BTV NEWS

ឃាត់ខ្លួនជនពាក់ព័ន្ធ Online Scams ជាង ៦៥០នាក់ នៅបាវិត ភាគច្រើនជាជនបរទេស

ជនជាតិវៀតណាមសរុប ៣៤នាក់ ត្រូវបានបណ្តេញចេញពីកម្ពុជា តាមប៉ុស្តិ៍នគរបាលច្រកទ្វារព្រំដែនអន្តរជាតិបាវិត ខេត្តស្វាយរៀង

កាស៊ីណូ ស៊ីលវើរ ស្តារនៅក្រុងបាវិតត្រូវបានព្យួរអាជ្ញាប័ណ្ណបន្ទាប់ពី រកឃើញមានជាប់ពាក់ព័ន្ធនឹងការឆបោកតាមប្រព័ន្ធបច្ចេកវិទ្យា

ឃាត់ខ្លួនជនបរទេសជាង១០០នាក់ ពាក់ព័ន្ធការឆបោកតាមប្រព័ន្ធបច្ចេកវិទ្យា ក្នុងអគារខនដូរ១កន្លែង នៅសង្កាត់បឹងសាឡាង ខណ្ឌទួលគោក

សន្តិសុខ និង សង្គម

មនុស្ស ៤ នាក់របួស និងជាងពីរពាន់នាក់រងផលប៉ះពាល់នៅហ្វីលីពីន ដោយសារព្យុះស៊ីក្លូនត្រូពិច

រដ្ឋាភិបាលបាននិយាយកាលពីថ្ងៃអាទិត្យ (២៦ ឧសភា) ថា ព្យុះស៊ីក្លូនត្រូពិច អេវីនែរ (Ewiniar) បានបង្កឱ្យមានទឹកជំនន់ និងបំណាក់ដីនៅតំបន់មួយចំនួននៃប្រទេសហ្វីលីពីន ដោយបានធ្វើឱ្យមនុស្ស ៤ នាក់រងរបួស និងបង្កផលប៉ះពាល់ដល់មនុស្សប្រមាណ ២.៧៣៤ នាក់។ នៅក្នុងរបាយការណ៍មួយ ក្រុមប្រឹក្សាកាត់បន្ថយ និងគ្រប់គ្រងគ្រោះមហន្តរាយជាតិ (NDRRMC) របស់ហ្វីលីពីនបាននិយាយថា អ្នករងរបួសទាំង ៤ នាក់នោះមកពីតំបន់ ប៊ីខូល (Bicol) ភាគអាគ្នេយ៍នៃរដ្ឋធានីម៉ានីល ហើយរហូតមកដល់ពេលនេះមិនមានអ្នកស្លាប់ត្រូវបានរាយការណ៍ទេ។ឆ្មាំល្បាតឆ្នេរហ្វីលីពីនបាននិយាយថា ទន្ទឹមនឹងនោះ អ្នកដំណើរជាង ៦.០០០ នាក់ អ្នកបើកបររថយន្តដឹកទំនិញ និងរថយន្តសណ្ដោងដឹកទំនិញត្រូវបានជាប់គាំងនៅក្នុងកំពង់ផែទាំងអស់ទូទាំងប្រទេសកាលពីព្រឹកថ្ងៃអាទិត្យ ដោយសារតែលក្ខខណ្ឌអាកាសធាតុមិនអំណោយផល។ព្យុះ អេវីនែរ ដែលជាព្យុះស៊ីក្លូនដំបូងគេដែលបានវាយប្រហារហ្វីលីពីនក្នុងឆ្នាំនេះ បានជះឥទ្ធិពលដល់តំបន់ ប៊ីខូល នៅលើកោះ លូហ្ស៊ូន (Luzon) ដ៏សំខាន់ និងតំបន់ វីសាយ៉ាស (Visayas) ភាគខាងកើតនៅកណ្តាលប្រទេសហ្វីលីពីន។ ការិយាល័យអាកាសធាតុរបស់រដ្ឋបាននិយាយថា ព្យុះនេះនឹងបន្តឱ្យមានភ្លៀងធ្លាក់ខ្លាំងនៅក្នុងតំបន់ជាច្រើន រួមទាំងទីក្រុងរណបម៉ានីល ដោយព្រមានអំពីលទ្ធភាពទឹកជំនន់ និងបំណាក់ដីដ៏ធ្ងន់ធ្ងរ៕

អគ្គិភ័យឆេះរាលដាលក្នុងទីក្រុង Rafah បន្ទាប់ពីអ៊ីស្រាអែលវាយប្រហារលើតំបន់ជនភៀសខ្លួនប៉ាឡេស្ទីន

