នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
BREAKING NEWS|កម្ពុជាចាត់ទុកផែនការថៃចង់ដណ្តើមប្រាសាទតាក្របី និងបិទប្រាសាទតាមាន់ធំគឺជាការប៉ុនប៉ងឈ្លានពានកម្ពុជាគិតទុកជាមុន និងមិនគោរពបទឈប់បាញ់
សម្ដេចតេជោ៖សង្គ្រាមព្រំដែនកម្ពុជា-ថៃបានផ្ទេរពីសង្គ្រាមប្រើប្រាស់អាវុធមកជាសង្រ្គាម ប្រើប្រាស់ជំពាមកៅស៊ូ ខណៈបើពិនិត្យឲ្យសុីជម្រៅវាជារឿងធំ ប្រសិនបើមិនទប់ស្កាត់
ឯកឧត្តម ចាន់ ដារ៉ុង ដឹកនាំគណៈកម្មការ​អន្តរ​ក្រសួង​ចុះ​ពិនិត្យ​វាយ​តម្លៃ​បញ្ចប់​សុពល​ភាព​ការងារ​ថែ​ទាំ​ផ្លូវ​ខួបចំនួន ៣កំណាត់ ក្នុងខេត្តពោធិ៍សាត់
BREAKING NEWS! សម្តេចធិបតី អបអរសាទរចំពោះការប្រព្រឹត្តទៅដោយជោគជ័យ​នូវ​កិច្ច​ប្រជុំ​​វិសាមញ្ញ នៃ​គណៈកម្មាធិកា​រ​ព្រំដែន​ទូទៅកម្ពុជា-ថៃ

នយោបាយ​ និង ការអភិវឌ្ឍន៍

រុស្ស៊ី៖ ខ្លួនអាចចាត់វិធានការទប់ស្កាត់នុយក្លេអ៊ែរបន្ថែម បើអាមេរិកដាក់ពង្រាយមីស៊ីលនៅអឺរ៉ុប និងអាស៊ី

2024/05/31 12:22:27 pm        179
Facebook Telegram Linkin
រដ្ឋមន្ត្រីការបរទេសរុស្ស៊ី លោក ហ្សើហ្គេឡារ៉ូហ្វ (Sergei Lavrov) បានប្រាប់ទីភ្នាក់ងារសារព័ត៌មានរដ្ឋ RIA ក្នុងបទសម្ភាសន៍មួយថា រុស្ស៊ីអាចនឹងចាត់វិធានការបន្ថែមទៀតនៅក្នុងតំបន់នៃការទប់ស្កាត់ដោយនុយក្លេអ៊ែរ ប្រសិនបើសហរដ្ឋអាមេរិក ដាក់ពង្រាយមីស៊ីលរយៈចម្ងាយមធ្យម និងជិត នៅអឺរ៉ុប និងអាស៊ី។ សារព័ត៌មាន RIA បានសំដៅទៅលើផែនការរបស់សហរដ្ឋអាមេរិក ដែលបានប្រកាសកាលពីខែមេសា ដើម្បីដាក់ពង្រាយមីស៊ីលនៅក្នុងតំបន់ឥណ្ឌូប៉ាស៊ីហ្វិក ឆ្លើយតបទៅនឹងអ្វីដែលទីក្រុងវ៉ាស៊ីនតោនមើលឃើញថា មានការកើនឡើងនៃកម្លាំងយោធារបស់ចិន។ ការដាក់ពង្រាយបែបនេះ នឹងត្រូវបានហាមប្រាមនៅក្រោមសន្ធិសញ្ញាកងកម្លាំងនុយក្លេអ៊ែរកម្រិតមធ្យមឆ្នាំ ១៩៨៧ ជាមួយរុស្ស៊ី ដែលសហរដ្ឋអាមេរិកបានដកខ្លួនចេញជាផ្លូវការនៅឆ្នាំ២០១៩ បន្ទាប់ពីបាននិយាយថាទីក្រុងមូស្គូបានបំពានលើកិច្ចព្រមព្រៀងនេះ ជាការចោទប្រកាន់ដែលវិមានក្រឹមឡាំងបានច្រានចោល។ ទីក្រុងមូស្គូបានព្រមានជាយូរមកហើយថា ខ្លួននឹងលុបចោលការផ្អាកដែលខ្លួនបានស្នើឡើង បន្ទាប់ពីសន្ធិសញ្ញានេះត្រូវបានលុបចោលលើការដាក់ពង្រាយមីស៊ីលរយៈចម្ងាយខ្លី និងមធ្យម ប្រសិនបើក្រុងវ៉ាស៊ីនតោនបន្តផែនការដាក់ពង្រាយមីស៊ីល បែបនេះនៅក្នុងតំបន់អាស៊ី និងអឺរ៉ុប។លោក Lavrov បានប្រាប់សារព័ត៌មាន RIA ថា រុស្ស៊ីអាចចាត់វិធានការផ្សេងទៀតផងដែរ។ប្រមុខការទូតរុស្ស៊ី រូបនេះ បាននិយាយថា យើងមិនច្រានចោលនូវជំហានបន្ថែម ក្នុងទប់ស្កាត់ដោយនុយក្លេអ៊ែរទេ ព្រោះមជ្ឈមណ្ឌលបញ្ជា និងទីតាំងនៃកងកម្លាំងនុយក្លេអ៊ែររបស់យើងនឹងស្ថិតនៅក្នុងជួរនៃមីស៊ីលឆ្ពោះទៅសហរដ្ឋអាមេរិក៕

