BTV NEWS

សម្ដេចធិបតី ដឹកនាំគណៈប្រតិភូចូលក្រាបបង្គំគាល់ព្រះករុណា ព្រះមហាក្សត្រ ទូលថ្វាយលទ្ធផលចុះបញ្ជីបូជនីយដ្ឋានចងចាំនៃកម្ពុជា ក្នុងបញ្ជីបេតិកភណ្ឌពិភពលោក

សភាតំណាងប្រជាជនចិនចាត់ទុកសម្តេចតេជោ ជាតួអង្គសំខាន់បន្តពីព្រះបរមរតនកោដ្ឋក្នុងការពូនជ្រំទំនាក់ទំនងរវាងកម្ពុជា និងចិន

សម្តេចតេជោអនុញ្ញាតឱ្យសមាជិកគណៈកម្មាធិការអចិន្ត្រៃយ៍សភាប្រជាជនចិនជួបសម្តែងការគួរសម

ក្រុមការងារបច្ចេកទេសអន្តរក្រសួងបន្តចុះកំណត់និយាមកា និងបោះបង្គោលព្រំដីតាមបណ្តោយព្រែកជីកហ្វូណនតេជោ សម្រាប់កំណាត់ទី២ ក្នុងភូមិសាស្រ្តខេត្តកំពត

នយោបាយ និង ការអភិវឌ្ឍន៍

ខេត្តកំពង់ស្ពឺ នឹងមានរោងចក្រចំនួន២០ បន្ថែមទៀត បង្កើតការងារថ្មីជាង៥ម៉ឺន កន្លែង

កំពង់ស្ពឺ ៖ អភិបាលនៃគណៈអភិបាលខេត្តកំពង់ស្ពឺ ថ្លែងថា ខេត្តកំពង់ស្ពឺ កំពុងមានមោទនភាព ក្នុងការទាក់ទាញអ្នកវិនិយោគ នឹងត្រូវការកម្លាំងពលកម្មរាប់ពាន់អ្នកបន្ថែមទៀត ស្ថិតនៅក្នុងដំណាលនៃការរីករាលដាលជំងឺកូវីដ-១៩ នេះ ។ឯកឧត្តម វ៉ី សំណាង អភិបាលនៃគណៈអភិបាលខេត្តកំពង់ស្ពឺ ថ្លែងប្រាប់ភ្នាក់ងារអ្នកយកព័ត៌មាន BTV ស្តីពីការ វិនិយោគ ស្ថិតក្នុងវិបត្តិនៃជំងឺកូវីដ-១៩ នៅលើទឹកដីខេត្តកំពង់ស្ពឺ នៅថ្ងៃទី ១៩ ខែ មីនា ឆ្នាំ ២០២១ នេះថា ខេត្តកំពង់ស្ពឺ គឺជាខេត្តមានសក្ដានុពលមួយ ក្នុងការជំរុញទាក់ទាញវិនិយោគឲ្យមកបណ្តាក់ទុននៅខេត្តនេះ ជាក់ស្តែងចាប់ពីពេលមាន វិបត្តិផ្ទុះឡើងនៃជំងឺកូវីដ-១៩ ខេត្តកំពង់ស្ពឺ នូវតែទទួលបានអ្នកវិនិយោគ និងត្រូវការកម្លាំងពលកម្មជាបន្តបន្ទាប់។ឯកឧត្តម បន្តថា ជុំវិញនិងការវិនិយោគស្ថិតក្នុងវិបត្តិនេះវិញ, ខេត្តកំពង់ស្ពឺ នៅតែមានមោទនភាព ក្នុងការទាក់ទាញ វិនិយោគិនឲ្យមកបណ្តាក់ទុនថ្មីៗ ជាច្រើនបន្តបន្ទាប់ ក្នុងទឹកដីខេត្តកំពង់ស្ពឺ ដែលកត្តាទាំងនោះ បានកើតចេញនយោបាយ ដ៏ត្រឹមត្រូវ ជាពិសេសការជឿជាក់លើការដឹកនាំនៃប្រមុខរាជរដ្ឋាភិបាល។ ជាក់ស្តែងនៅពេលថ្មីៗនេះ អ្នកវិនិយោគមកពី ប្រទសចិន បានអះអាងថា ពួកគាត់នឹងនាំក្រុមហ៊ុនថ្មីៗ មកបណ្តាក់ទុននៅក្នុងទឹកដីខេត្តកំពង់ស្ពឺ ចំនួន ២០ ក្រុមហ៊ុន នឹងត្រូវការកំលាំងពលកម្មប្រមាណចំនួន ៥ម៉ឺននាក់បន្ថែមទៀត ដើម្បីចូលចំណែកដល់ការអភិវឌ្ឍន៍នៅកម្ពុជា។ រោងចក្រទាំង២០ ភាគច្រើនជារោងចក្រកាត់ដេរសំលៀកបំពាក់ និងស្បែកជើង។ឯកឧត្តម វ៉ី សំណាង បានថ្លែងឲ្យដឹងថា ចាប់តាំងក្នុងវិបត្តិនៃការផ្ទុះឡើងនៃជំងឺកូវីដ-១៩ មក រោងចក្រខេត្តកំពង់ ស្ពឺមានការបិទរោងចក្រខ្លះៗ។ បច្ចុប្បន្នខេត្តកំពង់ស្ពឺមានគម្រោងរោងចក្រជាង២០០ ក្នុងនោះ ១៥៣រោងចក្រកំពុងដំណើរការ និងមួយចំនួនទៀត កំពុងស្ថិតក្នុងការសាងសង់៕អត្ថបទ៖ សុន រ៉ាឌី

