BTV NEWS

គម្រោងស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) និងផ្លូវតភ្ជាប់ សម្រេចបាន ៤៥% ហើយ ដែលលឿនជាងផែនការ ៤,១១%

សម្ដេចធិបតី អំពាវនាវដល់ជនរួមជាតិជឿទុកចិត្តលើរាជរដ្ឋាភិបាលដែលកំពុងធ្វើកិច្ចការងារយ៉ាងសកម្មស្វែងរកដំណោះស្រាយបញ្ចប់បញ្ហាព្រំដែនកម្ពុជា-ថៃ ឱ្យបានឆាប់រហ័ស

សម្ដេចធិបតីផ្ដល់អនុសាសន៍៧ចំណុច ដល់ក្រសួង-ស្ថាប័នពាក់ព័ន្ធឱ្យយកចិត្តទុកដាក់ក្នុងឱកាសទិវាអក្ខរកម្មអន្តរជាតិ ៨ កញ្ញា ២០២៥

សម្ដេចធិបតី៖ រាជរដ្ឋាភិបាលប្តេជ្ញាចិត្តយ៉ាងមុតមាំលើកកម្ពស់ការងារអក្ខរកម្ម និងបំពាក់បំប៉ន ជំនាញ និងឱកាសសិក្សាពេញមួយជីវិត ជាពិសេសជំនាញឌីជីថល

នយោបាយ និង ការអភិវឌ្ឍន៍

វត្តក្រពើហា ក្រុងតាខ្មៅ អនុវត្តតាមរាជរដ្ឋាភិបាល ក្នុងការទូងស្គរដាស់តឿនដល់ពលរដ្ឋឲ្យគោរពវិធានក្រសួងសុខាភិបាល

កណ្ដាល ៖ ព្រះចៅអធិការវត្តប្រជុំនទី ហៅវត្តក្រពើហា ព្រះនាម ព្រះឃោសមុនីវង្ស វ័ន្ត វណ្ណា បានមានសង្ឃដីកាថា ព្រះសង្ឃ លោកតាជី យាយជីទាំងអស់ដែលកំពុងគង់ និងស្នាក់នៅក្នុងវត្តនេះ បានអនុវត្តយ៉ាងត្រឹមត្រូវ និងខ្ជាប់ខ្ជួនជានិច្ចចំពោះវិធានការ របស់ក្រសួងសុខាភិបាល និងបានធ្វើទៅតាមចរាចរ ណែនាំរបស់រាជរដ្ឋាភិបាល ដោយបានទូងស្គរក្នុងមួយថ្ងៃ៥ដង ដើម្បីដាស់តឿនដល់ពុទ្ធបរិស័ទ និងបងប្អូនប្រជាពលរដ្ឋ ឲ្យមានការប្រុងប្រយ័ត្ន ក្នុងកិច្ចការពារនូវមេរោគកូវីដ-១៩នេះ ខណៈមេរោគនេះ បានកំពុងរីករាលដាលនៅកម្ពុជានោះ។ក្នុងកិច្ចសម្ភាសន៍ជាមួយទូរទស្សន៍ប៊ីធីវី កាលពីល្ងាចថ្ងៃទី២៤ ខែមីនាម្សិលមិញនេះ ព្រះគុណម្ចាស់ វ័ន្ត វណ្ណា បានមានសង្ឃដីកាបន្ដថា វត្តប្រជុំនទី ហៅវត្តក្រពើហានេះ បានសម្រេចបិទទ្វារជាបណ្តោះអាសន្ន មិនអនុញ្ញាតឲ្យពុទ្ធបរិស័ទ និងបងប្អូនប្រជាពលរដ្ឋចូលវត្ត ដើម្បីបង្ការ និងទប់ស្កាត់ការរីករាលដាលនូវមេរោគកូវីដ-១៩ ខណៈពេលកំពុងផ្ទុះឡើងនៅរាជធានីភ្នំពេញ ខេត្តកណ្តាល និងតាមបណ្តាខេត្តនានាទៀតនោះ។សូមបញ្ជាក់ថា កាលពីថ្ងៃទី២៣ ខែមីនា កន្លងទៅនេះ សម្តេចតេជោ ហ៊ុន សែន នាយករដ្ឋមន្ត្រី បានស្នើឱ្យគ្រប់វត្តអារាមទាំងអស់វាយគង ជួង រគាំង ទូងស្គរ ព្រមៗគ្នា ទាំងអស់ចំនួន ៥ ដងក្នុងមួយថ្ងៃ ដើម្បីជាសញ្ញាផ្សព្វផ្សាយព័ត៌មានដល់ប្រជាពលរដ្ឋ ពុទ្ធបរិស័ទ ឱ្យបង្កើនការប្រុងប្រយ័ត្ន ដោយអនុវត្តនូវវិធានការ« ៣ការពារ និង ៣កុំ»។សម្តេចតេជោ ហ៊ុន សែន បានស្នើដល់គ្រប់វត្តអារាមទាំងអស់ ត្រូវធ្វើការវាយឱ្យបាន ០៥ ដងក្នុង ០១ ថ្ងៃ តាមពេលវេលាកំណត់គឺ លើកទី១ នៅម៉ោង ៥:០០ ព្រឹក, លើកទី២ នៅម៉ោង ១១:០០ ព្រឹក, លើកទី៣ នៅម៉ោង ២:០០ រសៀល, លើកទី៤ នៅម៉ោង ៥:០០ ល្ងាច និងលើកទី៥ នៅម៉ោង ៨:០០ យប់។នៅក្នុងកិច្ចសម្ភាសន៍ជាមួយទូរទស្សន៍ប៊ីធីវីនោះដែរ ព្រះគុណម្ចាស់ វ័ន្ត វណ្ណា ក៏បានអំពាវនាវដល់ពុទ្ធបរិស័ទ និងបងប្អូនប្រជាពលរដ្ឋខ្មែរទាំងអស់ គប្បីអនុវត្តឲ្យបានម៉ត់ចត់បំផុតចំពោះវិធានការក្រសួងសុខាភិបាល ជាពិសេសអនុវត្តឲ្យបានត្រឹមត្រូវគ្រប់ពេលវេលា ទាំងអស់ចំពោះវិធានការ«៣ការពារ និង៣កុំ» ដូចអ្វីដែលប្រមុខរាជរដ្ឋាភិបាល សម្តេចតេជោ ហ៊ុន សែន ដែលសម្តេច បានទទូចហើយទទូចទៀត ដល់បងប្អូនរួមគ្នា សហការគ្នាក្នុងការទប់ស្កាត់នៃការរីករាលដាលនូវមេរោគកូវីដ១៩នេះ ៕អត្ថបទ ៖ បានចក់

