នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
កម្ពុជា-រុស្ស៊ី ឯកភាពបន្តជំរុញទំនាក់ទំនង និងកិច្ចប្រតិបត្តិការរវាងប្រទេសទាំងពីរឱ្យកាន់តែរីកចម្រើនបន្ថែមទៀត
ក្រុមហ៊ុន TH Automotive Manufacturing Co., Ltd​ នឹង​សម្ពោធជាផ្លូវការ​ រោងចក្រផ្គុំ និងដំឡើងរថយន្តរបស់ខ្លួន​នៅកម្ពុជា​ ក្នុងឆ្នាំ២០២៦នេះ
ប្រធានគណៈកម្មាធិការគណបក្សខេត្តតាកែវ ណែនាំសមាជិកមូលដ្ឋានឱ្យយកចិត្ត​ទុកដាក់​បម្រើ​ពលរដ្ឋ
សម្ដេចតេជោ ណែនាំឱ្យដាក់បេក្ខភាពស្រ្ដីជាប់ឆ្នោតយ៉ាងតិចមួយឃុំមួយរូប និងមានស្ត្រីធ្វើស្មៀនឃុំ

នយោបាយ​ និង ការអភិវឌ្ឍន៍

ប្រទេសកេនយ៉ា ដាក់ពង្រាយកងកម្លាំងនគរបាល ទៅកាន់ប្រទេសហៃទី

2024/06/25 05:17:04 pm        134
Facebook Telegram Linkin
ក្រសួងការបរទេសសហរដ្ឋអាមេរិក បាននិយាយ កាលពីថ្ងៃចន្ទថា មន្ត្រីនគរបាលប្រទេសកេនយ៉ាដំបូងគេ ដែលត្រូវបានចាត់តាំងឱ្យជួយទប់ស្កាត់អំពើហឹង្សារបស់ក្រុមជនអន្ធពាលពុំអាចគ្រប់គ្រងបាន នៅក្នុងប្រទេសហៃទី កំពុងចាកចេញពីប្រទេសកេនយ៉ា នៅថ្ងៃអង្គារ ទី២៥ ខែមិថុនានេះ ហើយនឹងទៅដល់ប្រទេសហៃទី នៅសប្តាហ៍នេះ ។រដ្ឋមន្ត្រីក្រសួងសន្តិសុខមហាផ្ទៃ និងរដ្ឋបាលជាតិ របស់ប្រទេសកេនយ៉ា លោក រ៉ាយម៉ុន អូម៉ូឡូ(Raymond Omollo) បានបង្ហោះរូបថតរបស់ក្រុមកងកម្លាំងនគរបាល ដែលធ្វើដំណើរទៅកាន់ប្រទេសហៃទី នៅក្នុងយន្តហោះ កាលពីថ្ងៃចន្ទ។ នៅក្នុងការបង្ហោះ លោក Omollo បានជូនពរក្រុមនេះ ឲ្យមានសុវត្ថិភាព និងជោគជ័យ ខណៈពួកគេដឹកនាំបេសកកម្មចម្រុះជាតិសាសន៍ ដែលនឹងជួយស្ដារឡើងវិញច្បាប់ និងសណ្តាប់ធ្នាប់ នៅក្នុងប្រទេសតំបន់សមុទ្រការ៉ាអ៊ីបមួយនេះ។ប្រទេសកេនយ៉ា បានស្ម័គ្រចិត្ត កាលពីខែកក្កដា ឆ្នាំ២០២៣ ដើម្បីដឹកនាំកងកម្លាំងអន្តរជាតិ ជួយទប់ស្កាត់អំពើហិង្សានៅក្នុងប្រទេសតំបន់ការ៉ាអ៊ីប ជាកន្លែងដែលក្រុមជនអន្ធពាល គ្រប់គ្រងភាគច្រើននៅក្នុងរដ្ឋធានី ព័រ អូប្រាំង(Port-au-Prince) ដែលបានប្រព្រឹត្តការសម្លាប់រាលដាល ការចាប់ជំរិត និងអំពើហិង្សាផ្លូវភេទ។ ការដាក់ពង្រាយនេះ ត្រូវបានពន្យារពេលម្តងហើយម្តងទៀត ដោយសារតែបញ្ហាប្រឈមជាមួយតុលាការ និងការធ្វើឱ្យចុះខ្សោយផ្នែកសន្តិសុខនៅក្នុងប្រទេសហៃទី ដែលកាលពីខែមីនា បានបង្ខំឱ្យនាយករដ្ឋមន្ត្រីស្តីទី លាលែងពីតំណែង។ប្រធានាធិបតី លោក វីលៀម រូតូ កាលពីថ្ងៃចន្ទ បានចាប់ផ្តើមដាក់ពង្រាយក្រុមនគរបាលចំនួន ៤០០ នាក់ដំបូង សម្រាប់បេសកកម្មសន្តិភាពរបស់អង្គការសហប្រជាជាតិនៅប្រទេសហៃទី។ លោក Ruto បានបង្ហាញទំនុកចិត្តថា ភាគីប្រទេសកេនយ៉ា រួមជាមួយនឹងប្រទេសផ្សេងទៀត មកពីបណ្តាប្រទេសដែលរួមចំណែក នឹងជួយក្នុងការនាំយកមកវិញនូវសន្តិភាពយូរអង្វែង នៅក្នុងប្រទេសហៃទី ដែលរងគ្រោះដោយជម្លោះ។

រុស្ស៊ី បន្ទោសអាមេរិកចំពោះការវាយប្រហារនៅក្រុង Sevastopol និងនិយាយថា UN មានស្តង់ដារពីរ

