BTV NEWS

ជាង៧ខែ កម្ពុជាបណ្តេញជនបរទេសចេញជាង ៥ម៉ឺននាក់ ពាក់ព័ន្ធ Online Scams និងការប្រព្រឹត្តបទល្មើសផ្សេងៗ

ឆមាសទី១ឆ្នាំនេះ សមត្ថកិច្ចបង្ក្រាបបទល្មើសជួញដូរមនុស្ស និងអាជីវកម្មផ្លូវភេទជាង ១១០ករណី និងសង្គ្រោះបាន ៥៨១នាក់

មនុស្ស៦នាក់ស្លាប់ និងម្នាក់រងរបួសធ្ងន់ក្នុងប្រតិបត្តិការបង្ក្រាបគ្រឿងញៀននៅវាលវែង

ក្រសួងព័ត៌មានអប់រំណែនាំក្រុមអ្នកផលិតមាតិកា ២ក្រុម គឺ «ក្រុមនាយក្រឹប» និង «ក្រុមគ្រូតឿ» ដែលបានផលិតផ្សព្វផ្សាយមាតិកាមិនសមរម្យ និងបំពានលើក្រមសីលធម៌

សន្តិសុខ និង សង្គម

ផ្ទៃដីជាង ១០លានហិកតា ត្រូវបានឆេះ ក្នុងហេតុការណ៍ចំហេះព្រៃ នៅកាណាដា

កាណាដា៖ ទិន្នន័យរបស់រដ្ឋាភិបាល ដែលបានចេញផ្សាយ កាលពីថ្ងៃសៅរ៍ (ទី១៥ ខែកក្កដា) បានបង្ហាញថា ហេតុការណ៍ចំហេះព្រៃ នៅប្រទេសកាណាដា បានឆេះផ្ទៃដីអស់ជាង ១០លានហិកតា នៅឆ្នាំនេះ ដែលជាតួលេខដ៏ខ្ពស់បំផុត ដែលបានលើសពីការព្យាករណ៍ទុកដ៏ទុទិដ្ឋិនិយមបំផុតរបស់អ្នកវិទ្យាសាស្ត្រ។យោងតាមតួលេខរបស់ជាតិពីមជ្ឈមណ្ឌលចំហេះព្រៃអន្តរទ្វីបកាណាដា (CIFFC) បានឲ្យដឹងថា ការឆេះ ក្នុងកម្រិតខ្ពស់បំផុត កាលពីមុន បានកើតឡើងក្នុងឆ្នាំ១៩៨៩ ដែលកាលនោះផ្ទៃដី ៧,៣លានហិកតា ត្រូវបានឆេះ ក្នុងរយៈពេលពេញមួយឆ្នាំ។ តំបន់ដែលឆេះនៅឆ្នាំនេះ គឺប្រហែលស្មើនឹងទំហំផ្ទៃដីរបស់ព័រទុយហ្គាល់ ឬអ៊ីស្លង់។ដូច្នេះ សរុបមក ការឆេះព្រៃចំនួន ៤.០៨៨កន្លែង បានកើតមានឡើង ចាប់តាំងពីខែមករា ក្នុងនោះរួមទាំងការឆេះជាច្រើន ដែលបានកម្លោចផ្ទៃដីរាប់សែនហិកតា។ ហើយជាមួយគ្នានេះ មនុស្សជាង ១៥០.០០០នាក់ ត្រូវបានផ្លាស់ទីលំនៅ ហើយអ្នកពន្លត់អគ្គិភ័យអាយុ ១៩ឆ្នាំម្នាក់ បានស្លាប់កាលពីថ្ងៃព្រហស្បតិ៍កណ្ដាលសប្ដាហ៍កន្លងមក។លោកវរសេនីយ៍ឯក Philippe Sansa ដែលជាប្រធានក្រុមអ្នកពន្លត់អគ្គិភ័យបារាំង ដែលត្រូវដាក់ពង្រាយនៅតំបន់ភាគខាងជើងនៃខេត្ត Quebec ដែលរងគ្រោះខ្លាំង បាននិយាយថា៖ «យើងកំពុងដោះស្រាយតំបន់ដ៏ធំសម្បើម។ ភ្លើងដែលយើងកំពុងគ្រប់គ្រងមានប្រវែង ៦៥គីឡូម៉ែត្រ ដែលបង្កបញ្ហាប្រឈមយ៉ាងខ្លាំងដល់អង្គភាព»។នៅខេត្ត British Columbia អ្នកពន្លត់អគ្គិភ័យប្រហែល ២.០០០នាក់ កំពុងប្រឹងប្រយុទ្ធនឹងអគ្គិភ័យជាង ៣៥០កន្លែង។ អាជ្ញាធរបានស្នើសុំអ្នកពន្លត់អគ្គិភ័យអន្តរជាតិបន្ថែមចំនួន ១.០០០នាក់ទៀត ដើម្បីជួយពន្លត់ភ្លើងដែលបានឆេះព្រៃចំនួន ១,២លានហិកតា ក្នុងខេត្តមកទល់ពេលនេះ នៅឆ្នាំនេះ ដែលលើសពីការឆេះរយៈពេលជាមធ្យម ១០ឆ្នាំចំនួន ៧៦.០០០ហិកតា៕