តម្លៃម៉ាសមិនឡើងថ្លៃនោះទេ ទោះពលរដ្ឋខេត្តកណ្តាល មានកាតព្វកិច្ចពាក់ម៉ាសជាចាំបាច់ក្តី

កណ្ដាល ៖ បន្ទាប់ពីក្រសួងសុខាភិបាលបានជូនដំណឹងអោយភូមិសាស្ត្រខេត្តរាជធានីចំនួន៥ កំណត់យកជាខេត្តភូមិសាស្ត្រត្រូវអនុវត្តកាតព្វកិច្ចពាក់ម៉ាស និងកាតព្វកិច្ចរក្សាគន្លាតសុវត្ថិភាព នៅថ្ងៃទី២៥ ខែមីនានេះ ការលក់ម៉ាស តាមទីសាធារណៈមួយចំនួននៅក្នុងទឹកដីខេត្តកណ្តាល មិនមានការដំឡើងថ្លៃនោះទេ ហើយសម្រាប់ការអនុវត្តកាតព្វកិច្ចពាក់ម៉ាសនេះដែរ អាជ្ញាធរមូលដ្ឋាន ចុះផ្សព្វផ្សាយជំរុញពលរដ្ឋត្រូវពាក់ម៉ាសជាចាំបាច់ នៅពេលចេញក្រៅផ្ទះផងដែរ។បើតាមពលរដ្ឋលក់ម៉ាស នៅតាមផ្លូវសាធារណៈនៅក្នុងក្រុងតាខ្មៅ បានថ្លែងប្រាប់ BTV ថ្លែងថា ម៉ាសបច្ចុប្បន្ន គឺបាននិងកំពុងដាក់លក់ក្នុងតំលៃទាបបំផុតតែ៦០០០រៀល ក្នុងមួយប្រអប់៥០ម៉ាស ហើយការលក់ក្នុងតំលៃនេះ គឺបានធ្វើអោយពលរដ្ឋជាច្រើនបាននាំគ្នាទិញដោយមិនមានត្អូញត្អែរនោះទេ។បើតាមលោក ជៀប ខូយ ចៅសង្កាត់តាខ្មៅ បានថ្លែងថា បន្ទាប់ពីទទួលបានសេចក្តីជូនដំណឹងក្រសួងសុខាភិបាល ស្តីពីការអនុវត្តកាតព្វកិច្ចពាក់ម៉ាស និងរក្សាគន្លាតសុវត្ថិភាពនេះមក អាជ្ញាធរសង្កាត់តាខ្មៅ នឹងបង្កើនសកម្មភាពផ្សព្វផ្សាយវិធានការ៣កុំ ៣ការពារ មានចែកម៉ាសសម្រាប់អ្នកមិនពាក់ម៉ាស ហើយបើគេនៅតែរឹងរូសមិនពាក់ម៉ាសទៀតនោះ អាជ្ញាធរនឹងអនុវត្តវិធានការពិន័យជាប្រាក់ ហើយបើសម្រាប់អាជីវករ នឹងតម្រូវអោយបិទអាជីវកម្មជាបណ្តោះអាសន្នជាដើម។សូមបញ្ជាក់ថា នៅថ្ងៃទី២៤ ខែមីនា ម្សិលមិញនេះ ក្រសួងសុខាភិបាល បានចេញសេចក្តីជូនដំណឹងស្នើគ្រប់អាជ្ញាធរមានសមត្ថកិច្ចគ្រប់លំដាប់ថ្នាក់ និងសាធារណៈជន នៅក្នុងភូមិសាស្ត្រ រាជធានីភ្នំពេញ ខេត្តកណ្តាល ខេត្តព្រះសីហនុ ខេត្តសៀមរាប និងព្រៃវែង ដែលមានការឆ្លងរាលដាលនៃជំងឺកូវីដ១៩ ក្នុងព្រឹត្តិការណ៍២០កុម្ភៈ ត្រូវតម្រូវអោយអនុវត្តកាតព្វកិច្ចពាក់ម៉ាស់ និងរក្សាគន្លាតសុវត្ថិភាពស្របតាមប្រកាសលេខ ០៨១ស.នក.ប្រកចុះថ្ងៃទី២២ ខែមីនាឆ្នាំ២០២១៕អត្ថបទ ស៊ុម សុខជា

ក្រសួងសុខាភិបាល រៀបចំរួចរាល់ទូរត្រជាក់ សម្រាប់រក្សាទុកវ៉ាក់សាំងកូវីដ-១៩ ប្រភេទ ស៊ីណូវ៉ាក់

ភ្នំពេញ ៖ មន្ត្រីជាន់ខ្ពស់ក្រសួងសុខាភិបាល បានប្រាប់BTV ព័ត៌មាន នៅព្រឹកថ្ងៃទី២៥ មីនា ២០២១នេះថា ក្រសួងសុខាភិបាល បានរៀបចំចាត់ចែងរួចរាល់ទូរត្រជាក់ សម្រាប់ទទួលដាក់វ៉ាក់សាំងកូវីដ-១៩ ប្រភេទ ស៊ីណូវ៉ាក់(Sinovac) របស់សាធារណរដ្ឋប្រជាមានិត ចិនចំនួន១លាន៥សែនដូស ដែលនឹងមកដល់កម្ពុជាឆាប់ៗនេះ។មន្ត្រីជាន់ខ្ពស់រូបនោះ បានបន្ថែមថា ក្រុមការងាររបស់ក្រសួងសុខាភិបាល បានរៀបចំរួចរាល់នូវទូរត្រជាក់ចំនួន០៥ទូរកន្លះ ស្ថិតនៅឃ្លាំងឱសថកណ្តាល ចោមចៅ(មានទូរត្រជាក់ (Cold Room) ទូរត្រជាក់ កក (Freezer Room)) ដែលមានសមត្ថភាពខ្ពស់ ក្នុងការទទួលដាក់រក្សាសុវត្ថិភាពសីតុណ្ហភាពរបស់វ៉ាក់សាំងបង្ការជំងឺកូវីដ១៩ ប្រភេទស៊ីណូវ៉ាក់ របស់សាធារណរដ្ឋប្រជាមានិត ចិន ចំនួន១លាន៥សែនដូស។ ហើយសម្រាប់កម្មវិធីប្រគល់-ទទួល វ៉ាក់សាំង កូវីដ-១៩ ( ស៊ីណូវ៉ាក់ )នេះ នឹងប្រព្រឹត្តឡើង នៅថ្ងៃទី២៦ ខែមីនា ឆ្នាំ២០២១ នៅអាកាសយានដ្ឋានអន្តរជាតិភ្នំពេញ វេលាម៉ោង ១១:៣០ នាទីព្រឹក ក្រោមវត្តមានឯកឧត្តម វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ នៃព្រះរាជាណាចក្រកម្ពុជា និងឯកឧត្តម វ៉ាង វិនធៀន (Wang Wentian) ឯកអគ្គរដ្ឋទូតនៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា។សូមបញ្ជាក់ ផងដែរថា ថ្មីៗនេះក្នុងសារពិសេសជាសំឡេង នាព្រឹកថ្ងៃទី១៩ ខែមីនា ឆ្នាំ២០២១ របស់ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន នាយករដ្ឋមន្រី្ត បានថ្លែងថា ក្នុងពេលខាងមុខនេះ បើគ្មានការផ្លាស់ប្ដូរទេ វ៉ាក់សាំងបង្ការជំងឺកូវីដ១៩ ប្រភេទស៊ីណូវ៉ាក់ មិនកំណត់អាយុមនុស្សសម្រាប់ការចាក់វ៉ាក់សាំងនេះ នឹងមកដល់កម្ពុជា នៅថ្ងៃទី២៦ ខែមីនា ឆ្នាំ២០២១នេះ ប្រទេសកម្ពុជា បានបញ្ជាទិញវ៉ាក់សាំងប្រភេទ ស៊ីណូវ៉ាក់ ចំនួន១លាន៥សែនដូស ហើយក្រៅពីនោះក៏យើងនៅសល់ជំនួយរបស់មិត្តចិន សម្រាប់វ៉ាក់សាំងកូវីដ១៩ ប្រភេទស៊ីណូហ្វាម ចំនួន៤០ម៉ឺនដូសទៀត ដែលសង្ឃឹមថា នឹងបានទទួលនៅមុនបុណ្យចូលឆ្នាំខ្មែរផងដែរ៕អត្ថបទ រដ្ឋា

