BTV NEWS

ភ្ជុំបិណ្ឌ៣ថ្ងៃ គ្រោះថ្នាក់ចរាចរណ៍សម្លាប់អ្នកដំណើរជាង ២០នាក់ របួសធ្ងន់ស្រាលជាង ១០០នាក់

គិតត្រឹមខែកញ្ញាឆ្នាំ២០២៦នេះ មន្ត្រីនគរបាល ៧៧នាក់ត្រូវវិន័យធ្ងន់ធ្ងរដោយសារ Online Scams ខណៈជនជាតិខ្មែរ និងបរទេសជិត ៥ពាន់ទៀតត្រូវជាប់ឃុំ

សមត្ថកិច្ចឃាត់ខ្លួនជនបរទេស៣នាក់ ក្រោយរកឃើញសារធាតុញៀនប្រភេទកញ្ឆាជាង ១០០ដុំ ពេលត្រៀមចាកចេញពីកម្ពុជាតាមយន្តហោះ

ករណីបុរសម្នាក់ឡើងលើផ្លូវល្បឿនលឿនPK54 យកដែកដាក់ទទឹងផ្លូវត្រូវបានសមត្ថកិច្ចនគរបាលស្រាវជ្រាវបង្រ្កាបបានហើយ

សន្តិសុខ និង សង្គម

នាយកខណ្ឌរដ្ឋបាលជលផលខេត្តកណ្ដាល ព្រមានចាត់វិធានការក្តៅចំពោះជនប្រព្រឹត្តបទល្មើសនេសាទខុសច្បាប់

កណ្ដាល៖ លោក ហេង សុភារិទ្ធ នាយខណ្ឌរដ្ឋបាលជលផលខេត្តកណ្តាល បានព្រមានចាត់វិធានការក្តៅ ដោយគ្មានការលើកលែងចំពោះជនប្រព្រឹត្តបទល្មើសនេសាទដោយខុសច្បាប់ ហើយបានអំពាវនាវដល់បងប្អូនប្រជានេសាទទាំងអស់ ដែលមានឧបករណ៍ខុសច្បាប់ សូមប្រញាប់ប្រគល់ជូនដល់សមត្ថកិច្ចជាបន្ទាន់ផងដែរ។ថ្លែងប្រាប់ទូរទស្សន៍BTVក្រោយបញ្ចប់កម្មវិធីផ្សព្វផ្សាយច្បាប់ ស្តីពីជលផល និងយុទ្ធនាការនៃ ការបង្ក្រាបបទល្មើសនេសាទ នាព្រឹកថ្ងៃទី៤ ខែតុលា ឆ្នាំ២០២៣នេះ លោក ហេង សុភារិទ្ធ បានលើកឡើងថា ចាប់ពីពេលនេះតទៅ ខណ្ឌរដ្ឋបាលជលផលខេត្តកណ្តាល នឹងធ្វើយុទ្ធនាការចុះបង្រ្កាបបទល្មើសនេសាទជាប្រចាំគ្រប់ទីកន្លែងទាំងអស់ដែលស្ថិតនៅក្នុងខេត្តកណ្តាល ហើយប្រសិនបើរកឃើញជនណាដែលប្រព្រឹត្តខុស នឹងច្បាប់ស្តីពីជលផលនេះ នឹងចាត់វិធានការទៅតាមច្បាប់ជាធរមានផងដែរ ខណៈអាជ្ញាធរមានការអំពាវនាវហើយនៅតែបន្តប្រព្រឹត្តនោះ។ជាមួយគ្នានោះដែរ លោក ហេង សុភារិទ្ធ ក៏បានរំលឹក និងអំពាវនាវដល់បងប្អូនប្រជានេសាទទាំងអស់ ដែលមានឧបករណ៍ឆក់ ឬឧបករណ៍ផ្សេងៗទៀត ដែលល្មើសនឹងច្បាប់របស់ជលផល គប្បីប្រគល់ជូនដល់អាជ្ញាធរយកទៅកម្ទេចចោលផងដែរ ដើម្បីធ្វើយ៉ាងណាលុបបំបាត់ការនេសាទខុសច្បាប់ជាពិសេសការឆក់នេះឲ្យអស់ ដើម្បីបង្កើនផលត្រីឡើងវិញ ខណៈបច្ចុប្បនផលត្រីកំពុងតែធ្លាក់ចុះដោយសារតែការឆក់ និងរាយស្បៃមុងជាដើមនោះ។សូមបញ្ជាក់ថា ក្នុងរយៈពេលប៉ុន្មានថ្ងៃចុងក្រោយនេះខណ្ឌរដ្ឋបាលជលផលខេត្តកណ្តាល ដឹកនាំដោយលោក ហេង សុភារិទ្ធី បានចុះបង្រ្កាបបទល្មើសនេសាទខុសច្បាប់ជាបន្តបន្ទាប់នៅ ស្រុកពញាឮ ខេត្តកណ្តាល។ ក្រោយធ្វើការចុះបង្រ្កាប ដោយកំលាំងចំរុះបានរុះរើសារយកបទល្មើសនេសាទ ជាច្រើនដូចជា លូស្បៃមុង, របាំងស្បៃមុង, បង្គាល និងឧបករណ៍ខុសច្បាប់មួយចំនួនទៀត ដើម្បីយកទៅដុតបំផ្លាញចោលនៅនឹងកន្លែងកើតហេតុផងដែរ៕អត្ថបទបាន ចក់

