BTV NEWS

អ្នកតាមដានព្រឹត្តិការណ៍សង្គម និងប្រជាពលរដ្ឋ កោតសរសើររាជរដ្ឋាភិបាលក្នុងការបោសសំអាតការឆបោកតាមអនឡាញ

កម្ពុជាសហការជាមួយបណ្តាប្រទេសជាដៃគូរបង្ក្រាបករណីដឹកជញ្ជូនគ្រឿងញៀនឆ្លងដែនក្នុងឆ្នាំ២០២៥ ទទួលបានលទ្ធផលល្អ

នៅឆ្នាំ២០២៥ មន្ទីរប្រឆាំងបទល្មើសគ្រឿងញៀនបង្ក្រាបបទល្មើសគ្រឿងញៀនជាង ៩ពាន់ករណី ឃាត់ខ្លួនជនសង្ស័យជាង ២ម៉ឺននាក់ និងចាប់យកសារធាតុញៀនជាង ៧តោន

រដ្ឋបាលរាជធានីភ្នំពេញ បង្ក្រាបទីតាំងហ្គេមអនឡាញខុសច្បាប់ក្នុងខណ្ឌចំការមនឃាត់ខ្លួនជនជាតិឥណ្ឌូណេស៊ី ២៤នាក់

សន្តិសុខ និង សង្គម

សមាជិកសភាអភិរក្សនិយម ចោទលោកកាមេរូនថា បានរិះគន់អ៊ីស្រាអែលជុំវិញការដោះស្រាយស្ថានការណ៍នៅហ្កាហ្សា

សមាជិកសភាអភិរក្សនិយម បានចោទប្រកាន់លោករដ្ឋមន្ត្រីការបរទេស លោក ដេវីត កាមេរូន ( David Cameron)ថាបាន «រិះគន់»អ៊ីស្រាអែលជុំវិញការដោះស្រាយស្ថានការណ៍របស់ខ្លួន នៅក្នុងតំបន់ហ្កាហ្សា ហើយបានអះអាងថា ក្រសួងការបរទេសបង្ហាញពី«មនោសញ្ចេតនាប្រឆាំងនឹងអ៊ីស្រាអែល»។សមាជិកសភាបក្សអភិរក្សអង់គ្លេសដែលគាំទ្រអ៊ីស្រាអែល គ្រោងនឹងលើកឡើងពីកង្វល់របស់ខ្លួនជាមួយរដ្ឋមន្ត្រីការបរទេស នៅក្នុងកិច្ចប្រជុំមួយ នៅថ្ងៃអង្គារ។កាលពីសប្តាហ៍មុន លោកកាមេរូន បានជួបជាមួយ លោក Benny Gantz រដ្ឋមន្ត្រីនៃគណៈរដ្ឋមន្ត្រីអ៊ីស្រាអែល ដើម្បីពិភាក្សាអំពីលំហូរនៃជំនួយទៅកាន់តំបន់ហ្កាហ្សា។ បន្ទាប់ពីកិច្ចប្រជុំ លោកបានបង្ហោះសេចក្តីថ្លែងការណ៍មួយនៅលើបណ្តាញសង្គម X ដែលពីមុនជា Twitter ដោយនិយាយថា លោកបាន«ធ្វើឲ្យមានភាពច្បាស់លាស់នូវជំហានដែលអ៊ីស្រាអែលត្រូវធ្វើ ដើម្បីបង្កើនជំនួយ» ហើយថា «យើងនៅតែមិនឃើញការកែលម្អជាក់ស្តែង»។លោកក៏បាននិយាយផងដែរថា ខ្លួនមាន«ការព្រួយបារម្ភយ៉ាងខ្លាំងអំពីលទ្ធភាពនៃការវាយលុកយោធានៅ ទីក្រុងរ៉ាហ្វា «Rafah» ហើយថា ការអនុវត្តរបស់អ៊ីស្រាអែលក្នុងការផ្តល់ជំនួយនឹងមាន «ផលវិបាក»សម្រាប់ការវាយតម្លៃរបស់ចក្រភពអង់គ្លេសអំពី«ថាតើអ៊ីស្រាអែល គោរពតាមច្បាប់អន្តរជាតិឬអត់»។សមាជិកសភាម្នាក់ បានប្រាប់សារព័ត៌មាន The Telegraph ថា នៅពេលដែលសេចក្តីថ្លែងការណ៍ ត្រូវបានបង្ហោះចូលទៅក្នុងក្រុម WhatsApp របស់សមាជិកសភាបក្សអភិរក្សអង់គ្លេស មាន «ការប៉ះពាល់ដល់ផ្លូវអារម្មណ៍យ៉ាងខ្លាំងទាក់ទងនឹងអ្វីដែលលោកដេវីត បានលើកឡើង។លោកស្រី Theresa Villiers អតីតរដ្ឋមន្ត្រីនៃគណៈរដ្ឋមន្ត្រី បាននិយាយថា៖«រដ្ឋាភិបាលចក្រភពអង់គ្លេស ត្រូវតែ [គាំទ្រ] សិទ្ធិរបស់អ៊ីស្រាអែលក្នុងការការពារខ្លួនពីអំពើប្រល័យពូជសាសន៍ ដែលបានវាយប្រហារពួកគេកាលពីថ្ងៃទី៧ ខែតុលា»។

