BTV NEWS

សហគ្រិនស្រ្តីនៅកម្ពុជា បានកំពុងចាប់យកបច្ចេកវិទ្យាឌីជីថលសម្រាប់ដំណោះស្រាយធ្វើអាជីវកម្ម

វិស័យឯកជន៖ គោលនយោបាយបើកចំហររបស់រារដ្ឋាភិបាល បានកំពុងស្រូបយកសក្តានុពលវិនិយោគ

វិស័យឯកជនស្វែងយល់និតិវិធីសំណើរសុំនាំចូលដោយពន្ធនាំចូលជាបន្ទុករបស់រដ្ឋតាមប្រព័ន្ធអនឡាញបញ្ជរតែមួយជាតិ

គណៈកម្មាធិការវិនិយោគពិនិត្យសំណើសុំចុះបញ្ជីថ្មីចំនួន១២គម្រោង មានទុនវិនិយោគ ៣១៨ លានដុល្លារ

សេដ្ឋកិច្ច និង កសិកម្ម

កម្ពុជា និងអេមីរ៉ាត់អារ៉ាប់រួម សហការជំរុញកិច្ចសហប្រតិបត្តិការវិស័យទេសចរណ៍

ភ្នំពេញ៖ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ នៅព្រឹកថ្ងៃទី៨ ខែមិថុនានេះ បានទទួលពិភាក្សាការងារជាមួយ ឯកឧត្តម ថានី ប៊ិន អាម៉េដ អាល ហ្សេយូឌី រដ្ឋមន្ត្រីពាណិជ្ជកម្មអន្តរជាតិ នៃប្រទេសអេមីរ៉ាត់អារ៉ាប់រួមនៅទីស្តីការក្រសួង ។ ក្នុងជំនួបនេះភាគីទាំងពីរបានលើកពីកិច្ចសហប្រតិបត្តិការអនុវត្តខ្លឹមអនុសារណៈជំរុញចលនាទេសចរ និងក្នុងវិនិយោគទុនក្នុងវិស័យទេសចរណ៍ឡើងវិញក្រោយវិបត្តិបានបញ្ចប់ទៅ។ឯកឧត្តម រដ្ឋមន្ត្រី ថោង ខុន ថ្លែងថា បច្ចុប្បន្នកម្ពុជា មានតំណាងស្ថានទេសចរណ៍ប្រចាំនៅទីក្រុង ឌូបៃ ហើយគ្រប់អ្នកវិនិយោគ នៅប្រទេសអេមីរ៉ាត់អារ៉ាប់រួម គឺអាចអញ្ជើញទៅទំនាក់ទំនងតំណាងស្ថានទេសចរណ៍កម្ពុជា នោះ ដើម្បីសាកសួរព័ត៌មាន និងភ្ជាប់ការងារវិនិយោគពីអេមីរ៉ាត់អារ៉ាប់រួម មកកម្ពុជាកាន់តែច្រើនថែមទៀត។នៅក្នុងជំនួបនេះឯកឧត្តម រដ្ឋមន្ត្រីពាណិជ្ជកម្មអន្តរជាតិ នៃប្រទេសអេមីរ៉ាត់អារ៉ាប់រួម ថ្លែងថា អេមីរ៉ាត់អារ៉ាប់រួម នឹងសម្របសម្រួលឲ្យល្អបំផុតក្នុងការជំរុញចលនាទេសចរ និងការវិនិយោគពី អេមីរ៉ាត់អារ៉ាប់រួម មកកម្ពុជា និងពីកម្ពុជាទៅអេមីរ៉ាត់អារ៉ាប់រួម ជាពិសេសជំរុញការតភ្ជាប់ជើងហោះហើរត្រង់កម្ពុជា អេមីរ៉ាត់អារ៉ាប់រួមឲ្យបានច្រើនថែមទៀត។ក្រោយជំនួបនេះដែរ ឯកឧត្តម ទ្រី ឈីវ ទីប្រឹក្សាក្រសួងទេសចរណ៍ ក៏បានថ្លែងថា ៖ នៅពេលនេះ កម្ពុជា បាននិងកំពុងអនុវត្តច្បាប់លើកទឹកចិត្តច្រើនដល់បណ្តាអ្នកវិនិយោគបរទេស មកវិនិយោគនៅកម្ពុជា និងផ្តល់ឱកាសល្អៗជាច្រើនក្នុងការវិនិយោគផងដែរ ។នៅក្នុងជំនួបនេះដែរ ភាគីកម្ពុជា អេមីរ៉ាត់អារ៉ាប់រួម ក៏បានជំរុញធ្វើបច្ចុប្បន្នភាព ខ្លឹមសារអនុសារណៈការយោគយល់គ្នា ដើម្បីពង្រីកកិច្ចសហប្រតិបត្តិការក្នុងវិស័យទេសចរណ៍ឲ្យបានច្រើនថែមទៀត ជាពិសេសគឺជំរុញការតភ្ជាប់ជើងហោះហើររវាងប្រទេសទាំងពីរឲ្យបានច្រើនថែមទៀត៕ អត្ថបទ ស៊ុម សុខជា

សុវត្ថិភាពចំណីអាហារ និងស្តង់ដារគុណភាព ដើរតួនាទីសំខាន់ចំពោះសុខភាព និងការធ្វើអាជីវកម្ម