2024/06/25 05:08:14 pm        147
Facebook Telegram Linkin
ឯកអគ្គរដ្ឋទូតរុស្ស៊ី ប្រចាំអង្គការសហប្រជាជាតិ លោក Vassily Nebenzia បានចោទប្រកាន់សហរដ្ឋអាមេរិក ពីការចូលរួមដោយផ្ទាល់ នៅក្នុងការវាយប្រហារដ៏បង្ហូរឈាម កាលពីថ្ងៃអាទិត្យ លើទីក្រុង Sevastopol នៅតំបន់គ្រីម៉េ។ក្នុងអំឡុងសន្និសីទសារព័ត៌មាន កាលពីថ្ងៃច័ន្ទ លោក Nebenzia បាននិយាយថា អ៊ុយក្រែន បានបាញ់មីស៊ីល ដែលផ្គត់ផ្គង់ដោយសហរដ្ឋអាមេរិក បណ្តាលឱ្យមនុស្ស៥នាក់ស្លាប់ ក្នុងនោះមានកុមារពីរនាក់ និងរងរបួសមនុស្សជាង ១៥០នាក់ ផ្សេងទៀត។ក្រសួងការពារជាតិរុស្ស៊ី បាននិយាយថា មីស៊ីលចំនួនបួនគ្រាប់នៃប្រព័ន្ធមីស៊ីលតាកទិករបស់កងទ័ព (ATACMS) ដែលផ្តល់ដោយសហរដ្ឋអាមេរិក មានបំពាក់ដោយក្បាលគ្រាប់ចង្កោម ត្រូវបានបាញ់ទម្លាក់ ដោយប្រព័ន្ធការពារដែនអាកាស ហើយគ្រាប់មួយចំនួន បានផ្ទុះនៅលើអាកាស។អាជ្ញាធរ ដែលលើកបន្តុបដោយរុស្ស៊ី នៅតំបន់គ្រីម៉េ បាននិយាយថា បំណែកមីស៊ីល បានធ្លាក់នៅក្បែរឆ្នេរមួយមួយកន្លែងនៅភាគខាងជើងទីក្រុង Sevastopol ដែលអ្នកស្រុកកំពុងសម្រាកវិស្សមកាល។ លោក Nebenzia បានថ្កោលទោសចំពោះកង្វះការឆ្លើយតបពីលេខាធិការដ្ឋានអង្គការសហប្រជាជាតិ ដោយហៅថា ជាគំរូនៃស្តង់ដារពីរ។លោក Nebenzia បានបញ្ជាក់ថា សហព័ន្ធរុស្ស៊ី នឹងចាត់វិធានការដើម្បីឆ្លើយតបទៅនឹងការវាយប្រហារនេះ ហើយបាននិយាយថា សកម្មភាពនាពេលថ្មីៗនេះរបស់ប្រទេសលោកខាងលិច អាចនាំឱ្យមានការរីកធំជម្លោះបន្ថែមទៀត។

រុស្ស៊ី កោះហៅឯកអគ្គរដ្ឋទូតអាមេរិកជុំវិញការវាយប្រហារដែលក្រុងមូស្គូថា បានប្រើមីស៊ីលអាមេរិក ខណៈប្ដេជ្ញាសងសឹក

2024/06/25 05:03:07 pm        229
Facebook Telegram Linkin
ក្រសួងការបរទេសរុស្ស៊ីបានកោះហៅឯកអគ្គរដ្ឋទូតអាមេរិកប្រចាំនៅប្រទេសរុស្ស៊ី លោកស្រី លីនី ត្រាស៊ី (Lynne Tracy) កាលពីថ្ងៃចន្ទដើម្បីតវ៉ាចំពោះអ្វីដែលខ្លួននិយាយថាជាការប្រើប្រាស់មីស៊ីលកម្រិតខ្ពស់ផលិតដោយសហរដ្ឋអាមេរិកក្នុងការវាយប្រហាររបស់អ៊ុយក្រែនលើឧបទ្វីបគ្រីម៉េ ដែលរុស្ស៊ី បានគេរាយការណ៍ថាបានសម្លាប់មនុស្ស៤ នាក់និងរបួសជាង ១៥០។ក្រសួងនេះបាននិយាយនៅក្នុងសេចក្តីថ្លែងការណ៍មួយថា ទីក្រុងវ៉ាស៊ីនតោន បានក្លាយទៅជាភាគីមួយយ៉ាងមានប្រសិទ្ធភាពចំពោះសង្រ្គាមនៅខាងអ៊ុយក្រែន ដោយបន្ថែមថា វិធានការសងសឹកនឹងត្រូវអនុវត្ត តែពុំបានបញ្ជាក់លម្អិតទេ។ ពុំមានការអត្ថាធិប្បាយភ្លាមៗពីមន្ត្រីអាមេរិក ឬអ៊ុយក្រែនទេ។សារព័ត៌មាន AP មិនអាចផ្ទៀងផ្ទាត់ដោយឯករាជ្យលើការអះអាងរបស់រុស្ស៊ីអំពីមីស៊ីលដែលបានប្រើនោះទេ។ កងកម្លាំងរបស់ទីក្រុង គីវ (Kyiv) បានពឹងផ្អែកយ៉ាងខ្លាំងលើសព្វាវុធដែលផ្គត់ផ្គង់ដោយលោកខាងលិច ចាប់តាំងពីការឈ្លានពានរបស់រុស្ស៊ីឆ្នាំ២០២២មក។ ជំនួយយោធាមានសារសំខាន់ក្នុងការអនុញ្ញាតឱ្យអ៊ុយក្រែនទប់ទល់នឹងកងទ័ពរបស់វិមានក្រឹមឡាំង៕

ការវាយប្រហារនៅដែនដីដាគីស្ថាន បង្ហាញភាពងាយរងគ្រោះរបស់រុស្ស៊ីក្នុងប្រទេស ខណៈមានសង្រ្គាមជាមួយអ៊ុយក្រែន