លោក Trump រិះគន់ខ្លាំងៗចំពោះសាលក្រមថាជា «ការអាម៉ាស់» បន្ទាប់ពីការជម្រះក្តីបទព្រហ្មទណ្ឌ

2024/05/31 11:53:28 am        185
Facebook Telegram Linkin
អតីតប្រធានាធិបតី លោក Donald Trump កាលពីថ្ងៃព្រហស្បតិ៍ បានរិះគន់ខ្លាំងៗចំពោះការជម្រះក្តី របស់លោកលើបទព្រហ្មទណ្ឌរដ្ឋចំនួន៣៤ករណី នៅក្នុងករណី«ផ្តល់លុយបំបិទមាត់» នៅទីក្រុងញូវយ៉ក ដោយហៅសាលក្រមនេះថាជា«ការអាម៉ាស់»ហើយបានប្តេជ្ញាថានឹង «តស៊ូរហូតដល់ទីបញ្ចប់»។ អតីតប្រធានាធិបតីរូបនេះ បានរិះគន់ខ្លាំងៗ ចំពោះករណីនាំមកចោទប្រកាន់លើលោក ដោយលោក អាល់វីន ប្រាក(Alvin Bragg) មេធាវីប្រចាំតំបន់ Manhattan ដោយអះអាងថា ការកាត់ទោសនេះ មានហេតុផលនយោបាយ និងរៀបចំឡើងដើម្បីបំផ្លាញបេក្ខភាពរបស់លោកសម្រាប់ដណ្តើមយកសេតវិមាន។ លោក Trump បានប្រកាសប្រាប់អ្នកសារព័ត៌មានថា លោកគឺជា «មនុស្សស្លូតត្រង់បំផុត»។លោកនិយាយថា «លោកនឹងតស៊ូរហូតដល់ទីបំផុត» ជាការបង្ហាញថាលោកនឹងបន្តការប្តឹងឧទ្ធរណ៍។ គណៈវិនិច្ឆ័យ នៅទីក្រុងញូវយ៉កចំនួន១២រូប បានឈានដល់សាលក្រមរបស់ខ្លួន បន្ទាប់ពីការពិភាក្សារយៈពេលពីរថ្ងៃ ក្រោយការជម្រះក្តីដែលមានរយៈពេល៦សប្តាហ៍ ដោយបានរកឃើញថាលោកTrump បានបំពានច្បាប់ដោយការក្លែងបន្លំកំណត់ត្រាអាជីវកម្មដើម្បីបិទបាំងការបង់ប្រាក់ចំនួន ១៣០.០០០ដុល្លារ ទៅឲ្យតារាភាពយន្តអាសអាភាស នាង ស្តមី ដេនញែល(Stormy Daniels) នៅក្នុងពេលដំណើរការនៃការបោះឆ្នោតកាលពីឆ្នាំ ២០១៦។ សេចក្តីសម្រេចនេះ គឺជាប្រវត្តិសាស្ត្រមួយដែលធ្វើឱ្យ លោក Trump ក្លាយជាអតីតប្រធានាធិបតីដំបូងគេ ដែលត្រូវបានជម្រះក្តីពីបទព្រហ្មទណ្ឌ។លោកTrump នឹងត្រូវកាត់ទោសនៅថ្ងៃទី ១១ ខែកក្កដា ប៉ុន្មានថ្ងៃមុនពេលចាប់ផ្តើមសន្និបាតរបស់គណបក្សសាធារណរដ្ឋ ដែលលោក ត្រូវបានគេរំពឹងថានឹងទទួលបានការតែងតាំងជាផ្លូវការពីគណបក្សសម្រាប់តំណែងប្រធានាធិបតី។ លោក Trump ត្រៀមខ្លួនរួចជាស្រេចដើម្បីប្រឈមមុខជាមួយលោក Biden ក្នុងការបោះឆ្នោតប្រធានាធិបតី នៅខែវិច្ឆិកាខាងមុខ ។អតីតប្រធានាធិបតីរូបនេះ បានប្រាប់អ្នកសារព័ត៌មានថា សាលក្រមពិតប្រាកដ នឹងមាននៅថ្ងៃទី ៥ ខែវិច្ឆិកា ធ្វើឡើងដោយប្រជាជន ហើយពួកគេដឹងពីអ្វីដែលបានកើតឡើងនៅទីនេះ។

