BTV NEWS

UN ពិភាក្សាអំពីការតាំងទីលំនៅរបស់អ៊ីស្រាអែលនិងអំពើហិង្សានៅ West Bank

UN៖ ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃអង្គារ បានជួបប្រជុំគ្នាដើម្បីពិភាក្សាអំពីភាពតានតឹងនៅមជ្ឈិមបូព៌ា ជាពិសេសសកម្មភាពការតាំងលំនៅឋាននិងការផ្ទុះឡើងអំពើហិង្សានៅតំបន់គ្រប់គ្រង West Bank។ ក្នុងអំឡុងកិច្ចប្រជុំក្រុមប្រឹក្សាសន្តិសុខ ឯកអគ្គរដ្ឋទូតរងរបស់សហរដ្ឋអាមេរិក លោក Robert Wood បាននិយាយថា ទីក្រុងវ៉ាស៊ីនតោននឹងធ្វើការជាមួយប្រទេសអ៊ីស្រាអែល និងអាជ្ញាធរដែនដីប៉ាឡេស្ទីន ដើម្បីកាត់បន្ថយភាពតានតឹង និងស្តារការទុកចិត្តគ្នាឡើងវិញ និងជួយបង្កើតលក្ខខណ្ឌសម្រាប់ការវិលត្រឡប់មករកកិច្ចចរចា។លោក Wood បាននិយាយថា យើងអំពាវនាវឱ្យភាគីទាំងអស់អត់ធ្មត់ពីសកម្មភាពឯកតោភាគី រួមទាំងសកម្មភាពការតាំងលំនៅឋាន ការបណ្តេញចេញ និងការរុះរើលំនៅឋានពលរដ្ឋប៉ាឡេស្ទីន អំពើភេរវកម្ម និងការញុះញង់ឱ្យមានអំពើហិង្សា ដែលទាំងអស់នេះបង្កើតឲ្យស្ថានការណ៍កាន់តែឆាបឆេះ។ ការវាយប្រហារដោយបាញ់រះរបស់ក្រុមហាម៉ាស ដែលបានបណ្តាលឲ្យជនស៊ីវិលអ៊ីស្រាអែល ៤ នាក់ស្លាប់ នៅខាងក្រៅតំបន់តាំងទីលំនៅក្នុងទឹកដីដែលគ្រប់គ្រងដោយអ៊ីស្រាអែល បានបង្កឱ្យមានការចូលលុកលុយដោយហឹង្សាជាច្រើនថ្ងៃ ទៅក្នុងភូមិនិងក្រុងនានារបស់ប៉ាឡេស្ទីន ដោយក្រុមអ្នកតាំងទីលំនៅជនជាតិជ្វីហ្វ។ នគរបាលអ៊ីស្រាអែល បាននិយាយថា ជនសង្ស័យ១២ នាក់ត្រូវបានចាប់ខ្លួននៅក្នុងឧបទ្ទហេតុចុងក្រោយនេះ៕

សម្ដេចតេជោ៖ បើការបង្ក្រាបគ្រឿងញៀនបានច្រើនមិនមែនជាសញ្ញាថាជោគជ័យ នៃការទប់ស្កាត់បទល្មើសនេះទេ

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងថា កម្ពុជាមិនមែនជាប្រទេសផលិតទេ តែគ្រឿងញៀនបានរុលចូលមកប្រទេសរបស់យើងយ៉ាងច្រើន ដែលត្រូវតែខិតខំប្រឹងប្រែងស្រាវជ្រាវបង្ក្រាបទប់ស្កាត់ឱ្យបាន។សម្តេចតេជោ ប្រមុខនៃរាជរដ្ឋភិបាលបានលើកឡើងទាក់ទិននឹងបទល្មើសគ្រឿងញៀន យ៉ាងដូច្នេះ ខណៈបន្តអញ្ជើញចុះជួបសំណេះសំណាលជាមួយកម្មករ និយោជិតសរុបជិត ២ម៉ឺននាក់ នៅតំបន់ព្រៃស្ពឺ ខណ្ឌពោធិ៍សែនជ័យ រាជធានីភ្នំពេញ នាព្រឹកថ្ងៃទី២៨មិថុនានេះ ។សម្តេច បានគូសបញ្ជាក់ថា បើការបង្ក្រាបបទល្មើសមួយនេះ បានច្រើនមិនមែនជាសញ្ញាបង្ហាញថា ជាលទ្ធផលល្អ ឬជាជោគជ័យនៃការទប់ស្កាត់បទល្មើសគ្រឿងញៀននៅឡើយទេ។សូមបញ្ជាក់ថា រយៈពេលចុងក្រោយនេះ អនុវត្តតាមបទបញ្ជារបស់នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និងនាយឧត្តមសេនីយ៍ ម៉ក់ ជីតូ អគ្គស្នងការរងទទួលផែនប្រឆាំងបទល្មើសគ្រឿងញៀន និងក្រោមការដឹកនាំផ្ទាល់ពី ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន កម្លាំងជំនាញមន្ទីរប្រឆាំងគ្រឿងបាន ចុះប្រតិបត្តិការបង្ក្រាបបទល្មើសគ្រឿងញៀន ដូចភ្លៀងរលឹមនៅទូទាំងប្រទេសជារៀងរាល់ថ្ងៃ ជាពិសេសបង្ក្រាបបានបទល្មើសជួញដូរគ្រឿងញៀនធំៗជាបន្តបន្ទាប់។សន្និបាតបូកសរុបត្រួតពិនិត្យលទ្ធផលការងារគ្រឿងញៀន ឆ្នាំ២០២២ និងលើកទិសដៅបន្តរបស់អាជ្ញាធរជាតិប្រយុទ្ធប្រឆាំងគ្រឿងញៀន ថ្មីៗនេះ យោងតាមរបាយការណ៍ បានឲ្យដឹងថា អាជ្ញាធរជាតិប្រយុទ្ធប្រឆាំងគ្រឿងញៀន បានបន្តសហការសម្របសម្រួលជាមួយស្ថាប័ន អង្គភាពអនុវត្តច្បាប់ទាំងក្នុងក្របខ័ណ្ឌជាតិ និងអន្តរជាតិ ក្នុងការពង្រឹងការអនុវត្តវិធានការច្បាប់ ក៏ដូចជាវិធានការរដ្ឋបាល។គណៈកម្មការ បង្ការ ទប់ស្កាត់ និងបង្ក្រាបគ្រឿងញៀនខុសច្បាប់តាមច្រកនៃយុទ្ធនាការប្រយុទ្ធប្រឆាំងគ្រឿងញៀនខុសច្បាប់ បានបន្តការងារតាមគោលការណ៍ដឹកនាំរបស់គណៈបញ្ជាការយុទ្ធនាការ ក្នុងការពង្រឹងប្រសិទ្ធភាពអនុវត្តច្បាប់ និងឈានទៅបំផ្លាញអង្គការចាត់តាំងឧក្រិដ្ឋជនគ្រឿងញៀន ដោយបង្កើនកិច្ចសហប្រតិបត្តិការជាមួយអន្តរជាតិ តំបន់ អនុតំបន់ ពិសេសសហការយ៉ាងជិតស្និទ្ធជាមួយប្រទេសជិតខាង ដើម្បីទប់ស្កាត់ការចរាចរគ្រឿងញៀនគ្រប់ប្រភេទ ឆ្លងកាត់តំបន់ព្រំដែន៕

