BTV NEWS

សម្ដេចធិបតី ដឹកនាំគណៈប្រតិភូចូលក្រាបបង្គំគាល់ព្រះករុណា ព្រះមហាក្សត្រ ទូលថ្វាយលទ្ធផលចុះបញ្ជីបូជនីយដ្ឋានចងចាំនៃកម្ពុជា ក្នុងបញ្ជីបេតិកភណ្ឌពិភពលោក

សភាតំណាងប្រជាជនចិនចាត់ទុកសម្តេចតេជោ ជាតួអង្គសំខាន់បន្តពីព្រះបរមរតនកោដ្ឋក្នុងការពូនជ្រំទំនាក់ទំនងរវាងកម្ពុជា និងចិន

សម្តេចតេជោអនុញ្ញាតឱ្យសមាជិកគណៈកម្មាធិការអចិន្ត្រៃយ៍សភាប្រជាជនចិនជួបសម្តែងការគួរសម

ក្រុមការងារបច្ចេកទេសអន្តរក្រសួងបន្តចុះកំណត់និយាមកា និងបោះបង្គោលព្រំដីតាមបណ្តោយព្រែកជីកហ្វូណនតេជោ សម្រាប់កំណាត់ទី២ ក្នុងភូមិសាស្រ្តខេត្តកំពត

នយោបាយ និង ការអភិវឌ្ឍន៍

ពលរដ្ឋវ័យចាស់នៅខណ្ឌជ្រោយចង្វារ បន្តមកចាក់វ៉ាក់សាំងបង្ការជំងឺកូវីដក្នុងយុទ្ធនាការ១៥ថ្ងៃ

ភ្នំពេញ ៖ ប្រជាពលរដ្ឋរស់នៅខណ្ឌជ្រោយចង្វារ ដែលមានវ័យចាប់ពី៦០ឡើង នាថ្ងៃទី២៤ ខែមីនានេះ បានបន្តមកចាក់វ៉ាក់សាំងបង្ការជំងឺកូវីដ-19 ស្ថិតនៅមណ្ឌលសុខភាពជ្រោយចង្វារ។មានប្រសាសន៍ប្រាប់BTV ក្នុងយុទ្ធនាការ១៥ថ្ងៃចាក់វ៉ាក់សាំងបង្ការជំងឺកូវីដ-19 ជូនពលរដ្ឋក្នុងរាជធានី ភ្នំពេញ ដែលមានវ័យចាប់ពី៦០ ឡើងទៅ នាថ្ងៃទី២៤ ខែមីនានេះ លោក កេត រតនានាយករងរដ្ឋបាលខណ្ឌជ្រោយចង្វារ បានលើកឡើងថា ពលរដ្ឋរស់នៅខណ្ឌជ្រោយចង្វារដែលអាយុចាប់ពី៦០ឆ្នាំឡើង គឺមានជាង៦ពាន់នាក់ ក្នុងនោះ ជាង១ពាន់នាក់ បានចាក់រួចរាល់ និងបន្តចាក់ជូនពលរដ្ឋជាង៤ពាន់បន្ថែមទៀត។លោក បានថា មុនពលរដ្ឋមកចាក់វ៉ាក់សាំង អាជ្ញាធរមូលដ្ឋានទាំង៥សង្កាត់ បានស្រង់ឈ្មោះប្រជាពលរដ្ឋវ័យចាស់ បញ្ចូលក្នុងប្រព័ន្ធកុំព្យូទ័រ រួចបញ្ជូនមកក្រុមគ្រូពេទ្យ ដើម្បីមានឈ្មោះអាចទៅចាក់វ៉ាក់សាំងបាន។លើសពីនេះ លោកសូមអគុណបានចំពោះរាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយរដ្ឋមន្ត្រីកម្ពុជា តែងតែគិតគូរពីសុខទុក្ខប្រជាពលពលរដ្ឋគ្រប់កាលៈទេសៈ។ជាការកត់សំគាល់ យុទ្ធនាការ ១៥ថ្ងៃចាក់វ៉ាក់សាំងបង្ការជំងឺកូវី-19 ជូនពលរដ្ឋវ័យ៦០ឡើង ក្នុងរាជធានីភ្នំពេញ ចាប់ផ្តើមឡើងពីថ្ងៃ២៣ ខែមីនា រហូត ថ្ងៃទី៦ ខែមេសា ឆ្នាំ២០២១។យុទ្ធនាការ នេះ ចាប់ផ្តើមឡើងបន្ទាប់ពីសម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានស្នើដល់លោកជំទាវឱ វណ្ណឌីន ប្រធានគណៈកម្មការចំពោះកិច្ចសម្រាប់ការចាក់វ៉ាក់សាំង និង ឯកឧត្តម ឃួង ស្រេង អភិបាលរាជធានីភ្នំពេញ ពិភាក្សាគ្នាអំពីការបើកយុទ្ធនាការ១៥ថ្ងៃ ដើម្បីចាក់វ៉ាក់សាំង Covishield របស់ក្រុមហ៊ុន Astra Zeneca ដល់មនុស្សចាស់ដែលមានអាយុចាប់ពី៦០ឆ្នាំឡើង នៅក្នុងបណ្តាខណ្ឌទាំង១៤ នៅរាជធានីភ្នំពេញ។ក្រៅពីនេះ សម្តេចតេជោ ហ៊ុន សែន ក៏បានបញ្ជាឱ្យមន្ទីរពេទ្យទាំងអស់ផ្អាកការចាក់វ៉ាក់សាំងនេះដល់អ្នកដែលមានអាយុក្រោម៦០ឆ្នាំជាបណ្ដោះអាសន្នសិន ដើម្បីទុកលទ្ធភាពក្នុងការចាក់វ៉ាក់សាំងដល់មនុស្សចាស់ ចាប់ពីអាយុចាប់ពី៦០ឆ្នាំឡើង។ ប៉ុន្តែទោះជាយ៉ាងនេះក្តី ប្រសិនបើអ្នកទាំងនោះទទួលវ៉ាក់សាំងដូសទី១ហើយ ត្រូវបន្តអនុញ្ញាតឱ្យគាត់ទទួលបានដូសទី២ បន្តទៀត ដោយសារវ៉ាក់សាំងមិនអាចចាក់តែ១លើកទេ៕អត្ថបទ ៖ ទូច សោភ័ណ