ឃ្លាំងស្តុកប្រេងរុស្ស៊ី ត្រូវរងការវាយប្រហារពីអ៊ុយក្រែន ខណៈវិមានក្រឹមឡាំង ហាមឃាត់ការនាំចេញប្រេង

ប្រជាជនរុស្សី កំពុងមានអារម្មណ៍ថា មានការប៉ះពាល់យ៉ាងខ្លាំងពីការវាយប្រហាររបស់អ៊ុយក្រែនលើហេដ្ឋារចនាសម្ព័ន្ធប្រេង «នៅក្នុងស្ថានភាពមួយដែលពួកគេពិបាកក្នុងការគ្រប់គ្រង» ខណៈដែលឃ្លាំងប្រេងមួយ នៅក្នុងតំបន់ Kursk បានក្លាយជាទីតាំងចុងក្រោយបំផុតដែលត្រូវបានកំណត់គោលដៅ។មន្ត្រីរុស្ស៊ី បាននិយាយថា ឃ្លាំងស្តុកប្រេងនៅក្នុងតំបន់ដែលមានព្រំប្រទល់ជាប់ប្រទេសអ៊ុយក្រែន បានផ្ទុះឡើង បន្ទាប់ពីវាត្រូវរងការវាយប្រហារ កាលពីព្រឹកថ្ងៃអាទិត្យ។លោក Roman Starovoyt អភិបាលតំបន់ បាននិយាយកាលពីព្រឹកថ្ងៃអាទិត្យថា៖«កងពន្លត់អគ្គិភ័យ និងសេវាសង្គ្រោះបន្ទាន់ កំពុងធ្វើការនៅកន្លែងកើតហេតុនោះ»។ លោកមិនបានបញ្ជាក់ថា តើឃ្លាំងប្រេងមួយណា ត្រូវបានវាយប្រហារ ឬទំហំរបស់វាប៉ុនណានោះទេ។ការវាយប្រហារនេះ គឺជាផ្នែកមួយនៃយុទ្ធសាស្ត្ររបស់អ៊ុយក្រែន ដើម្បីវាយប្រហាររោងចក្រប្រេង និងឧស្ម័ននៅទូទាំងប្រទេសរុស្ស៊ី ដែលក្រសួងការពារជាតិអង់គ្លេស បាននិយាយថា បានបង្ខំវិមានក្រឹមឡាំងឲ្យ ហាមឃាត់ការនាំចេញប្រេងឥន្ធនៈសម្រាប់រយៈពេល៦ខែ ដើម្បីព្យាយាមកាត់បន្ថយការកើនឡើងតម្លៃ ប្រេង។ក្រសួងនេះ បាននិយាយថា៖«វាទំនងជាសមត្ថភាពចម្រាញ់របស់រុស្ស៊ី ត្រូវបានកាត់បន្ថយជាបណ្ដោះ អាសន្នដោយការវាយប្រហារតាមអាកាសជាច្រើនដងប្រឆាំងនឹងរោងចក្រចម្រាញ់ប្រេង នៅទូទាំងប្រទេសរុស្ស៊ី»។ការហាមឃាត់ការនាំចេញប្រេងឥន្ធនៈរបស់រុស្ស៊ី ដែលបានណែនាំនៅថ្ងៃទី១ ខែមីនា បន្ទាប់ពីការហាមឃាត់រយៈពេល៣ខែ ស្រដៀងគ្នាដែលបានចូលជាធរមាន នៅពាក់កណ្តាលខែកញ្ញា។ ការហាមឃាត់ កាលពីឆ្នាំមុន ត្រូវបានបង្កឡើងដោយកសិកររុស្ស៊ី ដែលបានគំរាមតវ៉ា លុះត្រាវិមានក្រឹមឡាំងគ្រប់គ្រងតម្លៃប្រេងឥន្ធនៈ មិនឲ្យកើនឡើង។

