នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
គម្រោងស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) និងផ្លូវតភ្ជាប់ សម្រេចបាន ៤៥% ហើយ ដែលលឿនជាងផែនការ ៤,១១%
សម្ដេចធិបតី អំពាវនាវដល់ជនរួមជាតិជឿទុកចិត្តលើរាជរដ្ឋាភិបាល​ដែលកំពុង​ធ្វើកិច្ច​ការងារ​យ៉ាង​សកម្ម​ស្វែង​រក​ដំណោះស្រាយបញ្ចប់បញ្ហាព្រំដែនកម្ពុជា-ថៃ ឱ្យបានឆាប់រហ័ស
សម្ដេចធិបតីផ្ដល់អនុសាសន៍៧ចំណុច ដល់ក្រសួង-ស្ថាប័នពាក់ព័ន្ធឱ្យយកចិត្តទុកដាក់ក្នុងឱកាសទិវាអក្ខរកម្មអន្តរជាតិ ៨ កញ្ញា ២០២៥
សម្ដេចធិបតី៖ រាជរដ្ឋាភិបាលប្តេជ្ញាចិត្តយ៉ាងមុតមាំលើកកម្ពស់ការងារអក្ខរកម្ម និងបំពាក់បំប៉ន ជំនាញ និងឱកាសសិក្សាពេញមួយជីវិត ជាពិសេសជំនាញឌីជីថល

នយោបាយ​ និង ការអភិវឌ្ឍន៍

សម្តេចធិបតី៖ ធនាគារជាតិកម្ពុជាបានធ្វើទំនើបកម្មប្រព័ន្ធជាច្រើនលើការទូទាត់ប្រាក់ដោយប្រើ QR Code

2023/12/20 01:04:55 pm        128
Facebook Telegram Linkin
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានមានប្រសាសន៍ថា ធនាគារជាតិ​កម្ពុជា បានធ្វើទំនើបកម្មជាច្រើនលើប្រព័ន្ធការទូទាត់ប្រាក់ដោយប្រើ QR Code ហើយ​ថ្មី​ៗនេះ​ធនាគារ​ជាតិ​ក៏​បានដើរតួនាទីយ៉ាងសំខាន់ក្នុងការចរចាជាមួយបណ្ដាប្រទេសជាច្រើន លើការរៀប​ចំ​ប្រព័ន្ធ​ទំនាក់​ទំនង ដើម្បីជួយដល់ការធ្វើពាណិជ្ជកម្ម និងទេសចរណ៍ផ្សេងៗទៀតផងដែរ។សម្ដេចធិបតី នាយករដ្ឋមន្រ្ដី បាន​មាន​ប្រសាសន៍​ក្នុង​ឱកាស​អញ្ជើញ​ជា​អធិបតី​សម្ពោធ​ដាក់​ឱ្យ​ប្រើ​ប្រាស់​ជា​ផ្លូវការ អគារធនាគារវីងថៅវើ នៅព្រឹកថ្ងៃទី២០ ខែធ្នូ ឆ្នាំ២០២៣នេះថា ដើម្បី​អភិវឌ្ឍ​សេដ្ឋកិច្ច និងសង្គមឌីជីថល រាជរដ្ឋាភិបាលនីតិកាលទី៧ បានដាក់​ចេញ​នូវ​យុទ្ធសាស្រ្ដ​បញ្ចកោណ​ដំណាក់​កាលទី១ ដើម្បីជំរុញសន្ទុះនៃការអភិវឌ្ឍសេដ្ឋកិច្ចសង្គម សំដៅ​សម្រេច​ចក្ខុ​វិស័យ​ ឆ្នាំ២០៣០ ឆ្នាំ២០៥០ និងដើម្បីឆ្លើយតបទៅនឹងបដិវត្តន៍ឧស្សាហកម្មទី៤ ការរី​ក​ចម្រើន​វិទ្យា​សាស្រ្ដ និងបច្ចេកវិទ្យាសាកល ខណៈដែលបច្ចេកវិទ្យាឌីជីថលកំពុងដើរតួនាទីស្នូល និង​ជា​ចលករ​សំខាន់គ្របដណ្ដប់នៅលើគ្រប់ទិដ្ឋភាព សង្គម សេដ្ឋកិច្ច រួមទាំង​វិស័យ​ហិរញ្ញវត្ថុ​ធនាគារ​ផង​ដែរ​។ សូមជម្រាបថា ធនាគារជាតិនៃកម្ពុជា ជាធនាគារកណ្តាលរបស់ប្រទេសកម្ពុជា ហើយ​ក៏​ជា​អាជ្ញាធរ​រូបិយវត្ថុ និងត្រួតពិនិត្យប្រព័ន្ធធនាគារនៅកម្ពុជាផងដែរ។ បេសក​កម្ម​ចម្បង​របស់​ធនាគារ​ជាតិ​នៃ​កម្ពុជា ​គឺកំណត់ និងដឹកនាំគោលនយោបាយរូបិយវត្ថុ ក្នុងគោលដៅរក្សាស្ថិរភាពថ្លៃ សំដៅ​រួម​ចំណែក​ជំរុញ​ការ​អភិវឌ្ឍសេដ្ឋកិច្ចជាតិ ដោយពិគ្រោះជាមួយរាជរដ្ឋាភិបាល ក្នុងក្រប​ខ័ណ្ឌ​នយោបាយ​សេដ្ឋកិច្ច និងហិរញ្ញវត្ថុនៃព្រះរាជាណាចក្រកម្ពុជា។ក្នុងឱកាសនេះ​សម្ដេចធិបតីនាយករដ្ឋមន្រ្ដីបានបញ្ជាក់បន្ថែមថា រាជរដ្ឋាភិបាលអាណត្តិទី៧ ក៏បានដាក់ឱ្យអនុវត្តនូវគោលនយោបាយបច្ចេកវិទ្យាហិរញ្ញវត្ថុកម្ពុជា ឆ្នាំ ២០២៣-២០២៨ ដែលមានចក្ខុវិស័យរយៈពេលវែង អភិវឌ្ឍបច្ចេកវិទ្យាហិរញ្ញវត្ថុ ដោយ​ឈរ​​នៅ​លើ​មូល​ដ្ឋាន​នៃ​ការ​លើក​កម្ពស់​បរិយាបន្នហិរញ្ញវត្ថុ ការរក្សានូវស្ថិភាពវិស័យហិរញ្ញវត្ថុ និងការជំរុញនវានុវត្តន៍ហិរញ្ញវត្ថុ ដើម្បី​ចាប់​យកអត្ថប្រយោជន៍ជាអតិបរិមា និងបរិវត្ត​កម្ម​ឌីជីថល​នៅ​ក្នុង​វិស័យ​ហិរញ្ញ​វត្ថុ​របស់​កម្ពុជា​៕ អត្ថបទ៖ វ៉ន ដារ៉ា