ពលរដ្ឋអាយុ៦០ឆ្នាំឡើងទៅជាច្រើនមកទទួលការចាក់វ៉ាក់សាំង និងចាត់ទុកថា វាជាកាតព្វកិច្ច

ភ្នំពេញ ៖ ប្រជាពលរដ្ឋអាយុចាប់ពី ៦០ឆ្នាំឡើងទៅ ក្នុងខណ្ឌច្បារអំពៅ ជាច្រើនបានបន្តមកទទួលការចាក់វ៉ាក់សាំង Astra Zeneca ស្របពេលដែលជំងឺនេះ បន្តរីករាលដាលគួរឱ្យព្រួយបារម្ភ និងមានការស្លាប់ ៥ករណីមកនេះ។ សម្រាប់ការមក ទទួលការចាក់វ៉ាក់សាំងនេះ ពួកគាត់ចាត់ទុកថាវាជាកាតព្វកិច្ចដែលត្រូវបំពេញដើម្បីការពារខ្លួនឯង ការពារគ្រួសារ និងរួមចំណែកការពារសង្គមជាតិ។សម្រាប់ពេលបច្ចុប្បន្នភាពនេះ រាជធានីភ្នំពេញគឺកំពុងបន្តយុទ្ធនាការចាក់វ៉ាក់សាំង AstraZeneca ជូនប្រជាពលរដ្ឋទូទៅដែលមានអាយុចាប់ពី ៦០ឆ្នាំឡើងទៅ។ ការងារនេះ ធ្វើឡើងទន្ទឹមនឹង ការចាក់វ៉ាក់សាំង Sinopharm ជូនក្រុមគោលដៅសម្រាប់លើកទី២ កំពុងបន្តផងដែរ។ សម្រាប់ការចាក់វ៉ាក់សាំងនេះ មាននៅតាមខណ្ឌនីមួយៗ ដោយខណ្ឌច្បារអំពៅ មានការចាក់វ៉ាក់សាំងនៅទីតាំងចំនួនពីរ គឺមន្ទីរពេទ្យបង្អែកច្បារអំពៅ និងមណ្ឌលសុខភាពព្រែកឯង។ ជាទិដ្ឋភាពរួមនៅនៅទីតាំងទាំងពីរនេះ គឺមានវត្តមានក្រុមគោលដៅ និងប្រជាពលរដ្ឋអាយុចាប់ពី៦០ឆ្នាំ ឡើងទៅជាច្រើននាក់មកទទួលការចាក់វ៉ាក់សាំង។ការមកទទួលចាក់វ៉ាក់សាំងនាពេលនេះ ពួកគាត់ជាមនុស្សចាស់ លើកឡើងថា ការចាក់វ៉ាក់សាំងកូវីដនេះឈរលើគោលការណ៍ស្ម័គ្រចិត្ត និងចាត់ទុកថា វាជាកាតព្វកិច្ចសម្រាប់ពួកគាត់ត្រូវបំពេញ សម្រាប់ការពារខ្លួនឯង ការពារគ្រួសារ អ្នកដទៃ និងសង្គមជាតិទាំងមូល។ ពួកគាត់ថា ក្នុងកាលៈទេសៈនេះ គឺត្រូវធ្វើតាមប្រមុខរាជរដ្ឋាភិបាលកម្ពុជា ដើម្បីយកឈ្នះជំងឺនេះ ទាំងអស់គ្នា។សម្រាប់ខណ្ឌច្បារអំពៅ តាមទិន្នន័យពីខាងរដ្ឋបាលខណ្ឌ បង្ហាញថា មានប្រជាពលរដ្ឋវ័យចំណាស់អាយុចាប់ពី៦០ឆ្នាំឡើង សរុបទាំង៨ សង្កាត់ គឺ ១០៩៧១ នាក់ និងមានការចាក់រួចរាល់ចំនួន ៩១៩ នាក់៕ អត្ថបទ ៖ គឹមហុក

ក្រសួងការងារ និង GMAC ចាប់ផ្តើមរៀបចំចាក់វ៉ាក់សាំងកូវីដ-១៩ ជូនកម្មកររោងចក្រកាត់ដេរ

ភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ និងសមាគមរោងចក្រកាត់ដេរនៅកម្ពុជា (GMAC) បានចាប់ផ្តើមរៀបចំការចាក់វ៉ាក់សាំងជំងឺកូវីដ១៩ ដល់កម្មកររោងចក្រកាត់ដេរ នៅកម្ពុជា។នៅក្នុងសេចក្តីជូនដំណឹង កាលពីថ្ងៃទី ២៣ ខែមីនា ក្រសួងការងារ និងបណ្តុះបណ្តាលវិជ្ជាជីវៈ បានស្នើ GMAC ជួយសម្របសម្រួលជាមួយម្ចាស់ ឬ នាយកគ្រប់គ្រង រៀបចំបញ្ជីឈ្មោះគ្រូពេទ្យប្រចាំរោងចក្រចំនួន១រូប ក្នុង១រោងចក្រ ដើម្បីចូលរួមយុទ្ធនា ការចាក់វ៉ាក់សាំងកូវីដ១៩។ក្រសួងការងារ បញ្ជាក់ថា ដើម្បីការពារសុខភាពជូនបងប្អូនកម្មករនិយោជិត ក៏ដូចជាផលប្រយោជន៍រោងចក្រពីការឆ្លងជំងឺកូវីដ១៩ រាជរដ្ឋាភិបាលនឹងរៀបចំយុទ្ធនាការចាក់វ៉ាក់សាំងកូវីដ១៩ ដោយឥតគិតថ្លៃជូនដល់បងប្អូនកម្មករនិយោជិតរោងចក្រ សហគ្រាស នាពេលឆាប់ៗដ៏ខ្លីខាងមុខ។ថ្លែងនៅព្រឹកថ្ងៃទី២៤ មីនា ឆ្នាំ២០២១នេះ លោក កាំង ម៉ូនីកា អគ្គលេខាធិការរង នៃសមាគមរោងចក្រកាត់ដេរនៅកម្ពុជា បានឱ្យដឹងថា បន្ទាប់ពីសេចក្តីជូនដំណឹងស្នើឱ្យម្ចាស់ ឬនាយករោងចក្រដែលជាសមាជិករៀបចំបញ្ជីឈ្មោះគ្រូពេទ្យ ដើម្បីចូលរួមយុទ្ធនាការចាក់វ៉ាក់សាំងកូវីដ១៩ ដល់កម្មករ កម្មការិនី និយោជិត មកដល់ពេលនេះឃើញថា មានការបញ្ជូនឈ្មោះមកជាបណ្តើរៗហើយ។ លោក បានបញ្ជាក់ថា សម្រាប់ការងារនេះ គេបង្កើតជាក្រុមការងារចាស់ មិនមែនរោងចក្រមួយយកគ្រូពេទ្យម្នាក់មកចាក់ទេ គេបង្កើតជាក្រុម មួយក្រុមមានប្រមាណ ១០០នាក់ ចុះទៅតាមរោងចក្រ ឬ តំបន់សេដ្ឋកិច្ចពិសេស ឬសួនឧស្សាហកម្មណាមួយ គេនឹងពិភាក្សាគិតគូរអំពីទីតាំងទៀត នៅពេលនេះ យើងអត់ទាន់ដឹងច្បាស់។សមាគមរោងចក្រកាត់ដេរនៅកម្ពុជា លើកឡើងថា ក្រសួងការងារ និងបណ្តុះបណ្តាល សហការជាមួយក្រសួងសុខាភិបាល នឹងបើកវគ្គបណ្តុះបណ្តាលបច្ចេកទេសចាក់វ៉ាក់សាំងកូវីដ១៩ ជូនដល់គ្រូពេទ្យ (គិលានុបដ្ឋាយិកា) តាមរយៈប្រព័ន្ធអនឡាញ នៅថ្ងៃអង្គារ៍ ទី៣០ ខែមីនាខាងមុខ។ទាក់ទិន និងវ៉ាក់សាំងកូវីដ១៩នេះ ឯកឧត្តម ជួន មុំថុល ប្រធានសហភាពសហព័ន្ធសហជីពជាតិកម្ពុជា បានសម្តែងការអរគុណដល់ប្រមុខរដ្ឋាភិបាល ដែលតែងតែគិតគូរ និងយកចិត្តទុកដាក់ខ្ពស់ជានិច្ចទៅដល់កម្មករនិយោជិត ពិសេសការផ្តល់វ៉ាក់សាំងនេះ ដែលអាចបញ្ចៀសបាននូវហានិភ័យរបស់បងប្អូនកម្មករ។លោក កាំង ម៉ូនីកា ការចាក់វ៉ាក់សាំងកូវីដ១៩ របស់ក្រសួងការងារ គឺសម្រាប់កម្មករនិយោជិត មិនត្រឹមតែរោងចក្រកាត់ដេរសំលៀកបំពាក់ ប៉ុណ្ណោះទេ ប៉ុន្តែក៏សម្រាប់កម្មករនិយោជិត ក្នុងរោងចក្រដេរស្បែកជើង ផលិតផលធ្វើដំណើរ រោងចក្រផលិតកង់ រោងចក្រផលិតគ្រឿងដង្គុំ អេឡិចត្រូនិក ជាដើម។ គិតមកដល់បច្ចុប្បន្ននេះ សមាជិក នៃសមាគមរោងចក្រកាត់ដេរនៅកម្ពុជា រួមមាន ៖ វិស័យរោងចក្រកាត់ដេរ, រោងចក្រផលិត ផលិតផលធ្វើដំណើរ និងរោងចក្រផលិតស្បែកជើង សរុបចំនួនប្រមាណជាង ៦៦០សមាជិក ដែលស្មើនឹងកម្មករនិយោជិតសរុបចំនួនប្រមាណជាង ៧៥ម៉ឺននាក់៕អត្ថបទ ៖ ឈិត បូរ៉ាវី

