នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេច​តេជោចាត់ទុកពាក្យស្លោក «បរាជ័យក្នុងសាលាប្រសើរជាងបរាជ័យក្នុងជីវិត» របស់សម្ដេច​ធិបតី​មានតម្លៃ​មិនសាបសូន្យ
សម្ដេចធិបតីអញ្ជើញចុះត្រួតពិនិត្យ និងសួរសុខទុក្ខពលរដ្ឋរងគ្រោះដោយទឹកជំនន់នៅបន្ទាយមានជ័យ
សម្តេចតេជោ ហ៊ុន សែន អនុញ្ញាតឱ្យ លោកជំទាវ រ៉េឡែន ស្យ៉ាល់ តាហ្គាឡ័រ លៀវហ្វាឡានី (Raylene Siale Tagaloa LIUFALANI) ឯកអគ្គរដ្ឋទូតតែងតាំងថ្មី នៃប្រទេសនូវែលសេឡង់ ប្រចាំនៅកម្ពុជាចូលជួប និងប្រគល់សារតាំង
សម្តេចតេជោ ហ៊ុន សែន អនុញ្ញាតឱ្យ ឯកឧត្តម ទ្រីសម៉ាន់ អ៉ីហ្គោរ៍ (Driesmans Igor) ឯកអគ្គរាជទូតសហភាពអឺរ៉ុបប្រចាំកម្ពុជា និងជាប្រេសិតពិសេស EU ប្រចាំនៅមីយ៉ាន់ម៉ា ចូលជួបសម្ដែងការគួរសម

នយោបាយ​ និង ការអភិវឌ្ឍន៍

ជប៉ុននឹងបញ្ជូនអាជ្ញាកណ្តាល៤០នាក់ មកជួយកម្ពុជា ក្នុងព្រឹត្តិការណ៍ស៊ីហ្គេម

2023/02/23 05:27:24 pm        354
Facebook Telegram Linkin
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានបង្ហាញការរីករាយ និងអរគុណការដែលភាគីជប៉ុន បានសន្យាថា នឹងបញ្ជូនអាជ្ញាកណ្តាល៤០នាក់​មកជួយកម្ពុជា ក្នុងព្រឹត្តិការណ៍ស៊ីហ្គេម រួមនឹងកិច្ចការជួយដល់កុមារកំព្រាជាបន្តទៀត។នៅក្នុងជំនួប សំដែងការគួរសមជាមួយសម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅវិមានសន្តិភាព នាព្រឹកថ្ងៃទី២៣កុម្ភៈនេះ លោក តាកេ ហ្សឹសឺកិ (TAKEI Shunsuke )រដ្ឋលេខាធិការ​ក្រសួងការបរទេសជប៉ុននិង លោកស្រី មីណាមីណុ យូកូ (MINAMINO Yuko ) ម្ចាស់បទចម្រៀង”ឥន្ទធនូ​សម្រាប់ថ្ងៃស្អែក” ជាឯកអគ្គរដ្ឋទូតសុច្ឆន្ទៈសម្រាប់ខួប៧០ឆ្នាំមិត្តភាព​រវាងកម្ពុជា-ជប៉ុន បានគោរពជំរាបជូនសម្តេចថា ជប៉ុននឹងបញ្ជូនអាជ្ញាកណ្តាលចំនួន ៤០នាក់​មកជួយកម្ពុជាក្នុងព្រឹត្តិការណ៍ស៊ីហ្គេម រួមនឹងកិច្ចការជួយដល់កុមារកំព្រាផងដែរ។សូមជម្រាបជូនថា លោកស្រី មីណាមីណុ ជាតារាសម្ដែងនិងជាតារាចម្រៀងដ៏ល្បីល្បាញម្នាក់​នៅ​ប្រទេសជប៉ុនតាំងពីឆ្នាំ ១៩៨៥ រហូតមកដល់បច្ចុប្បន្ន។ជាការឆ្លើយតប សម្ដេចតេជោ ក៏បានសំដែងនូវសេចក្តី រីករាយជាមួយនឹងទំនាក់ទំនងកិច្ច​សហប្រតិបត្តិការរវាង​ប្រទេសទាំងពីរនិងបានថ្លែងអំណរគុណដល់ភាគីជប៉ុន​ដែលបានលើក​ទឹកចិត្តឲ្យអ្នកវិនិយោគ មកវិនិយោគនៅកម្ពុជា បញ្ជូនអាជ្ញាកណ្ដាលមកពិនិត្យការប្រកួតកីឡា sea games និងជំនួយដទៃទៀត។សម្ដេចក៏បានថ្លែងអំណរគុណជូនចំពោះលោកស្រីមីណាមីណុ ដែលបាននិពន្ធ និងសម្ដែង​បទ​ចម្រៀងឥន្ធនូរសម្រាប់ថ្ងៃស្អែកដែល​ឆ្លុះបញ្ចាំង​អំពីតថភាពរបស់កម្ពុជាពីអតីតកាល។លោកស្រីធ្លាប់បានអញ្ជើញមកប្រទេសកម្ពុជាចំនួន ០២ លើក តាមរយៈកម្មវិធី «ទូរទស្សន៍២៤ម៉ោង» នៅឆ្នាំ ១៩៨៩ (មុនពេលជប៉ុនបើកស្ថានទូតឡើងវិញ) និងកម្មវិធី «មេឃមួយទៀត» នៅឆ្នាំ ២០១៣។ លោកស្រី និងក្រុមការងារបានបង្កើតបទចំរៀង «ឥន្ទធនូសម្រាប់ថ្ងៃស្អែក» ដើម្បីបញ្ចូនសារ និងចាក់ បញ្ចាំងនៅក្នុងមហោស្រពប្រចាំឆ្នាំ ជប៉ុន-កម្ពុជាគីហ្សូណា ឆ្នាំ២០២២ ដើម្បីត្រៀមសម្រាប់អបអរ សាទរខួបអនុស្សាវរីយ៍លើកទី ៧០ នៃការបង្កើតទំនាក់ទំនងការទូតកម្ពុជា-ជប៉ុន នៅឆ្នាំ ២០២៣។ លោកស្រីជាបុគ្គល ដែលមានទំនាក់ទំនងជិតស្និទ្ធជាមួយកម្ពុជា និងមានបំណងធ្វើអ្វីមួយពិសេស ដើម្បីលើកកម្ពស់ទំនាក់ទំនងកម្ពុជា-ជប៉ុន និង ហេតុនេះ លោកស្រីបាននិពន្ធបទចំរៀង «ឥន្ទធនូ សម្រាប់ថ្ងៃស្អែក នេះឡើង ដោយផ្អែកលើការចងចាំរបស់ខ្លួនជាមួយនឹងកុមារី ដែលជាក្មេង កំព្រាមួយក្រុម នៅពេលលោកស្រីបានអញ្ជើញមកកម្ពុជា ជាលើកតំបូងនៅឆ្នាំ ១៩៨៩៕

