BTV NEWS

ករណីបុរសម្នាក់ឡើងលើផ្លូវល្បឿនលឿនPK54 យកដែកដាក់ទទឹងផ្លូវត្រូវបានសមត្ថកិច្ចនគរបាលស្រាវជ្រាវបង្រ្កាបបានហើយ

អង្គភាពប្រឆាំងអំពើពុករលួយបានធ្វើកោសល្យវិច័យទូរស័ព្ទជាង ៨០០គ្រឿង និងភស្តុតាងមួយចំនួនទៀតដែលសាលាដំបូងរាជធានីភ្នំពេញប្រគល់ឱ្យ

នគរបាលរាជធានីភ្នំពេញ ស្រាវជ្រាវឃាត់ខ្លួនក្មេងទំនើង ៩នាក់ ពាក់ព័ន្ធករណីវាយប្លន់យកម៉ូតូ

អាវុធហត្ថរាជធានីភ្នំពេញ បង្ក្រាបគ្រឿងញៀនជាង ៦គីឡូក្រាមឃាត់ខ្លួនមនុស្ស ១១នាក់

សន្តិសុខ និង សង្គម

លោកអេរដូហ្គែន ប្រាប់ប្រមុខUNថា អ៊ីស្រាអែល ត្រូវតែកាត់ទោស នៅតុលាការអន្តរជាតិចំពោះឧក្រិដ្ឋកម្មនៅតំបន់ហ្កាហ្សា

ការិយាល័យប្រធានាធិបតី បាននិយាយថា ប្រធានាធិបតីទួរគីលោក តាយីប អេរដូហ្គែន (Tayyip Erdogan) កាលពីថ្ងៃអង្គារ បានប្រាប់អគ្គលេខាធិការអង្គការសហប្រជាជាតិលោក អង់តូនីញ៉ូ ហ្គុយតឺរេស(Antonio Guterres)ថា អ៊ីស្រាអែល ត្រូវតែទទួលខុសត្រូវ នៅតុលាការអន្តរជាតិ ចំពោះអ្វីដែលលោកហៅថា ឧក្រិដ្ឋកម្មសង្គ្រាម ដែលខ្លួនបានប្រព្រឹត្ត នៅក្នុងតំបន់ហ្កាហ្សា។អ៊ីស្រាអែល បានបើកការវាយលុកតាមផ្លូវអាកាស និងជើងគោកប្រឆាំងនឹងក្រុមសកម្មប្រយុទ្ធហាម៉ាស នៅតំបន់ហ្កាហ្សា ដែលមនុស្សជាង ១៥.០០០នាក់ ត្រូវបានសម្លាប់ នេះបើតាមអាជ្ញាធរសុខាភិបាលតំបន់ហ្កាហ្សា។ការវាយលុកនេះ ត្រូវបានចាប់ផ្តើម បន្ទាប់ពីក្រុមហាម៉ាស បានបន្តការវាយលុកនៅប្រទេសអ៊ីស្រាអែលភាគខាងត្បូង កាលពីថ្ងៃទី៧ខែតុលា ដោយបានសម្លាប់មនុស្សប្រហែល ១.២០០នាក់ និងចាប់ចំណាប់ថ្នូរ ចំនួន ២៤០នាក់។ការិយាល័យប្រធានាធិបតីទួរគី បាននិយាយថា នៅក្នុងការសន្ទនាតាមស័ព្ទមុនកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិស្តីពីតំបន់ហ្កាហ្សា ដែលគ្រោងធ្វើ នៅថ្ងៃពុធនេះ លោកអេរដូហ្គែន និង លោកហ្គុយតឺរេស បានពិភាក្សាអំពី «ការរំពឹងទុករបស់សហគមន៍អន្តរជាតិទាក់ទងនឹងការវាយប្រហារដោយខុសច្បាប់របស់អ៊ីស្រាអែល» ការទទួលបានជំនួយមនុស្សធម៌ចូលទៅក្នុងដែនដីនេះ និងកិច្ចខិតខំប្រឹងប្រែង ដើម្បីសន្តិភាពយូរអង្វែង។