ចិន ផ្អាកសម្បទានពន្ធលើទំនិញជាង ១៣០ មុខ ក្រោមកិច្ចព្រមព្រៀងពាណិជ្ជកម្មកោះតៃវ៉ាន់

2024/05/31 11:43:58 am        132
Facebook Telegram Linkin
ក្រសួងហិរញ្ញវត្ថុរបស់ប្រទេសចិន បាននិយាយនៅថ្ងៃសុក្រ (៣១ ឧសភា) នេះថា ខ្លួននឹងផ្អាកសម្បទានពន្ធដែលផ្តល់ឱ្យកោះតៃវ៉ាន់ លើទំនិញចំនួន ១៣៤ ក្រោមកិច្ចព្រមព្រៀងពាណិជ្ជកម្ម ដោយនិយាយថាទីក្រុងតៃប៉ិ បានបរាជ័យក្នុងការចាត់វិធានការប្រកបដោយប្រសិទ្ធភាពដើម្បីដកការរឹតបន្តឹងពាណិជ្ជកម្មនៅលើចិនដីគោក។កិច្ចព្រមព្រៀងក្របខណ្ឌកិច្ចសហប្រតិបត្តិការសេដ្ឋកិច្ចឆ្លងច្រកសមុទ្រ (ECFA) រវាងចិន និងកោះតៃវ៉ាន់ ត្រូវបានចុះហត្ថលេខាដំបូងក្នុងឆ្នាំ២០១០។ ប្រទេសចិន ក្នុងខែធ្នូ បានផ្អាកសម្បទានពន្ធសម្រាប់ផលិតផលមួយចំនួនប៉ុណ្ណោះក្រោមកិច្ចព្រមព្រៀង ECFA នេះ ប៉ុន្តែក្រសួងហិរញ្ញវត្ថុបាននិយាយថា កោះនេះមិនទាន់បានដោះស្រាយលើការរឹតបន្តឹងពាណិជ្ជកម្មរបស់ខ្លួនឡើយ។ក្រសួងហិរញ្ញវត្ថុបាននិយាយថា «តំបន់តៃវ៉ាន់ បានអនុម័តជាឯកតោភាគីនូវវិធានការរើសអើង ដូចជាការហាមឃាត់ និងរឹតបន្តឹងការនាំចេញផលិតផលចិនដីគោក ដែលបំពានលើបទប្បញ្ញត្តិនៃកិច្ចព្រមព្រៀង»។ ក្រសួងបានបន្ថែមថា ការផ្អាកសម្បទានពន្ធនឹងធ្វើឡើងចាប់ពីថ្ងៃទី១៥ ខែមិថុនា ខាងមុខនេះ ហើយនឹងអនុវត្តចំពោះផលិតផលដែលនាំចូលពីកោះតៃវ៉ាន់ រួមទាំងផលិតផលចម្រាញ់ប្រេងផងដែរ៕

កូរ៉េខាងជើង៖ មីស៊ីល ១៨ គ្រាប់ដែលបានបាញ់នោះ ជាការព្រមានដល់កូរ៉េខាងត្បូង

2024/05/31 11:36:02 am        155
Facebook Telegram Linkin
ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃសុក្រ (៣១ ឧសភា) នេះថា ប្រទេសកូរ៉េខាងជើង បាននិយាយថា ខ្លួនបានបាញ់មីស៊ីលបាលិស្ទិករយៈចម្ងាយខ្លីចំនួន ១៨ គ្រាប់ក្នុងអំឡុងពេលសមយុទ្ធ ដែលជាការបង្ហាញអំពីឆន្ទៈរបស់ខ្លួនក្នុងការបើកការវាយប្រហារជាមុនប្រឆាំងនឹង «របបជនអន្ធពាល» របស់កូរ៉េខាងត្បូង ប្រសិនបើចាំបាច់ដើម្បីប្រឆាំងនឹងការវាយប្រហារ។ទីភ្នាក់ងារសារព័ត៌មានរដ្ឋ KCNA បានរាយការណ៍ថា មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បានដឹកនាំសមយុទ្ធបាញ់គ្រាប់រ៉ូកែតទំហំ ៦០០ មីលីម៉ែត្រ «ដ៏ធំអស្ចារ្យ» កាលពីថ្ងៃព្រហស្បតិ៍។ របាយការណ៍នេះ បានកើតឡើងបន្ទាប់ពីកូរ៉េខាងត្បូងបាននិយាយថា ខ្លួនបានរកឃើញមីស៊ីលបាលិស្ទិករយៈចម្ងាយខ្លីយ៉ាងហោចណាស់ ១០ គ្រាប់ ដែលកូរ៉េខាងជើងបាញ់ចេញពីឆ្នេរសមុទ្រភាគខាងកើតរបស់ខ្លួន ហើយបានហៅវាថាជាលទ្ធភាពនៃការបង្ហាញពីសមត្ថភាពអាវុធដល់អ្នកទិញ រួមទាំងរុស្ស៊ី ផងដែរ។របាយការណ៍ KCNA បានបន្ថែមថា លោក គីម បានជំរុញឱ្យមានការត្រៀមខ្លួនដោយកម្លាំងនុយក្លេអ៊ែរដើម្បីអនុវត្តបេសកកម្មទប់ស្កាត់សង្គ្រាម ក៏ដូចជាការផ្តួចផ្តើមគំនិតក្នុងករណីមានសង្គ្រាម។ ការបាញ់បង្ហោះកាលពីថ្ងៃព្រហស្បតិ៍ ដោយប្រើបច្ចេកវិទ្យាមីស៊ីលបាលិស្ទិកនេះត្រូវបានថ្កោលទោសដោយក្រសួងការបរទេសសហរដ្ឋអាមេរិក ថាជាទង្វើមិនប្រុងប្រយ័ត្ន និងរំលោភលើសេចក្ដីសម្រេចជាច្រើនរបស់ក្រុមប្រឹក្សាសន្តិសុខអង្គការសហប្រជាជាតិ៕

ភាគហ៊ុនរបស់ក្រុមហ៊ុនលោក Trump បានធ្លាក់ចុះ បន្ទាប់ពីការកាត់ទោសលើបណ្ដឹងប្រាក់បំបិទមាត់

