នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេ​ចតេជោ ហ៊ុន សែន៖«២០ មិថុនា ១៩៧៧ ជីវិតរបស់ខ្ញុំ និងភរិយាពេលនោះជួបជាមួយគ្រោះថ្នាក់ និងលំបាកវេទនាខ្លាំងណាស់»
សម្តេចតេជោ ហ៊ុន សែន ថ្លែងថា អាវក្រោះ និងសម្ភារយោធាម៉ាក DSS សុទ្ធតែមានគុណភាពហើយអាវការពារនេះនាយករដ្ឋមន្រ្តីបានសាករួចហើយ
សម្ដេចតេជោ ហ៊ុន សែន អញ្ជើញពិនិត្យមើលរោងចក្រ ផលិតសម្ភារៈយោធា DSS និងសំណេះសំណាលជាមួយកម្មករ កម្មការិនី
សម្ដេចតេជោឱ្យបើកការស៊ើបអង្កេតអ្នកពាក់ព័ន្ធនាំសាច់បង្កកពីថៃចូលមកម្ពុជាមិនឱ្យរួចខ្លួនឡើយ

នយោបាយ​ និង ការអភិវឌ្ឍន៍

តុលាការនីហ្ស៊េរីយ៉ា សម្រេចឃុំខ្លួនមនុស្សរាប់សិបនាក់ក្នុងពន្ធនាគារពីបទចោទចូលរួមក្នុងពិធីអាពាហ៍ពិពាហ៍ភេទដូចគ្នា

2023/09/05 09:49:46 am        106
Facebook Telegram Linkin
នីហ្ស៊េរីយ៉ា៖ មនុស្សជាង៦០នាក់ ដែលត្រូវបានចាប់ខ្លួនកាលពីសប្តាហ៍មុននៅក្នុងប្រទេសនីហ្ស៊េរីយ៉ា ពាក់ព័ន្ធនឹងការចោទប្រកាន់ថាចូលរួមក្នុងអាពាហ៍ពិពាហ៍អ្នកស្រលាញ់ភេទដូចគ្នា ដែលជាអំពើខុសច្បាប់នៅក្នុងប្រទេសនោះ ត្រូវបានឃុំខ្លួននៅក្នុងពន្ធនាគារ នេះបើយោងតាមនគរបាល និងមេធាវីរបស់ពួកគេបាននិយាយកាលពីថ្ងៃច័ន្ទ(៤កញ្ញា)។ តុលាការបានផ្តល់សំណើសុំដីកាពីនគរបាល បន្ទាប់ពីសវនាការមួយកាលពីថ្ងៃច័ន្ទ នៅទីក្រុង Warri ភាគខាងត្បូងនៃរដ្ឋ Delta ជាទីដែលជនសង្ស័យត្រូវបានចាប់ខ្លួនបន្ទាប់ពីមានការផ្តល់ព័ត៌មាន។នៅក្នុងប្រទេសនីហ្ស៊េរីយ៉ា ដូចទៅនឹងផ្នែកភាគច្រើននៃទ្វីបអាហ្រ្វិកដែរ ការស្រឡាញ់ភេទដូចគ្នាជាទូទៅត្រូវបានចាត់ទុកថាមិនអាចទទួលយកបាន ហើយច្បាប់ប្រឆាំងការស្រឡាញ់ភេទដូចគ្នាឆ្នាំ២០១៤ បានចូលជាធរមាន ទោះបីជាមានការថ្កោលទោសពីអន្តរជាតិក៏ដោយ។ ច្បាប់ប្រឆាំងមនុស្សស្រលាញ់ភេទដូចគ្នាក្នុងប្រទេស ដែលមានប្រជាជនច្រើនជាងគេនៅទ្វីបអាហ្រ្វិកមួយនេះ រួមមានការជាប់ពន្ធនាគាររហូតដល់១៤ឆ្នាំសម្រាប់អ្នកដែលត្រូវបានកាត់ទោស និងហាមប្រាមការរៀបអាពាហ៍ពិពាហ៍ភេទដូចគ្នា ទំនាក់ទំនងភេទដូចគ្នា ព្រមទាំងសមាជិកភាពនៃក្រុមសិទ្ធិស្រឡាញ់ភេទដូចគ្នាផងដែរ៕

អ៊ុយក្រែន និយាយថា យានដ្រូន រុស្ស៊ី វាយប្រហារប្រទេសរ៉ូម៉ានី ជាសមាជិកណាតូ ខណៈក្រុងប៊ុយចារ៉េស ច្រានចោល

