នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
BREAKING NEWS|កម្ពុជាចាត់ទុកផែនការថៃចង់ដណ្តើមប្រាសាទតាក្របី និងបិទប្រាសាទតាមាន់ធំគឺជាការប៉ុនប៉ងឈ្លានពានកម្ពុជាគិតទុកជាមុន និងមិនគោរពបទឈប់បាញ់
សម្ដេចតេជោ៖សង្គ្រាមព្រំដែនកម្ពុជា-ថៃបានផ្ទេរពីសង្គ្រាមប្រើប្រាស់អាវុធមកជាសង្រ្គាម ប្រើប្រាស់ជំពាមកៅស៊ូ ខណៈបើពិនិត្យឲ្យសុីជម្រៅវាជារឿងធំ ប្រសិនបើមិនទប់ស្កាត់
ឯកឧត្តម ចាន់ ដារ៉ុង ដឹកនាំគណៈកម្មការ​អន្តរ​ក្រសួង​ចុះ​ពិនិត្យ​វាយ​តម្លៃ​បញ្ចប់​សុពល​ភាព​ការងារ​ថែ​ទាំ​ផ្លូវ​ខួបចំនួន ៣កំណាត់ ក្នុងខេត្តពោធិ៍សាត់
BREAKING NEWS! សម្តេចធិបតី អបអរសាទរចំពោះការប្រព្រឹត្តទៅដោយជោគជ័យ​នូវ​កិច្ច​ប្រជុំ​​វិសាមញ្ញ នៃ​គណៈកម្មាធិកា​រ​ព្រំដែន​ទូទៅកម្ពុជា-ថៃ

នយោបាយ​ និង ការអភិវឌ្ឍន៍

លោកស្រី Galvez សង្ឃឹមក្លាយជាប្រធានាធិបតីម៉ិកស៊ិក បញ្ចប់យុទ្ធនាការមុនការបោះឆ្នោតនៅថ្ងៃអាទិត្យ

2024/05/30 11:47:00 am        118
Facebook Telegram Linkin
បេក្ខជនប្រធានាធិបតីរបស់ប្រទេសម៉ិកស៊ិក សម្រាប់ក្រុមចម្រុះគណបក្សប្រឆាំងទាំងស្តាំនិងឆ្វេងនិយម លោកស្រី សូជីល ហ្គាលវ៉េស(Xochitl Galvez) បានបញ្ចប់យុទ្ធនាការរបស់លោកស្រី ជាផ្លូវការ កាលពីថ្ងៃពុធ ដោយប្តេជ្ញាប្រយុទ្ធប្រឆាំង ភាពអសន្តិសុខ នៅក្នុងប្រទេស។លោកស្រី Galvez បានបិទយុទ្ធនាការរបស់លោកស្រី នៅក្នុងទីក្រុង Monterrey ជាទីក្រុងមួយនៅក្នុងដែនដីបេះដូងនៃឧស្សាហកម្មភាគនៅខាងជើងប្រទេសម៉ិកស៊ិក ជាច្រើនថ្ងៃបន្ទាប់ពីលោកស្រី បានដឹកនាំការប្រមូលផ្តុំដ៏ធំ នៅក្នុងរដ្ឋធានី។អតីតសមាជិកព្រឹទ្ធសភា និងអ្នកជំនួញស្រ្តីវ័យ៦១ឆ្នាំរូបនេះ បានសន្យាថានឹងធ្វើឲ្យប្រសើរ និងពង្រីកកម្មវិធីសង្គម ព្រមទាំងការប្រយុទ្ធប្រឆាំងអំពើពុករលួយ និងអំពើហឹង្សារាលដាល ដោយបោសសម្អាតឧក្រិដ្ឋកម្មរៀបចំទុក នៅក្នុងប្រទេសមានមនុស្សឃាតច្រើនដែលបានឈានដល់កំណត់ត្រាខ្ពស់ ១៨៥.០០០ករណី នៅក្នុងអាណត្តិរបស់ប្រធានាធិបតី លោក Andres Manuel Lopez Obrador ។បេក្ខជនណាក៏ដោយ ដែលទទួលជ័យជម្នះ នឹងប្រឈមមុខទៅនឹងបញ្ហាជាច្រើន រួមមានទាំងនិទណ្ឌភាពដែលគ្រប់គ្រងមិនបាន ក្នុងពេលមានអត្រាឃាតកម្មខ្ពស់ និងការចាប់ជំរិត កំណើនសេដ្ឋកិច្ចទាប និងសំណួរជុំវិញគោលនយោបាយថាមពល នៅពេលអនាគត។