ភ្នំពេញ៖ មន្រ្តីជំនាញលើកឡើងថា សុវត្ថិភាពចំណីអាហារ និងស្តង់ដារគុណភាព ដើរតួនាទីយ៉ាងសំខាន់ ក្នុងការធានាសុខភាព និងសុខុមាលភាពរបស់ប្រជាជនកម្ពុជា និងជាកត្តាចាំបាច់សម្រាប់ការធ្វើអាជីវកម្ម ដើម្បីប្រកួតប្រជែងផលិតផលនៅលើទីផ្សារ។ឯកឧត្តម សុខ ស៊ីឡូ អគ្គលេខាធិការនៃក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ លើកឡើងថា ទាក់ទង់បញ្ហាចំណីអាហារនេះ នៅក្នុងវិបត្តិកូវីដ ១៩, វិបត្តិសង្គ្រាមរុស្សី អ៊ុយក្រែន និងការប្រែប្រួលអាកាសធាតុជាដើម ក៏កម្ពុជានៅតែមានលទ្ធភាពផលិត ជាពិសេសវិស័យម្ហូបអាហារដែលមានគុណភាព សម្រាប់ការផ្គត់ផ្គង់លើទីផ្សារ។ តែទោះជាយ៉ាងណាបញ្ហានេះ គឺត្រូវការចូលរួមបន្ថែមទៀត ពីក្រសួងស្ថាប័នពាក់ព័ន្ធ ដើម្បីធ្វើយ៉ាងណា ឲ្យម្ហូបអាហារនៅកម្ពុជាមានសុវត្ថិភាព និងគុណភាព សម្រាប់បម្រើការហូបចុក និងបម្រើដល់សន្តិសុខស្បៀងក្នុងស្រុក។លោកស្រី Maria Theresa S. Medialdia ប្រធាននាយកដ្ឋានអភិវឌ្ឍកសិកម្ម និងពាណិជ្ជកម្ម នៃវិទ្យាស្ថានមេគង្គ លើកឡើងនៅក្នុងវេទិកាសុវត្ថិភាពចំណីអាហារ ស្តីពីការជំរុញកំណើននៃវិស័យផលិតផលកសិកម្មនៅកម្ពុជា តាមរយៈការបង្កើតអនុលោមស្តង់ដារចំណីអាហារ នៅថ្ងៃទី ៧ ខែ មិថុនា ឆ្នាំ ២០២៣ នេះថា សុវត្ថិភាពចំណីអាហារ និងស្តង់ដារគុណភាព បានដើរតួនាទីយ៉ាងសំខាន់លើការធានាសុខភាព និងសុខុមាលភាពរបស់ប្រជាជនកម្ពុជា។ ចំណែកស្តង់ដារ មិនត្រឹមតែការពារអ្នកប្រើប្រាស់លើផលិតផលអាហារ ដែលអាចបង្កគ្រោះថ្នាក់ប៉ុណ្ណោះទេ ប៉ុន្តែថែមទាំងផ្តល់នូវក្របខ័ណ្ឌសម្រាប់អាជីវកម្ម ការប្រកួតប្រជែងជាសកល និងរួមចំណែកដល់ការអភិវឌ្ឍន៍សេដ្ឋកិច្ចប្រកបដោយចីរភាព។លោកស្រី បន្តថា សុវត្ថិភាពចំណីអាហារមានសារៈសំខាន់ណាស់ ក្នុងកិច្ចការពារសុខភាពសាធារណៈ និងបង្ការជំងឺដែលបណ្តាលមកពីអាហារ ក្នុងនោះចំពោះប្រទេសកម្ពុជាក៏បានជួបប្រទះ នឹងបានផ្ទុះឡើងនៃជំងឺដោយសារចំណីអាហារផងដែរ ដូច្នេះការពង្រឹងស្តង់ដារសុវត្ថិភាពចំណីអាហារ និងគុណភាព គឺជាការចាំបាច់ សម្រាប់ការវិភាគលើចំណីអាហារគ្រោះថ្នាក់ និងការត្រួតពិនិត្យពី (HACCP) និង ISO:22000 ដើម្បីផ្តល់នូវវិធីសាស្រ្តជាប្រព័ន្ធក្នុងការកំណត់ និងគ្រប់គ្រងគ្រោះថ្នាក់ជីវសាស្ត្រគីមី និងរូបវន្តក្នុងដំណើរការផលិតអាហារ ពីកសិដ្ឋានរហូតដល់ការហូបចុក។ជុំវិញស្តង់ដារចំណីអាហារសនេះ ឯកឧត្តម ចាន់ សូផា អគ្គនាយកនៃវិទ្យាស្ថានស្តង់ដារកម្ពុជា លើកឡើងឲ្យដឹងថា វិទ្យាស្ថានស្តង់ដារកម្ពុជា គឺជាអង្គភាពមួយ នៃការបើករបាំងបច្ចេកទេស ចំពោះពាណិជ្ជកម្ម សម្រាប់ការងារផ្សព្វផ្សាយ និងជូនដំណឹងអំពីសកម្មភាព និងការងារពាក់ព័ន្ធនឹងស្តង់ដារូបនីយកម្ម បទប្បញ្ញត្តិបច្ចេកទេស និងនីតិវិធីវាយតម្លៃភាពអនុលោមនៅក្នុងប្រទេសកម្ពុជា ជាក់ស្តែងគិតមកដល់ពេលនេះ កម្ពុជាមានស្ដង់ដារផលិតផលផ្នែកម្ហូបអាហារ និងម្ហូបអាហារវេចខ្ចប់ជាមុន មានចំនួនជាង ៣០០ស្ដង់ដារហើយ បច្ចុប្បន្នវិទ្យាស្ថាននៅតែបន្តអនុម័តយកស្តង់ដារផ្សេងៗបន្ថែមទៀត ដើម្បីការឆ្លើយតបទៅនិងការប្រើប្រាស់ក្នុងការធ្វើអាជីវកម្ម៕អត្ថបទ៖ សុន រ៉ាឌី