2023/09/05 09:37:09 am        171
Facebook Telegram Linkin
អ៊ីរ៉ង់៖ កាលពីថ្ងៃចន្ទទីក្រុងគីវ (Kyiv) បាននិយាយថា យានដ្រូនរុស្ស៊ីផលិតដោយអ៊ីរ៉ង់ បានធ្លាក់ និងផ្ទុះនៅលើដែនដីរបស់ប្រទេសរ៉ូម៉ានី អំឡុងការវាយប្រហារពេលយប់ លើកំពង់ផែអ៊ីស្មេល(Izmail) របស់អ៊ុយក្រែន ជាការអះអាងមួយ ដែលប្រទេសរ៉ូម៉ានី សមាជិកសម្ព័ន្ធយោធាណាតូ បានច្រានចោល។អ្នកនាំពាក្យក្រសួងការបរទេសអ៊ុយក្រែន លោក អូឡេក នីកូឡេនកូ (Oleg Nikolenko) បាននិយាយនៅលើបណ្ដាញសង្គមថា យោងតាមសេវាឆ្មាំល្បាតព្រំដែនរដ្ឋ របស់អ៊ុយក្រែន ថា យានដ្រូន ហ្សាហីដ (Shaheds)បានធ្លាក់ និងផ្ទុះនៅលើដែនដីប្រទេសរ៉ូម៉ានីទាំងយប់ជ្រៅ។  លោកបាននិយាយថា ឧបទ្ទវេហតុនេះ បានកើតឡើង អំឡុង ការវាយប្រហារដ៏ធំ របស់រុស្ស៊ី ជិត កំពង់ផែអ៊ីស្មេល ដែលស្ថិតនៅលើទន្ល ដានូបេ (Danube) ឆ្លងកាត់ពីប្រទេសរ៉ូម៉ានី ។   ក្រសួងការពារជាតិរ៉ូម៉ានី បានច្រានចោលយ៉ាងច្បាស់លាស់អំពីការអះអាងរបស់ក្រសួងការបរទេសអ៊ុយក្រែន ដែលថាយ៉ាងហោចណាស់យានដ្រូនរបស់រុស្ស៊ី មួយគ្រឿងបានបាញ់អំឡុងការវាយប្រហារទាំងយប់ជ្រៅ លើកំពង់ផែរបស់អ៊ុយក្រែន បានធ្លាក់និងផ្ទុះឆេះនៅក្នុងទឹកដីរបស់រ៉ូម៉ានី។  ទីក្រុងគីវ និយាយកាលពីថ្ងៃទី៤ កញ្ញា ថា រុស្ស៊ី បានបើកការវាយប្រហារតាមអាកាសលើហេដ្ឋារចនាសម្ព័ន្ធនៅកំពង់ផែរបស់អ៊ុយក្រែន ។  ទោះយ៉ាងណាក៏ដោយ ក្រសួងការបរទេសរ៉ូម៉ានី បាននិយាយថាព័ត៌មានដែលបានបញ្ចេញដោយអ៊ុយក្រែន ជាព័ត៌មានក្លែងក្លាយ ៕

មេដឹកនាំរដ្ឋប្រហារហ្គាបុង បានស្បថចូលកាន់តំណែងជាប្រធានាធិបតីបណ្តោះអាសន្ន

2023/09/05 09:29:25 am        96
Facebook Telegram Linkin
ហ្គាបុង៖ មេដឹកនាំនៃរដ្ឋប្រហារហ្គាបុង ដែលបានទម្លាក់តំណែងប្រធានាធិបតី លោក Ali Bongo បានស្បថចូលកាន់តំណែងជាប្រធានាធិបតីបណ្តោះអាសន្ន និងត្រូវបានអបអរសាទរដោយអ្នកគាំទ្រដ៏រីករាយកាលពីថ្ងៃចន្ទ(៤ កញ្ញា) នៅក្នុងពិធីតាមទូរទស្សន៍មួយ ដែលរៀបចំឡើងដើម្បីធ្វើឲ្យយោធាជាអ្នករំដោះសង្គមដែលត្រូវបានជិះជាន់មួយនេះ។នៅក្នុងរដ្ឋប្រហារលើកទី៨របស់អាហ្វ្រិកខាងលិច និងកណ្តាលក្នុងរយៈពេលបីឆ្នាំមួយនេះ ក្រុមមន្ត្រីកងទ័ពដែលដឹកនាំដោយលោកឧត្តមសេនីយ Brice Oligui Nguema ( ប៊្រីស អូលីហ្គី ង្វែម៉ា) បានដណ្តើមអំណាចនៅថ្ងៃទី៣០ ខែសីហា ប៉ុន្មាននាទីបន្ទាប់ពីការប្រកាសថាលោកប្រធានាធិបតី Bongo បានឈ្នះការបោះឆ្នោត ដែលពួកគេលុបចោល ហើយនិយាយថាមិនគួរឱ្យទុកចិត្ត។រដ្ឋប្រហារនោះ បានទាក់ទាញការអបអរសាទររបស់ហ្វូងមនុស្សនៅតាមដងផ្លូវនៃរដ្ឋធានី Libreville ប៉ុន្តែបានទទួលការថ្កោលទោសពីបរទេស រួមទាំងមកពីប្លុកតំបន់អាហ្វ្រិកកណ្តាល ECCAS ដែលបាននិយាយកាលពីថ្ងៃចន្ទថា ខ្លួនកំពុងផ្អាកសមាជិកភាពហ្គាបុង រហូតដល់ការវិលត្រឡប់ទៅកាន់សណ្ដាប់ធ្នាប់រដ្ឋធម្មនុញ្ញវិញ។នៅក្នុងសុន្ទរកថា លោកឧត្តមសេនីយ ង្វែម៉ា បានស្នើកំណែទម្រង់រួមទាំងរដ្ឋធម្មនុញ្ញថ្មី ដែលត្រូវអនុម័តដោយប្រជាមតិ ច្បាប់បោះឆ្នោតថ្មី និងក្រមព្រហ្មទណ្ឌ ព្រមទាំងវិធានការផ្តល់អាទិភាពដល់ធនាគារ និងក្រុមហ៊ុនក្នុងស្រុកសម្រាប់ការអភិវឌ្ឍន៍សេដ្ឋកិច្ចផងដែរ៕

