BTV NEWS

ឃាត់ខ្លួនជនពាក់ព័ន្ធ Online Scams ជាង ៦៥០នាក់ នៅបាវិត ភាគច្រើនជាជនបរទេស

ជនជាតិវៀតណាមសរុប ៣៤នាក់ ត្រូវបានបណ្តេញចេញពីកម្ពុជា តាមប៉ុស្តិ៍នគរបាលច្រកទ្វារព្រំដែនអន្តរជាតិបាវិត ខេត្តស្វាយរៀង

កាស៊ីណូ ស៊ីលវើរ ស្តារនៅក្រុងបាវិតត្រូវបានព្យួរអាជ្ញាប័ណ្ណបន្ទាប់ពី រកឃើញមានជាប់ពាក់ព័ន្ធនឹងការឆបោកតាមប្រព័ន្ធបច្ចេកវិទ្យា

ឃាត់ខ្លួនជនបរទេសជាង១០០នាក់ ពាក់ព័ន្ធការឆបោកតាមប្រព័ន្ធបច្ចេកវិទ្យា ក្នុងអគារខនដូរ១កន្លែង នៅសង្កាត់បឹងសាឡាង ខណ្ឌទួលគោក

សន្តិសុខ និង សង្គម

លោកស្រី Yulia Navalnaya ទាមទារឲ្យអាជ្ញាធរប្រគល់សពស្វាមី និងហៅជំនឿរបស់លោក Putin ថា «ក្លែងក្លាយ»

អ្នកស្រី Yulia Navalnaya ដែលជាភរិយាមេម៉ាយរបស់អតីតមេដឹកនាំប្រឆាំងរុស្ស៊ី លោក Alexei Navalny នៅថ្ងៃសៅរ៍ (ទី២៤ ខែកុម្ភៈ) នេះ បានទាមទារឲ្យអាជ្ញាធររុស្ស៊ីប្រគល់សពស្វាមីរបស់លោកស្រី ដើម្បីយកទៅបញ្ចុះ ហើយបានចោទប្រកាន់ប្រធានាធិបតីរុស្ស៊ី លោក Vladimir Putin ថា ជា «បុគ្គលគ្មានមេត្តា» ដោយសារ «ធ្វើអំពើទារុណ» លើសពរបស់លោក Navalny។នៅក្នុងវីដេអូរយៈពេល ៦នាទីដែលត្រូវបានបង្ហោះនៅលើឆានែល YouTube លោកស្រី Navalnaya បានចោទប្រកាន់លោក Putin ថា បានខាំងទុកសពស្វាមីរបស់លោកជា «ចំណាប់ខ្មាំង» ហើយបានចោទសួរអំពីជំនឿក្នុងគ្រិស្តសាសនារបស់លោក Putin ម្ដងហើយម្ដងទៀត។ម្តាយរបស់សពលោក Navalny លោកស្រី Lyudmila កាលពីថ្ងៃសុក្រ (ទី២៣ ខែកុម្ភៈ) បាននិយាយថា អ្នកស៊ើបអង្កេតរុស្ស៊ី បានបដិសេធមិនឲ្យយកសពកូនរបស់គាត់ពីកន្លែងតម្កល់សព នៅទីក្រុងដាច់ស្រយាល Salekhard នៃតំបន់អាក់ទិកនោះទេ លុះត្រាតែលោកស្រីយល់ព្រមបញ្ចុះសព ដោយគ្មានពិធីបុណ្យសពជាសាធារណៈ។នៅក្នុងវីដេអូនោះ លោកស្រី Yulia Navalnaya ដែលពេញដោយអារម្មណ៍រំជួលចិត្ត បានអះអាងថា លោក Putin ជាអ្នកទទួលខុសត្រូវដោយផ្ទាល់ ចំពោះកន្លែងលាក់សពរបស់លោក Navalny ហើយថា លោកកំពុង «ធ្វើទារុណកម្ម» លើលោក Navalny ពេលស្លាប់ ដូចពេលលោកនៅមានជីវិត។លោកស្រី Navalnaya ក្នុងសម្លៀកបំពាក់ពណ៌ខ្មៅ បាននិយាយថា៖ «យើងបានដឹងរួចហើយថា ជំនឿរបស់លោក Putin គឺក្លែងក្លាយ។ ប៉ុន្តែឥឡូវនេះ យើងឃើញកាន់តែច្បាស់ជាងពេលមុន។ គ្មានអ្នកកាន់សាសនាគ្រិស្តពិតប្រាកដណាម្នាក់ អាចធ្វើអ្វីដែលលោក Putin កំពុងធ្វើជាមួយនឹងសពរបស់លោក Alexei បានយ៉ាងដូច្នេះទេ»៕

