នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ស្ពានមិត្តភាពកម្ពុជា-ចិន មេគង្គក្រចេះ នឹងបើកជូនពលរដ្ឋឆ្លងកាត់ចាប់ពីថ្ងៃទី១មេសា ឆ្នាំ​២០២៦​តទៅ
សម្តេចតេជោ ហ៊ុន សែន ដឹកនាំកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា ដើម្បី​សម្រេច​លើ​របៀប​វារៈចំនួន៧
បេក្ខជន និងសកម្មជនគណបក្សភ្លើងទៀនចំនួន៤នាក់នៅស្រុកកណ្តាលស្ទឹង ចូលរួម​ជីវភាពនយោបាយ ជាមួយគណបក្សប្រជាជនកម្ពុជា
ស្ថានីយប្រព្រឹត្តកម្មទឹកកខ្វក់ក្រុងកំពង់ឆ្នាំងតម្លៃជាង ១៩លានដុល្លារ ត្រូវបាន​សម្ពោធ​ដាក់​ឲ្យ​ប្រើ​ប្រាស់​ជាផ្លូ​វការ​នៅថ្ងៃនេះ

នយោបាយ​ និង ការអភិវឌ្ឍន៍

បក្សនយោបាយនានា ប្រកាសសាទរជ័យជម្នះ គណបក្សប្រជាជន​ដែលទទួលបានការ​គាំទ្រច្រើន​ពីការបោះឆ្នោតព្រឹទ្ធសភា

2024/02/26 12:14:13 pm        226
Facebook Telegram Linkin
បណ្តាគណបក្សនយោបាយនានា ដែលជាសម្ព័ន្ធភាពរបស់គណបក្សប្រជាជនកម្ពុជា បាន​ផ្ញើសារ​លិខិត​ប្រកាស​អបអរសាទរចំពោះជ័យជម្នះរបស់គណបក្សប្រជាជនកម្ពុជា ដែលទទួល​បាន​ការ​គាំទ្រ​យ៉ាង​ច្រើន​លើសលប់​ពីអង្គបោះឆ្នោត ក្នុងការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ នាថ្ងៃទី២៥ ខែកុម្ភៈ ឆ្នាំ២០២៤ម្សិលមិញនេះ។តាមរយៈលិខិតរបស់គណបក្សនយោបាយនានា ដែលទូរទស្សន៍BTVទទួលបាននាព្រឹកថ្ងៃទី២៦ ខែកុម្ភៈ ឆ្នាំ២០២៤នេះ បានលើកឡើងស្រដៀងគ្នាថា «ជ័យជម្នះដែលគណបក្សប្រជាជនកម្ពុជា ទទួលបានសំឡេងយ៉ាងច្រើនលើសលប់នេះ គឺបានបង្ហាញ និងឆ្លុះបញ្ចាំងនូវភាពឈ្លាសវៃមោះ មុត​​របស់សម្តេចតេជោ ហ៊ុន សែន ជាប្រធានគណបក្សប្រជាជនកម្ពុជា ដែល​បាន​ដឹកនាំ​ប្រកប​ដោយ​គតិ​បណ្ឌិតត្រឹមត្រូវ និងស្មារតីសាមគ្គីបង្រួបបង្រួមដើម្បីឧត្តមប្រយោជន៍ជាតិ និងរក្សា​ការពារ សុខសន្តិភាព ជូនប្រទេសជាតិឲ្យបានជានិរន្តរ៍ផងដែរ»។សូមបញ្ជាក់ថាលទ្ធផលបឋម នៃការបោះឆ្នោតជ្រើសតាំង សមាជិកព្រឹទ្ធសភា គណបក្ស​ប្រជាជន​កម្ពុជា ទទួលបានសំឡេងឆ្នោតសរុប ១០,០៥២សំឡេងស្មើនឹង៥៥អាសនៈ ខណៈ​គណបក្ស​ឆន្ទៈ​ខ្មែរ​ទ​ទួលបានសំឡេង ១,៣៩៤សំឡេង ស្មើនឹង៣អាសនៈ។ នេះបើតាមការបញ្ជាក់របស់គណៈកម្មាធិការជាតិរៀបចំការបោះឆ្នោតកាលពីល្ងាចម្សិលមិញនេះ។គណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា គណបក្សប្រជាជនកម្ពុជា ទទួល​បាន​សំឡេងគាំទ្រយ៉ាងច្រើនលើសលប់នៅក្នុងមណ្ឌលភូមិភាគទាំង៨ ដោយ​ទទួល​បាន​សំឡេង​ឆ្នោត​សរុបចំនួន១០,០៥២សំឡេង និងទទួលបានអាសនៈចំនួន៥៥អាសនៈ និង​គណបក្ស​ឆន្ទៈខ្មែរ ទទួលបានសំឡេងឆ្នោត១,៣៩៤សំឡេងទទួលបានអាសនៈចំនួន៣អាសនៈ ដោយឡែកគណបក្សហ៊្វុនស៊ិនប៉ិច និងគណបក្សកម្លាំងជាតិ មិនទទួលបានអាសនៈនោះទេ៕ អត្ថបទ ៖ បាន ចក់

