នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចធិបតី អំពាវនាវដល់ជនរួមជាតិជឿទុកចិត្តលើរាជរដ្ឋាភិបាល​ដែលកំពុង​ធ្វើកិច្ច​ការងារ​យ៉ាង​សកម្ម​ស្វែង​រក​ដំណោះស្រាយបញ្ចប់បញ្ហាព្រំដែនកម្ពុជា-ថៃ ឱ្យបានឆាប់រហ័ស
សម្ដេចធិបតីផ្ដល់អនុសាសន៍៧ចំណុច ដល់ក្រសួង-ស្ថាប័នពាក់ព័ន្ធឱ្យយកចិត្តទុកដាក់ក្នុងឱកាសទិវាអក្ខរកម្មអន្តរជាតិ ៨ កញ្ញា ២០២៥
សម្ដេចធិបតី៖ រាជរដ្ឋាភិបាលប្តេជ្ញាចិត្តយ៉ាងមុតមាំលើកកម្ពស់ការងារអក្ខរកម្ម និងបំពាក់បំប៉ន ជំនាញ និងឱកាសសិក្សាពេញមួយជីវិត ជាពិសេសជំនាញឌីជីថល
ប្រជាពលរដ្ឋត្រេកអរនឹងសមិទ្ធផលអាកាសយានដ្ឋានថ្មីដែលត្រៀមបើកដំណើរការ

នយោបាយ​ និង ការអភិវឌ្ឍន៍

កម្ពុជាចូលរួមកិច្ចប្រជុំរដ្ឋមន្ត្រីវប្បធម៌G20 នៅទីក្រុងBorobudur, Yogyakarta, Indonesia