ក្រុមហាម៉ាស ដោះលែងចំណាប់ថ្នូរបន្ថែមទៀត ខណៈអ៊ីស្រាអែលដោះលែងអ្នកទោសប៉ាឡេស្ទីន

ក្រុមហាម៉ាស់ បានដោះលែងចំណាប់ថ្នូរ ១២ នាក់បន្ថែមទៀត ហើយអ៊ីស្រាអែល បានដោះលែងអ្នកទោសប៉ាឡេស្ទីន ៣០ នាក់ ជាថ្ងៃទីប្រាំនៃបទឈប់បាញ់រយៈពេល៦ថ្ងៃ រវាងក្រុមសកម្មប្រយុទ្ធប៉ាឡេស្ទីន និងអ៊ីស្រាអែលក្នុងសង្រ្គាមនៅតំបន់ហ្សា។ ចំណាប់ថ្នូរទាំងនេះ ស្ថិតក្នុងចំណោមមនុស្សប្រមាណ ២៤០ នាក់ ដែលខ្មាន់កាំភ្លើងក្រុមហាម៉ាសចាប់ខ្លួន ក្នុងអំឡុងការវាយប្រហារចូលទៅភាគខាងត្បូងប្រទេសអ៊ីស្រាអែលកាលពីថ្ងៃទី ៧ ខែតុលា ដែលអ៊ីស្រាអែលនិយាយថា មនុស្ស ១.២០០នាក់ ត្រូវបានសម្លាប់។ អាជ្ញាធរសុខាភិបាល បាននិយាយថា ការទម្លាក់គ្រាប់បែករបស់អ៊ីស្រាអែលទៅលើតំបន់ហ្កាហ្សា គ្រប់គ្រងដោយក្រុមហាម៉ាស ក្នុងការសងសឹកបានសម្លាប់មនុស្សជាង ១៥.០០០នាក់នៅហ្កាហ្សា។ វីដេអូផ្សាយផ្ទាល់ ដោយទូរទស្សន៍ Al Jazeera កាលពីថ្ងៃអង្គារ បានបង្ហាញរថយន្តក្រុងមួយគ្រឿងមានអ្នកទោសប៉ាឡេស្ទីន ចាកចេញពីពន្ធនាគារ Ofer របស់អ៊ីស្រាអែល នៅតំបន់កាន់កាប់ West Bank ។អ្នកនាំពាក្យក្រសួងការបរទេសកាតា ដែលកំពុងសម្របសម្រួលក្នុងជម្លោះនេះ បាននិយាយថា ចំណាប់ថ្នូរអ៊ីស្រាអែល ដែលត្រូវបានដោះលែងរួមមានស្ត្រី ៩ នាក់ និងអនីតិជនម្នាក់។ ក្រសួងបាននិយាយនៅលើបណ្តាញ Telegram ថា ចំណាប់ថ្នូរមួយចំនួន ត្រូវបានប្រគល់ឲ្យដោយក្រុម Al Quds ដែលជាស្លាប ប្រដាប់អាវុធរបស់ចលនាជីហាតអ៊ីស្លាមនិយមប៉ាឡេស្ទីន ។ បទឈប់បាញ់នេះ បាននាំឱ្យតំបន់ហ្កាហ្សា មានផ្អាកជាលើកដំបូង បន្ទាប់ពីការប្រយុទ្ធគ្នារយៈពេល៧ សប្តាហ៍ និងការទម្លាក់គ្រាប់បែក ដែលបានពង្រាបតំបន់ហ្កាហ្សាភាគច្រើនឲ្យទៅជាកម្ទេចកម្ទីថ្ម។ ចំនួនចំណាប់ថ្នូរសរុបដែលត្រូវបានដោះលែងដោយក្រុមហាម៉ាស់ ចាប់តាំងពីការចាប់ផ្តើមនៃបទឈប់បាញ់កាលពីថ្ងៃសុក្រសប្តាហ៍មុន ពេលនេះមានចំនួន ៨១នាក់ ក្នុងនោះមានពលរដ្ឋអ៊ីស្រាអែល ៦០ នាក់ ជាស្ត្រី និងកុមារ និងជនបរទេស២១នាក់ ដែលភាគច្រើនជាកម្មករកសិដ្ឋានរបស់ប្រទេសថៃ។ ជាមួគ្នានេះ អ៊ីស្រាអែល បានដោះលែងអ្នកទោសចំនួន ១៥០ នាក់ មុនការដោះលែងកាលពីថ្ងៃអង្គារ។

កម្មករកម្មការិនីបង្ហាញទឹកមុខសប្បាយរីករាយពេលត្រឡប់ចូលបំពេញការងារឡើងវិញក្រោយចប់ព្រះរាជពិធីបុណ្យអុំទូក

ភ្នំពេញ៖ខណៈពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ត្រូវបានបញ្ចប់ប្រកបដោយភាពសប្បាយរីករាយគ្រប់កន្លែងនៅទូទាំងប្រទេស។ នៅព្រឹកថ្ងៃទី២៩ ខែវិច្ឆិកា ឆ្នាំ២០២៣នេះ បានមើលឃើញថា កម្មករ កម្មការិនី បានវិលត្រឡប់ចូលបំពេញការងារឡើងវិញ ព្រមជាមួយនិងទឹកមុខសប្បាយរីករាយដូចគ្នាផងដែរ។ ក្នុងបទសម្ភាសន៍ជាមួយកម្មករ កម្មការិនី រោងចក្រកាត់ដេរ ស៊ីជី ក្លូរី ស្ថិតនៅខណ្ឌមានជ័យ រាជធានីភ្នំពេញ ពួកគាត់បានឲ្យទូរទស្សន៍ព័ត៌មាន ប៊ីធីវី ដឹងថា ក្នុងថ្ងៃឈប់សម្រាកនាឱកាសបុណ្យអុំទូកឆ្នាំនេះ ពិតជាសប្បាយរីករាយយ៉ាងខ្លាំង ដោយសារបានជួបជុំគ្រួសារ និងដើរលេងកម្សាន្តក្នុងព្រឹត្តការណ៍ដ៏មានអត្ថន័យនេះ ដូចជាការប្រណាំងទូក បណ្តែតប្រទីប អុជកាំជ្រួច ការប្រគំតន្រ្តី និងទស្សនាស្តង់តាំងពិព័រណ៌ទំនិញជាដើម។ កម្មករ កម្មការនី បានលើកឡើងស្រដៀងគ្នាថា អ្វីដែលធ្វើឲ្យពួកគាត់កាន់តែរីករាយថែមទៀតនោះ គឺអាចវិលត្រឡប់និងចូលបំពេញការងារបានជាធម្មតាឡើងវិញ។ ពួកគាត់ បានប្តេជ្ញាទៀតថា នឹងខិតខំយ៉ាងណាបំពេញការងារឲ្យកាន់តែល្អប្រសើរថែមទៀត ដើម្បីឲ្យរោងចក្រដំណើរការទៅមុខ និងមានការបញ្ជាទិញឲ្យបានច្រើនៗ ដើម្បីមានការងារថែមម៉ោង និងប្រាក់ចំណូលខ្ពស់។ យោងតាមរបាយការណ៍របស់អគ្គស្នងការដ្ឋាននគរបាលជាតិ គិតក្នុងរយៈពេល ៣ថ្ងៃ ចាប់ពីថ្ងៃទី២៦ ដល់២៨ ខែវិច្ឆិកា ឆ្នាំ២០២៣ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក មានប្រជាពលរដ្ឋចូលរួមកម្សាន្តចំនួនសរុបប្រមាណជិត ៥លាននាក់៕អត្ថបទដោយ ឈិត បូរ៉ាវី

