នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ឯកអគ្គរដ្ឋទូតតែងតាំងថ្មីអាល្លឺម៉ង់កម្ពុជាប្ដេជ្ញាខិតខំលើកកម្ពស់ទំនាក់ទំនងរវាងកម្ពុជា និងអាល្លឺម៉ង់ឲ្យកាន់តែរឹងមាំបន្ថែមទៀត
កម្ពុជា-មីយ៉ាន់ម៉ា បន្តពង្រឹងកិច្ចសហប្រតិបត្តិការក្នុងក្របខ័ណ្ឌទ្វេភាគី តំបន់ និងពិភពលោក
កម្ពុជា ​និង​មីយ៉ាន់ម៉ា ​ពង្រឹង​ទំនាក់ទំនង​ ​ចុះ​ហត្ថលេខា​លើ​កិច្ច​ព្រម​ព្រៀង​សេដ្ឋកិច្ច កសិកម្ម វប្បធម៌
សម្តេចធិបតីនាយករដ្ឋមន្ត្រី ជួបពិភាក្សាការងារទ្វេភាគីជាមួយ ឯកឧត្តមប្រធានាធិបតីមីយ៉ាន់ម៉ា

នយោបាយ​ និង ការអភិវឌ្ឍន៍

ការប្រឆាំងនឹងការសាងសង់មូលដ្ឋានយោធាថ្មីរបស់សហរដ្ឋអាមេរិក ក្នុងខេត្តអូគីណាវ៉ា ប្រទេសជប៉ុន នៅតែបន្ត

2023/09/18 05:05:38 pm        165
Facebook Telegram Linkin
ជប៉ុន៖ ប្រជាជនអូគីណាវ៉ា បានបន្តសម្តែងការខកចិត្ត និងខឹងសម្បារចំពោះការទទូចរបស់រដ្ឋាភិបាលជប៉ុន ក្នុងការជំរុញការសាងសង់មូលដ្ឋានយោធាអាមេរិកនៅក្នុងតំបន់ ដែលផ្គើននឹងការតស៊ូរបស់ក្រុមអ្នកស្រុកតាមរយៈបណ្តាញផ្សេងៗ។នៅថ្ងៃទី៤ ខែកញ្ញា តុលាការកំពូលនៃប្រទេសជប៉ុន បានច្រានចោលម្តងទៀតនូវការប្តឹងឧទ្ធរណ៍របស់រដ្ឋាភិបាលខេត្តអូគីណាវ៉ា ប្រឆាំងនឹងផែនការរបស់រដ្ឋាភិបាលកណ្តាល ក្នុងការសាងសង់មូលដ្ឋានទ័ព ហេណូកូ (Henoko) របស់សហរដ្ឋអាមេរិក។ កាលពីដើមឆ្នាំ១៩៩៦ ប្រទេសជប៉ុន និងសហរដ្ឋអាមេរិក បានយល់ព្រមផ្លាស់ប្តូរមូលដ្ឋានទ័ព ហ្វ៊ូតេនម៉ា (Futenma) នៅខេត្តអូគីណាវ៉ា ទៅកាន់តំបន់ ហេណូកូ នៃទីក្រុងណាហ្គូ (Nago) ។ ការផ្លាស់ប្តូរទីតាំងនេះ តម្រូវឱ្យមានការរុះរើដីធ្លី និងផ្លូវចរាចរណ៍យន្តហោះចំនួនពីរខ្សែផងដែរ។អំពើឧក្រិដ្ឋកម្ម និងឧបទ្ទវហេតុ ដែលប្រព្រឹត្តដោយយោធាអាមេរិក កើតឡើងពីមួយពេលទៅមួយពេល ហើយបញ្ហាដូចជាសំលេងរំខានរបស់យន្តហោះ និងការបំពុលបរិស្ថាន ដែលបណ្តាលមកពីយោធភូមិភាគយោធាសហរដ្ឋអាមេរិក និងការធ្វើសមយុទ្ធយោធាញឹកញាប់ ក៏កើតមានជាយូរណាស់មកហើយដែរ។ដើម្បីបង្ហាញពីសេចក្ដីសម្រេចប្រឆាំងនឹងការសាងសង់មូលដ្ឋាន ហេណូកូ នេះ សមាជិកសភាចំនួន១០៧រូបមកពីខេត្តចំនួន២៤ របស់ជប៉ុន បានបង្កើតក្រុមស្ម័គ្រចិត្តមួយ ហើយបានកោះប្រជុំសន្និសីទសារព័ត៌មាននៅទីក្រុងណាហា ដើម្បីបង្ហាញពីការខកចិត្ត និងខឹងសម្បារចំពោះការសម្រេចរបស់រដ្ឋាភិបាលជប៉ុន៕

ពលរដ្ឋអ៊ីស្រាអែល តវ៉ាប្រឆាំងការផ្លាស់ប្តូរប្រព័ន្ធតុលាការ នៅទីក្រុងTel Aviv

2023/09/18 05:01:56 pm        151
Facebook Telegram Linkin
អ៊ីស្រាអែល៖ ពលរដ្ឋអ៊ីស្រាអែលរាប់ពាន់នាក់ បានចេញតវ៉ា នៅទូទាំងទីក្រុង Tel Aviv កាលពីថ្ងៃអាទិត្យ ដើម្បីតវ៉ាប្រឆាំងការផ្លាស់ប្តូរដែលជួបបញ្ហាប្រឈមរបស់នាយករដ្ឋមន្ត្រីលោក Benjamin Netanyahu ចំពោះការផ្លាស់ប្តូរប្រព័ន្ធតុលាការរបស់ប្រទេស។ ដោយស្លៀកពាក់ពណ៌ស ដើម្បីប្រារព្ធឆ្នាំជនជាតិជ្វីហ្វថ្មី ដែលបានចាប់ផ្តើមកាលពីចុងសប្តាហ៍ ក្រុមបាតុករបានក្រវីទង់ជាតិអ៊ីស្រាអែល និងស្រែកពាក្យផ្សេងៗប្រឆាំងលោក Netanyahu ។លោក Netanyahu បានកំណត់ពេលធ្វើដំណើរតាមយន្តហោះនៅពេលយប់ទៅសហរដ្ឋអាមេរិក ដែលលោកនឹងមានជំនួបក្រៅមហាសន្និបាតអង្គការសហប្រជាជាតិនៅសប្តាហ៍នេះជាមួយប្រធានាធិបតីសហរដ្ឋអាមេរិក លោក Joe Biden ដែលបានសម្តែងការព្រួយបារម្ភជុំវិញផែនការផ្លាស់ប្តូរប្រព័ន្ធតុលាការ។អ្នករៀបចំការតវ៉ា បាននិយាយថានឹងមានបាតុកម្មកាន់តែច្រើនថែមទៀតនៅអាកាសយានដ្ឋានអំឡុងពេលការចេញដំណើររបស់ លោក Netanyahu ព្រមទាំងនៅក្នុងរដ្ឋការលីហ្វរនីញ៉ា(California) ជាកន្លែងដែលលោកនឹងជួបជាមួយសហគ្រិនបច្ចេកវិទ្យា លោក Elon Musk ៕

