នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
រដ្ឋមន្ត្រីក្រសួងអភិវឌ្ឍន៍ជនបទចុះពិនិត្យវឌ្ឍនភាពការងារសាងសង់ស្ពានភ្នំក្រវាញ និង​ផ្លូវកៅ​ស៊ូ​ក្នុង​​ខេត្តពោធិ៍សាត់
BREAKING NEWS|កម្ពុជាចាត់ទុកផែនការថៃចង់ដណ្តើមប្រាសាទតាក្របី និងបិទប្រាសាទតាមាន់ធំគឺជាការប៉ុនប៉ងឈ្លានពានកម្ពុជាគិតទុកជាមុន និងមិនគោរពបទឈប់បាញ់
សម្ដេចតេជោ៖សង្គ្រាមព្រំដែនកម្ពុជា-ថៃបានផ្ទេរពីសង្គ្រាមប្រើប្រាស់អាវុធមកជាសង្រ្គាម ប្រើប្រាស់ជំពាមកៅស៊ូ ខណៈបើពិនិត្យឲ្យសុីជម្រៅវាជារឿងធំ ប្រសិនបើមិនទប់ស្កាត់
ឯកឧត្តម ចាន់ ដារ៉ុង ដឹកនាំគណៈកម្មការ​អន្តរ​ក្រសួង​ចុះ​ពិនិត្យ​វាយ​តម្លៃ​បញ្ចប់​សុពល​ភាព​ការងារ​ថែ​ទាំ​ផ្លូវ​ខួបចំនួន ៣កំណាត់ ក្នុងខេត្តពោធិ៍សាត់

នយោបាយ​ និង ការអភិវឌ្ឍន៍

អ៊ីស្រាអែល ប្តេជ្ញាចិត្តចំពោះសំណើបទឈប់បាញ់ ខណៈថាខ្លួនជិតកម្ចាត់ក្រុមហាម៉ាស អស់ហើយ

2024/06/25 09:04:51 am        107
Facebook Telegram Linkin
នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បាននិយាយកាលពីថ្ងៃចន្ទ (២៤ មិថុនា) ថា អ៊ីស្រាអែលនៅតែប្តេជ្ញាចិត្តចំពោះសំណើបទឈប់បាញ់ និងកិច្ចព្រមព្រៀងចំណាប់ថ្នូរនៅតំបន់ហ្កាហ្សា ហើយអង្គភាពយោធារបស់លោកបាននិយាយថា កងកម្លាំងហាម៉ាស ដែលនៅសេសសល់នៅទីក្រុងរ៉ាហ្វា (Rafah) ភាគខាងត្បូងហ្កាហ្សា ជិតត្រូវលុបបំបាត់អស់ហើយ។លោក ណេតាន់យ៉ាហ៊ូ បាននិយាយនៅក្នុងសុន្ទរកថាទៅកាន់សភាថា «យើងប្តេជ្ញាចំពោះសំណើឈប់បាញ់របស់អ៊ីស្រាអែល ដែលលោកប្រធានាធិបតី ចូ បៃដិន (Joe Biden) បានស្វាគមន៍។ ជំហររបស់យើងមិនផ្លាស់ប្តូរទេ គឺយើងមិនបញ្ចប់សង្គ្រាមឡើយរហូតក្រុមហាម៉ាស ត្រូវបានកម្ចាត់»។យោធាអ៊ីស្រាអែល និយាយថា «យើងកំពុងខិតជិតដល់ចំណុចដែលអាចនិយាយបានថា យើងបានកម្ចាត់កងពលតូចហាម៉ាសនៅក្រុងរ៉ាហ្វា។ នេះមិនមានន័យថាគ្មានភេរវករទៀតនោះទេ ប៉ុន្តែក្នុងន័យថា ក្រុមនេះមិនអាចដំណើរការជាអង្គភាពប្រយុទ្ធបានទៀតឡើយ»។ ជាការឆ្លើយតបទៅនឹងសំណួរអំពីការលើកឡើងរបស់កងទ័ពអ៊ីស្រាអែល លើការកម្ចាត់ក្រុមហាម៉ាស នៅក្នុងបទសម្ភាសន៍ជាមួយទូរទស្សន៍ អាល់-ចាហ្ស៊ីរ៉ា (Al Jazeera) កាលពីថ្ងៃចន្ទ លោក ខាលីល អាល់-ហាយយ៉ា (Khalil Al-Hayya) អនុប្រធានក្រុមហាម៉ាស នៅតំបន់ហ្កាហ្សា បាននិយាយថា «ប្រសិនបើអ៊ីស្រាអែល ចង់បញ្ចុះបញ្ចូលខ្លួនឯងថាខ្លួនបានសម្រេចគោលដៅរួចហើយ យោធានេះគួរតែចាកចេញពីតំបន់ហ៊ុមព័ទ្ធនេះទៅ»៕