រដ្ឋសភាបន្តសម័យប្រជុំ បោះឆ្នោតជ្រើសតាំងសមាជិកគណៈកម្មការជំនាញទាំង១០នៃរដ្ឋសភា

2023/09/05 09:06:52 am        260
Facebook Telegram Linkin
ភ្នំពេញ៖ នៅថ្ងៃទី៥ ខែសីហា ឆ្នាំ២០២៣ រដ្ឋសភានៃកម្ពុជា នៅថ្ងៃទី៥ ខែកញ្ញា ឆ្នាំ២០២៣ បានបន្តសម័យប្រជុំរដ្ឋសភាលើកទី១ នីតិកាលទី៧ ក្រោម​អធិបតីភាព​ដ៏ខ្ពង់ខ្ពស់​សម្តេច​មហា​រដ្ឋសភា​ធិការធិបតី ឃួន សុដារី ប្រធាន​រដ្ឋសភា​ ដើម្បី​បោះឆ្នោត​ជ្រើស​តាំង​សមាជិក​គណៈកម្មការ​ជំនាញទាំង១០ នៃរដ្ឋសភា នីតិកាលទី៧។ បន្ទាប់ពីសម័យប្រជុំរដ្ឋសភាបានរៀបចំការបោះឆ្នោតជ្រើសតាំងសមាជិកគណៈកម្មការនីមួយៗចប់​សព្វគ្រប់ហើយ គណៈកម្មការរដ្ឋសភាទាំង១០ បាន​រៀបចំ​បោះឆ្នោត​ផ្ទៃ​ក្នុង​តាម​គណៈកម្មការ​នីមួយៗ​បន្ត​ទៀត ក្នុងការជ្រើសតាំងលេខាធិការនៃគណៈកម្មការ។ ក្នុងនោះ គណៈកម្មការ​ជំនាញ​រដ្ឋសភា​នីមួយៗ​ដឹកនាំដោយប្រធានមួយរូប អនុប្រធានមួយរូប មានលេខាធិការ​គណៈកម្មការ​មួយ​រូប​ និងមានសមាជិកចំនួន៦រូប។ គណៈកម្មការជំនាញទាំង១០របស់រដ្ឋសភា មានដូចជា៖- គណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភា - គណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម- គណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក- គណៈកម្មការមហាផ្ទៃ ការពារជាតិ និងមុខងារសាធារណៈ - គណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន- គណៈកម្មការនីតិកម្ម និងយុត្តិធម៌- គណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍- គណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី- គណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ - គណៈកម្មការអង្កេត បោសសំអាត និងប្រឆំាងអំពើពុករលួយ៕

សម្តេចមហាបវរធិបតី ហ៊ុន ម៉ាណែត អញ្ជើញចូលរួមអាហារពេលព្រឹកការងារ ជាមួយនាយករដ្ឋមន្ត្រីវៀតណាម និងនាយករដ្ឋមន្រ្តីឡាវ

2023/09/05 08:46:49 am        338
Facebook Telegram Linkin
សម្តេច ហ៊ុន ម៉ាណែត អញ្ជើញចូលរួមអាហារពេលព្រឹកការងារជាមួយនាយករដ្ឋមន្ត្រីវៀតណាម និងឡាវ ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជានាព្រឹកថ្ងៃទី៥ ខែកញ្ញា ឆ្នាំ ២០២៣នេះបានជួបទទួលទានអាហារពេលព្រឹក និងកិច្ចពិភាក្សាការងារត្រីភាគីជាមួយ ឯកឧត្តម ផាម មីញជីញ (Pham Minh Chính ) នាយករដ្ឋមន្ត្រី នៃសាធារណរដ្ឋសង្គមនិយមវៀតណាម និង ឯកឧត្តម សនសៃ ស៊ីផាន់ដន (Sonexay Siphandone ) នាយករដ្ឋមន្ត្រី នៃសាធារណរដ្ឋប្រជាធិបតេយ្យប្រជាមានិតឡាវ។ការជួបទទួលទានអាហារពេលព្រឹកនេះ គឺជាការបន្តប្រពៃណី ដែលថ្នាក់ដឹកនាំនៃប្រទេសទាំងបីតែងបានអនុវត្តកន្លងមក នៅមុនពេលបើកកិច្ចប្រជុំកំពូលធំៗ នៅក្នុងតំបន់។នៅក្នុងជំនួបនេះ, ថ្នាក់ដឹកនាំនៃប្រទេសទាំងបី បានពិភាក្សា និង បានឯកភាពជាគោការណ៍ដូចជា ទី១. បន្តរក្សាប្រពៃណីនៃការជួបទទួលទានអាហារពេលព្រឹក និង ពិភាក្សាការងារត្រីភាគី នៅមុនពេលបើកកិច្ចប្រជុំកំពូលធំៗក្នុងតំបន់ ដែលតែងផ្ដល់ផលប្រយោជន៍ជាច្រើនដល់ប្រទេសទាំងបី ។ ទី២. បន្តដោះស្រាយជាមួយគ្នា និង ជំរុញសម្រេចឱ្យបាននូវលទ្ធផល ចំពោះបញ្ហាដែលនៅសេសសល់ទាំងឡាយ ។ ទី៣. បន្តអនុវត្តន៍យន្តការនៃការកំណត់ព្រំដែនរវាងប្រទេសទាំងបី ដើម្បីបញ្ចប់ទាំងស្រុង នាពេល ឆាប់ៗខាងមុខ ។ ទី៤. បន្តកិច្ចសហប្រតិបត្តិការរវាងប្រទេសទាំងបី ទាំងក្នុងទិដ្ឋភាពសង្គម-សេដ្ឋកិច្ច, សន្តិសុខ, ការផ្សារភ្ជាប់រវាងប្រជាជន និង ប្រជាជន, វប្បធម៌ និង ប្រពៃណី ។ ទី៥. ជំរុញបន្ថែមនូវទំនាក់ទំនង និង ការផ្សារភ្ជាប់រវាងប្រទេសទាំងបី លើគ្រប់មធ្យោបាយរួមទាំងហេដ្ឋារចនាសម្ព័ន្ធ ដូចជា ស្ពាន ផ្លូវ ផ្លូវដែក និងកំពង់ផែ, ខ្សែច្រវាក់ផ្គត់ផ្គង់, និងទេសចរណ៍ ។នៅក្នុងជំនួបនេះផងដែរ ឯកឧត្តមនាយករដ្ឋមន្ត្រីវៀតណាម បានផ្ដាំផ្ញើការសួរសុខទុក្ខ និង ក្តីនឹករលឹកជូនចំពោះ សម្ដេចតេជោ ប្រធានឧត្តមក្រុមប្រឹក្សាផ្ទាល់ព្រះមហាក្សត្រ និង បានបង្ហាញបំណងចង់ជួបសំណេះសំណាលដោយផ្ទាល់ជាមួយ សម្តេចតេជោ នៅក្នុងពេលណាមួយខាងមុខ ។ ឯកឧត្តមនាយករដ្ឋមន្ត្រីឡាវ ក៏បានអញ្ជើញ សម្តេចមហាបវរធិបតី ទៅបំពេញទស្សនកិច្ចផ្លូវការទៅកាន់ប្រទេសឡាវ នាឆ្នាំ២០២៤ ខាងមុខ៕

