ការគ្រប់គ្រងខ្សែច្រវាក់ផ្គត់ផ្គង់, ឧបករណ៍អគ្គិសនី និងមេកានិច, គ្រឿងម៉ាស៊ីនឆ្លាតវៃ, ការវេចខ្ចប់, ការផលិត និងកែច្នៃ ព្រមទាំងវិស័យអចលនទ្រព្យ។ឯកឧត្តមអគ្គលេខាធិការរងបានសម្តែងនូវការស្វាគមន៍យ៉ាងកក់ក្តៅជូនចំពោះគណៈប្រតិភូដែលបានចំណាយពេលវេលាដ៏មានតម្លៃមកធ្វើទស្សនកិច្ចសិក្សាដោយផ្ទាល់នៅកម្ពុជា ដើម្បីឈ្វេងយល់ឱ្យកាន់តែច្បាស់អំពីបរិយាកាសនៅកម្ពុជា។ ឯកឧត្តមអគ្គលេខាធិការរងបានជម្រាបជូនគណៈប្រតិភូអំពីច្បាប់ ស្តីពីវិនិយោគ របបលើកទឹកចិត្តដែលប្រកបដោយភាពទាក់ទាញ សក្តានុពលវិនិយោគក្នុងវិស័យអាទិភាពមួយចំនួន និងគោលនយោបាយដើម្បីលើកកម្ពស់បរិស្ថានវិនិយោគនិងធុរកិច្ចនៅកម្ពុជា។ លោក Gan Dehong ប្រធានសភាពាណិជ្ជកម្ម Chengdu Machinery Manufacturing បានថ្លែងអំណរគុណចំពោះឯកឧត្តមអគ្គលេខាធិការរង ដែលបានចំណាយពេលវេលាទទួលជួបគណៈប្រតិភូនាពេលនេះ និងព្រមទាំងបានអត្ថាធិប្បាយលម្អិតអំពីស្ថានភាពវិនិយោគនៅកម្ពុជាជូនគណៈប្រតិភូ។ លោក Gan Dehong ក៏បានមានការកត់សម្គាល់ឃើញថា កម្ពុជាពិតជាមានការអភិវឌ្ឍយ៉ាងឆាប់រហ័ស ជាមួយនឹងរំហូរនៃការវិនិយោគបានចូលមកកម្ពុជាកាន់តែច្រើនឡើងៗក្នុងរយៈពេលប៉ុន្មានឆ្នាំចុងក្រោយនេះ ហើយម្យ៉ាងទៀតរាជរដ្ឋាភិបាលកម្ពុជាតែងតែស្តាប់នូវមតិយោបល់របស់សហគមន៍វិនិយោគដើម្បីកែលម្អបរិស្ថានវិនិយោគនៅកម្ពុជាឱ្យកាន់តែមានភាពប្រកួតប្រជែង។ ស្របជាមួយគ្នានេះ លោកប្រធានគណៈប្រតិភូបានធ្វើការវាយតម្លៃខ្ពស់ចំពោះ​សកម្មភាព​ការងារ​ប្រកប​ដោយវិជ្ជាជីវៈរបស់គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា ក្នុង​ការ​ទាក់​ទាញវិនិយោគ និងថែទាំវិនិយោគ ហើយបានសន្យានឹងធ្វើការពាំនាំ​ព័ត៌មាន​សំខាន់ៗ​ដែល​ទទួល​បាន និងទិដ្ឋភាពជាក់ស្តែងដែលបានឃើញដោយផ្ទាល់នាពេលនេះ ដើម្បីចែករំលែក​ជាមួយ​សមាជិក និងបណ្តាញធុរកិច្ច និងវិនិយោគរបស់ខ្លួនដើម្បីពិនិត្យលទ្ធភាពមកបណ្តាក់ទុន​វិនិយោគនៅ​កម្ពុជា​៕

អ្នកជំនាញ៖ ទោះបីកម្ពុជាមានជម្លោះជាមួយថៃ ប៉ុន្ដែការធ្វើពាណិជ្ជកម្ម​អន្តរជាតិ​បន្តមាន​កំណើន​ខ្ពស់

2025/10/23 03:40:25 pm        1115
Facebook Telegram Linkin