អ៊ុយក្រែន បង្ហាញលទ្ធភាពនៃការអញ្ជើញរុស្ស៊ី ឱ្យចូលរួមកិច្ចប្រជុំសន្តិភាព

2024/02/26 11:02:02 am        169
Facebook Telegram Linkin
មន្ត្រីជាន់ខ្ពស់អ៊ុយក្រែនម្នាក់បាននិយាយកាលពីថ្ងៃអាទិត្យ (២៥ កុម្ភៈ) ថាអ៊ុយក្រែន និងបណ្ដាដៃគូបរទេសរបស់ខ្លួនអាចនឹងអញ្ជើញរុស្ស៊ី ឱ្យចូលរួមកិច្ចប្រជុំសន្តិភាពនាពេលអនាគត ដើម្បីពិភាក្សាអំពីការបញ្ចប់ការឈ្លានពានរបស់ទីក្រុងមូស្គូ រយៈពេលពីរឆ្នាំលើរបបរបស់ទីក្រុងគីវ។លោក អាន់ឌ្រី យើម៉ាក (Andriy Yermak) ប្រធានបុគ្គលិករបស់លោកប្រធានាធិបតី ហ៊្សេឡិនស្គី បាននិយាយថា ប្រទេសស្វីសនឹងធ្វើជាម្ចាស់ផ្ទះនៃកិច្ចប្រជុំកំពូលពិភាក្សាអំពីចក្ខុវិស័យសម្រាប់សន្តិភាពដោយប្រធានាធិបតីអ៊ុយក្រែន លោក វ្ល៉ូឌីមី ហ៊្សេឡិនស្គី (Volodymyr Zelenskiy) ដែលផែនការនេះអាចត្រូវបានប្រគល់ឱ្យរុស្ស៊ី ក្នុងអំឡុងពេលកិច្ចប្រជុំលើកទីពីរនៅពេលក្រោយ។លោ ហ៊្សេឡិនស្គី ធ្លាប់បានប្រកាសជាលើកដំបូងនូវរូបមន្តសន្តិភាពរបស់ខ្លួននៅឯកិច្ចប្រជុំកំពូលមួយកាលពីខែវិច្ឆិកា ឆ្នាំ២០២២ នៃក្រុមប្រទេសសេដ្ឋកិច្ចធំៗចំនួន ២០ ។ ផែនការនោះអំពាវនាវឱ្យមានការស្ដារឡើងវិញនូវបូរណភាពទឹកដីរបស់អ៊ុយក្រែន និងការដកទ័ពរុស្ស៊ីទាំងស្រុង។រដ្ឋធានីគីវ ប្រកាន់ខ្ជាប់ថាខ្លួននឹងមិនពិភាក្សាជាមួយទីក្រុងមូស្គូ ទេរហូតទាល់តែទាហានរុស្ស៊ី ទាំងអស់បានចាកចេញពីទឹកដីអ៊ុយក្រែន។ វិមានក្រឹមឡាំងបាននិយាយថា មិនមានមូលដ្ឋានបច្ចុប្បន្នសម្រាប់កិច្ចចរចាសន្តិភាពរវាងរុស្ស៊ី និងអ៊ុយក្រែនឡើយ ហើយថាផែនការសន្តិភាពរបស់ទីក្រុងគីវ គឺមិនទំនងទាល់តែសោះ ព្រោះមិនបានរាប់បញ្ចូលរុស្ស៊ី៕

លោក Zelenskiy និយាយថា អ៊ុយក្រែនមានផែនការសម្រាប់ការវាយបកថ្មីប្រឆាំងនឹងរុស្ស៊ី

2024/02/26 10:58:50 am        87
Facebook Telegram Linkin
ប្រធានាធិបតីអ៊ុយក្រែន លោក វ្ល៉ូឌីមី ហ៊្សេឡិនស្គី (Volodymyr Zelenskiy) បាននិយាយកាលពីថ្ងៃអាទិត្យ (២៥ កុម្ភៈ) ថាប្រទេសរុស្ស៊ី កំពុងរៀបចំការវាយលុកថ្មីមួយប្រឆាំងនឹងអ៊ុយក្រែន ដែលចាប់ផ្តើមនៅចុងខែឧសភា ឬរដូវក្តៅ ប៉ុន្តែទីក្រុងគីវ ក៏មានផែនការសមរភូមិច្បាស់លាស់មួយរបស់ខ្លួនប្រឆាំងទល់នឹងរុស្ស៊ីវិញផងដែរ។ថ្លែងរយៈពេលមួយថ្ងៃបន្ទាប់ពីខួបលើកទី២ នៃការលុកលុយរបស់រុស្ស៊ី លើអ៊ុយក្រែន លោក ហ៊្សេឡិនស្គី បាននិយាយថា វាមានសារៈសំខាន់ណាស់សម្រាប់ទីក្រុងគីវ និងសម្ព័ន្ធមិត្តលោកខាងលិចរបស់ខ្លួនក្នុងការរក្សាការរួបរួម និងបានរំលឹកឡើងវិញថា ជ័យជំនះរបស់អ៊ុយក្រែន គឺអាស្រ័យលើការបន្តគាំទ្ររបស់លោកខាងលិច។លោក ហ៊្សេឡិនស្គី បានប្រាប់អ្នកយកព័ត៌មាននៅទីក្រុងគីវថា «យើងនឹងត្រៀមខ្លួនសម្រាប់ការវាយលុករបស់រុស្ស៊ី ហើយកងទ័ពក៏នឹងរៀបចំផែនការវាយបកទៅវិញដែរ»។រយៈពេលពីរឆ្នាំនៅក្នុងសង្រ្គាម កងទ័ពរបស់ទីក្រុងមូស្គូ បានបន្តវាយលុកនៅតាមបណ្តោយសមរភូមិជួរមុខចម្ងាយ ៩៦០ គីឡូម៉ែត្រនៅភាគខាងកើត និងខាងត្បូងរបស់ប្រទេសអ៊ុយក្រែន ហើយបញ្ហាជាច្រើនបានប្រមូលផ្តុំលើអ៊ុយក្រែនរាប់ចាប់ពីកង្វះគ្រាប់កាំភ្លើងធំ និងតម្រូវការមីស៊ីលរយៈចម្ងាយឆ្ងាយ រហូតដល់ការខ្វះខាតកងទ័ពថ្មីជាដើម៕