សាខាកាកបាទក្រហមកម្ពុជាខេត្តកំពង់ចាម ផ្ដល់ផ្ទះមនុស្សធម៌ជូនពលរដ្ឋជួបការលំបាកចំនួន២គ្រួសារ

2023/09/04 05:48:24 pm        334
Facebook Telegram Linkin
ភ្នំពេញ៖ ឯកឧត្ដម អ៊ុន ចាន់ដា ប្រធានសាខាកាកបាទក្រហមកម្ពុជាខេត្តកំពង់ចាម ​និងសហការី ព្រមទាំង ព្រះសង្ឃ នៅព្រឹកថ្ងៃទី៤ ខែកញ្ញា ឆ្នាំ២០២៣ ​បាននិមន្ត ​និងអញ្ជើញប្រគល់​ផ្ទះមនុស្សធម៌ ទី១៥ និងទី១៦ នៅទីតាំង២កន្លែងផ្សេងគ្នា ជូន​ពលរដ្ឋទ័លលំបាក ២គ្រួសារ ​ដោយ១គ្រួសារ ស្ថិតក្នុងស្រុកកំពង់សៀម និង១គ្រួសារទៀត ក្នុងស្រុកកងមាស។លោក ទូច ឆៃ នាយកប្រតិបត្តិសាខាកាកបាទក្រហមខេត្តកំពង់ចាម បានឱ្យដឹងថា​ គ្រួសារទី១ រស់នៅភូមិគគរ ២ ឃុំគគរ ស្រុកកំពង់សៀម មានប្តីជាជនពិការភ្នែក ​និងជើង​ មិនអាចធ្វើការបាន មានជីវភាពលំបាកយ៉ាប់យ៉ឺនខ្លាំង​ ដោយរស់នៅពឹងផ្អែកតែលើការជួយពីរាជរដ្ឋាភិបាល តាម​រយៈបណ្ណសមធម៌ ក្រ ២ គួបផ្សំចំណូលតិចតួច ​ដែលបានពីប្រពន្ធ ដើរស៊ីឈ្នួលបោកខោអាវ​តាមផ្ទះអ្នកស្រុក។ ចំណែក គ្រួសារទី២. ជាស្រ្តីមេម៉ាយពិការភ្នែក មានកូនស្រី១នាក់ ​រស់នៅភូមិអន្លង់អកកើត ឃុំសូរគង ស្រុកកងមាស ​ដោយរស់នៅពឹងផ្អែកលើសប្បុរសជន​ អ្នកជិតខាង រួមជាមួយ​ការ​ឧបត្ថម្ភរបស់អាជ្ញាធរភូមិឃុំ ​និងការជួយពីរាជ ​រដ្ឋាភិបាល​ តាមរយៈប័ណ្ណសមធម៌ ក្រ ១ផងដែរ ។ដោយឡែកដើម្បីជួយសម្រាលជីវភាពរស់នៅ ​ឯកឧត្ដម អ៊ុន ចាន់ដា បានផ្តល់សម្ភារៈ គ្រឿង​ឧបភោគ បរិភោគ ជូនគ្រួសារទាំង២ សម្រាប់​សង្កត់ផ្ទះថ្មីនេះ​ ដោយក្នុង១គ្រួសារ ​ទទួលបាន​ អង្ករ ៥០គក្រ គ្រឿងឧបភោគបរិភោគ ប្រើប្រាស់ និងថវិកា២០ម៉ឺនរៀល។ ទន្ទឹមនឹងនោះ ​លោកតា លោកយាយ ​ដែលចូលរួមជាសាក្សី ​ក្នុងពិធីប្រគល់-ទទួលផ្ទះថ្មី ទាំង២ខ្នងនេះ ក្នុងម្នាក់ៗ​ ទទួលបានអង្ករ ត្រីខ ឃីត ​មី ទឹកត្រី ទឹកស៊ីអ៊ីវ សាប៊ូ អាវយឺត ព្រមទាំង​ថវិកាចំនួន ២ម៉ឺនរៀលផងដែរ ៕អត្ថបទ៖ ថុង សីហា