សម្តេចធិបតី ហ៊ុន ម៉ាណែត ក្រើនរំលឹកដល់ធនាគារនានាឱ្យយកចិត្តទុកដាក់​ពង្រឹងប្រព័ន្ធ​សុវត្ថិភាព

2023/12/20 12:54:22 pm        162
Facebook Telegram Linkin
ស្របពេលវិស័យធនាគារនៅក្នុងប្រទេសកម្ពុជា កំពុងមានការវិវត្តន៍ រីក​ចម្រើន​យ៉ាង​ឆាប់​រហ័ស​ជា​ពិសេស​ការ​វិវត្តន៍ទៅក្នុងវិស័យឌីជីលសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី​កម្ពុជា​ បាន​ក្រើន​រំលឹក​ដល់​បណ្ដា​ធនាគារនានា ត្រូវយកចិត្តទុកដាក់​ពង្រឹង​ប្រព័ន្ធ​សុវត្ថិភាព​របស់​ខ្លួន​ឱ្យ​បាន​ល្អ ដើម្បីបញ្ចៀសហានិភ័យជាយថាហេតុណាមួយពីក្រុមចោរបណ្ដាញអ៊ីនធឺណិត។ ក្នុងឱកាស អញ្ជើញជាអធិបតីសម្ពោធដាក់ឱ្យប្រើប្រាស់ជាផ្លូវការ អគារធនាគារវីងថៅវើ នៅ​ព្រឹក​ថ្ងៃ​ទី២០ ខែធ្នូ ឆ្នាំ២០២៣នេះ សម្ដេចធិបតី នាយករដ្ឋមន្រ្ដី បានផ្ដល់អនុសាសន៍ ដល់​ធនាគារ​ទាំង​អស់​ត្រូវ​ពិនិត្យ​លទ្ធភាព​ក្នុង​ការ​ផ្ដល់​សេវា​កម្ម​របស់​ខ្លួន​ឱ្យ​កាន់​តែ​ទូលំទូលាយ​ដើម្បី​លើក​កម្ពស់​បរិយាបន្ន​ហិរញ្ញវត្ថុនៅកម្ពុជា។ នៅក្នុងឱកាសនេះសម្ដេចធិបតីនាយករដ្ឋមន្រ្ដី បានមានប្រសាសន៍បន្តទៀតថា សមិទ្ធផល​មួយ​ដ៏​មាន​សារៈ​សំខាន់ គួរជាទីមោទនភាព សម្រាប់ជាមគ្គុទេសក៍ ក្នុងការជំរុញ​ការ​ប្រើ​ប្រាស់​បច្ចេក​វិទ្យា​ក្នុង​វិស័យ​ហិរញ្ញវត្ថុ គឺ «បច្ចេកវិទ្យាហិរញ្ញវត្ថុ FinTech» ដែលចូល​រួម​លើក​កម្ពស់​បរិយាបន្ន​ហិរញ្ញ​វត្ថុ, រក្សាស្ថិរភាពវិស័យហិរញ្ញវត្ថុ និងជំរុញនវានុវត្តន៍ហិរញ្ញវត្ថុ។ សម្ដេចធិបតីបញ្ជាក់ថា ក្របខ័ណ្ឌគោលនយោបាយទាំងនេះ​នឹង​មាន​សារៈ​សំខាន់​សម្រាប់​វិស័យ​ធនាគារ នៅកម្ពុជាក្នុងបរិការណ៍នៃការរីកចម្រើនយ៉ាងឆាប់រហ័សនៃបច្ចេកវិទ្យា ជាពិសេស  បច្ចេក​វិទ្យា​ហិរញ្ញវត្ថុ ។ ការចាប់យក និងការសម្របខ្លួនទៅនឹងប្រព័ន្ធឌីជីថលរបស់ធនាគារ មិន​ត្រឹម​តែ​រួម​ចំណែក​លើក​កម្ពស់កម្រិតបរិយាបន្នហិរញ្ញវត្ថុប៉ុណ្ណោះទេ, ប៉ុន្តែថែមទាំងរួម​ចំណែក​ដល់​ការ​កសាង​ហេដ្ឋារចនាសម្ព័ន្ធឌីជីថល និងការប្រើប្រាស់បច្ចេកវិទ្យា ដើម្បីលើកកម្ពស់កំណើន ប្រកបដោយចីរភាព៕

មេដឹកនាំព្រឹទ្ធសភាអាមេរិកនិយាយថា គ្មានជំនួយសម្រាប់អ៊ុយក្រែននោះទេ នៅមុនដំណាច់ឆ្នាំ