ព្រះវិហារប្រវត្តិសាស្ត្រនៅម៉ិកស៊ិក ផ្តល់ទីជម្រកដល់ជនភៀសខ្លួនជាងមួយពាន់នាក់

ព្រះវិហារប្រវត្តិសាស្ត្រមួយក្នុងចំណោមព្រះវិហារជាប្រវត្តិសាស្ត្របំផុត របស់ប្រទេសម៉ិកស៊ិក បានក្លាយជាចំណុចកណ្តាលនៃវិបត្តិជនអន្តោប្រវេសន៍ដែលកំពុងប្រឈមមុខនៅក្នុងប្រទេសនេះ ដោយមានជនអន្តោប្រវេសន៍ជាងមួយពាន់នាក់ បានប្រើប្រាស់ព្រះវិហារនេះជាចំណុចចាប់ផ្តើមក្នុងផ្លូវធ្វើដំណើររបស់ពួកគេទៅភាគខាងជើងឆ្ពោះទៅសហរដ្ឋអាមេរិក។ខណៈព្រះអាទិត្យលិចនៅលើព្រះវិហារ ទីធ្លាព្រះវិហារក្លាយជាទីក្រុងតង់ មានពលរដ្ឋប្រហែល ១.០០០ នាក់ ភាគច្រើនមកពីប្រទេសវេណេហ្ស៊ុយអេឡា ហៃទី និងមួយចំនួនមកពីប្រទេសអាមេរិកឡាទីន។នៅពេលយប់ ព្រះវិហារ ជនអន្តោប្រវេសន៍អាចស្នាក់រហូតដល់ ១.៣០០នាក់ ដេកនៅលើដីក្នុងទិដ្ឋភាពនៅក្នុងព្រះវិហារ។ ការដើរឆ្លងកាត់ទីក្រុងរស់នៅក្នុងតង់ ផ្តល់នូវអារម្មណ៍នៃភាពមិនច្បាស់លាស់ដែលប្រឈមមុខដោយសហគមន៍សកល។ កុមារតូចៗ លេងកម្សាន្តដូចពួកគេនៅកន្លែងផ្សេងៗដែរ។ តង់ជាច្រើនបានដាក់តម្រៀបជាជួរ ខណៈឪពុកម្តាយព្យាយាមរៀបចំកន្លែងស្នាក់នៅឲ្យមានសណ្តាប់ធ្នាប់តាមដែលអាចធ្វើទៅបាន។ មនុស្សជាច្រើន ព្យាយាមរស់នៅក្នុងជីវិតដ៏ថ្លៃថ្នូរ។ វាគឺជាការដាក់ទីតាំងជាបន្តបន្ទាប់សម្រាប់អ្នកដែលបានដើរមកដោយថ្មើរជើង ពីអាមេរិកកណ្តាលដើម្បីស្វែងរកអនាគតល្អប្រសើរជាងនេះនៅសហរដ្ឋអាមេរិក។ មនុស្សជាច្រើននិយាយថា ពួកគេត្រូវបានគេប្លន់នៅតាមផ្លូវ ហើយអ្នកមួយចំនួនទៀតនិយាយអំពីការធ្វើបាប។ជនអន្តោប្រវេសន៍ទាំងនេះ មួយចំនួនកំពុងរង់ចាំការណាត់ជួបជាមួយស្ថានទូតសហរដ្ឋអាមេរិក ដោយសង្ឃឹមថានឹងមានការយល់ព្រមដើម្បីធ្វើអន្តោប្រវេសន៍ទៅភាគខាងជើងទៅកាន់ជីវិតកាន់តែប្រសើរ។ អ្នកមួយចំនួនទៀត និយាយថាពួកគេនឹងជិះរថភ្លើងទៅទិសខាងជើង ជាការនិយាយសម្រាលចំពោះការចូលទៅសហរដ្ឋអាមេរិកដោយខុសច្បាប់។