ការបំផ្ទុះគ្រាប់បែកនៅមហាវិទ្យាល័យក្នុងរដ្ឋ Manipur របស់ឥណ្ឌា សម្លាប់មនុស្សម្នាក់

មន្ត្រីសន្តិសុខបានឲ្យដឹងថា មនុស្សម្នាក់បានស្លាប់ និងម្នាក់ទៀតរងរបួស ក្នុងការហេតុការណ៍បំផ្ទុះគ្រាប់បែក នៅមហាវិទ្យាល័យមួយ ក្នុងរដ្ឋធានី Imphal នៃរដ្ឋ Manipur ភាគឦសាននៃប្រទេសឥណ្ឌា កាលពីយប់ថ្ងៃសុក្រ (ទី២៣ ខែកុម្ភៈ)។ក្រុមមន្ត្រីបានប្រាប់បន្ថែមថា នៅមិនទាន់មានក្រុមណាមួយចេញមុខមកទទួលខុសត្រូវ ចំពោះការបំផ្ទុះ ដោយឧបករណ៍បំផ្ទុះកែច្នៃ (IED) នេះទេ។មន្ត្រីមួយរូប បានប្រាប់ថា៖ «ឧបករណ៍ IED បានផ្ទុះនៅក្នុងបរិវេណនៃមហាវិទ្យាល័យ (បរិវេណមហាវិទ្យាល័យ DM) នៅក្នុងទីក្រុង។ មនុស្សម្នាក់បានស្លាប់ ហើយម្នាក់ទៀត កំពុងសម្រាកព្យាបាល នៅមន្ទីរពេទ្យ»។គួរបញ្ជាក់ដែរថា រដ្ឋ Manipur បានកើតមាននូវការប្រយុទ្ធគ្នាយ៉ាងខ្លាំងក្លា ចាប់តាំងពីខែឧសភា ឆ្នាំ២០២៣ មក រវាងសមាជិកភាគច្រើននៃសហគមន៍ Meitei និងជនជាតិភាគតិច Kuki ពាក់ព័ន្ធការបែងចែកអត្ថប្រយោជន៍សេដ្ឋកិច្ច និងកូតា ដែលត្រូវបានផ្តល់ដល់ក្រុមកុលសម្ព័ន្ធ។ មនុស្សជិត ២០០នាក់ ត្រូវបានសម្លាប់ នៅក្នុងជម្លោះនេះ។ការផ្ទុះគ្រាប់បែក កាលពីថ្ងៃសុក្រ (ទី២៣ ខែកុម្ភៈ) បានកើតឡើងនៅក្នុងការិយាល័យរបស់ All Manipur Students' Union ដែលជាអង្គការនិស្សិតមានទីតាំងនៅខាងក្នុងបរិវេណសាកលវិទ្យាល័យ DM នៅតំបន់ Imphal West៕

អាជ្ញាធរអូស្ត្រាលី ជំរុញឲ្យមនុស្សរាប់រយនាក់ភៀសខ្លួនចេញពីចំហេះព្រៃដែលមិនអាចគ្រប់គ្រងបាន

ចំហេះព្រៃនៅក្នុងរដ្ឋ Victoria របស់អូស្ត្រាលី បានរាលដាលយ៉ាងឆាប់រហ័ស នៅថ្ងៃសៅរ៍ (ទី២៤ ខែកុម្ភៈ) ដោយបានបង្ខំឲ្យអាជ្ញាធរចេញការជូនដំណឹងអំពីការជម្លៀសថ្មី ក្នុងកម្រិតគ្រោះថ្នាក់ខ្ពស់បំផុត សម្រាប់អ្នកស្រុករាប់រយនាក់ នៅភាគខាងលិចរបស់រដ្ឋនេះ។ការព្រមានជាបន្ទាន់នេះ បានធ្វើឡើងបន្ទាប់ពីមានការបន្ថយកម្រិត នៅថ្ងៃសៅរ៍នេះ សម្រាប់ចំហេះព្រៃមួយផ្សេងទៀត ដែលបានកើតមានឡើងកាលពីដើមសប្តាហ៍នេះ ដោយការឆាបឆេះនេះបានសម្លាប់សត្វពាហនៈ បំផ្លាញទ្រព្យសម្បត្តិ និងបង្ខំឲ្យមនុស្សជាង ២.០០០នាក់ចាកចេញពីទីប្រជុំជនភាគខាងលិច ហើយឆ្ពោះទៅកាន់ទីក្រុង Ballarat ចម្ងាយ ៩៥គីឡូម៉ែត្រ នៅភាគខាងលិចនៃរដ្ឋធានី Melbourne។អណ្ដាតភ្លើងថ្មីនេះកំពុងគំរាមកំហែងដល់ទីប្រជុំជនជនបទ Amphitheatre ដែលមានប្រជាជនចំនួន ២២៣នាក់។ អង្គភាពគ្រប់គ្រាអាសន្នរបស់រដ្ឋ Victoria (Vic Emergency) បានឲ្យដឹងនៅលើគេហទំព័ររបស់ខ្លួនថា «ការចាកចេញភ្លាមៗ គឺជាជម្រើសដ៏មានសុវត្ថិភាពបំផុត មុនពេលស្ថានភាពប្រែក្លាយទៅជាគ្រោះថ្នាក់ខ្លាំងឡើង» ដោយបន្ថែមថា ចំហេះមិនទាន់អាចគ្រប់គ្រងបាននៅឡើយទេ។សារព័ត៌មាន Australian Broadcasting Corp បានរាយការណ៍នៅថ្ងៃសៅរ៍នេះថា ផ្ទះចំនួន ៣ខ្នង និងអគារតូចៗជាច្រើនខ្នង ត្រូវបានបំផ្លិចបំផ្លាញក្នុងសប្តាហ៍នេះ នៅក្នុងការសង្គ្រោះបន្ទាន់ពីចំហេះព្រៃ នៅរដ្ឋ Victoria ។ អ្នកពន្លត់អគ្គិភ័យប្រហែល ១.០០០នាក់ដែលមានការគាំទ្រពីយន្តហោះជាង ៥០គ្រឿង បានប្រយុទ្ធនឹងអគ្គិភ័យ ចាប់តាំងពីអណ្ដាតភ្លើងបានចាប់ផ្តើមឆាបឆេះឡើង៕

