BTV NEWS

អ្នកតាមដានព្រឹត្តិការណ៍សង្គម និងប្រជាពលរដ្ឋ កោតសរសើររាជរដ្ឋាភិបាលក្នុងការបោសសំអាតការឆបោកតាមអនឡាញ

កម្ពុជាសហការជាមួយបណ្តាប្រទេសជាដៃគូរបង្ក្រាបករណីដឹកជញ្ជូនគ្រឿងញៀនឆ្លងដែនក្នុងឆ្នាំ២០២៥ ទទួលបានលទ្ធផលល្អ

នៅឆ្នាំ២០២៥ មន្ទីរប្រឆាំងបទល្មើសគ្រឿងញៀនបង្ក្រាបបទល្មើសគ្រឿងញៀនជាង ៩ពាន់ករណី ឃាត់ខ្លួនជនសង្ស័យជាង ២ម៉ឺននាក់ និងចាប់យកសារធាតុញៀនជាង ៧តោន

រដ្ឋបាលរាជធានីភ្នំពេញ បង្ក្រាបទីតាំងហ្គេមអនឡាញខុសច្បាប់ក្នុងខណ្ឌចំការមនឃាត់ខ្លួនជនជាតិឥណ្ឌូណេស៊ី ២៤នាក់

សន្តិសុខ និង សង្គម

លោក Netanyahu និយាយថា អ៊ីស្រាអែលនឹងបន្តផែនការវាយប្រហារទីក្រុង Rafah

នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយកាលពីថ្ងៃអាទិត្យថា លោក នឹងបន្តយុទ្ធនាការយោធាប្រឆាំងក្រុមហាម៉ាសនៅតំបន់ហ្កាហ្សា ជាកន្លែងដែលទីភ្នាក់ងារជំនួយនិយាយថា គ្រោះទុរ្ភិក្ស ជិតចូលមកដល់ ខណៈកិច្ចចរចាបទឈប់បាញ់ ត្រូវបានកំណត់បន្តឡើងវិញ។ លោក Netanyahu បាននិយាយទៅកាន់កិច្ចប្រជុំគណៈរដ្ឋមន្ត្រីថា អ៊ីស្រាអែលនឹងរុលចូលទៅក្នុងទីក្រុង Rafah ជាកន្លែងសុវត្ថិភាពចុងក្រោយនៅក្នុងតំបន់ហ៊ុមព័ទ្ធហ្កាហ្សាដែលមានមនុស្សច្រើន និងតូចចង្អៀត បន្ទាប់ពីសង្រ្គាមរយៈពេលជាងប្រាំខែ ទោះបីជាមានសម្ពាធពីអន្តរជាតិឲ្យអ៊ីស្រាអែល បញ្ចៀសការស្លាប់ និងរងរបួស ជនស៊ីវិល ក៏ដោយ។ លោកបាននិយាយបន្ទាប់ពីជំនួបជាមួយអធិការបតីអាល្លឺម៉ង់ លោក Olaf Scholz នៅទីក្រុងហ្សេរុយសាឡឹម ថា អ៊ីស្រាអែលនឹងមិនទុកឲ្យជនស៊ីវិលនៅជាប់ក្នុងទីក្រុង Rafah ឡើយ នៅពេលដែលកងកម្លាំងរបស់ខ្លួនចាប់ផ្តើមការវាយលុក។ សម្ព័ន្ធមិត្តរបស់អ៊ីស្រាអែល បានដាក់សម្ពាធលើលោក Netanyahu មិនឱ្យវាយប្រហារទីក្រុង Rafah ជាកន្លែងដែលប្រជាជនជាងមួយលាននាក់ភៀសខ្លួនពីផ្នែកផ្សេងៗនៃតំបន់ដែលត្រូវបានបំផ្លិចបំផ្លាញបានស្វែងរកទីជម្រក ដោយគ្មានផែនការការពារជនស៊ីវិល។ នៅទីក្រុងវ៉ាស៊ីនតោន ក្នុងព្រឹត្តិការណ៍ St Patrick's Day នៅសេតវិមាន ជាមួយនាយករដ្ឋមន្ត្រីប្រទេសអៀរឡង់ លោកលីអូ វ៉ារ៉ាដកា(Leo Varadkar) ប្រធានាធិបតីសហរដ្ឋអាមេរិក លោក Joe Biden បានបញ្ជាក់លើតម្រូវការក្នុងការបង្កើនជំនួយមនុស្សធម៌ដល់តំបន់ហ្កាហ្សា និងការឈានដល់កិច្ចព្រមព្រៀងបទឈប់បាញ់ ដែលនាំយកចំណាប់ថ្នូរត្រឡប់មកផ្ទះវិញ។ លោក Biden និយាយថា ការចំណាត់ការឆ្ពោះទៅរកដំណោះស្រាយរដ្ឋពីរ គឺជា មធ្យោបាយតែមួយគត់សម្រាប់សន្តិភាព និងសន្តិសុខយូរអង្វែង។ លោក Varadkar បាននិយាយថា ប្រជាជននៅតំបន់ហ្កាហ្សា ត្រូវការអាហារ ថ្នាំពេទ្យ និងទីជម្រកយ៉ាងខ្លាំង។ លោកបាននិយាយថា ជាពិសេស ពួកគេត្រូវការឲ្យការទម្លាក់គ្រាប់បែកត្រូវបញ្ឈប់។ នេះត្រូវតែបញ្ឈប់ទាំងសងខាង ចំណាប់ថ្នូរត្រូវនាំយកមកលំនៅឋានវិញ ហើយការផ្តល់ជំនួយមនុស្សធម៌ត្រូវបានអនុញ្ញាត។ អ៊ីស្រាអែលត្រូវតែផ្លាស់ប្តូរវិញការសម្រេចចិត្ត ដ៏គួឲ្យព្រួយបារម្ភ ក្នុងការអនុញ្ញាតឱ្យមានការវាយលុកជើងគោកចូលទៅក្នុងទីក្រុង Rafah ។