រដ្ឋបាលខេត្តព្រះសីហនុបញ្ចុះតម្លៃការចុះបញ្ជីទូកនេសាទចំនួន ៥០% ដល់ប្រជានេសាទ

ព្រះសីហនុ៖ រដ្ឋបាលខេត្តព្រះសីហនុ នៅថ្ងៃទី ២៩ ខែវិច្ឆិកា ឆ្នាំ ២០២៣នេះ បានជូនដំណឹងដល់ប្រជាពលរដ្ឋ ដែលជាប្រជានេសាទចំពោះការអនុគ្រោះរបស់រដ្ឋបាលខេត្តព្រះសីហនុលើការចុះបញ្ជីជលយាន (ទូកនេសាទ) ចំនួន ៥០% គឺនៅសល់ ៣២ ថ្ងៃទៀត ដូច្នេះសូមប្រជាពលរដ្ឋប្រញាប់ទៅចុះបញ្ជីឱ្យបានទាន់ពេល។ រដ្ឋបាលខេត្តបានឱ្យដឹងថា ការបញ្ចុះតម្លៃបង់សេវា ចំនួន ៥០% ចំពោះមុខសេវាចំនួនពីរ គឺការចុះបញ្ជីបណ្ណសម្គាល់ជលយាន និងសៀវភៅពិនិត្យបច្ចេកទេស (ឆៀក) នៅអង្គភាពច្រកចេញចូលតែមួយខេត្តព្រះសីហនុ។ រដ្ឋបាលខេត្តព្រះសីហនុ បន្តអំពាវនាវដល់ប្រជានេសាទទាំងអស់ក្នុងខេត្តព្រះសីហនុ សូមរួសរាន់ និងប្រញាប់ប្រញាល់មកចុះបញ្ជី និងពិនិត្យបច្ចេកទេសជលយាន ដើម្បីទទួលបានការលើកទឹកចិត្ត អត្ថប្រយោជន៍ និងការការពារស្របច្បាប់ពីរដ្ឋបាលខេត្តព្រះសីហនុ។ សូមបញ្ជាក់ថា ចាប់ពីថ្ងៃទី១ ខែមករា ឆ្នាំ២០២៤ ប្រជានេសាទដែលមិនមានបណ្ណសម្គាល់ជលយាន និងសៀវភៅពិនិត្យបច្ចេកទេស (ឆៀក) នឹងប្រឈមវិធានការរដ្ឋបាលដូចជាការផាកពិន័យ និងមិនអនុញ្ញាតឱ្យនេសាទលើលម្ហសមុទ្រនៃខេត្តព្រះសីហនុឡើយ៕

មន្ត្រី WHO៖ ជំងឺផ្លូវដង្ហើមនៅចិន កើនឡើងមិនខ្ពស់ដូចនៅមុនការរាតត្បាតកូវីដនោះទេ

ការរីករាលដាលនៃជំងឺផ្លូវដង្ហើម ដែលប្រទេសចិន កំពុងទទួលរងនាពេលនេះគឺមិនខ្ពស់ដូចមុនការរាតត្បាតនៃជំងឺកូវីដ-១៩ នោះទេ នេះបើយោតាមមន្ត្រីម្នាក់របស់អង្គការសុខភាពពិភពលោក WHO បាននិយាយ ដោយបញ្ជាក់ថ្មីថា មិនមានមេរោគឆ្លងថ្មី ឬមិនធម្មតាត្រូវបានរកឃើញនៅក្នុងករណីថ្មីៗនោះទេ។លោកស្រី ម៉ារៀ វ៉ាន់ឃឺខូវ (Maria Van Kerkhove) ប្រធានស្តីទីនៃនាយកដ្ឋានប្រយុទ្ធនឹងជំងឺឆ្លង និងបង្ការជំងឺរាតត្បាតរបស់អង្គការសុខភាពពិភពលោក បាននិយាយថា ការកើនឡើងនេះហាក់ដូចជាត្រូវបានជំរុញដោយកំណើននៃចំនួនកុមារឆ្លងមេរោគស្រាល ដែលពួកគេធ្លាប់បានជៀសវាងក្នុងអំឡុងពេលពីរឆ្នាំនៃការរឹតបន្តឹងនៃជំងឺកូវីដ។អ្នកនាំពាក្យគណៈកម្មាធិការសុខភាពជាតិរបស់ប្រទេសចិន លោក មី ហ្វឹង (Mi Feng) បាននិយាយកាលពីថ្ងៃអាទិត្យថា ការកើនឡើងនៃជំងឺផ្លូវដង្ហើមដ៏ស្រួចស្រាវនេះត្រូវបានផ្សារភ្ជាប់ទៅនឹងចរន្តឈាមក្នុងពេលដំណាលគ្នានៃមេរោគជាច្រើនប្រភេទ ដែលភាគច្រើនជាជំងឺគ្រុនផ្តាសាយ។កំណើននេះបានក្លាយជាបញ្ហាសកលកាលពីសប្តាហ៍មុន នៅពេលដែលអង្គការសុខភាពពិភពលោកបានស្នើសុំប្រទេសចិន សម្រាប់ព័ត៌មានបន្ថែម ដោយដកស្រង់របាយការណ៍ស្តីពីចង្កោមនៃជំងឺរលាកសួតដែលមិនបានធ្វើរោគវិនិច្ឆ័យលើកុមារដោយកម្មវិធីសម្រាប់តាមដានជំងឺដែលកំពុងកើតមាន៕

មិត្តភក្តិនិងគ្រួសារ ទាមទារឲ្យដ្ឋាភិបាលអ៊ីស្រាអែល ធ្វើការងារបន្ថែមទៀត ដើម្បីជួយសង្គ្រោះចំណាប់ថ្នូរទាំងអស់