សម្តេចពញាចក្រី ហេង សំរិន អនុញ្ញាតឱ្យគណៈប្រតិភូក្រុមសភាសាធារណរដ្ឋសហព័ន្ធអាល្លឺម៉ង់ ទទួលបន្ទុកអាស៊ាន ចូលជួបសម្តែងការគួរសម

2023/02/22 06:01:49 pm        439
Facebook Telegram Linkin
ភ្នំពេញ៖ សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា បានអនុញ្ញាតឱ្យលោកជំទាវ ហ្កាប្រីអែល កាតស្មារ៉ែក (Mrs. Gabriele KATZMAREK) ប្រធានគណៈប្រតិភូក្រុមសភាសាធារណរដ្ឋសហព័ន្ធអាល្លឺម៉ង់ ទទួលបន្ទុកអាស៊ាន ចូលជួបសម្តែងការគួរសម នាព្រឹកថ្ងៃទី២២ ខែកុម្ភៈ ឆ្នាំ២០២៣ នៅវិមានរដ្ឋសភា។

យុវជនអង្គការសង្គមស៊ីវិលថ្កោលទោស ទណ្ឌិត សម រង្ស៊ី ដែលប្រមាថយ៉ាងធ្ងន់ធ្ងរដល់ព្រះមហាក្សត្រ

2023/02/22 05:51:56 pm        888
Facebook Telegram Linkin
ភ្នំពេញ៖ ក្រុមយុវជនអង្គការសង្គមស៊ីវិល នៅថ្ងៃទី២២ ខែកុម្ភៈ ឆ្នាំ២០២៣នេះ ចេញលិចិតថ្កោលទោសចំពោះទណ្ឌិត សម រង្ស៊ី ប្រើពាក្យប្រមាថយ៉ាងធ្ងន់ធ្ងរដល់ព្រះចេស្តា ព្រះករុណាព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់ ម្ដងហើយម្ដងទៀត។ក្រុមយុវជនអង្គការសង្គមស៊ីវិល បានលើកឡើងថា ពួកគេទាំងអស់គ្នាជាយុវជនអង្គការសង្គមស៊ីវិល​ដែលតែងតែរិះគន់រាជរដ្ឋាភិបាលដើម្បីរួមចំណែកអភិវឌ្ឍន៍សង្គមជាតិ ពេលនេះមិនអាចឈរ​អោបដៃមើលទណ្ឌិត សម រង្ស៊ី ប្រើពាក្យប្រមាថយ៉ាងធ្ងន់ធ្ងរដល់ព្រះចេស្តា ព្រះករុណាព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់ ម្ដងហើយម្ដងទៀត បាននោះទេ។ ក្រុមយុវជនសង្គមស៊ីវិល បញ្ជាក់ថា ជាក់ស្ដែងការពោលពាក្យថា «ក្បត់ជាតិ និងគ្មានមនសិកា​ស្នេហាជាតិ»​ទៅកាន់ព្រះមហាក្សត្រ ក្នុងអត្ថបទដែលសរសេរដោយទណ្ឌិត សម រង្ស៊ី គឺជា​ពាក្យពេចន៍​ប្រមាថយ៉ាងធ្ងន់ធ្ងរ​ដែលធ្វើឱ្យប្រជានុរាស្ត្រ​គ្រប់រូបទទួលការអាម៉ាស់យ៉ាងធ្ងន់ធ្ងរមិន​អាច​ទទួលយកបាន។ ក្រុមយុវជនបន្ថែមថាសម្រាប់ទណ្ឌិត សម រង្ស៊ី ដែលពោលពាក្យប្រមាថអង្គព្រះមហាក្សត្រខ្មែរ គឺមិនមែន លើកទី១ ទី២ ប៉ុន្តែជាទម្លាប់របស់គាត់បាត់ទៅហើយ។ ការបណ្តុះមនោគមវិជ្ជា​នយោបាយ​បោកបញ្ឆោតរបស់គាត់នេះ គឺមិនខុសពីការបំបែកបំបាក់ជាតិសាសន៍ខ្លួនឯង និងបង្ហាញដល់អន្តរជាតិឱ្យមើលងាយប្រជាជាតិខ្មែរក្នុងន័យអវិជ្ជមាននោះឡើយ។ក្រុមយុវជនបន្ថែមថា អង្គព្រះមហាក្សត្រកំពុងគង់ជាម្លប់ត្រជាក់ត្រជុំដល់​ប្រជានុរាស្ត្រគ្រប់​មជ្ឈដ្ឋាន និង បំពេញព្រះរាជកិច្ចយ៉ាង​ឧត្ដុងឧត្ដម ក្នុងការអំពាវនាវដល់ប្រជានុរាស្ត្រខ្មែរឱ្យចូលរួមបំពេញ​កាតព្វកិច្ចបោះឆ្នោតក្នុងការសម្រេចជោគវាសនារបស់ប្រទេសជាតិខ្លួន មិនគួរណាទណ្ឌិត សម រង្ស៊ី មកប្រើពាក្យប្រមាថផ្ទុយពីព្រះរាជតម្រិះដ៏ត្រឹមត្រូវរបស់ទ្រង់ដូចនេះសោះ។ក្រុមយុវជន បានអំពាវនាវដល់ប្រជាជនខ្មែរគ្រប់មជ្ឈដ្ឋាន ជាពិសេស សិស្ស និស្សិត បញ្ញាវន្ត និងមន្ត្រីរាជការចូលរួមការពារ តម្លៃជាតិសាសន៍ខ្មែរ ហើយស្នើសា្ថប័នពាក់ព័ន្ធមេត្តាចាត់វិធាន​ការតាមផ្លូវច្បាប់ទៅលើទណ្ឌិត សម រង្ស៊ី មកដាក់ទោសតាមច្បាប់នៃព្រះរាជាណាចក្រកម្ពុជា ដើម្បីទុកជាមេរៀនសម្រាប់អ្នកនយោបាយនានាកុំឱ្យយកខ្លួនបៀត និងយកគំរូតាមទណ្ឌិត សម រង្ស៊ី៕អត្ថបទ៖ វ៉ន ដារ៉ា