2024/05/31 11:29:00 am        35
Facebook Telegram Linkin
ភាគហ៊ុនរបស់ក្រុមហ៊ុនប្រព័ន្ធផ្សព្វផ្សាយ និងបច្ចេកវិទ្យា ត្រាំ (Trump Media & Technology Group) បានធ្លាក់ចុះ ៦,៥ ភាគរយកាលពីថ្ងៃព្រហស្បតិ៍ (៣០ ឧសភា) បន្ទាប់ពីគណៈវិនិច្ឆ័យទីក្រុងញូវយ៉ក បានផ្តន្ទាទោសលោកអតីតប្រធានាធិបតី ដូណាល់ ត្រាំ (Donald Trump) ពីបទក្លែងបន្លំឯកសារដើម្បីបិទបាំងការបង់ប្រាក់បំបិទមាត់តារាភាពយន្តអាសអាភាសនៅមុនការបោះឆ្នោតឆ្នាំ២០១៦។ភាគហ៊ុនរបស់ក្រុមហ៊ុនមេ របស់បណ្ដាញសង្គម ទ្រូស សូសល់ (Truth Social) ដែលភាគច្រើនគ្រប់គ្រងដោយលោក ត្រាំ មួយនេះ បានជួញដូរនៅតម្លៃ ៤៨,៤៤ ដុល្លារប៉ុណ្ណោះ បន្ទាប់ពីបិទការទិញលក់ ដែលជាធម្មតាភាគហ៊ុនក្រុមហ៊ុននេះធ្លាប់បានបិទនៅតម្លៃ ៥១,១២ ដុល្លារ។បន្ទាប់ពីការពិភាក្សាអស់រយៈពេលពីរថ្ងៃ គណៈវិនិច្ឆ័យដែលមានសមាជិក ១២ រូបបានប្រកាសថាខ្លួនបានរកឃើញថាលោក ត្រាំ មានទោសលើការចោទប្រកាន់ទាំង ៣៤ ករណីដែលលោកបានប្រឈម។ ប្រធានចៅក្រមយុត្តិធម៌ លោក វ័ន មើឆាន (Juan Merchan) បានកំណត់ការកាត់ទោសនៅថ្ងៃទី ១១ ខែកក្កដាដែលនឹងមានរយៈពេលប៉ុន្មានថ្ងៃប៉ុណ្ណោះមុនថ្ងៃទី១៥ ខែកក្កដា នៃពិធីមួយរបស់បក្សសាធារណរដ្ឋដែលរំពឹងថានឹងតែងតាំងលោក ត្រាំ ជាបេក្ខជនប្រធានាធិបតីជាផ្លូវការ។នៅក្នុងការជួញដូរជាសាធារណៈដំបូងរបស់ក្រុមហ៊ុនប្រព័ន្ធផ្សព្វផ្សាយ ត្រាំ មីឌៀ (Trump Media) កាលពីថ្ងៃទី២៦ ខែមីនា ក្រុមអ្នកគាំទ្រលោក ត្រាំ បានសម្រុកទិញភាគហ៊ុនរបស់ក្រុមហ៊ុននេះដោយធ្វើឱ្យកើនឡើងរហូតដល់ ៥៩ ភាគរយ។ ក្រុមហ៊ុនបានរាយការណ៍ពីប្រាក់ចំណូលចំនួន ៧៧០.៥០០ ដុល្លារសម្រាប់ត្រីមាសខែមីនា និងការខាតបង់ក្នុងប្រតិបត្តិការចំនួន ១២,១ លានដុល្លារ៕

ប្រធានាធិបតីស៊ីរី និងមេដឹកនាំកំពូលអ៊ីរ៉ង់ ជួបគ្នានៅទីក្រុងតេអេរ៉ង់ និយាយថា ទំនាក់ទំនងប្រទេសទាំងពីររឹងមាំ

2024/05/31 09:53:49 am        63
Facebook Telegram Linkin
បណ្តាញព័ត៌មាននិស្សិតអ៊ីរ៉ង់ (SNN) បានរាយការណ៍ថា ប្រធានាធិបតីស៊ីរី លោក Bashar al-Assad បានជួបជាមួយមេដឹកនាំកំពូលរបស់ប្រទេសអ៊ីរ៉ង់ លោក អាយ៉ាតូឡា អាលី ខាមីណេ(Ayatollah Ali Khamenei) ជាសម្ព័ន្ធមិត្តជិតស្និទ្ធ នៅទីក្រុងតេអេរ៉ង់ កាលពីថ្ងៃព្រហស្បតិ៍ ដើម្បីចូលរួមរំលែកទុក្ខចំពោះមរណភាពរបស់ប្រធានាធិបតី លោក អ៊ីប្រាហ៊ីម រ៉េស៊ី(Ebrahim Raisi)។លោក Raisi បានស្លាប់នៅពេលដែលឧទ្ធម្ភាគចក្ររបស់លោក បានធ្លាក់កាលពីថ្ងៃទី ១៩ ខែឧសភានៅជិតព្រំដែនប្រទេសអាស៊ែបៃហ្សង់។លោក Khamenei និង លោក Assad បានជួបគ្នាចុងក្រោយកាលពីឆ្នាំ២០២២ នៅទីក្រុងតេអេរ៉ង់ ប្រទេសអ៊ីរ៉ង់ ក្នុងអំឡុងពេលនោះភាគីទាំងពីរ បានអំពាវនាវឱ្យមានទំនាក់ទំនងកាន់តែរឹងមាំ។កាលពីថ្ងៃព្រហស្បតិ៍ លោក Assad និងលោក Khamenei បាននិយាយថា ទំនាក់ទំនងមានភាពរឹងមាំ នេះបើយោងតាមសេចក្តីថ្លែងការណ៍របស់ការិយាល័យប្រធានាធិបតីស៊ីរី។ លោក Assad អាចបង្វែរជំនោរនៃសង្គ្រាមស៊ីវិលរបស់ប្រទេសស៊ីរី ដែលបានផ្ទុះឡើងពីបាតុកម្មគាំទ្រលទ្ធិប្រជាធិបតេយ្យដ៏ធំ នៅក្នុងឆ្នាំ២០១១ ដោយមានជំនួយដ៏សំខាន់ពីកងជីវពលតំណាងរបស់ប្រទេសអ៊ីរ៉ង់ និងការអន្តរាគមន៍យោធារបស់ប្រទេសរុស្ស៊ី ក្នុងឆ្នាំ២០១៥ ។អ៊ីស្រាអែល ដែលអត្ថិភាព ពុំត្រូវបានទទួលស្គាល់ដោយសាធារណរដ្ឋអ៊ីស្លាម បានវាយប្រហារជាញឹកញាប់លើអ្វីដែលខ្លួនបានចាត់ទុកថាជាគោលដៅរបស់អ៊ីរ៉ង់ នៅក្នុងប្រទេសស៊ីរី ជាកន្លែងដែលកងកម្លាំងគាំទ្រដោយទីក្រុងតេអេរ៉ង់ រួមទាំងកងជីវពលហេសបូឡា របស់ប្រទេសលីបង់ បានដាក់ពង្រាយក្នុងរយៈពេលមួយទសវត្សរ៍កន្លងទៅនេះ ដើម្បីគាំទ្រលោក Assad ក្នុងសង្រ្គាមស៊ីរី។