កម្មករប្រមូលសំរាមជាច្រើនរយនាក់បន្ថែមទៀត ទទួលបានការចាក់វ៉ាក់សាំងលើកទី១

ភ្នំពេញ ៖ ក្រោយពីរកឃើញករណីវិជ្ជមានជំងឺកូវីដ-១៩ មួយករណីចំពោះកម្មករប្រមូលសំរាម និងស្របពេលដែលមានការផ្អាកការចាក់វ៉ាក់សាំង Sinopharm លើកទី១ ជូនក្រុមគោលដៅ នាពេលនេះកម្មករប្រមូលសំរាមក្នុងរាជធានីភ្នំពេញ ដែលជាក្រុមប្រឈម មានការជួយអន្តរាគមន៍ភ្លាមៗ ពីសាលារាជធានីភ្នំពេញ ដើម្បីទទួលការចាក់វ៉ាក់សាំង AstraZeneca ជំនួសវិញ។ មកទល់ពេលនេះ ចំនួនអ្នកចាក់វ៉ាក់សាំងលើកទី១ បានកើនឡើងពីជាង ១០០នាក់ ដល់ជាង៥០០នាក់។គិតមកត្រឹមពេលនេះ កម្មករប្រមូលសំរាមក្នុងរាជធានីភ្នំពេញចំនួនជាង ៥០០នាក់ គិតជាភាគរយគឺប្រមាណ ៣០% នៃចំនួនកម្មករសរុបជាង ២០០០នាក់ ទទួលបានការចាក់វ៉ាក់សាំងលើកទី១រួចរាល់ ។ នេះជាការលើកឡើងរបស់លោក នៅ ឧត្តម ប្រធានផ្នែកគ្រប់គ្រងធនធានមនុស្សនៅក្រុមហ៊ុន CINTRI។ លោក បញ្ជាក់ថា ចំនួនកម្មករប្រមូលសំរាមដំបូងឡើយ មានត្រឹមតែជាង ១០០នាក់ប៉ុណ្ណោះដែលបានចាក់វ៉ាក់សាំង Sinopharm រួចក៏មានការផ្អាកចាក់វ៉ាក់សាំងនេះ សម្រាប់លើកទី១។ ដោយមើលឃើញពីភាពប្រឈមរបស់កម្មករប្រមូលសំរាម សាលារាជធានីភ្នំពេញក៏បានអន្តរាគមន៍ភ្លាមៗ ដើម្បីអនុញ្ញាតឱ្យកម្មករប្រមូលសំរាមបន្តចាក់វ៉ាក់សាំង AstraZeneca ជំនួសវិញ។លោក នៅ ឧត្តម បញ្ជាក់ផងដែរថា បច្ចុប្បន្ននេះ ក្រុមហ៊ុនបានអប់រំណែនាំដល់កម្មករប្រមូលសំរាមឱ្យមានការប្រុងប្រយ័ត្នខ្ពស់ពេលបំពេញការងារប្រចាំថ្ងៃ។ ជាពិសេសគឺក្រុមដែលត្រូវទៅប្រមូលសំរាមនៅតំបន់ប្រឈមខ្ពស់ដូចជា តំបន់ចត្តាឡីស័ក ជាដើម ដោយត្រូវតែពាក់នូវឧបករណ៍ការពារ។ ចំពោះសំរាមដែលប្រមូលពីតំបន់នេះ គឺយកទៅបំផ្លាញចោលក្នុងឡវេជ្ជសាស្ត្រ ដោយមិនយកទៅចាក់លាយឡំជាមួយ សំរាមទូទៅនោះទេ។ ក្នុងនាមលោកជាតំណាងឱ្យកម្មករប្រមូលសំរាម ក៏ថ្លែងអំណរគុណដល់ប្រមុខរាជរដ្ឋាភិបាល ដែលបន្តផ្ដល់ការចាក់វ៉ាក់សាំងជូនក្រុមកម្មករប្រមូលសំរាម។ជុំវិញភាពប្រឈមរបស់កម្មករប្រមូលសំរាម គិតមកត្រឹមពេលនេះ មានបុគ្គលិកប្រមូលសំរាមម្នាក់បានរកឃើញវិជ្ជមានកូវីដ-១៩។ ការរកឃើញរបស់អ្នកជំងឺមួយរូបនេះ គឺមានការពាក់ព័ន្ធផ្ទាល់និងប្រយោលជាមួយក្រុមការងារប្រមូលសំរាមដទៃទៀតចំនួន ៣២ នាក់ ដែលខណៈពេលនេះ ពួកគាត់កំពុងធ្វើចត្តាឡីស័ក នៅតាមផ្ទះ និងតាមដានសុខភាពខ្លួនឯង៕ អត្ថបទ ៖ គឹមហុក

ពលរដ្ឋខេត្តកណ្តាលបង្កើនការប្រុងប្រយ័ត្ន ក្រោយរកឃើញវិជ្ជមានកូវីដ-១៩ នៅតំបន់ជ្រៃធំ

កណ្ដាល ៖ អ្នកភូមិរស់នៅតាមបណ្តោយផ្លូវជាតិលេខ២១ ចាប់ពីតំបន់ជ្រៃធំ ស្រុកកោះធំ រហូតដល់ស្រុកស្អាង និងក្រុងតាខ្មៅ បានបង្កើនការប្រុងប្រយ័ត្នការពារខ្លួនពីជំងឺកូវីដ១៩ ដោយអាជ្ញាធរភូមិបានចុះបាញ់ថ្នាំសម្លាប់មេរោគតាមខ្នងផ្ទះ បន្ទាប់ពីរកឃើញករណីវិជ្ជមានកូវីដ-១៩ ជាបន្តបន្ទាប់នៅតំបន់ជ្រៃធំ ឃុំសំពៅពូន ស្រុកកោះធំ។ប្រជាពលរដ្ឋរស់នៅតាមបណ្តោយផ្លូវជាតិលេខ២១ បានថ្លែងប្រាប់BTV នៅថ្ងៃទី១៩ ខែមីនានេះ ថា ក្រោយរកឃើញករណីឆ្លងកូវីដ-១៩ នៅក្នុងតំបន់ជ្រៃធំមក បានធ្វើឲ្យធ្វើដំណើរតាមផ្លូវជាតិលេខ២១ ស្ងប់ស្ងាត់ជាងមុន ការលក់ដូររបស់ពលរដ្ឋក៏ថមថយ ទីតាំងលក់ដូរទំនិញខ្លះមានចងខ្សែបាំងរក្សាគន្លាត កាត់បន្ថយការធ្វើដំណើរឡើងមកភ្នំពេញ ប្រសិនបើមិនមានការចាំបាច់ ចំណែកអាជ្ញាធរមូលដ្ឋាន បានចែកទឹកថ្នាំសម្លាប់មេរោគឲ្យមេភូមិ និងប្រជាការពារភូមិចុះបាញ់តាមនៅតាមដងផ្លូវ និងតាមខ្នងផ្ទះប្រជាពលរដ្ឋ។តាមការបញ្ជាក់ពីឯកឧត្តម គង់ សោភ័ណ្ឌ អភិបាលខេត្តកណ្តាល បានថ្លែងថា ដើម្បីទប់ស្កាត់ការរាលដាលកូវីដ-១៩ ក្នុងមូលដ្ឋាន នៅពេលនេះ អាជ្ញាធរ បានសម្រេចបិទកាស៊ីណូចំនួន៦ទីតាំង បណ្តោះអាសន្ន ដោយយកអាគារកាស៊ីណូទាំងអស់នោះ ធ្វើជាទីតាំងចត្តាឡីស័ក ទៅលើបុគ្គលិក និងអ្នកពាក់ព័ន្ធចូលក្នុងកាស៊ីណូនោះ ។ ដោយឡែកសម្រាប់អាជីវកម្មតូចធំគ្រប់ប្រភេទនៅក្នុងតំបន់ជ្រៃធំនោះ ត្រូវបានអាជ្ញាធរស្នើឲ្យបិទបណ្តោះអាសន្ន សម្រាប់ការធ្វើដំណើររបស់ពលរដ្ឋខ្មែរនៅក្នុងតំបន់នោះ គឺអនុញ្ញាតឲ្យធ្វើដំណើរធម្មតា តែហាមជនបរទេសធ្វើដំណើរបណ្តោះអាសន្នសិន។ ទោះយ៉ាងណា ក្នុងអំឡុងពេលនេះ ឯកឧត្តម គង់ សោភ័ណ្ឌ បានក្រើនរំលឹកប្រជាពលរដ្ឋក្នុងមូលដ្ឋាន បើមិនមានការចាំបាច់សូមកុំចេញក្រៅផ្ទះ ហើយបើចេញក្រៅផ្ទះសូមអនុវត្តវិធានការ បីការពារ បីកុំ ឲ្យបានខ្ជាប់ខ្ជួន ៕អត្ថបទ ស៊ុម សុខជា

សម្តេចពិជ័យសេនា ទៀ បាញ់ ៖ កងទ័ពចំនួន៥នាក់ បានឆ្លងមេរោគកូវីដ១៩ បើទោះបីបានចាក់វ៉ាក់សាំងរួចក្តី

