នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
រាជរដ្ឋាភិបាលកំពុងអនុវត្តយុទ្ធសាស្ត្រប្រែក្លាយផ្លូវជនបទពីដីល្បាយក្រួស​ ទៅជាផ្លូវកៅស៊ូ និងបេតុង
ប្រព័ន្ធធារាសាស្ត្រ២ ទីតាំងនៅខេត្តពោធិ៍សាត់ ផ្គត់ផ្គង់ទឹក​ជូនបង​ប្អូន​អតីត​យុទ្ធជ​ន​រាប់​រយ​គ្រួសារ​សម្រាប់​ប្រើប្រាស់ និងបង្កបង្កើនផល
ស្ពានមិត្តភាពកម្ពុជា-ចិន មេគង្គក្រចេះ នឹងបើកជូនពលរដ្ឋឆ្លងកាត់ចាប់ពីថ្ងៃទី១មេសា ឆ្នាំ​២០២៦​តទៅ
សម្តេចតេជោ ហ៊ុន សែន ដឹកនាំកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា ដើម្បី​សម្រេច​លើ​របៀប​វារៈចំនួន៧

នយោបាយ​ និង ការអភិវឌ្ឍន៍

អាល្លឺម៉ង់ ប្រាប់រុស្ស៊ី ថាសម្ព័ន្ធយោធាណាតូ នឹងការពារគ្រប់ម៉ែត្រក្រឡានៃទឹកដីរបស់ខ្លួន

2024/06/03 02:19:07 pm        162
Facebook Telegram Linkin
អធិការបតីអាល្លឺម៉ង់ លោក អូឡា សូស (Olaf Scholz) បាននិយាយកាលពីថ្ងៃអាទិត្យ (០២ មិថុនា) ថា ចំណាត់ការនាពេលថ្មីៗនេះរបស់អង្គការណាតូ (NATO) ក្នុងការពង្រឹងព្រំដែនភាគខាងកើតរបស់ខ្លួន គឺសំដៅរារាំងប្រទេសរុស្ស៊ី ហើយណាតូ នឹងការពារគ្រប់ម៉ែត្រក្រឡានៃទឹកដីសមាជិកខ្លួន ដោយបន្ថែមថានេះគួរតែច្បាស់ចំពោះទីក្រុងមូស្គូ ហើយថា សម្ព័ន្ធយោធានឹងត្រៀមដើម្បីការពារខ្លួនប្រសិនបើចាំបាច់។ថ្លែងនៅក្នុងវេទិកាសេដ្ឋកិច្ចអាល្លឺម៉ង់ខាងកើត លោក សូស បាននិយាយថា ប្រទេសអាល្លឺម៉ង់ បានដើរតួនាទីនាំមុខនៅក្នុងវត្តមានរបស់អង្គការណាតូ នៅក្នុងតំបន់បាល់ទិក នៅតាមព្រំដែនរបស់រុស្ស៊ី ដែលលាតសន្ធឹងជិតមួយទសវត្សរ៍។លោកបាននិយាយថា ការទូតនឹងទទួលបានជោគជ័យតែក្នុងទីតាំងដ៏រឹងមាំប៉ុណ្ណោះ ដោយបន្ថែមថា វាពិតជាមានសារៈសំខាន់ណាស់ដែលរដ្ឋបាល់ទិក អាចពឹងផ្អែកទាំងស្រុងលើសម្ព័ន្ធមិត្តណាតូ ដែលបង្កើនការការពាររបស់ពួកគេនៅក្នុងព្រឹត្តិការណ៍នៃការវាយប្រហាររបស់រុស្ស៊ី។ ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) នៅដើមសប្តាហ៍នេះ បានព្រមានសមាជិកណាតូ ប្រឆាំងនឹងការអនុញ្ញាតឱ្យអ៊ុយក្រែន បាញ់អាវុធចូលទៅក្នុងប្រទេសរុស្ស៊ី បន្ទាប់ពីសម្ព័ន្ធមិត្តលោកខាងលិចមួយចំនួនបានលុបចោលការរឹតបន្តឹងលើការប្រើប្រាស់អាវុធដែលបានផ្ដល់ឱ្យទីក្រុងគីវ។ប្រធានអង្គការណាតូ លោក ជេនស៍ ស្តុលថិនប៊ឺក (Jens Stoltenberg) កាលពីថ្ងៃសុក្រសប្ដាហ៍មុន បានច្រានចោលការព្រមាននេះ ដោយនិយាយថា សម្ព័ន្ធយោធាបានដឹងលឺការព្រមាននោះជាច្រើនដងពីមុន ហើយការការពារខ្លួនគឺមិនមែនជាបង្កើនភាពតានតឹងនៃសង្រ្គាមនោះទេ៕