អតិផរណាជះឥទ្ធិពលលើការចំណាយរបស់ភ្ញៀវទេសចរនៅសហរដ្ឋអាមេរិក

អាមេរិក៖ អតិផរណាដ៏ខ្ពស់នៅសហរដ្ឋអាមេរិកទំនងជាដាក់បន្ទុកលើតម្រូវការទេសចរណ៍ និងការចំណាយរបស់អ្នកប្រើប្រាស់ក្នុងអំឡុងរដូវវិស្សមកាលរដូវក្តៅនេះ។ការស្ទង់មតិនាពេលថ្មីៗនេះដែលធ្វើឡើងដោយក្រុមហ៊ុនប្រឹក្សា Redfield & Wilton Strategies តំណាងឲ្យក្រុមហ៊ុនវិភាគ Newsweek បង្ហាញថា ការចំណាយខ្ពស់សម្រាប់ការរស់នៅប្រចាំថ្ងៃបានធ្វើឱ្យជនជាតិអាមេរិកចំនួន ៤៩ភាគរយបោះបង់គម្រោងធ្វើដំណើរកម្សាន្តសម្រាប់រយៈពេលបីខែខាងមុខ ខណៈដែល ៦០ភាគរយនៃអ្នកដែលធ្វើដំណើរកម្សាន្តវិស្សមកាលរដូវក្តៅបាននិយាយថា ការចំណាយសមរម្យមានតួនាទីដ៏សំខាន់នៅក្នុងផែនការដំណើរកម្សាន្តរបស់ពួកគេ។នៅក្នុងលក្ខខណ្ឌនៃការចំណាយសរុប ទិន្នន័យបង្ហាញថា ដោយសារបញ្ហាអតិផរណាការចំណាយរបស់អ្នកទេសចរណ៍ក្នុងខែមីនាឆ្នាំនេះ ខ្ពស់ជាងឆ្នាំ២០១៩ ចំនួន៧ភាគរយ។ អតិផរណាប្រចាំឆ្នាំរបស់សហរដ្ឋអាមេរិកបានធ្លាក់ចុះមកត្រឹម ៣ភាគរយកាលពីខែមុន ដែលជាអត្រាប្រចាំឆ្នាំតូចបំផុតចាប់តាំងពីខែមីនា ឆ្នាំ២០២១មក នេះបើយោងតាមទិន្នន័យក្រុមហ៊ុន CPI ចុងក្រោយបង្អស់ ដែលចេញផ្សាយកាលពីថ្ងៃពុធដោយការិយាល័យស្ថិតិការងាររបស់សហរដ្ឋអាមេរិក។ថ្វីបើមានតួលេខអតិផរណាល្អក្នុងរយៈពេលចុងក្រោយនេះក៏ដោយ ការទទួលបានអតិផរណាត្រលប់ទៅគោលដៅ ២ភាគរយវិញនៅត្រូវការរយៈពេលយូរទៀត នេះបើយោងតាមធនាគារកណ្តាលអាមេរិក៕

ក្រុមហាម៉ាស់គ្មានលុយបើកប្រាក់បៀវត្សរ៍ជូនមន្រ្តីរដ្ឋការនៅតំបន់ហ្គាហ្សា ក្រោយការពន្យាពេលជំនួយរបស់កាតា