ភ្នំពេញ ៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ កម្ពុជា បានថ្លែងថា រហូតមកដល់ថ្ងៃនេះ យោធិនចំនួន៥នាក់ហើយ បានឆ្លងមេរោគកូវីដ១៩បើទោះបី ពួកគេបានចាក់ថ្នាំវ៉ាក់សាំងរួចរាល់ទាំងពីរលើកហើយក្តី ប៉ុន្តែការអាការៈ ជំងឺរបស់ពួកគេពុំមានលក្ខណៈធ្ងន់ធ្ងរ នោះទេ។ថ្លែងប្រាប់អ្នកយកព័ត៌មានក្រោយពីអមដំណើរសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញទៅពិនិត្យមើលដំណើរការរៀបចំមន្ទីរពេទ្យមួយ កន្លែងមានឈ្មោះថា មន្ទីរពេទ្យស្ត្រីនគរទេព ដែលមានទីតាំងស្ថិតនៅភូមិព្រៃសខាងកើត សង្កាត់ព្រៃស ខណ្ឌដង្កោ រាជធានីភ្នំពេញ សម្តេចពិជ័យសេនា ទៀ បាញ់ បានលើកឡើងថា ខណៈពេលនេះ កងទ័ពនៃក្រសួងការពារជាតិ បានអនុវត្តយ៉ាងខ្ជាប់ខ្ជួន ចំពោះវិធានការសុខាភិបាល ជាពិសេស«៣ការពារ និង៣កុំ» ក្រោយមានការឆ្លងជាបន្តបន្ទាប់ចំពោះយោធាតាមអង្គភាពតាមអង្គភាពមួយចំនួននៃអគ្គបញ្ជាការដ្ឋាននោះ។ដើម្បីបង្ការ ការពារ និងទប់ស្កាត់ការរីករាលដាលនៃជំងឺកូវីដ១៩ ក្នុងជូរកងទ័ព អគ្គបញ្ជាការដ្ឋាននៃកងយោធពលខេមរភូមិន្ទនោះ សម្តេចពិជ័យសេនា ទៀ បាញ់ ក៏បានណែនាំដល់មេបញ្ជាការ កងទ័ពជំនាញ និងនាយកស្ថាប័នចំណុះអគ្គបញ្ជាការទាំងអស់ត្រូវ បន្តអនុវត្តឲ្យបានម៉ឺងម៉ាត់បំផុតនូវវិធានការសុខាភិបាល ជាពិសេសវិធានការ៣ការពារ ៣កុំ របស់រាជរដ្ឋាភិបាលក្នុងការប្រយុទ្ធប្រឆាំង នឹងជំងឺកូវីដ១៩នេះ បន្ថែមទៀត បើទោះបីបានចាក់វ៉ាក់សាំងការពារកូវីដនេះ រួចរាល់ហើយនោះ។ជាមួយគ្នានោះដែរ សម្តេចពិជ័យសេនា ទៀ បាញ់ ក៏បានប្រកាសផងដែរថា ពេទ្យកងទ័ពនៃក្រសួងការពារជាតិបានត្រៀមខ្លួនរួចជាស្រេចផងដែរ ក្នុងការចូលរួមអន្តរាគមន៍ជួយដល់ប្អូនប្រជាពលរដ្ឋខ្មែរ ដែលជួបបញ្ហាកូវីដ១៩នេះ ខណៈកម្លាំងពេទ្យកងទ័ពទាំងនោះ ក៏បានទទួលការបណ្តុះបណ្តាលជំនាញវេជ្ជសាស្ត្ររួចរាល់ផងដែរនោះ៕អត្ថបទ ៖ បាន ចក់

វារីវប្បកម្ម អំពាវនាវប្រជាពលរដ្ឋជួយទិញត្រី ចិញ្ចឹមក្នុងស្រុក

ភ្នំពេញ ៖ ម្ចាស់អាជីវកម្មក្នុងវិស័យវារីវប្បកម្ម បានអំពាវនាវដល់ប្រជាពលរដ្ឋជួយគាំទ្រត្រីចិញ្ចឹមក្នុងស្រុកច្រើន ព្រោះថា នឹងជួយលើកទឹកចិត្តដល់អ្នកចិញ្ចឹមក្នុងស្រុក ជាពិសេសផ្តល់ប្រាក់ចំណូលដល់សេដ្ឋកិច្ចជាតិផងដែរ។លោក សុខ រ៉ាដែន ប្រធានសមាគមវារីវប្បករកម្ពុជា បានលើកឡើងថា ការនាំចូលផលវារីវប្បកម្ម មិនត្រឹមតែធ្វើឱ្យអ្នកចិញ្ចឹមក្នុងស្រុកជួបបញ្ហាទីផ្សារប៉ុណ្ណោះទេ ប៉ុន្តែផលិតផលមួយចំនួន ក៏មិនមានអនាម័យ គុណភាព និងប្រភពនាំចូលដែលអាចធ្វើឱ្យមានបញ្ហាដល់សុខភាពអ្នកបរិភោគដែរ គ្រាដែលផលិតផលក្នុងស្រុក សុទ្ធ សឹងមានគុណភាពល្អ ព្រោះថា ចំណីដែលផ្តល់ឱ្យត្រីសុទ្ធតែមានគុណភាព និងការផលិតយ៉ាងត្រឹមត្រូវ និងស្របតាមស្តង់ដារណែនាំពីអ្នកជំនាញ។ប្រកបរបរលក់ត្រីប្រមាណ២០ ឆ្នាំមកហើយ អាជីវករលក់ត្រីផ្សារច្បារអំពៅ អ្នកនាង ផា ស៊ីនួន បានអះអាងថា ត្រីដែលដាក់លក់សព្វថ្ងៃគឺទិញបន្តពីឈ្មួញនៅក្បែរផ្សារ ដែលភាគច្រើនជាត្រីចិញ្ចឹមក្នុងស្រុក។ អាជីវករូបនេះ បានបន្តថា ត្រីក្នុងស្រុកពិតជាល្អជាងការនាំចូល ទាំងគុណភាព និងរសជាតិទោះបីជាតម្លៃខុសគ្នាយ៉ាងណាក៏ដោយ តែតម្លៃអាចទទួលយកបាន។នៅក្នុងលិខិតផ្លូវការមួយរបស់ក្រសួងកសិកម្ម រុក្ខាប្រមាញ់ និងនេសាទ ចុះហត្ថលេខាដោយឯកឧត្តមរដ្ឋមន្ត្រី វេង សាខុន នៅថ្ងៃទី១៨ ខែមីនា ឆ្នាំ២០២១កន្លងទៅ បានឱ្យដឹងថា ដើម្បីជួយដោះស្រាយនូវបញ្ហាដែលបាននិងកំពុងកើតមានចំពោះវារីវប្បករក្នុងស្រុក ក្រសួងកសិកម្ម សូមគោរពស្នើសុំសម្តេចនាយករដ្ឋមន្ត្រីតេជោ ហ៊ុន សែន ដាក់លក្ខខណ្ឌដល់អាជីវករដែលមានបំណងនាំចូលផល ផលិតផលជលផល ត្រូវចូលរួមប្រមូលទិញផលវារីវប្បកម្មដែលកំពុងផលិតបាន និងជន់ជោរនៅលើទីផ្សារក្នុងស្រុកពីវារីវប្បករចំនួន ៥០ភាគរយ និងអនុញ្ញាតនាំចូលចំនួន ៥០ភាគរយ ដើម្បីបានអនុវត្តតាមទស្សនា នៃគោលនយោបាយ ឈ្នះ ឈ្នះ រវាងវារីវប្បករ និងអាជីវករ៕អត្ថបទ ៖ ឈិត បូរ៉ាវី