ឯកឧត្តម សួន ម៉ិ ប្រធានសមាគមសហគ្រិនវីម៉ូនៅកម្ពុជា បានមើលឃើញថា​ទោះ​បី​ប្រទេស​កម្ពុជា​មាន​ជម្លោះ​​ព្រំដែនជាមួយថៃមួយរយៈពេលកន្លងមកនេះ ក៏ការ​ធ្វើ​ពាណិជ្ជកម្ម​ជា​អន្តរជាតិ​របស់​កម្ពុជា​ជាមួយបណ្តាប្រទេសដៃគូផ្សេងៗ នៅតែបន្តមានកំណើនខ្ពស់ ខណៈ​ដែល​ប្រទេស​ថៃ​បាន​កំពុង​បាត់​បង់នូវសេដ្ឋកិច្ចរបស់ខ្លួនជាមួយបណ្តាប្រទេសផ្សេងៗ ជាពិសេសការធ្វើពាណិជ្ជ កម្ម​ជាមួយកម្ពុជា។ ឯកឧត្តមបានលើកឡើងថា ការបាត់បង់ដៃគូពាណិជ្ជកម្មរបស់​ភាគីថៃ​នេះ​ដោយសារ​ប្រទេស​ថៃ​មាន​បញ្ហា​ផ្ទៃ​ក្នុង ជាពិសេសរវាងរដ្ឋ និងវិស័យឯកជន និងការបង្ករជម្លោះ​ឥត​ឈប់​ឈរ​ជាមួយ​ប្រទេស​ជិត​ខាង​ដូចកម្ពុជាជាដើមបានធ្វើឱ្យបាត់បង់នូវទំនុកចិត្តដល់វិនិយោគិនជាតិ និង​អន្តរជាតិ​នៅ​ក្នុង​ប្រទេសរបស់ខ្លួន។ទាក់ទងនឹងការធ្វើពាណិជ្ជកម្មជាអន្តរជាតិរបស់កម្ពុជានេះ លោកបណ្ឌិត ហុង វណ្ណៈ ជំនាញ​សេដ្ឋកិច្ច​វិទ្យាស្ថានទំនាក់ទំនងអន្តរជាតិរាជបណ្ឌិតសភាកម្ពុជា លើកឡើងថា តាមរយៈ​ការ​ចុះ​ហត្ថ​លេខា​កិច្ច​ព្រមព្រៀងសន្តិភាពកម្ពុជា-ថៃ នៅក្នុងកិច្ចប្រជុំលើកទី៤៧ និងកិច្ចប្រជុំកំពូល​ពាក់​ព័ន្ធ​នៅ​ប្រទេសម៉ាឡេស៊ី ដែលប្រព្រឹត្តិទៅនៅថ្ងៃទី២៥-២៨ ខែតុលាខាងមុខនេះ ក្រោមអធិបតី​ភាព​វត្ត​មាន ឯកឧត្តមប្រធានាធិបតីអាមេរិក ដូណាល់ ត្រាំ ស្ថានភាពវិវាទព្រំដែនកម្ពុជា-ថៃ និង​មាន​ភាព​ប្រសើរឡើង ប៉ុន្ដែទំនាក់ទំនងពាណិជ្ជកម្មនៅមិនទាន់អាចល្អឡើងវិញនោះទេ។ បើ​តាមរបាយការណ៍របស់ក្រសួងសេដ្ឋកិច្ច និងហិរញ្ញវត្ថុកម្ពុជា ការធ្វើពាណិជ្ជ​កម្ម​អន្តរជាតិ​របស់​កម្ពុជា​រយៈ​ពេល៩ ខែឆ្នាំ២០២៥នេះមានទំហំទឹកប្រាក់សរុបប្រមាណជិត ៤៨ ពាន់​លាន​ដុល្លារ​អាមេរិក កើនឡើងជាង៦ពាន់លានដុល្លារស្មើ១៦% បើប្រៀបធៀបនឹងរយៈពេល៩ខែឆ្នាំ២០២៤ ក្នុង​នោះកម្ពុជាបាននាំចេញទំនិញមានទឹកប្រាក់ជាង ២៣ ពាន់លានដុល្លារ កើនឡើង ១៥% ខណៈ​ការនាំចូល មានទឹកប្រាក់ជាង ២៤ ពាន់លានដុល្លារអាម៉េរិក កើន ១៦% បើប្រៀប ធៀប​នឹង​រយៈ​ពេលដូចឆ្នាំ២០២៤៕ អត្ថបទ៖ សុន រ៉ាឌី

ប្រធាន Asia Bridge បង្ហាញការចូលរួមផ្សព្វផ្សាយពីបរិយាកាសវិនិយោគនៅកម្ពុជា ដល់​ធុរកិច្ច​អាល្លឺម៉ង់

2025/10/22 03:05:45 pm        707
Facebook Telegram Linkin
ប្រធានក្រុមប្រឹក្សាភិបាលស្ថាប័ន Asia Bridge បានបង្ហាញនូវឆន្ទៈខ្ពស់ ក្នុង​ការ​ចូល​រួម​ផ្សព្វ​ផ្សាយ​ពី​សក្តា​នុពលនានារបស់កម្ពុជា ដល់សហគមន៍ធុរកិច្ច និងពាណិជ្ជកម្មអាល្លឺម៉ង់ និងដៃគូរបស់ Asia Bridge ផ្សេងៗ បានស្វែងយល់អំពីបរិយាកាសវិនិយោគនៅកម្ពុជា។ឯកឧត្តម Andreas Scheuer ប្រធានក្រុមប្រឹក្សាភិបាលស្ថាប័ន Asia Bridge និង​ជា​អតីត​រដ្ឋ​មន្ត្រី​សាធារណ​រដ្ឋ​សហព័ន្ធ អាល្លឺម៉ង់ ទទួលបន្ទុកវិស័យដឹកជញ្ជូន