ព្រឹកស្អែក សម្តេចធិបតី ហ៊ុន ម៉ាណែត នឹងអញ្ជើញចុះជួបសំណេះសំណាលជាមួយកម្មករ និយោជិត ជិត២ម៉ឺននាក់នៅខេត្តតាកែវ

2023/09/18 03:10:58 pm        215
Facebook Telegram Linkin
នៅថ្ងៃទី១៩ ខែកញ្ញា ឆ្នាំ២០២៣ ស្អែកនេះ សម្តេចធិបតីនាយករដ្ឋមន្រ្តី នឹង​អញ្ជើញ​ចុះ​ជួប​សំណេះ​សំ​ណាលជាមួយកម្មករ និយោជិត តាមរោងចក្រ សហគ្រាស ចំនួន ១៨,១០៤នាក់ មក​ពី​រោង​ចក្រ សហគ្រាសចំនួន១៨ ដែលមានមូលដ្ឋាននៅក្នុងស្រុកបាទី ខេត្តតាកែវ។រោងចក្រ សហគ្រាសទាំង១៨នេះ ជាប្រភេទរោង​ចក្រកាត់ដេរសម្លៀកបំពាក់ ចំនួន ១៣, ផលិត​ផលិតផល​ធ្វើដំណើរ និងកាបូប ចំនួន ២, ដេរស្បែកជើង ចំនួន ២ និងបោកគក់សម្លៀកបំពាក់ ចំនួន១។នេះ គឺជាលើកទី៤​ ដែលសម្តេចមហាបវរធិបតី ហ៊ុន ម៉ាណែត បានអញ្ជើញ​ចុះ​ជួប​សំណេះ​សំណាល​ជាមួយ​នឹងបងប្អូនកម្មករ​ និយោជិត តាមបណ្តារោងចក្រ សហគ្រាសនានា ក្នុងឋានៈជា នាយករដ្ឋ​មន្ត្រី នៃព្រះរាជាណាចក្រកម្ពុជា។

កម្មវិធីបណ្តុះបណ្តាលជំនាញ១,៥លាននាក់ក្នុងអាណត្តិទី៧ ជាយុទ្ធសាស្ត្រគន្លឹះក្នុងពង្រឹងខឿននៃកម្លាំងសេដ្ឋកិច្ចជាតិដែលពលរដ្ឋខ្មែរគួរមានមោទន

