នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រុមហ៊ុន TH Automotive Manufacturing Co., Ltd​ នឹង​សម្ពោធជាផ្លូវការ​ រោងចក្រផ្គុំ និងដំឡើងរថយន្តរបស់ខ្លួន​នៅកម្ពុជា​ ក្នុងឆ្នាំ២០២៦នេះ
ប្រធានគណៈកម្មាធិការគណបក្សខេត្តតាកែវ ណែនាំសមាជិកមូលដ្ឋានឱ្យយកចិត្ត​ទុកដាក់​បម្រើ​ពលរដ្ឋ
សម្ដេចតេជោ ណែនាំឱ្យដាក់បេក្ខភាពស្រ្ដីជាប់ឆ្នោតយ៉ាងតិចមួយឃុំមួយរូប និងមានស្ត្រីធ្វើស្មៀនឃុំ
សម្ដេចតេជោស្នើស្ថាប័នពាក់ព័ន្ធចាត់វិធានការភ្លាមៗចំពោះអ្នកប្រព្រឹត្តទង្វើអសីលធម៌លើបណ្ដាញសង្គម

នយោបាយ​ និង ការអភិវឌ្ឍន៍

លោក Putin គិតថាលោក Trump មានចិត្តស្មោះក្នុងការបញ្ចប់សង្គ្រាមអ៊ុយក្រែន

2024/07/05 05:02:13 pm        401
Facebook Telegram Linkin
ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បាននិយាយកាលពីថ្ងៃព្រហស្បតិ៍ (០៤ កក្កដា) ក្នុងសន្និសីទព័ត៌មាននៅប្រទេសកាហ្សាក់ស្ថាន បន្ទាប់ពីត្រូវបានសាកសួរពីការលើកឡើងរបស់លោក ត្រាំ ដែលថាលោកអាចបញ្ចប់សង្រ្គាមអ៊ុយក្រែនបានយ៉ាងឆាប់រហ័ស បើលោកឈ្នះតំណែងសេតវិមានថា លោកជឿជាក់ថាបេក្ខជនប្រធានាធិបតីមកពីគណបក្សសាធារណរដ្ឋ លោក ដូណាល់ ត្រាំ (Donald Trump) មានចិត្តស្មោះចង់បញ្ចប់សង្រ្គាមនៅអ៊ុយក្រែនពិតមែន ប៉ុន្តែលោកមិនដឹងទេថាតើលោក ត្រាំ ធ្វើគម្រោងនោះដោយមធ្យោបាយណា ប្រសិនបើជាប់ឆ្នោត។លោក ពូទីន បាននិយាយថា «យើងយកចិត្តទុកដាក់លើរឿងដែលថាលោក ត្រាំ ប្រកាសថាខ្លួនត្រៀមរួចជាស្រេចដើម្បីបញ្ឈប់សង្រ្គាមនៅអ៊ុយក្រែននេះណាស់។ យើងមិនដឹងថាលោកនឹងធ្វើដោយរបៀបណាទេ ប៉ុន្តែយើងគិតថាលោកនិយាយដោយស្មោះ ហើយយើងគាំទ្រគំនិតនោះ»។សារព័ត៌មាន វ៉ាស៊ីនតោន ប៉ុស្តិ៍ (Washington Post) បានរាយការណ៍កាលពីខែមេសាថា លោក ត្រាំ បាននិយាយជាលក្ខណៈឯកជនពីជម្រើសនៃការអនុញ្ញាតឱ្យលោក ពូទីន ទុកតំបន់គ្រីម៉េ (Crimea) និងតំបន់ ឌុនបាស (Donbas) ដើម្បីជាថ្នូរនឹងសន្តិភាព ប៉ុន្តែមិនមានការបញ្ជាក់ពីយុទ្ធនាការលោកនោះទេ។ ទីភ្នាក់ងារព័ត៌មានរ៉យទ័រ បានរាយការណ៍កាលពីខែមុនថា ទីប្រឹក្សាពីរនាក់របស់លោក ត្រាំ បានបង្ហាញលោកនូវផែនការបញ្ចប់សង្រ្គាម ដែលពាក់ព័ន្ធនឹងការប្រាប់អ៊ុយក្រែនថាខ្លួននឹងមិនទទួលបានអាវុធបន្ថែមទៀតពីអាមេរិកទេ ប្រសិនបើមិនចូលរួមក្នុងកិច្ចចរចាសន្តិភាព។លោក ពូទីន បាននិយាយកាលពីខែមុនថា រុស្ស៊ីនឹងបញ្ចប់សង្រ្គាម លុះត្រាតែក្រុងគីវ បានយល់ព្រមទម្លាក់មហិច្ឆតាចូលរួមក្នុងអង្គការណាតូ ហើយប្រគល់ទឹកដីមូលនៃខេត្តចំនួនបួនដែលទាមទារដោយទីក្រុងមូស្គូ ប៉ុន្តែទីក្រុងគីវ បានបដិសេធភ្លាមៗ ហើយថានោះស្មើនឹងការចុះចាញ់៕

លោក Biden និយាយថា 'ខ្ញុំមិនទៅណាទេ' ខណៈមានការអំពាវនាវកាន់តែខ្លាំងឱ្យលោកបោះបង់ចោលការប្រកួតប្រជែង