លោកហ្សេឡិនស្គី បានពិភាក្សាជាមួយរដ្ឋមន្ត្រីការពារជាតិស៊ុយអែតអំពីការធានាសន្តិសុខ និងការផលិតអាវុធរួមគ្នា

2024/02/26 10:36:27 am        170
Facebook Telegram Linkin
សេចក្តីថ្លែងការណ៍កាលពីថ្ងៃទី ២៤ ខែកុម្ភៈរបស់ការិយាល័យរបស់លោកហ្សេឡិនស្គី បានឲ្យដឹងថា លោកប្រធានាធិបតី វ៉ូឡូមៀ ហ្សេឡិនស្គី ( Volodymyr Zelensky) និងរដ្ឋមន្ត្រីការពារជាតិស៊ុយអែត លោក Paul Johnson បានពិភាក្សាអំពីលទ្ធភាពនៃការផលិតអាវុធរួមគ្នា និងការចរចានាពេលអនាគតសម្រាប់ការចុះហត្ថលេខាលើកិច្ចព្រមព្រៀងធានាសន្តិសុខទ្វេភាគី។ មេដឹកនាំទាំងពីរ បានជួបគ្នានៅអ៊ុយក្រែនក្នុងខួបពីរឆ្នាំនៃការលុកលុយពេញទំហឹងរបស់រុស្ស៊ីលើអ៊ុយក្រែន ហើយរយៈពេល៤ថ្ងៃ បន្ទាប់ពីស៊ុយអែត បានប្រកាសកញ្ចប់ជំនួយផ្នែកការពារដ៏ធំបំផុតរបស់ខ្លួនសម្រាប់អ៊ុយក្រែន ដែលមានតម្លៃ ៦៨២លានដុល្លារ។កញ្ចប់ជំនួយចុងក្រោយបង្អស់នោះ បាននាំមកនូវតម្លៃសរុបនៃជំនួយយោធាស៊ុយអែតដល់អ៊ុយក្រែន ចាប់តាំងពីការចាប់ផ្តើមនៃការលុកលុយពេញលេញដល់ទៅ ៣០ពាន់លានក្រូណាស៊ុយអែត (២,៨៨ ពាន់លានដុល្លារ)។លោកហ្សេឡិនស្គី បាននិយាយនៅក្នុងសេចក្តីថ្លែងការណ៍ថា៖«ថ្ងៃនេះ គឺជាថ្ងៃដែលសោកនាដកម្មនេះបានចាប់ផ្តើម ហើយវាមានសារៈសំខាន់សម្រាប់យើង នៅពេលដែលមិត្តរបស់យើងនៅទីនេះ»។ក្នុងឆ្នាំនេះ ប្រទេសអ៊ុយក្រែន បានចុះហត្ថលេខាលើកិច្ចព្រមព្រៀងសន្តិសុខទ្វេភាគីជាមួយចក្រភពអង់គ្លេស ដាណឺម៉ាក អាល្លឺម៉ង់ កាណាដា អ៊ីតាលី និងបារាំង ខណៈដែលប្រទេសផ្សេងទៀត បាននិយាយថា ពួកគេគ្រោង នឹងចុះហត្ថលេខាលើកិច្ចព្រមព្រៀង នាពេលខាងមុខ។