ជនសង្ស័យបាញ់ប្រហារនៅផ្សារទំនើបថៃ បានកែកាំភ្លើងតម្រូវតាមការបាញ់លេងនៅទីលំហ

មន្ត្រីនគរបាលជាន់ខ្ពស់ម្នាក់ បាននិយាយនៅថ្ងៃពុធ ទី៤ ខែតុលានេះថា ក្មេងជំទង់ម្នាក់ដែលសង្ស័យថាបានសម្លាប់ជនបរទេសពីរនាក់ និងធ្វើឲ្យរងរបួសមនុស្សប្រាំនាក់ផ្សេងទៀត ក្នុងការបាញ់ប្រហារនៅផ្សារទំនើបប្រទេសថៃ បានកែកាំភ្លើងខ្លីតម្រូវតាមការបាញ់លេងនៅទីលំហ។ ភាពវឹកវរ បានផ្ទុះឡើងនៅផ្សារទំនើប ស្យាម ប៉ារ៉ាហ្គន (Siam Paragon) ក្នុងទីក្រុងបាងកក ជិតដល់ម៉ោងមមាញឹកកាលពីថ្ងៃអង្គារ ដោយមនុស្សរាប់រយនាក់បានរត់ភៀសខ្លួន ខណៈការបាញ់កាំភ្លើងបានផ្ទុះឡើង។ អ្នកស្លាប់គឺជាស្ត្រីពីរនាក់ មកពីប្រទេសចិន និងសហភាពមីយ៉ាន់ម៉ា។ ជនសង្ស័យជាខ្មាន់កាំភ្លើងអាយុ ១៤ឆ្នាំ ត្រូវបានចាប់ខ្លួនកាលពីល្ងាចថ្ងៃអង្គារ។ ឧត្តមសេនីយឯក Samran Nuanma បាននិយាយថា ខ្មាន់កាំភ្លើងបានកែកាំភ្លើងដែលតម្រូវតាមការបាញ់លេងនៅទីលំហ ដើម្បីអាចប្រើប្រាស់គ្រាប់រំសេវបាន។ នគរបាលនិយាយថា ជនសង្ស័យបានទទួលការព្យាបាលផ្លូវចិត្ត ហើយមិនបានលេបថ្នាំនោះទេ។ លោក Torsak Sukvimol ស្នងការនគរបាលជាតិបាននិយាយនៅក្នុងបទសម្ភាសន៍តាមទូរទស្សន៍នៅថ្ងៃពុធនេះថា ជាធម្មតាយើងមិនឱ្យជនសង្ស័យនៅរស់នោះទេ។ ករណីនេះគឺជាករណីសិក្សាដ៏សំខាន់មួយសម្រាប់យើង។ យើងត្រូវការព័ត៌មានពីយុវជន។ឧបទ្ទវហេតុនៅផ្សារទំនើបដ៏ល្បីល្បាញបំផុតរបស់ប្រទេសថៃ អាចជាការប៉ះទង្គិចដល់កិច្ចខិតខំប្រឹងប្រែងរបស់ប្រទេសនេះ ក្នុងការទ្រទ្រង់សេដ្ឋកិច្ចដែលកំពុងធ្លាក់ចុះ ដោយការជំរុញវិស័យទេសចរណ៍ដ៏សំខាន់របស់ខ្លួន។