ជនបរទេសមិនព្រមធ្វើចត្តាឡីស័ក អាចនឹងត្រូវបណ្ដេញចេញពីកម្ពុជា

ភ្នំពេញ ៖ ជនបរទេសដែលមិនព្រមសហការជាមួយអាជ្ញាធរ ក្នុងការធ្វើចត្តាឡីស័ក តាមវិធានសុខាភិបាល អាចនឹងបណ្តេញចេញពីប្រទេសកម្ពុជា ខណៈការផាកពិន័យអន្តរការណ៍ក៏នឹងត្រូវអនុវត្តស្របទៅតាមមាត្រា២១ ដែលពិន័យជាប្រាក់ពី១លានរៀលដល់៥លានរៀល។ នេះបើតាមការអះអាង របស់ឯកឧត្តម គឹម សន្តិភាព រដ្ឋលេខាធិការក្រសួងយុត្តិធម៌។ថ្លែងនៅក្នុងកិច្ចសម្ភាសន៍ជាមួយទូរទ្សន៍ប៊ីធីវី នៅព្រឹកថ្ងៃទី២៥ ខែមីនា ឆ្នាំ២០២១នេះ ឯកឧត្តម គឹម សន្តិភាព បានលើកឡើងថា ជនបរទេសស្បែកសម្នាក់ ដែលរឹងទទឹងមិនព្រមផ្តល់សំណាក តាមការស្នើសុំរបស់គ្រូពេទ្យ ត្រូវកម្លាំង គ-អន្តរាគមន៍ អាវុធហត្ថរាជធានីភ្នំពេញ បង្ខំនាំទៅកាន់មណ្ឌលសុខភាព ចាក់អង្រែក្រោម កាលពីល្ងាចថ្ងៃទី២៤ ខែមីនាម្សិលមិញនេះ នឹងត្រូវបណ្តេញចេញពីកម្ពុជា ដោយសារតែជននេះ បានប្រព្រឹត្តិល្មើសនឹងអនុក្រឹត្យ និងច្បាស់ស្តីពីកូវីដ-១៩នោះ។ឯកឧត្តម គឹម សន្តិភាព ក៏បានបញ្ជាក់បន្ថែមផងដែរថា ការបង្កើតច្បាប់ស្តីពីគូវីដ-១៩ មិនមែនជាការបង្កើតឡើង ដើម្បីដាក់ទោសទណ្ឌដល់ប្រជាពលរដ្ឋនោះទេ ពោលគឺធ្វើឡើងដើម្បីឲ្យប្រជាពលរដ្ឋចូលរួមសហការហើយប្រសិនបើពលរដ្ឋចូលរួមនោះ ច្បាប់ក៏នឹងមិនត្រូវអនុវត្តន៍ដែរ ខណៈច្បាប់នេះបានធ្វើឡើង គឺស្របទៅតាមសភាពការណ៍នាពេលបច្ចុប្បន្ន ដែលប្រទេសកម្ពុជាត្រូវតែអនុវត្ត នៃការរីករាលដាលនៃមេរោគកូវីដ-១៩បានកំពុងផ្ទុះឡើងនោះ។សូមបញ្ជាក់ថា ច្បាប់ស្តីពីកូវីដ១៩នេះ គឺមាន៦ជំពូក និង១៨មាត្រា ហើយក្នុងត្រង មាត្រា៧ បានចែងថា អំពើគេចវេះពីការធ្វើចត្តាឡីស័ក ឬគេចចេញពីទីកន្លែងធ្វើចត្តាឡីស័ក ក្នុងអំឡុងពេលធ្វើចត្តាឡីស័ក ដែលកំណត់ដោយក្រសួងសុខាភិបាល ឬអាជ្ញាធរមានសមត្ថកិច្ចត្រូវទទួលពិន័យអន្តរការណ៍ តាមការកំណត់នៅក្នុងអនុក្រឹត្យដោយត្រូវផ្តន្ទាទោសដាក់ពន្ធនាគារពី៦(ប្រាំមួយ)ខែ ទៅ ៣(បី)ឆ្នាំ និងពិន័យជាប្រាក់ពី ២,០០០,០០០ (ពីរលាន) រៀល ទៅ ១០,០០០,០០០ (ដប់លាន)រៀល កាលបើអំពើខាងលើនេះ បានបណ្តាលឱ្យមានការចម្លងជំងឺកូវីដ១៩ ដល់អ្នកដទៃនោះ។ជាមួយគ្នានោះដែរ ឯកឧត្តម គឹម សន្តិភាព ក៏បានអំពាវនាវដល់បងប្អូនជនរួមជាតិទាំងអស់ ក៏ដូចជាជនបរទេសដែលកំពុងរស់នៅប្រទេសកម្ពុជា គប្បីត្រូវចូលរួមសហការឲ្យបានត្រឹមត្រឹមចំពោះវិធានសុខាភិបាល ហើយប្រសិនបើមានការចូលរួមច្បាប់ក៏នឹងមិនដាក់ទោសទណ្ឌដល់បងប្អូននោះដែរ ហើយជំងឺរាតត្បាតនេះ ក៏មិនបន្តចម្លងដល់អ្នកដទៃផងដែរ៕អត្ថបទ ៖ បាន ចក់