2024/07/05 04:59:00 pm        229
Facebook Telegram Linkin
លោកប្រធានាធិបតី Joe Biden បាននិយាយថា "ខ្ញុំមិនទៅណាទេ" "I'm not going anywhere" ខណៈលោកប្រឈមកាន់តែខ្លាំងទៅនឹងការអំពាវនាវដោយសមាជិកគណបក្សប្រជាធិបតេយ្យជាច្រើនឲ្យលោកបោះបង់ចោលការប្រកួតប្រជែងការបោះឆ្នោតអាណត្តិថ្មីរបស់លោក ដោយប្រើការប្រារព្ធពិធីទិវាបុណ្យឯករាជ្យ៤កក្កដា កាលពីថ្ងៃព្រហស្បតិ៍ទី ៤ ខែកក្កដា ដើម្បីឆ្លើយតបទៅនឹងការមន្ទិលសង្ស័យអំពីភាពរឹងមាំទាំងផ្លូវកាយ និងផ្លូវចិត្តរបស់លោក ដើម្បីបន្តយុទ្ធនាការសម្រាប់ការបោះឆ្នោតនៅខែវិច្ឆិកាឆ្នាំនេះ ។ ការបង្ហាញភាពរង្គោះរង្គើរបស់អ្នកប្រជាធិបតេយ្យវ័យ៨១ ឆ្នាំ នៅឯការជជែកដេញដោលកាលពីថ្ងៃទី ២៧ ខែមិថុនា ជាមួយគូប្រជែងមកពីគណបក្សសាធារណរដ្ឋលោក Donald Trump មានន័យថារាល់ការលេចមុខរបស់លោកឥឡូវនេះត្រូវបានគេតាមដានយ៉ាងដិតដល់។ អ្នកបោះឆ្នោតឲ្យបក្សប្រជាធិបតេយ្យជាច្រើនព្រួយបារម្ភថាតើរូបលោកអាចរក្សាល្បឿននៃការងារដ៏លំបាកក្នុងរយៈពេល៤ឆ្នាំកន្លះ ខាងមុខបានដែរឬអត់ ហើយសមាជិកមួយចំនួននៅក្នុងគណបក្សរបស់លោកបានជំរុញឱ្យលោកបោះបង់ចោលការប្រជែងតំណែងប្រធានាធិបត្តីអាណត្តិបន្ទាប់ទៅ។ អំឡុងសុន្ទរកថារបស់លោក លោក Biden បាននិយាយថា អ្នករាល់គ្នាបានស្គាល់ខ្ញុំហើយ ។ ខ្ញុំមិនទៅណាទេ ដោយលោកបានបញ្ជាក់ឡើងវិញនូវការសន្យារបស់លោកថា លោកនឹងនៅតែស្ថិតក្នុងការប្រកួតប្រជែង ទោះបីជាមានការអំពាវនាវកាន់តែខ្លាំងឱ្យលោកដកខ្លួនចេញក៏ដោយ៕

លោក Xi ប្រាប់បណ្ដាមេដឹកនាំក្នុងកិច្ចប្រជុំកំពូលអាស៊ីកណ្តាលឱ្យទប់ទល់ នឹងការជ្រៀតជ្រែកពីខាងក្រៅ

2024/07/05 03:56:16 pm        300
Facebook Telegram Linkin
ប្រព័ន្ធផ្សព្វផ្សាយរដ្ឋបានរាយការណ៍ថា ប្រធានាធិបតីចិនលោក Xi Jinping បានប្រាប់ដល់បណ្ដាមេដឹកនាំនៅក្នុងកិច្ចប្រជុំកំពូលអាស៊ីកណ្តាលនៅរដ្ឋធានី អាស្តាណា (Astana) ប្រទេសកាហ្សាក់ស្ថានកាលពីថ្ងៃព្រហស្បតិ៍ ទី ៤ ខែកក្កដា ឲ្យទប់ទល់នឹងការជ្រៀតជ្រែកពីកម្លាំងខាងក្រៅ ។ យោងតាមទូរទស្សន៍រដ្ឋ CCTV លោក Xi បានប្រាប់កិច្ចប្រជុំអង្គការសហប្រតិបត្តិការសៀងហៃ (SCO) ថា យើងគួរតែរួមដៃគ្នាដើម្បីទប់ទល់នឹងការជ្រៀតជ្រែកពីកម្លាំងខាងក្រៅ គាំទ្រគ្នាទៅវិញទៅមកយ៉ាងរឹងមាំ ខ្វល់ខ្វាយពីក្ដីកង្វល់របស់គ្នាទៅវិញទៅមក និងគ្រប់គ្រងយ៉ាងរឹងមាំនូវអនាគត និងជោគវាសនានៃប្រទេសរបស់យើង ក៏ដូចជាសន្តិភាព និងការអភិវឌ្ឍន៍ក្នុងតំបន់នៅក្នុងដៃរបស់យើង។ អង្គការសហប្រតិបត្តិការសៀងហៃ ដែលគ្របដណ្ដប់លើពិភពលោកដ៏ច្រើនសន្ធឹកសន្ធាប់ចាប់ពីទីក្រុងមូស្គូ ដល់ទីក្រុងប៉េកាំង រួមមានប្រជាជនប្រហែលពាក់កណ្តាលនៃពិភពលោក ហើយកាលពីថ្ងៃព្រហស្បតិ៍បានស្វាគមន៍សមាជិកទី ១០ របស់ខ្លួនគឺប្រទេសបេឡារុស។ សមាជិកអចិន្ត្រៃយ៍ផ្សេងទៀតរបស់អង្គការនេះ ដែលជាម្ចាស់ផ្ទះឆ្នាំនេះ គឺ កាហ្សាក់ស្ថាន ឥណ្ឌា ចិន កៀហ្ស៊ីស៊ីស្ថាន ប៉ាគីស្ថាន រុស្ស៊ី តាជីគីស្ថាន អ៊ូសបេគីស្ថាន និងអ៊ីរ៉ង់។ទូរទស្សន៍ CCTV បានរាយការណ៍ថាលោក Xi បាននិយាយថា ពិភពលោកឈរម្តងទៀតនៅចំណុចផ្លូវបំបែក។ពិតជាមានសារៈសំខាន់ខ្លាំងណាស់សម្រាប់ពិភពលោកដែលអង្គការសហប្រតិបត្តិការសៀងហៃ ឈរនៅខាងស្តាំនៃប្រវត្តិសាស្ត្រ និងនៅលើផ្នែកនៃការស្មើភាពគ្នា និងយុត្តិធម៌៕