អ្នកនេសាទហ្វីលីពីន៣នាក់ស្លាប់ បន្ទាប់ពីការបុកទម្លាយដោយទូកមិនស្គាល់អត្តសញ្ញាណ នៅសមុទ្រចិនខាងត្បូង

ឆ្មាំល្បាតឆ្នេរប្រទេសហ្វីលីពីន និយាយនៅថ្ងៃពុធនេះថា អ្នកនេសាទហ្វីលីពិន៣នាក់ បានស្លាប់ បន្ទាប់ពីទូករបស់ពួកគេ ត្រូវបានបុកទម្លាយដោយទូកពាណិជ្ជកម្មបរទេសមិនស្គាល់អត្តសញ្ញាណ ខណៈកំពុងឆ្លងកាត់សមុទ្រចិនខាងត្បូង។ សេចក្តីថ្លែងការណ៍និយាយថា ឧបទ្ទវហេតុនេះ បានកើតឡើង កាលពីថ្ងៃចន្ទ ខណៈទូកកំពុងឆ្លងកាត់ដែនទឹក មានចម្ងាយ១៥៧គីឡូម៉ែត្រភាគពាយព្យ តំបន់កោះប៉ះប្រះទឹក ស្កាប្រូ (Scarborough Shoal) ដែលមានជម្លោះ។ សមាជិកនាវិក១១នាក់ ត្រូវបានជួយសង្គ្រោះបន្ទាប់ពីទូកបានលិច។ប្រធានាធិបតីលោក Ferdinand Marcos Jr បាននិយាយថា ប្រទេសហ្វីលីពីន កំពុងស៊ើបអង្កេតពីឧបទ្ទវហេតុនេះ ដើម្បីស្វែងយល់ពីអ្វីដែលបណ្តាលឲ្យមានអ្នកស្លាប់។ លោកបាននិយាយនៅលើបណ្តាញផ្សព្វផ្សាយសង្គមថា យើងធានាដល់ជនរងគ្រោះ ក្រុមគ្រួសាររបស់ពួកគេ និងមនុស្សគ្រប់គ្នាថា យើងនឹងប្រើប្រាស់គ្រប់កិច្ចប្រឹងប្រែងដើម្បីឲ្យអ្នកទាំងនោះមកទទួលខុសត្រូវ ដែលបានធ្វើឲ្យមានឧបទ្ទវហេតុលើដែនសមុទ្រដ៏គួឲ្យសោកស្តាយនេះ។ភាពតានតឹងជុំវិញដែនទឹកទាំងនេះ បានផ្ទុះឡើងកាលពីពេលថ្មីៗនេះ បន្ទាប់ពីប្រទេសហ្វីលីពីន និយាយថាខ្លួនបានដកចេញរបាំងពោងបាល់ប្រវែង៣០០ម៉ែត្រ ដែលបង្កើតឡើងដោយឆ្មាំឆ្នេររបស់ប្រទេសចិន នៅជិតតំបន់កោះប៉ះប្រះទឹកស្កាប្រូ ជាចំណុចនេសាទចម្បាង និងជាផ្នែកសំខាន់នៅដែនសមុទ្រដែលមានការប្រឈមបំផុតនៅអាស៊ី។