កិច្ចប្រជុំប្រាក់ឈ្នួល៖ ភាគីសហជីពស្នើតួលេខ២១៥ដុល្លារ ឯភាគីនិយោជកស្នើតួលេខ២០១ ដុល្លារ

2023/09/04 02:20:22 pm        768
Facebook Telegram Linkin
ភ្នំពេញ៖ ពាក់ព័ន្ធនឹងការពិភាក្សាប្រាក់ឈ្នួលអប្បបរមា ភាគីសហជីពបានស្នើតួលេខ ២១៥ដុល្លារ ភាគីនិយោជកស្នើតួលេខត្រឹមតែ ២០១ដុល្លារ ខណៈភាគីរាជរដ្ឋាភិបាលមិនទាន់បង្ហាញតួលេខនៅឡើយទេ ហើយក្រុមប្រឹក្សាជាតិប្រាក់ឈ្នួល​អប្បបរមា នឹងបើកកិច្ចប្រជុំពិភាក្សាបន្តនៅលើកទី៤ខាងមុខ។នៅក្នុងកិច្ចប្រជុំទាំង៣លើកនេះ​ តំណាងភាគីរាជរដ្ឋាភិបាលក៏បានសម្របសម្រួល និងផ្តល់នូវ​ការពន្យល់បន្ថែមលើចំណុចនានា ​ដែលតំណាងភាគីកម្មករនិយោជិត និងតំណាងភាគីនិយោជក​មានចម្ងល់ផងដែរ។ ជាលទ្ធផល ​តំណាងភាគីកម្មករនិយោជិតបានលើកឡើងនូវតួលេខចំនួន ២១៥ដុល្លារអាម៉េរិក ​និងតំណាងភាគីនិយោជកបានលើកឡើងនូវតួលេខចំនួន ២០១ដុល្លារ​អាម៉េរិក។អង្គប្រជុំបានឯកភាពគ្នាកំណត់កិច្ចពិភាក្សាបន្តទៀត នៅម៉ោង ៩:០០នាទីព្រឹក ថ្ងៃទី១១ ខែកញ្ញា ឆ្នាំ២០២៣។ ទោះជាយ៉ាងណា ក្រុមប្រឹក្សាជាតិប្រាក់ឈ្នួលអប្បបរមា នឹងបន្តកិច្ចប្រជុំសម្រេច​កំណត់​ប្រាក់ឈ្នួលអប្បបរមាផ្នែកវាយនភណ្ឌ ​កាត់ដេរ ​ផលិតស្បែកជើង និងផលិតផលិតផល​ធ្វើដំណើរ និងកាបូប ​សម្រាប់ឆ្នាំ២០២៤ ​ឱ្យបានចប់នៅមុនពិធីបុណ្យភ្ជុំបិណ្ឌ ​តាមការអនុសាសន៍​ណែនាំរបស់​សម្ដេចមហាបវរធិបតី ​ហ៊ុន ម៉ាណែត នាយករដ្ឋមន្ត្រីនៃកម្ពុជា៕