ផ្លូវជនបទនៅទូទាំងប្រទេស កំពុងត្រូវបានកែលម្អ និងថែទាំ ដើម្បីជួយសម្រួល​ដល់​ជីវភាពពលរដ្ឋ

2024/07/05 03:48:20 pm        382
Facebook Telegram Linkin
ភ្នំពេញ៖ រាជរដ្ឋាភិបាលកម្ពុជា តាមរយៈក្រសួងអភិវឌ្ឍន៍ជនបទ បាននិង​កំពុង​ធ្វើ​ការ​កសាង​ជួស​ជុល​កែ​លម្អ នូវផ្លូវជនបទនានា ឱ្យប្រែក្លាយទៅជាផ្លូវបេតុង ផ្លូវក្រាលកៅស៊ូ និងផ្លូវក្រាល​គ្រួស​ក្រហម​ជាដើម ដែលការអភិវឌ្ឍទាំងអស់នេះ កំពុងជួយជំរុញកំណើនសេដ្ឋកិច្ច របស់ពលរដ្ឋ​នៅ​តាម​មូលដ្ឋាន ជាពិសេសពលរដ្ឋនៅតំបន់ជនបទ។ ក្នុងឱកាសដឹកនាំគណៈកម្មការអន្តរក្រសួង ចុះពិនិត្យវាយតម្លៃផ្លូវចំនួន ៥ខ្សែ និងជួប​សំណេះ​សំណាល​អាជ្ញាធរ និងពលរដ្ឋ ក្នុងខេត្តព្រៃវែង ខេត្តកណ្ដាល និងខេត្តសៀមរាប នាថ្ងៃទី៤ ខែ​កក្កដា ឆ្នាំ២០២៤ ឯកឧត្តម ឈឹម សៅគី រដ្ឋលេខាធិការប្រចាំការ តំណាងឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ មានប្រសាសន៍ថា រាជរដ្ឋាភិបាល បាននិង​កំពុង​ខិតខំ​អភិវឌ្ឍ​ប្រទេសជាតិ លើគ្រប់វិស័យឱ្យកាន់តែមានភាពរីកចម្រើនទៅមុខ ដោយបានដាក់​ចេញ​នូវ​យុទ្ធ​សាស្ត្រ​បញ្ចកោណ ដែលបានកំណត់អាទិភាពគន្លឹះ៥ គឺ៖ មនុស្ស ផ្លូវ ទឹក ភ្លើង និងបច្ចេក​វិទ្យា​ឌីជីថល ជាបាវចនា ដើម្បីកំណើនការងារ សមធម៌ ប្រសិទ្ធភាព និងចីរភាព ក្នុង​គោល​ដៅ​អភិវឌ្ឍ​ប្រទេស ឈានឆ្ពោះទៅសម្រេចចក្ខុវិស័យកម្ពុជា ជាប្រទេសមានចំណូលមធ្យមកម្រិតខ្ពស់ នៅឆ្នាំ២០៣០ និងចំណូលខ្ពស់នៅឆ្នាំ២០៥០។ ឯកឧត្តមបានបន្តទៀតថា ជាមួយនេះ ក្រសួងអភិវឌ្ឍន៍ជនបទ កំពុងពន្លឿនកិច្ចអភិវឌ្ឍន៍ និង​ជំរុញ​ការ​អនុវត្តនូវយុទ្ធសាស្ដ្រសំខាន់ៗ រួមមាន ទី១. អភិវឌ្ឍហេដ្ឋារចនាសម្ព័ន្ធរូបវន្ត និង​គមនាគមន៍​ជនបទប្រទាក់ក្រឡា ដោយការខិតខំលើកកម្ពស់កម្រិតគុណភាពផ្លូវពីផ្លូវដីស និង​ផ្លូវ​ដី​ល្បាយក្រួស ទៅជាផ្លូវក្រាលកៅស៊ូពីរជាន់ និងផ្លូវបេតុង, ទី២. កែ​លម្អ​លក្ខខណ្ឌ​នៃ​ការ​រស់​នៅ​របស់​សហគមន៍ជនបទ តាមរយៈការជំរុញអាត្រាគ្របដណ្ដប់នៃការផ្គត់ផ្គង់ទឹកស្អាត និងអនាម័យ​ជន​បទ​១០០ភាគរយ, ទី៣. ការធ្វើពិពិធកម្មសកម្មភាពសេដ្ឋកិច្ចជនបទ តាមរយៈ​ការ​បណ្តុះ​បណ្តាល​ជំនាញ​មូលដ្ឋានបំណិនជីវិត ដើម្បីបង្កើតការងារ និងមុខរបរ ដើម្បីបង្កើនប្រាក់​ចំណូល​បន្ថែម​ ក្នុងគោលដៅលើកកម្ពស់ជីវភាព និងសេដ្ឋកិច្ចនៅជនបទឱ្យមានការរីកចម្រើន ជា​ពិសេស​ការ​ពង្រឹង​តួនាទី ភារកិច្ចរបស់គណៈកម្មការអភិវឌ្ឍន៍ភូមិ ដើម្បីជំរុញការអភិវឌ្ឍភូមិគំរូ និងទី៤. ការ​ពង្រឹង​ស្ថាប័ន និងកិច្ចការ តាមរយៈបណ្ដុះបណ្ដាល ពង្រឹងសមត្ថភាព​មន្ដ្រី​រាជ​ការ​គ្រប់​លំ​ដាប់​ថ្នាក់, ការរៀបចំសណ្ដាប់ធ្នាប់ និងការពង្រឹងសាមគ្គីភាព ដើម្បី​ចូល​រួម​ចំណែក​អនុវ​ត្ត​ការងារ​ប្រកប​ដោយ​ប្រសិទ្ធភាព និងការទទួលខុសត្រូវ។  ជាមួយនេះ គណៈកម្មាធិការអន្តរក្រសួង បានណែនាំដល់អ្នកទទួលការ និងបងប្អូនប្រជាពលរដ្ឋ ឱ្យ​ជួយថែទាំផ្លូវនេះ ឱ្យបានដិតដល់ ដើម្បីធានាថា អាចប្រើប្រាស់បានយូរអង្វែង បម្រើ​ផល​ប្រយោជន៍​ជូន​ប្រជាពលរដ្ឋ ។ គួរបញ្ជាក់ថា ផ្លូវទាំង៥ខ្សែ ស្ថាបនាដោយនាយកដ្ឋានកងវិស្វកម្ម នៃក្រសួងការពារជាតិ មាន​ការ​ចូល​រួម​ពីឯកឧត្តមបណ្ឌិត នួន ដាញ៉ិល រដ្ឋលេខាធិការ ក្នុងការចូលរួមចុះពិនិត្យវាយតម្លៃផងនោះ មាន​ទី១. ផ្លូវក្រាលកៅស៊ូ DBST ចំនួន១ខ្សែ ប្រវែង២ ៨០០ម៉ែត្រ មានស្ថាបនា​លូ​មូល​មុខ​ពីរ​ចំនួន​១​កន្លែង និងលូមូលមុខមួយចំនួន ២កន្លែង ស្ថិតនៅភូមិតាគោក ឃុំល្វា ទៅភូមិពាយនាយ ឃុំ​ក្រាំស្វាយ ស្រុកព្រះស្តេច ខេត្តព្រៃវែង, ទី២. ផ្លូវក្រាលកៅស៊ូ DBST ចំនួន ១ខ្សែ ប្រវែង ២ ៨០០​ម៉ែត្រ ស្ថាបនាលូមូលមុខមួយចំនួន ៤កន្លែង ស្ថិតនៅភូមិក្តីស្គា ឃុំជៃកំពត ទៅភូមិ​គោក​សំពៅ ឃុំក្រាំស្វាយ ស្រុកព្រះស្តេច ខេត្តព្រៃវែង, ទី៣. ផ្លូវក្រាលបេតុងចំនួន ១ខ្សែ ប្រវែង ១ ១២០​ម៉ែត្រ ស្ថិតនៅភូមិជ្រៃលាស់ ឃុំជ័យធំ ស្រុកខ្សាច់កណ្តាល ខេត្តកណ្តាល និងទី៤. ផ្លូវ​ក្រាល​កៅ​ស៊ូ DBST ចំនួន ២ខ្សែ ប្រវែង ២ ៥០០ម៉ែត្រ និងស្ថាបនាលូមូលមុខមួយចំនួន ២​កន្លែង ស្ថិតនៅភូមិតាយ៉ុន ទៅភូមិអូរក្រោម ឃុំស្ពានត្នោត ស្រុកជីក្រែង ខេត្តសៀមរាប ៕ អត្ថបទ បាន សុខរិទ្ធិ

