BTV NEWS

លោកសាស្ត្រាចារ្យ Yang Jiemian៖ ការពង្រឹង និងពង្រីកកិច្ចសហប្រតិបត្តិការលើគ្រប់វិស័យ និងគ្រប់តួអង្គ ជាកត្តាគន្លឹះនៃទំនាក់ទំនងទ្វេភាគី ចិន-កម្ពុជា

មេបញ្ជាការរងកងទ័ពជើងគោកនៃសហព័ន្ធរុស្ស៊ី ប្ដេជ្ញាបន្តពូនជ្រំទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ឱ្យកាន់តែរឹងមាំ និងរីកចម្រើន

កម្ពុជា បារាំង ចង់បង្កើតនូវកិច្ចសហប្រតិបត្តិការ លើវិស័យសុខាភិបាល និងអាកាសចរស៊ីវិល បន្ថែមទៀត

សម្ដេចតេជោ៖ ទំនាក់ទំនងស្នូលកម្ពុជា-ជប៉ុន មិនអាចខ្វះបានឡើយ នូវផ្នែកសេដ្ឋកិច្ច ពាណិជ្ជកម្ម និងវិនិយោគ

នយោបាយ និង ការអភិវឌ្ឍន៍

អ៊ុយក្រែន សង្ឃឹមថា រុស្ស៊ីនឹងចូលរួមកិច្ចប្រជុំកំពូលសន្តិភាពអ៊ុយក្រែន លើកទីពីរ

នៅមុនកិច្ចប្រជុំកំពូលលើកដំបូងស្តីពីសន្តិភាពនៅអ៊ុយក្រែន ទីក្រុងគីវ បាននិយាយកាលពីថ្ងៃអង្គារ ថា ខ្លួនចង់ឱ្យរុស្ស៊ីចូលរួមក្នុងកិច្ចប្រជុំកំពូលលើកទីពីរ ដើម្បីទទួលបានផែនទីបង្ហាញផ្លូវដែលបានព្រមព្រៀងជាអន្តរជាតិ ឈានទៅរកការបញ្ចប់ជម្លោះ។ ទីក្រុងមូស្គូ និយាយថា ខ្លួនគ្មានចំណាប់អារម្មណ៍ក្នុងការចូលរួមកិច្ចប្រជុំនៅចុងសប្តាហ៍នេះទេ។ ដូច្នេះ ពុំត្រូវបានអញ្ជើញដោយប្រទេសស្វីស ជាម្ចាស់ផ្ទះនៃកិច្ចប្រជុំនោះទេ ខណៈអ៊ុយក្រែន ចង់ទទួលបានលទ្ធផលជាក់ស្តែងមួយចំនួន ពីកិច្ចប្រជុំដើម្បីឈានទៅដល់កិច្ចប្រជុំកំពូលលើកទីពីរ។លោក អាន់ឌ្រី យឺម៉ាក(Andriy Yermak) ប្រធានការិយាល័យរបស់ប្រធានាធិបតីអ៊ុយក្រែន លោក Volodymyr Zelenskyy បាននិយាយថា មាន «បទពិសោធន៍មិនល្អ» នៃទម្រង់ការចរចា កាលពីពេលមុនដែលពាក់ព័ន្ធជាមួយទីក្រុងមូស្គូ មុនពេលការវាយលុកពេញលេញរបស់រុស្ស៊ីលើអ៊ុយក្រែន ក្នុងខែកុម្ភៈ ឆ្នាំ ២០២២។លោក Yermak បាននិយាយទៅកាន់អង្គភាពប្រព័ន្ធផ្សព្វផ្សាយអឺរ៉ុប តាមរយៈបណ្តាញវីដេអូ ពីទីក្រុងប៊ែរឡាំង ថា សម្រាប់កិច្ចប្រជុំកំពូលលើកទីពីរ យើងនឹងធ្វើការជាមួយក្រុមការងារទាំងអស់ ជាមួយនឹងប្រទេសទាំងអស់ ដែលចាប់អារម្មណ៍ចូលរួម។ យើងមានផែនការរៀបចំរួមគ្នា ដែលនឹងត្រូវបានគាំទ្រដោយប្រទេសមានទំនួលខុសត្រូវទាំងអស់ ហើយយើងកំពុងស្វែងរកលទ្ធភាពសម្រាប់កិច្ចប្រជុំកំពូលលើកទី២ ដើម្បីអញ្ជើញអ្នកតំណាងរបស់ប្រទេសរុស្ស៊ី ។លោកនិយាយថា ទស្សនវិស័យដែលគាំទ្រដោយ ប្រទេសជាង១០០ មានមកពីគ្រប់ទ្វីប នឹងក្លាយជាផែនការពិតប្រាកដ។ប្រទេសជាង១៦០ និងអង្គការអន្តរជាតិ ត្រូវបានអញ្ជើញដោយប្រទេសស្វីស ទៅកាន់កិច្ចប្រជុំកំពូលរយៈពេលពីរថ្ងៃ នៅរមណីយដ្ឋាន ប៊ឺហ្គេនស្តុក(Burgenstock) ដោយទទួលបានការបញ្ជាក់ចូលរួមពីប្រទេសជាង៩០ រហូតមកដល់ពេលនេះ។