ចិន៖ សមយុទ្ធជុំវិញកោះតៃវ៉ាន់ បានសម្រេចគោលដៅ ប៉ុន្តែក៏នឹងត្រៀមមានសកម្មភាពបន្ថែមទៀត

2024/05/31 09:48:44 am        85
Facebook Telegram Linkin
អ្នកនាំពាក្យក្រសួងការពារជាតិចិន បាននិយាយកាលពីថ្ងៃព្រហស្បតិ៍ (៣០ ឧសភា) ថា យោធារបស់ប្រទេសចិន បានសម្រេច «គោលដៅរំពឹងទុក» ក្នុងអំឡុងពេលពីរថ្ងៃនៃសមយុទ្ធនៅជុំវិញកោះតៃវ៉ាន់ កាលពីសប្តាហ៍មុន ប៉ុន្តែខ្លួនក៏បានត្រៀមរៀបចំសម្រាប់សកម្មភាពយោធាបន្ថែមទៀតផងដែរ ប្រសិនបើមានការបង្កហេតុ។ប្រទេសចិន ដែលចាត់ទុកកោះស្វ័យគ្រប់គ្រងតាមបែបប្រជាធិបតេយ្យ តៃវ៉ាន់ ថាជាទឹកដីរបស់ខ្លួននោះ បានរៀបចំហ្គេមសង្រ្គាមរយៈពេលពីរថ្ងៃជុំវិញកោះនេះ បន្ទាប់ពីពិធីចូលកាន់តំណែងរបស់មេដឹកនាំថ្មី លោក ឡៃ ឆឹងទ័រ (Lai Ching-te) ដែលទីក្រុងប៉េកាំង ហៅថាជា «ជនផ្ដាច់ខ្លួនដ៏គ្រោះថ្នាក់»។ ការអត្ថាធិប្បាយកាលពីថ្ងៃព្រហស្បតិ៍ នេះបានកើតឡើងប៉ុន្មានម៉ោងបន្ទាប់ពីកោះតៃវ៉ាន់ បានព្រមានថាទីក្រុងប៉េកាំង កំពុងព្យាយាម «លុបបំបាត់» ដែនអាកាសរបស់ខ្លួន និងបង្កើតភាពធម្មតាថ្មីមួយជាមួយនឹងសមយុទ្ធ និងសកម្មភាពផ្សេងទៀតដើម្បីដាក់សម្ពាធលើរដ្ឋបាលថ្មីរបស់លោក ឡៃ។អ្នកនាំពាក្យលោក អ៊ូ ឈាន (Wu Qian) បាននិយាយនៅក្នុងទីក្រុងប៉េកាំង ថា សមយុទ្ធរួមគ្នាដោយកងទ័ពរំដោះប្រជាជនគឺជា »វិធានការដើម្បីទប់ស្កាត់ឯករាជ្យភាព និងសកម្មភាពផ្ដាច់ខ្លួនរបស់តៃវ៉ាន់ដ៏ឈ្លានពាន និងការព្រមានប្រឆាំងនឹងការជ្រៀតជ្រែកពីបរទេស»។ ខណៈពេលដែលសមយុទ្ធបានបញ្ចប់ជាផ្លូវការ សកម្មភាពយោធារបស់ចិនមិនបានបញ្ឈប់នោះទេ ដោយតៃវ៉ាន់ បាននិយាយកាលពីថ្ងៃពុធ ថា យន្តហោះចម្បាំង និងនាវាចម្បាំងរបស់ចិន បានអនុវត្ត «ការល្បាតត្រៀមប្រយុទ្ធរួមគ្នា» នៅក្បែរនោះ៕