2024/06/25 04:57:58 pm        173
Facebook Telegram Linkin
ការវាយប្រហារភេរវកម្មកាលពីថ្ងៃអាទិត្យចុងសប្ដាហ៍នេះនៅសាធារណរដ្ឋដាគីស្ថាន(Dagestan) ដែលបានសម្លាប់មនុស្សយ៉ាងហោចណាស់ ២០ នាក់បានបង្ហាញពីការលំបាកកាន់តែខ្លាំងរបស់រុស្ស៊ីក្នុងការគ្រប់គ្រងការកើនឡើងនៃភេរវករអ៊ីស្លាមនៅក្នុងប្រទេស ខណៈកងកម្លាំងសន្តិសុខរបស់ខ្លួនកំពុងចូលរួមក្នុងសង្គ្រាមនៅអ៊ុយក្រែន។ ការវាយប្រហារដោយក្រុមខ្មាន់កាំភ្លើងបួននាក់នៅក្នុងរដ្ឋធានី ម៉ាខាឆ្កាឡា(Makhachkala) របស់ សាធារណរដ្ឋ ដាគីស្ថាន (Dagestan) និងពីរនាក់នៅក្នុងទីក្រុងមាត់សមុទ្រឌើបិនធ៍ (Derbent) ។យ៉ាងហោចណាស់មានមន្ត្រីនគរបាលចំនួន១៥នាក់ ក្នុងចំណោមអ្នកស្លាប់ទាំង២០នាក់រួមទាំងជនស៊ីវិល ហើយខ្មាន់វាយប្រហារក៏បានដុតបំផ្លាញវិហាជ្វីហ្វ និងដុតព្រះវិហារគ្រិស្តសាសនាអូតូដុកមួយ ជាសកម្មភាពធ្វើឲ្យក្រុមមន្ត្រីរុស្ស៊ីមានការព្រួយបារម្ភយ៉ាងច្បាស់ថា អាចនាំឱ្យមានការកើនឡើងនៃអំពើហិង្សាជាអន្តរហិង្សាបង្កឡើងដោយជនជាតិភាគតិចនៅក្នុងប្រទេស។តំបន់សំបូរដោយពលរដ្ឋមូស្លីមរស់នៅភាគច្រើននៅតំបន់ កូកាស(Caucasus)ខាងជើង នៅភាគខាងត្បូងនៃប្រទេសរុស្ស៊ី គឺជាតំបន់តានតឹងបំផុតមួយរបស់ប្រទេសនេះ ហើយភាពចលាចលក្នុងសង្គម និងអំពើហិង្សាកើនឡើងនៅទីនោះ អាចបង្ហាញថាវិមានក្រឹមឡាំង កំពុងតស៊ូដើម្បីរក្សាសណ្តាប់ធ្នាប់នៅក្នុងប្រទេស ខណៈ លោក Vladimir Putin ផ្ដោតលើជម្លោះនៅអ៊ុយក្រែន និងខាងលិច។សោកនាដកម្មនេះ បានកើតឡើងប៉ុន្មានខែ ក្រោយការវាយប្រហារសាលប្រគុំតន្ត្រីនៅទីក្រុងមូស្គូ ជាទីដែលក្រុមសកម្មប្រយុទ្ធ រដ្ឋអ៊ីស្លាម បានសម្លាប់មនុស្សចំនួន១៤៥នាក់៕

ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ក្នុងឱកាសសម្ពោធបណ្តាញសាកលវិទ្យាល័យសាយប័រកម្ពុជា

2024/06/25 04:49:33 pm        204
Facebook Telegram Linkin
ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី២៥ ខែមិថុនា ឆ្នាំ២០២៤ បានអញ្ជើញជាអធិបតីភាពដ៏ខ្ពង់ខ្ពស់សម្ពោធបណ្តាញសាកលវិទ្យាល័យសាយប័រកម្ពុជានិងសមិទ្ធផលបណ្តុះបណ្តាលផ្នែកបច្ចេកវិទ្យាឌីជីថល នៅវិទ្យាស្ថានបច្ចេកវិទ្យាកម្ពុជា។ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ដែលមានខ្លឹមសារដូចខាងក្រោម៖-សម្ដេចធិបតី បានកោតសរសើរដល់ក្រសួងអប់រំ យុវជន និងកីឡា ដែលបានដាក់ចេញនូវចក្ខុវិស័យបុរេសកម្ម និងការច្នៃប្រឌិតនៅក្នុងវិស័យអប់រំ ។-សម្ដេចធិបតី ហ៊ុន ម៉ាណែត នាយករដ្ឋមន្ត្រី មានក្ដីរីករាយ និងមោទកភាព ចំពោះសមត្ថភាព របស់កូនខ្មែរ ដែលអាចផលិតបាននូវសម្ភារឧបករណ៍ប្រើប្រាស់ជាច្រើន ដូចប្រទេសរីកចម្រើននានា ដែរ។-សម្តេចធិបតី ហ៊ុន ម៉ាណែត៖ ការកសាងនូវធនធានមនុស្ស មិនអាចធ្វើតែមួយថ្ងៃបាននោះទេ ខណៈធនធានមនុស្សនេះ គឺជាកត្តាចាំបាច់បំផុត ក្នុងការអភិវឌ្ឍកម្ពុជាឲ្យ កាន់តែរីកចម្រើន ទៅមុខបន្ថែមទៀត។-សម្ដេចធិបតី ហ៊ុន ម៉ាណែត នាយករដ្ឋមន្ត្រី អំពាវនាវដល់សាធាណជនទាំងអស់ សូមពង្រឹង សមត្ថភាពបន្ថែមលើបច្ចេកវិទ្យាឌីជីថល ដើម្បីក្លាយជាពលរដ្ឋឌីជីថលនៅក្នុងសង្គមទំនើបបច្ចុប្បន្ន។-សម្តេចធិបតី នាយករដ្ឋមន្រ្តី បានលើកឡើងថា មានធនធានមនុស្សគឺមានឱកាស ក្នុងការប្រកួតប្រជែងជាមួយប្រទេសខាងក្រៅ ដូច្នេះហើយបានជារាជរដ្ឋាភិបាលបានខិតខំដាក់ចេញ នូវគោលនយោបាយពង្រីក និងលើកកម្ពស់នូវវិស័យអប់រំឲ្យកាន់តែល្អប្រសើរបន្ថែមទៀតនោះ។-សម្ដេចធិបតី ជំរុញឱ្យកាត់បន្ថយគម្លាតវិស័យអប់រំឱ្យដល់តាមបណ្ដាខេត្តដែលជាកត្តាសំខាន់ តាមរយៈការចែករំលែកធនធានចំណេះដឹង ដោយការចងក្រងជាបណ្ដាញសកលវិទ្យាល័យ ។-សម្ដេចធិបតី ហ៊ុន ម៉ាណែត នាយករដ្ឋមន្ត្រី៖ គ្រឹះស្ថានសិក្សាទាំងអស់សូមបង្កើនការកែ ទម្រង់ និងសិក្សាស្រាវជ្រាវវិទ្យាសាស្ត្រ ដើម្បីពង្រឹងគុណភាពអប់រំនៅកម្ពុជា ឱ្យកាន់តែប្រសើរថែមទៀត។-សម្ដេចធិបតី ជំរុញឱ្យគិតគូរបើកបង្រៀនតាមអនឡាញ ដើម្បីផ្ដល់ឱកាសដល់សិស្សនិស្សិតនៅតាម បណ្ដាខេត្តឆ្ងាយៗអាចមានឱកាសបន្តការសិក្សាដោយភាពងាយស្រួល ។

