នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រធាន​ក្រុមការងារ​ចុះមូលដ្ឋាន ប្រកាស​បញ្ចូលសមាជិកថ្មី​​គណបក្សប្រជាជនកម្ពុជាចំនួន ៦៩០០នាក់ ក្នុងស្រុកប្រាសាទបល្ល័ង្ក ខេត្តកំពង់ធំ
សម្ដេច​តេជោ៖ការពង្រឹងខឿនការពារជាតិមិនសំដៅតែនៅសមរភូមិមុខទេ ត្រូវយកចិត្តទុកដាក់ទំនុកបម្រុងអ្នកសមរភូមិក្រោយជាគ្រួសារយុទ្ធជនជួរមុខ និងអតីតយុទ្ធជន
ឯកអគ្គរដ្ឋទូតហុងគ្រីចប់អាណត្តិមើលឃើញថាកម្ពុជាគឺជាដៃគូដ៏ជិតស្និទ្ធរបស់ហុងគ្រី
ឯកអគ្គរដ្ឋទូតបញ្ចប់អាណត្តិស្វីស៖ រដ្ឋាភិបាលស្វីសនឹងបន្តគាំទ្រដល់ការអភិវឌ្ឍសង្គម-សេដ្ឋកិច្ចកម្ពុជា

នយោបាយ​ និង ការអភិវឌ្ឍន៍

ព្រះមហាក្សត្រ ផ្ញើព្រះរាជសាររំលែកមរណទុក្ខចំពោះក្រុម​គ្រួសារសពនិសិត្ស ចាន់ ឧត្ដម ដែលបានស្លាប់ដោយសារការប្រយុទ្ធរវាងកងទ័ពអ៊ីស្រាអែល និង ក្រុមហាម៉ាស់

2023/10/09 05:03:44 pm        512
Facebook Telegram Linkin
ព្រះករុណា ព្រះបាទសម្ដេច ព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណា​ចក្រ​កម្ពុជា នៅថ្ងៃទី០៩ ខែតុលា ឆ្នាំ២០២៣នេះ បាន​ផ្ញើព្រះរាជសារ​ចូល​រួម​សោក​ស្ដាយ និង​រំលែក​មរណ​ទុក្ខ ចំពោះក្រុម​គ្រួសារលោក ចាន់ ឈាងគ្រី និងលោកស្រី នង ណារុន ដែលកូនប្រុស​បង្កើត​របស់​គាត់ គឺលោក ចាន់ ឧត្ដម ជានិសិត្សនៅសាកលវិទ្យាល័យភូមិន្ទកសិកម្ម​ចំការដូង បាន​បាត់​​ប​ង់ជីវិត​នៅ​ក្នុងប្រទេសអ៊ីស្រាអែល ដោយសារតែការប្រយុទ្ធរវាងកងទ័ពអ៊ីស្រាអែល និង ក្រុម​ហាម៉ាស់​។

ប្រសាសន៍សំខាន់ៗរបស់សម្ដេចតេជោ ហ៊ុន សែន ក្នុងពិធីបិទបញ្ចប់កញ្ចក់កាមេរ៉ា-ថតខ្សែភាពយន្តភាគរឿង " កូនប្រុសក្រោមពន្លឺព្រះចន្ទពេញបូណ៌មី "

