នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
TOP STORY | សម្ដេចធិបតី បានចាត់វិធានការចាំបាច់​ជាបន្ត​បន្ទា​ប់ចំ​ពោះកា​រ​វិល​ត្រឡប់​ទ្រង់ទ្រាយ​ធំរ​បស់​ពលករ​ខ្មែរ និងជនភៀសសឹក
TOP STORY | សម្ដេចតេជោ៖ ពេលនេះ ខ្ញុំកំពុងតែរួមចំណែកបញ្ជាទ័ព តាមប្រព័ន្ធវីដេអូ និងប្រព័ន្ធផ្សេងទៀតជាមួយនាយករដ្ឋមន្ត្រី, រដ្ឋមន្ត្រីក្រសួងការពារជាតិ អគ្គមេបញ្ជាការកងទ័ព និងបញ្ជាការកងកម្លាំងប្រដាប់អាវុធគ្រប់លំដាប់ថ្នាក់
TOP STORY |សម្ដេចធិបតី ហ៊ុន ម៉ាណែត ដាក់លិខិតស្នើសុំ​​កោះប្រជុំក្រុមប្រឹក្សាសន្តិសុខជាបន្ទាន់ ដើម្បី​សុំ​ការ​អន្ត​រាគមន៍​បញ្ចប់​ការ​ឈ្លាន​ពាន​របស់​កង​ទ័ព​ថៃមក​លើដែនអធិបតេយ្យភាពរបស់កម្ពុជា
TOP STORY | សម្ដេចធិបតី៖ កងទ័ពថៃបានបើកការ​វាយប្រហារ​មក​លើ​ទីតាំង​ឈរ​ជើង​របស់​កង​ទ័ព​កម្ពុជា​ នៅប្រាសាទតាមាន់ធំ តាក្របី និងបានពង្រីកភូមិសាស្ត្រវាយប្រហារទៅដល់តំបន់មុំបី

នយោបាយ​ និង ការអភិវឌ្ឍន៍

ពលរដ្ឋក្នុងស្រុកចំនួនបីនៃខេត្តតាកែវ នឹងទទួលការចាក់វ៉ាក់សាំងដូសទី៣ នៅសប្ដាហ៍ក្រោយ

2021/11/10 04:31:07 pm        294
Facebook Telegram Linkin
តាកែវ ៖ អាជ្ញាធរខេត្តតាកែវ បានប្រកាសថា ចាប់ពីសប្ដាហ៍ក្រោយទៅ ប្រជាពលរដ្ឋក្នុងស្រុកចំនួនបី នឹងទទួលបានការចាក់វ៉ាក់សាំងដូសទីបី ឬដូសជំរុញ ។អាជ្ញាធរខេត្តតាកែវ នៅថ្ងៃនេះ បានចេញសេចក្ដីជូនដំណឹងដល់ប្រជាពលរដ្ឋ រស់នៅក្នុងស្រុកចំនួនបី គឺស្រុកបាទី ស្រុកសំរោង និងស្រុកត្រាំកក់ ស្ដីពីការចាក់វ៉ាក់សាំងការពារជំងឺកូវីដ-១៩ ដូសទី៣ ចាប់ពីថ្ងៃទី១៥ ខែវិច្ឆិកានេះតទៅ។បើយោងតាមសេចក្ដីជូនដំណឹងរបស់រដ្ឋបាលខេត្តតាកែវ ដំណើរការចាក់សាំងដូសទី៣ ជូន​ដល់​ប្រជាពលរដ្ឋនៅស្រុកទាំង៣ខាងលើ នឹងធ្វើឡើងនៅទីតាំងចំនួន ៣៥ កន្លែងដោយ​ក្នុងនោះ​ស្រុកបាទី​មាន​ចំនួន១០ទីតាំង​ ស្រុកសំរោង មានចំនួន១១ទីតាំង​ និងស្រុកត្រាំកក់ មានចំនួន១៤ទីតាំង។លោកវេជ្ជបណ្ឌិត នុត ស៊ីណាត ប្រធានមន្ទីរសុខាភិបាលខេត្តតាកែវ បានថ្លែងឲ្យដឹងថា ប្រជា​ពលរដ្ឋ ដែលត្រូវចាក់វ៉ាក់សាំងដូសទី៣ ដែលជាដូសជម្រុញ ​នៅក្នុងស្រុកទាំង៣ខាងលើនេះ មាន​ចំនួនប្រមាណ៣០ម៉ឺននាក់ ដោយអាជ្ញាធ​បាន​ជ្រើសរើស​ទីតាំង​វត្តចំនួន២១​នៅក្នុងស្រុកសំរោង និងស្រុកបាទី ធ្វើជាកន្លែងទីតាំង​សម្រាប់​ចាក់វ៉ាក់សាំង​ជូនប្រជាពលរដ្ឋ ​ដោយ​ឡែកស្រុកត្រាំកក់ អាជ្ញាធរ ​បានជ្រើសរើសមណ្ឌលសុខភាពចំ​នួន១៤ ​ធ្វើជាទីតាំងសម្រាប់ចាក់វ៉ាក់សាំងដូសទី៣ ជូនប្រជាពលរដ្ឋ។លោកប្រធានមន្ទីរសុខាភិបាលខេត្តតាកែវ ចំពោះប្រជាពលរដ្ឋរស់នៅក្នុងក្រុងស្រុកចំនួន៧ទៀត​នៅ​ក្នុងខេត្តតាកែវ ​អាជ្ញាធរ នឹងរៀបចំចាក់វ៉ាក់សាំងជូនដូសទី៣​ ដែល​ជាដូសជំរុញនៅក្នុងខែធ្នូ៕អត្ថបទ៖ គុជ វិភាគ