រដ្ឋាភិបាលថ្មីប្រទេសកុងហ្គោ ស្បថចូលកាន់តំណែង បន្ទាប់ពីការពន្យារពេលជាច្រើនខែ

លោកស្រី ជូឌីត ស៊ូមីនវ៉ា ទូលូកា(Judith Suminwa Tuluka) បានស្បថចូលកាន់តំណែងជានាយករដ្ឋមន្ត្រី របស់សាធារណរដ្ឋប្រជាធិបតេយ្យកុងហ្គោ កាលពីថ្ងៃអង្គារ រួមជាមួយសមាជិកដែលបានកាត់បន្ថយរួចចំនួន៥៤រូប ដោយបញ្ចប់ការពន្យារពេលជាងប្រាំមួយខែ បន្ទាប់ពីការបោះឆ្នោតឡើងវិញរបស់ប្រធានាធិបតី លោក ហ្វីលិក ស្ស៊ីសេកកេឌី(Felix Tshisekedi)។លោក Tshisekedi បានទទួលជ័យជម្នះអាណត្តិទីពីរកាលពីចុងឆ្នាំ២០២៣ បន្ទាប់ពីការបោះឆ្នោតដែលបានផ្តល់ឱ្យក្រុមចម្រុះសហព័ន្ធរបស់លោកប្រហែល ៩៥ភាគរយ នៃអាសនៈនៅរដ្ឋសភា។ ប៉ុន្តែជម្លោះផ្ទៃក្នុងលើតំណែងរដ្ឋមន្ត្រី បានពន្យារពេលការបង្កើតរដ្ឋាភិបាល។នៅទីបំផុត លោកប្រធានាធិបតី បានតែងតាំង លោកស្រី Suminwa ជានាយករដ្ឋមន្ត្រីស្ត្រីដំបូងរបស់ប្រទេសកុងហ្គោ នៅថ្ងៃទី១ ខែមេសា និងអតីតនាយសេនាធិការរបស់លោក លោក វីតាល់ កាំមែហេ(Vital Kamerhe) ជាប្រធានសភា នៅថ្ងៃទី២២ ខែឧសភា ដោយត្រួសត្រាយផ្លូវសម្រាប់ការតែងតាំងគណៈរដ្ឋមន្ត្រីថ្មី។រដ្ឋាភិបាលថ្មី មានរដ្ឋមន្ត្រីចំនួន៥៤រូប ជាការបង្រួមតិចជាងការរំពឹងទុកពី៥៧រូប កាលពីពេលពីមុន ទោះបីជាមានសម្ពាធដើម្បីឲ្យមានការកាត់បន្ថយការចំណាយក៏ដោយ។ នាយកផ្នែកទំនាក់ទំនងរបស់ លោក Tshisekedi លោកអ៊ីរីក នីយីនឌូ(Erik Nyindu) បាននិយាយថា ការពន្យារពេល បានអនុញ្ញាតឱ្យមានពេលវេលាដើម្បីស្វែងរកការសម្របសម្រួលរវាងភាគីចម្រុះ។

កូរ៉េខាងជើង លើកសរសើរទំនាក់ទំនងដ៏រឹងមាំជាមួយរុស្ស៊ី ស្របពេលការរំពឹងទុកនៃទស្សនកិច្ចលោក ពូទីន

ប្រព័ន្ធផ្សព្វផ្សាយរដ្ឋ KCNA បាននិយាយនៅថ្ងៃពុធ (១២ មិថុនា) នេះថា មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បាននិយាយថា ប្រទេសរបស់លោកគឺជា «សមមិត្តដ៏រឹងមាំដែលមិនអាចកាត់ថ្លៃបាន» ជាមួយរុស្ស៊ី នៅក្នុងសារមួយទៅកាន់លោកប្រធានាធិបតី វ៉្លាឌីមៀ ពូទីន (Vladimir Putin) ស្របពេលមានការរំពឹងទុកជុំវិញដំណើរទស្សនកិច្ចរបស់លោក ពូទីន ទៅកាន់ប្រទេសកូរ៉េខាងជើង។ដោយប្រារព្ធទិវាជាតិរបស់រុស្ស៊ី លោក គីម បាននិយាយថា ជំនួបរបស់ខ្លួនជាមួយលោក ពូទីន នៅឯទីតាំងបាញ់បង្ហោះយានអវកាសរុស្ស៊ី កាលពីឆ្នាំមុន បានលើកកម្ពស់ចំណងនៃ «ទំនាក់ទំនងយុទ្ធសាស្ត្រដែលមានអាយុកាលរាប់សតវត្សរ៍» របស់ពួកគេ។ សារនេះបានកើតឡើងបន្ទាប់ពីសារព័ត៌មាន វ៉េដូម៉ូស្ទី (Vedomosti) របស់រុស្ស៊ី កាលពីថ្ងៃចន្ទ បានរាយការណ៍ថាលោក ពូទីន នឹងទៅបំពេញទស្សនកិច្ចនៅកូរ៉េខាងជើង និងវៀតណាម ក្នុងប៉ុន្មានសប្តាហ៍ខាងមុខនេះ។មន្ត្រីម្នាក់ក្នុងប្រទេសវៀតណាម បានប្រាប់សារព័ត៌មានរ៉យទ័រថា ដំណើរទស្សនកិច្ចនៅវៀតណាមនោះ ត្រូវបានគ្រោងធ្វើនៅថ្ងៃទី ១៩ និងថ្ងៃទី ២០ ខែមិថុនា ប៉ុន្តែមិនទាន់ត្រូវបានគេបញ្ជាក់នៅឡើយទេ។ វិមានក្រឹមឡាំងបាននិយាយថា រុស្ស៊ី ចង់ជំរុញកិច្ចសហប្រតិបត្តិការជាមួយកូរ៉េខាងជើង «លើគ្រប់វិស័យ» ប៉ុន្តែមិនបានបញ្ជាក់ពីកាលបរិច្ឆេទនៃដំណើរទស្សនកិច្ចនោះទេ។លោក គីម បានធ្វើដំណើរទៅតំបន់ចុងបូព៌ារបស់រុស្ស៊ី កាលពីខែកញ្ញា ឆ្នាំមុន ដោយទៅទស្សនាមជ្ឈមណ្ឌលបង្ហោះយានអវកាស វ៉ូស្តូឆ្នី ខូស្មូដ្រូម (Vostochny Cosmodrome) ជាទីដែលលោក ពូទីន បានសន្យាថានឹងជួយលោកបង្កើតផ្កាយរណប។ ទីក្រុងព្យុងយ៉ាង និងទីក្រុងមូស្គូ បានបង្កើនទំនាក់ទំនងការទូត និងសន្តិសុខកាន់តែខ្លាំងឡើង ដោយធ្វើជាម្ចាស់ផ្ទះទទួលរដ្ឋាភិបាល សភា និងគណៈប្រតិភូផ្សេងទៀតរវាងគ្នាទៅវិញទៅមកក្នុងប៉ុន្មានខែថ្មីៗនេះ៕

