BTV NEWS

សម្តេចព្រះមហាក្សត្រី ព្រះរាជានុញ្ញាតជូន ឯកឧត្តម តូ ឡឹម ចូលក្រាបថ្វាយបង្គំគាល់ នៅព្រះបរមរាជវាំង

ប្រធានសភាពាណិជ្ជកម្មកម្ពុជា អំពាវនាវដល់វិស័យឯកជនបង់ពន្ធជូនរដ្ឋគ្រប់ៗគ្នាដើម្បីអភិវឌ្ឍន៍ជាតិ

មន្រ្តីជាន់ខ្ដស់ CDC៖ ខណៈពិភពលោកកំពុងតានតឹង កម្ពុជាបានកំពុងបន្តឆ្ពោះទៅមុខមានទិសដៅសេដ្ឋកិច្ចច្បាស់លាស់

អ្នកជំនាញ៖ វិស័យដឹកជញ្ជូនឆ្នាំ២០២៦នេះ នឹងបន្តនិន្នាការល្អ គាំទ្រការងើបឡើងនៃអនុវិស័យផ្សេងៗ

សេដ្ឋកិច្ច និង កសិកម្ម

សមាគមជប៉ុន-កម្ពុជា សន្យាកៀរគរអ្នកវិនិយោគ និងSMEs ជប៉ុនបន្ថែមមកអភិវឌ្ឍន៍នៅកម្ពុជា

ភ្នំពេញ៖ សមាគមជប៉ុន-កម្ពុជា (JCA) បានសន្យាថា នឹងទាក់ទាញអ្នកវិនិយោគ និងសហគ្រាសធុនតូច និងមធ្យម (SMEs) ពីប្រទេសជប៉ុនចូលមកធ្វើការវិនិយោគនៅកម្ពុជាឱ្យបានច្រើនបន្ថែមទៀត ដើម្បីរួមចំណែកក្នុងការអភិវឌ្ឍសេដ្ឋកិច្ច និងធនធានមនុស្សនៅកម្ពុជាឱ្យកាន់តែមានសមត្ថភាព ដើម្បីដើរឱ្យទាន់តម្រូវការសង្គម សេដ្ឋកិច្ចដែលកំពុងមានការរីកចម្រើន នាពេលបច្ចុប្បន្ន និងអនាគត។ការសន្យានេះធ្វើឡើងក្នុងជំនួបសម្តែងការគួរសម និងពិភាក្សាការងាររវាងឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ជាមួយលោក តាកាហាស៊ី ហ្វ៊ូមីអាគិ (Takahashi Fumiaki) ប្រធានសមាគមជប៉ុន-កម្ពុជា (JCA) និងជាអតីតឯកអគ្គរាជទូតជប៉ុនប្រចាំកម្ពុជា នាព្រឹកថ្ងៃទី១៤ ខែកញ្ញា ឆ្នាំ២០២៣ នៅទីស្តីការក្រសួងការងារ។នាឱកាសនោះ ឯកឧត្តមរដ្ឋមន្ត្រីលើកឡើងថា ប្រទេសជប៉ុនបានចូលរួមចំណែកយ៉ាងសំខាន់ក្នុងការនាំមកសន្តិភាពនៅកម្ពុជា។ ហើយរាជរដ្ឋាភិបាលប្រទេសទាំងពីរបានបង្កើនកិច្ចសហប្រតិបត្តិការដល់កម្រិតដៃគូជាយុទ្ធសាស្ត្រគ្រប់ជ្រុងជ្រោយ។ មួយវិញទៀត រំហូរពាណិជ្ជករជប៉ុនបានចូលមកវិនិយោគកាន់តែច្រើនលើគ្រប់វិស័យ ហើយក៏បានផ្តល់ឱកាសការងារជូនប្រជាពលរដ្ឋបានយ៉ាងច្រើន ដែលនេះជាការបង្ហាញពីសក្តានុពល និងភាពទាក់ទាញរបស់កម្ពុជា។ ឯកឧត្តម យល់ឃើញថា វត្តមានរបស់អ្នកវិនិយោគជប៉ុនយ៉ាងច្រើនបែបនេះ ជាការជំរុញទាក់ទាញអ្នកវិនិយោគប្រទេសដទៃមកកាន់កម្ពុជាកាន់តែច្រើនបន្ថែមទៀតផងដែរ។ឯកឧត្តមរដ្ឋមន្ត្រីក៏បានស្នើដល់ខាងភាគីជប៉ុនសហការលើការបណ្តុះបណ្តាលធនធានមនុស្សរបស់កម្ពុជា ដើម្បីឆ្លើយតបនឹងតម្រូវការទីផ្សាការងារ និងឱកាសការងារ ដែលស្របទៅនឹងយុទ្ធសាស្រ្ដបញ្ចកោណរបស់រាជរដ្ឋាភិបាលអាណត្តិថ្មី ពិសេសគឺការផ្ដល់ការបណ្ដុះបណ្ដាលវិជ្ជាជីវៈដល់យុវជន១លាន៥សែននាក់មកពីក្រុមគ្រួសារក្រីក្រ និងងាយរងគ្រោះ តាមរយៈការបន្តគាំទ្រស្ថាប័ន TVET ដែលកំពុងសហការស្រាប់ជាមួយភាគីជប៉ុន។ជាការឆ្លើយតប លោក ហ៊្វុមីអាគិ និងប្រតិភូដែលជាសមាជិករបស់សមាគម JCA បានទទួលយកសំណូមពរនេះ និងបានបញ្ជាក់ថា រថយន្តដែលផលិតនៅប្រទេសជប៉ុនបានចរាចរណ៍នៅកម្ពុជាមានចំនួនកាន់តែច្រើន ដែលជាឱកាសមួយសម្រាប់ឱ្យខាងជប៉ុនផ្តល់ការបណ្តុះបណ្តាលលើជំនាញថែទាំ និងជួសជុលរថយន្តទាំងនោះ ទៅដល់យុវជនកម្ពុជាឱ្យកាន់តែមានសមត្ថភាព។ ជាមួយគ្នានេះដែរ ភាគីជប៉ុនក៏ចង់ផ្តល់ការបណ្តុះបណ្តាលជំនាញកែសម្ជស្ស ដែលជាជំនាញមួយកំពុងតែពេញនិយម និងអាចផ្តល់ចំណូលបានប្រសើរផងដែរ។ឯកឧត្តមរដ្ឋមន្ត្រីថែមទាំងបានបញ្ជាក់ពីឆន្ទៈក្នុងការផ្ដល់កិច្ចសហប្រតិបត្តិជាមួយភាគីជប៉ុន នៅពេលដែលប្រតិភូវិនិយោគជប៉ុនមកទស្សនកិច្ចនៅប្រទេសកម្ពុជា នាខែវិច្ឆិកា ឆ្នាំ២០២៣ ខាងមុខ ពោលនឹងត្រៀមចាំសម្របសម្រួលដំណើរទស្សនកិច្ចទៅកាន់តំបន់សក្តានុពលសម្រាប់ការបង្កើតអាជីវកម្ម ក៏ដូចជាជួយសហការក្នុងការជ្រើសរើស និងបណ្ដុះបណ្ដាលកម្មករនិយោជិត ត្រៀមខ្លួនមុនចូលបម្រើការងារ៕