ការស្ទង់មតិ៖លោក Starmer ត្រៀមខ្លួនធ្វើជានាយករដ្ឋមន្ត្រីចក្រភពអង់គ្លេស ខណៈគណបក្សអភិរក្សនិយម ប្រឈមនឹងការបរាជ័យដ៏ធ្ងន់ធ្ងរ

2024/07/05 03:11:44 pm        257
Facebook Telegram Linkin
ការស្ទង់មតិកាលពីថ្ងៃព្រហស្បតិ៍ ទី៤ ខែកក្កដា បានបង្ហាញថា លោក គៀរ ស្តាមើ (Keir Starmer) នឹងក្លាយជានាយករដ្ឋមន្ត្រីបន្ទាប់របស់ចក្រភពអង់គ្លេសដោយគណបក្សការងាររបស់លោកអាចនឹងឈ្នះសំឡេងភាគច្រើននៅក្នុងការបោះឆ្នោតសភា ខណៈគណបក្សអភិរក្សរបស់លោកនាយករដ្ឋមន្ត្រី Rishi Sunak ត្រូវបានព្យាករណ៍ថានឹងទទួលរងការបរាជ័យដ៏ធ្ងន់ធ្ងរជាប្រវត្តិសាស្ត្រ។ គណបក្សការងារ ឆ្វេងនិយមកណ្តាលកំពុងឈានទៅរកការដណ្តើមបានអាសនៈ ៤១០ ក្នុងចំណោមអាសនៈសរុបនៅក្នុងសភាចំនួន៦៥០ ដែលជាការបញ្ច្រាសដ៏គួរឱ្យភ្ញាក់ផ្អើលខុសពីរយៈពេល៥ ឆ្នាំមុននៅពេលដែលគណបក្សនេះ បានបរាជ័យដ៏ធ្ងន់ធ្ងរបំផុតចាប់តាំងពីឆ្នាំ ១៩៣៥ មក ។ លទ្ធផលនឹងផ្តល់ឱ្យគណបក្សការងារនូវអាសនៈចំនួន១៧០លើសំឡេងភាគច្រើនដាច់ខាត ហើយនឹងឈានដល់ការបញ្ចប់ការដឹកនាំ រយៈពេល ១៤ ឆ្នាំនៃរដ្ឋាភិបាលដឹកនាំដោយគណបក្សអភិរក្សនិយមកាន់តែមានភាពច្របូកច្របល់។ លោក ស្តាមើ (Starmer) បាននិយាយនៅលើបណ្ដាញសង្គម X ថា ចំពោះអ្នកគ្រប់គ្នាដែលបានធ្វើយុទ្ធនាការសម្រាប់បក្សការងារនៅក្នុងការបោះឆ្នោតនេះ ចំពោះអ្នកគ្រប់គ្នាដែលបានបោះឆ្នោតឱ្យយើង ហើយដាក់ការជឿជាក់របស់ពួកគេចំពោះគណបក្សការងារដែលបានផ្លាស់ប្តូររបស់យើង សូមអរគុណ ។ គណបក្សរបស់លោក Sunak ត្រូវបានគេព្យាករណ៍ថានឹងដណ្តើមបានត្រឹមតែ ១៣១ អាសនៈប៉ុណ្ណោះ ពោលគឺធ្លាក់ចុះពីអាសនៈចំនួន៣៤៦ ពេលដែលសភាត្រូវបានរំលាយ ខណៈអ្នកបោះឆ្នោតដាក់ទណ្ឌកម្មលើក្រុមអភិរក្សសម្រាប់វិបត្តិនៃការចំណាយខ្ពស់ក្នុងជីវភាពរស់នៅប្រចាំថ្ងៃ និងអស្ថិរភាពជាច្រើនឆ្នាំ និងការដណ្ដើមអំណាចគ្នា ដែលបានមើលឃើញនាយករដ្ឋមន្ត្រីដល់ទៅ៥រូបផ្សេងគ្នាចាប់តាំងពីឆ្នាំ ២០១៦ មក៕