ប្រទេស បូលីវី ប្រកាសដាក់រដ្ឋក្នុងគ្រាអាសន្នក្រោយភ្លៀងធ្លាក់ខ្លាំង

ឯកសាររដ្ឋាភិបាលបានបង្ហាញកាលពីថ្ងៃអាទិត្យថា ភ្លៀងធ្លាក់ខ្លាំងនៅក្នុងរដ្ឋធានីឡាប៉ាស់ (La Paz)របស់ប្រទេសបូលីវី បានជំរុញឲ្យក្រុមអាជ្ញាធរប្រកាសដាក់ប្រទេសក្នុងគ្រាអាសន្ន បន្ទាប់ពីទឹកក្នុងទន្លេហក់ឡើងប្រៀបច្រាំងបំផ្លាញលំនៅឋានជាច្រើនខ្នងកាលពីចុងសប្ដាហ៍នេះ។ យោងតាមឯកសារខាងលើ លោកប្រធានាធិបតីបូលីវី ល្វីស អាសេ(Luis Arce) បានសន្យាបញ្ជូនគ្រឿងចក្រធុនធ្ងន់ និងទាហានចំនួន៣ពាន់នាក់ ដើម្បីទប់ស្កាត់ការបំផ្លិចបំផ្លាញបន្ថែមទៀត ។ ភ្លៀងធ្លាក់ខ្លាំង បានបង្កឲ្យមានទឹកជំនន់ នៅក្នុងភូមិឋានមួយចំនួន និង កាត់ផ្ដាច់ទំនាក់ទំនងតំបន់មួយជាច្រើនទៀតនៅក្នុងទីក្រុងនេះ ព្រមទាំងកាត់ផ្ដាច់ចរន្តអគ្គិសនី និងជន់លិចផ្លូវផងដែរ។ លោកអាសេ បាននិយាយនៅលើបណ្ដាញសង្គម Xថា យើងបារម្ភជាខ្លាំងចំពោះស្ថានភាពដ៏លំបាកដែលទីក្រុងឡាប៉ាស់ កំពុងជួបប្រទះ។ យោងតាមទិន្នន័យ មនុស្សម្នាក់បានស្លាប់ កាលពីចុងសប្ដាហ៍មុនក្នុងទីក្រុងឡាប៉ាស់ ដោយសារភ្លៀងធ្លាក់ខ្លាំង ខណៈមនុស្សជិត៥០នាក់បានស្លាប់ ក្នុងទឹកជំនន់ទូទាំងប្រទេសចាប់តាំងពីរដូវភ្លៀងធ្លាក់បានចាប់ផ្ដើមកាលពីខែមករា ៕

លោក Netanyahu៖ ភេរវករ ១៣.០០០ នាក់ស្ថិតចំណោមប្រជាជនប៉ាឡេស្ទីន ដែលត្រូវបានសម្លាប់

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បាននិយាយកាលពីថ្ងៃអាទិត្យ (១០ មីនា) ថាយ៉ាងហោចណាស់ «ភេរវករ» ចំនួន ១៣.០០០ នាក់ស្ថិតក្នុងចំណោមជនជាតិប៉ាឡេស្ទីន ដែលត្រូវបានសម្លាប់ក្នុងអំឡុងសង្គ្រាមរបស់អ៊ីស្រាអែល ប្រឆាំងនឹងក្រុមហាម៉ាស នៅតំបន់ហ្កាហ្សាស្ទ្រីប។លោក ណេតាន់យ៉ាហ៊ូ បានប្តេជ្ញាថានឹងបន្តការវាយលុកនៅភាគខាងត្បូងនៃតំបន់ហ៊ុមព័ទ្ធនេះ ដោយជាសកម្មភាពមួយដែលប្រធានាធិបតីអាមេរិកអាមេរិក ចូ បៃដិន (Joe Biden) ពិពណ៌នាថាជា «បន្ទាត់ក្រហម» របស់លោក។ប្រជាជនប៉ាឡេស្ទីនជាង ៣១.០០០ នាក់ត្រូវបានសម្លាប់នៅហ្កាហ្សា ក្នុងអំឡុងសង្គ្រាមរយៈពេលប្រាំខែ ដែលបានចាប់ផ្តើមបន្ទាប់ពីពួកសកម្មប្រយុទ្ធហាម៉ាសបានវាយប្រហារអ៊ីស្រាអែលកាលពីថ្ងៃទី០៧ ខែតុលា ដោយបានសម្លាប់មនុស្ស ១.២០០ នាក់ និងចាប់ចំណាប់ថ្នូរ ២៥៣ នាក់ នេះបើយោងតាមតួលេខសរុបរបស់អ៊ីស្រាអែល។ក្រសួងសុខាភិបាលហ្កាហ្សា មិនបែងចែកចំនួនអ្នកស្លាប់រវាងជនស៊ីវិល និងក្រុមសកម្មប្រយុទ្ធហាម៉ាសទេ ប៉ុន្តែបាននិយាយថាចំនួន ៧២ ភាគរយនៃអ្នកស្លាប់ទាំងអស់គឺជាស្ត្រី និងកុមារ ហើយក្រុមនេះបានច្រានចោលតួលេខអ្នកស្លាប់ ដែលអ៊ីស្រាអែល បានដាក់ឡើងចំពោះក្រុមសកម្មប្រយុទ្ធហាម៉ាស ថាជាការប៉ុនប៉ងបង្ហាញពី «ជ័យជម្នះក្លែងក្លាយ»៕