ស្នងការដ្ឋាននគរបាលរាជធានីភ្នំពេញ ទទួលម៉ាស់ចំនួន៣០ម៉ឺនពីក្រុមហ៊ុន និងសប្បុរសជននានា

ភ្នំពេញ ៖ ស្នងការនគរបាលរាជធានីភ្នំពេញ បានទទួលម៉ាស់ចំនួន៣០ម៉ឺនម៉ាស់ ពីក្រុមហ៊ុន និងសប្បុរសជននានា ដើម្បីបំពេញតម្រូវការចាំបាច់ជូនដល់កងកម្លាំង ក្នុងឱកាសប្រតិបត្តិការបំពេញបេសកកម្មទប់ស្កាត់មេរោគកូវីដ១៩ ។នៅក្នុងកម្មវិធីផ្តល់ និងទទួលម៉ាស់ពីក្រុមហ៊ុន និងសប្បុរសជន នៅថ្ងៃទី២៣ ខែមីនា ឆ្នាំ២០២១នោះ ឧត្តម សេនីយ៍ឯក ស ថេត អគ្គស្នងការរងនគរបាលជាតិ និងជាស្នងការរាជធានីភ្នំពេញ បាន ថ្លែងអំណរគុណ(ប្រធាន ក្រុមហ៊ុន លី ហួរ លីស៊ីងនិងក្រុមហ៊ុន រូស៊ី ហ្គាមែន) ដែលបានយកចិត្តទុកដាក់គិតគូរពីសុខទុក្ខសុវត្ថិភាពដល់កម្លាំងនគរបាលរាជធានីភ្នំពេញ ដែលកំពុងចូលរួមយ៉ាងមមាញឹកលើការងារប្រយុទ្ធប្រឆាំងជំងឺ ឆ្លងកូវីដ១៩ ក្នុងព្រឹត្តិការណ៍សហគមន៍ ២០ កុម្ភៈ។ នេះជាកាយវិការដ៏ប្រពៃក្នុងការចូលរួមជាមួយរាជរដ្ឋាភិបាលកម្ពុជា ដើម្បីបង្ការទប់ស្កាត់ជំងឺឆ្លងកូវីដ១៩។ជាពិសេសបានលើកទឹកចិត្តដល់កម្លាំងនគរបាលរាជធានីភ្នំពេញ ដែលបានបំពេញភារកិច្ចការពារសន្តិសុខ រក្សាសណ្ដាប់ធ្នាប់សុវត្ថិភាពសង្គម។ឯកឧត្តមឧត្តមសេនីយ៍ឯក ស ថេត បានលើកឡើងទៀតថា ជុំវិញការងារបង្ការទប់ស្កាត់ជំងឺឆ្លងកូវីដ១៩នេះ គឺអនុវត្តតាមបទបញ្ជារបស់រាជរដ្ឋាភិបាលកម្ពុជា និងវិធានរបស់ក្រសួងសុខាភិបាលកម្ពុជា កម្លាំងនគរបាលរាជធានីភ្នំពេញ ក្រោមការអនុវត្តតាមបទបញ្ជាផ្ទាល់របស់ឯកឧត្តម នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និងឯកឧត្តម ឃួង ស្រេង អភិបាលរាជធានីភ្នំពេញ នៅក្នុងអង្គភាពតែងតែបានអនុវត្តតាមវិធានរបស់ក្រសួងសុខាភិបាលកម្ពុជាយ៉ាងខ្ជាប់ខ្ជួន ជាពិសេសបានប្រើប្រាស់កម្លាំងចូលរួមការពារសន្តិសុខ រក្សាសណ្តាប់ធ្នាប់នៅគ្រប់គោលដៅធ្វើចត្តាឡីស័ក និងគោលដៅមន្ទីរពេទ្យព្យាបាលជំងឺកូវីដ១៩ យ៉ាងម៉ឺងម៉ាត់ ដើម្បីទប់ស្កាត់អ្នកជំងឺរឺអ្នកធ្វើចត្តាឡីស័ក ដែលមានបំណងរត់គេចវេសមិនអនុវត្តតាមវិធានរបស់ក្រសួងសុខាភិបាល។ជាងនេះទៅទៀត ឯកឧត្តម ស ថេត ក៏បានលើកឡើងផងដែរថា ស្នងការរាជធានីភ្នំពេញបានប្រើប្រាស់កម្លាំងចេញល្បាតតាមរថយន្តចុះត្រួតពិនិត្យគោលដៅ ធ្វើចត្តាឡីស័ក និងគោលដៅព្យាបាលជំងឺកូវីដ១៩ និងបានចូលរួមសហការជាមួយអាជ្ញាធរមូលដ្ឋានបង្ការទប់ស្កាត់ និងបង្ក្រាបទីតាំងក្លឹបកម្សាន្ត ខារ៉ាអូខេ ហាងផឹកស៊ី មិនអនុវត្តតាមវិធានរបស់ក្រសួងសុខាភិបាល,ចូលរួមចែកម៉ាស់និងផ្សព្វផ្សាយជូនប្រជាពលរដ្ឋនៅតាមផ្លូវសាធារណៈ នៅតាមសហគមន៍ពីផលប៉ះពាល់ជំងឺឆ្លងកូវីដ១៩ ហើយឱ្យនាំគ្នាចូលរួមបង្ការទប់ស្កាត់ជំងឺឆ្លងកូវីដ១៩នេះ កុំឱ្យឆ្លងរាលដាលទៅចូលសហគមន៍ផ្សេងទៀត៕អត្ថបទ ៖ បាន ចក់

ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ ទទួលបានការឯកភាពដ៏ខ្ពង់ខ្ពស់ពីសម្ដេចតេជោបើកឱ្យដំណើរការជាបណ្តោះអាសន្ន