2023/10/09 04:53:29 pm        505
Facebook Telegram Linkin
ភ្នំពេញ៖ ពិធីបិទបញ្ចប់កញ្ចក់កាមេរ៉ាថត ខ្សែភាពយន្តភាគ រឿង “ កូនប្រុសក្រោមពន្លឺព្រះចន្ទពេញបូណ៌មី ” ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នៅរសៀលថ្ងៃទី០៩ ខែតុលា ឆ្នាំ២០២៣។+ប្រសាសន៍សំខាន់ៗរបស់សម្ដេចតេជោ ហ៊ុន សែន ដែលមានខ្លឹមសារដូចខាងក្រោម៖-សម្ដេចតេជោ ហ៊ុន សែន ថ្លែងកោតសរសើរចំពោះអ្នកដឹកនាំរឿង អ្នកបច្ចេកទេស និងតួសម្ដែងទាំងអស់ ក្នុងការថតខ្សែភាពយន្តភាគរឿង «កូនប្រុសក្រោមពន្លឺព្រះចន្ទពេញបូណ៌មី» រហូតឈានដល់ការបិទបញ្ចប់ជាផ្លូវការនាថ្ងៃនេះ។-សម្ដេចតេជោ ហ៊ុន សែន រឿងភាគប្រវត្តិសាស្ត្រ រឿងកូនប្រុសក្រោមពន្លឺព្រះចន្ទពេញបូណ៌មី បើថត គ្រប់ព្រឹត្តិការណ៍ប្រវត្តិសាស្ត្រទាំងអស់ អាចឈានដល់ជាង ៣០០ ភាគ។-សម្ដេចតេជោ ហ៊ុន សែន ការរីកចម្រើននៅកម្ពុជា បានបង្កឱ្យមានការលំបាកខ្លាំងដល់ដំណើរការថ តរឿង កូនប្រុសក្រោមពន្លឺព្រះចន្ទពេញបូណ៌មី ដើម្បីឱ្យត្រូវតាមព្រឹត្តិការណ៍ប្រវត្តិសាស្ត្រ។-សម្ដេចតេជោ ថ្លែងអំណរគុណចំពោះសប្បុរសជននានា ដែលបានជួយឧបត្ថម្ភដល់ដំ ណើរការថតរឿង កូនប្រុសក្រោមពន្លឺព្រះចន្ទពេញបូណ៌មី ដែលជាការចំណាយច្រើនបំផុតមិនធ្លាប់ មាននៅក្នុងប្រវត្តិនៃការថតភាពយន្តនៅកម្ពុជា។-សម្ដេចតេជោ ហ៊ុន សែន សោកស្ដាយចំពោះសាក្សីប្រវត្តិសាស្ត្រ ដែលបានទទួលមរណភាពនៅអំឡុងពេលថតខ្សែភាពយន្តប្រវត្តិសាស្ត្រ រឿងកូនប្រុសក្រោមពន្លឺព្រះចន្ទពេញបូណ៌មី ដែលមិនបានមើល ភាពយន្តនេះ នៅក្រោយថតចប់ ក្នុងនោះមានដូចជាឯកឧត្ដម សុខ សារឿន, សម្ដេច ហ៊ុន ណេង, អ្នក គ្រូពេទ្យ តាំង លី និងប្អូនថ្លៃស្រីសម្ដេចតេជោ ជាដើម។-សម្ដេចតេជោ ហ៊ុន សែន បញ្ជាក់ថា សម្ដេចនឹងមិនអនុញ្ញាតឱ្យថតសាច់រឿងរបស់សម្ដេចផ្សេងទីពីរ ដែលមានការបញ្ចូលដាក់មនោសញ្ចេតនារបស់អ្នកនិពន្ធ នាំឱ្យខុសប្រវត្តិសាស្រ្ដឡើយ។-សម្ដេចតេជោ ហ៊ុន សែន ចោទជាសំណួរថា តើមានមនុស្សប៉ុន្មាននាក់នៅលើពិភពលោក ដែលសុខចិត្តលះបង់អំណាច នៅពេលដែលខ្លួនកំពុងមានប្រជាប្រិយភាពខ្ពស់?-សម្ដេចតេជោ៖ ការលះបង់របស់ខ្ញុំ គឺដើម្បីប្រជាជនកម្ពុជា រស់នៅក្នុងសុខសន្តិភាព និងការអភិវឌ្ឍជាបន្តទៀត។-សម្ដេចតេជោ ហ៊ុន សែន ផ្ញើសារទៅកាន់ក្រុមប្រឆាំងទាំងឡាយឱ្យភ្លឺភ្នែក និងផ្ដាំទៅក្រុមប្រឆាំងត្រូវរៀនសូត្រពីសម្ដេចឱ្យបានច្រើនបន្ថែមទៀត ខណៈកាលពីមុនក្រុមនេះតែងតែនិយាយថាសម្ដេចតេជោ មិនហ៊ានចុះចេញពីតំណែង ប៉ុន្ដែមកដល់ពេលនេះ សម្ដចតេជោ កំពុងធ្វើជាឪពុករបស់នាយករដ្ឋមន្រ្ដីរួចបាត់ទៅហើយ។-សម្ដេចតេជោ ហ៊ុន សែន៖ ខ្ញុំអាចរស់នៅយ៉ាងតិច ៣០ ឆ្នាំទៀត ហើយក៏នៅមានឥទ្ធិពលនៅក្នុងសង្គមកម្ពុជា ជាបន្តទៅទៀតដែរ។-សម្ដេចតេជោ ៖ បើអ៊ីស្រាអែល មិនតម្រូវឱ្យយើងចាកចេញពីប្រទេសគេនោះទេ យើងនៅ តែបន្តរស់នៅជាមួយប្រជាជនអ៊ីស្រាអែល យើងមិនរត់ចោលប្រជាជនអ៊ីស្រាអែលនោះទេ។-សម្ដេចតេជោ ហ៊ុន សែន៖ បើអ៊ីស្រាអែល តម្រូវឱ្យយើងជម្លៀសនិស្សិតជាង ៤០០ នាក់ចេញពីអ៊ីស្រាអែល កម្ពុជាមិនខ្លាចនឹងចំណាយថវិកាជួលយន្តហោះពិសេស ដើម្បីទៅដឹកនិស្សិតទាំងនោះ នោះឡើយ។-សម្ដេចតេជោ ហ៊ុន សែន៖ សង្គ្រាមនៅអ៊ីស្រាអែល អាចរាលដាលទៅដល់លីបង់ ដែលមានក្រុមចលនាហេសប៊ូឡានៅទីនោះ។-សម្ដេចតេជោ អំពាវនាវ ដល់ប្រទេសអ៊ីស្រាអែល និងហាម៉ាស់ ប្រកាន់ភ្ជាប់នូវភាពអត់ធ្មត់ និងប្រកាន់យកនៅការចរចារគ្នា ដើម្បីឈានទៅបញ្ចប់ការឈប់បាញ់។-សម្ដេចតេជោ ហ៊ុន សែន បញ្ជាក់ថា ក្នុងនាមជាប្រធានគណបក្សកាន់អំណាចសម្ដេចនៅតែមានសិទ្ធិក្នុងកិច្ចការងារនយោបាយទាំងក្នុងប្រទេស និងក្រៅប្រទេស។ សម្ដេចតេជោ ហ៊ុន សែន៖ ខ្ញុំមិនមានសិទ្ធិបញ្ជាលើកងកម្លាំងនោះទេ ប៉ុន្តែខ្ញុំមានសិទ្ធិខាងនយោបាយ។-សម្ដេចតេជោ ហ៊ុន សែន៖ ការបន្តពូជនៅក្នុងអំណាច គឺជាការពិត រដ្ឋាភិបាលមួយ ត្រូវបន្តទៅរដ្ឋាភិ បាលមួយទៀត ដោយមិនមានដាច់។ ទី២ គឺជាការបន្តតំណែង តាមរយៈបក្សឈ្នះឆ្នោត។ ទី៣ សម្ដេចធិបតី ហ៊ុន ម៉ាណែត ជាកូនសម្ដេច ដែលទទួលបានការសិក្សាកម្រិតខ្ពស់ទាំងនៅក្នុង និងក្រៅប្រទេស ព្រមទាំងមានបទពិសោធន៍ការងារជាច្រើន។-សម្ដេចតេជោ ហ៊ុន សែន៖ អ្នកវិភាគបរទេសមួយចំនួន គេសំណាងនៅត្រង់ គេកើតនៅប្រទេសអ្នក មាន ប៉ុន្តែខួរក្បាលគេ មិនពូកែជាងយើងនោះទេ។-សម្ដេចតេជោ ហ៊ុន សែន ផ្ដល់ថវិកាជូនតួសម្ដែងនៅក្នុងភាពយន្តប្រវត្តិសាស្ត្រ រឿងកូនប្រុសក្រោមព ន្លឺព្រះចន្ទពេញបូណ៌មី ជាង ៤០០ នាក់ ក្នុងម្នាក់ៗទទួលបានថវិកាចំនួន ៥០០ ដុល្លារ។ ចំពោះកុមារា កុមារី ដែលបានចូលរួមសម្ដែងនៅក្នុងភាពយន្តប្រវត្តិសាស្ត្រនេះ សម្ដេចតេជោ និងសម្ដេចកិត្តិព្រឹទ្ធប ណ្ឌិត ឧបត្ថម្ភនូវខ្សែកមាសទម្ងន់ ៥ ជីក្នុងម្នាក់ៗ ជំនួសឱ្យការមិនបានមេដាយ ដោយសារនៅជាកុមារ។

