BTV NEWS

ផ្តន្ទាទោសជនជាប់ចោទ ៦នាក់ ដាក់ពន្ធនាគារអស់មួយជីវិតពាក់ព័ន្ធនឹងករណីឃាតកម្មដោយមានទារុណកម្មលើនិស្សិតជនជាតិកូរ៉េខាងត្បូង

ឃាត់ខ្លួនជនជាតិចិន ៦១នាក់ ក្នុងប្រតិបត្តិការបង្ក្រាបទីតាំង Online Scams នៅខណ្ឌចំនួនពីរ ក្នុងភូមិសាស្រ្តរាជធានីភ្នំពេញ

រយៈពេល៣សប្តាហ៍ខែឧសភានេះ សមត្ថកិច្ច បង្ក្រាប Online Scams ចំនួន ៥០ទីតាំង ឃាត់ខ្លួនជនបរទេសសង្ស័យប្រមាណ ៣ ៣២០នាក់ និងបណ្តេញចេញជាង១ពាន់នាក់

ស្នងការរាជធានីដាក់បទបញ្ជាដល់នគរបាលឱ្យចុះពិនិត្យផ្សព្វផ្សាយណែនាំចំពោះរថយន្តដឹកសិស្ស និងកម្មករដែលលើសចំនួនដើម្បីបញ្ចៀសគ្រោះថ្នាក់

សន្តិសុខ និង សង្គម

កងកម្លាំងអាមេរិក រងការបាញ់ប្រហារនៅមជ្ឈិមបូព៌ា ខណៈអាមេរិករំកិលខ្លួនចូលកាន់តែជិតសង្រ្គាមនៅហ្កាហ្សា

យានដ្រូនខូចមួយគ្រឿងនៅក្នុងប្រទេសអ៊ីរ៉ាក់ ប្រហែលជាបានជួយការពារអាមេរិកពីការអូសទាញកាន់តែជ្រៅទៅក្នុងជម្លោះមជ្ឈិមបូព៌ាដែលកំពុងរីករាលដាល។ យោងតាមមន្ត្រីអាមេរិកពីររូប ដែលបានដឹងបញ្ហានេះ យានដ្រូនមួយគ្រឿង ដែលត្រូវបានបាញ់ទៅលើមូលដ្ឋានអាកាសអឺបៀល (Erbil) ដោយកងជីវពល គាំទ្រដោយអ៊ីរ៉ង់ មុនពេលថ្ងៃរះកាលពីថ្ងៃទី ២៦ តុលា បានទម្លាយប្រព័ន្ធការពារដែនអាកាសរបស់សហរដ្ឋអាមេរិក ហើយបានធ្លាក់ចូលទៅក្នុងជាន់ទី ២ នៃបន្ទាយទាហានអាមេរិក នៅម៉ោងប្រហែល ៥ ព្រឹក ។ ក្រុមមន្ត្រីដែលសុំមិនបញ្ចេញឈ្មោះបាននិយាយថា ប៉ុន្តែឧបករណ៍ដែលផ្ទុកដោយគ្រឿងផ្ទុះមិនអាចបំផ្ទុះបានទេ ហើយមានតែសមាជិកកងទ័ពម្នាក់ប៉ុណ្ណោះដែលរងការប៉ះទង្គិចពីផលប៉ះពាល់នោះ ។ ពួកគេបានបន្ថែមថា សហរដ្ឋអាមេរិកមានសំណាងណាស់ ព្រោះយានដ្រូននោះអាចបង្កឱ្យមានការសម្លាប់រង្គាល បើបានផ្ទុះ។ យោងតាមទិន្នន័យពីមន្ទីរបញ្ចកោណ និងក្រុមមន្ត្រីអាមេរិក ២រូប ឧបទ្ទវហេតុនេះគឺស្ថិតក្នុងចំណោមការវាយប្រហារដោយយានដ្រូននិងគ្រាប់រ៉ូកែតចំនួន៤០គ្រាប់ ដាច់ដោយឡែកពីគ្នា ដែលបានបាញ់ទៅលើកងកម្លាំងសហរដ្ឋអាមេរិកដោយកងជីវពលគាំទ្រដោយអ៊ីរ៉ង់នៅក្នុងប្រទេសអ៊ីរ៉ាក់ និងស៊ីរីក្នុងរយៈពេល ៣ សប្តាហ៍ចុងក្រោយនេះ ឆ្លើយតបទៅនឹងការគាំទ្ររបស់អាមេរិកសម្រាប់អ៊ីស្រាអែលនៅក្នុងសង្រ្គាមតំបន់ហ្កាហ្សា ។ គេមិនច្បាស់ទេថា តើលោកប្រធានាធិបតី Joe Biden នឹងឆ្លើយតបបែបណា ចំពោះការវាយប្រហារដ៏ធំ ដែលបានសម្លាប់ជនជាតិអាមេរិកមួយចំនួនធំ។ នៅក្នុងការស្ទង់មតិនៅមុនការបោះឆ្នោតប្រធានាធិបតីឆ្នាំក្រោយ លោក Biden រហូតមកដល់ពេលនេះបានព្យាយាមកំណត់តួនាទីរបស់សហរដ្ឋអាមេរិកនៅក្នុងជម្លោះភាគច្រើនក្នុងការធានាជំនួយយោធាដល់អ៊ីស្រាអែល៕