របាយការណ៍៖ មនុស្សជាង ៧៤ លាននាក់ ប្រឈមអសន្តិសុខស្បៀងនៅតំបន់ញកអាហ្រ្វិក

2024/05/30 11:43:25 am        75
Facebook Telegram Linkin
យោងតាមរបាយការណ៍ចេញផ្សាយកាលពីថ្ងៃពុធ (២៩ ឧសភា) ដោយអង្គការស្បៀងអាហារ និងកសិកម្មនៃអង្គការសហប្រជាជាតិ (FAO) និងអាជ្ញាធរអន្តររដ្ឋាភិបាលស្តីពីការអភិវឌ្ឍន៍ (IGAD) ដែលជាប្លុកនៅអាហ្វ្រិកខាងកើត បានឱ្យដឹងថា ប្រជាជនប្រហែល ៧៤,៩ លាននាក់នៅក្នុងតំបន់ញកអាហ្រ្វិកដ៏ធំល្វឹងល្វើយ កំពុងប្រឈមនឹងបញ្ហាអសន្តិសុខស្បៀងយ៉ាងខ្លាំង និងត្រូវការជំនួយមនុស្សធម៌ជាបន្ទាន់។ស្ថាប័នទាំងពីរនេះបាននិយាយថា ក្នុងចំណោមតួលេខនោះ មានមនុស្សចំនួន ៤៦,៨ លាននាក់មកពីប្រទេសចំនួនប្រាំពីរក្នុងចំណោមរដ្ឋសមាជិកនៃប្លុកអាជ្ញាធរអន្តររដ្ឋាភិបាល IGAD ដូចជា ជីប៊ូទី កេនយ៉ា សូម៉ាលី ស៊ូដង់ខាងត្បូង តង់ហ្សានី សូដង់ និងអ៊ូហ្កង់ដា។ ដែលនៅសល់គឺនៅប្រទេសប៊ូរុនឌី សាធារណរដ្ឋអាហ្វ្រិកកណ្តាល (CAR) និងសាធារណរដ្ឋប្រជាធិបតេយ្យកុងហ្គោ (DRC)។របាយការណ៍នេះបានសង្កេតឃើញថា ស្ថានភាពអាហារូបត្ថម្ភនៅទូទាំងតំបន់នៅតែគួរឱ្យព្រួយបារម្ភ ដែលភាគច្រើនបណ្តាលមកពីជម្លោះ ការផ្លាស់ទីលំនៅ អសន្តិសុខស្បៀង ជំងឺឆ្លង ទឹកមិនស្អាត និងលក្ខខណ្ឌអនាម័យមិនសមស្រប។របាយការណ៍នោះបានបន្ថែមថា ក្រៅពីវិបត្តិស្បៀងអាហារ តំបន់ញកអាហ្រ្វិកនេះក៏កំពុងប្រឈមមុខនឹងការផ្ទុះឡើងជំងឺជាច្រើនផងដែរ ដោយសារលក្ខខណ្ឌសើមជាងធម្មតា ដែលត្រូវបានសង្កេតឃើញលើផ្នែកភាគច្រើននៃតំបន់ ដោយបង្កើនហានិភ័យនៃជំងឺដែលឆ្លងតាមរយៈទឹក ដោយសារតែគ្រោះទឹកជំនន់៕

ប្រធានាធិបតី អ៊ុយក្រែន ធ្វើទស្សនកិច្ចទៅកាន់រដ្ឋសមាជិកអឺរ៉ុបចំនួនបី សម្រាប់កិច្ចព្រមព្រៀងសន្តិសុខ

2024/05/30 11:40:33 am        115
Facebook Telegram Linkin
ប្រទេសស៊ុយអែត បានប្រកាសផ្តល់ជំនួយយោធាបន្ថែមទៀតសម្រាប់ប្រទេសអ៊ុយក្រែន ខណៈប្រធានាធិបតី អ៊ុយក្រែន លោក Volodymyr Zelenskyy បានធ្វើដំណើរទៅកាន់ប្រទេសសមាជិកសហភាពអឺរ៉ុបចំនួនបី ដើម្បីបង្កើនការគាំទ្រសម្រាប់ការប្រយុទ្ធប្រឆាំងរុស្ស៊ី។ ប្រទេសស៊ុយអែត កាលពីថ្ងៃពុធ បានប្រកាសកញ្ចប់ថវិកាចំនួន ១,១៦ពាន់លានអឺរ៉ូ ឬប្រហែល ១,២៥ ពាន់លានដុល្លារ ដើម្បីជួយបង្កើនសមត្ថភាពការពារដែនអាកាសរបស់អ៊ុយក្រែន។ ចំនួនទឹកប្រាក់នេះ គឺជាការរួមចំណែកច្រើនបំផុត មិនធ្លាប់មានរបស់ប្រទេសស៊ុយអែត ដល់ប្រទេសអ៊ុយក្រែន។លោក Zelenskyy បានបញ្ជាក់ថា កញ្ចប់ជំនួយ ដែលរួមមានយន្តហោះឈ្លបយកការណ៍របស់កងទ័ពអាកាស និងយន្តយោះត្រួតពិនិត្យ នឹងមិនត្រឹមតែជួយសង្គ្រោះអាយុជីវិតរបស់អ៊ុយក្រែនប៉ុណ្ណោះទេ ប៉ុន្តែថែមទាំងជួយធានាបានសន្តិភាពនិងសន្តិសុខរយៈពេលវែង នៅទ្វីបអឺរ៉ុបផងដែរ។លោក Zelenskyy បានស្ថិតនៅក្នុងប្រទេសព័រទុយហ្គាល់ បន្ទាប់ពីដំណើរទស្សនកិច្ចទៅកាន់ប្រទេសអេស្ប៉ាញ និងបែលហ្ស៊ិក។ លោកបានបញ្ជាក់ពីភាពជោគជ័យនៃដំណើរទស្សនកិច្ចរបស់លោក ក្នុងអំឡុងពេលដែលលោក បានចុះហត្ថលេខាលើកិច្ចព្រមព្រៀងសន្តិសុខទ្វេភាគី។អ៊ុយក្រែន បាននឹងកំពុងបង្កើនកិច្ចខិតខំប្រឹងប្រែងផ្នែកការទូត នៅមុនកិច្ចប្រជុំកំពូលក្រុមប្រទេសG7នៅប្រទេសអ៊ីតាលី នៅពាក់កណ្តាលខែមិថុនា និងសន្និសីទអន្តរជាតិដើម្បីសន្តិភាពនៅអ៊ុយក្រែនដែលស្នើឡើងដោយលោក Zelenskyy ដែលគ្រោងនឹងធ្វើនៅប្រទេសស្វីស។ទន្ទឹមនឹងនេះ រុស្ស៊ីបានចាប់ផ្តើមសមយុទ្ធកាលពីសប្តាហ៍មុន ដោយក្លែងប្រដូចការពិតដោយប្រើប្រាស់អាវុធនុយក្លេអ៊ែរតាកទិក។ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានព្រមានថា អ្នកតំណាងប្រទេសសមាជិកសម្ព័ន្ធយោធាណាតូ ជាពិសេសប្រទេសតូចៗនៅអឺរ៉ុប គួរតែដឹងពីអ្វីដែលពួកគេកំពុងលេងជាមួយ។