កម្ពុជាបង្កើតការងារជិត ៦ម៉ឺនកន្លែង ក្នុងរយៈពេល៨ខែឆ្នាំ២០២៣

2023/10/09 02:29:55 pm        466
Facebook Telegram Linkin
ភ្នំពេញ៖ យោងតាមរបាយការណ៍ក្រសួងការងារ និងបណ្តុះបណ្តាលវិជ្ជាជីវៈ បង្ហាញថា រយៈពេល៨ខែឆ្នាំ២០២៣នេះ មានសហគ្រាស គ្រឹះស្ថានបើកដំណើរការថ្មីចំនួន ១,១៨៨ នៅក្នុងប្រទេសកម្ពុជា ដោយផ្តល់ការងារដល់​ប្រជាពលរដ្ឋ​បានចំនួនជិត ៦ម៉ឺនកន្លែង(៥៩,៦៣១)។ ក្នុងនោះ សហគ្រាសគ្រឹះស្ថានវិស័យកាត់ដេរបើកថ្មីមានចំនួន៧៩ ផ្តល់ការងារថ្មីបានជិត​៣ម៉ឺន៣ពាន់នាក់(៣២,៥៥១នាក់) រីឯសហគ្រាសគ្រឹះស្ថាន​ក្រៅវិស័យកាត់ដេរ​បើកថ្មីមានចំនួន១,១០៩ ផ្តល់ការងារថ្មីបានជាង២ម៉ឺន៧ពាន់កន្លែង (២៧,០៨០)។ វត្តមាននៃសហគ្រាសគ្រឹះស្ថានថ្មីនេះ អាចបង្ហាញថាអ្នកវិនិយោគមានទំនុកចិត្តចំពោះគោល​នយោបាយរបស់រាជរដ្ឋាភិបាលកម្ពុជា ​ក៏ដូចជាការមើលឃើញនូវសក្តានុពលផ្នែកធុរកិច្ច ពាណិជ្ជកម្ម នៅក្នុងប្រទេសកម្ពុជាផងដែរ។សូមបញ្ជាក់ថា គិតត្រឹមខែកញ្ញា ឆ្នាំ២០២៣ នៅក្នុងប្រទេសកម្ពុជា មានរោងចក្រ សហគ្រាសដែលបានចុះបញ្ជិការសរុបចំនួន ១៧,៦៨៤ ដែលមានកម្មករនិយោជិតសរុបចំនួនជិត១,៥លាននាក់ ក្នុងនោះរោងចក្រ សហគ្រាសវិស័យវាយនភណ្ឌកាត់ដេរ ស្បែកជើង និងផលិតផលធ្វើដំណើរនិងកាបូប មានចំនួន ១,៣៣៧ ដែលមានកម្មករនិយោជិតសរុបជាង៨៣ម៉ឺននាក់។ ក្នុងតំណែងជានាយករដ្ឋមន្ត្រីនៃកម្ពុជាក្នុងអាណត្តិទី៧នេះ សម្តេចមហាបវរធិបតី ហ៊ុន ម៉ាណែត ក៏បានបញ្ជាក់ថា រាជរដ្ឋាភិបាលកម្ពុជានឹងរៀបចំកិច្ចប្រជុំជាមួយវិស័យឯកជន នាខែវិច្ឆិកា ខាងមុខ ដើម្បីកែលម្អបរិយាកាសវិនិយោគ និងការធ្វើធុរកិច្ចនៅកម្ពុជា សំដៅបង្កើនភាពប្រកួតប្រជែង និងទាក់ទាញទុនវិនិយោគបន្ថែម និងបង្កើតការងារថ្មីៗជូនប្រជាពលរដ្ឋ។ទន្ទឹមនេះដែរ ក្រសួងការងារ និងបណ្តុះបណ្តាលវិជ្ជាជីវៈ ក៏កំពុងបន្តអនុវត្តទិសដៅក្នុងការរក្សា និង បង្កើនមុខរបរ និងការងារនៅក្នុង និងក្រៅប្រទេសផងដែរ។ កាលពីថ្ងៃទី៣ ខែតុលា ឆ្នាំ២០២៣ ក្នុងឱកាសជួបសំណេះសំណាលជាមួយកម្មករនិយោជិតរោងចក្រកាត់ដេរនៅក្នុងខណ្ឌមានជ័យ និងខណ្ឌដង្កោ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ក៏បានបង្ហាញ អំពីវឌ្ឍនភាពការងារអាទិភាព ដែលក្រសួងត្រូវអនុវត្តក្នុងឆ្នាំ២០២៣នេះផងដែរ។ ក្នុងនោះគឺក្រសួងការងារ ​និងបណ្តុះបណ្តាលវិជ្ជាជីវៈ បញ្ជាក់ថា បានបង្កើតក្រុមការងារដើម្បីរៀបចំ​យន្តការវាយ​តម្លៃនិងកំណត់លក្ខណវិនិច្ឆ័យ “សហគ្រាសមួយ ជាសហគមន៍សុខសាន្តមួយ” ដោយ​ពិគ្រោះយោបល់និងសហការជាមួយដៃគូសង្គម សំដៅឈានទៅការដាក់ចេញយុទ្ធនាការប្រឡង​ប្រណាំងចាប់ពីឆ្នាំ២០២៤។ ​កម្មវិធីនេះ​ នឹងចូលរួមជម្រុញ ​លើកទឹកចិត្តដល់រោងចក្រ សហគ្រាស បង្កើនការប្រកួតប្រជែងទាំង​បរិយាកាសការងារ និង ​ផលិតភាពការងារ ​ក្នុងរោងចក្រ​សហគ្រាសនីមួយៗ​កាន់តែខ្លាំង៕

ក្រសួងប្រៃសណីយ៍ និងក្រសួងអប់រំ ចុះអនុស្សរណៈ ស្ដីពីការកសាងមជ្ឈមណ្ឌល​បច្ចេកវិទ្យាសហគមន៍ នៅតាមវិទ្យាល័យសាធារណៈ