ឯកឧត្តម លី ធុជ ស្នើ UNDP បន្តផ្ដល់ជំនួយដើម្បីអភិវឌ្ឍកម្ពុជាឱ្យកាន់តែរីកចម្រើន

2021/11/10 04:20:40 pm        648
Facebook Telegram Linkin
ភ្នំពេញ ៖ ឯកឧត្តម លី ធុជ ទេសរដ្ឋមន្ត្រី និងជាអនុប្រធានទី១ អាជ្ញាធរមីនកម្ពុជា ទទួលបន្ទុកបេសកកម្មពិសេស បានស្នើដល់អង្គការ UNDP បន្តជួយផ្ដល់ជំនួយមនុស្សធម៌នានា ដល់កម្ពុជា ដើម្បីយកមកអភិវឌ្ឍន៍ប្រទេសជាតិ ឲ្យកាន់តែរីកចម្រើន រួមទាំងបន្តជួយគាំទ្រដល់វិស័យបោសសំអាតមីន ។ក្នុងជំនួបជាមួយលោកស្រី Alissar CHAKER ប្រធានអង្គការUNDP នៅថ្ងៃទី១០ ខែវិច្ឆិកា ឆ្នាំ២០២១ ឯកឧត្តម ទេសរដ្ឋមន្រ្តី លី ធុជ មានប្រសាសន៍ថា ក្នុងនាមរាជរដ្ឋាភិបាលកម្ពុជា​ បាន​ថ្លែង​អំណរ​គុណ និង​វាយ​តម្លៃខ្ពស់ ​ចំពោះ UNDP ចូលរួមគាំទ្រដល់ការងារអភិវឌ្ឍន៍នៅកម្ពុជា ក្នុងនោះ​បាន​ចូលរួមដល់​ការងារ​សកម្មភាពមីនមនុស្សធម៌ តាំងពីឆ្នាំ២០០៦ តាមរយៈគម្រោង​បោស​សម្អាតមីន ជា​លទ្ធផល​រហូត​មក​ដល់ពេលនេះ​ គឺជាការអនុវត្តគម្រោងដំណាក់កាលទី៤ ។ ឯកឧត្តមទេសរដ្ឋមន្ត្រី បានបន្ថែមថា ​ចាប់ពីឆ្នាំ២០០៦ ដល់ខែកញ្ញា ​ឆ្នាំ២០២១ គម្រោងនេះ​បាន ចូលរួម​បោស​សម្អាតផ្ទៃដីប្រមាណ​ ២៧៥គីឡូម៉ែត្រក្រឡា​ សម្រាប់​យកមកប្រើប្រាស់ ដើម្បី​បង្ក​បង្កើផល និង​សាងសង់​លំនៅឋាន ​ដោយ​សហគមន៍ដែលរងផលប៉ះពាល់ ​ព្រមទាំង​ បានរកឃើញ និង​កម្ទេច​គ្រាប់​មីន​ប្រឆាំង​មនុស្ស​ចំនួន ៧១ ៨៤៩គ្រាប់ ​មីនប្រឆាំងរថក្រោះចំនួន ​១ ៥១៥គ្រាប់ សំណល់​ជាតិ​ផ្ទុះ​ពី​សង្គ្រាម​ចំនួន ២១៤ ៥៤២ ​និងបានផ្តល់អត្ថប្រយោជន៍ដល់ប្រជាជនជនបទចំនួន ១ ០៧៨ ០២២នាក់ ដែល​ក្នុងនោះ ​៥០ភាគរយ ជា​អ្នកទទួលផលជាស្ត្រី ។ជាមួយគ្នា ឯកឧត្តម លី ធុជ បាន​សំណូមពរលោកស្រី​ Alissar CHAKER បន្ត​ជួយ​កៀរគរ​ធនធាន​បន្ថែម​ពី​សហគមន៍​ផ្តល់​ជំនួយ និងដៃគូអភិវឌ្ឍន៍ ​ដើម្បីចូលរួមជាមួយ​រាជ​រដ្ឋាភិបាល​កម្ពុជា ក្នុង​ការ​លើក​កម្ពស់​ជីវភាព​រស់​នៅរបស់ពលរដ្ឋមូលដ្ឋាន​ ការជួយសង្រ្គោះជីវិតប្រជាជន និងផ្តល់ដីមាន​សុវត្ថិភាព​តាមរយៈការ​ចូល​រួម​បោស​សម្អាត​មីនមនុស្សធ​ម៌ នៅកម្ពុជា ។ក្នុងឱកាសនោះ លោកស្រី Alissar CHAKER បានបង្ហាញពីសេចក្តីសប្បាយរីករាយ​ ដែលបាន​ចូល​រួម​ធ្វើការ ​ជាមួយរាជរដ្ឋាភិបាលកម្ពុជា​ ព្រមទាំង​បាន​តាំង​ចិត្តបន្តជួយគាំទ្រដល់ ​រាជរដ្ឋាភិបាល ក្នុង​ការងារ​បោស​សម្អាតមីនមនុស្សធម៌​ ឈានឆ្ពោះទៅរកការបញ្ចប់ការ​គម្រាមកំហែង​ដោយសារមីន ឆ្នាំ២០២៥​ ខាងមុខនេះ ៕អត្ថបទ បាន សុខរិទ្ធិ 

ប្រមុខការពារជាតិកម្ពុជា ៖ សន្តិភាព និងស្ថិរភាពនយោបាយជាមូលដ្ឋានធំ​សម្រាប់ពង្រឹង​វិបុលភាព​អាស៊ីអាគ្នេយ៍