ស្ទឹងត្រង់-ក្រូចឆ្មារ៖ ស្ពានមិត្តភាពកម្ពុជា-ចិនប្រវែង ១១៣១ម៉ែត្រ ដែលតភ្ជាប់ទឹកដីនៃស្រុកស្ទឹងត្រង់ និងស្រុកក្រូចឆ្មារ ទទួលបានការឯកភាពដ៏ខ្ពង់ខ្ពស់ពីសម្ដេចតេជោ ហ៊ុន សែន នាយករដ្ឋមន្ត្រី បើកឱ្យដំណើរការជាបណ្តោះអាសន្ន ដើម្បីសម្រួលដល់ការដឹកជញ្ជូន និងការធ្វើដំណើររបស់បងប្អូនប្រជាពលរដ្ឋចាប់ពីថ្ងៃទី២៣ ខែមីនា ឆ្នាំ២០២១ តទៅ។ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំគណៈប្រតិភូ និងអ្នកជំនាញបច្ចេកទេសក្រសួង នាព្រឹកថ្ងៃអង្គារ ១០កើត ខែចេត្រ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី២៣ ខែមីនា ឆ្នាំ២០២១ បានអញ្ជើញចុះពិនិត្យលទ្ធភាពសម្រាប់ដាក់ឱ្យដំណើរការជាបណ្តោះអាសន្នស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ ដោយមានការចូលរួមពីថ្នាក់ដឹកនាំក្រសួង អភិបាលនៃគណៈអភិបាលខេត្តកំពង់ចាម អភិបាលនៃគណៈអភិបាលខេត្តត្បូងឃ្មុំ តំណាងក្រុមហ៊ុនសាងសង់ តំណាងក្រុមហ៊ុនទីប្រឹក្សាបច្ចេកទេស អាជ្ញាធរដែនដី និងភាគីពាក់ព័ន្ធផងដែរ។ស្ពាននេះ ឆ្លងកាត់ទន្លេមេគង្គតភ្ជាប់រវាងស្រុកក្រូចឆ្មារ ខេត្តត្បូងឃ្មុំ និងស្រុកស្ទឹងត្រង់ខេត្ត កំពង់ចាម សាងសង់ឡើង ដោយក្រុមហ៊ុនសាងសង់សំណង់សៀងហៃគ្រុប ខូអិលធីឌី ត្រួតពិនិត្យបច្ចេកទេសដោយក្រុមហ៊ុនក្វាងចូវវ៉ានអាន មានប្រវែងសរុបចំនួន ១១៣១ម៉ែត្រ ទទឹង ១៣,៥ ម៉ែត្រ (ក្នុងនោះមានគន្លងផ្លូវរថយន្ត ៣,៥មx២ គន្លងទោចក្រយានយន្ត ១,៩មx២ គន្លងផ្លូវថ្មើរជើង១,១មx២+០,២៥មx២ (បង្កាន់ដៃ) ជាប្រភេទស្ពានបេតុងសរសៃដែក ឬ បេតុងអាមេ មានបំពាក់ផ្លាក សញ្ញា ចរាចរណ៍ គំនូសចរាចរណ៍ និងបង្គោលភ្លើងបំភ្លឺស្ពាន មានសាងសង់រង្វង់មូលមួយកន្លែងនៅត្រើយខាងលិចផងដែរ។គម្រោងសាងសង់ស្ពានស្ទឹងត្រង់-ក្រូចឆ្មារដែលជាគម្រោងស្ពានមិត្តភាពកម្ពុជាចិនទី៨ ត្រូវបានបើកការដ្ឋានសាងសង់កាលពីថ្ងៃទី១ ខែធ្នូ ឆ្នាំ២០១៧ គ្រោងចំណាយថវិកាប្រមាណ៥៨,៤២លានដុល្លារអាមេរិក រយៈពេលសាងសង់ចំនួន៤២ខែ ជាគម្រោងហិរញ្ញប្បទានឥតសំណងពីរដ្ឋាភិបាលចិន និងថវិកាបដិភាគពីរាជរដ្ឋាភិបាលកម្ពុជា គិតរហូតមកទល់ពេលនេះការសាងសង់សម្រេចបាន១០០%ហើយ។គួរកត់សម្គាល់ផងដែរថា ស្ពាននេះ នឹងជួយទាញភូមិសាស្ត្ររវាងខេត្តកំពង់ចាម និងខេត្តត្បូងឃ្មុំឱ្យកាន់តែកៀកចូលជិតគ្នា ជួយសម្រួលដល់ការធ្វើដំណើររបស់បងប្អូនប្រជាពលរដ្ឋ បម្រើដល់ការដឹកជញ្ជូនទំនិញកសិផលទៅកាន់ទីផ្សារ ទាក់ទាញការវិនិយោគ លើកកម្ពស់ជីវភាពរស់នៅរបស់ប្រជាជន ជាពិសេសចូលរួមចំណែកដល់ការជំរុញកំណើនសេដ្ឋកិច្ចជាតិបានមួយកម្រិតថែមទៀត។នាឱកាសចុះពិនិត្យស្ពាននេះ ឯកឧត្តម ទេសរដ្ឋមន្ត្រីបានជម្រាបជូនថា តាមគម្រោងស្ពាននេះនឹងត្រូវបើកសម្ពោធឱ្យប្រើប្រាស់ជាផ្លូវការ នៅថ្ងៃទី២៤ ខែមីនា ឆ្នាំ២០២១ ក្រោមអធិបតីភាពដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅថ្ងៃស្អែកនេះ ប៉ុន្តែដោយសារព្រឹត្តិការណ៍២០ កុម្ភៈ ទើបមានការលើកពេលវេលានៃការសម្ពោធបើកប្រើប្រាស់ជាផ្លូវការ។ឯកឧត្តម ទេសរដ្ឋមន្ត្រី បានជម្រាបជូនថា ការចុះពិនិត្យនេះធ្វើឡើងក្នុងគោលបំណងដើម្បីគោរពស្នើទៅសម្ដេចនាយករដ្ឋមន្ត្រី សុំបើកស្ពាននេះ ឱ្យប្រជាពលរដ្ឋប្រើប្រាស់ជាបណ្ដោះអាសន្នដើម្បីសម្រួលដល់ការដឹកជញ្ជូន និងការធ្វើដំណើររបស់បងប្អូនប្រជាពលរដ្ឋនៅក្នុងឱកាសពិធីបុណ្យចូលឆ្នាំខ្មែរប្រពៃណីជាតិខាងមុខ។ ជាការឆ្លើយតប សម្តេច នាយករដ្ឋមន្ត្រី បានឯកភាពបើកឱ្យបងប្អូនប្រជាពលរដ្ឋប្រើប្រាស់ស្ពាននេះ ជាបណ្ដោះអាសន្នចាប់ពីថ្ងៃនេះទៅ រង់ចាំពេលវេលាសមស្របណាមួយ ដើម្បីបើកសម្ពោធឱ្យប្រើប្រាស់ជាផ្លូវការ ៕អត្ថបទ ៖ តារាវុទ្ធី

ពលរដ្ឋក្នុងខណ្ឌចំការមនជាង ៤ពាន់នាក់វ័យពី ៦០ឆ្នាំឡើង នឹងទទួលបានវ៉ាក់សាំងបង្ការកូវីដ-១៩