អ្នកទេសចរអស់សង្ឃឹមនៅហៃទី ដែលហែកហួរដោយអំពើហិង្សា ខណៈជើងហោះហើរត្រូវបានលុបចោល

ជម្លោះប្រដាប់អាវុធដែលកំពុងផ្ទុះឡើងកាន់តែខ្លាំងនៅក្នុងប្រទេសហៃទី រវាងក្រុមឧក្រិដ្ឋជន និងកងកម្លាំងសន្តិសុខជាតិ បានបំផ្លិចបំផ្លាញរដ្ឋធានីព័រ- អូ-ប្រាំង (Port-au-Prince) របស់ប្រទេសនេះ ក្នុងកុបកម្ម ហើយបានធ្វើឱ្យអ្នកទេសចរ និងអ្នកស្រុកដែលជាប់គាំងស្ថិតក្នុងភាពអស់សង្ឃឹម។ មនុស្សជាច្រើនកំពុងព្យាយាមចាកចេញពីប្រទេសហែកហួរដោយអំពើហិង្សា ដែលក្រុមជនអន្ធពាលប្រឆាំងរដ្ឋាភិបាលបានបិទអាកាសយានដ្ឋានអន្តរជាតិខេបហៃធាន(Cap-Haitien) រួចហើយ។ក្នុងចំណោមពួកគេមានលោកអេលី ម៉ុនដេឡាស់ (Elie Mondelus) ដែលបានមកប្រទេសហៃទីដើម្បីរៀបការ ប៉ុន្តែបានជាប់គាំងនៅក្នុងប្រទេសនេះ ដោយសារតែជើងហោះហើរត្រូវបានគេលុបចោល។លោកបាននិយាយថា ខ្ញុំមករៀបការ ខ្ញុំស្នាក់នៅសណ្ឋាគារ។ ប៉ុន្តែខ្ញុំមិនមានថវិកាច្រើនដើម្បីស្នាក់នៅរយៈពេលយូរនោះទេ។ ថវិការបស់ខ្ញុំផ្តោតលើអាពាហ៍ពិពាហ៍របស់ខ្ញុំ បន្ទាប់មកខ្ញុំត្រូវត្រលប់ទៅធ្វើការវិញ ។លោក Mondelus បានបន្ថែមថា មុខតំណែងរបស់លោកនៅរដ្ឋផ្លរីដា សហរដ្ឋអាមេរិក គឺស្ថិតក្នុងហានិភ័យ ខណៈដែលនិយោជករបស់លោកគំរាមបណ្តេញលោកចេញ បើខកខានក្នុងការត្រឡប់ទៅវិញភ្លាមៗ។ក្រុមប្រដាប់អាវុធបានបង្អាក់ការផ្គត់ផ្គង់ឥន្ធនៈ រារាំងរថយន្តដឹកប្រេងមិនឱ្យចូលទៅក្នុងស្ថានីយប្រេងឥន្ធនៈ វ៉ារ៉េស(Varreux) ដ៏សំខាន់ និងទុកចោលស្ថានីយ៍ប្រេងឥន្ធនៈ។ វិបត្តិប្រេងឥន្ធនៈបានបណ្តាលឱ្យមានការកើនឡើងគួរឱ្យកត់សម្គាល់លើថ្លៃដឹកជញ្ជូនដែលដាក់បន្ទុកកាន់តែខ្លាំងលើជីវិតប្រចាំថ្ងៃរបស់ប្រជាពលរដ្ឋសាមញ្ញ។ រដ្ឋាភិបាលហៃទី នៅថ្ងៃចន្ទនេះ បានបន្ថែមពេលវេលាសម្រាប់បម្រាមគោរចរណ៍ដល់ថ្ងៃទី២០ខែមីនា។រដ្ឋបាលហៃទី បាននិយាយថា បម្រាមគោចរណ៍នេះចូលជាធរមានចាប់ពីម៉ោង៧ យប់ដល់ម៉ោង៥ព្រឹករាល់ថ្ងៃ៕