2021/11/10 02:22:47 pm        405
Facebook Telegram Linkin
ភ្នំពេញ ៖ សម្តេចពិជ័យសេនា ទៀ បាញ់ បានលើកឡើងថា សន្តិភាព និងស្ថិរភាពនយោបាយ គឺជាមូលដ្ឋានដែលមិនអាចកាត់ថ្លៃបាន ក្នុងការពង្រឹងវិបុលភាព និងចីរភាពក្នុងតំបន់អាស៊ីអាគ្នេយ៍ ហើយប្រទេសជាសមាជិកអាស៊ាន គប្បីត្រូវធ្វើការពិភាក្សាគ្នាឲ្យបានម៉ត់ចត់បន្ថែមទៀត ។ក្នុងកិច្ចប្រជុំតាមរយៈវីដេអូពីចម្ងាយនៅថ្ងៃទី១០ ខែវិច្ឆិកានេះ ក្នុងកិច្ចប្រជុំចង្អៀតរដ្ឋមន្ត្រី​ការពារជាតិ​អាស៊ាន (ADMM Retreat) កិច្ចប្រជុំក្រៅផ្លូវការរដ្ឋមន្ត្រីការពារជាតិអាស៊ាន-សាធារណរដ្ឋកូរ៉េ និង​កិច្ចប្រជុំ​ក្រៅផ្លូវការរដ្ឋមន្ត្រីការពារជាតិអាស៊ាន-អូស្ត្រាលី ដែលប្រទេសប្រុយណេ ធ្វើជាម្ចាស់ផ្ទះ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា​ បានបញ្ជាក់ថា «សន្តិភាព និងស្ថិរភាពនយោបាយ ​គឺជាមូលដ្ឋានដែលមិនអាចកាត់ថ្លៃបាន ​ក្នុងការពង្រឹងវិបុលភាព និងចីរភាព តំបន់ អាស៊ីអាគ្នេយ៍។ បើសិនណាមិនមានសន្តិភាព​ និងស្ថិរភាពនោះទេ ប្រទេសនៅ​ក្នុងតំបន់​ក៏ប្រហែលជាមិនបានទទួលនូវការអភិវឌ្ឍ​ និងវិបុលភាពនោះដែរ។សម្តេចពិជ័យសេនា ទៀ បាញ់ បានបន្ដថា ការប្រកួតប្រជែងផ្នែកភូមិសាស្ត្រនយោបាយ និងភូមិសាស្ដ្រយុទ្ធសាស្រ្ត នាពេលបច្ចុប្បន្ន អាចនឹងប៉ះពាល់ដល់សន្តិភាព​ និងស្ថិរភាពតំបន់ អាស៊ានត្រូវតែធ្វើការពង្រឹង​ប្រពៃណី នៃការធ្វើកិច្ចសហប្រតិបត្តិការពហុភាគី ជាមួយ​នឹងដៃគូ​ខាងក្រៅ ដោយផ្អែកលើការ​ឯកភាព​ខាងក្នុង និងតួនាទីជាស្នូលរបស់អាស៊ាននោះ»។ប្រមុខការពារជាតិកម្ពុជា បានបញ្ជាក់បន្ថែមទៀតថា​ កម្ពុជាសូមស្វាគមន៍ ចំពោះគំនិតផ្តួចផ្តើម​ប្រកប​ដោយភាពបើកចំហ បរិយាបន្ន និងតម្លាភាព ​និងដែលមានគោលដៅច្បាស់លាស់ ក្នុងការ​លើក​កម្ពស់​កិច្ចសហប្រតិបត្តិការជាក់ស្តែង ​សន្តិភាពប្រកបដោយចីរភាព ​និងការអភិវឌ្ឍនៅក្នុងតំបន់។ ការវិវត្តនៃស្ថានភាពសន្តិសុខនាពេលថ្មីៗនេះ​ គឺទាមទារឱ្យមានការពិភាក្សាគ្នាយ៉ាងម៉ត់ចត់ និងចែករំលែក​ការយល់ដឹងក្នុងចំណោមរដ្ឋសមាជិកអាស៊ាន។ដោយសារតែការលេចឡើងនូវសម្ព័ន្ធការពារជាតិនាពេលថ្មីៗនេះ បានបង្កឱ្យមានការកង្វល់​ចំពោះ​ការកើនឡើង​នៃការប្រកួតប្រជែងភូមិសាស្ត្រនយោបាយ និងលទ្ធភាពនៃការប្រណាំងប្រជែង​សព្វាវុធ​នៅក្នុងតំបន់។ជាមួយគ្នានោះដែរ សម្តេចពិជ័យសេនាទៀ បាញ់ ក៏បានអំពាវនាវដល់រដ្ឋជាសមាជិកអាស៊ាន​ទាំង​អស់ ​គប្បីធ្វើការពិចារណាក្នុងការ​ដាក់បញ្ចូល ​បញ្ហាប្រែប្រួល​អាកាសធាតុ ទៅក្នុងយន្តការ​សហប្រតិបត្តិការអាស៊ាន ដើម្បី​កសាង​ភាពធន​របស់​កងកម្លាំងប្រដាប់អាវុធ និងកាត់​បន្ថយ​ផល​ប៉ះពាល់នៃបញ្ហាប្រឈមអាកាសធាតុ ដោយបញ្ហាគ្រោះ​មហន្តរាយធម្មជាតិ និងការប្រែប្រួល​អាកាស​ធាតុនេះ គឺមានការពាក់ព័ន្ធគ្នា ខណៈកងកម្លាំងប្រដាប់អាវុធនៃគ្រប់បណ្តា​ប្រទេស​អាស៊ាន​ទាំងអស់ ក៏បានដើរតួនាទីយ៉ាងសំខាន់ក្នុងការ ផ្តល់​ជំនួយមនុស្សធម៌ ការជួយ​ជម្លៀស​ប្រជាជន​ទៅ​កាន់ទីសុវត្ថិភាព ​និងការពារ​សន្តិសុខជាដើម៕អត្ថបទ ៖ បាន ចក់

ក្រសួងវប្បធម៌ នឹងរៀបចំព្រឹត្តិការណ៍សិល្បៈដ៏ធំមួយឈ្មោះថា «រាត្រីចងចាំឆ្នាំ២០២១» តាមប្រព័ន្ធអនឡាញ