កូរ៉េខាងជើង បានបញ្ជូនបាឡុងសំរាមជាច្រើនបន្ថែមទៀត ចូលទៅកូរ៉េខាងត្បូង

2024/06/25 09:01:50 am        127
Facebook Telegram Linkin
យោធារបស់ទីក្រុងសេអ៊ូល បាននិយាយកាលពីល្ងាចថ្ងៃចន្ទ (២៤ មិថុនា) ថា កូរ៉េខាងជើង កំពុងបញ្ជូនបាឡុងបន្ថែមទៀតដែលទំនងជាកំពុងដឹកសំរាមចូលទៅក្នុងកូរ៉េខាងត្បូង។ អាជ្ញាធរក្រុងសេអ៊ូល បានចេញសេចក្តីជូនដំណឹងដល់ប្រជាជននៅល្ងាចថ្ងៃចន្ទ ដោយនិយាយថា «បាឡុងសំរាមពីកូរ៉េខាងជើង ត្រូវបានបញ្ជាក់ថាបានចូលទៅក្នុងដែនអាកាសរបស់ទីក្រុងសេអ៊ូល»។ ទីក្រុងព្យុងយ៉ាង បានបញ្ជូនបាឡុងសំរាមជាងមួយពាន់គ្រឿងរួចមកហើយចូលទៅកូរ៉េខាងត្បូង ក្នុងអ្វីដែលខ្លួនហៅថាការសងសឹកចំពោះបាឡុងដឹកការឃោសនាប្រឆាំងរបប បានអណ្តែតចូលទៅក្នុងកូរ៉េខាងជើងដោយសកម្មជនកូរ៉េខាងត្បូងតាមព្រំដែន។ សកម្មជនម្នាក់ ដែលបានភៀសខ្លួនចេញពីកូរ៉េខាងជើង ហើយបានបញ្ជូនខិត្តប័ណ្ណប្រឆាំងរបបក្រុងព្យុងយ៉ាងអស់រយៈពេលជាច្រើនឆ្នាំ បាននិយាយថា ខ្លួនបានបង្ហោះបាឡុងចំនួន ២០ គ្រឿងដែលផ្ទុកទៅដោយកម្មវិធីឃោសនា ក៏ដូចជា អង្គចងចាំ (flash drives) ផ្ទុកតន្រ្តី ខេ-ផប់ (K-pop) និងរឿងភាគទូរទស្សន៍ឆ្លងកាត់ព្រំដែនកាលពីថ្ងៃព្រហស្បតិ៍ សប្តាហ៍មុន។ កូរ៉េខាងជើង មានភាពរសើបខ្លាំងចំពោះប្រជាជនរបស់ខ្លួនដែលស្គាល់វប្បធម៌តន្រ្តីប៉ុបរបស់កូរ៉េខាងត្បូង ជាមួយនឹងរបាយការណ៍របស់អង្គការសហប្រជាជាតិ ដែលនិយាយថា ការកាន់កាប់ខ្លឹមសារបែបនេះភាគច្រើនត្រូវបានគេដឹងថានាំឱ្យមានការកាត់ទោសប្រហារជីវិត។ តាមផ្លូវច្បាប់ កូរ៉េខាងត្បូងមិនអាចដាក់ទណ្ឌកម្មសកម្មជនដែលបញ្ជូនបាឡុងឆ្លងព្រំដែនបានទេ ដោយសារសេចក្តីសម្រេចរបស់តុលាការឆ្នាំ២០២៣ ដែលហាមប្រាមថាជាការរំលោភលើសេរីភាពបញ្ចេញមតិដែលមិនសមហេតុផល៕

លោក Blinken ជំរុញឱ្យរដ្ឋមន្ត្រីការពារជាតិអ៊ីស្រាអែល ធ្វើផែនការក្រោយសង្គ្រាម

2024/06/25 08:42:56 am        91
Facebook Telegram Linkin
រដ្ឋមន្ត្រីក្រសួងការពារជាតិអ៊ីស្រាអែល លោក យ៉ូអាវ ហ្កាលែន(Yoav Gallant) បានទៅដល់ក្រសួងការបរទេសសហរដ្ឋអាមេរិក ដើម្បីពិភាក្សាជាមួយអ្នកការទូតជាន់ខ្ពស់របស់សហរដ្ឋអាមេរិក លោក Antony Blinken កាលពីថ្ងៃចន្ទ។យោងតាមអ្នកនាំពាក្យក្រសួងការបរទេសលោក Matthew Miller បាននិយាយថា ដំណើរទស្សនកិច្ចនេះ ធ្វើឡើងក្នុងពេលដែលសហរដ្ឋអាមេរិកអំពាវនាវឱ្យមានបទឈប់បាញ់នៅតំបន់ហ្កាហ្សា និងសម្រាប់ការបង្កើតផែនការក្រោយសង្គ្រាមជាក់ស្តែង។លោក Matthew Miller និយាយថា មានភាពស្របមតិគ្នាថា នឹងធ្វើឲ្យក្រុមហាម៉ាសបរាជ័យយូរអង្វែង ហើយចាំបាច់ត្រូវមានផែនការសម្រាប់អ្វីដែលត្រូវដាក់ជំនួស និងអ្វីដែលត្រូវជំនួសអភិបាលកិច្ចដឹកនាំដោយប៉ាឡេស្ទីន។ វាត្រូវតែជាផែនការសន្តិសុខជាក់ស្តែង។ វាចាំបាច់ត្រូវមានផែនការកសាងឡើងវិញជាក់ស្តែង ហើយនោះជាអ្វីដែលយើងបន្តធ្វើការឆ្ពោះទៅមុខជាមួយដៃគូរបស់យើងនៅក្នុងតំបន់ ព្រមទាំងបន្តជំរុញឱ្យរដ្ឋាភិបាលអ៊ីស្រាអែល ពិចារណាឱ្យបានត្រឹមត្រូវ។ទីក្រុងវ៉ាស៊ីនតោន បានព្រមានអ៊ីស្រាអែលថា គ្មានផែនការបែបនេះ អាចបង្កឱ្យមានភាពគ្មានច្បាប់ និងភាពចលាចល ព្រមទាំងការវិលត្រលប់មកវិញរបស់ក្រុមហាម៉ាសនៅក្នុងតំបន់ហ៊ុមព័ទ្ធហ្កាហ្សា។ បន្ទាប់ពីជំនួប លោក Gallant ពុំបាននិយាយអំពីចំណុចនេះ ជាមួយអ្នកសារព័ត៌មាននោះទេ ប៉ុន្តែបាននិយាយថា សម្ព័ន្ធភាពជាមួយសហរដ្ឋអាមេរិក គឺមានសារៈសំខាន់ខ្លាំង សម្រាប់អនាគតរបស់អ៊ីស្រាអែល។លោកក៏បានជួបជាមួយទីប្រឹក្សាប្រធានាធិបតី លោក Joe Biden និងនាយក CIA លោក Bill Burns កាលពីថ្ងៃច័ន្ទ ក្នុងការពិភាក្សាដែលលោកចាត់ទុកថា «សំខាន់» ខណៈអ៊ីស្រាអែល ដោះស្រាយជាមួយតំបន់ហ្កាហ្សា និងការកើនឡើងជម្លោះនៅតាមព្រំដែនរបស់អ៊ីស្រាអែល ជាមួយប្រទេសលីបង់ ជាកន្លែងមានការបាញ់ប្រហារតគ្នាជាមួយក្រុមហេសបូឡា ដែលបានធ្វើឱ្យមានការព្រួយបារម្ភថាជម្លោះកាន់តែរីកធំ។ លោក Gallant ក៏មានផែនការជួបជាមួយរដ្ឋមន្ត្រីក្រសួងការពារជាតិ លោក Lloyd Austin នៅថ្ងៃអង្គារនេះផងដែរ។

