នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
គណៈបញ្ជាការឯកភាពរាជធានី ចុះរដ្ឋបាលបង្ក្រាប Online Scams នៅខណ្ឌពោធិ៍សែនជ័យ ឃាត់ជនបរទេស ២០នាក់
ភ្ជុំបិណ្ឌ៣ថ្ងៃ គ្រោះថ្នាក់ចរាចរណ៍សម្លាប់អ្នកដំណើរជាង ២០នាក់ របួសធ្ងន់ស្រាលជាង ១០០នាក់
គិតត្រឹមខែកញ្ញាឆ្នាំ២០២៦នេះ មន្ត្រីនគរបាល ៧៧នាក់ត្រូវវិន័យធ្ងន់ធ្ងរដោយសារ Online Scams ខណៈជនជាតិខ្មែរ និងបរទេសជិត ៥ពាន់ទៀតត្រូវជាប់ឃុំ
សមត្ថកិច្ចឃាត់ខ្លួនជនបរទេស៣នាក់ ក្រោយរកឃើញសារធាតុញៀនប្រភេទកញ្ឆាជាង ១០០ដុំ ពេលត្រៀមចាកចេញពីកម្ពុជាតាមយន្តហោះ

សន្តិសុខ និង សង្គម

មនុស្សជាង ១.០០០ ត្រូវបានជម្លៀសចេញ ខណៈចំហេះព្រៃនៅព័រទុយហ្គាល់រីករាលដាលកាន់តែខ្លាំង

2023/08/08 06:38:37 pm        92
Facebook Telegram Linkin
ព័រទុយហ្កាល់៖ នៅថ្ងៃអង្គារនេះ ក្រុមអ្នកពន្លត់អគ្គិភ័យរាប់រយនាក់បានព្យាយាមពន្លត់ភ្លើងចំហេះព្រៃដែលកំពុងឆាបឆេះនៅភាគខាងត្បូងប្រទេសព័រទុយហ្កាល់ ដែលបានឆេះរាលដាលលើផ្ទៃដីរាប់ពាន់ហិចតា និងបង្ខំឲ្យមានការជម្លៀសមនុស្សប្រហែល ១.៤០០ នាក់។ ភ្លើងឆេះព្រៃដែលបច្ចុប្បន្នកំពុងត្រូវបានទប់ស្កាត់ដោយក្រុមអ្នកពន្លត់អគ្គិភ័យជាង ៨០០ នាក់បានចាប់ផ្តើមកាលពីថ្ងៃសៅរ៍នៅក្នុងក្រុងអូដេមីរ៉ា(Odemira) ក្នុងតំបន់អាឡិនតេចូ(Alentejo)ប៉ុន្តែចាប់តាំងពីពេលនោះមកបានរាលដាលទៅភាគខាងត្បូងឆ្ពោះទៅតំបន់ អាល់ ហ្គាវ (Algarve) ដែលជាគោលដៅទេសចរណ៍មួយក្នុងចំណោមតំបន់ទេសចរណ៍ល្បីៗជាច្រើនរបស់ប្រទេសព័រទុយហ្គាល់។ សីតុណ្ហភាពខ្ពស់ និងខ្យល់បក់ខ្លាំងកំពុងបង្កភាពស្មុគស្មាញដល់កិច្ចខិតខំប្រឹងប្រែងដើម្បីប្រយុទ្ធប្រឆាំងនឹងអណ្តាតភ្លើង ដែលបានបំផ្លាញផ្ទៃដីប្រហែល៦.៧០០ ហិកតា។ មិនយូរប៉ុន្មានមុនពេលថ្ងៃលិចកាលពីថ្ងៃចន្ទ ផ្ទៃមេឃនៅក្រុងអូដេមីរ៉ា បានប្រែជាងងឹត ខណៈពពកផ្សែងដ៏ធំគ្របដណ្ដប់ពាសពេញមេឃ។អភិបាលក្រុង អេដេមីរ៉ា លោក ហេលឌ័រ ហ្គូរ៉េរ៉ូ (Helder Guerreiro) បានហៅស្ថានភាពនេះថា ធ្ងន់ធ្ងរ លំបាក និងស្មុគស្មាញ ស្របពេលមេបញ្ជាការការពារជនស៊ីវិលលកហូសេ រីប៊ើរ៉ូ (Jose Ribeiro) បាននិយាយថា មាន ការងារជាច្រើន នៅខាងមុខដើម្បីគ្រប់គ្រងភ្លើងឆេះព្រៃនេះ ។  ក្រុមអាជ្ញាធរបាននិយាយថា ភូមិតូចៗសរុបចំនួន ១៩ កន្លែងស្ថិតនៅតំបន់ទេសចរណ៍ចំនួន ៤ និងកន្លែងបោះជំរំមួយ ត្រូវបានជម្លៀសចេញពីការប្រុងប្រយ័ត្ន ហើយផ្លូវជាច្រើនត្រូវបានបិទ។បណ្តាប្រទេសនៅអឺរ៉ុបខាងត្បូង ដូចជាព័រទុយហ្គាល់ បាននឹងកំពុងប្រឈមចំពោះសីតុណ្ហភាពបំបែកកំណត់ត្រា ក្នុងរដូវទេសចរណ៍រដូវក្តៅខ្ពស់បំផុត ដែលជំរុញឲ្យក្រុមអាជ្ញាធរព្រមានពីហានិភ័យសុខភាព។ក្រុមអ្នកវិទ្យាសាស្ត្រនិយាយថា រលកកម្ដៅបានកើតមានឡើងកាន់តែញឹកញាប់ កាន់តែខ្លាំង និងរាលដាលពេញមួយរដូវ ដោយសារការប្រែប្រួលអាកាសធាតុ៕