ភ្នំពេញ ៖ យុទ្ធនាការ១៥ថ្ងៃ ចាក់វ៉ាក់សាំងបង្ការជំងឺកូវីដ-១៩ ជូនពលរដ្ឋដែលមានវ័យចាប់ពី៦០ឡើង ក្នុងរាជធានីភ្នំពេញ បានចាប់ផ្តើមពីថ្ងៃទី២៣ ខែមីនា នេះតទៅ។ សម្រាប់យុទ្ធនាការនេះ មណ្ឌលសុខភាពផ្សារដើមថ្កូវ បានទទួលវ៉ាក់សាំងពីមន្ទីរសុខាភិបាលចំនួន៣ពាន់ដូល ចាក់ជូនពលរដ្ឋដែលវ័យចាប់ពី៦០ឆ្នាំឡើងទៅ ស្ថិតក្នុងខណ្ឌចំការមន មានជាង ៤ពាន់ បែងចែកវេនគ្នាមកចាក់។ស្ថិតក្នុងបរិបទជំងឺកូវីដ-19 ពលរដ្ឋដែលបានចាក់វ៉ាក់សាំងបង្ការជំងឺកូវីដ-19 Covishield ផលិតនៅប្រទេសឥណ្ឌា ដែលទទួលបានអាជ្ញាប័ណ្ណពីក្រុមហ៊ុន AstraZeneca បានប្រាប់ BTV នៅថ្ងៃទី២៣ខែមីនានេះថា ក្រោយចាក់វ៉ាក់សាំងនេះរួច នៅមណ្ឌលសុខភាពផ្សារដើមថ្កូវ សុខភាពជាធម្មតា មិនប្រតិកម្មនឹងថ្នាំនោះទេ។ពួកគាត់ថា មុនចាក់វ៉ាក់សាំងបង្ការ ក្រុមគ្រូពេទ្យបានពិនិត្យសុខភាព និងសួរនាំព័ត៌មានមួយចំនួនទៀតមុនអនុញ្ញាតឱ្យចាក់វ៉ាក់សាំង។ ម្យ៉ាងទៀតការចាក់វ៉ាក់សាំងនៅពេលនេះ គឺជាស្ម័គ្រចិត្ត។ជាមួយគ្នានេះ លោកវេជ្ជបណ្ឌិត ហ៊ីង រដ្ឋា ប្រធានបច្ចេកទេសមណ្ឌលសុខភាពផ្សារដើមថ្កូវ បានលើកឡើងដែរថា យុទ្ធនាការ១៥ថ្ងៃ ចាក់វ៉ាក់សាំងបង្ការជំងឺកូវីដ-19 ជូនពលរដ្ឋដែលមានវ័យចាប់ពី៦០ឡើង ក្នុងរាជធានីភ្នំពេញ បានចាប់ផ្តើមពីថ្ងៃនេះតទៅ។សម្រាប់យុទ្ធនាការនេះ មណ្ឌលសុខភាពផ្សារដើមថ្កូវ បានទទួលវ៉ាក់សាំងពីមន្ទីរសុខាភិបាលចំនួន៣ពាន់ដូស ចាក់ជូនចាក់ជូនពលរដ្ឋដែលវ័យចាប់ពី៦០ឡើងទៅ ស្ថិតក្នុងខណ្ឌចំការមន ដោយបែងចែកវេនគ្នាមកចាក់។បើតាមរបាយការណ៍របស់រដ្ឋបាលខណ្ឌចំការមន បានលើកឡើងថា ពលរដ្ឋដែលមានវ័យចាប់ពី៦០ឆ្នាំឡើងទៅ មានចំនួន៤,៣៤៥នាក់ ក្នុងនោះ អ្នកដែលចាក់វ៉ាក់សាំងរួច ដោយគិតត្រឹមថ្ងៃទី២២ខែមីនា ម្សិលមិញ មាន២៩០នាក់។កន្លងទៅថ្មីៗនះ ប្រទេសមួយចំនួននៅអឺរ៉ុបមានអ្នកប្រតិកម្មនឹងវ៉ាក់សាំងរបស់ក្រុមហ៊ុន AstraZeneca មានឈាមកក ក្នុងសរសៃឈាមបណ្តាលឱ្យបាត់បង់អាយុជីវិត។យ៉ាងណាក៏ដោយ បើតាមលោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល ធ្លាប់ផ្តល់បទសម្ភាសន៍ឱ្យ BTV ថា ការផលិតវ៉ាក់សាំង Covishield នៅប្រទេសឥណ្ឌា ដែលទទួលបានអាជ្ញាប័ណ្ណពីក្រុមហ៊ុន AstraZeneca ក្រោមកិច្ចសម្របសម្រួលពីអង្គការសុខភាពលោក ដែលកម្ពុជាទទួលបាននេះ គឺមិនស្ថិតក្នុងក្រុមវ៉ាក់សាំងរបស់ក្រុមហ៊ុន AstraZeneca នៅអឺរ៉ុបនោះទេ ហើយកម្ពុជានៅតែបន្តចាក់វ៉ាក់សាំង Covishield ជូនដល់ប្រជាពលរដ្ឋដើម្បីបង្ការជំងឺកូវីដ-19៕អត្ថបទ ៖ ទូច សោភ័ណ

អភិបាលរាជធានីភ្នំពេញ ស្នើពលរដ្ឋចាក់វ៉ាក់សាំងបង្ការកូវីដរួចហើយ ត្រូវអនុវត្តវិធានការសុខាភិបាល

ភ្នំពេញ ៖ ក្នុងយុទ្ធនាការចាក់វ៉ាក់សាំងកូវីសែល (Covishield) នៅមនី្ទរពេទ្យបង្អែករាជធានីភ្នំពេញ នាព្រឹកថ្ងៃទី២៣ មីនា ២០២១នេះ ឯកឧត្តម ឃួង ស្រេង អភិបាលរាជធានីភ្នំពេញ បានស្នើប្រជាពលរដ្ឋទទួលការចាក់វ៉ាក់សាំងបង្ការជំងឺកូវីដ១៩ រួចហើយ ត្រូវបន្តអនុវត្តវិធានការសុខាភិបាល។ឯកឧត្តម ឃួង ស្រេង បានលើកឡើងទៀតថា សកម្មភាពនាពេលនេះ គឺជាការយកចិត្តទុកដាក់របស់សម្តេចតេជោ ហ៊ុន សែន នាយករដ្ឋមន្រី្ត ហើយសម្តេចតេជោ នៅតាមថែទាំបងប្អូនប្រជាពលរដ្ឋ ដែលបានយកវ៉ាក់សាំងកូវីដ១៩ មកចាក់ជូនអ្នកមានអាយុចាប់ពី៦០ឆ្នាំ ឡើងទៅ ហើយអ្នកដែលមានអាយុចាប់ពី៦០ឆ្នាំឡើងទៅនេះ សុទ្ធតែជាអ្នកដែលសម្តេចតេជោ រំដោះឲ្យរួចផុតពីការកាប់សម្លាប់ក្នុងសម័យប៉ុលពត។ ដូច្នេះសូមពុក ម៉ែ បងប្អូន ប្រជាពលរដ្ឋ ជឿជាក់លើការដឹកនាំរបស់សម្តេចតេជោ ហ៊ុន សែន និងសូមជូនពរបងប្អូនប្រជាពលរដ្ឋ ឲ្យជៀស ផុតនូវជំងឺកូវីដ-១៩ ទាំងអស់គ្នា ។បើតាមលោកវេជ្ជបណ្ឌិត នេត សុវីរៈ ប្រធានមនី្ទរពេទ្យបង្អែករាជធានីភ្នំពេញ បានឲ្យដឹងថា មនី្ទរពេទ្យបង្អែករាជធានីភ្នំពេញ ចាប់ផ្តើមបើកយុទ្ធនាការ១៥ថ្ងៃ ចាក់វ៉ាក់សាំងបង្ការជំងឺកូវីដ១៩ កូវីសែល សម្រាប់ប្រជាពលរដ្ឋដែលមានអាយុចាប់ពី៦០ឆ្នាំឡើងទៅ។ មានក្រុមគ្រូពេទ្យចាក់វ៉ាក់សាំងជូនបងប្អូនប្រជាពលរដ្ឋ មានចំនួន៦ក្រុម ដោយក្នុងមួយក្រុម មានលោកគ្រូពេទ្យ អ្នកគ្រូពេទ្យ ចំនួន០៩នាក់។ទន្ទឹមគ្នានោះដែរ ប្រជាពលរដ្ឋ ដែលមកទទួលការចាក់វ៉ាក់សាំងបង្ការជំងឺកូវីដ១៩ កូវីសែល បាននិយាយស្រដៀងគ្នាថា នៅព្រឹកនេះ គាត់បានមកចាក់វ៉ាក់សាំង កូវីសែល ពិតជាសប្បាយរីករាយណាស់ និងសូមអរគុណប្រមុខរាជរដ្ឋាភិបាលកម្ពុជា ដែលបានស្វះស្វែងរកវ៉ាក់សាំងកូវីដ១៩ ចាក់ជូនប្រជាជន។ជាចុងក្រោយឯកឧត្តម ឃួង ស្រេង អភិបាលរាជធានីភ្នំពេញ សុំឲ្យបងប្អូនប្រជាពលរដ្ឋ កុំភ្លេចវិធានការដែលសម្តេចតេជោ បានដាក់ចុះ ៣កុំ ៣ការពារ និងវិធានការការពារជំងឺកូវីដ១៩ របស់ក្រសួងសុខាភិបាល លាងដៃនឹងអាល់កុល ពាក់ម៉ាស់ជាប់ជាប្រចាំ និងមិនចាំបាច់កុំចេញពីផ្ទះ ទៅខាងក្រៅ៕អត្ថបទ រដ្ឋា