ប្រមុខNATO៖ សង្គ្រាមរបស់លោកPutin នៅអ៊ុយក្រែន បានធ្វើឱ្យមានការបែកចែកកាន់តែជ្រៅនៅក្នុងប្រទេសរុស្ស៊ី

រុស្ស៊ី៖ អគ្គលេខាធិការសម្ព័ន្ធយោធាណាតូ លោក Jens Stoltenberg បាននិយាយកាលពីថ្ងៃអង្គារថា ព្រឹត្តិការណ៍ដែលបានកើតឡើងនៅក្នុងប្រទេសរុស្ស៊ីកាលពីចុងសប្តាហ៍ បានបង្ហាញថាសង្រ្គាមនៅអ៊ុយក្រែនបានធ្វើឱ្យមានការបែងចែកកាន់ជ្រាលជ្រៅនៅក្នុងប្រទេសរុស្ស៊ី ប៉ុន្តែសម្ព័ន្ធមិត្តរបស់អ៊ុយក្រែន នៅតែមិនអាចមើលស្រាលលើរុស្ស៊ីបានទេ ហើយត្រូវតែបន្តគាំទ្រអ៊ុយក្រែន ។ការអធិប្បាយរបស់លោក Stoltenberg បានធ្វើឡើងបន្ទាប់ពីការទទួលទានអាហារពេលល្ងាចជាមួយមេដឹកនាំរដ្ឋសមាជិកសម្ព័ន្ធយោធាណាតូជាច្រើននៅទីក្រុងឡាអេ ប៉ុន្មានថ្ងៃបន្ទាប់ពីកងកម្លាំងទាហានស៊ីឈ្នួលក្រុមហ៊ុន Wagner បានចូលគ្រប់គ្រងរយៈពេលខ្លីមជ្ឈមណ្ឌលទីបញ្ជាការយុទ្ធសាស្ត្រសម្រាប់សង្គ្រាមនៅអ៊ុយក្រែនរបស់រុស្ស៊ី និងក្បួនដំណើរចូលទៅកាន់ទីក្រុងមូស្គូ មុនពេលត្រឡប់មកវិញ ជាការប្រឈមមុខដ៏កម្រចំពោះមេដឹកដឹកនាំយោធារបស់ខ្លួន។ថ្លែងនៅក្នុងសន្និសីទសារព័ត៌មាន លោក Stoltenberg បាននិយាយថា វាឆាប់ពេកក្នុងការសន្និដ្ឋានលើលទ្ធផលនៃសកម្មភាពរបស់កងទ័ពក្រុមហ៊ុន Wagner ទៅកាន់ប្រទេសបេឡារុស ប៉ុន្តែបានបញ្ជាក់ថា សម្ព័ន្ធភាពនេះ បានត្រៀមខ្លួនជាស្រេចដើម្បីការពារខ្លួនប្រឆាំងការគំរាមកំហែងណាមួយ។ លោក Stoltenberg និងនាយករដ្ឋមន្ត្រីប្រទេសហូឡង់ លោក Mark Rutte ដែលជាសហប្រធានរៀបចំអាហារពេលល្ងាចការងារ នៅទីក្រុងឡាអេ សម្រាប់មេដឹកនាំមួយក្រុមតូច នៅមុនកិច្ចប្រជុំនៃប្រទេសសម្ព័ន្ធមិត្តពេញលេញនៅទីក្រុង Vilnius ប្រទេសលីទុយអានី នៅថ្ងៃទី ១១-១២ ខែកក្កដា។ ដោយនិយាយជាមួយ លោក Stoltenberg ប្រធានាធិបតីលីទុយអានី លោក Gitanas Nauseda បាននិយាយថា ការដាក់ពង្រាយទាហានស៊ីឈ្នួលរបស់ក្រុមហ៊ុន Wagner នៅក្នុងប្រទេសបេឡារុស ប្រឈមនឹង«គ្រោះថ្នាក់កាន់តែខ្លាំងនៃអស្ថិរភាព» នៅក្នុងប្រទេសជិតខាង។ ប្រធានាធិបតីប៉ូឡូញ លោក Andrzej Duda បាននិយាយថា ចំណាត់ការនេះ ទាមទារការឆ្លើយតបដ៏ម៉ឺងម៉ាត់ពីសម្ព័ន្ធយោធាណាតូ៕

សម្តេចតេជោប្រកាសផ្តល់រង្វាន់២០ម៉ឺនដុល្លារ ដល់អង្គភាពណាបាញ់យន្តហោះគ្មានមនុស្សបើក ហោះចូលទឹកដីកម្ពុជា

ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ប្រកាសផ្ដល់រង្វាន់ចំនួន២០ម៉ឺនដុល្លារដល់អង្គភាពយោធាណា ដែលបានបាញ់ទម្លាក់យន្តហោះគ្មានមនុស្សបើក ដែលហោះចូលទឹកដីកម្ពុជា ។ថ្លែងនៅក្នុងឱកាសអញ្ជើញចុះជួបសំណេះសំណាលជាមួយកម្មករ និយោជិតសរុប១៨,៣១នាក់ នៅតំបន់ព្រៃស្ពឺ ខណ្ឌពោធិ៍សែនជ័យ រាជធានីភ្នំពេញ នាព្រឹកថ្ងៃទី២៨ ខែមិថុនា ឆ្នាំ២០២៣នេះ សម្តេចតេជោ ហ៊ុន សែន បានបញ្ជាឲ្យកងទ័ពដែលបានបញ្ជូន និងប្រចាំនៅតំបន់ភូមិភាគទី១ទាំងអស់ត្រូវតែបាញ់ដ្រូន និងយន្តហោះគ្មានមនុស្សបើកនេះ ឲ្យខាងតែបាន ខណៈការហោះចូលជារឿយៗក្នុងទឹកដីកម្ពុជាជាប់នឹងព្រំដែនវៀតណាមនាពេលប៉ុន្មានថ្ងៃមកនេះ គឺជាការឈ្លានពាន និងបំពាននូវអធិបតេយ្យកម្ពុជាសុទ្ធសាធ។ជាមួយគ្នានោះដែរសម្តេចតេជោ ក៏បានអំពាវនាវយ៉ាងទទូចដល់ប្រទេសណាក៏ដោយដែលបាន ឧបត្ថម្ភនូវសម្ភារៈដ្រូន និងយន្តហោះគ្មានមនុស្សបើកទាំងនេះដល់ក្រុមឧទ្ទាមទាំងនោះសូមបញ្ឈប់ជាបន្ទាន់ ខណៈបញ្ហានេះវាមិនមែនជាករណីលេងសើចនោះទេ វាគឺជាបញ្ហាភេរវកម្ម។ទាក់ទងនឹងបញ្ហាដ្រូន និងយន្តហោះគ្មានមនុស្សបើកចូលទឹកដីកម្ពុជានេះដែរ សម្តេច ក៏បានស្តីបន្ទោសដល់មេភូមិភាគទី១ថា ជាមេទ័ពកំសាកដោយមិនហ៊ានបាញ់ទម្លាក់ចំពោះដ្រូន ដែលបានហោះចូលតំបន់ស្រុកកោះញែក ខេត្តមណ្ឌលគិរី ចំនួន៥គ្រឿងកាលពីយប់មិញផងដែរ។សម្តេច បានលើកឡើងថា អស់លោកធ្វើទ័ពស្លូតពេកហើយ គេហោះចូលដីយើងប៉ុន្មានថ្ងៃត្រឹមយកកាំភ្លើងសេកាសេបាញ់ ដូច្នេះសម្តេចសូមបញ្ជាឲ្យដាក់សំណាញ់មេឃបាញ់ទម្លាក់ដ្រូន និងយន្តហោះទាំងនោះ ឲ្យខាងតែបាន ដើម្បីឲ្យដឹងប្រភពច្បាស់លាស់ថាវាចេញពីខាងណាមក។សូមបញ្ជាក់ថា កាលពីម្សិលមិញសម្តេចតេជោ បានបញ្ជាឱ្យនាយឧត្តមសេនីយ៍ ហ៊ីង ប៊ុនហៀង បញ្ចេញកម្លាំងយោធាចំនួន៥០០នាក់ និងអាវុធទំនើប២០០ដើមទៅកាន់តំបន់ភូមិភាគ១ ដើម្បីត្រៀមបាញ់ដ្រូន និងយន្តហោះគ្មានមនុស្សបើកចូលទឹកដីកម្ពុជា ខណៈសម្តេច បានដាក់ការសង្ស័យថាដ្រូន ទាំងនោះជារបស់ក្រុមឧទ្ទាម ឬជនជាតិភាគតិចម៉ុងតាញ៉ា ដែលបានវាយប្រហារដល់អាជ្ញាធរវៀតណាម កាលពីពាក់កណ្តាលខែមិថុនាកន្លងទៅ ហើយបាក់ទ័ពរត់ចូលលាក់ខ្លួនក្នុងព្រំដែនកម្ពុជា៕អត្ថបទ៖ បាន ចក់

តុលាការក្រុងញូវយ៉កបង្រួបសំណុំរឿងក្លែងបន្លំរបស់Trump ដោយច្រានចោលលោកស្រី Ivanka Trump ជាចុងចោទ

អាមេរិក៖ តុលាការឧទ្ធរណ៍ទីក្រុងញូវយ៉កកាលពីថ្ងៃអង្គារបានបង្រួមបណ្តឹងរដ្ឋប្បវេណីរបស់រដ្ឋអាជ្ញាលោកស្រី Letitia James ដែលចោទប្រកាន់លោក Donald Trump និងអាជីវកម្មគ្រួសាររបស់លោកពីបទក្លែងបន្លំ "គួរឲ្យភ្ញាក់ផ្អើល" ហើយបានច្រានចោលការអះអាងទាំងអស់ប្រឆាំងនឹងកូនស្រីច្បងរបស់អតីតប្រធានាធិបតីអាមេរិក រូបនេះ។ ខណៈបដិសេធការអះអាងរបស់លោក Trump ក្នុងការច្រានចោលករណីនេះ ផ្នែកបណ្តឹងឧទ្ធរណ៍នៅ សង្កាត់ Manhattan បាននិយាយថាលក្ខន្តិកៈនៃការកំណត់បានរារាំងលោកស្រី James ពីការប្តឹងជុំវិញប្រតិបត្តិការដែលបានកើតឡើងមុនថ្ងៃទី ១៣ ខែកក្កដា ឆ្នាំ ២០១៤ ឬថ្ងៃទី ៦ ខែកុម្ភៈ ឆ្នាំ ២០១៦អាស្រ័យលើចុងចោទ។តុលាការក៏បាននិយាយផងដែរថា ការទាមទារទាំងអស់ប្រឆាំងនឹងកូនស្រីច្បងរបស់លោក Trump គឺ លោកស្រី Ivanka Trump គួរតែត្រូវបានច្រានចោល ដោយសារតែរឿងហួសពេលវេលាយូរពេក។ ខ្លួនបានបញ្ជូនសំណុំរឿងនេះទៅចៅក្រមជំនុំជម្រះដើម្បីកំណត់ថាការទាមទារមួយណាគួរត្រូវបានទាត់ចោល។ លោកស្រី James បានចោទប្រកាន់លោក Donald Trump ពីបទកុហកធនាគារផ្ដល់ប្រាក់កម្ចី និងក្រុមអ្នកធានាពីឆ្នាំ ២០១១ ដល់ឆ្នាំ ២០២១ អំពីតម្លៃទ្រព្យសកម្មនៅអង្គការ Trump ឬ Trump Organization ក៏ដូចជាទ្រព្យសម្បត្តិសុទ្ធផ្ទាល់ខ្លួនរបស់លោក ដើម្បីទទួលបានលក្ខខណ្ឌល្អប្រសើរពីអ្នកធនាគារ និងក្រុមអ្នកធានា។ ដោយត្រូវបានដាក់កាលពីខែកញ្ញាឆ្នាំមុន បន្ទាប់ពីការស៊ើបអង្កេតរយៈពេល៣ឆ្នាំ បណ្តឹងរបស់លោកស្រី James ស្វែងរកការខូចខាតយ៉ាងហោចណាស់ ២៥០លានដុល្លារ និងដើម្បីបញ្ឈប់ Trumps កុំឲ្យដំណើរការអាជីវកម្មនៅញូវយ៉ក។ កូនប្រុសពេញវ័យរបស់លោក Trump គឺ Donald Jr. និង Eric ក៏ជាជនដែលត្រូវចោទផងដែរ៕