សាលក្រមមានទោសរបស់លោក Trump ជំរុញឱ្យមានការគាំទ្រកាន់តែខ្លាំងពីម្ចាស់ជំនួយ

2024/05/31 09:45:47 am        131
Facebook Telegram Linkin
បណ្ដាម្ចាស់ជំនួយមកពីគណបក្សសាធារណរដ្ឋសំខាន់ៗបាននិយាយកាលពីថ្ងៃព្រហស្បតិ៍ (៣០ ឧសភា) ថា ពួកគេមានឆន្ទៈគាំទ្រអតីតប្រធានាធិបតីអាមេរិក ដែលជាប់ទោសព្រហ្មទណ្ឌដំបូងគេរូបនេះ ឱ្យឈរឈ្មោះជាបេក្ខជនប្រធានាធិបតី ដោយយ៉ាងហោចណាស់ម្ចាស់ជំនួយម្នាក់បានផ្តល់ប្រាក់ដល់លោក ដូណាល់ ត្រាំ (Donald Trump) ជាលើកដំបូង នេះបើយោងតាមអ្នកផ្តល់ជំនួយ និងអ្នករៃអង្គាសប្រាក់ប្រហែលរាប់សិបនាក់។ម្ចាស់ជំនួយអភិរក្សនិយមជាច្រើនបានចាត់ទុកសំណុំរឿងប្រាក់បំបិទមាត់នៅក្រុងញូវយ៉ក (New York) នេះថាជាការធ្វើទុក្ខបុកម្នេញផ្នែកនយោបាយ ដោយបានជំរុញការអះអាងរបស់បេក្ខជនប្រធានាធិបតីមកពីគណបក្សសាធារណរដ្ឋរូបនេះ ដែលថាគណបក្សប្រជាធិបតេយ្យកំពុងព្យាយាមធ្វើឱ្យលោកបាត់បង់ប្រជាប្រិយភាពនៅមុនការបោះឆ្នោតថ្ងៃទី០៥ ខែវិច្ឆិកា ប្រឆាំងនឹងលោកប្រធានាធិបតី ចូ បៃដិន (Joe Biden) ប៉ុន្តែរដ្ឋអាជ្ញាបានច្រានចោលការអះអាងទាំងនោះថាមិនពិត។គណៈវិនិច្ឆ័យនៅទីក្រុងញូវយ៉ក កាលពីថ្ងៃព្រហស្បតិ៍ បានរកឃើញថាលោក ត្រាំ មានទោសពីបទក្លែងបន្លំឯកសារដើម្បីបិទបាំងការបង់ប្រាក់ដើម្បីបំបិទមាត់តារាភាពយន្តអាសអាភាសម្នាក់នៅមុនការបោះឆ្នោតឆ្នាំ២០១៦។ សាលក្រមនេះបានជំរុញម្ចាស់ជំនួយមួយចំនួនឱ្យបង្កើនការគាំទ្រផ្នែកហិរញ្ញវត្ថុរបស់ពួកគេកាន់តែខ្លាំងឡើងសម្រាប់លោក ត្រាំ។បន្ទាប់ពីការកាត់ទោសកាលពីថ្ងៃព្រហស្បតិ៍ លោក ដន ថាភា (Don Tapia) អតីតឯកអគ្គរដ្ឋទូតជំនាន់រដ្ឋបាលលោក ត្រាំ ប្រចាំប្រទេសហ្សាម៉ាអ៊ីក បានប្រាប់សារព័ត៌មានរ៉យទ័រ ថា ក្រុមម្ចាស់ជំនួយមានបំណងផ្តល់ប្រាក់ជាង ១ លានដុល្លារសម្រាប់ការចំណាយដល់ក្រុមគាំទ្រលោក ត្រាំ ឈ្មោះថា ម៉ាហ្កា អាយអែនស៊ី (MAGA Inc) ក្នុងប៉ុន្មានសប្តាហ៍ខាងមុខនេះ។ ម្ចាស់ជំនួយផ្សេងទៀតដែលត្រូវបានសម្ភាសដោយសារព័ត៌មានរ៉យទ័រ ក៏មានការរំពឹងទុកយ៉ាងទូលំទូលាយអំពីជ័យជម្នះលោក ត្រាំ ក្នុងខែវិច្ឆិកា ដោយផ្អែកលើការស្ទង់មតិសាធារណៈមួយចំនួនដែលបង្ហាញថាលោក ត្រាំ នាំមុខលោក បៃដិន នៅក្នុងរដ្ឋសំខាន់ៗមួយចំនួន៕

ប្រតិកម្មពីពិភពនយោបាយអាមេរិក បន្ទាប់ពីលោក Trump មានទោសក្នុងសំណុំរឿងប្រាក់បំបិទមាត់