ពលរដ្ឋប៉ាឡេស្ទីនក្នុងតំបន់ហ្កាហ្សា បានរៀបចំប្រារព្ធពិធីបុណ្យរ៉ាម៉ាដានក្រោមស្រមោលសង្គ្រាម

ប្រជាជនប៉ាឡេស្ទីនបានរៀបចំពិធីបុណ្យរ៉ាម៉ាដាន(Ramadan)ទាំងទុក្ខព្រួយជាមួយនឹងវិធានការរឹតបន្តឹងសន្តិសុខកាន់តែខ្លាំងពីសំណាក់កងកម្លាំងនគរបាលអ៊ីស្រាអែល និងទិដ្ឋភាពនៃសង្គ្រាម និងភាពអត់ឃ្លាននៅក្នុងតំបន់ហ្កាហ្សា ដែលជាស្រមោលគ្របដណ្ដប់លើខែដ៏វិសុទ្ធរបស់មូស្លីមសាសនិក ខណៈការចរចាធានាឲ្យបានបទឈប់បាញ់បានជាប់គាំង។ នគរបាលរាប់ពាន់នាក់ត្រូវបានដាក់ពង្រាយនៅជុំវិញផ្លូវតូចចង្អៀតនៃទីក្រុងចាស់ Old City ក្នុងទីក្រុង ហ្ស៊េរ៉ុយសាឡឹម (Jerusalem)ជាទីដែលអ្នកគោរពបូជារាប់ម៉ឺននាក់ត្រូវបានរំពឹងថានឹងទៅកាន់ បរិវេណវិហារអ៊ីស្លាមអាល់-អាកសា(Al-Aqsa)ជារៀងរាល់ថ្ងៃ ជាទីសក្ការៈមួយក្នុងចំណោមទីតាំងដ៏ពិសិដ្ឋបំផុតមួយនៅក្នុងសាសនាអ៊ីស្លាម។ តំបន់ដែលត្រូវបានចាត់ទុកថាជាកន្លែងពិសិដ្ឋបំផុតដោយជនជាតិជ្វីហ្វដែលស្គាល់វាថាជា Temple Mount គឺជាចំណុចផ្ទុះជម្លោះដ៏យូរអង្វែង និងជាចំណុចចាប់ផ្តើមមួយនៃសង្រ្គាមចុងក្រោយក្នុងឆ្នាំ ២០២១រវាងអ៊ីស្រាអែល និងក្រុមហាម៉ាស ជាចលនាសកម្មប្រយុទ្ធដែលគ្រប់គ្រងតំបន់ហ្កាហ្សា។ ជម្លោះរយៈពេល ១០ ថ្ងៃនោះត្រូវបានបង្អាក់ដោយសង្គ្រាមបច្ចុប្បន្ន ដែលឥឡូវនេះឈានដល់ខែទី ៦ ហើយ។ ជម្លោះនេះបានចាប់ផ្តើមផ្ទុះឡើងកាលពីនៅថ្ងៃទី ៧ ខែតុលា នៅពេលក្រុមយុទ្ធជនហាម៉ាសរាប់ពាន់នាក់បានវាយលុកចូលទៅក្នុងប្រទេសអ៊ីស្រាអែល សម្លាប់មនុស្សប្រហែល១.២០០នាក់។យុទ្ធនាការឥតឈប់ឈររបស់អ៊ីស្រាអែលនៅហ្កាហ្សា បានបង្កឱ្យមានភាពអាសន្នកាន់តែខ្លាំងនៅទូទាំងពិភពលោក ខណៈការកើនឡើងហានិភ័យនៃគ្រោះទុរ្ភិក្សបានគំរាមកំហែងបន្ថែមទៀត ខណៈចំនួនអ្នកស្លាប់បានកើនឡើងដល់ជាង ៣១.០០០នាក់រួចហើយ៕

ក្រុមអ្នកតវ៉ាគាំទ្រប៉ាឡេស្ទីន ហែក្បួនក្នុងទីក្រុងប៉ារីស អំពាវនាវឲ្យមានបទឈប់បាញ់ និងនាំជំនួយចូលហ្កាហ្សា