អគ្គិភ័យបានឆាបឆេះរាលដាល បន្ទាប់ពីការវាយប្រហាររបស់អ៊ីស្រាអែលលើតំបន់មួយដែលត្រូវបានគេរៀបចំសម្រាប់ប្រជាជនប៉ាឡេស្ទីនភៀសខ្លួន ក្នុងទីក្រុង Rafah តំបន់ហ្កាហ្សា កាលពីយប់ថ្ងៃអាទិត្យ។ រូបភាពទទួលបានដោយសារព័ត៌មាន Reuters បង្ហាញពីមនុស្សបានប្រមូលផ្តុំនៅជិតអគ្គិភ័យដ៏ធំ។ យោធាអ៊ីស្រាអែល បាននិយាយកាលពីថ្ងៃអាទិត្យថា ខ្លួនបានវាយប្រហារស៊ីបគោលដៅទៅលើបរិវេណក្រុមហាម៉ាសនៅភាគខាងត្បូងទីក្រុងរ៉ាហ្វា តំបន់ហ្កាហ្សា ប៉ុន្តែកំពុងពិនិត្យមើលឧបទ្ទវហេតុនេះបន្ទាប់ពីមានសេចក្តីរាយការណ៍ថាការវាយប្រហារ បានបណ្តាលឱ្យមានអគ្គិភ័យ និងបណ្តាលឲ្យជនស៊ីវិលស្លាប់ និងរងរបួស។ យន្តហោះរបស់កងកម្លាំងការពារជាតិអ៊ីស្រាអែលមួយគ្រឿង បានវាយប្រហារទៅលើបរិវេណក្រុមហាម៉ាសក្នុងទីក្រុង Rafah ជាកន្លែងដែលក្រុមភេរវករហាម៉ាស កំពុងធ្វើប្រតិបត្តិការ។ ការវាយប្រហារនេះ ត្រូវបានធ្វើឡើងទៅលើគោលដៅស្របច្បាប់ក្រោមច្បាប់អន្តរជាតិ ដោយប្រើអាវុធស៊ីបគោលដៅ និងផ្អែកលើការស៊ើបការណ៍ច្បាស់លាស់ ដែលបង្ហាញពីការប្រើប្រាស់តំបន់នេះរបស់ហាម៉ាស។ មន្ត្រីសុខាភិបាលប៉ាឡេស្ទីន និងអង្គភាពសេវាសង្គ្រោះបន្ទាន់ស៊ីវិល បាននិយាយថា ការវាយប្រហារតាមអាកាសរបស់អ៊ីស្រាអែល បានសម្លាប់ប្រជាជនប៉ាឡេស្ទីនយ៉ាងហោចណាស់៤០នាក់ និងរងរបួសរាប់សិបនាក់នៅក្នុងតំបន់មួយនៅភាគខាងត្បូងទីក្រុង Rafah តំបន់ហ្កាហ្សា ជាកន្លែងត្រូវបានរៀបចំ សម្រាប់ជនភៀសខ្លួន។ ការវាយប្រហារ បានកើតឡើងនៅក្នុងសង្កាត់ Tel Al-Sultan នៅភាគខាងលិចទីក្រុង ជាកន្លែងដែលមនុស្សរាប់ពាន់នាក់កំពុងជ្រកកោន បន្ទាប់ពីមនុស្សជាច្រើនបានភៀសខ្លួនចេញពីតំបន់ភាគខាងកើត ទីក្រុង ដែលកងកម្លាំងអ៊ីស្រាអែល បានចាប់ផ្តើមការវាយលុកតាមជើងគោក កាលពី២សប្តាហ៍មុន។

មនុស្ស ៤០នាក់បានស្លាប់ នៅក្នុងការទម្លាក់គ្រាប់បែករបស់អ៊ីស្រាអែល លើជំរំនៅក្រុង Rafah

ទីភ្នាក់ងារព័ត៌មានផ្លូវការរបស់ប៉ាឡេស្ទីន WAFA បានរាយការណ៍ថា យ៉ាងហោចណាស់មនុស្ស ៤០ នាក់បានស្លាប់ និងមួយចំនួនទៀតរងរបួសកាលពីល្ងាចថ្ងៃអាទិត្យ (២៦ ឧសភា) នៅក្នុងការទម្លាក់គ្រាប់បែករបស់អ៊ីស្រាអែល លើជំរំតង់នៅភាគពាយ័ព្យទីក្រុង រ៉ាហ្វា (Rafah) ដែលជាក្រុងនៅចុងភាគខាងត្បូងនៃតំបន់ហ្កាហ្សាស្ទ្រីប។ទីភ្នាក់ងារព័ត៌មាន WAFA បានបន្ថែមថា កងកម្លាំងអ៊ីស្រាអែល បានបាញ់រ៉ូកែតប្រហែលប្រាំបីគ្រាប់ឆ្ពោះទៅរកតង់បណ្ដោះអាសន្នរបស់អ្នកស្រុកនៅក្នុងជំរំបង្កើតថ្មី ដែលប្រមូលផ្តុំដោយជនភៀសខ្លួនរាប់ពាន់នាក់នៅក្បែរឃ្លាំងរបស់ទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីននៅតំបន់ដើមបូព៌ា (UNRWA)។ប្រភពក្នុងតំបន់បានប្រាប់សារព័ត៌មាន ស៊ីនហួរ ថា នេះគឺជាការវាយប្រហារតាមអាកាសរបស់អ៊ីស្រាអែល «ដ៏ធ្ងន់ធ្ងរ និងមិនធ្លាប់មានពីមុនមក» លើតំបន់ដែលមានប្រជាជនភៀសខ្លួនរស់នៅយ៉ាងក្រាស់ក្រែលនេះ ដោយបានធ្វើឱ្យជំរំតង់ និងរថយន្តជនស៊ីវិលជាច្រើនត្រូវឆេះខ្ទេចខ្ទី។ ប្រភពដដែលបានបញ្ជាក់ថា ក្រុមមន្ត្រីការពារជនស៊ីវិល និងក្រុមរថយន្តសង្គ្រោះ បានជួបឧបសគ្គយ៉ាងខ្លាំងក្នុងការទាញយកសាកសពដោយសារស្ថានភាពលំបាកខ្លាំងពេក។នៅក្នុងសេចក្តីថ្លែងការណ៍មួយដែលបានចេញផ្សាយកាលពីយប់ថ្ងៃអាទិត្យ ក្រុមហាម៉ាស បានថ្កោលទោសការទម្លាក់គ្រាប់បែកនេះថាជា «ការប្រឆាំងទាំងស្រុង និងមិនយកចិត្តទុកដាក់ចំពោះសេចក្តីសម្រេចរបស់តុលាការយុត្តិធម៌អន្តរជាតិ (ICJ) ដែលទាមទារឱ្យវាបញ្ឈប់ការឈ្លានពានរបស់ខ្លួនប្រឆាំងនឹងក្រុង រ៉ាហ្វា»៕