សម្តេចតេជោ នឹងទាក់ទាញវិនិយោគិនអារ៉ាប់អេមីរ៉េតបន្ថែមមកវិនិយោគនៅកម្ពុជា

កំពង់ឆ្នាំង៖ សម្តេចតេជោ ហ៊ុន សែន នឹងមានជំនួបជាមួយរដ្ឋមន្រ្ដីពាណិជ្ជកម្មប្រទេសអារ៉ាប់អេមីរ៉េត ដែលសម្ដេចនឹងលើកឡើងពីការទាក់ទាញវិនិយោគបន្ថែមទៀតមកកាន់កម្ពុជាជាពិសេសលើវិស័យកសិកម្ម ហើយនេះក៏ជាឱកាសបង្កើតការងារបន្ថែមទៀតនៅកម្ពុជាផងដែរ។ក្នុងពិធីសំណេះសំណាលជាមួយកម្មករ កម្មការិនីសរុបជិត ២ម៉ឺននាក់ នៅស្រុកកំពង់ត្រឡាច ខេត្តកំពង់ឆ្នាំង នៅថ្ងៃទី៨ ខែមិថុនា សម្តេចតេជោ ហ៊ុន សែន មានប្រសាសន៍ថា នៅរសៀលថ្ងៃទី៨នេះ សម្តេចតេជោ នឹងមានការចុះហត្ថលេខាលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងកម្ពុជា និងអេមីរ៉ាត់អារ៉ាប់រួម។សូមបញ្ជាក់ថា កម្ពុជា-អេមីរ៉ាតអារ៉ាប់រួមប្រកាសបើកជាផ្លូវការអំពីការចាប់ផ្តើមដំណើរការចរចាកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ កាលពីថ្ងៃទី២៤តុលា ឆ្នាំ២០២២។ កិច្ចព្រមព្រៀងនេះ មានបញ្ចូលការចរចាលើការធ្វើសេរីភាវហូបនីយកម្មទំនិញ សេវាកម្ម ការជំរុញការវិនិយោគ និងការចរចាលើបញ្ញត្តិសំខាន់ៗ មួយចំនួនដូចជា ពាណិជ្ជកម្មតាមប្រព័ន្ធអេឡិចត្រូនិក របាំងបច្ចេកទេសពាណិជ្ជកម្ម អនាម័យនិងភូតគាមអនាម័យ កម្មសិទ្ធិបញ្ញាជាដើម៕ អត្ថបទ៖ វណ្ណៈ

កម្ពុជា ពិភាក្សាលើសេចក្តីព្រាងផែនការសកម្មភាពនៃការកសាងសហគមន៍វាសនារួមកម្ពុជា-ចិន

ភ្នំពេញ៖ ឯកឧត្តម វង្សី វិស្សុត រដ្ឋមន្រ្តីប្រតិភូអមនាយករដ្ឋមន្រ្តី, រដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការកម្ពុជា នៃគណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន នៅថ្ងៃទី៦ ខែមិថុនា ឆ្នាំ២០២៣នេះ បានដឹកនាំកិច្ចប្រជុំអន្តរក្រសួង ជាមួយក្រសួងស្ថាប័នពាក់ព័ន្ធចំនួន ៣០ ដើម្បីពិភាក្សាលើខ្លឹមសារនៃសេចក្តីព្រាងផែនការសកម្មភាពស្តីពីការកសាងសហគមន៍វាសនារួមកម្ពុជា-ចិន នៅក្នុងយុគសម័យថ្មី ឆ្នាំ២០២៤-២០២៨ រវាងរាជរដ្ឋាភិបាលកម្ពុជា និងរដ្ឋាភិបាលនៃសាធារ ណរដ្ឋប្រជាមានិតចិន។សេចក្តីព្រាងផែនការសកម្មភាពនេះ ត្រូវបានរៀបចំឡើងដើម្បីពង្រឹងការកសាងកិច្ចសហប្រតិបត្តិការនៃប្រទេសទាំងពីរ កម្ពុជា-ចិន ដែលជាមិត្តដែកថែប សម្រាប់រយៈពេល ៥ ឆ្នាំតទៅមុខទៀត ឱ្យកាន់តែទូលំទូលាយ, ស៊ីជម្រៅ, កាន់តែជិតស្និត, មានគុណភាពខ្ពស់, កម្រិតខ្ពស់ និងស្តង់ដារខ្ពស់ នៅក្នុងក្របខ័ណ្ឌនៃ កិច្ចសហប្រតិបត្តិការត្បូងពេជ្រ ដែលជាលទ្ធផលនៃជំនួបកំពូលនៅកប្រទេសចិន រវាងថ្នាក់ដឹកនាំនៃប្រទេសទាំងពីរគឺ សម្តេចតេជោ ហ៊ុន សែន នាយករដ្ឋមន្រ្តី និង ឯកឧត្តម Xi Jinping ប្រធានាធិបតីនៃសាធារណរដ្ឋប្រជាមានិតចិន កាលពីថ្ងៃទី១០ ខែកុម្ភៈ ឆ្នាំ២០២៣ កន្លងទៅ។ សេចក្តីព្រាងផែនការសកម្មភាពស្តីពីការកសាងសហគមន៍វាសនារួម កម្ពុជា-ចិន នៅក្នុងយុគសម័យថ្មី ដែលជាក្របខ័ណ្ឌ នៃកិច្ចសហប្រតិបត្តិការត្បូងពេជ្រ កម្ពុជា-ចិន ខាងលើនេះ គ្របដណ្តប់លើវិស័យអាទិភាពចំនួន ៦ រួមមាន៖ កិច្ចសហប្រតិបត្តិការនយោបាយ, គុណភាព និងសមត្ថភាពផលិតកម្ម, កសិកម្ម, ថាមពល, សន្តិសុខ និងការផ្លាស់ប្តូរប្រជាជន និងប្រជាជន។ សេចក្តីព្រាងផែនការសកម្មភាពនេះ នឹងត្រូវដាក់ជូនថ្នាក់ដឹកនាំនៃប្រទេសទាំងពីរ ពិនិត្យ និងសម្រេច នាពេលខាងមុខ។គួរបញ្ជាក់ដែរថា កាលពីខែ មេសា ឆ្នាំ២០២៣ កន្លងទៅនេះ ឯកឧត្តម Nong Rong ឧបការីរដ្ឋមន្ត្រីការបរទេស នៃសាធារណរដ្ឋប្រជាមានិតចិន ដែលទើបនឹងត្រូវបានតែងតាំងជាអគ្គលេខាធិការចិនថ្មី នៃគណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន បានដឹកនាំគណៈប្រតិភូចិនមកបំពេញទស្សនកិច្ចនៅប្រទេសកម្ពុជា និងបានជួបពិភាក្សា ជាមួយឯកឧត្តម វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី, រដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការកម្ពុជា នៃគណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន ដើម្បីជំរុញការរៀបចំសេចក្តីព្រាងផែនការសកម្មភាពស្តីពីការកសាងសហគមន៍វាសនារួម កម្ពុជា-ចិន នៅក្នុងយុគសម័យថ្មីនេះ ឱ្យបានឆាប់ តាមដែលអាចធ្វើទៅបាន ដើម្បីជាឧត្តមប្រយោជន៍នៃប្រទេសទាំងពីរកម្ពុជា-ចិន៕អត្ថបទ៖ សុន រ៉ាឌី