អ្នកនាំពាក្យ៖ កម្ពុជាត្រូវការសារព័ត៌មាន ដើម្បីបង្រួបបង្រួមជាតិ មិនត្រូវការសារព័ត៌មាន បំបែកបំបាក់ជាតិ

2023/02/21 11:50:19 pm        702
Facebook Telegram Linkin
ភ្នំពេញ៖ ឯកឧត្តម ផៃ ស៊ីផាន ប្រធានអង្គភាពអ្នកនាំពាក្យរាជរដ្ឋាភិបាល បានថ្លែងថា កម្ពុជា ត្រូវការសារព័ត៌មាន ដែលផ្សព្វផ្សាយព័ត៌មាន ដើម្បីបង្រួបបង្រួមជាតិ មិនត្រូវការជាដាច់ខាត នូវសារព័ត៌មាន​ ដែលផ្សព្វផ្សាយ ក្នុងគោលបំណងអាក្រក់ បំបែកបំបាក់ជាតិ ។នៅក្នុងសន្និសីទសារព័ត៌មានស្ដីពី ភាពជោគជ័យក្នុងរយៈពេល ៥ឆ្នាំកន្លងមក របស់រដ្ឋ បាលខេត្តកោះកុង នាថ្ងៃទី២១ ខែកុម្ភៈ ឆ្នាំ២០៣ ឯកឧត្តម ផៃ ស៊ីផាន មានប្រសាសន៍ថា ការបាត់នូវវិទ្យុវីអូឌី មិនបានធ្វើឲ្យសេរីភាពសារព័ត៌មាន នៅក្នុងប្រទេសកម្ពុជាស្លាប់នោះទេ ប៉ុន្តែផ្ទុយទៅវិញ ​បានពង្រឹងនូវវិជ្ជាជីវៈ ​សីលធម៌នៃសារព័ត៌មាននៅកម្ពុជា ដោយរាជរដ្ឋាភិបាល​បានផ្ដល់ និងពង្រឹងនូវវេទិកា ​នៃការផ្ដល់ព័ត៌មាន តាមរយៈការឆ្លងឆ្លើយមន្ត្រីរាជរដ្ឋាភិបាល ។ ឯកឧត្តមបន្តថា​ គោលនយោបាយរបស់រាជរដ្ឋាភិបាលបច្ចុប្បន្ន ​បានឆ្លើយតប និងការពង្រឹង​នូវលំហសេរីភាព ប្រជាធិបតេយ្យ ​ហើយគោលនយោបាយរបស់កម្ពុជា គឺខិតខំពង្រឹងរក្សា​នូវស្ថិរភាពនយោបាយ ​ដើម្បីការពារសន្តិភាព​ ហើយថ្នាក់ក្រោមជាតិ​ ត្រូវអនុវត្តលម្អបន្ថែម ចំនួន​២ចំណុច ទី១. ការផ្ដល់សេវាកម្មឲ្យដល់ពលរដ្ឋ ​និងទី២. ការអភិវឌ្ឍនូវគោលនយោបាយវិមជ្ឈការ និងវិសហមជ្ឈការ ។គួរបញ្ជាក់ថា ជាបន្តបន្ទាប់ តាមរយៈបណ្ដាញសង្គមហ្វេសប៊ុក​ និងក្នុងពិធីផ្សេងៗ ​សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ​បានថ្លែងថា ​ការបិទវិទ្យុវីអូឌី គឺ​សេរីភាពសារព័ត៌មាននៅកម្ពុជា ពុំស្លាប់នោះទេ ​ប៉ុន្តែផ្ទុយទៅវិញ​ គឺដើម្បីពង្រឹងវិជ្ជាជីវៈ និង​ក្រមសីលធម៌សារព័ត៌មាន​ ហើយអំពាវនាវកុំឲ្យបរទេសលូក​ដៃក្នុងរឿងនេះ ព្រោះជារឿង​ផ្ទៃក្នុងរបស់កម្ពុជា ៕ អត្ថបទ បាន សុខរិទ្ធិ

ក្រសួងស្ថាប័ននានាថ្កោលទោសជនក្បត់ជាតិ សម រង្ស៊ី បន្ទាប់ពីប្រមាថអង្គព្រះមហាក្សត្រសារជាថ្មី

2023/02/21 07:59:15 pm        695
Facebook Telegram Linkin
ភ្នំពេញ៖ ក្រសួង ស្ថាប័ននានា របស់រាជរដ្ឋាភិបាល រួមទាំងកងកម្លាំងប្រដាប់អាវុធគ្រប់ប្រភេទ បានប្រកាសថ្កោលទោសយ៉ាងដាច់អហង្ការចំពោះជនក្បត់ជាតិ៣ជំនាន់ សម រង្ស៉ី ដែលបាន​ប្រមាថជាថ្មីម្តងទៀតដល់ អង្គព្រះមហាក្សត្រ ជាទីគោរពសក្ការៈដ៏ខ្ពង់ខ្ពស់បំផុត​របស់​ប្រជារាស្ត្រខ្មែរទូទាំងប្រទេស។តាមរយៈសេចក្តីថ្លែងការណ៍របស់ថ្នាក់ដឹកនាំក្រសួង ស្ថាប័ន និងអង្គភាពនានា ដែលបានចេញ នៅថ្ងៃទី២១ ខែកុម្ភៈ នេះ បានលើកឡើងថា ​ការបង្ហោះតាមបណ្តាញសង្គមរបស់ ទណ្ឌិតក្បត់ជាតិ​៣ជំនាន់នេះ កាលពីថ្ងៃទី២០ ខែកុម្ភៈ ឆ្នាំ២០២៣ ដោយចោទប្រកាន់​យ៉ាង​គឃ្លើនលើ ព្រះអម្ចាស់ជីវិតតម្កល់ លើត្បូង គឺជាអំពើល្មើសច្បាប់ដ៏ធ្ងន់ធ្ងរបំផុតដែលមិនអាចលើកលែងបាន ដោយ​មាត្រា៧ នៃរដ្ឋធម្មនុញ្ញ នៃព្រះរាជាណាចក្រកម្ពុជា បានចែងថា «អង្គព្រះមហាក្សត្រ មិនអាចនរណារំលោភបំពានបានឡើយ» និងបទល្មើសព្រហ្មទណ្ឌ ដែលមានចែង និងផ្តន្ទាទោស តាមបទប្បញ្ញត្តិនៃក្រមព្រហ្មទណ្ឌ នៃព្រះរាជាណាចក្រកម្ពុជា ។ជាមួយគ្នានោះដែរ ថ្នាក់ដឹកនាំក្រសួង ស្ថាប័ន និងអង្គភាពនានាទាំងនោះ ក៏សូមសំណូមពរដល់ អាជ្ញាធរ​មានសមត្ថកិច្ច មេត្តាចាត់វិធានការតាមផ្លូវច្បាប់ឱ្យបានម៉ឺងម៉ាត់​ ចំពោះទណ្ឌិត​អន្ធពាល សម រង្ស៉ី ដែលនៅតែបន្តប្រព្រឹត្តអំពើអសីលធម៌ និងបំពានច្បាប់ជាធរមាន យ៉ាងគឃ្លើននេះ ។ក្នុងនាមថ្នាក់ដឹកនាំ ក្រសួងស្ថាប័ន ក៏សូមប្តេជ្ញាគាំទ្រ ​និងដង្ហែរតាមព្រះរាជតម្រិះដ៏ខ្ពង់ខ្ពស់បំផុត នៃអង្គព្រះមហាក្សត្រ ព្រះប្រមុខរដ្ឋ ជាទីគោរពសក្ការៈ និងស្រឡាញ់ ​ដ៏ជ្រាលជ្រៅបំផុត ចំពោះទឹក​ព្រះទ័យស្នេហាជាតិដ៏ល្អបរិសុទ្ធ និង ព្រះរាជតួនាទីដ៏ត្រឹមត្រូវតាមរដ្ឋធម្មនុញ្ញ នៃព្រះរាជាណាចក្រកម្ពុជា។ ពួកគេក៏សូមប្រកាសគាំទ្រយ៉ាង ​ពេញទំហឹងចំពោះយុទ្ធនាការ ដែលប្រកាសដោយសម្តេចអគ្គ​មហា​សេនា​បតីតេជោ ហ៊ុន សែន ក្នុងការកម្ចាត់ចោលនយោបាយជ្រុល និយមរបស់ជនក្បត់ជាតិ​បី​ជំនាន់​ឲ្យអស់ពីកម្ពុជាដើម្បីរក្សា ​សន្តិភាព ស្ថិរ ​ភាពសង្គម និងសេចក្តីសុខសាន្តរបស់ប្រជាពលរដ្ឋ​ខ្មែរផងដែរ ៕អត្ថបទ៖ បាន ចក់