អាស៊ាន នឹងធ្វើការឆ្ពោះទៅមុខប្រសិនបើបញ្ហាមីយ៉ាន់ម៉ា ត្រូវបានដោះស្រាយ

2023/09/04 01:57:33 pm        563
Facebook Telegram Linkin
ឥណ្ឌូនេស៊ី បានទទួលស្គាល់ថាវិបត្តិនៅមីយ៉ាន់ម៉ា បានរារាំងដល់ផែនការអាស៊ានជាច្រើន ក្នុងការធ្វើការឆ្ពោះទៅមុខ។ ទាក់ទងទៅនឹងបញ្ហានេះ អាស៊ាន ត្រូវតែដឹកនាំការស្វែងរកដំណោះស្រាយប្រកប ដោយសន្តិវិធី សម្រាប់សហភាពមីយ៉ាន់ម៉ា។ កិច្ចប្រជុំកំពូលអាស៊ានលើកទី៤៣ ដែលមានជាបន្តបន្ទាប់ នៅថ្ងៃទី២ ដល់ថ្ងៃទី៧ ខែកញ្ញាឆ្នាំ២០២៣នេះ ក្នុងទីក្រុងហ្សាកាតា គឺជាឱកាសមួយផ្សេងទៀតសម្រាប់ការស្វែងរកនេះ។ រដ្ឋមន្ត្រីការបរទេសឥណ្ឌូនេស៊ី លោកស្រី Retno Marsudi បាននិយាយថាអាស៊ាន បានដឹងអំពីផលលំបាកជាច្រើននៅក្នុងតំបន់។ ទោះជាយ៉ាងណា យើងមិនត្រូវបណ្តោយឲ្យបញ្ហាទាំអអស់នេះ ប៉ះពាល់ដល់កិច្ចប្រឹងប្រែងបំពេញការងាររបស់យើងនោះទេនៅក្នុងកិច្ចប្រជុំកំពូល។ លោកស្រីបាននិយាយនៅក្នុងការបើកកិច្ចប្រជុំរដ្ឋមន្ត្រីការបរទេសអាស៊ាន(AMM) នៅថ្ងៃចន្ទនេះក្នុងទីក្រុងហ្សាកាតា ថា ការសំឡឹងមើលរបស់ពលរដ្ឋរបស់យើងមកលើយើងដើម្បីបញ្ជាក់ថាអាស៊ាននៅតែសំខាន់ និងរួមចំណែកដល់សន្តិភាព ស្ថិរភាព និងភាពរុងរឿងនៅក្នុងតំបន់។ បញ្ហាមួយក្នុងចំណោមបញ្ហាទាំងអស់ដែលចាំបាច់ត្រូវដោះស្រាយដោយអាស៊ាន គឺបញ្ហាសហភាពមីយ៉ាន់ម៉ា។ ភាពជាអ្នកដឹកនាំរបស់យើងកំពុងធ្វើការយ៉ាងខ្លាំងដើម្បីធ្វើឲ្យប្រសើរដំណោះស្រាយរួមគ្នា ជាមួយអាស៊ាន។ អាស៊ានអាចធ្វើការឆ្ពោះទៅមុខក្នុងល្បឿនពេញលេញប្រសិនបើយើងអាចធានាបាននូវដំណោះស្រាយប្រកបដោយសន្តិវិធី និងនិរន្តរភាពក្នុងសហភាពមីយ៉ាន់ម៉ា។ ខណៈកិច្ចប្រជុំជាច្រើនរបស់អាស៊ានកាលពីពេលមុន ធ្វើជាប្រធានដោយប្រទេសឥណ្ឌូនេស៊ី សហភាពមីយ៉ាន់ម៉ានៅតែគ្មានអ្នកតំណាងនៅក្នុងកិច្ចប្រជុំរដ្ឋមន្ត្រីការបរទេស។ កៅអីសម្រាប់អ្នកតំណាងមីយ៉ាន់ម៉ា នៅក្នុងបន្ទប់កិច្ចប្រជុំនេះគឺពុំមាននោះទេ។

អាណាព្យាបាលវេចខ្ចប់ម្ហូបអាហារសម្រាប់កូនទៅរៀន ដើម្បីលើកកម្ពស់សុវត្ថិភាពសុខភាព

2023/09/04 01:35:32 pm        690
Facebook Telegram Linkin
ភ្នំពេញ៖ បច្ចុប្បន្នអាណាព្យាបាលមួយចំនួនពិសេសនៅរាជធានីភ្នំពេញ បានចាប់ផ្ដើមវេចខ្ចប់​ម្ហូបអាហារ​ ក៏ដូចជាទឹកពិសារ ​សម្រាប់កូនទៅសិក្សាជារៀងរៀងរាល់ថ្ងៃ។ ការអនុវត្តនេះ គឺស្រប​ទៅ​តាមគោលការណែនាំ របស់ក្រសួងអប់រំ យុវជន និងកីឡា ក្នុងការលើកកម្ពស់សុវត្ថិភាព​សុខភាព​របស់សិស្សនៅតាមគ្រឹះស្ថានសិក្សា។ សកម្មភាពវេចខ្ទប់ម្ហូបអាហារដល់កូនក្នុងពេល​ទៅសិក្សានៅសាលានេះ ​សង្កេតឃើញមានច្រើន​នៅ​តាមសាលាគំរូ បឋមសិក្សាចតុមុខ ​រាជធានីភ្នំពេញ ដោយសិស្សគ្រប់រូបសុទ្ធតែមានកញ្ចប់​ម្ហូប​អាហារពីផ្ទះ ​សម្រាប់បរិភោគ។ក្នុងនាមជាអាណាព្យាបាល ​ដែលបានរៀបចំម្ហូបអាហារ ក៏ដូចជាទឹកពិសារសម្រាប់កូនមកសិក្សា​រៀង​រាល់ថ្ងៃនេះអ្នកអាណាព្យាលបាលបានលើកឡើងថា ​សុខភាពរបស់កូន ជារឿងសំខាន់សម្រាប់​អាណាព្យាបាលគ្រប់រូប។ ដូច្នេះទោះជារវល់យ៉ាងណាក្ដីក៏ត្រូវតែរៀបចំម្ហូប​អាហារ​សម្រាប់​កូនរៀងរាល់ថ្ងៃដែរ។លោក សូ ធី នាយករងក្ដាប់រួមសាលាបឋមសិក្សាចតុមុខ​ លើកឡើងថា សាលាបានដាក់គោល​ការណ៍ ​និងមានការឯកភាពពីអាណាព្យាបាល ​ក្នុងរៀបចំម្ហូបអាហារសម្រាប់​កូនមកសិក្សា។ សាលាបាន​គ្រប់គ្រងលើបញ្ហា​សុខភាព​របស់សិស្ស ​ដោយមិនអនុញ្ញាតឱ្យសិស្សចេញ​ទៅទិញចំណី​អាហារ​នៅខាងក្រៅសាលានោះទេ ហើយសាលាក៏មិនទាន់បើកឱ្យមានការលក់​ដូរក្នុង​សាលាផងដែរ។ឯកឧត្តម ហង់ ជួនណារ៉ុន ឧបនាយករដ្ឋមន្រ្ដី រដ្ឋមន្រ្ដីក្រសួងអប់រំ ​យុវជន និងកីឡា បាន​លើកឡើងថា​ ការលើកកម្ពស់សុវត្ថិភាព​នៅតាមសាលារៀន ​ជាការងារអាទិភាព។ ការងារនេះ គឺទាមទារឱ្យគ្រប់គ្នាចូលរួមអនុវត្តឱ្យបានខ្ជាប់ខ្ជួន។ សូមជម្រាបថា​ ក្រសួងអប់រំបានចេញសេចក្ដីណែនាំពីចំណីអាហារហាមប្រាម ក្នុងការលក់ដូរ​ក្នុង​គ្រឹះស្ថានសិក្សា។ ចំណីអាហារដែលត្រូវបានហាមប្រាម ​ព្រោះវាអាចប៉ះពាល់ដល់សុខភាពនោះ គឺមាន ៦ប្រភេទ។ ចំណីអាហារទាំងនោះរួមមាន ​ចំណីអាហារគ្រប់ប្រភេទដែលហួសកំណត់កាល​បរិច្ឆេទ​ប្រើប្រាស់ គ្រឿងស្រវឹង ​និងផលិតផលថ្នាំជក់គ្រប់ប្រភេទ ចំណីអាហារដែលមិនមាន​ប្រភពច្បាស់លាស់ ភេសជ្ជៈប៉ូវកម្លាំង ភេសជ្ជៈផ្អែម ​កាហ្វេ ការ៉េម ទឹកស៊ីរ៉ូគ្រប់ប្រភេទ​ ស្ករសូកូឡា ស្ករគ្រាប់ ​និងស្ករកៅស៊ូគ្រប់ប្រភេទ ​និងចាហួយគ្រប់ប្រភេទ ​នំដូណាត់ ​និងនំផ្អែមជាដើម៕អត្ថបទ៖ គឹមហុក