កោះតៃវ៉ាន់ បង្កើនសន្តិសុខ បន្ទាប់ពីអតីតកាពីទែនជើងទឹកចិន លួចជិះទូកចូលដោយខុសច្បាប់

អាជ្ញាធរកោះតៃវ៉ាន់ កាលថ្ងៃអង្គារ (១១ មិថុនា) បានកំណត់អត្តសញ្ញាណបុរសជនជាតិចិនម្នាក់ដែលត្រូវបានចាប់ខ្លួនពីបទចូលកោះដោយខុសច្បាប់តាមរយៈទូក ថាជាអតីតកាពីទែនជើងទឹក ដោយនិយាយថាពួកគេមិនអាចបដិសេធលទ្ធភាពដែលថាការលួចចូលនេះគឺជា «ការសាកល្បង» នៃសមត្ថភាពការពាររបស់កោះ ខណៈកំពុងបង្កើនការរឹតបន្តឹងសន្តិសុខបន្ថែមទៀត។បុរសវ័យ ៦០ ឆ្នាំរូបនោះបានប្រាប់មន្ត្រីឆ្មាំល្បាតឆ្នេរនៅកន្លែងកើតហេតុថា ខ្លួនចង់ «រត់ចោលស្រុក» នេះបើយោងតាមភ្នាក់ងារសារព័ត៌មានកណ្តាល។ ប្រមុខកិច្ចការសមុទ្រកោះតៃវ៉ាន់ លោកស្រី ខ្វ័ន ពីលីង (Kuan Bi-ling) បាននិយាយថា បុរសនោះធ្លាប់បានបម្រើការជាប្រធានក្រុមនៅក្នុងកងទ័ពជើងទឹកចិន ដោយបន្ថែមថាលោកគឺជាម្នាក់ក្នុងចំណោមអ្នករត់ចោលស្រុក ១៨ នាក់ ដែលត្រូវបានគេរកឃើញក្នុងរយៈពេលមួយឆ្នាំកន្លងមកនេះ ហើយអ្នកទាំងអស់នោះបានអះអាងថា ពួកគេកោតសរសើរ «របៀបរស់នៅបែបប្រជាធិបតេយ្យរបស់កោះតៃវ៉ាន់ និងចូលមកដើម្បីស្វែងរកសេរីភាព»។ប្រទេសចិន បានទាមទារកោះស្វ័យគ្រប់គ្រងតាមបែបប្រជាធិបតេយ្យ តៃវ៉ាន់ ថាជាផ្នែកមួយនៃទឹកដីរបស់ខ្លួន ហើយបានបង្កើនសម្ពាធផ្នែកយោធា និងនយោបាយក្នុងប៉ុន្មានឆ្នាំថ្មីៗនេះ រួមទាំងហ្គេមសង្រ្គាមកាលពីខែមុន ដែលវាហៅថាជាការសាកល្បងសមត្ថភាពរបស់ខ្លួនក្នុងការក្រសោបយកកោះ។ច្រកសមុទ្រតៃវ៉ាន់ ដែលជាផ្លូវទឹកប្រវែង ១៨០ គីឡូម៉ែត្រ ខណ្ឌចែកប្រទេសចិនពីកោះនេះ គឺជាផ្លូវទឹកមួយក្នុងចំណោមផ្លូវទឹកដែលមានកម្លាំងនគរបាលច្រើនបំផុតនៅលើពិភពលោក។ មន្រ្តីជាន់ខ្ពស់រដ្ឋាភិបាលកោះតៃវ៉ាន់ លោក ចូ យ៉ុងថៃ (Cho Jung-tai) បានប្រាប់អ្នកសារព័ត៌មានកាលពីថ្ងៃអង្គារថា «អង្គភាព និងក្រុមសន្តិសុខទាំងអស់កំពុងយកចិត្តទុកដាក់យ៉ាងខ្លាំង ហើយការស៊ើបអង្កេតបានចាប់ផ្តើម»៕

រុស្ស៊ី គំរាមកែប្រែគោលការណ៍អាវុធនុយក្លេអ៊ែរ ពាក់ព័ន្ធការកើនឡើងសកម្មភាពរបស់អាមេរិក