ក្រុមហាម៉ាស់ដែលគ្រប់គ្រងតំបន់កាន់កាប់ហ្គាហ្សាស្រ្ទីប ពុំមានលទ្ធភាពបើកប្រាក់បៀវត្សន៍ជូនមន្រ្តីរដ្ឋការ៥ម៉ឺននាក់នោះទេ ក្នុងនោះក្រុមមន្រ្តី បានការដាក់ការស្តីបន្ទោសការខកខាននេះ ទៅលើការពន្យាពេលការផ្តល់ប្រាក់បៀវត្សរ៍ប្រចាំខែពីប្រទេសកាតា ដែលជាម្ចាស់ជំនួយដ៏សំខាន់ដល់តំបន់ក្រក្រីរបស់ប៉ាឡេស្ទីនមួយនេះ ។ វិបត្តិប្រាក់បៀវត្សរ៍នេះដែរ បង្កឲ្យមានការរិះគន់ច្រើនខុសពីធម្មតានៅលើបណ្តាញព័ត៌មានសង្គមក្នុងតំបន់ហ្គាហ្សា ដែលរួមទាំងនិយោជិកខ្លួនឯងផ្ទាល់មួយចំនួនរបស់ក្រុមហាម៉ាស់ ។ ការធ្លាក់ចុះប្រាក់ចំណូលពន្ធ ហើយនិងការហក់ឡើបខ្ពស់ការចំណាយលើថ្លៃរស់នៅ បានធ្វើឲ្យស្ថានភាពកាន់តែយ៉ាប់យ៉ឺនខ្លាំង គួរឲ្យដឹងថាភាគច្រើននៃប្រជាពលរដ្ឋ ២,៣លាននាក់ក្នុងតំបន់ហ្គាហ្សា រស់នៅក្នុងភាពក្រីក្រ ហើយសេដ្ឋកិច្ចរបស់ពួកគេ ពឹងផ្អែកខ្លាំងលើជំនួយបរទេស ។ ប្រទេសកាតា បានចំណាយលុយរាប់រយលានដុល្លារ ចាប់តាំងពីឆ្នាំ ២០១៤រហូតមក លើគម្រោងសំណង់ ។ បច្ចុប្បន្នពួកគេចំណាយប្រាក់ ៣០លានដុល្លារក្នុង១ខែ ជាប្រាក់ឧបត្ថម្ភដល់ក្រុមគ្រួសារ ប្រេងឥន្ធនៈសម្រាប់អគ្គិសនី និងជួយបើកប្រាក់បៀវត្សរ៍ជូនមន្រ្តីរដ្ឋការផងដែរ ។ ទោះបីជាយ៉ាងណាក៏ដោយ ក្រុមមន្រ្តីហាម៉ាស់ និយាយថា គ្មានជំនួយប្រាក់បៀវត្សរ៍ ទទួលបាននោះទេ ចាប់តាំងពីការផ្តល់ប្រាក់ជាងពាក់កណ្តាលនៃប្រាក់ឧបត្ថម្ភ ៥លានដុល្លារ ដើម្បីគាំទ្រដល់ការបើប្រាក់បៀវត្សរ៍ប្រចាំខែឧសភា ។ ដោយឡែកនៅក្នុងទីក្រុង Dohaវិញ ការិយាល័យព័ត៌មានអន្តរជាតិកាតា ពុំបានឆ្លើយតបភ្លាមៗនោះទេចំពោះសំណើរសុំសេចក្តីអធិប្បាយ ជុំវិញបញ្ហាមួយនេះ ៕

ព្យុះទីហ្វុង ថាលីម ព្យាករណ៍ថានឹងបោកបក់ទៅភាគខាងត្បូងប្រទេសចិននៅល្ងាចថ្ងៃចន្ទនេះ

ប៉េកាំង៖ ទីភ្នាក់ងារព្យាករណ៍អាកាសធាតុជាតិបាននិយាយថា ព្យុះត្រូពិច ថាលីម បានក្លាយទៅជាព្យុះទីហ្វុងនៅព្រឹកថ្ងៃចន្ទ (១៧ កក្កដា)នេះ ហើយត្រូវបានកំណត់ថាជាព្យុះទីមួយក្នុងឆ្នាំនេះ ដែលបានបោកបក់ដល់ដីទៅក្នុងប្រទេសចិន ខណៈដែលក្រុមអាជ្ញាធរបានលុបចោលជើងហោះហើរជាច្រើន និងបានជំរុញឱ្យអ្នកស្រុកស្នាក់នៅក្នុងផ្ទះ។រដ្ឋបាលឧតុនិយមចិនបានចេញការប្រកាសអាសន្នពណ៌លឿងទុំ ដោយនិយាយថា ព្យុះទីហ្វុងត្រូវបានគេរំពឹងថានឹងកើនឡើងក្នុងកម្រិតខ្លាំងក្លាយជាព្យុះទីហ្វុងដ៏ធ្ងន់ធ្ងរពេលវាបោកបក់នៅពេលយប់តាមបណ្តោយឆ្នេរសមុទ្រភាគខាងត្បូងពីខេត្តក្វាងតុងទៅកាន់ខេត្តហៃណាន។ព្យុះទីហ្វុង ថាលីម ត្រូវបានកំណត់ថាជាព្យុះទីហ្វុងទី៤ នៅឆ្នាំនេះ ប៉ុន្តែជាព្យុះទី១ ដែលបានបោកបក់ដល់ដីគោកនៅក្នុងប្រទេសចិន នេះបើយោងតាមការព្យាករណ៍អាកាសធាតុ។ នៅព្រឹកថ្ងៃច័ន្ទនេះ មជ្ឈមណ្ឌលឧតុនិយមបាននិយាយថា ព្យុះថាលីម ស្ថិតនៅចម្ងាយ ៣៧៥គីឡូម៉ែត្រភាគអាគ្នេយ៍នៃទីក្រុងចានជាំង (Zhanjiang) ក្នុងខេត្តហ្គ័ងតុង (Guangdong) ដោយផ្លាស់ទីក្នុងល្បឿន ២០គីឡូម៉ែត្រក្នុងមួយម៉ោង។ទីភ្នាក់ងារព្យាករណ៍អាកាសធាតុជាតិរបស់ចិនបាននិយាយថា កម្រិតទឹកភ្លៀងនៅក្នុងទីក្រុងជាច្រើននៅភាគអាគ្នេយ៍ខេត្តហ្វ៊ូជាន (Fujian) និងខេត្តជាំងស៊ូ (Jiangsu) ភាគខាងកើតបានឈានដល់កម្រិត ២០០មីលីម៉ែត្រ ទៅ៣០០មីលីម៉ែត្រ ក្នុងរយៈពេលបីម៉ោងនៅព្រឹកថ្ងៃចន្ទនេះ៕