កសិករប្រទេសអេស្បាញ តវ៉ានៅទីក្រុងម៉ាឌ្រីដ ប្រឆាំងនឹងសម្ពាធជាច្រើន

ក្បួនត្រាក់ទ័រ បានបើកឆ្លងកាត់រដ្ឋធានីប្រទេសអេស្ប៉ាញ កាលពីថ្ងៃអាទិត្យ អមដោយកសិករថ្មើរជើង ដើម្បីតវ៉ាប្រឆាំងទៅនឹងសម្ពាធជាច្រើន ដែលពួកគេនិយាយថាតម្លៃកសិផលមានតម្លៃថោក ការនាំចូលមានតម្លៃទាប ដែលកាត់បន្ថយផលិតផលក្នុងស្រុក ហើយមានច្បាប់បរិស្ថានរបស់សហភាពអឺរ៉ុប តឹងរឹង។កសិករចូលនិវត្តន៍អាយុ ៦៦ឆ្នាំ លោក អាទូរ៉ូ សានឌីន (Arturo Sandin) ដែលបានឈប់ធ្វើការនៅក្នុងឆ្នាំ ២០២២ ហើយបានផ្តល់ការងារបន្តទៅកូនៗរបស់លោក បាននិយាយថា វិស័យកសិកម្មស្ថិតក្នុងស្ថានភាពស្មុគស្មាញ។លោកស្រី អាជេតដា ម៉ុនតុន អាហ្គីឡា(Ageda Monton Aguilar) បាននិយាយថាកូនៗ របស់គាត់ប្រហែលជាមិនចង់កាន់កាប់មុខរបរនេះទេ នៅពេលដែលប្តីរបស់លោកស្រីចូលនិវត្តន៍ព្រោះ កូនៗមិនចង់រស់នៅក្នុងស្ថានភាពបែបនេះទេ។ការទាមទាររបស់កសិករ ក៏រួមបញ្ចូលផងដែរនូវការបញ្ចប់កិច្ចព្រមព្រៀងពាណិជ្ជកម្មសេរី ដែលក្រុមកសិករ និយាយថាបាននាំឱ្យមានការនាំចូលមានតម្លៃថោក ពីប្រទេសនានាដែលអ្នកផលិតប្រឈម នឹងស្តង់ដារបរិស្ថានតឹងរ៉ឹង។

លោកស្រី von der Leyen៖ តំបន់ហ្កាហ្សាកំពុងប្រឈមគ្រោះទុរ្ភិក្ស ដែលត្រូវការបទឈប់បាញ់ឲ្យបានឆាប់

ប្រធានគណៈកម្មការអឺរ៉ុប លោកស្រី Ursula von der Leyen បាននិយាយកាលពីថ្ងៃអាទិត្យថា តំបន់ហ្កាហ្សា កំពុងប្រឈមគ្រោះទុរ្ភិក្ស ហើយត្រូវតែមានកិច្ចព្រមព្រៀងឈប់បាញ់ឲ្យបានឆាប់រហ័ស នៅក្នុងសង្គ្រាមរវាងអ៊ីស្រាអែល និងក្រុមហាម៉ាស។ លោកស្រី von der Leyen បាននិយាយទៅកាន់អ្នកសារព័ត៌មាននៅក្នុងទីក្រុងគែរ បន្ទាប់ពីការចុះហត្ថលេខាលើកិច្ចព្រព្រៀងភាពជាដៃគូយុទ្ធសាស្ត្រ ជាមួយប្រធានាធិបតីអេហ្ស៊ីប លោក Abdel Fattah al-Sisi ថា តំបន់ហ្កាហ្សាកំពុងប្រឈមគ្រោះទុរ្ភិក្ស ហើយយើងពុំអាចទទួលយករឿងនេះបានទេ។ លោក Sisi និយាយថា មេដឹកនាំអេហ្ស៊ីប និងសហភាពអឺរ៉ុប បានព្រមព្រៀង បដិសេធប្រតិបត្តិការយោធារបស់អ៊ីស្រាអែល នៅទីក្រុង Rafah។ការអត្ថាធិប្បាយរបស់ភាគីទាំងពីរ ធ្វើឡើងបន្ទាប់ពីការប្រកាសកញ្ចប់ថវិកាចំនួន ៧,៤ ពាន់លានអឺរ៉ូ (៨,១ ពាន់លានដុល្លារ) ពីសហភាពអឺរ៉ុប សម្រាប់ប្រទេសអេហ្ស៊ីប ព្រមទាំងការធ្វើឱ្យប្រសើរឡើងនូវទំនាក់ទំនងជាមួយប្រទេសអាហ្វ្រិកខាងជើង ជាផ្នែកមួយនៃការជំរុញ ដែលត្រូវបានរិះគន់ដោយក្រុមសិទ្ធិមនុស្ស ដើម្បីទប់ស្កាត់លំហូរជនអន្តោប្រវេសន៍ទៅកាន់អឺរ៉ុប។ រថក្រោះយោធា និងរថពាសដែក (APC) អាចត្រូវបានគេមើលឃើញពីភាគខាងត្បូងប្រទេសអ៊ីស្រាអែល ដែលបើកបរនៅជិតព្រំដែនជាមួយតំបន់ហ្កាហ្សា កាលពីថ្ងៃអាទិត្យ។ ដោយឆ្លងកាត់ព្រំដែន ប្រជាជននៅតំបន់ហ្កាហ្សា បានដើរចន្លោះអគារនានាដែលត្រូវបានបំផ្លាញ ខណៈផ្សែងហុយចេញពីគំនរបាក់បែកនៅក្នុងតំបន់ហ៊ុមព័ទ្ធដែលប្រយុទ្ធគ្នា។ អាជ្ញាធរសុខាភិបាលនៅតំបន់ហ្កាហ្សារបស់ក្រុមហាម៉ាស បាននិយាយថា យុទ្ធនាការតាមអាកាសនិងជើងគោកនៅតំបន់ហ្កាហ្សា បានសម្លាប់មនុស្សជាង ៣១.៦០០នាក់ និងបានជំរុញឲ្យប្រជាជនភាគច្រើនភៀសខ្លួនចេញពីលំនៅឋានរបស់ពួកគេ ហើយនាំពួកគេឲ្យឈានទៅដល់មាត់ជ្រោះនៃគ្រោះទុរ្ភិក្ស។