ការរាប់សន្លឹកឆ្នោតចាប់ផ្តើមនៅអាហ្រ្វិកខាងត្បូង ខណៈអ្នកបោះឆ្នោតស្វែងរកការផ្លាស់ប្តូរមេដឹកនាំ

2024/05/30 11:35:27 am        65
Facebook Telegram Linkin
ការិយាល័យបោះឆ្នោត បានបិទនៅទូទាំងប្រទេសអាហ្រ្វិកខាងត្បូង កាលពីថ្ងៃពុធ បន្ទាប់ពីរយៈពេលមួយថ្ងៃនៃការតម្រង់ជួរដ៏វែង ខណៈអ្នកបោះឆ្នោតសម្រាប់ការបោះឆ្នោតដ៏សំខាន់ អាចមើលឃើញគណបក្ស African National Congress (ANC) ចាញ់សំឡេងភាគច្រើន បន្ទាប់ពីកាន់អំណាចរយៈពេល៣០ឆ្នាំ។អ្នកបោះឆ្នោតចុងក្រោយ បានបោះឆ្នោតដែលនឹងកំណត់ផ្លូវសម្រាប់សេដ្ឋកិច្ចដែលមានឧស្សាហកម្មរីកលូតលាស់បំផុតនៅទ្វីបអាហ្រ្វិក បន្ទាប់ពីរយៈពេលមួយទសវត្សរ៍ នៃភាពមិនរីកចម្រើន និងរឿងអាស្រូវពុករលួយ ដែលបានធ្វើឱ្យខូចកេរ្តិ៍ឈ្មោះរបស់គណបក្ស African National Congress (ANC) ដែលកាលពីពេលមុនដឹកនាំ ដោយលោក Nelson Mandela។ ប្រសិនបើគណបក្ស African National Congress (ANC) បរាជ័យក្នុងការទទួលបានសំឡេងភាគច្រើននៅក្នុងការបោះឆ្នោតជាតិ វាទំនងជាត្រូវការបង្កើតរដ្ឋាភិបាលចម្រុះ។គណបក្ស African National Congress (ANC) បានប្រឈមមុខទៅនឹងការខឹងសម្បារ ចំពោះសេវាសាធារណៈដែលមិនល្អប្រសើរ ការដាច់ចរន្តអគ្គិសនី អំពើពុករលួយដ៏ច្រើនលើសលប់ និងអត្រាគ្មានការងារធ្វើលើសពី៣០ភាគរយ ដែលបានធ្វើឱ្យមនុស្សរាប់លាននាក់ជាប់ក្នុងភាពក្រីក្រ រយៈពេលជិតបីទសវត្សរ៍។ អ្នកបោះឆ្នោត បានអំពាវនាវឱ្យមានការផ្លាស់ប្តូរ ដោយលើកឡើងពីអត្រាខ្ពស់នៃភាពអត់ការងារធ្វើ និងឧក្រិដ្ឋកម្ម ការដាច់ចរន្តអគ្គិសនីញឹកញាប់ និងអំពើពុករលួយ ជាហេតុផលដែលពួកគេនឹងបោះឆ្នោតឱ្យគណបក្សប្រឆាំង។ខណៈអ្នកផ្សេងទៀត មិនទុកចិត្តចំពោះការផ្លាស់ប្តូរ ពួកគេនៅតែជឿជាក់ថាគណបក្ស African National Congress (ANC) ដែលកំពុងកាន់អំណាច នៅតែអាចបំពេញតាមការសន្យារបស់ខ្លួន។