ពលរដ្ឋនៅស្រុកអង្គស្នួល ដែលពាក់ព័ន្ធនឹងព្រឹត្តិការណ៍សហគមន៍២០កុម្ភៈ ចំនួន៦៣នាក់ ត្រូវបានអាជ្ញាធរអនុញ្ញាតឱ្យត្រឡប់ទៅផ្ទះវិញ

កណ្តាល ៖ ប្រជាពលរដ្ឋចំនួន ៦៣នាក់ ដែលមានជាប់ពាក់ព័ន្ធ នឹងព្រឹត្តិការណ៍សហគមន៍២០កុម្ភៈ និង បានធ្វើចត្តាឡីស័ក បានត្រឹមត្រូវតាមវិធានរបស់ក្រសួងសុខាភិបាល ក្រោយយកសំណាកធ្វើតេស្តមិនមានមេរោគកូវីដ-១៩ នៅមណ្ឌលចត្តាឡីស័ក សាលាបឋមសិក្សា អង្គពពាយ ត្រូវបានអាជ្ញាធរស្រុកអង្គស្នួល អនុញ្ញាតឱ្យត្រឡប់ទៅផ្ទះវិញ នាព្រឹកថ្ងៃទី២៥ ខែមីនា នេះ។លោក ខុន សេរីរដ្ឋា អភិបាលស្រុកអង្គស្នួល បានសម្ដែងនូវការអបអរសាទរ ដែលបងប្អូនប្រជាពលរដ្ឋទាំង ៦៣នាក់ មិនមានអ្នកណាម្នាក់វិជ្ជមាននូវមេរោគកូវីដ-១៩ ។ លោក អភិបាលស្រុកអង្គស្នួល បានថ្លែងអំណរគុណយ៉ាងជឿបំផុត ចំពោះប្រជាពលរដ្ឋទាំងអស់ដែលមានការអត់ធ្មត់ និងចូលរួមជាមួយអាជ្ញាធរបានយ៉ាងល្អ ក្នុងការធ្វើចត្តាឡីស័កបានយ៉ាងត្រឹមត្រូវ តាមការណែនាំរបស់ក្រសួងសុខាភិបាល។ក្នុងឱកាសនោះដែរ លោកអភិបាលស្រុកអង្គស្នួល បានធ្វើការផ្សព្វផ្សាយ អំពីវិធានការការពារជំងឺកូវីដ-១៩ របស់ក្រសួងសុខាភិបាល ជូនប្រជាពលរដ្ឋទាំង ៦៣នាក់ ពិសេសវិធានការការពារជំងឺកូវីដ-១៩ របស់ប្រមុខរាជរដ្ឋាភិបាល សម្ដេចតេជោ គឺ ៣ការពារ ៣កុំ។ លោក អភិបាលស្រុកអង្គស្នួល ក៏បានសំណូមពរដល់បងប្អូនប្រជាពរដ្ឋ នៅពេលត្រឡប់ទៅលំនៅឋានវិញ សូមបន្តផ្សព្វផ្សាយវិធានការទាំងនេះ ជូនប្រជាពលរដ្ឋនៅមូលដ្ឋានរបស់ខ្លួន សំដៅរួមគ្នា បង្ការ ការពារ ទប់ស្កាត់ ការឆ្លងរាលដាលជំងឺកូវីដ១៩ និងឈានដល់ការបញ្ចប់នូវព្រឹត្តិការណ៍សហគមន៍ ២០ កុម្ភៈផងដែរ។ លោកអភិបាលស្រុក បានឧបត្ថម្ភដល់ប្រជាពលរដ្ឋទាំង ៦៣នាក់ ក្នុង១នាក់ទទួលបាន ៖ អង្ករ២៥ គីគីឡូក្រា មី ១កេសតូច ម៉ាសក្រណាត់ ៥ម៉ាស អាល់កុល១ដបតូច និងថវិកា ៥ម៉ឺនរៀល ជាថវិការបស់រដ្ឋបាលខេត្ត៕អត្ថបទ ៖ ម៉ង់

ទំហំពាណិជ្ជកម្មទ្វេភាគីកម្ពុជា-សិង្ហបុរី កើនដល់ជាង៤ពាន់លានដុល្លារ ទោះជួបវិបត្តិកូវីដ-១៩ក្តី