តម្លៃបន្លែនៅកូរ៉េខាងត្បូងកើនឡើងដោយសាររលកកម្ដៅ និងភ្លៀងធ្លាក់យ៉ាងខ្លាំងបំផ្លាញដំណាំ

កូរ៉េខាងត្បូង៖ សីតុណ្ហភាពក្តៅហែង និងភ្លៀងធ្លាក់ដ៏ខ្លាំងបានវាយប្រហារប្រទេសកូរ៉េខាងត្បូងក្នុងខែកក្កដានេះ ដោយបានធ្វើឱ្យខូចខាតយ៉ាងធ្ងន់ធ្ងរលើការផ្គត់ផ្គង់ និងផលិតកម្មបន្លែ ព្រមទាំងជំរុញឱ្យតម្លៃបន្លែក្នុងស្រុកកើនឡើងខ្ពស់ជាងធម្មតា។យោងតាមទិន្នន័យដែលបានចេញផ្សាយកាលពីថ្ងៃសៅរ៍ដោយសាជីវកម្មកសិកម្មនេសាទ និងស្បៀងអាហាររបស់កូរ៉េបានឲ្យដឹងថា តម្លៃនៃផលិតផលកសិកម្មសំខាន់ៗចំនួន១៩មុខរបស់ប្រទេសនេះបានកើនឡើងបើធៀបនឹងខែមុន។ជាឧទាហរណ៍ តម្លៃលក់ដុំនៃសាឡាត់មួយប្រអប់ទម្ងន់ ៤គីឡូក្រាមកើនឡើងទ្វេដងពីខែមុនរហូតដល់ ២៦.០០០វ៉ុន (ប្រហែល២០,៤៨ដុល្លារ)។ ហើយតម្លៃស្ពៃខ្មៅ និងស្ពៃក្តោបបានកើនឡើង ៩០,២ភាគរយ និង ៥១,៧ភាគរយរៀងគ្នាក្នុងមួយខែ នេះបើយោងតាមទិន្នន័យ។ទិន្នន័យផ្លូវការរបស់ក្រសួងកសិកម្ម រុក្ខាប្រមាញ់ បសុសត្វ និងស្បៀងអាហាររបស់ប្រទេស បានបង្ហាញថា ភ្លៀងធ្លាក់ក្នុងសប្តាហ៍ចុងក្រោយនៃខែមិថុនា បានជន់លិចលើផ្ទៃដីដំណាំជាង ៤.០០០ ហិចតា រួមទាំងវាលស្រែ និងវាលសណ្តែកជាច្រើនទៀតផង។អ្វីដែលអាក្រក់ជាងនេះទៅទៀតនោះគឺ ភ្លៀងធ្លាក់ខ្លាំងបានវាយលុកដីស្រែចំការនៅតំបន់ជនបទកាន់តែច្រើនចាប់តាំងពីថ្ងៃព្រហស្បតិ៍មក ដោយធ្វើឱ្យមានការបំផ្លិចបំផ្លាញដល់វិស័យកសិកម្មដ៏ផុយស្រួយរបស់ប្រទេសនេះ និងនាំមកនូវក្តីបារម្ភកាន់តែច្រើនអំពីការខូចខាតដំណាំ និងការឡើងថ្លៃបន្លែផងដែរ។ភ្លៀងធ្លាក់ដ៏ខ្លាំងកាលពីចុងសប្ដាហ៍នៅក្នុងកូរ៉េខាងត្បូងបានសម្លាប់មនុស្ស៤០នាក់ ខណៈដែល៩នាក់ទៀតបាត់ខ្លួន៕

សីតុណ្ហភាព ៤៣អង្សាសេ ឬខ្ពស់ជាងនេះបានវាយប្រហារដ្ឋ Arizona សហរដ្ឋអាមេរិករយៈពេល ១៧ថ្ងៃជាប់ៗគ្នា

អាមេរិក៖ កាលពីថ្ងៃអាទិត្យម្សិលមិញ ដែលជាថ្ងៃទី ១៧ជាប់ៗគ្នានៃសីតុណ្ហភាពកើនឡើងជាង ៤៣អង្សាសេរនោះ ប្រជាពលរដ្ឋរស់នៅក្នុងរដ្ឋ Arizona សហរដ្ឋអាមេរិក បានធ្វើដំណើរទៅកាន់សួនទឹកដើម្បីរកទីកន្លែងត្រជាក់ ។ លោក Mike Qurin គឺជាប្រជាពលរដ្ឋវ័យ ៤០ឆ្នាំ ដែលបានទៅលេងសួនទឹកជាមួយកូនប្រុសរបស់គាត់ ដើម្បីទប់ទល់នឹងរលកកម្តៅនោះ បាននិយាយថា វាពិតជាវេទនាខ្លាំងណាស់ពេលនៅខាងក្រៅ លុះត្រាតែអ្នកនៅកន្លែងណាដែលមានទឹក ហើយជាការពិតណាស់ថា វាគ្មានសុវត្ថិភាពទាល់តែសោះ ។ ចំណែកឯអ្នកស្រី Lauren Stewart បាននៅទីនោះផងដែរជាមួយកូនតូចរបស់គាត់ ។ អ្នកស្រីនិយាយថា បម្រែបម្រួលអាកាសធាតុ គឺជាដើមហេតុនាំឲ្យសីតុណ្ហភាពក្តៅខ្លាំងបែបនេះ ។ អ្នកស្រីពន្យល់ថា ជាច្រើនឆ្នាំមកហើយដែលពួកយើងនៅតែកន្លែងត្រជាក់ និងជាកន្លែងសើម ប៉ុន្តែពេលនេះ វាប្រែទៅជាក្តៅខ្លាំង គឺក្តៅខ្លាំងជាងពេលណាៗទាំងអស់ ។ ការព្យាករណ៍អាកាសធាតុនៅថ្ងៃចន្ទនេះ បានឲ្យដឹងថា ទីក្រុង Phoenixនឹងបំបែកកំណត់ត្រាសីតុណ្ហភាពជាង ៤៣អង្សាសេ រយៈពេល ១៨ថ្ងៃជាប់ៗគ្នា ដែលធ្លាប់បានបង្កើតឡើងកាលពីខែមិថុនា ឆ្នាំ ១៩៧៤ ៕