ប្រទះឃើញសត្វប្រើសមួយក្បាល រត់ចូលដីឡូត៍អ្នកភូមិ ឃុំកំពង់គ្រែង ស្រុកទឹកឈូ

2024/02/26 09:39:55 am        259
Facebook Telegram Linkin
កំពត៖ នាព្រលប់ថ្ងៃទី២៥ ខែកុម្ភៈ ឆ្នាំ២០២៤ អ្នកដំណើរ និងអ្នកភូមិព្រៃត្នោត ឃុំកំពង់គ្រែង ស្រុកទឹកឈូ បានប្រទះឃើញសត្វប្រើសមួយក្បាលរត់ចុះឡើង ចូលក្នុងដីឡូត៍ទុកនៅទំនេរមួយកន្លែង បង្កការភ្ញាក់ផ្អើល។ជាមួយនឹងវត្តមានសត្វព្រៃចូលស្រុកនេះ ប្រជាពលរដ្ឋ បានអំពាវនាវដល់អ្នកផងនានាកុំចាប់យក ឬធ្វើបាបសត្វប្រើស១ក្បាលនេះ។ អ្នកភូមិក៏បានស្នើសុំដល់មន្ត្រីជំនាញ​ជួយចុះអន្តរាគមន៍​ដើម្បីនាំយកសត្វប្រើសនោះទៅលែងក្នុងព្រៃវិញ។ទាក់ទិនបញ្ហាខាងលើ លោក ជួន សារ៉ា នាយខណ្ឌរដ្ឋបាលព្រៃឈើនៃមន្ទីរកសិកម្ម រុក្ខាប្រមាញ់ និងនេសាទខេត្តកំពត បានបញ្ជាក់ថា ក្រោយទទួលបានសេចក្តីរាយការណ៍ពីអាជ្ញាធរមូលដ្ឋាន លោកក៏បានចុះដល់ទីតាំង និងពិនិត្យដឹងថា នោះជាសត្វប្រើឈ្មោលចុះមកពីតំបន់ភ្នំបូកគោ។ ដោយសារជារដូវក្តៅខ្វះទឹកផឹក ហើយប្រើសនេះ ឡើងកត្រូវការរកញីផងទើបរត់ចុះរហូត​ដល់​ឃុំកំពង់គ្រែងដែលអ្នកភូមិបានប្រទះឃើញនោះ។លោកនាយខណ្ឌបានបន្តថា ព្រោះតែក្តីព្រួយអំពីហេតុការណ៍មិនល្អណាមួយកើតឡើង លោកបាន​ទំនាក់ទំនងជាមួយអាជ្ញាធរស្រុកទឹកឈូដោយស្នើសុំកម្លាំងរបស់អធិការដ្ឋាន ពិសេសនគរបាល​ប៉ុស្តិ៍មូលដ្ឋានជួយការពារដ្បិតដីឡូត៍នោះមានរបងបាំងតែ៣ជ្រុងប៉ុណ្ណោះ។ ម្យ៉ាងទៀត លោកបានទំនាក់ទំនងជាមួយខាងឧទ្យានុរក្សភ្នំតាម៉ៅរួចហើយ ដើម្បីឱ្យមន្ត្រីជំនាញមកបាញ់​ថ្នាំ​សន្លប់​នាំយកទៅលែងទីនោះនៅព្រឹកថ្ងៃទី២៦ ខែកុម្ភៈនេះ៕

ការអត្ថាធិប្បាយរបស់លោក Trump លើអ្នកបោះឆ្នោតជនជាតិស្បែកខ្មៅ ទាក់ទាញការស្តីបន្ទោសយ៉ាងខ្លាំង

2024/02/26 09:20:24 am        142
Facebook Telegram Linkin
ការអត្ថាធិប្បាយរបស់លោក ដូណាល់ ត្រាំ (Donald Trump) ដែលអះអាងថា អ្នកបោះឆ្នោតជនជាតិស្បែកខ្មៅកាន់តែគាំទ្ររូបលោក បន្ទាប់ពីការចោទប្រកាន់ជាច្រើនរបស់ខ្លួនលើបទចោទព្រហ្មទណ្ឌ បានទាក់ទាញការស្តីបន្ទោសយ៉ាងខ្លាំងកាលពីចុងសប្តាហ៍ពីគូប្រជែងគណបក្សសាធារណរដ្ឋសម្រាប់ការតែងតាំងតំណែងបេក្ខជនប្រធានាធិបតី សកម្មជនសិទ្ធិមនុស្ស និងអ្នកដទៃទៀត។លោក ត្រាំ កាលពីថ្ងៃសុក្រ (២៣ កុម្ភៈ) មុនពេលការបោះឆ្នោតបឋមនៅរដ្ឋសៅ ខារ៉ូឡាញណា(South Carolina) ដែលលោកបានទទួលជ័យជម្នះ បានប្រដូចការចោទប្រកាន់ព្រហ្មទណ្ឌចំនួន ៩១ ករណីរបស់ខ្លួននៅក្នុងសំណុំរឿងព្រហ្មទណ្ឌចំនួនបួនដាច់ដោយឡែកពីគ្នា ទៅនឹងការរើសអើងដែលប្រឈមមុខដោយជនជាតិអាមេរិកស្បែកខ្មៅ។លោកប្រធានាធិបតី ចូ បៃដិន បានប្រតិកម្មទៅនឹងការលើកឡើងនោះថា «ការអះអាងរបស់លោក ត្រាំ ដែលថាជនជាតិអាមេរិកស្បែកខ្មៅនឹងគាំទ្រលោកដោយសារតែបទចោទព្រហ្មទណ្ឌរបស់ខ្លួននោះគឺជាការប្រមាថយ៉ាងខ្លាំង»។ អតីតអភិបាលរដ្ឋ សៅ ខារ៉ូឡាញណា លោកស្រី នីកគី ហាលី បាននិយាយថា «ការលើកឡើងនោះជារឿងគួរឱ្យស្អប់ខ្ពើម»។បញ្ហាប្រឈមផ្លូវច្បាប់របស់លោក ត្រាំ រួមទាំងបទចោទប្រកាន់សហព័ន្ធលើកិច្ចខិតខំប្រឹងប្រែងព្យាយាមបង្វែរលទ្ធផលឆ្នោតឆ្នាំ២០២០ និងការមិនប្រគល់ឯកសារសម្ងាត់ ក្នុងចំណោមការចោទប្រកាន់របស់រដ្ឋ និងបណ្តឹងរដ្ឋប្បវេណីផ្សេងទៀត មានភាពខុសប្លែកគ្នាយ៉ាងខ្លាំងពីវិសមភាពជាប្រវត្តិសាស្ត្រដែលជនជាតិអាមេរិកស្បែកខ្មៅបានជួបប្រទះនៅក្នុងប្រព័ន្ធយុត្តិធម៌ព្រហ្មទណ្ឌ៕