ចិន៖ អាមេរិកមិនគួរប្រឈមបន្ទាត់ក្រហមរបស់ចិនលើបញ្ហាតៃវ៉ាន់ឡើយ ដោយព្រមានសងសឹកដ៏ស័ក្ដិសម

2024/06/25 08:16:07 am        143
Facebook Telegram Linkin
អ្នកនាំពាក្យក្រសួងការបរទេសចិនបាននិយាយកាលពីថ្ងៃចន្ទសប្ដាហ៍នេះថា គ្មានប្រទេស អង្គការ ឬបុគ្គលណាមួយ គួរគិតថាពួកគេអាចឆ្លងកាត់បន្ទាត់ក្រហមលើបញ្ហាកោះតៃវ៉ាន់ដោយមិនប្រឈមនឹងផលវិបាកនោះទេ។ កាលពីថ្ងៃទី ២១ ខែមិថុនា ក្រសួងការបរទេសចិនបានប្រកាសពីការសម្រេចចិត្តរបស់ខ្លួនក្នុងការចាត់វិធានការប្រឆាំងនឹងក្រុមហ៊ុនលក់អាវុធអាមេរិក Lockheed Martin Corp និងនាយកប្រតិបត្តិរបស់ក្រុមហ៊ុននេះ។ជាការឆ្លើយតបទៅនឹងសំណួរពាក់ព័ន្ធក្នុងអំឡុងសន្និសីទសារព័ត៌មានប្រចាំថ្ងៃ អ្នកនាំពាក្យក្រសួងខាងលើ គឺលោកស្រី ម៉ៅនីង ( Mao Ning) បាននិយាយថា ការលក់អាវុធរបស់សហរដ្ឋអាមេរិកទៅឱ្យកោះតៃវ៉ាន់បានរំលោភយ៉ាងធ្ងន់ធ្ងរលើគោលការណ៍ចិនតែមួយ និងសេចក្តីថ្លែងការណ៍រួមចំនួនបីរវាងចិននិងអាមេរិក។ទង្វើរបស់អាមេរិក បានជ្រៀតជ្រែកក្នុងកិច្ចការផ្ទៃក្នុងរបស់ចិន ធ្វើឱ្យប៉ះពាល់អធិបតេយ្យភាព និងបូរណភាពទឹកដីរបស់ចិន។ លោកស្រីបានបន្ថែមថា ប្រទេសចិនបានចាត់វិធានការប្រឆាំងនឹងក្រុមហ៊ុនពាក់ព័ន្ធ និងនាយកប្រតិបត្តិរបស់ក្រុមនេះផងដែរ ដែលពាក់ព័ន្ធការលក់អាវុធស្របតាមច្បាប់។ លោកស្រីម៉ៅ បានសង្កត់ធ្ងន់ថា បញ្ហាកោះតៃវ៉ាន់ គឺជាចំណុចស្នូលនៃផលប្រយោជន៍ស្នូលរបស់ប្រទេសចិន និងជាខ្សែបន្ទាត់ក្រហមដំបូងដែលមិនអាចឆ្លងកាត់បាន។អ្នកនាំពាក្យរូបនេះបាននិយាយថា គ្មានប្រទេស អង្គការ ឬបុគ្គលណាម្នាក់ គួរមើលស្រាលការប្តេជ្ញាចិត្ត ឆន្ទៈ និងសមត្ថភាពដ៏រឹងមាំរបស់រដ្ឋាភិបាលចិន និងប្រជាជនចិន ដើម្បីការពារអធិបតេយ្យភាពជាតិ និងបូរណភាពទឹកដី ហើយមិនគួរស្រមៃចង់ឆ្លងកាត់ខ្សែបន្ទាត់ក្រហមលើបញ្ហាតៃវ៉ាន់ ឡើយពុំនោះនឹងត្រូវទទួលការឆ្លើយតបវិញយ៉ាងស័ក្ដិសម៕

សម្ដេចធិបតីអំពាវនាវដល់ស្ថាប័នតុលាការ និងអយ្យការអនុវត្តច្បាប់ឱ្យបានម៉ត់ចត់ ត្រឹមត្រូវតាមច្បាប់ ចំពោះករណីឃាតកម្មប្រព្រឹត្តដោយជនល្មើស ស្រី ស៊ីណា

