នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រធាន​ក្រុមការងារ​ចុះមូលដ្ឋាន ប្រកាស​បញ្ចូលសមាជិកថ្មី​​គណបក្សប្រជាជនកម្ពុជាចំនួន ៦៩០០នាក់ ក្នុងស្រុកប្រាសាទបល្ល័ង្ក ខេត្តកំពង់ធំ
សម្ដេច​តេជោ៖ការពង្រឹងខឿនការពារជាតិមិនសំដៅតែនៅសមរភូមិមុខទេ ត្រូវយកចិត្តទុកដាក់ទំនុកបម្រុងអ្នកសមរភូមិក្រោយជាគ្រួសារយុទ្ធជនជួរមុខ និងអតីតយុទ្ធជន
ឯកអគ្គរដ្ឋទូតហុងគ្រីចប់អាណត្តិមើលឃើញថាកម្ពុជាគឺជាដៃគូដ៏ជិតស្និទ្ធរបស់ហុងគ្រី
ឯកអគ្គរដ្ឋទូតបញ្ចប់អាណត្តិស្វីស៖ រដ្ឋាភិបាលស្វីសនឹងបន្តគាំទ្រដល់ការអភិវឌ្ឍសង្គម-សេដ្ឋកិច្ចកម្ពុជា

នយោបាយ​ និង ការអភិវឌ្ឍន៍

វ៉េណេហ្ស៊ុយអេឡា ប្រញាប់ប្រញាល់ផ្សះផ្សាទំនាក់ទំនងជាមួយអ៊ីរ៉ង់ ខណៈទណ្ឌកម្មរបស់អាមេរិក ជិតចាប់ផ្តើម

2024/03/13 09:19:03 am        99
Facebook Telegram Linkin
អ៊ីរ៉ង់ និងវ៉េណេហ្ស៊ុយអេឡា កំពុងព្យាយាមពង្រឹងសម្ព័ន្ធភាពប្រេង ដែលបានចាប់ផ្តើមបែកបាក់គ្នា កាលពីឆ្នាំមុន នេះបើយោងតាមមនុស្ស៦រូបដែលដឹងពីបញ្ហានេះ បន្ទាប់ពីប្រទេសនៅអាមេរិកខាងត្បូង បានធ្លាក់ចុះពីក្រោយការដោះដូរប្រេង ដែលបានជំរុញការនាំចេញប្រេងឆៅ និងជួយទប់ស្កាត់ការខ្វះខាតប្រេង ឥន្ធនៈក្នុងស្រុក។ការរំពឹងថា នឹងត្រឡប់មកវិញនៅខែមេសានូវទណ្ឌកម្មរបស់សហរដ្ឋអាមេរិកលើឧស្សាហកម្មប្រេងរបស់ វ៉េណេហ្ស៊ុយអេឡា នឹងធ្វើឲ្យសម្ព័ន្ធភាពអ៊ីរ៉ង់មានសារៈសំខាន់ ក្នុងការរក្សាផ្នែកថាមពល ដែលកំពុងប្រែប្រួលរបស់ខ្លួនឲ្យនៅដដែល។ កាលពីឆ្នាំមុន ទីក្រុងវ៉ាស៊ីនតោន បានបន្ធូរបន្ថយទណ្ឌកម្មជាបណ្ដោះអាសន្នលើការសន្យារបស់វ៉េណេហ្ស៊ុយអេឡា ក្នុងការអនុញ្ញាតឲ្យមានការបោះឆ្នោតជ្រើសរើសប្រធានាធិបតីដែលមានលក្ខណៈប្រកួតប្រជែង ជារឿងមួយដែលមិនបានកើតឡើង។ស្ថានភាពនេះ កាន់តែធ្ងន់ធ្ងរឡើង។ ការពិនិត្យឡើងវិញលើទិន្នន័យដឹកជញ្ជូន និងឯកសារពីក្រុមហ៊ុនប្រេងរបស់វ៉េណេហ្ស៊ុយអេឡា PDVSA បង្ហាញថា វ៉េណេហ្ស៊ុយអេឡា មិនបានធ្វើការទូទាត់ទៀងទាត់ទៅឲ្យប្រទេសអ៊ីរ៉ង់ ជាការខ្វះខាតដែលកាន់តែអាក្រក់ឡើង នៅពេលដែលសហរដ្ឋអាមេរិក ចាប់ផ្តើមចេញអាជ្ញាប័ណ្ណ នៅចុងឆ្នាំ ២០២២។ ការអនុញ្ញាតទាំងនោះ បានជំរុញឲ្យក្រុមហ៊ុនរដ្ឋ ប្រគល់ទំនិញឡើងវិញ ដែលបានគ្រោងទុកសម្រាប់អ៊ីរ៉ង់ក្នុងការផ្តល់ឲ្យដល់អតិថិជនដែលបានទូទាត់ជាសាច់ប្រាក់។ដើម្បីស្តារភាពជាដៃគូនេះ ប្រទេសវ៉េណេហ្ស៊ុយអេឡា កំពុងប្រញាប់ប្រញាល់បំពេញលក្ខខណ្ឌនៃសម្ព័ន្ធភាព រយៈពេល ៣ឆ្នាំ ដែលពាក់ព័ន្ធនឹងការដោះដូរប្រេង និងកិច្ចសន្យារាប់រយលានដុល្លារ។ ប្រទេសនេះ កំពុងព្យាយាមដោះស្រាយបំណុលដែលមិនទាន់បានទូទាត់ ដោយពន្លឿនការដឹកជញ្ជូនទំនិញប្រេងឆៅ និងឥន្ធនៈក្នុងបរិមាណច្រើនទៅប្រទេសអ៊ីរ៉ង់។

ប្រសាសន៍សំខាន់ៗរបស់សម្តេចធិបតី ក្នុងពិធីសម្ពោធដាក់ឱ្យប្រើប្រាស់ជាផ្លូវការមន្ទីរពេទ្យតេជោសែនកោះធំ