អ៊ីស្រាអែល ប្តេជ្ញាចិត្តចំពោះសំណើបទឈប់បាញ់ ខណៈថាខ្លួនជិតកម្ចាត់ក្រុមហាម៉ាស អស់ហើយ

2024/06/25 04:04:51 pm        163
Facebook Telegram Linkin
នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បាននិយាយកាលពីថ្ងៃចន្ទ (២៤ មិថុនា) ថា អ៊ីស្រាអែលនៅតែប្តេជ្ញាចិត្តចំពោះសំណើបទឈប់បាញ់ និងកិច្ចព្រមព្រៀងចំណាប់ថ្នូរនៅតំបន់ហ្កាហ្សា ហើយអង្គភាពយោធារបស់លោកបាននិយាយថា កងកម្លាំងហាម៉ាស ដែលនៅសេសសល់នៅទីក្រុងរ៉ាហ្វា (Rafah) ភាគខាងត្បូងហ្កាហ្សា ជិតត្រូវលុបបំបាត់អស់ហើយ។លោក ណេតាន់យ៉ាហ៊ូ បាននិយាយនៅក្នុងសុន្ទរកថាទៅកាន់សភាថា «យើងប្តេជ្ញាចំពោះសំណើឈប់បាញ់របស់អ៊ីស្រាអែល ដែលលោកប្រធានាធិបតី ចូ បៃដិន (Joe Biden) បានស្វាគមន៍។ ជំហររបស់យើងមិនផ្លាស់ប្តូរទេ គឺយើងមិនបញ្ចប់សង្គ្រាមឡើយរហូតក្រុមហាម៉ាស ត្រូវបានកម្ចាត់»។យោធាអ៊ីស្រាអែល និយាយថា «យើងកំពុងខិតជិតដល់ចំណុចដែលអាចនិយាយបានថា យើងបានកម្ចាត់កងពលតូចហាម៉ាសនៅក្រុងរ៉ាហ្វា។ នេះមិនមានន័យថាគ្មានភេរវករទៀតនោះទេ ប៉ុន្តែក្នុងន័យថា ក្រុមនេះមិនអាចដំណើរការជាអង្គភាពប្រយុទ្ធបានទៀតឡើយ»។ ជាការឆ្លើយតបទៅនឹងសំណួរអំពីការលើកឡើងរបស់កងទ័ពអ៊ីស្រាអែល លើការកម្ចាត់ក្រុមហាម៉ាស នៅក្នុងបទសម្ភាសន៍ជាមួយទូរទស្សន៍ អាល់-ចាហ្ស៊ីរ៉ា (Al Jazeera) កាលពីថ្ងៃចន្ទ លោក ខាលីល អាល់-ហាយយ៉ា (Khalil Al-Hayya) អនុប្រធានក្រុមហាម៉ាស នៅតំបន់ហ្កាហ្សា បាននិយាយថា «ប្រសិនបើអ៊ីស្រាអែល ចង់បញ្ចុះបញ្ចូលខ្លួនឯងថាខ្លួនបានសម្រេចគោលដៅរួចហើយ យោធានេះគួរតែចាកចេញពីតំបន់ហ៊ុមព័ទ្ធនេះទៅ»៕