អ៊ីស្រាអែល ព្រមានក្រុមហាម៉ាស កុំកេងចំណេញជំនួយមនុស្សធម៌ ខណៈរថយន្តជំនួយហូរចូលតំបន់ហ្កាហ្សា

រថយន្តផ្ទុកជំនួយផ្គត់ផ្គង់មនុស្សធម៌សំដៅចូលទៅក្នុងតំបន់ហ្កាហ្សា បានកំពុងដំណើរការនៅច្រកឆ្លងកាត់ព្រំដែន នីត ហ្សាណា (Nitzana) កាលពីថ្ងៃព្រហស្បតិ៍ទី៩វិច្ឆិកា បន្ទាប់ពីអ៊ីស្រាអែលអនុញ្ញាតឲ្យដឹកជញ្ជូនជំនួយចូលក្រោមការសម្របសម្រួលជាមួយសហរដ្ឋអាមេរិក អង្គការសហប្រជាជាតិ និង ប្រទេសអេហ្ស៊ីប។ សុនខស្រង់ក្លិន និងវិធីសាស្ត្រសន្តិសុខផ្សេងទៀត ត្រូវបានប្រើប្រាស់ដើម្បីត្រួតពិនិត្យការដឹកជញ្ជូនជំនួយទាំងនោះ មុនពេលអនុញ្ញាតឲ្យចូលទៅតំបន់ហ្កាហ្សា។ ប្រធានសម្របសម្រួល និងទំនាក់ទំនងសម្រាប់តំបន់ហ្កាហ្សារបស់យោធាអ៊ីស្រាអែល លោក វរសេនីយ៍ឯក មូសេ តេត្រូ បាននិយាយថា រថយន្តដឹកស្បៀងអាហារ ទឹក និងជំនួយផ្គត់ផ្គង់មនុស្សចំនួន៧០០គ្រឿង កំពុងសំដៅចូលក្នុងតំបន់ហ្កាហ្សា។ នៅសន្និសីទសារព័ត៌មានខ្លីមួយលោកបាននិយាយថា អ៊ីស្រាអែល បានជួសជុលបំពង់បង្ហូរទឹកចំនួន២ ចូលទៅហ្កាហ្សា បន្ទាប់ពីត្រូវបានបំផ្លិចបំផ្លាញដោយគ្រាប់រ៉ូកែតក្រុមហាម៉ាស។ លោកក៏បាននិយាយផងដែរថា មានប្រេងឥន្ធនៈគ្រប់គ្រាន់ក្នុងតំបន់ហ្កាហ្សា។ លោក តេត្រូ បានព្រមានក្រុមហាម៉ាស កុំប្រើប្រាស់ជំនួយមនុស្សធម៌ជាផលប្រយោជន៍ផ្ទាល់ខ្លួនឲ្យសោះ និងបាននិយាយថា ក្រុមហាម៉ាស នៅតែព្យាយាមរារាំងប្រជាពលរដ្ឋមិនឲ្យចាកចេញពីភាគខាងជើង ចូលទៅភាគខាងត្បូង៕

លោក Biden និយាយថា អាមេរិកមានបំណងចង់បានរថយន្តជំនួយប្រចាំថ្ងៃយ៉ាងហោចណាស់ ១៥០ គ្រឿងសម្រាប់តំបន់ហ្កាហ្សា