ពិព័រណ៍ម្ហូបអាហារសណ្ឋាគារ និងសំណង់ខ្នាតអន្តរជាតិ រំពឹងថា នឹងទាក់ទាញអ្នកទស្សនាជាង១ម៉ឺននាក់

ភ្នំពេញ៖ កម្មវិធីតាំងពិព័រណ៍វិស័យផ្គត់ផ្គង់ម្ហូបអាហារ សណ្ឋាគារ និងសំណង់ខ្នាតអន្តរជាតិ ឬហៅជាភាសាអង់គ្លេស CamFood CamHotel and CamBuild ដែលបានបើកសម្ពោធជាផ្លូវការ ដើម្បីបង្ហាញពិព័រណ៍ជាលក្ខណៈ ប៊ីធូប៊ី (B2B) ធំជាងគេក្នុងប្រទេសកម្ពុជា ចាប់ពីថ្ងៃទី១៤ ដល់១៦ ខែកញ្ញា ឆ្នាំ២០២៣ នៅមជ្ឈមណ្ឌលសន្និបាតពិព័រណ៍កោះពេជ្រ រាជធានីភ្នំពេញ ត្រូវបានរំពឹងថា នឹងទាក់ទាញអ្នកទស្សនាជាង១ម៉ឺននាក់ក្នុងរយៈពេល ៣ថ្ងៃនេះ។ព្រឹត្តិការណ៍ដ៏ធំនេះ បានសហការរៀបចំដោយក្រសួងទេសចរណ៍ ក្រសួងពាណិជ្ជកម្ម និងក្រសួងរៀបចំដែនដីនគរូបនីយកម្ម និងសំណង់ ជាមួយអ្នកផ្គត់ផ្គង់ខាងវិស័យម្ហូបអាហារ សណ្ឋាគារ និងសំណង ទាំងក្នុងស្រុក និងអន្តរជាតិ ប្រមាណជាង ១៥០ ម៉ាក។លោក Darren Siow គណៈកម្មាធិការរៀបចំការពិព័រណ៍នេះថ្លែងថា ក្រៅពីការតាំងពិព័រណ៍ ព្រឹត្តិការណ៍នេះក៏នឹងបង្ហាញពីការប្រកួតប្រជែងផ្នែកបដិសណ្ឋារកិច្ច និងធ្វើម្ហូបផ្សេងៗនៅកម្ពុជា ដែលនឹងបង្ហាញដោយអ្នកជំនាញក្នុងវិស័យ F&B និងផ្នែកបដិសណ្ឋារកិច្ចប្រកួតប្រជែងដណ្តើមពានរង្វាន់។ លោក ជា និមល អគ្គនាយករង នៃក្រុមហ៊ុនសាប៊ូក្លិន និងលោកស្រី រិន ណៃហួយ ប្រធានផ្នែកទីផ្សារក្រុមហ៊ុន បុងកាហ្វេ ខេមបូឌា ដែលបានចូលរួមតាំងបង្ហាញក្នុងពិព័រណ៍ខ្នាតអន្តរជាតិនេះបានអំពាវនាវដល់សាធារណៈជន ជាពិសេសអ្នកដែលមានបំណងចង់បង្កើតអាជីវកម្ម ឬស្វែងរកដៃគូពាណិជ្ជកម្ម អាចចូលរួមស្វែងយល់ពីផលិតផល ក៏ដូចជាបច្ចេកវិទ្យាទំនើបៗតាមរយៈកម្មវិធីនេះ។ឯកឧត្តម គុជ បញ្ញាសា រដ្ឋលេខាធិការក្រសួងទេសចរណ៍ ក៏បានអំពាវនាវវិស័យឯកជន និងគ្រប់ភាគីពាក់ព័ន្ធចូលរួមសហការ ដើម្បីស្វាគមន៍ភ្ញៀវទេសចរណ៍ជាតិ និងអន្តរជាតិ ដែលមកកម្សាន្តកម្ពុជា ស្របទៅតាមដំណាក់កាលទី២នៃការជំរុញ និងស្តារឡើងវិញនៃវិស័យទេសចរណ៍នៃផែនទីចង្អុលផ្លូវ ស្តីពីផែនការស្តារ និងលើកស្ទួយវិស័យទេសចរណ៍កម្ពុជា ក្នុងនិងក្រោយវិបត្តិកូវីដ-១៩៕អត្ថបទ ឈិត បូរ៉ាវី

ការប្រកួតប្រជែងស្មាតហ្វូនរបស់ក្រុមហ៊ុន Apple និងក្រុមហ៊ុន Huawei ជះឥទ្ធិពលដល់គំនិតបច្ចេកវិទ្យារបស់ប្រជាជនចិន