2024/06/25 07:06:25 am        285
Facebook Telegram Linkin
ភ្នំពេញ៖សម្ដេច​មហាបវរធិបតី ហ៊ុន​ម៉ាណែត នាយករដ្ឋមន្រ្ដីនៃកម្ពុជា នៅព្រឹកថ្ងៃទី២៥ ខែមិថុនានេះ បាន​ចេញសារ​តាមបណ្ដាញ​​តេឡេសក្រាម អំពាវនាវដល់ស្ថាប័ន​តុលាការ និងអយ្យការយកចិត្តទុកដាក់ក្នុងការពិនិត្យនិងអនុវត្តច្បាប់លើករណីនេះឱ្យបានម៉ត់ចត់, ឱ្យបានតឹងរ៉ឹង និងម៉ឺងម៉ាត់ និងឱ្យបានត្រឹមត្រូវទៅតាមច្បាប់ជាធរមាន ដើម្បីស្វែងរកយុត្តិធម៌ ជូនជនរងគ្រោះ និងក្រុមគ្រួសារ ដោយគ្មានការអន្តរាគមន៍ណាមួយជាដាច់ខាត ពាក់ព័ន្ធ «ករណីឃាតកម្ម ប្រព្រឹត្តដោយជនល្មើសឈ្មោះ ស្រី ស៊ីណា»។ក្នុងឱកាសនេះ សម្ដេ​ចធិបតី នាយករដ្ឋមន្រ្ដី បានចូលរួមរំលែកទុក្ខដ៏ក្រៀមក្រំបំផុតជាមួយគ្រួសារនៃសពប្អូន ទ្បុង លីសុង និងប្អូន ឃីន កញ្ចនា ដែលបានស្លាប់ដោយសារការបាញ់ប្រហារកាលពីថ្ងៃទី១៧ ខែមិថុនា ឆ្នាំ២០២៤ កន្លងទៅ។សម្ដេច​ធិបតី​មាន​ប្រសាសន៍ថា ក្រោយពីថ្ងៃកើតហេតុ មានការជជែកវែកញែកគ្នាពាក់ព័ន្ធទៅនឹងការកាត់ទោសជនល្មើសនៅក្នុងករណីនៃការបាញ់ប្រហារនេះ ដោយមានការបង្ហាញក្តីកង្វល់ និងបារម្ភ ខ្លាចជនល្មើសពុំត្រូវបានផ្តន្ទាទោសឱ្យបានម៉ឺងម៉ាត់តាមផ្លូវច្បាប់ ឬអាចមានការធានាឱ្យនៅក្រៅឃុំដោយមិនប្រក្រតី។សម្ដេច​ធិបតីនាយករដ្ឋមន្រ្ដីបញ្ជាក់ថា រាជរដ្ឋាភិបាល នីតិកាលទី៧ នៃរដ្ឋសភា បានយកចិត្តទុកដាក់ខ្ពស់ជាអាទិភាពមួយដ៏សំខាន់ក្នុងការពង្រឹងនីតិរដ្ឋ ពិសេស ការពង្រឹងការអនុវត្តច្បាប់ ដើម្បីធានាថែរក្សាសន្តិសុខសាធារណៈ និងសណ្តាប់ធ្នាប់សង្គម ក៏ដូចជា ការដោះស្រាយបញ្ហានានាក្នុងសង្គម ប្រកបដោយភាពត្រឹមត្រូវ និងយុត្តិធម៌ ស្របតាមច្បាប់ជាធរមាន ដែលក្នុងនោះ ក៏រួមមានការពង្រឹងទំនួលខុសត្រូវចំពោះមុខច្បាប់របស់ជនល្មើស និងការអនុវត្តច្បាប់តឹងរ៉ឹង លើជនប្រព្រឹត្តបទល្មើស ជាពិសេសជនដែលបង្កឱ្យបាត់បង់អាយុជីវិតអ្នកដទៃ។សម្ដេច​បញ្ជាក់ថា កន្លងទៅ ក៏មានការចាត់វិធានការយ៉ាងតឹងរ៉ឹងលើជនបង្កគ្រោះថ្នាក់ចរាចរណ៍ ដែលស្ថិតក្នុងស្ថានភាពស្រវឹង និងបង្កឱ្យបាត់បង់អាយុជីវិតអ្នកដទៃ ដោយបានអនុវត្តច្បាប់ គ្មានការយោគយល់ គ្មានការលើកលែង ឬអន្តរាគមន៍ណាមួយទ្បើយ។សម្ដេច​ធិបតីបន្តថា៖«ដូចគ្នាផងដែរ ចំពោះករណីឃាតកម្មនេះ បើទោះបីជារាជរដ្ឋាភិបាល មិនអាចលូកដៃចូលក្នុងកិច្ចការរបស់ស្ថាប័នតុលាការក៏ដោយ ខ្ញុំសូមអំពាវនាវឱ្យស្ថាប័នតុលាការ និងស្ថាប័នអយ្យការ យកចិត្តទុកដាក់ក្នុងការពិនិត្យនិងអនុវត្តច្បាប់លើករណីនេះឱ្យបានម៉ត់ចត់, ឱ្យបានតឹងរ៉ឹង និងម៉ឺងម៉ាត់ និងឱ្យបានត្រឹមត្រូវទៅតាមច្បាប់ជាធរមាន ដើម្បីស្វែងរកយុត្តិធម៌ ជូនជនរងគ្រោះ និងក្រុមគ្រួសារ ដោយគ្មានការអន្តរាគមន៍ណាមួយជាដាច់ខាត»។សម្ដេច​នាយករដ្ឋមន្រ្ដីបានថ្លែង អរគុណដល់ប្រជាពលរដ្ឋទាំងអស់ ដែលបានបង្ហាញនូវសុទ្ធចិត្តវែកញែកក្នុងរឿងនេះ ហើយក៏សូមអំពាវនាវដល់ប្រជាពលរដ្ឋទាំងអស់ ដើម្បីទុកកិច្ចការនេះជូនស្ថាប័នអនុវត្តច្បាប់ដែលមានសមត្ថកិច្ច ដើម្បីចាត់ការ និងដោះស្រាយករណីនេះ ឱ្យបានត្រឹមត្រូវ និងយុត្តិធម៌ ទៅតាមនីតិវិធី និង ច្បាប់ជាធរមានរបស់ព្រះរាជាណាចក្រកម្ពុជា។ ខ្ញុំក៏សូមឱ្យប្រជាពលរដ្ឋមានការជឿទុកចិត្តលើប្រព័ន្ធយុត្តិធម៌កម្ពុជាក្នុងការចាត់ការ និង ដោះស្រាយផ្តល់យុត្តិធម៌ឱ្យបានត្រឹមត្រូវចំពោះករណីនេះ។សម្ដេច​ធិបតីរម្លឹកថា​ នៅពេលត្រឡប់មកដល់កម្ពុជាវិញបន្ទាប់ពីបំពេញទស្សនកិច្ចជាផ្លូវការនៅប្រទេសសុង្ហបុរីសម្ដេច​បានក្រាបបង្គំទូលថ្វាយព្រះមហាក្សត្រ ដើម្បីបញ្ចប់គោរមងារឧកញ៉ារបស់លោក ស្រី ស៊ីណា កាលពីថ្ងៃទី ២០ មិថុនា ឆ្នាំ២០២៤ ហើយចាប់តាំងពីថ្ងៃកើតហេតុនោះមកសម្ដេច​បានចេញបទបញ្ជាឱ្យសមត្ថកិច្ចពាក់ព័ន្ធ ក៏ដូចជាប្រគល់ភារកិច្ចជូនឯកឧត្តម កើត រិទ្ធ ឧបនាយករដ្ឋមន្រ្តី រដ្ឋមន្រ្តីក្រសួងយុត្តិធម៌ បន្តតាមដានដោយយកចិត្តទុកដាក់លើការអនុវត្តច្បាប់ចំពោះករណីនេះ ដើម្បីធានាថា ច្បាប់ត្រូវបានអនុវត្តដោយតឹងរ៉ឹង ម៉ឺងម៉ាត់ និង ដោយត្រឹមត្រូវទៅតាមខ្លឹមសារនៃច្បាប់ ក្នុងការផ្តល់យុត្តិធម៌ដល់ជនរងគ្រោះ និង ក្រុមគ្រួសារ៕