ទឹកជំនន់ដ៏មហន្តរាយជំរុញឱ្យមានកង្វល់អំពីសុវត្ថិភាពស្បៀងអាហារក្នុងប្រទេសចិន

2023/08/08 06:34:27 pm        121
Facebook Telegram Linkin
ចិន៖ ភ្លៀងធ្លាក់ខ្លាំងជាច្រើនថ្ងៃបានបណ្តាលឱ្យមានទឹកជំនន់យ៉ាងធ្ងន់ធ្ងរនៅក្នុងតំបន់ផលិតគ្រាប់ធញ្ញជាតិឈានមុខគេរបស់ប្រទេសចិននៅភាគឦសាន ដោយបានសម្លាប់មនុស្ស១៤នាក់ និងបង្កើនការព្រួយបារម្ភអំពីសន្តិសុខស្បៀង ខណៈដែលទឹកជំនន់បានជន់លិចដីស្រែចំការជាច្រើន។ប្រព័ន្ធផ្សព្វផ្សាយរដ្ឋបានរាយការណ៍ថា នៅចុងភាគខាងជើងក្នុងខេត្ត ហ៊ីឡុងជាំង (Heilongjiang) ដែលនៅជិតខាងនោះ ទន្លេដែលស្រោចស្រពដីស្រែមានជីជាតិបានជោរជន់ វាលស្រែត្រូវបានលិចទឹក ផ្ទះកញ្ចក់ជាច្រើនសម្រាប់ដាំបន្លែត្រូវបានបំផ្លាញ និងរោងចក្រនានាក៏ត្រូវខូចខាតផងដែរ។ការជន់លិចដីស្រែចម្ការនេះ បានបន្ថែមការព្រួយបារម្ភអំពីផលប៉ះពាល់ដែលអាចកើតមាន លើសន្តិសុខស្បៀងនៅក្នុងប្រទេសសេដ្ឋកិច្ចធំទីពីររបស់ពិភពលោកនេះ ដោយសារអាកាសធាតុដ៏ធ្ងន់ធ្ងរដែលទាក់ទងនឹងបម្រែបម្រួលអាកាសធាតុ បង្កការគំរាមកំហែងកាន់តែខ្លាំងឡើងដល់ការផ្គត់ផ្គង់កសិកម្ម និងស្បៀងអាហាររបស់ប្រទេសចិន។ការបំផ្លិចបំផ្លាញដល់វាលស្រែនៅភាគឦសាននៃប្រទេសចិននេះ បានកើតឡើងបន្ទាប់ពីមានភ្លៀងធ្លាក់ខ្លាំងកាលពីចុងខែឧសភា បានជន់លិចខេត្តហឺណាន (Henan) ជាតំបន់ដាំដុះគ្រាប់ធញ្ញជាតិដ៏សំខាន់មួយទៀត ដែលផលិតស្រូវសាលីប្រហែលមួយភាគបីនៃប្រទេសនេះផងដែរ៕

អ្នកជំនាញ៖ ផែនការបញ្ចេញសំណល់ទឹក ហ្វ៊ូគូស៊ីម៉ា របស់ជប៉ុន គឺជាវិធានការកខ្វក់ និងខ្វះភស្តុតាងសុវត្ថិភាព