ក្រុមមន្ត្រី៖ រុស្ស៊ីធ្វើឲ្យខូចទំនាក់ទំនងនៃសម្ព័ន្ធមិត្តអាហ្វ្រិកខាងលិចដ៏សំខាន់ជាមួយអាមេរិក

ដៃគូសំខាន់របស់អាមេរិកនៅអាហ្វ្រិកភាគពាយព្យ កំពុងងាកទៅរករុស្ស៊ី ចំពេលមានការព្រមានពីមេបញ្ជាការកំពូលអាមេរិកប្រចាំទ្វីបថា ជនជាតិរុស្ស៊ី កំពុងព្យាយាម «កាន់កាប់» តំបន់សាហែល (Sahel) ទាំងមូលនៃទ្វីបអាហ្វ្រិក។ប្រទេសនីហ្សេដែលបានបម្រើការជាមូលដ្ឋានដ៏សំខាន់សម្រាប់ប្រតិបត្តិការប្រឆាំងភេរវកម្មរបស់សហរដ្ឋអាមេរិក នៅក្នុងតំបន់អស់រយៈពេលជិតមួយទសវត្សរ៍នោះ បានប្រកាសកាលពីថ្ងៃសៅរ៍ថា ខ្លួនកំពុងបញ្ចប់កិច្ចព្រមព្រៀង ដែលបានអនុញ្ញាតឲ្យបុគ្គលិកយោធា និងបុគ្គលិកស៊ីវិលរបស់សហរដ្ឋអាមេរិក ធ្វើប្រតិបត្តិការ នៅក្នុងប្រទេស ចាប់តាំងពីឆ្នាំ ២០១៤។សេចក្តីប្រកាសនេះ បានធ្វើឡើងប៉ុន្មានថ្ងៃ បន្ទាប់ពីកិច្ចប្រជុំដ៏តានតឹងមួយរវាងរបបយោធានីហ្សេដែលបានដណ្ដើមអំណាចក្នុងរដ្ឋប្រហារខែកក្កដា ឆ្នាំ២០២៣ និងមន្ត្រីការទូត និងយោធារបស់សហរដ្ឋអាមេរិក រួមទាំងឧត្តមសេនីយ៍ Michael Langley មេបញ្ជាការនៃទីបញ្ជាការអាហ្វ្រិកអាមេរិក និងលោកស្រី Celeste Wallander ឧបការីរដ្ឋមន្ត្រីការពារជាតិសម្រាប់មន្ត្រីការពារជាតិ បានប្រាប់សារព័ត៌មាន CNN អំពីកិច្ចការសន្តិសុខអន្តរជាតិ។ ក្រុមមន្ត្រី បាននិយាយថា នៅក្នុងកិច្ចប្រជុំនោះ គណៈប្រតិភូអាមេរិក បានសម្តែងការព្រួយបារម្ភអំពីការកើនឡើងនៃវត្តមានយោធារុស្ស៊ី នៅក្នុងប្រទេសនីហ្សេ និងជាពិសេសអំពីអនាគតនៃមូលដ្ឋានទ័ពអាកាស ១០១ នៅក្នុងរដ្ឋធានីរបស់នីហ្សេ និងថាតើមូលដ្ឋានទ័ពនេះ នឹងត្រូវប្រគល់ឲ្យរុស្ស៊ីដែរឬទេ។ការពិភាក្សានេះ បានធ្វើឲ្យមេដឹកនាំរបបយោធាខឹងសម្បា ដែលមានអារម្មណ៍ថា ពួកគេកំពុងត្រូវបានស្តីបន្ទោស បើទោះបីជាសហរដ្ឋអាមេរិក បានកាត់ផ្តាច់ជំនួយផ្នែកយោធា និងជំនួយបរទេសជាច្រើនរបស់ខ្លួនដល់ប្រទេសនីហ្សេ កាលពីចុងឆ្នាំមុន បន្ទាប់ពីរដ្ឋប្រហារក៏ដោយ។