អ្នកជំងឺ២៤នាក់ រួមមានកុមារ១២នាក់ស្លាប់ រយៈពេលតែ១ថ្ងៃ នៅមន្ទីរពេទ្យប្រទេសឥណ្ឌា

កុមារ១២នាក់ បានស្លាប់ក្នុងរយៈពេលតែមួយថ្ងៃ នៅមន្ទីរពេទ្យនៅក្នុងរដ្ឋ Maharashtra ប្រទេសឥណ្ឌា កាលពីថ្ងៃអាទិត្យ បង្កឲ្យមានព្យុះនយោបាយរយៈពេលច្រើនថ្ងៃក្រោយមក។ យោងតាមមន្ត្រីមន្ទីរពេទ្យ និងប្រព័ន្ធផ្សព្វផ្សាយក្នុងតំបន់បានឲ្យដឹងថា អ្នកស្លាប់មានចំនួន២៤នាក់ នៅមន្ទីរពេទ្យរដ្ឋាភិបាល Shankarrao Chavan ក្នុងស្រុក Nanded ។ អ្នកនយោបាយគណបក្សប្រឆាំង បានចោទប្រកាន់រដ្ឋាភិបាលតំបន់ និងអាជ្ញាធរមន្ទីរពេទ្យ ពីការមិនយកចិត្តទុកដាក់កាលពីថ្ងៃអង្គារ។ កូនរបស់លោក Ramesh Chokovasadavarti បានស្លាប់នៅមន្ទីរពេទ្យ។ លោកនិយាយថា យើងត្រូវបានគេប្រាប់ថាកូនរបស់យើង មានដំបៅរលួយហើយត្រូវការវះកាត់ដើម្បីកុំឲ្យឆ្លង។ ពួកគេបានសុំការព្រមព្រៀងពីយើង ហើយយើងភ័យខ្លាចនិងបានចុះហត្ថលេខាលើពាក្យសុំការយល់ព្រម ហើយក្រោយមកសាកសពអ្នកស្លាប់ជាកូនរបស់លោក បានយកចេញមក។ប្រធាននៅមន្ទីរពេទ្យ ពុំបានឆ្លើយតបជាមួយសារព័ត៌មានរ៉យទ័រសម្រាប់ការសុំអត្ថាធិប្បាយនោះទេលើការចោទប្រកាន់នេះ ឬការចោទប្រកាន់ប្រឆាំងពីការធ្វើប្រហែស។ ប៉ុន្តែនិយាយទៅកាន់ ទីភ្នាក់ងារសារព័ត៌មាន ANI កាលពីព្រឹកថ្ងៃអង្គារ លោកបាននិយាយថា អ្នកជំងឺពេញវ័យម្នាក់ បានស្លាប់ដោយសារមានជំងឺច្រើន រួមទាំងជំងឺទឹកនោមផ្អែម ជំងឺថ្លើម និងតម្រងនោម។រដ្ឋាភិបាលរដ្ឋ គ្រប់គ្រងដោយគណបក្សរបស់នាយករដ្ឋមន្ត្រីលោក Narendra Modi និងសម្ព័ន្ធមិត្ត បានចាប់ផ្តើមការស៊ើបអង្កេតលើករណីអ្នកស្លាប់។ភាពចលាចល បានបញ្ជាក់ពីភាពច្របូកច្របល់កាន់តែខ្លាំង នៅមន្ទីរពេទ្យរដ្ឋាភិបាល ក្នុងប្រទេសដែលមានប្រជាជនច្រើនបំផុតលើពិភពលោក។ ប្រព័ន្ធថែទាំសុខភាពសាធារណៈរបស់ប្រទេសឥណ្ឌាគ្មានការបំពាក់សម្ភារៈ និងត្រូវបានញាំញីដោយកង្វះបុគ្គលិកនិងសម្ភារៈ។

ទង់ជាតិត្រូវបានបង្ហូតត្រឹមពាក់កណ្តាលដង ខណៈប្រទេសនីហ្សេកាន់ទុក្ខទាហាន២៩នាក់ស្លាប់

ពលរដ្ឋនីហ្សេ ភ្ញាក់ឡើង បានឃើញសារព័ត៌មានដែលនិយាយថា ទាហាននីហ្សេយ៉ាងហោចណាស់២៩នាក់ស្លាប់ ក្នុងការវាយប្រហារដោយក្រុមបះបោរប្រដាប់អាវុធ នៅជិតព្រំដែនរបស់ប្រទេសជាមួយប្រទេសម៉ាលី។ យោងតាមអំណានសេចក្តីថ្លែងការណ៍ នៅលើទូរទស្សន៍នីហ្សេបានឲ្យដឹងថា ទាហាន២៩នាក់បានស្លាប់ និង២នាក់រងរបួសធ្ងន់។ ទង់ជាតិត្រូវបានបង្ហូតត្រឹមពាក់កណ្តាលដង ខណៈប្រទេសនីហ្សេ កាន់ទុក្ខទាហានស្លាប់ទាំង២៩នាក់។មនុស្សជាច្រើនបានចូលរួមរំលែកទុក្ខសម្រាប់ទាហានដែលបានស្លាប់ ខណៈអ្នកផ្សេងទៀតបារម្ភថា រដ្ឋាភិបាលថ្មី ពុំអាចមានសមត្ថភាពបញ្ឈប់ភាពអសន្តិសុខនៅក្នុងប្រទេសនេះ។ក្រសួងការពារជាតិ បាននិយាយថាទាហានជាច្រើន បានវិលត្រលប់ពីប្រតិបត្តិការប្រឆាំងក្រុមសកម្មប្រយុទ្ធ នៅពេលពួកគេត្រូវបានដាក់គោលដៅដោយអ្នកវាយប្រហារជាង១០០នាក់ ជិះតាមយានយន្ត និងម៉ូតូ ដោយប្រើប្រាស់ឧបករណ៍បំផ្ទុះ និងគ្រាប់បែកអត្តឃាត។