2024/03/13 08:29:15 am        177
Facebook Telegram Linkin
កណ្តាល៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា អញ្ជើញជាអធិបតីដ៏ខ្ពង់ខ្ពស់ សម្ពោធដាក់ឱ្យប្រើប្រាស់ជាផ្លូវការមន្ទីរពេទ្យតេជោសែនកោះធំ ស្ថិតនៅស្រុកកោះធំ ខេត្តកណ្តាល នៅព្រឹកថ្ងៃទី១៣ ខែមីនា ឆ្នាំ២០២៤ ។ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ដែលមានខ្លឹមសារដូចខាងក្រោម៖-សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានប្រកាសថ្លែងអំណរគុណដល់បងប្អូនប្រជាពលរដ្ឋនៅស្រុកកោះធំ ខេត្តកណ្តាល ដែលបានបន្តបោះឆ្នោតគាំទ្រដល់គណបក្សប្រជាជនកម្ពុជាតាំងពីដើមរហូតរៀងមក ហើយសម្តេចសូមប្តេជ្ញាថា គណបក្សប្រជាជនកម្ពុជា នឹងបន្តបម្រើដល់បងប្អូនប្រជាពលរដ្ឋដើម្បីជាការតបស្នងសងគុណដល់បងប្អូន។-សម្តេចធិបតី បានអះអាងថា ដរាបណាបងប្អូនប្រជាពលរដ្ឋនៅ បន្តបោះឆ្នោតជូនដល់គណបក្សប្រជាជនកម្ពុជា រាជរដ្ឋាភិបាលដែលដឹកនាំដោយគណបក្សប្រជាជនកម្ពុជានឹងបន្តខិតខំកសាងនូវសមិទ្ធផលថ្មីៗជាច្រើនទៀត ដើម្បីបម្រើដល់បងប្អូនជានិច្ច។-សម្តេចធិបតី ហ៊ុន ម៉ាណែត បានជំរុញឲ្យរដ្ឋមន្រ្តីក្រសួងសុខាភិបាលខិតខំពង្រឹង និងពង្រីកវិស័យសុខាភិបាលជូនដល់បងប្អូនប្រជាពលរដ្ឋឲ្យបានល្អប្រសើរបន្ថែមទៀត ជាពិសេសគឺគ្រឿងបំពាក់ និងថ្នាំសង្កូវជាដើម ពោលគឺត្រូវពង្រីកឲ្យបានគ្រប់ទីកន្លែងដល់មូលដ្ឋានតែម្តង។-សម្តេចធិបតី ហ៊ុន ម៉ាណែត បានណែនាំឲ្យបំពាក់សម្ភារៈវះកាត់ឲ្យដល់គ្រប់មន្ទីរពេទ្យបង្អែក នៅតាមស្រុកនានា ជាពិសេសគឺឧបករណ៍វះកាត់ផ្នែកបេះដូងតែម្តង។-សម្ដេចធិបតី ហ៊ុន ម៉ាណែត នាយករដ្ឋមន្រ្ដី៖ មនុស្សគឺជាកត្តាធំណាស់សម្រាប់ការអភិវឌ្ឍសង្គមជាតិ ហើយបើនិយាយពីកត្តាមនុស្ស គឺយើងត្រូវនិយាយពីកត្តាសុខភាព និងការអប់រំ សម្រាប់មនុស្សផងដែរ។-សម្តេចធិបតី បានថ្លែងថា ការអប់រំ និងសុខាភិបាលគឺជាគន្លឹះដ៏ធំបំផុតសម្រាប់ការពារជាតិ ដូច្នេះហើយការកសាងនូវសុខភាព និងការអប់រំនេះគឺជាកត្តាធំបំផុត ដែលត្រូវយកចិត្តទុកដាក់ និងត្រូវលើកកម្ពស់ជានិច្ច។-សម្តេចធិបតី បានថ្លែងថា ការលើកកម្ពស់សុខភាពរបស់មនុស្ស គឺជាគោលនយោបាយមួយដ៏ធំរបស់រាជរដ្ឋាភិបាល ខណៈមូលធនមនុស្សនេះគឺជាកត្តាសំខាន់បំផុត ដែលត្រូវយកចិត្តទុកដាក់គ្រប់ពេលទាំងអស់។-សម្ដេចធិបតី ហ៊ុន ម៉ាណែត៖ គោលដៅរបស់រាជរដ្ឋាភិបាលអាណត្តិទី៧នេះ គឺពង្រាយសេវា និងពង្រឹងមូលដ្ឋាន សេវាសុខាភិបាលឱ្យគ្របដណ្ដប់ដល់ប្រជាពលរដ្ឋ នៅតាមមណ្ឌលសុខភាពទាំងអស់នៅមូលដ្ឋានក្នុង ២៤ ម៉ោងលើ២៤ម៉ោង ហើយត្រូវផ្ដល់សេវាសុខាភិបាលនេះដល់ពលរដ្ឋឱ្យបានល្អ។-សម្ដេចធិបតី ហ៊ុន ម៉ាណែត នាយករដ្ឋមន្រ្ដី៖ អាណត្តិទី៧នេះ ខ្ញុំបានដាក់គោលដៅពង្រឹង ៦០% ពង្រីក ៤០% នៅតាមគោលដៅក្រសួង ស្ថាប័នទាំងអស់។ ជារួមគឺយើងផ្ដោតលើការពង្រឹងលើការផ្ដល់សេវា និងការអនុវត្តផែនការការងារ ជាជាងការពង្រីកចំនួនមន្រ្ដីបន្ថែម។-សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី៖ ការពង្រឹងគុណភាពសុខាភិបាល ត្រូវពង្រឹង តាំងពីគុណភាពឱសថឡើងទៅ ដើម្បីពលរដ្ឋទាំងអស់ ជាពិសេសពលរដ្ឋនៅតំបន់ជនបទ មាន សុខភាពកាន់តែប្រសើរ។-សម្ដេចធិបតី ហ៊ុន ម៉ាណែត បញ្ជាក់ថា ប្រធានមណ្ឌលសុខភាពនៅតាមរាជធានី ខេត្ត គឺសំខាន់ណាស់ ដូច្នេះទើបសម្ដេចបានឯកភាពផ្ដល់គោលការណ៍ និងសិទ្ធិទៅឱ្យខេត្ត ក្នុងការជ្រើសរើសប្រធានមណ្ឌលសុខភាពតែម្ដង ដើម្បីធានានូវសុគត្តភាព និងស្ដង់ដា។ ការណ៍នេះគឺជាការធ្វើវិមជ្ឈការសិទ្ធិក្នុងការដឹកនាំរបស់រាជរដ្ឋាភិបាលទៅដល់មូលដ្ឋាន។-សម្ដេចធិបតី ហ៊ុន ម៉ាណែត នាយករដ្ឋមន្រ្ដី ផ្ដល់អនុសាសន៍ឱ្យរដ្ឋមន្រ្ដីក្រសួងសុខាភិបាលត្រូវជ្រើសរើសថ្នាក់ដឹកនាំផ្នែកសុខភិបាល ដូចជាប្រធានមណ្ឌលសុខភាព ឬនាយកមន្ទីរពេទ្យដោយផ្ដោតសំខាន់ទៅលើមន្រ្ដីដែលមានបទពិសោធផ្នែកសុខភិបាលជាពិសេសធ្លាប់ធ្វើកិច្ចការងារសុខភិបាលនេះពីថ្នាក់ក្រោមរហូតមកដល់លើ។-សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានអំពាវនាវដល់គ្រូពេទ្យទាំងអស់ សូមគោរព តាមនិយាម និងក្រមសីលធម៌វិជ្ជាជីវៈគ្រូពេទ្យឱ្យបានខ្ជាប់ខ្ជួន ដើម្បីថែរក្សាការពារសុខភាពពលរដ្ឋឱ្យ កាន់តែប្រសើរ។-សម្ដេចធិបតី បានព្រមានថា សម្ដេចនឹងមិនអនុញ្ញាតឱ្យមាន ឱសថគ្មានគុណភាព យកមកព្យាបាលជំងឺពលរដ្ឋនោះទេ។ សម្ដេចបានស្នើដល់ក្រសួងសុខាភិបាល ត្រូវធានាឱ្យបាននូវគុណភាពឱសថទាំងអស់ ដែលត្រូវប្រើសម្រាប់ព្យាបាលពលរដ្ឋ។-សម្ដេចធិបតី ហ៊ុន ម៉ាណែត នាយករដ្ឋមន្រ្ដី៖ ចង់បានជោគជ័យ កុំផ្សងសំណាង ហើយអត់ធ្វើអ្វី ប៉ុន្ដែត្រូវខិតខំប្រឹងប្រែង។ បើឈឺត្រូវទៅរកគ្រូពេទ្យ ហើយបើខ្វះចំណេះដឹង ត្រូវស្វែងរកគ្រូបណ្ដុះបណ្ដាល។-សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី៖ ពលរដ្ឋមានសុខភាពល្អ នឹងជួយដល់សេដ្ឋកិច្ច ជាតិកាន់តែប្រសើរ ដោយសាររដ្ឋមិនចំណាយច្រើនលើការព្យាបាលជំងឺជូនពលរដ្ឋ។-សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី៖ ចង់បានជោគជ័យ សូមកុំផ្សងសំណាង ត្រូវខិត ខំប្រឹងប្រែងរៀនសូត្រ រៀនជំនាញផ្សេងៗឱ្យបានពូកែ ទើបមានជោគជ័យក្នុងជីវិត។-សម្ដេចធិបតី ហ៊ុន ម៉ាណែត នាយករដ្ឋមន្រ្ដី ថ្លែងថា វិស័យសុខាភិបាល និងសុខភាពរបស់ប្រជាពលរដ្ឋគឺជាកត្តាចំបងបំផុតដែលរាជរដ្ឋាភិបាលត្រូវយកចិត្តទុកដាក់ និងកំពុងអនុវត្ត ដូច្នេះសូមប្រជាពលរដ្ឋជឿជាក់លើការដឹកនាំរបស់រាជរដ្ឋាភិបាល។-សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី៖ សេដ្ឋកិច្ចកម្ពុជា ក៏ជាចំណែកមួយនៃសេដ្ឋកិច្ច ពិភពលោក។ សេដ្ឋកិច្ចកម្ពុជារីកចម្រើន សេដ្ឋកិច្ចពិភពលោកក៏រីកចម្រើន។-សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី៖ ដើម្បីអភិវឌ្ឍន៍កសាងប្រទេសឱ្យរីកចម្រើន គឺត្រូវ ធ្វើឱ្យប្រជាជនមានជីវភាពកាន់តែធូរធារ។-សម្ដេចធិបតី ហ៊ុន ម៉ាណែត នាយករដ្ឋមន្រ្ដី ណែនាំដល់គ្រូពេទ្យទាំងអស់ត្រូវខិតខំពង្រឹងនូវក្រមសីលធម៌ និងផ្ដល់សេវាល្អទៅដល់ប្រជាពលរដ្ឋនៅគ្រប់មជ្ឈដ្ឋាន។-សម្ដេចធិបតី ហ៊ុន ម៉ាណែត នាយករដ្ឋមន្រ្ដី៖ កុំឃើញមន្ទីរពេទ្យល្អចង់ចូល កុំមានបណ្ណ ប.ស.ស ចង់ប្រើ ប៉ុន្ដែត្រូវខិតខំថែមទាំសុខភាពខ្លួនឯងតាមរយៈការហាត់ប្រាណ ចាប់យកកីឡាណាមួយសម្រាប់ខ្លួនឯងជាប្រចាំទើបទទួលបានសុខភាពល្អ។-សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានសំណូមពរដល់ពលរដ្ឋទាំងអស់ សូមរក្សា ថែសុខភាពឱ្យបានល្អ ជៀសវាងចូលទៅមន្ទីរពេទ្យ ទោះមន្ទីរពេទ្យនោះរដ្ឋាភិបាលបានដាក់ ពង្រាយគ្រូពេទ្យជំនាញ និងផ្ដល់បណ្ណ ប.ស.ស. សម្រាប់ព្យាបាលជំងឺ ដោយមិនមានបង់ថវិកាក្ដី។