មនុស្ស៣នាក់ស្លាប់ក្នុងចំហេះព្រៃនៅភាគនិរតីរបស់ប្រទេសចិន

មន្ត្រីក្នុងតំបន់បីនាក់បានស្លាប់ ខណៈដឹកនាំកិច្ចខិតខំប្រឹងប្រែងពន្លត់ចំហេះព្រៃមួយដែលបានចាប់ផ្ដើមឆេះរាលដាលកាលពីថ្ងៃសុក្រ និងថ្ងៃសៅរ៍នៅក្នុងខេត្តស៊ីឈួន(Sichuan)និងយ៉ុនណាន( Yunnan) ភាគនិរតីប្រទេសចិន។យោងតាមរដ្ឋបាលអគ្គិភ័យ និងសង្គ្រោះ អគ្គិភ័យនេះស្ថិតក្នុងចំណោមភ្លើងឆេះព្រៃដែលបានកើតឡើងនៅកន្លែងជាច្រើននៅទូទាំងប្រទេសចិនចាប់តាំងពីខែមុនមក។ និទាឃៈរដូវគឺជារដូវកាលងាយបង្កឲ្យមានភ្លើងឆេះព្រៃ ដោយសារខ្យល់បក់ខ្លាំង និងស្ងួត។យោងតាមរដ្ឋាភិបាលក្នុងតំបន់បានឱ្យដឹងថា មន្ត្រីទាំងបីនាក់បានស្លាប់ នៅពេលមានអគ្គិភ័យដែលបានចាប់ផ្តើមនៅម៉ោង ៦ និង១០ នាទីល្ងាចថ្ងៃសៅរ៍នៅក្នុងភូមិ តូ(Douge) ក្នុងទីក្រុង លីនកាង (Lincang) នៃខេត្តយ៉ុនណាន ហើយអគ្គិភ័យក៏បានបណ្តាលឱ្យមនុស្សម្នាក់រងរបួសផងដែរ។ រដ្ឋាភិបាលក្នុងតំបន់បាននិយាយថា ភ្លើងដែលត្រូវបានពន្លត់នៅម៉ោង ១១:០៥នាទីយប់កាលពីថ្ងៃសៅរ៍ ដោយសារតែការខិតខំប្រឹងប្រែងរបស់អ្នកពន្លត់អគ្គិភ័យចំនួន១១០នាក់បានប៉ះពាល់ដល់ផ្ទៃដីប្រហែល ៥,៣៣ ហិកតា។ ប្រភពដដែលបានបន្ថែមថា ក្រុមអាជ្ញាធរកំពុងតាមដានកន្លែងកើត។ មូលហេតុនៃការឆាបឆេះនេះ កំពុងស្ថិតក្រោមការស៊ើបអង្កេតនៅឡើយ។នៅក្នុងខេត្តស៊ីឈួន(Sichuan) ដែលនៅជិតខាង ក្រុមអ្នកពន្លត់អគ្គិភ័យបាននឹងកំពុងព្យាយាមពន្លត់អណ្ដាតភ្លើងឆេះព្រៃដែលបានចាប់ផ្ដើមឡើងនៅម៉ោងប្រហែល ៥ល្ងាចថ្ងៃសុក្រ នៅជិតភូមិ ប៉ៃស៊ី (Baizi) ក្នុងសង្កាត់ យ៉ាជៀន (Yajiang) នៃខេត្តស្វយ័តទីបេ ហ្គាហ្ស៊េ (Garze)៕

រោងចក្រចម្រាញ់ប្រេងរបស់រុស្សីកាន់តែច្រើន ត្រូវរងការវាយប្រហារដោយយានដ្រូនរបស់អ៊ុយក្រែន