ស៊ែរប៊ីចាប់ខ្លួនជនសង្ស័យសំខាន់ជុំវិញការសម្លាប់នគរបាលកូសូវ៉ូ

ក្រសួងមហាផ្ទៃ បាននិយាយថា ប្រទេសស៊ែរប៊ី កាលពីថ្ងៃអង្គារ បានចាប់ខ្លួនមេដឹកនាំនៃក្រុមខ្មាន់កាំភ្លើង ដែលគេសង្ស័យ បានសម្លាប់នគរាបាលកូសូវ៉ូ កាលពីថ្ងៃទី២៤ ខែកញ្ញា។ក្រសួងបាននិយាយនៅក្នុងសេចក្តីថ្លែងការណ៍មួយថា លោក Milan Radoicic ត្រូវបានឃុំខ្លួន នៅក្នុងមន្ទីរឃុំឃាំងរយៈពេល៤៨ម៉ោង ហើយបានប្រគល់ទៅឲ្យការិយាល័យរដ្ឋអាជ្ញាសាធារណៈនៃទីក្រុងបែលហ្គ្រាដ ដោយបន្ថែមថា នគរបាល បានឆែកឆេរផ្ទះល្វែងរបស់គាត់ និងទ្រព្យសម្បត្តិផ្សេងទៀត ប៉ុន្តែមិនបានបញ្ជាក់ថា គាត់ត្រូវបានចាប់ខ្លួន នៅទីណានោះទេ។លោក Radoicic មានវ័យ៤៥ឆ្នាំ គឺជាពាណិជ្ជករម្នាក់ និងជាអតីតអ្នកនយោបាយជនជាតិភាគតិចកូសូវ៉ូដ៏មានឥទ្ធិពល។រដ្ឋអាជ្ញាធរ បាននិយាយថា លោករួមជាមួយនឹង«ជនមិនស្គាល់មុខជាច្រើន» ត្រូវបានគេសង្ស័យថា បានផលិត កាន់កាប់ និងជួញដូរអាវុធ និងសារធាតុផ្ទុះដោយគ្មានការអនុញ្ញាត ព្រមទាំងឧក្រិដ្ឋកម្មធ្ងន់ធ្ងរប្រឆាំងនឹងសុវត្ថិភាពទូទៅ។ពួកគេ បាននិយាយនៅក្នុងសេចក្តីថ្លែងការណ៍មួយថា នៅចន្លោះខែមករា និងថ្ងៃនៃការវាយប្រហារនោះ លោក Radoicic កំពុងទិញអាវុធពីប្រទេសជិតខាងគឺ បូស្នៀ (Bosnia) ហើយបន្ទាប់មកដឹកជញ្ជូន និងរក្សាទុកអាវុធទាំងនោះនៅទីតាំងដែលមិនបានបញ្ជាក់«ក្នុងទីក្រុងកូសូវ៉ូ។