រលកកំដៅមិនស្រុតចុះ បានគ្របដណ្ដប់លើសហរដ្ឋអាមេរិកភាគខាងត្បូង ខណៈគុណភាពខ្យល់កាន់តែយ៉ាប់យ៉ឺនលើតំបន់ Midwest

អាមេរិក៖ រលកកំដៅដ៏អូសបន្លាយ បានបន្តគ្របដណ្ដប់នៅលើភាគខាងត្បូងសហរដ្ឋអាមេរិកកាលពីថ្ងៃអង្គារ ខណៈ សីតុណ្ហភាពខ្ពស់ដ៏គ្រោះថ្នាក់កើនឡើងលើសពី១០០ អង្សាហ្វារិនហៃ ស្មើរនឹង៣៨ អង្សាសេ និងសម្ពាធសំណើមធ្ងន់ធ្ងរបានកំពុងប៉ះពាល់ពាសពេញផ្នែកដ៏ធំនៃតំបន់នេះរហូតដល់ថ្ងៃឈប់សម្រាកចុងសប្តាហ៍។ ទន្ទឹមនឹងនេះ នៅទីក្រុង ឈីកាហ្គោ កុមារ មនុស្សចាស់ និងអ្នកដែលមានជំងឺផ្លូវដង្ហើមត្រូវបានណែនាំឲ្យស្នាក់នៅក្នុងផ្ទះសម្រាប់ហេតុផលខុសគ្នាទាំងស្រុង ដូចជា កង្វក់ខ្យល់ឣាកាសជាដើម។មន្ទីរផ្ដល់សេវាកម្មអាកាសធាតុជាតិបាននិយាយថា ពលរដ្ឋអាមេរិកប្រហែល ៦២លាននាក់នៅភាគកណ្តាលរដ្ឋអារីហ្សូណា ទូទាំងរដ្ឋតិចសាស់ និងតំបន់ ឌីប សោត (Deep South) និងចូលទៅក្នុងតំបន់គ្រប់គ្រងរបស់រដ្ឋផ្លរីដា ស្ថិតនៅក្រោមការឃ្លាំមើលកំដៅខ្លាំង ការព្រមាន និងការណែនាំដែលរំពឹងថានឹងមានរយៈពេលរហូតដល់ថ្ងៃទី៤ ខែកក្កដា។ មន្ទីរផ្ដល់សេវាកម្មអាកាសធាតុជាតិ បាននិយាយនៅក្នុងសេចក្តីណែនាំមួយថា វាអាចមានគ្រោះថ្នាក់ជាងព្រឹត្តិការណ៍កំដៅធម្មតាដោយសារតែរយៈពេលវែងនៃការកើនឡើងកំណត់ត្រាខ្ពស់បំផុតមិនធ្លាប់មាននៅពេលយប់ និងអំណានសន្ទស្សន៍កំដៅកើនឡើងនៅពេលថ្ងៃ ។ វាចាំបាច់ណាស់ក្នុងការចាត់វិធីធ្វើឲ្យត្រជាក់ និងទប់ស្កាត់ការប៉ះពាល់ពីកំដៅ។កាលពីថ្ងៃអង្គារ បណ្តាញអគ្គិសនីនៅរដ្ឋតិចសាស់ កំពុងដំណើរការក្នុងការប្រើប្រាស់ខ្ពស់បំផុត ដោយ"ការឃ្លាំមើលអាកាសធាតុ" ដែលមិនស្នើសុំឲ្យអ្នកស្រុកកាត់បន្ថយការប្រើប្រាស់ថាមពលទេ ប៉ុន្តែបង្កើនលទ្ធភាពផលិតកម្ម។ សូម្បីតែអ្នកជំនាញផ្នែកថាមពលមួយចំនួនដែលបានរិះគន់ការគ្រប់គ្រងថាមពលរបស់រដ្ឋតិចសាស់ ក៏ចាត់ទុកការដាច់ភ្លើងក្នុងរដូវក្តៅនេះមិនទំនងនោះទេ ដោយនិយាយថារដូវរងាមានហានិភ័យខ្លាំងជាង៕

ការប៉ះបោររបស់ក្រុមហ៊ុនទាហានស៊ីឈ្នួល វ៉េកណា បង្កហានីភ័យសម្រាប់ទំនាក់ទំនងដ៏ជ្រាលជ្រៅរបស់រុស្ស៊ីជាមួយចិន