ក្រុមបាតុករគាំទ្រប៉ាឡេស្ទីនរាប់រយនាក់បានដង្ហែក្បួននៅទីក្រុងប៉ារីសកាលពីថ្ងៃសៅរ៍ ៩ មីនា ដោយទាមទារឲ្យមានបទឈប់បាញ់នៅតំបន់ហ្កាហ្សា ខណៈជម្លោះនៅមជ្ឈិមបូព៌ាឈានចូលដល់ខែទី ៥ ។កាលពីចុងសប្ដាហ៍នេះ ក្រៅពីនៅក្នុងទីក្រុងប៉ារីស ប្រទេសបារាំង ការតវ៉ាក៏បានកើតឡើងនៅក្នុងប្រទេសជាច្រើនទៀតផងដែរ ដូចនៅទីក្រុងឡុងដ្រ៍ ច្រកភពអង់គ្លេស ហ្ស៊កដានី ឈីលី និងសហរដ្ឋអាមេរិកជាដើម។ អ្នកតវ៉ាម្នាក់មកពីចលនាសាមគ្គីភាពបារាំង-ប៉ាឡេស្ទីន បានរិះគន់ការទម្លាក់ជំនួយអាហារចូលក្នុងដែនដីហ្កាហ្សា ដោយនិយាយថាពលរដ្ឋហ្កាហ្សា ត្រូវបានគេចាត់ទុកថាដូចជាសត្វធាតុ។ ប្រទេសមួយចំនួនដូចជាបារាំង ហ្ស៊កដានី និងសហរដ្ឋអាមេរិក បានទម្លាក់ជំនួយតាមយន្តហោះ ខណៈការចូលក្នុងដែនដីឡោមព័ទ្ធដោយអ៊ីស្រាអែលមួយនេះ តាមរថយន្តមានកំណត់។ ការចរចាស្តីពីបទឈប់បាញ់ដែលអាចកើតមាននៅក្នុងសង្គ្រាមរបស់អ៊ីស្រាអែលប្រឆាំងនឹងក្រុមហាម៉ាសនៅតែជាប់គាំង។ ទីភ្នាក់ងារផ្ដល់ជំនួយបានព្រមានអំពីគ្រោះទុរ្ភិក្សដែលកំពុងកើតមានរយៈពេល៥ខែនៅក្នុងយុទ្ធនាការរបស់អ៊ីស្រាអែលប្រឆាំងនឹងក្រុមហាម៉ាស។ ភាគច្រើននៃប្រជាជន ២,៣លាននាក់នៅតំបន់ហ្កាហ្សាឥឡូវនេះ ត្រូវបានជម្លៀសចេញពីផ្ទះសម្បែងនៅខាងក្នុងដែនដីនេះ ខណៈដំណើរការផ្ដល់ជំនួយត្រូវបានរាំងស្ទះយ៉ាងខ្លាំងនៅប៉ុស្តិ៍ត្រួតពិនិត្យតាមច្រកព្រំដែនដីគោក៕

Updat៖ មនុស្ស២១នាក់ស្លាប់ និង៦នាក់កំពុងបាត់ខ្លួនក្នុងគ្រោះទឹកជំនន់ និងបំណាក់ដីនៅឥណ្ឌូនេស៊ី

ក្រុមអាជ្ញាធរបាននិយាយនៅថ្ងៃអាទិត្យទី១០មីនា ថា ភ្លៀងធ្លាក់ខ្លាំងរយៈពេលជាច្រើនថ្ងៃ បានបង្កឲ្យទឹកជំនន់ និងបំណាក់ដីនៅក្នុងខេត្តស៊ូម៉ាត្រាខាងលិច (West Sumatra)របស់ប្រទេសឥណ្ឌូនេស៊ី បង្ខំឲ្យមនុស្សជាង ៧ម៉ឺន៥ពាន់នាក់ ជម្លៀសចេញពីលំនៅឋាន និងឆក់យកជីវិតមនុស្ស២១នាក់ ខណៈ៦នាក់ផ្សេងទៀតនៅតែបាត់ខ្លួន ។ ទឹកជំនន់ដ៏ធ្ងន់ធ្ងរចាប់តាំងពីថ្ងៃព្រហស្បតិ៍សប្ដាហ៍មុននៅក្នុងទីក្រុងផាដាង (Padang) និងតំបន់ចំនួន៨ផ្សេងទៀត បានបំផ្លិចបំផ្លាញ លំនៅឋានជិត៧០០ខ្នង ស្ពាន និងសាលារៀនជាច្រើនកន្លែង និងជន់លិចផ្ទៃដីកសិកម្មប្រមាណ១១៣ហិចតា។ ក្រុមមន្ត្រីនិយាយថា ទីភ្នាក់សង្រ្គោះរបស់ប្រទេសឥណ្ឌូនេស៊ី កំពុងតាមរកអ្នកបាត់ខ្លួនទាំងនោះ ខណៈក្រុមអ្នកសង្រ្គោះ១៥០នាក់ ដែលកំពុងប្រឹងប្រែងការងារសង្រ្គោះ ត្រូវបានរារាំងដោយបំណាក់ដី។ លោកអាប់ឌុល ម៉ាលីក(Abdul Malik)ប្រធានក្រុមការងារសង្រ្គោះខេត្តបាននិយាយក្នុងសេចក្ដីថ្លែងការណ៍ថា ការសង្រ្គោះថ្ងៃនេះមានការចូលរួមពីបុគ្គលិក១៥០នាក់ មកពីទីភ្នាក់ងារគ្រប់គ្រងគ្រោះមហន្តរាយផ្សេងៗ៕