អ៊ុយក្រែនបាត់បង់សព្វាវុធ ២០ភាគរយ ក្នុងរយៈពេល២សប្តាហ៍

អ៊ុយក្រែន៖ សារព័ត៌មាន The New York Times បាននិយាយថា កងទ័ពអ៊ុយក្រែន បានបាត់បង់សព្វាវុធច្រើនជាង២០ភាគរយ ដែលពួកគេបានប្រើប្រាស់ ក្នុងរយៈពេល២សប្តាហ៍ដំបូងនៃការវាយបកលើរុស្ស៊ី។ ការរាយការណ៍កាលពីថ្ងៃសៅរ៍ ដែលបានបានលើកឡើងដោយមន្ត្រីសហរដ្ឋអាមេរិក និងអឺរ៉ុប និយាយថា ការបាត់បង់រួមមានរថក្រោះដែលត្រូវបានផ្គត់ផ្គង់ដោយប្រទេសលោកខាងលិច។ សេចក្តីរាយការណ៍បាន បន្ថែមថា ស្ថានភាពបានរីកចម្រើននូវអ្វីមួយចំនួន បន្ទាប់ពីអ៊ុយក្រែនផ្តោតបន្ថែមទៀតលើការប្រើប្រាស់មីស៊ីលរយៈចម្ងាយឆ្ងាយ ដើម្បីយកឈ្នះកងកម្លាំងរុស្ស៊ី។ អនុរដ្ឋមន្ត្រីការពារជាតិអ៊ុយក្រែន លោកស្រី Hanna Maliar បាននិយាយកាលពិថ្ងៃអាទិត្យថា កងកម្លាំងអ៊ុយក្រែន កំពុងរុលទៅកាន់ភាគខាងត្បូងទីក្រុង Bakhmut ក្នុងតំបន់ Donetsk ភាគខាងកើត។ លោកស្រីនិយាយថា មានការប្រយុទ្ធគ្នាកាន់តែខ្លាំង ហើយជំហររបស់ភាគីសង្គ្រាមទាំងពីរផ្លាស់ប្តូរជាច្រើនដងក្នុងមួយថ្ងៃ។ ប្រធានាធិបតីរុស្ស៊ី លោក Vladimir Putin និយាយតាមទូរទស្សន៍រដ្ឋ ដែលបានផ្សាយកាលពីថ្ងៃអាំទិត្យថា ការវាយបករបស់អ៊ុយក្រែនពុំទទួលបានជោគជ័យនោះទេ។លោក Putin បានព្រមានថា ប្រទេសរបស់លោក មានសិទ្ធិបតវិញ ប្រសិនបើអ៊ុយក្រែនប្រើប្រាស់គ្រាប់បែកចង្កោម ដែលផ្គត់ផ្គង់ដោយសហរដ្ឋអាមេរិក។ ទន្ទឹមនឹងនេះ កិច្ចព្រមព្រៀងដែលធានាដល់ការនាំចេញសុវត្ថិភាពនៃផលិតផលកសិកម្មរបស់អ៊ុយក្រែន តាមរយៈសមុទ្រខ្មៅ បានដល់ពេលផុតកំណត់នៅថ្ងៃចន្ទនេះ។ កិច្ចព្រមព្រៀង ដែលបានសម្របសម្រួលដោយអង្គការសហប្រជាជាតិនិងប្រទេសទួរគី បានបន្ថែមពេល៣ដង។ ក្រុមមន្ត្រី នៅវិមានក្រឹមឡាំង និយាយថាពួកគេ ពុំអាចធ្វើបែបនេះម្តងទៀតនោះទេ៕

រលកកម្ដៅ ជំរុញឲ្យទីក្រុង Athens បិទស្ថានទីបុរាណ Acropolis ខណៈភាគខាងត្បូងអាមេរិកឡើងក្ដៅខ្លាំង