2023/10/09 02:22:38 pm        595
Facebook Telegram Linkin
ភ្នំពេញ៖ ឯកឧត្ដម ជា វ៉ាន់ដេត រដ្ឋមន្ត្រី ក.ប.ទ. និងឯកឧត្តមបណ្ឌិតសភាចារ្យ ហង់ជួន ណារ៉ុន ឧប​នាយករដ្ឋមន្ត្រី រដ្ឋមន្ត្រី ក.អ.យ.ក. នាព្រឹកថ្ងៃទី៩ ខែតុលា ឆ្នាំ២០២៣ នៅទីស្តីការ​ក្រសួង​ប្រៃសណីយ៍ និង​ទូរគមនាគមន៍ (ក.ប.ទ.) បានអញ្ជើញជា​អធិបតីភាព​ក្នុង​ពិធី​ចុះ​ហត្ថ​លេខា​លើ​អនុស្សរណៈ នៃ​ការយោគយល់គ្នា ស្ដីពីការកសាង​មជ្ឈ​មណ្ឌល​បច្ចេក​វិទ្យា​សហគមន៍​នៅ​តាម​វិទ្យាល័យ​សាធារណៈ ដែលមានការអញ្ជើញចូលរួមពី ឯកឧត្ដម លោកជំទាវ ជាថ្នាក់ដឹកនាំ មន្រ្តី​រាជការ តំណាងក្រសួងទាំងពីរ ព្រមទាំងតំណាងគ្រឹះស្ថានឧត្ដមសិក្សា និងមធ្យមសិក្សាទុតិយភូមិ វិស័យ​ឯកជន និងអង្គភាពសារព័ត៌មាន ដែលមានចំនួនសរុបប្រមាណ ២៧០ នាក់។នៅក្នុងឱកាសនោះ លោកជំទាវ ហ៊ាន ប៉ូលីណេ អនុរដ្ឋលេខាធិការ ក.ប.ទ. បាន​ជម្រាប​ជូន​អំពី​វត្ថុ​បំណង​នៃ​ការបង្កើត “មជ្ឈមណ្ឌលបច្ចេកវិទ្យាសហគមន៍” (ម.ប.ស.) នៅតាមវិទ្យាល័យ​សាធារណៈ​ ក្នុងព្រះរាជាណាចក្រកម្ពុជា ដែលមានចក្ខុវិស័យចម្បងចំនួន ៣ រួមមាន៖ (១) ការចូល​រួមអនុវត្តយុទ្ធសាស្រ្តបញ្ចកោណ-ដំណាក់កាលទី១ របស់រាជរដ្ឋាភិបាល នីតិកាល​ទី៧ នៃរដ្ឋសភា ក្របខណ្ឌគោលនយោបាយសេដ្ឋកិច្ចនិងសង្គមឌីជីថលកម្ពុជា ២០២១-២០៣៥ និង​គោលនយោបាយរដ្ឋាភិបាលឌីជីថលកម្ពុជា 2022-2035។(២) ការលើក​កម្ពស់​បរិវត្តកម្ម​វិស័យ​អប់រំ និងអក្ខរកម្មឌីជីថល។(៣) ការគាំទ្រដល់ដំណើរការអភិវឌ្ឍមូលធនមនុស្សឌីជីថល។បន្ថែមពីលើនេះ លោក​នាយកវិទ្យាល័យ ហ៊ុន សែន ១មិថុនា បានលើកឡើងថា តាម​រយៈ​គំនិត​ផ្តួច​ផ្តើម​បង្កើត ម.ប.ស. នេះ សហគមន៍ទាំងមូលនឹងមានឱកាសទទួលបានជំនាញបច្ចេកវិទ្យា និង​សេវាចាំបាច់នានា ក្នុងយុគសម័យឌីជីថល។ឯកឧត្តមរដ្ឋមន្រ្តី ជា វ៉ាន់ដេត បានមានប្រសាសន៍ថា ដើម្បីកសាងរដ្ឋាភិបាល សេដ្ឋកិច្ច សង្គម និង​ពលរដ្ឋឌីជីថល តាមរយៈការកសាងហេដ្ឋារចនាសម្ព័ន្ធឌីជីថល ការតភ្ជាប់ឌីជីថល ការ​រៀប​ចំ​ប្រព័ន្ធ​បច្ចេកវិទ្យាឌីជីថល ការតភ្ជាប់អ៊ីនធឺណិត និងការបង្កើត “មជ្ឈមណ្ឌល​បច្ចេក​វិទ្យាស​ហគមន៍​”​ នៅតាមវិទ្យាល័យសាធារណៈ គឺជាកាតាលីករថ្មីដ៏មានសារៈសំខាន់ ប្រកប​ដោយ​សក្ដានុពល និងកាលានុវត្តភាព ក្នុងការជំរុញ​ការ​អភិវឌ្ឍ​ប្រព័ន្ធ​អេកូឡូស៊ី​ នៃ​ការ​អប់​រំ​បែប​ឌីជីថល​ឱ្យ​រឹង​មាំ និងអំណោយផលដល់ការធ្វើបរិវត្តកម្មឌីជីថលលើគ្រប់វិស័យ។ ឯកឧត្តមរដ្ឋមន្ត្រី បាន​គូស​បញ្ជាក់​បន្ថែមថា ពិធីចុះហត្ថលេខានេះ គឺពិតជាឆ្លុះបញ្ចាំង​អំពី​វឌ្ឍន​ភាព​បន្ថែម​ថ្មី​មួយ​ទៀត​រវាង​ក្រសួង​ទាំងពីរ ក្នុងការធ្វើបរិវត្តកម្មឌីជីថលបម្រើដល់ការអប់រំ ដើម្បីបន្ត​អភិវឌ្ឍ​ធន​ធាន​មនុស្ស​បច្ចេកវិទ្យាឌីជីថល ក្នុងការកសាងសេដ្ឋកិច្ច និងសង្គមឌីជីថល ក្រោមការ​ដឹក​នាំ​ប្រកប​ដោយ​គតិ​បណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃ​ព្រះរា​ជា​ណា​ចក្រ​កម្ពុជា​។ឯកឧត្តមបណ្ឌិតសភាចារ្យ ហង់ជួន ណារ៉ុន បានថ្លែងអំណរគុណដល់ ក.ប.ទ. ដែលបាន​ផ្តួច​ផ្តើម​បង្កើត​ ម.ប.ស. ដើម្បីរួមចំណែកដល់ការលើកកម្ពស់អក្ខរកម្មនិងបំណិនឌីជីថល និងកា​រ​ធ្វើ​សមាហរណ​កម្ម​បច្ចេកវិទ្យាអប់រំ ដើម្បីការអប់រំឌីជីថលនៅក្នុងថ្នាក់រៀន សាលារៀន និង​សហគមន៍​ទាំងមូល។ ម្យ៉ាងទៀត អនុស្សរណៈនៃការយោគយល់គ្នានេះ ពិតជាមានសារៈសំខាន់ ទាន់​ពេលនិងចំគោលដៅ ដែលគាំទ្រដល់ដំណើរអភិវឌ្ឍន៍ការអប់រំឌីជីថល ក្នុងគោល​ដៅ​ជំរុញ​កំណើន ​ការលើកកម្ពស់ផលិតភាព និងប្រសិទ្ធភាពនៃការកសាងអនាគតពលរដ្ឋឌីជីថលកម្ពុជា។សូមជម្រាបជូនថា ម.ប.ស. បានចាប់ផ្តើមសាងសង់នៅ វិទ្យាល័យ ហ៊ុន សែន ១ មិថុនា នៅ​ឃុំ​ពារាម​ ស្រុកបាទី ខេត្តតាកែវ ដែលជាវិទ្យាល័យឈានមុខគេនៅស្រុកបាទី ខេត្តតាកែវ ហើយ​នាយ​ក​វិទ្យាល័យបានទទួលពានរង្វាន់លេខ២ ក្នុងការគ្រប់គ្រងល្អ នៅទូទាំងប្រទេស។ គម្រោង ម.ប.ស. នឹងត្រូវចាប់ផ្តើមសាងសង់នៅគ្រប់វិទ្យាល័យនៃខេត្តតាកែវ នៅដើមខែវិច្ឆិកា ឆ្នាំ២០២៣ ខាងមុខ ព្រមទាំងបន្តសាងសង់នៅទូទាំងប្រទេស៕