លោកប្រធានាធិបតីអាមេរិក Joe Biden បាននិយាយកាលពីថ្ងៃព្រហស្បតិ៍ ទី៩ វិច្ឆិកា ថា ប្រតិបត្តិការ ផ្អាកប្រយុទ្ធរបស់យោធានៅតំបន់ហ្កាហ្សា ក្នុងគោលបំណងទទួលបានរថយន្តជំនួយរហូតដល់ ១៥០ គ្រឿងជារៀងរាល់ថ្ងៃ ដើម្បីបង្កើនលំហូរអាហារ ទឹក និងថ្នាំពេទ្យចូលទៅក្នុងតំបន់នេះ។ នៅក្នុងការបង្ហោះជាបន្តបន្ទាប់នៅលើបណ្ដាញសង្គម X លោក Biden បាននិយាយថា សហរដ្ឋអាមេរិកកំពុងផ្តោតលើការបង្កើនការផ្គត់ផ្គង់ និងជំនួយមនុស្សធម៌។ លោក Biden បាននិយាយថា អ៊ីស្រាអែល សម្រេចចិត្តដោយខ្លួនឯង ហើយថាពួកគេត្រូវតែ បែងចែករវាងភេរវករ និងជនស៊ីវិល។ សេតវិមានបាននិយាយកាលពីថ្ងៃព្រហស្បតិ៍ថា អ៊ីស្រាអែលបានយល់ព្រមផ្អាកប្រតិបត្តិការយោធានៅតំបន់ភាគខាងជើងនៃតំបន់ហ្កាហ្សារយៈពេល ៤ម៉ោងក្នុងមួយថ្ងៃ ប៉ុន្តែពុំមានសញ្ញាណាមួយនៃការផ្អាកប្រយុទ្ធ ដែលបានសម្លាប់មនុស្សរាប់ពាន់នាក់ និងបំផ្លិចបំផ្លាញយ៉ាងធ្ងន់ធ្ងររហូតដល់តំបន់មាត់សមុទ្រនោះទេ។ អ្នកនាំពាក្យសន្តិសុខជាតិរបស់សេតវិមានលោក John Kirby បាននិយាយថា ការផ្អាក ដែលនឹងអនុញ្ញាតឱ្យមនុស្សភៀសខ្លួនតាមច្រករបៀងមនុស្សធម៌ចំនួនពីរ និងអាចត្រូវបានប្រើសម្រាប់ការដោះលែងចំណាប់ថ្នូរ គឺជាជំហានដំបូងដ៏សំខាន់៕

សង្រ្គាមក្រោមដីរវាងកងទ័ពអ៊ីស្រាអែល និងក្រុមសកម្មប្រយុទ្ធហាម៉ាស នៅក្នុងផ្លូវរូងក្រោមដី នៅហ្គាហ្សា អាចនឹងចាប់ផ្តើម

កងកម្លាំងការពារអ៊ីស្រាអែលបានប្រកាសថា ពួកគេបានទៅដល់ជាយក្រុងហ្កាហ្សា ហើយរំពឹងថា នឹងចូលទីក្រុងក្នុងពេលឆាប់ៗនេះ។នៅពេលការវាយប្រហារកើតឡើង កងទ័ពអ៊ីស្រាអែល នឹងចាប់ផ្តើមដំណាក់កាលថ្មីដ៏គ្រោះថ្នាក់នៃយុទ្ធនាការយោធាប្រឆាំងនឹងក្រុមយុទ្ធជនហាម៉ាស នៅក្នុងដីទីក្រុងដែលមានប្រជាជនរស់នៅយ៉ាងច្រើន ដែលរួមមានអគារដែលប្រមូលផ្តុំជិតៗគ្នាពីលើដី និងផ្លូវរូងក្រោមដីដ៏លំបាកមួយ នៅខាងក្រោមនោះ។រហូតមកដល់ពេលនេះ យុទ្ធនាការរបស់អ៊ីស្រាអែលប្រឆាំងនឹងក្រុមហាម៉ាស ហាក់ដូចជាត្រូវបានធ្វើឡើង ជាចម្បងពីលើអាកាស រួមទាំងតាមរយៈគ្រាប់បែកបំពាក់ឡាស៊ែរដែលបំពាក់ដោយក្បាលគ្រាប់ដែលអាចទម្លុះចូលជ្រៅ និងមានហ្វុយស៊ីបដែលពន្យារពេល ដើម្បីឲ្យពួកវាអាចបំផ្ទុះ នៅក្រោមដីបាន។ប៉ុន្តែនៅថ្ងៃទី ២៩ ខែតុលា ឆ្នាំ ២០២៣ កងកម្លាំងការពារអ៊ីស្រាអែល បាននិយាយថា កងទ័ពរបស់ខ្លួនបានវាយប្រហារខ្មាន់កាំភ្លើងក្រុមហាម៉ាស នៅក្នុងផ្លូវរូងក្រោមដីមួយ ហើយបានសម្លាប់យុទ្ធជនហាម៉ាសដែលបានចេញពីផ្លូវរូងក្រោមដី ដើម្បីវាយប្រហារទីតាំងរបស់ពួកគេ នៅភាគពាយព្យនៃតំបន់ហ្កាហ្សា។ជាបន្តបន្ទាប់ ក្រុមហាម៉ាស បានបង្ហោះវីដេអូនៃអ្វីដែលហាក់ដូចជាការវាយប្រហារដូចគ្នា ពីទស្សនៈរបស់ក្រុមសកម្មប្រយុទ្ធរបស់ខ្លួន ដោយធ្វើដំណើរឆ្លងកាត់ឆ្នេរខ្សាច់ ដើម្បីវាយប្រហារជនជាតិអ៊ីស្រាអែល។

សារព័ត៌មានThe Wall StreetJournal (WSJ)៖ រុស្ស៊ីស្នើឲ្យប្រទេសដទៃ ប្រគល់អាវុធដែលខ្លួនលក់ឲ្យពួកគេ ត្រឡប់មកវិញ