និងហេដ្ឋារចនាសម្ព័ន្ធឌីជីថល នៅ​ក្នុងជំនួបសម្តែងការគួរសម និងពិភាក្សាការងារជាមួយ ឯកឧត្តម ស៊ុន ចាន់ថុល ឧប​នាយក​រដ្ឋម​ន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅថ្ងៃទី២២ ខែតុលា ឆ្នាំ២០២៥នេះ, ឯកឧត្តម​បានសម្តែងនូវការកត់សម្គាល់ខ្ពស់ ចំពោះកំណែទម្រង់នានា ដែលនាំឱ្យកម្ពុជា​មាន​ការ​ផ្លាស់​ប្តូរ​មុខមាត់ក្នុងរយៈពេលចុង ក្រោយ ព្រមទាំង​បាន​សម្តែង​នូវ​ការ​កោត​សរសើរ​ខ្ពស់​ចំពោះ​ចក្ខុ​វិស័យ និងឆន្ទៈយ៉ាងមោះមុតរបស់ឯកឧត្តមឧបនាយករដ្ឋមន្ត្រី ក្នុងការ ជំរុញកម្ពុជា​ដើរ​ស្រប​តាម​ចក្ខុ​វិស័យ​ឆ្នាំ​២០៥០ ជាប្រទេសដែលមានចំណូលខ្ពស់។ ឯកឧត្តមប្រធាន បានបង្ហាញនូវការតាំងចិត្តខ្ពស់ ក្នុងការពាំនាំអំពីចំណុចវិជ្ជមាន និង​សក្តានុពល​នានា​របស់កម្ពុជា ដែល ឯកឧត្តមបានស្វែងយល់ក្នុងដំណើរទស្សនកិច្ចនេះ ទៅផ្សព្វផ្សា​យ​បន្ត​ដល់​សហគមន៍​ធុរកិច្ច និងពាណិជ្ជកម្ម ដែលមានទំនាក់ទំនង ជាមួយស្ថាប័ន Asia Bridge ផ្សេង​ៗ បានស្វែងយល់អំពីបរិយាកាសធ្វើធុរកិច្ចនៅកម្ពុជា។ឯកឧត្តមឧបនាយករដ្ឋមន្ត្រី, ក៏បានជម្រាបបន្ថែមអំពីការបំបែកកំណត់ត្រា ការ​អនុម័ត​គម្រោង​វិនិយោគ​ក្នុង​ឆ្នាំ២០២៤ និង ការឈានទៅបំបែកកំណត់ត្រាសារជាថ្មីម្តងទៀតក្នុងឆ្នាំ២០២៥ ដែល​លទ្ធផលនេះបានបង្ហាញឱ្យឃើញពីការយកចិត្តទុកដាក់ខ្ពស់ ក្នុងការ​លើក​កម្ពស់​បរិយាកាស​វិនិយោគ​នៅ​កម្ពុជា ឱ្យកាន់តែមានភាពអំណោយផល និងជាទីទុកចិត្តសម្រាប់​ការ​វិនិយោគ​ដោយ​ផ្ទាល់ពីបរទេស។នៅក្នុងជំនួបនេះ, ឯកឧត្តមឧបនាយករដ្ឋមន្ត្រី និងឯកឧត្តមប្រធានក្រុមប្រឹក្សាភិបាល បាន​ពិភាក្សា​ផ្លាស់​ប្តូរយោបល់ពាក់ព័ន្ធនឹង បទពិសោធន៍ការងារកន្លងមក, បរិយាកាស​វិនិយោគ​នៅ​កម្ពុជា, ពិពិធកម្មសេដ្ឋកិច្ច និងគោលដៅវិនិយោគ, ពាណិជ្ជកម្មអន្តរជាតិ, ការអភិវឌ្ឍ​លើ​វិស័យ​ហេដ្ឋា​រចនាសម្ព័ន្ធ និងបច្ចេកវិទ្យាឌីជីថល៕ អត្ថបទ៖ សុន រ៉ាឌី

រាជរដ្ឋាភិបាល បន្តលើកទឹកចិត្តផ្នែកពន្ធដារ លើការវិនិយោគ​ខេត្ត​ព្រះសីហនុ​ដល់​បំណាច់​ឆ្នាំ​២០២៥​នេះ

2025/10/22 11:38:16 am        190
Facebook Telegram Linkin