លោក Zelensky ៖ទាហាន៣១.០០០នាក់ បានស្លាប់ ចាប់តាំងពីការវាយលុកពេញបន្ទុករបស់រុស្ស៊ី

2024/02/26 08:39:46 am        114
Facebook Telegram Linkin
លោកប្រធានាធិបតីអ៊ុយក្រែន Volodymyr Zelensky បាននិយាយថា ទាហានអ៊ុយក្រែនចំនួន៣១.០០០នាក់ បានស្លាប់ អំឡុងការវាយលុកពេញបន្ទុករបស់រុស្ស៊ី។ លោកប្រធានាធិបតីរូបនេះ លើកឡើងថា លោកនឹងមិនផ្ដល់ចំនួនទាហានរងរបួសទេ ព្រោះនឹងជួយដល់ផែនការយោធារបស់រុស្ស៊ី ។ តាមធម្មតា ក្រុមមន្ត្រីអ៊ុយក្រែន មិនដែលបង្ហាញទិន្នន័យអ្នកស្លាប់ឬរបួសជាសាធារណៈទេ ហើយ មានការប៉ាន់ប្រមាណផ្សេងទៀតថា ចំនួនអាចមានច្រើនជាងនេះ។ ការបង្ហាញទិន្នន័យកងទ័ពបាត់បង់ជីវិតនៅសមរភូមិនេះ បានកើតមានឡើង បន្ទាប់ពីមន្ត្រីការពារជាតិបាននិយាយថា ជំនួយលោកខាងលិចទាំងអស់សម្រាប់អ៊ុយក្រែន ត្រូវបានពន្យាពេល ដែលនាំឲ្យមានការបាត់បង់ជីវិត និងទឹកដី។លោក Zelensky បាននិយាយកាលពីថ្ងៃអាទិត្យថា លោកកំពុងផ្ដល់ចំនួនអ្នកស្លាប់ឆ្លើយតបទៅនឹងទិន្នន័យបំប៉ោងដែលប្រទេសរុស្ស៊ី បានដកស្រង់មកនិយាយ។ លោកបានបញ្ជាក់ថា ទាហានចំនួន៣១.០០០នាក់ បានស្លាប់ នៅក្នុងសង្រ្គាមនេះ មិនមែន៣០ម៉ឺននាក់ ឬ១៥ម៉ឺននាក់ទេ ឬដូចអ្វីដែលលោក Putinកំពុងកុហកនោះឡើយ។ ប៉ុន្តែការបាត់បង់នីមួយៗ គឺជាការខាតបង់ធំបំផុតសម្រាប់យើង។ ថ្លែងពីការបាត់បង់ដ៏ធំធេងក្នុងសង្រ្គាមនេះ លោក Zelensky បាននិយាយថាជនស៊ីវិលរាប់ម៉ឺននាក់បានស្លាប់ក្នុងតំបន់ជាច្រើនគ្រប់គ្រងដោយរុស្ស៊ី ប៉ុន្តែចំនួនពិតប្រាកដមិនត្រូវបានគេដឹងទេ។ ក្រុមមន្ត្រីអាមេរិកកាលពីខែសីហា បានដាក់ចំនួនទាហានអ៊ុយក្រែនស្លាប់ ៧ម៉ឺននាក់ និងប្រហែល១២០.០០០នាក់ រងរបួស។ ចំពោះការបាត់បង់របស់រុស្ស៊ី វិញ លោក Zelensky បាននិយាយថា ទាហានរុស្ស៊ីចំនួន១៨០.០០០នាក់ បានស្លាប់ និងរាប់ម៉ឺននាក់បានរងរបួស៕

ដំណើរការបោះឆ្នោតព្រឹទ្ធសភា បានប្រព្រឹត្តទៅដោយរលូន ខណៈការិយាល័យមួយចំនួន​បានបិទបញ្ចប់