កូរ៉េខាងជើង បានបញ្ជូនបាឡុងសំរាមជាច្រើនបន្ថែមទៀត ចូលទៅកូរ៉េខាងត្បូង

2024/06/25 04:01:50 pm        201
Facebook Telegram Linkin
យោធារបស់ទីក្រុងសេអ៊ូល បាននិយាយកាលពីល្ងាចថ្ងៃចន្ទ (២៤ មិថុនា) ថា កូរ៉េខាងជើង កំពុងបញ្ជូនបាឡុងបន្ថែមទៀតដែលទំនងជាកំពុងដឹកសំរាមចូលទៅក្នុងកូរ៉េខាងត្បូង។ អាជ្ញាធរក្រុងសេអ៊ូល បានចេញសេចក្តីជូនដំណឹងដល់ប្រជាជននៅល្ងាចថ្ងៃចន្ទ ដោយនិយាយថា «បាឡុងសំរាមពីកូរ៉េខាងជើង ត្រូវបានបញ្ជាក់ថាបានចូលទៅក្នុងដែនអាកាសរបស់ទីក្រុងសេអ៊ូល»។ ទីក្រុងព្យុងយ៉ាង បានបញ្ជូនបាឡុងសំរាមជាងមួយពាន់គ្រឿងរួចមកហើយចូលទៅកូរ៉េខាងត្បូង ក្នុងអ្វីដែលខ្លួនហៅថាការសងសឹកចំពោះបាឡុងដឹកការឃោសនាប្រឆាំងរបប បានអណ្តែតចូលទៅក្នុងកូរ៉េខាងជើងដោយសកម្មជនកូរ៉េខាងត្បូងតាមព្រំដែន។ សកម្មជនម្នាក់ ដែលបានភៀសខ្លួនចេញពីកូរ៉េខាងជើង ហើយបានបញ្ជូនខិត្តប័ណ្ណប្រឆាំងរបបក្រុងព្យុងយ៉ាងអស់រយៈពេលជាច្រើនឆ្នាំ បាននិយាយថា ខ្លួនបានបង្ហោះបាឡុងចំនួន ២០ គ្រឿងដែលផ្ទុកទៅដោយកម្មវិធីឃោសនា ក៏ដូចជា អង្គចងចាំ (flash drives) ផ្ទុកតន្រ្តី ខេ-ផប់ (K-pop) និងរឿងភាគទូរទស្សន៍ឆ្លងកាត់ព្រំដែនកាលពីថ្ងៃព្រហស្បតិ៍ សប្តាហ៍មុន។ កូរ៉េខាងជើង មានភាពរសើបខ្លាំងចំពោះប្រជាជនរបស់ខ្លួនដែលស្គាល់វប្បធម៌តន្រ្តីប៉ុបរបស់កូរ៉េខាងត្បូង ជាមួយនឹងរបាយការណ៍របស់អង្គការសហប្រជាជាតិ ដែលនិយាយថា ការកាន់កាប់ខ្លឹមសារបែបនេះភាគច្រើនត្រូវបានគេដឹងថានាំឱ្យមានការកាត់ទោសប្រហារជីវិត។ តាមផ្លូវច្បាប់ កូរ៉េខាងត្បូងមិនអាចដាក់ទណ្ឌកម្មសកម្មជនដែលបញ្ជូនបាឡុងឆ្លងព្រំដែនបានទេ ដោយសារសេចក្តីសម្រេចរបស់តុលាការឆ្នាំ២០២៣ ដែលហាមប្រាមថាជាការរំលោភលើសេរីភាពបញ្ចេញមតិដែលមិនសមហេតុផល៕

លោក Blinken ជំរុញឱ្យរដ្ឋមន្ត្រីការពារជាតិអ៊ីស្រាអែល ធ្វើផែនការក្រោយសង្គ្រាម

2024/06/25 03:42:56 pm        123
Facebook Telegram Linkin
រដ្ឋមន្ត្រីក្រសួងការពារជាតិអ៊ីស្រាអែល លោក យ៉ូអាវ ហ្កាលែន(Yoav Gallant) បានទៅដល់ក្រសួងការបរទេសសហរដ្ឋអាមេរិក ដើម្បីពិភាក្សាជាមួយអ្នកការទូតជាន់ខ្ពស់របស់សហរដ្ឋអាមេរិក លោក Antony Blinken កាលពីថ្ងៃចន្ទ។យោងតាមអ្នកនាំពាក្យក្រសួងការបរទេសលោក Matthew Miller បាននិយាយថា ដំណើរទស្សនកិច្ចនេះ ធ្វើឡើងក្នុងពេលដែលសហរដ្ឋអាមេរិកអំពាវនាវឱ្យមានបទឈប់បាញ់នៅតំបន់ហ្កាហ្សា និងសម្រាប់ការបង្កើតផែនការក្រោយសង្គ្រាមជាក់ស្តែង។លោក Matthew Miller និយាយថា មានភាពស្របមតិគ្នាថា នឹងធ្វើឲ្យក្រុមហាម៉ាសបរាជ័យយូរអង្វែង ហើយចាំបាច់ត្រូវមានផែនការសម្រាប់អ្វីដែលត្រូវដាក់ជំនួស និងអ្វីដែលត្រូវជំនួសអភិបាលកិច្ចដឹកនាំដោយប៉ាឡេស្ទីន។ វាត្រូវតែជាផែនការសន្តិសុខជាក់ស្តែង។ វាចាំបាច់ត្រូវមានផែនការកសាងឡើងវិញជាក់ស្តែង ហើយនោះជាអ្វីដែលយើងបន្តធ្វើការឆ្ពោះទៅមុខជាមួយដៃគូរបស់យើងនៅក្នុងតំបន់ ព្រមទាំងបន្តជំរុញឱ្យរដ្ឋាភិបាលអ៊ីស្រាអែល ពិចារណាឱ្យបានត្រឹមត្រូវ។ទីក្រុងវ៉ាស៊ីនតោន បានព្រមានអ៊ីស្រាអែលថា គ្មានផែនការបែបនេះ អាចបង្កឱ្យមានភាពគ្មានច្បាប់ និងភាពចលាចល ព្រមទាំងការវិលត្រលប់មកវិញរបស់ក្រុមហាម៉ាសនៅក្នុងតំបន់ហ៊ុមព័ទ្ធហ្កាហ្សា។ បន្ទាប់ពីជំនួប លោក Gallant ពុំបាននិយាយអំពីចំណុចនេះ ជាមួយអ្នកសារព័ត៌មាននោះទេ ប៉ុន្តែបាននិយាយថា សម្ព័ន្ធភាពជាមួយសហរដ្ឋអាមេរិក គឺមានសារៈសំខាន់ខ្លាំង សម្រាប់អនាគតរបស់អ៊ីស្រាអែល។លោកក៏បានជួបជាមួយទីប្រឹក្សាប្រធានាធិបតី លោក Joe Biden និងនាយក CIA លោក Bill Burns កាលពីថ្ងៃច័ន្ទ ក្នុងការពិភាក្សាដែលលោកចាត់ទុកថា «សំខាន់» ខណៈអ៊ីស្រាអែល ដោះស្រាយជាមួយតំបន់ហ្កាហ្សា និងការកើនឡើងជម្លោះនៅតាមព្រំដែនរបស់អ៊ីស្រាអែល ជាមួយប្រទេសលីបង់ ជាកន្លែងមានការបាញ់ប្រហារតគ្នាជាមួយក្រុមហេសបូឡា ដែលបានធ្វើឱ្យមានការព្រួយបារម្ភថាជម្លោះកាន់តែរីកធំ។ លោក Gallant ក៏មានផែនការជួបជាមួយរដ្ឋមន្ត្រីក្រសួងការពារជាតិ លោក Lloyd Austin នៅថ្ងៃអង្គារនេះផងដែរ។