2023/09/17 11:02:19 pm        878
Facebook Telegram Linkin
ភ្នំពេញ៖ នៅពេលចាប់ផ្តើមក្នុងអាណត្តិថ្មីនេះ នាយករដ្ឋមន្ត្រី បានណែនាំដល់ក្រសួងការងារ និងបណ្តុះបណ្តាលវិជ្ជាជីវៈ ត្រូវអនុវត្តនូវការងារចំពោះមុខ ក្នុងឆ្នាំ២០២៣នេះ ចំនួន ៦ចំណុច សម្រាប់ជាប្រយោជន៍ដល់កម្មករនិយោជិត។ ក្នុងនោះ ការរៀបចំដាក់ឱ្យដំណើរការកម្មវិធីបណ្តុះបណ្តាលជំនាញបច្ចេកទេសវិជ្ជាជីវៈ ដល់យុវជន មកពីគ្រួសារក្រីក្រ និងគ្រួសារងាយរងហានិភ័យ នៅទូទាំងប្រទេសចំនួនប្រមាណ១,៥លាននាក់ គឺជាអាទិភាពមួយ ក្នុងចំណោមអនុសាសន៍ជាអាទិភាពទាំង ៦ចំណុចរបស់សម្តេចធិបតី នាយករដ្ឋមន្ត្រី ហ៊ុន ម៉ាណែត ក្នុងវិស័យការងារ និងបណ្តុះបណ្តាលបច្ចេកទេសវិជ្ជាជីវៈ។លោកនាយករដ្ឋមន្ត្រីហ៊ុន ម៉ាណែត បានណែនាំអំពីការរៀបចំដាក់ឱ្យដំណើរការកម្មវិធីបណ្តុះបណ្តាលជំនាញបច្ចេកទេសវិជ្ជាជីវៈ ដល់យុវជន មកពីគ្រួសារក្រីក្រ និងគ្រួសារងាយរងហានិភ័យ នៅទូទាំងប្រទេស ចំនួនប្រមាណ ១,៥លាននាក់ និងសម្របសម្រួលជាមួយភាគីពាក់ព័ន្ធ អនុញ្ញាតឱ្យបងប្អូនកម្មករនិយោជិត អាចចូលរៀនជំនាញវិជ្ជាជីវៈផងដែរ។ ក្នុងនោះ ដើម្បីបង្កើនផលិតភាព ប្រសិទ្ធភាពការងារនៅកន្លែងការងារ ក៏ត្រូវរៀបចំវគ្គបណ្តុះបណ្តាល នៅវេនពេលយប់ ឬចុងសប្តាហ៍ សម្រាប់បងប្អូនកម្មករនិយោជិត។ នេះ គឺជាការគិតគូររយៈពេលវែងរបស់រាជរដ្ឋាភិបាល បន្ថែមលើការកសាងធនធានមនុស្ស ដែលស្ថិតក្នុងអាទិភាពគន្លឹះទាំង ៥ នៃយុទ្ធសាស្ត្របញ្ចកោណ ដំណាក់កាលទី១ គឺ៖ មនុស្ស ផ្លូវ ទឹក ភ្លើង និងបច្ចេកវិទ្យា។ កម្មវិធីថ្មីនេះ ក្រៅតែពីបង្រៀនឱ្យយុវជន មានជំនាញបច្ចេកទេសវិជ្ជាជីវៈ ក៏អាចបង្កើនចំណេះ និងជំនាញបន្ថែមដល់កម្មករនិយោជិត ពិសេសកម្មករកាត់ដេររបស់យើង។ ពោលគឺប្រែក្លាយការប្រើកម្លាំងពលកម្មសុទ្ធសាធ ទៅជាកម្មករមានជំនាញច្បាស់លាស់ ហើយកម្មករនិយោជិត ដែលទទួលការបណ្តុះបណ្តាលជំនាញច្បាស់លាស់ តាមរយៈការបណ្តុះបណ្តាលពិសេសនេះ ច្បាស់ណាស់ ប្រាកដជានឹងទទួលបានការងារល្អជាងមុន ហើយក៏ច្បាស់ណាស់ថែមទៀត នឹងទទួលបានប្រាក់ខែច្រើនជាងមុន។ និយាយឱ្យងាយស្តាប់ បើសិនជាយុវជន ដែលទើបចេញពីសាលា ដែលរៀនចប់ត្រឹមមធ្យមសិក្សា ឬក៏ប្រឡងបាក់ឌុបធ្លាក់ ស្ថិតក្នុងគ្រួសារក្រីក្រ និងងាយរងហានិភ័យ គឺជាអាទិភាព ដែលអាចចុះឈ្មោះចូលរួមជំនាញបច្ចេកទេសវិជ្ជាជីវៈ ដែលជាកម្មវិធីអាទិភាពមួយរបស់ក្រសួងការងារ និងបណ្តុះបណ្តាលវិជ្ជាជីវៈ ដែលបានបង្រៀនរួចហើយនូវជំនាញ ក្នុងវិស័យកម្មន្តសាល វិស័យសំណង់ វិស័យអគ្គិសនី វិស័យមេកានិករថយន្ត សេវាកម្មធុរកិច្ច និងបរិក្ខាត្រជាក់ និងក្តៅ។ ក្រៅពីជំនាញក្នុងវិស័យគោលទាំងនេះ អំឡុងពេលបើកវគ្គបណ្តុះបណ្តាលពិសេស ១,៥លាននាក់ ក៏អាចបង្កើតជំនាញ ក្នុងវគ្គសិក្សារយៈពេលខ្លីនូវជំនាញជួសជុលម៉ូតូ ជាងទឹកភ្លើង ជាងម៉ាស៊ីនត្រជាក់ ខាងសំអាង សាឡន ឬក៏ជំនាញធ្វើម្ហូបអាហារ និងភេសជ្ជៈ ជាដើម។សូមបញ្ជាក់ថា គ្រឹះស្ថានបណ្តុះបណ្តាលបច្ចេកទេស និងវិជ្ជាជីវៈ ដែលស្ថិតក្រោមការគ្រប់គ្រងរបស់ក្រសួងការងារ និងបណ្តុះបណ្តាលវិជ្ជា មានចំនួន ១០៧។ ក្នុងនោះ មានគ្រឹះស្ថានអប់រំ បណ្តុះបណ្តាលវិជ្ជាជីវៈសាធារណៈ ចំនួន ៣៧ នៅទូទាំង ២៥រាជធានីខេត្ត។ ក្នុងនោះ ក្រសួង ក៏បានបង្កើតទីតាំងបណ្តុះបណ្តាលជំនាញពហុបច្ចេកទេសវិជ្ជាជីវៈ ច្រើនទីតាំង មាននៅរាជធានីភ្នំពេញ នៅខេត្តសៀមរាប នៅខេត្តបាត់ដំបង នៅកំពង់ធំ និងនៅខេត្តបន្ទាយមានជ័យ ជាដើម។ក្រៅពីកន្លែងបណ្តុះបណ្តាលជំនាញថ្មី សម្រាប់យុវជន នៅតាមទីតាំងខាងលើនេះ កម្មករនិយោជិត ពិសេសកម្មករកាត់ដេរ ដែលកំពុងធ្វើការងារប្រចាំថ្ងៃ គឺនៅពេលក្រសួងការងារ និងបណ្តុះបណ្តាលវិជ្ជាជីវៈ អនុវត្តកម្មវិធីបណ្តុះបណ្តាលថ្មីនេះ នៅតាមរាជធានីខេត្ត គឺបងប្អូនកម្មករនិយោជិតយើង អាចឆ្លៀតពេលទំនេរពីការងារ ឬនៅម៉ោងចេញពីធ្វើការងាររៀងរាល់ថ្ងៃ ឬក៏នៅថ្ងៃអាទិត្យចុងសប្តាហ៍ ចូលរៀនជំនាញណាមួយ ដោយឥតគិតថ្លៃ។ រៀនចប់ មានជំនាញច្បាស់លាស់ កម្មករនិយោជិតយើង អាចផ្លាស់ប្តូការងារ ពីកម្មករ ដែលប្រើកម្លាំងសុទ្ធ ទៅជាកម្មករនិយោជិត ដែលមានជំនាញ ហើយទទួលបានប្រាក់ខែខ្ពស់ជាងមុន។របាយការណ៍របស់ក្រសួងការងារ និងបណ្តុះបណ្តាលវិជ្ជាជីវៈ បង្ហាញថា ប្រទេសកម្ពុជាយើង ក៏កំពុងមាននិន្នាការនៃការកើនឡើងចំនួនប្រជាជន គួរកត់សម្គាល់ក្នុងរយៈពេល ២ទស្សវត្សរ៍កន្លងមកនេះ។ ពោលគឺកើនឡើងពីប្រមាណ ១១,៤លាននាក់ ដល់ ១៦,៨លាននាក់ ចន្លោះពីឆ្នាំ១៩៩៨ ដល់ឆ្នាំ២០២២ ឬមានអត្រាកំណើនមធ្យមប្រចាំឆ្នាំប្រមាណ ១,៦%។ នៅកម្ពុជាយើង និន្នាការកើនឡើងនូវអត្រាប្រជាជន ក្នុងវ័យធ្វើការអាយុចន្លោះ ១៥ឆ្នាំ ទៅ ៦៤ឆ្នាំ កាន់តែច្រើន ដែលទាមទារឱ្យរាជរដ្ឋាភិបាល ត្រូវបង្កើតការងារថ្មីប្រមាណពី ២០ ទៅ ៣០ម៉ឺនកន្លែង ក្នុង ១ឆ្នាំ។ក្រសួងការងារ ក៏បានប្រកាសថា នៅប្រទេសកម្ពុជាយើង អត្រាមានការងារធ្វើ មានប្រមាណ ៩៩,៣% និងមានកម្លាំងពលកម្ម ទាំងក្នុង និងក្រៅប្រទេស ១០.៨លាននាក់។ ក្នុងនោះ ការងារក្នុងប្រទេស ផ្នែកឧស្សាហកម្ម ២.៥លាននាក់ កសិកម្ម ៣.៤លាននាក់ សេវាកម្ម ៣.‌១លាននាក់ និងមន្ត្រីសាធារណៈ ៥០ម៉ឺននាក់។ រីឯពលករទេសន្តរប្រវេសន៍ ឬពលករកម្ពុជាចំណាកស្រុក មានប្រមាណ ១.៣លាននាក់ ខណៈដែលកម្មករនិយោជិត ក្នុងវិស័យកាត់ដេរ មានជាង ៨៣ម៉ឺននាក់។ដូច្នេះដើម្បីឆ្លើយតបនឹងក្តីប្រាថ្នាកាន់តែខ្ពស់ ក្នុងការមានការងារកាន់តែមានគុណភាព ប្រាក់ចំណូលកាន់តែកើនខ្ពស់ និងជីវភាពកាន់តែប្រសើរ ច្បាស់ណាស់ទាមទារឱ្យយុវជនយើង ពិសេសកម្មករនិយោជិត រួមទាំងកម្មករកាត់ដេរផង ត្រូវតែសង្វាត ចូលរៀន ដើម្បីបង្កើនចំណេះដឹង និងជំនាញ។ យុវជនយើង រួមទាំងកម្មករនិយោជិត ត្រូវតែឆ្លៀតពេលចាប់យកជំនាញ។ ក្នុងនោះ ក្រៅតែពីជំនាញបច្ចេកទេសវិជ្ជាជីវៈ ភាសាបរទេស ដូចជា រៀនភាសាចិន ជប៉ុន កូរ៉េ ឬអង់គ្លេស ជាដើម រួមផ្សំនឹងចំណេះដឹងខាងបច្ចេកវិទ្យាឌីជីថលផង ក៏សុទ្ធតែជាជំនាញ ដែលកម្មករនិយោជិត មិនអាចមើលរំលងឡើយ៕