អាមេរិកព្រមានពីមហន្តរាយបរិស្ថាន ដោយសារនាវាដឹកទំនិញដែលរងការវាយប្រហារពីក្រុមឧទ្ទាមហ៊ួទី

នាវាដឹកទំនិញ ១គ្រឿងដែលត្រូវបានបោះបង់ចោល នៅឈូងសមុទ្រ Aden បន្ទាប់ពីរងការវាយប្រហារពីពួកឧទ្ទាមរបស់ប្រទេសយេម៉ែន កំពុងជា្របទឹក ហើយធ្វើឲ្យមានប្រេងអណ្ដែតត្រៀបត្រា ជាគ្រោះមហន្តរាយបរិស្ថាន ដែលបញ្ជាការកណ្តាលរបស់សហរដ្ឋអាមេរិក (CENTCOM) កាលពីថ្ងៃសុក្រ (ទី២៣ ខែកុម្ភៈ) បាននិយាយថា អាចមានសភាពកាន់តែអាក្រក់ទៅៗ។នាវា Rubymar ជានាវាដឹកទំនិញដែលមានទង់ជាតិរបស់ប្រទេសបេលី ចុះបញ្ជីដោយអង់គ្លេស និងលីបង់ដែលដឹកជីឥន្ធនៈ ត្រូវរងការខូចខាតនៅក្នុងការវាយប្រហារដោយមីស៊ីល កាលពីថ្ងៃអាទិត្យ (ទី១៨ ខែកុម្ភៈ) ដោយការវាយប្រហារនោះត្រូវអះអាងថា ជាស្នាដៃរបស់ខ្លួនពីសំណាក់ក្រុមឧទ្ទាមហ៊ួទីដែលគាំទ្រដោយអ៊ីរ៉ង់។ក្រុមប្រតិបត្តិកររបស់នាវា គឺក្រុមហ៊ុន Blue Fleet Group បាននិយាយថា ក្រុមនាវិកត្រូវបានជម្លៀសទៅកាន់ប្រទេសជីប៊ូទី បន្ទាប់ពីមីស៊ីលមួយគ្រាប់បានវាយប្រហារផ្នែកម្ខាងរបស់នាវា ដែលនាំឲ្យមានទឹកជ្រាបចូលក្នុងបន្ទប់ម៉ាស៊ីន ហើយផ្នែកខាងក្រោយចាប់លិចបន្តិចម្ដងៗ។មីស៊ីលគ្រាប់ទី២ បានវាយប្រហារត្រូវដំបូលនាវា ដោយមិនបានបង្កឲ្យមានការខូចខាតធំដុំនោះទេ។ នេះបើតាមលោក Roy Khoury នាយកប្រតិបត្តិក្រុមហ៊ុន Blue Fleet បានប្រាប់សារព័ត៌មាន AFP។ CENTCOM បានឲ្យដឹងថា នាវានេះត្រូវបានបោះយុថ្កា ប៉ុន្តែបានជា្របទឹកយឺតៗ ហើយបានធ្វើឲ្យមានប្រេងអណ្ដែតត្រៀបត្រា ២៩គីឡូម៉ែត្រ៕