2023/08/08 06:31:39 pm        121
Facebook Telegram Linkin
ជប៉ុន៖ ផែនការរបស់រដ្ឋាភិបាលជប៉ុនក្នុងការបញ្ចេញទឹកសំណល់ បំពុលដោយនុយក្លេអ៊ែរពីរោងចក្រថាមពលនុយក្លេអ៊ែរ ហ្វ៊ូគូស៊ីម៉ា ដែលបានខូចខាត ចូលទៅក្នុងមហាសមុទ្រប៉ាស៊ីហ្វិក នៅតែបន្តបង្កឱ្យមានកង្វល់អំពីសិទ្ធិមនុស្ស និងបរិស្ថានទូទាំងពិភពលោក។ ប្រធានក្រុមគ្រូពេទ្យអន្តរជាតិសម្រាប់ការទប់ស្កាត់សង្គ្រាមនុយក្លេអ៊ែរ (IPPNW) បាននិយាយថា គម្រោងការនោះគឺជាវិធីសាស្រ្តកខ្វក់ ហើយខ្វះភស្តុតាងអំពីសុវត្ថិភាពរបស់វា។នៅក្នុងបទសម្ភាសន៍ជាមួយបណ្តាញទូរទស្សន៍ចិនសកល (CGTN) លោកបណ្ឌិត Tilman Ruff សហប្រធាននៃក្រុមគ្រូពេទ្យអន្តរជាតិ IPPNW បានបំភ្លឺលើបញ្ហានៃផែនការបញ្ចេញទឹកកខ្វក់នុយក្លេអ៊ែរ របស់ប្រទេសជប៉ុន ដោយលោកបានរិះគន់ថា មិនបានផ្តល់អាទិភាពខ្ពស់លើការការពារសុខភាពមនុស្ស និងបរិស្ថាន។លោក Ruff បានចង្អុលបង្ហាញថា ផែនការបង្ហូរទឹកនេះអាចនាំមកនូវឥទ្ធិពលអវិជ្ជមានយ៉ាងច្រើនទៅលើប្រជាជនមួយចំនួនធំ ដែលរស់នៅតាមឆ្នេរសមុទ្រ និងធ្វើការចិញ្ចឹមជីវិតក្នុងឧស្សាហកម្មនេសាទ ដោយសារតែការបញ្ចេញទឹកដែលមានមេរោគនុយក្លេអ៊ែរនេះ នឹងបង្ខំឱ្យប្រទេសនានាដាក់ចេញនូវតម្រូវការតឹងរ៉ឹងបន្ថែមទៀតលើការនាំចូលអាហារសមុទ្រ។អ្នកជំនាញរូបនោះបានបញ្ជាក់បន្ថែមទៀតថា សហគមន៍អន្តរជាតិគួរតែប្រើប្រាស់បណ្តាញការទូតដើម្បីបង្ហាញពីការព្រួយបារម្ភអំពីបញ្ហានេះ និងគាំទ្រដល់បណ្ដាប្រទេសកោះប៉ាស៊ីហ្វិកនានាក្នុងការសន្ទនារបស់ពួកគេ ជាមួយប្រទេសជប៉ុនក្នុងកម្រិតទ្វេភាគី និងពហុភាគី ក្នុងកិច្ចខិតខំប្រឹងប្រែងដើម្បីជំរុញឱ្យប្រទេសជប៉ុនមានការទទួលខុសត្រូវបន្ថែមទៀតលើបញ្ហានេះ៕

ប្រតិកម្មអន្តរជាតិកើនឡើងកាន់តែខ្លាំង បន្ទាប់ពីនាវាចិនបាញ់កាណុងបាញ់ទឹកលើនាវាហ្វីលីពីន នៅសមុទ្រចិនខាងត្បូង

2023/08/08 06:28:55 pm        149
Facebook Telegram Linkin
ចិន៖ ប្រទេសចិនកំពុងប្រឈមមុខនឹងប្រតិកម្មជាអន្តរជាតិកាន់តែខ្លាំងឡើង បន្ទាប់ពីនាវាឆ្មាំល្បាតឆ្នេរមួយរបស់ខ្លួន បានប្រើកាណុងបាញ់ទឹកប្រឆាំងនឹងនាវាហ្វីលីពីននៅសមុទ្រចិនខាងត្បូងកាលពីថ្ងៃសៅរ៍ ដោយក្រុមអ្នកវិភាគឧបទ្ទវហេតុជាច្រើននិយាយថា ស្ថានភាពកាន់តែតានតឹង ហើយអាចឃើញសហរដ្ឋអាមេរិក និងសម្ព័ន្ធមិត្តបង្កើនល្បឿនផែនការសម្រាប់សមយុទ្ធល្បាតរួមគ្នានៅក្នុងផ្លូវទឹក។វីដេអូពីហ្វីលីពីនបានបង្ហាញពីនាវាឆ្មាំល្បាតឆ្នេរចិនដ៏ធំមួយគ្រឿង បានបាញ់កាណុងទឹកលើនាវាហ្វីលីពីន ដ៏តូចមួយគ្រឿង ដែលកំពុងព្យាយាមបញ្ជូនការផ្គត់ផ្គង់ដល់យោធភូមិភាគហ្វីលីពីន នៅលើច្រកសមុទ្រទី២ ឈ្មោះថា Thomas Shoal ជាតំបន់សមុទ្រចិនខាងត្បូងនៅក្នុងតំបន់សេដ្ឋកិច្ចផ្តាច់មុខរបស់ទីក្រុងម៉ានីល ដែលប្រទេសចិនហៅថាតំបន់នោះថាច្រកសមុទ្រ Renai Reef ហើយថែមទាំងទាមទារតំបន់នោះជាទឹកដីអធិបតេយ្យភាពរបស់ខ្លួនទៀតផង។គិតត្រឹមថ្ងៃអាទិត្យ សម្ព័ន្ធមិត្តសំខាន់របស់ទីក្រុងម៉ានីល គឺទីក្រុងវ៉ាស៊ីនតោន បានថ្កោលទោសសកម្មភាពរបស់ចិន ហើយបានរំលឹកឡើងវិញថា ខ្លួននឹងបំពេញកាតព្វកិច្ចសន្ធិសញ្ញាការពារទៅវិញទៅមកជាមួយហ្វីលីពីន។សម្ព័ន្ធមិត្តរបស់សហរដ្ឋអាមេរិកបានចូលរួមនៅក្នុងរណសិរ្សរួបរួមជាមួយទីក្រុងវ៉ាស៊ីនតោន និងទីក្រុងម៉ានីលផងដែរ។ អូស្ត្រាលី ជប៉ុន និងអាល្លឺម៉ង់ បានហៅសកម្មភាពរបស់ចិនថា គ្រោះថ្នាក់ និងធ្វើឱ្យមានអស្ថិរភាព។ ហើយស្ថានទូតកាណាដានៅទីក្រុងម៉ានីលបាននិយាយថា រដ្ឋធានីអូតាវ៉ា «ថ្កោលទោសយ៉ាងដាច់អហង្ការចំពោះសកម្មភាពដ៏គ្រោះថ្នាក់ និងបង្កហេតុដែលបានធ្វើឡើងដោយឆ្មាំល្បាតឆ្នេររបស់ប្រទេសចិន»៕