រដ្ឋធានីហៃទី ស្ថិតក្រោមការឡោមព័ទ្ធ ខណៈមានការកើនឡើងអំពើហិង្សាពីក្រុមជនអន្ធពាល

អ្នកស្រុកនៃរដ្ឋធានីរបស់ប្រទេសហៃទីបានបង្ហាញក្ដីបារម្ភយ៉ាងខ្លាំងអំពីសុវត្ថិភាពកាលពីថ្ងៃសៅរ៍បន្ទាប់ពីការរីករាលដាលចុងក្រោយនៃអំពើហិង្សាពីក្រុមជនអន្ធពាល ខណៈក្រុមមន្ត្រីអង្គការសហប្រជាជាតិបានព្រមានពីទីក្រុងស្ថិតនៅក្រោមការឡោមព័ទ្ធ បន្ទាប់ពីក្រុមវាយប្រហារប្រដាប់អាវុធបានដាក់គោលដៅទៅលើវិមានប្រធានាធិបតី និងទីស្នាក់ការរបស់កងម្លាំងនគរបាល។ក្រុមឧក្រិដ្ឋជន ដែលគ្រប់គ្រងភាគច្រើននៃរដ្ឋធានីព័រ-អូ-ប្រាំង (Port-au-Prince)ព្រមទាំងផ្លូវនានាភ្ជាប់ទៅដល់តំបន់ផ្សេងទៀតរបស់ប្រទេសនេះ បានបង្កភាពមហន្តរាយនៅក្នុងប៉ុន្មានថ្ងៃថ្មីៗនេះ ខណៈក្រុមនេះព្យាយាមបណ្តេញលោកនាយករដ្ឋមន្ត្រី អារៀល ហេនរី(Ariel Henry) ជាមេដឹកនាំប្រទេសក្នុងតំបន់ការីអ៊ីបមួយនេះចេញពីតំណែង។ កាលពីថ្ងៃសៅរ៍ អ្នកស្រុករាប់សិបនាក់កំពុងស្វែងរកសុវត្ថិភាពនៅក្នុងអគារសាធារណៈនានា ដោយខ្លះបានសម្រុកចូលទៅក្នុងអគារមួយដោយជោគជ័យ នេះបើយោងតាមអ្នកឆ្លើយឆ្លងព័ត៌មាន AFP ។ អង្គការទេសន្តរប្រវេសន៍អន្តរជាតិ (IOM) បាននិយាយកាលពីថ្ងៃសៅរ៍ថា ភាពចលាចលនេះបានធ្វើឱ្យជនជាតិហៃទីចំនួន ៣៦២.០០០នាក់ រត់ភៀសខ្លួននៅក្នុងប្រទេស ច្រើនជាងពាក់កណ្តាលនៃពួកគេ គឺជាកុមារ និងមួយចំនួនត្រូវបានបង្ខំឱ្យជម្លៀសចេញពីទីជម្រកជាច្រើនដង។ លោក ហ្វីលីព ប្រានឆាត (Philippe Branchat) ប្រធានអង្គការទេសន្តរប្រវេសន៍អន្តរជាតិ នៅប្រទេសហៃទី បាននិយាយនៅក្នុងសេចក្តីថ្លែងការណ៍មួយថា ប្រជាជនហៃទីមិនអាចដឹកនាំជីវិតសមរម្យបានទេ។ពួកគេរស់នៅក្នុងភាពភ័យខ្លាច ហើយជារៀងរាល់ថ្ងៃ រៀងរាល់ម៉ោង ស្ថានភាពបែបនេះចេះតែបន្តកើតមានកាន់តែធ្ងន់ធ្ងរ៕

បង្ក្រាបទីតាំងកម្សាន្តអតីតក្លិប BOEING នៅសង្កាត់ចតុមុខ ដែលបន្តលួចបន្លំចែកចាយ ប្រើប្រាស់គ្រឿងញៀន ឃាត់ខ្លួនជនបរទេស និងខ្មែរចំនួន ៨៧នាក់