ប្រទេសម៉ាល់ឌីវ នឹងធ្វើវិសោធនកម្មច្បាប់ ហាមជនជាតិអ៊ីស្រាអែល មិនឲ្យចូលមកប្រទេសនេះ

2024/06/03 02:13:01 pm        96
Facebook Telegram Linkin
ប្រព័ន្ធផ្សព្វផ្សាយក្នុងស្រុក បានដកស្រង់សម្តីរដ្ឋមន្ត្រីក្រសួងសន្តិសុខ និងបច្ចេកវិទ្យា លោក អាលី អ៊ីហ៊ូសាន Ali Ihusan ដែលបាននិយាយថា រដ្ឋាភិបាលប្រទេសម៉ាល់ឌីវ បានសម្រេចធ្វើវិសោធនកម្មច្បាប់របស់ខ្លួន ដើម្បីដាក់បម្រាមលើជនជាតិអ៊ីស្រាអែល មិនឱ្យចូលមកក្នុងប្រទេស។នៅក្នុងសន្និសីទសារព័ត៌មាន កាលពីថ្ងៃអាទិត្យ លោក Ihusan បាននិយាយថា ការសម្រេចនេះ ត្រូវបានធ្វើឡើងនៅក្នុងកិច្ចប្រជុំគណៈរដ្ឋមន្ត្រី បន្ទាប់ពីការអំពាវនាវរបស់ប្រជាជនក្នុងតំបន់ ឱ្យដាក់បម្រាមលើជនជាតិអ៊ីស្រាអែល ដោយសារតែការវាយប្រហារដ៏មហន្តរាយ នៅតំបន់ហ្កាហ្សា។លោកនិយាយថា រដ្ឋាភិបាលនឹងធ្វើវិសោធនកម្មច្បាប់ ដើម្បីអនុវត្តបម្រាម ហើយគណៈកម្មាធិការពិសេសមួយ ត្រូវបានចាត់តាំងដើម្បីពន្លឿនដំណើរការនេះ។ ប្រព័ន្ធផ្សព្វផ្សាយក្នុងស្រុក បានរាយការណ៍ថា ប្រទេសម៉ាល់ឌីវ ទទួលបានភ្ញៀវទេសចរជាង១ លាននាក់ក្នុងមួយឆ្នាំ ដែលក្នុងចំណោមអ្នកទេសចរទាំងនេះ ប្រមាណ ១៥.០០០នាក់ មកពីប្រទេសអ៊ីស្រាអែល។

សម្ដេចតេជោ ហ៊ុន សែន អញ្ជើញដង្ហែព្រះមហាក្សត្រយាងថ្វាយព្រះភ្លើងព្រះបរមសព សម្ដេចព្រះមហាសង្ឃរាជ ទេព វង្ស

2024/06/03 12:12:06 pm        190
Facebook Telegram Linkin
ភ្នំពេញ៖ នៅព្រឹកថ្ងៃទី៣ ខែមិថុនា ឆ្នាំ២០២៤នេះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានក្រុមឧត្ដមប្រឹក្សាផ្ទាល់ព្រះមហាក្សត្រ អញ្ជើញដង្ហែ ព្រះករុណា ព្រះបាទសម្តេចព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា យាងថ្វាយព្រះភ្លើង ព្រះបរមសព សម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស សម្ដេចព្រះមហាសង្ឃរាជ នៃព្រះរាជាណាចក្រកម្ពុជា នៅ ព្រះមេរុ មុខវត្តបទុមវតីរាជរោម រាជធានីភ្នំពេញ។ នៅក្នុងព្រះរាជពិធីថ្វាយព្រះភ្លើង ព្រះបរមសព ក្រោមព្រះរាជាធិបតីដ៏ខ្ពង់ខ្ពស់បំផុតរបស់ ព្រះករុណា ព្រះបាទសម្តេចព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា ត្រូវបានយាង និមន្ត និងអញ្ជើញចូលរួមដោយ ម្រមុខដឹកនាំកំពូលៗ ឥស្សរជនឆ្នើមជាច្រើនរួមមាន សម្តេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រីសម្តេចព្រះមហាសង្ឃរាជ និងជាសម្តេចព្រះប្រធានគណៈសង្ឃនាយក គណៈធម្មយុត្តិកនិកាយ នៃព្រះរាជាណាចក្រកម្ពុជា, សម្តេចព្រះពោធិវ័ង្ស កិត្តិបណ្ឌិត អំ លឹមហេង សម្តេចព្រះសង្ឃនាយកស្ដីទី គណៈមហានិកាយ នៃព្រះរាជាណាចក្រកម្ពុជា, ព្រះរាជាគណៈ ព្រះមន្ត្រីសង្ឃតាមព្រះឋានាក្រម ព្រះថេរានុត្ថេរៈ, សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា, សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី, សម្តេច ឯកឧត្តម ដែលជា ឧត្តមប្រឹក្សាផ្ទាល់ព្រះមហាក្សត្រ, ព្រះអង្គម្ចាស់ ព្រះអង្គម្ចាស់ក្សត្រី, ឯកអគ្គរាជទូត ឯកអគ្គរដ្ឋទូត ប្រចាំព្រះរាជាណាចក្រកម្ពុជា, ភ្ញៀវកិត្តិយសជាតិ-អន្តរជាតិ មន្ត្រីរាជការ កងកម្លាំងប្រដាប់អាវុធគ្រប់ជាន់ថ្នាក់ លោកតាជី ដូនជី ព្រមទាំងប្រជាពលរដ្ឋ សិស្សានុសិស្សយ៉ាងច្រើនកុះករ។ សូមរំឭកថា សម្ដេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស សម្ដេចព្រះមហាសង្ឃរាជ នៃព្រះរាជាណាចក្រកម្ពុជា និងជាសម្ដេចព្រះចៅអធិការវត្តឧណ្ណាលោម រាជធានីភ្នំពេញ បានយាងចូលព្រះទិវង្គត់ នៅថ្ងៃចន្ទ ២ រោច ខែមាឃ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី២៦ ខែកុម្ភៈ ឆ្នាំ២០២៤ វេលាម៉ោង ០៥:៤០នាទីល្ងាច ក្នុងព្រះជន្ម ៩៣ព្រះវស្សា ដោយព្រះរោគាពាធ នៅក្នុងវត្តឧណ្ណាលោម សង្កាត់ជ័យជំនះ ខណ្ឌដូនពេញ រាជធានីភ្នំពេញ។យោងតាមសារាចរណែនាំលេខ ០៣ សរណន ចុះថ្ងៃទី២១ ខែឧសភា ឆ្នាំ២០២៤ របស់រាជរដ្ឋាភិបាលកម្ពុជាស្តីពីការចូលរួមកាន់ទុក្ខព្រះបរមសពសម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេច ព្រះមហាសង្ឃរាជនៃព្រះរាជាណាចក្រកម្ពុជា រាជរដ្ឋាភិបាលកម្ពុជា បានប្រកាសយកថ្ងៃទី០៣ ខែមិថុនា ឆ្នាំ២០២៤ ជាថ្ងៃកាន់ទុក្ខផ្លូវការ លើកទី២។នៅថ្ងៃទី០៣ ខែមិថុនា ឆ្នាំ២០២៤នេះ រដ្ឋបាលរាជធានីភ្នំពេញ បានធ្វើការណែនាំអោយ គ្រប់រដ្ឋបាលខណ្ឌ-សង្កាត់ មន្ទីរ-អង្គភាពជំនាញជុំវិញរដ្ឋបាលរាជធានីភ្នំពេញ រោងចក្រ សហគ្រាស ក្រុមហ៊ុន គ្រឹះស្ថានសិក្សា វត្តអារាម មន្ត្រីរាជការ កងកម្លាំង និងប្រជាពលរដ្ឋរស់នៅក្នុងរាជធានីភ្នំពេញទាំងអស់ ត្រូវបង្ហូតទង់ជាតិ ទង់សាសនា និងទង់ព្រះមហាក្សត្រ មួយភាគបីនៃដងពីលើចុះមកក្រោម ដើម្បីចូលរួម កាន់ទុក្ខ លើកទី២ រយៈពេល ០១ថ្ងៃ ដើម្បីចូលរួមរំលែកទុក្ខដ៏ក្រៀមក្រំបំផុត និងរៀបចំព្រះរាជពិធីបុណ្យ ថ្វាយព្រះបរមសព សម្ដេចព្រះមហាសង្ឃរាជ ឱ្យស្របតាមប្រពៃណីជាតិ ស័ក្តិសមនឹងព្រះកិត្តិយស និងព្រះគុណូបការៈ ដ៏ធំធេងបំផុតរបស់សម្តេច ដែលបានបូជាថ្វាយចំពោះ ជាតិ សាសនា ព្រះមហាក្សត្រ៕