ទីក្រុងមូស្គូ កំពុងគម្រាមកែប្រែគោលការណ៍អាវុធនុយក្លេអ៊ែររបស់ខ្លួន ជាការឆ្លើយតបទៅនឹងអ្វីដែលវិមានក្រឹមឡាំង ចាត់ទុកជាសកម្មភាពកើនឡើងដោយសហរដ្ឋអាមេរិក និងសម្ព័ន្ធយោធាណាតូ។អនុរដ្ឋមន្ត្រីការបរទេសរុស្ស៊ី លោក ហ្សើហ្គេ រីយ៉ាបកូវ (Sergei Ryabkov) បានចេញការព្រមានកាលពីថ្ងៃអង្គារទី១១មិថុនាសប្ដាហ៍នេះ នៅក្នុងការអត្ថាធិប្បាយទៅកាន់អ្នកសារព័ត៌មាន ដោយនិយាយថា គ្មានអ្វីត្រូវសង្ស័យទេ ការកើនឡើងនៃបញ្ហាប្រឈមបង្កើតឡើងដោយសហរដ្ឋអាមេរិក និងសម្ព័ន្ធមិត្តរបស់ខ្លួន បានក្លាយជាភាពប្រឈមខ្លាំងចំពោះមុខយើង គ្របដណ្ដប់ដោយសំណួររាប់មិនអស់ថាតើរុស្ស៊ី ត្រូវកែប្រែច្បាប់គោលនយោបាយនុយក្លេអ៊ែររបស់ខ្លួនដោយរបៀបណាដើម្បីឲ្យស្របតាមតម្រូវការចាំបាច់នាពេលបច្ចុប្បន្ន។ លោកបាននិយាយថា ក្រុមអាជ្ញាធររុស្ស៊ីនឹងមិនផ្តល់ការជូនដំណឹងជាមុនអំពីការផ្លាស់ប្តូរដ៏ជាក់លាក់នឹងធ្វើឡើងចំពោះគោលនយោបាយយោធា នោះទេ ដោយដាក់ចេញនូវលក្ខខណ្ឌដែលប្រធានាធិបតីរុស្ស៊ីនឹងពិចារណាប្រើប្រាស់អាវុធនុយក្លេអ៊ែរ។ការអត្ថាធិប្បាយរបស់លោកកើតឡើងមិនដល់មួយសប្តាហ៍ទេ បន្ទាប់ពីលោក Vladimir Putin បានបានប្រលយពាក្យនៃការផ្លាស់ប្តូរគោលការណ៍នុយក្លេអ៊ែរនៅឯវេទិកាសេដ្ឋកិច្ចអន្តរជាតិក្រុង សេន ភីធើរស្បើក(St.Petersburg) ដោយហៅថាជា ឧបករណ៍រស់នៅ ដែលអាចផ្លាស់ប្តូរបាន និងព្រមានថា យើងកំពុងតាមដានដោយប្រុងប្រយ័ត្ននូវអ្វីដែលកំពុងកើតឡើងនៅជុំវិញពិភពលោក៕

មន្រ្តីជាន់ខ្ពស់ក្រសួងការពារជាតិ៖ សម្ព័ន្ធមេត្រីភាពពិតជាមានសារសំខាន់ណាស់សម្រាប់កងទ័ពទាំងមូល