ប្រទេសរុស្សី កំពុងព្យាយាមប្រមូលយកមកវិញនូវអាវុធមួយចំនួន ដែលខ្លួនបាននាំចេញទៅកាន់ប្រទេសមួយចំនួន ដូចជា ប៉ាគីស្ថាន អេហ្ស៊ីប បេឡារុស និងប្រេស៊ីល។ប្រភពចំនួនបី បានប្រាប់សារព័ត៌មាន The WSJ ថា កាលពីខែមេសាកន្លងទៅ គណៈប្រតិភូមន្ត្រីរុស្ស៊ី ដែលបានទៅទស្សនកិច្ចនៅទីក្រុងគែរ បានស្នើឲ្យប្រធានាធិបតីអេហ្ស៊ីប លោក Abdel Fattah el-Sisi ប្រគល់ម៉ាស៊ីនជាងមួយរយគ្រឿងពីឧទ្ធម្ភាគចក្ររុស្ស៊ី ដែលទីក្រុងម៉ូស្គូ ត្រូវការសម្រាប់សង្គ្រាមប្រឆាំងនឹងអ៊ុយក្រែន។ប្រភពទាំងនោះ បានឲ្យដឹងថា លោក Sisi បានយល់ព្រម ហើយការដឹកជញ្ជូនម៉ាស៊ីនប្រហែល ១៥០ គ្រឿង ទំនងជានឹងចាប់ផ្តើម នៅខែក្រោយ។កិច្ចពិភាក្សាទាំងនោះ គឺជាផ្នែកមួយនៃការជំរុញរុស្ស៊ីធំជាងមុន ដើម្បីស្វែងរកជំនួយពីអតិថិជនអាវុធដ៏យូរអង្វែងរបស់ខ្លួន ដែលអស់ជាច្រើនទសវត្សរ៍ បានទិញយន្តហោះរុស្ស៊ី មីស៊ីល និងប្រព័ន្ធការពារដែនអាកាស ដែលធ្វើឲ្យទីក្រុងម៉ូស្គូ ក្លាយជាប្រទេសនាំចេញអាវុធធំទីពីររបស់ពិភពលោក។រយៈពេលពេញមួយឆ្នាំ ប្រទេសរុស្ស៊ី បានពិភាក្សាជាមួយមន្ត្រីមកពីប៉ាគីស្ថាន បេឡារុស និងប្រេស៊ីល ដើម្បីព្យាយាមទិញកាំភ្លើងធំសម្រាប់ការវាយប្រហារ និងឧទ្ធម្ភាគចក្រដឹកជញ្ជូនជាច្រើនគ្រឿងរបស់រុស្ស៊ី ដែលកងកម្លាំងរបស់ខ្លួន បានបាត់បង់ដោយសារប្រព័ន្ធការពាររបស់អ៊ុយក្រែននៅពេលសង្រ្គាមចាប់ផ្តើម។ប្រភពចំនួនពីរ រួមទាំងអតីតមន្ត្រីចារកម្មរុស្ស៊ី បានប្រាប់សារព័ត៌មាន WSJ អំពីរឿងនេះ។ ប្រភពទាំងនេះ រាយការណ៍ថា ប្រទេសរុស្ស៊ី កំពុងព្យាយាមដោយសម្ងាត់ ដើម្បីទិញត្រឡប់មកវិញនូវអ្វីដែលខ្លួនបានលក់ទៅ «អតិថិជន» របស់ខ្លួន មុននេះ។

មីស៊ីលប្រឆាំងនាវារបស់ក្រុមសកម្មប្រយុទ្ធហេសបូឡា បង្កើនការគំរាមកំហែងដល់កងទ័ពជើងទឹកអាមេរិក