មនុស្សរាប់រយនាក់ រួមមានទាំងសមាជិកក្រុមគ្រួសារចំណាប់ថ្នូរ ដែលនៅតែស្ថិតនៅក្នុងតំបន់ហ្កាហ្សា និងអ្នកគាំទ្ររបស់ពួកគេ បានមកប្រមូលផ្តុំគ្នានៅខាងមុខមូលដ្ឋានយោធា Kirya កាលពីយប់ថ្ងៃអង្គារ ទាមទារឱ្យរដ្ឋាភិបាលធ្វើការងារបន្ថែមទៀត ដើម្បីនាំយកចំណាប់ថ្នូរទាំងអស់ត្រឡប់មកវិញឱ្យបានឆាប់តាមដែលអាចធ្វើទៅបាន។នាង Gali Lev អាយុ២៧ឆ្នាំ ដែលមិត្តរបស់នាងរៀននៅវិទ្យាល័យ ត្រូវបានក្រុមហាម៉ាសចាប់ពង្រត់ចាប់តាំងពីថ្ងៃទី ៧ ខែតុលា បាននិយាយថា យើងចង់ដាក់សម្ពាធឲ្យរដ្ឋាភិបាលស្វែងរកការដោះលែង មិនត្រឹមតែកុមារប៉ុណ្ណោះទេ ប៉ុន្តែថែមទាំងឪពុកម្តាយរបស់ពួកគេដែលនៅតែត្រូវបានចាប់ពង្រត់ និងមានទាំងយុវជន មានទាហានវ័យក្មេងៗ និងមនុស្សស្លូតត្រង់ដែលនៅក្នុងក្រុមនេះ។ នាងនិយាយថា យើងត្រូវតែឲ្យពួកគេត្រឡប់មកផ្ទះវិញ ឲ្យបានឆាប់តាមដែលអាចធ្វើទៅបាន។អ្នកចូលរួមម្នាក់ទៀតផ្សេងទៀតឈ្មោះ Dror Alfassa អាយុ ១៨ ឆ្នាំ ដែលមីងរបស់គាត់ឈ្មោះ Goren Maya អាយុ ៥៦ឆ្នាំ ត្រូវបានចាប់ជាចំណាប់ថ្នូរនៅតំបន់ហ្កាហ្សា បាននិយាយថាលោកចង់ឃើញកាកបាទក្រហម ជំរុញបន្ថែមទៀតដើម្បីតាមដានសុខុមាលភាពរបស់ចំណាប់ថ្នូរដែលនៅសល់។ គណៈកម្មាធិការកាកបាទក្រហមអន្តរជាតិ (ICRC) បាននិយាយកាលពីថ្ងៃអង្គារថា ក្រុមហាម៉ាស់ បានដោះលែងចំណាប់ថ្នូរចំនួន១២នាក់បន្ថែមទៀត ជាថ្ងៃទីប្រាំនៃបទឈប់បាញ់រយៈពេល ៦ ថ្ងៃ ដែលបានព្រមព្រៀងរវាងក្រុមសកម្មប្រយុទ្ធប៉ាឡេស្ទីន និងអ៊ីស្រាអែល នៅក្នុងសង្គ្រាមតំបន់ហ្កាហ្សា។

ក្រុមហាម៉ាសនិយាយថា ខ្លួនបើកឱកាសសម្រាប់កិច្ចព្រមព្រៀងបទឈប់បាញ់ថ្មីជាមួយអ៊ីស្រាអែល

បទឈប់បាញ់បណ្តោះអាសន្នរវាងអ៊ីស្រាអែល និងក្រុមហាម៉ាស នៅតំបន់ហ្កាហ្សាស្ទ្រីបបានបន្តកាលពីថ្ងៃអង្គារបន្ទាប់ពីត្រូវបានពន្យារពេលពីរថ្ងៃបន្ថែមទៀតដើម្បីអនុញ្ញាតឱ្យមានការដោះលែងចំណាប់ថ្នូរដោយក្រុមសកម្មប្រយុទ្ធ និងអ្នកទោសប៉ាឡេស្ទីនបន្ថែមទៀតត្រូវបានដោះលែងដោយអ៊ីស្រាអែល។ ក្រុមមន្ត្រីអ៊ីស្រាអែលបាននិយាយថា ពួកគេបានយល់ព្រមលើបញ្ជីឈ្មោះអ្នកទោសប៉ាឡេស្ទីនថ្មី ដែលត្រូវដោះលែង ប្រសិនបើក្រុមហាម៉ាស គោរពការសន្យារបស់ខ្លួនក្នុងការដោះលែងចំណាប់ខ្មាំងបន្ថែមទៀត ហើយអ៊ីស្រាអែលមានបញ្ជីឈ្មោះពីក្រុមហាម៉ាសនៃចំណាប់ថ្នូរដែលខ្លួនគ្រោងនឹងដោះលែងនៅពេលក្រោយ។ យោងតាមអ៊ីស្រាអែល មនុស្សប្រហែល ១៧០ នាក់នៅតែជាប់ឃុំនៅក្នុងតំបន់ហ្កាហ្សា ប៉ុន្តែមិនមែនទាំងអស់សុទ្ធតែត្រូវបានចាប់ខ្លួនដោយក្រុមហាម៉ាសនោះទេ។ ក្រុមមន្ត្រីសហរដ្ឋអាមេរិកបាននិយាយថា ពួកគេកំពុងបន្តធ្វើការបន្ថែមទៀតនៅក្នុងបទឈប់បាញ់ ហើយថាពួកគេនឹងបន្តជំរុញការចរចារហូតដល់មនុស្សទាំងអស់ត្រូវបានដោះលែង។ មន្ត្រីក្រុមហាម៉ាស បានប្រាប់ទូរទស្សន៍ CBS News កាលពីថ្ងៃអង្គារថា ក្រុមនេះដែលត្រូវបានចាត់ទុកជាយូរមកហើយថាជាអង្គការភេរវករដោយសហរដ្ឋអាមេរិក អ៊ីស្រាអែល និងប្រទេសជាច្រើនផ្សេងទៀត កំពុងសម្លឹងរកការចរចាថ្មីមួយបន្ថែមទៀតនៃការផ្អាកប្រយុទ្ធក្នុងអំឡុងដែលខ្លួននឹងដោះលែងមិន ត្រឹមតែស្ត្រី និងកុមារប៉ុណ្ណោះទេ ខណៈបានដោះលែងជារៀងរាល់ថ្ងៃចាប់តាំងពីថ្ងៃសុក្រសប្ដាហ៍មុនមក ប៉ុន្តែក៏មានចំណាប់ខ្មាំងជាបុរស និងទាហានអ៊ីស្រាអែលដែលត្រូវបានចាប់ពង្រត់ ផងដែរ។ ការិយាល័យរបស់លោកនាយករដ្ឋមន្ត្រីអ៊ីស្រាអែល Benjamin Netanyahu បានបដិសេធមិនធ្វើអត្ថាធិប្បាយទេ កាលពីថ្ងៃអង្គារ លើការចរចាណាមួយសម្រាប់កិច្ចព្រមព្រៀងថ្មីជាមួយក្រុមហាម៉ាស៕