2021/11/10 01:38:34 pm        470
Facebook Telegram Linkin
ភ្នំពេញ ៖ នៅថ្ងៃទី២៨ ខែវិច្ឆិកា ឆ្នាំ២០២១ នាពេលខាងមុខនេះ ក្រសួងវប្បធម៌ និងវិចិត្រសិល្បៈ នឹងរៀបចំព្រឹត្តិការណ៍សិល្បៈដ៏ធំមួយឈ្មោះថា «រាត្រីចងចាំឆ្នាំ២០២១» តាមប្រព័ន្ធអនឡាញ ដើម្បីអបអរសាទរសម្បត្តិបេតិកភណ្ឌវប្បធម៌រូបី និងអរូបីត្រូវបានចុះក្នុងបញ្ជីបេតិកភណ្ឌពិភពលោក និងបេតិកភណ្ឌអរូបីនៃមនុស្សជាតិ ពិសេសអបអរសាទរខួប៣ឆ្នាំ នៃការដាក់បញ្ជូលល្ខោនខោលកម្ពុជា ចូលជាសម្បត្តិបេតិកភណ្ឌវប្បធម៌អរូបី នៃមនុស្សជាតិ។ឯកឧត្តម ហ៊ឺ វីរៈ រដ្ឋលេខាធិការក្រសួងវប្បធម៌ និងវិចិត្រសិល្បៈ និងជាប្រធានក្រុមការងាររៀបចំ​ព្រឹត្តិការណ៍នេះ មានប្រសាសន៍ថា ព្រឹត្តិការណ៍សិល្បៈនេះ ក្រៅពីមានការសម្តែងនូវ​ទស្សនីយភាព​សិល្បៈចម្រុះទាំងបុរាណ ​និងសម័យ ​គឺមានការសម្តែង ​ល្ខោនខោល ក្នុងគោលបំណងចង់ឱ្យ​សាធារណជនជាតិ និងអន្តរជាតិ បានឃើញកាន់តែច្បាស់អំពីកិត្យានុភាពនៃវប្បធម៌ជាតិខ្មែរ ខណៈដែល​ល្ខោនខោលសហគមន៍វត្តស្វាយ ​តំណាងឱ្យល្ខោនខោលកម្ពុជា ត្រូវបាន​ទទួល​ស្គាល់​ដោយអង្គការ ​យូណេស្កូ (UNESCO) អស់រយៈពេល៣ឆ្នាំកន្លងទៅ ក្នុងការចុះបញ្ជីជាសម្បត្តិ​បេតិកភណ្ឌ​វប្បធម៌ អរូបីនៃមនុស្សជាតិ។ ព្រឹត្តិការណ៍ដ៏មានសារៈសំខាន់នេះ​ នឹងមានការផ្សាយផ្ទាល់តាមរយៈផេកផ្លូវការរបស់ ក្រសួង​វប្បធម៌ និងវិចិត្រសិល្បៈ និងតាមបណ្តាស្ថានីយទូរទស្សន៍-សារព័ត៌មាន-បណ្តាញទំនាក់ទំនងសង្គម មួយចំនួន ដែលនឹងរួមគ្នាផ្សព្វផ្សាយឱ្យកាន់តែទូលំទូលាយ​ ដើម្បីឱ្យពិភពលោក នឹងបានឃើញ​ពី​តម្លៃល្ខោន​ ខោលកម្ពុជា​ ដែលជាតម្លៃនៃមនុស្សជាតិ ហើយនេះក៏ជាបំណងដែលយើងគ្រប់គ្នា​ចង់បាន។ ឯកឧត្តម ក៏បានអំពាវនាវឱ្យប្រជាជនខ្មែរ ជាពិសេសយុវជនបន្តសកម្មភាពគាំទ្រឱ្យបានកាន់តែ​ខ្លាំងខ្លា​បន្ថែមទៀត ​ដើម្បីថែរក្សា សម្បត្តិបេតិកភណ្ឌវប្បធម៌ដ៏សម្បូរបែបដែលដូនតាខ្មែរ​យើង​បន្សល់​ទុកឱ្យនៅបានយូរអង្វែងទៅមុខទៀត។ជាមួយគ្នានោះដែរឯកឧត្តម ទិត ថាវរិទ្ធ អនុរដ្ឋលេខាធិការ និងជាអនុប្រធានក្រុមការងារ​អចិន្រ្តៃយ៍​ទទួល​បន្ទុករៀបចំព្រឹត្តិការណ៍​ និងជាប្រធានក្រុមការងារបច្ចេកទេស​រៀបចំព្រឹត្តិការណ៍ និង​សិល្បទស្សនីយភាព​ បានបញ្ជាក់ទៀតថា​ នេះជាលើកទី២ហើយ​ ដែលក្រសួងវប្បធម៌ និង​វិចិត្រសិល្បៈ បានរៀបចំនូវព្រឹត្តិ្កការណ៍នេះឡើង បន្ទាប់ពីបានរៀបចំនូវព្រឹត្តិការណ៍រាត្រី​ចងចាំ​លើកទី១ ​នៅលើទឹកដីអង្គរខេត្តសៀមរាប ដែលមានអ្នកចូលរួមទស្សនា​ដោយផ្ទាល់​ប្រមាណជាង​២ម៉ឺននាក់។ ប៉ុន្តែឆ្នាំ២០២១នេះ ​ដោយសារបញ្ហាជំងឺកូវីដ-១៩ ​ដែលជាបញ្ហាសាកល ទើប​ព្រឹត្តិការណ៍​​រាត្រីចងចាំឆ្នាំ២០២១ ពុំត្រូវបានរៀបចំសម្តែងដោយផ្ទាល់នៅទីកន្លែង​សារធារណៈ ឬក្នុងតំបន់ទេសចរណ៍ណាមួយនោះទេ មានន័យថា ទិដ្ឋភាព សោភណ្ឌភាព បច្ចេកទេសនៃការ សម្តែងគឺបានបង្ហាញពីរសជាតិថ្មី ​តាមបរិបទថ្មីនៃប្រព័ន្ធបច្ចេកវិទ្យា(អនឡាញ)។ឯកឧត្តម ទិត ថាវរិទ្ធ បានសង្កត់ធ្ងន់ថា ​ព្រឹត្តិការណ៍នេះ គឺមានសិល្បករ សិល្បការិនី ​នាដកា តន្រ្តីករ និងតារាសម្តែងល្បី សរុបប្រមាណជិត២០០នាក់ ​បានស្ម័គ្រចិត្តចូលរួមសម្តែង ដោយបង្ហាញពីការ​ពេញចិត្ត និងក្តីស្រលាញ់ពីបេះដូង ​ដែលនេះបង្ហាញពីឆន្ទៈ នៃយុវជនប្រតិបត្តិវិស័យ ដើម្បីរួមគ្នា​លើកស្ទួយមរតកវប្បធម៌ជាតិ។ ឯកឧត្តម ក៏បានបញ្ជក់ផងដែរថា ថ្វីត្បិតរាជរដ្ឋាភិបាលបានប្រកាសបើកប្រទេសឡើងវិញ​លើ​គ្រប់​វិស័យក៏ពិតមែន​ តែសិល្បករ​ សិល្បការិនី បានរៀនរស់នៅដោយចេះសម្របខ្លួន​តាម​គន្លង​ប្រក្រតីភាពថ្មី ​ស្របតាមវិធានការណ៍របស់ក្រសួងសុខាភិបាល៕អត្ថបទ រដ្ឋា

ពលរដ្ឋនៅរាជធានីភ្នំពេញបន្តទៅពិនិត្យឈ្មោះ និងចុះឈ្មោះបោះឆ្នោតជ្រើសរើសក្រុមប្រឹក្សាឃុំ

2021/11/10 01:16:37 pm        374
Facebook Telegram Linkin
ភ្នំពេញ ៖ ពលរដ្ឋរស់នៅក្នុងរាជធានីភ្នំពេញ នៅថ្ងៃទី១០ ខែវិច្ឆិកានេះ បន្តទៅពិនិត្យឈ្មោះ និងចុះឈ្មោះបោះ ឆ្នោតជ្រើសរើសក្រុមប្រឹក្សាឃុំ/សង្កាត់ អាណិត្តទី៥ ដែលនឹងប្រព្រឹត្តិទៅនៅថ្ងៃទី០៥ ខែមិថុនា ឆ្នាំ២០២២ ខាងមុខនេះ។ជាការយល់ឃើញរបស់ប្រជាជពលរដ្ឋ រស់នៅក្នុងរាជធានីភ្នំពេញ នាថ្ងៃទី១០ ខែវិច្ឆិកានេះ បាន ប្រាប់BTVឲ្យដឹងថា ការពិនិត្យឈ្មោះ និងចុះឈ្មោះបោះឆ្នោត ​ពិតជាមានសារសំខាន់ណាស់ សម្រាប់ការ ជ្រើសរើសថ្នាក់ដឹកនាំ ​ដែលមានសមត្ថភាព និងគិតគូរពីសុខទុក្ខប្រជាជនពលរដ្ឋ។ ក្រៅពីនេះ ពួកគេ បានអំពាវនាវដល់ពលរដ្ឋ ដែលមិនទាន់មានឈ្មោះក្នុងបញ្ជីបោះឆ្នោត សូមទៅចុះឈ្មោះបោះឆ្នោតឲ្យបាន គ្រប់គ្នាៗ។យោងតាមរបាយការណ៍របស់គណៈកម្មាធិការជាតិរៀបចំការបោះឆ្នោតដែលហៅកាត់ថា គ.ជ.ប បានបង្ហាញថា ​គិតចាប់ពីថ្ងៃដំណើរការចុះឈ្មោះបោះឆ្នោតរហូតដល់ថ្ងៃទី៩​ ខែវិច្ឆិកានេះ ពលរដ្ឋជាង៣១ ម៉ឺននាក់ ​បានមកចុះឈ្មោះបោះឆ្នោតថ្មី។នៅឆ្នាំ២០២១នេះ គ.ជ.ប ចាប់ផ្តើមពិនិត្យបញ្ជីឈ្មោះ និងការចុះឈ្មោះបោះឆ្នោត​ ចាប់ពីថ្ងៃទី១២ ខែតុលា រហូតដល់ថ្ងៃទី៣០ ខែវិច្ឆិកា ឆ្នាំ២០២១។ ដំណើរនេះ នឹងធ្វើឡើងរៀងរាល់ថ្ងៃ រួមទាំង​ថ្ងៃសៅរ៍ និងថ្ងៃអាទិត្យ ដែលពេលព្រឹក ចាប់ពីម៉ោង៧៖០០នាទី ដល់ម៉ោង១១៖៣០នាទី និងពេលរសៀល ចាប់ពី ម៉ោង២៖០០នាទី ដល់ម៉ោង៥៖៣០នាទី នៅតាមសាលាឃុំ-សង្កាត់ និងទីតាំងមួយចំនួនទៀតក្នុងឃុំ-សង្កាត់។ ដើម្បីចុះឈ្មោះបោះឆ្នោតបាន ប្រជាពលរដ្ឋមានសញ្ជាតិកម្ពុជាទាំងពីរភេទ ត្រូវមានអាយុយ៉ាង តិចពី១៨ឆ្នាំឡើងទៅ និងមានឯកសាព័ន្ធផ្សេងៗមួយចំនួនទៀត។តាមការប៉ាន់ស្មានរបស់គ.ជ.ប ពលរដ្ឋ ដែលមានអាយុពី១៨ឆ្នាំឡើងទៅ មិនទាន់​មានឈ្មោះក្នុង​បញ្ជី​បោះឆ្នោតថ្មី មានចំនួនជាង១លាន នាក់។ សម្រាប់ដំណើការការបោះឆ្នោតជ្រើសរើស​ក្រុម​ប្រឹក្សាឃុំ/សង្កាត់ អាណិត្តទី៥ នឹងប្រព្រឹត្តិទៅនៅថ្ងៃ ទី០៥ ខែមិថុនា ឆ្នាំ២០២២៕អត្ថបទ៖ ទូច សោភ័ណ 