ចិន៖ អាមេរិកមិនគួរប្រឈមបន្ទាត់ក្រហមរបស់ចិនលើបញ្ហាតៃវ៉ាន់ឡើយ ដោយព្រមានសងសឹកដ៏ស័ក្ដិសម

2024/06/25 03:16:07 pm        206
Facebook Telegram Linkin
អ្នកនាំពាក្យក្រសួងការបរទេសចិនបាននិយាយកាលពីថ្ងៃចន្ទសប្ដាហ៍នេះថា គ្មានប្រទេស អង្គការ ឬបុគ្គលណាមួយ គួរគិតថាពួកគេអាចឆ្លងកាត់បន្ទាត់ក្រហមលើបញ្ហាកោះតៃវ៉ាន់ដោយមិនប្រឈមនឹងផលវិបាកនោះទេ។ កាលពីថ្ងៃទី ២១ ខែមិថុនា ក្រសួងការបរទេសចិនបានប្រកាសពីការសម្រេចចិត្តរបស់ខ្លួនក្នុងការចាត់វិធានការប្រឆាំងនឹងក្រុមហ៊ុនលក់អាវុធអាមេរិក Lockheed Martin Corp និងនាយកប្រតិបត្តិរបស់ក្រុមហ៊ុននេះ។ជាការឆ្លើយតបទៅនឹងសំណួរពាក់ព័ន្ធក្នុងអំឡុងសន្និសីទសារព័ត៌មានប្រចាំថ្ងៃ អ្នកនាំពាក្យក្រសួងខាងលើ គឺលោកស្រី ម៉ៅនីង ( Mao Ning) បាននិយាយថា ការលក់អាវុធរបស់សហរដ្ឋអាមេរិកទៅឱ្យកោះតៃវ៉ាន់បានរំលោភយ៉ាងធ្ងន់ធ្ងរលើគោលការណ៍ចិនតែមួយ និងសេចក្តីថ្លែងការណ៍រួមចំនួនបីរវាងចិននិងអាមេរិក។ទង្វើរបស់អាមេរិក បានជ្រៀតជ្រែកក្នុងកិច្ចការផ្ទៃក្នុងរបស់ចិន ធ្វើឱ្យប៉ះពាល់អធិបតេយ្យភាព និងបូរណភាពទឹកដីរបស់ចិន។ លោកស្រីបានបន្ថែមថា ប្រទេសចិនបានចាត់វិធានការប្រឆាំងនឹងក្រុមហ៊ុនពាក់ព័ន្ធ និងនាយកប្រតិបត្តិរបស់ក្រុមនេះផងដែរ ដែលពាក់ព័ន្ធការលក់អាវុធស្របតាមច្បាប់។ លោកស្រីម៉ៅ បានសង្កត់ធ្ងន់ថា បញ្ហាកោះតៃវ៉ាន់ គឺជាចំណុចស្នូលនៃផលប្រយោជន៍ស្នូលរបស់ប្រទេសចិន និងជាខ្សែបន្ទាត់ក្រហមដំបូងដែលមិនអាចឆ្លងកាត់បាន។អ្នកនាំពាក្យរូបនេះបាននិយាយថា គ្មានប្រទេស អង្គការ ឬបុគ្គលណាម្នាក់ គួរមើលស្រាលការប្តេជ្ញាចិត្ត ឆន្ទៈ និងសមត្ថភាពដ៏រឹងមាំរបស់រដ្ឋាភិបាលចិន និងប្រជាជនចិន ដើម្បីការពារអធិបតេយ្យភាពជាតិ និងបូរណភាពទឹកដី ហើយមិនគួរស្រមៃចង់ឆ្លងកាត់ខ្សែបន្ទាត់ក្រហមលើបញ្ហាតៃវ៉ាន់ ឡើយពុំនោះនឹងត្រូវទទួលការឆ្លើយតបវិញយ៉ាងស័ក្ដិសម៕

សម្ដេចធិបតីអំពាវនាវដល់ស្ថាប័នតុលាការ និងអយ្យការអនុវត្តច្បាប់ឱ្យបានម៉ត់ចត់ ត្រឹមត្រូវតាមច្បាប់ ចំពោះករណីឃាតកម្មប្រព្រឹត្តដោយជនល្មើស ស្រី ស៊ីណា