ព្យុះព្រិលសម្លាប់មនុស្សជាង១០នាក់នៅអ៊ុយក្រែន និងរុស្ស៊ី ខណៈមនុស្សរាប់ពាន់នាក់ត្រូវបានជួយសង្គ្រោះ

រដ្ឋមន្ត្រីក្រសួងមហាផ្ទៃអ៊ុយក្រែននិយាយថា មនុស្ស១០នាក់បានស្លាប់ នៅក្នុងទឹកដីអ៊ុយក្រែន ខណៈព្យុះទឹកកក និងភ្លៀងធ្លាក់បានគ្របដណ្ដប់ចាប់ពីសមុទ្រខ្មៅ ដែលកំពុងបំផ្លិចបំផ្លាញហេដ្ឋារចនាសម្ព័ន្ធ បិទផ្លូវ និងកាត់ផ្ដាច់ចរន្តអគ្គិសនី។ព្យុះបំបែកកំណត់ត្រាបានបោកបក់មកលើទឹកដីប្រទេសនេះ ចាប់តាំងពីថ្ងៃអាទិត្យមក ដោយបានធ្វើឱ្យការតាំងទីលំនៅរាប់ពាន់កន្លែងនៅក្នុងតំបន់រងផលប៉ះពាល់ គ្មានថាមពលអគ្គិសនីប្រើប្រាស់ និងជាការដាក់បន្ទុកកាន់តែធ្ងន់ធ្ងរបន្ថែមទៀតលើបណ្តាញថាមពល និងសេវាសង្គ្រោះលើសចំណុះរួចហើយ ដែលហួសពីការលុកលុយជិតពីរឆ្នាំរបស់រុស្ស៊ី ទៅទៀត។ រដ្ឋមន្ត្រីអ៊ុយក្រែន លោកអ៊ីហ័រ គ្លីមិនកូ (Ihor Klymenko)បានសរសេរលើ Telegram កាលពីថ្ងៃអង្គារថា ដោយសារស្ថានភាពអាកាសធាតុកាន់តែអាក្រក់ មនុស្ស ១០នាក់បានស្លាប់នៅក្នុងតំបន់ អូឌីសា (Odesa) តំបន់ ខាគីវ (Kharkiv) តំបន់ មីកូឡេអ៊ីវ ( Mykolaiv) និង រដ្ឋធានីគីវ (Kyiv)។ មនុស្ស២៣នាក់បានរងរបួស ក្នុងនោះមានកុមារ២នាក់។ លោកបាននិយាយថា ការតាំងទីលំនៅសរុបចំនួន ៤១១កន្លែង នៅក្នុងតំបន់ចំនួន ១១ បានគ្មានអគ្គិសនីប្រើប្រាស់ ហើយរថយន្តជាង ១.៥០០គ្រឿង ត្រូវជួយយកចេញពីព្យុះទឹកកក។ ប្រព័ន្ធព្យុះក៏បានបោកបក់លើតំបន់ក្បែរនោះផងដែរ។ នៅឧបទ្វីបគ្រីមេ(Crimea) និងភាគខាងត្បូងរបស់រុស្ស៊ី មានមនុស្សយ៉ាងហោចណាស់ ៣នាក់ ត្រូវគេរាយការណ៍ថាបានស្លាប់។ ក្រសួងថាមពលរបស់ប្រទេសរុស្ស៊ីបាននិយាយថា ប្រជាជនប្រហែល ១,៩ លាននាក់ ត្រូវបានរងផលប៉ះពាល់ដោយការដាច់ចរន្តអគ្គិសនីនៅក្នុងតំបន់មួយចំនួននៅភាគខាងត្បូងនៃប្រទេសរុស្ស៊ី ដូចជាតំបន់ដាហ្គេស្ថាន(Dagestan)ក្រាស្នូដា (Krasnodar) និងតំបន់រ៉ូស្តូវ ( Rostov) ក៏ដូចជាទឹកដីអ៊ុយក្រែនដែលខ្លួនបានកាន់កាប់ដូចជាតំបន់ Donetsk, Luhansk, Kherson, Zaporizhia និង Crimea ៕