អាមេរិក៖ ជនជាតិអាមេរិកជាង ១០០លាននាក់ ប្រឈមនឹងការឡើងកម្ដៅខ្លាំង ដែលអូសបន្លាយពេលយ៉ាងយូរ ខណៈដែលក្រុងអាតែន (Athens) ប្រទេសក្រិក បានសម្រេចបិទស្ថានទីបុរាណ Acropolis អំឡុងពេលមានអាកាសធាតុក្តៅខ្លាំងបំផុត នៅពេលខ្លះ កាលពីថ្ងៃសុក្រ (ទី១៥ ខែកក្កដា) ដើម្បីការពារភ្ញៀវទេសចរ នៅពេលដែលតំបន់អឺរ៉ុបភាគខាងត្បូង ទទួលរងនូវរលកកម្ដៅដែលក្ដៅស្ទើរទ្រាំមិនបាន។ទីភ្នាក់ងារអវកាសអឺរ៉ុប (ESA) ដែលផ្កាយរណបរបស់ខ្លួន តាមដានសីតុណ្ហភាពនៅលើដី និងសមុទ្រ បានព្រមានថា ប្រទេសអ៊ីតាលី អេស្ប៉ាញ បារាំង អាល្លឺម៉ង់ និងប៉ូឡូញ កំពុងប្រឈមនឹងស្ថានភាពធ្ងន់ធ្ងរ។ សីតុណ្ហភាព នាសប្តាហ៍ក្រោយ អាចឲ្យអឺរ៉ុបជួបនឹងកម្ដៅក្ដៅលើសពីកម្ដៅបច្ចុប្បន្ន ៤៨,៨អង្សាសេ ដែលត្រូវបានកត់ត្រា នៅលើកោះស៊ីស៊ីលី (Sicily) ក្នុងខែសីហា ឆ្នាំ២០២១។ពិភពលោកបានជួបប្រទះនឹងថ្ងៃដែលក្តៅបំផុតមិនធ្លាប់មាន កាលពីសប្តាហ៍មុន ដោយអ្នកវិទ្យាសាស្ត្រ បានបន្ទោសថា នេះកើតឡើងដោយសារការរួមផ្សំគ្នានៃការឡើងកម្ដៅផែនដីរយៈពេលវែង ដែលបង្កឡើងដោយឧស្ម័នផ្ទះកញ្ចក់ ជាមួយនឹងការជំរុញរយៈពេលខ្លីពីព្រឹត្តិការណ៍ El Niño ដែលជាលំនាំអាកាសធាតុក្តៅជាធម្មតាដែលមានប្រភពមកពីមហាសមុទ្រប៉ាស៊ីហ្វិក។នៅកន្លែងជាច្រើន នៅភាគនិរតីនៃសហរដ្ឋអាមេរិក ដែលតែងមានរដូវក្តៅក្តៅខ្លាំងជាប្រក្រតី សីតុណ្ហភាពឡើងក្ដៅកាន់តែខ្លាំងឡើងៗ រហូតដល់អាចនឹងខ្ពស់ជាងការព្យារការណ៍អាកាសធាតុ ក្នុងរយៈពេលប៉ុន្មានថ្ងៃខាងមុខនេះ។ជាក់ស្ដែង ទីក្រុង Phoenix ក្នុងរដ្ឋ Arizona មានសីតុណ្ហភាពក្ដៅខ្លាំងលើស ៤៣,៣អង្សាសេ រយៈពេល ១៥ថ្ងៃជាប់ៗគ្នា ហើយគ្លីនិកចល័ត ត្រូវព្យាបាលអ្នកគ្មានផ្ទះសម្បែង ដែលទទួលរងនូវការរលាកកម្រិតទី៣ និងការខ្វះជាតិទឹកធ្ងន់ធ្ងរ។ឥទ្ធិពលនៃរដូវក្តៅក្ដៅខ្លាំង ត្រូវបាននាំឲ្យចាប់អារម្មណ៍ខ្លាំង ចំពោះការសិក្សាមួយ ក្នុងសប្តាហ៍នេះថា មនុស្សរហូតដល់ ៦១.០០០នាក់ អាចនឹងស្លាប់ អំឡុងការឡើងកម្ដៅកាន់តែក្ដៅខ្លាំងឡើងៗ នៅទូទាំងទ្វីបអឺរ៉ុប កាលពីរដូវក្តៅមុន៕

ក្រុមវេជ្ជបណ្ឌិតជាន់ខ្ពស់នៅចក្រភពអង់គ្លេសប្រកាសរៀបចំកូដកម្មបន្ថែម និងច្រានចោលកិច្ចព្រមព្រៀងដំឡើងប្រាក់ឈ្នួល