មនុស្សជាង ៦៧០ នាក់ត្រូវគេបារម្ភថា ស្លាប់ក្នុងបំណាក់ដីនៅប៉ាពួនូវ៉ែលហ្គីណេ ខណៈការសង្រ្គោះកំពុងបន្ត

ក្រុមសង្គ្រោះបន្ទាន់នៅប្រទេសប៉ាពួនូវ៉ែលហ្គីណេ នៅថ្ងៃច័ន្ទ (២៧ ឧសភា) នេះ បានបន្តកិច្ចខិតខំប្រឹងប្រែងជួយសង្គ្រោះរបស់ពួកគេដើម្បីស្វែងរកអ្នកនៅរស់រានមានជីវិត បន្ទាប់ពីមនុស្សជាង ៦៧០ នាក់ត្រូវគេបារម្ភថាបានស្លាប់ នៅក្នុងបំណាក់ដីដ៏ធំមួយ ដែលបានវាយប្រហារលើភូមិដាច់ស្រយាលមួយនៅក្នុងតំបន់ភាគខាងជើងនៃប្រទេសប៉ាស៊ីហ្វិកមួយនេះ។ទីភ្នាក់ងារអន្តោប្រវេសន៍របស់អង្គការសហប្រជាជាតិ កាលពីថ្ងៃអាទិត្យ បាននិយាយថាមនុស្សប្រហែល ១.២៥០ នាក់ត្រូវបានផ្លាស់ទីលំនៅពីបំណាក់ដីដែលបានកើតឡើងនៅក្នុងខេត្ត អែនហ្កា (Enga) របស់ ប្រទេសប៉ាពួនូវ៉ែលហ្គីណេ កាលពីព្រឹកព្រលឹមថ្ងៃសុក្រ សប្ដាហ៍មុន។ លំនៅឋានជាង ១៥០ ខ្នងត្រូវបានកប់ក្រោមបំណាក់ដី ហើយលំនៅឋានប្រហែល ២៥០ ខ្នងត្រូវបានប្រជាជនបោះបង់ចោល។នាយកប្រចាំប្រទេសនៃអង្គការ ឃែរ (CARE) អន្តរជាតិរបស់ប៉ាពួនូវ៉ែលហ្គីណេ លោកស្រី ចាស្ទីន មែកម៉ាហូន (Justine McMahon) បានប្រាប់ទូរទស្សន៍ ABC នៅថ្ងៃចន្ទ នេះថា ស្ថានភាពដ៏គ្រោះថ្នាក់ និងសណ្ឋានដីមិនស្ថិតស្ថេរ កំពុងរារាំងដល់កិច្ចខិតខំប្រឹងប្រែងជួយសង្គ្រោះ ហើយមនុស្សប្រមាណ ៤.០០០ នាក់បានរស់នៅក្បែរតំបន់រងផលប៉ះពាល់នោះ។ក្រុមសង្គ្រោះបន្ទាន់កំពុងបន្តកិច្ចខិតខំប្រឹងប្រែងសង្រ្គោះ ប៉ុន្តែឧបករណ៍ធុនធ្ងន់ដែលត្រូវការសម្រាប់ការប្រតិបត្តិការមិនទាន់ទៅដល់ភូមិនៅឡើយទេ ដោយសារផ្លូវធំៗនៅតែត្រូវបានកាត់ផ្តាច់ ហើយការចេញចូលតំបន់កើតហេតុបានតែតាមរយៈឧទ្ធម្ភាគចក្រប៉ុណ្ណោះ៕