លោក ម៉ក់ ហឺន ចាត់ទុកក្រុមប្រឆាំងគម្រោង«ព្រែកជីកហ្វូណនតេជោ» ជាជនវង្វេងជាតិ និងវង្វេងស្មារតី

2024/06/03 12:05:43 pm        179
Facebook Telegram Linkin
លោក ម៉ក់ ហឺន ពលរដ្ឋដើមកំណើតខ្មែររស់នៅអាមេរិក និងជាអ្នក​និយាយ​អំពី​នយោបាយ​នៅ​ក្រៅ​ប្រ​ទេស បានចាត់ទុកថា ក្រុមប្រឆាំងនឹងគម្រោង«ព្រែកជីកហ្វូណនតេជោ» គឺជាជន​វង្វេង​ជាតិ និងវង្វងស្មារតី ហើយទង្វើរបស់ពួកអគតិទាំងនោះ គឺធ្វើ​ឡើង​ផ្ទុយ​ទាំង​ស្រុង​ទៅ​នឹង​ផល​ប្រយោជន៍​ជា​យុទ្ធសាស្រ្តរបស់ជាតិ និងបេះដូងដ៏ពុះកញ្រ្ជោលរបស់ប្រជាជនខ្មែរគ្រប់រូប ខណៈ​គម្រោង​ជាប្រវត្តិសាស្រ្តមួយនេះត្រូវបានមហាជនខ្មែរប្រកាសគាំទ្រយ៉ាងភ្លូកទឹកភ្លូកដីនោះ។នៅក្នុងកិច្ចសម្ភាស៍ជាមួយទូរទស្សន៍ប៊ីធីវី ក្រោយចូលរួមអាហារសាមគ្គី ដែលរៀបចំ​ឡើង​ដោយ​ក្រុម​សេនា​សន្តិភាព នាល្ងាចថ្ងៃទី២ ខែមិថុនា ឆ្នាំ ២០២៤នេះ លោកម៉ក់ ហឺន បានសង្កត់ធ្ងន់ថា ការ​ប្រតិកម្មម្ដងហើយម្ដងទៀតរបស់ក្រុមក្បត់ជាតិបីជំនាន់ សម រង្ស៊ី និងបក្ស​ពួក​ពាក់ព័ន្ធ​នឹង​គម្រោង​ព្រែក​ជីកហ្វូណនតេជោ គឺផ្ទុយទាំងស្រុង​ទៅ​នឹង​ផល​ប្រយោជន៍​ជា​យុទ្ធសាស្ត្រ​របស់​ជាតិ​ និង​បេះដូង​ដ៏ពុះ​កញ្ជ្រោល​របស់​ប្រជាជនខ្មែរ​ទូទាំង​ប្រទេស និង​ប្រជាជន​ខ្មែរ​ដ៏​ច្រើន​លើស​លប់​ដែល​កំពុង​រស់នៅឯនាយសមុទ្រ ដែលប្រាថ្នាចង់ឃើញ​ព្រែកជីក​នេះ​លេច​ចេញ​ជា​រូប​រាង​ឆាប់ៗ​នៅ​លើ​ទឹកដីខ្មែរ ដោយពួកគេចាត់ទុកថា គម្រោងនេះនឹងផ្តល់ផលប្រយោជន៍ជូនជាតិ និង​ប្រជាជន​បានយ៉ាងច្រើនលើសលុបនាពេលអនាគត។នៅក្នុងកិច្ចសម្ភាសន៍ជាមួយទូរទស្សន៍ប៊ីធីវីនោះដែរ លោក ម៉ក់ ហឺន បានចំអកឲ្យជនក្បត់ជាតិបី ជំនាន់ និងបក្សពួកថា ការប្រកាសប្រឆាំងនឹងគម្រោងព្រែកជីកហ្វូណនតេជោនេះ គឺជា​មនុស្ស​ច្រណែន ឈ្នានីស សរុបសេចក្តីមក ការលើកឡើង​ម្តង​ហើយ​ម្តង​ទៀត​របស់​ក្រុម​អគតិ​ទាំង​នោះ​ពាក់ព័ន្ធ​នឹង​គម្រោងព្រែកជីកហ្វូណនតេជោ ដូចគ្នានឹងការ​លើក​ឡើង​ដដែលៗ​របស់​វៀតណាម​ដែរ ដែលហាក់ដូចជាមានចេតនារារាំងការអភិវឌ្ឍរបស់ប្រទេសកម្ពុជា ដែល​ជា​ការ​រំលោភ​លើ​ឯករាជ្យ​ភាព​ក្នុងការធ្វើសេចក្តីសម្រេចចិត្តផ្ទៃក្នុងរបស់រដ្ឋអធិបតេយ្យមួយ។ យ៉ាងណា​ក៏​ដោយ​ក្នុង​នាម​ប្រជាពលរដ្ឋខ្មែរម្នាក់ លោក ម៉ក់ ហឺន បានប្រកាស​គាំទ្រ​យ៉ាង​ពេញ​ទំហឹង​នូវ​គម្រោង​ព្រែក​ជីក​ហ្វូណន​តេជោ​នេះដោយលោកចាត់ទុកថា គម្រោងនេះ ជា​គម្រោង​ប្រវត្តិសាស្រ្ត​មួយ​នឹង​ផ្តល់​ប្រយោជន៍​រាប់​ពាន់ឆ្នាំទៅមុខទៀតសម្រាប់ប្រជាជាតិខ្មែរទាំងមូល៕ អត្ថបទ៖ បាន ចក់