ប្រៃសណីយ៍កម្ពុជា និង ACU ចុះMOU លើសេចក្តីជូនដំណឹងរួមពាក់ព័ន្ធនឹងអំពើពុករលួយ

2024/03/12 04:03:56 pm        236
Facebook Telegram Linkin
ប្រៃសណីយ៍កម្ពុជា និងអង្គភាពប្រឆាំងអំពើពុករលួយ (ACU) នៅថ្ងៃទី១២ខែមីនានេះ បានចុះMOU លើសេចក្តីជូនដំណឹងរួមគ្នាពាក់ព័ន្ធនឹងអំពើពុករលួយ។ ពិធីនេះ រៀបចំឡើងនៅ ACU រាជធានីភ្នំពេញ ដោយមានការអញ្ជើញចូលរួមចុះហត្ថលេខាពីឯកឧត្តម ថេន សំវិសុទ្ធ អគ្គនាយកប្រៃសណីយ៍កម្ពុជា និងឯកឧត្តម ជា សំអាត អគ្គនាយក នៃអគ្គនាយកដ្ឋានប្រតិបត្តិការនៃអង្គភាពប្រឆាំងអំពើពុករលួយ។នៅក្នុងឱកាសនោះ ឯកឧត្តម ថេន សំវិសុទ្ធ អគ្គនាយកប្រៃសណីយ៍កម្ពុជា បានមានប្រសាសន៍ថា ការចុះ MOUនាពេលនេះ គឺជាការជួយសម្រួលបន្ថែមទៀតដល់ប្រពលរដ្ឋក្នុងការផ្ញើសំបុត្រ និងលិខិស្នាមផ្សេងៗពាក់ព័ន្ធនឹងអំពើពុករលួយផ្ញើមកកាន់ប្រៃសណីយ៍កម្ពុជានៅទូទាំង២៥រាជធានី-ខេត្ត ដោយមិនគិតថ្លៃ។ បន្ទាប់មកប្រៃសណីយ៍កម្ពុជានឹងយកសំបុត្រទាំងនោះ ទៅអង្គភាពប្រឆាំងអំពើពុករលួយ។ ការផ្ញើរសំបុត្រ ឫលិខិតស្នាមពាក្យបណ្តឹងផ្សេងៗ មកអង្គភាពប្រឆាំងអំពើពុករលួយ តាមរយៈប្រៃសណីយ៍កម្ពុជា សាធារណៈជនត្រូវសរសេរនៅលើខ្នងសំបុត្រតាមរបៀបដូចជា៖ទី១.ជូនអង្គភាពប្រឆាំងអំពើពុករលួយ អាសយដ្ឋានអាគារ ៥៤ មហាវិថីព្រះនរោត្តម សង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ។ ទី២.ជូនអង្គភាពប្រឆាំងអំពើពុករលួយ (មិនចាំចាច់បញ្ជាក់អាសយដ្ឋាន) និងទី៣. ជូនដល់អង្គភាពប្រឆាំងអំពើពុករលួយ ប្រអប់សំបុត្រ លេខ៦២៦ ឫ លេខ ៣២៨៤ ឫមិនចាំបាច់សរសេរពាក្យផ្ញើជូនអង្គភាពប្រឆាំងអំពើពុករលួយ គ្រាន់តែសរសេរពាក្យផ្ញើមកប្រអប់សំបុត្រលេខ ៦២៦ ឫ លេខ ៣២៨៤។គួរបញ្ជាក់ដែរថា អង្គភាពប្រឆាំងអំពើពុករលួយមានបេសកកម្មដឹកនាំការប្រយុទ្ធប្រឆាំង នឹងអំពើពុករលួយគ្រប់រូបភាព គ្រប់វិស័យ និងគ្រប់ជាន់ថ្នាក់នៅទូទាំងព្រះរាជាណាចក្រកម្ពុជា តាមរយៈការចាត់វិធានការអប់រំ បង្ការ ទប់ស្កាត់ និងអនុវត្តច្បាប់បង្រ្កាបបទល្មើសពុករលួយ ដោយមានការចូលរួមពីសាធារណៈជន និង ប្រតិបត្តិការ ៕ អត្ថបទ៖ទូច សោភ័ណ 

សម្តេចធិបតី៖ សមិទ្ធផលអាកាសយានដ្ឋានអន្តរជាតិតេជោ ជានិម្មិតរូបនៃការរីកចម្រើនរបស់ប្រទេសកម្ពុជា ក្រោមដំបូលសុខសន្ដិភាព