រុស្ស៊ី៖ ខណៈព័ត៌មានបានផ្ទុះថា ទាហានរបស់ក្រុមហ៊ុនទាហានស៊ីឈ្នួលវ៉េកណា(Wagner) បានកំពុងហែក្បួនទៅកាន់ទីក្រុងមូស្គូ ក្នុងការបះបោររយៈពេលខ្លី ក្រុមធុរកិច្ចជនមួយចំនួនមកពីប្រទេសចិនភាគខាងត្បូង បានចាប់ផ្ដើមចេញបញ្ជាយ៉ាងប្រញាប់ប្រញាល់ឲ្យក្រុមហ៊ុននានាបញ្ឈប់ការដឹកជញ្ជូនទំនិញដែលបានត្រៀមទៅកាន់ប្រទេសរុស្ស៊ី ។ ខណៈការបះបោរ ដែលជាការសាកល្បងដ៏ធំបំផុតសម្រាប់ការដឹកនាំរបស់លោកប្រធានាធិបតីរុស្ស៊ី Vladimir Putin ចាប់តាំងពីការឈ្លានពានរបស់លោកចូលអ៊ុយក្រែន កាលពីថ្ងៃទី២៤ខែកុម្ភៈឆ្នាំ២០២២ ពេលនេះក្រុមហ៊ុននាំចេញមួយចំនួន បានចោទជាសំណួរអំពីការពឹងផ្អែកនាពេលអនាគតរបស់ខ្លួនលើសម្ព័ន្ធមិត្តដ៏ជិតស្និទ្ធិបំផុតរបស់ទីក្រុងប៉េកាំង។ លោក ស៊ិន មូហួយ (Shen Muhui) ប្រធានផ្នែកពាណិជ្ជកម្មសម្រាប់ក្រុមហ៊ុននៅក្នុងខេត្ត ហ្វូជៀន (Fujian) ភាគខាងត្បូងរបស់ប្រទេសចិនបានរំឮកពីផលវិបាកក្នុងចំណោមសមាជិករបស់ខ្លួនដែលនាំចេញគ្រឿងបន្លាស់រថយន្ត គ្រឿងចក្រ និងសម្លៀកបំពាក់ទៅកាន់ប្រទេសរុស្ស៊ីថា "យើងគិតថានឹងមានបញ្ហាធំ" ។ប្រទេសចិន បានព្យាយាមនិយាយសម្រាលព្រឹត្តិការដែលបានកើតឡើងកាលពីថ្ងៃចុងសប្ដាហ៍មុន និងបានបង្ហាញការគាំទ្រដល់ទីក្រុងមូស្គូ ដែលបានបញ្ជាក់ពីភាពជាដៃគូគ្មានព្រំដែនភ្លាមៗ មុនពេលរុស្ស៊ី វាយលុកចូលអ៊ុយក្រែន ជាអ្វីដែលរុស្ស៊ី ហៅថាជាប្រតិបត្តិការសឹកពិសេស។ ប៉ុន្តែកាលពីថ្ងៃចន្ទ មន្ត្រីជាន់ខ្ពស់មួយរូបរបស់សហរដ្ឋអាមេរិក បាននិយាយថា ការបះបោរកាលពីចុងសប្តាហ៍ បានធ្វើឲ្យការដឹកនាំរបស់ទីក្រុងប៉េកាំង មានភាពស្ងប់ស្ងាត់ ហើយអ្នកវិភាគមួយចំនួននៅក្នុង និងក្រៅប្រទេសចិន បានចាប់ផ្តើមចោទសួរថាតើទីក្រុងប៉េកាំងត្រូវការបន្ធូរបន្ថយទំនាក់ទំនងនយោបាយ និងសេដ្ឋកិច្ចរបស់ខ្លួនជាមួយទីក្រុងមូស្គូដែរឬទេ៕

សម្ដេចតេជោ ហ៊ុន សែន បញ្ជាឲ្យដាក់សំណាញ់មេឃបាញ់កម្ទេចយន្តហោះគ្មានមនុស្សបើក (Drone) ដែលធ្វើសកម្មភាពឈ្លានពានកម្ពុជា

ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា បានដាក់បញ្ជាដាច់ណាត់ឱ្យដាក់សំណាញ់មេឃបាញ់កម្ទេចចោលយន្តហោះគ្មានមនុស្សបើក (Drone) ដែលមកធ្វើសកម្មភាពឈ្លានពានលើដែនអធិបតេយ្យកម្ពុជា។សម្ដេចតេជោ បានចេញដាក់បញ្ជាបន្ថែមយ៉ាងដូច្នេះក្នុងឱកាសអញ្ជើញចុះជួបសំណេះសំណាលជាមួយកម្មករ-កម្មការិនីប្រមាណជិត ២ម៉ឺននាក់ មកពីរោងចក្រ សហគ្រាស ចំនួន១៧ ដែលកំពុងដំណើរការអាជីវកម្មក្នុងរាជធានីភ្នំពេញ ថ្ងៃទី២៨ ខែមិថុនា ឆ្នាំ២០២៣។សម្ដេចតេជោ ជឿជាក់ថា យន្តហោះគ្មានមនុស្សបើកដែលចូលមកឈ្លានពានប្រទេសកម្ពុជា គឺមកធ្វើការទំនាក់ទំនងជាមួយក្រុមភេរវករបាក់ទ័ពរត់ចេញពីវៀតណាមចូលមកដែនដីកម្ពុជា។ សម្តេចតេជោ បញ្ជាក់ថា បើអង្គភាពណាបាញ់ធ្លាក់ទ្រូននេះមួយគ្រឿងសម្ដចនឹងផ្ដល់រង្វាន់ ២០ ម៉ឺនដុល្លារ៕

ប្រសាសន៍សំខាន់ៗរបស់សម្តេចតេជោ ហ៊ុន សែន ក្នុងឱកាសអញ្ជើញចុះជួបកម្មករ-កម្មការិនីជិត ២ម៉ឺននាក់ជាបន្តទៀតនៅតំបន់ព្រៃស្ពឺ ខណ្ឌពោធិ៍សែនជ័យ

ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានបន្តអញ្ជើញចុះជួបសំណេះសំណាលជាមួយកម្មករនិយោជិតសរុប ១៨,៣១៣នាក់ នៅតំបន់ព្រៃស្ពឺ ខណ្ឌពោធិ៍សែនជ័យ រាជធានីភ្នំពេញ នៅព្រឹកថ្ងៃទី២៨ ខែមិថុនា ឆ្នាំ២០២៣នេះ។ប្រសាសន៍សំខាន់ៗរបស់សម្តេចតេជោ ហ៊ុន សែន ដែលមានខ្លឹមសារដូចខាងក្រោម៖សម្តេចតេជោ ហ៊ុន សែន បានប្រកាសអំពាវនាវសារជាថ្មី កុំឱ្យមានការ LIVE ជេរ បញ្ចោរ ដៀលត្មះ គ្នា តាមបណ្តាញសង្គមពេលមានជម្លោះក្នុងគ្រួសារ(ប្តី ប្រពន្ធ) គួរទុកកិត្តិយសសម្រាប់កូនៗ។សម្តេចតេជោ ហ៊ុន សែន បញ្ជាក់ថា សម្ដេចមានគម្រោងចុះជួបជាមួយកម្មករនិយោជិតតាំងពីឆ្នាំ២០២០ ប៉ុន្ដែដោយសារបញ្ហាកូវីដ-១៩ ទើបមានការពន្យារពេលដល់ពេលនេះ។សម្ដេចតេជោ ហ៊ុន សែន បញ្ជាក់ថា ជំនួបជាមួយបងប្អូនកម្មករនិយោជិត គឺចាត់ទុកជាវេទិការសាធារណៈមួយ ដើម្បីសួរសុខទុក្ខដល់បងប្អូនកម្មករកម្មការិនីផង និងមួយផ្នែកទៀត ដើម្បីពិនិត្យមើលលើតម្រូវការ និងបញ្ហាដែលត្រូវដោះស្រាយជូនដល់កម្មករនិយោជិតបន្ថែមទៀត។សម្តេចតេជោ ហ៊ុន សែន មានប្រសាសន៍ថា ការពិនិត្យអំពីអ្វីដែលរាជរដ្ឋាភិបាលសម្រេចនាពេលកន្លងទៅ គឺជាវឌ្ឍនភាពមួយដែលរាជរដ្ឋាភិបាល និងម្ចាស់រោងចក្រទាំងអស់បានអនុវត្តបានយ៉ាងល្អ។ ក្នុងនោះមានទាំងបញ្ហាតូច និងបញ្ហាធំ។សម្តេចតេជោ ហ៊ុន សែន បញ្ជាក់ថា ប្រទេសកម្ពុជា ត្រូវតែមានការពង្រឹងចំពោះការគោរពទំនៀមទម្លាប់ប្រពៃណីបុរាណខ្មែរឡើងវិញ ដែលចំណុចនេះ គឺជាផ្នែកមួយដ៏សំខាន់ក្នុងការពង្រឹងសីលធម៌ និងសុជីវធម៌យុវជនជំនាន់ក្រោយឱ្យចេះគោរពចាស់ទុំ កូនគោរព ឪពុកម្ដាយ។សម្តេចតេជោ ហ៊ុន សែន បានប្រកាសអរគុណដល់កម្មករ-កម្មការិនី ដែលបានអនុវត្តបានយ៉ាងល្អនូវវិធានការសុខាភិបាល និងការចាក់វ៉ាក់សាំងគ្រប់ៗគ្នា ធ្វើឱ្យកម្ពុជាអាចមានលទ្ធភាពគ្រប់គ្រងស្ថានការវិបត្តិកូវីដ-១៩ បានយ៉ាងល្អរហូតអាចបើកសង្គម សេដ្ឋកិច្ចឡើងវិញដល់បច្ចុប្បន្ននេះ។សម្តេចតេជោ ហ៊ុន សែន បានបញ្ជាក់ជាថ្មីម្តងទៀតថា ដំណើរចុះ ជួបបងប្អូនកម្មករនិយោជិតរបស់សម្តេច មិនមែនជាការជិះសេះមើលផ្កានោះទេ គឺដើម្បីស្វែងរកវឌ្ឍនភាព និងរកដំណោះស្រាយជូនដល់បងប្អូនកម្មករនិយោជិតដែលជួបបញ្ហា។សម្តេចតេជោ ហ៊ុន សែន បញ្ជាក់ថា រាជរដ្ឋាភិបាលបន្តដោះស្រាយបញ្ហាតទៅទៀត ជាពិសេសបញ្ហាដែលកើតមានឡើងចំពោះបងប្អូនកម្មករនិយោជិត។ រាជរដ្ឋាភិបាលបានធ្វើរួចហើយលើការដោះស្រាយបញ្ហា១០ចំណុច ក្នុងនោះមានដូចជា៖បញ្ហាស្រ្ដីមានផ្ទៃពោះ និងការដំឡើងប្រាក់បៀវត្សជូនបងប្អូកម្មករនិយោជិតប្រចាំឆ្នាំជាដើម។សម្តេចតេជោ ហ៊ុន សែន បន្តអំពាវនាវដល់ម្ចាស់ផ្ទះឈ្នួលទាំងឡាយ កុំដំឡើងថ្លៃចំពោះកម្មករនិយោជិត ខណៈនាពេលកន្លងមក មានម្ចាស់ផ្ទះជួលជាច្រើនអនុវត្តបានយ៉ាងល្អដោយមិនដំឡើងថ្លៃផ្ទះជួលចំពោះកម្មករកម្មការិនីឡើយ។សម្តេចតេជោ ហ៊ុន សែន