ព្យុះស៊ីក្លូនវាយប្រហារបង់ក្លាដែស ខណៈមនុស្សជិត១លាននាក់ជម្លៀសទៅទីជម្រកបណ្ដោះអាសន្ន

ព្យុះស៊ីក្លូនដ៏ខ្លាំងក្លាមួយបានបោកបក់ចូលឆ្នេរសមុទ្រនៅតំបន់ទំនាបនៃប្រទេសបង់ក្លាដែសកាលពីថ្ងៃអាទិត្យ ២៦ ឧសភា ដោយមនុស្សជិតមួយលាននាក់បានជម្លៀសខ្លួនចេញពីដីគោក។ ប្រធានមន្ទីរឧតុនិយមបង់ក្លាដែស លោក អាហ្ស៊ីហ្សើររ៉ាម៉ាន់ (Azizur Rahman) បានប្រាប់សារព័ត៌មាន AFP ថា ព្យុះស៊ីក្លូន មានឈ្មោះថា រីម៉ាល់ (Remal) ដ៏ធ្ងន់ធ្ងរបានចាប់ផ្តើមឆ្លងកាត់ឆ្នេរសមុទ្របង់ក្លាដែស ដោយបន្ថែមថា ព្យុះដ៏មានទ្ធិពលនេះ អាចបន្តវាយលុកតំបន់ឆ្នេរសមុទ្ររហូតដល់យ៉ាងហោចណាស់ព្រឹកព្រលឹមថ្ងៃចន្ទនេះ។ យើងបានកត់ត្រាល្បឿនខ្យល់អតិបរមា ៩០ គីឡូម៉ែត្រក្នុងមួយម៉ោង ប៉ុន្តែល្បឿនខ្យល់អាចនឹងកើនឡើងខ្លាំងជាងនេះ។ក្រុមអ្នកព្យាករណ៍អាកាសធាតុ បានព្យាករណ៍ថា មានខ្យល់បោកបក់ក្នុងល្បឿន ១៣០ គីឡូម៉ែត្រក្នុងមួយម៉ោង ដោយមានភ្លៀងធ្លាក់ខ្លាំង ហើយខ្យល់ក៏កំពុងបក់បោកទៅលើប្រទេសឥណ្ឌាជិតខាងផងដែរ។ក្រុមអាជ្ញាធរបានដំឡើងសញ្ញាគ្រោះថ្នាក់ដល់កម្រិតខ្ពស់បំផុត។ គួររម្លឹកថា ព្យុះស៊ីក្លូន ធ្លាប់បានសម្លាប់មនុស្សរាប់សែននាក់ក្នុងប្រទេសបង់ក្លាដែសក្នុងរយៈពេលប៉ុន្មានទសវត្សរ៍ថ្មីៗនេះ ប៉ុន្តែចំនួននៃព្យុះកំបុតត្បូងដ៏បំផ្លិចបំផ្លាញ ដែលវាយប្រហារឆ្នេរសមុទ្រមានប្រជាជនរស់នៅយ៉ាងច្រើន បានកើនឡើងយ៉ាងខ្លាំងពីមួយឆ្នាំទៅមួយឆ្នាំពិសេស៣ឆ្នាំចុងក្រោយ ដោយសារឥទ្ធិពលនៃបម្រែបម្រួលអាកាសធាតុ៕

អ៊ីស្រាអែលវាយប្រហារទីក្រុង Rafah ក្រោយតុលាការកំពូលរបស់ UN បញ្ជាឲ្យខ្លួនបញ្ឈប់ការវាយលុក

អ៊ីស្រាអែលបានទម្លាក់គ្រាប់បែកលើតំបន់ហ្កាហ្សា ក្នុងនោះរួមទាំងទីក្រុង Rafah នៅថ្ងៃសៅរ៍ (ទី២៥ ខែឧសភា) នេះ ពោលគឺមួយថ្ងៃបន្ទាប់ពីតុលាការកំពូលរបស់អង្គការសហប្រជាជាតិ (UN) បានបញ្ជាឲ្យខ្លួនបញ្ឈប់ប្រតិបត្តិការយោធា នៅក្នុងទីក្រុងភាគខាងត្បូងមួយនេះ ខណៈកិច្ចប្រឹងប្រែង កំពុងដំណើរការនៅទីក្រុងប៉ារីសប្រទេសបារាំង ដើម្បីស្វែងរកបទឈប់បាញ់នៅក្នុងសង្គ្រាម ដែលបង្កឡើងដោយការវាយប្រហាររបស់ក្រុមហាម៉ាស កាលថ្ងៃទី៧ ខែតុលា។ ជាមួយគ្នានេះ តុលាការយុត្តិធម៌អន្តរជាតិ (ICJ) ក៏បានទាមទារផងដែរឲ្យមាន «ការដោះលែងជាបន្ទាន់ និងដោយគ្មានលក្ខខណ្ឌ» ចំពោះចំណាប់ថ្នូរទាំងអស់ ដែលនៅតែត្រូវបានឃុំខ្លួនដោយក្រុមសកម្មប្រយុទ្ធប៉ាឡេស្ទីន ដោយការទាមទារនោះកើតមានឡើងប៉ុន្មានម៉ោងបន្ទាប់ពីយោធាអ៊ីស្រាអែល បានប្រកាសថា កងទ័ពបានយកមកវិញនូវសពចំណាប់ថ្នូរ ៣នាក់ទៀត ពីភាគខាងជើងតំបន់ហ្កាហ្សា។លើសពីនេះទៀត តុលាការដែលមានមូលដ្ឋាននៅទីក្រុងឡាអេ ប្រទេសហូឡង់ ដែលបញ្ជារបស់ខ្លួនមានជាប់កាតព្វកិច្ចស្របច្បាប់ ប៉ុន្តែខ្វះយន្តការអនុវត្តដោយផ្ទាល់នោះ ក៏បានបញ្ជាឲ្យអ៊ីស្រាអែលបន្តបើកច្រកឆ្លងកាត់ Rafah រវាងប្រទេសអេហ្ស៊ីប និងតំបន់ហ្កាហ្សា ដែលខ្លួនបានបិទកាលពីដើមខែឧសភា នៅពេលចាប់ផ្តើមវាយប្រហារលើទីក្រុង។យ៉ាងណាក្ដី អ៊ីស្រាអែលមិនបានផ្តល់ការបង្ហាញថា ខ្លួនកំពុងរៀបចំកែប្រែគោលដៅ នៅទីក្រុង Rafah នោះទេ ដោយទទូចថា តុលាការបានយល់ពីស្ថានការណ៍ខុស។ នៅក្នុងសេចក្តីថ្លែងការណ៍រួមមួយជាមួយអ្នកនាំពាក្យក្រសួងការបរទេសរបស់អ៊ីស្រាអែល ទីប្រឹក្សាសន្តិសុខជាតិ លោក Tzachi Hanegbi បានប្រាប់ឲ្យដឹងថា៖ «អ៊ីស្រាអែលមិនមាន និងនឹងមិនធ្វើប្រតិបត្តិការយោធា នៅក្នុងតំបន់ Rafah ដែលបង្កើតលក្ខខណ្ឌរស់នៅ ដែលអាចបណ្តាលឲ្យមានការបំផ្លិចបំផ្លាញប្រជាជនប៉ាឡេស្ទីនទាំងមូល ឬមួយផ្នែកនោះទេ»។ក្រុមហាម៉ាសដែលបានគ្រប់គ្រងតំបន់ហ្កហ្សាតាំងពីឆ្នាំ២០០៧ មកនោះ បានស្វាគមន៍សេចក្តីសម្រេចរបស់ ICJ លើទីក្រុង Rafah ប៉ុន្តែបានរិះគន់ការសម្រេចរបស់ស្ថាប័ននេះ ក្នុងការមិនបញ្ចូលផ្នែកផ្សេងទៀតនៃតំបន់ហ្កាហ្សាដែលហែកហួរដោយសង្រ្គាម ក្នុងបទបញ្ជានេះ៕