សមយុទ្ធសង្រ្គាមរបស់កោះតៃវ៉ាន់ នៅឆ្នាំនេះនឹងធ្វើត្រាប់តាមការប្រយុទ្ធពិតប្រាកដ

2024/06/24 02:27:09 pm        83
Facebook Telegram Linkin
មន្ត្រីជាន់ខ្ពស់កោះតៃវ៉ាន់ មួយរូបបាននិយាយថា សមយុទ្ធ ឬហ្គេមសង្រ្គាមប្រចាំឆ្នាំរបស់តៃវ៉ាន់ នៅឆ្នាំនេះនឹងមានភាពដូចបំផុតតាមដែលអាចធ្វើទៅបានចំពោះការប្រយុទ្ធជាក់ស្តែង ហើយមិនមែនគ្រាន់តែជាការសម្ដែងដើម្បីរកពិន្ទុនោះទេ ប៉ុន្តែមានគោលបំណងធ្វើត្រាប់តាមការប្រយុទ្ធពិតប្រាក ដោយសារ «ការគំរាមកំហែងរបស់សត្រូវ» កំពុងកើនឡើងយ៉ាងឆាប់រហ័សពីប្រទេសចិន។ប្រទេសចិន ដែលចាត់ទុកកោះតៃវ៉ាន់ថាជាទឹកដីរបស់ខ្លួន បាននិងកំពុងធ្វើសមយុទ្ធជាទៀងទាត់ជុំវិញកោះនេះអស់រយៈពេល ៤ ឆ្នាំ ដើម្បីដាក់សម្ពាធឱ្យទីក្រុងតៃប៉ិ ទទួលយកការទាមទារអធិបតេយ្យភាពរបស់ទីក្រុងប៉េកាំង បើទោះបីជាមានការជំទាស់យ៉ាងខ្លាំងពីតៃវ៉ាន់ក៏ដោយ។កោះតៃវ៉ាន់ នឹងចាប់ផ្តើមសមយុទ្ធឈ្មោះថា ហាន ខ័ង (Han Kuang) រយៈពេលប្រាំថ្ងៃរបស់ខ្លួននៅថ្ងៃទី២២ ខែកក្កដា ខាងមុខនេះ ហើយមន្ត្រីអាជ្ញាធរការពារជាតិជាន់ខ្ពស់ម្នាក់ដែលនិយាយក្នុងលក្ខខណ្ឌមិនបញ្ចេញឈ្មោះបានឱ្យដឹងថា មានតម្រូវការបន្ទាន់ដើម្បីគិតគូរឡើងវិញពីរបៀបដែលសមយុទ្ធនេះត្រូវបានធ្វើឡើង។មន្ត្រីរូបនេះបាននិយាយថា ការហ្វឹកហ្វឺនដែលភាគច្រើនសម្រាប់សម្តែង ដូចជាសមយុទ្ធហាត់សមជាដើម ត្រូវបានលុបចោល ខណៈដែលឆ្នាំនេះនឹងមានលំហាត់សមពេលយប់មិនធម្មតា ហើយក្រុងតៃប៉ិ ក៏នឹងត្រូវដាក់បញ្ចូលក្នុងសមយុទ្ធផងដែរ។ ក្រសួងការពារជាតិចិន មិនបានអត្ថាធិប្បាយភ្លាមៗអំពីសមយុទ្ធនេះទេ ប៉ុន្តែកន្លងមកខ្លួនបាននិយាយថា វាគ្មានប្រយោជន៍ទេសម្រាប់តៃវ៉ាន់ ដែលគិតថាខ្លួនអាចប្រើប្រាស់អាវុធដើម្បីការពារ «ការបង្រួបបង្រួមជាតិ» របស់ប្រទេសចិនបាន៕