2023/12/20 12:02:47 pm        143
Facebook Telegram Linkin
មេដឹកនាំគណបក្សប្រជាធិបតេយ្យ និងគណបក្សសាធារណរដ្ឋ នៅព្រឹទ្ធសភាសហរដ្ឋអាមេរិក បាននិយាយកាលពីថ្ងៃអង្គារ ទី១៩ ខែធ្នូថា ទីក្រុងវ៉ាស៊ីនតោន នឹងមិនអាចអនុម័តជំនួយថ្មីសម្រាប់ប្រទេសអ៊ុយក្រែននៅមុនដំណាច់ឆ្នាំនេះបានទេ ខណៈភាគីទាំងពីរនៅតែបន្តស្វែងរកការសម្របសម្រួល។លោក Chuck Schumer គណបក្សប្រជាធិបតេយ្យ និងលោក Mitch McConnell គណបក្សសាធារណរដ្ឋ បាននិយាយនៅក្នុងសេចក្តីថ្លែងការណ៍រួមថា ខណៈក្រុមអ្នកចរចា ធ្វើការលើបញ្ហាដែលនៅសេសសល់ វាគឺជាក្តីសង្ឃឹមរបស់យើង ដែលថាកិច្ចខិតខំប្រឹងប្រែងនឹងអនុញ្ញាតឱ្យព្រឹទ្ធសភា មានចំណាត់ការយ៉ាងឆាប់រហ័ស នៅដើមឆ្នាំថ្មី។ «នៅក្នុងពេលវេលាដែលនៅសល់ក្នុងឆ្នាំនេះ ព្រឹទ្ធសភា និងក្រុមអ្នកចរចាផ្នែករដ្ឋបាល នឹងបន្តធ្វើការដោយស្មោះត្រង់ឆ្ពោះទៅរកការបញ្ចប់កិច្ចព្រមព្រៀងរបស់ខ្លួន»។បញ្ហាប្រឈមជាច្រើននៅតែមាន ប៉ុន្តែយើងប្តេជ្ញាដោះស្រាយតម្រូវការនៅព្រំដែនភាគខាងត្បូង និងជួយសម្ព័ន្ធមិត្ត និងដៃគូ ចំពោះការប្រឈមទៅនឹងការគំរាមកំហែងធ្ងន់ធ្ងរនៅក្នុងប្រទេសអ៊ីស្រាអែល អ៊ុយក្រែន និងតំបន់ឥណ្ឌូ-ប៉ាស៊ីហ្វិក។ ព្រឹទ្ធសភា នឹងមិនអនុញ្ញាតប្រទេសទាំងនេះ មានបញ្ហាប្រឈមសន្តិសុខជាតិ ដោយគ្មានដំណោះស្រាយនោះទេ។សេចក្តីប្រកាសពីវិមាន Capitol Hill បានកត់សម្គាល់ពីការលំបាកមួយផ្សេងទៀតសម្រាប់ប្រធានាធិបតីអ៊ុយក្រែន លោក Volodymyr Zelenskyy ដែលរដ្ឋាភិបាលរបស់លោក បានព្រមានអំពី «តម្រូវការច្រើនបំផុត សម្រាប់សព្វាវុធនៅមុនរដូវរងា»។លោក Zelenskyy នៅតែមានសង្ឃឹមដោយនិយាយនៅក្នុងសន្និសីទសារព័ត៌មានកាលពីថ្ងៃអង្គារថា សហរដ្ឋអាមេរិក «នឹងមិនក្បត់សន្យានោះទេ» ចំពោះប្រទេសដែលត្រូវបានហ៊ុមព័ទ្ធរបស់លោក។ យោធារបស់អ៊ុយក្រែន បានបរាជ័យក្នុងការបង្កើនការវាយបកក្នុងរយៈពេលប៉ុន្មានខែថ្មីៗនេះ ហើយសម្ពាធរបស់រុស្ស៊ីលើសមរភូមិនៅតែរឹងមាំ។

ក្រុមសិទ្ធិជនស៊ីវិល ដាក់បណ្តឹងជំទាស់ទៅនឹងច្បាប់ អន្តោប្រវេសន៍ថ្មីរបស់រដ្ឋតិចសាស់

2023/12/20 11:50:09 am        129
Facebook Telegram Linkin
ក្រុមសិទ្ធិជនស៊ីវិល បានដាក់ពាក្យបណ្ដឹងកាលពីថ្ងៃអង្គារ ដោយជំទាស់ទៅនឹងច្បាប់ថ្មីដែលគាំទ្រដោយគណបក្សសាធារណរដ្ឋនៅក្នុងរដ្ឋតិចសាស់ ដែលនឹងផ្តល់ឱ្យមន្ត្រីរដ្ឋនូវអំណាចដ៏ទូលំទូលាយក្នុងការចាប់ខ្លួន កាត់ទោស និងនិរទេសអ្នកដែលឆ្លងកាត់ព្រំដែនអាមេរិក-ម៉ិកស៊ិក ដោយខុសច្បាប់ ។ កាលពីថ្ងៃច័ន្ទ អភិបាលរដ្ឋតិចសាស់ លោក Greg Abbott បានចុះហត្ថលេខាលើច្បាប់ផ្តល់អំណាចដល់ការអនុវត្តច្បាប់របស់រដ្ឋ និងក្នុងតំបន់ ដែលត្រូវបានផ្ទេរអំណាចជាយូរមកហើយទៅឱ្យរដ្ឋាភិបាលសហព័ន្ធ។ ច្បាប់នេះ ត្រូវបានគេស្គាល់ថា SB4 នឹងចូលជាធរមាននៅខែមីនា ហើយបង្កើតច្បាប់ព្រហ្មទណ្ឌរដ្ឋថ្មីមួយ សម្រាប់ការចូលមកដោយខុសច្បាប់ ឬចូលរដ្ឋតិចសាស់ជាថ្មី ដោយមានទោសឲ្យជាប់ពន្ធនាគារចាប់ពី ១៨០ ថ្ងៃ រហូតដល់២០ ឆ្នាំ។ ចៅក្រមរដ្ឋតិចសាស់ នឹងត្រូវតម្រូវឱ្យចេញសេចក្តីបង្គាប់ឱ្យជនអន្តោប្រវេសន៍ត្រឡប់ទៅប្រទេសម៉ិកស៊ិកវិញ ដោយមានការកាត់ទោសរហូតដល់២០ឆ្នាំ សម្រាប់អ្នកដែលមិនព្រមធ្វើតាម។ពាក្យបណ្តឹងនេះអះអាងថា សេចក្តីស្នើច្បាប់របស់រដ្ឋតិចសាស់ បំពានដោយខុសច្បាប់លើសិទ្ធិអំណាចរបស់រដ្ឋាភិបាលសហព័ន្ធ ក្រោមរដ្ឋធម្មនុញ្ញរបស់សហរដ្ឋអាមេរិក ដើម្បីអនុវត្តច្បាប់អន្តោប្រវេសន៍របស់ប្រទេស។ ក្រុម ដែលដឹកនាំដោយសហភាពសេរីភាពស៊ីវិលអាមេរិក បាននិយាយថា ច្បាប់នេះ ហាមឃាត់ជនអន្តោប្រវេសន៍ដោយខុសច្បាប់មិនឲ្យដាក់ពាក្យទៅកាន់រដ្ឋាភិបាលអាមេរិកសម្រាប់ការសុំសិទ្ធិជ្រកកោន ឬការការពារមនុស្សធម៌ផ្សេងទៀត។ ប្រធានាធិបតីម៉ិកស៊ិក លោក Andres Manuel Lopez Obrador កាលពីថ្ងៃអង្គារ បានចាត់ទុកច្បាប់នេះថា «អមនុស្សធម៌»។ លោកនិយាយថា ក្រសួងការបរទេសរបស់ប្រទេសម៉ិកស៊ិក បានធ្វើការរួចហើយដើម្បីជំទាស់ទៅនឹងច្បាប់នេះ និងបានចោទប្រកាន់លោក Abbott ថាបានធ្វើទង្វើបែបនេះដើម្បីផលប្រយោជន៍នយោបាយ។