រដ្ឋាករទឹកស្វយ័ត កំពុងតភ្ជាប់បណ្តាញទឹកទៅតំបន់កំពុងខ្វះខាត នៅរាជធានីភ្នំពេញ

ភ្នំពេញ៖ រដ្ឋាករទឹកស្វយ័តក្រុងភ្នំពេញ ចុះហត្ថលេខាលើកិច្ចសន្យាជាមួយក្រុមហ៊ុនក្រៅស្រុកមួយ សម្រាប់ការផ្គត់ផ្គង់បំពង់មេនាំទឹក និងបំពង់មេចែកចាយទឹក ក្នុងកញ្ចប់ថវិកាសរុបប្រមាណជា ៥០ លានអឺរ៉ូ នៃគម្រោងសាងសង់រោងចក្របាក់ខែងជំហានទី២ ដើម្បីយកមកតភ្ជាប់បណ្តាញទឹកស្អាតក្នុងរាជធានីភ្នំពេញ។ ឯកឧត្តម ឡុង ណារ៉ូ អគ្គនាយករដ្ឋាករទឹកស្វយ័តក្រុងភ្នំពេញ លើកឡើងក្នុងពិធីចុះហត្ថលេខាលើកិច្ចសន្យាផ្គត់ផ្គង់បំពង់ដែក និងដំណភ្ជាប់ដែកចំនួនពីរកញ្ចាប់ នៃគម្រោងផ្គត់ផ្គង់ទឹកស្អាតបាក់ខែងជំហានទី២ រវាងរដ្ឋាករទឹកស្វយ័តក្រុងភ្នំពេញ និងក្រុមហ៊ុនផ្គត់ផ្គង់ សាំងហ្គោបេនប៉ាម នៅថ្ងៃទី ៦ ខែ មិថុនា ឆ្នាំ ២០២៣ នេះថា សម្រាប់គម្រោងនៃការតភ្ជាប់បំពង់មេទាំងពីរនេះ គឺជាការបន្តនៃការភ្ជាប់បំពង់បាក់ខែងជំហានទី១ ដើម្បីយកទឹកពីបាក់ខែងជំហានទី២ ទៅផ្គត់ផ្គង់នៅតំបន់បែកខាងលិច និងខាងត្បូងរាជធានីភ្នំពេញ ហើយមកដល់ពេលនេះ ចំពោះការដាក់បំពង់មេនាំទឹកនេះ រដ្ឋាករទឹកស្វយ័តក្រុងភ្នំពេញ បានចុះហត្ថលេខាជាមួយក្រុមហ៊ុនខាងលើរួមមាន ការផ្គត់ផ្គង់បំពង់មេនាំទឹក ប្រវែងប្រមាណ ២០គីឡូម៉ែត្រ មានមុខកាត់ពី ៨០០ ដល់ ១ ៦០០ មីលីម៉ែត្រ ក្នុងកញ្ចប់ថវិកា ៣៥ លានអឺរ៉ូ ។ ចំណែកបំពង់មេចែកចាយទឹក ប្រវែងប្រមាណ ៥០គីឡូម៉ែត្រ មានមុខកាត់ពី ៣០០ ទៅដល់ ៦០០ មីលីម៉ែត្រ ក្នុងកញ្ចប់ថវិកា ១៤ លានអឺរ៉ូ។ឯកឧត្តម បន្តឲ្យដឹងថា ចំពោះបំពង់មេទាំងពីរប្រភេទនេះ នឹងត្រូវនាំមកដល់រាជធានីភ្នំពេញក្នុងរង្វង់ ខែតុលា ឆ្នាំ ២០២៣ ខាងមុខនេះ ក្នុងនោះបន្ទាប់ពីបំពង់បាននាំមកដល់ រដ្ឋាករទឹកស្វយ័តក្រុងភ្នំពេញនឹងយកបំពង់ទាំងនោះ ទៅដំឡើងនៅតាមទំនុបកប់ស្រូវ រហូតដល់ផ្លូវជាតិលេខ ៤ ដោយនឹងត្រូវការពេលវេលាជាង ១ ឆ្នាំ ដើម្បីដាក់បំពង់នេះឲ្យអស់ សំដៅធានាពង្រីកបណ្តើរៗ ដើម្បីផ្គត់ផ្គង់ទឹកស្អាតដល់អតិថិជនដែលកំពុងខ្វះខាតទឹក។សូមបញ្ជាក់ថា គម្រោងសាងសង់រោងចក្រផលិតទឹកស្អាតបាក់ខែងជំហានទី២ មានសមត្ថភាពផលិតប្រមាណ ១៩៥ ពាន់ម៉ែត្រគីប ក្នុងមួយថ្ងៃ ដោយរោងចក្រនេះបានចាប់ផ្តើមសាងសង់កាលពីខែធ្នូ ឆ្នាំ ២០២២ ស្ថិតក្រោមហិរញ្ញប្បទានរបស់រាជរដ្ឋាភិបាលកម្ពុជា, របស់រដ្ឋាករទឹកស្វយ័តក្រុងភ្នំពេញ ជាមួយទីភ្នាក់ងារបារាំងសម្រាប់អភិវឌ្ឍន៍ (AFD) មកដល់ពេលនេះរោងចក្របាក់ខែងជំហានទី២ សម្រេចបានប្រមាណជា ៩០ ភាគរយហើយ នៃទំហំគម្រោងទាំងមូល ដោយគម្រោងនេះនឹងដាក់ឲ្យដំណើរនៅដើមឆ្នាំ ២០២៤ ខាងមុខ៕អត្ថបទ៖ សុន រ៉ាឌី