រោងចក្រចម្រាញ់ប្រេងរបស់រុស្សីកាន់តែច្រើន ត្រូវរងការវាយប្រហារដោយយានដ្រូន ជាការវាយប្រហារចុងក្រោយបង្អស់លើរោងចក្រថាមពល ដែលភាគច្រើននៃពួកវា ស្ថិតនៅជ្រៅក្នុងប្រទេសរុស្ស៊ី។ការវាយប្រហារកាលពីថ្ងៃសៅរ៍ គឺសំដៅទៅលើរោងចក្រនៅក្នុងតំបន់ Samara របស់រុស្ស៊ី មានចម្ងាយជាង ១.០០០ គីឡូម៉ែត្រ (៦២០ ម៉ាយ) ពីព្រំដែនអ៊ុយក្រែន។សារព័ត៌មាន RIA Novosti បានរាយការណ៍ដោយដកស្រង់សម្តីអភិបាលខេត្តលោក Dmitry Azarov ថា អង្គភាពកែច្នៃផលិតផលប្រេង បានឆាបឆេះនៅលើទឹកដីនៃរោងចក្រចម្រាញ់ប្រេង Rosneft PJSC ក្នុងទីក្រុងស៊ីហ្ស្រាន (Syzran)។ សមត្ថភាពផលិតរបស់រោងចក្រនេះ គឺ ៨,៥លានបារ៉ែល ក្នុងមួយឆ្នាំ ឬប្រហែល ១៧០.000 បារ៉ែល ក្នុងមួយថ្ងៃ។ទីភ្នាក់ងារសារព័ត៌មានបារាំង AFP កាលពីថ្ងៃអាទិត្យបានរាយការណ៍ដោយដកស្រង់សម្តីអាជ្ញាធរក្នុងតំបន់ថា ការវាយប្រហារដោយយានដ្រូនមួយផ្សេងទៀត បានកើតឡើងលើរោងចក្រចម្រាញ់ប្រេង Slavyansk-on-Kuban ក្នុងតំបន់ Krasnodar ភាគខាងត្បូងនៃប្រទេសរុស្ស៊ី។ សេចក្តីរាយការណ៍នោះ បានបន្តថា អគ្គិភ័យដែលបង្កឡើងដោយការវាយប្រហារនោះ ត្រូវបានពន្លត់ ហើយមនុស្សម្នាក់ បានស្លាប់ដោយសារគាំងបេះដូង ។អភិបាលក្រុង បាននិយាយថា ការប៉ុនប៉ងវាយប្រហាររោងចក្រចម្រាញ់ប្រេងទីពីរ នៅទីក្រុង Novokuibyshevsk ត្រូវបានរារាំង។មនុស្សម្នាក់ដែលដឹងពីកិច្ចប្រតិបត្តិការមិនត្រូវបានអនុញ្ញាតឲ្យនិយាយជាសាធារណៈ បានអះអាងថា អ៊ុយក្រែន បានកំណត់គោលដៅរោងចក្រទី៣ក្នុងតំបន់នៅពេលយប់ គឺរោងចក្រចម្រាញ់Kuibyshevដ៏ធំ។

អង្គការ UNICEF៖ កុមារជាង ១៣.០០០ នាក់ត្រូវបានសម្លាប់នៅហ្កាហ្សា ក្នុងការវាយលុករបស់អ៊ីស្រាអែល

ទីភ្នាក់ងារកុមាររបស់អង្គការសហប្រជាជាតិ UNICEF បាននិយាយកាលពីថ្ងៃអាទិត្យ (១៧ មីនា) ថាកុមារជាង ១៣.០០០ នាក់ត្រូវបានសម្លាប់នៅហ្កាហ្សា ក្នុងការវាយលុករបស់អ៊ីស្រាអែល ដោយបន្ថែមកុមារជាច្រើនបានទទួលរងពីកង្វះអាហារូបត្ថម្ភធ្ងន់ធ្ងរហើយមិនមាន «សូម្បីតែកម្លាំងយំ»។នាយកប្រតិបត្តិអង្គការយូនីសេហ្វ លោកស្រី ខាធើរីន រ៉ាស់សែល (Catherine Russell) បានប្រាប់សារព័ត៌មាន CBS News ថា «កុមាររាប់ពាន់នាក់ទៀតបានរងរបួស ហើយពួកគេអាចនឹងជាប់គាំងនៅក្រោមគំនរបាក់បែក។ យើងមិនដែលបានឃើញអត្រាដ៏ខ្ពស់បែបនេះនៃការស្លាប់របស់កុមារនៅក្នុងជម្លោះស្ទើរតែទាំងអស់នៅលើពិភពលោក»។ការរិះគន់ពីអន្តរជាតិបានកើតមានលើអ៊ីស្រាអែល ដោយសារតែចំនួនអ្នកស្លាប់ក្នុងសង្គ្រាម វិបត្តិភាពអត់ឃ្លាននៅហ្កាហ្សា និងការចោទប្រកាន់ពីការរារាំងការផ្តល់ជំនួយទៅក្នុងតំបន់ហ៊ុមព័ទ្ធ។ អ្នកជំនាញរបស់អង្គការសហប្រជាជាតិបាននិយាយនៅដើមខែនេះថា អ៊ីស្រាអែលកំពុងបំផ្លាញប្រព័ន្ធស្បៀងអាហាររបស់ហ្កាហ្សា ដែលជាផ្នែកនៃ «យុទ្ធនាការបង្អត់អាហារ» ដ៏ទូលំទូលាយ ប៉ុន្តែអ៊ីស្រាអែលបានច្រានចោលការចោទប្រកាន់នេះ។ការវាយប្រហារដោយយោធារបស់អ៊ីស្រាអែល លើតំបន់ហ្កាហ្សា ដែលគ្រប់គ្រងដោយក្រុមហាម៉ាស បានធ្វើឱ្យប្រជាជនជិត ២,៣ លាននាក់របស់តំបន់នេះត្រូវភៀសខ្លួន និងបណ្តាលឱ្យមានវិបត្តិអត់ឃ្លាន ធ្វើឱ្យតំបន់ភាគច្រើនខ្ទេចខ្ទីអស់ និងបានសម្លាប់មនុស្សជាង ៣១.០០០ នាក់ នេះបើយោងតាមក្រសួងសុខាភិបាលរបស់ហ្កាហ្សា៕