ភ្នំពេញ ៖ សម្តេចវិបុលសេនាភក្តី សាយ ឈុំ ប្រមុខរដ្ឋស្តីទី បានថ្លែងថា ទំហំពាណិជ្ជកម្មទ្វេភាគីរវាងកម្ពុជា និងសិង្ហបុរី បានកើនឡើងដល់ចំនួនជាងបួនពាន់លានដុល្លារអាមេរិក បើទោះបីជាប្រទេសទាំងពីរជួបនៅវិបត្តិមេរោគកូវីដ១៩ក្តី ខណៈការកើននេះ គឺដើម្បីរួមចំណែកយ៉ាងសំខាន់ដល់ការអភិវឌ្ឍសេដ្ឋកិច្ច-សង្គម របស់ប្រជាជន និងប្រទេសទាំងពីរ។នៅក្នុងកិច្ចជំនួបជាមួយលោកស្រី ធាវ ឡេ ឈិង (Teo Lay Cheng) ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋសិង្ហបុរី ថ្មី ប្រចាំព្រះរាជាណាចក្រកម្ពុជា នាថ្ងៃទី២៥ ខែមីនា ឆ្នាំ២០២១នេះ នៅវិមានព្រឹទ្ធសភា សម្តេចសាយ ឈុំ បានលើកឡើងថា សម្តេច ឯកភាពចំពោះប្រសាសន៍របស់លោកជំទាវឯកអគ្គរដ្ឋទូត ដែលបានលើកឡើងទាក់ទង នឹងបញ្ហាសេដ្ឋកិច្ច-សង្គម។ «ទោះបីជាស្ថិតក្នុងវិបតិ្ត នៃជំងឺកូវីដ-១៩ ក៏ដោយ ក៏ពាណិជ្ជកម្មទ្វេភាគីរបស់ប្រទេសទាំងពីរមានទំហំ៤,២៤ ប៊ីលានដុល្លារអាមេរិក ហើយការវិនិយោគរបស់ប្រទេសសិង្ហបុរី នៅព្រះរាជាណាចក្រកម្ពុជាមានទំហំទៅដល់១,២៩ ប៊ីលានដុល្លារអាមេរិក (ពីឆ្នាំ១៩៩៤ ដល់ឆ្នាំ២០២០)»។សម្តេចប្រមុខរដ្ឋស្តីទី បានលើកឡើងផងដែរថា ទំនាក់ទំនងមិត្តភាព និងកិច្ចសហប្រតិបត្តិការរវាងប្រជាជន និងប្រទេសទាំងពីរ (កម្ពុជា-សិង្ហបុរី) មានការរីកចម្រើនជាបន្តបន្ទាប់។ ការរីកចម្រើន និងទំនាក់ទំនងដ៏ល្អនេះ ស្តែងឡើងតាមរយៈការផ្លាស់ប្តូរដំណើរទស្សនកិច្ចគ្នាទៅវិញទៅមក រវាងថ្នាក់ដឹកនាំកំពូល ថ្នាក់ដឹកនាំជាន់ខ្ពស់ និងថ្នាក់ដឹកនាំតាមក្រសួង ស្ថាប័ននានា ក៏ដូចជាស្តែងឡើងតាមរយៈនៃការ គាំទ្រគ្នាទៅវិញទៅមក ក្នុងក្របខ័ណ្ឌកិច្ចសហប្រតិបត្តិការថ្នាក់តំបន់ និងអន្តរជាតិ។ថ្លែងនៅក្នុងកិច្ចជំនួបនោះដែរ លោកស្រី ធាវ ឡេ ឈិង បានថ្លែងអំណរគុណយ៉ាងជ្រាលជ្រៅចំពោះសម្តេចប្រមុខរដ្ឋស្តីទី ដែលបានផ្តល់កិត្តិយសឱ្យលោកជំទាវចូលជួបសម្តែងការគួរសមនាពេលនេះ។ លោកជំទាវ ឯកអគ្គរដ្ឋទូត បានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អរវាងប្រទេសទាំងពីរក្នុងវិស័យជាច្រើនដូចជា ៖ វិស័យសេដ្ឋកិច្ច វិស័យសុខាភិបាល ក៏ដូចជាទំនាក់ទំនងរវាងប្រជាជននៃប្រទេសទាំងពីរ។ វិស័យសេដ្ឋកិច្ច និងការវិនិយោគរវាងប្រទេសទាំងពីរមានការកើនឡើងជាលំដាប់ ជាពិសេសអ្នកវិនិយោគិនសិង្ហបុរីបានសហការយ៉ាងជិត ស្និតជាមួយនឹងអ្នកវិនិយោគកម្ពុជា ក្នុងការអភិវឌ្ឍលើកកម្ពស់វិស័យបច្ចេកវិទ្យា និងវិស័យឌីជីថល ក្នុងនោះវិស័យដែលលេចធ្លោជាងគេ គឺវិស័យទេសចរណ៍ និងវិស័យបដិសណ្ឋាកិច្ច។លោកស្រី ឯកអគ្គរដ្ឋទូត ក៏បានបញ្ជាក់ផងដែរថា ការហោះហើរត្រង់ពីប្រទេសសិង្ហបុរី មកព្រះរាជាណាចក្រកម្ពុជា គឺមានការកើនឡើង៩ដង ក្នុងមួយសប្តាហ៍ ដែលអាចជំរុញលើកកម្ពស់ទំនាក់ទំនង និងការផ្សារភ្ជាប់រវាងប្រជាជន នៃប្រទេសទាំងពីរផងដែរ។ ក្រៅពីកិច្ចសហប្រតិបត្តិការទ្វេភាគី ប្រទេសទាំងពីរ ក៏មានកិច្ចសហប្រតិបត្តិការដ៏ល្អជាមួយ នឹងគ្នា ក្នុងក្របខ័ណ្ឌកិច្ចសហប្រតិបត្តិការថ្នាក់តំបន់ និងអន្តរជាតិជាដើមនោះ៕អត្ថបទ ៖ បាន ចក់

ចិនផ្តល់វ៉ាក់សាំងស៊ីណូហ្វាម ការពារកូវីដ១៩ ដល់គណបក្សហ៊្វុនស៊ិនប៉ិចចំនួន៣ពាន់ដូស

ភ្នំពេញ ៖ រដ្ឋាភិបាលចិន នឹងផ្តល់វ៉ាក់សាំងស៊ីណូហ្វាម ការពារមេរោគកូវីដ១៩ ដល់គណបក្សហ៊្វុនស៊ិនប៉ិច ចំនួន៣ពាន់ដូស ខណៈវ៉ាក់សាំងនេះ នឹងមកដល់ប្រទេសកម្ពុជា នាពេលឆាប់ៗខាងមុខនេះ។ នេះបើតាមសេចក្តីប្រកាសព័ត៌មានរបស់ស្ថានទូតចិនប្រចាំនៅកម្ពុជា ដែលបានផ្ញើជូនគណបក្សនេះ ដែលទូរទស្សន៍ប៊ីធីវី ទទួលបាន នៅថ្ងៃទី២៥ ខែមីនានេះ។យោងតាមសេចក្តីប្រកាសព័ត៌មាន បានបញ្ជាក់ថា ដើម្បីបង្កើនមិត្តភាពទ្វេភាគីរវាងគណបក្សកុម្មុយនិស្ត ចិន និងគណបក្សហ៊្វុនស៊ិនប៉ិច ឲ្យកាន់តែល្អប្រសើរទៀតនោះ រដ្ឋាភិបាលចិនបានសម្រេចផ្តល់នូវ វ៉ាក់សាំង ស៊ីណូហ្វាម ចំនួន៣ពាន់ដូសដល់គណបក្សហ៊្វុនស៊ិនប៉ិច ដើម្បីចាក់ជូនដល់មន្ត្រីជាន់ខ្ពស់គណបក្សនេះ។នៅក្នុងសេចក្តីប្រកាសព័ត៌មាននេះ ក៏បានប្រាប់ដល់គណបក្សហ៊្វុនស៊ិនប៉ិច សរសេរលិខិតមួយទៅកាន់ក្រសួងសុខាភិបាលកម្ពុជា ដើម្បីធ្វើសំណើនៃការទទួលនូវវ៉ាក់សាំងនេះ ដែលគ្រោងនឹងមកដល់ប្រទេសកម្ពុជា នាពេលឆាប់ៗខាងមុខនេះផងដែរ៕អត្ថបទ ៖ បាន ចក់