មន្ត្រីផែនការ-សង្គមស៊ីវិលសហការសម្ភាសន៍អ្នកបម្រើការទេសចរណ៍ក្រៅប្រព័ន្ធ ដើម្បីផ្តល់បណ្ណក្រីក្រ

2023/09/04 01:16:49 pm        562
Facebook Telegram Linkin
ភ្នំពេញ៖ សមាគមន៍ អង្គការសង្គមស៊ីវិល ជាដៃគូមន្ទីរផែនការនៃរាជធានីភ្នំពេញ បានបង្កើន​កិច្ចសហការ ​បន្តស្វែងរកបុគ្គលបម្រើការតាមមណ្ឌលសេវាកម្សាន្តទេសចរណ៍ ផ្នែក​សេដ្ឋកិច្ចក្រៅប្រព័ន្ធ ដែលមានឈ្មោះនៅក្នុងបញ្ជី នៃក្រសួងផែនការ មកផ្តល់បទសំភាសន៍​នៅតាមសាលាសង្កាត់ ដើម្បីផ្តល់ជូនបណ្ណមូលនីធីសមធម៌សុខាភិបាល ​ទទួលបានអត្ថប្រយោជន៍ និងការពិនិត្យថែទាំសុខភាព ​ព្យាបាលជំងឺដោយមិនគិតថ្លៃ ពីរាជរដ្ឋាភិបាល។មន្ត្រីមន្ទីរផែនការរាជធានីភ្នំពេញ ​និងសមាគមន៍នារីកម្ពុជា ដើម្បីសន្តិភាព និងការអភិវឌ្ឍ​ CWPD បានថ្លែងប្រាប់BTV នៅថ្ងៃទី៤ ខែកញ្ញានេះថា នៅពេលនេះ យុទ្ធនាការចុះសម្ភាសន៍​ផ្តល់​បណ្ណមូលនីធីសមធម៌ ឬបណ្ណក្រីក្រ ​ជូនបុគ្គលបម្រើការ ​នៅតាមមណ្ឌលសេវាកម្សាន្តទេសចរណ៍ ផ្នែកសេដ្ឋកិច្ចក្រៅប្រព័ន្ធ​ នៅបណ្តាខ័ណ្ឌនានា ​នៅក្នុងរាជធានីភ្នំពេញ ត្រូវបានបញ្ចប់ ប៉ុន្តែ​សម្រាប់​អ្នកបម្រើការតាមសេវាកម្សាន្តនេះ​ ដែលនៅមិនទាន់ទៅផ្តល់សម្ភាសន៍ ​ត្រូវបានបុគ្គលិក នៃសមាគន៍ CWPD និងអង្គការជាដៃគូនានាទៀត គឺបាននិងកំពុងស្វែងរកបុគ្គលបម្រើការតាមសេវា​កម្សាន្ត​ទាំងនោះ ទៅទៅផ្តល់ការសម្ភាសន៍​ ធ្វើបណ្ណសមធម៌តាមសាលាសង្កាត់ដើម្បីបានបណ្ណក្រីក្រនោះ។បុគ្គលិកបម្រើការសេដ្ឋកិច្ចក្រៅប្រព័ន្ធ ​ក្នុងវិស័យទេសចរណ៍ ​បានថ្លែងអរគុណរាជរដ្ឋាភិបាល និង​អាជ្ញាធរមូលដ្ឋានដែលសហការរៀបចំផ្តល់បណ្ណក្រីក្រ ​សម្រាប់អ្នកបម្រើការងារសេដ្ឋកិច្ចក្រៅប្រព័ន្ធ មកពី​តាមបណ្តាខេត្តនានា ​មកស្នាក់នៅបម្រើការ ​នៅក្នុងរាជធានីភ្នំពេញ។លោក កែវ អ៊ូលី ប្រធាននាយកដ្ឋានកំណត់អត្តសញ្ញាណកម្មគ្រួសារក្រីក្រនៃ​ ក្រសួងផែនការ បានថ្លែងថា ​បុគ្គលបម្រើការ ​នៅតាមមណ្ឌលសេវាកម្សាន្តទេសចរណ៍​ ក្រៅប្រព័ន្ធ ដែលមានជីវភាព​ក្រីក្រ ហើយអាចធ្វើបណ្ណក្រីក្រ​ បានគឺតម្រូវឲ្យមានអត្ថសញ្ញាណបណ្ណសញ្ជាតិខ្មែរ មានលិខិត​បញ្ជាក់ការស្នាក់នៅពីអាជ្ញាធរសង្កាត់ចំនួនបីខែឡើងទៅ ​និងមានឈ្មោះនៅក្នុងបញ្ជី ដែល​ផ្តល់មកពី អាជ្ញាធរមូលដ្ឋាន ឃុំសង្កាត់ ​អង្គការសង្គមស៊ីវិល និងមន្ទីរទេសចរណ៍រាជធានីខេត្ត​ជាដើម ​នៅតាមបណ្តាគោលដៅទេសចរណ៍​នានាទូទាំងប្រទេស៕អត្ថបទ ស៊ុម សុខជា