ផ្លួវល្បឿនលឿនភ្នំពេញ-បាវិត នឹងជួយលើកកម្ពស់វិនិយោគ ពាណិជ្ជកម្ម ការដឹកជញ្ជូន និងទេសចរណ៍

ភ្នំពេញ៖ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន មានប្រសាសន៍ថា ផ្លួវល្បឿនលឿនភ្នំពេញ-បាវិត នឹងជួយលើកកម្ពស់ វិនិយោគ ពាណិជ្ជកម្ម ក្នុងតំបន់ស្រុកល្វាម ខេត្តកណ្តាល និងការដឹកជញ្ជូន និងទេសចរណ៍ រវាងកម្ពុជា និងវៀតណាម។ថ្លែងក្នុងពិធីបើកការដ្ឋានសាងសង់ផ្លូវល្បឿនលឿនភ្នំពេញ-បាវិត នៅថ្ងៃទី៧ ខែមិថុនា ឯកឧត្តម ស៊ុន ចាន់ថុល មានប្រសាសន៍ថា ផ្លូវល្បឿនលឿនភ្នំពេញ-បាវិត គឺជាខ្សែសេដ្ឋកិច្ច ដ៏មានសក្តានុពល របស់កម្ពុជា តភ្ជាប់ពីរាជធានីភ្នំពេញ ទៅក្រុងបាវិត។ឯកឧត្តម ស៊ុន ចាន់ថុល ថ្លែងថា៖ “ផ្លូវល្បឿនលឿននេះ នឹងជំរុញឲ្យមានកំណើនវិនិយោគ ពាណិជ្ជកម្ម និងទេសចរណ៍នៅរាជធានីភ្នំពេញ និងក្រុងថ្មី អរិយក្សត្រ នៃខេត្តកណ្តាល ខេត្តព្រៃវែង ខេត្តស្វាយរៀង និងក្រុងបាវិត ជាពិសេសសកម្មភាពពាណិជ្ជកម្ម ទេសចរណ៍ និងការដឹកជញ្ជូនឆ្លងកាត់ព្រំដែនជាលក្ខណៈទ្វេភាគី រវាងកម្ពុជា និងវៀតណាមបន្ថែមទៀត”។បន្ថែមលើនេះ ផ្លូវល្បឿនលឿននេះ ក៏នឹងក្លាយជាផ្នែកមួយយ៉ាងសំខាន់ក្នុងការបំពេញបន្ថែមលើផ្លូវហាយវ៉េលេខមួយ ដែលនឹងជួយសម្រួលបន្ថែមនូវការតភ្ជាប់ប្រទាក់ក្រឡានៃផ្ទៃក្នុងប្រទេស និងការតភ្ជាប់កម្ពុជា ទៅក្នុងក្របខណ្ឌតំបន់អាស៊ាន និងមហាអនុតំបន់មេគង្គ ឲ្យកាន់តែទូលំទូលាយដើម្បីពង្រឹងសក្តានុពេលនៃទីផ្សារ ការប្រកួតប្រជែង និងភាពទន់សេដ្ឋកិច្ច-សង្គម តាមរយៈធ្វើការធ្វើឲ្យកាន់តែស៊ីចង្វាក់គ្នា ។ឯកឧត្តម ស៊ុន ចាន់ថុល លើកឡើងទៀតថា ការតភ្ជាប់ហេដ្ឋារចនាសម្ព័ន្ធ ត្រូវបានចាត់ទុកជាក្បាលម៉ាស៊ីនជំរុញកំណើនសេដ្ឋកិច្ចជាតិ និងកាត់បន្ថយភាពក្រីក្ររបស់ប្រជាពលរដ្ឋបានយ៉ាងឆាប់រហ័ស។កសាងដោយក្រុមហ៊ុន សាជីវកម្មស្ពាន និងថ្នល់ចិន ផ្លូវល្បឿនលឿនភ្នំពេញ-បាវិត មានប្រវែង ១៣៥គីឡូម៉ែត្រ ដោយថវិកាវិនិយោគសាងសង់ ប្រមាណ ១,៣៥ប៊ីលានដុល្លារ ក្រោមទម្រង់វិនិយោគសាងសង់-ប្រតិបត្តិការ-ផ្ទេរ(BOT) ដែលមានរយៈពេលប្រតិបត្តិការចំនួន ៥០ឆ្នាំ ដោយគ្រោងបញ្ចប់ការសាងសង់នៅឆ្នាំ២០២៧៕ អត្ថបទ៖ វណ្ណៈ

អាមេរិកបង្កើនការបង្រ្កាបលើហាងឆេងរូបិយបណ្ណគ្រីបតូដោយដាក់បណ្ដឹងទល់នឹងក្រុម Coinbase និង Binance