2024/03/12 03:03:54 pm        168
Facebook Telegram Linkin
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា មានប្រសាសន៍ថា សមិទ្ធផលអាកាសយានដ្ឋានអន្តរជាតិតេជោ ជានិម្មិតរូបនៃការរីកចម្រើនរបស់ប្រទេសកម្ពុជា ក្រោមដំបូលសុខសន្ដិភាព និងជាកម្លាំងចលករដ៏សំខាន់ក្នុងការបង្កើតការងារ និងបណ្តុះបណ្តាលសមត្ថភាព គាំទ្រដល់ការរីកចម្រើនក្នុងវិស័យទេសចរណ៍ វិស័យដឹកជញ្ជូន និងទ្បូជីស្ទីក ដល់តំបន់ជុំវិញ និងទូទាំងប្រទេស។ សម្តេចធិបតីនាយករដ្ឋមន្រ្តី មានប្រសាសន៍បែបនេះ ក្នុងឱកាសអញ្ជើញជាអធីបតី ក្នុងពិធី​សំណេះសំណាល និងចុះត្រួតពិនិត្យវឌ្ឍនភាពនៃគម្រោងអភិវឌ្ឍន៍​សាងសង់អាកាសយានដ្ឋាន​អន្តរជាតិតេជោ លំដាប់ថ្នាក់ 4F ដំណាក់កាលទីមួយ ស្ថិតក្នុងភូមិសាស្រ្ត ស្រុកកណ្ដាលស្ទឹង ខេត្តកណ្ដាល និងស្រុកបាទី ខេត្តតាកែវ នាព្រឹកថ្ងៃទី១២ ខែមីនា ឆ្នាំ ២០២៤។ មានប្រសាសន៍នៅក្នុងពិធីនោះ សម្តេចធិបតីនាយករដ្ឋមន្ត្រី បានធ្វើការអរគុណដល់ក្រសួង-ស្ថាប័នគ្រប់លំដាប់ថ្នាក់ ក្រុមហ៊ុនក្នុងនិងក្រៅប្រទេស ក៏ដូចជាបុគ្គលិក ​កម្មករ-កម្មការិនី ពាក់ព័ន្ធទាំងអស់ ដែលបានសហការគ្នាយ៉ាង​ជិតស្និទ្ធ និងសម្របសម្រួលឱ្យគម្រោងអភិវឌ្ឍន៍​សាងសង់អាកាសយានដ្ឋានអន្តរជាតិតេជោ លំដាប់ថ្នាក់ 4F នេះ ដំណើរការដោយរលូន ប្រកបដោយ​ស្មារតីបុរេសកម្ម និងទទួលខុសត្រូវខ្ពស់ ចាប់តាំងពីពេលចាប់ផ្ដើមរហូតដល់​សម្រេចបានលទ្ធផលជារូបរាងតាមផែនការ ហើយក៏គ្រោងនឹងបើកឱ្យដំណើរការនៅ​ឆមាសទីមួយឆ្នាំ ២០២៥ ខាងមុខ។ សម្តេចធិបតី បានគូសបញ្ជាក់ថា សមិទ្ធផលជាប្រវត្តិសាស្ត្រនេះ ជានិម្មិតរូបនៃការរីកចម្រើន​របស់​ប្រទេសកម្ពុជា ក្រោមដំបូលសុខសន្ដិភាព ​និងជាកម្លាំងចលករដ៏សំខាន់ក្នុងការបង្កើតការងារ និង​បណ្តុះបណ្តាលសមត្ថភាព​ គាំទ្រដល់ការរីកចម្រើនក្នុងវិស័យទេសចរណ៍ ​វិស័យដឹកជញ្ជូន និងទ្បូជីស្ទីក ​ដល់តំបន់ជុំវិញ និងទូទាំងប្រទេស​ ក៏ដូចជាការជួយជំរុញការអភិវឌ្ឍប៉ូលទិសនិរតី រួមជាមួយគម្រោងផ្លូវនាវាចរណ៍​ និងប្រព័ន្ធភស្ដុភារកម្មទន្លេបាសាក់ឈ្មោះថា “គម្រោងព្រែកជីកហ្វូណនតេជោ” ក្នុងតំបន់នេះ នាពេលអនាគតដ៏ខ្លីខាងមុខ សម្រាប់ទ្រទ្រង់​ដល់សេដ្ឋកិច្ចជាតិ និងលើកស្ទួយជីវភាពរស់នៅរបស់ប្រជាជន ។សម្តេចធិបតី ក៏បានរំឭកផងដែរថា គម្រោងអភិវឌ្ឍន៍​សាងសង់អាកាសយានដ្ឋាន​អន្តរជាតិតេជោនេះ កសាងឡើងក្រោមគំនិតផ្ដួចផ្ដើម ប្រកបដោយចក្ខុវិស័យវែងឆ្ងាយរបស់ សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តីនៃព្រះរាជាណាចក្រកម្ពុជា និង ជាប្រធាន​ក្រុមឧត្តមប្រឹក្សាផ្ទាល់ព្រះមហាក្សត្រ ដោយផ្អែកតាមផែនការមេច្បាស់លាស់។ កម្មវិធីសាងសង់អាកាសយានដ្ឋានអន្តរជាតិតេជោលំដាប់ថ្នាក់ 4F ត្រូវបានចែកចេញជា ៣ ដំណាក់កាលធំៗ គឺ ដំណាក់កាលទី ១ ពីឆ្នាំ ២០២០-ឆ្នាំ២០៣០ សម្រាប់អ្នកដំណើរ ១៣ លាននាក់ក្នុងមួយឆ្នាំ, ដំណាក់កាលទី ២ ពីឆ្នាំ ២០៣០-២០៥០ សម្រាប់អ្នកដំណើរ ៣០ លាននាក់ក្នុងមួយឆ្នាំ និង ដំណាក់កាលទី ៣ ក្រោយឆ្នាំ ២០៥០ សម្រាប់អ្នកដំណើរពី ៥០ លាននាក់ឡើងទៅក្នុងមួយឆ្នាំ៕

គ.ជ.ប ប្រកាសទទួលស្គាល់គណបក្សនយោបាយចំនួន៥ ឱ្យចូលរួមបោះឆ្នោតជ្រើសរើស​ក្រុមប្រឹក្សារាជធានី-ខេត្ត