ប្រមុខការទូតកម្ពុជា នឹងអញ្ជើញបំពេញទស្សនកិច្ចផ្លូវការនៅថៃក្នុងសប្តាហ៍នេះ

2023/02/21 05:56:30 pm        632
Facebook Telegram Linkin
 ភ្នំពេញ៖ ឯកឧត្តម ប្រាក់ សុខុន ឧបនាយករដ្ឋមន្រ្តី រដ្ឋមន្រ្តី ការបរទេស និងសហប្រតិបត្តិការអន្តរជាតិ នឹងអញ្ជើញបំពេញទស្សនកិច្ចផ្លូវការនៅប្រទេសថៃ នៅថ្ងៃទី២៣-២៤ ខែកុម្ភៈ ឆ្នាំ២០២៣ តបតាមការអញ្ជើញរបស់ ឯកឧត្តម ដន ប្រាម៉ាត់វីណៃ ឧបនាយករដ្ឋមន្រ្តី រដ្ឋមន្រ្តី ការបរទេសនៃព្រះរាជាណាចក្រថៃ។ឯកឧត្តមឧបនាយករដ្ឋមន្រ្តីទាំងពីរ នឹងមានជំនួបទ្វេភាគីដើម្បីពិភាក្សាអំពីទំនាក់ទំនងទ្វេភាគីដ៏ល្អប្រសើរ និងកិច្ចសហប្រតិបត្តិការកំពុងលូតលាស់លើគ្រប់វិស័យដូចជា៖ វិស័យពាណិជ្ជកម្ម វិនិយោគ ទេសចរណ៍ ការងារ ការតភ្ជាប់ អប់រំ សុខាភិបាល និងវប្បធម៌។ល។

សម្តេចតេជោ ហ៊ុន សែន វាយតម្លៃលទ្ធផលដ៏ប្រសើរដែល ក្រុមប្រឹក្សាជាតិកម្ពុជាដើម្បីស្រ្តីសម្រេចបានក្នុងឆ្នាំ២០២២