អ៊ីស្រាអែលនិយាយថា សង្គ្រាមនៅតំបន់ហ្កាហ្សា ទំនងជានឹងបន្តរយៈពេលប្រាំពីរខែទៀត

2024/05/30 11:26:31 am        103
Facebook Telegram Linkin
ទីប្រឹក្សាសន្តិសុខជាតិរបស់អ៊ីស្រាអែល និយាយថា សង្រ្គាមលើតំបន់ហ្កាហ្សា ទំនងជានឹងបន្តរហូតដល់ចុងឆ្នាំនេះ។ នៅក្នុងបទសម្ភាសន៍ជាមួយទូរទស្សន៍រដ្ឋ ខាន់ (Kan) របស់អ៊ីស្រាអែល កាលពីថ្ងៃពុធ (២៩ ឧសភា) លោក ហ្ស៊ាឈី ហាណេកប៊ី (Tzachi Hanegbi) បាននិយាយថា «យើងរំពឹងថានឹងមានការប្រយុទ្ធរយៈពេលប្រាំពីរខែទៀត» ដើម្បីបំផ្លាញសមត្ថភាពយោធា និងការគ្រប់គ្រងរបស់ក្រុមហាម៉ាស និងក្រុមជីហាតអ៊ីស្លាមប៉ាឡេស្ទីន (PIJ) ។ការលើកឡើងរបស់លោកបានកើតឡើងនៅពេលដែលអ៊ីស្រាអែល រកឃើញថាខ្លួនឯងកាន់តែឯកោនៅលើឆាកពិភពលោក ជិតប្រាំបីខែក្នុងការវាយប្រហារ ដោយសូម្បីតែសហរដ្ឋអាមេរិក និងសម្ព័ន្ធមិត្តជិតស្និទ្ធផ្សេងទៀត ក៏បានសម្តែងការខឹងសម្បារចំពោះចំនួនអ្នកស្លាប់របស់ជនស៊ីវិលដ៏ច្រើនលើសលប់នៅហ្កាហ្សា។លោក ហាណេកប៊ី ការពារប្រតិបត្តិការដែលកំពុងបន្តរបស់អ៊ីស្រាអែលនៅក្រុងរ៉ាហ្វា (Rafah) ជាប់ព្រំដែនហ្កាហ្សា ជាមួយអេហ្ស៊ីប ដោយនិយាយថា ព្រំដែនបានក្លាយទៅជា «តំបន់រត់ពន្ធ» តាំងពីឆ្នាំ២០០៧ មក នៅពេលដែលក្រុមហាម៉ាស ចាប់ផ្តើមគ្រប់គ្រងហ្កាហ្សា។ អេហ្ស៊ីប បានសម្តែងការព្រួយបារម្ភយ៉ាងខ្លាំងអំពីការវាយលុកលើក្រុងរ៉ាហ្វា របស់អ៊ីស្រាអែល ដោយនិយាយថាវាគំរាមកំហែងដល់សន្ធិសញ្ញាសន្តិភាពឆ្នាំ១៩៧៩។ការលើកឡើងរបស់លោក ហាណេកប៊ី បង្កជាសំណួរអំពីអនាគតហ្កាហ្សា និងថាតើអ៊ីស្រាអែលនឹងដើរតួនាទីបែបណានៅក្នុងតំបន់នោះ។ សម្ព័ន្ធមិត្តកំពូលរបស់ខ្លួន គឺសហរដ្ឋអាមេរិក បានទាមទារឱ្យលោកនាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ (Benjamin Netanyahu) បង្កើតផែនការក្រោយសង្គ្រាមសម្រាប់ទឹកដីប៉ាឡេស្ទីនមួយនេះ ហើយរដ្ឋមន្ត្រីការពារជាតិ និងដៃគូគ្រប់គ្រងរបស់លោកក៏បានព្រមានថា លោក ណេតាន់យ៉ាហ៊ូ ត្រូវតែចាត់វិធានការដើម្បីធានាថាអ៊ីស្រាអែល មិនស្ថិតនៅក្នុងតំបន់ហ្កាហ្សា ដោយគ្មានកំណត់៕

អ៊ីរ៉ង់ ស្វះស្វែងរកអ្នកប្រកាន់ជំហរតឹងដែលគួរឱ្យទុកចិត្តដើម្បីជំនួសតំណែងលោក Raisi ក្នុងការបោះឆ្នោត