ស្ត្រីម្នាក់ត្រូវកាត់ទោសឲ្យជាប់ពន្ធនាគារពីបទសម្អាតរូបិយប័ណ្ណគ្រីបតូ នៅអង់គ្លេស តាមរយៈការឆបោក ៦,៤ពាន់លានដុល្លារ នៅចិន

ស្ត្រីម្នាក់ត្រូវបានកាត់ទោសឲ្យជាប់ពន្ធនាគារជិត ៧ឆ្នាំ កាលពីថ្ងៃសុក្រ (ទី២៤ ខែឧសភា) ពីបទសម្អាតលុយកខ្វក់ បន្ទាប់ពីមានការកាត់ក្តី នៅតុលាការទីក្រុងឡុងដ្រ៍ ដោយរូបនាងត្រូវបានចោទប្រកាន់ពីបទបំប្លែងកាក់ប៊ីតខន (រូបិយប័ណ្ណគ្រីបតូ) ទៅជាសាច់ប្រាក់ និងទ្រព្យសម្បត្តិ ដើម្បីជួយបិទបាំងដំណើរការឆបោកទឹកប្រាក់ ៥ពាន់លានផោន (៦,៤ពាន់លានដុល្លារ)។ព្រះរាជអាជ្ញាបានឲ្យដឹងថា លោកស្រី Wen Jian បានជួយលាក់ប្រភពលុយដែលត្រូវបានគេចោទប្រកាន់ថាបានលួចពីអ្នកវិនិយោគចិនជិត ១៣០.០០០នាក់ នៅក្នុងគម្រោងទ្រព្យសម្បត្តិបោកប្រាស់ នៅចន្លោះឆ្នាំ២០១៤ និងឆ្នាំ២០១៧។ អ្នកទោសស្រីរូបនេះមិនត្រូវបានចោទប្រកាន់ថា មានជាប់ពាក់ព័ន្ធនឹងការឆបោកដែលរដ្ឋអាជ្ញាបាននិយាយថា ត្រូវបានរៀបគម្រោងដោយស្ត្រីម្នាក់ទៀត ដែលលោកស្រី Wen ជឿថា ជាអ្នកមានទ្រព្យស្ដុកស្ដម្ភមិនធម្មតាម្នាក់។ជាផ្នែកមួយនៃការស៊ើបអង្កេតរបស់ពួកគេ នគរបាលអង់គ្លេសបានរឹបអូសហឹបមួយដែលមានទុកកាក់ប៊ីតខនជាង ៦១.០០០កាក់ ដែលនេះធ្វើឲ្យវាជាក្លាយជាការរឹបអូសរូបិយប័ណ្ណគ្រីបតូដ៏ធំបំផុតមួយ តាមរយៈការអនុវត្តច្បាប់ទូទាំងពិភពលោក។ អំឡុងសវនាការរបស់លោកស្រី Wen ព្រះរាជអាជ្ញាបាននិយាយថា កាក់ប៊ីតខន ៦១.០០០កាក់នេះ មានតម្លៃប្រហែល ១,៤ពាន់លានផោន នៅពេលដែលនគរបាលទទួលបានសិទ្ធិចូលទៅរឹបអូស ក្នុងឆ្នាំ២០២១។ តែឥឡូវនេះវាមានតម្លៃជាង ៣ពាន់លានផោន។លោកស្រី Wen វ័យ ៤២ឆ្នាំ បានបដិសេធបទចោទ ៣ករណី ពាក់ព័ន្ធនឹងការសម្អាតលុយកខ្វក់ ហើយបាននិយាយថា លោកស្រីមិនមានចំណេះដឹងអំពីបទល្មើសឧក្រិដ្ឋដែលទាក់ទងនឹងកាក់ប៊ីតខននោះទេ។ អ្នកទោសរូបនេះត្រូវបានក្រុមប្រឹក្សាតុលាការរកឃើញថា មានទោស ១ករណី ក្នុងខែមីនា ក្រោយការកាត់ក្ដី នៅតុលាការ Southwark Crown តែគណៈវិនិច្ឆ័យមិនអាចឈានដល់ការចេញសាលក្រមលើបទចោទ ២ករណីផ្សេងទៀតទ។ កាលពីថ្ងៃសុក្រ លោកស្រី Wen ត្រូវបានកាត់ទោសឲ្យជាប់ពន្ធនាគាររយៈពេល ៦ឆ្នាំ និង ៨ខែ ពីបទសម្អាតលុយកខ្វក់ ដែលលោកស្រីត្រូវបានរកឃើញថា មានទោសពិតប្រាកដមែន៕