នាយឧត្តមសេនីយ៍ ដាំ ដារីនី រដ្ឋលេខាធិការក្រសួងការពារជាតិ និងជាប្រធានក្រុមការងារសម្របសម្រួលកិច្ចការសម្ព័នមេត្រីភាពរវាងអង្គភាពនៃកងយោធពលខេមរភូមិន្ទជាមួយស្ថាប័នអង្គភាពស៊ីវិល បានលើកឡើងថា ការងារសម្ព័ន្ធមេត្រីភាពពិតជាមានសារសំខាន់ណាស់សម្រាប់កងយោធពលខេមរភូមិន្ទ ខណៈ កម្មវិធីនេះគឺមានការជួយទ្រទ្រង់ពីសំណាក់ស្ថាប័នស៊ីវិលដល់កងទ័ព ដូចជាការស្ថាបនាសំណង់អគារ លេណដ្ឋាន អគារ និងហេដ្ឋារចនាសម្ព័ន្ធនានាជាដើម។ក្នុងកិច្ចប្រជុំត្រៀមរៀបចំសិក្ខាសាលាដកពិសោធន៍ លើការងារសម្ព័ន្ធមេត្រីភាពរវាងអង្គភាពនៃកងយោធពលខេមរភូមិន្ទ ជាមួយស្ថាប័នអង្គភាពស៊ីវិលទិសភូមិភាគទី៥ នាថ្ងៃទី១២ខែមិថុនា ឆ្នាំ ២០២៤នេះ នៅទីស្តីការក្រសួងការពារជាតិ លោកជំទាវ នាយឧត្តមសេនីយ៍ ដាំ ដារីនី បានលើកឡើងថា ការងារសម្ព័ន្ធមេត្រីភាពគឺជាគំនិតផ្តួចផ្តើមរបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា ហើយបច្ចុប្បន្ននេះ រាជរដ្ឋាភិបាលក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបន្តគិតគូរនិងយកចិត្តទុកដាក់ ជំរុញនិងលើកទឹកចិត្តឱ្យមានការចងសម្ព័ន្ធមេត្រីភាពនេះបន្តទៅមុខទៀត ដើម្បីលើកស្ទួយជីវភាព និង សុខុមាលភាពរបស់កងទ័ពនិងក្រុមគ្រួសារកងទ័ព។ លោកជំទាវ នាយឧត្តមសេនីយ៍ រដ្ឋលេខាធិការ បានបន្ថែមទៀតថា ការងារសម្ព័ន្ធមេត្រីភាពពិតជាមានសារសំខាន់ណាស់សម្រាប់កងយោធពលខេមរភូមិន្ទ ទោះក្នុងកាលៈទេសៈណាក៏ដោយ កងទ័ពបានបំពេញភារកិច្ចយ៉ាងម៉ឺងម៉ាត់ក្នុងកិច្ចការ ពារអធិបតេយ្យភាព និងបូរណភាពទឹកដី ក៏ដូចជាចូលរួមចំណែករក្សានូវស្ថិរភាព និងសុខសន្តិភាពជូនប្រជាជនកម្ពុជា។ ហេតុនេះស្មារតីសាមគ្គីភាព និងវប្បធម៌នៃការចែករំលែកស្របតាមទិសស្លោក «សមរភូមិក្រោយជួយ សមរភូមិមុខ»។ សម្រាប់ក្នុងឆ្នាំ២០២៤នេះ គឺមានអង្គភាពនៃកងយោធពលខេមរភូមិន្ទមួយចំនួនទទួលបានការអនុញ្ញាតឲ្យចងសម្ព័ន្ធមេត្រីភាពជាមួយស្ថាប័ន អង្គភាពស៊ីវិលបន្ថែមទៀតផងដែរ។ លោកជំទាវបានលើកឡើងទៀតថា សម្រាប់ឆ្នាំ២០២៤នេះ ដោយទទួលបានការអនុញ្ញាតពី នាយឧត្តមសេនីយ៍ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ សិក្ខាសាលាសម្ព័ន្ធមេត្រីភាពនឹងរៀបចំឡើងនៅទិសយោធភូមិភាគទី៥ គោលបំណងសំខាន់របស់អង្គសិក្ខាសាលា គឺដើម្បីបន្តលើកទឹកចិត្តដល់ទំនាក់ទំនងដៃគូសម្ព័ន្ធមេត្រីភាព បន្តប្រពៃណីសិល្បៈនៃការចែករំលែក នៃការងារសម្ព័ន្ធមេត្រីភាព ឱ្យបានសកម្មថែមទៀត ដើម្បីពង្រឹងនិងពង្រីកសមិទ្ធផលការងារសម្ព័ន្ធមេត្រីភាព និងតម្រង់ទិសឱ្យមានគុណប្រយោជន៍ និងជាយុទ្ធសាស្ត្រយូរអង្វែង។បង្វែរទិសមួយផ្នែកនៃជំនួយសម្ព័ន្ធមេត្រីភាពបម្រើទស្សនៈវិស័យយូរអង្វែង ដូចជាការស្ថាបនាសំណង់អគារ លេណដ្ឋាន អគារ និងហេដ្ឋារចនាសម្ព័ន្ធនានា, រួមគ្នាជាមួយដៃគូរសម្ព័ន្ធមេត្រីភាពដែលមានស្រាប់ សហការផ្តួចផ្តើមគម្រោងអភិវឌ្ឍន៍ ដើម្បីទ្រទ្រង់ដល់ជីវភាពនិងសុខមាលភាពយោធិន គ្រួសារយោធិន និងយោធិនត្រៀមចូលនិវត្តន៍,បណ្តុះបណ្តាលជំនាញវិជ្ជាជីវៈ និងជំនាញបច្ចេកទេស ដល់យោធិន គ្រួសារយោធិននិងយោធិនត្រៀមចូលនិវត្តន៍ជាដើម៕ អត្ថបទបាន ចក់

ប្រធានាធិបតីជាប់ឆ្នោតរបស់ម៉ិកស៊ិក នឹងបន្តធ្វើកំណែទម្រង់ ប៉ុន្តែប្រាប់អ្នកវិនិយោគកុំឱ្យព្រួយបារម្ភ

ប្រធានាធិបតីជាប់ឆ្នោតរបស់ប្រទេសម៉ិកស៊ិក លោកស្រី ក្លៅឌៀ ស្សេនបូម(Claudia Sheinbaum) កាលពីថ្ងៃអង្គារ បានព្យាយាមធ្វើឲ្យស្ងប់ស្ងាត់ការព្រួយបារម្ភរបស់វិនិយោគិន ជុំវិញការកែប្រែប្រព័ន្ធតុលាការដែលបានស្នើឡើង ដោយសន្យាថាប្រទេសនេះនឹងរក្សានីតិរដ្ឋរបស់ខ្លួន ខណៈបាននិយាយថា លោកស្រីមានផែនការជំរុញការធ្វើកំណែទម្រង់។ លោកស្រី Sheinbaum បាននិយាយក្នុងសន្និសិទសារព័ត៌មានថា សាររបស់លោកស្រី សូមឲ្យអ្នកវិនិយោគកុំមានការព្រួយបារម្ភ ទោះបីជាប្រាក់ប៉េសូ បានធ្លាក់ចុះប្រហែល ១,៥ភាគរយ ទល់នឹងនឹងប្រាក់ដុល្លារ កាលពីថ្ងៃអង្គារក៏ដោយ។ក្រុមចម្រុះដែលកំពុងកាន់អំណាច ដឹកនាំដោយគណបក្ស Morena របស់លោកស្រី Sheinbaum ទទួលបានលទ្ធផលល្អប្រសើរជាងការរំពឹងទុកនៅក្នុងការបោះឆ្នោតកាលពីថ្ងៃទី២ ខែមិថុនា ដោយផ្តល់ឱ្យក្រុមនេះនូវសំឡេងភាគច្រើននៅក្នុងសភាជាន់ទាប ដោយធ្វើឱ្យស្ថិតក្នុងជំហររឹងមាំដើម្បីអនុម័តកំណែទម្រង់រដ្ឋធម្មនុញ្ញ នៅពេលដែលសភាថ្មីចូលកាន់តំណែង។ អ្នករិះគន់ ព្រួយបារម្ភថាការកែទម្រង់នេះនឹងកែប្រែតុល្យភាពអំណាចនៅក្នុងប្រទេសម៉ិកស៊ិក ដោយជួយសម្រួលដល់ការដណ្តើមគ្រប់គ្រងផ្នែកនយោបាយរបស់តុលាការ និងដកចេញការត្រួតពិនិត្យ និងតុល្យភាពសំខាន់ៗ។ខណៈសភាជាប់ឆ្នោតថ្មីនឹងចូលកាន់តំណែងនៅដើមខែកញ្ញា ប៉ុន្តែលោកស្រី Sheinbaum នឹងមិនត្រូវបានចូលកាន់តំណែងនោះទេ រហូតដល់មួយខែក្រោយ គឺនៅខែតុលា ដោយផ្តល់ឱ្យប្រធានាធិបតី លោក Andres Manuel Lopez Obrador និងសមាជិកសភា នូវច្រកដើម្បីព្យាយាមធ្វើកំណែទម្រង់របស់លោក។