លោក ម៉ក់ ហឺន៖ គោលនយោបាយរាជរដ្ឋាភិបាលផ្តល់​ជំនាញវិជ្ជាជីវៈ​ដោយដាក់គោលដៅ សម្រាប់ពលរដ្ឋខ្មែរ១លាន៥សែននាក់ គឺជាទិសដៅដ៏ល្អបំផុតសម្រាប់ជាតិ

2024/06/03 11:28:35 am        122
Facebook Telegram Linkin
លោក ម៉ក់ ហឺន ពលរដ្ឋដើមកំណើតខ្មែររស់នៅអាមេរិក និងជាអ្នក​និយាយ​អំពី​នយោបាយ​នៅ​ក្រៅ​ប្រទេស បានលើកឡើងថា រាជរដ្ឋាភិបាលកម្ពុជា​បាន​ដាក់​កម្ម​វិធី​នយោបាយ​បណ្តុះ​បណ្តាល​ជំនាញ​វិជ្ជាជីវៈ និងបច្ចេកទេសដល់ យុវជនមកពីគ្រួសារក្រីក្រ និងងាយរងហានិភ័យ ដែល​មាន​គោលដៅ​បណ្តុះបណ្តាលចំនួន១លាន៥សែននាក់នោះ គឺជាទិសដៅដ៏ល្អបំផុតសម្រាប់ជាតិ ខណៈ​កម្មវិធីនេះនៅអាមេរិកក៏មានដែរ ប៉ុន្តែគេមិនបានផ្តល់ប្រាក់ខែជូនសិក្ខា កាមដែល​កំពុង​ធ្វើ​ការ​បណ្តុះបណ្តាលដូចខ្មែរនោះឡើយ។នៅក្នុងកិច្ចសម្ភាសន៍ជាមួយទូរទស្សន៍ប៊ីធីវី នាល្ងាចថ្ងៃទី២ ខែមិថុនា ឆ្នាំ២០២៤នេះ នៅ​ក្នុង​ពិធី​អាហារ សាមគ្គីមួយ ដែលរៀបចំឡើងក្រុម«សេនាសន្តិភាព» លោក ម៉ក់ ហឺន បានលើកឡើងថា រាជរដ្ឋាភិបាលបានខិតខំ ពុះពារយ៉ាងខ្លាំងដើម្បីលើកកម្ពស់ សុខុមាលភាព និងជីវភាពពលរដ្ឋខ្មែរ ដោយ​បានបង្កើតកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស​ដល់​យុវជន​មក​ពី​គ្រួសារ​ក្រីក្រ និងងាយរងហានិភ័យនេះជានយបាយមួយដ៏ល្អបំផុតសម្រាប់ប្រជាជនរបស់ខ្លួន ដូច្នេះ​ពលរដ្ឋ​ខ្មែរ​ជាពិសេសយុវជនខ្មែរគប្បីខិតខំរៀនសូត្រនូវជំនាញទាំងនេះដើម្បី សេដ្ឋកិច្ច​គ្រួសារ​របស់​​ខ្លួន កុំគិតតែដើរហើរ និងបង្ហោះម៉ូតូឥតប្រយោជន៍នោះ។សូមបញ្ជាក់ថា រាជរដ្ឋាភិបាលបានកំណត់មុខជំនាញចំនួន៣៨ក្នុងការបណ្តុះបណ្តាលវិជ្ជាជីវៈ ដោយ​ផ្តោតលើវិស័យអាទិភាពចំនួន១០ ដែលរួមមានសំណង់ អគ្គិសនី និងថាមពល អេឡិច​ត្រូនិក​ បរិក្ខារត្រជាក់និងកម្ដៅ កម្មន្តសាល មេកានិកទូទៅ មេកានិករថយន្ត ទេសចរណ៍ សេវាកម្ម កសិកម្ម និងកសិ-ឧស្សាហកម្ម ធុរកិច្ចនិងព័ត៌មានវិទ្យា។ កម្មវិធី​បណ្តុះ​បណ្តាល​នេះ​មាន​ការ​រៀប​ចំ​​ជា​​វេន​យប់ និងវេនចុងសប្តាហ៍ បន្ថែមពីវេនធម្មតាផងដែរ ដើម្បីបង្ក​លក្ខណៈ​ងាយ​ស្រួលដ​ល់​យុវជន​ក្នុង​ការ​ចូល​រៀនជំនាញទាំងនោះ ខណៈការសិក្សាជំនាញ​នីមួយ​ៗ​អាច​មាន​រយៈ​ពេល​៤​ខែ​។យុវជនដែលមានអាយុចាប់ពី១៥ឆ្នាំឡើងទៅ អាចចុះឈ្មោះចូលរៀនជំនាញវិជ្ជាជីវៈ និង​បច្ចេកទេស​ដោយឥតគិតថ្លៃ ដោយអាចចុះឈ្មោះបានតាមរយៈកម្មវិធីទូរសព្ទដៃ ដែលមានឈ្មោះ «TVET ឬទៅចុះឈ្មោះដោយផ្ទាល់នៅតាមវិទ្យាស្ថានអប់រំបណ្តុះបណ្តាលវិជ្ជាជីវៈ មន្ទីរការងារ មជ្ឈមណ្ឌលការងាររាជធានីខេត្តចំនួន១៤ មជ្ឈមណ្ឌលការងារចល័តចំនួន៥ និងដៃគូ​សង្គម​ផ្សេង​ទៀត ដែលមានបំណងស្ម័គ្រចិត្តចូលរួមក្នុងការជួយចុះឈ្មោះ៕ អត្ថបទ៖ បាន ចក់