សមាជិកសភាបារាំង ផ្តល់ការអនុម័តចុងក្រោយចំពោះសេចក្តីស្នើច្បាប់អន្តោប្រវេសន៍កាន់តែតឹងរ៉ឹង

2023/12/20 11:44:41 am        102
Facebook Telegram Linkin
សមាជិកសភាប្រទេសបារាំង បានអនុម័តសេចក្តីស្នើច្បាប់អន្តោប្រវេសន៍ដ៏ចម្រូងចម្រាស់ កាលពីថ្ងៃអង្គារ ដោយសភាទាំងពីរបានផ្តល់ការអនុម័តចុងក្រោយរបស់ពួកគេ ចំពោះបទប្បញ្ញត្តិកាន់តែតឹងរ៉ឹង ដែលនឹងកាត់បន្ថយការចំណាយផ្នែកសុខុមាលភាពសម្រាប់ជនបរទេសជាពិសេស។ច្បាប់កាន់តែតឹងរ៉ឹង បង្ហាញពីការផ្លាស់ប្តូរទៅខាងស្ដាំនិយម ក្នុងនយោបាយភាគច្រើននៅអឺរ៉ុប ដែលបានបង្កឱ្យមានភាពមិនសប្បាយចិត្តក្នុងចំណោមសមាជិកសភាឆ្វេងនិយមរបស់ប្រធានាធិបតី លោក Emmanuel Macron ដោយប្រព័ន្ធផ្សព្វផ្សាយបារាំង បានសន្និដ្ឋានថារដ្ឋមន្ត្រីជាច្រើនគំរាមលាលែងពីតំណែង។ រដ្ឋាភិបាលបារាំង បាននិយាយពីដំបូងថា នេះនឹងក្លាយជាច្បាប់បញ្ចុះបញ្ចូលនិងបង្ខំ ដែលនឹងធ្វើឱ្យវាកាន់តែងាយស្រួលសម្រាប់ជនអន្តោប្រវេសន៍ធ្វើការក្នុងវិស័យជាច្រើនកំពុងខ្វះការងារដើម្បីទទួលបានការអនុញ្ញាតឲ្យស្នាក់នៅ ប៉ុន្តែក៏នឹងធ្វើឱ្យមានភាពងាយស្រួលក្នុងការបណ្តេញជនអន្តោប្រវេសន៍ខុសច្បាប់ផងដែរ។ទោះជាយ៉ាងណា ដើម្បីទទួលបានការគាំទ្រនូវសិទ្ធិ រដ្ឋាភិបាលបានព្រមព្រៀងកាត់បន្ថយវិធានការអនុញ្ញាតឱ្យស្នាក់នៅ ខណៈមានការការពន្យារពេលការទទួលបានអត្ថប្រយោជន៍សុខុមាលភាពរបស់ជនអន្តោប្រវេសន៍ រួមទាំងអត្ថប្រយោជន៍សម្រាប់កុមារ និងប្រាក់ឧបត្ថម្ភលំនៅឋាន ជាច្រើនឆ្នាំ។បារាំង មានមោទនភាពជាយូរណាស់មកហើយ ក្នុងការផ្តល់ប្រព័ន្ធសុខុមាលភាពដ៏សប្បុរសបំផុតមួយនៅលើពិភពលោក ដោយផ្តល់ការបង់ប្រាក់ដល់ជនបរទេស ថែមទាំងជួយពួកគេបង់ថ្លៃឈ្នួល ឬមើលថែទាំកូនៗរបស់ពួកគេ។សេចក្តីស្នើច្បាប់ដែលបានអនុម័ត នឹងពន្យារការទទួលបានសិទ្ធចំពោះអត្ថប្រយោជន៍ស្នាក់នៅ សម្រាប់ជនអន្តោរប្រវេសន៍ដែលគ្មានការងារធ្វើនៅសហភាពអឺរ៉ុប ក្នុងរយៈពេលប្រាំឆ្នាំ។

លោកហ្សេឡិនស្គី មានទំនុកចិត្តថា អ៊ុយក្រែននឹងទទួលបានការគាំទ្រពីអាមេរិកបន្ថែមទៀតសម្រាប់សង្រ្គាមជាមួយរុស្ស៊ី