សម្តេចតេជោ ផ្តល់ថវិកាដល់ខេត្តចំនួន១១ សម្រាប់ឧបត្ថម្ភពលរដ្ឋវិលមកស្រុកកំណើតវិញ

ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៅព្រឹកថ្ងៃទី២៣ ខែមីនា ឆ្នាំ២០២១នេះ បានផ្តល់ថវិកាបន្ថែមសរុបចំនួន ១៦០០លានរៀលទៀត ដល់បណ្តាខេត្តចំនួន១១ សម្រាប់ឧបត្ថម្ភដល់ពលករខ្មែរ ដែលត្រឡប់មកពីប្រទេសថៃ មកកាន់ស្រុកកំណើតវិញ។បើតាមលោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល ប្រាប់BTV ព័ត៌មានព្រឹកនេះថា ដោយមានការយកចិត្តទុកដាក់ខ្ពស់ពីសម្តេចតេជោ ហ៊ុន សែន នាយករដ្ឋមន្រី្ត បានឲ្យរៀបចំចាត់ចែង ថវិកាបន្ថែម ជូនទៅកាន់បណ្តាខេត្តនានា សរុបចំនួន១១ខេត្ត សម្រាប់ត្រៀមពីថ្ងៃទី២៣ រហូតដល់ថ្ងៃទី៣១ ខែមីនា ឆ្នាំ២០២១។លោកជំទាវ វេជ្ជបណ្ឌិត យក់ សម្បតិ្ត បានបញ្ជាក់ទៀតថា ខេត្តទាំង១១ ដែលទទួលបានថវិកាបន្ថែមរបស់សម្តេចតេជោ រួមមាន ៖ ខេត្តបាត់ដំបង ទទួលបានថវិកា៣០០លានរៀល, ខេត្តបន្ទាយមានជ័យ ទទួលបានជំនួយ៣០០លានរៀល, ខេត្តពោធិ៍សាត់ ទទួលបានថវិកា២០០លានរៀល, ខេត្តព្រះវិហារ ទទួលបានថវិកា២០លានរៀល, ខេត្តកណ្តាល ទទួលបានថវិកា ១៥០លានរៀល, ខេត្តស្វាយរៀង ទទួលបានថវិកា២០លានរៀល, ខេត្តព្រៃវែង ទទួលបានថវិកា៣០០លានរៀល, ខេត្តក្រចេះ ទទួលបានថវិកា៤០លានរៀល, ខេត្តតាកែវ ទទួលបានថវិកា៤០លានរៀល, ខេត្តកំពង់ឆ្នាំង ទទួលបានថវិកា៣០លានរៀល និងខេត្តសៀមរាប ទទួលបានថវិកា២០០លានរៀល។ ហើយខេត្តទាំង១១នេះ មានប្រជាពលរដ្ឋកំពុងធ្វើចត្តាឡីស័ក សរុបចំនួន១១០១០នាក់៕អត្ថបទ រដ្ឋា

អនុប្រធានចល័តឃុំព្រែកថ្មី ជំរុញអាជ្ញាធរបន្តចុះណែនាំពលរដ្ឋ ក្នុងការពារមេរោគកូវីដ

កណ្តាល ៖ អនុប្រធានចល័តឃុំព្រែកថ្មី ស្រុកកោះធំ ខេត្តកណ្តាល បានអំពាវនាវដល់អាជ្ញាធរភូមិ-ឃុំ ត្រូវបន្តចុះអប់រំ និងណែនាំដល់បងប្អូនប្រជាពលរដ្ឋឲ្យបានញឹកញាប់ បន្ថែមទៀត ទាក់ទងនឹងវិធានការការពារមេរោគកូវីដ១៩ ជាពិសេសវិធានរបស់សម្តេចតេជោ «៣ការពារ និង៣កុំ»នេះ ខណៈវិធាននឹងមានប្រសិទ្ធភាពខ្ពស់បំផុតក្នុងការគេចផុតពីការឆ្លងរីករាលដាលមេរោគគូវីដ១៩ ចូលក្នុងសហគមន៍នោះ។ថ្លែងនៅក្នុងពិធីប្រកាសតួនាទីមេភូមិថ្មី និងសំណេះសំណាលជាមួយប្រជាការពារភូមិ និងយុវជន ស.ស.យ.ក ឃុំព្រែកថ្មី ស្រុកកោះធំ នាថ្ងៃទី២២ ខែមីនា ឆ្នាំ២០២១ លោក ស៊ុន វុទ្ធី អនុប្រធានចល័តឃុំព្រែកថ្មី ស្រុកកោះធំ ខេត្តកណ្តាល និងជាប្រធានគណៈពង្រឹងភូមិចាមក្រោម បានលើកឡើងថា មេភូមិដែលទើបប្រកាសថ្មី ត្រូវខិតខំប្រឹងប្រែងក្នុងការបម្រើប្រជាពលរដ្ឋនៅក្នុងមូលដ្ឋានឱ្យអស់ពីកម្លាំងកាយចិត្ត ជាពិសេសត្រូវចុះផ្សព្វផ្សាយឲ្យបានញឹកញាប់បំផុតទាក់នូវវិធានការរបស់រាជរដ្ឋាភិបាល ក៏ដូចជាក្រសួងសុខាភិបាលទាក់ទងនឹងមេរោគកូវីដ១៩ ខណៈមេរោគនេះ បានកំពុងរីករាលដាលខ្លាំងនៅភ្នំពេញ និងតាមបណ្តាខេត្តនានា ដូចជា ខេត្តកណ្តាលយើងនេះដែរ។ជាមួយគ្នានោះ លោកអនុប្រធានក្រុមការងារ ក៏បានសំណេះសំណាលជាមួយយុវជនសហភាពសហព័ន្ធយុវជនកម្ពុជា ឃុំព្រែកថ្មី ដោយប្អូនៗ ជាយុវជនស្ម័គ្រចិត្តមានតួនាទីយ៉ាងសំខាន់ក្នុងមូលដ្ឋាន ក្នុងការជួយបម្រើផលប្រយោជន៍ប្រជាពលរដ្ឋ និងធ្វើយ៉ាងណាជួយផ្នែកប្រាជ្ញា ស្មារតី បណ្តុះ គំនិតយុវជនផ្សេងទៀត ដើម្បីជាការចូលរួមចំណែកជួយដល់សង្គមគ្រួសារ និងសង្គមជាតិ ឱ្យកាន់តែមានការរីកចម្រើនបន្តទៀត ។ ពិសេសក្នុងដំណាក់កាលដែលប្រទេសកម្ពុជា កំពុងតែមានការរីករាលដាលនូវជំងឺកូវីដ-១៩ ទាំងមន្ត្រីគ្រប់លំដាប់ថ្នាក់ ប្អូនៗ ជាយុវជនទាំងអស់ ចូលរួមផ្សព្វផ្សាយ ដើម្បីឱ្យប្រជាពលរដ្ឋ មានការប្រុងប្រយ័ត្នខ្ពស់ ថែរក្សាអនាម័យខ្លួនប្រាណ តាមការណែនាំរបស់ក្រសួងសុខាភិបាល គឺ៣កុំនិង៣ការពារ ដើម្បីជៀសឆ្ងាយ និងចូលរួមឱ្យជំងឺកាចសាហាវមួយនេះ ឆាប់រលាយបាត់ក្នុងពេលឆាប់ៗខាងមុខ ។ក្នុងឱកាសអញ្ជើញជួបសំណេះសំណាលនាពេលនេះ អនុប្រធានចល័តឃុំព្រែកថ្មី បានឧបត្ថម្ភប្រជាការពារ ១៧នាក់ ក្នុងម្នាក់ទទួលបានអង្ករ២៥គីឡូ ត្រីខ២យួរ ថវិកា៥ម៉ឺនរៀល យុវជន ស.ស.យ.ក ឃុំព្រែកថ្មី២៤នាក់ ក្នុងម្នាក់ៗ ទទួលបានថវិកា៥ម៉ឺនរៀល មេភូមិថ្មី-ចាស់ អនុភូមិ និងអ្នកចូលរួមទទួលបាន៥ម៉ឺនរៀលផងដែរ ៕អត្ថបទ ៖ បាន ចក់