2024/05/31 09:40:11 am        109
Facebook Telegram Linkin
ក្រុមអ្នកនយោបាយអាមេរិក បញ្ចេញប្រតិកម្មរបស់ខ្លួនចំពោះសាលក្រមប្រវត្តិសាស្ត្រក្នុងបណ្ដឹងប្រាក់បំបិទមាត់របស់លោក ដូណាល់ ត្រាំ (Donald Trump) បន្ទាប់ពីគណៈវិនិច្ឆ័យនៅទីក្រុងញូវយ៉ក (New York) កាលពីថ្ងៃព្រហស្បតិ៍ (៣០ ឧសភា) បានរកឃើញថាលោក ត្រាំ មានទោសពីបទក្លែងបន្លំកំណត់ត្រាអាជីវកម្មដើម្បីបិទបាំងការបង់ប្រាក់ដល់តារាភាពយន្តអាសអាភាស ដែលធ្វើឱ្យលោកក្លាយជាអតីតប្រធានាធិបតីអាមេរិកដំបូងគេ ដែលត្រូវបានកាត់ទោសពីបទព្រហ្មទណ្ឌ។លោក ត្រាំ បាននិយាយថា «នេះជាភាពអាម៉ាស់ និងជាការកាត់ក្តីដោយចៅក្រមពុករលួយ ហើយយើងនឹងបន្តតស៊ូរហូតដល់ទីបញ្ចប់។ សាលក្រមពិតប្រាកដនឹងធ្វើឡើងនៅថ្ងៃទី០៥ ខែវិច្ឆិកា ដោយប្រជាជន ព្រោះពួកគេដឹងច្បាស់ពីអ្វីដែលបានកើតឡើងនៅទីនេះ»។យុទ្ធនាការរបស់លោកប្រធានាធិបតី ចូ បៃដិន (JOE BIDEN) និងអនុប្រធានាធិបតី លោកស្រី ខាម៉ាឡា ហារីស (KAMALA HARRIS) បានលើកឡើងថា «លោក ត្រាំ តែងយល់ច្រឡំថាខ្លួននឹងមិនប្រឈមមុខនឹងផលវិបាកចំពោះការបំពានច្បាប់ ប៉ុន្តែសាលក្រមថ្ងៃនេះបង្ហាញថាពុំមាននរណាម្នាក់នៅលើច្បាប់នោះទេ»។ ប្រធានសភា លោក ម៉ៃ ចនសុន (MIKE JOHNSON) បាននិយាយថា «ថ្ងៃនេះជាថ្ងៃដ៏អាម៉ាស់ក្នុងប្រវត្តិសាស្ត្រអាមេរិក។ សមាជិកបក្សប្រជាធិបតេយ្យ បានត្រេកអរនៅពេលពួកគេកាត់ទោសមេដឹកនាំបក្សប្រឆាំង លើការចោទប្រកាន់ដ៏គួរឱ្យអស់សំណើច»។បន្ថែមពីលើនេះ អ្នកនយោបាយអាមេរិកជាច្រើនរូបទៀតបានបញ្ចេញប្រតិកម្មរបស់ពួកគេនៅជុំវិញការកាត់ក្ដីនោះ ដោយសមាជិកបក្សសាធារណរដ្ឋនិយាយថា សាលក្រមនេះគឺជាភាពបរាជ័យដ៏អាក្រក់សម្រាប់ជនជាតិអាមេរិក ហើយនេះជាការជ្រៀតជ្រែកក្នុងការបោះឆ្នោត និងការបញ្ឈប់លោក ត្រាំ ពីការឈ្នះឆ្នោតឡើងវិញដ៏ត្រឹមត្រូវ។ចំណែកក្រុមបក្សប្រជាធិបតេយ្យ បានសម្តែងការពេញចិត្ត ដោយនិយាយថា យើងដឹងថា លោក ត្រាំ មានឆន្ទៈធ្វើគ្រប់យ៉ាងដើម្បីការពារផលប្រយោជន៍ផ្ទាល់ខ្លួន រួមទាំងការបំផ្លាញការបោះឆ្នោត។ គ្មាននរណានៅពីលើច្បាប់នោះទេ ហើយយើងរីករាយណាស់ដែលមើលឃើញថា យុត្តិធម៌ពិតជាមានប្រាកដមែន៕

របាយការណ៍៖សមយុទ្ធយោធា កំពុងកើនឡើងនៅអាស៊ី ប៉ុន្តែចិននៅតែបង្កើនការទប់ទល់អាមេរិក និងសម្ព័ន្ធមិត្ត