សម្តេចតេជោ អញ្ជើញពិនិត្យមើលស្តូបព្រះបរមរតនកោដ្ឋ ដែលកំពុងជួសជុល បានប្រមាណ៩៥%

ភ្នំពេញ ៖ ព្រឹកថ្ងៃទី១៩ខែមីនានេះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា រួមជាមួយថ្នាក់ដឹកនាំ មន្ត្រី ជំនាញ និង អាជ្ញាធរ ដែនដី ពាក់ព័ន្ធ បានអញ្ជើញទៅពិនិត្យមើលដំណើរការជួសជុលកែលម្អ ស្តូបព្រះបរមរតនៈកោដ្ឋ ដែល ស្ថិតនៅលើសួនច្បារខាងកើតវិមានឯករាជ្យ ស្ថិតក្នុងខណ្ឌចំការមន រាជធានីភ្នំពេញ ដែលកំពុងតែដំណើរការជួសជុល កែលម្អ។ក្នុងឱកាស ចុះ ពិនិត្យ នោះ សម្តេច បាន កត់សម្គាល់ចំពោះស្នាដៃដ៏ល្អនិងលើកទឹកចិត្តអោយក្រុមជំនាញយកចិត្តទុកដាក់ខ្ពស់បន្ថែមទៀត ដើម្បីអោយសំណង់ដ៏ថ្លៃថ្លានេះ សម្រេចបានគួរជាទីមោទនៈ និងគោរពប្រតិបត្តិសម្រាប់ប្រជាជាតិនិងភ្ញៀវអន្តរជាតិចំពោះព្រះវិញ្ញាណក្ខន្ធ ព្រះបរមរតនកោដ្ឋ។ នេះជាទីឋាន ដែលរដ្ឋបាលរាជធានីភ្នំពេញបានជួសជុលថែទាំជាប់ជាប្រចាំនិងជាទីកន្លែងដែលតែងប្រារព្ធពិធីថ្វាយកុសលឧទ្ទិសដល់ដួងព្រះវិញ្ញាណក្ខន្ធ ព្រះករុណាព្រះបាទ សម្តេចព្រះនរោត្តម សីហនុ ព្រះបរមរតនៈកោដ្ឋ ជារៀងរាល់ឆ្នាំ ។បើតាម ឯកឧត្តមអភិបាល រាជធានីភ្នំពេញ បានឲ្យដឹងថា ការជួសជុល កែលម្អស្តូបព្រះបរមរតនកោដ្ឋនេះ ជាដំណាក់កាល គឺមាន ជួសជុល ដំបូល ពិដាន, លាបក្បាច់ពណ៌ទឹកមាស ផ្នែកខាងលើបរមរូប , ជួសជុល ជើង ទម្រ ថ្ម ម៉ាប និង ថ្មភ្នំ រួមទាំង ការថែទាំ សួនច្បារ , រៀបចំ ប្រព័ន្ធ បាញ់ ទឹក ជាថ្មី ឡើងវិញ រួមទាំង ការកាប់ ដើម ក្ងោកចាស់ៗដែលពុកផុយ រួចដាំជាថ្មីឡើងវិញ ហើយសាលារាជធានីភ្នំពេញ ក៏បានរៀបចំបែងចែកអោយមានគណៈកម្មការទទួលខុសត្រូវលើជួសជុលថែទាំជាប់ជាប្រចាំទាំងចំពោះស្តូបព្រះបរមរូប ក៏ដូចជាសួនផងដែរ។ការជួសជុលកែលម្អឡើងវិញស្តូបព្រះបរមរូប បើគិតរហូតមកដល់ពេលនេះ គឺសម្រេចបានប្រមាណ ៩៥% ហើយៗ គ្រោងនឹងធ្វើឱ្យ រួចរាល់នៅចុងខែមីនានេះ ។ ទីតាំង ស្តូប ព្រះបរមរតនៈកោដ្ឋ រួមទាំង សួនច្បារ ជុំវិញផង បានក្លាយជាទីរមណីយដ្ឋានដ៏ស្រស់បំព្រង ប្រកបដោយ ខ្យល់អាកាស បរិសុទ្ធ និង ពេញនិយម សំរាប់ ភ្ញៀវទេសចរ ទៅ លំហែ កម្សាន្ត និង ជាទី ពេញនិយម សំរាប់ ប្រជាពលរដ្ឋ ទូទៅ ហាត់ប្រាណ ដើម្បី សុខភាព ផងដែរ ។គួរបញ្ជាក់ថា ព្រះករុណា សម្តេច ព្រះ នរោត្តម សីហនុ ព្រះ មហា វីរក្សត្រ ព្រះបរមរតនកោដ្ឋ បានស្តេច យាង សោយ ព្រះ ទិវង្គត នៅ ថ្ងៃ ទី ១៥ ខែ តុលា ឆ្នាំ ២០១២ នៅ ឯ មន្ទីរពេទ្យ ធំ ក្នុង ទីក្រុង ប៉េកាំង នៃ សាធារណរដ្ឋ ប្រជាមានិត ចិន ក្នុង ព្រះជន្ម ៩០ ព្រះវស្សា ដោយ ព្រះ រោគាពាធ ដែល ជាការ បាត់បង់ ដ៏ ធំធេង របស់ កម្ពុជាហើយស្តូបព្រះបរមរូបព្រះបរមរតនកោដ្ឋនេះគឺបានបញ្ចុះបឋមសិលាសាងសង់កាលពីថ្ងៃទី២២ខែកុម្ភៈឆ្នាំ ២០១៣ មាន រចនា តាមទម្រង់បុស្បុក មានកម្ពស់សរុប ២៧ ម៉ែត្រ គិតពីបាតក្រោម ដល់ កំពូល។ រីឯ តួព្រះបរមរូប ធ្វើ អំពីស្ពាន់មានកម្ពស់៤,៥ ម៉ែត្រ ទ្រង់ឈរ លើព្រះទែនមានកម្ពស់ ២,៧ ម៉ែត្រ គឺ សង់នៅលើខឿនរាងចតុកោណ កែង មានបណ្តោយ៥៤ ម៉ែត្រ ទទឹង២៧ ម៉ែត្រ កម្ពស់ ០,៩ ម៉ែត្រ។ ការរចនាសម្ព័ន្ធបុស្បុក និងព្រះបរមរូប គឺ ត្រូវ បានកំណត់យកខ្នាតទូទៅមួយសុទ្ធ តែមានលេខ អាចបូកផ្គុំបញ្ចូលគ្នាបានជាលេខ៩ទាំងអស់ ហើយស្តូបព្រះបរមរូប ព្រះបរមរតនកោដ្ឋត្រូវបានសម្ពោធដាក់ឱ្យប្រជាពលរដ្ឋនិងភ្ញៀវបរទេសចូលគោរពព្រះវិញ្ញាណក្ខន្ធនៅថ្ងៃទី១១ខែ តុលា ឆ្នាំ២០១៣ ក្រោមព្រះរាជាធិបតីភាពដ៏ខ្ពង់ខ្ពស់បំផុត សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល នរោត្តម មុនីនាថ សីហនុ ព្រមទាំងឥស្សរជនជាន់ខ្ពស់ក្នុងស្ថាប័នព្រឹទ្ធសភា រដ្ឋសភា រាជរដ្ឋាភិបាល មន្ត្រីរាជការ និងសិស្សានុសិស្សមួយចំនួនផងដែរ៕អត្ថបទ៖ មុត សុទ្ធ