បន្តអំពាវនាវដល់ម្ចាស់រោងចក្រ និងកម្មករនិយោជិត ត្រូវរួមគ្នាធ្វើយ៉ាងណាឱ្យរោងចក្រមួយក្លាយទៅជាសហគមន៍សុខសាន្តមួយ។ ការធ្វើបែបនេះបាន កម្មករនិយោជិត និងម្ចាស់រោងចក្រ ត្រូវធ្វើបែបណា កុំឱ្យមានគ្រឿងញៀន កុំឱ្យមានបងតូច បងធំ កុំឱ្យមានជម្លោះរវាងកម្មករនិយោជិត និងថៅកែរោងចក្រ។សម្តេចតេជោ ហ៊ុន សែន ជឿជាក់ថា នាពេលខាងមុខនេះសេដ្ឋកិច្ចកម្ពុជាលើវិស័យសេវាកម្ម នឹងមានកំណើនខ្លាំងជាងគេលើសវិស័យផ្សេងៗទៀត តាមរយៈកំណើនទេសចរ ខណៈបច្ចុប្បន្នសេដ្ឋកិច្ចវិស័យឧស្សាហកម្មមានការកើនឡើងខ្ពស់រហូតដល់ ៣៨%។សម្តេចតេជោ ហ៊ុន សែន បញ្ជាក់ថា រាជរដ្ឋាភិបាលកំពុងបន្តខិតខំធ្វើការកសាងហេដ្ឋារចនាសម្ព័ន្ធទាំងផ្នែករឹង និងទន់ ដើម្បីបម្រើដល់ការទាក់ទាញវិនិយោគមកកាន់ប្រទេសកម្ពុជា ខណៈបច្ចុប្បន្នកម្ពុជា មានតម្រូវការកម្លាំងពលកម្មក្នុង១ឆ្នាំជាង ៣០ ម៉ឺននាក់។សម្តេចតេជោ ហ៊ុន សែន បានផ្ដាំផ្ញើដល់កម្មករនិយោជិតកុំលង់ទៅតាមការញុះញង់របស់ក្រុមជនអាក្រក់នៅក្រៅប្រទេស ខណៈកាលពីឆ្នាំ២០១៣ ក្រុមជនអាក្រក់នេះហើយ ជាមេខ្លោងដឹកនាំកម្មករធ្វើបាតុកម្មខុសច្បាប់។សម្តេចតេជោ ហ៊ុន សែន ប្រកាសជាថ្មីម្តងទៀតថា អ្នកទោសណា ក៏ដោយឲ្យ តែមានការអន្តរាគមន៍ពីបរទេស នឹងគ្មានការបន្ធូរបន្ថយ និងលើកលែងទោសនោះទេ ដើម្បីលុបបំបាត់ការជ្រៀតជ្រែករបស់បរទេសលើផ្ទៃក្នុងកម្ពុជា។សម្តេចតេជោ ហ៊ុន សែន បញ្ជាក់ថា គ្រប់បរទេសដែលមកវិនិយោគនៅកម្ពុជា គឺផ្ដោតសំខាន់លើធនធានចំនួន២ គឺធនធានមនុស្ស និងអគ្គិសនី ដូច្នេះចាប់ពីខែសីហា ឆ្នាំ២០២៣នេះ តទៅ រាជរដ្ឋាភិបាលនឹងចាប់ផ្ដើមធ្វើការបណ្ដុះបណ្ដាលកម្លាំងពលកម្មជំនាញជាយុវជនចំនួន ១,៥លាននាក់។សម្តេចតេជោ ហ៊ុន សែន ប្រកាសផ្តល់រង្វាន់ចំនួន២០ម៉ឺនដុល្លារអាមេរិក សម្រាប់អង្គភាពណាដែលបានបាញ់ យន្តហោះគ្មានមនុស្សបើក(ដ្រូន) ដែលហោះចូលនៅក្នុងទឹកដីកម្ពុជាក្នុងបំណងទុច្ចរិត។សម្តេចតេជោ បានដាក់បញ្ជាដាច់ណាត់ឱ្យដាក់សំណាញ់មេឃ និងបាញ់កម្ទេចយន្តហោះគ្មានមនុស្សបើក (ដ្រូន) ដែលមកធ្វើសកម្មភាពឈ្លានពានកម្ពុជា។សម្តេចតេជោ ហ៊ុន សែន ជឿជាក់ថា យន្តហោះគ្មានមនុស្សបើកដែលចូលមកឈ្លានពានប្រទេសកម្ពុជា គឺមកធ្វើការទំនាក់ទំនងជាមួយក្រុមភេរវករបាក់ទ័ពរត់ចេញពីវៀតណាមចូលមកដែនដីកម្ពុជា។សម្តេចតេជោ បានដាក់ការសង្ស័យយន្តហោះគ្មានមនុស្សបើក (ដ្រូន) ដែលឈ្លានពានចូលទឹកដីកម្ពុជានេះ គឺអាចចេញមកពីនាវា ឬចេញពីប្រទេសមួយ។សម្តេចតេជោ ហ៊ុន សែន ព្រមានជាថ្មីចំពោះជនណាក៏ដោយ ដែលមានជាប់ពាក់ព័ន្ធជាមួយជនក្បត់ជាតិ ៣ ជំនាន់នៅក្រៅប្រទេស គឺត្រូវតែមានវិធានការទាំងអស់។សម្តេចតេជោ ហ៊ុន សែន អំពាវនាវដល់ប្រទេសនានា ចំពោះការបង្ហោះយន្តហោះគ្មានមនុស្សបើកចូលមកដែនដីកម្ពុជា គឺជាបំពានដែនដីរបស់កម្ពុជា ហើយករណីនេះមិនមែនជារឿងសាមញ្ញនោះទេ គឺជារឿងសុខសន្ដិភាពរបស់ប្រទេសកម្ពុជា។