សន្និបាតសុខភាពពិភពលោក WHA នៅស្វីស បញ្ចប់ដោយការអនុម័តសេចក្តីសម្រេចមួយចំនួន

2024/06/03 11:06:50 am        49
Facebook Telegram Linkin
មហាសន្និបាតសុខភាពពិភពលោកលើកទី៧៧ (WHA) បានបិទបញ្ចប់កាលពីថ្ងៃសៅរ៍ (០១ ឧសភា) នៅទីក្រុងហ្សឺណែវ ប្រទេសស្វីស ជាមួយនឹងការអនុម័តនូវសេចក្ដីសម្រេចដ៏ទូលំទូលាយជាច្រើន។ ព្រឹត្តិការណ៍រយៈពេលប្រាំមួយថ្ងៃនេះ បានយល់ព្រមលើកញ្ចប់វិសោធនកម្មនៃបទប្បញ្ញត្តិសុខភាពអន្តរជាតិ ២០០៥ (IHR) ដោយមានគោលបំណងបង្កើនសមត្ថភាពឆ្លើយតបជាសកលទាក់ទងនឹងការការពារ ការត្រួតពិនិត្យ និងការគ្រប់គ្រងភាពអាសន្នផ្នែកសុខភាព រួមទាំងជំងឺរាតត្បាត។អគ្គនាយកអង្គការសុខភាពពិភពលោក (WHO) លោក តេដ្រូស អាដហាណូម ហ្កេប្រេយ៉េស៊ូស (Tedros Adhanom Ghebreyesus) បាននិយាយថា វិសោធនកម្មនេះនឹងជំរុញសមត្ថភាពរបស់ប្រទេសនានាក្នុងការរកឃើញ និងឆ្លើយតបទៅនឹងការផ្ទុះឡើង និងជំងឺរាតត្បាតនាពេលអនាគត ដោយការពង្រឹងសមត្ថភាពរៀងៗខ្លួន និងការសម្របសម្រួលរវាងរដ្ឋជាសមាជិក លើការឃ្លាំមើលជំងឺ ការចែករំលែកព័ត៌មាន និងការឆ្លើយតប។សភាក៏បានអនុម័តគោលការណ៍ និងសេចក្តីសម្រេចលើបញ្ហាផ្សេងៗជាច្រើនទៀត រួមទាំងភាពធន់នឹងថ្នាំសម្លាប់មេរោគ បម្រែបម្រួលអាកាសធាតុ និងសុខភាព ការបង្ការ និងត្រួតពិនិត្យការឆ្លង ព្រមទាំងសុខភាពមាតា ទារកទើបនឹងកើត រួមទាំងកុមារផងដែរ។ កម្មវិធីទូទៅនៃការងារលើកទី១៤ របស់អង្គការសុខភាពពិភពលោក WHO ក៏ត្រូវបានអនុម័តនៅក្នុងព្រឹត្តិការណ៍នេះផងដែរ ដែលនឹងណែនាំការងាររបស់ WHO ក្នុងការគាំទ្រដល់រដ្ឋជាសមាជិក និងដៃគូ ដែលលាតសន្ធឹងពីឆ្នាំ២០២៥ និង២០២៨៕

ប្រមុខការពារជាតិចិន៖ រដ្ឋាភិបាលក្រុងប៉េកាំងត្រៀមខ្លួនជាស្រេច ដើម្បីបញ្ឈប់ចលនាទាមទារឯករាជ្យភាពតៃវ៉ាន់ដោយកម្លាំង