សម្តេចតេជោ អញ្ជើញពិនិត្យមើលមន្ទីរពេទ្យនគរទេព ដែលត្រូវបានរៀបចំសម្រាប់ព្យាបាលអ្នកជំងឺកូវីដ-១៩

ភ្នំពេញ ៖ ព្រឹកថ្ងៃទី១៩ខែមីនា នេះ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា រួមជាមួយថ្នាក់ដឹកនាំ មន្ត្រី ជំនាញ និង អាជ្ញាធរ ដែនដី ពាក់ព័ន្ធ បានអញ្ជើញទៅពិនិត្យមើលដំណើរការរៀបចំមន្ទីរពេទ្យមួយ កន្លែងមានឈ្មោះថា មន្ទីរពេទ្យស្ត្រីនគរទេព ដែលមានទីតាំងស្ថិតនៅភូមិព្រៃសខាងកើត សង្កាត់ព្រៃស ខណ្ឌដង្កោ រាជធានីភ្នំពេញ។មន្ទីរពេទ្យនេះ ជាមន្ទីរពេទ្យថ្មីមួយទើបត្រូវបានបង្កើតឡើងក្រោមការគាំទ្រពីលោកជំទាវរដ្ឋមន្ត្រីក្រសួងកិច្ចការនារី ដើម្បីផ្តល់សេវា ព្យាបាលផ្នែករោគស្ត្រី និងជំងឺមហារីករបស់ស្ត្រី ជាពិសេសសម្រាប់ផ្តល់សេវាជូនដល់ស្ត្រី ដែលមានជីវភាពខ្វះខាត ប៉ុន្តែដោយសារមានតម្រូវការជាបន្ទាន់ចំពោះមុខនៃការឆ្លងរីករាលដាលនៃជំងឺកូវីដ-១៩ គួរឱ្យព្រួយបារម្ភមន្ទីរពេទ្យមួយនេះត្រូវបានសម្តេចតេជោ ប្រមុខរាជរដ្ឋាភិបាល ណែនាំឱ្យប្រែក្លាយទៅជាមន្ទីរពេទ្យសម្រាប់ព្យាបាលអ្នកជំងឺកូវីដ-១៩ ព្រមគ្នាជាមួយនឹងការយកអតីតសណ្ឋាគារអាំងទែកុងទីណង់តាល់ ធ្វើជាមន្ទីរពេទ្យសម្រាប់ដាក់ពិនិត្យនិងព្យាបាលអ្នកជំងឺកូវីដ-១៩ ដូចគ្នាដែរនោះ។សម្តេច បានអញ្ជើញពិនិត្យមើលដោយយកចិត្តទុកដាក់នៅគ្រប់ទីកន្លែង នៃទីតាំងបន្ទប់នីមួយៗ ដើម្បីធ្វើយ៉ាងណាឱ្យការរៀបចំមន្ទីរពេទ្យមួយកន្លែងនេះ ប្រព្រឹត្តិទៅបានត្រឹមត្រូវតាមស្តង់ដារ បច្ចេកទេស សំដៅធ្វើយ៉ាងណាឱ្យការពិនិត្យ និងព្យាបាលអ្នកជំងឺកូវីដ-១៩ជោគជ័យ។ការរៀបចំមន្ទីរពេទ្យនគរទេពឱ្យទៅជាមន្ទីរពេទ្យព្យាបាលជំងឺកូវីដ-១៩នេះ ជាហេដ្ឋារចនាសម្ព័ន្ធធំទូលាយ នៅលើផ្ទៃដី១ហ.ត កន្លះ , ដោយមន្ទីរពេទ្យនេះមានទំហំអគារ ២៥.០០០ម៉ែត្រក្រឡា, កម្ពស់៥ជាន់ ,មានប្រព័ន្ធទឹក ភ្លើងល្អ បំពាក់ប្រព័ន្ធសឡា និងមានម៉ាស៊ីនភ្លើងបម្រុង៣៥០KWA បំពាក់ដោយម៉ាស៊ីនផ្លាស់ប្តូរដោយស្វ័យប្រវត្តិ។មន្ទីរពេទ្យនេះ មានចំណុះ៥០០គ្រែដោយអាចរៀបចំជាផ្នែកសង្គ្រោះបន្ទាន់៨០គ្រែ និងផ្នែកជំងឺធម្មតា៤២០គ្រែ។ មន្ទីរពេទ្យមានបំពាក់ឧបករណ៍វេជ្ជសាស្ត្រទំនើបៗ ស្របតាមស្តង់ដារ សម្រាប់ព្យាបាលជំងឺកូវីដ-១៩ ដែលផ្តល់ជូនដោយក្រសួងសុខាភិបាល។សូមបញ្ជាក់ថា នេះជាមន្ទីរពេទ្យទី៥ហើយ សម្រាប់ដាក់ការព្យាបាលជំងឺកូវីដ-១៩ នៅរាជធានីភ្នំពេញ បន្ទាប់ពីមន្ទីរពេទ្យមិត្តភាពខ្មែរ-សូវៀត,មណ្ឌលសុខភាពចាក់អង្រែ, មជ្ឈមណ្ឌលព្យាបាលជំងឺហង់សិន ,សណ្ឋាគារឌឹក្រេកឌូក (អតីតសណ្ឋាគារអាំងទែរកុងទីណង់តាល់)។ ទាក់ទងនឹងការឆ្លងរីករាលដាលជំងឺកូវីដ-១៩ បើតាមក្រសួងសុខាភិបាលបានជូនដំណឹងនៅថ្ងៃនេះថា បានរកឃើញអ្នកឆ្លងកូវីដ-១៩ថ្មី សម្រាប់ថ្ងៃទី១៨ ខែមីនាមាន ចំនួន៣៧នាក់ ក្នុងនោះគឺជាករណីឆ្លងដោយព្រឹត្តិការណ៍សហគមន៍២០កុម្ភៈទាំងអស់ ខណៈថ្ងៃនេះ មានអ្នកជាសះស្បើយ១៩នាក់និងអនុញ្ញាតឱ្យចេញពីមន្ទីរពេទ្យ។ ចំពោះករណីរកឃើញថ្មី៣៧នាក់នេះគឺ មានរកឃើញនៅរាជធានីភ្នំពេញ៣៣នាក់ , ខេត្តព្រះសីហនុ៣នាក់,និងខេត្តកណ្តាល ១នាក់។ របាយការណ៍ បានបង្ហាញដែរថា គិតត្រឹមម៉ោង៧ព្រឹកថ្ងៃនេះ កម្ពុជា បានរកឃើញអ្នកឆ្លងកូវីដ-១៩ សរុបចំនួន១.៥៨៧នាក់ ក្នុងនោះព្យាបាលជាសះស្បើយ៩១៧នាក់ ,និងអ្នកកំពុងសំរាកព្យាបាលចំនួន៦៥៨នាក់ និងមានអ្នកស្លាប់១នាក់ ដោយសារជំងឺកូវីដ-១៩៕អត្ថបទ ៖ មុត សុទ្ធ