មុខមាត់ជាធារណៈតំណាងឲ្យយោធារបស់ចិន ស្ថិតក្រោមការស៊ើបអង្កេតអំពើពុករលួយ

2023/09/17 12:10:53 am        562
Facebook Telegram Linkin
លោកឧត្តមសេនីយ៍ Li Shangfu ដែលជាទាហានជើងចាស់ដ៏មានបទពិសោធន៍ ក្នុងការជំរុញឲ្យមានទំនើបកម្មយោធារបស់ប្រទេសចិន បានឡើងឋានៈជារដ្ឋមន្ត្រីការពារជាតិនៅឆ្នាំនេះ។ តែក្នុងរង្វង់ ៦ខែ លោកបានបាត់មុខជាសាធារណៈ នៅក្រោមព័ត៌មានដ៏អាប់អួ ជុំវិញការស៊ើបអង្កេតអំពើពុករលួយ។លោក Li ទទួលបានភាពលេចមុខលេចមាត់ក្រោមការស្វែងរការបង្កើនឥទ្ធិពលខាងកម្លាំងយោធារបស់ប្រធានាធិបតី លោក Xi Jinping អំឡុងការកាន់អំណាចមួយទសវត្សរ៍របស់លោក ខណៈដែលទំនាក់ទំនងរបស់ប្រទេសចិន ជាមួយសហរដ្ឋអាមេរិក បានចាប់ផ្ដើមអាក្រក់ទៅៗ ជុំវិញបញ្ហានានា ក្នុងនោះរួមទាំងបញ្ហាកោះតៃវ៉ាន់ ដែលជាកោះគ្រប់គ្រងតាមបែបប្រជាធិបតេយ្យ និងដែលត្រូវបានទីក្រុងប៉េកាំងទាមទារថា ជាចំណែកនៃប្រទេសរបស់ខ្លួន។ប៉ុន្តែផ្នែកមួយនៃការជំរុញរបស់លោក Xi ក្នុងការធ្វើឲ្យប្រសើរឡើងនូវកម្លាំងប្រយុទ្ធរបស់លោក គឺការលុបបំបាត់អំពើពុករលួយ ដែលបានញាំញីជាយូរមកហើយ ក្នុងវិស័យយោធា និងស្ថាប័នរដ្ឋដទៃទៀតរបស់ប្រទេសចិន។ក្នុងនាមជាមេដឹកនាំម្នាក់នៃការអភិវឌ្ឍផ្លូវអវកាស និងការប្រយុទ្ធប្រឆាំងតាមអ៊ីនធឺណិតរបស់ប្រទេសចិន ហើយបន្ទាប់មកក្លាយជាប្រធានផ្នែកលទ្ធកម្មយោធានោះ លោក Li វ័យ ៦៥ឆ្នាំ ត្រូវបានដំឡើងឋានៈជារដ្ឋមន្ត្រីការពារជាតិ នៅក្នុងខែមីនា។បន្ទាប់ពីលោកបានអវត្តមាន ក្នុងការបង្ហាញខ្លួនជាសាធារណៈ កាលពីខែមុន និងខកខានចូលរួមកិច្ចប្រជុំនានា ដោយក្នុងនោះរួមទាំងជាមួយសមភាគីបរទេសយ៉ាងហោចណាស់ម្តងនោះ សារព័ត៌មាន Reuters កាលពីថ្ងៃសុក្រ (ទី១៥ ខែកញ្ញា) បានរាយការណ៍ថា លោក Li កំពុងស្ថិតនៅក្រោមការតាមដាន ដែលជាការស៊ើបអង្កេតដ៏ធំមួយ ពាក់ព័ន្ធនឹងការទិញសម្ភារៈយោធា។តែយ៉ាងណាក្ដី សារព័ត៌មាន Reuters មិនអាចបញ្ជាក់បានថា តើការទិញអ្វីនោះឡើយ ដែលស្ថិតក្រោមការត្រួតពិនិត្យនេះ ហើយក្រសួងការពារជាតិចិន មិនបានឆ្លើយតបនឹងសំណើសុំការអត្ថាធិប្បាយនោះទេ ខណៈអ្នកនាំពាក្យក្រសួងការបរទេស បានប្រាប់អ្នកសារព័ត៌មាន កាលពីថ្ងៃសុក្រថា លោកស្រីមិនបានដឹងអំពីស្ថានភាពនេះទេ៕