2023/12/20 11:41:04 am        95
Facebook Telegram Linkin
ប្រធានាធិបតីអ៊ុយក្រែនលោក វ៉ូឡូមៀ ហ្សេឡិនស្គី (Volodymyr Zelenskyy) បានថ្លែងកាលពីថ្ងៃអង្គារថា លោកប្រាកដក្នុងចិត្តថា សហរដ្ឋអាមេរិក នឹងរក្សាការសន្យារបស់ខ្លួន ក្នុងការផ្តល់ជំនួយបន្ថែមរាប់ពាន់លានដុល្លារសម្រាប់ទីក្រុងគីវ ដើម្បីបន្តការប្រយុទ្ធរបស់ខ្លួនប្រឆាំងនឹងរុស្ស៊ី ហើយលោក បានឆ្លើយយ៉ាងចំៗថា “ទេ” ចំពោះសំណួរថាតើប្រទេសរបស់លោក អាចចាញ់សង្រ្គាមឬអត់នោះ។ថ្លែងនៅក្នុងសន្និសីទសារព័ត៌មានចុងឆ្នាំ នៅទីក្រុងគីវ លោក ហ្សេឡិនស្គី ក៏បានច្រានចោលការលើកឡើងដែលថា កងកម្លាំងរបស់ទីក្រុងម៉ូស្គូ បានឈ្នះសង្គ្រាម នៅក្នុងឆ្នាំ២០២៣នេះ បន្ទាប់ពីភាគច្រើន បានយកឈ្នះលើការវាយបករបស់អ៊ុយក្រែន និងការបង្កើនផលិតកម្មយោធារបស់ខ្លួននោះ។លោក បាននិយាយថា៖«រុស្ស៊ីបានបរាជ័យក្នុងការសម្រេចបាននូវគោលដៅណាមួយរបស់ខ្លួន» នៅឆ្នាំនេះ ទោះបីជាលោក បានទទួលស្គាល់អ៊ុយក្រែន នៅតែប្រឈមមុខនឹង «បញ្ហាជាច្រើន» បន្ទាប់ពីការចំណាយទៅលើគ្រឿងយុទ្ធោបករណ៍របស់លោកខាងលិច ក្នុងការវាយបក ដែលមិនធ្វើឲ្យមានការចាប់អារម្មណ៍ទៅ លើខ្សែត្រៀមជួរមុខដែលមានចម្ងាយ ១.០០០ គីឡូម៉ែត្រ (៦០០ ម៉ាយ)នោះ។ សភាអាមេរិក បានចាកចេញពីទីក្រុងសម្រាប់ថ្ងៃឈប់សម្រាក ដោយគ្មានកិច្ចព្រមព្រៀង ដើម្បីបញ្ជូនប្រាក់ចំនួន៦១ពាន់លានដុល្លារទៅឲ្យអ៊ុយក្រែន ហើយក្រសួងការពារជាតិអាមេរិក បាននិយាយថា ខ្លួនស្ទើរតែអស់ប្រាក់ ដើម្បីជួយទីក្រុងគីវ បន្ទាប់ពីមានការប្រយុទ្ធគ្នាអស់រយៈពេលជិត ២២ខែ។ សហភាពអឺរ៉ុប ក៏ត្រូវជំរុញទៅក្នុងឆ្នាំថ្មីនូវផែនការផ្គត់ផ្គង់អ៊ុយក្រែនចំនួន ៥៤,៥ ពាន់លានដុល្លារ បន្ទាប់ពីការវេតូពីនាយករដ្ឋមន្ត្រីហុងគ្រី វីកទ័រ អ័របាន (Viktor Orban) ប៉ុន្តែ លោកហ្សេឡិនស្គី បានបញ្ជាក់ថា ខ្លួនមិនព្រួយបារម្ភទេ។

ការពិភាក្សាចំណាប់ថ្នូររវាងកាតា និងអ៊ីស្រាអែល មានសញ្ញាវិជ្ជមាន ប៉ុន្តែកិច្ចព្រមព្រៀងមិនទាន់សម្រេចឡើយ

2023/12/20 11:23:59 am        127
Facebook Telegram Linkin
កិច្ចប្រជុំរបស់នាយករដ្ឋមន្រ្តីកាតា និងប្រធានទីភ្នាក់ងារចារកម្ម ម៉ូសាដ (Mossad) របស់អ៊ីស្រាអែល និងទីភ្នាក់ងារស៊ើបការណ៍សម្ងាត់កណ្តាលរបស់សហរដ្ឋអាមេរិក កាលពីថ្ងៃច័ន្ទ ស្តីពីជំហានដើម្បីដោះលែងចំណាប់ថ្នូរបន្ថែមទៀតដែលត្រូវបានចាប់ខ្លួនដោយក្រុមហាម៉ាស មានភាពវិជ្ជមាន ប៉ុន្តែមិនមានកិច្ចព្រមព្រៀងណាមួយកើតឡើងនោះទេ នេះបើតាមប្រភពមួយបានរាយការណ៍សង្ខេបអំពីកិច្ចខិតខំប្រឹងប្រែងការទូតនេះ។ភាគីពិភាក្សាទាំងបីបានជួបប្រជុំគ្នានៅរដ្ឋធានី វ៉ាសូវី របស់ប្រទេសប៉ូឡូញ ដើម្បីពិភាក្សាអំពីលទ្ធភាពកិច្ចព្រមព្រៀងថ្មីមួយ ក្នុងការធានាការដោះលែងចំណាប់ថ្នូរអ៊ីស្រាអែល ដែលត្រូវបានឃុំខ្លួននៅហ្កាហ្សា ជាថ្នូរនឹងការដោះលែងជនជាតិប៉ាឡេស្ទីននៅក្នុងពន្ធនាគារអ៊ីស្រាអែល និង «ការផ្អាកប្រយុទ្ធមនុស្សធម៌» នៅក្នុងសង្គ្រាមនៅហ្កាហ្សា។នៅក្នុងសេចក្តីថ្លែងការណ៍មួយកាលពីថ្ងៃអង្គារ នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បាននិយាយថា លោកបាន «បញ្ជូនប្រមុខទីភ្នាក់ងារចារកម្ម ម៉ូសាដ ទៅកាន់អឺរ៉ុបចំនួនពីរដង ដើម្បីលើកកម្ពស់ដំណើរការសម្រាប់ការដោះលែងចំណាប់ថ្នូររបស់យើង» ដោយមិនបានផ្តល់ព័ត៌មានលម្អិតអំពីអ្វីដែលត្រូវបានពិភាក្សានោះទេ។ប្រទេសកាតា បាននិយាយថាខ្លួនកំពុងប្រឹងប្រែងដើម្បីជួសជុលកិច្ចព្រមព្រៀងបទឈប់បាញ់មនុស្សធម៌ដែលបានដួលរលំបន្ទាប់ពីរយៈពេលមួយសប្តាហ៍កាលពីថ្ងៃទី០១ ខែធ្នូ និងជំរុញឱ្យមានការបញ្ចប់យ៉ាងទូលំទូលាយចំពោះសង្រ្គាមអ៊ីស្រាអែល និងក្រុមហាម៉ាស ដែលមានរយៈពេលជាងពីរខែ និងដែលបានបង្កគ្រោះមហន្តរាយមនុស្សធម៌យ៉ាងធ្ងន់ធ្ងរនៅតំបន់ហ្កាហ្សា មួយនេះ៕

កងកម្លាំងការពារអ៊ីស្រាអែល ច្រានចោលការចោទប្រកាន់ថា ខ្លួនបានសម្លាប់ស្ត្រីពីរនាក់ នៅព្រះវិហារនៃតំបន់ហ្កាហ្សា