អាជ្ញាធរខេត្តកោះកុង តម្រូវឱ្យឈ្នួញជីកកាយអាចម៍ដី ដែលលុបព្រៃកោងកាងនៅភូមិទួលគគីរចេញ

កោះកុង ៖ អាជ្ញាធរខេត្តកោះកុង ប្រើវិធានការរដ្ឋបាលដោយតម្រូវឱ្យឈ្នួញដីដ៏ល្បីឈ្មោះម្នាក់ ជីកកាយអាចម៍ដី ចេញពីចំណីព្រែក និងព្រៃកោងកាងធម្មជាតិជាបន្ទាន់ ក្រោយពីមានការរំលោភបំពានគ្មានញញើត នឹងច្បាប់ ក្រោមរូបភាពឃុបឃិត គ្នាជាប្រព័ន្ធនៅឃុំទួលគគីរ ស្រុកមណ្ឌលសីមា។លោក សុខ សុទ្ធី អភិបាលរងខេត្តកោះកុង បានឱ្យដឹង កាលពីល្ងាចថ្ងៃទី១៧ ខែមីនា ២០២១ថា ឈ្នួញដែលហ៊ានលួចចាក់អាចម៍ដី ចូលដៃព្រែក និងព្រៃកោងកាង ក្នុងតំបន់ប្រើប្រាស់ ទំហំផ្ទៃដីសរុបជាង៣.៣០២ម៉ែត្រការ៉េ នៅភូមិទួលគគីរក្រោម នោះគឺឈ្មោះ លាង ហ៊ីម ហៅម៉ា Gold ដែលត្រូវបានគេស្គាល់ថា ជាឈ្នួញទិញលក់ដីដ៏ល្បីម្នាក់នៅក្នុងខេត្ត។ក្រោយទទួលបានកំណត់ហេតុពិនិត្យវាស់វែងវាយតម្លៃពីផលប៉ះពាល់ទីតាំងដីខាងលើពីរដ្ឋបាលស្រុក និងការិយាល័យជំនាញ លោកអភិបាលរងខេត្តរូបនេះ ក៏បានតម្រូវឱ្យឈ្នួញទិញលក់ដីដែលល្មើសច្បាប់ ការពារធម្មជាតិ ជីកកាយអាចម៍ដី ដែលខ្លួនរំលោភបំពានចេញជាបន្ទាន់ និងស្តារព្រៃកោងកាងឡើងវិញ។លោក សុខ សុទ្ធី អះអាងថា លោកស្រី លាង ហ៊ីម ទិញដីចំនួន១២ហិចតាពីពលរដ្ឋក្នុងតំបន់សហគមន៍ ដោយមិនស្គាល់ឈ្មោះពិតប្រាកដ និងគ្មានលិខិតស្នាមសម្គាល់ណាមួយអាជ្ញាធរមូលដ្ឋាននោះទេ ហើយបន្តចាក់ដីហៀចូលមាត់ព្រែករួមទាំងលុបព្រៃកោងកាង ទម្រង់លក្ខណៈហ៊ុំព័ទ្ធធ្វើជាដីឡូតិ៍ ក្នុងបំណងចង់ធ្វើ រីសត។ ក្រៅពីប្រើវិធានការរដ្ឋបាល ចំពោះនីតិវិធីច្បាប់ អាជ្ញាធរខេត្តប្រគល់ភារកិច្ចទៅតុលាការ ក្នុងគោលបំណងដាក់ទោសទណ្ឌលើបុគ្គលប្រព្រឹត្តបទល្មើសលើតំបន់ការពារធម្មជាតិ។ បើតាមអាជ្ញាធរខេត្ត មួយខាងផ្នែកនៃដីតំបន់នោះ ធ្លាប់បានស្នើសុំទៅរាជរដ្ឋាភិបាល ដើម្បីកាត់ឆ្វៀលចេញពីអនុក្រឹត្យលេខ១៧៩រួចហើយ តែទោះយ៉ាងណា អាជ្ញាធរពុំបានបង្ហាញអនុក្រឹត្យជាសាធារណៈឡើយ។ទាក់ទិនបញ្ហានេះដែរ លោក អៀង ច័ន្ទភារ៉ា ព្រះរាជអាជ្ញារងអមសាលាដំបូងខេត្ត ថ្លែងថា ក្នុងនាមដើមបណ្តឹងដោយរដ្ឋ លោកកំពុងចាត់ការស៊ើបអង្កេតលម្អិត និងប្រមូលព័ត៌មានបានមួយចំនួនធំរួចរាល់ហើយលើករណីនេះ មុននឹងបន្តនីតិវិធីចំពោះបុគ្គល និងក្រុមអ្នកដែលពាក់ព័ន្ធល្មើសនឹងច្បាប់ការពារធម្មជាតិ។ ស្រុកមណ្ឌលសីមា តែងលេចឮនូវព័ត៌មានបទល្មើសធនធានធម្មជាតិជាហូរហែ ព្រោះតែហាងឆេងដីត្រូវប៉ាន់ទិញលក់បានថ្លៃ ដែលជាហេតុធ្វើឱ្យឈ្នួញខិលខូចអាងទឹកលុយហ៊ានឃុបឃិតជាមួយអាជ្ញាធររំលោភបំពានយ៉ាងអនាធិបតេយ្យ។ក្រុមប្រជានេសាទនៅក្នុងសហគមន៍ភូមិទួលគគីរក្រោម ដែលសុំលាក់អត្តសញ្ញាណ បានឱ្យដឹងថា សកម្មភាពចាក់ដីលុបព្រៃកោងកាង និងចូលមាត់ព្រែកនេះ ពលរដ្ឋតូចតាចមិនអាចធ្វើទៅបានទេពោលគឺមានតែអ្នកមានអំណាចដែលឃុបឃិត ជាមួយអាជ្ញាធរប៉ុណ្ណោះ ទើបធ្វើទៅបានដោយរលូនយ៉ាងដូច្នេះមិនគិតពីប្រយោជន៍រួម។ ពលរដ្ឋ សង្កត់ធ្ងន់ ទៀតថា តើឱ្យពួកគាត់ទៅរកក្តាម ខ្យង និងត្រីឯណា បើធនធម្មជាតិជីវចម្រុះរងការបំផ្លិចបំផ្លាញស្ទើរគ្មានសល់ ខណៈកូវីដ រីករាលដាល រឹតតែមិនរកប្រាក់ចំណូលមកផ្គត់ផ្គង់ជីវភាពរស់នៅប្រចាំថ្ងៃ។ ពលរដ្ឋ ស្នើឱ្យវិធានការប្រញាប់រកមុខអ្នកដែលបំពានមកផ្តន្ទាទោសតាមច្បាប់ ជៀសវាងបណ្តែលបណ្តោយឱ្យក្រុមឈ្នួញអាងអំណាចទឹកលុយចេះតែរំលោភបំពានតាមតែអំពើចិត្តខ្លួនចង់បាន៕ អត្ថបទ ៖ ឈឹម មករា

ក្រោយការប៉ះទង្គិចគ្នាទ្រង់ទ្រាយធំ មួយប្រ៉ាវអភិបាលខេត្តកំពតកោះហៅ ឧកញ៉ា សួ ងួន និងគ្រួសារកងទ័ពមកដោះស្រាយដោយសន្តិវិធី