2024/06/03 10:56:42 am        193
Facebook Telegram Linkin
រដ្ឋមន្ត្រីការពារជាតិចិន លោក តុង ជុន (Dong Jun) បានព្រមានកាលពីថ្ងៃអាទិត្យទី២មិថុនា ថា យោធារបស់លោកត្រៀមខ្លួនជាស្រេច ដើម្បីបញ្ឈប់សកម្មភាពទាមទារឯករាជ្យភាពរបស់កោះតៃវ៉ាន់ ប៉ុន្តែបានអំពាវនាវឱ្យមានការផ្លាស់ប្តូរកាន់តែច្រើនជាមួយសហរដ្ឋអាមេរិក។ ការអត្ថាធិប្បាយរបស់លោកនៅក្នុងវេទិកាសន្តិសុខប្រចាំឆ្នាំនៅប្រទេសសិង្ហបុរីបានធ្វើឡើងបន្ទាប់ពីកិច្ចពិភាក្សាទល់មុខគ្នាដ៏សំខាន់ជាលើកដំបូងក្នុងរយៈពេល ១៨ ខែរវាងប្រមុខការពារជាតិនៃប្រទេសទាំងពីរ។លោក តុង បានប្រាប់កិច្ចសន្ទនា សាំងគ្រី ឡា (Shangri-La)ជាទីដែលរូបលោកបានជួបជាមួយរដ្ឋមន្ត្រីការពារជាតិអាមេរិក លោក ឡយ អូស្ទីន (Lloyd Austin) កាលពីថ្ងៃសុក្រសប្ដាហ៍មុនថា យើងតែងតែបើកចំហចំពោះការផ្លាស់ប្តូរ និងកិច្ចសហប្រតិបត្តិការ ប៉ុន្តែប្រការនេះ តម្រូវឱ្យភាគីទាំងពីរឯកភាពគ្នា។ យើងជឿថាយើងត្រូវការការផ្លាស់ប្តូរបន្ថែមទៀតយ៉ាងជាក់លាក់ ព្រោះមានការខ្វែងគំនិតគ្នាជាច្រើនរវាងយោធាទាំងពីររបស់យើង។លោកតុង និង លោកអូស្ទីន បានជួបគ្នាជាងមួយម៉ោងនៅសណ្ឋាគារប្រណិតដែលរៀបចំវេទិកានេះ ដែលត្រូវបានចូលរួមដោយមន្ត្រីការពារជាតិមកពីជុំវិញពិភពលោក ហើយក្នុងប៉ុន្មានឆ្នាំថ្មីៗនេះត្រូវបានគេមើលឃើញថាជាវេទិកានៃទំនាក់ទំនងអាមេរិក-ចិន។ កិច្ចសន្ទនា សាំងគ្រីឡា ឆ្នាំនេះកើតឡើងមួយសប្តាហ៍បន្ទាប់ពីប្រទេសចិនបានធ្វើសមយុទ្ធយោធានៅជុំវិញកោះតៃវ៉ាន់ និងបានព្រមានពី សង្គ្រាមលើកោះដែលគាំទ្រដោយសហរដ្ឋអាមេរិក បន្ទាប់ពីការចូលកាន់តំណែងរបស់មេដឹកនាំថ្មី លោក ឡៃ ឆឹង-ទ័រ (Lai Ching-te) ដែលទីក្រុងប៉េកាំងបានហៅថាជា ជនផ្ដាច់ខ្លួនដ៏គ្រោះថ្នាក់៕

លោក Trump៖ ប្រជាជនអាមេរិក អាចឈានដល់ «ចំណុចលែងទទួលយកបាន» ប្រសិនបើលោកជាប់ពន្ធនាគារ

2024/06/03 10:53:50 am        72
Facebook Telegram Linkin
លោក Donald Trump បាននិយាយថា លោកនឹងទទួលយកការឃុំខ្លួនក្នុងលំនៅឋាន ឬពន្ធនាគារបន្ទាប់ពីការកាត់ទោសជាប្រវត្តិសាស្ត្រដោយគណៈវិនិច្ឆ័យទីក្រុងញូវយ៉កកាលពីសប្តាហ៍មុន ប៉ុន្តែវានឹងពិបាកសម្រាប់សាធារណជន ក្នុងការទទួលយក។ លោក មិនប្រាកដថា សាធារណៈជននឹងគាំទ្រវានោះទេ។ បេក្ខជនប្រធានាធិបតីគណបក្សសាធារណរដ្ឋរូបនេះ បានប្រាប់សារព័ត៌មាន Fox News នៅក្នុងបទសម្ភាសន៍មួយ ដែលបានចាក់ផ្សាយកាលពីថ្ងៃអាទិត្យ ថា លោកគិតថាវានឹងពិបាកសម្រាប់សាធារណជនក្នុងការទទួលយក។ នៅចំណុចជាក់លាក់មួយ នឹងមានចំណុចលែងទទួលយកបាន។ លោក Trump នឹងត្រូវបានកាត់ទោសនៅថ្ងៃទី ១១ ខែកក្កដា ដែលមានរយៈពេលបួនថ្ងៃមុនពេលសាមាជិកគណបក្សសាធារណរដ្ឋ ជួបប្រជុំគ្នាដើម្បីជ្រើសរើសបេក្ខជនប្រធានាធិបតីរបស់ពួកគេជាផ្លូវការ ដើម្បីប្រឈមមុខជាមួយប្រធានាធិបតីគណបក្សប្រជាធិបតេយ្យ លោក Joe Biden ក្នុងការបោះឆ្នោត នៅខែវិច្ឆិកា។ លោក Trump បានប្រើការកាត់ទោសរបស់លោកដើម្បីបង្កើនកិច្ចខិតខំប្រឹងប្រែងរៃអង្គាសប្រាក់ ប៉ុន្តែពុំបានស្វែងរកការប្រមូលផ្តុំអ្នកគាំទ្ររបស់លោកនោះទេ ដែលផ្ទុយទៅនឹងការលើកឡើង ដែលប្រឆាំងទៅនឹងការបរាជ័យកាលពីឆ្នាំ២០២០ ជាមួយលោក Biden ដោយមានការវាយប្រហារពីសំណាក់អ្នកគាំទ្ររបស់លោក នៅថ្ងៃទី៦ ខែមករា ឆ្នាំ២០២១ ទៅលើវិមាន Capitol សហរដ្ឋអាមេរិក។ លោក Trump បានប្តេជ្ញាប្តឹងឧទ្ធរណ៍ចំពោះការជម្រះក្តីរបស់លោក ធ្វើឡើងដោយគណៈវិនិច្ឆ័យទីក្រុងញូវយ៉ក ដែលបានរកឃើញថាលោកមានទោសពីបទព្រហ្មទណ្ឌចំនួន៣៤ករណី ជុំវិញការក្លែងបន្លំឯកសារដើម្បីបិទបាំងការបង់ប្រាក់បំបិទមាត់តារាភាពយន្តអាសអាភាសម្នាក់ នៅមុនការបោះឆ្នោតឆ្នាំ ២០១៦។ បញ្ហានេះ ទំនងជាពុំត្រូវបានដោះស្រាយនៅមុនការបោះឆ្នោតប្រធានាធិបតី នៅខែវិច្ឆិកា នៅពេលដែលលោកនឹងស្វែងរកការដណ្តើមយកសេតវិមានមកវិញ ពីលោក Bidenនោះទេ។ ការបោះឆ្នោតស្ទង់មតិ បង្ហាញការប្រជែងយ៉ាងស្វិតស្វាញ រវាងបេក្ខជនទាំងពីរ ហើយបង្ហាញថា ការកាត់ទោសរបស់លោកអាចធ្វើឱ្យធ្វើឲ្យមានផលប៉ះពាល់ ជាមួយអ្នកបោះឆ្នោតគណបក្សសាធារណរដ្ឋ និងអ្នកបោះឆ្នោតឯករាជ្យ មួយចំនួន។ លោក Trump បានបដិសេធថា ពុំបានប្រព្រឹត្តខុស ក្នុងគ្រប់ករណីទាំងអស់ ហើយបានចាត់ទុក បទចោទប្រកាន់ទាំងនេះថា ជាការឃុបឃិតខាងគណបក្សប្រជាធិបតេយ្យ ដើម្បីរារាំងលោក មិនឲ្យប្រកួតប្រជែង។