ក្រុមគ្រួសារនៅតែស្វែងរកអ្នកបាត់ខ្លួនក្នុងទឹកជំនន់នៅទីក្រុង Derna របស់ប្រទេសលីប៊ី

ចាប់តាំងពីគ្រោះទឹកជំនន់ដ៏មហន្តរាយ បានលេបត្របាក់តំបន់ទាំងមូលនៃទីក្រុង Derna របស់ប្រទេសលីប៊ី កាលពីខែមុន ជាមួយនឹងសាកសពជាង៤.០០០នាក់មកទល់ពេលនេះមក អ្នករស់រានមានជីវិតនៅតែបន្តស្វែងរកសាច់ញាតិដែលបានបាត់ខ្លួន។ ពួកគេមិនរំពឹងថានឹងអាចរកឃើញពួកគេនៅរស់ទេ ប៉ុន្តែពួកគេចង់កប់អ្នកទាំងនោះឲ្យបានត្រឹមត្រូវដើម្បីឱ្យមានផ្នូរសម្រាប់កាន់ទុក្ខ។លោក Abdulsalam al-Kadi វ័យ៤៣ឆ្នាំ ដែលបានចំណាយរយៈពេលពីរថ្ងៃក្នុងការធ្វើដំណើរទៅទីក្រុង Derna ពីលំនៅឋានថ្មីរបស់លោកនៅសហរដ្ឋអាមេរិក ដើម្បីស្វែងរកឪពុក និងបងប្រុសរបស់ខ្លួន បាននិយាយថា «ខ្ញុំគិតថាប្រហែលជាសមុទ្របានបោកបក់យកពួកគេទៅក្នុងទឹក ហើយប្រហែលជាពួកគេជាប់នៅក្រោមកំពង់ផែ ប៉ុន្តែគ្រាន់តែរកមិនទាន់ឃើញ»។រយៈពេលបីសប្តាហ៍ បន្ទាប់ពីទឹកជំនន់បានសម្លាប់មនុស្សរាប់ពាន់នាក់មក អ្នកនៅរស់រានមានជីវិតជាច្រើនមិនទាន់រកឃើញមនុស្សជាទីស្រលាញ់របស់ពួកគេទេ ខណៈក្រុមបក្សគូប្រជែងរបស់ប្រទេសលីប៊ីបាននឹងកំពុងជជែកវែកញែកអំពីថា អ្នកណាដែលត្រូវស្តីបន្ទោសចំពោះគ្រោះមហន្តរាយនេះ និងមធ្យោបាយកសាងទីក្រុងដែលខូចនោះឡើងវិញ។ឥឡូវនេះ ក្រុមគ្រួសារជាច្រើនប្រឈមមុខនឹងការរំពឹងទុកថា ពួកគេមិនអាចរកឃើញថាមានអ្វីកើតឡើងចំពោះឪពុកម្តាយ កូនៗ ឬសាច់ញាតិផ្សេងទៀតរបស់ពួកគេនោះទេ ទោះបីជាមានការខិតខំប្រឹងប្រែងដើម្បីកំណត់អត្តសញ្ញាណសាកសពក៏ដោយ ខណៈសាកសពជាច្រើនត្រូវបានកប់យ៉ាងប្រញាប់ប្រញាល់នៅក្នុងផ្នូរដ៏ធំមួយដោយប្រើរូបថត ឬការធ្វើតេស្តឌីអិនអេ (DNA) ជាដើម៕

[BREAKING NEWS] លោកKevin McCarthy ត្រូវបានបណ្តេញចេញពីតំណែងជាប្រធានសភានៅក្នុងការបោះឆ្នោតជាប្រវត្តិសាស្ត្រ

អាមេរិក៖ ប្រធានសភាសហរដ្ឋអាមេរិក លោក Kevin McCarthy ត្រូវបានដកចេញពីតំណែងនៅក្នុងការបោះឆ្នោតជាប្រវត្តិសាស្ត្រមួយកាលពីថ្ងៃអង្គារបន្ទាប់ពីការបះបោរស្តាំនិយមចំពោះការពឹងផ្អែករបស់លោកលើគណបក្សប្រជាធិបតេយ្យដើម្បីអនុម័តការផ្តល់មូលនិធិដើម្បីទប់ស្កាត់ការបិទរដ្ឋាភិបាល។ការបោះឆ្នោតចុងក្រោយគឺ សំឡេងគាំទ្រ២១៦ ទល់នឹង២១០ដោយមានគណបក្សសាធារណរដ្ឋចំនួន៨រូបចូលរួមជាមួយគណបក្សប្រជាធិបតេយ្យទាំងអស់ដើម្បីបោះឆ្នោតដើម្បីដកលោក McCarthy ចេញពីតំណែង។ នេះគឺជាលើកទីមួយហើយដែលប្រធានសភាត្រូវបានដកចេញនៅក្នុងការបោះឆ្នោតដកសេចក្ដីទុកចិត្ត៕

កូនប្រុសរបស់លោកយ៉េវហ្គេ ព្រីហ្គោហ្ស៊ី (Yevgeny Prigozhin)«កាន់កាប់ទីបញ្ជាការរបស់ក្រុមទាហានស៊ីឈ្នួល Wagner»