2024/02/25 12:35:21 pm        346
Facebook Telegram Linkin
ដំណើរការនៃការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ដែលបានចាប់​ផ្ដើម​តាំង​ពី​ព្រឹក​ថ្ងៃ​ទី២៥ ខែកុម្ភៈ ឆ្នាំ២០២៤ រហូតដល់ថ្ងៃត្រង់នេះ គឺបានប្រព្រឹត្តដោយរលូន មានសន្តិសុខ សុវត្ថិភាព សណ្តាប់ធ្នាប់ល្អ គ្មានអំពើហិង្សា និងពុំមាន​បាតុភាពណាមួ​យ​កើត​ឡើង​គួរ​ឱ្យ​កត់​សម្គាល់​ឡើយ ខណៈការិយាល័យមួយ​ចំនួនក៏បាន​ប្រកាស​បិទ​បញ្ចប់​ក្រោយ​អង្គបោះឆ្នោត​បាន​ចូល​រួមបោះឆ្នោតគ្រប់គ្នា។គណៈកម្មាធិការជាតិរៀបចំការបោះឆ្នោត គ.ជ.ប បានឱ្យដឹងថា ការិយាល័យបោះឆ្នោតទាំង ៣៣ ការិយាល័យ នៅតាមរាជធានី ខេត្តចំណុះឱ្យភូមិភាគទាំង ៨ បាន​បើក​ដំណើរការ​ព្រមៗ​គ្នា​តាំង​ពីម៉ោង ៧:០០ ព្រឹកថ្ងៃអាទិត្យ ទី២៥ ខែកុម្ភៈ ឆ្នាំ២០២៤ សម្រាប់​បម្រើ​ឱ្យ​ការ​បោះឆ្នោត​ជ្រើសតាំង​សមាជិកព្រឹទ្ធសភា នីតិកាលទី៥ ឆ្នាំ២០២៤ ក្នុងបរិយាកាស មានសន្តិសុខ សុវត្ថិភាព និង​សណ្តាប់ធ្នាប់ល្អ។អ្នកបោះឆ្នោតដែលជាតំណាងរាស្ត្រក្នុងតំណែង និងសមាជិកក្រុមប្រឹក្សាឃុំ សង្កាត់ក្នុងតំណែង ដែ​ល​មានសិទ្ធិបោះឆ្នោត បានអញ្ជើញ​ទៅ​ចូល​រួម​បោះឆ្នោត​ដោយ​ស្ម័គ្រ​ចិត្ត​រៀងៗ​ខ្លួន​នៅតា​ម​កា​រិយាល័យ​បោះឆ្នោតដែលសាមីខ្លួនមានឈ្មោះក្នុងបញ្ជីបោះឆ្នោតផ្លូវការ។ បើ​តាម​ការបញ្ជាក់របស់ គ.ជ.ប ការបោះឆ្នោតនឹងត្រូវបិទបញ្ចប់នៅវេលាម៉ោង ៣:០០ រសៀល​ថ្ងៃនេះ ប៉ុន្តែប្រសិនបើនៅតែ មានអ្នកបោះឆ្នោតស្ថិតក្នុងការិយាល័យបោះឆ្នោត ឬឈរតម្រង់ជួរ ឬ​ស្ថិតនៅ​ក្នុងបរិវេណខាងក្នុងការិយាល័យបោះឆ្នោតទៀត អ្នកបោះឆ្នោត​ទាំង​នោះ​ត្រូវ​តែ​បាន​អនុញ្ញាត​ឱ្យ​បោះឆ្នោត។ ហើយប្រធានគណៈកម្មការការិយាល័យបោះឆ្នោត អាចប្រកាស​បិទ​បញ្ចប់​ការ​បោះឆ្នោតនៅការិយាល័យរបស់ខ្លួននៅមុនម៉ោង ៣:០០ រសៀលនេះបាន​ប្រសិន​បើ​អ្នក​បោះឆ្នោត​ដែល​មានឈ្មោះក្នុងបញ្ជីបោះឆ្នោតនៃ ការិយាល័យបោះឆ្នោត​នោះ​បាន​បោះឆ្នោត​គ្រប់​គ្នា​អស់​ហើយ​។ផ្អែកតាម​បញ្ជីបោះឆ្នោតផ្លូវការសម្រាប់បម្រើឱ្យការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ អ្នកបោះឆ្នោត មានចំនួនសរុប ១១.៧៤៧ នាក់ ក្នុងនោះ​តំណាង​រាស្ត្រ​ក្នុងតំណែង មានចំនួន ១២៥ នាក់ និងសមាជិកក្រុមប្រឹក្សាឃុំ សង្កាត់ទាំងអស់ក្នុងតំណែង មាន​ចំនួន ១១ ៦២២ នាក់។ការបោះឆ្នោតជ្រើស​តំាងសមាជិកព្រឹទ្ធសភា ជាការបោះឆ្នោតអសកល ដែលមានសមាជិក​សមាជិកា​រដ្ឋសភា និងសមាជិកក្រុមប្រឹក្សាឃុំ សង្កាត់ ក្នុងតំណែងជាអង្គបោះឆ្នោត។ អនុវត្ត​គោលការណ៍​លទ្ធិប្រជាធិបតេយ្យ ដែលមានចែងនៅក្នុងរដ្ឋធម្មនុញ្ញ ព្រះរាជាណាចក្រកម្ពុជា បាន​រៀប​ចំ​ការ​បោះឆ្នោតសកល និងអសកលជាទៀងទាត់ស្របតាមច្បាប់ជាធរមាន។ក្នុង​ចំណោម​សមាជិកព្រឹទ្ធសភាចំនួន ៦២រូប ក្រៅពីការបោះឆ្នោតជ្រើសតំាង មាន​សមាជិក​ព្រឹទ្ធ​សភា ២រូប ត្រូវចាត់តំាងដោយព្រះមហាក្សត្រ និង២ រូបទៀតជ្រើស​តំាង​ដោយ​រដ្ឋសភា​តាម​មតិភាគ​ច្រើន​។ សុខសន្តិភាព គឺ​ជាមូល​ដ្ឋាន​គ្រឹះ​ធ្វើ​ឱ្យ​កម្ពុជា​មាន​លទ្ធភាព​ក្នុង​ការ​ពង្រឹង​លទ្ធិ​ប្រជាធិបតេយ្យ និង ពន្លឿនការអភិវឌ្ឍប្រទេសជាតិ លើកកម្ពស់​ជីវភាព​ពលរដ្ឋ​ឱ្យ​មាន​ការ​រីក​ចម្រើនជា​លំដាប់។សូមជម្រាបជូនថា គ.ជ.បនឹង​បើក​កិច្ចប្រជុំ​ផ្សព្វ​ផ្សាយ​ជាមួយ​ភាគី​ពាក់ព័ន្ធ​នឹង​ការ​បោះឆ្នោត​ស្តីពី​ការ​សរុប​ព្រឹត្តិការណ៍ទូទៅនៃដំណើរការបោះឆ្នោត ជ្រើសតាំងសមាជិកព្រឹទ្ធសភានីតិកាលទី៥ ឆ្នាំ​២០២៤ នៅវេលាម៉ោង ៥:០០ ល្ងាចថ្ងៃនេះ បន្ទាប់​ម​ក​នឹង​ធ្វើ​ការ​ផ្សាយ​លទ្ធផល​បឋម​នៃ​ការ​បោះឆ្នោត​ព្រឹទ្ធសភាតែម្ដង៕