មេដឹកនាំតៃវ៉ាន់ និយាយថា ចិនគ្មានសិទ្ធិដាក់ទោសកោះនេះទេ ក្រោយការគំរាមរបស់ក្រុងប៉េកាំង

2024/06/24 01:26:28 pm        156
Facebook Telegram Linkin
មេដឹកនាំកោះតៃវ៉ាន់ លោក ឡៃ ឆីង-ទ័រ (Lai Ching-te) បាននិយាយបន្ទាប់ពីប្រទេសចិនបានគំរាមដាក់ទោសប្រហារជីវិតក្នុងករណីធ្ងន់ធ្ងរបំផុតសម្រាប់អ្នកបំបែកខ្លួនឯករាជ្យតៃវ៉ាន់ថា របបប្រជាធិបតេយ្យមិនមែនជាឧក្រិដ្ឋកម្មទេ។ប្រទេសចិន ដែលចាត់ទុកកោះតៃវ៉ាន់ ជាទឹកដីរបស់ខ្លួន គ្មានអាថ៌កំបាំងនៃការមិនពេញចិត្តរបស់ខ្លួនចំពោះមេដឹកនាំលោក ឡៃ ដែលចូលកាន់តំណែងកាលពីខែមុនទេ ដោយនិយាយថាបុគ្គលរូបនេះ គឺជាអ្នកបំបែកខ្លួន ហើយបានរៀបចំល្បែងសង្រ្គាមភ្លាមៗបន្ទាប់ពីការឡើងកាន់តំណែងរបស់រូបលោក។ កាលពីថ្ងៃសុក្រសប្ដាហ៍មុន ប្រទេសចិនបានបង្កើនសម្ពាធលើកោះតៃវ៉ាន់ ដោយដាក់ចេញគោលការណ៍ផ្លូវច្បាប់ថ្មីដើម្បីដាក់ទណ្ឌកម្មអ្នកដែលខ្លួននិយាយថាគាំទ្រឯករាជ្យភាពជាផ្លូវការរបស់កោះនេះ ទោះបីជាតុលាការចិនមិនមានយុត្តាធិការលើកោះស្វ័យគ្រប់គ្រងតាមបែបប្រជាធិបតេយ្យក៏ដោយ។នៅពេលសួរអំពីសកម្មភាពរបស់ប្រទេសចិននៅក្នុងសន្និសីទសារព័ត៌មាននៅការិយាល័យមេដឹកនាំក្នុងទីក្រុងតៃប៉ិ លោក ឡៃ បានរំលឹកឡើងវិញនូវការអាណិតអាសូរចំពោះប្រជាជនចិនក្នុងគ្រោះទឹកជំនន់នាពេលថ្មីៗនេះនៅភាគខាងត្បូង ប្រទេសចិន ៕

រុស្ស៊ី អាចកាត់បន្ថយពេលវេលាសម្រេចចិត្តសម្រាប់ការប្រើប្រាស់អាវុធនុយក្លេអ៊ែរ

2024/06/24 01:13:48 pm        132
Facebook Telegram Linkin
ប្រធានគណៈកម្មាធិការការពារជាតិរបស់សភារុស្ស៊ី បាននិយាយថា ប្រទេសដែលជាមហាអំណាចនុយក្លេអ៊ែរដ៏ធំបំផុតរបស់ពិភពលោក មួយនេះ អាចកាត់បន្ថយពេលវេលាសម្រេចចិត្តដែលមានចែងក្នុងគោលនយោបាយផ្លូវការសម្រាប់ការប្រើប្រាស់អាវុធនុយក្លេអ៊ែរ ប្រសិនបើទីក្រុងមូស្គូជឿជាក់ថាមានការគំរាមកំហែងកើនឡើង។ដោយសារសង្រ្គាមនៅអ៊ុយក្រែនបានបង្កឱ្យមានការប្រឈមដាក់គ្នាដ៏ធំបំផុតរវាងរុស្ស៊ី និងលោកខាងលិច ចាប់តាំងពីវិបត្តិមីស៊ីលគុយបាឆ្នាំ ១៩៦២ លោកប្រធានាធិបតី Vladimir Putin បាននិយាយកាលពីខែមុនថា រុស្ស៊ីអាចនឹងផ្លាស់ប្តូរគោលនយោបាយនុយក្លេអ៊ែរជាផ្លូវការ ដោយកំណត់លក្ខខណ្ឌដែលអាវុធបែបនេះអាចប្រើប្រាស់បាន។ កាលពីថ្ងៃអាទិត្យ លោក អាន់ដ្រេ កាតាប៉ូឡូវ (Andrei Kartapolov) ប្រធានគណៈកម្មាធិការការពារជាតិនៃសភាជាន់ទាបរុស្ស៊ី ត្រូវបានដកស្រង់សម្តីដោយទីភ្នាក់ងារសារព័ត៌មានរដ្ឋ RIA ដោយនិយាយថា ប្រសិនបើការគំរាមកំហែងកើនឡើង នោះពេលវេលានៃការសម្រេចចិត្តសម្រាប់ការប្រើប្រាស់អាវុធបែបនេះអាចនឹងត្រូវផ្លាស់ប្តូរ។ទីភ្នាក់ងារសារព័ត៌មាន RIA បានដកស្រង់សម្តីមន្ត្រីរូបនេះ ថា ប្រសិនបើយើងមើលឃើញថាបញ្ហាប្រឈម និងការគំរាមកំហែងកើនឡើង មានន័យថាយើងអាចកែតម្រូវអ្វីមួយនៅក្នុងគោលការណ៍ ទាក់ទងនឹងពេលវេលានៃការប្រើប្រាស់អាវុធនុយក្លេអ៊ែរ និងការសម្រេចចិត្តក្នុងការប្រើប្រាស់អាវុធនេះ៕