មនុស្សជាង ៣០០ នាក់ត្រូវបានកប់ក្នុងបំណាក់ដីនៅប៉ាពួ នូវ៉ែលហ្គីនណេ

ប្រព័ន្ធផ្សព្វផ្សាយក្នុងស្រុក បានរាយការណ៍នៅថ្ងៃសៅរ៍នេះថា មនុស្សជាង៣០០នាក់ និងលំនៅឋានជាង ១.១០០ខ្នង ត្រូវបានកប់ដោយបំណាក់ដីដ៏ធំ នៅភាគខាងជើង ប្រទេសប៉ាពួ នូវ៉ែលហ្គីនណេ។មនុស្សរាប់រយនាក់ ត្រូវបានគេបារម្ភថា ស្លាប់នៅក្នុងបំណាក់ដី ដែលបានកើតឡើងនៅភូមិ Kaokalam ក្នុងខេត្ត Enga ចម្ងាយប្រហែល៦០០ គីឡូម៉ែត្រ ភាគពាយព្យរដ្ឋធានី Port Moresby។សារព័ត៌មាន បាននិយាយថា បំណាក់ដីនៅក្នុងប្រទេសតំបន់ប៉ាស៊ីហ្វិកភាគខាងជើងប្រទេសអូស្ត្រាលីបានកប់មនុស្សជាង៣០០នាក់ និងលំនៅឋាន១.១៨២ខ្នង។ ក្រសួងការបរទេស និងពាណិជ្ជកម្មរបស់ប្រទេសអូស្ត្រាលី បាននិយាយនៅថ្ងៃសៅរ៍នេះថា ភូមិចំនួន៦ បានរងផលប៉ះពាល់ ដោយបំណាក់ដីនៅក្នុងតំបន់ Mulitaka ។អ្នកនាំពាក្យក្រសួង បាននិយាយនៅក្នុងសេចក្តីថ្លែងការណ៍ថា គណៈកម្មាធិការជាន់ខ្ពស់របស់ប្រទេសអូស្ត្រាលី នៅទីក្រុង Port Moresby កំពុងទាក់ទងយ៉ាងជិតស្និទ្ធជាមួយអាជ្ញាធរ ប៉ាពួ នូវ៉ែលហ្គីណេ សម្រាប់ការវាយតម្លៃបន្ថែមលើទំហំនៃការខូចខាត និងជនរងគ្រោះ។ សារព័ត៌មាន ABC បានរាយការណ៍នៅថ្ងៃសៅរ៍នេះថា សាកសពចំនួន៤នាក់ ត្រូវបានគេយកចេញពីទីក្រុង បន្ទាប់ពីក្រុមសង្គ្រោះបន្ទាន់បានទៅដល់តំបន់ដែលមានប្រជាជនរស់នៅដាច់ៗពីគ្នា ខណៈចំនួនអ្នកស្លាប់ត្រូវបានគេរំពឹងថា នឹងកើនឡើង។ប្រព័ន្ធផ្សព្វផ្សាយបានរាយការណ៍ថា បំណាក់ដី បានបិទផ្លូវហាយវ៉េ ធ្វើឱ្យឧទ្ធម្ភាគចក្រត្រូវបានប្រើប្រាស់ ជាមធ្យោបាយតែមួយគត់ដើម្បីទៅដល់តំបន់រងគ្រោះ។ នាយករដ្ឋមន្ត្រី លោក James Marape បាននិយាយថា មន្ត្រីគ្រោះមហន្តរាយ កងកម្លាំងការពារជាតិ និងក្រសួងសាធារណៈការនិងផ្លូវហាយវ៉េ កំពុងបង្កើនកិច្ចខិតខំប្រឹងប្រែងសង្គ្រោះ និងស្តារឡើងវិញ។