2024/05/30 11:21:10 am        170
Facebook Telegram Linkin
ប្រទេសអ៊ីរ៉ង់ បានចាប់ផ្តើមនៅសប្តាហ៍នេះក្នុងការបោះឆ្នោតដើម្បីរកអ្នកជំនួសតំណែងលោកប្រធានាធិបតី អ៊ីប្រាហ៊ីម រ៉េស៊ី (Ebrahim Raisi) ដែលការស្លាប់របស់លោកនៅក្នុងការធ្លាក់ឧទ្ធម្ភាគចក្រ អាចធ្វើអោយស្មុគស្មាញដល់កិច្ចខិតខំប្រឹងប្រែងរបស់អាជ្ញាធរដើម្បីគ្រប់គ្រងភារកិច្ចដែលមានផលវិបាកកាន់តែធំ នោះគឺការស្នងតំណែងរបស់មេដឹកនាំកំពូល។ដោយធ្លាប់ត្រូវបានគេមើលឃើញថាជាអ្នកស្នងតំណែងរបស់មេដឹកនាំកំពូល លោក អាយ៉ាតូឡា អាលី ខាមីណេ (Ayatollah Ali Khamenei) ដែលជាអ្នកសម្រេចចិត្តចុងក្រោយដ៏ចំណាស់របស់អ៊ីរ៉ង់ ការស្លាប់ភ្លាមៗរបស់លោក រ៉េស៊ី បានបង្កឱ្យមានការប្រកួតប្រជែងក្នុងចំណោមក្រុមអ្នកប្រកាន់ជំហរតឹង ដើម្បីមានឥទ្ធិពលលើការជ្រើសរើសមេដឹកនាំបន្ទាប់របស់អ៊ីរ៉ង់។លោក ខាមីណេ វ័យ ៨៥ ឆ្នាំ កំពុងស្វះស្វែងរកប្រធានាធិបតីថ្មីដ៏ស្មោះត្រង់ម្នាក់នៅក្នុងការបោះឆ្នោតថ្ងៃទី ២៨ ខែមិថុនា ខាងមុខនេះ ដើម្បីគ្រប់គ្រងប្រទេស ហើយម្នាក់នោះត្រូវតែជាសម្ព័ន្ធមិត្តអាចទុកចិត្តបាន ដែលអាចធានាបាននូវស្ថិរភាព ស្របពេលមានភាពតានតឹងលើការបន្តស្នងតំណែងរបស់ខ្លួន នេះបើតាមអ្នកផ្ទៃក្នុង និងក្រុមអ្នកវិភាគ។ការចុះឈ្មោះបេក្ខជននឹងបើកនៅថ្ងៃព្រហស្បតិ៍ (៣០ ឧសភា) នេះ ហើយនោះគ្រាន់តែជាការចាប់ផ្តើមប៉ុណ្ណោះនៃដំណើរការ ដែលនឹងមើលឃើញបេក្ខជននាំមុខត្រូវបានត្រួតពិនិត្យដោយក្រុមប្រឹក្សាអាណាព្យាបាល ដែលជាស្ថាប័នឃ្លាំមើលដ៏តឹងរ៉ឹង ដែលមិនផ្តល់សិទ្ធិឱ្យបេក្ខជនដោយមិនផ្សព្វផ្សាយហេតុផលជាសាធារណៈ។ ក្រុមអ្នកផ្ទៃក្នុង និងអ្នកវិភាគបាននិយាយថា ដើម្បីធានាថាអ្នកឈ្នះគឺជាអ្នកប្រកាន់ជំហរតឹងដែលស្មោះត្រង់នឹងលោក ខាមីណេ ការបោះឆ្នោតនាពេលខាងមុខនេះទំនងជានឹងត្រូវបានគ្របដណ្ដប់ដោយក្រុមប្រកាន់ជំហរតឹងដែលមានទស្សនវិស័យស្រដៀងនឹងមេដឹកនាំកំពូលរូបនេះ៕

អាមេរិកប្រាប់UN ថា អ៊ីស្រាអែល បំផ្លាញគោលដៅ ដោយបង្កគ្រោះថ្នាក់ដល់ជនស៊ីវិលនៅហ្កាហ្សា