អាជីវករផ្សារតាខ្មៅចាស់ជាង៨០% បានបិទតូបលក់ដូរ ខណៈ៤តូប បានពាក់ព័ន្ធអ្នកជំងឺកូវីដ-១៩

ភ្នំពេញ ៖ មកដល់ព្រឹកថ្ងៃទី២៣ ខែមីនា បណ្តាអាជីវករនៅក្នុងផ្សារតាខ្មៅចាស់ បានបន្តបិទតូបលក់ដូរទំនិញដោយខ្លួនឯង បានកើនដល់ប្រមាណជាង៨០% បន្ទាប់ពីអាជ្ញាធរមូលដ្ឋានក្រុងតាខ្មៅ បានតម្រូវអោយម្ចាស់តូបចំនួន៤តូប មានការពាក់ព័ន្ធផ្ទាល់អ្នកផ្ទុកមេរោគកូវីដ-១៩ ផ្អាកការលក់ដូរជាបណ្តោះអាសន្ន ដើម្បីទៅធ្វើចត្តាឡីស័ក។ដោយមានការព្រួយបារម្ភខ្លាំងអំពីការរាតត្បាតកូវីដ១៩ នៅក្នុងសហគមន៍ នៅព្រឹកមិញនេះ នៅក្នុងផ្សារតាខ្មៅចាស់ជាន់ទី១ គឺមានតូបលក់ទំនិញប្រមាណ៩០% មិនមានការបើកលក់ដូរទំនិញនោះទេ ហើយនៅជាន់ផ្ទាល់ដី វិញមានតូចលក់ទំនិញប្រមាណតែ៣០% បានដំណើរការធម្មតា ហើយក្រៅពីនេះ គឺបានបន្តបិទជាបណ្តោះអាសន្ន។បើតាមបណ្តាអាជីវករក្នុងផ្សារតាខ្មៅចាស់ បានថ្លែងថា ចាប់តាំងពីអាជ្ញាធរបានរកឃើញអ្នកផ្ទុកមេរោគកូវីដ-១៩ បានដើរចូលផ្សារ និងមានពាក់ព័ន្ធផ្ទាល់ជាមួយអ្នកលក់ទំនិញនៅក្នុងផ្សារមក បានធ្វើចំនួនពលរដ្ឋដើរផ្សារ និងអ្នកលក់ទំនិញនៅក្នុងផ្សារ បានធ្លាក់ចុះបន្តបន្ទាប់ ជាពិសេសក្នុងរយៈពេល២ថ្ងៃ ចុងក្រោយនេះ។បើតាមឯកឧត្តម គង់ សោភ័ណ្ឌ អភិបាលខេត្តកណ្តាល បានថ្លែងប្រាប់BTV នៅថ្ងៃនេះដែរថា នៅពេលនេះ រដ្ឋបាលខេត្តមិនមានផែនការបិទមូលដ្ឋានអាជីវកម្ម និងបិទមុខរបរការរកស៊ីប្រចាំថ្ងៃរបស់បងប្អូននោះទេ ប៉ុន្តែសម្រាប់មូលដ្ឋានអាជីវកម្ម ហាង និងតូបលក់ទំនិញ និងសេវាកម្មណាដែលពាក់ព័ន្ធផ្ទាល់អ្នកផ្ទុកកូវីដ-១៩ ចូលទៅទទួលសេវា គឺអាជ្ញាធរបានតម្រូវអោយពួកគាត់បិទ ដោយយើងតម្រូវអោយគាត់ទៅធ្វើចត្តាឡីស័ក ១៤ថ្ងៃ ។ ឯកឧត្ដម បន្តថា ដោយឡែកសម្រាប់អាជីវកម្ម ហាងលក់ទំនិញផ្សេងៗ អាជ្ញាធរមិនតម្រូវអោយបិទទេ តែពួកគាត់បានបិទដោយខ្លួនឯង ហើយរង់ចាំកូវីដ ធូរស្រាលវិញទើបបើកវិញ។ទន្ទឹមនឹងព្រួយបារម្ភ និងការរួមគ្នាទប់ស្កាត់ការរាតត្បាតកូវីដ-១៩នេះដែរ ឯកឧត្តម គង់ សោភ័ណ្ឌក៏បានបញ្ជាក់ថា បន្ទាប់ពីបានចាក់វ៉ាក់សាំងការពារកូវីដ-១៩ ជូនមន្ត្រីរាជការ និងនគរបាលធ្វើការងារជួរមុខ បានអស់គ្នារួចហើយ យើងក៏បានបើកឱកាសជូនពលរដ្ឋវ័យ៦០ឆ្នាំឡើង និង ពលរដ្ឋអាទិភាពនានាទៀត ទទួលបានការចាក់វ៉ាក់សាំងផងដែរ ខណៈមកដល់បច្ចុប្បន្ន ក្នុងចំណោមវ៉ាក់សាំង ដែលខេត្តកណ្តាល ទទួលបានជាង២៥០០០ដូស នៅជុំទី១ គឺយើងបានចាក់អស់ប្រមាណ៩៥% ក្នុងនោះ វ៉ាក់សាំងកូវីសែល កំពុងចាក់ជូនមនុស្សវ័យលើស៦០ឆ្នាំ ជាងនៅជុំទី១នេះ បានជាង២០០០០នាក់។ ដោយឡែកសម្រាប់វ៉ាក់សាំងស៊ីណូហ្វាមវិញ នៅក្នុងជុំទី២ ដំណើរការចាក់បានចំនួនជិត៤៣០០នាក់៕អត្ថបទ ៖ ស៊ុម សុខជា

បណ្ដាញសង្គម

ព័ត៌មានថ្មីៗ

សមត្ថកិច្ចរាជធានីភ្នំពេញបង្ក្រាបទីតាំងបទល្មើសឆបោកតាមអនឡាញ២កន្លែងទៀតឃាត់ខ្លួនមនុស្សបាន១៣៣នាក់