ក្រុមដែលមានទំនាក់ទំនងជាមួយកងជីវពល បាននិយាយថា កូនប្រុសរបស់ លោក យ៉េវហ្គេ ព្រីហ្គោហ្ស៊ី បានចូលកាន់កាប់ទីបញ្ជាការរបស់ក្រុមទាហានស៊ីឈ្នួល Wagner ហើយកំពុងចរចាជាមួយទីក្រុងម៉ូស្គូអំពីការបញ្ជូនអ្នកប្រយុទ្ធរបស់ខ្លួនទៅចូលរួមសង្រ្គាមនៅអ៊ុយក្រែនវិញ។ វិទ្យាស្ថានសម្រាប់ការសិក្សាសង្គ្រាម (ISW) បាននិយាយថា លោក ប៉ាវ៉ែល ព្រីហ្គោហ្ស៊ី (Pavel Prigozhin) មានវ័យ ២៥ឆ្នាំ កំពុងពិភាក្សាជាមួយឆ្មាំការពារជាតិរុស្ស៊ីអំពីអនាគតនៃក្រុមទាហានស៊ីឈ្នួលដែលបង្កើតឡើងដោយឪពុករបស់ខ្លួន នេះបើយោងតាមបណ្តាញ Telegram ដែលមានទំនាក់ទំនងជាមួយក្រុមទាហានស៊ីឈ្នួល Wagner ដ៏លេចធ្លោនេះ។សមាសភាពប្រយុទ្ធសំខាន់ៗរបស់ក្រុម Wagner ត្រូវបានខ្ចាត់ខ្ចាយនៅក្នុងប្រទេសជាច្រើន រួមទាំងបេឡារុស សាធារណរដ្ឋអាហ្វ្រិកកណ្តាល លីប៊ី និងម៉ាលី ដោយយុទ្ធជនរបស់ខ្លួន បានដកខ្លួនចេញពីអ៊ុយក្រែន កាលពីដើមឆ្នាំនេះ។ក្រុមនេះ មិនមានមេដឹកនាំច្បាស់លាស់ទេ ចាប់តាំងពីការស្លាប់របស់ លោក យ៉េវហ្គេ ព្រីហ្គោហ្ស៊ី ក្នុងឧប្បត្តិហេតុធ្លាក់យន្តហោះ ក្នុងខែសីហា រយៈពេលពីរខែ បន្ទាប់ពីគាត់បានដឹកនាំការបះបោរ ដែលបរាជ័យក្នុងគោលបំណងដកតំណែងមេដឹកនាំយោធាជាន់ខ្ពស់របស់រុស្ស៊ីជុំវិញការបរាជ័យប្រតិបត្តិការ នៅក្នុងសង្គ្រាមអ៊ុយក្រែន។

ក្រុមគ្រូពេទ្យអាឡឺម៉ង់ ចាប់ផ្តើមធ្វើកូដកម្មជុំវិញបញ្ហាប្រាក់ឈ្នួល និងអតិផរណាខ្ពស់