2023/12/20 11:17:39 am        169
Facebook Telegram Linkin
កងកម្លាំងការពារអ៊ីស្រាអែល (IDF) កំពុងរុញច្រានប្រឆាំងនឹងរបាយការណ៍ទាក់ទងនឹងស្ត្រីគ្រិស្តសាសនិកពីរនាក់ ដែលត្រូវបានសម្លាប់ ក្នុងអំឡុងពេលប្រយុទ្ធគ្នា នៅក្នុងតំបន់ដែលមានវិហារកាតូលិកតែមួយគត់របស់តំបន់ហ្កាហ្សា កាលពីចុងសប្តាហ៍មុន។សម្តេចសង្ឃនៃទីក្រុងហ្ស៊េរុយសាឡឹម បានអះអាងនៅក្នុងសេចក្តីប្រកាសព័ត៌មាន កាលពីថ្ងៃសៅរ៍ថា អ្នកបាញ់ស៊ីបរបស់កងកម្លាំងការពារអ៊ីស្រាអែល បានសម្លាប់ស្ត្រីគ្រិស្តសាសនិកពីរនាក់ នៅខាងក្នុងវិហារគ្រួសារបរិសុទ្ធ នៅតំបន់ហ្កាហ្សា ជាកន្លែងដែលគ្រួសារគ្រិស្តសាសនិកភាគច្រើន បានភៀសខ្លួន ចាប់តាំងពីការចាប់ផ្តើមនៃសង្គ្រាមអ៊ីស្រាអែលជាមួយក្រុមហាម៉ាស។សម្តេចសង្ឃនៃក្រុងយេរូសាឡឹមមានព្រះនាម ពៀបាតទីស្តា ភីសហ្សាបាឡា (Pierbattista Pizzaballa) បានសរសេរ នៅក្នុងរបាយការណ៍មួយ ក្រោយមកត្រូវបានបោះពុម្ពឡើងវិញដោយគេហទំព័រ Holy See ថា ស្ត្រីម្នាក់ឈ្មោះ Nahida Khalil Anton និងកូនស្រីរបស់គាត់ឈ្មោះ Samar Kamal Anton ត្រូវបាន «បាញ់សម្លាប់ នៅពេលពួកគេ ដើរទៅកាន់ព្រះវិហារ Sisters' Convent។សម្តេចសង្ឃ ភីសហ្សាបាឡា ដែលជាព្រះសង្ឃកាតូលិក បានមានព្រះបន្ទូលថា៖ «ម្នាក់ត្រូវបានសម្លាប់ ខណៈដែលនាង បានព្យាយាមនាំម្នាក់ទៀត ទៅរកកន្លែងសុវត្ថិភាព។ មនុស្ស៧នាក់ទៀត ត្រូវបានគេបាញ់ និងរងរបួស ខណៈពួកគេ ព្យាយាមការពារអ្នកផ្សេងទៀត នៅក្នុងបរិវេណព្រះវិហារនោះ»។

សម្តេចធិបតី ហ៊ុន ម៉ាណែត៖ វិស័យធនាគារដើរតួនាទីសំខាន់ក្នុងការគាំទ្រដល់កំណើនសេដ្ឋកិច្ចជាតិ