ក្រសួងទេសចរណ៍ និង ស.ស.យ.ក អនុវត្តកម្មវិធីបណ្តុះបណ្តាលអក្ខរកម្មឌីជីថលទ្រទ្រង់​ការងើប​ឡើងវិញ នៃវិស័យទេសចរណ៍

2021/11/10 12:54:21 pm        258
Facebook Telegram Linkin
ភ្នំពេញ ៖ ក្រសួងទេសចរណ៍ និងសហភាពសហព័ន្ធយុវជនកម្ពុជា និងមជ្ឈមណ្ឌលកម្ពុជា ៤.០ បាន​ប្រកាស​ដាក់​ប្រើប្រាស់​អនុវត្តកម្មវិធីបណ្តុះបណ្តាលអក្ខរកម្ម ​ឌីជីថល ក្នុង​វិស័យទេសចរណ៍កម្ពុជា អម​ជាមួយ​ការ​ប្រគល់​វិញ្ញាបនបត្រ​ជូន​សិក្ខាកាមផងដែរ។ ក្នុង​ពិធីប្រកាស​ដាក់​ប្រើប្រាស់នេះ រដ្ឋមន្ត្រីក្រសួងទេសចរណ៍​ ថ្លែងថា បច្ចុប្បន្ន ​អក្ខរកម្ម​ឌីជីថល កំពុងមានតម្រូវការចាំបាច់ដើម្បីទ្រទ្រង់ដល់ការងើបឡើងវិញ ​នៃ​វិស័យ​ទេសចរណ៍​កម្ពុជា​ពី​វិបត្តិ​ជំងឺ​កូវីដ-១៩។ឯកឧត្តម ថោង ខុន រដ្ឋមន្ត្រីក្រសួងទេសចរណ៍ មានប្រសាសន៍ថា តាមវគ្គ​បណ្តុះ​បណ្តាល​អក្ខរកម្មឌីជីថល ​ជូន​យុវជន​ទូទៅ​ បុគ្គលិកឯកជន​ ម្ចាស់អាជីវកម្មក្នុងវិស័យ​ទេសចរណ៍ ក៏ដូចជា​សម្រាប់មន្ត្រីទេសចរណ៍ទាំងថ្នាក់ជាតិ​ និង​ថ្នាក់​ក្រោមជាតិ​ អោយ​មាន​ជំនាញនេះ នឹងជួយ​ទ្រទ្រង់​ដល់ការងើបឡើងវិញនៃវិស័យទេសចរណ៍​កម្ពុជា​ពី​វិបត្តិ​ជំងឺ​កូវីដ-១៩ និងធានាបានឧត្តមភាពប្រកួត​ប្រជែង​នៃវិស័យទេសចរណ៍ជាតិ តាមរយៈការទាញយកសក្តានុពលពី​ការ​ប្រើប្រាស់​បច្ចេកវិទ្យា បំរើ​ដល់ការគ្រប់គ្រង និងការអភិវឌ្ឍ នៅក្នុងពេលបច្ចុប្បន្ន ​និងទៅអនាគត ស្របតាម​បរិបទ​នៃ​បដិវត្តន៍​ឧស្សាហកម្ម ៤.០។ឯកឧត្តម ហ៊ុន ម៉ានី ប្រធានគណៈកម្មការអប់រំ យុវជន កីឡា ធម្មការកិច្ចការសាសនា វប្បធម៌ និងទេសចរណ៍​នៃ​រដ្ឋសភាព​ និងក្នុងនាមជាប្រធានសហភាពសហព័ន្ធយុវជនកម្ពុជា​ បានថ្លែងថា ដើម្បីចូលរួម​ជម្រុញចលនាទេសចរណ៍ ​និង​ការផ្តល់​សេវាទេសចរណ៍នៅកម្ពុជា មានភាព​ល្អប្រសើរ​និងមានភាពទាក់ទាញថែមទៀត គឺយើង​ពឹងផ្អែកខ្លាំង​ នឹង​ការ​សម្របខ្លួន ដោយ​បំផុស​ចលនាឱ្យប្រជាពលរដ្ឋគ្រប់រូបដែលជាកោសិកាសង្គម-សេដ្ឋកិច្ច ​ត្រូវស្រូប​យក​ និង​សម្រប​ខ្លួន ទៅ​នឹងបច្ចេកវិទ្យាថ្មីៗ​ តាមរយៈចូលរួមវគ្គបណ្តុះបណ្តាលអក្ខរកម្ម ​និងអាចស្វែងរកធនធានបន្ថែម​ ដែល​មាន​នៅ​លើ​អ៊ីនធឺណិត។ឯកឧត្តម ហ៊ុន ម៉ានី បន្តថា ដើម្បីទទួលបានធនធាន​ជំនាញឌីជីថលក្នុងវិស័យទេសចរណ៍នេះ គឺ​យើង​ត្រូវ​បន្ត​ពង្រឹង​ការ​បណ្តុះ​បណ្តាលផ្នែកវិទ្យាសាស្ត្រ ​និងបច្ចេកវិទ្យា ចាប់ពីការសិក្សា​នៅ​កម្រិត​មូលដ្ឋាន មធ្យម​សិក្សាទុតិយភូមិ, និង​បន្ត​ពង្រឹង​កិច្ចសហការរវាងស្ថាប័នរដ្ឋ ​ជាមួយវិស័យឯកជន និងគ្រឹះស្ថានអប់រំ ​ទាំងសាលាចំណេះទូទៅ​ សាលាវិជ្ជាជីវៈ ​និង​សាកលវិទ្យាល័យ ដើម្បី​បញ្ចូល​ការអប់រំ​ផ្នែកបច្ចេកវិទ្យា​ និងវិទ្យាសាស្ត្រ ​នៅក្នុងការបណ្តុះបណ្តាល ​ការតម្រង់ទិស និង​ការ​ពង្រឹងសមត្ថភាព។បើតាមឯកឧត្តម អាំង សុវណ្ណរ័ត្ន នាយកប្រតិបត្តិមជ្ឈមណ្ឌលកម្ពុជា៤.០ ថ្លែងថា មកដល់​បច្ចុប្បន្ននេះ ​បានបណ្តុះ​បណ្តាល​អក្ខរកម្ម​ឌីជីថល និងជំនាញឌីជីថលក្នុងវិស័យទេសចរណ៍ជូន​យុវជនបានចំនួនប្រមាណជា៤០០០នាក់ លើ​មុខ​វិជ្ជាជាង ៤៧ ហើយបច្ចុប្បន្នយើង​ក៏កំពុង​បន្តការ​បណ្តុះ​បណ្តាល​យុវជនផ្សេងៗជាច្រើនទៀត៕អត្ថបទ ស៊ុម សុខជា