អ៊ុយក្រែនបន្តប្រយុទ្ធការពារ ខណៈសង្រ្គាមរុស្ស៊ី ឈានចូលដល់ឆ្នាំទី៣

ប្រទេសអ៊ុយក្រែន នៅថ្ងៃសៅរ៍ (ទី២៤ ខែកុម្ភៈ) នេះ បានប្រារព្ធខួប ២ឆ្នាំ ចាប់តាំងមានពីការលុកលុយពីសំណាក់រុស្ស៊ី ដោយប្រទេសនេះកំពុងប្រឈមជាមួយឆ្នាំថ្មីនៃសង្រ្គាមដែលត្រូវបានធ្វើចុះខ្សោយដោយសារការខ្វះខាតជំនួយរបស់លោកខាងលិច ខណៈដែលរុស្ស៊ីកំពុងមានសន្ទុះដោយសារការទទួលបានជ័យជម្នះថ្មីៗ។នៅពេលដែលប្រធានាធិបតីរុស្ស៊ី លោក Vladimir Putin បានប្រកាសពី «ប្រតិបត្តិការយោធាពិសេស» នៅព្រឹកព្រលឹមថ្ងៃទី២៤ ខែកុម្ភៈ ឆ្នាំ២០២២ មជ្ឈដ្ឋានជាច្រើនរំពឹងថា ទីក្រុងមូស្គូនឹងជោគជ័យក្នុងរយៈពេលតែប៉ុន្មានថ្ងៃប៉ុណ្ណោះ តែផ្ទុយទៅវិញអ៊ុយក្រែនបានប្រយុទ្ធការពារ និងវាយតបតយ៉ាងរឹងមាំ រហូតធ្វើឲ្យទាហានរុស្ស៊ីដកថយយ៉ាងអាម៉ាស់។ប៉ុន្តែអ៊ុយក្រែនបានជួបនឹងឧបសគ្គ ដោយបរាជ័យ សម្រាប់ការវាយបករបស់ខ្លួន នៅឆ្នាំ២០២៣។ ហើយកងទ័ពរុស្ស៊ីបានកសាងនូវជំហរកងកម្លាំងដ៏រឹងមាំ ដោយសារការបង្កើនផលិតកម្មយោធា ខណៈដែលកងទ័ពអ៊ុយក្រែនកំពុងខ្វះកម្លាំងមនុស្ស និងកាន់តែអស់ទៅៗនូវគ្រាប់កាំភ្លើងធំ និងប្រព័ន្ធការពារដែនអាកាសដែលផ្គត់ផ្គង់ដោយលោកខាងលិច។ប្រធានាធិបតីអ៊ុយក្រែនលោក Volodymyr Zelenskyy កាលពីថ្ងៃសុក្រ ទី២៣ ខែកុម្ភៈ) បាននិយាយថា ការសម្រេចជុំវិញការផ្គត់ផ្គង់អាវុធ ត្រូវតែជា «អាទិភាពចម្បង»។ខួបសង្គ្រាម នាថ្ងៃសៅរ៍នេះ នឹងឃើញដំណើរទស្សនកិច្ចរបស់បណ្ដាមេដឹកនាំលោកខាងលិច ដោយក្នុងនោះរួមទាំងប្រធានគណៈកម្មការសហភាពអឺរ៉ុប លោកស្រី Ursula von der Leyen ផងដែរ តែទិដ្ឋភាពជារួម នៅតែអាប់អួដដែលសម្រាប់ទីក្រុងគីវ ដោយសារតែសភាអាមេរិកបានរារាំងកញ្ចប់ជំនួយដ៏សំខាន់ចំនួន ៦០ពាន់លានដុល្លារ។ ប្រធានាធិបតីអាមេរិកលោក Joe Biden បានអំពាវនាវជាថ្មីឲ្យសមាជិកសភាមកពីគណបក្សសាធារណរដ្ឋព្រមបើកផ្លូវដល់ការផ្តល់មូលនិធិបន្ថែម ដោយព្រមានថា «ប្រវត្តិសាស្រ្តកំពុងរង់ចាំនៅខាងមុខ» ហើយ «ការខាកខានមិនបានគាំទ្រដល់អ៊ុយក្រែន ក្នុងគ្រាដ៏សំខាន់នេះ នឹងត្រូវបានគេចងចាំជារៀងរហូត»៕