មីស៊ីលប្រឆាំងនាវាដ៏មានអានុភាពផលិតដោយរុស្ស៊ី ដែលទទួលបានដោយក្រុមហេសបូឡា ផ្តល់ឱ្យក្រុមនេះនូវមធ្យោបាយដើម្បីបញ្ជូនការគំរាមកំហែងរបស់មេដឹកនាំរបស់ខ្លួនប្រឆាំងនឹងនាវាចម្បាំងអាមេរិក និងគូសបញ្ជាក់អំពីហានិភ័យធ្ងន់ធ្ងរនៃសង្គ្រាមក្នុងតំបន់ ណនេះបើយោងតាមប្រភពដែលស្គាល់ពីឃ្លាំងអាវុធរបស់ក្រុមហេសបូឡា។មេដឹកនាំក្រុមហេសបូឡា លោក Sayyed Hassan Nasrallah បានព្រមានក្រុងវ៉ាស៊ីនតោន កាលពីសប្តាហ៍មុនថា ក្រុមរបស់លោកមានអ្វីមួយនៅក្នុងឃ្លាំងសម្រាប់ប្រឆាំងនាវាអាមេរិក ដែលដាក់ពង្រាយនៅក្នុងតំបន់ ចាប់តាំងពីសង្រ្គាមបានផ្ទុះឡើងកាលពីខែមុន រវាងក្រុមប៉ាឡេស្ទីនហាម៉ាស និងអ៊ីស្រាអែល ដែលបានអង្រួនមជ្ឈិមបូព៌ាកាន់តែទូលំទូលាយ។ប្រភពចំនួនពីរនៅក្នុងប្រទេសលីបង់ ដែលស្គាល់ពីឃ្លាំងអាវុធរបស់ក្រុមគាំទ្រដោយអ៊ីរ៉ង់ បាននិយាយថា មេដឹកនាំក្រុមហេសបូឡារូបនោះ កំពុងសំដៅទៅលើសមត្ថភាពមីស៊ីលប្រឆាំងនាវាដែលមានអានុភាពយ៉ាងខ្លាំងរបស់ក្រុមសកម្មប្រយុទ្ធមួយនេះ រួមទាំងមីស៊ីលយ៉ាឃុត (Yakhont) ដែលផលិតដោយរុស្ស៊ី ហើយអាចបាញ់បានចម្ងាយ ៣០០គីឡូម៉ែត្រ។ទីក្រុងវ៉ាស៊ីនតោន បាននិយាយថា ការដាក់ពង្រាយកងនាវាចរនៅសមុទ្រមេឌីទែរ៉ាណេរបស់ខ្លួន ដែលរួមមាននាវាផ្ទុកយន្តហោះពីរគ្រឿង និងនាវាគាំទ្ររបស់ពួកគេ មានគោលបំណងការពារជម្លោះពីការរីករាលដាលកាន់តែទូលំទូលាយដោយការរារាំងអ៊ីរ៉ង់ ដែលគាំទ្រក្រុមហាម៉ាស ក្រុមហេសបូឡា និងក្រុមឥស្លាមជីហាត របស់ប៉ាឡេស្ទីនផងដែរ៕

ប្រមុខសិទ្ធិមនុស្សអង្គការសហប្រជាជាតិ និយាយថា ឧក្រិដ្ឋកម្មសង្គ្រាម ត្រូវបានប្រព្រឹត្តដោយភាគីទាំងសងខាងនៃជម្លោះអ៊ីស្រាអែល-ហាម៉ាស់

ស្នងការជាន់ខ្ពស់ទទួលបន្ទុកសិទ្ធមនុស្សអង្គការសហប្រជាជាតិ និយាយកាលពីថ្ងៃពុធថា ឧក្រិដ្ឋកម្មសង្គ្រាម ត្រូវបានប្រព្រឹត្តិឡើងដោយភាគីទាំងពីរ អ៊ីស្រាអែលនិងក្រុមហាម៉ាស់ នៅក្នុងជម្លោះ ដែលបានផ្ទុះឡើងរយៈពេល១ខែមកនេះ។ លោក Volker Turk បាននិយាយនៅច្រកឆ្លងកាត់តំបន់ Rafah ក្នុងប្រទេសអេហ្ស៊ីប ព្រំដែនជាមួយតំបន់ហ្កាហ្សាថា អំពើឃោឃៅត្រូវបានប្រព្រឹត្តឡើង ដោយក្រុមប្រដាប់អាវុធប៉ាឡេស្ទីន កាលពីថ្ងៃទី៧ ខែតុលា គឺយង់ឃ្នងបំផុត វាជាឧក្រិដ្ឋកម្មសង្គ្រាម ខណៈកំពុងបន្តឃុំខ្លួនចំណាប់ថ្នូរ។ លោកនិយាយថា ការដាក់ទណ្ឌកម្មជារួម ធ្វើឡើងដោយអ៊ីស្រាអែលលើជនស៊ីវិលប៉ាឡេស្ទីន គឺជាឧក្រិដ្ឋកម្មសង្គ្រាម ខណៈជាការជម្លៀសជនស៊ីវិលដោយបង្ខំ។ និយាយអំពីការផ្តល់ជំនួយមនុស្សធម៌ ដែលត្រូវបានដឹកជញ្ជូនតាមច្រកឆ្លងកាត់តំបន់Rafah លោក Turk និយាយថាជីវិតមានភាពអយុត្តិធម៌ ឃោឃៅខ្លាំង។ អ៊ីស្រាអែល បានទម្លាក់គ្រាប់បែកទៅលើតំបន់ហ្កាហ្សាឥតឈប់ឈរ ក្នុងការឆ្លើយតបទៅនឹងការឆ្មក់ចូលរបស់ក្រុមហាម៉ាស់ឆ្លងកាត់ព្រំដែនចូលអ៊ីស្រាអែលភាគខាងត្បូងកាលពីថ្ងៃទី៧ ខែតុលា ដែលខ្មាន់កាំភ្លើង បានសម្លាប់មនុស្ស១.៤០០នាក់ និងចាប់ចំណាប់ថ្នូរប្រមាណ២៤០នាក់។ អ៊ីស្រាអែល បានទម្លាក់គ្រាប់បែកនៅតំបន់ហ្កាហ្សាបណ្តាលឲ្យមនុស្ស១០.៥០០នាក់ស្លាប់ មានស្ត្រីនិងកុមារភាគច្រើន។ លោក Turk និយាយថា លោកបានចាត់ទុកជាជាបញ្ហាបន្ទាន់ សម្រាប់ភាគីទាំងអស់ នៅពេលនេះដើម្បីព្រមព្រៀងលើបទឈប់បាញ់។ លោកនិយាយថា មានភាពចាំបាច់ផ្នែកសិទ្ធមនុស្សចំនួន៣ គឺ ដឹកជញ្ជូនជំនួយមនុស្សធម៌គ្រប់គ្រាន់ទៅកាន់តំបន់ហ្កាហ្សា ដោះលែងចំណាប់ថ្នូរ និងអនុវត្តការបញ្ចប់រយៈពេលជាយូរចំពោះការចូលកាន់កាប់។