ការស្ទង់មតិព្យាករណ៍ថា លោកនាយករដ្ឋមន្ត្រីឥណ្ឌា ម៉ូឌី (Modi) អាចឈ្នះអាណត្តិទីបី

2024/06/03 10:49:26 am        142
Facebook Telegram Linkin
លោក នាយករដ្ឋមន្ត្រីឥណ្ឌា Narendra Modi ទំនងជាឈ្នះអាណត្តិទី ៣ ជាប់ៗគ្នាក្នុងតំណែង នេះបើយោងតាមការស្ទង់មតិ។ ក្រុមអ្នកវិភាគព្រមានថា ការស្ទង់មតិស្ដីពីការបោះឆ្នោតចេញផ្សាយដោយទីភ្នាក់ងារព័ត៌មានផ្សេងៗតែងតែខុសកាលពីអតីតកាល ហើយមិនលម្អៀង។ ទោះជាយ៉ាងណាក៏ដោយ ការស្ទង់មតិទាំងនោះបានដាក់គណបក្ស Bharatiya Janata Party (BJP) របស់លោក Modi នាំមុខនៅក្នុងការបោះឆ្នោតសកលនេះ។ គណបក្ស BJP គណបក្សប្រឆាំងដ៏សំខាន់ និងគូប្រជែងក្នុងតំបន់បានប្រណាំងប្រជែងគ្នានៅក្នុងយុទ្ធនាការដ៏ក្ដៅគគុកលើការបោះឆ្នោតចំនួនប្រាំពីរដំណាក់កាល។លទ្ធផលឆ្នោត នឹងប្រកាសនៅថ្ងៃទី ៤ ខែមិថុនាសប្ដាហ៍នេះ។គណបក្ស ឬក្រុមចម្រុះ មួយ ត្រូវការអាសនៈចំនួន ២៧២ ក្នុងសភា ដើម្បីបង្កើតរដ្ឋាភិបាល។យោងតាមការស្ទង់មតិ ដែលព្យាករណ៍ថា ខ្លួននឹងទទួលបានអាសនៈប្រហែលពីរភាគបី សម្ព័ន្ធដឹកនាំដោយគណបក្ស BJP ដែលជាសម្ព័ន្ធប្រជាធិបតេយ្យជាតិ (NDA) នឹងឆ្លងផុតគោលដៅនេះ ។ នៅក្នុងការអត្ថាធិប្បាយដំបូងរបស់លោកបន្ទាប់ពីការបោះឆ្នោតបានបញ្ចប់ លោក Modi បានអះអាងពីជ័យជម្នះដោយមិនសំដៅទៅលើការស្ទង់មតិនោះទេ។ លោកបានសរសេរនៅលើបណ្ដាញសង្គម X ដោយមិនផ្តល់ភស្តុតាងនៃការអះអាងរបស់លោកថា ខ្ញុំអាចនិយាយដោយទំនុកចិត្តថាប្រជាជនឥណ្ឌាបានបោះឆ្នោតក្នុងចំនួនខ្ពស់បំផុត ដើម្បីជ្រើសរើសរដ្ឋាភិបាល NDA ជាថ្មីទៀត៕