លោក Putin ជួបលោក Xi ជាលើកទីពីរចាប់តាំងពីខែឧសភា ខណៈចំណងមិត្តភាពកាន់តែរឹងមាំ

2024/07/04 09:07:25 pm        284
Facebook Telegram Linkin
ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បានសាទរចំពោះ «ភាពជាដៃគូពេញលេញ» របស់រុស្ស៊ី ជាមួយចិន ខណៈលោកបានជួបសមភាគីចិន លោក ស៊ី ជីនពីង (Xi Jinping) ជាលើកទីពីរក្នុងរយៈពេលតិចជាងពីរខែ ដោយបង្ហាញពីការឱបក្រសោបយ៉ាងជ្រាលជ្រៅរបស់ទីក្រុងមូស្គូ ចំពោះក្រុងប៉េកាំង។លោក ពូទីន បាននិយាយនៅក្នុងកិច្ចប្រជុំមួយនៅខាងក្រៅជំនួបកំពូលសន្តិសុខកាលពីថ្ងៃពុធ (០៣ កក្កដា) នៅទីក្រុង អាស្តាណា (Astana) ប្រទេសកាហ្សាក់ស្ថានថា ទំនាក់ទំនងរុស្ស៊ី-ចិន «គឺល្អបំផុតនៅក្នុងប្រវត្តិសាស្ត្រ ហើយត្រូវបានបង្កើតឡើងដោយឈរលើសមភាព ផលប្រយោជន៍រួម និងការគោរពអធិបតេយ្យភាពរបស់គ្នាទៅវិញទៅមក»។លោក ស៊ី បានហៅលោក ពូទីន ថាមិត្តសម្លាញ់ ហើយសម្ដែងភាពរីករាយនៅក្នុងកិច្ចប្រជុំថ្មីរបស់មេដឹកនាំទាំងពីរ។ ក្រសួងការបរទេសចិន បាននិយាយក្នុងសេចក្ដីថ្លែងការណ៍ថា លោក ស៊ី បានលើកឡើងថា ចិន និងរុស្ស៊ី គួរតែបន្តពង្រឹងការសម្របសម្រួលជាយុទ្ធសាស្ត្រ និងប្រឆាំងនឹងការជ្រៀតជ្រែកពីខាងក្រៅ។ ចំពោះបញ្ហាអ៊ុយក្រែន លោក ស៊ី បានរំលឹកឡើងវិញថា ចិនគឺ «តែងតែឈរនៅខាងភាពត្រឹមត្រូវនៃប្រវត្តិសាស្រ្ត» ហើយមានឆន្ទៈក្នុងការខិតខំប្រឹងប្រែងជាវិជ្ជមានដើម្បីលើកកម្ពស់កិច្ចចរចាសន្តិភាព និងដំណោះស្រាយនយោបាយ។ចិន និងរុស្ស៊ី បានរួបរួមគ្នាក្នុងបេសកកម្មមួយដើម្បីទប់ទល់នឹងសហរដ្ឋអាមេរិក ខណៈដែលប្រទេសទាំងពីរប្រឈមមុខនឹងការត្រួតពិនិត្យកាន់តែខ្លាំងឡើងពីលោកខាងលិចជុំវិញគោលដៅយោធារបស់មេដឹកនាំប្រទេសទាំងពីរ៕

ក្រុមប្រដាប់អាវុធអ៊ីរ៉ាក់ថា ខ្លួនត្រៀមរួចរាល់ដើម្បីប្រយុទ្ធនឹងអ៊ីស្រាអែល បើសង្គ្រាមលីបង់ ផ្ទុះឡើង