2024/05/30 10:04:55 am        108
Facebook Telegram Linkin
សហរដ្ឋអាមេរិក បាននិយាយទៅកាន់ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃពុធថា អ៊ីស្រាអែល ត្រូវតែធ្វើអ្វីបន្ថែមទៀត ដើម្បីការពារជនស៊ីវិលប៉ាឡេស្ទីន នៅតំបន់ហ្កាហ្សា ហើយគួរតែ ដកចេញនូវរបាំងទាំងអស់ចំពោះលំហូរជំនួយតាមរយៈច្រកឆ្លងកាត់ និងផ្លូវទាំងអស់ ដែលចូលទៅក្នុងតំបន់ហ៊ុមពព័ទ្ធមួយនេះ។ ឯកអគ្គរដ្ឋទូតរងសហរដ្ឋអាមេរិក ប្រចាំអង្គការសហប្រជាជាតិ លោក Robert Wood បាននិយាយទៅកាន់ក្រុមប្រឹក្សាដែលមានសមាជិក១៥ រូប ថា គំរូដែលនៅបន្តនៃការបង្កគ្រោះថ្នាក់ដល់ជនស៊ីវិល បណ្តាលមកពីឧបទ្ទវហេតុ ដូចជាការវាយប្រហារតាមអាកាស កាលពីថ្ងៃអាទិត្យកន្លងទៅនេះ បានបំផ្លាញដល់គោលដៅយុទ្ធសាស្ត្រ របស់អ៊ីស្រាអែល នៅតំបន់ហ្កាហ្សា។ការវាយប្រហារតាមអាកាសកាលពីថ្ងៃអាទិត្យទី២៦ ខែឧសភា បានបង្កឱ្យមានអគ្គិភ័យ នៅក្នុងជំរំតង់មួយកន្លែងក្នុងទីក្រុង Rafah ភាគខាងត្បូងតំបន់ហ្កាហ្សា ដោយបានសម្លាប់មនុស្សយ៉ាងហោចណាស់ ៤៥នាក់។ អ៊ីស្រាអែល ដែលជាសម្ព័ន្ធមិត្តរបស់សហរដ្ឋអាមេរិក បាននិយាយថា ខ្លួនបានកំណត់គោលដៅលើក្រុមសកម្មប្រយុទ្ធហាម៉ាស ហើយពុំមានបំណងបង្កគ្រោះថ្នាក់ដល់ជនស៊ីវិលឡើយ។ ប្រទេសអាល់ហ្សេរី កាលពីថ្ងៃអង្គារ បានដាក់ពង្រាងសេចក្តីសម្រេច របស់ក្រុមប្រឹក្សាសន្តិសុខអង្គការសហប្រជាជាតិ ដែលបង្គាប់ឱ្យអ៊ីស្រាអែល «បញ្ឈប់ការវាយលុកដោយយោធារបស់ខ្លួនជាបន្ទាន់» នៅទីក្រុងRafah។ កាលពីថ្ងៃពុធ លោក Wood បាននិយាយទៅកាន់អ្នកសារព័ត៌មានថា ទីក្រុងវ៉ាស៊ីនតោនកំពុងពិនិត្យមើលសេចក្តីសម្រេចនេះឡើងវិញ ប៉ុន្តែចំណាត់ការរបស់អង្គការសហប្រជាជាតិ មិនទំនងជាមានប្រយោជន៍ ឬផ្លាស់ប្តូរស្ថានភាព នៅលើដែនដី នោះបានទេ។សេចក្តីព្រាងឯកសារនេះ ក៏បានលើកឡើងពីការចេញសេចក្តីសម្រេចរបស់តុលាការយុត្តិធម៌អន្តរជាតិ(ICJ) កាលពីថ្ងៃទី២៤ ខែឧសភា ដែលបានបង្គាប់ឱ្យអ៊ីស្រាអែល បញ្ឈប់ជាបន្ទាន់នូវការវាយលុកដោយយោធារបស់ខ្លួនលើទីក្រុង Rafah ជាការចេញសេចក្តីសម្រេចបន្ទាន់ដ៏សំខាន់ នៅក្នុងសំណុំរឿងនាំមកដោយប្រទេសអាហ្វ្រិកខាងត្បូង ដែលចោទប្រកាន់អ៊ីស្រាអែល ពីបទប្រល័យពូជសាសន៍។ អង្គការសហប្រជាជាតិបាននិយាយថា ការទទួលបានជំនួយមនុស្សធម៌ចូលទៅកាន់តំបន់ហ្កាហ្សា ត្រូវបានកំណត់យ៉ាងតឹងតែង ចាប់តាំងពីអ៊ីស្រាអែល ចាប់ផ្តើមការវាយលុកដោយយោធារបស់ខ្លួនចូលទៅក្នុងទីក្រុង Rafah កាលពីបីសប្តាហ៍មុន ដោយគ្រោះទុរ្ភិក្ស កំពុងខិតជិតមកដល់ នៅក្នុងតំបន់ហ៊ុមព័ទ្ធ ដែលមានប្រជាជន ២,៣លាននាក់ មួយនេះ។

រដ្ឋមន្ត្រីអ៊ីស្រាអែល ថាលោក Netanyahu បរាជ័យក្នុងការដឹកនាំ និងអំពាវនាវឱ្យមានការបោះឆ្នោត