2023/02/21 04:32:15 pm        734
Facebook Telegram Linkin
ភ្នំពេញ៖ នៅវិមានសន្តិភាព នាព្រឹកថ្ងៃទី ២១ ខែកុម្ភៈ ឆ្នាំ២០២៣នេះ សម្តេចតេជោហ៊ុន សែន នាយករដ្ឋមន្ត្រីកម្ពុជា និងជាអនុប្រធានកិត្តិយសនៃក្រុមប្រឹក្សាជាតិកម្ពុជាដើម្បីស្ត្រី បានអញ្ជើញជាអធិបតីក្នុងកិច្ចប្រជុំបូកសរុបលទ្ធផលការងារឆ្នាំ ២០២២ របស់ក្រុមប្រឹក្សាជាតិកម្ពុជាដើម្បីស្រ្តី ដែលកិច្ចប្រជុំនេះមានវត្តមានស្ត្រីជាតំណាងមកពីបណ្តាស្ថាប័ន អង្គភាពជាង៦០០នាក់។សម្តេចបានថ្លែងកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់ក្រុមប្រឹក្សាជាតិកម្ពុជាដើម្បីស្ត្រី ដែលបានរួមចំណែកយ៉ាងសកម្មក្នុងការកសាង និងអភិវឌ្ឍសង្គមជាតិ។ សម្តេចតេជោ ហ៊ុន សែន បានបន្តថា បច្ចុប្បន្ន ស្ត្រី បានចូលរួមចំណែកក្នុងកិច្ចការងារជាច្រើនវិស័យ។លោកជំទាវកិត្តិបណ្ឌិត អុឹង កន្ថាផាវី ប្រធានក្រុមប្រឹក្សាជាតិកម្ពុជាដើម្បីស្ត្រី និងជារដ្ឋមន្ត្រីក្រសួងកិច្ចការនារីបានគោរពរាយការណ៍ ដោយសង្ខេបអំពីលទ្ធផលការងារសម្រេចបានក្នុងឆ្នាំ២០២២ របស់ក្រសួង ស្ថាប័ន អាជ្ញាធរគ្រប់លំដាប់ថ្នាក់ ក្នុងនោះប្រតិភូក្រុមប្រឹក្សាជាតិកម្ពុជាដើម្បីស្ត្រីចំនួន ១២ រូប បានចូលក្រាបបង្គំគាល់ថ្វាយព្រះពរជ័យក្នុងឱកាស ព្រះរាជពិធីចម្រើនព្រះជន្មគម្រប់ ៨៦ ព្រះវស្សា យាងចូល ៨៧ព្រះវស្សា សម្តេចព្រះមហាក្សតី ព្រះវររាជមាតាជាតិខ្មែរ ព្រះប្រធានកិត្តិយសនៃក្រុមប្រឹក្សាជាតិកម្ពុជាដើម្បីស្ត្រី និងទូលថ្វាយរបាយ ការណ៍លទ្ធផលការងារឆ្នាំ២០២១ និងផែនការសកម្មភាពឆ្នាំ២០២២ និងអនុសាសន៍ ១២ ចំណុច របស់ សម្ដេចតេជោនាយករដ្ឋមន្ត្រី ដែលបានដាក់ចេញឱ្យអនុវត្តឆ្នាំ២០២២ ដោយព្រះអង្គបានកោតសរសើរចំពោះលទ្ធផលដែលសម្រេចបានក្រោមការដឹកនាំដ៏ឈ្លាសវៃរបស់ សម្ដេច តេជោនាយករដ្ឋមន្ត្រី និងជាអនុប្រធានកិត្តិយស កស.ក.ជ. ដែលបានឧបត្ថម្ភគាំទ្រដ៏រឹងមាំក្នុងការ ជំរុញសកម្មភាពការងាររបស់ ក.ជ.ក.ស ឱ្យទទួលសមិទ្ធផលជាបន្តបន្ទាប់ ក្នុងការលើកកម្ពស់សិទ្ធិ សេរីភាព សេចក្តីថ្លៃថ្នូរ តួនាទីរបស់ស្ត្រី និងមានជីវភាពរស់នៅកាន់តែប្រសើរ។របាយការណ៍ក៏បានបង្ហាញអំពីលទ្ធផលដែលសម្រេចជាច្រើនទៀតនៅលើវិស័យផ្សេងៗ ជាពិសេសការអភិវឌ្ឍសមត្ថភាពស្ត្រីជាថ្នាក់ដឹកនាំនៅថ្នាក់ជាតិ និងថ្នាក់ក្រោមជាតិ ការអភិវឌ្ឍសមត្ថភាពដល់ស្ត្រីជាថ្នាក់ដឹកនាំ និងមន្ត្រីរាជការជានារី នៅថ្នាក់ជាតិ ត្រូវបានយកចិត្តទុកដាក់ខ្ពស់ដោយថ្នាក់ដឹកនាំស្ថាប័ន ហើយក្រសួងកិច្ចការនារី បានរៀបចំកម្មវិធីអភិវឌ្ឍន៍សមត្ថភាពមន្ត្រីកិច្ចការនារីក្នុងការអនុវត្តការងារ ការស្វែងរកការគាំទ្រមតិ ការបញ្ជ្រាបយេនឌ័រ និងបរិយាបន្ន សីលធម៌សង្គម និងភាពជាអ្នកដឹកនាំ និងដាក់បញ្ចូលទៅក្នុងកម្មវិធីវិនិយោគ ឃុំ សង្កាត់ និងសមាហរណកម្មផែនការឃុំ សង្កាត់ ថ្នាក់ ក្រុង ស្រុក ខណ្ឌ។លោកជំទាវបន្តថា៖នៅឆ្នាំ២០២២ មន្ត្រីរាជការស្ត្រី មានចំនួន ៦៨២២ នាក់ នៃមន្ត្រីរាជការសរុប ២៨៥៤២នាក់ បានទទួលការពង្រឹងសមត្ថភាពលើចំណេះដឹង និងជំនាញផ្សេងៗ ទាំងនៅក្នុងប្រទេស និងក្រៅប្រទេស។ក្នុងវិស័យសេដ្ឋកិច្ចនៅកម្ពុជា ស្ត្រីបានក្លាយជាកម្លាំងចលករដែលបានរួមចំណែកជំរុញកំណើនសេដ្ឋកិច្ច ជាតិ និងការអភិវឌ្ឍសង្គម។ កម្លាំងពលកម្មស្រ្តីមានប្រមាណ ៨៤ % ហើយស្រ្តីប្រមាណ ៦១% ជាម្ចាស់អាជីកម្ម ឬ អ្នកធ្វើធុរកិច្ច ដែលជាអត្រាខ្ពស់ក្នុងតំបន់។នៅឆ្នាំ២០២២ ស្ត្រីជាម្ចាស់ក្រុមហ៊ុន មានកើនឡើងចន្លោះពី ២០%ទៅ ២២% និងស្ត្រីជាម្ចាស់សហគ្រាសកើនពីចន្លោះពី ៣០% ទៅ ៣២%។ទោះជាយ៉ាងណា លោកជំទាវបញ្ជាក់ថា៖ទន្ទឹមនឹងលទ្ធផលសម្រេចបាននេះ នៅមានបញ្ហាប្រឈម និងកង្វល់មួយចំនួនដែលត្រូវបន្តរួមគ្នាដោះស្រាយ តាមរយះយន្តការបញ្ជ្រាបយេនឌ័រនៅថ្នាក់ជាតិ និងក្រោមជាតិ កិច្ចការពារសិទ្ធិស្ត្រី តម្រូវឱ្យមានការអភិវឌ្ឍធនធានមនុស្ស និងការធ្វើទំនើបកម្មស្ថាប័ន ពង្រីកវិសាល ភាពការងារ ដើម្បីឆ្លើយតបទៅការវិវត្តន៍ថ្មីៗ និងបញ្ហារបស់ស្ត្រី និងក្មេងស្រី មានជាអាទិ៍ បទពិសោធន៍ ចំណេះដឹង ជំនាញ ទីផ្សារការងារ និងមុខរបរ និងសុវត្ថិភាពពាក់ព័ន្ធបច្ចេកវិទ្យាឌីជីថលដើម។លោកជំទាវបានថ្លែងអំណរគុណដ៏ជ្រាលជ្រៅជូនចំពោះ សម្តេចតេជោនាយករដ្ឋមន្ត្រីនិងជាអនុប្រធានកិត្តិយសនៃក្រុមប្រឹក្សាជាតិកម្ពុជាដើម្បីស្ត្រី ដែលបានផ្តល់អាទិភាពខ្ពស់ក្នុងការជំរុញ និងលើកកម្ពស់សមភាពយេនឌ័រ និងស្ថានភាពស្រ្តីលើគ្រប់វិស័យ និងគ្រប់កម្រិត ក្នុងការអនុវត្តច្បាប់ គោលនយោបាយ និងវិធានការនានា តាមរយៈយន្តការថ្នាក់ជាតិ និងថ្នាក់ក្រោមជាតិ ជាពិសេស សម្តេចតេជោនាយករដ្ឋមន្ត្រី ដែលជានិច្ចកាលតែងផ្តល់នូវការគាំទ្រយ៉ាងពេញទំហឹងទាំងស្មារតី និងថវិកាដល់ដំណើរការសកម្មភាពរបស់ក្រុមប្រឹក្សាជាតិកម្ពុជាដើម្បីស្ត្រី ឱ្យសម្រេចបាននូវវឌ្ឍនភាពជាទីមោទនៈ ក្រោមសុខសន្តិភាពជាតិ។សូមជំរាបជូនថា«ក្រុមប្រឹក្សាជាតិកម្ពុជាដើម្បីស្ត្រី»បានបង្កើតឡើងតាំងពីឆ្នាំ២០០៦មកហើយតែងតែបានបើកកិច្ចប្រជុំជាទៀងទាត់រៀងរាល់មួយឆ្នាំម្តង ៕(ដោយ៖ មុត សុទ្ធ)