អ៊ីស្រាអែល បន្តឃុំខ្លួនបុគ្គលិកថែទាំសុខភាពស្ម័គ្រចិត្តចំនួន ១៣នាក់

អង្គការនេះ បាននិយាយកាលពីថ្ងៃអាទិត្យថា កងកម្លាំងអ៊ីស្រាអែល បន្តឃុំខ្លួនបុគ្គលិកថែទាំសុខភាពចំនួន១៣នាក់ ដែលស្ម័គ្រចិត្តជាមួយសង្គមអឌ្ឍចន្ទក្រហមប៉ាឡេស្ទីន (PRCS) នៅក្នុងតំបន់ហ្កាហ្សា។អង្គការសង្គមអឌ្ឍចន្ទក្រហមប៉ាឡេស្ទីន (PRCS) បាននិយាយនៅក្នុងសេចក្តីថ្លែងការណ៍មួយថា បន្ទាប់ពីដោះលែងអ្នកស្ម័គ្រចិត្តឈ្មោះ Tamer Fouad Salim Al-Qarm កាលពីថ្ងៃសៅរ៍ កងកម្លាំងអ៊ីស្រាអែលបន្តឃុំខ្លួនអ្នកស្ម័គ្រចិត្ត១៣នាក់ផ្សេងទៀត ។ លោក Al-Qarm ត្រូវបានឃុំខ្លួនអស់រយៈពេល ៣៦ថ្ងៃបន្ទាប់ពីទាហានអ៊ីស្រាអែល បានឆ្មក់ចូលមន្ទីរពេទ្យ Al-Amal នៅក្នុងខាន់យូនីស (Khan Younis) កាលពីខែមុន។ក្រសួងការបរទេសប៉ាឡេស្ទីន បាននិយាយនៅក្នុងសេចក្តីថ្លែងការណ៍មួយកាលពីថ្ងៃអាទិត្យថា៖ «ការគំរាមកំហែងជាបន្តបន្ទាប់របស់លោកណេតាន់យ៉ាហ៊ូក្នុងការឈ្លានពានទីក្រុងរ៉ាហ្វា (Rafah) បង្កឲ្យមានការប្រឈមមុខដាក់គ្នាចំពោះមតិអន្តរជាតិ និងអាមេរិកលើការការពារជនស៊ីវិល»។ «ការសងសឹកដោយខ្វះហេតុផលគ្របដណ្តប់លើរដ្ឋាភិបាលអ៊ីស្រាអែល និងគំរាមកំហែងដល់សន្តិសុខ និងស្ថិរភាព ក្នុងតំបន់ និងពិភពលោក»។ខណៈពេលដែលអ៊ីស្រាអែលអំពាវនាវឲ្យមានការវិលត្រឡប់មកវិញនៃជនជាតិអ៊ីស្រាអែលចំនួន ១០៨ នាក់ ដែលត្រូវបានចាប់ខ្លួនដោយក្រុមហាម៉ាស ប្រជាជនប៉ាឡេស្ទីនរាប់ពាន់នាក់ នៅតែត្រូវបានចាប់ខ្លួនដោយកងកម្លាំងអ៊ីស្រាអែល។យោងតាមទិន្នន័យពីក្រុមសិទ្ធិមនុស្សអ៊ីស្រាអែល B'Tselem ជនជាតិប៉ាឡេស្ទីនប្រហែល ៤.៧៦៤ នាក់ត្រូវបានអ៊ីស្រាអែលឃុំខ្លួន នៅខែកញ្ញា មុនពេលអំពើហិង្សាចុងក្រោយ បានផ្ទុះឡើង ពួកគេជាច្រើនត្រូវបានឃុំខ្លួនដោយមានហេតុផលតិចតួច ឬដោយគ្មានការចោទប្រកាន់។

អ្នកតវ៉ារាប់រយនាក់ក្នុងតំបន់ស្វយ័ត បាស(Basque)របស់អេស្ប៉ាញដេកលើដីរំឭកដល់ជនរងគ្រោះហ្កាហ្សា