នគរបាលរាជធានី នឹងធ្វើសន្និសិទបង្ហាញមុខក្រុមក្មេងទំនើងដែលបង្ក្រាបបាន នៅរសៀលនេះ

ភ្នំពេញ៖ យោងតាមប្រភពមន្ត្រីនគរបាលរាជធានីភ្នំពេញ នៅម៉ោង១៤ និង០០នាទីរសៀលថ្ងៃទី២៥ ខែឧសភា ឆ្នាំ២០២៤នេះ សមត្ថកិច្ចនឹងធ្វើសន្និសិទព័ត៌មានបង្ហាញមុខក្រុមក្មេងទំនើងជាច្រើននាក់ ដែលធ្វើការបង្ក្រាបបានក្នុងរយះពេល២ថ្ងៃមកនេះ ។សន្និសិទនេះ នឹងធ្វើឡើងនៅការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានី ដោយបង្ហាញមុខក្រុមជនសង្ស័យ រួមជាមួយវត្ថុតាងមានជាដាវ និងកាំបិតជាច្រើន ដែលបានដកហូត បន្ទាប់ពីក្រុមទាំងនេះ បានធ្វើសកម្មភាពអុកឡុក និងដើរកាប់ចាក់យ៉ាងខ្លាំងខ្លាក្នុងរាជធានីភ្នំពេញ ។ ក្នុងរយះពេល២ថ្ងៃមកនេះ កម្លាំងសមត្ថកិច្ចទូទាំងរាជធានីភ្នំពេញ ដោយបានសហការ ជាមួយកម្លាំងនគរបាល នៃនាយកដ្ឋាននគរបាលព្រហ្មទណ្ឌក្រសួងមហាផ្ទៃ បានបើកប្រតិបត្តិការទ្រង់ទ្រាយធំ ក្នុងការចុះល្បាតក្នុងភូមិសាស្ត្ររាជធានី ដើម្បីបង្ការទប់ស្កាត់ និងបង្ក្រាបលើសកម្មភាពក្រុមក្មេងទំនើង ដែលបានបង្កើតភាពអសន្តិសុខ បង្កជាក្តីព្រួយបារម្ភ និងភ័យខ្លាចដល់ប្រជាពលរដ្ឋស្លូតត្រង់នៅក្នុងសង្គមជាតិ ។ ប្រតិបត្តិការដ៏ក្តៅគគុករបស់កម្លាំងសមត្ថកិច្ចនេះ ធ្វើឡើង បន្ទាប់ពីមានបទបញ្ជាដ៏ម៉ឺងម៉ាត់របស់សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា ដែលបានបញ្ជារដល់កងកម្លាំងគ្រប់លំដាប់ថ្នាក់ ពិសេសអភិបាលរាជធានីខេត្តទាំង២៤ ធ្វើយ៉ាងណាដាច់ខាតត្រូវតែបង្ក្រាបឱ្យមានប្រសិទ្ធិភាពបំផុត លើសកម្មភាពក្រុមក្មេងទំនើង ដែលកំពុងមានការផុសផុលឡើងខ្លាំង បង្កជាភាពអសន្តិសុខដល់ពលរដ្ឋ និងសង្គមជាតិ ក្នុងពេលបច្ចុប្បន្ននេះ ៕ អត្ថបទ ៖ លីហេង

បាតុករគាំទ្រប៉ាឡេស្ទីននិយាយថា «មិនគ្រប់គ្រាន់ទេ» សម្រាប់សេចក្តីសម្រេចរបស់ ICJ លើអ៊ីស្រាអែល