អ្នកនាំពាក្យ គ.ជ.ប៖ បញ្ជីឈ្មោះបោះឆ្នោតត្រូវបានរៀបចំដោយសុក្រឹត ខណៈអ្នកមានឈ្មោះក្នុងបញ្ជី ជាង៩លាននាក់

2023/02/20 09:00:31 pm        849
Facebook Telegram Linkin
ភ្នំពេញ៖ ឯកឧត្តម ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានអះអាងថា បញ្ជីឈ្មោះបោះឆ្នោតសម្រាប់ប្រើប្រាស់ក្នុងការបោះឆ្នោតជ្រើសតាំងតំណាងរាស្រ្ត ត្រូវបានរៀបចំឡើង ដោយមានភាពសុក្រឹត ខណៈប្រជាពលរដ្ឋមានឈ្មោះក្នុងបញ្ជីជាង ៩លាននាក់។ មុនមួយថ្ងៃ នៃការប្រកាសសុពលភាពលើបញ្ជីឈ្មោះបោះឆ្នោតឆ្នាំ២០២២ ឯកឧត្តម ហង្ស ពុទ្ធា អ្នកនាំពាក្យ គ.ជ.ប បានប្រាប់BTVថា ស្អែកនេះ គ.ជ.ប នឹងប្រកាស​សុពលភាពលើ​បញ្ជី​ឈ្មោះបោះឆ្នោត ឆ្នាំ២០២២ ដែលនឹងត្រូវប្រើប្រាស់សម្រាប់ការបោះឆ្នោតជ្រើសតាំង​តំណាង​រាស្ត្រនី​តិកាលទី៧ ឆ្នាំ២០ ២៣ ។ គ.ជ.ប បានបញ្ចប់ដោយរលូន ដោយមានកិច្ចសហការជាមួយភាគីពាក់ព័ន្ធ ដើម្បីអនុម័តបទបញ្ជា និងនីតិវិធីលើការពិនិត្យបញ្ជីឈ្មោះបោះឆ្នោត ​និងការចុះឈ្មោះបោះឆ្នោតឆ្នាំ២០២២។ ឯកឧត្តម បានបន្តថា បន្ទាប់ពីមានការចូលរួមពីភាគីពាក់ព័ន្ធទៅលើការរៀបចំបញ្ជីឈ្មោះបោះ ឆ្នោត​ឆ្នាំ២០២២ គិតមកដល់ពេលនេះ ​ប្រជាពលរដ្ឋមានឈ្មោះក្នុងបញ្ជីឈ្មោះផ្លូវការ​ ដែលនឹងត្រូវចូលរួម បោះឆ្នោតជ្រើសតាំងតំណាងរាស្ត្រ នីតិកាលទី៧ នាពេលខាងមុខ ចំនួនជាង៩លាន២សែននាក់។ឯកឧត្តម ហង្ស ពុទ្ធា បានបញ្ជាក់ទៀតថា ​ដើម្បីផ្ទៀងផ្ទាត់ពីភាពត្រឹមត្រូវ ​នៃឈ្មោះ និងទិន្នន័យ របស់​ប្រជាពលរដ្ឋនីមួយៗ ​ភាគីពាក់ព័ន្ធបានយល់ព្រមនឹងទទួលយក ក៏ដូចជាតែងតែអញ្ជើញ​ចូលរួម​តាម ​ដានរាល់កិច្ចប្រជុំជាមួយ គ.ជ.ប​ រហូតដល់ដំណាក់កាលបិទផ្សាយ​បញ្ជីបោះឆ្នោតដំបូង ដោយ​កន្លងមក នេះ ក៏មានករណីប្តឹងតវ៉ា ​និងជំទាស់ ​ត្រូវបានដោះស្រាយបញ្ចប់ និងទទួលយក​ពីភាគីពាក់ព័ន្ធផងដែរ ៕អត្ថបទ៖ សេក ឧត្តម

ខេត្តស្វាយរៀង ត្រូវបានប្រកាសជាខេត្តអស់មីនទី៨ ក្រោមគម្រោងសម្តេចតេជោសម្រាប់សកម្មភាពមីន ក្រោមមូលបទ “ផ្តល់ដីសុវត្ថិភាព បង្កើតស្នាមញញឹម”