កំពត ៖ កាលពីថ្ងៃទី១៤ និង១៥ ខែមីនា កន្លងទៅថ្មីៗនេះ មានការប៉ះទង្គិចគ្នាលក្ខណៈទ្រង់ទ្រាយធំ មួយប្រ៉ាវ រវៀងក្រុមឆ្មាំការពារដីឲ្យក្រុមហ៊ុនលោក ឧកញ៉ា សូ ងួន រាប់រយនាក់ ជាមួយនឹងក្រុមគ្រួសារកងទ័ពសមាហរណកម្មការពារកោះឆ្នេររាប់រយនាក់ដែរ ។ ទីតាំងដីទំនាស់ស្ថិតក្នុងភូមិដុំផ្ដៅ ឃុំត្រពាំងភ្លាំង ស្រុកឈូក ខេត្តកំពត ។ ក្រោយកិច្ចប្រជុំទល់មុខគ្នា រវៀងភាគីទាំងសងខាង ដោយមានការចូលរួមពីមន្ត្រីមន្ទីរជំនាញ និងអាជ្ញាធរពាក់ព័ន្ធ ដើម្បីពិនិត្យពិភាក្សា រកដំណោះស្រាយ លើករណីទំនាស់ដីធ្លី ក្រុមហ៊ុន វើលទ្រីស្តារ របស់លោកឧកញ៉ា សូ ងួន ជាមួយគ្រួសារកងទ័ពសមាហរណកម្មការពារកោះឆ្នេរ មានទីតាំងដី ស្ថិតក្នុងភូមិដុំផ្ដៅ ឃុំត្រពាំងភ្លាំង ស្រុកឈូក ឯកឧត្តម ជាវ តាយ អភិបាលខេត្តកំពត បានសំណូមពរឲ្យអនុវត្តតាមវិធានការបីចំណុច ៖ ទី១- សូមក្រុមហ៊ុនអនុវត្តសកម្មភាព នៅក្នុងដីរបស់ក្រុមហ៊ុនដែលបានចុះបញ្ជីរួច ហើយមិនមានទំនាស់ ចំណែកដីនៅក្រៅការចុះបញ្ជី សូមក្រុមហ៊ុនរក្សាទុក នឹងផ្អាកសកម្មភាពដើម្បីរកដំណោះស្រាយបន្តនៅលើទីតាំងដីជាក់ស្ដែងបន្ថែមទៀត។ ទី ២- សូមឲ្យក្រុមការងារបន្តការចុះសិក្សាទីតាំងដីឲ្យច្បាស់លាស់ តាម ស.ជ.ណ របស់រាជរដ្ឋាភិបាល ដែលបានសម្រេចជូនគ្រួសារកងទ័ព ដែលបានដាក់ពាក្យស្នើសុំកន្លងមក យកទៅជូនរាជរដ្ឋាភិបាល។ ហើយក្រុមការងារក៏ត្រូវរៀបចំឯកសារ តាមការលើកឡើងរបស់តំណាងក្រសួងកសិកម្ម ដាក់ស្នើជូនទៅក្រសួងកសិកម្ម ដើម្បីសម្រេចដោះស្រាយឲ្យបានឆាប់ចប់ជូនគ្រួសារកងទ័ព។ និងទី៣- អភិបាលខេត្តសូមឲ្យក្រុមហ៊ុនឧកញ៉ា សូ ងួន និងគ្រួសារកងទ័ព រួមគ្នាដោះស្រាយ ដោយសន្តិវិធីតាមលក្ខណៈ ផ្លូវច្បាប់ ពិសេសមិនត្រូវបង្កទំនាស់រហូតផ្ទុះអំពើហិង្សាជាដាច់ខាត ដែលនាំឱ្យប្រឈមនឹងការទទួលខុសត្រូវ ចំពោះមុខច្បាប់។ តាមការអះអាងពីតំណាងគ្រួសារយោធិនថាដីធ្លីដែលរាជរដ្ឋាភិបាលធ្វើប្រទានកម្មជូនគ្រួសារកម្លាំងទ័ពសមាហរណកម្ម ការពារកោះឆ្នេរស្ថិតក្នុងឃុំត្រពាំងភ្លាំង សរុបប្រមាណជាង១០០០ហិចតា ។ ប៉ុន្តែសុំកាន់កាប់ជាក់ស្ដែង តែប្រមាណ៧៤០ហិកតាទេ ក្នុងនោះ បានចេញប័ណ្ណកម្មសិទ្ធិមួយចំនួន ខណៈដែលដីប្រមាណ៤៧៨ហិចតា នៅមានទំនាស់ជាមួយក្រុមហ៊ុនសូ ងួន រហូតមកដល់សព្វថ្ងៃ៕

ពលរដ្ឋនៅតាកែវម្នាក់ ត្រូវបានរកឃើញមានផ្ទុកមេរោគកូវីដ-១៩

តាកែវ ៖ ប្រធានមន្ទីរសុខាភិបាលខេត្តតាកែវ លោកវេជ្ជៈបណ្ឌិត នុត ស៊ីណាត បានថ្លែងឲ្យដឹងនៅថ្ងៃទី១៧ ខែមីនាថា មន្ត្រីជំនាញបានរកឃើញបុរសម្នាក់ ដែលទើបត្រលប់ពីភ្នំពេញ បានផ្ទុកជំងឺកូវីដ១៩។លោកវេជ្ជបណ្ឌិត នុត ស៊ីណាត បានបន្តថា បុរសដែលផ្ទុកជំងឺកូវីដ១៩ ជាបុគ្គលិកធ្វើការនៅក្រុមហ៊ុនស៊ីនទ្រី ដែលមកស្នាក់នៅភូមិពន្លឺ ឃុំជំរះពេន ស្រុកសំរោង ខេត្តតាកែវ កាលពីយប់ថ្ងៃទី១៣ ខែមីនា ហើយត្រូវបានសមត្ថកិច្ច និងមន្ត្រីពេទ្យចុះពិនិត្យសុខភាពឃើញមានកំដៅឡើងខ្ពស់ ព្រឹកឡើងនៅថ្ងៃទី១៤ បុរសរូបនេះ, គ្រួសារ ប្រពន្ធ និងកូនចំនួន ២ នាក់ ត្រូវបានដឹកយកទៅធ្វើចត្តាឡីស័ក នៅមណ្ឌលចត្តាឡីស័ក ខេត្តតាកែវ ។ លោក បន្តថា មកដល់រាត្រីថ្ងៃទី១៦ មីនា លទ្ធផលសំណាកបុរសម្នាក់នេះ មានរោគសញ្ញាវិជ្ជមានកូវិដ-១៩ ហើយត្រូវបានយកមកសំរាកព្យាបាលនៅមន្ទីរពេទ្យបង្អែកខេត្តតាកែវ ដោយឡែកក្រុមគ្រួសារត្រូវបន្តដាក់អោយធ្វើចត្តាឡីស័ក នៅសណ្ឋាគារសេវែនដេអ៊ីនក្នុងក្រុងដូនកែវ។នេះជាករណីលើកដំបូង ដែលខេត្តតាកែវ មានអ្នកផ្ទុកជំងឺកូវីដ១៩ បានកើតឡើង ចាប់តាំងពីមានការផ្ទុះរីករាលដាលជំងឺកូវីដ១៩ នៅក្នុងប្រទេសកម្ពុជាអស់រយៈពេលប្រមាណ១ឆ្នាំ កន្លងមកនេះ៕

បណ្ដាញសង្គម

ព័ត៌មានថ្មីៗ

CDC ដាក់ឱ្យប្រើប្រាស់ e-Signature និង e-Stamp លើឯកសារទម្រង់ឌីជីថលចេញពីប្រព័ន្ធ cdcIPM