នគរបាលស៊ែរប៊ី ចាប់ខ្លួនជនអន្តោប្រវេសន៍ជាង ៤.៥០០នាក់ និងរឹបអូសអាវុធជាច្រើន

ជាការឆ្លើយតបទៅនឹងការបាញ់ប្រហារនាពេលថ្មីៗនេះ ដែលជនអន្តោប្រវេសន៍បីនាក់ បានបាត់បង់ជីវិត នគរបាលស៊ែរប៊ី បានបើកប្រតិបត្តិការទូទាំងប្រទេស សំដៅលើការឃាត់ខ្លួនជនអន្តោប្រវេសន៍នៅតំបន់ភាគខាងជើង និងភាគខាងកើតនៃប្រទេសក្នុងតំបន់បាល់កង់មួយនេះ។ប្រតិបត្តិការនេះបានបណ្តាលឱ្យមានការឃុំខ្លួនជនអន្តោប្រវេសន៍ជាង ៤.៥០០នាក់ នៅក្នុងក្រុងសាបូទីកា (Subotica) ទីក្រុងស៊ុមបូរ (Sombor) និងទីក្រុងគីគីនដា (Kikinda) នៅជិតព្រំដែនប្រទេសហុងគ្រី នៅភាគខាងជើង ក៏ដូចជានៅជិតទីក្រុង ភីរ៉ត (Pirot) នៅភាគអាគ្នេយ៍ ជិតព្រំដែនប្រទេសប៊ុលហ្គារី ផងដែរ។ ជនអន្តោប្រវេសន៍ដែលត្រូវបានឃាត់ខ្លួនទាំងនោះ ត្រូវបានផ្ទេរទៅកាន់ជំរំគ្រប់គ្រងដោយរដ្ឋាភិបាល។ក្នុងប្រតិបត្តិការនោះ នគរបាលរឹបអូសបានកាំភ្លើងវែង ៥ដើម កាំភ្លើងខ្លី ៥ដើម គ្រាប់រំសេវជាង ១.៥០០គ្រាប់ កាំភ្លើងវែងប្រភេទផ្សេងៗ លិខិតឆ្លងដែនបរទេសរាប់រយក្បាល និងឆែកឆេររថយន្តជាង ៨១.០០០គ្រឿង និងលំនៅឋានជាង ៣០០ខ្នង។សេចក្តីថ្លែងការណ៍របស់ក្រសួងមហាផ្ទៃស៊ែរប៊ី បានសង្កត់ធ្ងន់លើការប្តេជ្ញាចិត្តរបស់ពួកគេក្នុងការដោះស្រាយបញ្ហានៃការធ្វើអន្តោប្រវេសន៍មិនទៀងទាត់ និងការរុះរើបណ្តាញរត់ពន្ធមនុស្ស។ ខណៈពេលដែលសេចក្តីថ្លែងការណ៍មិនបានបញ្ជាក់ពីសញ្ជាតិរបស់ជនអន្តោប្រវេសន៍ ដែលត្រូវបានឃាត់ខ្លួននោះ បុគ្គលភាគច្រើនដែលប្រើប្រាស់ខ្សែផ្លូវតំបន់បាល់កង់ ដើម្បីចូលសហភាពអឺរ៉ុប គឺមកពីតំបន់ដូចជាមជ្ឈិមបូព៌ា អាហ្វហ្គានីស្ថាន ប៉ាគីស្ថាន និងអាហ្វ្រិកខាងជើងជាដើម៕