ប្រទេសអ៊ុយក្រែន៖ អ្នកជំនាញ IAEA នៅរោងចក្រ Zaporizhzhia ដែលគ្រប់គ្រងដោយរុស្ស៊ីមានសិទ្ធិចូលដែលមានកម្រិត

2023/08/08 05:47:34 pm        110
Facebook Telegram Linkin
អ៊ុយក្រែន៖ ប្រធាននុយក្លេអ៊ែររបស់ប្រទេសអ៊ុយក្រែន បាននិយាយកាលពីថ្ងៃចន្ទ (ទី៧ សីហា)ថា អ្នកជំនាញឃ្លាំមើលនុយក្លេអ៊ែរអន្តរជាតិ នៅរោងចក្រនុយក្លេអ៊ែរហ្សាប៉ូរីហ្សា (Zaporizhzhia) ដែលគ្រប់គ្រងដោយ   ប្រទេសរុស្ស៊ីមាន«សិទ្ធិចូលមានដែនកំណត់»ខ្លាំងណាស់។ប្រធានក្រុមហ៊ុនថាមពលនុយក្លេអ៊ែររដ្ឋរបស់អ៊ុយក្រែន លោក ប៉េត្រូ កូទីន (Petro Kotin) បានធ្វើអត្ថាធិប្បាយរបស់លោកក្នុងដំណើរទស្សនកិច្ចគួរឲ្យភ្ញាក់ផ្អើលមួយទៅកាន់រោងចក្រនុយក្លេអ៊ែរអ៊ុយក្រែន ដែលមិនត្រូវបានបង្ហាញ ដោយសារហេតុផលសន្តិសុខ។លោកបានបន្ថែមថា អ្នកជំនាញ IAEA (ទីភ្នាក់ងារថាមពលបរិមាណូអន្តរជាតិ) មានលទ្ធភាពចូលទៅកាន់ដំបូលនៃអង្គភាពនុយក្លេអ៊ែរពីរប៉ុណ្ណោះ ហើយថា មានផ្នែកជាច្រើននៅរោងចក្រនេះ ពួកគេពុំមានសិទ្ធចូលទីដល់នោះទេ។ទីភ្នាក់ងារនេះ បាននិយាយនៅក្នុងសេចក្តីថ្លែងការណ៍មួយកាលពីថ្ងៃសុក្រ (ទី៤ ខែសីហា)ថា ក្រុមឃ្លាំមើលនុយក្លេអ៊ែររបស់អង្គការសហប្រជាជាតិ បានទទួលសិទ្ធិចូលទៅកាន់តំបន់រោងចក្រនៅភាគខាងត្បូងប្រទេសអ៊ុយក្រែន មួយខែបន្ទាប់ពីបានស្នើសុំវា ហើយរកមិនឃើញគ្រឿងផ្ទុះទេ។ IAEA បាននិយាយកាលពីថ្ងៃទី៥ ខែកក្កដាថា ការចូលទៅកាន់ដំបូលនៃអង្គភាពទាំងពីរ និងផ្នែកខ្លះនៃអគារទួរប៊ីន គឺចាំបាច់ណាស់។ កងកម្លាំងប្រដាប់អាវុធរបស់អ៊ុយក្រែន បាននិយាយមួយថ្ងៃមុននេះថា ទិន្នន័យប្រតិបត្តិការ បង្ហាញថា «ឧបករណ៍បំផ្ទុះ» ត្រូវបានដាក់នៅលើដំបូលទាំងពីរនោះ៕

លោក Trump ជំទាស់ការកម្រិតលើភស្តុតាងនៃករណីបោះឆ្នោតឆ្នាំ ២០២០ ដែលរំលោភលើការនិយាយស្ដីដោយសេរី

2023/08/08 05:43:36 pm        137
Facebook Telegram Linkin
អាមេរិក៖ ក្រុមការងារអ្នកច្បាប់របស់អតីតប្រធានាធិបតីលោក Donald Trump បានវាយបកវិញកាលពីថ្ងៃចន្ទ អមដោយបណ្ដឹងថ្មីទៅកាន់តុលាការ ដោយបានជជែកវែកញែកអំពីដែនកំណត់ដែលបានស្នើឡើងរបស់ក្រសួងយុត្តិធម៌លើការចេញផ្សាយភស្តុតាងនៅក្នុងសំណុំរឿងជ្រៀតជ្រែកការបោះឆ្នោតឆ្នាំ ២០២០ ដែលរំលោភលើសិទ្ធិសេរីភាពក្នុងការបញ្ចេញមតិរបស់លោក Trump ខណៈលោកឈរឈ្មោះសម្រាប់ការតែងតាំងបេក្ខភាពក្នុងគណបក្សសាធារណរដ្ឋ។   យោងតាមឯកសាររបស់តុលាការកាលពីថ្ងៃចន្ទ ក្រុមការងាររបស់លោក Trump និយាយថា ដីកាការពារគឺទូលំទូលាយពេក។ ឯកសារនេះអះអាងថាអតីតប្រធានាធិបតី គួរតែត្រូវបានដាក់កម្រិតតែនៅពេលដែលនិយាយអំពីការចែករំលែកភស្តុតាងដ៏រសើប ជាមួយសាធារណៈជនហើយថា ក្រុមមេធាវីស្ម័គ្រចិត្ត គួរតែមានសិទ្ធិពេញលេញក្នុងការស្រាវជ្រាវក្នុងករណីនេះ។ មេធាវីរបស់លោក Trump បានសរសេរនៅក្នុងបណ្ដឹងនោះថា នៅក្នុងការកាត់ក្តីអំពីសិទ្ធិវិសោធនកម្មទីមួយ រដ្ឋាភិបាលស្វែងរកការរឹតបន្តឹងសិទ្ធិវិសោធនកម្មទីមួយ ។ឯកសារនោះបានសរសេរថា រឿងកាន់តែអាក្រក់ជាងនេះ ការធ្វើបែបនេះ ប្រឆាំងនឹងគូប្រជែងនយោបាយចម្បងរបស់រដ្ឋបាលរបស់ខ្លួន ក្នុងរដូវបោះឆ្នោត ដែលរដ្ឋបាល សមាជិកបក្សលេចធ្លោ និងសម្ព័ន្ធភាពប្រព័ន្ធផ្សព្វផ្សាយបានធ្វើយុទ្ធនាការលើការចោទប្រកាន់ និងផ្សព្វផ្សាយការចោទប្រកាន់មិនពិត។ សំណើរបស់ក្រសួងយុត្តិធម៌ ដែលត្រូវបានប្តឹងមួយថ្ងៃបន្ទាប់ពីលោក Trump បានផ្ដល់ចម្លើយពីភាពគ្មានទោស ចំពោះការចោទប្រកាន់ដែលថារូបលោកបានសមគំនិតដើម្បីបង្វែរលទ្ធផល ចាញ់ការបោះឆ្នោតឆ្នាំ ២០២០ របស់លោកចំពោះលោក Joe Biden រួមមានផ្ទាំងរូបភាពដែលដកចេញអេក្រង់ ឬ screenshot នៃសារដែលលោក Trump បង្ហោះនៅលើ បណ្ដាញសង្គមTruth Social ៕

អាមេរិក បិទការិយាល័យរដ្ឋាភិបាលជាច្រើនកន្លែង ខណៈមនុស្សរាប់លាននាក់រងហានីភ័យពីព្យុះកួចដ៏កំណាច