អាជ្ញាធរក្រុងតាខ្មៅបាញ់ថ្នាំសម្លាប់មេរោគនៅផ្សារតាខ្មៅចាស់ ក្រោយមានតូប៤ពាក់ព័ន្ធអ្នកជំងឺកូវីដ-១៩

ភ្នំពេញ៖ នៅល្ងាចថ្ងៃទី២៣ខែមីនា ម្សិលមិញនេះ អាជ្ញាធរក្រុងតាខ្មៅ បានប្រកាសបិទផ្សារតាខ្មៅចាស់មួយល្ងាច ដើម្បីបាញ់សំលាប់មេរោគកូវីដ១៩ និងមេរោគឆ្លងនានាទៀត ខណៈផ្សារតាខ្មៅចាស់ក្នុងពេលថ្មីៗនេះ គឺមានអ្នកពាក់ព័ន្ធអ្នកជំងឺកូវីដ ១៩ចូលទិញទំនិញ។ពាក់ព័ន្ធព្រឹត្តិការណ៍២០កុម្ភៈនេះ មកដល់ពេលនេះ បានធ្វើអោយពលរដ្ឋនៅក្នុងសង្កាត់តាខ្មៅក្រុងតាខ្មៅ ខេត្តកណ្តាល ចំនួន៣នាក់ បានកើតវិជ្ជមានកូវីដ១៩ និងប្រមូលបានអ្នកពាក់ព័ន្ធជាច្រើនចូលធ្វើចត្តាឡីស័ក នៅក្នុងមណ្ឌលផង និងនៅតាមផ្ទះ ហើយ អាជ្ញាធរក៏បានតម្រូវអោយមូលដ្ឋានអាជីវកម្ម និងហាង តូបលក់ដូរទំនិញមួយចំនួនដែលពាក់ព័ន្ធ ធ្វើការផ្អាកដំណើរការជាបណ្តោះអាសន្ន ផងដែរ។បើតាមលោក ជៀប ខូយ ចៅសង្កាត់តាខ្មៅ បានថ្លែងប្រាប់BTV នៅព្រឹកថ្ងៃទី២៤ ខែមីនានេះថា គិតមកដល់ពេលនេះ មានទីតាំងធំៗចំនួន៤ និងទីសាធារណៈនានាទៀត ដែលពាក់ព័ន្ធអ្នកកើតជំងឺកូវីដ១៩ ត្រូវបានចុះចាញ់ថ្នាំសម្លាប់មេរោគអស់ហើយ ដើម្បីកុំអោយមេរោគកូវីដ១៩នេះ បន្តការរាតត្បាតទៀត។សម្រាប់ទិដ្ឋភាព ដែលគេឃើញថា បណ្តាមូលដ្ឋានអាជីវកម្ម ហាង និងតូបលក់ដូរទំនិញនិងសេវានានានៅក្នុងក្រុងតាខ្មៅមានការបិទនោះ លោក ជៀប ខូយ បញ្ជាក់ថា សម្រាប់អ្នកលក់ដូរទំនិញ សេវាកម្មណា មិនគោរពវិធាន៣កុំ ៣ការពារ គឺអាជ្ញាធរបានចេញបញ្ជាអោយបិទ ។ ដោយឡែកអ្នកលក់ដូរ និងមូលដ្ឋានអាជីវកម្មខ្លះទៀត ដែលអាជ្ញាធរមិនបានតម្រូវអោយបិទ គឺពួកគាត់បានបិទការលក់ដូរដោយខ្លួនឯង ដោយគេមានការព្រួយបារម្ភការឆ្លងជំងឺកូវីដ១៩។ដើម្បីបង្កើនការទប់ស្កាត់កូវីដ១៩នៅក្នុងសង្កាត់តាខ្មៅនេះដែរ លោកជៀប ខូយ បាន ចុះស្រង់ស្ថិតិមនុស្សវ័យចាស់អាយុលើស៦០ឆ្នាំ ទៅធ្វើចាក់ថ្នាំវ៉ាក់សាំងការពារកូវីដ-១៩ និងបានបង្កើនការចុះផ្សព្វផ្សាយអោយបណ្តាពលរដ្ឋ និងអាជីវករនានាបង្កើនប្រុងប្រយ័ត្នការពារខ្លួនតាមរយៈការអនុវត្តវិធាន៣ការពារ ៣កុំទប់ស្កាត់ កូវីដ១៩៕អត្ថបទ ស៊ុម សុខជា

លោកឧកញ៉ា សាម ឃុន និងលោកជំទាវ ឧបត្ថម្ភថវិកាចំនួន៣ម៉ឺនដុល្លារ ជូនដល់សមាគមគ្រូពេទ្យTYDA ដើម្បីចូលរួមប្រយុទ្ធប្រឆាំងជំងឺកូវីដ-១៩

ភ្នំពេញ ៖ នៅថ្ងៃទី២៣ ខែមីនា ឆ្នាំ២០២១ លោកឧកញ៉ា សាម ឃុន និងលោកជំទាវ បានឧបត្ថម្ភថវិកាចំនួន៣០,០០០ ដុល្លារ ជូនដល់ក្រុមគ្រូពេទ្យស្ម័គ្រចិត្តយុវជន សម្តេចតេជោ ហ៊ុន សែន (TYDA) ដែលចូលរួមប្រយុទ្ធប្រឆាំងជំងឺកូវីដ១៩ ដើម្បីជាការលើកទឹកចិត្តចំពោះកិច្ចខិតខំ ប្រឹងប្រែង ចូលរួមក្នុងការទប់ស្កាត់ជំងឺកូវីដ-១៩ កន្លងមក។នាពេលបច្ចុប្បន្ននេះ ថ្នាក់ដឹកនាំ និងក្រុមការងារសមាគមគ្រូពេទ្យស្ម័គ្រចិត្តយុវជនសម្តេចតេជោ(TYDA) និងយុវជនស្ម័គ្រចិត្តប្រឆាំងកូវីដ-១៩ កំពុងបំពេញភារកិច្ចយ៉ាងសកម្មដើម្បីជាតិ និងប្រជាជន ខណៈដែលប្រទេសកម្ពុជា មានការរីករាលដាលជំងឺកូវីដ-១៩ នៅក្នុងសហគមន៍។ក្រុមការងារនៃសមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) និងយុវជនស្ម័គ្រចិត្តប្រឆាំងកូវីដ-១៩ បានចូលរួមយ៉ាងសកម្មជាមួយក្រុមគ្រូពេទ្យ និងអាជ្ញាធរ និងផ្នែកដែលពាក់ព័ន្ធ ក្នុងការចុះយកសំណាក និងដឹកអ្នកជំងឺកូវីដ-១៩ ទៅកាន់មន្ទីរពេទ្យ។សូមជម្រាបថា ក្រសួងសុខាភិបាលកម្ពុជា នៅព្រឹកថ្ងៃពុធ ទី២៤ ខែមីនា ឆ្នាំ២០២១នេះ បានប្រកាសរកឃើញអ្នកវិជ្ជមានកូវីដ-១៩ថ្មី ចំនួន២៩នាក់ ដែល ២៧នាក់ ជាករណីឆ្លងសហគមន៍ ( ព្រឹត្តិការណ៍សហគមន៍២០កុម្ភៈ ) ហើយ០២នាក់ទៀត ជាករណីដែលនាំចូលពីបរទេស ខណៈដែលមានអ្នកជាសះស្បើយថ្មីមានចំនួន៣៤នាក់ ផងដែរ។ តួលេខជាសរុប កម្ពុជា មានអ្នកឆ្លងកូវីដ-១៩ ចំនួន ១,៨១៧នាក់ ក្នុងនោះ មានអ្នកជាសះស្បើយចំនួន ១,០៣៣នាក់, និងអ្នកជំងឺកំពុងសម្រាកព្យាបាលចំនួន ៧៧៧នាក់ និងករណីស្លាប់ ចំនួន០៥នាក់៕