អ្នកវិភាគ៖ ក្រុមប្រឆាំងបន្តចូលរួមជីវភាពជាមួយបក្សប្រជាជនកម្ពុជា ដោយផ្អែកលើទស្សន​វិជ្ជាឈ្នះឈ្នះ

2024/06/24 12:48:09 pm        50
Facebook Telegram Linkin
អ្នកវិភាគសង្គម និងនយោបាយ លើកឡើងថា សកម្មភាពរបស់ក្រុមប្រឆាំងបន្តចូលរួម​ជីវភាព​ជាមួយ​​គណបក្សប្រជាជនកម្ពុជា ដោយផ្អែកលើទស្សនវិជ្ជា ឈ្នះឈ្នះ របស់សម្តេចតេជោ ហ៊ុន សែន ទើបជាមេដឹកនាំដែលមាននយោបាយច្បាស់លាស់ជូនប្រជាជន។ថ្លែងប្រាប់ BTV នៅថ្ងៃទី២៤ ខែមិថុនា ឆ្នាំ២០២៤ លោកបណ្ឌិត គិន ភា អ្នកវិភាគសង្គម និង​នយោបាយ លើកឡើងថា តាមរយៈសកម្មភាពនៃការបន្តផ្តាច់ខ្លួនរបស់សមាជិក និងសកម្មជន​គណបក្ស​ប្រឆាំង ដើម្បីចូលរួមជីវភាព​នយោបាយ​ជាមួយ​គណបក្ស​ប្រជាជ​ន​កម្ពុជា​ដែល​ជា​គណបក្ស​មាន​ភាពចាស់ទុំ និងប្រាកដនិយម បានកើនឡើងជាបន្ត​បន្ទាប់​ក្នុង​ស្ថានភាព​វិឌ្ឍន៍​នយោបាយ​នៅ​កម្ពុជាមានភាពល្អប្រសើរ។ លោកបណ្ឌិត លើកឡើងទៀតថា ការស្ម័គ្រចិត្តចូល​រួម​ជីវភាព​នយោបាយជាមួយគណបក្សប្រជាជនកម្ពុជាត្រូវបានផ្អែកលើកត្តារួមមាន ការធានានូវសុខ​សន្តិភាព ស្ថិរភាពនយោបាយ ការអភិវឌ្ឍន៍ និងជីវភាពរស់នៅរបស់ប្រជាជន។ លោកបណ្ឌិតបញ្ជាក់ថា គណបក្សប្រជាជនកម្ពុជាក្រោមការដឹកនាំរបស់សម្តេចតេជោ ហ៊ុន សែន និង​ឥរិយាបថនយោបាយរបស់សម្តេចតេជោ គឺមានទស្សនៈវិជ្ជានយោបាយឈ្នះ ឈ្នះ ជាស្នូល​ដែល​សម្តេចបានស្វាគមន៍ និងសហការតាំងពីឆ្នាំ១៩៩០ ទើបធ្វើឱ្យសមាជិក និងសកម្ម​ជន​គណបក្ស​ប្រឆាំងបន្តចូលរួមជីវភាពនយោបាយជាមួយគណបក្សប្រជាជនកម្ពុជា។ជាក់ស្តែងតាមរយៈវីដេអូរបស់សមាជិក និងសកម្មជន​គណបក្ស​ប្រឆាំង​ប្រកាស​ចូល​រួម​ជីវភាព​នយោបាយ​ជា​មួយគណបក្សប្រជាជនកម្ពុជា ដោយសារសម្តេចតេជោ ហ៊ុន សែន ជាមេដឹកនាំ​ប្រកប​ដោយ​ព្រហ្មវិហាធម៌ និងគិតគូរពីជាត៨ និងប្រជាជនជាចំបង។សូមជម្រាបថា គិតមកទល់ពេលនេះ សមាជិក និងសកម្មជនរបស់គណបក្សប្រឆាំងទាំងក្នុង និង​ក្រៅ​ប្រទេស​មិនតិចទេ បានបន្តគ្នាចាកចេញពីគណបក្សប្រឆាំង ដោយសារមេដឹក​នាំ​ជា​ទណ្ឌិត​ក្បត់​ជាតិ និងបានភូតកុហកជាបន្តបន្ទាប់ ដែលធ្វើឱ្យសមាជិក និងសកម្មជន​របស់​ខ្លួន​អស់​ជំនឿ​ចិត្ត និងងាកមករួមរស់ជាមួយគណបក្សប្រជាជនកម្ពុជា ដែលមានឆន្ទះ និងស្មោះស្ម័គ្រជូនជាតិ និង​ប្រជាជនពិតប្រាកដ៕ 