2024/07/04 08:57:17 pm        335
Facebook Telegram Linkin
ខណៈពេលដែលសង្រ្គាមកំពុងតែបន្តនៅតំបន់ហ្កាហ្សា និងគំរាមកំហែងរីករាលដាលដល់ប្រទេសលីបង់ បណ្ដាក្រុមសកម្មប្រយុទ្ធអ៊ីរ៉ាក់ បានព្រមានថាពួកគេត្រៀមខ្លួនរួចជាស្រេចដើម្បីចូលទៅក្នុងជម្លោះប្រឆាំងនឹងអ៊ីស្រាអែល និងសហរដ្ឋអាមេរិក។ មេបញ្ជាការតំបន់នៃចលនាតស៊ូអ៊ីស្លាមនិយមនៅក្នុងប្រទេសអ៊ីរ៉ាក់បាននិយាយថា នឹងមានការប្រើប្រាស់ «កម្លាំងទល់កម្លាំង» នៅក្នុងព្រឹត្តិការណ៍នៃសង្រ្គាមពេញលេញនៅលីបង់។ មេបញ្ជាការនោះបាននិយាយទៅកាន់សារព័ត៌មាន AFP ក្នុងលក្ខខណ្ឌមិនបញ្ចេញឈ្មោះថា ក្រុមដែលគាំទ្រដោយអ៊ីរ៉ង់ បានបញ្ជូន «អ្នកជំនាញ និងទីប្រឹក្សា» ទៅកាន់លីបង់ រួចរាល់ហើយ។អ្នកវិទ្យាសាស្ត្រនយោបាយអ៊ីរ៉ាក់ លោក អាលី អាល់-បៃដា (Ali al-Baidar) បានយល់ស្របថា ប្រសិនបើមានសង្គ្រាមដ៏ធំមួយរវាងអ៊ីស្រាអែល និងក្រុមហេសបូឡា (Hezbollah) របស់លីបង់ «នោះវានឹងមិនស្ថិតនៅតែចំពោះទឹកដីលីបង់ទេ»។ លោកនិយាយថា ក្រុមប្រដាប់អាវុធនៅអ៊ីរ៉ាក់ និងនៅក្នុងតំបន់ នឹងចូលរួមក្នុងការប្រឈមមុខដាក់គ្នានោះ ដោយបន្ថែមថាពួកគេនឹងចង់បង្ហាញ «សមត្ថភាពរបស់ខ្លួន ប៉ុន្តែក៏ចង់បង្ហាញពីភាពស្មោះត្រង់ចំពោះសម្ព័ន្ធមិត្តរបស់ពួកគេផងដែរ»។សង្គ្រាមនៅតំបន់ហ្កាហ្សា ដ៏បង្ហូរឈាមបំផុតមិនធ្លាប់មានបានផ្ទុះឡើង នៅពេលដែលក្រុមសកម្មប្រយុទ្ធប៉ាឡេស្ទីនហាម៉ាស វាយប្រហារភាគខាងត្បូងអ៊ីស្រាអែលកាលពីថ្ងៃទី០៧ ខែតុលា។ ជម្លោះនេះបានពង្រីកយ៉ាងឆាប់រហ័សដោយមានការពាក់ព័ន្ធនឹងក្រុមប្រដាប់អាវុធគាំទ្រដោយអ៊ីរ៉ង់ជាច្រើន ហៅថា «ចលនាអ័ក្សនៃការតស៊ូ» ដែលបង្ហាញពីសាមគ្គីភាពជាមួយប៉ាឡេស្ទីន និងទាមទារឱ្យមាន បញ្ចប់ការវាយលុករបស់អ៊ីស្រាអែល នៅហ្កាហ្សា៕

ការិយាល័យបោះឆ្នោត ត្រូវបានបើកនៅទូទាំងចក្រភពអង់គ្លេស សម្រាប់ការបោះឆ្នោតសកល

2024/07/04 08:44:54 pm        219
Facebook Telegram Linkin
អ្នកបោះឆ្នោត កំពុងទៅបោះឆ្នោតនៅទូទាំងចក្រភពអង់គ្លេស នៅថ្ងៃព្រហស្បតិ៍ ក្នុងការបោះឆ្នោតសកល ដែលត្រូវបានគេរំពឹងថា នឹងផ្តល់រដ្ឋាភិបាលនៃគណបក្សការងារជាលើកដំបូង ក្នុងរយៈពេល ១៤ឆ្នាំ។ការិយាល័យបោះឆ្នោតក្នុងមណ្ឌលបោះឆ្នោតចំនួន ៦៥០ទីតាំង នៅទូទាំងប្រទេសអង់គ្លេស វ៉ែលស៍ ស្កុតឡែន និងអៀរឡង់ខាងជើង បើកពីម៉ោង៧ ព្រឹកដល់ម៉ោង ១០យប់។ ការរាប់សន្លឹកឆ្នោត នឹងចាប់ផ្ដើម ភ្លាមៗ បន្ទាប់ពីការបោះឆ្នោត ចប់ ដោយលទ្ធផល នឹងត្រូវបានប្រកាស នៅព្រឹកថ្ងៃសុក្រ។ការប្រកួតប្រជែងនេះ បានបិទបញ្ចប់យុទ្ធនាការឃោសនារយៈពេល ៦សប្តាហ៍ ដោយលោកនាយករដ្ឋមន្ត្រី រីស៊ី ស៊ុណាក់ (Rishi Sunak) និងមេដឹកនាំគណបក្សប្រឆាំង លោក Keir Starmer។ ការបោះឆ្នោតនេះ កើតឡើងបន្ទាប់សម័យកាលមួយ ដែលចក្រភពអង់គ្លេស មាននាយករដ្ឋមន្ត្រីអភិរក្សចំនួនបីរូប ក្នុងរយៈពេលជិត ៥ឆ្នាំ។នេះគឺជាការបោះឆ្នោតលើកដំបូងដែលធ្វើឡើង ក្នុងខែកក្កដា ចាប់តាំងពីឆ្នាំ ១៩៤៥ បន្ទាប់ពីលោក ស៊ុណាក់ បានធ្វើឲ្យមានការភ្ញាក់ផ្អើលនៅទូទាំងប្រទេស កាលពី ៦សប្តាហ៍មុន ហើយ បានជំរុញឲ្យមានការស្ទង់មតិមួយ នៅរដូវក្តៅ។គណបក្សការងារ កំពុងស្វែងឲ្យមានការបោះឆ្នោតទៅលើកម្មវិធីនៃការផ្លាស់ប្តូរ ហើយបានសន្យាថា នឹងបង្កើតក្រុមហ៊ុនថាមពលដែលជាកម្មសិទ្ធិសាធារណៈថ្មីមួយ ធ្វើតូបនីយកម្មផ្លូវដែក កាត់បន្ថយការធ្វើ ទេសន្តប្រវេសន៍ ជ្រើសរើសគ្រូបង្រៀនចំនួន ៦.៥០០នាក់ និងបង្កើតកន្លែងបណ្តុះបណ្ដាលថ្មីជាង ១០០.០០០កន្លែង។