2024/03/12 02:33:08 pm        133
Facebook Telegram Linkin
អ្នកនាំពាក្យគណៈកម្មាធិការជាតិរៀបចំការបោះឆ្នោត ហៅកាត់ គ.ជ.ប បានឱ្យដឹងថា គ.ជ.ប បានសម្រេចទទួលស្គាល់ជាផ្លូវការឱ្យគណបក្សនយោបាយចំនួន៥ចូលរួមការបោះឆ្នោតជ្រើសរើស​ក្រុមប្រឹក្សារាជធានី-ខេត្ត ក្រុង ស្រុក និងខណ្ឌ។ថ្លែងប្រាប់ BTV នៅថ្ងៃទី១២ ខែមីនា ឆ្នាំ២០២៤ ឯកឧត្តម ហង្ស ពុទ្ធា សមាជិក និង​ជា​អ្នក​នាំ​ពាក្យ ​គ.ជ.ប បានឱ្យដឹងថា ដើម្បីឆ្ពោះទៅរកការបោះឆ្នោតជ្រើសរើសក្រុមប្រឹក្សារាជធានី ក្រុម​ប្រឹក្សា​ខេត្ត ក្រុមប្រឹក្សាក្រុង ក្រុមប្រឹក្សាស្រុក និងក្រុមប្រឹក្សាខណ្ឌ អាណត្តិទី៤ ឆ្នាំ២០២៤ គិត​មក​ទល់​ពេល​នេះ មានគណបក្សនយោបាយចំនួន៥ហើយដែល គ.ជ.ប បានប្រកាស​ទទួល​ស្គាល់​ជា​ផ្លូវ​ការឱ្យចូលរួមប្រកួតប្រជែងការបោះឆ្នោតខាងមុខ ក្នងុនោះមាន គណបក្ស​ប្រជាជន​កម្ពុជា​ គណបក្សឆន្ទៈខ្មែរ គណបក្សកម្លាំងជាតិ គណបក្សហ្វ៊ុនស៊ិនប៉ិច និង​គណបក្ស​ខ្មែរ​រួបរួម​ជាតិ​។ ពាក់ព័ន្ធនឹងការស្នើចុះបញ្ជីបេក្ខជននេះ ឯកឧត្តម ហង្ស ពុទ្ធា បញ្ជាក់ថា តាមមណ្ឌលរាជធានី ខេត្ត ក្រុង ស្រុក និងខណ្ឌ ត្រូវបានគណៈកម្មការរាជធានី-ខេត្តរៀបចំការបោះឆ្នោត កំពុង​បន្ត​នីតិ​វិធី​លើ​ការ​ពិនិត្យការចុះបញ្ជីបេក្ខជនឈរឈ្មោះរបស់គណបក្សនយោបាយ ដោយសារ​គណបក្ស​សាម៉ី​មួយ​ចំនួន​ពុំទាន់រៀបចំឯកសារដាក់បេក្ខជនរបស់ខ្លួនបានត្រឹមត្រូវនៅឡើយទេ។អ្នក​នាំ​ពាក្យរូបនេះលើកឡើងថា ស្របតាមគោលការណ៍លទ្ធិប្រជាធិបតេយ្យ និងផ្អែក​តាម​ការ​ចូលរួម​ដោយ​ស្ម័គ្រចិត្ត ជាពិសេស​គណបក្ស​នយោបាយទាំង៥​ដែល​ចុះ​បញ្ជី​ចូល​រួម​ប្រកួត​ប្រជែង​ការ​​បោះឆ្នោតខាងមុខ បង្ហាញឱ្យ​ឃើញ​ថា​ទោះ​បី​គណបក្ស​នយោបាយ​មាន​លទ្ធភាព​ចូលរួម​ដាក់​បេក្ខជន​តិច ឬច្រើនក្តី តែក៏បានឆ្លុះបញ្ចាំងពីជំនឿចិត្តរបស់គណបក្សចំពោះការបោះឆ្នោត នឹង​រួម​ចំ​ណែក​ឱ្យ​កម្ពុជាទទួលបានបទពិសោធន៍ និងជំរុញឱ្យភាព​ជា​តំណាង​របស់​ប្រជាពលរដ្ឋ​កាន់​តែ​មាន​ភាព​សុក្រិត​ជាងមុន។សូមជម្រាបថា ការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុម​ប្រឹក្សា​ស្រុក ក្រុមប្រឹក្សាខណ្ឌ អាណត្តិទី៤ ឆ្នាំ២០២៤ នឹងប្រព្រឹត្តទៅនាថ្ងៃទី២៥ ខែឧសភា ឆ្នាំ​២០២៤​ខាងមុខ និងមានអង្គបោះឆ្នោតជាសមាជិកក្រុមប្រឹក្សាឃុំ-សង្កាត់ក្នុងមុខតំណែង៕ អត្ថបទ៖ សេក ឧត្តម

អតីតយុទ្ធជនជាង ៦០គ្រួសារក្នុងខេត្តកំពង់ធំនឹងទទួលបានដី និងផ្ទះជាអំណោយ​របស់សម្តេចតេជោ ហ៊ុន សែន

2024/03/12 02:23:57 pm        205
Facebook Telegram Linkin
កំពង់ធំ៖ ឯកឧត្តម នាយឧត្តមសេនីយ៍ កិត្តិសង្គហបណ្ឌិត គន់ គីម ទេសរដ្ឋមន្ត្រី អនុ​ប្រធាន​សមាគម​អតីតយុទ្ធជនកម្ពុជា នៅថ្ងៃទី១២ ខែមីនា ឆ្នាំ២០២៤ បានអញ្ជើញ​ជា​អធិបតី​ដឹកនាំ​កិច្ច​ប្រជុំ​ត្រួត​ពិនិត្យវឌ្ឍនភាពការងារ របស់សមាគមអតីតយុទ្ធជនកម្ពុជាខេត្តកំពង់ធំ។ នាឱកាសនោះ ឯកឧត្តមកិត្តិសង្គហបណ្ឌិត បានកោតសរសើរ និងវាយ​តម្លៃ​ខ្ពស់​ចំពោះ​ការ​ខិតខំ​ប្រឹងប្រែង​កន្លងមករបស់សមាគមខេត្ត។ ឯកឧត្តម មានប្រសាសន៍ថា តាងនាម សម្តេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា និង សម្តេចបវរធិបតីនាយករដ្ឋមន្ត្រីកម្ពុជា ក៏​ដូច​ជា​ថ្នាក់​ដឹកនាំគ្រប់ជាន់ថ្នាក់ មិនដែលភ្លេចនូវគុណូបការៈ ដែលបងប្អូនបានខិតខំនាពេលកន្លងមក គឺ​នៅ​តែចងចាំ នៅតែដឹងគុណជាប់ជានិច្ចចំពោះបងប្អូនអតីតយុទ្ធជន គ្រួសារអ្នកពលី-មរណៈ ជន​ពិការ និងនិវត្តន៍ជន មន្រ្តីរាជការស៉ីវិលទាំងអស់ និងបានជំរុញឱ្យអាជ្ញាធរពាក់ព័ន្ធទាំងអស់ បន្ត​យក​ចិត្តទុកដាក់លើជីវភាព និងការរស់នៅរបស់អតីតយុទ្ធជន។ ឯកឧត្តមកិត្តិសង្គហបណ្ឌិត មានប្រសាសន៍ទៀតថា តាមរយៈការប្រជុំត្រួតពិនិត្យ និង​ការ​ស្រង់​ស្ថិតិ​ទិន្នន័យរបស់អតីតយុទ្ធជនខេត្តកំពង់ធំ រកឃើញថា អតីតយុទ្ធជន គ្មានដី គ្មាន​ផ្ទះ មានដី ខ្វះផ្ទះ និងអតីតយុទ្ធជនកំពុងរស់នៅលើដីសាធារណៈមានប្រមាណ៦៥គ្រួសារ នឹង​ទទួល​បាន​ការ​រៀបចំ​សាងសង់ផ្ទះ និងដីបង្ករបង្កើនផល ដែលជា​អំណោយ​របស់​សម្តេច​តេជោប្រ​ធាន​សមាគម​អតីតយុទ្ធជន និងសម្តេចបវរធិបតី នាយករដ្ឋមន្ត្រី ប្រគល់ជូននាពេលខាងមុខ។ ឯកឧត្តមកិត្តិសង្គហបណ្ឌិត បានឱ្យដឹងទៀតថា ដោយឡែកចំពោះប្រជាពលរដ្ឋ​ជួប​ការ​លំបាក​ខ្វះ​ខាត​ហើយ​បាន​ទៅរស់នៅលើដីសម្បទានសង្គមកិច្ចរបស់អតីតយុទ្ធជន ចំនួន៧០គ្រួសារ បាន​យល់​ព្រម​ប្រគល់​ដីមកវិញ។ ឯកឧត្តមកិត្តិសង្គហបណ្ឌិត បន្តថា ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តី​ក្រសួង​រៀបចំ​ដែន​ដី នគរូបនីយកម្ម និងសំណង់ និងជាអនុប្រធានសមាគមអតីតយុទ្ធជនកម្ពុជា បាន​សន្យា​រក​មូល​និធិ​សម្រាប់​ជួយ​កសាង​ផ្ទះ​ជូន​ដល់​អតីត​យុទ្ធជនក្រីក្រ​មុ​ន​គេ​បង្អស់​ចាប់ពី​​ឆ្នាំ​២០២៤​ ដល់២០២៨ ដើម្បីជូនពួកគាត់បានរស់នៅ ។ ក្នុងនាមជាសេនាធិការរបស់សម្តេចតេជោលើការងារអតីតយុទ្ធជននេះ ឯកឧត្តមកិត្តិ​សង្គហ​បណ្ឌិត គន់ គីម បានបន្តចុះត្រួតពិនិត្យ ស្រង់ស្ថិតិអតីតយុទ្ធជន ខ្វះដីខ្វះផ្ទះ មានដី ខ្វះផ្ទះ និង​អតីត​យុទ្ធជនកំពុងរស់នៅលើដីសាធារណៈនៅតាមបណ្តាខេត្តជុំវិញបឹងទន្លេសាបមុនគេ និង​បន្ត​ចុះ​តាម​បណ្តាខេត្តទូទាំងប្រទេស ដើម្បីធ្វើបច្ចុប្បន្នភាពអតីតយុទ្ធជនក្រីក្រពិតប្រាកដ សម្រាប់​ធ្វើជា​របាយការណ៍ជូន ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ ដើម្បីដោះស្រាយបញ្ហាជូនដល់អតីតយុទ្ធជនយើង៕