ពលរដ្ឋជាង១ម៉ឺននាក់ចូលរួមផ្ទាល់ទស្សនាស្វែងយល់ពីបញ្ហាគ្រឿងញៀនក្នុងព្រះរាជពិធីបុណ្យអុំទូក

ភ្នំពេញ៖នាឱកាស ព្រះរាជពិធីបុណ្យអុំទូក ចាប់ពីថ្ងៃទី២៦ដល់២៨ ខែវិច្ឆិកា ឆ្នាំ២០២៣ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន ដែលមានឯកឧត្តម នាយឧត្តមសេនីយ៍ មាស វិរិទ្ធ ជាអគ្គលេខាធិការ និងឧត្តមសេនីយ៍ឯក ថោង សុគន្ធា ជាអគ្គលេខាធិការរងទទួលផែនបានរៀបចំពិធីផ្សព្វផ្សាយពីបញ្ហាគ្រឿងញៀនដល់សាធារណជនក្នុងឱកាសព្រះរាជពិធីបុណ្យអុំទូក។ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណ:នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនបានប្រាប់ឱ្យដឹងថា រយ:ពេល០៣ថ្ងៃនៃព្រះរាជពិធីបុណ្យអុំទូក អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនសហការជាមួយរដ្ឋបាលរាជធានីភ្នំពេញ គ្រឹះស្ថានមីក្រូហិរញ្ញវត្ថុអិលអូអិលស៊ី LOLC បានរៀបចំពិធីផ្សព្វផ្សាយជាការប្រគំតន្រ្តី សំដែងរឿងខ្លី ចម្រៀង ឆ្លើយសំណួរយករង្វាន់អនុស្សាវរីយ៍ ការរាំ-ច្រៀងកំសាន្ត ការតាំងពិព័រណ៍រូបភាព និងចែកឯកសារចំណេះដឹងពីបញ្ហាគ្រឿងញៀនដែលមានសាធារណជនប្រមាណជាង១ម៉ឺននាក់បានចូលទស្សនាផ្ទាល់នៅសួនមាត់ទន្លេទល់មុខក្រុមប្រឹក្សាអភិវឌ្ឍន៍កម្ពុជា (CDC)។ឧត្តមសេនីយ៍ឯក លឹម តុងហួត បានបន្តថា បងប្អូនជាសាធារណជន បានសំដែងនូវការសប្បាយរីករាយផង មានឆន្ទ:ចូលរួមគាំទ្រដល់កម្មវិធីផ្សព្វផ្សាយអប់រំនេះផងតាមរយៈការបង្ហាញនូវអារម្មណ៍ពិត ការចែករំលែកនូវរឿងពិតផលវិបាកដែលមានសមាជិកគ្រួសារធ្លាក់ចូលទៅក្នុងអន្ទាក់នៃគ្រឿងញៀនដោយបានសំណូមពរសួមឱ្យចូលរួមសិក្សាស្វែងយល់និងផ្សព្វផ្សាយពីបញ្ហាគ្រឿងញៀនដើម្បីបង្ការទប់ស្កាត់ការកើតមានបញ្ហាគ្រឿងញៀនក្នុងគ្រួសារ។ លោកបញ្ជាក់ថា រយ:ពេលបីថ្ងៃនេះដែរ មន្រ្តីអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន យុវជនកាយរិទ្ធ និងកាកបាទក្រហមកម្ពុជា អង្គការកសាង KHANA បណ្តាញស្រ្តីអប់រំសហគមន៍និងHACC សរុបចំនួន៥០០នាក់បានដើរដង្ហែរក្បួនកាន់បដា អានសារ ចែកខិត្តបណ្ណផ្សព្វផ្សាយអប់រំបញ្ហាគ្រឿងញៀន ដល់សាធារណជនពីសួនច្បារមុខព្រះបរមរាជវាំង ទៅសួនច្បារមាត់ទន្លេទល់មុខក្រុមប្រឹក្សាអភិវឌ្ឍកម្ពុជា(CDC)ផងដែរ។ក្នុងនាមថ្នាក់ដឹកនាំ ពិសេស ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ ឧត្តមសេនីយ៍ឯក លឹម តុងហួត សូមថ្លែងអំណរគុណ ក្រសួងព័ត៌មាន រដ្ឋបាលរាជធានីភ្នំពេញ មន្ទីរអប់រំ យុវជន និងកីឡារាជធានីភ្នំពេញ អង្គការកសាង អង្គការសម្ព័ន្ធភាពខ្មែរប្រយុទ្ធជំងឺអេដស៍(khana) គណកម្មការសម្របសម្រួលសកម្មភាពសុខភាពសុខភាព (Hacc) បណ្តាញស្រ្តីអប់រំផ្ទាល់នៅតាមសហគមន៍ គ្រឹះស្ថានមីក្រូហិរញ្ញវត្ថុអិលអិលស៊ី (LOLC) Freshnews ទូរទស្សន៍ជាតិ វិទ្យុជាតិកម្ពុជា ស៊ីអិនស៊ី បាយ័ន កាសែតនគរវត្ត ព័ត៌មានអគ្គស្នងការដ្ឋាននគរបាលជាតិ ទូរទស្សន៍តន្រ្តីក្រុមហ៊ុនធំៗ ដែលបានផ្តល់កិច្ចសហការយ៉ាងល្អជាមួយអាជ្ញារជាតិប្រយុទ្ធប្រឆាំងគ្រឿងញៀនធ្វើសកម្មភាពផ្សព្វផ្សាយអប់រំពីបញ្ហាគ្រឿងញៀនក្នុងឱកាសបុណ្យអុំទូក២០២៣នេះ។ សូមបញ្ជាក់ថា ការផ្សព្វផ្សាយអប់រំបញ្ហាគ្រឿងញៀន ដល់អ្នកមកចូលរួមលេងកម្សាន្ត ព្រះរាជពិធីបុណ្យអុំទូកនេះ គឺស្របទៅនឹងតាមឆន្ទៈមុះមុតរបស់សម្តេចមហាបវរធិបតីហ៊ុនម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការប្រយុទ្ធប្រឆាំងគ្រឿងញៀនក្នុងនីតិកាលទី៧នេះ ។ ហើយថ្មីៗនេះ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿនឧបនាយករដ្ឋមន្រ្តីប្រចាំការ ប្រធានអាជ្ញាធរជាតិប្រយុទ្ធប្រឆាំងគ្រឿងញៀនបានដាក់ចេញនូវសេចក្តីណែនាំលេខ០០២សណនស្តីពីការចាត់តាំងអនុវត្តការងារប្រយុទ្ធប្រឆាំងគ្រឿងញៀនឱ្យមានកាន់តែមានប្រសិទ្ធភាពទាំងថ្នាក់ជាតិ និងថ្នាក់ក្រោមជាតិក្នុងនោះ ឯកឧត្តមផ្តោតសំខាន់លើការងារអប់រំផ្សព្វផ្សាយធ្វើយ៉ាងណាឱ្យបានដឹងដល់ប្រជាពលរដ្ឋគ្រប់ស្រទាប់ទាំងអស់នៅតាមមូលដ្ឋានទូទាំងប្រទេសកម្ពុជា៕