អង់គ្លេស៖ សហគមន៍វេជ្ជសាស្ត្រចក្រភពអង់គ្លេស (BMA) បាននិយាយនៅថ្ងៃចន្ទនេះថា ក្រុមវេជ្ជបណ្ឌិតជាន់ខ្ពស់នៅក្នុងចក្រភពអង់គ្លេស នឹងរៀបចំក្បួនកូដកម្មរយៈពេល២ថ្ងៃ នៅខែសីហា ដោយច្រានចោលកិច្ចព្រមព្រៀងដំឡើងប្រាក់ខែ៦% ដែលបានប្រកាសដោយរដ្ឋាភិបាលកាលពីសប្ដាហ៍មុន ថាជាការកាត់ប្រាក់ឈ្នួលតាមលក្ខខណ្ឌជាក់ស្តែងដោយខ្វះការពិចារណា។ ក្រុមវេជ្ជបណ្ឌិតកម្រិតពិគ្រោះយោបល់ នៅក្នុងសេវាសុខភាពជាតិដែលបានផ្ដល់មូលនិធិសាធារណៈរបស់ចក្រភពអង់គ្លេស នឹងរៀបចំកូដកម្មនៅថ្ងៃទី២៤និង២៥ខែសីហា ជាការបន្ថែមពីលើកូដកម្មនានាដែលធ្លាប់បានប្រកាសកាលពីកន្លងទៅនៅថ្ងៃទី២៩ និង២១ និងការគូសបញ្ជាក់ការបរាជ័យរបស់លោកនាយករដ្ឋមន្ត្រីរីស៊ីស៊ូណាក់(Rishi Sunak) ក្នុងការបញ្ចប់សកម្មភាពឧស្សាហកម្មជាច្រើនខែទូទាំងសេវាសាធារណៈ។ លោក Sunak កាលពីសប្ដាហ៍មុន បានហៅការដំឡើងប្រាក់ឈ្នួលវិស័យសាធារណៈនាពេលថ្មីៗនេះ ថាជាដំណោះស្រាយចុងក្រោយ ដោយព្រមានថា ពួកគេនឹងខាតបង់ប្រាក់រាប់លាន ការកាត់កញ្ចប់ថវិកាគ្រប់ទីកន្លែង និង ពុំមានការចរចាបន្ថែមទៀតនោះទេ។ ខណៈក្រុមសហជីពគ្រូបង្រៀន បានផ្អាកកូដកម្ម និងបានលើកឡើងពីការទទួលយកកិច្ចព្រមព្រៀងរបស់ពួកគេ ក្រុមសហជីពរបស់ក្រុមវេជ្ជបណ្ឌិត ពុំចាប់អារម្មណ៍ទេ បន្ទាប់ពីអ្វីដែលពួកគេនិយាយថា មានការខាតបង់ជាច្រើនឆ្នាំសម្រាប់សមាជិករបស់ខ្លួន។ អត្រាអតិផរណារបស់ចក្រភពអង់គ្លេស បានហាក់ឡើងខ្ពស់ជាង១ឆ្នាំមកហើយ ដោយកើនឡើងជាង១១% កាលពីខែតុលា និង៨,៧%កាលពីខែឧសភា ជាកម្រិតខ្ពស់បំផុតក្នុងចំណោមប្រទេសអភិវឌ្ឍ ដែលមានសេដ្ឋកិច្ចធំៗ៕