2023/08/08 05:32:52 pm        181
Facebook Telegram Linkin
អាមេរិក៖ ការិយាល័យរដ្ឋាភិបាលជាច្រើនកន្លែងរបស់សហរដ្ឋអាមេរិក នៅក្នុងតំបន់វ៉ាស៊ីនតោន បានបិទកាលពីព្រឹកថ្ងៃចន្ទ ដោយសារការមកដល់នៃព្យុះភ្លៀងលាយលំជាមួយផ្គររន្ទះ ខណៈប្រជាពលរដ្ឋទូទាំងភាគខាងកើត សហរដ្ឋអាមេរិក ត្រូវបានព្រមានថាអាចនឹងមានព្យុះកួច កម្លាំងខ្យល់អាចបំផ្លិចបំផ្លាញ និង ការធ្លាក់ដុំទឹកកកធំៗ មុនឈានចូលដល់ថ្ងៃអង្គារនេះ។  សេវាព្យាករណ៍អាកាសធាតុជាតិ បាននិយាយថា មនុស្សជាង២៩,៥លាននាក់រស់នៅតំបន់មួយចាប់ពីរដ្ឋអាឡាបាម៉ា (Alabama) ដល់ភាគខាងលិចរដ្ឋ New York ជាទីដែលមានហានីភ័យនៃព្យុះកួច មុនម៉ោង១១យប់។ សេវាព្យាករណ៍អាកាសធាតុជាតិ បាននិយាយថា ហានីភ័យខ្លាំងបំផុតគឺបណ្ដារដ្ឋស្ថិតចំណុចប្រសព្វមហាសមុទ្រអាត្លង់ទិក រួមទាំងទីក្រុងវ៉ាស៊ីនតោន ឌីស៊ី ។ តំបន់មួយចំនួនអាចមើលឃើញព្យុះមានកម្លាំង ជាង៧៥ ម៉ាយក្នុងមួយម៉ោង និងធ្លាក់ដុំទឹកកកធំជាងគ្រាប់កូនហ្គោល ។  អតិថិជនជាង៨សែននាក់ គ្មានអគ្គិសនីប្រើប្រាស់នៅក្នុងភាគខាងត្បូង និងបណ្ដារដ្ឋស្ថិតចំណុចប្រសព្វមហាសមុទ្រអាត្លង់ទិក នេះបើយោងតាមគេហទំព័រតាមដានថាមពលអគ្គិសនី PowerOutage.us.។ បណ្ណាល័យ សារមន្ទីរ សួនសត្វជាតិ អាងហែលទឹក និងទីក្រុងផ្សេងៗ ព្រមទាំងសេវាសហព័ន្ធនានា នៅក្នុងតំបន់វ៉ាស៊ីនតោន ក៏ត្រូវបានបិទកាលពីព្រឹកថ្ងៃដដែល ផងដែរ ។ការិយាល័យគ្រប់គ្រងបុគ្គលិករបស់សហរដ្ឋអាមេរិក និយាយថា ក្រុមបុគ្គលិកសហព័ន្ធត្រូវតែចាកចេញពីកន្លែងការងារមិនឲ្យយឺតជាងម៉ោង៣រសៀល ឡើយ។  FlightAware ដែលជាគេហទំព័រតាមដានការហោះហើររបស់ក្រុមហ៊ុនអាកាសចរណ៍ បាននិយាយថាជើងហោះហើរជាង២ពាន់៣រយជើង ត្រូវបានលុបចោល រួមទាំង ៩៥ជើង នៅអាកាសយានដ្ឋានជាតិ Washington Reagan ។ ជើងហោះហើរ របស់អាមេរិក ចំនួន៦,៨០០ទៀត ត្រូវបានពន្យារពេលហោះហើរ៕

លោក Marcos ៖ ហ្វីលីពីននឹងបន្តអះអាងសិទ្ធិអធិបតេយ្យភាពនៅសមុទ្រចិនខាងត្បូង

2023/08/08 05:14:32 pm        128
Facebook Telegram Linkin
ហ្វីលីពីន៖ ប្រធានាធិបតីហ្វីលីពីនលោក Ferdinand Marcos Jr. បាននិយាយកាលពីថ្ងៃចន្ទ (៧ សីហា) ថា ប្រទេសហ្វីលីពីននៅតែបន្តអះអាងអធិបតេយ្យភាព និងសិទ្ធិដែនដីរបស់ខ្លួន ទោះបីជាមានបញ្ហាប្រឈមជាច្រើននៅក្នុងសមុទ្រចិនខាងត្បូងក៏ដោយ។ ប្រទេសហ្វីលីពីនកាលពីថ្ងៃអាទិត្យ (៦ សីហា) បានចោទប្រកាន់ឆ្មាំល្បាតឆ្នេររបស់ប្រទេសចិន ពីបទរារាំង និងបាញ់កាណុងទឹកលើនាវាផ្គត់ផ្គង់យោធាហ្វីលីពីននៅសមុទ្រចិនខាងត្បូង។ប្រទេសចិនអះអាងអធិបតេយ្យភាពលើសមុទ្រចិនខាងត្បូងស្ទើរតែទាំងមូល ជាការអះអាងមួយដែលត្រូវបានបដិសេធជាអន្តរជាតិ ខណៈដែលម៉ាឡេស៊ី វៀតណាម ព្រុយណេ កោះតៃវ៉ាន់ និងហ្វីលីពីន មានការទាមទារផ្សេងៗគ្នាចំពោះតំបន់មួយចំនួនក្នុងសមុទ្រចិនខាងត្បូងនេះផងដែរ។ការប្រើប្រាស់កាណុងបាញ់ទឹករបស់ឆ្មាំល្បាតឆ្នេរប្រទេសចិន កាលពីថ្ងៃសៅរ៍ (៥ សីហា) មិនមែនជាលើកទីមួយទេ ព្រោះកងឆ្មាំល្បាតឆ្នេររបស់ប្រទេសចិន ក៏ធ្លាប់បានបាញ់ទឹកទៅលើនាវារបស់ទីក្រុងម៉ានីលក្នុងបេសកកម្មផ្គត់ផ្គង់ស្បៀងអាហារ និងទឹកដល់កងទ័ពមួយចំនួន រស់នៅលើនាវាចម្បាំងដែលបានខូចកាលពីខែវិច្ឆិកា ឆ្នាំ២០២១ផងដែរ៕