បណ្ដាញសង្គម

ព័ត៌មានថ្មីៗ

ពិធីលៀងសាយភោជន៍ អបអរសាទរការបញ្ចប់កម្មវិធីថ្ងៃដំបូង នៃវេទិកាអន្តរជាតិស្តីពី «បច្ចេកវិទ្យាបញ្ញាសិប្បនិម្មិត (AI) ដើម្បីសកម្មភាពអាកាសធាតុ ឆ្នាំ២០២៦»

ប្រមុខការពារជាតិកម្ពុជា និងវៀតណាម ពង្រឹង និងពង្រីកចំណងមិត្តភាពជាប្រពៃណី ភាពជាអ្នកជិតខាងល្អ និងកិច្ចសហប្រតិបត្តិការលើវិស័យការពារជាតិ

តំណាងអចិន្ត្រៃយ៍កម្ពុជា បន្តបង្ហាញការពិតនៅសម័យប្រជុំលើកទី៧៧ របស់ UNHCR អំពីពលរដ្ឋកម្ពុជាជាង ២ម៉ឺននាក់ នៅតែមិនអាចវិលត្រឡប់ទៅកាន់លំនៅឋានរបស់ខ្លួនវិញបាន ដោយសារថៃឈ្លានពាន

ជនភៀសសឹកកម្ពុជា (IDPs) មានបំណងប្រាថ្នា និងសមនឹងទទួលបានការត្រឡប់ទៅផ្ទះវិញ

កម្ពុជាបញ្ជាក់ជាថ្មីអំពីការប្តេជ្ញាចិត្តដោះស្រាយវិវាទដោយសន្តិវិធីផ្អែកលើច្បាប់អន្តរជាតិ និងការគោរពគោលការណ៍សមភាពអធិបតេយ្យភាពរបស់រដ្ឋ

កម្ពុជា-អាស៊ែបៃហ្សង់ នឹងបន្តពង្រឹង និងពង្រីកកិច្ចសហប្រតិបត្តិការឱ្យកាន់តែរីកចម្រើនបន្ថែមទៀត

កូរ៉េខាងជើង និងរុស្ស៊ី ចុះហត្ថលេខាលើផែនការសហប្រតិបត្តិការ ៣ឆ្នាំ ស្តីពីការគ្រប់គ្រងគ្រោះមហន្តរាយ

អាកាសយានដ្ឋាន Nuremberg របស់អាល្លឺម៉ង់ បិទដំណើរការដោយសារគ្រាអាសន្នផ្នែកអាកាសចរណ៍

ស៊ុយអែត៖ លោកស្រី Andersson ប្រាប់ថា គណបក្សរបស់លោកស្រី នៅមិនអាចបង្កើតរដ្ឋាភិបាលបាន

លោក TRUMP ថា លោកមិនជឿថា ចិន និងរុស្ស៊ី កំពុងជួយអ៊ីរ៉ង់នោះទេ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877