អាមេរិក៖ ការវាយលុករបស់អ៊ីស្រាអែល នៅលីបង់ អាចបង្កើនហានិភ័យនៃសង្គ្រាមកាន់តែរីកធំ

2024/06/24 10:40:21 am        144
Facebook Telegram Linkin
ឧត្តមសេនីយជាន់ខ្ពស់របស់សហរដ្ឋអាមេរិក បាននិយាយកាលពីថ្ងៃអាទិត្យ (២៣ មិថុនា) ថា ការវាយលុករបស់អ៊ីស្រាអែល នៅក្នុងប្រទេសលីបង់ មានសក្តានុពលក្នុងការបង្កើនហានិភ័យនៃជម្លោះកាន់តែទូលំទូលាយ ដែលអូសទាញអ៊ីរ៉ង់ និងបណ្ដាក្រុមសកម្មប្រយុទ្ធដែលគាំទ្រដោយអ៊ីរ៉ង់ ជាពិសេសប្រសិនបើអត្ថិភាពរបស់ពួកហេសបូឡា (Hezbollah) ត្រូវបានគំរាមកំហែង។លោក ឧត្តមសេនីយ៍ទោ ឆាលស៍ ឃ្យូ ប្រោន (Charles Q. Brown) ដែលជាប្រធានអគ្គសេនាធិការចម្រុះ មិនបានទស្សន៍ទាយជំហានបន្ទាប់របស់អ៊ីស្រាអែលទេ ហើយបានទទួលស្គាល់សិទ្ធិរបស់អ៊ីស្រាអែល ក្នុងការការពារខ្លួន ប៉ុន្តែលោកបានព្រមានថា ការវាយលុកទៅលើប្រទេសលីបង់ «អាចជំរុញឱ្យមានលទ្ធភាពនៃជម្លោះកាន់តែទូលំទូលាយបន្ថែមទៀត»។ការអត្ថាធិប្បាយរបស់លោក ប្រោន បានកើតឡើងនៅពេលដែលលោកនាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ (Benjamin Netanyahu) បាននិយាយកាលពីថ្ងៃអាទិត្យដដែលនេះថា ការបញ្ចប់ដំណាក់កាលដ៏ខ្លាំងក្លានៃការប្រយុទ្ធគ្នានៅតំបន់ហ្កាហ្សា នឹងអនុញ្ញាតឱ្យអ៊ីស្រាអែល ដាក់ពង្រាយកម្លាំងបន្ថែមទៀតនៅតាមព្រំដែនភាគខាងជើងជាមួយប្រទេសលីបង់។ក្រុមហេសបូឡា ដែលគាំទ្រដោយអ៊ីរ៉ង់ បានចាប់ផ្តើមវាយប្រហារអ៊ីស្រាអែល ភ្លាមៗបន្ទាប់ពីការវាយលុករបស់ពួកហាម៉ាស កាលពីថ្ងៃទី០៧ ខែតុលា ដែលបានបង្កឱ្យមានសង្រ្គាមហ្កាហ្សា ហើយភាគីទាំងពីរបានបាញ់តបតក្នុងរយៈពេលជាច្រើនខែចាប់តាំងពីពេលនោះមក។ ក្រុមហេសបូឡា បាននិយាយថា ខ្លួននឹងបញ្ឈប់ការវាយប្រហាររហូតដល់មានបទឈប់បាញ់នៅតំបន់ហ្កាហ្សា៕

បណ្ដាញសង្គម

ព័ត៌មានថ្មីៗ

ក្រុមហាម៉ាស ត្រៀមជាស្រេចសម្រាប់កិច្ចព្រមព្រៀងបទឈប់បាញ់ដ៏ទូលំទូលាយមួយ ជាមួយអ៊ីស្រាអែល
08/25/2025 03:08 PM
Facebook Telegram Linkin
អ៊ីស្រាអែលប្រើប្រាស់គ្រឿងចក្រ ដើម្បីគាស់រំលើងដើមឈើរាប់រយដើម នៅក្នុងភូមិនៃតំបន់ West Bank
08/25/2025 03:08 PM
Facebook Telegram Linkin
មន្ត្រីនិយាយថា កងទ័ពអាកាសនីហ្សេរីយ៉ា ជួយសង្គ្រោះជនរងគ្រោះដែលត្រូវបានចាប់ពង្រត់ជាង ៧០នាក់
08/25/2025 02:08 PM
Facebook Telegram Linkin
UNICEF៖ គ្រោះទុរ្ភិក្សនៅហ្កាហ្សា កើតចេញពីបរាជ័យក្នុងការផ្តល់ជំនួយ មិនមែនមកពីកង្វះស្បៀងទេ
08/25/2025 02:08 PM
Facebook Telegram Linkin
WSJ រាយការណ៍ថា មន្ទីរបញ្ចកោណដាក់កំហិតលើអ៊ុយក្រែន ក្នុងការប្រើមីស៊ីលអាមេរិក ប្រឆាំងនឹងរុស្ស៊ី
08/25/2025 02:08 PM
Facebook Telegram Linkin
ការស្ទង់មតិ៖ អត្រាគាំទ្ររបស់នាយករដ្ឋមន្ត្រីជប៉ុន Ishiba កើនឡើង ទោះជាចាញ់ឆ្នោតក៏ដោយ
08/25/2025 02:08 PM
Facebook Telegram Linkin
របបសឹកមីយ៉ាន់ម៉ា និយាយថា ស្ពានផ្លូវរថភ្លើងដ៏ប្រវត្តិសាស្ត្ររបស់ប្រទេស «ត្រូវបានបំផ្ទុះ និងបំផ្លាញ»
08/25/2025 02:08 PM
Facebook Telegram Linkin
សហរដ្ឋអាមេរិក បញ្ជាក់ករណីដង្កូវស៊ីសាច់ក្នុងខ្លួនមនុស្ស ស្របពេលការផ្ទុះឡើងនៅអាមេរិកកណ្តាល
08/25/2025 01:08 PM
Facebook Telegram Linkin
លោកជំទាវ ចម និម្មល អញ្ជើញដឹកនាំកិច្ចប្រជុំគណៈកម្មការអន្តរក្រសួងដើម្បីរៀបចំ និងចូលរួមពិព័រណ៍ពិភពលោក និងពិព័រណ៍ពាណិជ្ជកម្មអន្តរជាតិ
08/25/2025 01:08 PM
Facebook Telegram Linkin
ឧត្តមសេនីយ៍ឯក ឯក សំអូន៖ កម្ពុជា-ថៃ នឹងខិតខំដោះស្រាយបញ្ហាដោយសន្តិវិធីជៀសវាងការប៉ះទង្គិចគ្នា
08/25/2025 01:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.