ភ្នំពេញ៖ កម្លាំងជំនាញមន្ទីរប្រឆាំងគ្រឿងញៀន បានសហការជាមួយកម្លាំងនគរបាលស្នងការដ្ឋានរាជធានីភ្នំពេញ បានឆ្មក់ចូលបង្ក្រាបទីតាំងក្លិបកម្សាន្តមួយកន្លែង ដែលបន្លំចែកចាយប្រើប្រាស់គ្រឿងញៀន ឈ្មោះ City of Starry Sky ដែលជាអតីតក្លិបកម្សាន្ត BOEING នៅសង្កាត់ចតុមុខ ខណ្ឌដូនពេញ។ ឯកឧត្តម ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងគ្រឿងញៀន ដែលដឹកនាំផ្ទាល់ប្រតិបត្តិការបង្ក្រាបនេះ បានបញ្ជាក់ថា ដោយអនុវត្តន៍តាមបទបញ្ជាដ៏ម៉ឺងម៉ាត់របស់ឯកឧត្តម នាយឧត្ដមសេនីយ៍ ស ថេត អគ្គស្នងការនគរបាលជាតិ និងការដឹកនាំបញ្ជារបស់ឯកឧត្តម ឧត្ដមសេន៍យ៍ ព្រុំ សន្ធរ អគ្គស្នងការទទួលផែនប្រឆាំងគ្រឿងញៀន កម្លាំងជំនាញមន្ទីរប្រឆាំងគ្រឿងញៀន និងកម្លាំងជំនាញរបស់ស្នងការដ្ឋាននគរបាលរាជធានីភ្នំពេញ ដោយមានការសម្របសម្រួល ពីព្រះរាជអជ្ញានៃអយ្យកាអមសាលាដំបូងរាជធានីភ្នំពេញ នៅម៉ោងប្រមាណ ២៖០០នាទី រំលងអធ្រាត្រឈានចូលថ្ងៃទី១០ ខែមីនា ឆ្នាំ២០២៤ បានឆ្មក់ចូលបង្ក្រាបក្លិបកម្សាន្ត City of Starry Sky ជាអតីតក្លិបកម្សាន្ត BOEING ដែលកម្លាំងមន្ទីរប្រឆាំងគ្រឿងញៀន ធ្លាប់បានបង្ក្រាបម្តងរួចហើយ កាលពីថ្ងៃទី៨ ខែតុលា ឆ្នាំ២០២៣ ប៉ុន្តែពេលនេះ ក្លិបកម្សាន្តនេះបានប្តូរឈ្មោះថ្មី និងលួចបង្កប់ការចែកចាយ និងប្រើប្រាស់គ្រឿងញៀនដដែល។ឧត្តមសេនីយ៍ឯកបន្តថា ក្នុងប្រតិបត្តិការឆ្មក់បង្ក្រាបនេះ កម្លាំងជំនាញបានឃាត់ខ្លួនមនុស្ស ៨៧នាក់ ដែលមានជនជាតិចិន វៀតណាម និងកម្ពុជា យកមកសាកសួរ មុននឹងសម្រេចបន្តនីតិវិធី។ ចំណែកឯវត្ថុតាងដែលរឹបអូស បានកម្លាំងជំនាញកំពុងរៀបចំវេចខ្ចប់ បើតាមការប៉ាន់ស្មានបឋមប្រមាណ ៣គីឡូក្រាម។ បច្ចុប្បន្នសមត្ថកិច្ចនៃមន្ទីរប្រឆាំងគ្រឿងញៀន កំពុងសាកសួរ ធ្វើតេស្តរកសារធាតុញៀនលើជនសង្ស័យទាំងអស់ ដើម្បីស្រាវជ្រាវបង្ក្រាប មេខ្លោង អ្នកជូញដូរ អ្នកញៀនគ្រឿងញៀន និងកសាងសំណុំរឿងប្រមូលភស្តុតាងបញ្ជូនទៅតុលាការ ចាត់ការតាមច្បាប់៕

ចំនួនពលរដ្ឋប៉ាឡេស្ទីនស្លាប់នៅហ្កាហ្សា កើនឡើងដល់ ៣០.៩៦០នាក់ ខណៈមានការវាយប្រហារកាន់តែខ្លាំងពីអ៊ីស្រាអែល