2024/05/31 09:29:22 am        112
Facebook Telegram Linkin
ការសិក្សាថ្មីមួយបានរកឃើញថា សហរដ្ឋអាមេរិក និងចិនបានបង្កើនទំហំសមយុទ្ធយោធានៅទូទាំងអាស៊ី ស្របពេលមានភាពតានតឹងក្នុងតំបន់កើនឡើងក្នុងប៉ុន្មានឆ្នាំថ្មីៗនេះ ទោះបីជាសមយុទ្ធរបស់ទីក្រុងប៉េកាំងនៅតែមានទំហំធំ និងភាពស្មុគស្មាញក៏ដោយ ។ នៅក្នុងការវាយតម្លៃនៃសមយុទ្ធយោធានៅក្នុងតំបន់អាស៊ីចន្លោះឆ្នាំ ២០០៣និង២០២២ វិទ្យាស្ថានអន្តរជាតិនៃការសិក្សាយុទ្ធសាស្ត្រដែលមានមូលដ្ឋាននៅទីក្រុងឡុងដ៍្រចក្រភពអង់គ្លេសបាននិយាយថា សមយុទ្ធកំពុងពង្រីកក្នុងអត្រាកើនឡើងដ៏ខ្ពស់ ដែលជំរុញដោយផ្នែក ដោយកិច្ចខិតខំប្រឹងប្រែងរបស់សហរដ្ឋអាមេរិក និងចិន ដើម្បីសាកល្បងសមត្ថភាព និងជំរុញការទូតជាយុទ្ធសាស្ត្រ។ ការសិក្សារបស់វិទ្យាស្ថាន IISS ខាងលើដែលបានចេញផ្សាយនៅថ្ងៃសុក្រទី៣១ខែឧសភា បានធ្វើតារាងលំហាត់សមយុទ្ធរបស់សហរដ្ឋអាមេរិកចំនួន១.១១៣ លើក ដែលចូលរួមជាមួយបណ្តាប្រទេសនៅអាស៊ី ធៀបនឹង សមយុទ្ធចំនួន ១៣០លើក របស់ប្រទេសចិន។ ការសិក្សានេះបានកត់សម្គាល់ថា សហរដ្ឋអាមេរិកនឹងព្យាយាមរក្សាការនាំមុខរបស់ខ្លួនតាមរយៈការធ្វើសមយុទ្ធយោធាជាច្រើនជាមួយបណ្តាប្រទេសក្នុងតំបន់ស្ទើរតែទាំងអស់។ចិននឹងព្យាយាមបង្រួមគម្លាតដោយធ្វើឱ្យទំនាក់ទំនងសមយុទ្ធរបស់ខ្លួនកាន់តែស៊ីជម្រៅជាមួយដៃគូក្នុងតំបន់មួយចំនួនតូច។ កាន់តែទូលំទូលាយថែមទៀត ការដាក់ពង្រាយយោធានៅទូទាំងតំបន់បានកើនឡើងជាច្រើនឆ្នាំ មកនេះ ខណៈមានភាពតានតឹងលើកោះតៃវ៉ាន់ ដែលចិនអះអាងថាជាកម្មសិទ្ធិខ្លួន និងជម្លោះដែនទឹកនៅក្នុងផ្លូវទឹកពាណិជ្ជកម្មដ៏សំខាន់នៃសមុទ្រចិនខាងកើត និងខាងត្បូង។ ចិន កូរ៉េខាងជើង និងរុស្ស៊ី សុទ្ធតែបានត្អូញត្អែរថា ការកើនឡើងនៃសមយុទ្ធរបស់សហរដ្ឋអាមេរិក ដោយមាន និងគ្មានសម្ព័ន្ធមិត្ត កំពុងជំរុញឱ្យមានភាពតានតឹងនៅក្នុងតំបន់ និងបង្កឱ្យមានការរត់ប្រណាំងគ្រឿងសព្វាវុធ៕

បណ្ដាញសង្គម

ព័ត៌មានថ្មីៗ

ប្រធានាធិបតីអ៊ីរ៉ង់ ធ្វើដំណើរទៅអាមេនី ដើម្បីពិភាក្សាអំពីច្រករបៀងគាំទ្រដោយសហរដ្ឋអាមេរិក
08/18/2025 07:08 PM
Facebook Telegram Linkin
រដ្ឋមន្រី្តក្រសួងសុខាភិបាល បានរំលឹក «ក្នុងស្មារតីស្នេហាជាតិ យើងទាំងអស់គ្នាត្រូវបន្តប្រឹងប្រែង និងសាមគ្គីគ្នា បំពេញការងារឱ្យកាន់តែខ្លាំងឡើងៗ»
08/18/2025 07:08 PM
Facebook Telegram Linkin
នគរបាលកូរ៉េខាងត្បូងបើកយុទ្ធនាការបង្រ្កាបទូទាំងប្រទេស រយៈពេល ១០០ថ្ងៃ លើការរំលោភបំពានពលករអន្តោប្រវេសន៍
08/18/2025 07:08 PM
Facebook Telegram Linkin
អ្នកពន្លត់អគ្គិភ័យ ២នាក់ ស្លាប់ ពេលជួយពន្លត់អណ្ដាតភ្លើងឆាបឆេះអគារ នៅតំបន់ទេសចរណ៍ Dotonbori របស់ជប៉ុន
08/18/2025 07:08 PM
Facebook Telegram Linkin
ទីក្រុង Budapest៖ លំហូរប្រេងរុស្ស៊ីទៅហុងគ្រី ត្រូវបានផ្អាក បន្ទាប់ពីមានការវាយប្រហាររបស់អ៊ុយក្រែន
08/18/2025 06:08 PM
Facebook Telegram Linkin
​​សម្ដេចតេជោ ហ៊ុន សែន ផ្ដល់ផ្ទះមួយខ្នង ដីមួយហិចតា ជូនឪពុកម្តាយទ័ពជួរមុខប្រចាំការនៅប្រាសាទតាក្របី
08/18/2025 06:08 PM
Facebook Telegram Linkin
អេហ្ស៊ីប និងអ៊ីរ៉ង់ ប្រឆាំងអ៊ីស្រាអែលចំពោះផែនការផ្លាស់ប្តូរទីលំនៅជនជាតិប៉ាឡេស្ទីន
08/18/2025 05:08 PM
Facebook Telegram Linkin
អូស្ត្រាលីលុបចោលទិដ្ឋាការរបស់អ្នកនយោបាយអ៊ីស្រាអែលស្តាំនិយមជ្រុល
08/18/2025 05:08 PM
Facebook Telegram Linkin
កងកម្លាំងការពារអ៊ីស្រាអែល៖ កញ្ចប់ជំនួយជាង ១៦០កញ្ចប់ពីប្រទេសចំនួន ៦ ត្រូវបានទម្លាក់តាមអាកាស ចូលទៅហ្កាហ្សា
08/18/2025 05:08 PM
Facebook Telegram Linkin
ប្រមុខសន្តិសុខជាតិបេឡារុស៖ លោកខាងលិច មិនចាប់អារម្មណ៍ក្នុងការបញ្ចប់អរិភាព នៅអ៊ុយក្រែនទេ
08/18/2025 05:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.