ចំនួនអ្នកស្លាប់សរុបកើនដល់ ១២.១០០នាក់ ក្នុងជម្លោះហ្កាហ្សា ខណៈទាហានអ៊ីស្រាអែល បន្តការវាយលុកកាន់តែខ្លាំង

ជម្លោះដ៏មហន្តរាយនៅតំបន់ហ្កាហ្សា បានឆក់យកជីវិតមនុស្សជាង ១២.១០០នាក់ ទាំងភាគីប៉ាឡេស្ទីន និងអ៊ីស្រាអែល នេះបើយោងតាមទិន្នន័យចេញផ្សាយដោយក្រុមអាជ្ញាធរសុខាភិបាលទាំងសងខាងកាលពីថ្ងៃពុធ (០៨ វិច្ឆិកា)។ នាយកដ្ឋានសុខាភិបាលនៃតំបន់ហ្កាហ្សា ស្ទ្រីប កាលពីថ្ងៃពុធ បានបង្ហាញពីតួលេខអ្នកស្លាប់ដ៏គួរឱ្យភ្ញាក់ផ្អើលចំនួន ១០.៥៦៩នាក់ ចាប់តាំងពីការផ្ទុះឡើងនៃជម្លោះបច្ចុប្បន្ននេះមក ហើយប្រភពរបស់អ៊ីស្រាអែលបានរាយការណ៍ថា មនុស្សជាង ១.៤០០នាក់ បានបាត់បង់ជីវិតនៅក្នុងជម្លោះនេះ។អ្នកនាំពាក្យកងកម្លាំងការពារអ៊ីស្រាអែល បានបញ្ជាក់កាលពីថ្ងៃពុធ ពីការបំផ្លិចបំផ្លាញដែលកំពុងបន្តនៃមូលដ្ឋានរឹងមាំរបស់ក្រុមហាម៉ាស នៅទីក្រុងហ្កាហ្សា និងការរឹបអូសបានគ្រាប់រ៉ូកែតប្រមាណ ៧០០គ្រាប់។ បន្ថែមពីលើនេះ អង្គភាពវិស្វកម្មបានកម្ទេចរូងក្រោមដីដែលប្រើប្រាស់ដោយក្រុមហាម៉ាស ចំនួន ១៣០ទីតាំងដោយជោគជ័យផងដែរ។ក្រុមសកម្មប្រយុទ្ធហាម៉ាស បានបន្តការប៉ះទង្គិចជាមួយកងកម្លាំងអ៊ីស្រាអែល ដោយអះអាងថាបានបំផ្លាញរថយន្តយោធាអ៊ីស្រាអែលចំនួន ១៥គ្រឿង រួមទាំងរថក្រោះចំនួន ៥គ្រឿងនៅទូទាំងទីតាំងជាច្រើននៅក្នុងតំបន់ហ្កាហ្សា។ កងពលតូចអាល់កាសាម ដែលជាស្លាបប្រដាប់អាវុធរបស់ក្រុមហាម៉ាស បានអះអាងទទួលខុសត្រូវចំពោះការបំផ្លាញយានជំនិះយោធាអ៊ីស្រាអែល ចំនួន ១៣៦គ្រឿង ចាប់តាំងពីជម្លោះបច្ចុប្បន្នបានចាប់ផ្តើមមក៕

ទាហានអ៊ីស្រាអែល និងក្រុមហាម៉ាស កំពុងប្រយុទ្ធគ្នាយ៉ាងស្វិតស្វាញក្នុងក្រុងហ្កាហ្សា ខណៈជនស៊ីវិលបន្តរត់គេចខ្លួន