ទូរស័ព្ទអាយហ្វូន១៥ (iPhone 15) របស់ក្រុមហ៊ុន Apple បានទាក់ទាញប្រតិកម្មចម្រុះនៅក្នុងទីផ្សារធំទីបីរបស់ខ្លួននៅប្រទេសចិន កាលពីថ្ងៃពុធ (១៣ កញ្ញា) ដោយអ្នកប្រើប្រាស់អនឡាញជាច្រើនចូលចិត្តបន្ទះឈីបដែលមានល្បឿនលឿនជាងមុន និងបង្កើនសមត្ថភាពលេងហ្គេម ខណៈដែលអ្នកផ្សេងទៀតចូលចិត្តស្មាតហ្វូនសេរីថ្មីរបស់ក្រុមហ៊ុន Huawei ។ ប្រទេសចិន នៅតែជាគន្លឹះសម្រាប់ក្រុមហ៊ុនបច្ចេកវិទ្យាយក្សរបស់សហរដ្ឋអាមេរិក ដែលបានបង្ហាញសេរីទូរស័ព្ទអាយហ្វូនថ្មីរបស់ខ្លួនកាលពីថ្ងៃអង្គារ (១២ កញ្ញា)។ ភាគហ៊ុននៅក្នុងក្រុមហ៊ុន Apple និងអ្នកផ្គត់ផ្គង់របស់ខ្លួន ត្រូវបានប៉ះពាល់កាលពីសប្តាហ៍មុន បន្ទាប់ពីមានរបាយការណ៍ថា ទីភ្នាក់ងាររដ្ឋាភិបាល និងក្រុមហ៊ុនរដ្ឋរបស់ចិន បានហាមឃាត់បុគ្គលិកមិនឲ្យប្រើប្រាស់ទូរស័ព្ទអាយហ្វូន និងក្រុមហ៊ុន Huawei បានដាក់បង្ហាញស្មាតហ្វូនថ្មីជាមួយបន្ទះឈីបកម្រិតខ្ពស់ដែលត្រូវបានគេមើលឃើញថា ជាការខិតខំប្រឹងប្រែងរបស់ក្រុមហ៊ុនចិនមួយនេះសម្រាប់ការវិលត្រឡប់មកកាន់ទីផ្សារវិញផងដែរ។ជាមួយគ្នានេះដែរ ក្រសួងការបរទេសចិនបាននិយាយកាលពីថ្ងៃពុធ (១៣ កញ្ញា) ថា ទីក្រុងប៉េកាំងមិនបានចេញបម្រាមលើការបញ្ជាទិញ និងប្រើប្រាស់ម៉ាកទូរស័ព្ទបរទេសដូចជាក្រុមហ៊ុន Apple ទេ ប៉ុន្តែបានលើកឡើងថា ខ្លួនបានណែនាំឲ្យមានការផ្សាយពាណិជ្ជកម្មពីប្រព័ន្ធផ្សព្វផ្សាយ អំពីឧប្បត្តិហេតុសុវត្ថិភាពទាក់ទងនឹងទូរស័ព្ទរបស់ក្រុមហ៊ុន Apple តែប៉ុណ្ណោះ៕

ទីផ្សារនាំចេញស្វាយកែវរមៀតស្រស់ នឹងងើបឡើងល្អប្រសើរវិញនៅចុងឆ្នាំនេះ

ភ្នំពេញ៖ អ្នកនាំចេញស្វាយកម្ពុជា រំពឹងថា ទីផ្សារនាំចេញស្វាយកែវរមៀតស្រស់ទៅកាន់ប្រទេសចិន នឹងងើបល្អប្រសើរឡើងវិញ នៅចុងឆ្នាំនេះ ខណៈវិបត្តិជំងឺកូវីដ ១៩ នៅប្រទេសចិនមានស្ថានភាពល្អប្រសើរ និងស្របពេលក្រុមអ្នកសម្របស្រួលរបស់កម្ពុជា កំពុងខិតខំផ្សារភ្ជាប់រវាងអ្នកលក់ និងអ្នកទិញនៃប្រទេសទាំងពីរ។លោកស្រី ច្រាន់ ប៉ុន្នី ប្រធានក្រុមប្រឹក្សាភិបាលសមាគមកសិកម្មដំណាំស្វាយកម្ពុជា និងជាអ្នកនាំចេញស្វាយកែវរមៀតទៅកាន់ទីផ្សារចិន លើកឡើងក្នុងកិច្ចសម្ភាសជាមួយសារព័ត៌មាន ស្តីពីការដាំដុះ និងការនាំចេញស្វាយកែវរមៀតស្រស់របស់កម្ពុជា នៅថ្ងៃទី១៣ខែកញ្ញាឆ្នាំ២០២៣នេះថា ជុំវិញការនាំចេញស្វាយកែវរមៀតនេះ នៅក្នុងវិបត្តិនៃការរីករាលដាលជំងឺកូវីដ ១៩ ការនាំចេញស្វាយកែវ រមៀតស្រស់របស់កម្ពុជាទៅកាន់ទីផ្សារចិន បានធ្លាក់ចុះជាបន្តបន្ទាប់ ខណៈដែលចិនបានរឹតត្បិតចំពោះការធ្វើដំណើរ ទាំងការនាំចូលផលិតផល និងកសិផលទៅកាន់ប្រទេសរបស់ខ្លួនជាដើម ដែលបញ្ហានេះសម្រាប់កម្ពុជា បានធ្វើឲ្យកសិករបាក់ទឹកចិត្តក្នុងការដាំដុះ និងការថែទាំស្វាយរបស់ខ្លួនផងដែរ។ទាក់ទិនការនាំចេញស្វាយ, លោកស្រី បន្តថា កម្ពុជាមានក្រុមការងារសម្របសម្រួលទីផ្សារនាំចេញ បច្ចុប្បន្នបានកំពុងធ្វើការទំនាក់ទំនង ដើម្បីជំរុញការនាំចេញស្វាយទៅកាន់ទីផ្សារចិន ក្នុងនោះតាមរយៈនៃកិច្ចសហប្រតិបត្តិការនេះ និងស្របពេលវិបត្តិជំងឺកូវីដ ១៩ នៅប្រទេសចិន មានស្ថានភាពល្អប្រសើរឡើងវិញ ទាំងទីផ្សារ និងមនុស្សចរាចរណ៍ឡើងវិញជាធម្មតានោះ, លោកស្រីរំពឹងថា ទីផ្សារនាំចេញស្វាយកែវរមៀតស្រស់របស់កម្ពុជា ទៅកាន់ទីផ្សារប្រទេសចិន នឹងងើបល្អប្រសើរឡើងវិញចាប់ពីបំណាច់ចុងឆ្នាំ ២០២៣ នេះតទៅ។ ពាក់ព័ន្ធការនាំចេញស្វាយរបស់កម្ពុជានេះដែរ, ឧកញ៉ាបណ្ឌិត ឈិន កេន អ្នកសម្របសម្រួលទីផ្សារនាំចេញ និងជាតំណាង Alibaba នៅកម្ពុជា លើកឡើងថា ក្នុងនាមអ្នកសម្របស្រួលផ្សារភ្ជាប់រវាងអ្នកលក់ និងអ្នកទិញ ឧកញ៉ាបានខិតខំប្រឹងប្រែងយ៉ាងខ្លាំង ជាពិសេសការកៀគរស្វែងរកអ្នកទិញនៅប្រទេសចិន ដែលកំពុងរកស៊ីទទួលទាននៅក្នុងវិស័យកសិកម្មអាចផ្សារភ្ជាប់គ្នា ដើម្បីធ្វើយ៉ាងណាជួយជំរុញនាំចេញកសិផលរបស់កម្ពុជាទៅកាន់ទីផ្សារចិនឲ្យបានច្រើន ជាពិសេសស្វាយកែវរមៀតស្រស់ និងមៀនប៉ៃលិនជាដើម។ជុំវិញការនាំចេញស្វាយ, បើតាមរបាយការណ៍របស់អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ បានបង្ហាញឲ្យដឹងថា នៅក្នុងរយៈពេល ៨ ខែ ឆ្នាំ ២០២៣ នេះ កម្ពុជាបាននាំចេញកសិផល មានបរិមាណសរុបជាង ៥ លានតោន មានទំហំទឹកប្រាក់ប្រមាណជិត ៣ ពាន់លានដុល្លារអាមេរិក ក្នុងនោះសម្រាប់ការនាំចេញផ្លែស្វាយស្រស់ មានចំនួនជាង ៩៥ ពាន់តោន ថយចុះ ២១ ភាគរយ ខណៈការនាំចេញដំណាប់ស្វាយ មានជាង ១៩ ពាន់តោន កើនឡើង ៣៧ ភាគរយ៕អត្ថបទ៖ សុន រ៉ាឌី