ក្រសួងសុខាភិបាលមានមូលដ្ឋាននៅក្នុងតំបន់ហ្កាហ្សាបាននិយាយកាលពីថ្ងៃសៅរ៍ថា ចំនួនអ្នកស្លាប់របស់ពលរដ្ឋប៉ាឡេស្ទីនពីការវាយប្រហារដ៏សន្ធឹកសន្ធាប់ឥតឈប់របស់អ៊ីស្រាអែលនៅតំបន់ហ្កាហ្សាស្ទ្រីបបានកើនឡើងដល់ ៣០.៩៦០នាក់។ ក្រសួងបាននិយាយនៅក្នុងសេចក្តីថ្លែងការណ៍មួយថា ក្នុងរយៈពេល២៤ ម៉ោងកន្លងមកនេះ កងទ័ពអ៊ីស្រាអែលបានសម្លាប់ពលរដ្ឋប៉ាឡេស្ទីនចំនួន៨២ នាក់ និងប្រហែល ១២២នាក់ផ្សេងទៀតរងរបួស។យោងតាមរបាយការណ៍ដែលចេញផ្សាយដោយទីភ្នាក់ងារព័ត៌មានប៉ាឡេស្ទីនកាលពីថ្ងៃសៅរ៍ កងទ័ពអ៊ីស្រាអែលបានទម្លាក់គ្រាប់បែកយ៉ាងសន្ធាប់ទៅលើតំបន់ជាច្រើននៅភាគខាងជើង និងភាគខាងត្បូងហ្កាហ្សាស្ទ្រីបកាលពីល្ងាចថ្ងៃសុក្រ ដោយបានសម្លាប់មនុស្សយ៉ាងហោចណាស់៣៨នាក់។របាយការណ៍ដដែលនោះបាននិយាយថា ការវាយប្រហារតាមអាកាសរបស់អ៊ីស្រាអែលបានសម្លាប់មនុស្សយ៉ាងហោចណាស់៩នាក់លើលំនៅដ្ឋានមួយកន្លែងនៅក្នុងជំរំជនភៀសខ្លួនចាបាលីយ៉ា( Jabalia) នៅភាគខាងជើងតំបន់ហ្កាហ្សាស្ទ្រីប កាលពីល្ងាចថ្ងៃសុក្រ។ កាលពីព្រឹកថ្ងៃសៅរ៍ កងទ័ពអ៊ីស្រាអែលបានបើកការវាយប្រហារផ្លូវអាកាសលើលំនៅឋានជាច្រើនកន្លែងក្នុងទីក្រុងហ្កាហ្សា ដោយបានសម្លាប់មនុស្សយ៉ាងហោចណាស់ ៦ នាក់។កងទ័ពអ៊ីស្រាអែលក៏បានទម្លាក់គ្រាប់បែកយ៉ាងខ្លាំងក្លាទៅលើតំបន់ជាច្រើននៅក្នុងទីក្រុងហ្កាហ្សាស្រ្ទីប ភាគខាងត្បូងទីក្រុងខាន់យ៉ូនីស និងក្រុងរ៉ាហ្វា នៅថ្ងៃជាមួយគ្នានោះផងដែរ ដោយបានសម្លាប់មនុស្សយ៉ាងហោចណាស់២៣នាក់ ៕

បណ្ដាញសង្គម

ព័ត៌មានថ្មីៗ

អ៊ីរ៉ាក់នឹងកាត់បន្ថយការផលិតប្រេង បើសិនជានាវាដឹកប្រេងមិនអាចធ្វើដំណើរឆ្លងកាត់ច្រកសមុទ្រ Hormuz

បារាំងបង្ហាញ «សាមគ្គីភាព» ជាមួយអេស្ប៉ាញ ក្រោយមានការគំរាមកំហែងពីអាមេរិកលើទីក្រុងម៉ាឌ្រីដ

ប្រតិភូអនុព័ន្ធយោធាបរទេស បន្តចុះសួរសុខទុក្ខប្រជាជនភៀសសឹកកម្ពុជាកំពុងបន្តរស់នៅជំរំក្នុងវត្តកណ្តោល ស្រុកថ្មពួកដែលមិនទាន់អាចវិលត្រឡប់ទៅកាន់លំនៅដ្ឋានវិញបានដោយសារថៃឈ្លានពាន

រដ្ឋមន្ត្រីក្រសួងកសិកម្ម ទទួលជួបគណៈប្រតិភូក្រុមប្រឹក្សាធុរកិច្ចសហភាពអឺរ៉ុប-អាស៊ានដើម្បីរកឱកាសវិនិយោគនៅប្រទេសកម្ពុជា

ការបាញ់ផ្លោង និងការផ្ទុះយ៉ាងខ្លាំង បង្កឲ្យមានការភ័យខ្លាចតាមបណ្តោយព្រំដែនប៉ាគីស្ថាន-អាហ្វហ្គានីស្ថាន

ស្ថាប័នបោះឆ្នោតថៃ អះអាងលទ្ធផលបោះឆ្នោតផ្លូវការ ដោយបើកផ្លូវឲ្យមានសភាថ្មី

យានដ្រូនរាប់រយគ្រឿងមានគោលដៅនៅគូវ៉ែត អ៊ីរ៉ាក់ អារ៉ាប៊ីសាអ៊ូឌីត និងអារ៉ាប់រួម ស្របពេលផ្ទុះសង្រ្គាមអ៊ីរ៉ង់

ឯកឧត្ដមឧបនាយករដ្ឋមន្ត្រី ហ៊ុន ម៉ានី អញ្ជើញជាអធិបតីក្នុងពិធីសមោសរនៃកិច្ចប្រជុំកំពូលធុរកិច្ចអាស៊ាន-កម្ពុជា ឆ្នាំ២០២៦ នៅភ្នំពេញ

ផ្លូវបានបិទ នគរបាលមកដល់ ក្រោយផ្សែងហុយនៅជិតស្ថានកុងស៊ុលសហរដ្ឋអាមេរិក ក្នុងទីក្រុង Dubai

អ៊ីស្រាអែលវាយប្រហារ និងបំផ្លាញទីតាំងអ៊ីរ៉ង់មានការជាប់ពាក់ព័ន្ធនឹងកម្មវិធីអាវុធនុយក្លេអ៊ែរ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877