ឧបនាយករដ្ឋមន្រ្តី ស៊ុន ចាន់ថុល ស្នើសហភាពអឺរ៉ុបជំរុញអ្នកវិនិយោគបន្ថែមពីអឺរ៉ុបមកកម្ពុជា

2024/03/12 02:10:32 pm        183
Facebook Telegram Linkin
ភ្នំពេញ៖ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅថ្ងៃទី១១ ខែមីនា ឆ្នាំ២០២៤ បានអនុញ្ញាតឱ្យលោក Peteris Ustubs នាយក​សម្រាប់​មជ្ឈឹម​បូព៌ា អាស៊ី និងបាស៊ីហ្វិក នៃអគ្គនាយកដ្ឋានភាពជាដៃគូអន្តរជាតិ (DG INTPA) សហភាពអ៊ឺរ៉ុប ព្រម​ទាំង​ឯកឧត្ដម Igor Driesmans ឯកអគ្គរដ្ឋទូតវិសាមញ្ញ និង​ពេញ​សមត្ថភាព​នៃ​សហភាព​អឺរ៉ុប​ប្រចាំ​ព្រះរាជាណាចក្រកម្ពុជា និងសហការី ចូលជួបសម្ដែងការគួរសម និងពិភាក្សាការងារ។ឯកឧត្តមឧបនាយករដ្ឋមន្ត្រី បានថ្លែង​អំណរ​គុណ​ជូន​ចំពោះ​សហភាព​អឺរ៉ុប​ដែល​បាន​គាំទ្រ​លើ​ការផ្ដល់ជំនួយអភិវឌ្ឍន៍ កិច្ចសហប្រតិបត្តិការទ្វេភាគីនានា ជាមួយរាជ​រដ្ឋាភិបាល​កម្ពុជា​។ យ៉ាងណាមិញ ដោយសង្កេតឃើញថាស្ថានភាពកិច្ចសហប្រតិបត្តិការវិនិយោគរវាងកម្ពុជា-សហ​ភាពអឺរ៉ុប ហាក់មានកម្រិតតិចតួចនៅឡើយ គឺស្ថិតក្នុងរង្វង់ទឹកប្រាក់ប្រមាណ ៥៤០លានដុល្លារ បាន​ពី​៦២គម្រោងវិនិយោគមានលក្ខណៈសម្បត្តិគ្រប់គ្រាន់ គិតចាប់ពីឆ្នាំ១៩៩៤ ដល់បច្ចុប្បន្ន ឯកឧត្តម​ឧបនាយករដ្ឋមន្ត្រី បានជម្រាបជូនសហភាពអឺរ៉ុបអំពីជំហររបស់កម្ពុជា ដែលបើកចំ​ហរ​ស្វាគម​ន៍​រាល់គ្រប់វិនិយោគិនទាំងអស់ចូលមកវិនិយោគលើគ្រប់វិស័យ និងមានការលើក​ទឹក​ចិត្ត​លើ​វិស័យ​មួយចំនួនផងដែរ។ ឯកឧត្តម ឧបនាយករដ្ឋមន្រ្តី បញ្ជាក់ថា កម្ពុជាបាន​ទទួល​វិនិយោគិន​រួចរាល់​ពី​ប្រទេស​នានា​រួម​មាន​សហរដ្ឋអាមេរិក កូរ៉េ ជប៉ុន ចិន ព្រមទាំងប្រទេសផ្សេងៗជាច្រើនទៀត ដែលក្នុងនោះ​កម្ពុជា​ចង់​ឱ្យ​វិនិយោគិនពីតំបន់អឺរ៉ុបចូលមកវិនិយោគនៅកម្ពុជាបន្ថែមទៀតផងដែរ។បន្ថែមពីនេះ ឯកឧត្តមឧបនាយករដ្ឋមន្ត្រី បានជម្រាបជូនតំណាងសហភាពអឺរ៉ុប អំពីផែនការ​អភិវឌ្ឍន៍​ជាតិ​នានា​របស់​រដ្ឋាភិបាល​ដើម្បី​គាំទ្រ​ដល់​វិស័យ​ឯកជន​រួម​មាន​លើ​វិស័យ​ហេដ្ឋា​រចនា​សម្ព័ន្ធ ការសាងផ្លូវជាតិ ផ្លូវល្បឿនលឿន ព្រលានយន្តហោះ កំពង់ផែ និង​ពិសេស​ផែន​ការ​មេ​គ្រប់​ជ្រុង​ជ្រោយ​ស្ដីពីប្រព័ន្ធដឹកជញ្ជូនអន្តរមធ្យោបាយ និងភស្ដុភារកម្មកម្ពុជា ២០២៣-២០៣៣ មាន​ចំនួន ១៧៤គម្រោង ដែល​ក្រុម​ហ៊ុន​ឯកជន​ពី​សហភាព​អឺរ៉ុប​អាច​ពិនិត្យ​លទ្ធភាព​ក្នុង​ការ​វិនិយោគ​បាន​ផង​ដែរ។ បន្ថែមពីនេះទៀត ឯកឧត្តម ឧបនាយករដ្ឋមន្រ្តី លើកឡើងថា ស្របតាម​ផែន​ការរបស់​រាជ​រដ្ឋាភិបាល ដើម្បីជំរុញផ្លាស់ប្ដូរកម្ពុជាពីការប្រើកម្លាំងពលកម្ម ទៅជា​ការ​ប្រើប្រាស់​ជំនាញ​កម្រិត​មធ្យម និងជំនាញបច្ចេកទេសកម្រិតខ្ពស់ ព្រមទាំង​ការ​យក​ចិត្ត​ទុក​ដាក់​ក្នុង​ការ​អ​ភិវឌ្ឍ​ធន​ធាន​មនុស្ស កម្ពុជាក៏បានដាក់ចេញកម្មវិធីបណ្តុះបណ្តាលជំនាញវិជ្ជាជីវៈ និង​បច្ចេក​ទេស​ទៅ​ដល់​យុវជន​ចំនួន​ពីគ្រួសារក្រីក្រនិងងាយរងគ្រោះ ១,៥លាននាក់ ដើម្បីបង្កើន​កម្រិត​សមត្ថភាព​ផង​ដែរ​។លោក Peteris Ustubs បាន​ឆ្លៀត​ឱកាស​នេះ​ដើម្បី​អបអរ​សាទរ​ដល់​លទ្ធ​ផល​ដ៏​ល្អ​ប្រសើរ​លើ​ការ​អភិវឌ្ឍ​ជាតិ​ដែល​ទទួលបានពីកិច្ចខិតខំប្រឹងប្រែងរបស់កម្ពុជា។ លោក Peteris Ustubs បាន​លើក​ឡើង​ផង​ដែរ​អំពី​ទស្សន​កិច្ច​ទាក់​ទាញ​វិនិយោគិន​ដែល​កម្ពុជា​អាច​រៀបចំ​បាន​ក្នុង​សហភាព​អ៊ឺរ៉ុប​ ដែលមាន ២៧ប្រទេស ដោយក្នុង​នោះលោកបាន​លើក​ទឹក​ចិត្ត​កម្ពុជា​ឱ្យ​ជ្រើស​យក​វិស័យ​អាទិភាព​សំខាន់ៗ ដើម្បីបង្ហាញជូនវិនិយោគិន។ លោក Peteris Ustubs ក៏បានបន្តជម្រាបជូន​ពី​ការ​យក​ចិត្តទុកដាក់របស់សហភាពអឺរ៉ុបដែលបច្ចុប្បន្នផ្ដោតលើគម្រោងអភិវឌ្ឍន៍បៃតង និង​បច្ចេកវិ​ទ្យា​៕