2023/02/20 06:21:54 pm        263
Facebook Telegram Linkin
ស្វាយរៀង ៖ នៅថ្ងៃទី២០ ខែកុម្ភៈ ឆ្នាំ២០២៣ ខេត្តស្វាយរៀង ត្រូវបានប្រកាសជាខេត្តអស់មីន ក្រោមអធិបតីភាព លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី រដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច តំណាងដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី និងមានបានទទួលការគាំទ្រពី គម្រោងសម្តេចតេជោសម្រាប់សកម្មភាពមីន ក្រោមមូលបទ “ផ្តល់ដីសុវត្ថិភាព បង្កើតស្នាមញញឹម”។ ឯកឧត្តមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានមានប្រសាសន៍ថា បន្ទាប់ពីទទួលការអនុញ្ញាតដ៏ខ្ពង់ខ្ពស់ពី សម្តេចតេជោនាយករដ្ឋមន្រ្តី កាលថ្ងៃទី០១ ខែសីហា ឆ្នាំ២០២២ អាជ្ញាធរមីន បានដាក់ពង្រាយកម្លាំងបោសសម្អាតមីនរបស់អង្គភាពស៊ីម៉ាក់ ធ្វើការបោសសម្អាតមីនចុងក្រោយដែលបានដឹងនៅខេត្តស្វាយរៀង ក្នុងទំហំផ្ទៃដីសរុបជាង ១២.៣៨៦.៩២៧ ម៉ែត្រក្រឡា ស្មើនឹង ១៣៩ ចម្ការមីន និងបានឈានដល់ការប្រកាសជាខេត្តអស់មីនទី៨។ឯកឧត្តមបន្តទៀតថា ទោះបីខេត្តស្វាយរៀង ត្រូវបានប្រកាសជាខេត្តមីនក៏ពិតមែន ប៉ុន្តែខេត្តស្វាយរៀង នៅបន្តរងការគំរាមដោយសារគ្រាប់បែកចង្កោម និងយុទ្ធភ័ណ្ឌមិនទាន់ផ្ទុះដទៃទៀត ក្នុងទំហំផ្ទៃដីសង្ស័យប្រមាណជាង ១០៩ គីឡូម៉ែត្រក្រឡា ស្មើនឹង ៧៧១ ចម្ការគ្រាប់ ទៀត ស្ថិតនៅពាសពេញខេត្ត។ឯកឧត្តមទេសរដ្ឋមន្រ្តី បានលើកឡើងថា ថ្ងៃនេះ ជាថ្ងៃប្រវត្តិសាស្រ្តដែលប្រជាជនខេត្តស្វាយរៀងទាំងមូល បានទទួលនូវសេរីភាពរួចចាកផុតពីគម្រាមកំហែងដោយសារមីន ហើយកម្ពុជា មុននឹងឈានដល់ថ្ងៃនេះ យើងទាំងអស់គ្នា ត្រូវគោរពដឹងគុណ កត្តញ្ញូតាធម៌ និងចងចាំជានិច្ចចំពោះស្នាដៃជាប្រវត្តិសាស្រ្ត និងវីរភាពដ៏ឧត្តុង្គឧត្តមរបស់ សម្តេចតេជោ ជារដ្ឋបុរស បិតាសន្តិភាព និងជាស្ថាបនិកនយោបាយ ឈ្នះ ឈ្នះ ក្នុងនោះក៏មានការចូលរួមផងដែរ ពីលោកជំទាវកិត្តិសង្គហបណ្ឌិត ម៉ែន សំអន ដែលជាវីរៈនារីដ៏ឆ្នើមរបស់កម្ពុជាយើង។ នយោបាយ ឈ្នះ ឈ្នះ និងការរក្សាបាននូវសុខសន្តិភាព បានធ្វើជាមូលដ្ឋានគន្លឹះដ៏សំខាន់សម្រាប់ប្រតិបត្តិករបោសសម្អាតមីនទាំងអស់ មានលទ្ធភាពចូលដល់គ្រប់ទីកន្លែង នៃទឹកដីកម្ពុជា ដោយគ្មានការភ័យខ្លាច។ យើងទាំងអស់គ្នា ត្រូវមានសុទិដ្ឋិនិយម មានក្តីសង្ឃឹម និងត្រូវសម្លឹងមើលទៅមុខជានិច្ច ដោយបន្តឈរឱបយកពន្លឺក្រោមម្លប់សន្តិភាព។ក្នុងនាមរាជរដ្ឋាភិបាលកម្ពុជា ឯកឧត្តមទេសរដ្ឋមន្រ្តី បានថ្លែងអំណរគុណ និងវាយតម្លៃខ្ពស់ចំពោះម្ចាស់ជំនួយ ប្រទេសជាមិត្តដ៏ឆ្នើមរបស់យើង និងសប្បុរសជន ដែលបានចូលរួមជាមួយរាជរដ្ឋាភិបាលកម្ពុជា ក្នុងការជួយឧបត្ថម្ភគាំទ្រដល់ការងារសកម្មភាពមីនមនុស្សធម៌ រយៈពេល ៣០ ឆ្នាំ មកនេះ។ យើងទាំងអស់ក៏មិនអាចបំភ្លេចបានដែរ ចំពោះវីរភាពដ៏អង់អាចក្លាហានរបស់ប្រតិបត្តិករបោសសម្អាតមីនជាតិ និងអន្តរជាតិ ក៏ដូចជាអង្គការស្ម័គ្រចិត្តមួយចំនួនទៀត ជាពិសេសវីរបុរស-វីរនារីដោះមីនយើង ដែលបានបំពេញការងារក្រោមពន្លឺថ្ងៃយ៉ាងក្តៅ និងទាំងប្រថុយប្រថានអាយុជីវិត ក្នុងការជួយសង្រ្គោះជីវិត និងរំដោះផ្ទៃដីជូនប្រជាពលរដ្ឋ សម្រាប់កសាងភូមិដ្ឋាន ធ្វើស្រែចំការ និងកសាងហេដ្ឋារចនាសម្ព័ន្ធសាធារណៈនានា។ក្នុងឱកាសនោះ ឯកឧត្តម ទេសរដ្ឋមន្រ្តី បានថ្លែងអំណរគុណជូនចំពោះ ឯកឧត្តម ម៉ែន វិបុល អភិបាលនៃគណៈអភិបាលខេត្តស្វាយរៀង និងអាជ្ញាធរគ្រប់លំដាប់ថ្នាក់ ដែលបានផ្តល់នូវកិច្ចសហការយ៉ាងល្អប្រសើរ ក្នុងការរៀបចំព្រឹត្តិការណ៍ដ៏មានសារៈសំខាន់នេះ ក៏ដូចជាសម្របសម្រួលដល់ការងារសកម្មភាពមីនក្នុងភូមិសាស្រ្តខេត្តស្វាយរៀង។សូមបញ្ជាក់ថា គិតត្រឹមឆ្នាំ២០២២ ផ្ទៃដីមានមីន និងសំណល់ជាតិផ្ទុះពីសង្រ្គាមក្នុងខេត្តស្វាយរៀង ចំនួន ៤១ គីឡូម៉ែត្រក្រឡា ស្មើនឹង ៤១៩ ចម្ការមីន/គ្រាប់ បានបោសសម្អាតរួច ដោយរកឃើញ និងបានកំទេចចោលមីនប្រឆាំងមនុស្សចំនួន ៣៥៦៩ គ្រាប់ មីនប្រឆាំងរថក្រោះចំនួន ១៣២ គ្រាប់ និងសំណល់ជាតិផ្ទុះផ្សេងទៀតចំនួន ៧១៨៤៣ គ្រាប់៕