កងកម្លាំងអ៊ីស្រាអែល និងក្រុមសកម្មប្រយុទ្ធហាម៉ាស ហាក់ដូចជាកំពុងប្រយុទ្ធគ្នានៅចម្ងាយដ៏ជិតយ៉ាងស្វិតស្វាញក្នុងទីក្រុងហ្កាហ្សា ខណៈដែលជនស៊ីវិលរាប់ពាន់នាក់ បន្តភៀសខ្លួនចេញពីភាគខាងត្បូងកាលពីថ្ងៃពុធ (០៨ វិច្ឆិកា) ដើម្បីចៀសវាងការជាប់ពាក់ព័ន្ធនៅក្នុងជម្លោះដ៏តានតឹងនេះ។យោធាអ៊ីស្រាអែលបាននិយាយថា កងទ័ពរបស់ខ្លួនបានរុលចូលទៅកណ្ដាលនៃទីក្រុងហ្កាហ្សា ដែលជាបន្ទាយសំខាន់របស់ក្រុមហាម៉ាស និងជាទីក្រុងដ៏ធំបំផុតនៅក្នុងតំបន់ហ៊ុមព័ទ្ធមាត់សមុទ្រនេះ ខណៈដែលក្រុមឥស្លាមនិយមនេះ បាននិយាយថា អ្នកប្រយុទ្ធរបស់ខ្លួនបានធ្វើឱ្យមានការខាតបង់យ៉ាងធ្ងន់ធ្ងរដល់អ៊ីស្រាអែល។រថក្រោះជាច្រើនគ្រឿងរបស់អ៊ីស្រាអែល បានជួបការតស៊ូយ៉ាងខ្លាំងពីយុទ្ធជនហាម៉ាសដោយប្រើប្រាស់ផ្លូវរូងក្រោមដី ដើម្បីលបវាយឆ្មក់ នេះបើយោងតាមប្រភពពីក្រុមហាម៉ាស ដែលគាំទ្រដោយអ៊ីរ៉ង់ និងក្រុមសកម្មប្រយុទ្ធផ្ដាច់ខ្លួនឥស្លាម ជីហាត។អ៊ីស្រាអែលបានវាយប្រហារតំបន់ហ្កាហ្សា ជាការឆ្លើយតបទៅនឹងការវាយឆ្មក់ឆ្លងព្រំដែនរបស់ក្រុមសកម្មប្រយុទ្ធហាម៉ាស លើភាគខាងត្បូងអ៊ីស្រាអែលកាលពីថ្ងៃទី៧ ខែតុលា ដែលក្នុងនោះខ្មាន់កាំភ្លើងបានសម្លាប់មនុស្ស ១.៤០០នាក់ ដោយភាគច្រើនជាជនស៊ីវិល និងបានចាប់ចំណាប់ថ្នូរប្រហែល ២៤០នាក់ នេះបើយោងតាមតួលេខសរុបរបស់អ៊ីស្រាអែល។ ក្រុមមន្ត្រីប៉ាឡេស្ទីនបាននិយាយថា មនុស្សចំនួន ១០.៥៦៩នាក់ ត្រូវបានសម្លាប់គិតត្រឹមថ្ងៃពុធ (០៨ វិច្ឆិកា) ដោយក្នុងនោះមាន ៤០% ជាកុមារ ខណៈអ៊ីស្រាអែលនិយាយថា ទាហានរបស់ខ្លួនចំនួន ៣៣នាក់ក៏ត្រូវបានសម្លាប់ផងដែរ៕

បណ្ដាញសង្គម

ព័ត៌មានថ្មីៗ

ប៉ូលិសកម្ពុជាបញ្ជាក់ពីការចាប់ជនជាតិសាម៉នពីរនាក់បាញ់ប្រហារលើជនជាតិអូស្ត្រាលីពីរនាក់នៅទីក្រុងហូជីមិញ

ចាប់គិតចាប់ពីខែកក្កដាឆ្នាំមុនដល់ពេលនេះសមត្ថកិច្ចបង្ក្រាប Onlin Scams ជាង៤០០ករណី និងបណ្តេញជនបរទេសជិត ២ម៉ឺននាក់ចេញពីកម្ពុជា

មន្រ្តីជាន់ខ្ពស់ក្រសួងកោតសរសើរមន្ទីរអភិវឌ្ឍន៍ជនបទខេត្តកំពង់ឆ្នាំង ថែទាំផ្លូវបានល្អជូនប្រជាពលរដ្ឋ

ការិយាល័យឧតុនិយមអង់គ្លេស៖ អាកាសធាតុក្តៅជាប់កំណត់ត្រាខែឧសភា មិនទាន់អាចចាត់ថ្នាក់ថាជារដូវក្តៅខ្លាំងនោះទេ

ប្រមុខ WHO ព្រមានថា ជម្លោះជំរុញឲ្យវិបត្តិជំងឺ Ebola កាន់តែអាក្រក់ នៅភាគខាងកើតកុងហ្គោ

ឯកឧត្តម គន់ គីម អញ្ជើញចុះសួរសុខទុក្ខសមាជិក អ.ន.ក.តាមខ្នងផ្ទះ ក្នុងខេត្តស្វាយរៀង

អ៊ីរ៉ង់៖ សេចក្តីព្រាងកិច្ចព្រមព្រៀងជាមួយអាមេរិក នឹងបើកច្រកសមុទ្រ Hormuz ឡើងវិញ និងបញ្ចប់បិទផ្លូវទឹក

នគរបាលអេស្ប៉ាញសម្រុកចូលទីស្នាក់ការកណ្តាលគណបក្សសង្គមនិយមរបស់លោក Sanchez

ហ្គាណាធ្វើមាតុភូមិនិវត្តន៍ពលរដ្ឋរបស់ខ្លួន ក្រោយការវាយប្រហារប្រឆាំងជនបរទេសនៅអាហ្វ្រិកខាងត្បូង

ជនមូស្លីមនៅទូទាំងតំបន់មជ្ឈិមបូព៌ា និងអាហ្វ្រិកខាងជើងប្រារព្ធថ្ងៃដំបូងនៃពិធីបុណ្យ Eid

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877