តំបន់សេដ្ឋកិច្ចពិសេសកំពុងដំណើរការមានចំនួន២៤ ជាមួយនឹងទុនជាង៨ពាន់លានដុល្លារ

ភ្នំពេញ៖ ប្រទេសកម្ពុជាមានតំបន់សេដ្ឋកិច្ចពិសេសកំពុងដំណើរការចំនួន២៤ ដោយគិតចាប់តាំងពីឆ្នាំ ២០០៦ ដល់ដំណាច់ឆមាសទី ១ ឆ្នាំ ២០២៣ ជាមួយនឹងទុនវិនិយោគជាង៨ ពាន់លានដុល្លារ។ សកម្មភាពចម្បងនៃតំបន់សេដ្ឋកិច្ច ផ្តោតលើផលិតកម្ម នៃវិស័យកាត់ដេរសំលៀកបំពាក់ ស្បែកជើង សម្ភារធ្វើដំណើរ វិស័យគ្រឿងបង្គុំរថយន្ត គ្រឿងអេឡិចត្រូនិក រោងចក្រផលិតសម្បកកង់ ឧស្សាហកម្មដំឡើងរថយន្ត និងកង់។យោងតាមរបាយការណ៍ក្រុមប្រឹក្សាអភិវឌ្ឍន៍កម្ពុជា ក្នុងចំណោមតំបន់សេដ្ឋកិច្ចពិសេសទាំង ២៤ គឺមានរោងចក្រ/ក្រុមហ៊ុនដែលចុះបញ្ជីនៅក្នុងតំបន់សេដ្ឋកិច្ចពិសេសនោះរហូតដល់ ៦៥៥ គម្រោង ដែលស្មើទុនវិនិយោគប្រមាណ ៨,១ ពាន់លានដុល្លារ។ ការនាំចេញចាប់ពីឆ្នាំ ២០១១ រហូតដល់ខែមិថុនា ឆ្នាំ ២០២៣ មានប្រមាណ ២៥,៧ ពាន់លានដុល្លារ និងបង្កើតការងារបាន ១៧៤ ពាន់កន្លែង។ឯកឧត្តម ជា វុទ្ធី អគ្គលេខាធិការ CDC បានលើកឡើងក្នុងវេទិកាមួយកាលពីពេលថ្មីៗនេះថា ចាប់តាំងពីរដ្ឋាភិបាលកម្ពុជាផ្ដួចផ្ដើមឱ្យមានការតាក់តែងបទប្បញ្ញត្តិ និងច្បាប់ តាំងពីឆ្នាំ ២០០៥ មកគិតត្រឹមដំណាច់ខែមិថុនា ឆ្នាំ ២០២៣ កម្ពុជាមានតំបន់សេដ្ឋកិច្ចពិសេសកំពុងដំណើរការចំនួន ២៤។លោក បន្តថា តំបន់សេដ្ឋកិច្ចពិសេសបានដើរតួយ៉ាងសំខាន់ក្នុងការធ្វើពិពិធកម្មសេដ្ឋកិច្ចកម្ពុជា ការធ្វើពិពិធកម្មឧស្សាហកម្ម និងការធ្វើពិពិធកម្មប្រភពទុនវិនិយោគពីប្រទេសនានា។ វិស័យផលិតកម្មសំលៀកបំពាក់ ស្បែកជើង និងសម្ភារធ្វើដំណើរ មានប្រមាណជាង ៩០ ភាគរយដែលបានវិនិយោគក្នុងតំបន់សេដ្ឋកិច្ចពិសេស។របាយការណ៍របស់ធនាគារជាតិនៃកម្ពុជា បង្ហាញថា គិតត្រឹមចុងឆ្នាំ ២០២១ ការវិនិយោគផ្ទាល់បរទេសនៅកម្ពុជា មានទឹកប្រាក់សរុប ៤១ ពាន់លានដុល្លារ កើនឡើង ១១,២ ភាគរយបើធៀបឆ្នាំ ២០២០។ក្នុងនោះវិស័យហិរញ្ញវត្ថុ ៩,៤ ពាន់លានដុល្លារ ស្មើ ២២,៩ ភាគរយ, កម្មន្តសាល ៨,៥ ពាន់លានដុល្លារ ស្មើ ២០,៨ ភាគរយ, អចលនទ្រព្យ ៤,៩ ពាន់លានដុល្លារ ស្មើ ១២ ភាគរយ, សណ្ឋាគារ និងភោជនីយដ្ឋាន ៤,៤ ពាន់លានដុល្លារ ស្មើ ១០,៧ ភាគរយ, កសិកម្ម ៤,២ លានដុល្លារ ស្មើ ១០,៣ ភាគរយ, អគ្គិសនី ២,៦ ពាន់លានដុល្លារ ស្មើ ៦,២ ភាគរយ, សំណង់ ១,៦ ពាន់លានដុល្លារ ស្មើ ៤,១ ភាគរយ និងផ្នែកផ្សេងៗ ៥,៣ ពាន់លានដុល្លារ ស្មើនឹង ១៣ ភាគរយ៕អត្ថបទ៖ វណ្ណៈ