អ្នកប្រើប្រាស់ប័ណ្ណ ប.ស.ស. ក្នុងមន្ទីរពេទ្យព្រះអង្គឌួងកើនឡើងជិត ១,២លាននាក់

2023/10/09 02:19:58 pm        1082
Facebook Telegram Linkin
ភ្នំពេញ៖ ការិយាល័យផ្នែកបេឡាជាតិសន្តិសុខសង្គម (ប.ស.ស.) នៃមន្ទីរពេទ្យព្រះអង្គឌួង លើកឡើងថា គិតចាប់តាំងពីឆ្នាំ២០១៧ រហូតមកត្រឹមខែកញ្ញា ឆ្នាំ២០២៣នេះ មានអ្នកជម្ងឺចំនួនជិត ១,២លាននាក់ បានមកទទួលសេវាពិនិត្យ និងព្យាបាលជម្ងឺ នៅមន្ទីរពេទ្យព្រះអង្គឌួង។ តាមក្រសួងការងារ និងបណ្តុះបណ្តាលវិជ្ជាជីវៈ នៅព្រឹកថ្ងៃទី៩ ខែតុលានេះ លោកស្រី ឃួន វ៉ាន់ឌី អនុប្រធានការិយាល័យផ្នែក ប.ស.ស. នៃមន្ទីរពេទ្យព្រះអង្គឌួង ចាត់ទុកថា ទោះបីជាប្រជាពលរដ្ឋដែលប្រើប័ណ្ណ ប.ស.ស. រឺ ប័ណ្ណសមធម៌ រឺអ្នកត្រូវបង់លុយដើម្បីទទួលសេវាពិនិត្យ និងព្យាបាលជម្ងឺក្តី គឺសុទ្ធតែជាអ្នកជម្ងឺរបស់មន្ទីរពេទ្យដូចគ្នាទាំងអស់។ ដូចនេះ សម្រាប់អ្នកជម្ងឺដែលប្រើប័ណ្ណ ប.ស.ស. ក៏ទទួលបានការយកចិត្តទុកដាក់ដូចគ្នាពីក្រុមគ្រូពេទ្យ។ លោកស្រី បញ្ជាក់ថា គ្រូពេទ្យនៃមន្ទីរពេទ្យព្រះអង្គឌួង និងមន្ត្រីផ្នែក ប.ស.ស. ដែលប្រចាំការក្នុងមន្ទីរពេទ្យនេះ សហការគ្នាយ៉ាងល្អក្នុងការសម្របសម្រួលឲ្យមានភាពងាយស្រួល និងរហ័ស សម្រាប់អ្នកជម្ងឺមកទទួលសេវាពិនិត្យសុខភាព និងព្យាបាលជម្ងឺ។ លោកស្រី បានលើកទឹកចិត្តដល់អ្នកមានប័ណ្ណ ប.ស.ស. ទាំងអស់មកទទួលសេវាពិនិត្យ និងព្យាបាលជម្ងឺ នៅមន្ទីរពេទ្យព្រះអង្គឌួង សម្រាប់គ្រប់ផ្នែកទាំងអស់ រួមមាន ផ្នែកច្រមុះ បំពង់ក ផ្នែកភ្នែក ផ្នែកសម្ភព និងរោគស្ត្រី ផ្នែកមាត់ធ្មេញ និងផ្នែកជម្ងឺទូទៅជាដើម។ ដោយឡែក លោក ម៉ៅ សុភក្តី ប្រធានក្រុមភ្នាក់ងារ ប.ស.ស. ប្រចាំមន្ទីរពេទ្យព្រះអង្គឌួង បានបញ្ជាក់ថា ជាមធ្យមក្នុងថ្ងៃធម្មតា មានអ្នកជម្ងឺប្រមាណ ៦០០នាក់ មកទទួលសេវាពិនិត្យ និងព្យាបាលជម្ងឺ នៅក្នុងមន្ទីរពេទ្យនេះ ដោយប្រើប្រាស់ប័ណ្ណ ប.ស.ស.។ ដោយឡែក សម្រាប់ថ្ងៃអាទិត្យ អាចកើនដល់ជាង ១ ០០០នាក់។ លោក មើលឃើញថា ពីមួយឆ្នាំទៅមួយឆ្នាំ អ្នកប្រើប័ណ្ណ ប.ស.ស. មកទទួលសេវាពិនិត្យ និងព្យាបាលជម្ងឺនៅមន្ទីរពេទ្យនេះ កាន់តែកើនឡើង ដោយជាមធ្យមក្នុងមួយខែមានប្រហែលជា ៣ម៉ឺននាក់។គួរបញ្ជាក់ថា រាជរដ្ឋាភិបាលកម្ពុជា បានដាក់ឲ្យដំណើរការរបបសន្តិសុខសង្គមផ្នែកថែទាំសុខភាព សម្រាប់វិស័យឯកជន (កម្មករនិយោជិត) ចាប់ពីឆ្នាំ២០១៦ និងសម្រាប់វិស័យសាធារណៈ (មន្ត្រីសាធារណៈ អតីតមន្ត្រីរាជការ អតីតយុទ្ធជន) ចាប់ពីឆ្នាំ២០១៨។ របាយការណ៍របស់ក្រសួងការងារ និង បណ្តុះបណ្តាលវិជ្ជាជីវៈ បង្ហាញថាគិតត្រឹមឆមាសទី១ ឆ្នាំ២០២៣ សមាជិកដែលប្រើប្រាស់របបសន្តិសុខសង្គមផ្នែកថែទាំសុខភាព មានសរុបចំនួនជាង ៣,២លាននាក់។ គិតត្រឹមខែកញ្ញា ឆ្នាំ២០២៣ មានមូលដ្ឋានសុខាភិបាលចំនួន ១ ៥១៨ បានចុះកិច្ចព្រមព្រៀងជាមួយ ប.ស.ស. នៅទូទាំងប្រទេសកម្ពុជា ដែលរួមមានទាំងមន្ទីរពេទ្យថ្នាក់ជាតិ មន្ទីរពេទ្យបង្អែក មណ្ឌលសុខភាព និងមូលដ្ឋានសុខាភិបាលឯកជន៕អត្ថបទ ឈិត បូរ៉ាវី 

ប្រមុខការពារជាតិថ្មី អំពាវនាវឲ្យមានជំហរត្រៀមខ្លួនដ៏ម៉ឺងម៉ាត់ប្រឆាំងនឹងកូរ៉េខាងជើង