ការបោះឆ្នោតជ្រើសតាំងសមាជិកព្រឹទ្ធសភា ខេត្តឧត្តរមានជ័យ ប្រព្រឹត្តិទៅមានសណ្តាប់ធ្នាប់ ល្អប្រសើរ គ្មានការបង្ខិតបង្ខំ

2024/02/25 11:29:56 am        350
Facebook Telegram Linkin
នៅព្រឹកថ្ងៃទី២៥ ខែកុម្ភៈ ឆ្នាំ២០២៤នេះ គណៈកម្មការ​រៀបចំ​ការ​បោះឆ្នោត​ខេត្ត​ឧត្តរមានជ័យ បានដំណើរការការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ មណ្ឌល​ខេត្ត​ឧត្តរមានជ័យ ភូមិភាគ៤ ដែលមាន ១ការិយាល័យ(លេខ៤០០៧ ) នៅវិទ្យាល័យ​តេជោ​សែន សំរោង មាន​សមាជិក​ក្រុម​ប្រឹក្សាឃុំសង្កាត់​ដែល​មាន​ឈ្មោះ​ចូលរួម​បោះឆ្នោត​ចំនួន ១៥៣នាក់ក្នុងនោះសមាជិកព្រឹទ្ធសភាមួយរូប ។លោកស្រី ត្រាន់ សួគ៌ា ប្រធានគណៈកម្មការរៀបចំការបោះឆ្នោតខេត្តឧត្តរមានជ័យបានឲ្យដឹងថា ចំពោះ​ស្ថានភាពទូទៅនៅថ្ងៃបោះឆ្នោតនាពេលនេះ គឺប្រព្រឹត្តិទៅមានភាពរលូន មាន​សណ្តាប់​ធ្នាប់ សន្តិសុខ ល្អប្រសើរ មិនមានការបង្ខិត​បង្ខំ ចំពោះបក្សនយោបាយណាមួយឡើយ និង​មាន​អ្នកសង្កេតការណ៍ជាតិមកពីក្រុមយុវជន និងគណបក្ស​នយោបាយ​មួយចំនួន​ចូលរួម​សង្កេតការណ៍​ផងដែរ។សូមជម្រាបថា ការបោះឆ្នោតជ្រើសតាំង​សមាជិកព្រឹទ្ធសភា នីតិកាលទី៥ ឆ្នាំ២០២៤ មាន​គណបក្ស​នយោបាយចំនួន៤ បាន​ចូលរួម​ប្រកួត​ប្រជែង ក្នុងនោះរួមមាន គណបក្ស​ប្រជាជនកម្ពុជា, គណបក្សហ្វ៊ុនស៊ិនប៉ិច, គណបក្ស​កម្លាំងជាតិ និងគណបក្សឆន្ទៈខ្មែរ។ សម្រាប់​អង្គបោះឆ្នោតរួមមាន៖ សមាជិកព្រឹទ្ធសភាក្នុងតំណែងចំនួន ១២៥រូប សមាជិកក្រុមប្រឹក្សាឃុំ/សង្កាត់ ក្នុងតំណែង​ចំនួន ១១,៦២២ សរុប ១១,៧៤៧រូប ស្រី ២,៥៨៤រូប៕