2022/09/14 08:21:32 am        511
Facebook Telegram Linkin
ភ្នំពេញ៖ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ នៅថ្ងៃទី១៣ ខែកញ្ញា ឆ្នាំ២០២២ ក្នុងនាមជាប្រធានប្តូរវេនអាស៊ានផ្នែកវប្បធម៌ និងសិល្បៈ បានអញ្ជើញចូលរួមក្នុងកិច្ចប្រជុំរដ្ឋមន្ត្រីវប្បធម៌ G20 ក្រោមប្រធានបទស្ដីពី “វប្បធម៌ដើម្បីការរស់នៅប្រកបដោយចីរភាព” (Culture for Sustainable Living) នៅទីក្រុងវប្បធម៌Borobudur នៃប្រទេសឥណ្ឌូនេស៊ី។កិច្ចប្រជុំនេះ មានការអញ្ជើញចូលរួមពីបណ្តារដ្ឋមន្ត្រីវប្បធម៌នៃបណ្ដាប្រទេសG20, តំណាងសហគមន៍អាស៊ាន (កម្ពុជា), តំណាង EU, UNESCO និងបណ្តាប្រទេសដៃគូសន្ទនាមួយចំនួនទៀត។កិច្ចប្រជុំពិភាក្សាបានផ្តោតលើចំណុចសំខាន់ៗមួយចំនួន ដូចតទៅ៖• បទអន្តរាគមន៍នៃគោលនយោបាយអទិភាពក្នុងវិស័យវប្បធម៌នៃបណ្តាប្រទេសG20 ក៏ដូចជាការស្តារឡើងវិញនូវវិស័យវប្បធម៌បន្ទាប់ពីជំងឺរាតត្បាតសកលកូវីត-១៩ បម្រែបម្រួលអាកាសធាតុ ផលវិបាកនៃសង្គ្រាម និងវិបតិ្តសកលមួយចំនួនទៀតដែលប៉ះពាល់ដល់វិស័យវប្បធម៌• បទអន្តរាគមន៍រដ្ឋមន្ត្រីវប្បធម៌នៃបណ្តាប្រទេសG20 និងប្រទេសនានា បានសង្កត់ធ្ងន់ទៅលើតួនាទីវប្បធម៌ក្នុងការរួមចំណែកពង្រឹងដល់ការរស់នៅប្រកបដោយចីរភាព (Culture for Sustainable Living)  • កិច្ចពិភាក្សាលើគំនិតផ្តួចផ្តើមរបស់ឥណ្ឌូនេស៊ី ស្តីពីការបង្កើតមូលនិធិសម្រាប់ស្តារវិស័យសិល្បៈ និងវប្បធម៌ សកល(Global Arts and Culture Recovery Fund) ដែលបង្ហាញពីសារសំខាន់ក្នុងការរៀបចំមូលនិធិអន្តរជាតិមួយដើម្បីជួយអន្តរាគមន៍លើវិស័យវប្បធម៌ដល់ប្រទេសនានាក្រោយវិបត្តិសកល។ នៅក្នុងបទអន្តរាគមន៍ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានគាំទ្រដល់សកម្មភាពនានាទាក់ទងទៅនឹងវិស័យវប្បធម៌ ដែលបានលើកឡើងក្នុងបទអន្តរាគមន៍នៃសមាជិកនៃកិច្ចប្រជុំដែលឆ្លើយតបយ៉ាងសមស្របទៅនឹងសភាពការណ៌បច្ចុប្បន្ន ពិសេសគឺការអំពាវនាវឱ្យពង្រឹងកិច្ចខិតខំប្រឹងប្រែង ដើម្បីបញ្ជ្រាបវប្បធម៌នៅក្នុងសកម្មភាពអភិវឌ្ឍន៍ប្រកបដោយចីរភាព ការលើកទឹកចិត្តឱ្យមានការវិនិយោគប្រកបដោយចីរភាព ដែលផ្តល់តម្លៃនិងរួមចំណែកក្នុងកិច្ចការពារធនធានវប្បធម៌ ដល់អ្នកបម្រើការក្នុងវិស័យវប្បធម៌ សិល្បៈ និងបេតិកភណ្ឌ ព្រមទាំងលើកទឹកចិត្តដល់ការផ្លាស់ប្តូររបៀបរស់នៅថ្មីក្នុងសង្គម ដោយឈរលើមូលដ្ឋាននៃវិញ្ញាតិ្តវប្បធម៌ សមធម៌ និងបរិយាប័ន។ ស្មារតីនេះ ក៏ស្របគ្នាទៅនឹងខ្លឹមសារសំខាន់នៃសេចក្តីថ្លែងការណ៍សៀមរាបទីក្រុងវប្បធម៌អាស៊ាន (Siem Reap – ASEAN City of Culture) ដែលបានអនុម័តនាពេលថ្មីៗកន្លងទៅនេះ ក៏បានផ្តោតសំខាន់ស្តីពីការលើកកម្ពស់សហគមន៍អាស៊ានប្រកបដោយការច្នៃប្រឌិត និងការសម្របខ្លួនដើម្បីគាំទ្រដល់ចរន្តសេដ្ឋកិច្ចវប្បធម៌ក្នុងបរិបទថ្មី។លោកជំទាវបណ្ឌិតសភាចារ្យ ក៏បានជម្រាបជូនអង្គប្រជុំអោយបានជ្រាបផងដែរ អំពីការរៀបចំសន្និសីទអន្តរជាតិ ស្តីពីការការពារ និងទប់ស្កាត់ការចរាចរជួញដូរសម្បតិ្តវប្បធម៌ខុសច្បាប់ - ទស្សនៈពីអាស៊ាន នៅទីក្រុងសៀមរាប កាលពីសប្តាហ៍កន្លងទៅ ដែលបានទទួលលទ្ធផលប្រកបដោយផ្លែផ្កាគួរជាទីពេញចិត្ត។ លោកជំទាវបណ្ឌិតសភាចារ្យ បានផ្តល់ការគាំទ្រដល់ប្រទេសឥណ្ឌូនេស៊ី និងបណ្ដាប្រទេសG20 ដែលបានផ្តួចផ្តើមគំនិតក្នុងការបង្កើតមូលនិធិសកលក្នុងការស្តារវិស័យសិល្បៈ និងវប្បធម៌សកលដើម្បីជួយគាំទ្រដល់បណ្តាប្រទេសនានា សំដៅធ្វើអោយវិស័យវប្បធម៌ក្លាយជាកម្លាំងចលករមួយសំខាន់ ក្នុងការស្ថាបនាសេដ្ឋកិច្ច និងការអភិវឌ្ឍប្រកបដោយចីរភាព។ក្នុងអំឡុងនៃកិច្ចប្រជុំរដ្ឋមន្ត្រីវប្បធម៌G20នេះ លោកជំទាវបណ្ឌិតសភាចារ្យ បានឆ្លៀតទទួលជួបប្រជុំទ្វេភាគីជាមួយរដ្ឋមន្ត្រីវប្បធម៌នៃប្រទេសសឹង្ហបុរី និងប្រទេសអារ៉ាប៊ីសាអូឌីត ដើម្បីពង្រឹងកិច្ចសហប្រតិបតិ្កការទ្វេភាគី និងបង្កើតទំនាក់ទំនងកាន់តែជិតស្និទ្ធលើវិស័យសិល្បៈវប្បធម៌ ដែលជាអទិភាពនៃការផ្តល់អត្ថប្រយោជន៍ដល់ប្រជាជននៃប្រទេសទាំងសងខាង៕ ដោយ៖ រដ្ឋា