លោកស្រី Kamala Harris ជាជម្រើសទីមួយជំនួសបេក្ខភាពលោក Biden បើលោកសម្រេចចាកចេញ

2024/07/04 06:48:08 pm        272
Facebook Telegram Linkin
យោងតាមប្រភពជាន់ខ្ពស់ចំនួនប្រាំពីរនៅយុទ្ធនាការបោះឆ្នោតរបស់លោក ចូ បៃដិន (Joe Biden) សេតវិមាន និងគណៈកម្មាធិការជាតិបក្សប្រជាធិបតេយ្យដែលដឹងពីការពិភាក្សាបច្ចុប្បន្នលើប្រធានបទនេះបានឱ្យដឹងថា អនុប្រធានាធិបតីអាមេរិក លោកស្រី ខាម៉ាឡា ហារីស (Kamala Harris) គឺជាជម្រើសទីមួយដើម្បីជំនួសប្រធានាធិបតីសហរដ្ឋអាមេរិក លោក ចូ បៃដិន (Joe Biden) ប្រសិនបើលោកសម្រេចចិត្តមិនបន្តយុទ្ធនាការបោះឆ្នោតឡើងវិញ។ការធ្វើមិនបានល្អក្នុងការជជែកដេញដោលលើកទីមួយដ៏ច្របូកច្របល់ ហើយជួនកាលមិនស៊ីសង្វាក់គ្នា របស់លោក Biden ប្រឆាំងនឹងគូប្រជែងរបស់ខ្លួនគឺលោក ដូណាល់ ត្រាំ (Donald Trump) កាលពីសប្តាហ៍មុន បានធ្វើឱ្យមានរលកនៃការភ័យស្លន់ស្លោនៅក្នុងបក្សប្រជាធិបតេយ្យ ជុំវិញការព្រួយបារម្ភថាលោកប្រហែលជាមិនស័ក្ដិសមគ្រប់គ្រាន់ក្នុងការបម្រើអាណត្តិទីពីរ ហើយបានជំរុញឱ្យមន្រ្តីជំនិត អំពាវនាវឱ្យលោកលាលែងពីតំណែងបេក្ខជននេះ។សមាជិកបក្សប្រជាធិបតេយ្យ ដែលមានឥទ្ធិពលមួយចំនួន បានបង្ហើបជម្រើសជំនួសលោក Biden ក្រៅពីលោកស្រី Harris រួមទាំងសមាជិកគណៈរដ្ឋមន្ត្រីដ៏ពេញនិយម និងអភិបាលរដ្ឋប្រជាធិបតេយ្យជាច្រើនរូបទៀត ប៉ុន្តែប្រភពបាននិយាយថា ពួកគេគិតថាលោកស្រី Harris គឺជម្រើសស័ក្ដិសមជាងគេ។ប្រភពបានបន្តថា ប្រសិនបើត្រូវបានតែងតាំងជាបេក្ខភាពប្រធានាធិបតី លោកស្រី Harris វ័យ ៥៩ ឆ្នាំរូបនេះនឹងកាន់កាប់ប្រាក់ដែលរៃអង្គាសដោយយុទ្ធនាការលោក Biden និងទទួលគ្រប់គ្រងរចនាសម្ព័ន្ធយុទ្ធនាការបោះឆ្នោត។ ប្រភពបានបន្ថែមថា លោកស្រីមានឈ្មោះល្បីបំផុតក្នុងចំណោមជម្រើសទាំងអស់ និងមានការបោះឆ្នោតគាំទ្រខ្ពស់បំផុតក្នុងចំណោមសមាជិកបក្សប្រជាធិបតេយ្យដែលអាចចាត់ទុកលោកស្រីថាជាបេក្ខជនស័ក្ដិសម៕

សម្តេចធិបតី៖ ធនធានមនុស្សជាកត្តាសំខាន់បំផុតដែលរាជរដ្ឋាភិបាល ត្រូវបន្តវិនិយោគដោយខានមិនបាន