2023/10/09 02:07:58 pm        488
Facebook Telegram Linkin
រដ្ឋមន្ត្រីក្រសួងការពារជាតិកូរ៉េខាងត្បូង លោក ស៊ីន វ៉ុង ស៊ីក (Shin Won-sik) នៅពីថ្ងៃចន្ទនេះ បានអំពាវនាវឲ្យមានកាតត្រៀមខ្លួនដ៏រឹងមាំប្រឆាំងនឹងប្រទេសកូរ៉េខាងជើង ខណៈដែលលោក បានធ្វើទស្សនកិច្ចលើកដំបូងទៅកាន់អង្គភាពយោធាជួរមុខក្នុងតួនាទីថ្មីរបស់ខ្លួន។លោកស៊ីន ដែលចូលកាន់តំណែង កាលពីថ្ងៃសៅរ៍ ត្រូវបានគេរាយការណ៍ជូនដោយសង្ខេបអំពីប្រតិបត្តិការព្រំដែននៅកងពលធំថ្មើរជើងលេខ១របស់កងទ័ពនៅទីក្រុងប៉ាជូ ( Paju) ភាគខាងត្បូងនៃតំបន់គ្មានយោធា ហើយបានបញ្ជាឲ្យមានជំហរត្រៀមលក្ខណៈយោធាដ៏ម៉ឺងមាត់។លោកត្រូវបានដកស្រង់សម្តី ដោយនិយាយថា៖«កន្លងទៅ ប្រទេសកូរ៉េខាងជើង បានធ្វើការបង្កហេតុទ្រង់ទ្រាយធំ បន្ទាប់ពីរដ្ឋាភិបាលរបស់យើងចូលកាន់តំណែងបានរយៈពេលពីរទៅបីឆ្នាំ»។ប្រសិនបើកូរ៉េខាងជើងបង្កហេតុ លោកបាននិយាយថា៖«ទីមួយ សងសឹកភ្លាមៗ ទីពីរសងសឹកយ៉ាងខ្លាំងនិង ទីបី សងសឹករហូតដល់ទីបញ្ចប់»។កាលពីសប្តាហ៍មុន ប្រធានាធិបតី Yoon Suk Yeol បានប្តេជ្ញាការពារប្រទេសពីការបង្កហេតុរបស់កូរ៉េខាងជើង ដោយពង្រឹងសមត្ថភាពរបស់ខ្លួនក្នុងការឆ្លើយតប «ភ្លាមៗ និងយ៉ាងលើសលប់» ។ភាពតានតឹងនៅឧបទ្វីបកូរ៉េ នៅតែបន្ត បន្ទាប់ការគំរាមកំហែងដោយនុយក្លេអ៊ែរនិងមីស៊ីល ដែលកំពុងកើនឡើងរបស់កូរ៉េខាងជើង។

អាល្លឺម៉ង់ និង បារាំង រៀបចំកិច្ចប្រជុំគណៈរដ្ឋមន្ត្រីដែលមិនធ្លាប់មានពីមុនមក អំពីគោលនយោបាយថាមពល ឧស្សាហកម្ម និងការពារជាតិរបស់EU

2023/10/09 01:28:32 pm        424
Facebook Telegram Linkin
រដ្ឋាភិបាលរបស់ប្រទេសបារាំង និងអាល្លឺម៉ង់ ចាប់ផ្តើមកិច្ចប្រជុំរយៈពេលពីរថ្ងៃដែលមិនធ្លាប់មានពីមុនមកនៅទីក្រុងហាំប៊ឺក (Hamburg) នៅថ្ងៃចន្ទនេះ ក្នុងគោលបំណង ដើម្បីស្តារទំនាក់ទំនងឡើងវិញរវាងមហាអំណាចទាំងពីររបស់សហភាពអឺរ៉ុប ចំពេលមានការខ្វែងគំនិតគ្នាជាច្រើនស្តីពីគោលនយោបាយថាមពល ឧស្សាហកម្ម និងការពារជាតិ។ក្រុមអ្នកវិភាគ និងសមាជិកសភា បាននិយាយថា កិច្ចសហការបារាំង-អាល្លឺម៉ង់ ដែលបានជំរុញគោលនយោបាយរបស់សហភាពអឺរ៉ុបអស់រយៈពេលជាច្រើនទស្សវត្សរ៍ បានបង្ហាញឲ្យឃើញថា វាមិនធ្លាប់មាន បើទោះបីជាវាមានភាពចាំបាច់ជាងពេលណាៗទាំងអស់ ដោយសារវិបត្តិជាច្រើនដែលប្លុកនេះ កំពុងប្រឈមមុខ។អឺរ៉ុបកំពុងប្រឈមមុខនឹងការកើនឡើងនៃការធ្វើអន្តោប្រវេសន៍មិនទៀងទាត់ ការផ្លាស់ប្តូរទៅរកសេដ្ឋកិច្ច អព្យាក្រឹតកាបូន សង្រ្គាមអ៊ុយក្រែន ការផ្លាស់ប្តូរទំនាក់ទំនងជាមួយដៃគូពាណិជ្ជកម្មសំខាន់របស់ចិន ហើយឥឡូវនេះ ក៏មានជម្លោះ នៅមជ្ឈិមបូព៌ាផងដែរ។លោក Jacob Ross បាននិយាយនៅឯក្រុមប្រឹក្សាអាល្លឺម៉ង់ទទួលបន្ទុកកិច្ចការបរទេសថា៖«ដោយសារទំនាក់ទំនងបារាំង-អាល្លឺម៉ង់ ដោយសារបញ្ហាអឺរុប មិនស្របតាមនឹងបញ្ហាប្រឈម ដែលយើងកំពុងជួបប្រទះ នាពេលបច្ចុប្បន្ននេះទេ» ។

អ្នកទេសចរចិននៅក្នុងប្រទេសជប៉ុន នៅតែទទួលទានអាហារសមុទ្រ ខណៈភាពតានតឹងជុំវិញបញ្ហាបង្ហូរទឹកនុយក្លេអ៊ែរ