មន្ត្រីអ៊ីស្រាអែលនិយាយថា ក្រុមហាម៉ាសបានច្រានចោលសំណើបទឈប់បាញ់ ពង្រាងដោយអាមេរិក

យោងតាមរបាយការណ៍ប្រព័ន្ធផ្សព្វផ្សាយអ៊ីស្រាអែល មន្ត្រីអ៊ីស្រាអែលមួយរូបបាននិយាយកាលពីថ្ងៃអង្គារសប្ដាហ៍នេះ ថា ក្រុមហាម៉ាស បានច្រានចោលសំណើដែលត្រូវបានពង្រាងដោយសហរដ្ឋអាមេរិកសម្រាប់បទឈប់បាញ់ និងការដោះលែងចំណាប់ខ្មាំងនៅក្នុងដែនដីហ្កាហ្សាស្ទ្រីប ។ សារព័ត៌មាន Times of Israel បានដកស្រង់សម្តីមន្ត្រីអ៊ីស្រាអែលសុំមិនបញ្ចេញឈ្មោះមួយរូបថា ល្ងាចនេះ អ៊ីស្រាអែលបានទទួលដំណឹងតាមរយៈក្រុមអ្នកសម្របសម្រួល ដែលជាការឆ្លើយតបរបស់ក្រុមហាម៉ាស។ នៅក្នុងការឆ្លើយតបរបស់ខ្លួន ក្រុមហាម៉ាស បានច្រានចោលសំណើសុំដោះលែងចំណាប់ខ្មាំងដែលត្រូវបានបង្ហាញដោយលោកប្រធានាធិបតី Biden ។ មន្ត្រីរូបនេះបាននិយាយថា ក្រុមហាម៉ាស បានផ្លាស់ប្តូរលក្ខខណ្ឌសំខាន់នៃសំណើនេះ។យោងតាមរបាយការណ៍របស់ទីភ្នាក់ងារសារព័ត៌មាន Reuters មន្ត្រីក្រុមហាម៉ាសមួយរូប បាននិយាយថា ក្រុមនេះគ្រាន់តែបញ្ជាក់ឡើងវិញនូវការទាមទារជាយូរមកហើយរបស់ខ្លួន ដែលមិនបានបំពេញតាមផែនការដែលបានស្នើឡើង។មន្ត្រីក្រុមហាម៉ាស ដែលនិយាយសុំមិនបញ្ចេញឈ្មោះ បានបញ្ជាក់ក្នុងការឆ្លើយតបរបស់ខ្លួនថា ក្រុមនេះបានអះអាងជំហររបស់ខ្លួនជាថ្មីថា បទឈប់បាញ់ត្រូវតែឈានដល់ការបញ្ចប់អរិភាពជាអចិន្ទ្រៃយ៍នៅក្នុងដែនដីហ្កាហ្សា ដូចជាការដកកងកម្លាំងអ៊ីស្រាអែល ការកសាងឡើងវិញក្នុងដែនដីប៉ាឡេស្ទីន ដែលត្រូវបានអ៊ីស្រាអែលឡោមព័ទ្ធ និងការដោះលែងអ្នកទោសប៉ាឡេស្ទីននៅក្នុងប្រទេសអ៊ីស្រាអែល។ យើងបានបញ្ជាក់ជំហរចាស់របស់យើងឡើងវិញ។ ខ្ញុំជឿជាក់ថាគ្មានចន្លោះប្រហោងអ្វីនៅសល់ទៀតឡើយ។ ឥឡូវនេះកូនបាល់ គឺនៅក្នុងកណ្ដាប់ដៃរបស់អ៊ីស្រាអែល៕

ប្រទេសប្រហែល ៩០ នឹងចូលរួមកិច្ចប្រជុំកំពូលសន្តិភាពអ៊ុយក្រែន នៅស្វីស តែរុស្ស៊ីគ្មានវត្តមានទេ