2024/06/25 02:06:25 pm        328
Facebook Telegram Linkin
ភ្នំពេញ៖សម្ដេច​មហាបវរធិបតី ហ៊ុន​ម៉ាណែត នាយករដ្ឋមន្រ្ដីនៃកម្ពុជា នៅព្រឹកថ្ងៃទី២៥ ខែមិថុនានេះ បាន​ចេញសារ​តាមបណ្ដាញ​​តេឡេសក្រាម អំពាវនាវដល់ស្ថាប័ន​តុលាការ និងអយ្យការយកចិត្តទុកដាក់ក្នុងការពិនិត្យនិងអនុវត្តច្បាប់លើករណីនេះឱ្យបានម៉ត់ចត់, ឱ្យបានតឹងរ៉ឹង និងម៉ឺងម៉ាត់ និងឱ្យបានត្រឹមត្រូវទៅតាមច្បាប់ជាធរមាន ដើម្បីស្វែងរកយុត្តិធម៌ ជូនជនរងគ្រោះ និងក្រុមគ្រួសារ ដោយគ្មានការអន្តរាគមន៍ណាមួយជាដាច់ខាត ពាក់ព័ន្ធ «ករណីឃាតកម្ម ប្រព្រឹត្តដោយជនល្មើសឈ្មោះ ស្រី ស៊ីណា»។ក្នុងឱកាសនេះ សម្ដេ​ចធិបតី នាយករដ្ឋមន្រ្ដី បានចូលរួមរំលែកទុក្ខដ៏ក្រៀមក្រំបំផុតជាមួយគ្រួសារនៃសពប្អូន ទ្បុង លីសុង និងប្អូន ឃីន កញ្ចនា ដែលបានស្លាប់ដោយសារការបាញ់ប្រហារកាលពីថ្ងៃទី១៧ ខែមិថុនា ឆ្នាំ២០២៤ កន្លងទៅ។សម្ដេច​ធិបតី​មាន​ប្រសាសន៍ថា ក្រោយពីថ្ងៃកើតហេតុ មានការជជែកវែកញែកគ្នាពាក់ព័ន្ធទៅនឹងការកាត់ទោសជនល្មើសនៅក្នុងករណីនៃការបាញ់ប្រហារនេះ ដោយមានការបង្ហាញក្តីកង្វល់ និងបារម្ភ ខ្លាចជនល្មើសពុំត្រូវបានផ្តន្ទាទោសឱ្យបានម៉ឺងម៉ាត់តាមផ្លូវច្បាប់ ឬអាចមានការធានាឱ្យនៅក្រៅឃុំដោយមិនប្រក្រតី។សម្ដេច​ធិបតីនាយករដ្ឋមន្រ្ដីបញ្ជាក់ថា រាជរដ្ឋាភិបាល នីតិកាលទី៧ នៃរដ្ឋសភា បានយកចិត្តទុកដាក់ខ្ពស់ជាអាទិភាពមួយដ៏សំខាន់ក្នុងការពង្រឹងនីតិរដ្ឋ ពិសេស ការពង្រឹងការអនុវត្តច្បាប់ ដើម្បីធានាថែរក្សាសន្តិសុខសាធារណៈ និងសណ្តាប់ធ្នាប់សង្គម ក៏ដូចជា ការដោះស្រាយបញ្ហានានាក្នុងសង្គម ប្រកបដោយភាពត្រឹមត្រូវ និងយុត្តិធម៌ ស្របតាមច្បាប់ជាធរមាន ដែលក្នុងនោះ ក៏រួមមានការពង្រឹងទំនួលខុសត្រូវចំពោះមុខច្បាប់របស់ជនល្មើស និងការអនុវត្តច្បាប់តឹងរ៉ឹង លើជនប្រព្រឹត្តបទល្មើស ជាពិសេសជនដែលបង្កឱ្យបាត់បង់អាយុជីវិតអ្នកដទៃ។សម្ដេច​បញ្ជាក់ថា កន្លងទៅ ក៏មានការចាត់វិធានការយ៉ាងតឹងរ៉ឹងលើជនបង្កគ្រោះថ្នាក់ចរាចរណ៍ ដែលស្ថិតក្នុងស្ថានភាពស្រវឹង និងបង្កឱ្យបាត់បង់អាយុជីវិតអ្នកដទៃ ដោយបានអនុវត្តច្បាប់ គ្មានការយោគយល់ គ្មានការលើកលែង ឬអន្តរាគមន៍ណាមួយទ្បើយ។សម្ដេច​ធិបតីបន្តថា៖«ដូចគ្នាផងដែរ ចំពោះករណីឃាតកម្មនេះ បើទោះបីជារាជរដ្ឋាភិបាល មិនអាចលូកដៃចូលក្នុងកិច្ចការរបស់ស្ថាប័នតុលាការក៏ដោយ ខ្ញុំសូមអំពាវនាវឱ្យស្ថាប័នតុលាការ និងស្ថាប័នអយ្យការ យកចិត្តទុកដាក់ក្នុងការពិនិត្យនិងអនុវត្តច្បាប់លើករណីនេះឱ្យបានម៉ត់ចត់, ឱ្យបានតឹងរ៉ឹង និងម៉ឺងម៉ាត់ និងឱ្យបានត្រឹមត្រូវទៅតាមច្បាប់ជាធរមាន ដើម្បីស្វែងរកយុត្តិធម៌ ជូនជនរងគ្រោះ និងក្រុមគ្រួសារ ដោយគ្មានការអន្តរាគមន៍ណាមួយជាដាច់ខាត»។សម្ដេច​នាយករដ្ឋមន្រ្ដីបានថ្លែង អរគុណដល់ប្រជាពលរដ្ឋទាំងអស់ ដែលបានបង្ហាញនូវសុទ្ធចិត្តវែកញែកក្នុងរឿងនេះ ហើយក៏សូមអំពាវនាវដល់ប្រជាពលរដ្ឋទាំងអស់ ដើម្បីទុកកិច្ចការនេះជូនស្ថាប័នអនុវត្តច្បាប់ដែលមានសមត្ថកិច្ច ដើម្បីចាត់ការ និងដោះស្រាយករណីនេះ ឱ្យបានត្រឹមត្រូវ និងយុត្តិធម៌ ទៅតាមនីតិវិធី និង ច្បាប់ជាធរមានរបស់ព្រះរាជាណាចក្រកម្ពុជា។ ខ្ញុំក៏សូមឱ្យប្រជាពលរដ្ឋមានការជឿទុកចិត្តលើប្រព័ន្ធយុត្តិធម៌កម្ពុជាក្នុងការចាត់ការ និង ដោះស្រាយផ្តល់យុត្តិធម៌ឱ្យបានត្រឹមត្រូវចំពោះករណីនេះ។សម្ដេច​ធិបតីរម្លឹកថា​ នៅពេលត្រឡប់មកដល់កម្ពុជាវិញបន្ទាប់ពីបំពេញទស្សនកិច្ចជាផ្លូវការនៅប្រទេសសុង្ហបុរីសម្ដេច​បានក្រាបបង្គំទូលថ្វាយព្រះមហាក្សត្រ ដើម្បីបញ្ចប់គោរមងារឧកញ៉ារបស់លោក ស្រី ស៊ីណា កាលពីថ្ងៃទី ២០ មិថុនា ឆ្នាំ២០២៤ ហើយចាប់តាំងពីថ្ងៃកើតហេតុនោះមកសម្ដេច​បានចេញបទបញ្ជាឱ្យសមត្ថកិច្ចពាក់ព័ន្ធ ក៏ដូចជាប្រគល់ភារកិច្ចជូនឯកឧត្តម កើត រិទ្ធ ឧបនាយករដ្ឋមន្រ្តី រដ្ឋមន្រ្តីក្រសួងយុត្តិធម៌ បន្តតាមដានដោយយកចិត្តទុកដាក់លើការអនុវត្តច្បាប់ចំពោះករណីនេះ ដើម្បីធានាថា ច្បាប់ត្រូវបានអនុវត្តដោយតឹងរ៉ឹង ម៉ឺងម៉ាត់ និង ដោយត្រឹមត្រូវទៅតាមខ្លឹមសារនៃច្បាប់ ក្នុងការផ្តល់យុត្តិធម៌ដល់ជនរងគ្រោះ និង ក្រុមគ្រួសារ៕