លោក Zelenskiy ជួបប្រធានាធិបតីហ្វីលីពីន ដោយថ្លែងអំណរគុណសម្រាប់ការគាំទ្រ

2024/06/03 10:40:06 am        54
Facebook Telegram Linkin
ប្រធានាធិបតីអ៊ុយក្រែន លោក វ្ល៉ូឌីមី ហ្ស៊េឡិនស្គី (Volodymyr Zelenskiy) បានជួបជាមួយប្រធានាធិបតីហ្វីលីពីន លោក ហ្វឺឌីណាន ម៉ាកូស ជូនៀ (Ferdinand Marcos Jr) ក្នុងទីក្រុងម៉ានីលនៅថ្ងៃចន្ទ (០៣ មិថុនា) នេះ ហើយបានថ្លែងអំណរគុណចំពោះការគាំទ្រ និង «ជំហរច្បាស់លាស់» របស់ហ្វីលីពីន លើការលុកលុយរបស់រុស្ស៊ី លើទឹកដីរបស់អ៊ុយក្រែន។មេដឹកនាំទាំងពីរបានជួបគ្នានៅវិមានប្រធានាធិបតីហ្វីលីពីន បន្ទាប់ពីលោក ហ្ស៊េឡិនស្គី បានបង្ហាញខ្លួនដោយមិនបានគ្រោងទុកនៅក្នុងសន្និសីទសន្តិសុខដ៏ធំបំផុតរបស់អាស៊ី ក្នុងប្រទេសសិង្ហបុរី កាលពីចុងសប្តាហ៍ ដែលជាដំណើរទស្សនកិច្ចលើកទីពីររបស់លោកមកកាន់អាស៊ី ចាប់តាំងពីសង្រ្គាមរបស់រុស្ស៊ី លើអ៊ុយក្រែន ក្នុងឆ្នាំ២០២២ មក។លោក ហ្ស៊េឡិនស្គី ដែលបានបំពេញទស្សនកិច្ចលើកដំបូងរបស់ខ្លួនទៅកាន់ប្រទេសហ្វីលីពីន ចាប់តាំងពីការបោះឆ្នោតរបស់លោកក្នុងឆ្នាំ២០១៩ បាននិយាយថា «យើងសូមអរគុណសម្រាប់ការអញ្ជើញនេះហើយពួកយើងពិតជាអរគុណខ្លាំងណាស់ដែលបានស្ថិតនៅក្នុងប្រទេសដែលគាំទ្របូរណភាពទឹកដី និងអធិបតេយ្យភាពរបស់អ៊ុយក្រែន»។ លោក ហ្ស៊េឡិនស្គី បានបន្ថែមថា អ៊ុយក្រែនក៏នឹងបើកស្ថានទូតមួយនៅទីក្រុងម៉ានីល ផងដែរនៅឆ្នាំនេះ។លោក ម៉ាកូស នៅក្នុងវេទិកាសន្ទនា សាំងគ្រី-ឡា (Shangri-La) បានប្រាប់លោក ហ្ស៊េឡិនស្គី ថាហ្វីលីពីន មានកិត្តិយសណាស់ដែលមេដឹកនាំអ៊ុយក្រែន បានធ្វើទស្សនកិច្ចនៅទីក្រុងម៉ានីល។ លោក ម៉ាកូស បាននិយាយថា «វាពិតជារីករាយណាស់ក្នុងការជួបពិភាក្សាគ្នាអំពីបញ្ហាដូចគ្នាសម្រាប់ប្រទេសទាំងពីរ ហើយសង្ឃឹមថាភាគីទាំងពីរអាចស្វែងរកមធ្យោបាយសម្រាប់ដោះស្រាយបញ្ហាប្រឈមនានាបាន»៕

បណ្ដាញសង្គម

ព័ត៌មានថ្មីៗ

កម្លាំងសមត្ថកិច្ចចម្រុះខណ្ឌចំការមនដកហួតវត្ថុតាងមួយចំនួនធំ នៅអគារយៀកថៃ ពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា
11/15/2025 10:11 AM
Facebook Telegram Linkin
ប្រទេសមហាអំណាចរបស់NATO នៅអឺរ៉ុបចំនួន៥ ប្ដេជ្ញាដោះស្រាយ«ការគំរាមកំហែងកូនកាត់»
11/15/2025 09:11 AM
Facebook Telegram Linkin
លោកTrump កាត់ការដំឡើងពន្ធលើសាច់គោ កាហ្វេ និងអាហារផ្សេងទៀត ខណៈព្រួយបារម្ភពីអតិផរណាកើនឡើង
11/15/2025 09:11 AM
Facebook Telegram Linkin
​​សម្តេចធិបតីជួបគ្នាតាមទូរស័ព្ទជាថ្មីជាមួយឯកឧត្តម ដូណាល់ ត្រាំដើម្បីពិភាក្សាអំពីការវិវត្តសភាពការណ៍តាមបណ្តោយព្រំដែនកម្ពុជា-ថៃ
11/15/2025 07:11 AM
Facebook Telegram Linkin
សម្ដេចកិត្ដិព្រឹទ្ធបណ្ឌិត ជួបសំណេះសំណាលតាមទូរស័ព្ទ និងចាត់តំណាងយកថវិកា សម្ភារៈ ជូនពលរដ្ឋរងគ្រោះដោយទាហានថៃបាញ់ប្រហារ នៅមន្ទីរពេទ្យកាល់ម៉ែត
11/14/2025 09:11 PM
Facebook Telegram Linkin
អំណោយ សម្ដេចតេជោ និងសម្ដេចធិបតី នាំយកជូន ប្រជាពលរដ្ឋភៀសសឹក ជិត ៥០០ គ្រួសារ
11/14/2025 09:11 PM
Facebook Telegram Linkin
ក្រុមអ្នកជំនាញវេជ្ជសាស្រ្ត៖ អាហ្វ្រិកប្រឈមនឹងការរីករាលដាលឆ្លងជំងឺអាសន្នរោគដ៏អាក្រក់បំផុតក្នុងរយៈពេល ២៥ឆ្នាំ
11/14/2025 09:11 PM
Facebook Telegram Linkin
ក្មេងស្រីហ្កាហ្សាចែករំលែករឿងរ៉ាវដែលនាងត្រូវបានរកឃើញនៅរស់ក្នុងសាលតម្កល់សពក្រោយការវាយប្រហាររបស់អ៊ីស្រាអែល
11/14/2025 09:11 PM
Facebook Telegram Linkin
កងកម្លាំងអ៊ុយក្រែនប្រឈមនឹងសង្រ្គាមដ៏យ៉ាប់យ៉ឺនជាមួយរុស្ស៊ីនៅតំបន់ Zaporizhia និង Donetsk
11/14/2025 09:11 PM
Facebook Telegram Linkin
​ក្រសួងការពារជាតិ បង្ហាញវត្តមានក្រុម AOT ក្នុងអំឡុងពេលធ្វើកោសល្យវិច័យសពជនស៊ីវិលកម្ពុជា ដែលរងគ្រោះបាត់បង់ជីវិតដោយការបាញ់ប្រហារនៅព្រំដែន កម្ពុជា-ថៃ
11/14/2025 08:11 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.