នាយករដ្ឋមន្ត្រីបារាំង ប្រឹងប្រែងបន្ទន់ជំហរប្រឆាំង ចំពោះច្បាប់ថវិការបស់លោក ដើម្បីបញ្ចៀសវិបត្តិថ្មី

អ៊ីរ៉ង់៖ ប្រទេសអឺរ៉ុបគ្មានមូលដ្ឋានសីលធម៌ និងផ្លូវច្បាប់ ដើម្បីអនុវត្តទណ្ឌកម្មមានឡើងវិញភ្លាមៗ

វិមានក្រឹមឡាំង ប្រាប់ថា រុស្ស៊ីបានបង្កើតអភ័យឯកសិទ្ធិជាក់លាក់ បន្ទាប់ពី EU ចេញទណ្ឌកម្មថ្មី

បទបញ្ជាបោសសម្អាតការឆបោកតាមប្រព័ន្ធបច្ចេកវិទ្យា នឹងជួយទាក់ទាញអ្នកវិនិយោគកាន់តែច្រើនថែមទៀតមកកាន់កម្ពុជា

កម្ពុជា-ហ្វីលីពីន ឯកភាពបន្តពង្រឹងកិច្ចសហប្រតិបត្តិការលើវិស័យការពារជាតិ ជាពិសេសការបណ្តុះបណ្តាលធនធានមនុស្ស

មន្ត្រីរាជការក្រសួងប្រៃសណីយ៍ ចូលរួមដាំដើមកោងកាងចំនួន៥៥០ ដើម ក្រោមប្រធានបទ “ឌីជីថល ផ្សារភ្ជាប់បរិស្ថាន”

លោក Zelenskyy៖ លោកបានពិភាក្សាអំពីការផ្គត់ផ្គង់មីស៊ីល និងការបណ្តុះបណ្តាលអ្នកបើកយន្តហោះជាមួយលោក Macron

ប្រធានការិយាល័យសិទ្ធិមនុស្ស UN ជំរុញឲ្យមានការទទួលខុសត្រូវ ចំពោះការសម្លាប់ នៅទីក្រុង Sweida របស់ស៊ីរី

រុស្ស៊ីចាប់ខ្លួនស្ត្រីសញ្ជាតិអាមេរិក-រុស្ស៊ី នៅអាកាសយានដ្ឋាន ពីបទរត់ពន្ធកាំភ្លើង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ និង ការអភិវឌ្ឍន៍

ពលរដ្ឋវ័យចាស់នៅខណ្ឌជ្រោយចង្វារ បន្តមកចាក់វ៉ាក់សាំងបង្ការជំងឺកូវីដក្នុងយុទ្ធនាការ១៥ថ្ងៃ

ពលរដ្ឋអាយុ៦០ឆ្នាំឡើងទៅជាច្រើនមកទទួលការចាក់វ៉ាក់សាំង និងចាត់ទុកថា វាជាកាតព្វកិច្ច

ក្រសួងការងារ និង GMAC ចាប់ផ្តើមរៀបចំចាក់វ៉ាក់សាំងកូវីដ-១៩ ជូនកម្មកររោងចក្រកាត់ដេរ

ស្នងការដ្ឋាននគរបាលរាជធានីភ្នំពេញ ទទួលម៉ាស់ចំនួន៣០ម៉ឺនពីក្រុមហ៊ុន និងសប្បុរសជននានា

ពលរដ្ឋក្នុងខណ្ឌចំការមនជាង ៤ពាន់នាក់វ័យពី ៦០ឆ្នាំឡើង នឹងទទួលបានវ៉ាក់សាំងបង្ការកូវីដ-១៩

អភិបាលរាជធានីភ្នំពេញ ស្នើពលរដ្ឋចាក់វ៉ាក់សាំងបង្ការកូវីដរួចហើយ ត្រូវអនុវត្តវិធានការសុខាភិបាល

សម្តេចតេជោ ផ្តល់ថវិកាដល់ខេត្តចំនួន១១ សម្រាប់ឧបត្ថម្ភពលរដ្ឋវិលមកស្រុកកំណើតវិញ

អនុប្រធានចល័តឃុំព្រែកថ្មី ជំរុញអាជ្ញាធរបន្តចុះណែនាំពលរដ្ឋ ក្នុងការពារមេរោគកូវីដ

អាជីវករផ្សារតាខ្មៅចាស់ជាង៨០% បានបិទតូបលក់ដូរ ខណៈ៤តូប បានពាក់ព័ន្ធអ្នកជំងឺកូវីដ-១៩

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

ពលរដ្ឋ​អាយុ​៦០​ឆ្នាំ​ឡើងទៅ​​ជាច្រើន​មក​ទទួល​ការ​ចាក់​វ៉ាក់សាំង​ និង​ចាត់ទុកថា ​វា​ជា​កាតព្វកិច្ច

ក្រសួង​ការងារ និង GMAC ​ចាប់ផ្តើម​រៀបចំ​ចាក់​វ៉ាក់សាំង​កូ​វីដ​-១៩​ ជូន​កម្មករ​រោងចក្រ​កាត់ដេរ

ស្នងការដ្ឋាន​នគរបាល​រាជធានី​ភ្នំពេញ​ ទទួល​ម៉ាស់​ចំនួន​៣០​ម៉ឺន​ពី​ក្រុមហ៊ុន និង​សប្បុរសជន​នានា

សម្តេច​តេ​ជោ ​ផ្តល់​ថវិកា​ដល់​ខេត្ត​ចំនួន​១១ ​សម្រាប់​ឧបត្ថម្ភ​ពលរដ្ឋ​វិល​មក​ស្រុកកំណើត​វិញ

អនុប្រធាន​ចល័ត​ឃុំ​ព្រែក​ថ្មី ជំរុញ​អាជ្ញាធរ​បន្ត​ចុះ​ណែនាំ​ពលរដ្ឋ ​ក្នុង​ការពារ​មេរោគ​កូ​វីដ

អាជីវករ​ផ្សារ​តាខ្មៅ​ចាស់​ជាង​៨០% ​បាន​បិទតូប​លក់ដូរ ​ខណៈ​​៤​តូប បាន​ពាក់ព័ន្ធ​អ្នកជំងឺ​កូ​វីដ-១៩​

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍

ពលរដ្ឋអាយុ៦០ឆ្នាំឡើងទៅជាច្រើនមកទទួលការចាក់វ៉ាក់សាំង និងចាត់ទុកថា វាជាកាតព្វកិច្ច

ក្រសួងការងារ និង GMAC ចាប់ផ្តើមរៀបចំចាក់វ៉ាក់សាំងកូវីដ-១៩ ជូនកម្មកររោងចក្រកាត់ដេរ

ស្នងការដ្ឋាននគរបាលរាជធានីភ្នំពេញ ទទួលម៉ាស់ចំនួន៣០ម៉ឺនពីក្រុមហ៊ុន និងសប្បុរសជននានា

សម្តេចតេជោ ផ្តល់ថវិកាដល់ខេត្តចំនួន១១ សម្រាប់ឧបត្ថម្ភពលរដ្ឋវិលមកស្រុកកំណើតវិញ

អនុប្រធានចល័តឃុំព្រែកថ្មី ជំរុញអាជ្ញាធរបន្តចុះណែនាំពលរដ្ឋ ក្នុងការពារមេរោគកូវីដ

អាជីវករផ្សារតាខ្មៅចាស់ជាង៨០% បានបិទតូបលក់ដូរ ខណៈ៤តូប បានពាក់ព័ន្ធអ្នកជំងឺកូវីដ-១៩