សាលាហ្វឹកហ្វឺនទ័ពមួកខៀវ ត្រូវបានយកធ្វើជាកន្លែងព្យាបាលអ្នកជំងឺកូវីដ-១៩

ភ្នំពេញ ៖ នៅថ្ងៃទី២៤ ខែមីនា ឯកឧត្តមទេសរដ្ឋមន្ត្រី សែម សុវណ្ណនី អនុប្រធានគណៈកម្មាធិការជាតិសម្របសម្រួល បញ្ជូនកងកម្លាំងរក្សាសន្តិភាព ឯកឧត្តម មាន ច័ន្ទយ៉ាដា អភិបាលរងរាជធានីភ្នំពេញ និងមន្ត្រីជំនាញក្រសួងសុខាភិបាល បានអញ្ជើញត្រួតពិនិត្យទីតាំងចត្តាឡីស័ក និងព្យាបាលអ្នកជំងឺកូវីដ១៩ នៅសាលាហ្វឹកហ្វឺនពហុសាសន៍ ACO ខេត្តកំពង់ស្ពឺ ។នៅក្នុងដំណើរត្រួតពិនិត្យនេះ សាលារាជធានីភ្នំពេញ និងមន្ត្រីជំនាញក្រសួងសុខាភិបាលបានសម្រេចយកមណ្ឌលចត្តាឡីស័ក ២កន្លែងទៀតរបស់មជ្ឈមណ្ឌលគ្រប់គ្រងរក្សាសន្តិភាពរួមមាន ៖ មណ្ឌលចត្តាឡីស័ក នៅសាលាហ្វឹកហ្វឺនពហុសាសន៍ACOស្រុកភ្នំស្រួច និងមណ្ឌលចត្តាឡីស័ក នៅសាលាហ្វឹកហ្វឺនឧត្តុង្គ ខេត្តកំពង់ស្ពឺ ធ្វើជាមណ្ឌលចត្តាឡីស័ក និងព្យាបាលអ្នកជំងឺកូវីដ១៩ តាមអនុសាសន៍ណែនាំ របស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា។នាយឧត្តមសេនីយ៍ សែម សុវណ្ណនី ក្នុងនាមអគ្គនាយកមជ្ឈមណ្ឌលជាតិ បានថ្លែងប្រាប់BTVនៅថ្ងៃទី២៤ ខែមីនានេះ បានថ្លែងថា ការយកមណ្ឌលចត្តាឡីស័ក ទាំងពីរកន្លែងរបស់អង្គភាពទ័ពមួកខៀវសម្រាប់ធ្វើចត្តាឡីស័ក និងព្យាបាលអ្នកជំងឺកូវីដ១៩ ទាំងលើកំលាំងយោធា និងពលរដ្ឋស៊ីវិល គឺបានធ្វើឡើងបន្ទាប់ពីក្រុមគ្រូពេទ្យយោធាមួកខៀវយើងមានបទពិសោធន៍ មានសមត្ថភាពព្យាបាលអ្នកជំងឺកូវីដ១៩ បានជាសះស្បើយ ជាពិសេសការព្យាបាលជាសះស្បើយចំពោះអ្នកជំងឺទ័ពមួកខៀវមកពីសាធារណៈអាហ្វ្រិកកណ្តាលលើកចុងក្រោយបានជាចំនួន៩នាក់សល់២នាក់ទៀតកំពុងបន្តព្យាបាល។សូមបញ្ជាក់ថា នៅក្នុងឱកាសចុះត្រួតពិនិត្យមណ្ឌលព្យាបាលអ្នកជំងឺកូវីដទីតាំងថ្មីនេះ ក្រុមគ្រូពេទ្យ ក៏បានអញ្ជើញមកចាក់ថ្នាំវ៉ាក់សាំងការពារកូវីដ-១៩ ជូនកងទ័ពមួកខៀវកម្ពុជាចំនួនជិត២០០នាក់ ដែលទើបត្រឡប់មកពីប្រទេសលីបង់ និងសាធារណៈអាហ្វ្រឹកកណ្តាល និងទើបបានបញ្ចប់ការធ្វើចត្តាឡីស័ក នៅក្នុងមជ្ឈមណ្ឌលផងដែរ។នាយឧត្តមសេនីយ៍ សែម សុវណ្ណនី បានបញ្ជាក់ដែរ សម្រាប់ទ័ពមួកខៀវដែលកំពុងបំពេញបេសកកម្មថែរក្សាសន្តិភាពនៅក្រៅប្រទេស បច្ចុប្បន្នគឺមានទ័ពមួកខៀវកម្ពុជានៅ ប្រទេសម៉ាលី នៅអាហ្វ្រិកកណ្តាល លីបង់ គឺបានចុះឈ្មោះចាក់វ៉ាក់សាំងការពារកូវីដ១៩ ដែលរៀបចំដោយអង្គការសហប្រជាជាតិអស់ហើយ ដោយឡែកទ័ពមួកខៀវនៅប្រទេសស៊ូដង់ និងស៊ូដង់ខាងត្បូង គឺបាននិងកំពុងត្រៀមចុះឈ្មោះបន្ត៕អត្ថបទ ៖ ស៊ុម សុខជា