ក្រុមហ៊ុនចិន និងកម្ពុជា ចុះMOUវិនិយោគចិញ្ចឹមសត្វ និងដាំដំណាំលើផ្ទៃដីរាប់ពាន់ហិកតាក្នុងខេត្តពីរ

ភ្នំពេញ៖ ក្រុមហ៊ុន Danong Aricultural Development Group របស់ប្រទេសចិន បានចុះកិច្ចព្រមព្រៀង (MOU) ជាមួយក្រុមហ៊ុន និងដៃគូពាក់ព័ន្ធនានារបស់កម្ពុជា ដើម្បីធ្វើការវិនិយោគទៅលើវិស័យកសិ-ឧស្សាហកម្ម នៅក្នុងខេត្តចំនួន២ គឺខេត្តកំពត និងខេត្តកំពង់ធំ ។នៅក្នុងពិធីចុះហត្ថលេខាលើគម្រោងវិនិយោគលើវិស័យកសិកម្មនៅកម្ពុជា នៅថ្ងៃទី១២ ខែកញ្ញា នេះ លោក សៅ ស៊ូជី ប្រធានក្រុមហ៊ុនដាណុង ឌីវេឡុបមែន គ្រុប បានលើកឡើងថា សម្រាប់គម្រោងកសិ-ឧស្សាហកម្មបែបពាណិជ្ជកម្មទំនើបនេះ គឺដំណាក់កាលទី១ នៃគម្រោងនេះ នឹងបង្កើតជាតំបន់គំរូមួយ នៅលើផ្ទៃដីប្រហែលជាង១ម៉ឺនហិកតា ដែលក្នុងនោះមានការបង្កាត់ពូជពោត ការដាំស្មៅចំបើង ស្មៅប្រូតេ អ៊ីនខ្ពស់ មានការចិញ្ចឹមគោយកសាច់ រួមទាំងការសាងសង់រោងចក្រកែច្នៃ សម្រាប់ផលិតផលកសិកម្ម ។លោកបន្តថា សម្រាប់ទីផ្សារធំ នៃផលិតផល ដែលផលិតបាន គឺនៅប្រទេសចិន ខណៈនៅទីនោះ កំពុងមានតម្រូវការស្បៀងច្រើន ហើយការវិនិយោគនេះ ក៏នឹងបានជួយផងដែរដល់ពលរដ្ឋកម្ពុជា ក្នុងការទទួលបានប្រាក់ចំណូលពីគម្រោងនេះ ដែលគម្រោងទាំងអស់នេះ អាចនឹងបានអនុវត្តឆាប់រហ័ស ទៅតាមការកិច្ចសហការបន្ថែមពីរាជរដ្ឋាភិបាល និងដៃគូផ្សេងៗនៅកម្ពុជា ។ឯកឧត្តម ដួង ដារ៉ា រដ្ឋលេខាធិការទីស្ដីការគណៈរដ្ឋមន្ត្រី បានបញ្ជាក់ថា ការនិយោគលើវិស័យកសិកម្ម របស់ក្រុមហ៊ុន Danong នេះ បានបង្ហាញពីការយកចិត្តទុកដាក់ជួយជំរុញការរីកចម្រើន របស់កសិករ នៅក្នុងប្រទេសកម្ពុជា ។ឯកឧត្តម បានបន្តថា ការវិនិយោគនេះ ជាតម្រូវការចាំបាច់ផងដែររបស់ប្រទេសកម្ពុជា ក្នុងការអភិវឌ្ឍវិស័យកសិកម្មឲ្យមានភាពទូលំទូលាយ ដើម្បីកាត់បន្ថយភាពក្រីក្រ ជួយកសិករឲ្យមានការងារធ្វើ មានចំណូលខ្ពស់ នេះគឺជាគោលដៅរបស់រាជរដ្ឋាភិបាលកម្ពុជា ហើយបន្ទាប់ពីចុះកិច្ចព្រមព្រៀងនេះ ក្រុមហ៊ុន នឹងទៅជួបជាមួយក្រុមប្រឹក្សាអភិវឌ្ឍន៍កម្ពុជា (CDC) ដើម្បីធ្វើការចុះបញ្ជីវិនិយោគ ។គួរបញ្ជាក់ថា ក្រុមហ៊ុន Danong Development Group គ្រោងបោះទុន ប្រមាណ១២,៧ពាន់ ដុល្លារ ធ្វើការវិនិយោគលើវិស័យកសិ-ឧស្សាហកម្មបែបទំនើប លើផ្ទៃដីចំនួន៧៥ម៉ឺនហិកតា ក្នុងខេត្តបាត់ដំបង ពោធិ៍សាត់ សៀមរាប កំពង់ធំ និងខេត្តកំពត ៕ អត្ថបទ៖ បាន សុខរិទ្ធិ