កម្ពុជា​បន្ត​រក​ឃើញ​មនុស្ស​ ៦៥នាក់​​ឆ្លង​កូវីដ-១៩​ ខណៈ​​អ្នក​ជំងឺ​៦៨នាក់​ទៀត​ ត្រូវ​បាន​​ព្យាបាល​ជា​សះ​ស្បើយ

2021/11/10 12:05:43 pm        182
Facebook Telegram Linkin
ភ្នំពេញ ៖ ក្រសួង​សុខាភិបាល​នៅថ្ងៃនេះ បាន​ប្រកាស​​ថា​ កម្ពុជា​បន្ដ​រក​ឃើញ​មនុស្ស​ចំនួន​៦៥នាក់​បន្ថែម​ទៀត ឆ្លង​មេរោគ​កូវីដ-១៩​ ខណៈអ្នក​ជំងឺ​កូវីដ​ចំនួន ៦៨នាក់​ទៀត​ ត្រូវ​បាន​ព្យាបាល​ជា​សះ​ស្បើយ។ក្នុង​សេចក្ដី​ប្រកាស​ព័ត៌មាន​​របស់​​ខ្លួន​នៅ​ថ្ងៃ​នេះ ​ក្រសួង​សុខាភិបាល​បាន​​បញ្ជាក់​ថា ករណី​ឆ្លង​ថ្មី​ដល់​ទៅ​ចំនួន ៥៨នាក់ សុទ្ធ​តែ​ពាក់​ព័ន្ធ​នឹង​ព្រឹត្តិការណ៍​សហគមន៍២០​កុម្ភៈ ហើយ៧នាក់​ទៀត គឺ​ជា​ករណី​នាំ​ចូល។ក្រសួង​សុខាភិបាល ​ក៏​បាន​ប្រកាស​ផង​ដែរ​ថា មនុស្ស៥នាក់​បន្ថែម​ទៀត បាន​ស្លាប់​​​ដោយ​សារ​ជំងឺ​កូវីដ-១៩ ដែល​នាំ​ឱ្យ​តួលេខ​អ្នក​ស្លាប់​សរុប​ឡើង​ដល់ ២ ៨៤៥នាក់​គិត​ចាប់​តាំង​ពី​កម្ពុជា​ប្រកាស​ពី​ករណី​ស្លាប់​លើក​ដំបូង​ជា​ផ្លូវការ​ នាពេល​កន្លង​មក។បើ​តាម​ក្រសួង​សុខាភិបាល អ្នក​ជំងឺ​កូវីដ-១៩​សរុប ១១៥ ៦៥៩នាក់​ហើយ ត្រូវ​បាន​ព្យាបាល​ជា​សះ​ស្បើយ ក្នុង​នោះ​មាន​ទាំង​អ្នក​ជា​សះ​ស្បើយ​ថ្មី​ ដែល​ក្រសួង​ប្រកាស​នៅ​ថ្ងៃ​នេះ​ផង​ដែរ។គិត​ត្រឹម​ថ្ងៃ​នេះ កម្ពុជា​រក​ឃើញ​មនុស្ស​សរុប​ដល់​ទៅ ១១៩ ២៩២ នាក់​ហើយ បាន​ឆ្លង​មេរោគ​កូវីដ-១៩​នៅ​ទូទាំង​ប្រទេស​ចាប់​តាំង​ពី​កម្ពុជា​រក​ឃើញ​ករណី​ឆ្លង​ដំបូង​កាល​ពី​ចុង​ខែ​មករា​ឆ្នាំ​២០២០​កន្លង​មក​៕

ព្រះមហាក្សត្រ ស្តេចយាងទៅចូលរួមមហាសន្និបាតលើកទី៤១ របស់អង្គការយូណេស្កូ នៅប្រទេសបារាំង