បណ្ដាញសង្គម

ព័ត៌មានថ្មីៗ

សភាសហភាពអឺរ៉ុប កំពុងតាមដានដោយយកចិត្តទុកដាក់ការអនុវត្តបទឈប់បាញ់

ផ្ទះអតីតយុទ្ធជន ៣៥ខ្នង ស្ថិតនៅឃុំក្រយា ស្រុកសន្ទុក ខេត្តកំពង់ធំ រងផលប៉ះពាល់ដោយជំនន់ទឹកភ្លៀង

ឯកអគ្គរដ្ឋទូត៖ ដាណឺម៉ាកប្រើកោះ Bornholm ដើម្បីគំរាមកំហែងសន្តិសុខរបស់រុស្ស៊ី រួមទាំងតំបន់ Kaliningrad

មនុស្សរាប់ពាន់នាក់ ធ្វើបាតុកម្មនៅយេម៉ែនប្រឆាំងនឹងប្រតិបត្តិការយោធាអ៊ីស្រាអែល នៅតំបន់ហ្កាហ្សា

អាមេរិក កំពុងពិភាក្សាជាមួយក្រុមតាលីបង់អំពីការវិលត្រឡប់នូវយោធារបស់ខ្លួន ទៅមូលដ្ឋានទ័ពអាកាស Bagram វិញ

កូរ៉េខាងត្បូង មានបំណងរក្សាទំនាក់ទំនងជាមួយរុស្ស៊ី

រុស្ស៊ីបើកការវាយប្រហារចង្កោមលើគោលដៅអ៊ុយក្រែន ចំណែកអ៊ុយក្រែន បានវាយប្រហារមជ្ឈមណ្ឌលដឹកជញ្ជូនយោធារុស្ស៊ី

មន្ត្រីជាន់ខ្ពស់៖ យន្តហោះចម្បាំង MiG-31 របស់រុស្ស៊ី មិនបានបំពានដែនអាកាសអេស្តូនីទេ

គណៈកម្មាការអឺរ៉ុប៖ និយាយថា ប្រទេសចំនួន៨របស់សហភាពអឺរ៉ុប បន្តនាំចូលឧស្ម័នពីរុស្ស៊ី

លោកស្រី von der Leyen ៖ គណៈកម្មការអឺរ៉ុបស្នើឲ្យដាក់ទណ្ឌកម្មប្រឆាំងនឹងក្រុមហ៊ុនរុស្ស៊ី និងបរទេសចំនួន ៤៥

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ និង ការអភិវឌ្ឍន៍

តម្លៃម៉ាសមិនឡើងថ្លៃនោះទេ ទោះពលរដ្ឋខេត្តកណ្តាល មានកាតព្វកិច្ចពាក់ម៉ាសជាចាំបាច់ក្តី

ក្រសួងសុខាភិបាល រៀបចំរួចរាល់ទូរត្រជាក់ សម្រាប់រក្សាទុកវ៉ាក់សាំងកូវីដ-១៩ ប្រភេទ ស៊ីណូវ៉ាក់

ជនបរទេសមិនព្រមធ្វើចត្តាឡីស័ក អាចនឹងត្រូវបណ្ដេញចេញពីកម្ពុជា

ទំហំពាណិជ្ជកម្មទ្វេភាគីកម្ពុជា-សិង្ហបុរី កើនដល់ជាង៤ពាន់លានដុល្លារ ទោះជួបវិបត្តិកូវីដ-១៩ក្តី

ចិនផ្តល់វ៉ាក់សាំងស៊ីណូហ្វាម ការពារកូវីដ១៩ ដល់គណបក្សហ៊្វុនស៊ិនប៉ិចចំនួន៣ពាន់ដូស

អាជ្ញាធរក្រុងតាខ្មៅបាញ់ថ្នាំសម្លាប់មេរោគនៅផ្សារតាខ្មៅចាស់ ក្រោយមានតូប៤ពាក់ព័ន្ធអ្នកជំងឺកូវីដ-១៩

សាលាហ្វឹកហ្វឺនទ័ពមួកខៀវ ត្រូវបានយកធ្វើជាកន្លែងព្យាបាលអ្នកជំងឺកូវីដ-១៩

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

តម្លៃ​ម៉ាស​មិន​ឡើងថ្លៃ​នោះទេ​ ​​ទោះ​ពលរដ្ឋ​ខេត្តកណ្តាល​ មាន​កាតព្វកិច្ច​ពាក់​ម៉ាស​ជា​ចាំបាច់​ក្តី​

ក្រសួងសុខាភិបាល រៀបចំ​រួចរាល់​ទូរ​ត្រជាក់ ​សម្រាប់​រក្សាទុក​វ៉ាក់សាំង​កូ​វីដ​-១៩​ ប្រភេទ ស៊ី​ណូ​វ៉ា​ក់​

ជនបរទេស​មិន​ព្រម​ធ្វើ​ច​ត្តា​ឡី​ស័ក ​អាច​នឹង​ត្រូវ​បណ្ដេញ​ចេញពី​កម្ពុជា

ចិន​ផ្តល់​វ៉ាក់សាំង​ស៊ី​ណូ​ហ្វា​ម​ ការពារ​កូ​វីដ​១៩ ​ដល់​គណបក្ស​ហ៊្វុនស៊ិនប៉ិច​ចំនួន​៣​ពាន់​ដូ​ស

សាលា​ហ្វឹកហ្វឺន​ទ័ព​មួក​ខៀវ​ ត្រូវ​បាន​យក​ធ្វើជា​កន្លែង​ព្យាបាល​អ្នកជំងឺ​កូ​វីដ​-១៩

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍

តម្លៃម៉ាសមិនឡើងថ្លៃនោះទេ ទោះពលរដ្ឋខេត្តកណ្តាល មានកាតព្វកិច្ចពាក់ម៉ាសជាចាំបាច់ក្តី

ក្រសួងសុខាភិបាល រៀបចំរួចរាល់ទូរត្រជាក់ សម្រាប់រក្សាទុកវ៉ាក់សាំងកូវីដ-១៩ ប្រភេទ ស៊ីណូវ៉ាក់

ជនបរទេសមិនព្រមធ្វើចត្តាឡីស័ក អាចនឹងត្រូវបណ្ដេញចេញពីកម្ពុជា

ចិនផ្តល់វ៉ាក់សាំងស៊ីណូហ្វាម ការពារកូវីដ១៩ ដល់គណបក្សហ៊្វុនស៊ិនប៉ិចចំនួន៣ពាន់ដូស

សាលាហ្វឹកហ្វឺនទ័ពមួកខៀវ ត្រូវបានយកធ្វើជាកន្លែងព្យាបាលអ្នកជំងឺកូវីដ-១៩