អាមេរិក៖ និយតករមូលបត្រជាន់ខ្ពស់សហរដ្ឋអាមេរិក បានប្ដឹង platform ក្រុមហ៊ុនហាងឆេងរូបិយបណ្ណគ្រីបតូ Coinbase កាលពីថ្ងៃអង្គារ ទី៦ ឧសភា ជាបណ្ដឹងលើកទី២ ក្នុងពេល២ថ្ងៃទល់នឹងក្រុមហ៊ុនហាងឆេងប្ដូររូបិយបណ្ណគ្រីបតូដ៏ធំមួយក្នុងការបង្ក្រាបកាន់តែខ្លាំងលើឧស្សាហកម្មន៍នេះ និងក្រុមហ៊ុនមួយទៀត ដែលអាចធ្វើឲ្យប៉ះពាល់ដល់ទីផ្សារមួយដែល បានធ្វើប្រតិបត្តិការយ៉ាងទូលំទូលាយនៅក្រៅនិយតកម្ម។គណៈកម្មការមូលបត្រនិងអត្រាប្ដូរប្រាក់ហៅកាត់ថា (SEC) កាលពីថ្ងៃចន្ទ បានប្ដឹងក្រុមហ៊ុនអត្រាប្ដូររូបិយប័ណ្ណ គ្រីបតូ បាយនិន (Binance) ដែលជាហាងឆេងប្ដូររូបិយបណ្ណគ្រីបតូធំបំផុតលើពិភពលោក។ SEC បានចោទប្រកាន់ក្រុមហ៊ុន Binance និងអគ្គនាយករបស់ខ្លួន លោក Changpeng Zhao ពីបទប្រតិបត្តិការខុសច្បាប់នៃការបោកប្រាស់អតិថិជន និងការគេចវេះពីច្បាប់ ។ប្រសិនបើការប្តឹងផ្តល់ទទួលជោគជ័យ បណ្ដឹងទាំងនោះ នឹងអាចកែប្រែទីផ្សាររូបិយបណ្ណគ្រីបតូ ដោយបញ្ជាក់ថាយុត្តាធិការរបស់ SEC ជុំវិញ ឧស្សាហកម្ម ដែលរយៈពេលជាច្រើនឆ្នាំមកនេះ បានបង្ហាញថារូបិយបណ្ណទាំងនោះ មិនតំណាងឲ្យមូលបត្រទេ និងមិនគួរត្រូវបានកំណត់និយតកម្មដោយ SECដែរ។ លោក Kevin O'Brien ដែលជាដៃគូនៅក្រុមហ៊ុន Ford O'Brien Landy និងក្រុមហ៊ុន Ford O'Brien Landy និង ជាអតីតរដ្ឋអាជ្ញាសហព័ន្ធ បាននិយាយថា ករណីទាំងពីរគឺខុសគ្នា ប៉ុន្តែការត្រួតស៊ីគ្នា និង ចំណុចដែលដូចគ្នា គឺ យុទ្ធនាការដ៏ខ្លាំងក្លារបស់ SEC ដើម្បីនាំយករូបិយបណ្ណគ្រីបតូ ឲ្យស្ថិតនៅក្រោមយុត្តាធិការនៃច្បាប់មូលបត្រសហព័ន្ធ ដោយបន្ថែមថា SEC មិនធ្លាប់បានចាត់វិធានការលើក្រុមហ៊ុនរូបិបណ្ណគ្រីបតូសំខាន់ៗបែបនេះពីមុនមកទេ៕

រាជរដ្ឋាភិបាលលើកលែងពន្ធលើអចលនទ្រព្យ ស្ថិតនៅក្រុងបង្កើតថ្មីក្នុងឆ្នាំនេះ

ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ ចេញសេចក្តីប្រកាស ស្តីពីការលើកលែងពន្ធលើអចលនទ្រព្យ ក្នុងឆ្នាំ ២០២៣ នេះ ចំពោះអចលនទ្រព្យស្ថិតក្នុងក្រុងបង្កើតថ្មីចំនួន៤ គឺក្រុងឧដុង្គម៉ែជ័យ, ក្រុងអរិយក្សត្រ, ក្រុងសំពៅពូន, និងក្រុងបូកគោ។តាមប្រកាសរបស់ក្រសួងសេដ្ឋកិច្ច និងហិរញ្ញវត្ថុ ស្តីពីការលើកលែងពន្ធអចលនទ្រព្យ ចំពោះអចលនទ្រព្យស្ថិតក្នុងក្រុងឧដុង្គម៉ែជ័យ នៃខេត្តកំពង់ស្ពឺ, ក្រុងអរិយក្សត្រ ខេត្តកណ្តាល, ក្រុងសំពៅពូន ខេត្តបាត់ដំបង់ និងក្រុងបូកគោ នៃខេត្តកំពត គឺត្រូវបានលើកលែងពន្ធលើអចលនទ្រព្យរហូតដល់ដំណាច់ឆ្នាំ ២០២៣។ម្ចាស់អចលនទ្រព្យទាំងអស់ដែលស្ថិតក្នុងក្រុង ត្រូវមានកាតព្វកិច្ចចុះបញ្ជីអចលនទ្រព្យនៅសាខាពន្ធដារខេត្ត ដែលអចលនទ្រព្យស្ថិតនៅ ឬនៅនាយកដ្ឋានពន្ធចលនទ្រព្យ និងអចលនទ្រព្យនៃអគ្គនាយកដ្ឋានពន្ធដារ, ប៉ុន្តែពុំមានកាតព្វកិច្ចដាក់លិខិតប្រកាស និងបង់ពន្ធលើអចលនទ្រព្យរហូតដល់ដំណាច់ឆ្នាំ២០២៣។ក្នុងករណីអចលនទ្រព្យស្ថិតក្នុងក្រុងដូចមានកំណត់ក្នុងប្រការ១ នៃប្រកាសនេះ បានបង់ពន្ធលើអចលនទ្រព្យរួចហើយ ចំនួនប្រាក់ពន្ធដែលបានបង់រួចនោះ ត្រូវបានអនុញ្ញាតឱ្យធ្វើជាឥណទានយោង សម្រាប់យកទៅកាត់កងពន្ធលើអចលនទ្រព្យសម្រាប់ឆ្នាំបន្តបន្ទាប់។ ម្ចាស់អចលនទ្រព្យ ត្រូវស្នើសុំឥណទានពន្ធ លើអចលនទ្រព្យដែលបានបង់រួច នៅសាខាពន្ធដារខេត្ត ដែលអចលនទ្រព្យស្ថិតនៅ ឬនៅអគ្គនាយកដ្ឋានពន្ធដារ សម្រាប់យកទៅកាត់កងពន្ធលើអចលនទ្រព្យសម្រាប់ឆ្នាំជាប់ពន្ធបន្តបន្ទាប់ទៀត។ជុំវិញការលើកលែងពន្ធលើអចលនទ្រព្យនេះ បានបង្ហាញឲ្យឃើញពីការយកចិត្តទុកដាក់ និងគិតគូរដ៏ខ្ពង់ខ្ពស់របស់រាជរដ្ឋាភិបាល ចំពោះសុខទុក្ខ និងជីវភាពរស់នៅប្រចាំថ្ងៃរបស់ប្រជាពលរដ្ឋ ទោះបីជាកាតព្វកិច្ចក៏ដោយ៕អត្ថបទ៖ សុន រ៉ាឌី