2023/12/20 11:07:54 am        188
Facebook Telegram Linkin
ភ្នំពេញ៖ នាព្រឹកថ្ងៃទី២០ ខែធ្នូ ឆ្នាំ២០២៣សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និង លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានអញ្ជើញជាអធិបតី ក្នុងពិធីសម្ពោធជាផ្លូវការអគារធនាគារវីងថៅវើ ដែលជាសមិទ្ធផលថ្មីមួយរបស់ធនាគារវីង មានកម្ពស់ ២៥ ជាន់ ហើយនឹងក្លាយជាអគារពាណិជ្ជកម្មដ៏លេចធ្លោមួយនៅកណ្តាលរាជធានីភ្នំពេញ សម្រាប់បម្រើសេវាកម្មហិរញ្ញវត្ថុ ឱ្យកាន់តែទូលំទូលាយ និងប្រកប ដោយនិរន្តរភាព ។មានប្រសាសន៍នៅក្នុងពិធីដ៏អធិកអធមនោះ សម្តេចធិបតីនាយករដ្ឋមន្ត្រី បានគូសបញ្ជាក់ថា វិស័យធនាគារដើរតួនាទីសំខាន់ក្នុងការគាំទ្រដល់កំណើនសេដ្ឋកិច្ចជាតិ ប្រៀបបានទៅនឹងបេះដូងដែលប្រមូល និងបញ្ចេញឈាម សម្រាប់​ចិញ្ចឹម​រាង្គកាយមនុស្ស នោះដែរ ។ ទន្ទឹមនឹងនេះ ការសម្រេចវិនិយោគសាងសង់អគារខ្ពស់ទំនើបទាន់សម័យរបស់ធនាគារវីង បានឆ្លុះបញ្ចាំងពីសារៈសំខាន់នៃកត្តាសុខសន្តិភាព ដែលជាមូលដ្ឋានគ្រឹះ សម្រាប់ការអភិវឌ្ឍ និងនាំមកនូវវិបុលភាពសម្រាប់សង្គមជាតិយើង ព្រមទាំងបានបង្ហាញអំពីទំនុកចិត្ត និងភាពជឿជាក់​របស់វិនិយោគិនឯកជន និងក្រុមប្រឹក្សាភិបាលធនាគារ មកលើបរិយាកាសធុរកិច្ច, ភាពរឹងមាំ និងភាពធន់របស់វិស័យធនាគារ និងហិរញ្ញវត្ថុរបស់កម្ពុជា ។សម្តេចធិបតី បានមានប្រសាសន៍បន្តទៀតថា ដើម្បីអភិវឌ្ឍន៍សេដ្ឋកិច្ច និងសង្គមឌីជីថល, រាជរដ្ឋាភិបាលនីតិកាល ទី៧ បានដាក់ចេញយុទ្ធសាស្រ្តបញ្ចកោណ-ដំណាក់កាលទី១ ដើម្បីជំរុញសន្ទុះនៃ ការ អភិវឌ្ឍ សេដ្ឋកិច្ច-សង្គម សំដៅសម្រេចចក្ខុវិស័យឆ្នាំ២០៣០ និងឆ្នាំ ២០៥០ និងដើម្បីឆ្លើយ តប ទៅនឹងបដិវត្តន៍ឧស្សាហកម្មទី៤, ការរីកចម្រើនផ្នែកវិទ្យាសាស្រ្ត និងបច្ចេកវិទ្យាសកល ដែលបច្ចេកវិទ្យាឌីជីថលកំពុងដើរតួនាទីស្នូល និងជាចលករសំខាន់គ្របដណ្តប់លើគ្រប់ ទិដ្ឋភាពសង្គម-សេដ្ឋកិច្ច, រួមទាំងវិស័យហិរញ្ញវត្ថុ និង ធនាគារ ។ បន្ថែមលើនេះ, រាជរដ្ឋាភិបាលបានដាក់ឱ្យអនុវត្ត «គោលនយោបាយអភិវឌ្ឍបច្ចេកវិទ្យាហិរញ្ញវត្ថុកម្ពុជា ២០២៣-២០២៨» ដែលមានចក្ខុវិស័យរយៈពេលវែង ក្នុងការអភិវឌ្ឍបច្ចេកវិទ្យាហិរញ្ញវត្ថុ ដោយឈរលើមូលដ្ឋាននៃការលើកកម្ពស់បរិយាបន្នហិរញ្ញវត្ថុ, ការរក្សាស្ថិរភាពវិស័យហិរញ្ញវត្ថុ និងការជំរុញនវានុវត្តន៍ហិរញ្ញវត្ថុ ដើម្បីចាប់យកអត្ថប្រយោជន៍ជាអតិបរមាពីបរវិត្តកម្មឌីជីថលក្នុងវិស័យហិរញ្ញវត្ថុ និងលើកកម្ពស់ភាពប្រកួតប្រជែងក្នុងវិស័យធនាគារ។ ទន្ទឹមនេះ ក៏ជាសមិទ្ធផលមួយដ៏មានសារៈសំខាន់ គួរជាទីមោទនភាព សម្រាប់ជាមគ្គុទេសក៍ ក្នុងការជំរុញការប្រើប្រាស់បច្ចេកវិទ្យាក្នុងវិស័យហិរញ្ញវត្ថុ «បច្ចេកវិទ្យាហិរញ្ញវត្ថុ FinTech» សំដៅចូលរួមលើកកម្ពស់បរិយាបន្នហិរញ្ញវត្ថុ, រក្សាស្ថិរភាពវិស័យហិរញ្ញវត្ថុ និងជំរុញនវានុវត្តន៍ហិរញ្ញវត្ថុ ។ ក្របខ័ណ្ឌគោលនយោបាយទាំងនេះនឹងមានសារៈសំខាន់សម្រាប់វិស័យធនាគារ នៅ កម្ពុជាក្នុងបរិការណ៍នៃការរីកចម្រើនយ៉ាងឆាប់រហ័សនៃបច្ចេកវិទ្យា ជាពិសេស បច្ចេកវិទ្យាហិរញ្ញវត្ថុ ។ ការចាប់យក និងការសម្របខ្លួនទៅនឹងប្រព័ន្ធឌីជីថលរបស់ធនាគារ មិនត្រឹមតែរួមចំណែកលើកកម្ពស់កម្រិតបរិយាបន្នហិរញ្ញវត្ថុប៉ុណ្ណោះទេ, ប៉ុន្តែថែមទាំងរួមចំណែកដល់ការកសាងហេដ្ឋារចនាសម្ព័ន្ធឌីជីថល និងការប្រើប្រាស់បច្ចេកវិទ្យា ដើម្បីលើកកម្ពស់កំណើន ប្រកប ដោយចីរភាព ។ក្នុងឱកាសនៃពិធីនោះផងដែ សម្តេចធិបតីនាយករដ្ឋមន្រ្តី បានវាយតម្លៃខ្ពស់ចំពោះធនាគារវីង ដែលបានសហការជាមួយក្រសួង-ស្ថាប័នថ្នាក់ជាតិ និងរដ្ឋបាលថ្នាក់ក្រោមជាតិ រួមចំណែកដល់ការអនុវត្តគោលនយោបាយ និង កម្មវិធីអាទិភាពនានារបស់រាជរដ្ឋាភិបាល តាមរយៈការជួយអនុវត្តគោលនយោបាយគាំពារសង្គម គិតចាប់ពីខែមិថុនា ឆ្នាំ២០២០ រហូតដល់ ខែតុលា ឆ្នាំ២០២៣ ដោយសម្រួលក្នុងការបើកប្រាក់ឧបត្ថម្ភរបស់រាជរដ្ឋាភិបាល ដល់ប្រជាជនប្រមាណ ៨០ ម៉ឺនគ្រួសារ ស្មើនឹងប្រជាជនចំនួនជាង ៣,៣ លាននាក់, តាមបណ្ដាញភ្នាក់ងារវីងជាង ១៥ ០០០ កន្លែង ។ ការវិវឌ្ឍរបស់ធនាគារវីង បានគាំទ្រ និងជួយជំរុញដំណើរប្រព្រឹត្តទៅនៃ រដ្ឋាភិបាលអេឡិចត្រូនិក (e-Government) របស់រាជរដ្ឋាភិបាលកម្ពុជា តាមរយៈ ការ ទូទាត់សេវាកម្មរដ្ឋ និងសាធារណៈជាច្រើន ហើយនាពេលថ្មីៗនេះ ធនាគារបានធ្វើកិច្ចសហការជាមួយក្រសួង កសិកម្ម រុក្ខាប្រមាញ់ និងនេសាទ ដោយបានព្រមព្រៀងផ្តល់កម្ចីឥណទានប្រមាណ ៥ លានដុល្លារអាមរិក ដល់ប្រជាកសិករក្នុងអត្រាការប្រាក់ទាប ដើម្បីជួយដល់ប្រជាកសិករ ក៏ដូចជា អ្នកជំនួញក្នុងវិស័យកសិកម្ម សំដៅលើកកម្ពស់កម្លាំងថាមពលនៅក្នុងការជួយជំរុញការអភិវឌ្ឍវិស័យកសិកម្មឱ្យបានបោះជំហានទៅមុខមួយកម្រិតទៀត ។ លើសពីនេះ, ធនាគារវីង ក៏បានបង្កើតភាពជាដៃគូសហការជាមួយសហភាពសហព័ន្ធយុវជនកម្ពុជា ដើម្បីជួយសម្រួលទៅដល់យុវជន ឱ្យទទួលបានចំណេះដឹងផ្នែកហិរញ្ញវត្ថុចាំបាច់នានា ក្នុងការបង្កើនជីវភាពប្រចាំថ្ងៃរបស់ពួកគេ តាមរយៈការទទួលបានបទពិសោធន៍ហិរញ្ញវត្ថុនៃធនាគារឌីជីថលទំនើប ក៏ដូចជាចូលរួមបង្កើតគំនិតផ្តួចផ្តើមថ្មីៗជាច្រើនទៀត ៕