កសិករឆាបឆួលដោយកំហឹង ត្រៀមប្រឈមមុខជាមួយលោក Macron នៅពិព័រណ៍កសិកម្មក្រុងប៉ារីស

កសិករបានរៀបចំតវ៉ា នៅថ្ងៃសៅរ៍ (ទី២៤ ខែកុម្ភៈ) នេះ ដើម្បីប្រឆាំងនឹងដំណើរទស្សនកិច្ចរបស់ប្រធានាធិបតីបារាំងលោក Emmanuel Macron ទៅកាន់ពិព័រណ៍កសិកម្ម នៅទីក្រុងប៉ារីស ក្នុងពេលដែលមានអារម្មណ៍ឆាបឆួលដោយកំហឹង ដោយសារការចំណាយ ការិយាធិបតេយ្យហួសហេតុ និងបទប្បញ្ញត្តិបៃតង។ត្រាក់ទ័ររាប់សិបគ្រឿងបានបើកចូលក្នុងរដ្ឋធានីបារាំង កាលពីរសៀលថ្ងៃសុក្រ (ទី២៣ ខែកុម្ភៈ) អមដោយការចុចស៊ីផ្លេលាន់កងរំពងពេញផ្លូវ។ ក្នុងចំណោមនោះ ត្រាក់ទ័រ ១គ្រឿង បានព្យួរបដាដែលសរសេរថា «លោក Macron! អ្នកកំពុងសាបគ្រាប់ពូជព្យុះភ្លៀង ដូច្នេះ ប្រយ័ត្នទទួលបានផលពីអ្វីដែលអ្នកបានធ្វើ»។គួរបញ្ជាក់ថា កសិករបានធ្វើការតវ៉ានៅទូទាំងទ្វីបអឺរ៉ុប ដោយអំពាវនាវឲ្យមានប្រាក់ចំណូលប្រសើរជាងមុន និងការិយាធិបតេយ្យតិចតួច និងត្អូញត្អែរពីការប្រកួតប្រជែងមិនយុត្តិធម៌ពីទំនិញតម្លៃថោករបស់អ៊ុយក្រែន។ សហភាពអឺរ៉ុប ក្នុងឆ្នាំ២០២២ បានលើកលែងពន្ធលើការនាំចូលអាហាររបស់អ៊ុយក្រែន ដើម្បីគាំទ្រសេដ្ឋកិច្ចរបស់ប្រទេសនេះ បន្ទាប់ពីមានការលុកលុយរបស់រុស្ស៊ី។លោក Jean Lefevre ជាសមាជិករបស់ FNSEA ដែលជាសហជីពកសិកម្មដ៏ធំបំផុតរបស់ប្រទេសបារាំងបានប្រាប់សារព័ត៌មាន Reuters ថា៖ «កសិករមួយចំនួននឹងព្យាយាមរារាំងលោកប្រធានាធិបតី (លោក Macron) មិនឲ្យចូលទៅក្នុងពិព័រណ៍ពាណិជ្ជកម្ម។ ហើយប្រសិនបើរូបលោកចូលទៅ ពួកគេនឹងរំខានការដើរមើលរបស់លោក នៅទីនោះ»។លោក Macron បានលុបចោលការជជែកដេញដោលដែលលោកចង់រៀបចំនៅក្នុងពិព័រណ៍កសិកម្ម នៅថ្ងៃសៅរ៍នេះ ជាមួយកសិករ អ្នកកែច្នៃម្ហូបអាហារ និងអ្នកលក់រាយ បន្ទាប់ពីសហជីពកសិករបាននិយាយថាពួកគេនឹងមិនទៅចូលរួមនោះទេ ដោយនេះគឺសញ្ញាមួយផ្សេងទៀត ដែលបង្ហាញថា តើទំនាក់ទំនងដ៏តានតឹង រវាងកសិករ និងរដ្ឋាភិបាល នៅតែមានដដែលកម្រិតណា៕

មនុស្សយ៉ាងហោចណាស់១៥នាក់ស្លាប់ ក្នុងអគ្គិភ័យឆេះអគារលំនៅឋាន នៅប្រទេសចិន

អាជ្ញាធរ ក្នុងតំបន់បាននិយាយនៅថ្ងៃសៅរ៍ទី ២៤ ខែកុម្ភៈនេះថា យ៉ាងហោចណាស់មនុស្ស ១៥ នាក់បានស្លាប់ និង៤៤នាក់បានរងរបួសនៅក្នុងអគ្គិភ័យឆាបឆេះអគារលំនៅឋានមួយកន្លែងក្នុងទីក្រុង Nanjing ភាគខាងកើត ប្រទេសចិន។មន្ត្រី បាននិយាយនៅក្នុងសន្និសីទសារព័ត៌មានថា អគ្គិភ័យ បានឆាបឆេះកាលពីថ្ងៃសុក្រ ដោយការស៊ើបអង្កេតបឋមបង្ហាញថា អគ្គិភ័យបានចាប់ផ្តើមនៅអគារជាន់ទីមួយ ជាកន្លែងដាក់កង់អគ្គិសនី។ អគារនេះ មានទីតាំងស្ថិតនៅសង្កាត់ Yuhuatai ទីក្រុង Nanjing ជាទីក្រុងមានប្រជាជនរស់នៅជាង៨លាននាក់ ដែលស្ថិតនៅចម្ងាយប្រហែល ២៦០គីឡូម៉ែត្រ ភាគពាយព្យទីក្រុងសៀងហៃ។អាជ្ញាធរបាននិយាយថា អគ្គិភ័យត្រូវបានពន្លត់ ហើយប្រតិបត្តិការស្វែងរកនិងជួយសង្គ្រោះ បានបញ្ចប់នៅម៉ោង២ រសៀលថ្ងៃសុក្រ។ អង្គភាពសេវាសង្គ្រោះបន្ទាន់ បាននិយាយថា រថយន្តពន្លត់អគ្គីភ័យចំនួន ២៥ គ្រឿង ត្រូវបានដាក់ឲ្យចល័ត ដើម្បីពន្លត់អគ្គិភ័យ។វីដេអូដែលចែករំលែកនៅលើបណ្ដាញសង្គមប្រទេសចិន បានបង្ហាញអគារខ្ពស់កប់ពពកមួយកន្លែង ត្រូវបានភ្លើងឆេះនៅពាក់កណ្តាលអធ្រាត្រ ដោយមានផ្សែងខ្មៅហុយចេញ។ក្រុមមន្ត្រីនិយាយថា អ្នករងរបួសចំនួន៤៤នាក់ ត្រូវបានបញ្ជូនទៅមន្ទីរពេទ្យ ដើម្បីព្យាបាល ហើយម្នាក់ក្នុងចំណោមអ្នករងរបួស ស្ថិតក្នុងស្ថានភាពធ្ងន់ធ្ងរ។