ក្រសួងពាណិជ្ជកម្ម សហការជាមួយក្រុមហ៊ុន Alibaba បណ្តុះបណ្តាលជំនាញពាណិជ្ជកម្មតាមប្រព័ន្ធអេឡិចត្រូនិច

ភ្នំពេញ៖ ក្រុមហ៊ុនលក់តាមប្រព័ន្ធអនឡាញប្រទេសចិន Alibaba នឹងបើកថ្នាក់បណ្តុះបណ្តាលតាមប្រព័ន្ធអេឡិចត្រូនិចជួយសហគ្រិន និងម្ចាស់អាជីវកម្មប្រព័ន្ធអេឡិចត្រូនិចខ្មែរ ក្នុងការប្រើប្រាស់បច្ចេកវិទ្យាឌីជីថល ដើម្បីលើកកម្ពស់អាជីវកម្ម និងសេដ្ឋកិច្ចក្នុងតំបន់ឱ្យមានភាពវិជ្ជមានប្រសើរឡើង។ក្នុងសេចក្តីជូនដំណឹងចុះថ្ងៃទី៥ ខែមិថុនា ក្រសួងពាណិជ្ជកម្ម លើកឡើងថា ក្រុមហ៊ុនលក់តាមប្រព័ន្ធអនឡាញប្រទេសចិន Alibaba នឹងបើកថ្នាក់បណ្តុះបណ្តាលតាមប្រព័ន្ធអេឡិចត្រូនិច មួយឈ្មោះថា Alibaba Netpreneur Masterclass នៅថ្ងៃទី២៧ ខែកក្កដា ឆ្នាំ២០២៣ នៅក្រោមកិច្ចសហប្រតិបត្តិការរវាងក្រសួងពាណិជ្ជកម្ម និងក្រុមហ៊ុន Alibaba ។ក្រសួងបន្តថា វគ្គបណ្តុះបណ្តាលនេះ ធ្វើឡើងក្នុងគោលបំណងផ្ដល់ដល់សហគ្រិន និងម្ចាស់អាជីវកម្មប្រព័ន្ធអេឡិចត្រូនិចទាំងអស់ នូវបទពិសោធន៍ និងជំនាញថ្មីៗក្នុងការប្រើប្រាស់បច្ចេកវិទ្យាឌីជីថលដើម្បីលើកកម្ពស់អាជីវកម្ម និង សេដ្ឋកិច្ចក្នុងតំបន់ឱ្យមានភាពវិជ្ជមានប្រសើរឡើង។តាមរយៈថ្នាក់បណ្តុះបណ្តាលនេះ សហគ្រិន និងម្ចាស់អាជីវកម្មនឹងយល់ដឹងកាន់តែស៊ីជម្រៅអំពីសេដ្ឋកិច្ចឌីជីថល ស្វែងយល់ពីជំហានផ្សេងៗដើម្បីជម្រុញអាជីវកម្មអោយមានភាពយូរអង្វែងក្នុងសម័យឌីជីថល ទទួលបានវិញ្ញាបនបត្របញ្ជាក់ការសិក្សាក្រោយថ្នាក់បណ្ដុះបណ្ដាលចប់ ទទួលបានឱកាសចូលរួមថ្នាក់បណ្តុះបណ្តាលផ្ទាល់នៅទីស្នាក់ការកណ្តាលក្រុមហ៊ុនAlibaba ប្រទេសចិន សម្រាប់បុគ្គលឆ្នើម។ចំពោះកាលបរិច្ឆេទចូលរៀន នឹងចាប់ផ្តើមពី ថ្ងៃទី ២៧ ខែកក្កដា ឆ្នាំ២០២៣ ដល់ ថ្ងៃទី ២៤ ខែសីហា ឆ្នាំ២០២៣ ដែលមានរយៈពេលពី ៦ ទៅ ៨ ម៉ោងក្នុងមួយសប្តាហ៍ ហើយតម្រូវអោយរៀនជាភាសាអង់គ្លេស។ វគ្គបណ្តុះបណ្តាល ធ្វើឡើងស្របតាមកិច្ចសហប្រតិបត្តិការពីការបង្កើតក្រុមការងារចំពោះកិច្ចសិក្សាពីលទ្ធភាព និងសម្របសម្រួលការនាំចេញផលិតផលខ្មែរទៅកាន់ទីផ្សារអនឡាញបរទេសតាមរយៈថ្នាលបច្ចេកវិទ្យាក្រុមហ៊ុន Alibaba៕ អត្ថបទ៖ វណ្ណៈ