សម្តេចតេជោ ហ៊ុន សែន អញ្ជើញចុះជួបកម្មករ-កម្មការិនីជិត ២ម៉ឺននាក់ ជាបន្តទៀត នៅតំបន់ព្រៃស្ពឺ ខណ្ឌពោធិ៍សែនជ័យ

ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានបន្តអញ្ជើញចុះជួបសំណេះសំណាលជាមួយកម្មករនិយោជិតសរុប ១៨,៣១៣នាក់ នៅតំបន់ព្រៃស្ពឺ ខណ្ឌពោធិ៍សែនជ័យ រាជធានីភ្នំពេញ នៅព្រឹកថ្ងៃទី២៨ ខែមិថុនា ឆ្នាំ២០២៣នេះ។ឯកឧត្តម អ៊ិត សំហេង រដ្ឋមន្ត្រីរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឱ្យ ដឹងថា កន្លងទៅសម្ដេចតេជោនាយករដ្ឋមន្តី ធ្លាប់បានអញ្ជើញជួបសំណេះសំណាលជាមួយបងប្អូនកម្មករនិយោជិត នៅខណ្ឌពោធិ៍សែនជ័យ រាជធានីភ្នំពេញនេះ ចំនួន១៦ដងរួចមកហើយ ក្នុងនោះកាលពីឆ្នាំ២០១៧ ចំនួន ៧ដង ដែលមានកម្មករនិយោជិតចូលរួមចំនួន១០ម៉ឺន ៦ពាន់នាក់ មកពីរោងចក្រ សហគ្រាស ចំនួន ៨៨, កាលពីឆ្នាំ២០១៨ ចំនួន ៧ដង ដែលមានកម្មករនិយោជិតចូលរួមចំនួន១០ម៉ឺន ៧ពាន់នាក់ មកពីរោងចក្រ សហគ្រាសចំនួន១០០ និងក្នុងឆ្នាំ២០២៣ នេះ ចំនួន ២លើក គឺ កាលពីថ្ងៃអង្គារ ទី១៣ ខែមិថុនា ឆ្នាំ២០២៣ និងថ្ងៃពុធ ទី១៤ ខែមិថុនា ដែលមានកម្មករនិយោជិតចូលរួមចំនួន ៣ម៉ឺន ៦ពាន់នាក់ មកពីរោងចក្រ សហគ្រាស ចំនួន៣៣។ថ្ងៃនេះ ជាលើកទី១៧ ដែល សម្តេចតេជោនាយករដ្ឋមន្ត្រី បានមកជួបសំណេះសំណាលជាមួយ បងប្អូនកម្មករនិយោជិតសរុបចំនួន១៨ ៣១៣នាក់ មកពីរោងចក្រ សហគ្រាស ចំនួន១៧ ក្នុងនោះ ខណ្ឌពោធិ៍ សែនជ័យ ចំនួន១០, ខណ្ឌមានជ័យចំនួន ៤ និងខណ្ឌកំបូលចំនួន៣។រោងចក្រ សហគ្រាសចំនួន១៧ ជាប្រភេទរោងចក្រកាត់ដេរទាំងអស់។ផលិតផលរបស់រោងចក្រទាំងនេះ គឺនាំចេញទៅទីផ្សារអន្តរជាតិ ដូចជាសហគមន៍អឺរ៉ុប សហរដ្ឋអាម៉េរិក ប្រទេសចិន ប្រទេសល្យស្ត្រាលី។ល។ នៅរាជធានីភ្នំពេញ ឆ្នាំ២០២៣ មានរោងចក្រ សហគ្រាស ចំនួន ៩៣១៤ មានកម្មករនិយោជិតប្រមាណជាង ៦៦ម៉ឺននាក់ ដែលមានប្រាក់ឈ្នួលមធ្យមសរុបប្រមាណ ២ពាន់លានដុល្លារអាម៉េរិកក្នុងមួយឆ្នាំ ក្នុងនោះរោងចក សហគ្រាសវិស័យកាត់ដេរ ចំនួន ៧២៧. មានកម្មករនិយោជិតសរុបជិត ៣៣ម៉ឺន៩ពាន់នាក់ ដែលមានប្រាក់ ឈ្នួលមធ្យមសរុបប្រមាណ ១ពាន់ ៥០លានដុល្លារអាមេរិកក្នុងមួយឆ្នាំ ហើយរាជធានីភ្នំពេញជាប៉ូលសេដ្ឋកិច្ចទីមួយ និងជាតំបន់ដែលមានការអភិវឌ្ឍរោងចក្រ សហគ្រាស ច្រើនជាងគេ៕

នយោបាយ និង ការអភិវឌ្ឍន៍

UN ពិភាក្សាអំពីការតាំងទីលំនៅរបស់អ៊ីស្រាអែលនិងអំពើហិង្សានៅ West Bank

សម្ដេចតេជោ៖ បើការបង្ក្រាបគ្រឿងញៀនបានច្រើនមិនមែនជាសញ្ញាថាជោគជ័យ នៃការទប់ស្កាត់បទល្មើសនេះទេ

ប្រមុខNATO៖ សង្គ្រាមរបស់លោកPutin នៅអ៊ុយក្រែន បានធ្វើឱ្យមានការបែកចែកកាន់តែជ្រៅនៅក្នុងប្រទេសរុស្ស៊ី

សម្តេចតេជោប្រកាសផ្តល់រង្វាន់២០ម៉ឺនដុល្លារ ដល់អង្គភាពណាបាញ់យន្តហោះគ្មានមនុស្សបើក ហោះចូលទឹកដីកម្ពុជា

តុលាការក្រុងញូវយ៉កបង្រួបសំណុំរឿងក្លែងបន្លំរបស់Trump ដោយច្រានចោលលោកស្រី Ivanka Trump ជាចុងចោទ

រលកកំដៅមិនស្រុតចុះ បានគ្របដណ្ដប់លើសហរដ្ឋអាមេរិកភាគខាងត្បូង ខណៈគុណភាពខ្យល់កាន់តែយ៉ាប់យ៉ឺនលើតំបន់ Midwest

ការប៉ះបោររបស់ក្រុមហ៊ុនទាហានស៊ីឈ្នួល វ៉េកណា បង្កហានីភ័យសម្រាប់ទំនាក់ទំនងដ៏ជ្រាលជ្រៅរបស់រុស្ស៊ីជាមួយចិន

សម្តេចតេជោ ហ៊ុន សែន អញ្ជើញចុះជួបកម្មករ-កម្មការិនីជិត ២ម៉ឺននាក់ ជាបន្តទៀត នៅតំបន់ព្រៃស្ពឺ ខណ្ឌពោធិ៍សែនជ័យ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

UN ពិភាក្សាអំពីការតាំងទីលំនៅរបស់អ៊ីស្រាអែលនិងអំពើហិង្សានៅ West Bank

សម្ដេចតេជោ៖ បើការបង្ក្រាបគ្រឿងញៀនបានច្រើនមិនមែនជាសញ្ញាថាជោគជ័យ នៃការទប់ស្កាត់បទល្មើសនេះទេ

ប្រមុខNATO៖ សង្គ្រាមរបស់លោកPutin នៅអ៊ុយក្រែន បានធ្វើឱ្យមានការបែកចែកកាន់តែជ្រៅនៅក្នុងប្រទេសរុស្ស៊ី

សម្តេចតេជោប្រកាសផ្តល់រង្វាន់២០ម៉ឺនដុល្លារ ដល់អង្គភាពណាបាញ់យន្តហោះគ្មានមនុស្សបើក ហោះចូលទឹកដីកម្ពុជា

តុលាការក្រុងញូវយ៉កបង្រួបសំណុំរឿងក្លែងបន្លំរបស់Trump ដោយច្រានចោលលោកស្រី Ivanka Trump ជាចុងចោទ

រលកកំដៅមិនស្រុតចុះ បានគ្របដណ្ដប់លើសហរដ្ឋអាមេរិកភាគខាងត្បូង ខណៈគុណភាពខ្យល់កាន់តែយ៉ាប់យ៉ឺនលើតំបន់ Midwest

ការប៉ះបោររបស់ក្រុមហ៊ុនទាហានស៊ីឈ្នួល វ៉េកណា បង្កហានីភ័យសម្រាប់ទំនាក់ទំនងដ៏ជ្រាលជ្រៅរបស់រុស្ស៊ីជាមួយចិន

សម្តេចតេជោ ហ៊ុន សែន អញ្ជើញចុះជួបកម្មករ-កម្មការិនីជិត ២ម៉ឺននាក់ ជាបន្តទៀត នៅតំបន់ព្រៃស្ពឺ ខណ្ឌពោធិ៍សែនជ័យ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