ភ្លៀងធ្លាក់ខ្លាំងនៅភាគខាងត្បូងប្រទេសប៉េរូ ប្រជាជនកំពុងស្ថិតក្រោមការព្រមានពណ៌ក្រហម

ភ្លៀងធ្លាក់ខ្លាំងកាលពីថ្ងៃសុក្រ បណ្តាលឲ្យជន់លិចតំបន់ភាគខាងត្បូងប្រទេសប៉េរូ និងបានធ្វើឲ្យខូចខាតលំនៅឋានច្រើនខ្នង និងផ្លូវជាច្រើនខ្សែ។ អាជ្ញាធរ បានចេញការព្រមានពណ៌ក្រហម នៅទីក្រុង ម៉ូហ្គូហ្គា(Moquegua) ខណៈភ្លៀងធ្លាក់អាចបង្កទឹកជំនន់។ ប្រព័ន្ធផ្សព្វផ្សាយក្នុងស្រុក បានរាយការណ៍ថា នៅទីក្រុង Yura លំនៅឋានជាង ៥០ខ្នង ត្រូវបានជន់លិចដោយសារភ្លៀងធ្លាក់ខ្លាំង។យោងតាមប្រព័ន្ធផ្សព្វផ្សាយក្នុងស្រុក បានរាយការណ៍ថា នៅទីក្រុង Inapari លំនៅឋានចំនួន ៩០ខ្នងបានរងការខូចខាត បន្ទាប់ពីទឹកទន្លេ Acre បានហក់ឡើងខ្ពស់ ។ អង្គភាពសេវាឧតុនិយមជាតិ Senamhi បានព្យាករណ៍ថា ភ្លៀងនឹងបន្តធ្លាក់នៅចុងសប្តាហ៍នេះ។រដ្ឋាភិបាលប្រទេសប៉េរូ បានប្រកាសរដ្ឋក្នុងគ្រាអាសន្នរយៈពេល ៦០ ថ្ងៃសម្រាប់តំបន់ជាច្រើននៅទូទាំងប្រទេសប៉េរូ ដោយសារការបំផ្លាញបណ្តាលមកពីភ្លៀងធ្លាក់ខ្លាំងនាពេលថ្មីៗនេះ ជាពិសេសនៅតំបន់ភ្នំដាច់ស្រយាល។ ភ្លៀងធ្លាក់ខ្លាំង អាចបង្កឲ្យមានបំណាក់ដី ទឹកជំនន់ដ៏គំហុក ការបាក់ច្រាំងទន្លេ ការបាក់ស្ពាន ព្រមទាំងការខូចខាតទ្រព្យសម្បត្តិ។ ផ្លូវនានា រួមទាំងផ្លូវហាយវ៉េ អាចបិទភ្លាមៗ ហើយបិទក្នុងរយៈពេលមិនកំណត់ ជាពិសេសនៅតំបន់ដាច់ស្រយាល។ ការធ្វើដំណើរ អាចរងផលប៉ះពាល់ពេញមួយរដូវវស្សា ដែលជាធម្មតាបញ្ចប់នៅថ្ងៃទី ៣១ ខែមីនា។ប្រជាជនដែលរស់នៅក្នុង ឬធ្វើដំណើរឆ្លងកាត់តំបន់ដែលងាយរងគ្រោះទឹកជំនន់ ត្រូវបានជំរុញឱ្យមានចំណាត់ការបង្ការជាមុន ជៀសឱ្យឆ្ងាយពីទឹកអូរ និងទន្លេ ពិចារណាឡើងវិញនូវការឆ្លងកាត់តាមដងស្ទឹងទន្លេ និងត្រូវយកចិត្តទុកដាក់លើការណែនាំរបស់អាជ្ញាធរតំបន់។

ផែនការក្រោយសង្គ្រាមរបស់លោក Netanyahu មើលឃើញថា អ៊ីស្រាអែលនៅតែគ្រប់គ្រងតំបន់ប៉ាឡេស្ទីន