បណ្ដាញសង្គម

ព័ត៌មានថ្មីៗ

UN៖ ការផ្តោតសំខាន់គឺបញ្ចប់សង្រ្គាមអ៊ុយក្រែន មិនមែនវិធីដែលសង្រ្គាមចាប់ផ្តើមនោះទេ
06/14/2026 12:06 PM
Facebook Telegram Linkin
សន្ទុះថ្មីមានសម្រាប់មាគ៌ាអ៊ុយក្រែនឆ្ពោះទៅរកសមាជិកភាព EU
06/14/2026 12:06 PM
Facebook Telegram Linkin
លោក Putinនិយាយពីការវាយប្រហាររបស់អ៊ុយក្រែនថា សត្រូវមិនអាចទប់ទល់ការវាយលុករបស់រុស្ស៊ីបានទេ
06/14/2026 12:06 PM
Facebook Telegram Linkin
ក្រុមបាតុករប្រឆាំងអន្តោប្រវេសន៍ និងក្រុមបាតុករប្រឆាំងស្តាំនិយមជ្រុល ជួបជុំគ្នានៅទីក្រុង Brighton របស់អង់គ្លេស
06/14/2026 12:06 PM
Facebook Telegram Linkin
​ចាប់ពីថ្ងៃទី១០ដល់១៣ មិថុនា អាជ្ញាធររាជធានីភ្នំពេញចុះត្រួតពិនិត្យទីតាំងឃ្លាំងទំនិញសង្ស័យនាំចូលពីថៃចំនួន ១០៧ទីតាំង រកឃើញ១២ទីតាំងនាំសាច់បង្កកពីថៃ
06/14/2026 11:06 AM
Facebook Telegram Linkin
ព្រះអង្គម្ចាស់ នរោត្តម ចក្រាវុធ យាងចុះជួបសួរសុខទុក្ខប្រជារាស្ត្រ និងសិស្សានុសិស្ស នៅជំរុំភៀសសឹក ខេត្តឧត្តរមានជ័យ
06/14/2026 10:06 AM
Facebook Telegram Linkin
បទល្មើសធនធានធម្មជាតិ ចំនួន២០ករណី ត្រូវបានបង្រ្កាបនៅក្នុងភូមិសាស្រ្តតំបន់ជួរភ្នំក្រវាញ ក្នុងខែឧសភា ឆ្នាំ២០២៦
06/14/2026 10:06 AM
Facebook Telegram Linkin
រយៈពេល៥ខែមកនេះ ការនាំចូលទំនិញថៃមកកាន់កម្ពុជា បន្តធ្លាក់ចុះថែមទៀតដោយសារការពហិការរបស់ពលរដ្ឋ
06/14/2026 10:06 AM
Facebook Telegram Linkin
វិស័យរដ្ឋបញ្ជាក់ពីប្តេជ្ញាចិត្តក្នុងការជួយពង្រឹងការយល់ដឹងអំពីច្បាប់និងនីតិវិធីគយដល់វិស័យ SMEs
06/14/2026 10:06 AM
Facebook Telegram Linkin
ព្រឹកនេះ ដំណើរការប្រឡងប្រជែងជ្រើសរើសមន្ត្រីរាជការ សម្រាប់ក្របខ័ណ្ឌក្រសួងការបរទេស និងសហប្រតិបត្តិការអន្តរជាតិ លើវិញ្ញាសាសួរផ្ទាល់មាត់ ចាប់ផ្តើម
06/14/2026 10:06 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.