លោក Blinken៖ លោកមិនបានដឹងអំពីស្ថានភាពរដ្ឋមន្ត្រីការពារជាតិចិននោះទេ

2023/09/16 11:51:22 pm        520
Facebook Telegram Linkin
រដ្ឋមន្ត្រីការបរទេសអាមេរិក លោក Antony Blinken កាលពីថ្ងៃសុក្រ (ទី១៥ ខែកញ្ញា) បាននិយាយថា លោកមិនបានដឹងអំពីស្ថានភាពរបស់រដ្ឋមន្ត្រីការពារជាតិចិន លោក Li Shangfu ដែលបានអវត្តមានពីការបង្ហាញខ្លួនជាសាធារណៈអស់រយៈពេលជាង ២សប្តាហ៍មកនោះទេ ដោយបន្ថែមថា ទាំងនេះ គឺជាបញ្ហាផ្ទាល់សម្រាប់រដ្ឋាភិបាលចិន ក្នុងការសម្រេច។សូមបញ្ជាក់ថា កាលពីថ្ងៃសុក្រ ទីភ្នាក់ងារសារព័ត៌មាន Reuters បានរាយការណ៍ថា លោក Li កំពុងស្ថិតនៅក្រោមការស៊ើបអង្កេតរបស់អាជ្ញាធរចិន។ សេចក្ដីរាយការណ៍នេះ ត្រូវបានធ្វើឡើងដោយយោងតាមបុគ្គលចំនួន ១០នាក់ ដែលដឹងពីបញ្ហានេះ។ពាក់ព័ន្ធនឹងករណីនេះ នៅឯសន្និសីទសារព័ត៌មានមួយ លោក Blinken បានប្រាប់អ្នកសារព័ត៌មានថា៖ «យើងនៅតែត្រៀមខ្លួនយ៉ាងពេញលេញរួចជាស្រេច ដូចដែលយើងបានធ្វើ ដើម្បីចូលរួមជាមួយរដ្ឋាភិបាលចិន មិនថា អ្នកណាក៏ដោយ ដែលមានឱកាសកាន់មុខតំណែងនៃការទទួលខុសត្រូវនេះ តាមពេលវេលាសមស្របណាមួយ»៕

ព្រះអាទិត្យរះចំកំពូលកណ្ដាលប្រាសាទអង្គរវត្ត នឹងកើតទ្បើង នាថ្ងៃទី២២កញ្ញាខាងមុខនេះ

2023/09/16 11:44:03 pm        708
Facebook Telegram Linkin
សមរាត្រីរដូវវស្សា ឬព្រឹត្តិការណ៍ព្រះអាទិត្យរះនៅចំកំពូលកណ្ដាលប្រាសាទអង្គរវត្ត នឹងកើតទ្បើងចំថ្ងៃទី២២ ខែកញ្ញា ឆ្នាំ២០២៣ខាងមុខនេះ ចាប់ពីម៉ោង៦ព្រឹកតទៅ។ នេះបើយោងតាមការបញ្ជាក់ពីអាជ្ញាធរជាតិអប្សរា។ សមរាត្រីរដូវវស្សា គឺជាវេលាពេលថ្ងៃ​ និងយប់មានរយៈពេលស្មើគ្នា ដែលជាព្រឹត្តិការណ៍​កើតឡើង២ដង ក្នុងមួយឆ្នាំ គឺនៅក្នុងខែមីនា និងខែកញ្ញា៕រូបភាពអាជ្ញាធរជាតិអប្សរា

ប្រតិភូយុវជនកាកបាទក្រហម និងអឌ្ឍចន្ទក្រហមអាស៊ាន បានធ្វើដំណើរមកដល់កម្ពុជាជាបន្តបន្ទាប់