នាយករដ្ឋមន្ត្រីប្រទេសអ៊ីស្រាអែល លោក Benjamin Netanyahu បានបង្ហាញផែនការ«ពេលថ្ងៃក្រោយ» ជាផ្លូវការលើកដំបូងរបស់លោកសម្រាប់តំបន់ហ្កាហ្សា នៅពេលដែលសង្រ្គាមបញ្ចប់ ដោយនិយាយថា អ៊ីស្រាអែល នឹងនៅតែគ្រប់គ្រងផ្នែកសន្តិសុខ លើតំបន់ជាច្រើនរបស់ប៉ាឡេស្ទីន និងកសាងឡើងវិញ ផ្អែកលើភាពគ្មានយោធា។ ផែនការ ដែលនាំមករួមគ្នានូវទីតាំងជាច្រើនរបស់អ៊ីស្រាអែលដែលបានបង្កើតឡើងយ៉ាងល្អជាបន្តបន្ទាប់ នោះបានបញ្ជាក់ពីការតស៊ូរបស់ លោក Netanyahu ចំពោះការបង្កើតរដ្ឋប៉ាឡេស្ទីន ដែលលោកមើលឃើញថា វាជាការគំរាមកំហែងផ្នែកសន្តិសុខ ដោយគ្មានការគ្រប់គ្រងច្បាស់លាស់នៅដំណាក់កាលណាមួយនាពេលអនាគត។ ឯកសារ ដែលត្រូវបានផ្តល់ដល់សមាជិកគណៈរដ្ឋមន្ត្រីសន្តិសុខ ជាឯកសារពិភាក្សាច្រើនជាងកម្មវិធីកំណត់ ដែលស្នើឲ្យអ៊ីស្រាអែល បន្តគ្រប់គ្រងសន្តិសុខលើដែនដីទាំងអស់នៅភាគខាងលិចប្រទេសហ្ស៊កដានី រួមមានទាំងតំបន់វ៉េសបេង(West Bank) និងហ្កាហ្សា ជាដែនដី ដែលប៉ាឡេស្ទីនសង្ឃឹមថានឹងបង្កើតរដ្ឋឯករាជ្យមួយ។ ផែនការនេះកើតឡើង ក្នុងពេលមានការអំពាវនាវជាអន្តរជាតិកាន់តែខ្លាំងឡើង ដើម្បីបញ្ចប់ការប្រយុទ្ធគ្នាដែលបានបំផ្លាញតំបន់ហ្កាហ្សាដ៏ធំធេង និងដើម្បីពិនិត្យឡើងវិញកិច្ចខិតខំប្រឹងប្រែងដើម្បីបង្កើតរដ្ឋប៉ាឡេស្ទីនរួមជាមួយប្រទេសអ៊ីស្រាអែល។ ប្រធានាធិបតីសហរដ្ឋអាមេរិក លោក Joe Biden ជាសម្ព័ន្ធមិត្តដ៏សំខាន់របស់អ៊ីស្រាអែល បាននិយាយថា មានតែដំណោះស្រាយរដ្ឋពីរប៉ុណ្ណោះ ដែលមានឱកាសនាំមកនូវសន្តិភាពយូរអង្វែង ហើយចូលរួមក្នុងកិច្ចខិតខំប្រឹងប្រែងផ្នែកការទូតខ្លាំងក្លា ដើម្បីកសាងការគាំទ្រក្នុងចំណោមរដ្ឋប្រចាំតំបន់ និងរដ្ឋផ្សេងទៀត។ ប៉ុន្មានម៉ោងបន្ទាប់ពីផែនការត្រូវបានបង្ហាញ រដ្ឋមន្ត្រីការបរទេសសហរដ្ឋអាមេរិក លោក Antony Blinken បាននិយាយថា ការពង្រីកទីតាំងទីលំនៅ របស់អ៊ីស្រាអែល នៅតំបន់កាន់កាប់ West Bank គឺមិនសមស្របទៅនឹងច្បាប់អន្តរជាតិនោះទេ។

កសិករប្រទេសឥណ្ឌា ធ្វើបាតុកម្មដោយមានអុជភ្លើងទៀន បន្ទាប់ពីការស្លាប់របស់អ្នកតវ៉ា

ប្រជាកសិករ នៅព្រំដែនរដ្ឋ ពុនចាប-ហារីយ៉ាណា(Punjab-Haryana) បានធ្វើបាតុកម្មដោយមានអុជភ្លើងទៀន កាលពីថ្ងៃសុក្រ បន្ទាប់ពីការស្លាប់របស់អ្នកតវ៉ាឈ្មោះ ស៊្សូបការ៉ាន ស៊ីង(Shubhkaran Singh)។ កសិករ បានដាក់កំហុសការស្លាប់របស់លោក ដោយសារតែការបំពានរបស់នគរបាល។លោក សាតាច ស៊ីង(Sartaj Singh) មន្ត្រីនគរបាលជាន់ខ្ពស់ ក្នុងស្រុក សាងរួ(Sangrur) នៃរដ្ឋ Punjab ជាកន្លែងដែលឧបទ្ទវហេតុបានកើតឡើង បាននិយាយថា បុរសនោះបានស្លាប់នៅកន្លែងតវ៉ា ប៉ុន្តែមូលហេតុនៃការស្លាប់ នឹងត្រូវបានដឹងបន្ទាប់ពីការធ្វើកោសល្យវិច័យ។ប្រធានរដ្ឋមន្ត្រីប្រចាំរដ្ឋ Punjab លោក បាគ្វាន ម៉ាន (Bhagwant Mann) កាលពីថ្ងៃសុក្រ បានប្រកាសផ្តល់សំណងចំនួន ១០ លានរូពី ឬ ១២០.០០០ ដុល្លារ ទៅឲ្យគ្រួសារបុរសដែលបានស្លាប់។មេដឹកនាំកសិករ បានច្រានចោលប្រាក់សំណងនេះ ហើយបាននិយាយថា ពួកគេនឹងមិនអនុញ្ញាតឱ្យធ្វើកោសល្យវិច័យឡើយ រហូតដល់ករណីឃាតកម្មនេះត្រូវបានចុះបញ្ជី។អង្គការលើកលែងទោសអន្តរជាតិ បានថ្កោលទោសការស្លាប់របស់អ្នកតវ៉ា ហើយបានជំរុញឱ្យរដ្ឋាភិបាល «គោរព ការពារ និងសម្របសម្រួល សិទ្ធិសេរីភាព ក្នុងការប្រមូលផ្តុំគ្នាដោយសន្តិវិធី»។កសិករដែលកំពុងតវ៉ា ភាគច្រើនជាអ្នកកាន់សាសនាស៊ីក(Sikhs) និងជាអ្នកដែលមកពីរដ្ឋ Punjab ភាគខាងជើង ទាមទារឱ្យតម្លៃឡើងខ្ពស់ជាងនេះសម្រាប់កសិផលរបស់ពួកគេ។ប្រជាកសិករ បានចាប់ផ្តើមចេញធ្វើបាតុកម្មទៅកាន់រដ្ឋធានី Delhi កាលពីដើមខែនេះ ដើម្បីជំរុញការទាមទារតម្លៃកសិផលឡើងខ្ពស់ជាងនេះ ទៅកាន់រដ្ឋាភិបាល។ ទោះជាយ៉ាងណា នគរបាលបានបញ្ឈប់ការដង្ហែរបាតុកម្ម ក្នុងចម្ងាយប្រហែល ២០០ គីឡូម៉ែត្រ ពីរដ្ឋធានី ដោយប្រើប្រាស់កាណុងបាញ់ទឹក និងឧស្ម័នបង្ហៀរទឹកភ្នែក ដើម្បីបង្អាក់ដល់ក្បួនបាតុកម្ម។

បណ្ដាញសង្គម

ព័ត៌មានថ្មីៗ

គិតត្រឹមថ្ងៃនេះ ក្រុមហ៊ុនរ៉ឺនេសង់ ផលិតមាសបាន ១៦ តោន និងបង់ចំណូលចូលរដ្ឋជាង ១២៦ លានដុល្លារ

ខ្មាន់កាំភ្លើងសម្លាប់នាយករងសាលា និងចាប់ពង្រត់សិស្សស្រី អំឡុងការវាយប្រហារលើសាលា នៅនីហ្សេរីយ៉ា

លោកនាយករដ្ឋមន្ត្រី Tusk៖ ការផ្ទុះលើផ្លូវរថភ្លើងរបស់ប៉ូឡូញ គឺបង្កឡើងដោយអំពើកាវិឆ្ឆេទកម្ម

អបអរសាទរពិធីការពារសារណាបញ្ចប់ការសិក្សាថ្នាក់បរិញ្ញាបត្រគិលានុបដ្ឋាក ជំនាន់ទី១០ ចំនួន ១៣ក្រុម និងបរិញ្ញាបត្រ ឆ្មប ជំនាន់ទី៧ ចំនួន ០៩ក្រុម

ចិន៖ នាយករដ្ឋមន្ត្រីចិន គ្មានគម្រោងជួបនាយករដ្ឋមន្ត្រីជប៉ុន ក្រៅកិច្ចប្រជុំ G20

គិតត្រឹមថ្ងៃទី១៧ វិច្ឆិកា ២០២៥ កម្ពុជា-ថៃ បោះបង្គោលបណ្តោះអាសន្នលើដីជាក់ស្តែងបានចំនួន ៩៤ បង្គោល

ប្រមុខការពារជាតិ EU៖ អឺរ៉ុប «មិនទាន់ត្រៀមខ្លួន» ទប់ទល់នឹងការវាយប្រហារដោយយានដ្រូនរបស់រុស្ស៊ី

ឯកឧត្តមទេសរដ្ឋមន្រ្តី អៀង មូលី អញ្ជើញជាអធិបតីដឹកនាំពិធីជួបសំណេះសំណាលជាមួយគណៈកម្មាធិការប្រយុទ្ធនឹងជំងឺអេដស៍ ក្រសួងសុខាភិបាលដែលបានកែសម្រួលសមាសភាពថ្មី

២១៦ សហភាព សហជីព សមាគម ន៨ងសហគមន៍ចេញសេចក្ដីថ្លែងការណ៍ថ្កោលទោសចំពោះអំពើចាប់រំលោភមកលើពលករស្ត្រីកម្ពុជា ដោយកងទ័ពឈុតខ្មៅថៃ

កិច្ចសហប្រតិបត្តិការកម្ពុជា-អាមេរិក សម្រេចបាននូវលទ្ធផលផ្លែផ្កា លើការអភិវឌ្ឍវិស័យសុខាភិបាល

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877