2023/10/09 01:24:24 pm        390
Facebook Telegram Linkin
ភ្ញៀវទេសចរណ៍ជនជាតិចិន ដែលទៅលេងនៅប្រទេសជប៉ុនបាននិយាយថា ពួកគេកំពុងរីករាយនឹងការទទួលទានអាហារសមុទ្រស៊ូស៊ី ស្របពេលទីក្រុងប៉េកាំងបានហាមឃាត់ការនាំចូលអាហារសមុទ្ររបស់ប្រទេសជប៉ុន ដែលត្រូវបានដាក់ចេញបន្ទាប់ពីការបញ្ចេញទឹកវិទ្យុសកម្មធ្វើប្រព្រឹត្តកម្មរួច ចេញពីបរិវេណរោងចក្រនុយក្លេអ៊ែរហ្វ៊ូគូស៊ីម៉ា ដែលត្រូវបានបំផ្លាញ ចូលទៅក្នុងសមុទ្រ។ អ្នកទេសចរជាច្រើនបាននិយាយថា «ពួកយើងញ៉ាំស៊ូស៊ីជារៀងរាល់ថ្ងៃ ហើយយើងមិនខ្វល់ថាត្រីទាំងនោះត្រូវបានចាប់ពីសមុទ្រប្រទេសណានោះទេ»។ចាប់តាំងពីប្រទេសជប៉ុនបានចាប់ផ្តើមបញ្ចេញទឹកវិទ្យុសកម្ម លើកទី១ ចូលទៅក្នុងសមុទ្រពីរោងចក្រ ហ្វ៊ូគូស៊ីម៉ា កាលពីចុងខែសីហាមក ប្រព័ន្ធផ្សព្វផ្សាយរបស់ចិនជាច្រើន បានរាយការណ៍អំពីការលុបចោលដំណើរកម្សាន្តទៅប្រទេសជប៉ុន និងការព្រួយបារម្ភរបស់អ្នកប្រើប្រាស់ចិន អំពីសុវត្ថិភាពនៃផលិតផលសមុទ្រជប៉ុន។ទីក្រុងប៉េកាំងដែលបានជំរុញប្រទេសជប៉ុនម្តងហើយម្តងទៀត ឱ្យបញ្ឈប់ការបញ្ចេញទឹកនេះ និងហៅទឹកនោះថាជា «ទឹកកខ្វក់ដោយនុយក្លេអ៊ែរ» បានដាក់បម្រាមលើការនាំចូលអាហារសមុទ្ររបស់ជប៉ុន បន្ទាប់ពីការបង្ហូរទឹកបានចាប់ផ្តើមមក។ ទោះជាយ៉ាងណាក៏ដោយ ប្រជាជនចិនជាច្រើននាក់នៅខេត្តជឺជាំង (Zhejiang) បាននិយាយថា ប្រព័ន្ធផ្សព្វផ្សាយក្នុងស្រុករបស់ចិន ដែលសង្កត់ធ្ងន់លើគ្រោះថ្នាក់នៃទឹកពីរោងចក្រហ្វ៊ូគូស៊ីម៉ា កំពុងមានភាព «លំអៀង» ហើយមិនមានប្រជាជនចិនច្រើនទេ ដែលអាចធ្វើការសម្រេចចិត្តដោយផ្អែកលើព័ត៌មានដែលទទួលបានពីក្រៅប្រទេសនោះ៕

អ្នកទេសចរចាប់អារម្មណ៍ខ្លោងទ្វារតាកាវ នៃក្រុងអង្គរធំ បន្ទាប់ពីជួសជុលរួចរាល់

2023/10/09 01:16:48 pm        1169
Facebook Telegram Linkin
សៀមរាប៖ ពីមួយថ្ងៃទៅមួយថ្ងៃ មានអ្នកទេសចរជាតិ -អន្តរជាតិកាន់តែច្រើនឡើងៗទៅទស្សនា និងថតរូបនៅខ្លោងទ្វារតាកាវ បន្ទាប់ពីក្រុមការងារនៃអាជ្ញាធរជាតិអប្សរាបានជួសជុល​តួខ្លោងទ្វាររួចរាល់ រួមទាំងចម្លាក់ទេវតា និងអសុរៈទាញព្រ័ត្របានមួយចំនួន ហើយកែលម្អផ្លូវផង ងាយស្រួលភ្ញៀវទេសចរអាចឆ្លងកាត់ និងមានសុវត្ថិភាព។អ្នកទេសចរពីររូប មកតាំងពីខេត្តកំពត និងភ្នំពេញ មានប្រសាសន៍ថា ខ្លោងទ្វារតាកាវ ស្ថិតនៅទិសខាងលិចនៃក្រុងអង្គរធំ មានចំណុចពិសេសជាងខ្លោងទ្វារផ្សេងៗទៀត ដោយសារតែខ្លោងទ្វារនេះ មានពន្លឺព្រះអាទិត្យរៀបលិចចាំងលើ ធ្វើឱ្យសម្រស់ខ្លោងទ្វារកាន់តែស្រស់ស្អាត។ខ្លោងទ្វារតាកាវមិនត្រឹមតែជាកេរដំណែលរបស់បុព្វបុរសខ្មែរប៉ុណ្ណោះទេ ថែមទាំងអាចទស្សនា​ថ្ងៃរៀបលិច កសិន្ធុព័ទ្ធជុំវិញ ថតរូបជាមួយនិងប្លង់ស្អាតៗផង។ក្រៅតែពីការថតរូប ទេសចរចំណាយពេល ​ចំណាយអារម្មណ៍ជាមួយទិដ្ឋភាពថ្ងៃរៀបលិច នឹងទទួល​បានអារម្មណ៍ស្រស់ស្រាយទៅតាមធម្មជាតិ ផ្ទៃមេឃ ពន្លឺព្រះ អាទិត្យរៀបអស្តង្គត បូកជាមួយ​ស្ថាបត្យកម្មដ៏អស្ចារ្យរបស់ដូនតា ដែលនេះជាការចងចាំដ៏ល្អ ​និងមានក្តីសុខផ្លូវចិត្ត។ខ្លោងទ្វារតាកាវបច្ចុប្បន្ន​ បានបង្ហាញសម្រស់ និងភាពរឹងមាំ ត្រចះត្រចង់ឡើងវិញ​ឈរបង្អួត​ភ្ញៀវទេសចរយ៉ាងមោទកភាព ​ហើយប្រជាពលរដ្ឋក៏នឹងអាចធ្វើដំណើរឆ្លងកាត់​ទីនេះដោយ​សុខសុវត្ថិភាព​លែងមានការលំបាកដូចមុនទៀតហើយ។អ្នកទេសចរក៏បានបង្ហាញចំណាប់អារម្មណ៍ភ្ញាក់ផ្អើលថា ​ពេលឃើញខ្លោងទ្វារតាកាវ បន្ទាប់ពី​អាជ្ញាធរជាតិអប្សរាបានជួសជុលតួខ្លោងទ្វាររួចរាល់នេះ​ មានភាពរឹងមាំ ​និងស្រស់ស្អាតខ្លាំងណាស់ ហើយលោកក៏មិនធ្លាប់បានឃើញ ឬស្គាល់ពីមុនសោះឡើយ។នេះជាមោទកភាពរបស់ខ្មែរសម្រាប់ឱ្យក្មេងជំនាន់ក្រោយបានសិក្សាស្វែងយល់ ក៏ដូចជាចង់ឱ្យភ្ញៀវទេសចរគ្រប់រូបបានទៅទស្សនាទីនេះ ព្រមទាំង​ថតរូបភាពស្អាតៗ យកទៅចូលរួម​ផ្សព្វផ្សាយពីសក្កានុពលនៃកន្លែងទេសចរណ៍ថ្មីនេះ៕

ក្នុងការប្រណាំងសព្វាវុធនៅអាស៊ី ចិនជិតឈានដល់ដំណាក់កាលថ្មី ជាមួយនាវាមុជទឹកបំពាក់នុយក្លេអ៊ែរ