2023/09/16 10:21:13 pm        591
Facebook Telegram Linkin
គណៈប្រតិភូយុវជន មកពីសមាគមជាតិចំនួន១០ ក្នុងភូមិភាគអាស៊ី-អាគ្នេយ៍ បាន​និងកំពុង​ធ្វើដំណើរ​មកដល់កម្ពុជាជាបន្តបន្ទាប់ហើយ ​ដើម្បីចូលរួមវេទិកាយុវជនលើកទី២ ចាប់ពីថ្ងៃទី ១៧-២០ ខែកញ្ញា ឆ្នាំ២០២៣ និងបន្តចូលរួមជាអ្នកសង្កេតការណ៍ក្នុងកិច្ចប្រជុំថ្នាក់ដឹកនាំលើកទី២០ ចាប់ពីថ្ងៃទី ២១-២២ ខែកញ្ញា ឆ្នាំ២០២៣។កាកបាទក្រហមកម្ពុជា ដែលមានហ្លួងម៉ែ នរោត្ដម មុនិនាថ សីហនុ ជាព្រះប្រធានកិត្តិយស និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន នឹងធ្វើជាម្ចាស់ផ្ទះវេទិកាយុវជនលើកទី២ និងជាប្រធានកិច្ចប្រជុំថ្នាក់ដឹកនាំលើកទី២០ ​នៃសមាគមជាតិកាកបាទក្រហម អឌ្ឍចន្ទក្រហម ភូមិភាគអាស៊ី-អាគ្នេយ៍។លោកស្រី ឌួង ទេពសុគន្ធា តំណាងប្រតិភូយុវជនកាកបាទក្រហមកម្ពុជា ​បានលើកឡើងថាដោយអនុវត្ត​តាមប្រសាសន៍ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន កាកបាទក្រហមកម្ពុជា បានរៀបចំក្រុមការងារទទួលស្វាគមន៍ ​និងបដិសណ្ឋារកិច្ច ​ដោយមានមន្ត្រីទំនាក់ទំនង (L.O) សម្រាប់ប្រតិភូយុវជនតាមសមាគមជាតិនីមួយៗ និងក្រុមការងារដែលជាប្រតិភូយុវជន​កាកបាទក្រហមកម្ពុជា រង់ចាំទទួលស្វាគមន៍គណៈប្រតិភូយុវជនអន្តរជាតិដោយផ្ទាល់​នៅអាកាសយានដ្ឋានភ្នំពេញអន្តរជាតិ។វេទិកាយុវជនលើកទី២នេះ មានគោលបំណងផ្ដល់ឱកាសដល់យុវជននៃសមាគមជាតិទាំង ១១ នៅក្នុងតំបន់អាស៊ី-អាគ្នេយ៍ ​ទទួលបានការបណ្ដុះបណ្ដាលជំនាញទំនាក់ទំនង និងការនិយាយ​ជាសាធារណៈក្នុងភាពជាអ្នកដឹកនាំវ័យក្មេងនាពេលបច្ចុប្បន្ន និងអនាគត។ ​លើសនេះទៅទៀត វេទិកាយុវជនលើកទី២ នឹងពិនិត្យរួមគ្នាលើការអនុវត្តសេចក្ដីថ្លែងការណ៍របស់យុវជន នៃវេទិកាយុវជនលើកទី១ ដែលធ្វើឡើងនៅប្រទេសព្រុយណេកាលពីឆ្នាំ ២០២២ រួមជាមួយនឹង​ការពិនិត្យពិភាក្សារកបញ្ហាប្រឈមនានាដែលកំពុងកើតឡើង និងរកដំណោះស្រាយថ្មីរួមគ្នា​ក្នុងវិស័យមនុស្សធម៌ ព្រមទាំងពង្រឹងកិច្ចសហប្រតិបត្តិការ ​សាមគ្គីភាពអន្តរជាតិក្នុងចលនាអន្ដរជាតិ កាកបាទក្រហម និងអឌ្ឍចន្ទក្រហមភូមិភាគអាស៊ី-អាគ្នេយ៍។គូសបញ្ជាក់ផងដែរថា ​វេទិកាយុវជនលើកទី២ មានកម្មវិធីពិសេសមួយ​ គឺពិធីដាំដើមឈើនៅថ្ងៃទី២០ ខែកញ្ញា ឆ្នាំ២០២៣ ក្រោមអធិបតីភាពដ៏ខ្ពង់ខ្ពស់ ​សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាក​​បាទក្រហមកម្ពុជា និងជាប្រធានកិច្ចប្រជុំថ្នាក់ដឹកនាំ ​ដាំដើមឈើចំនួនជាង ២ពាន់ដើម លើផ្ទៃដី ២ហិកតា នៅមជ្ឈមណ្ឌលវប្បធម៌ព្រះពុទ្ធសាសនាកម្ពុជា ដែលស្ថិតនៅក្នុងឧទ្យានជាតិ​ព្រះសុរាម្រិតកុសុមៈគិរីរម្យ ខេត្តកំពង់ស្ពឺ។សកម្មភាពដាំដើមឈើនេះ គឺជាការបណ្ដុះនូវឆន្ទៈ និងក្ដីស្រលាញ់ចំពោះបរិស្ថាន និងការរួមចំណែក​នៃការកាត់បន្ថយហានិភ័យនៃការប្រែប្រួលអាកាសធាតុ ​ជំរុញឱ្យមានកំណើនបរិស្ថានបៃតង ដែលនឹង​មានការចូលរួមពីឥស្សរជនជាថ្នាក់ដឹកនាំ​តាមក្រសួងស្ថាប័នពាក់ព័ន្ធ គណៈកម្មាធិការ​សាខា យុវជន អ្នកស្ម័គ្រចិត្តទាំង ២៥រាជធានីខេត្ត ​ភ្ញៀវជាតិ-អន្តរជាតិ ​សរុបប្រមាណ ៥០០នាក់។ បន្តពីនេះប្រតិភូយុវជនទាំងអស់ នឹងទៅទស្សនកិច្ចនៅសារមន្ទីរប្រល័យពូជសាសន៍គុកទួលស្លែង ដើម្បីសិក្សាឱ្យស៊ីជម្រៅបន្ថែមនៃច្បាប់មនុស្សធម៌អន្តរជាតិតាមរយៈប្រវត្តិដ៏ជូរចត់ដែលធ្លាប់កើតមាននៅប្រទេសកម្ពុជា៕