ឯកឧត្តម ម៉ៅ សុផាន់ ចុះជួបជាមួយប្រជាពលរដ្ឋចំនួន ១៤៣គ្រួសារ រស់នៅក្នុងឃុំស្រយង់ ស្រុកគូលែន

2024/03/12 01:18:49 pm        295
Facebook Telegram Linkin
ឯកឧត្តម ម៉ៅ សុផាន់ ប្រធានក្រុមការងាររាជរដ្ឋាភិបាល ចុះមូលដ្ឋានខេត្តព្រះវិហារ អមដំណើរដោយឯកឧត្តម គីម រិទ្ធី អភិបាល នៃគណៈអភិបាលខេត្ត នារសៀលថ្ងៃទី១១ ខែមីនា ឆ្នាំ២០២៤ បានអញ្ជើញចុះជួបសំណេះសំណាលជាមួយប្រជាពលរដ្ឋរស់នៅក្នុងភូមិម្រេច ឃុំស្រយង់ ស្រុកគូលែន ខេត្តព្រះវិហារ ។ ក្នុងឱកាសនោះក៏មានការអញ្ជើញចូលរួមពីសំណាក់ ឧត្តមសេនីយ៍ឯក ស្រី ឌឹក មេបញ្ជាការកងពលធំអន្តរគមន៍លេខ៣ ​កងកម្លាំងទាំង៣ ប្រធានមន្ទីរពាក់ព័ន្ធ និងអាជ្ញាធរមូលដ្ឋានជាច្រើនរូបទៀត។ក្នុងជំនួបសំណេះសំណាលជាមួយប្រជាពលរដ្ឋនាឱកាសនោះ ឯកឧត្តម គីម រិទ្ធី បានណែនាំអោយមន្ទីរជំនាញកំណត់តំបន់ធ្វើការវិនិច្ឆ័យ សម្រាប់ការចុះបញ្ជីដីធ្លីជាលក្ខណៈប្រព័ន្ធ និងធ្វើការចុះវាស់វែងដីធ្លីជូនប្រជាពលរដ្ឋទាំង ១៤៣គ្រួសារ ដែលរស់នៅក្នុងតំបន់ខាងលើ​ដើម្បីចេញប្លង់កម្មសិទ្ធិជូនអោយបានឆាប់ៗនេះ។បន្ថែមពីនេះឯកឧត្តម ម៉ៅ សុផាន់ ប្រធានក្រុមការងាររាជរដ្ឋាភិបាល ចុះមូលដ្ឋានខេត្តព្រះវិហារ ក៏បានសន្យាថាហ្នឹងធ្វើការអភិវឌ្ឍហេដ្ឋារចនាសម្ព័ន្ធផ្លូវថ្នល់ សាងសង់អណ្ដូងទឹក សាលារៀន និងតបណ្ដាញអគ្គីសនីអោយបានចូលដល់ ជូនប្រជាពលរដ្ឋដែលរស់នៅក្នុងតំបន់នេះផងដែរ៕

សម្តេចធិបតី ផ្ដាំទៅវិទ្យុប្រឆាំងនៅក្រៅប្រទេសកុំបង្ខូចឈ្មោះមន្រ្ដី និងការអភិវឌ្ឍរបស់កម្ពុជា ពិសេសពាក់ព័ន្ធ «គម្រោងព្រែកជីកហ្វូណនតេជោ»

2024/03/12 01:11:44 pm        243
Facebook Telegram Linkin
ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានថ្លែងថា ការប្រើពាក្យមន្រ្តីជាន់ខ្ពស់ក្រសួងសេដ្ឋកិច្ចដោយវិទ្យុមួយនៅក្រៅប្រទេស គឺមិនមានវិជ្ជាជីវៈនោះទេ ហើយមន្រ្តីរបស់រាជរដ្ឋាភិបាល គឺបានយល់ច្បាស់ពីការអភិវឌ្ឍ « គម្រោងព្រែកជីកហ្វូណនតេជោ» ដែលនឹងផ្តល់ផលប្រយោជន៍ដល់សេដ្ឋកិច្ចជាតិ។សម្ដេចធិបតី បានបញ្ជាក់បែបនេះ ក្នុងឱកាសអញ្ជើញត្រួតពិនិត្យវឌ្ឍនភាពនៃការសាងសង់ព្រលានយន្តហោះអន្តរជាតិតេជោ ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល នៅព្រឹកថ្ងៃទី១២ ខែមីនា ឆ្នាំ២០២៤នេះ។ សម្តេចធិបតី ហ៊ុន ម៉ាណែត បានគូសបញ្ជាក់ថា គម្រោងព្រែកជីកហ្វូណនតេជោ មិនមែនខ្ចីប្រាក់​ពីបរទេសមក​ធ្វើការអភិវឌ្ឍនោះទេ គឺធ្វើឡើងតាមរយៈ BOT ហើយសម្តេចក៏មិនជឿថា មន្រ្តីរាជរដ្ឋាភិបាល​ល្ងង់ដល់ថ្នាក់មិនស្គាល់ពាក្យ BOT នោះទេ។សម្តេចធិបតី ហ៊ុន ម៉ាណែត ក៏បានសង្កត់ធ្ងន់ថា រាជរដ្ឋាភិបាលមានចក្ខុវិស័យខ្ពស់ក្នុងគម្រោង​អភិវឌ្ឍន៍​នានា ទាំងផ្លូវអាកាស ផ្លូវទឹក និងផ្លូវគោកដើម្បីជំរុញកំណើន​សេដ្ឋកិច្ចនិង​បម្រើផលប្រយោជន៍ប្រជាពលរដ្ឋ៕

សម្តេចធិបតី បង្ហាញមោទនភាពចំពោះសមិទ្ធផលព្រលានយន្តហោះអន្តរជាតិតេជោ នៅលើទឹកដីកម្ពុជា