បណ្តាញកសិករ នឹងបង្កើនការដាំដុះស្រូវអត្តសញ្ញាណខ្មែរ ដើម្បីជំរុញនាំចេញ

កណ្ដាល៖ ក្រោយពេលរដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទបានណែនាំឲ្យប្រជាកសិករនាំគ្នាធ្វើស្រូវសែនក្រអូប និងស្រូវផ្ការំដួលជាប្រភេទស្រូវប្រណិតសម្រាប់នាំចេញលក់នៅក្រៅប្រទេស នៅពេលបណ្តាញកសិករថា នឹងនាំគ្នាធ្វើការដាំដុះប្រភេទពូជស្រូវទាំងនេះ ដើម្បីជំរុញបង្កើនការនាំចេញលក់នៅទីផ្សារក្រៅប្រទេស និងបង្ហាញអត្តសញ្ញាណខ្មែរនៅលើឆាកអន្តរជាតិ។ប្រជាសហគមន៍កសិករ នៅខេត្តកណ្តាល បានថ្លែងប្រាប់ BTV នៅថ្ងៃទី១២ ខែកញ្ញានេះថា ដើម្បីជំរុញការនាំចេញ និងទទួលបានប្រាក់ចំនិញខ្ពស់ ពីការប្រកបរបរដំណាំ ពួកគេនឹងនាំគ្នាបង្កើនការដាំដុះស្រូវ សែនក្រអូប និងស្រូវផ្ការំដួលរបស់ខ្មែរបន្ថែមទៀត ខណៈប្រភេទពូជស្រូវទាំងនេះ ងាយស្រួលដាំដុះ មិនរើសដី និងអាកាសធាតុជាដើម។លោក ថែង សារឿន ប្រធានសមាគមន៍សម្ព័ន្ធ សហគមន៍កសិករកម្ពុជា CCFC បានថ្លែងថា សមាគមលោកមានពេញចិត្តជាខ្លាំងរាជរដ្ឋាភិបាលប្រកាសជំរុញឲ្យកសិករនាំដាំដុះពូជស្រូវអត្តសញ្ញាណខ្មែរ ស្រូវសែនក្រអូប និងស្រូវផ្ការំដួល ដោយសារស្រូវទាំងនេះជាប្រភេទស្រូវប្រណិត មានគុណភាពល្អ ក្លិនក្រអូប បាយឆ្ងាញ់ និងមានការលក់ដាច់បំផុតនៅលើទីផ្សារអន្តរជាតិ។ លោកក៏ណែនាំឲ្យប្រជាកសិករនាំគ្នាដាំដុះពូជស្រូវទាំងនេះ និងស្នើរាជរដ្ឋាភិបាលជួយផ្តល់ពូជស្រូវទាំងនេះ បែងចែកទៅដល់ប្រជាកសិករឲ្យបានច្រើន ដើម្បីឲ្យកសិករនាំគ្នាបង្កើនការដាំ។ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្មរុក្ខាប្រមាញ់ និងនេសាទ ថ្លែងថា បច្ចុប្បន្នក្រសួងកសិកម្មកំពុងផ្តល់ការលើកទឹកចិត្តឲ្យកសិករបង្កើនផលិតស្រូវសែនក្រអូប និងស្រូវផ្ការំដួល។ ក្រសួងក៏មានក្រុមហ៊ុនដៃគូសហការធំៗជាច្រើនដែលអ្នកធានាទទួលទិញស្រូវពីកសិករទាំងអស់គ្នា ទៅតាមកិច្ចសន្យា ដើម្បីរួមចំណែកជួយកាត់បន្ថយថ្លៃដើមផលិត និងសម្រេចគោលនយោបាយនៃការនាំចេញ។ឯកឧត្តម បញ្ជាក់ថា ក្រៅពីនេះក្រសួងកសិកម្ម ក៏ជំរុញឲ្យកសិករដាំដុះ ពូជស្រូវខ្មែរប្រភេទថ្មីដែលកំពុងសាកល្បងដាំដុះ គឺពូជស្រូវចំប៉ី ស ៧០ ដែលពូជនេះដាំឆាប់បានប្រមូលផល មានភាពស៊ាំខ្លាំងនឹងអាកាសធាតុ ចំណាយថ្លៃដើមតិចថែមទៀត៕អត្ថបទ ស៊ុម សុខជា

វៀតណាម និងហ្វីលីពីន នឹងចុះហត្ថលេខាលើកិច្ចព្រមព្រៀងអង្ករ ខណៈតម្លៃអង្ករពិភពលោកកើនឡើង