ក្រោយកាយ និងស្តាររួចប្រឡាយមេធំៗក្នុងរាជធានី ជួយរំដោះទឹកជន់កាន់តែប្រសើរឡើង

2023/09/16 09:59:37 pm        921
Facebook Telegram Linkin
ភ្នំពេញ៖ បន្ទាប់ពីអាជ្ញាធររាជធានីភ្នំពេញ បានកាយនិងស្តារនៅតាមបណ្តាប្រឡាយធំៗសំខាន់ៗ នៅក្នុងរាជធានីភ្នំពេញ ​ក្នុងមួយរយះក្រោយនេះរួចមក ឃើញថា ប្រឡាយទាំងអស់ អាចបង្ហូរទឹក​យ៉ាងលឿនរហ័ស និងរំដោះទឹកពីការជន់លិច​ នៃជំនន់ទឹកភ្លៀងជាដើម ​ខណៈដែលរដូវនេះ ក៏ជារដូវវស្សា ​ដែលមានភ្លៀងធ្លាក់ខ្លាំងជាបន្តបន្ទាប់ផងនោះ ។ប្រលាយសំខាន់ៗ ដែលជាអាទិភាពខ្ពស់ សម្រាប់ការរំដោះទឹក មានប្រលាយបឹងត្របែក ក៏ដូចជា​ប្រលាយ​បឹងសាឡាងជាដើម ​ដែលជាប្រព័ន្ធចរន្តបង្ហូរទឹកដ៏ចម្បង ​ដោយរំដោះទឹកពីតាមបណ្តា​ខណ្ឌធំៗជាច្រើន នៃកណ្តាលរាជធានីភ្នំពេញ ។ បច្ចុប្បន្នប្រឡាយមេធំខាងលើ គេសង្កេតឃើញថា មានជម្រៅជ្រៅជាងមុខ​ក្រោយអាជ្ញាធរ​បានកាយរួច ​ដែលអាចធ្វើឱ្យប្រឡាយមានបរិមាអាចផ្ទុកទឹកបានកាន់​តែច្រើន​ជាងមុនផងដែរ ។ ក្នុងនោះដែរប្រឡាយ ​ក៏ត្រូវបានសម្អាតស្អាតល្អ ​ដោយមិនមានសំរាមនៅលើផ្ទៃប្រឡាយនោះឡើយ ដែលនេះជាកត្តាងាយឱ្យទឹកអាចហូរទៅបានលឿន​ដោយមិនមានការរាំងស្ទះពីសំរាមនោះទេ ។ ប្រជាពលរដ្ឋនៅសង្កាត់បឹងសាឡាង ​ក៏បានបង្ហាញក្តីរីករាយផងដែរ ​ពេលសង្កេតឃើញថា អាជ្ញាធរបាន​យកចិត្តទុកដាក់ធ្វើការស្តារ ​និងកាយប្រឡាយធំៗ​ ដើម្បីរំដោះទឹក ​ព្រោះកន្លងទៅ នៅពេលមិនទាន់​មានការកាយប្រឡាយឱ្យបានធំនោះ ពលរដ្ឋតែងឧស្សាហ៍ជួបការជន់លិចជាខ្លាំង​នៅរៀងរាល់ភ្លៀងខ្លាំងម្តងៗ ​ដោយលិចដល់តាមខ្នងផ្ទះ ក៏ដូចជាជន់លិចតាមដងផ្លូវរំខាន​ដល់ការធ្វើ​ដំណើរជាដើម ។ ពលរដ្ឋបន្តលើកឡើងថា ការគិតគូរធ្វើការស្តារ និងកាយគ្រប់ប្រឡាយធំៗទាំងអស់បែបនេះ វាជា​ភាពប្រសើរខ្លាំងណាស់ ដើម្បីធានាបានថា ​ទោះរដូវវស្សាមកដល់ ​មានភ្លៀងខ្លាំងក៏ដោយ ក៏មិន​មានការជន់លិចក្នុងរាជធានីភ្នំពេញនោះទេ ​ប៉ុន្តែបើមានការលិច​ ក៏មិនអាចលិចក្នុងរយៈពេលយូរ ប៉ះពាល់​ដល់ពលរដ្ឋនោះដែរ ​ទាំងការរស់នៅ និងការធ្វើដំណើរជាដើម ។គួររំលឹកផងដែរថា​ អភិបាលរាជធានីភ្នំពេញ ​ឯកឧត្តមឃួង ស្រេង​ កាលពីល្ងាចថ្ងៃទី២៨ ខែសីហា ឆ្នាំ២០២៣កន្លងទៅ ​បានណែនាំដល់ក្រុមមន្ត្រីជំនាញ ​នៃមន្ទីរសាធារណការ ​និងដឹកជញ្ជូន ត្រូវស្ដារលូ ​និងប្រឡាយមេធំៗជាបន្ទាន់ដើម្បីរំដោះទឹកភ្លៀងកុំឱ្យមានការជន់លិច ប៉ះពាល់​ដល់ពលរដ្ឋ ។ ​ការណែនាំរបស់លោកអភិបាល ​ធ្វើឡើងគ្រាដែលលោក ​និងក្រុមមន្ត្រី ចុះទៅ​ចុះពិនិត្យមើលប្រព័ន្ធលូ ​និងប្រឡាយបឹងសាឡាង ​ក្នុងមូលដ្ឋានខណ្ឌទួលគោក ដើម្បីរិះរក​គ្រប់មធ្យោបាយ​ ធ្វើយ៉ាងណាឱ្យលូ ​និងប្រឡាយទាំងនេះ ​អាចរំដោះទឹកបាន នៅពេលមាន​ជំនន់​ទឹកភ្លៀងខ្លាំងម្តងៗ ។ក្រោយទទួលបានការណែនាំពីឯកឧត្តមអភិបាលរាជធានីរួចមក ​ឃើញថា ​នៅថ្ងៃបន្តបន្ទាប់ មន្ទីរសាធារណការ ​និងដឹក​ជញ្ជូន​ បានសហការជាមួយអាជ្ញាធរខណ្ឌទួលគោក ​និងខណ្ឌចំការមន ប្រើអេស្កាវ៉ាទ័រ ​ចុះស្តារ ​និងកាយប្រឡាយមេសម្ខាន់ៗ ​នៅក្នុងមូលដ្ឋានតែម្តង មានដូចជាប្រឡាយ​បឹងសាឡាយ ​និងប្រឡាយបឹងត្របែក ជាដើម ដើម្បីធានាបានថាប្រឡាយអាចបង្ហូរទឹកទៅ​បាន​ដោយមិនមានការរាំងស្ទះ ​បង្កជាការជន់​លិច​ប៉ះពាល់ដល់ពលរដ្ឋក្នុងរាជធានីភ្នំពេញបន្តទៀត ៕ អត្ថបទ ៖ លីហេង 

ពេលត្រូវបានសួរពីកោះតៃវ៉ាន់ អនុប្រធាន UN និយាយថា ការដកនរណាម្នាក់ចេញ អាចប៉ះពាល់ដល់គោលដៅសកល