ការខូចខាតនៅកូរ៉េខាងត្បូង កើនឡើង ខណៈភ្លៀងធ្លាក់ខ្លាំង ចូលដល់ថ្ងៃទី៤

កម្លាំងចម្រុះ ចុះប្រតិបត្តិការត្រួតពិនិត្យទីតាំងសង្ស័យលួចលាក់ប្រព្រឹត្តបទល្មើស Online Scam នៅក្រុងបាវិត

គណៈកម្មាធិការគណបក្សឃុំគូលែនត្បូង ប្រារព្ធមីទ្ទីងអបអរសាទរខួបលើកទី៧៤ ថ្ងៃបង្កើតគណបក្សប្រជាជនកម្ពុជា

កសិផលខ្មែរមួយចំនួនថែមទៀតអាចនឹងទទួលដំណឹងល្អពីភាគីចិន ខណៈផ្លែទុរេនស្រស់ជាង ១៧តោន ត្រូវបាននាំចេញ

សមាគមគ្រូពេទ្យ TYDA រៀបចំសន្និសីទទន្តសាស្រ្តប្រចាំឆ្នាំ ដោយផ្ដោតលើការអនុវត្តទន្តសាស្រ្តឈានមុខ

មេបញ្ជាការកងទ័ពជើងគោកកម្ពុជា និងហ្វីលីពីន អញ្ជើញចូលរួមបិទវគ្គហ្វឹកហ្វឺនរួមគ្នា នៅភ្នំម្រះព្រៅ ខេត្តកំពង់ស្ពឺ

អែលសាល់វ៉ាឌ័រ បញ្ជូនពលរដ្ឋវេណេស៊ុយអេឡាដែលត្រូវបានឃុំខ្លួន ត្រឡប់ទៅប្រទេសវិញជាថ្នូរនឹងពលរដ្ឋអាមេរិក

ការផ្ទុះនៅមូលដ្ឋានតម្រួតទីក្រុង Los Angeles បានសម្លាប់នាយរងបីនាក់

លោក Trump៖ «កិច្ចព្រមព្រៀងពាណិជ្ជកម្មធំៗ» មួយចំនួននឹងត្រូវបានប្រកាសក្នុងពេលឆាប់ៗនេះ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ និង ការអភិវឌ្ឍន៍

ខេត្តកំពង់ស្ពឺ នឹងមានរោងចក្រចំនួន២០ បន្ថែមទៀត បង្កើតការងារថ្មីជាង៥ម៉ឺន កន្លែង

កម្មករប្រមូលសំរាមជាច្រើនរយនាក់បន្ថែមទៀត ទទួលបានការចាក់វ៉ាក់សាំងលើកទី១

ពលរដ្ឋខេត្តកណ្តាលបង្កើនការប្រុងប្រយ័ត្ន ក្រោយរកឃើញវិជ្ជមានកូវីដ-១៩ នៅតំបន់ជ្រៃធំ

សម្តេចពិជ័យសេនា ទៀ បាញ់ ៖ កងទ័ពចំនួន៥នាក់ បានឆ្លងមេរោគកូវីដ១៩ បើទោះបីបានចាក់វ៉ាក់សាំងរួចក្តី

វារីវប្បកម្ម អំពាវនាវប្រជាពលរដ្ឋជួយទិញត្រី ចិញ្ចឹមក្នុងស្រុក

សម្តេចតេជោ អញ្ជើញពិនិត្យមើលស្តូបព្រះបរមរតនកោដ្ឋ ដែលកំពុងជួសជុល បានប្រមាណ៩៥%

សម្តេចតេជោ អញ្ជើញពិនិត្យមើលមន្ទីរពេទ្យនគរទេព ដែលត្រូវបានរៀបចំសម្រាប់ព្យាបាលអ្នកជំងឺកូវីដ-១៩

អាជ្ញាធរខេត្តកោះកុង តម្រូវឱ្យឈ្នួញជីកកាយអាចម៍ដី ដែលលុបព្រៃកោងកាងនៅភូមិទួលគគីរចេញ

ពលរដ្ឋនៅតាកែវម្នាក់ ត្រូវបានរកឃើញមានផ្ទុកមេរោគកូវីដ-១៩

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

ខេត្តកំពង់ស្ពឺ​ នឹងមាន​រោងចក្រ​ចំនួន​២០​ បន្ថែមទៀត ​បង្កើត​ការងារ​ថ្មី​ជាង​៥​ម៉ឺន ​កន្លែង

កម្មករ​ប្រមូល​សំរាម​ជាច្រើន​រយ​នាក់​បន្ថែមទៀត​ ទទួលបាន​ការចាក់​វ៉ាក់សាំង​លើក​ទី​១

ពលរដ្ឋ​ខេត្តកណ្តាល​បង្កើន​ការប្រុងប្រយ័ត្ន​ ​ក្រោយ​រក​ឃើញ​វិជ្ជមាន​កូ​វីដ​-១៩ ​នៅ​តំបន់​ជ្រៃ​ធំ​

វារី​វប្បកម្ម​ អំពាវនាវ​ប្រជាពលរដ្ឋ​ជួយ​ទិញ​ត្រី ​ចិញ្ចឹម​ក្នុងស្រុក​

សម្តេច​តេ​ជោ​ អញ្ជើញ​ពិនិត្យមើល​ស្តូប​ព្រះ​បរម​រតន​កោដ្ឋ​ ដែល​កំពុង​ជួសជុល​ បាន​ប្រមាណ​៩៥%

អាជ្ញាធរ​ខេត្តកោះកុង ​ តម្រូវឱ្យ​ឈ្នួ​ញ​ជីក​កាយ​អាចម៍​ដី​ ដែល​លុប​ព្រៃកោងកាង​នៅ​ភូមិ​ទួល​គគីរ​ចេញ​

ពលរដ្ឋ​នៅ​តាកែវ​ម្នាក់ ត្រូវ​បាន​រក​ឃើញ​មាន​ផ្ទុក​មេរោគ​កូ​វីដ​-១៩

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍

ខេត្តកំពង់ស្ពឺ នឹងមានរោងចក្រចំនួន២០ បន្ថែមទៀត បង្កើតការងារថ្មីជាង៥ម៉ឺន កន្លែង

កម្មករប្រមូលសំរាមជាច្រើនរយនាក់បន្ថែមទៀត ទទួលបានការចាក់វ៉ាក់សាំងលើកទី១

ពលរដ្ឋខេត្តកណ្តាលបង្កើនការប្រុងប្រយ័ត្ន ក្រោយរកឃើញវិជ្ជមានកូវីដ-១៩ នៅតំបន់ជ្រៃធំ

វារីវប្បកម្ម អំពាវនាវប្រជាពលរដ្ឋជួយទិញត្រី ចិញ្ចឹមក្នុងស្រុក

សម្តេចតេជោ អញ្ជើញពិនិត្យមើលស្តូបព្រះបរមរតនកោដ្ឋ ដែលកំពុងជួសជុល បានប្រមាណ៩៥%

អាជ្ញាធរខេត្តកោះកុង តម្រូវឱ្យឈ្នួញជីកកាយអាចម៍ដី ដែលលុបព្រៃកោងកាងនៅភូមិទួលគគីរចេញ

ពលរដ្ឋនៅតាកែវម្នាក់ ត្រូវបានរកឃើញមានផ្ទុកមេរោគកូវីដ-១៩