ក្រុមអាជ្ញាធរវៀតណាមបាននិយាយកាលពីថ្ងៃព្រហស្បតិ៍ (៧ កញ្ញា)ថា រដ្ឋាភិបាលនៃប្រទេសវៀតណាម និងហ្វីលីពីន នឹងចុះហត្ថលេខាលើកិច្ចព្រមព្រៀងពាណិជ្ជកម្មអង្ករក្នុងពេលឆាប់ៗនេះ ដើម្បីធានាសន្តិសុខស្បៀង។ កិច្ចព្រមព្រៀងនេះ កើតឡើងស្របពេលតម្លៃអង្ករកំពុងកើនឡើងក្នុងប្រទេសហ្វីលីពីន ដែលជំរុញអតិផរណានៅក្នុងប្រទេស ខណៈតម្លៃប្រេងឥន្ធនៈឡើងថ្លៃ ទោះបីជារដ្ឋាភិបាលនិយាយថាការផ្គត់ផ្គង់គ្រាប់ធញ្ញជាតិក្នុងស្រុកមានច្រើនហើយក៏ដោយ។ព័ត៌មានស្តីពីកិច្ចព្រមព្រៀងនេះ បានកើតឡើងនៅក្នុងសេចក្តីថ្លែងការណ៍មួយ ដែលបានចេញផ្សាយបន្ទាប់ពីនាយករដ្ឋមន្រ្តីវៀតណាម លោក Pham Minh Chinh( ផាម មិញ ជិញ) និងប្រធានាធិបតីហ្វីលីពីន លោក Ferdinand Marcos Jr. បានជួបគ្នានៅក្រៅវេទិកាកិច្ចប្រជុំកំពូលអាស៊ាននៅប្រទេសឥណ្ឌូនេស៊ី ប៉ុន្តែពុំមានព័ត៌មានលម្អិតបន្ថែមទៀតនោះទេ។វៀតណាម ធ្លាប់ជាប្រទេសនាំចេញអង្ករធំជាងគេទី៣ របស់ពិភពលោកកាលពីឆ្នាំមុនបន្ទាប់ពីឥណ្ឌា និងថៃ ហើយហ្វីលីពីនគឺជាអ្នកទិញធំបំផុតរបស់ប្រទេសនេះ ដោយបំពេញតម្រូវការនាំចូលជិត៩០% របស់ខ្លួន។ លោក Marcos ដែលជាលេខាធិការកសិកម្មហ្វីលីពីនផងដែរនោះ បានស្វាគមន៍ការផ្តល់ជូនរបស់ប្រទេសជិតខាងមួយនេះ នៃកិច្ចព្រមព្រៀងផ្គត់ផ្គង់រយៈពេលប្រាំឆ្នាំ។តម្លៃអង្ករពិភពលោកបានកើនឡើងដល់កម្រិតខ្ពស់ក្នុងរយៈពេល១៥ឆ្នាំ បន្ទាប់ពីប្រទេសឥណ្ឌាដែលមានពាណិជ្ជកម្មអង្ករច្រើនជាង៤០% របស់ពិភពលោក បានបញ្ជាឱ្យផ្អាកចំពោះប្រភេទនៃការនាំចេញដ៏ធំបំផុតរបស់ខ្លួនកាលពីខែកក្កដា ក្នុងគោលបំណងធ្វើឱ្យតម្លៃអង្ករក្នុងស្រុកធ្លាក់ចុះ៕

ពិព័រណ៍ចិន-អាស៊ាននៅប្រទេសចិន ផ្តល់ឱកាសឱ្យកម្ពុជាផ្សព្វផ្សាយផលិតផល និងទាក់ទាញវិនិយោគ

ភ្នំពេញ៖ ការចូលរួមក្នុងពិព័រណ៍ចិន-អាស៊ាន លើកទី២០ (CAEXPO ) នៅប្រទេសចិន បានផ្តល់ឱកាសឱ្យកម្ពុជា ផ្សព្វផ្សាយពីផលិតផលសក្តានុពលរបស់កម្ពុជា ទីកាន់ទីផ្សារប្រទេសចិន ក៏ដូចបណ្តាប្រទេសផ្សេងទៀត ដែលចូលរួមនិងទាក់ទាញវិនិយោគពីបរទេសចូលមកកម្ពុជា។ពិព័រណ៍ចិន-អាស៊ាន លើកទី២០ “The 20th China-ASEAN Expo” នឹងប្រព្រឹត្ត ទៅចាប់ពីថ្ងៃទី១៦-២០ ខែកញ្ញា ឆ្នាំ២០២៣ នៅមជ្ឈមណ្ឌលសន្និសីទ និងពិព័រណ៍អន្តរជាតិ នាទីក្រុងណាននីង តំបន់ស្វយ័តក្វាងស៊ី សាធារណរដ្ឋប្រជាមានិតចិន។លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា លើកឡើងថា ពិព័រណ៌អាស៊ាន ចិន គឺសំខាន់ណាស់ សម្រាប់ប្រទេសក្នុងតំបន់អាស៊ាន ជាពិសេសប្រទេសកម្ពុជា ដែលនាំយកផលិតផលថ្មីៗ ក៏ដូចជាផលិតកសិកម្មរកទីផ្សារនៅប្រទេសចិន។ លោកឧកញ៉ា បន្តថា៖ “ទន្ទឹមកម្ពុជាមានFTA ជាមួយចិន និងកិច្ចព្រមព្រៀង RCEP ពិព័រណ៍ចិន-អាស៊ាន លើកទី២០ នឹងជំរុញបន្ថែមកិច្ចសហប្រតិបត្តិការសេដ្ឋកិច្ច ជំរុញការដោះដូរទំនិញ និងទាក់ទាញវិនិយោគរវាងកម្ពុជាតំបន់អាស៊ាន និងចិន”។សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នឹងដឹកនាំគណប្រតិភូកម្ពុជា អញ្ជើញចូលរួមពិព័រណ៍ចិន-អាស៊ាន លើកទី២០ (CAEXPO ) នៅប្រទេសចិននាពាក់កណ្តាលខែកញ្ញានេះ។ពិព័រណ៍ចិន-អាស៊ាន ជាវេទិកានៃការផ្លាស់ប្តូរពាណិជ្ជកម្ម និងវិនិយោគដ៏សំខាន់រវាងបណ្តាប្រទេសជាសមាជិក អាស៊ាន និងប្រទេសចិន។គណៈកម្មការរៀបចំពិព័រណ៍បានអញ្ជើញប្រទេសជាសមាជិកអាស៊ានទាំងអស់រួមទាំងកម្ពុជា រៀបចំដឹកនាំប្រតិភូពាណិជ្ជកម្មដែលមានរួមមានអ្នកតាំងពិព័រណ៍ អ្នកទស្សនាពិព័រណ៍ដើម្បីជួបដៃគូពាណិជ្ជកម្ម ទៅចូលរួមដោយផ្ទាល់ និងចូលរួមក្នុងកម្មវិធីសំខាន់ៗ ដូចជា វេទិធុរកិច្ច វិនិយោគ និងទេសចរណ៍កម្ពុជា-ចិន វេទិកាធុរកិច្ចនិងវិនិយោគ ចិន-អាស៊ានជាដើម ៕ អត្ថបទ៖ វណ្ណៈ