ការបាញ់មីស៊ីលដោយមិនប្រុងប្រយ័ត្នរបស់កូរ៉េខាងជើង ត្រូវការការឆ្លើយតបជាសាកលដ៏ម៉ឺងម៉ាត់

2023/12/20 10:23:37 am        142
Facebook Telegram Linkin
បណ្ដាប្រទេសមហាអំណាចពិភពលោកបាននិយាយកាលពីថ្ងៃអង្គារទី១៩ ខែធ្នូថា សហគមន៍អន្តរជាតិត្រូវការការឆ្លើយតបយ៉ាងម៉ឺងម៉ាត់និងឯកភាពគ្នា ចំពោះការផលិតអាវុធនុយក្លេអ៊ែរ និងការបាញ់មីស៊ីល ដោយខ្វះការប្រុងប្រយ័ត្ន របស់កូរ៉េខាងជើង។ ក្រុមរដ្ឋមន្ត្រីការបរទេស G7 បាននិយាយនៅក្នុងសេចក្តីថ្លែងការណ៍មួយបន្ទាប់ពីការបាញ់មីស៊ីលអន្តរទ្វីបដ៏មានឥទ្ធិពលបំផុតរបស់ទីក្រុងព្យុងយ៉ាងថា សកម្មភាពដែលគ្មានការប្រុងប្រយ័ត្នម្តងហើយម្តងទៀតរបស់កូរ៉េខាងជើង ត្រូវតែឆ្លើយតបយ៉ាងរហ័ស រួបរួម និងម៉ឺងម៉ាត់ ជាពិសេសពីសំណាក់ក្រុមប្រឹក្សាសន្តិសុខអង្គការសហប្រជាជាតិ ។ ប្រទេសកូរ៉េខាងជើងកាលពីថ្ងៃចន្ទដើមសប្ដាហ៍នេះ បានបាញ់សាកល្បងមីស៊ីលផ្លោងអន្តរទ្វីបទំនើបនិងមានសមត្ថភាពខ្លាំបំផុត ដែលអាចបាញ់ទៅដល់សហរដ្ឋអាមេរិក។ កូរ៉េខាងជើង បាននិយាយថា មេដឹកនាំរបស់ខ្លួន លោក គីម ជុងអ៊ុន (Kim Jong Un) បានត្រួតពិនិត្យការបាញ់នេះ ដោយផ្ទាល់ ហើយបានព្រមានទីក្រុងវ៉ាស៊ីនតោន ដែលបានពង្រឹងទំនាក់ទំនង ជាមួយកូរ៉េខាងត្បូង ប្រឆាំងនឹងការធ្វើការសម្រេចចិត្តខុស។ នៅក្នុងទង្វើចុងក្រោយបំផុត ដើម្បីជំរុញកិច្ចសហប្រតិបត្តិការត្រីភាគី រវាងប្រទេសជប៉ុន កូរ៉េខាងត្បូង និងសហរដ្ឋអាមេរិក កាលពីថ្ងៃអង្គារ បានធ្វើឱ្យសកម្មនៃប្រព័ន្ធមួយដើម្បីចែករំលែកទិន្នន័យពេលវេលាជាក់ស្តែងស្តីពីការបាញ់អាវុធរបស់កូរ៉េខាងជើងដែលត្រូវបានព្រមព្រៀងនៅក្នុងកិច្ចប្រជុំកំពូលក្នុងចំណោមមេដឹកនាំប្រទេសទាំងបីកាលពីខែសីហា៕

បណ្ដាញសង្គម

ព័ត៌មានថ្មីៗ

នគរបាលបានបង្រ្កាបក្រុមបាតុករប្រឆាំងរដ្ឋាភិបាលប៉េរូនៅទីក្រុង Lima
09/22/2025 04:09 PM
Facebook Telegram Linkin
ដូមីនីករឹបអូសបានសារធាតុកូកាអ៊ីនទម្ងន់ ១តោន អំឡុងប្រតិបត្តិការរួមគ្នាជាមួយអាមេរិក
09/22/2025 04:09 PM
Facebook Telegram Linkin
បាតុកម្មទ្រង់ទ្រាយធំផ្ទុះឡើងនៅប្រេស៊ីល ប្រឆាំងនឹងសំណើច្បាប់លើកលែងទោសសម្រាប់លោក Bolsonaro
09/22/2025 04:09 PM
Facebook Telegram Linkin
អ៊ីស្រាអែលបញ្ចេញវីដេអូឃើញរថក្រោះដែលពួកគេអះអាងថាស្ថិតក្នុង និងជុំវិញទីក្រុងហ្កាហ្សា
09/22/2025 04:09 PM
Facebook Telegram Linkin
ជនប៉ាឡេស្ទីននៅវ៉េសប៊ែងស្វាគមន៍ការទទួលស្គាល់រដ្ឋប៉ាឡេស្ទីនរបស់អង់គ្លេស
09/22/2025 04:09 PM
Facebook Telegram Linkin
ស៊ីរីកំណត់កាលបរិច្ឆេតបោះឆ្នោតជាលើកដំបូងនៅខែតុលា ក្រោយការដួលរលំរបស់លោក al-Assad
09/22/2025 04:09 PM
Facebook Telegram Linkin
ការវាយប្រហាររបស់អ៊ីស្រាអែលសម្លាប់មនុស្សយ៉ាងហោច ២៥នាក់ក្នុងគ្រួសារតែមួយនៅទីក្រុងហ្កាហ្សា
09/22/2025 04:09 PM
Facebook Telegram Linkin
មនុស្សម្នាក់ស្លាប់ ម្នាក់ទៀតបាត់ខ្លួន ក្រោយភ្លៀងធ្លាក់ខ្លាំងនៅតំបន់ Catalonia ប្រទេសអេស្ប៉ាញ
09/22/2025 04:09 PM
Facebook Telegram Linkin
UNព្រួយបារម្ភយ៉ាងខ្លាំងចំពោះស្ថានភាពកាន់តែធ្ងន់ធ្ងរនៅទីក្រុង El-Fasher ប្រទេសស៊ូដង់
09/22/2025 04:09 PM
Facebook Telegram Linkin
ព្យុះទីហ្វុង Ragasa វាយប្រហារខេត្តភាគឦសាន Cagayan របស់ប្រទេសហ្វីលីពីន
09/22/2025 03:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.