បាតុកររាប់រយនាក់បានចូលរួមគោរពវិញ្ញាណក្ខន្ធជនរងគ្រោះក្នុងសង្គ្រាមនៅតំបន់ហ្កាហ្សា ក្នុងទីក្រុង សាន់ សេបាស្ទាន (San Sebastián) ប្រទេសអេស្ប៉ាញ កាលពីថ្ងៃអាទិត្យ ១៧ មីនា ដោយដេកលើដីអមដោយនឹងសំឡេងស៊ីរ៉ែន។ ការជួបជុំនេះត្រូវបានរៀបចំឡើងដោយសមូហភាពជើនីកាប៉ាឡេស្ទីណា(Gernika-Palestina)ដែលជាក្រុមសិល្បករ និងសកម្មជនមកពីតំបន់ស្វយ័តបាស( Basque) របស់អេស្ប៉ាញ ដោយប្រៀបធៀបស្របគ្នារវាងស្ថានភាពនៅហ្កាហ្សា និងការវាយប្រហារនៅទីក្រុង កានីកា (Guernica) ក្នុងឆ្នាំ ១៩៣៧ ដែលបានបំផុសគំនិតដោយគំនូររបស់ លោក ប៉ាប្លូ ភីកាសូ(Pablo Picasso)វិចិត្រកដៃរឯករបស់ពិភពលោក។ សកម្មភាពនេះត្រូវបានធ្វើឡើងនៅក្បែររូបចម្លាក់អេក្វាដូឈីលីដា( Eduardo Chillida) នៅលើឆ្នេរសមុទ្រ ខុនចា(Concha) របស់ទីក្រុង San Sebastian។ យោងតាមក្រសួងសុខាភិបាលរបស់ហ្កាហ្សា ការវាយប្រហារដោយយោធារបស់អ៊ីស្រាអែលលើតំបន់ហ្កាហ្សាបានបង្ខំពលហ្កាហ្សារដ្ឋរត់ភៀសខ្លួនចំនួនប្រជាជនជិត ២,៣ លាននាក់ បណ្តាលឱ្យមានវិបត្តិអត់ឃ្លាន អគារនានាស្ទើរបាក់រាបដល់ដីក្នុងតំបន់រងការឡោមព័ទ្ធនេះ និងបានសម្លាប់មនុស្សជាង ៣១,០០០នាក់ ដែលនាំឱ្យមានការចោទប្រកាន់ពីបទប្រល័យពូជសាសន៍កំពុងត្រូវបានស៊ើបអង្កេតនៅក្នុងតុលាការពិភពលោក៕

បណ្ដាញសង្គម

ព័ត៌មានថ្មីៗ

ព្រឹត្តិការណ៍ប្រណាំងម៉ូតូត្រៃពានរង្វាន់ ENEOS ២០២៦ ទទួលបានអ្នកចុះឈ្មោះចូលរួមច្រើនជាងឆ្នាំ២០២៥

ក្រសួងការងារ និង UNDP សហការក្នុងការពង្រឹងការគ្រប់គ្រងមូលនិធិសោធនឱ្យកាន់តែមានប្រសិទ្ធភាពនិងតម្លាភាព

រដ្ឋមន្ត្រីក្រសួងពាណិជ្ជកម្ម លើកទឹកចិត្តវិស័យឯកជនអាស៊ានតភ្ជាប់បណ្តាញធុរកិច្ច និងវិនិយោគក្នុងតំបន់ឱ្យកាន់តែស៊ីជម្រៅ ខណៈសក្តានុពលវិនិយោគនៅមិនទាន់បានប្រើប្រាស់ពេញលេញ

ការសិក្សាជំនាញឌីជីថលជាដើមទុន ក្នុងការពង្រឹងសមត្ថភាពបច្ចេកវិទ្យាថ្មីៗរៀបចំការប្រកួតកីឡាអន្តរជាតិនានា

អ៊ីរ៉ង់៖ បុគ្គលិកយោធាអាមេរិកជាង ៦៥០នាក់ត្រូវបានសម្លាប់ ឬរបួសក្នុងរយៈពេលពីរថ្ងៃដំបូងនៃប្រតិបត្តិការ True Promise-4

មន្ត្រីក្រសួងបរិស្ថានកំពុងចុះពិនិត្យគុណភាពបរិស្ថាននៅរោងចក្រផលិតកាបូបមួយកន្លែង នៅ ខេត្តកណ្ដាល បន្ទាប់ពីមានករណីកម្មករចំនួន១៩នាក់ មានបញ្ហាសុខភាពខ្សោយទន់ដៃទន់ជើង

មនុស្សរាប់ម៉ឺននាក់ដែលចង់ចាកចេញពីឈូងសមុទ្រពែរ្ស ត្រូវជាប់គាំង ស្របពេលជម្លោះនៅមជ្ឈិមបូព៌ា

លោក Trump គំរាមផ្ដាច់ចំណងពាណិជ្ជកម្មទាំងអស់ជាមួយអេស្ប៉ាញ បន្ទាប់ពីមិនឱ្យអាមេរិក ប្រើមូលដ្ឋានទ័ព

អ៊ីស្រាអែលពង្រីកប្រតិបត្តិការជើងគោកនៅលីបង់ខណៈសង្គ្រាមជាមួយក្រុមហេសបូឡា រីកកាន់តែធំ

អាមេរិក-អ៊ីស្រាអែល នៅតែបន្តវាយប្រហារទីក្រុងតេអេរ៉ង់ ខណៈលោក Trump ថា ការចរចាយឺតពេលហើយ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877