2024/05/30 10:01:35 am        131
Facebook Telegram Linkin
រដ្ឋមន្ត្រីមួយរូបនៃគណៈរដ្ឋមន្រ្តីអ៊ីស្រាអែល កាលពីថ្ងៃពុធ (២៩ ឧសភា) បានចោទប្រកាន់ក្រុមចម្រុះរបស់លោកនាយករដ្ឋមន្ត្រី បេនចាមីន ណេតាន់យ៉ាហ៊ូ (Benjamin Netanyahu) ថា «បរាជ័យយ៉ាងវេទនាក្នុងការដឹកនាំ» ស្របពេលមានសង្រ្គាមហ្កាហ្សា ដែលជំរុញឱ្យមានការស្តីបន្ទោសពីគណបក្ស លីគុត (Likud) របស់លោក ណេតាន់យ៉ាហ៊ូ នៅពេលដែលការខ្វែងគំនិតផ្នែកនយោបាយកាន់តែស៊ីជម្រៅ។សមាជិកសភា លោក ហ្កាឌី អ៊ីសិនកូត (Gadi Eisenkot) អ្នកសង្កេតការណ៍នៅក្នុងគណៈរដ្ឋមន្ត្រីសង្គ្រាមបាននិយាយថា លោក ណេតាន់យ៉ាហ៊ូ បានបរាជ័យលើផ្នែកសន្តិសុខ និងសេដ្ឋកិច្ចរបស់ប្រទេស ហើយបានអំពាវនាវឱ្យមានការបោះឆ្នោតថ្មីនៅចុងឆ្នាំនេះ។ លោក អ៊ីសិនកូត បាននិយាយថា លោក ណេតាន់យ៉ាហ៊ូ បានបរាជ័យក្នុងការបំពេញតាមការសន្យាក្នុងយុទ្ធនាការបោះឆ្នោតឆ្នាំ២០២២ របស់ខ្លួន រួមទាំងការបញ្ឈប់កម្មវិធីនុយក្លេអ៊ែររបស់អ៊ីរ៉ង់ ការបង្កើតទំនាក់ទំនងការទូតជាផ្លូវការជាមួយអារ៉ាប៊ីសាអ៊ូឌីត និងការពង្រឹងសេដ្ឋកិច្ច។ថ្លែងនៅក្នុងសន្និសិទមួយ អតីតប្រមុខយោធា ដែលកូនប្រុសពៅរបស់ខ្លួនត្រូវបានសម្លាប់នៅក្នុងការប្រយុទ្ធនៅតំបន់ហ្កាហ្សាស្ទ្រីប ក្នុងខែធ្នូ រូបនេះបាននិយាយថា លោក ណេតាន់យ៉ាហ៊ូ បានបំភាន់ពលរដ្ឋជាមួយនឹងប្រយោគ «ជ័យជំនះទាំងស្រុង» ប្រឆាំងនឹងក្រុមហាម៉ាស ជំនួសឱ្យការនិយាយការពិតអំពីភាពស្មុគស្មាញនៃសង្រ្គាមហ្កាហ្សា។អ៊ីស្រាអែល បានបើកការវាយលុកផ្លូវអាកាស និងជើងគោកនៅតំបន់ហ្កាហ្សា កាលពីខែតុលា ឆ្នាំមុន ដោយប្តេជ្ញាកម្ទេចក្រុមសកម្មប្រយុទ្ធអ៊ីស្លាមប៉ាឡេស្ទីនហាម៉ាស បុន្តែក្រុមអ្នកជំនាញបានសង្ស័យថា តើការប្ដេជ្ញានោះអាចទៅរួច ឬក៏អត់។ នៅក្នុងសេចក្តីថ្លែងការណ៍មួយនៅលើបណ្ដាញផ្ញើសារតេលេក្រាម គណបក្ស លីគុត បាននិយាយថា លោក អ៊ីសិនកូត និងរដ្ឋមន្ត្រីនៃគណៈរដ្ឋមន្រ្តីសង្រ្គាមអ៊ីស្រាអែល លោក បេននី ហ្កាន់ស៍ (Benny Gantz) ដែលជាគូប្រជែងដ៏សំខាន់របស់លោក ណេតាន់យ៉ាហ៊ូ កំពុងស្វែងរកលេសដើម្បីចាកចេញពីក្រុមចម្រុះនៅពេលកំពុងមានសង្រ្គាម៕

[BREAKING NEWS]អ្នកប្រជាធិបតេយ្យហុងកុង ១៤ នាក់ត្រូវបានកាត់ទោស ២នាក់ត្រូវបានជម្រះក្ដីពីបទសមគំនិតបំពានអំណាចជាតិ ក្នុងការកាត់ក្តីសន្តិសុខជាតិដ៏សំខាន់

2024/05/30 09:45:58 am        90
Facebook Telegram Linkin
អ្នកប្រជាធិបតេយ្យហុងកុងចំនួន ១៤ នាក់ត្រូវបានគេរកឃើញថាមានកំហុស ហើយពីរនាក់ ត្រូវបានជម្រះក្ដីពីបទចូលរួមឃុបឃិតគ្នាប្រព្រឹត្តអំពើបំពានអំណាចច្បាប់ ក្នុងការកាត់ក្តីស្ដីពីសន្តិសុខជាតិដ៏សំខាន់មួយជុំវិញតួនាទីរបស់ពួកគេនៅក្នុងការបោះឆ្នោតបឋមក្រៅផ្លូវការកាលពីខែកក្កដាឆ្នាំ ២០២០។ គណៈកម្មាការចៅក្រមសន្តិសុខជាតិដែលបានកំណត់ចំនួនបីរូប បានប្រកាសសាលក្រមរបស់ខ្លួនទៅកាន់អតីតសមាជិកសភា អតីតក្រុមប្រឹក្សាស្រុក និងអតីតអ្នកសារព័ត៌មាននៅតុលាការ West Kowloon នៅថ្ងៃព្រហស្បតិ៍សប្ដាហ៍នេះ៕