ដំណើរការបោះឆ្នោតជ្រើសតាំងសមាជិកព្រឹទ្ធសភានៅខេត្តបាត់ដំបង ប្រព្រឹត្តទៅដោយរលូន

2024/02/25 11:09:09 am        405
Facebook Telegram Linkin
បាត់ដំបង៖ ដំណើរការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ នាថ្ងៃទី២៥ ខែកុម្ភៈ ឆ្នាំ២០២៤ នៅភូមិភាគ៤ ខេត្តបាត់ដំបង បានប្រព្រឹត្តទៅដោយរលូនក្រោមបរិយាកាសសន្តិសុខ សុវត្ថិភាព​ និងសណ្ដាប់ធ្នាប់ល្អប្រសើរ។ដំណើរការបោះឆ្នោតនាព្រឹកនេះប្រព្រឹត្តទៅដោយមានអង្គបោះឆ្នោតជាច្រើននាក់បានមកឈររង់ចាំ និងពិនិត្យបញ្ជីឈ្មោះមុនការិយាល័យបោះឆ្នោតបើកដំណើរការ ខណៈអង្គបោះឆ្នោត​បាន​ត្រៀម​បម្រុង​ជា​ស្រេច​នូវ​ឯកសារ​សម្រាប់​បម្រើ​ឱ្យ​ការ​បោះឆ្នោ​ត​ធ្វើ​ឱ្យ​ដំណើរ​ការ​បោះឆ្នោត​ប្រព្រឹត្ត​ទៅ​ដោយ​រលូន។អង្គបោះឆ្នោតដែលបានបោះឆ្នោតរួចរាល់ បង្ហាញការកត់សម្គាល់ថា ដំណើរ​ការ​បោះឆ្នោត​បាន​ប្រព្រឹត្ត​ទៅ​ដោយ​ប្រក្រតីមានសន្តិសុខសណ្ដាប់ធ្នាប់ល្អប្រសើរ ស្របទៅ​តាម​ច្បាប់​កំណត់​របស់​គណៈកម្មាធិការ​ជាតិ​រៀបចំកាបោះឆ្នោត។អង្គបោះឆ្នោត អះអាងថា អង្គបោះឆ្នោតទាំងអស់បានចូលរួមបោះឆ្នោតដោយគ្មានការបង្ខិតបង្ខំ និង​ប្រកាន់​ខ្ជាប់ទៅតាមគោលការណ៍របស់គ.ជ.ប។សូមបញ្ជាក់ថា ក្នុងខេត្តបាត់ដំបងមានអង្គបោះឆ្នោត និងអ្នកបោះឆ្នោតសរុបចំនួន៨៣១នាក់ ក្នុង​នោះ​អ្នក​បោះឆ្នោតជាអ្នកតំណាងរាស្រ្ត ក្នុងមុខតំណែងមានចំនួន ៨រូប និង​អង្គបោះឆ្នោត​ជា​សមាជិក​ក្រុម​ប្រឹក្សាឃុំ សង្កាត់ក្នុងមុខ​តំណែង​មាន​ចំនួន ៨២៣រូប។ ចំពោះ​ការិយាល័យ​បោះឆ្នោត​មាន​ចំនួន២ ការិយាល័យដែលមានទីតាំង នៅក្នុងបរិវេណវិទ្យាល័យសម្ដេចឪ ក្រុង​បាត់ដំបង​៕

បណ្ដាញសង្គម

ព័ត៌មានថ្មីៗ

សភាអ៊ីស្រាអែលអនុម័តការពិនិត្យដំបូងលើសេចក្តីស្នើច្បាប់ទោសប្រហារជីវិតសម្រាប់អំពើភេរវកម្ម
11/11/2025 06:11 PM
Facebook Telegram Linkin
អាជ្ញាធរម៉ាឡេស៊ី ស្រង់សាកសពមនុស្សបន្ថែមទៀត ក្នុងប្រតិបត្តិការស្វែងរកជនជាតិរ៉ូហ៊ីងយ៉ាបាត់ខ្លួន
11/11/2025 06:11 PM
Facebook Telegram Linkin
ឥណ្ឌាពង្រឹងការទប់ស្កាត់ការបំពុលខ្យល់កាន់តែតឹងរ៉ឹង ក្នុងរដ្ឋធានីញូវដេលី ខណៈគុណភាពខ្យល់កាន់តែធ្លាក់ចុះ
11/11/2025 06:11 PM
Facebook Telegram Linkin
នាយឧត្តមសេនីយ៍ ទៀ សីហា និងឯកអគ្គរដ្ឋទូតប្រចាំកម្ពុជាអញ្ជើញចូលរួមពិធីរំលឹកវិញ្ញាណក្ខន្ធដល់យុទ្ធជន ដែលបានពលីក្នុងសម័យសង្គ្រាមលោកលើកទី១
11/11/2025 05:11 PM
Facebook Telegram Linkin
[UPDATE] ការបំផ្ទុះគ្រាប់បែក នៅទីក្រុងអ៊ីស្លាម៉ាបាដ បណ្ដាលឲ្យមនុស្ស ១២នាក់ស្លាប់ និង ២៧នាក់ រងរបួស
11/11/2025 05:11 PM
Facebook Telegram Linkin
ហូឡង់កំពុងពិចារណាលើការហាមឃាត់ពាណិជ្ជកម្មលើទំនិញ ពីកន្លែងតាំងទីលំនៅរបស់អ៊ីស្រាអែល
11/11/2025 05:11 PM
Facebook Telegram Linkin
កងកម្លាំងសន្តិសុខ៖ ជាងពាក់កណ្តាលនៃជនជាតិអ៊ុយក្រែន នៅតែទំនាក់ទំនងគ្នា ជាភាសារុស្ស៊ី
11/11/2025 05:11 PM
Facebook Telegram Linkin
សហភាពអាហ្វ្រិកអំពាវនាវឲ្យមានវិធាការបន្ទាន់ នៅក្នុងប្រទេសម៉ាលីដែលញាំញីដោយការបះបោរ
11/11/2025 05:11 PM
Facebook Telegram Linkin
ទួរគីនិយាយថា អាមេរិកយល់ថាស៊ីរីត្រូវការរួបរួមគ្នា ក្រោយជំនួបនៅទីក្រុងវ៉ាស៊ីនតោន
11/11/2025 05:11 PM
Facebook Telegram Linkin
ព្រះករុណា ព្រះមហាក្សត្រ ស្ដេចយាងពន្លត់ទៀនជ័យ នៃទិវាបុណ្យឯករាជ្យជាតិ ៩ វិច្ឆិកា
11/11/2025 05:11 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.