ប្រធានាធិបតីប្រទេសស្វីស កាលពីថ្ងៃចន្ទ (ទី១០ ខែមិថុនា) បាននិយាយថា ប្រទេស និងស្ថាប័នជិត ៩០ ដែលពាក់កណ្តាលមកពីទ្វីបអឺរ៉ុប បានបញ្ជាក់ពីការចូលរួមក្នុងកិច្ចប្រជុំកំពូល ស្ដីពីសន្តិភាពអ៊ុយក្រែនដែលរៀបចំដោយប្រទេសស្វីស នៅចុងសប្តាហ៍នេះ។ តែរុស្ស៊ីនឹងមិនមានវត្តមាននោះទេ។គួរបញ្ជាក់ថា ទីក្រុងមូស្គូមិនទទួលបានការអញ្ជើញនោះទេ ប៉ុន្តែប្រទេសនេះបាននិយាយថា ខ្លួននឹងមិនចូលរួមនោះទេ ទោះក្នុងករណីណាក៏ដោយ ខណៈដែលសន្និសីទនេះ គឺផ្អែកលើសំណើសន្តិភាពរបស់ប្រធានាធិបតីអ៊ុយក្រែន លោក Volodymyr Zelenskyy ដែលសំណើនោះត្រូវបានរុស្ស៊ីបដិសេធ។នៅឯរដ្ឋធានី Bern របស់ប្រទេសស្វីស លោកស្រីប្រធានាធិបតី Viola Amherd បានប្រាប់អ្នកសារព័ត៌មាន ថា កិច្ចប្រជុំកំពូល នាថ្ងៃសៅរ៍ និងថ្ងៃអាទិត្យចុងសប្ដាហ៍នេះ នឹងមានបំណងកំណត់ផ្លូវឆ្ពោះទៅរកសន្តិភាពដែលអាចកើតមាន ពោលគឺក្នុងរយៈពេលជិត ២៨ខែ បន្ទាប់ពីកងកម្លាំងរុស្ស៊ីបានលុកលុយអ៊ុយក្រែន ហើយសង្រ្គាមកំពុងបន្តមាន។លោកស្រី Amherd បាននិយាយថា៖ «នេះមិនមែនជាការឃោសនានោះទេ។ នេះគឺអំពីមូលដ្ឋាននៃជំនួយមនុស្សធម៌ដែលផ្តល់ដោយប្រទេសស្វីស ដោយផ្អែកលើការជំរុញឲ្យមានសន្តិភាព (និង) ដើម្បីផ្តល់វេទិកាមួយ ដែលផ្តួចផ្តើមឲ្យមានការសន្ទនា»។ លោកស្រីប្រធានាធិបតីស្វីសបានបន្ថែមថា អ្នកចូលរួមភាគច្រើននឹងជាមេដឹកនាំប្រទេសធំៗ ដែលមានប្រហែលពាក់កណ្តាលតំណាងឲ្យនៅកម្រិតប្រមុខរដ្ឋ ឬរដ្ឋាភិបាល ហើយ «មួយចំនួនតូច» មកពីអង្គការនានា ដូចជាអង្គការសហប្រជាជាតិ។សូមបញ្ជាក់ថា មានការផ្ញើការអញ្ជើញប្រហែល ១៦០ ហើយលោកស្រី Amherd បាននិយាយថា នេះមិនមែនជា «ការខកចិត្ត» សម្រាប់រដ្ឋាភិបាលស្វីសទេ ដែលរហូតមកដល់ពេលនេះ ប្រទេស និងស្ថាប័នមិនដល់ ១០០ នោះឡើយ បានប្រកាសពីការចូលរួមនៅក្នុងដំណាក់កាលដំបូងនៃដំណើរការសន្តិភាពនេះ។យោងតាមអាជ្ញាធរស្វីស បានឲ្យដឹងថា ប្រទេសប្រេស៊ីល និងចិន បានប្រាប់ថា ពួកគេនឹងមិនចូលរួមនោះទេ លុះត្រាណាតែភាគីទាំង២ ក្នុងនោះរួមមានទាំងរុស្ស៊ីផងដែរ មានវត្តមាននៅក្នុងកិច្ចពិភាក្សានេះ។ ទីក្រុងប៉េកាំង គឺជាអ្នកគាំទ្រដ៏ធំបំផុតមួយរបស់ប្រធានាធិបតីរុស្ស៊ី លោក Vladimir Putin ចាប់តាំងពីសង្រ្គាមបានចាប់ផ្តើម ហើយបាននិយាយថា លក្ខណខណ្ឌ សម្រាប់ការចូលរួមរបស់ខ្លួន នឹង «ពិបាកបំពេញតាម»៕

ក្រុមហ៊ុននាំចេញគ្រាប់ធញ្ញជាតិរុស្ស៊ី នឹងផ្តោតលើទីផ្សារនៅមជ្ឈិមបូព៌ា និងអាហ្វ្រិកខាងជើង