សភារបស់អង់គ្លេស ត្រូវបានរំលាយនៅមុនការបោះឆ្នោត

2024/05/30 09:38:27 am        126
Facebook Telegram Linkin
សភារបស់ចក្រភពអង់គ្លេស ត្រូវបានរំលាយនៅថ្ងៃព្រហស្បតិ៍នេះ នៅមុនការបោះឆ្នោតសកល នៅថ្ងៃទី៤ ខែកក្កដា ដែលមើលទៅនឹងនាំឱ្យគណបក្សការងារ ឡើងកាន់អំណាច បន្ទាប់ពីការគ្រប់គ្រងរយៈពេល១៤ឆ្នាំ របស់គណបក្សអភិរក្សនិយម។ យុទ្ធនាការរយៈពេលប្រាំសប្តាហ៍ បានចាប់ផ្តើមជាផ្លូវការ ខណៈអាសនៈចំនួន៦៥០នៃសមាជិកសភា បាននៅទំនេរភ្លាមៗ កាលពីពាក់កណ្តាលអាធ្រាត្រ ស្របទៅតាមកាលបបរិច្ឆេទនៃការបោះឆ្នោត។សប្តាហ៍ដំបូងនៃយុទ្ធនាការឃោសនាបោះឆ្នោត ត្រូវបានគេមើលឃើញថាចាប់ផ្តើមរង្គោះរង្គើ បន្ទាប់ពីការប្រកាសការបោះឆ្នោតរបស់នាយករដ្ឋមន្ត្រី លោក Rishi Sunak ក្នុងពេលមានភ្លៀងធ្លាក់ជោគជាំ ដោយអ្នកសង្កេតការណ៍ជាច្រើន បានចាត់ទុកភ្លៀងធ្លាក់នេះថាជាប្រផ្នូលមិនល្អ។លោក Sunak បានកំណត់ការបោះឆ្នោតនៅថ្ងៃទី ៤ខែកក្កដា ដូចដែលបានរំពឹងទុកយ៉ាងទូលំទូលាយ ជាអ្វីដែលអ្នកសង្កេតការណ៍ បាននិយាយថា ជាការប៉ុនប៉ងដើម្បីទទួលបានសន្ទុះឡើងវិញ ខណៈគណបក្សរបស់លោក ធ្លាក់ចុះនៅក្នុងការបោះឆ្នោតស្ទង់មតិ។បន្ទាប់ពីការប្រឆាំងរយៈពេល១៤ឆ្នាំមក គណបក្សការងារ បច្ចុប្បន្ននេះ មានឱកាសទទួលជ័យជម្នះឡើងកាន់អំណាច ជាមួយមេដឹកនាំរបស់ខ្លួន លោក ឃៀ ស្តាមឺ(Keir Starmer) ដែលជាអតីតមេធាវីសិទ្ធិមនុស្ស ជាអ្នកឡើងកាន់តំណែង។

បណ្ដាញសង្គម

ព័ត៌មានថ្មីៗ

ឯកឧត្តម ហេង រតនា៖គ្រាប់មីនបើសិននៅជាប់គន្លឹះ ទោះបីជាដើរជាន់យ៉ាងណាក៏មិនផ្ទុះដែរ
08/18/2025 04:08 PM
Facebook Telegram Linkin
រដ្ឋបាលក្រុងស្វាយរៀងនាំយកគ្រឿងឧបភោគបរិភោគផ្ដល់ជូនវីរកងទ័ពនៅសមរភូមិជួរមុខនិងជនភៀសសឹក
08/18/2025 04:08 PM
Facebook Telegram Linkin
ឯកឧត្តមបណ្ឌិត ងី មានហេង បន្តអំពាវនាវបងប្អូនប្រជាពលរដ្ឋរួមគ្នាលុបបំបាត់ជម្រកមូសខ្លា
08/18/2025 04:08 PM
Facebook Telegram Linkin
រដ្ឋមន្ត្រីការបរទេសយេម៉ែន៖ អ៊ីរ៉ង់លើកទឹកចិត្តក្រុមហ៊ួទីឲ្យអូសបន្លាយពេលសង្គ្រាម និងបដិសេធសន្តិភាព
08/18/2025 04:08 PM
Facebook Telegram Linkin
អង្គការលើកលែងទោសអន្តរជាតិនិយាយថា អ៊ីស្រាអែលមានចេតនាបង្អត់អាហារដល់ប្រជាជនប៉ាឡេស្ទីន នៅហ្កាហ្សា
08/18/2025 04:08 PM
Facebook Telegram Linkin
រដ្ឋមន្ត្រីអាល្លឺម៉ង់ និយាយថា ចិន «កាន់តែបង្កើនឥទ្ធិពលខ្លាំងឡើងៗ» នៅអាស៊ីប៉ាស៊ីហ្វិក
08/18/2025 04:08 PM
Facebook Telegram Linkin
ឯកឧត្តមបណ្ឌិតសភាចារ្យ ហង់ជួន ណារ៉ុន ជួបសំណេះសំណាល និងរៀបចំសាងសង់ផ្ទះ ព្រមទាំងប្រគល់ម៉ូតូជូនវីរកងទ័ពនៅជួរមុខ ផុន សុធា នៅភូមិរាយប៉ាយកណ្តាល ស្រុកកងមាស
08/18/2025 04:08 PM
Facebook Telegram Linkin
មេដឹកនាំរបស់ស៊ីរី សង្ឃឹមមានកិច្ចព្រមព្រៀងជាមួយកងជីវពលឃឺដ ដើម្បីទប់ស្កាត់ជម្លោះ
08/18/2025 04:08 PM
Facebook Telegram Linkin
រដ្ឋមន្ត្រីក្រសួងទេសចរណ៍៖ កម្ពុជាកំពុងធ្វើពិពិធកម្មទីផ្សារទេសចរណ៍អន្តរជាតិឱ្យមានលក្ខណៈទូលំទូលាយ និងចាប់យកទីផ្សារទេសចរណ៍មូស្លីម
08/18/2025 04:08 PM
Facebook Telegram Linkin
គ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចុះព្យាបាលជំងឺជូនបងប្អូនជនភៀសសឹកតាមបន្ទាត់ព្រំដែន ក្នុងខេត្តឧត្តរមានជ័យ
08/18/2025 03:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.