សម្តេចតេជោ៖ អាចលើកលែងបានដល់អ្នកដើរតាម សម រង្ស៊ី តែមិនលើកលែងឱ្យ សម រង្ស៊ី ជាដាច់ខាត

2023/02/20 06:17:33 pm        261
Facebook Telegram Linkin
ភ្នំពេញ៖ ក្នុងឱកាសអញ្ជើញជាអធិបតីក្នុងពិធីប្រគល់វិញ្ញាបនបត្រ និងសញ្ញាបត្រ ជូនដល់សិស្សថ្នាក់វិជ្ជាជីវៈ និងនិស្សិតសាកលវិទ្យាល័យធនធានមនុស្ស នៅមជ្ឈមណ្ឌល​ពិព័រណ៍ពាណិជ្ជកម្មជ្រោយចង្វារ នាព្រឹកថ្ងៃទី២០កុម្ភៈនេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានលើកពីបញ្ហានយោបាយដោយថា ចាប់ពីពេលនេះតទៅមិនអនុញ្ញាត ឱ្យអ្នកណាប្រមាថ និង​លាបពណ៌​​មកលើគណបក្សប្រជាជនដោយមិនតបតវិញនោះទេ។សម្តេចតេជោ បានរំលឹកពីការដែលអ្នកនិយាយវាយប្រហារមកលើសម្តេចទាំង​ពេលកន្លងមក និង​បច្ចុប្បន្ន ជាពិសេសការវាយប្រហារបំភ្លៃការពិតទៅលើទាក់ទំនាក់ទំនង​ដ៏ល្អរវាងសម្តេច និង​ប្រធានាធិបតិបារាំង ដែលបានធ្វើការជាមួយគ្នាយ៉ាង​ជិតស្និទ្ធទាំងកិច្ចការទ្វេភាគី បញ្ហាតំបន់ និងអន្តរជាតិដែលសម្តេចមិនអាចនិយាយចេញអស់ព្រោះជារឿងអាថ៌កំបាំង។ទោះជាយ៉ាងណាក៏ដោយសម្តេចថា ចាប់ពីពេលនេះតទៅសម្តេចផ្តាំតកូន តចៅមិនអត់ឱនមេក្លោង ជនក្បត់ជាតិ សម រង្ស៊ី ។គួរបញ្ជាក់ថា ការដែលសម្តេចតេជោ ហ៊ុន សែន បានរំលឹកពីបញ្ហាដោយសារក្រុមអ្នកមាន​ចរិត​ប្រឆាំង​ផ្កាប់មុខតែងតែបបំភ្លៃប្រឌិតព័ត៌មាន ​ឬវិភាគវាយ​បរិហារ មកលើសម្តេច និង​ក្រុមគ្រួសារតាម​មហិច្ឆតា​ចិញ្ចឹម​ចិត្ដ​ចង់ផ្តួលរំលំសម្តេច និងរាជរដ្ឋាភិបាលកម្ពុជា៕

បណ្ដាញសង្គម

ព័ត៌មានថ្មីៗ

ក្រុមការងារសមាគមកាយឫទ្ធិនារីកម្ពុជា និងក្រុមការងារអាហារូបករណ៍ អ.ម.ត សហការគ្នាវគ្គតម្រង់ទិសស្ដីពី «ការប្រើប្រាស់ប្រព័ន្ធឌីជីថល អ.ម.ត» ដល់បេក្ខជនអាហារូបករណ៍ អ.ម.ត
10/05/2026 02:10 PM
Facebook Telegram Linkin
យុវជននៅខេត្ដសៀមរាបជាច្រើន ទៅទទួលពាក្យចូលរួមបំពេញកាតព្វកិច្ចយោធា
10/05/2026 02:10 PM
Facebook Telegram Linkin
ទេសចរអន្តរជាតិពេញចិត្តខ្លាំងចំពោះការចូលទស្សនា និងទទួលយក​បទ​ពិសោធន៍​ការ​ធ្វើបុណ្យ​​កាន់​​បិ​ណ្ឌតាមវត្តអារ៉ាម
10/05/2026 02:10 PM
Facebook Telegram Linkin
សម្តេចរដ្ឋសភាធិបតី ឃួន សុដារី អញ្ជើញដឹកនាំប្រជុំត្រៀមចូលរួម AIPA លើកទី៤៧ នៅប្រទេសហ្វីលីពីន ឱ្យទទួលបានជោគជ័យ នាំផលប្រយោជន៍ជូនប្រជាពលរដ្ឋនិងប្រទេសជាតិ
10/05/2026 02:10 PM
Facebook Telegram Linkin
យុវជនកាន់តែក្លាហានក្នុងការចូលបំពេញកាតព្វកិច្ចយោធា និងប្តេជ្ញា​ដាច់​ខាត​ការពារ​បូរណ​ភាព​ទឹកដី​ពី​សត្រូវ​ឈ្លានពាន
10/05/2026 01:10 PM
Facebook Telegram Linkin
កម្ពុជាបញ្ចប់បេសកកម្មកីឡាអាស៊ី ដោយឈ្នះមេដាយ ៤គ្រឿង ខណៈចិន ឈរលេខ១ និងម្ចាស់ផ្ទះជប៉ុន ឈរលេខ២
10/05/2026 12:10 PM
Facebook Telegram Linkin
មេដឹកនាំជនជាតិដើមស៊ែរប៊ីរស់នៅបូស្នីជាប់បម្រាម លោក Dodik ប្រកាសពីជ័យជម្នះរបស់គណបក្សក្នុងការបោះឆ្នោត
10/05/2026 12:10 PM
Facebook Telegram Linkin
ការនាំចេញប្រេងឆៅពីមជ្ឈិមបូព៌ាកើនឡើងលើសកម្រិតមុនមានសង្គ្រាម ប៉ុន្តែការវាយប្រហារនាវាដឹកប្រេងក៏កើនឡើងដែរ
10/05/2026 12:10 PM
Facebook Telegram Linkin
មន្ត្រីក្រសួងសុខាភិបាល និងក្រុមគ្រូពេទ្យតាមមន្ទីរពេទ្យថ្នាក់ជាតិចូលរួមធ្វើជំរឿនមន្ត្រីរាជការ
10/05/2026 12:10 PM
Facebook Telegram Linkin
អាមេរិកនឹងបញ្ជូនកងកម្លាំងបន្ថែមទៅអ៊ីស្រាអែលត្រៀមទប់ភាពតានតឹងអាចកើនឡើង ខណៈប្រទេសទាំងពីរជិតបោះឆ្នោត
10/05/2026 12:10 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.