ក្រសួងកសិកម្មរុស្ស៊ី បាននិយាយនៅថ្ងៃអង្គារនេះថា ក្រុមហ៊ុននាំចេញគ្រាប់ធញ្ញជាតិរបស់ប្រទេស នឹងផ្លាស់ប្តូរការផ្តោតសំខាន់របស់ពួកគេទៅកាន់ទីផ្សារនៅតំបន់មជ្ឈិមបូព៌ា និងអាហ្វ្រិកខាងជើង ហើយពង្រឹងទំនាក់ទំនងជាមួយប្រទេសឥណ្ឌា និងចិន។ក្រសួងបាននិយាយថា ក្នុងអំឡុងកិច្ចប្រជុំដែលដឹកនាំដោយរដ្ឋមន្ត្រីក្រសួងកសិកម្មរុស្ស៊ី លោក Oksana Lut ជាមួយក្រុមហ៊ុននាំចេញគ្រាប់ធញ្ញជាតិ ដែលកិច្ចប្រជុំបានព្រមព្រៀងជាឯកច្ឆ័ន្ទថា ការបដិសេធនាំចូលរបស់ប្រទេសទួរគី នឹងមិនប៉ះពាល់ដល់សមត្ថភាពនាំចេញរបស់ប្រទេសរុស្ស៊ីនោះទេ។ ការស្របមតិគ្នាគឺ សម្រាប់រដូវកាលខាងមុខ ដែលចាប់ផ្តើមនៅថ្ងៃទី ១ ខែកក្កដា ប្រទេសរុស្ស៊ីមានផែនការកាត់បន្ថយការផ្គត់ផ្គង់គ្រាប់ធញ្ញជាតិរបស់ខ្លួន ទៅកាន់ទីផ្សារពិភពលោកដល់៦០ លានតោន។ក្រសួងនិយាយថា នៅក្នុងស្ថានភាពបច្ចុប្បន្ន ក្រុមហ៊ុននាំចេញក្នុងស្រុក នឹងផ្តោតលើទីផ្សារសំខាន់ៗនៅមជ្ឈិមបូព៌ា និងអាហ្វ្រិកខាងជើង ព្រមទាំងលើការអភិវឌ្ឍន៍ទំនាក់ទំនងជាមួយប្រទេសឥណ្ឌា និងប្រទេសចិន ជាប្រទេសដែលមានវឌ្ឍនភាពក្នុងការផ្គត់ផ្គង់គ្រាប់ធញ្ញជាតិសណ្តែក និងការរំពឹងទុកដ៏ទូលំទូលាយសម្រាប់គ្រាប់ធញ្ញជាតិដំណាំដែលនឹងបើកដំណើរការ។ក្រសួងក៏បានបញ្ជាក់ថា ដោយពិចារណាលើទិន្នផលខ្ពស់កាលពីឆ្នាំមុន ប្រទេសរុស្ស៊ី មានគោលបំណងដឹកជញ្ជូនគ្រាប់ធញ្ញជាតិរហូតដល់៧០លានតោនទៅកាន់ទីផ្សារពិភពលោក រួមមានស្រូវសាលីចំនួន៥៣លានតោន នៅក្នុងរដូវនៅបន្តនេះ ដែលនឹងបញ្ចប់នៅថ្ងៃទី ៣០ ខែមិថុនា។ ក្រសួងកសិកម្មប្រទេសទួរគី នឹងផ្អាកការនាំចូលស្រូវសាលី ចាប់ពីថ្ងៃទី២១ ខែមិថុនា ដល់ថ្ងៃទី១៥ ខែតុលា ដើម្បីគាំទ្រអ្នកផលិតក្នុងស្រុក ខណៈតម្លៃគ្រាប់ធញ្ញជាតិ ត្រូវបានគេរំពឹងថានឹងធ្លាក់ចុះ។

បណ្ដាញសង្គម

ព័ត៌មានថ្មីៗ

ទេសចរចុះពីនាវា Villa Vie Odyssey អរគុណកម្ពុជាដែលបានផ្ដល់ជំនួយយ៉ាងកក់ក្ដៅលើសការរំពឹងទុក

យុវជនជាប់កាតព្វកិច្ចយោធាបង្ហាញស្មារតីរឹងមាំ និងត្រៀមខ្លួនពេញលេញរួមចំណែកការពារជាតិ

អាជ្ញាធរខេត្ដសៀមរាប និងក្រសួងការពារជាតិទម្លាយផ្លូវមួយខ្សែ នៅកណ្ដាលក្រុងសៀមរាប បន្ទាប់ពីបានបិទអស់រយៈពេល ៣០ឆ្នាំ

ពលរដ្ឋជាច្រើនទៅទទួលសេវាអត្តសញ្ញាណបណ្ណសញ្ជាតិខ្មែរ នៅអ៊ីអនម៉លសែនសុខ និងអ៊ីអនម៉លមានជ័យ នាថ្ងៃចុងសប្ដាហ៍

បេក្ខជនជាប់បម្រុងគ្រូអនុវិទ្យាល័យ ៥៧៥នាក់ ចាប់ផ្តើមជ្រើសរើសកន្លែងការងារដែលខ្លួនប៉ងប្រាថ្នា

រដ្ឋមន្រី្តសុខាភិបាល បើកសិក្ខាសាលាផ្សព្វផ្សាយនិយាមជាតិស្តីពីការពិនិត្យ ព្យាបាលជំងឺមហារីកមាត់ស្បូន

សិស្សនៅវិទ្យាល័យ ប្ដេជ្ញាខិតខំប្រឹងប្រែងរៀនសូត្រក្នុងឆ្នាំសិក្សាថ្មី ២០២៦-២០២៧

នគរបាលស្វីស ប្រើប្រាស់កាណុងបាញ់ទឹក បន្ទាប់ពីក្រុមអ្នកតវ៉ាពាក់ម៉ាសបង្កអគ្គិភ័យ

អ៊ុយក្រែន និងទួរគី ព្រមព្រៀងគ្នាធ្វើការលើច្រករបៀងដឹកជញ្ជូនគ្រាប់ធញ្ញជាតិនៅសមុទ្រខ្មៅ

រដ្ឋមន្រ្តីក្រសួងសាធារណការ បើកសិក្ខាសាលាស្តីពី «បញ្ហាប្រឈមពីការប្រែប្រួលអាកាសធាតុលើហេដ្ឋារចនាសម្ព័ន្ធភូគព្ភសាស្រ្តនៅកម្ពុជា»

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ​ និង ការអភិវឌ្ឍន៍