2023/10/09 12:42:05 pm        269
Facebook Telegram Linkin
ការរត់ប្រណាំងសព្វាវុធនាវាមុជទឹក កំពុងកើនឡើងខ្លាំងខណៈប្រទេសចិន ចាប់ផ្តើមដំណើរការផលិតនាវាមុជទឹកបំពាក់អាវុធនុយក្លេអ៊ែរជំនាន់ថ្មី ដែលនោះគឺជាលើកដំបូងត្រូវបានគេរំពឹងថា នឹងដាក់បញ្ហាប្រឈមចំពោះការកើនឡើងកិច្ចប្រឹងប្រែងរបស់សហរដ្ឋអាមេរិក និងសម្ព័ន្ធមិត្តក្នុងការតាមដានពួកវា។ អ្នកវិភាគ និងអ្នកតំណាងការពារជាតិប្រចាំតំបន់ និយាយថាភស្តុតាងបង្ហាញថាប្រទេសចិន កំពុងដំណើរការឲ្យមាននាវាមុជទឹកបំពាក់មីស៊ីលបាលីស្ទីក ប្រភេទ096 ធ្វើប្រតិបត្តិការ មុនចុងទសវត្សរ៍នេះ ដោយឈានដល់ដំណាក់កាលថ្មី ក្នុងភាពស្ងប់ស្ងាត់របស់ខ្លួន ដែលផ្តល់ជំនួយមួយផ្នែកដោយ បច្ចេកវិទ្យារបស់រុស្ស៊ី។ ការស្រាវជ្រាវត្រូវបានពិភាក្សានៅក្នុងសន្និសីទមួយ កាលពីខែឧសភា នៅហាវិទ្យាល័យសង្គ្រាមកងទ័ពជើងទឹកសហរដ្ឋអាមេរិក និងត្រូវបានចេញផ្សាយកាលពីខែសីហា ដោយវិទ្យាស្ថានសិក្សាសមុទ្រប្រទេសចិន ដែលព្យាករណ៍ថានាវាថ្មី នឹងធ្វើឲ្យពិបាកកាន់តែខ្លាំងក្នុងការតាមដាន។ យោងតាមអ្នកវិភាគចំនួន៧នាក់ និងមន្ត្រីយោធាមានមូលដ្ឋាននៅអាស៊ី៣នាក់ បានឲ្យដឹងថា ការសន្និដ្ឋាននោះ គឺអាចជឿទុកចិត្តបាន។ អ្នកវិភាគការស៊ើបអង្កេតបច្ចេកវិទ្យាកងទ័ពជើងទឹក និងជាសមាជិកនាវាមុជទឹកដែលបានចូលនិវត្តន៍ លោក Christopher Carlson ជាអ្នកស្រាវជ្រាវម្នាក់ក្នុងចំណោមអ្នកស្រាវជ្រាវជាច្រើន បាននិយាយថានាវាមុជទឹកប្រភេទ096 នឹងក្លាយជាសុបិន្តអាក្រក់។ ពួកវានឹងក្លាយជានាវាដែលពិបាកខ្លាំងក្នុងការរកឃើញ។ កិច្ចប្រឹងប្រែងមិនបានបង្ហាញឲ្យដឹង ក្នុងការបន្តផលិតនាវាមុជទឹកបំពាក់មីស៊ីលបាលីស្ទីកមានអាវុធនុយក្លេអ៊ែរ និងដើរដោយថាមពលនុយក្លេអ៊ែររបស់ចិន ដែលគេស្គាល់ថាSSBNs នឹងជាអ្នកជំរុញមួយដ៏សំខាន់ ចំពោះការដាក់ពង្រាយដែលកើនឡើងនិងផែនការរៀបចំទុកជាមុនរបស់កងទ័ពជើងទឹកអាមេរិក និងកងទ័ពផ្សេងទៀត នៅទូទាំងតំបន់ឥណ្ឌូ-ប៉ាស៊ីហ្វិក។ ការជំរុញនេះត្រូវបានគេរំពឹងថា នឹងកើនឡើង នៅពេលនាវាប្រភេទ096s ដាក់ចូលក្នុងប្រតិបត្តិការ។

បណ្ដាញសង្គម

ព័ត៌មានថ្មីៗ

ឆ្នាំនេះ និស្សិតកម្ពុជា​១០នាក់ ជាប់ជ័យលាភីអាហារូបករណ៍ France Excellence បន្តការសិក្សាថ្នាក់បណ្ឌិតនៅប្រទេសបារាំង​
06/03/2026 11:06 AM
Facebook Telegram Linkin
ព្យុះត្រូពិក Jangmi វាយប្រហារប្រទេសជប៉ុន ដោយបានកាត់ផ្តាច់ចរន្តអគ្គិសនីដល់លំនៅឋាន៦ម៉ឺនខ្នង
06/03/2026 11:06 AM
Facebook Telegram Linkin
កម្មកររោងចក្រទទូចចង់បានសន្តិភាព និងទាមទាឱ្យភាគីថៃដោះស្រាយបញ្ហាដោយសន្តិភាព និងគោរពតាមច្បាប់អន្តរជាតិ
06/03/2026 11:06 AM
Facebook Telegram Linkin
កិច្ចប្រជុំអគ្គនាយកគយអាស៊ានលើកទី៣៥ បានចាប់ផ្តើមជាផ្លូវការ ខណៈកម្ពុជាធ្វើជាម្ចាស់ផ្ទះ
06/03/2026 10:06 AM
Facebook Telegram Linkin
ការវាយប្រហាររបស់រុស្ស៊ី បានសម្លាប់មនុស្សច្រើននាក់ ខណៈប្រធានាធិបតីអ៊ុយក្រែនថា ការវាយប្រហារថ្មីអាចកើតឡើង
06/03/2026 10:06 AM
Facebook Telegram Linkin
រដ្ឋមន្ត្រីការបរទេសអាមេរិក សង្ឃឹមចំពោះកិច្ចព្រមព្រៀងជាមួយអ៊ីរ៉ង់ ដោយទទូចលើការទប់ស្កាត់នុយក្លេអ៊ែរ
06/03/2026 10:06 AM
Facebook Telegram Linkin
អ៊ីស្រាអែល និងហេសបូឡា វាយប្រហារដាក់គ្នា ខណៈក្រុមអ្នកការទូតជួបគ្នានៅទីក្រុងវ៉ាស៊ីនតោន
06/03/2026 10:06 AM
Facebook Telegram Linkin
អាមេរិក បាញ់មីស៊ីល Hellfire ទៅលើនាវាដឹកប្រេងកំពុងធ្វើដំណើរទៅកាន់ប្រទេសអ៊ីរ៉ង់
06/03/2026 10:06 AM
Facebook Telegram Linkin
អាមេរិកវាយប្រហារកោះ Qeshm របស់អ៊ីរ៉ង់ ខណៈទីក្រុងតេអេរ៉ង់បាញ់មីស៊ីលទៅលើកូវ៉ែត និងបារ៉ែន​
06/03/2026 09:06 AM
Facebook Telegram Linkin
អ៊ីរ៉ង់ កំពុងសិក្សាកិច្ចព្រមព្រៀងផ្អាកសង្គ្រាម ខណៈភាពជាប់គាំងនៅតែបន្ត
06/03/2026 08:06 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.