បណ្ដាញសង្គម

ព័ត៌មានថ្មីៗ

ឯកឧត្តមកិត្តិសង្គហបណ្ឌិត គន់ គីម បន្តអញ្ជើញចុះពិនិត្យស្ថានភាពទឹកជំនន់ និងផលប៉ះពាល់ប្រជាពលរដ្ឋ ក្នុងខេត្តក្រចេះ
08/24/2026 06:08 PM
Facebook Telegram Linkin
មនុស្សយ៉ាងហោចណាស់២០នាក់ត្រូវបានបញ្ជូនទៅមន្ទីរពេទ្យក្រោយលេចធ្លាយឧស្ម័នក្លរនៅរោងចក្រប្រទេសឥណ្ឌា
08/24/2026 06:08 PM
Facebook Telegram Linkin
ចិនជម្លៀសមនុស្សរាប់ម៉ឺននាក់ ខណៈភ្លៀងធ្លាក់ដោយសារ​ព្យុះទីហ្វុង Narra វាយប្រហារភាគនិរតី
08/24/2026 05:08 PM
Facebook Telegram Linkin
កម្ពុជា-រុស្ស៊ី ឯកភាពបន្តជំរុញទំនាក់ទំនង និងកិច្ចប្រតិបត្តិការរវាងប្រទេសទាំងពីរឱ្យកាន់តែរីកចម្រើនបន្ថែមទៀត
08/24/2026 05:08 PM
Facebook Telegram Linkin
អាជ្ញាធរខេត្តកំពង់ស្ពឺ កំពុងជំរុញការស្ថាបនាជួសជុលកែលម្អផ្លូវជាច្រើនខ្សែដែលរងការខូចខាត
08/24/2026 05:08 PM
Facebook Telegram Linkin
លោក Macron ទទួលរជ្ជទាយាទអារ៉ាប៊ីសាអ៊ូឌីត ខណៈ​មាន​ការពិភាក្សា​ រាប់​ពី​​កីឡាអេឡិចត្រូនិក រហូតដល់មជ្ឈិមបូព៌ា
08/24/2026 05:08 PM
Facebook Telegram Linkin
លោក Burnham ទស្សនកិច្ចនៅ​អ៊ុយក្រែនលើក​ទី១ ក្នុងនាមជានាយករដ្ឋមន្ត្រីអង់គ្លេស
08/24/2026 05:08 PM
Facebook Telegram Linkin
តំណាងអយ្យការសម្រេចចោទប្រកាន់មន្ត្រីក្រសួងការបរទេស៣រូបពាក់ព័ន្ធករណីលួចទិដ្ឋាការឲ្យជនបរទេសដែលជាពួក online scams
08/24/2026 04:08 PM
Facebook Telegram Linkin
ប្រព័ន្ធផ្សព្វផ្សាយចិនសាទរ ចំពោះការសងសឹកជាមួយ​​ការ​ដំឡើង​ពន្ធ​ «តាមបែបចិន» របស់កាណាដា
08/24/2026 04:08 PM
Facebook Telegram Linkin
អាមេរិកលុបចោលសមយុទ្ធកងម៉ារីនរួមជាមួយកូរ៉េខាងត្បូង ដោយសារកង្វះ​កង​កម្លាំង ទាក់​ទង​សង្គ្រាមអ៊ីរ៉ង់
08/24/2026 04:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.