អគ្គនាយកពន្ធដារ អំពាវនាវដល់ប្រជាពលរដ្ឋបង់ពន្ធលើមធ្យោបាយដឹកជញ្ជូន

ភ្នំពេញ៖ អគ្គនាយកនៃអគ្គនាយកដ្ឋានពន្ធដារ អំពាវនាវដល់ប្រជាពលរដ្ឋដែលប្រើប្រាស់យានយន្តគ្រប់ប្រភេទ អញ្ជើញទៅបង់ពន្ធលើមធ្យោបាយដឹកជញ្ជូនឲ្យបានរួសរាន់ ដោយសូមកុំចាំដល់ចុងខែដែលត្រូវបិទបញ្ចប់ ដែលនាំឲ្យខកខាន ឬការកកស្ទះដោយប្រការណាមួយមិនបានបង់ពន្ធ។ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្រ្តី និងទទួលបន្ទុកជាអគ្គនាយកនៃអគ្គនាយកដ្ឋានពន្ធដារ លើកឡើងក្នុងក្នុងវេទិកាស្តីពីពន្ធដារ (Tax Forum 2023) រៀបចំដោយអគ្គនាយកដ្ឋានពន្ធដារ សហការជាមួយសភាពាណិជ្ជកម្មម៉ាឡេស៊ី នៅថ្ងៃទី ៦ខែកញ្ញាឆ្នាំ ២០២៣ នេះថា អគ្គនាយកដ្ឋានពន្ធដារ បានបង្កើត App មួយដែលមានឈ្មោះថា កម្មវិធីគណនាពន្ធមធ្យោបាយ សម្រាប់ការបង់ពន្ធលើមធ្យោបាយដឹកជញ្ជូន និងយានយន្តគ្រប់ប្រភេទ នឹងមានសេវាដឹកជញ្ជូនសាលកបត្រទៅដល់គេហដ្ឋានរបស់អស់លោកអ្នកផងដែរ។ App នេះ គឺបានផ្តល់នូវភាពងាយស្រួលដល់បងប្អូនប្រជាពលរដ្ឋ ក្នុងការបង់ពន្ធលើយានយន្តរបស់ខ្លួន ដោយមិនចំណាយពេលវេលាធ្វើដំណើរទៅទិញសាលកបត្រនោះឡើយ។ឯកឧត្តម បានបញ្ជាក់ឲ្យដឹងថា គិតមកដល់ពេលនេះ ការបង់ពន្ធលើមធ្យោបាយដឹកជញ្ជូន ទើបអនុវត្តបានជិត ៥០ ភាគរយប៉ុណ្ណោះ ដោយនៅមានចំនួនច្រើនទៀត។ បងប្អូនប្រជាពលរដ្ឋដែលប្រើប្រាស់យានយន្ត សូមអញ្ជើញមកបង់ពន្ធលើមធ្យោបាយដឹកជញ្ជូនឲ្យបានរួសរាន់ឲ្យបានមុនកាលកំណត់ នៅតាមសាខាពន្ធដារ ឬនៅតាមធនាគារជាដៃគូរក្តី ដែលការបង់ពន្ធនឹងត្រូវបញ្ចប់នៅចុងខែ វិច្ឆិកាខាងមុខ។សូមបញ្ជាក់ថា ជុំវិញការបង់ពន្ធលើមធ្យោបាយដឹកជញ្ជូន នៅក្នុងឆ្នាំ ២០២២ កន្លងមកនេះ អគ្គនាយកដ្ឋានពន្ធដារ អនុវត្តការប្រមូលចំណូលពន្ធលើមធ្យោបាយដឹកជញ្ជូន និងយានយន្តគ្រប់ប្រភេទ បានចំនួនជាង ៨៨ ម៉ឺនគ្រឿង សរុបជាថវិកាមានចំនួនជាង ៤២២ ប៊ីលានរៀល ត្រូវប្រមាណជាង ១០៥ លានដុល្លារ ស្មើជាង ១៣០ ភាគរយនៃផែនការប្រចាំឆ្នាំ ៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

មនុស្ស ៨នាក់ បានស្លាប់នៅក្នុងហេតុការណ៍ផ្ទុះរោងចក្រនៅភាគខាងជើងប្រទេសចិន

កងកម្លាំងចិន ធ្វើការល្បាតផ្លូវទឹកនិងផ្លូវអាកាស ជុំវិញសមុទ្រចិនខាងត្បូងដែលមានជម្លោះ

ជនបរទេស ៦២៥ នាក់ទៀត ត្រូវបានបណ្ដេញចេញពីកម្ពុជា ពាកព័ន្ធករណីឆបោកតាមប្រព័ន្ធបច្ចេកវិទ្យា

នាយករដ្ឋមន្រ្តីអ៊ីស្រាអែល គ្រោងទៅអាមេរិកជួបលោក Trump នាសប្ដាហ៍ក្រោយ ដើម្បីពិភាក្សាពីបញ្ហាអ៊ីរ៉ង់

អាជ្ញាធរចក្រភពអង់គ្លេស ចេញការព្រមានអំពីគ្រោះទឹកជំនន់ ខណៈនឹងមានភ្លៀងធ្លាក់ខ្លាំងបន្ថែមទៀត

លោក Trump ចង់រៀបចំកិច្ចប្រជុំលើកដំបូងនៃក្រុមប្រឹក្សាសន្តិភាព នៅទីក្រុងវ៉ាស៊ីនតោន ក្នុងខែនេះ

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញជាអធិបតី ក្នុងពិធីបើកដំណើរការគម្រោងវះកាត់បេះដូងកុមារ

ខ្មែរជួយខ្មែរ! ក្រសួងការងារ បន្តពាំនាំឱកាសការងារជាង៣ពាន់កន្លែង ជូនដល់ដៃពលរដ្ឋ នៅមូលដ្ឋានខេត្តបាត់ដំបង

កូរ៉េខាងជើង នឹងកោះប្រជុំសមាជលើកទី៩ ដ៏ធំនៅចុងខែកុម្ភៈនេះ ដើម្បីកំណត់គោលនយោបាយសំខាន់ៗ

ព្រិលធ្លាក់ដ៏កម្រនៅពាសពេញប្រទេសជប៉ុន ក្នុងថ្ងៃបោះឆ្នោត បានបង្កការលំបាកដល់អ្នកទៅបោះឆ្នោត

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877