2023/09/16 08:44:37 pm        450
Facebook Telegram Linkin
អគ្គលេខាធិការរងរបស់អង្គការសហប្រជាជាតិ (UN) លោកស្រី Amina Mohammed បាននិយាយ កាលពីថ្ងៃសុក្រ (ទី១៥ ខែកញ្ញា) ថា ការមិនរាប់បញ្ចូលអ្នកណាម្នាក់ ត្រូវប៉ះពាល់ដល់កិច្ចប្រឹងប្រែងនានា ក្នុងការសម្រេចគោលដៅអភិវឌ្ឍន៍សកល ដោយនេះជាការលើកឡើង បន្ទាប់ពីត្រូវបានសួរអំពីការអំពាវនាវរបស់កោះតៃវ៉ាន់ឲ្យបញ្ចូលខ្លួនទៅក្នុងយុទ្ធនាការ។គួរបញ្ជាក់ដែរថា មេដឹកនាំពិភពលោក នឹងជួបប្រជុំគ្នា នាសប្តាហ៍ក្រោយ នៅឯមហាសន្និបាតប្រចាំឆ្នាំរបស់អង្គការសហប្រជាជាតិ។ ប៉ុន្តែកោះតៃវ៉ាន់មិនត្រូវបានរាប់បញ្ចូលនោះឡើយ នៅក្រោមសេចក្ដីសម្រេចរបស់អង្គការសហប្រជាជាតិ ឆ្នាំ១៩៧១ ដែលទទួលស្គាល់សាធារណរដ្ឋប្រជាមានិតចិនថា ជាតំណាងស្របច្បាប់របស់ប្រទេសចិនប្រចាំនៅអង្គការសហប្រជាជាតិ។បណ្ដារមេដឹកនាំទាំងអស់ ក៏នឹងចូលរួមផងដែរ ក្នុងកិច្ចប្រជុំកំពូលស្តីពីគោលដៅអភិវឌ្ឍន៍ដោយចីរភាព ជាបញ្ជីកិច្ចការ «ត្រូវធ្វើ» ជាសកល ដែលត្រូវបានបង្កើតឡើងក្នុងឆ្នាំ២០១៥ ដែលរួមមានបញ្ចូលបញ្ហានានា ដូចជាការដោះស្រាយវិបត្តិអាកាសធាតុ ការសម្រេចបាននូវសមភាពយេនឌ័រ ហើយនិងការបញ្ចប់ភាពអត់ឃ្លាន និងភាពក្រីក្រ។លោកស្រី Mohammed បានប្រាប់អ្នកសារព័ត៌មាន កាលពីថ្ងៃសុក្រថា៖ «ខ្ញុំគិតថា ការមិនរាប់បញ្ចូលនរណាម្នាក់ រារាំងដល់គោលដៅនានា។ យើងបាននិយាយថា កុំទុកនរណាម្នាក់ចោល ហើយខ្ញុំគិតថា រដ្ឋជាសមាជិកត្រូវតែរកវិធី ដើម្បីធ្វើឲ្យប្រាកដថា យើងមិនស្ថិតនៅក្នុងទីតាំង ដែលយើងកំពុងបដិសេធមនុស្សទាំងឡាយ។ មនុស្សគ្រប់រូប មានសារៈសំខាន់ មិនថាកោះតៃវ៉ាន់ ឬផ្នែកផ្សេងទៀតនោះទេ។ ហើយខ្ញុំគិតថា វាពិតជាមានសារៈសំខាន់ខ្លាំងណាស់ ដែលរដ្ឋជាសមាជិត្រូវស្វែងរកដំណោះស្រាយ»។តែអ្នកនាំពាក្យរងរបស់អង្គការសហប្រជាជាតិ លោក Farhan Haq បាននិយាយថា អង្គការសហប្រជាជាតិប្រកាន់ខ្ជាប់នូវគោលនយោបាយចិនតែមួយ ដោយបន្ថែមថា «យើងមិនមានបំណងទុកប្រជាជនចិនណាមួយចោលនោះទេ ហើយយើងគាំទ្រប្រជាជនចិនទាំងអស់ ប៉ុន្តែយើងប្រកាន់ខ្ជាប់គោលនយោបាយចិនតែមួយ»។សូមបញ្ជាក់ថា កោះតៃវ៉ាន់បានអំពាវនាវជាយូរមកហើយឲ្យអង្គការសហប្រជាជាតិទទួលស្គាល់ខ្លួនជាសមាជិក៕

បណ្ដាញសង្គម

ព័ត៌មានថ្មីៗ

ទីក្រុងប៉េកាំង៖ រដ្ឋមន្ត្រីការបរទេសអ៊ីរ៉ង់ នឹងបំពេញទស្សនកិច្ចនៅប្រទេសចិន នាថ្ងៃពុធ
09/15/2026 06:09 PM
Facebook Telegram Linkin
កូរ៉េខាងត្បូង និងកាហ្សាក់ស្ថាន ចុះហត្ថលេខាលើ MoU ស្តីពីថាមពលនុយក្លេអ៊ែរ និង​សិក្សា​លទ្ធភាព​ធ្វើ​អាជីវកម្ម​រ៉ែ
09/15/2026 06:09 PM
Facebook Telegram Linkin
អូម៉ង់៖ នាវាដឹកប្រេងរងការវាយប្រហារ ត្រូវបានអូសចូលកំពង់ផែ ខណៈនាវិក ២នាក់ នៅតែបាត់ខ្លួន
09/15/2026 06:09 PM
Facebook Telegram Linkin
នាយអគ្គសេនាធិការកងទ័ព៖ បេឡារុសគ្មានផែនការវាយប្រហារទេ ហើយសមយុទ្ធគ្រាន់តែជាការត្រួតពិនិត្យការត្រៀមខ្លួន
09/15/2026 06:09 PM
Facebook Telegram Linkin
ជប៉ុនអាចនឹងចំណាយ ៣,៥% នៃ GDP លើវិស័យការពារជាតិ បន្ទាប់ពីមានសម្ពាធពីសហរដ្ឋអាមេរិក
09/15/2026 06:09 PM
Facebook Telegram Linkin
ឯកអគ្គរដ្ឋទូតអាមេរិកទៅទស្សនកិច្ច «តំបន់សាកល្បង» ដែលកងទ័ពលីបង់គ្រប់គ្រង នៅក្បែរអ៊ីស្រាអែល
09/15/2026 06:09 PM
Facebook Telegram Linkin
អគ្គិភ័យឆាបឆេះផ្ទះពលរដ្ឋ នៅជាន់ទី២ បង្កការខូចខាតសម្ភារៈមួយចំនួនធំ
09/15/2026 06:09 PM
Facebook Telegram Linkin
អ៊ីរ៉ង់​បដិសេធ​មិន​មាន​ការចរចាណាមួយ​ជាមួយអាមេរិក ក្រោយការលើកឡើងរបស់លោក Trump
09/15/2026 06:09 PM
Facebook Telegram Linkin
អេហ្ស៊ីប និងក្រិក ចាប់ផ្តើមសមយុទ្ធយោធារួមគ្នា នៅសមុទ្រមេឌីទែរ៉ាណេ
09/15/2026 06:09 PM
Facebook Telegram Linkin
ក្រុមសង្រ្គោះរកឃើញសាកសព ខណៈឥណ្ឌូនេស៊ីបង្កើនប្រតិបត្តិការស្វែងរកមនុស្សបាត់ខ្លួន ១២៩នាក់ ក្រោយនាវាលិច
09/15/2026 06:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.