វិស័យធានារ៉ាប់រងនៅកម្ពុជា រក្សាបានកំណើនវិជ្ជមានគួរឱ្យកត់សម្គាល់

ភ្នំពេញ៖ វិស័យធានារ៉ាប់រងនៅកម្ពុជាបានរក្សានូវកំណើនជាវិជ្ជមានរបស់ខ្លួនយ៉ាងប្រសើរ ខណៈដែលបុព្វលាភដុលសរុបមាន ប្រមាណជាង ៩៣ លានដុល្លារអាមេរិក ក្នុងត្រីមាសទី១ ឆ្នាំ២០២៣ កើនឡើង ៥,៧ភាគរយ ធៀបនឹងរយៈពេលដូចគ្នាកាលពីឆ្នាំ២០២២។ទិន្នន័យធានារ៉ាប់រងកម្ពុជាប្រចាំត្រីមាសទី១ ចេញផ្សាយកាលពីថ្ងៃទី២ ខែមិថុនា បង្ហាញថា បុព្វលាភធានារ៉ាប់រងទូទៅ មានចំនួនជាង ៤២លានដុល្លារ កើនឡើង ៦,៥ភាគរយ ធានារ៉ាប់រងអាយុជីវិត មានបុព្វលាភចំនួនជាង ៤៨លានដុល្លារ មានកំណើន៣,៨ភាគរយ និងបុព្វលាភធានារ៉ាប់រងខ្នាតតូចជាង ១,៨លានដុល្លារ កើនឡើង៤៥ភាគរយ។ចំណែកទីផ្សារនៃធានារ៉ាប់រងអាយុជីវិត មាន៥២,២៦ភាគរយ ខណៈធានារ៉ាប់រងទូទៅ មាន៤៥,៧៨ភាគរយ និងធានារ៉ាប់រងខ្នាតតូច ១,៨ភាគរយ ។បើតាមរបាយការណ៍ដដែល ទ្រព្យសកម្មសរុបនៃវិស័យធានារ៉ាប់រង គិតត្រឹមត្រីមាសទី១ ឆ្នាំ២០២៣នេះ មានចំនួន១ពាន់លានដុល្លារ ។ឯកឧត្តម ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជា ធ្លាប់បានលើកឡើងថា វិស័យធានារ៉ាប់រងនៅព្រះរាជាណាចក្រកម្ពុជា មានការរីកចម្រើនគួរឲ្យកត់សម្គាល់ នៅក្នុងរយៈពេលប្រាំឆ្នាំចុងក្រោយនេះ។បច្ចុប្បន្ន មានគ្រឹះស្ថានធានារ៉ាប់រងសរុប៩៤ ក្នុងនោះមានក្រុមហ៊ុនធានារ៉ាប់រងទូទៅ១៨ ធានារ៉ាប់រងអាយុជីវិត១៤ ក្រុមហ៊ុនធានារ៉ាប់រងខ្នាតតូច៧ ក្រុមហ៊ុនធានារ៉ាប់រងបន្ត១ ក្រុមហ៊ុនជើងសាធានារ៉ាប់រង១៨ ក្រុមហ៊ុនភ្នាក់ងារធានារ៉ាប់រង៣៤ និងក្រុមហ៊ុនវាយតម្លៃហានិភ័យធានារ៉ាប់រង២ កំពុងធ្វើប្រតិបត្តិការអាជីវកម្មធានារ៉ាប់រងនៅក្នុងប្រទេសកម្ពុជា។អត្ថបទ៖ វណ្ណៈ

បណ្ដាញសង្គម

ព័ត៌មានថ្មីៗ

ចិននិយាយថា បញ្ហាថ្នាំហ្វេនតានីលអាមេរិក គឺជាទំនួលខុសត្រូវផ្ទាល់ខ្លួនរបស់ទីក្រុងវ៉ាស៊ីនតោន

សាលារៀននៅតាមទីក្រុងព្រំដែនប្រទេសឥណ្ឌា និងប៉ាគីស្ថាន ចាប់ផ្តើមបើកឡើងវិញ ក្រោយមានបទឈប់បាញ់

ការវាយប្រហាររបស់អ៊ីស្រាអែលលើតំបន់ហ្កាហ្សាសម្លាប់មនុស្សយ៉ាងហោច ៤៦នាក់ក្នុងរយៈពេល ២៤ម៉ោងចុងក្រោយ

វិមានក្រឹមឡាំង បដិសេធន៍ពុំនិយាយពីជំនួបសន្តិភាពរវាងរុស្ស៊ី និងអ៊ុយក្រែននៅទួរគី

ប៉ាគីស្ថាន និយាយថា ទាហាន និងជនស៊ីវិល ៥១នាក់របស់ខ្លួន ត្រូវបានសម្លាប់ អំឡុងការប៉ះទង្គិចជាមួយឥណ្ឌា

ភ្នំភ្លើង Etna របស់អ៊ីតាលី ចាប់ផ្តើមកម្រើកកាន់តែខ្លាំងកាលពីយប់ថ្ងៃចន្ទ

ឧបទ្ទេវហេតុគ្រោះថ្នាក់ចរាចរណ៍បានសម្លាប់ទាហានប៉ារ៉ា ៩នាក់ នៅម៉ាឡេស៊ីល

ចិន និងប្រេស៊ីល សន្យាការពារពាណិជ្ជកម្មសេរី ពេលប្រធានាធិបតីប្រទេសទាំង ២ជួបគ្នានៅទីក្រុងប៉េកាំង

ឯកឧត្តមសាស្ត្រាចារ្យ ឈាង រ៉ា បន្តធ្វើបាឋកថាលើភាពជាអ្នកដឹកនាំស្តីពីវិធីសាស្រ្តនៃការគិតពិចារណា “សម្ភារៈនិយមវិចារវិទ្យាបែបវិទ្យាសាស្រ្ត”

ថៃបញ្ចប់ប្រតិបត្តិការស្វែងរក នៅទីតាំងអគារខ្ពស់ដែលបាក់រលំ អំឡុងរញ្ជួយដី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877