ម៉ិកស៊ិក ចាប់បានជនអន្តោប្រវេសន៍ជាង ៥០០នាក់ ក្នុងរយៈពេល ២ថ្ងៃ

ម៉ិកស៊ិក៖ អាជ្ញាធររបស់ប្រទេសម៉ិកស៊ិក កាលពីថ្ងៃអាទិត្យ (ទី១៦ ខែកក្កដា) បានឲ្យដឹងថា ពួកគេស្ទាក់ចាប់បានជនអន្តោប្រវេសន៍ជាង ៥០០នាក់ ក្នុងរយៈពេល ២ថ្ងៃ នៅភាគខាងកើតរដ្ឋ Veracruz ខណៈដែលអាជ្ញាធរ បង្ក្រាបលើការដឹកជញ្ជូនជនអន្តោប្រវេសន៍ទៅសហរដ្ឋអាមេរិក ដោយមិនមានស្ថានភាពសុវត្ថិភាព។ប្រភពពីវិទ្យាស្ថានជាតិ សម្រាប់ជនអន្តោប្រវេសន៍ (INM) បានប្រាប់ថា អាជ្ញាធរបានរកឃើញជនអន្តោប្រវេសន៍ចំនួន ២០៦នាក់ដែលត្រូវបានគេទុកចោលនៅក្នុងរថយន្តសណ្ដោងរ៉ឺម៉កមួយ កាលពីថ្ងៃសៅរ៍ (ទី១៥ ខែកក្កដា) នៅទីក្រុង Puente Nacional ក្នុងរដ្ឋ Veracruz។អភិបាលក្រុងលោក Roberto Montiel បានសរសេរនៅលើបណ្ដាញសង្គម Facebook ថា ជនអន្តប្រវេសន៍ជាង ១៨០នាក់ ត្រូវបានរកឃើញ ក្នុងនោះមានរួមទាំងស្ត្រី និងកុមារផងដែរ ដោយជនអន្តោប្រវេសន៍មួយចំនួន មានអាការខ្វះជាតិទឹក។ នៅព្រឹកថ្ងៃអាទិត្យ វិទ្យាស្ថានជាតិ សម្រាប់ជនអន្តោប្រវេសន៍ (INM) បានឲ្យដឹងក្នុងសេចក្តីថ្លែងការណ៍មួយថា អាជ្ញាធរស្ទាក់ចាប់បានជនអន្តោប្រវេសន៍ចំនួន ៣០៣នាក់នៅក្នុងប្រតិបត្តិការចំនួន២ កាលពីព្រឹកថ្ងៃសុក្រ (ទី១៤ ខេកក្កដា) ក្នុងរដ្ឋ Veracruz។កាលពីថ្ងៃសុក្រនោះដែរ អាជ្ញាធរបានរកឃើញជនអន្តោប្រវេសន៍ចំនួន ១៩៦នាក់ រួមទាំងអនីតិជនដែលមិនមានអ្នករួមដំណើរចំនួន ១៩នាក់ ត្រូវបានទុកក្នុងរថយន្ដសណ្ដោងរ៉ឺម៉កចតគ្មានសណ្ដាប់ធ្នាប់ ដែលត្រូវបានឃើញនៅលើផ្លូវមួយនៅជិតទីក្រុង Fortin de las Flores។ការរត់ពន្ធជនអន្តោរប្រវេសន៍ប្រកបដោយគ្រោះថ្នាក់ នៅលើផ្លូវឆ្ពោះទៅកាន់សហរដ្ឋអាមេរិក បានបញ្ចប់ទៅក្នុងទិដ្ឋភាពសោកនាដកម្មគួរឲ្យកត់សម្គាល់ នៅប៉ុន្មានឆ្នាំថ្មីៗនេះ។ក្នុងខែធ្នូ ឆ្នាំ២០២១ មនុស្ស ៥៥នាក់បានស្លាប់ បន្ទាប់ពីរថយន្តដឹកជនអន្តោប្រវេសន៍ប្រមាណ ១៦៦នាក់បានជួបឧបទ្ទវហេតុ នៅភាគខាងត្បូងរដ្ឋ Chiapas របស់ប្រទេសម៉ិកស៊ិក ហើយនៅខែមិថុនា ឆ្នាំ២០២២ ជនអន្តោប្រវេន៍ចំនួន ៥៣នាក់បានបាត់បង់ជីវិត ក្នុងរថយន្តសណ្ដោងរ៉ឺម៉កដែលកំពុងឆេះ នៅរដ្ឋតិចសាស់ ដែលនេះជាឧបទ្ទវហេតុជួញដូរជនអន្តោប្រវេសន៍ដ៏គួរឲ្យរន្ធត់បំផុត នៅសហរដ្ឋអាមេរិក៕

បណ្ដាញសង្គម

ព័ត៌មានថ្មីៗ

អនុប្រធានទី១ អាជ្ញាធរមីន៖ សមិទ្ធផលជិត២០ឆ្នាំនៃគម្រោងបោសសម្អាតមីនដើម្បីលទ្ធផលបានរួមចំណែកកសាងសហគមន៍មានសុវត្ថិភាព ខណៈកម្ពុជាប្រឈមនឹងបន្ទុកមនុស្សធម៌ថ្មីដែលបង្កឡើងដោយប្រទេសថៃ

ការចូលជាសមាជឹកសហគមន៍កសិកម្មទំនើប បានផ្ដល់ផលប្រយោជន៍ជាច្រើនដល់ប្រជាកសិករក្នុងសហគមន៍

ទីភ្នាក់ងារ៖ កូរ៉េខាងត្បូងប្តេជ្ញារក្សាជំហររបស់ខ្លួនមិនផ្គត់ផ្គង់អាវុធដល់អ៊ុយក្រែន

រុស្ស៊ីព្រមានអ៊ុយក្រែនកុំឲ្យធ្វើសកម្មភាពបង្កហេតុណាមួយប្រឆាំងនឹងប្រទេសបេឡារុស

ឯកអគ្គរដ្ឋទូតរុស្ស៊ីរិះគន់ទណ្ឌកម្មថ្មីរបស់កាណាដាថា ជាការបង្ហាញអាកប្បកិរិយាឥតប្រយោជន៍

អ៊ីស្រាអែលទទួលស្គាល់ថា ការចរចាកំពុងដំណើរការលើគ្រប់វិស័យសំខាន់ៗ

ស្ថានទូត៖ រុស្ស៊ីនឹងចាត់វិធានការឆ្លើយតបចំពោះវត្តមានរបស់ NATO ដែលកំពុងកើនឡើង នៅហ្វាំងឡង់

លោក TRUMP អះអាងថា ច្រកសមុទ្រហ័រមូសត្រូវបានបោសសម្អាតមីនទាំងស្រុង

កងកម្លាំងយោធា និងសមត្ថកិច្ចការពារព្រំដែនភូមិសាស្ត្រស្រុកម៉ាឡៃ បង្ក្រាបទំនិញថៃឆ្លងដែនដោយខុសច្បាប់ ពីសំណាក់ក្រុមឈ្មួញលួចនាំចូលមកកម្ពុជា (សាច់បង្កក់នាំពីថៃចូលមក)

រដ្ឋមន្រ្តីក្រសួងសេដ្ឋកិច្ច ប្រកាសដាក់ឱ្យអនុវត្តយុទ្ធសាស្រ្តជាតិស្តីពីការអភិវឌ្ឍធុរកិច្ចថ្មីឆ្នាំ២០២៦-២០៣០

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877