ក្រុមវេជ្ជបណ្ឌិតរាប់ពាន់នាក់ កាលពីថ្ងៃច័ន្ទ (២ តុលា) បានធ្វើដំណើរតាមដងផ្លូវទូទាំងប្រទេសអាល្លឺម៉ង់ ដោយត្អូញត្អែរអំពីកំណើនថ្លៃចំណាយប្រចាំថ្ងៃ ស្របពេលមានការកើនឡើងជាបន្តបន្ទាប់នៃអតិផរណា ដែលបានញាំញីបណ្ដាប្រទេសអឺរ៉ុបជាច្រើន។ ក្រុមវេជ្ជបណ្ឌិតនៅទីក្រុងប៊ែរឡាំង បានប្រមូលផ្តុំគ្នានៅខាងក្រៅទីស្នាក់ការកណ្តាលរបស់ក្រសួងសុខាភិបាលសហព័ន្ធ ដោយសម្តែងការទាមទាររបស់ពួកគេសម្រាប់ការគាំទ្រផ្នែកហិរញ្ញវត្ថុបន្ថែមទៀត។ក្រុមអ្នករៀបចំការតវ៉ាបាននិយាយថា កំណើនការចំណាយលើថាមពល បរាជ័យការប៉ុនប៉ងអនុវត្តឌីជីថល និងកង្វះអ្នកមានជំនាញ បានធ្វើឱ្យគ្លីនិកសម្រាកព្យាបាលកាន់តែមានភាពតានតឹង ដែលមិនអាចគ្រប់គ្រងបាន។ ពួកគេបាននិយាយថា ថវិកាដ៏តឹងរ៉ឹងរបស់រដ្ឋាភិបាល បានរួមបញ្ជូលក្នុងវិបត្តិសេដ្ឋកិច្ចរបស់ពួកគេ ហើយការបិទគ្លីនិកបន្តបន្ទាប់អាចប្រែទៅជារឿងធម្មតា ប្រសិនបើស្ថានភាពបច្ចុប្បន្នមិនផ្លាស់ប្តូរ។យោងតាមគ្រូពេទ្យម្នាក់ក្នុងអំឡុងពេលតវ៉ាបានឲ្យដឹងថា ដោយអស់សង្ឃឹមក្នុងការទប់ទល់ថ្លៃចំណាយ គ្លីនិកមួយចំនួនយល់ថា ពួកគេត្រូវបង្ខំចិត្តទទួលបន្ទុកអ្នកជំងឺលើសកំណត់ ដែលមិនត្រឹមតែបង្កើនបន្ទុកការងាររបស់គ្រូពេទ្យប៉ុណ្ណោះទេ ថែមទាំងប៉ះពាល់ដល់គុណភាពនៃការថែទាំដែលផ្តល់ឲ្យអ្នកជំងឺផងដែរ ដោយសារពេលវេលាពិគ្រោះសុខភាពតិច និងមានកំណត់៕

បណ្ដាញសង្គម

ព័ត៌មានថ្មីៗ

អភិបាលរាជធានីភ្នំពេញ ចុះពិនិត្យដោះស្រាយច្រាំងទន្លេមេគង្គបាក់នៅព្រែកលៀប និងរំដោះទឹកជន់លិចមហាវិថីឈ្នះឈ្នះ

សម្ដេចធិបតី ហ៊ុន ម៉ាណែត ជួបលោកវ៉ាន សាកូលីន ពលរដ្ឋខ្មែរជិះម៉ូតូឆ្លងកាត់ប្រទេសជាច្រើន(គោលដៅ១៥ប្រទេស) ផ្សព្វផ្សាយសក្ដានុពលទេសចរណ៍កម្ពុជា ក្នុងពេលបំពេញទស្សនកិច្ចនៅប្រទេសតួកគីយ៉េ

រដ្ឋមន្ត្រីក្រសួងសុខាភិបាលដឹកនាំគណៈប្រតិភូកម្ពុជាទៅចូលរួមកិច្ចប្រជុំលើកទី៧៧ របស់អង្គការសុខភាពពិភពលោកប្រចាំតំបន់ប៉ាស៊ីហ្វិកខាងលិច នៅរដ្ឋធានីម៉ានីល ប្រទេសហ្វីលីពីន

វគ្គបណ្តុះបណ្តាលកម្មវិធី R&I4E 2026 ជំរុញនិស្សិតកម្ពុជាបង្កើតធុរកិច្ចថ្មីពីគម្រោងស្រាវជ្រាវ

ប្រជានេសាទនៅតំបន់ឆ្នេរ Michoacan របស់ម៉ិកស៊ិក ប្រឈមនឹងការមកដល់របស់ព្យុះសង្ឃរា Trudy

UN ថា ភាគីសង្រ្គាមនៅស៊ូដង់ ពុំបានខិតទៅរកកិច្ចប្រជុំនោះទេ និងសូមជំរុញឲ្យបញ្ឈប់ការវាយប្រហារយានដ្រូន

UN ជំរុញឲ្យជំនួយចូលដល់ស្រ្តីមានផ្ទៃពោះ ១៣.០០នាក់ នៅទីក្រុង Taiz របស់យេម៉ែន

លោកស្រី Von der Leyen ៖ EU ស្នើសុំឲ្យទប់ស្កាត់ការនាំចូលពីវិស័យផ្សេងទៀតរបស់ចិន

លោក Zelenskiy៖ ជំនួបត្រីភាគីជាមួយអាមេរិក និងរុស្ស៊ី អាចកើតឡើង អំឡុងជំនួប G20

យុវជន ២៤០នាក់នៅខេត្តកោះកុង បានដាក់ពាក្យបំពេញកាតព្វកិច្ចយោធា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877