អ្នករត់​ម៉ូតូ​កង់​បី​ប៉ុនប៉ង​អាក្រក់​លើស្ត្រីជនជាតិ​បារាំង​ត្រូវ​បាន​ឃាត់ខ្លួន​

2023/08/08 02:12:23 pm        520
Facebook Telegram Linkin
បាត់ដំបង​​៖​ មុខសញ្ញាបម្រុងធ្វើស៊ីស្ត្រីរងគ្រោះជាជនជាតិបារាំង ត្រូវបានកម្លាំងអធិការនគរបាលក្រុងបាត់ដំបងសហការជាមួយការិយាល័យព្រហ្មទណ្ឌកម្រិតស្រាល នៃស្នងការនគរបាលខេត្តបាត់ដំបង ឃាត់ខ្លួន​បាន​ នាយប់ថ្ងៃទី៧​ ខែសីហា​ ឆ្នាំ​២០២៣​។ ជនល្មើសឈ្មោះ ទេព ភាឡី ហៅលីញ ភេទប្រុស អាយុ ២៩ឆ្នាំ ទីលំនៅភូមិកម្មករ សង្កាត់ស្វាយប៉ោ ក្រុង-ខេត្តបាត់ដំបង មុខរបររត់ម៉ូតូ (Pass App) ជាមុខសញ្ញាចាស់ បានសារភាពមុខសមត្ថកិច្ចថា ខ្លួនពិតជាបានប្រព្រឹត្តបទល្មើសមួយនេះមែន។សូមរំលឹកថា​ ស្រ្តីរងគ្រោះជាជនជាតិបារាំង​ មានឈ្មោះ អេលេន ដីតឈី (Helene Dietschy) អាយុ ២១ឆ្នាំ ជានិស្សិតពេទ្យជនជាតិបារាំង។ នាងបានមកប្រទេសកម្ពុជា រយៈពេលពីរខែហើយបម្រើការងារជាបុគ្គលិកហាត់ការនៅមន្ទីរពេទ្យកាល់ម៉ែត។ស្រ្តីរូបនោះបានជិះឡានក្រុងពេលយប់មកដល់បាត់ដំបង ប្រហែលម៉ោង៤ទៀបភ្លឺថ្ងៃទី៥ ខែសីហា ឆ្នាំ២០២៣ហើយបានប្រាប់ឱ្យPass App ដឹកគាត់មកសណ្ឋាគារ ឡាគី ប៉ុន្តែនៅពេល មកដល់មុខសណ្ឋាគារហើយ Pass App មិនបានដាក់គាត់ចុះតាមគោលដៅ ដែលបានចរចា មុនពេលឡើងជិះទេ ទោះបីគាត់ព្យាយាមប្រាប់ឲ្យឈប់ក្តី ក៏Pass App មិនឈប់ដែរ បែរជាព្យាយាមជិះពង្វាងគាត់ទៅផ្លូវ ស្ងាត់។ ឃើញស្ថានភាពមិនស្រួលគាត់ក៏លោតចុះពីលើPass App ធ្វើឲ្យមានរបួសបាក់ម្រាមដៃ និងរបកមុខមាត់។ក្រោយ​កេីតហេតុស្ត្រីរូបនេះ​ បានទទួលការយកចិត្តទុកដាក់ពីអាជ្ញាធរ កងកម្លាំងសមត្ថកិច្ច និងមន្រ្តីទេសចរណ៍៕

​​ឧកញ៉ាដីធ្លីម្នាក់ និងអ្នកពាក់ព័ន្ធ ១៣ នាក់ផ្សេងទៀតត្រូវឃាត់ខ្លួន ក្រោយមានការផ្ទុះអាវុធជាច្រើនគ្រាប់