2024/07/04 06:41:38 pm        234
Facebook Telegram Linkin
សម្តេចធិបតី ហ៊ុន ម៉ាណែត នាយករដ្ឋមន្រ្តី បានលើកឡើងថា ធនធានមនុស្សគឺជាកត្តាសំខាន់បំផុត ដែលរាជរដ្ឋាភិបាលនឹងត្រូវបន្តវិនិយោគដោយខានមិនបាន តាមរយៈការឧបត្ថម្ភ និងដំឡើងប្រាប់បៀវត្សជូនដល់លោកគ្រូ អ្នកគ្រូជាបន្តបន្ទាប់តាំងពីដើមរហូតដល់បច្ចុប្បន្ន និងទៅអនាគត។ក្នុងឱកាសអញ្ជើញប្រគល់សញ្ញាបត្រជូនដល់គរុសិស្ស និស្សិត និងសម្ពោធដាក់ឲ្យប្រើប្រាស់​អគារអន្តេវាសិកដ្ឋានគ្រូ នៅវិទ្យាស្ថានគរុកោសល្យរាជធានីភ្នំពេញ នាព្រឹកថ្ងៃទី៤ ខែកក្កដា ឆ្នាំ២០២៤នេះ សម្តេចធិបតី ហ៊ុន ម៉ាណែត បានបញ្ជាក់ថា ឆ្អឹងខ្នងរបស់វិស័យអប់រំគឺជាគ្រូ ដូច្នេះគ្រូត្រូវតែខ្លាំង និង ត្រូវតែមានចំណេះចំនាញគ្រប់គ្រាន់ ដែលជាមូលដ្ឋានគ្រឹះក្នុងការធ្វើកំណែ​ទម្រង់​សម្រាប់វិស័យអប់រំនោះ ហើយចំពោះវិស័យអប់រំនេះ គឺរាជរដ្ឋាភិបាលបានបញ្ចេញថវិកាជាតិ​ច្រើន​ជាងក្រសួងស្ថាប័ន ណាៗទាំងអស់ដើម្បីលើកកម្ពស់វិស័យអបរំនេះឲ្យមានស្តង់ដា និងរីកចម្រើនទៅមុខបន្ថែមទៀត។យ៉ាងណាក៏ដោយសម្តេចធិបតី ហ៊ុន ម៉ាណែត នាយករដ្ឋមន្រ្តី បានលើកឡើងផងដែរថា ដើម្បី​ពង្រឹង​គុណភាពលើវិស័យអប់រំរដ្ឋតម្រូវឱ្យលោកគ្រូ អ្នកគ្រូមានចំណេះដល់កម្រិតថ្នាក់​បត្រ​បរិញ្ញាបត្រ និងថ្នាក់បត្របរិញ្ញាបត្រជាន់ខ្ពស់ ​ដោយក្នុងនោះជាចក្ខុវិស័យរបស់រាជរដ្ឋាភិបាល នឹងតម្រូវឲ្យគ្រូបង្រៀននៅ ​បឋមសិក្សានិងអនុវិទ្យាល័យ យ៉ាងហោចណាស់មានកម្រិតថ្នាក់​បរិញ្ញាបត្រ។ក្នុងឱកាសអញ្ជើញប្រគល់សញ្ញាបត្រជូនដល់គរុសិស្ស និស្សិត និងសម្ពោធដាក់ឲ្យប្រើប្រាស់​អគារអន្តេវាសិកដ្ឋានគ្រូ នៅវិទ្យាស្ថានគរុកោសល្យរាជធានីភ្នំពេញនេះដែរ សម្តេចធិបតី​ក៏បានលើកទឹកចិត្តឲ្យលោកគ្រូ ​អ្នកគ្រូទាំងអស់ត្រូវមានការត្រៀមឯកសារ និងការស្រាវជ្រាវបន្ថែម​ទៀត​សម្រាប់សិស្ស និស្សិតរបស់ខ្លួនផងដែរ ដើម្បីឲ្យទាន់សម័យទំនើបបច្ចេកវិទ្យានោះ៕អត្ថបទបាន ចក់

បណ្ដាញសង្គម

ព័ត៌មានថ្មីៗ

ផ្ទះទេវតាទី៣៣៨ មួយខ្នងទៀតដោយមានភ្ជាប់ប្រព័ន្ធភ្លើងសូឡា និងទឹកស្អាត ត្រូវបានលោកជំទាវ ហ៊ុន ម៉ាណា ប្រគល់ជូនពលរដ្ឋខ្វះខាតជីវភាព នៅខេត្តកំពង់ធំ
08/23/2026 05:08 PM
Facebook Telegram Linkin
លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញវឌ្ឍនភាព និងការចាប់ផ្តើមអនុវត្ត “កម្មវិធីលើកកម្ពស់ជីវភាពគ្រួសារយុទ្ធជន តាមរយៈគំរូផលិតកម្មកសិកម្មទំនើប”
08/23/2026 04:08 PM
Facebook Telegram Linkin
លោកជំទាវ ឌី សុខីទីឃាយុកោ ហ៊ុន ម៉ានិត អញ្ជើញប្រគល់អណ្តូងទឹកស្អាត ១០ កន្លែង ជូនប្រជាពលរដ្ឋក្នុងឃុំមានជ័យ ស្រុកឈូក ខេត្តកំពត
08/23/2026 04:08 PM
Facebook Telegram Linkin
ក្រសួងការងារ៖ ខេត្តកំពង់ស្ពឺមានឱកាសការងារជិត ២ម៉ឺនកន្លែងកំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ
08/23/2026 04:08 PM
Facebook Telegram Linkin
ចង់ក្លាយជាអ្នកជំនាញអគ្គិសនី? ឱកាសអាហារូបករណ៍ រៀនជំនាញទំនើប អនុវត្តជាក់ស្តែង រៀនចប់ឆាប់មានការងារធ្វើ រៀននៅវិទ្យាស្ថានពហុបច្ចេកទេសតេជោសែនស្វាយរៀង
08/23/2026 04:08 PM
Facebook Telegram Linkin
ACU នឹងបញ្ជូនមន្ត្រីក្រសួងការបរទេសចំនួន ៣រូប ទៅតុលាការនៅរសៀលនេះ
08/23/2026 03:08 PM
Facebook Telegram Linkin
ក្រសួងការងារ៖ ខេត្ត៤ជាប់សមុទ្រមានឱកាសការងារជិត ២ពាន់កន្លែងកំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ
08/23/2026 03:08 PM
Facebook Telegram Linkin
ក្រសួងការងារ៖ ខេត្តតាកែវមានឱកាសការងារជាង ៦ពាន់កន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ
08/23/2026 03:08 PM
Facebook Telegram Linkin
មនុស្ស ២នាក់ ត្រូវបានសង្រ្គោះ និងមនុស្ស ២២នាក់ បាត់ខ្លួន ក្រោយនាវាដឹកទំនិញលិចនៅជិតតំបន់ឆ្នេរប្រទេសឥណ្ឌា
08/23/2026 03:08 PM
Facebook Telegram Linkin
ជនជាតិម៉ិកស៊ិក ៣៦៥នាក់ ត្រូវបាននិរទេសចេញពីអាមេរិកទៅកាន់ហុងឌូរ៉ាស
08/23/2026 03:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.