2024/03/12 01:07:04 pm        133
Facebook Telegram Linkin
សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បង្ហាញមោទនភាព និងអារម្មណ៍រំភើប ចំពោះសមិទ្ធផលព្រលានយន្តហោះអន្តរជាតិតេជោនៅលើទឹកដីកម្ពុជា ក្នុងឱកាសអញ្ជើញពិនិត្យការសាងសង់អាកាសយានដ្ឋានអន្តរជាតិតេជោ កណ្តាលស្ទឹង ខេត្តកណ្ដាល ខណៈការសាងសង់ជំហានទី១ សម្រេចបានជាង ៦៦ ភាគរយហើយ និងគ្រោងដាក់ឱ្យប្រើប្រាស់នៅឆ្នាំក្រោយ។ សម្ដេចធិបតី នាយករដ្ឋមន្រ្ដី មានប្រសាសន៍ក្នុងឱកាសអញ្ជើញត្រួតពិនិត្យវឌ្ឍនភាពនៃការសាងសង់ព្រលានយន្តហោះអន្តរជាតិតេជោ នៅព្រឹកថ្ងៃទី១២ ខែមីនា ឆ្នាំ២០២៤នេះ ដោយបានកោតសរសើរ និងបង្ហាញមោទនភាពចំពោះសមិទ្ធផលព្រលានយន្តហោះអន្តរជាតិតេជោ នៅលើទឹកដីនៃព្រះរាជាណាចក្រកម្ពុជា។ សម្ដេចធិបតីបញ្ជាក់ថា ការសាងសង់អាកាសយានដ្ឋានអន្តរជាតិតេជោ គឺត្រូវបន្តរហូតទោះបីជាអំឡុងពេលការផ្ទុះរីករាលដាលជំងឺកូវីដ-១៩ ក៏ដោយ គឺមិនបានឈប់សម្រាកនោះទេ។ ខណៈវឌ្ឍនភាពជំហានទី១ នៃការសាងសង គឺសម្រេចបានជាង ៦៦% និងបានចំណាយទឹកប្រាក់សរុបសម្រាប់ការសាងសង់ប្រមាណ ១ ពាន់លានដុល្លារហើយ។ក្នុងឱកាសនោះសម្ដេចធិបតី នាយករដ្ឋមន្រ្ដី បានថ្លែងអំណរគុណដល់ក្រសួង ស្ថាប័ន អ្នកវិនិយោគិនដែលបានបណ្ដាក់ទុន និងកម្មករ អ្នកសាងសង់ព្រលានយន្តហោះនេះទាំងអស់ ដែលបានរួមគ្នាធ្វើការដោះស្រាយបញ្ហាផ្សេងៗ និងធ្វើឱ្យការការសាងសង់អាកាសយានដ្ឋាន​អន្តរជាតិតេជោ អាចដំណើរការទៅបានដោយរលូន និងប្រកបដោយសមិទ្ធផលរហូត​មកទល់ពេលនេះ។សម្ដេចធិបតី នាយករដ្ឋមន្រ្ដីបញ្ជាក់ថា ប្រទេសកម្ពុជាធ្លាប់មានព្រលានយន្តហោះខ្នាតធំ កាលពី ៦៥ឆ្នាំមុន ប៉ុន្តែនៅឆ្នាំខាងមុខនេះប្រទេសកម្ពុជា នឹងបើកដំណើរការព្រលានយន្តហោះខ្នាតធំ​ជាប្រវត្តិសាស្រ្ត​មួយទៀត។ សម្តេចធិបតីថ្លែងថា សម្តេចធ្លាប់បានឃើញព្រលានយន្តហោះធំ​ច្រើនហើយ​ តែមិនរំភើបដូចឃើញព្រលានយន្តហោះអន្តរជាតិតេជោ នៅលើទឹកដីកម្ពុជាបែប​នេះឡើយ ពីព្រោះសមិទ្ធផលនេះ ​គឺជា របស់ខ្មែរ នៅលើទឹកដីកម្ពុជា។ សូមជម្រាបថា គម្រោងអភិវឌ្ឍសាងសង់អាកាសយានដ្ឋានអន្តរជាតិតេជោ លំដាប់ថ្នាក់ 4F ត្រូវបានបែងចែកជា ៣ដំណាក់កាល។ ដំណាក់កាលទី១ អាកាសយានដ្ឋានអន្តរជាតិនេះ អាចទទួលអ្នកដំណើរបានប្រមាណ ១៣ លាននាក់ក្នុងមួយឆ្នាំ, ដំណាក់កាលទី២ អាចទទួល​បានអ្នកដំណើរ ៣០លាននាក់ក្នុង១ឆ្នាំ និងដំណាក់កាលទី៣ អាចទទួលបានអ្នកដំណើររហូតដល់ ៥០ លាននាក់ក្នុងមួយឆ្នាំ។ កាលានុវត្តភាពថ្មីនេះ នឹងក្លាយជាសក្តានុពលស្រូបទាញដ៏ខ្លាំងក្លា និងសំខាន់សម្រាប់វិស័យទេសចរណ៍ក្នុងភូមិសាស្ត្ររាជធានីភ្នំពេញ និយាយដោយឡែក ព្រមទាំងវិស័យទេសចរណ៍នៅទូទាំងប្រទេស និយាយជារួម។ បន្ថែមពីនេះ​ក៏នឹងអាចទាក់ទាញដល់វិនិយោគិន មកវិនិយោគនៅកម្ពុជា រួមទាំងផ្តល់ប្រយោជន៍​សេដ្ឋកិច្ចដល់ប្រជាពលរដ្ឋផងដែរ៕អត្ថបទ៖ វ៉ន ដារ៉ា

បណ្ដាញសង្គម

ព័ត៌មានថ្មីៗ

ឯកឧត្តម ឌី វិជ្ជា និងលោកជំទាវ ហ៊ុន ម៉ាណា អញ្ជើញនាំយកទេយ្យវត្ថុ ប្រគេនព្រះសង្ឃ និងចែកអំណោយប្រជាពលរដ្ឋ នៅស្រុកភ្នំស្រួច ខេត្តកំពង់ស្ពឺ
05/31/2026 07:05 PM
Facebook Telegram Linkin
ឯកឧត្តមកិត្តិសង្គហបណ្ឌិត គន់ គីម អញ្ជើញជួបប្រជាពលរដ្ឋភៀសសឹក និងពិនិត្យទីតាំងរៀបចំផ្សារបណ្តោះអាសន្ន ក្នុងខេត្តបន្ទាយមានជ័យ
05/31/2026 06:05 PM
Facebook Telegram Linkin
ក្រសួងការងារ៖ ខេត្តស្ថិតក្នុងតំបន់ទំនាបកណ្ដាលចំនួន៣ មាន​ឱកាស​ការ​ងារ​ជាង ៨,០០០​កន្លែង កំពុង​រង់​​ចាំអតីត​​ពលករ​​ត្រឡ​ប់​មក​ពី​ថៃ និង​អ្នកកំ​ពុង​ស្វែងរកកា​រងា​រ​ធ្វើ
05/31/2026 06:05 PM
Facebook Telegram Linkin
ក្រសួងការងារ៖ នៅខេត្តជាប់សមុទ្រទាំង៤ មានឱកាសកា​រងារជិត ៧,០០០កន្លែង ដែល​កំពុងរង់ចាំ​អតីត​ពលករត្រឡ​ប់ម​កពីថៃ និង​អ្នក​​កំពុង​​ស្វែង​រក​ការ​ងារ​ធ្វើ
05/31/2026 06:05 PM
Facebook Telegram Linkin
ឯកឧត្តមឧបនាយករដ្ឋមន្ត្រី ហ៊ុន ម៉ានី៖ វិញ្ញាសាតាក់តែងចប់ភ្លាម ប្រឡងភ្លាមតែម្តង
05/31/2026 03:05 PM
Facebook Telegram Linkin
រដ្ឋមន្រ្តីការពារជាតិជប៉ុនលោក Koizumi ច្រានចោល​ការចោទប្រកាន់ពីយោធានិយមថ្មី
05/31/2026 03:05 PM
Facebook Telegram Linkin
ក្រសួងការងារ៖ ខេត្តចំនួន៤ នៅភូមិភាគ​ឦសាន្ត មានឱកាសកា​រងារជិត ៤,០០០​កន្លែង កំពុងរង់​ចាំអតីតព​ល​ករត្រឡប់​មកពីថៃ និងអ្នក​​កំពុង​ស្វែង​រ​កការងារធ្វើ
05/31/2026 02:05 PM
Facebook Telegram Linkin
ប្រមុខ WHO ទទួចសុំឲ្យមានការបញ្ចុះសពដោយសុវត្ថិភាព អំឡុងធ្វើដំណើរទៅកាន់តំបន់រីករាលដាលឆ្លងជំងឺអេបូឡា
05/31/2026 01:05 PM
Facebook Telegram Linkin
អាជ្ញាធរជាតិអប្សរា និង JQA បិទបញ្ចប់កម្មវិធីអប់រំបរិស្ថានសម្រាប់កុមារ ឆ្នាំ២០២៦ និងប្រគល់​រង្វាន់​ដល់​សិស្សឆ្នើម
05/31/2026 01:05 PM
Facebook Telegram Linkin
អ៊ីរ៉ង់និយាយថា កិច្ចប្រជុំជាមួយអាមេរិកកំពុងបន្ត តែពុំឈានដល់កិច្ចព្រមព្រៀងផ្តាច់ព្រ័ត្រនោះទេ
05/31/2026 01:05 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.