2023/08/08 02:17:20 am        1870
Facebook Telegram Linkin
ភ្នំពេញ ៖ លោកឧត្តមសេនីយ៍ត្រី សាន សុខសីហា អ្នកនាំពាក្យនៃស្នងការដ្ឋាននគរបាលរាជធានីភ្នំពេញ បានឲ្យដឹងនៅមុននេះបន្តិចថា សមត្ថកិច្ចបានឃាត់ខ្លួនមនុស្ស១៤នាក់ គឺអគ្គនាយកក្រុមហ៊ុនដីមាស និងប្រព ន្ធ រួមទាំងអង្គរក្ស និងអ្នកពាក់ព័ន្ធផ្សេងទៀត ក្រោយមានជំលោះជាមួយពលរដ្ឋ និងផ្ទុះអាវុធ។​ហេតុការណ៍នេះបានកើតឡើងនៅវេលាម៉ោង៤ល្ងាចនាថ្ងៃទី០៧ ខែសីហា ឆ្នាំ២០២៣ ស្ថិតនៅភូមិ ត្រពាំងថ្លាន់ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ។ប្រភពព័ត៌មានបានឲ្យដឹងថា នៅមុនកើតហេតុ មានអតិថិជនរាប់សិបនាក់ បានមកតវ៉ា តាំងពីព្រឹកនៃថ្ងៃទី០៧ ខែសីហា ប៉ុន្តែពុំមានការចេញមុខពីខាងភាគីក្រុមហ៊ុនមកជួបជាមួយអតិថិជិនដើម្បីស្វែងរក ដំណោះស្រាយសមស្របណាមួយនោះឡើយ។ ហេតុនេះហើយ ទើបក្រុមអ្នកតវ៉ាបាននាំគ្នាដុតកង់ឡាន ដើម្បីសុំជួបលោកឧកញ៉ាជជែកគ្នាដោះស្រាយ ។ លុះរសៀលថ្ងៃដដែល អ្នកតវ៉ាសុំចូលស្នាក់ការ និងសុំយកអ្នកថតចូលផងដែរ ប៉ុន្តែក៏ត្រូវក្រុមអង្គរក្សរបស់លោកឧកញ៉ាចេញមកឃាត់ និងមាន ការវាយតប់គ្នា រហូតឈានដល់ដកកាំភ្លើងខ្លី និងបានវាយដំទៅលើសមត្ថកិច្ចម្នាក់ឱ្យរងរបួស ទើបស មត្ថកិច្ចសម្រេចចិត្តបាញ់ឡើងលើជាច្រើនគ្រាប់ ដើម្បីទប់ទល់។បច្ចុប្បន្នមនុស្សប្រុសស្រីទាំង១៤នាក់នេះ ត្រូវបានឃាត់ខ្លួនជាបណ្ដោះអាសន្ននៅស្នងការដ្ឋាននគរបា លរាជធានីភ្នំពេញ ដើម្បីចាត់ការតាមនីតិវិធី៕ ដោយ ៖ កុម្ភះ

បណ្ដាញសង្គម

ព័ត៌មានថ្មីៗ

វិទ្យាល័យ ជា ចាន់តូ ចាប់ផ្តើមឆ្នាំសិក្សាដំបូង ដើម្បីផ្តល់លទ្ធភាពដល់សិស្សានុសិស្សបានសិក្សារៀនសូត្រ
10/26/2026 09:10 PM
Facebook Telegram Linkin
កម្ពុជា-កូរ៉េខាងត្បូងរម្លឹកពីប្រវត្តិ និងកិច្ចខិតខំរបស់សម្ដេចតេជោ ដើម្បីភ្ជាប់ទំនាក់ទំនងប្រទេសទាំងពីរឡើងវិញ
10/26/2026 09:10 PM
Facebook Telegram Linkin
អណ្តូងប្រេងក្រុមហ៊ុន Borr Drilling លិចនៅជិតប្រទេសហ្គាបុង បណ្តាលឲ្យមនុស្សម្នាក់ស្លាប់ និង ៤នាក់ បាត់ខ្លួន
10/26/2026 07:10 PM
Facebook Telegram Linkin
លីប៊ីកោះហៅឲ្យចូលខ្លួនប្រសិតពិសេសអាមេរិក ដើម្បីតវ៉ាសេចក្តីអត្ថាធិប្បាយរបស់លោក Trump
10/26/2026 07:10 PM
Facebook Telegram Linkin
ក្រុមបាតករបារាំងទាមទារឲ្យមានការតវ៉ាបន្ថែមទៀត ខណៈលោក Macron ប្រឈមនឹងជម្រើសដ៏លំបាក
10/26/2026 07:10 PM
Facebook Telegram Linkin
មនុស្ស ៦នាក់ រងរបួស នៅក្នុងការវាយប្រហាររបស់រុស្ស៊ីលើទីក្រុង Zaporizhzhia របស់អ៊ុយក្រែន
10/26/2026 07:10 PM
Facebook Telegram Linkin
លោក Lee បញ្ជាក់​ថា កូរ៉េខាងត្បូង ទំនងមិនចូលរួមកិច្ចព្រមព្រៀងពាណិជ្ជកម្មប៉ាស៊ីហ្វិកក្នុងអាណត្តិ​របស់លោកទេ​
10/26/2026 07:10 PM
Facebook Telegram Linkin
ក្រុមមកពីប្រទេសកិច្ចព្រមព្រៀងក្រុង Mecca ជួបជាមួយក្រុមមន្រ្តីអ៊ីរ៉ង់នៅទីក្រុងតេអេរ៉ង់
10/26/2026 07:10 PM
Facebook Telegram Linkin
ការវាយប្រហារយានដ្រូនលើតំបន់ Voronezh របស់រុស្ស៊ី សម្លាប់បុរស ២នាក់
10/26/2026 06:10 PM
Facebook Telegram Linkin
នាយករដ្ឋមន្ត្រីព្រីតថេន លោក Burnham បញ្ជាក់ថា​ ការបោះឆ្នោតនឹងមិនកើតឡើង «ឆាប់ៗនេះ» ទេ
10/26/2026 06:10 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.