2021/11/10 05:34:35 am        431
Facebook Telegram Linkin
សូមចុច Join Channel Telegram BTV News ដើម្បីទទួលព័ត៌មានថ្មីៗភ្នំពេញ ៖ តបតាមការយាងរបស់លោកជំទាវ អូដ្រេយ អាហ្សូឡេយ (Audrey Azoulay) អគ្គនាយិកានៃអង្គការអប់រំ វិទ្យាសាស្ត្រ និងវប្បធម៌របស់អង្គការសហប្រជាជាតិ (យូណេស្កូ) ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ស្តេចយាងចាកចេញពីកម្ពុជាហើយ នៅព្រឹកថ្ងៃទី១០វិច្ឆិកានេះ ដើម្បីទៅចូលរួមក្នុងមហាសន្និបាតលើកទី៤១ របស់អង្គការយូណេស្កូ ក្នុងឱកាសខួបលើក ទី៧៥នៃអង្គការនេះ ដែលនឹងប្រព្រឹត្តទៅនៅទីក្រុងប៉ារីស សាធារណរដ្ឋបារាំង ពីថ្ងៃទី ១០ ដល់ថ្ងៃ ទី ១៤ ខែវិច្ឆិកា ឆ្នាំ២០២១។នៅថ្ងៃទី១២ ខែវិច្ឆិកា ឆ្នាំ២០២១ ជាមួយនឹងវត្តមានរបស់ប្រមុខរដ្ឋ និងរដ្ឋាភិបាលជាច្រើនរូប ព្រះករុណា ព្រះបាទ សម្តេចព្រះបរមនាថ នរោត្តម សីហមុនី នឹងថ្លែងព្រះរាជសុន្ទរកថា នៅ​ក្នុង​ពិធីបើកសម័យប្រជុំជាផ្លូវការនៃមហាសន្និបាត​ ដោយផ្តោតលើសមិទ្ធផល សំខាន់ៗ​នៃអង្គការ​យូណេស្កូ ​នៅក្នុងប្រទេសកម្ពុជា។ចាប់តាំងពីត្រូវបានបង្កើតឡើងនៅឆ្នាំ១៩៤៥ អង្គការ យូណេស្កូ បានរួមចំណែកយ៉ាងសំខាន់ ដល់​ការលើកតម្កើងវិស័យអប់រំ វិទ្យាសាស្ត្រ វប្បធម៌​ និងការប្រាស្រ័យទាក់ទងគ្នា ​នៅក្នុងពិភពលោក តាមរយៈកម្មវិធីកិច្ច​សហប្រតិបត្តិការពហុភាគី។វត្តមានអញ្ជើញដង្ហែអង្គព្រះមហាក្សត្រដល់អាកាសយានដ្ឋានអន្តរជាតិភ្នំពេញ មានវត្តមានថ្នាក់​ដឹកនាំ​ជាន់ខ្ពស់គឺសម្តេចវិបុលសេនាភក្តី ប្រធានព្រឹទ្ធសភា,សម្តេចពញាចក្រី ប្រធានរដ្ឋសភា សម្តេចតេជោ នាយករដ្ឋមន្ត្រី ព្រមជាមួយវត្តមានសម្តេច​ ឯកឧត្តម លោកជំទាវ ជាថ្នាក់ដឹកនាំ​ជាឥស្សរជនសំខាន់ៗ មួយចំនួនទៀត។ បើតាមព្រះរាជសាររបស់ព្រះករុណាចុះថ្ងៃទី៤វិច្ឆិកា ព្រះអង្គបានសូមព្រះអនុញ្ញាត និងអនុញ្ញាត​ពី​សម្តេចព្រះមហាសង្ឃរាជ​ ទាំងពីរគណៈ និង​ព្រះថេរានុត្ថេរៈ​គ្រប់ព្រះអង្គ ​សម្តេច ឯកឧត្តម លោកជំទាវ អស់លោក លោកសី លោកតា លោកយាយ មាមីង បងប្អូន ក្មួយៗជនរួមជាតិទាំងអស់ អវត្តមានពីមាតុប្រទេស​ ចាប់ពី ថ្ងៃទី១០ ដល់ថ្ងៃទី១៥ ខែវិច្ឆិកា ឆ្នាំ២០២១ ដើម្បីចូលរួម​ក្នុង​ពិធី​បើក​សម័យប្រជុំមហាសន្និបាត ​លើកទី៤១ ក្នុងឱកាសបុណ្យខួបទី៧៥ នៃអង្គការយូណេស្កូ នៅសាធារណរដ្ឋបារាំង ។នៅក្នុងឱកាសអវត្តមានរបស់ព្រះអង្គខាងលើនេះ ​សម្តេចវិបុលសេនា ភក្តី សាយ ឈុំ ប្រធានព្រឹទ្ធសភា ​នឹងទទួលជួយព្រះអង្គ ក្នុងឋានៈជាប្រមុខរដ្ឋស្តីទីនៃព្រះរាជាណាចក្រកម្ពុជា ។ នៅរសៀលថ្ងៃទី១១ ខែ វិច្ឆិកា ឆ្នាំ២០២១​ សម្តេចប្រមុខរដ្ឋ ស្តីទី នឹងអញ្ជើញជាព្រះរាជតំណាង​របស់​ព្រះអង្គ ក្នុងពិធីពន្លត់ទៀនជ័យ​ នៃទិវាបុណ្យឯករាជ្យជាតិ នៅវិមានឯករាជ្យ ៕អត្ថបទ មុត សុទ្ធ

រដ្ឋមន្រ្តីការបរទេសកម្ពុជាជួបពិភាក្សាការងារជាមួយឧបការីអគ្គលេខាធិការអង្គការសហប្រជាជាតិ

2021/11/10 11:50:30 am        212
Facebook Telegram Linkin
ភ្នំពេញ ៖ ឯកឧត្តម ឧបនាយករដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេស បានអញ្ជើញជួបពិភាក្សាការងារជាមួយឧបការីអគ្គលេខាធិការអង្គការសហប្រជាជាតិ។ដូចការគ្រោងទុក នៅថ្ងៃទី១០ ខែវិច្ឆិកា ឆ្នាំ២០២១នេះ ឯកឧត្តមឧបនាយករដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ បានអញ្ជើញជួបឯកឧត្តម Khaled Khiari ឧបការីអគ្គលេខាធិការអង្គការសហប្រជាជាតិទទួលបន្ទុកកិច្ចការមជ្ឈិមបូព៌ា អាស៊ី និងប៉ាស៊ិហ្វិក ដើម្បីពិភាក្សាការងារ នៅទីស្តីការក្រសួងការរទេសកម្ពុជា។ជំនួបពិភាក្សានេះ នឹងមានការផ្តោតសំខាន់ទៅលើកិច្ចសហប្រតិបត្តិការរបស់​កម្ពុជា​ក្នុងនាម​ជា​សមាជិក​នៃអង្គការសហប្រជាជាតិ​ បញ្ហាតំបន់​ និងអន្តរជាតិដែលជាចំណាប់អារម្មណ៍​ និងកង្វល់រួម ខណៈកម្ពុជាក៏នឹងធ្វើជាប្រធានអាស៊ាននៅឆ្នាំ២០២២ខាងមុខ៕អត្ថបទ ៖ សេក ឧត្តម

ក្រសួងអប់រំ រក្សាគោលការណ៍អ្នកចេះគឺជាប់ ខណៈនៅសល់៥ថ្ងៃទៀត ការប្រឡងឌីប្លូមនឹងចូលមកដល់