ក្រុមបាតុករគាំទ្រប៉ាឡេស្ទីនមួយក្រុម បានមកប្រមូលផ្តុំគ្នានៅខាងក្រៅតុលាការយុត្តិធម៌អន្តរជាតិ (ICJ) កាលពីថ្ងៃសុក្រ ដោយបានស្តីបន្ទោសចំពោះសេចក្តីសម្រេចរបស់តុលាការដែលឲ្យអ៊ីស្រាអែលត្រឹមតែ បញ្ឈប់ប្រតិបត្តិការយោធាទាំងអស់នៅទីក្រុងRafah។ អ្នកតវ៉ានិយាយថា សវនាការនៅថ្ងៃនេះល្អ ប៉ុន្តែវាមិនទាន់គ្រប់គ្រាន់នៅឡើយទេ។ «សេរីភាពប៉ាឡេស្ទីន ព្រមទាំងដំណោះស្រាយរដ្ឋពីរដោយសេរីភាព នោះទើបគ្រប់គ្រាន់។ វាល្អសម្រាប់ប្រជាជនទាំងសងខាង ទាំងសាសនា និងសម្រាប់តំបន់មជ្ឈិមបូព៌ាផងដែរ។ចៅក្រមតុលាការកំពូលរបស់អង្គការសហប្រជាជាតិ បានបង្គាប់ឱ្យអ៊ីស្រាអែល បញ្ឈប់ការវាយលុកដោយយោធារបស់ខ្លួនលើទីក្រុងRafah ភាគខាងត្បូងតំបន់ហ្កាហ្សា នៅក្នុងសេចក្តីសម្រេចបន្ទាន់មួយលើករណីនាំមកដោយប្រទេសអាហ្រ្វិកខាងត្បូង ដែលចោទប្រកាន់អ៊ីស្រាអែលពីបទប្រល័យពូជសាសន៍។ តុលាការ ក៏បានបង្គាប់ឱ្យអ៊ីស្រាអែលបើកច្រកឆ្លងកាត់ទីក្រុង Rafah រវាងអេហ្ស៊ីប និងតំបន់ហ្កាហ្សា ដើម្បីអនុញ្ញាតឲ្យមានការដឹកជញ្ជូនជំនួយមនុស្សធម៌ចូលទៅក្នុងតំបន់ហ៊ុមព័ទ្ធ។បាតុករ អ្នកស្រី អ៊ីមម៉ាន ខាសាណេ(Eman Khasawneh) បាននិយាយថាតុលាការយុត្តិធម៌អន្តរជាតិ (ICJ) គួរតែបង្គាប់ឱ្យមានបទឈប់បាញ់ ដែលការចេញសេចក្តីសម្រេចរបស់តុលាការនៅពេលនេះ មិនគ្រប់គ្រាន់នៅឡើយទេ។ យើងកោតសរសើរចំពោះការចេញសេចក្តីសម្រេចឲ្យបញ្ឈប់ប្រតិបត្តិការនៅទីក្រុង Rafah ប៉ុន្តែវាមិនទាន់គ្រប់គ្រាន់។អ៊ីស្រាអែល បានច្រានចោល ការចោទប្រកាន់ករណីប្រល័យពូជសាសន៍ ម្តងហើយម្តងទៀតថា ការចោទប្រកាន់នេះ «គ្មានមូលដ្ឋាន» ដោយលើកហេតុផលនៅក្នុងតុលាការថា ប្រតិបត្តិការរបស់ខ្លួននៅតំបន់ហ្កាហ្សា គឺជាការ ការពារខ្លួន និងបានដាក់គោលដៅតែទៅលើក្រុមសកម្មប្រយុទ្ធហាម៉ាស ដែលបានវាយប្រហារលើអ៊ីស្រាអែល កាលពីថ្ងៃទី ៧ ខែតុលា។

បណ្ដាញសង្គម

ព័ត៌មានថ្មីៗ

គណៈប្រតិភូរដ្ឋសភា អញ្ជើញដាក់កម្រងផ្កានៅវិមានឯករាជ្យ និងគោរពព្រះវិញ្ញាណក្ខន្ធ និងថ្វាយកម្រងផ្កា ព្រះបរមរូប ព្រះបរមរតនកោដ្ឋ ក្នុងឱកាសខួបលើកទី៧២ ទិវាឯករាជ្យជាតិ

ព្រះមហាក្សត្រ ប្រោសព្រះរាជទាន ព្រះរាជដំណាក់ចំនួន២ ធ្វើជាសារមន្ទីរជាតិ និងទុកជាសម្បត្តិបេតិកភណ្ឌជាតិ

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្រេចផ្តល់អំណោយមនុស្សធម៌ជូនប្រជាជនងាយរងគ្រោះបំផុតចំនួន ១.៧៨៣គ្រួសារ រស់នៅខេត្តរតនគិរី និងខេត្តមណ្ឌលគិរី ...!!

ឯកឧត្តម ហ៊ុន ម៉ានី អញ្ជើញដឹកនាំប្រតិភូ ស.ស.យ.ក. ដាក់កម្រងផ្កា និងថ្វាយបង្គំព្រះបរមរូប ព្រះបរមរតនកោដ្ឋ ក្នុងឱកាសខួបលើកទី ៧២ នៃទិវាបុណ្យឯករាជ្យជាតិ

អូស្ត្រាលីគាំទ្រវិស័យស្រូវអង្ករកម្ពុជា

អគ្គិភ័យឆេះឃ្លាំងទឹកអប់នៅភាគពាយ័ព្យប្រទេសទួរគី បណ្តាលឲ្យមនុស្សយ៉ាងតិច ៦នាក់ស្លាប់

ប្រឹក្សាយោធាជាន់ខ្ពស់EU និយាយថា គ្រូបណ្តុះបណ្តាលយោធាអឺរ៉ុប គួរតែជាផ្នែកមួយនៃការធានាសន្តិសុខអ៊ុយក្រែន

ទួរគីកំពុងរៀបចំច្បាប់ ដើម្បីអនុញ្ញាតឲ្យយុទ្ជជន PKK ត្រឡប់មកប្រទេសវិញ ក្រោមផែនការសន្តិភាព

កាសែត៖ អាមេរិកស្នើអ៊ីស្រាអែលឲ្យដោះលែងឲ្យយុទ្ធជនហាម៉ាសប្រហែល ១៥០នាក់ ដែលជាប់នៅក្នុង ផ្លូវរូងក្រោមដី នៅហ្កាហ្សា

ក្រសួងការពារជាតិកម្ពុជាបញ្ជាក់បន្ថែម ៦ ចំណុចអំពីវឌ្ឍនភាពការងារ ដោះមីនមនុស្សធម៌ក្នុងតំបន់អាទិភាពនៅព្រំដែនកម្ពុជា និងថៃ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877