រាជរដ្ឋាភិបាលបន្តការលើកទឹកចិត្តផ្នែកពន្ធដារដល់បំណាច់ឆ្នាំ២០២៥ ក្រោម​កម្ម​វិធី​ពិសេស​ជំរុញ​ការ​វិនិយោគ​ក្នុងខេត្តព្រះសីហនុ លើគម្រោងវិនិយោគពាក់ព័ន្ធនឹងអគារជាប់គាំង, គម្រោង​វិនិយោគ​ដែលអាចចាប់ផ្តើមអនុវត្តបាននៅឆ្នាំ២០២៤-២០២៥, ការពង្រីក គម្រោង​ដែល​មាន​ស្រាប់​ និងគម្រោងវិនិយោគ ឬធុរកិច្ចដែលមានស្រាប់។អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ ចេញសេចក្ដីណែនាំ ស្តី​ពី​នីតិ​វិធី​នៃ​ការ​អនុវត្ត​ការ​លើកទឹកចិត្តផ្នែកពន្ធ ដារ ក្រោមកម្មវិធីពិសេសជំរុញការវិនិយោគក្នុងខេត្តព្រះសីហនុ, អនុ​លោមតាមសេចក្តីសម្រេចចុះថ្ងៃទី១០ ខែមករា ឆ្នាំ២០២៤, របស់ រាជរដ្ឋាភិបាលកម្ពុជា និង​សេចក្តី​ជូន​ដំណឹងជាបន្តបន្ទាប់របស់ទីស្តីការគណៈរដ្ឋមន្ត្រី។ រាជរដ្ឋាភិបាលកម្ពុជា បាន​ដាក់​ឱ្យ​អនុវត្តនូវកម្មវិធី ពិសេសជំរុញការវិនិយោគក្នុងខេត្តព្រះសីហនុឆ្នាំ២០២៤ និង​បន្ត​អនុវត្ត​ដល់​ដំណាច់​ឆ្នាំ​២០២៥ ដោយផ្តល់ការលើកទឹកចិត្តការអនុ- គ្រោះ និងសម្រួល​នីតិ​វិធី​ជូន​ដល់​វិនិយោគិន​រួម​មាន៖ គម្រោងវិនិយោគពាក់ព័ន្ធនឹងអគារជាប់គាំង, គម្រោងវិនិយោគដែលអាចចាប់ ផ្តើម​អនុវត្តបាននៅឆ្នាំ២០២៤-២០២៥, ការពង្រីកគម្រោងដែលមានស្រាប់, និង​គម្រោង​វិនិយោគ ឬធុរកិច្ចដែលមានស្រាប់។ អគ្គនាយកដ្ឋានពន្ធដារ បានណែនាំដល់អភិបាល ឬបណ្ណាធិការ និងកម្មសិទ្ធិកររបស់សហគ្រាស អំពី​នីតិវិធីនៃការអនុវត្តការ លើកទឹកចិត្តផ្នែកពន្ធដារក្រោមកម្មវិធីពិសេស ដោយ​បាន​កំណត់​លើ​ការ​អនុ​គ្រោះជាច្រើនដូចជា៖ ការស្នើសុំការលើកទឹកចិត្តនានា ក្រោមកម្មវិធីពិសេស, កាត​ព្វ​កិច្ច​ចុះ​បញ្ជី​ពន្ធដារ, និងនីតិវិធីនៃការអនុវត្តការលើកទឹកចិត្តផ្នែកពន្ធដារក្រោមកម្មវិធីពិសេស (ដោយ​មានបង្ហាញនូវក្នុងសេចក្តីណែនាំនេះ)។ជុំវិញគម្រោងវិនិយោគលើអចលនទ្រព្យ, ឧកញ៉ា សន សៀប ប្រធាន​សមាគម​អ្នក​វាយ​តម្លៃ​និ​ង​ភ្នាក់​ងារ​អចលនវត្ថុកម្ពុជា ថ្មីៗ នេះបានលើកឡើងថា អចលនវត្ថុខេត្តព្រះសីហនុ និ​ង​ស្រូប​យក​សំណង់​ថ្មី​ៗ​បន្ថែម ខណៈអគារជាប់គាំងពីមុនៗបានកំពុងអភិវឌ្ឍន៍ យ៉ាងផុលផុស ជាក់ស្តែង​គិត​មក​ដល់​ពេល​នេះ អគារជាប់គាំងជាច្រើន ត្រូវបានរាជរដ្ឋាភិបាល​បាន​ដោះ​ស្រាយ​នៅ​សល់​បន្តិច​បន្ទួច​ ដែលនេះបានបង្ហាញឱ្យឃើញនូវការអភិវឌ្ឍយ៉ាងលឿន ទោះបីបច្ចុប្បន្ន​ការ​អភិវឌ្ឍ​វិស័យ​អចលន​វត្ថុ​ផ្សេងៗនៅមានកម្រិតក៏ដោយ។ទាក់ទងពន្ធលើអចលនទ្រព្យ ដើម្បីទទួលបានការអនុញ្ញាតលើកលែងពន្ធលើអចលនទ្រព្យ ម្ចាស់​កម្ម​សិទ្ធិឬម្ចាស់គម្រោង ឬអ្នកតំណាង ត្រូវអនុវត្តដូចជា៖ ជំហានទី១, ដាក់ពាក្យ​ស្នើ​សុំ​ការ​លើក​ទឹក​ចិ​ត្ត ចំពោះគម្រោងវិនិយោគពាក់ព័ន្ធនឹងអគារជាប់គាំង ដោយម្ចាស់ គម្រោង​ត្រូវ​ធ្វើ​បច្ចុប្បន្ន​ភាព​ព័ត៌​មានអចលនវត្ថុ ដោយភ្ជាប់​ជាមួយ​នូវ​ឯកសារ​ថត​ចម្លង​ជូន​លេខា​ធិការដ្ឋាន​នៃ​ក្រុម​ការងារ​វិនិយោគ​ ខេត្ត​ព្រះសីហនុ។ ជំហានទី២, បន្ទាប់ពីទទួលបាន​ការ​អនុញ្ញាត​ជា​គោល​ការណ៍​លើក​ទឹក​ចិត្ត​ចំពោះគម្រោងពាក់ព័ន្ធ និងអគារជាប់គាំង លេខាធិការដ្ឋាន​នៃ​ក្រុម​ការងារ​វិនិយោគ​ខេត្ត​ព្រះសីហនុ ត្រូវបញ្ជូនសំណុំឯកសារមករដ្ឋបាលសារពើពន្ធ។ ជំហានទី៣, ក្រោយពី រដ្ឋបាល​សារ​ពើ​ពន្ធ​ពិនិត្យ ចុះបញ្ជី និងធ្វើបច្ចុប្បន្នភាពព័ត៌មានអចលនទ្រព្យ ដែលទទួល​បាន​ការ​លើក​លែង​ពន្ធ​ ក្នុងប្រព័ន្ធគ្រប់គ្រង ទិន្នន័យអចលនទ្រព្យ រដ្ឋបាលសារ​ពើ​ពន្ធ​នឹង​ចេញ​លិខិត​អំពី​ការ​លើក​លែង​ពន្ធ​អំពីអចនទ្រព្យទៅដល់ម្ចាស់កម្មសិទ្ធ៕ អត្ថបទ៖ សុន រ៉ាឌី

គណៈប្រតិភូទីក្រុងអ៊ូស៊ី ចិន ប្តេជ្ញាបន្តជំរុញធ្វើឱ្យតំបន់សេដ្ឋកិច្ចពិសេសក្រុងព្រះសីហនុ កាន់តែរីកចម្រើន

2025/10/17 03:53:14 pm        454
Facebook Telegram Linkin
នៅទីស្តីការក្រុមប្រឹក្សាអភិវឌ្ឍន៍កម្ពុជា នាព្រឹកថ្ងៃសុក្រ ទី១៧ ខែតុលា ឆ្នាំ២០២៥ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា និងសហការី បានទទួលជួបពិភាក្សាការងារជាមួយជាមួយគណៈប្រតិភូទីក្រុងអ៊ូស៊ី ខេត្តជាំងស៊ូ សាធារណរដ្ឋប្រជាមានិតចិន ដឹកនាំដោយឯកឧត្តម Du Xiaogang លេខាបក្សទីក្រុងអ៊ូស៊ី ដោយមានការចូលរួមពីលោក Sun Wei អភិបាលរងទីក្រុងអ៊ូស៊ី និងលោក Chen Jiangang ប្រធានក្រុមប្រឹក្សាភិបាលនៃក្រុមហ៊ុនតំបន់សេដ្ឋកិច្ចពិសេសក្រុងព្រះសីហនុ។ ក្នុងឱកាសនោះ គណៈប្រតិភូទីក្រុងអ៊ូស៊ី ខេត្តជាំងស៊ូ សាធារណរដ្ឋប្រជាមានិតចិន បានប្តេជ្ញាក្នុងការបន្តជំរុញធ្វើឱ្យតំបន់សេដ្ឋកិច្ចពិសេសក្រុងព្រះសីហនុកាន់តែមានការរីកចម្រើន។ឯកឧត្តម Du Xiaogang លេខាបក្សទីក្រុងអ៊ូស៊ី បានថ្លែងអំណរគុណដល់ឯកឧត្តមអគ្គលេខាធិការដែលបានចំណាយពេលវេលាដ៏មានតម្លៃទទួលជួបគណៈប្រតិភូ។ ឆ្លៀតក្នុងឱកាសនេះដែរ ឯកឧត្តម Du Xiaogang បានថ្លែងអំណរគុណដល់រាជរដ្ឋាភិបាលកម្ពុជា ក៏ដូចជា ក្រសួងស្ថាប័នពាក់ព័ន្ធ អាជ្ញាធរមូលដ្ឋាន និងក្រុមប្រឹក្សាអភិវឌ្ឍន៍កម្ពុជា ដែលតែងតែបានផ្តល់ការគាំទ្រដល់កិច្ចដំណើរការនៃគម្រោងតំបន់សេដ្ឋកិច្ចពិសេសក្រុងព្រះសីហនុ ដែលបានធ្វើឱ្យតំបន់សេដ្ឋកិច្ចពិសេសនេះមានការរីកចម្រើនជាបន្តបន្ទាប់។ ឯកឧត្តម Du Xiaogang បានឱ្យដឹងផងដែរថា ដំណើរទស្សនកិច្ចនៅកម្ពុជានាពេលនេះគឺឆ្លើយតបនឹងស្មារតី នៃកិច្ចប្រជុំលើកទី៤ របស់គណៈកម្មាធិការសម្របសម្រួលតំបន់សេដ្ឋកិច្ចពិសេសក្រុងព្រះសីហនុ ដែលបានប្រព្រឹត្តទៅកាលពី ខែកក្កដា ឆ្នាំ២០២៥ កន្លងមក និងដើម្បីបន្តកិច្ចការមួយចំនួនដែលបានពិភាក្សាគ្នាក្នុងកិច្ចប្រជុំនាពេលនោះ ជាពិសេស ការត្រៀមរៀបចំកិច្ចប្រជុំលើកទី៥ ដែលគ្រោងធ្វើនៅប្រទេសចិន។ ឯកឧត្តម Du Xiaogang ក៏បានលើកឡើងពីកិច្ចខិតខំប្រឹងរបស់ថ្នាក់ដឹកនាំទីក្រុងអ៊ូស៊ីក្នុងការឧបត្ថម្ភគាំទ្រឱ្យមានជើងហោះហើរត្រង់ និងការដឹកជញ្ជូនត្រង់រវាងក្រុងអ៊ូស៊ី និងខេត្តព្រះសីហនុ ដែលការណ៍នេះបានចូលរួមចំណែកជំរុញការអភិវឌ្ឍខេត្តព្រះសីហនុទាំងមូល ក៏ដូចជា តំបន់សេដ្ឋកិច្ចពិសេសក្រុងព្រះសីហនុ។ មុននឹងបញ្ចប់ ឯកឧត្តម Du Xiaogang បានបង្ហាញនូវការប្តេជ្ញាក្នុងការបន្តជំរុញធ្វើឱ្យតំបន់សេដ្ឋកិច្ចពិសេសក្រុងព្រះសីហនុកាន់តែមានការរីកចម្រើនមួយកម្រិតទៀតតាមរយៈការខិតខំជំរុញឱ្យវិនិយោគិនចិន មកបណ្តាក់ទុនវិនិយោគបន្ថែមទៀត ពិសេស ការវិនិយោគកែច្នៃកសិផលកម្ពុជា ដើម្បីនាំទៅទីផ្សារចិន។ ជាទីបញ្ចប់ឯកឧត្តម Du Xiaogang បានលើកឡើងនូវសំណូមពរមួយចំនួនសំដៅបន្តជំរុញការអភិវឌ្ឍតំបន់សេដ្ឋកិច្ចពិសេសក្រុងព្រះសីហនុឱ្យកាន់តែរីកចម្រើន និងមានភាពទាក់ទាញបន្ថែមទៀត។ឯកឧត្តម ជា វុទ្ធី បានថ្លែងអំណរគុណដល់រដ្ឋាភិបាលចិន ប្រជាជនចិន និងថ្នាក់ដឹកនាំនៃទីក្រុងអ៊ូស៊ី ដែលតែងតែខិតខំជំរុញ និងគាំទ្រវិនិយោគិនចិន ពិសេសវិនិយោគិនមកពីទីក្រុងអ៊ូស៊ី ឱ្យមកបណ្តាក់ទុនវិនិយោគនៅប្រទេសកម្ពុជា និយាយជារួម និងនៅក្នុងតំបន់សេដ្ឋកិច្ចពិសេសក្រុងព្រះសីហនុ និយាយដោយឡែក។ ឯកឧត្តមអគ្គលេខាធិការ បានលើកទ្បើងពីភាពល្អប្រសើរ នៃស្ថានភាពវិនិយោគនៅកម្ពុជាដែលឆ្លុះបញ្ចាំងតាមរយៈកំណើនវិនិយោគដ៏គំហុកក្នុង ឆ្នាំ២០២៤ និងកំណើនវិនិយោគក្នុងរយៈពេល ៩ខែ នៃ ឆ្នាំ២០២៥, ការអភិវឌ្ឍតំបន់សេដ្ឋកិច្ចពិសេសនៅកម្ពុជា, ពិសេសភាពរីកចម្រើន នៃតំបន់សេដ្ឋកិច្ចពិសេសក្រុងព្រះសីហនុ។ ជាមួយគ្នានេះ ឯកឧត្តមអគ្គលេខាធិការក៏បានលើកឡើងពីសារៈសំខាន់នៃ “ច្រករបៀងឧស្សាហកម្ម និងបច្ចេកវិទ្យា” ក្នុងការជំរុញទាក់ទាញការវិនិយោគ ហើយម្យ៉ាងទៀត រាជរដ្ឋាភិបាលកម្ពុជាបាន និងកំពុងយកចិត្តទុកដាក់យ៉ាងខ្លាំងក្នុងការធ្វើពិពិធកម្មទីផ្សារសម្រាប់ទំនិញនាំចេញពីកម្ពុជា និងដាក់ចេញនូវវិធានការថ្មីៗសំដៅសម្រួលដល់ការធ្វើធុរកិច្ច និងវិនិយោគ។  ឯកឧត្តមអគ្គលេខាធិការសង្ឃឹមយ៉ាងមុតមាំថា តាមរយៈជំនួបពិភាក្សាលើកនេះ ថ្នាក់ដឹកនាំរបស់ទីក្រុងអ៊ូស៊ីនឹងបន្តជំរុញវិនិយោគិនពីទីក្រុងអ៊ូស៊ី ជាពិសេសនាំយកនូវឧស្សាហកម្មដែលប្រើបច្ចេកវិទ្យាទំនើបមកកម្ពុជា។ មួយវិញទៀត ឯកឧត្តមអគ្គលេខាធិការក៏បានស្នើសូមឱ្យភាគីចិនជួយជំរុញឱ្យមានការវិនិយោគក្នុងការផលិតវត្ថុធាតុដើម ឬទំនិញពាក់កណ្តាលសម្រេចនៅកម្ពុជាឱ្យកាន់តែច្រើន ដើម្បីធានាស្ថិរភាព នៃខ្សែច្រវាក់ផ្គត់ផ្គង់ និងបានស្នើឱ្យមានការគិតគូរវិនិយោគបង្កើតតំបន់កែច្នៃកសិផលនៅកម្ពុជា ដើម្បីនាំទៅទីផ្សារចិន៕

ប្រធាន AmCham៖ ទំនិញអាម៉េរិកនឹងហូរចូល​កម្ពុជាកាន់តែ​ច្រើនជំរុញ​កំណើន​ពាណិជ្ជកម្ម​ប្រទេស​ទាំងពីរ

2025/10/17 02:29:10 pm        1851
Facebook Telegram Linkin
ប្រធានសភាពាណិជ្ជកម្មអាម៉េរិកប្រចាំនៅកម្ពុជា (AmCham) មានក្តីរំពឹងខ្ពស់ នៃការ​ធ្វើ​ពាណិជ្ជកម្ម​ទ្វេភាគីរវាងកម្ពុជា-អាម៉េរិក នឹងមានកំណើនកាន់តែខ្លាំងក្លា ជាពិសេសទំនិញអាម៉េរិក នឹងហូរចូលមកទីផ្សារកម្ពុជាកាន់តែច្រើន បន្ទាប់ពីការទម្លាក់អត្រាពន្ធនាំចូល សូន្យ (០%) គាំទ្រដល់ការធ្វើពាណិជ្ជកម្មនៃប្រទេសទាំងពីរ។លោក ខេស៊ី បាណេត ប្រធានសភាពាណិជ្ជកម្មអាម៉េរិកប្រចាំនៅកម្ពុជា (AmCham) លើកឡើងក្នុងកិច្ចសម្ភាសន៍ជាមួយ សារព័ត៌មាន ស្តីពីការធ្វើពាណិជ្ជកម្មទ្វេភាគីរវាងកម្ពុជា-អាម៉េរិក នេះថា ជុំវិញការធ្វើពាណិជ្ជកម្មទ្វេនៃប្រទេសទាំងពីរ បាននិងកំពុង បន្តកំណើនកើនឡើងជារៀងរាល់ឆ្នាំ ជាពិសេសការនាំចេញទំនិញរបស់កម្ពុជាទៅកាន់ទីផ្សារអាម៉េរិក។ ចំណែកការនាំចូលវិញ មកដល់ បច្ចុប្បន្ន ក៏មានការកើនឡើងជាបន្តបន្ទាប់ តែស្ថិតនៅក្នុងកម្រិតទាបមិនទាន់សមតុល្យនិងគ្នានៅឡើយ។ជុំវិញការនាំចូលនេះ លោកមានសុទិដ្ឋិនិយមខ្ពស់ នឹងរំពឹងថា នៅក្នុងរយៈពេលខាងមុខ ការនាំចូលទំនិញពីអាម៉េរិក នឹងបន្ត កើនឡើងកាន់តែខ្លាំងក្លា ខណៈដែលកម្ពុជាបានទម្លាក់អត្រាពន្ធនាំចូល ០% (សូន្យភាគរយ) នៅលើប្រភេទមុខទំនិញជាច្រើន ដែល ប្រការទាំងនេះនឹងគាំទ្រដល់ការធ្វើពាណិជ្ជកម្មនៃប្រទេសទាំងពីរ គាំទ្រដល់ការហូរចូលទំនិញពីអាម៉េរិក ស្របពេលប្រជាជនកម្ពុជាមាន ជីវភាពកាន់តែធូរធារ។សូមបញ្ជាក់ថា នៅក្នុងរយៈពេល ៩ ខែ ឆ្នាំ២០២៥នេះ ការដោះដូរពាណិជ្ជកម្មអន្តរជាតិរបស់កម្ពុជា មានទំហំទឹកប្រាក់សរុបជិត ៤៨ ពាន់លានដុល្លារអាម៉េរិក ដោយកម្ពុជាបាននាំចេញទំនិញសំខាន់ៗ មានទឹកប្រាក់ជាង ២៣ ពាន់លានដុល្លារ ខណៈតម្លៃនៃការនាំចូល មានទឹកប្រាក់សរុបជិត ២៤ ពាន់លានដុល្លារ, ក្នុងនោះចំពោះការធ្វើពាណិជ្ជកម្មទ្វេភាគីរវាងកម្ពុជា-អាម៉េរិកវិញ ឃើញថា នៅក្នុងរយៈ ពេល ៩ ខែនេះដែរ ការធ្វើពាណិជ្ជកម្មនៃប្រទេសទាំងពីរ មានទំហំទឹកប្រាក់ជាង ៩ ៥៦០ លានដុល្លារអាម៉េរិក កើនឡើងជាង ២២ ភាគរយ ធៀបរយៈពេលដូចគ្នាឆ្នាំមុន ពោលគឺទីផ្សារមួយនេះបានគាំទ្រដល់កំណើនខ្ពស់នៃការនាំចេញទំនិញរបស់កម្ពុជា៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

ការជ្រើសរើស និងការគ្រប់គ្រងមន្ត្រីផ្អែកលើកិច្ចព្រមព្រៀងការងារជាកិច្ចការចាំបាច់ ដើម្បីគាំទ្រ ដល់ដំណើរការនៃការកែទម្រង់ ឆ្ពោះទៅកាន់ការគ្រប់គ្រងមុខងារសាធារណៈផ្អែកលើសមិទ្ធកម្ម
10/28/2025 01:10 PM
Facebook Telegram Linkin
ចិន និយាយថាពិភពលោកពហុប៉ូល នឹងមកដល់ មុនជំនួបកំពូលរវាងលោកTrumpនិងលោក Xi នៅកូរ៉េខាងត្បូង
10/28/2025 12:10 PM
Facebook Telegram Linkin
ក្រសួងឧស្សាហកម្មកំពុងរៀបចំយន្តការសម្រួលនីតិវិធី ដើម្បីលើកទឹកចិត្តដល់អ្នកផលិតនិងអ្នកនាំចូល
10/28/2025 12:10 PM
Facebook Telegram Linkin
អ៊ីស្រាអែលនៅតែបន្តការវាយប្រហារជុំវិញតំបន់ ទោះមានបទឈប់បាញ់នៅហ្កាហ្សាក៏ដោយ
10/28/2025 12:10 PM
Facebook Telegram Linkin
សម្ដេចធិបតីឆ្លៀតជួបសំណេះសំណាលជាមួយប្រធានាធិបតីហ្វីលីពីន និង នាយករដ្ឋមន្ត្រីឡាវ ក្នុងឱកាសចូលរួមពិធីចុះហត្ថលេខាដំឡើង កម្រិតតំបន់ពាណិជ្ជកម្មសេរីអាស៊ាន-ចិន ៣.០
10/28/2025 12:10 PM
Facebook Telegram Linkin
ឯកឧត្តម គង់ កន្នារតន៍ ចុះត្រួតពិនិត្យការសាងសង់ផ្ទះ និងជីកប្រឡាយទឹក ជូនគ្រួសារ​អតីត​យុទ្ធជន​ក្នុងខេត្តបាត់ដំបង
10/28/2025 12:10 PM
Facebook Telegram Linkin
UN ថ្កោលទោសអ៊ីស្រាអែល ក្រោយការវាយប្រហារលើកងរក្សាសន្តិភាពនៅប្រទេសលីបង់
10/28/2025 12:10 PM
Facebook Telegram Linkin
ដោយបន្ថែមលើបញ្ហានៃការបាញ់ប្រហាររបស់ក្រុមចោរព្រៃ ពលរដ្ឋហៃទីកំពុងជួបប្រទះព្យុះសង្ឃរា Melissa
10/28/2025 12:10 PM
Facebook Telegram Linkin
សម្តេចធិបតី នាយករដ្ឋមន្ត្រី អញ្ជើញចូលរួមកិច្ចប្រជុំកំពូលអាស៊ាន-ចិន លើកទី២៨ នៅទីក្រុងកូឡាឡាំពួ
10/28/2025 12:10 PM
Facebook Telegram Linkin
ប្រជាជនប៉ាគីស្ថាន ប្រមូលផ្តុំគ្នានៅថ្ងៃ «ទិវា Kashmir Black Day'» ជំរុញឱ្យUN មានចំណាត់ការលើតំបន់មានជម្លោះ
10/28/2025 12:10 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.