2021/11/10 11:44:02 am        293
Facebook Telegram Linkin
ភ្នំពេញ ៖ ចាប់រាប់ត្រឹមថ្ងៃទី១០ ខែវិច្ឆិកាថ្ងៃនេះ នៅសល់ប្រមាណ៥ថ្ងៃទៀតប៉ុណ្ណោះ ការប្រឡងឌីប្លូម (ថ្នាក់ទី៩) នឹងចាប់ផ្តើមជាផ្លូវការហើយ ក្នុងនោះមន្ត្រីបានណែនាំឱ្យបេក្ខជនកុំភ័យ ប៉ុន្តែត្រូវអនុវត្តវិធានការសុខាភិបាល ៣ការពារ និង៣កុំ បើទោះគោលការណ៍អ្នកចេះគឺជាប់ដដែលបែបណាក្តី។លោក ហែម ស៊ីណារ៉េត ប្រធានមន្ទីរអប់រំយុវជននិងកីឡា រាជធានីភ្នំពេញ បានឲ្យដឹងថា នៅ​រាជធានី​ភ្នំពេញ ​ឆ្នាំនេះ មានបេក្ខជនចូលរួមប្រឡងមានប្រមាណ ១៥ ៨៥៨នាក់  ហើយក៏មាន​បេក្ខជ​ននៅ​សាលា​ឯកជន​​មួយ​ចំនួនបានប្រឡងខ្លះៗហើយដែរ ​ហើយនៅថ្ងៃទី១៥ វិច្ឆិកា ដែលជាថ្ងៃ​ប្រឡង​ឌីប្លូបនេះមាន ៦៣មណ្ឌល ចែកជា ៦៦៤បន្ទប់ ហើយបើប្រៀបធៀបឆ្នាំ២០២០កន្លងទៅ ឃើញថា មានការ​ថយចុះ​ជាង​ឆ្នាំ​មុន​លើចំនួនបេក្ខជន ដោយឆ្នាំមុនមានបេក្ខជនចូលរួមប្រឡង​ចំនួន ២១៥៣២នាក់ នៅរាជធានីភ្នំពេញ ហើយ​ការ​ថមថយ​នេះ ​អាចបណ្តាលមកពីបរិបទកូវីដ-១៩ខ្លះ និង​ដោយសារបេក្ខជនស្វ័យរិន​មាន​ចំនួន​តិច​ខ្លះផ​ងដែរ។លោក បន្តថា ការប្រឡងនេះ លោកស្នើសូមឱ្យបេក្ខជន ​កុំមានការភិតភ័យ​ ប៉ុន្តែ​ត្រូវ​ប្រកាន់​ភ្ជាប់​នូវ​វិធានការ​សុខាភិបាល ​គឺ៣ការពារ និង៣កុំ ​បើទោះគោលការណ៍អ្នកចេះគឺជាប់ដដែលបែបណាក្តី។គួរបញ្ជាក់ថា ការប្រឡងឌីប្លូមនៅឆ្នាំនេះ នឹងប្រព្រឹត្តិទៅនៅថ្ងៃទី១៥ខែ វិច្ឆិកា ចំណែកការប្រកាស​លទ្ធផល​ប្រឡង​ធ្វើនៅ ​ថ្ងៃទី២២ ខែវិច្ឆិកា ឆ្នាំ២០២១ ​ហើយ​ការប្រឡងឆ្នាំនេះ គឺនៅតាម​សាលារៀន​នីមួយៗ ជា​អ្នក​រៀប​ចំប្រឡងដោយខ្លួនឯង​ ប៉ុន្តែតម្រូវឱ្យមានអនុរក្ស ​និងមន្ត្រីក្រសួង​ មន្ត្រីនៃ​មន្ទីរ​តាម​ដាន​ការ​ប្រឡង​បន្ថែមផងដែរ៕អត្ថបទ ៖ គង់ រ៉េន

បណ្ដាញសង្គម

ព័ត៌មានថ្មីៗ

លោក Trump ចុះហត្ថលេខាលើក្រឹត្យបង្កើតក្រុមការងារកីឡាអូឡាំពិក មុនការប្រកួតឆ្នាំ២០២៨
08/05/2025 10:08 AM
Facebook Telegram Linkin
កូរ៉េខាងត្បូង និងអាមេរិក ត្រៀមធ្វើជំនួបកំពូលមេដឹកនាំ ខណៈខ្លឹមសារកិច្ចព្រមព្រៀងពាណិជ្ជកម្ម មិនទាន់រួចរាល់
08/05/2025 10:08 AM
Facebook Telegram Linkin
ទីក្រុងហុងកុង ចេញការព្រមានខ្ពស់បំផុតពីអាកាសធាតុអាក្រក់ ខណៈភ្លៀងធ្លាក់ខ្លាំងបង្កការរំខានស្ទើរគ្រប់កន្លែង
08/05/2025 10:08 AM
Facebook Telegram Linkin
រដ្ឋាភិបាលកម្ពុជា​នឹងឧបត្ថម្ភសាច់ប្រាក់ជូនពលរដ្ឋវិលត្រឡប់ពីប្រទេសថៃ ដែល​មាន​បណ្ណ​សមធម៌ និងបណ្ណគ្រួសារងាយរងហានិភ័យ​ បាន​ចុះ​ឈ្មោះ​ចូល​សិក្សា​ក្នុង​កម្ម​វិធី​បណ្តុះ​បណ្តាល​ជំនាញ​វិជ្ជាជីវៈ
08/05/2025 10:08 AM
Facebook Telegram Linkin
ក្រុមអ្នកតវ៉ានៅលីបង់ ទាមទារយុត្តិធម៌ក្នុងខួបប្រាំឆ្នាំនៃការផ្ទុះនៅទីក្រុងបេរូត
08/05/2025 10:08 AM
Facebook Telegram Linkin
សន្ទស្សន៍ការទិញ PMI របស់S&P Global៖ កំណើនសកម្មភាពសេវាកម្មរបស់ចិនឡើងដល់កម្រិតខ្ពស់ក្នុងពេល១៤ ខែនៅខែកក្កដា
08/05/2025 10:08 AM
Facebook Telegram Linkin
រុស្ស៊ីជំរុញឲ្យមានការប្រុងប្រយ័ត្នក្នុងវោហារសាស្ត្រនុយក្លេអ៊ែរ បន្ទាប់ពីការអត្ថាធិប្បាយរបស់លោក Trump
08/05/2025 10:08 AM
Facebook Telegram Linkin
ប្រជាពលរដ្ឋ និងពលករខ្មែរមកពីប្រទេសថៃ ៥ ២៩៣នាក់ បានដឹងពីឱកាសការងារដ៏សម្បូរបែបនៅកម្ពុជា ខណៈ ១ ០០៦នាក់ ទទួលបានការងារធ្វើភ្លាមៗ
08/05/2025 09:08 AM
Facebook Telegram Linkin
លោក Medvedev របស់រុស្ស៊ី ព្រមានពីជំហានបន្ថែមទៀត បន្ទាប់ពីក្រុងមូស្គូ បោះបង់កិច្ចព្រមព្រៀងផ្អាកប្រើមីស៊ីល
08/05/2025 09:08 AM
Facebook Telegram Linkin
ឱសានវាទរបស់លោក Trump សម្រាប់រុស្ស៊ីជិតមកដល់ ប៉ុន្តែលោកPutinពុំបង្ហាញសញ្ញានៃការធ្វើសម្បទានទេ
08/05/2025 09:08 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.