សម្តេចតេជោ ហ៊ុន សែន នឹងអញ្ជើញប្រកាសបើកកិច្ចប្រជុំ រដ្ឋមន្ត្រីសេដ្ឋកិច្ចអាស៊ានលើកទី៥៤ និងកិច្ចប្រជុំពាក់ព័ន្ធ

2022/09/14 07:12:25 am        112
Facebook Telegram Linkin
ភ្នំពេញ៖ នៅព្រឹកថ្ងៃពុធ ទី១៤ ខែកញ្ញា ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្ត្រី និងជាប្រធានអាស៊ាន នឹងអញ្ជើញជាអធិបតីភាពប្រកាសបើកកិច្ចប្រជុំរដ្ឋមន្ត្រីសេដ្ឋកិច្ចអាស៊ានលើកទី៥៤ និងកិច្ចប្រជុំពាក់ព័ន្ធ ដែលរៀបចំឡើងដោយក្រសួងពាណិជ្ជកម្មកម្ពុជា ដែលប្រារព្ធធ្វើឡើងនៅសណ្ឋាគារសុខាខេត្តសៀមរាប។ កិច្ចប្រជុំរដ្ឋមន្ត្រីសេដ្ឋកិច្ចអាស៊ាន និងកិច្ចប្រជុំពាក់ព័ន្ធ គឺជាកិច្ចប្រជុំដ៏មានសារៈសំខាន់សម្រាប់អាស៊ាន និងប្រទេសជាដៃគូរបស់អាស៊ាន ដើម្បីជំរុញកំណើនសេដ្ឋកិច្ច និងឆ្លើយតបនឹងវិបត្តិដែលកំពុងកើតមានលើសាកលលោកនាពេលបច្ចុប្បន្នបណ្តាលមកពីការប្រកួតប្រជែងឥទ្ធិពលនយោបាយ ការរាតត្បាតជំងឺកូវីដ១៩ និងសង្គ្រាមរុស្ស៉ី-អ៊ុយក្រែន។ សម្តេចតេជោ ហ៊ុន សែន ក្នុងនាមជាប្រធានអាស៊ាន នឹងថ្លែងសុន្ទរកថាគន្លឹះក៏ដូចជាផ្តល់នូវទស្សនទានមួយចំនួន ដើម្បីជាធាតុចូលសម្រាប់រដ្ឋមន្ត្រីសេដ្ឋកិច្ចអាស៊ាន ក៏ដូចជារដ្ឋមន្ត្រីសេដ្ឋកិច្ចប្រទេសដៃគូ យកទៅជជែកស្វែងរកកាលានុវត្តន៍ភាពសេដ្ឋកិច្ច និងដោះស្រាយវិបត្តិ៕

សម្តេចតេជោ៖ លោក ខឹម វាសនា គួរចេញឆ្លើយតប ខណៈមានការចោទបង្កើតព្រឹត្តិការណ៍តាមការបញ្ជា

2022/09/13 01:48:32 pm        467
Facebook Telegram Linkin
សៀមរាប៖ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានថ្លែងថា លោក ខឹម វាសនា ប្រធានគណបក្ស​សម្ព័ន្ធ ដើម្បីប្រជាធិបតេយ្យ (LDP) គួរចេញបកស្រាយចំពោះការចោទប្រកាន់ថា​បានបង្កើតព្រឹត្តិការណ៍ កៀរគរមនុស្សទៅប្រមូលផ្ដុំនៅ​ក្នុង​ចម្ការជិតភ្នំគូលែន ដើម្បីគ្របរឿង​រ៉ាវភ្នំតាម៉ៅ ដែលកំពុងមានការចាប់អារម្មណ៍ តាមការបញ្ជារបស់សម្ដេច។ក្នុងឱកាសអញ្ជើញជួបសំណេះសំណាល ​ជាមួយប្រជាពលរដ្ឋស្ម័គ្រចិត្តចាកចេញពីតំបន់រមណីយ ដ្ឋានអង្គរ ​ទៅរស់នៅតំបន់រុនតាឯក នាព្រឹកថ្ងៃទី១៣ ខែកញ្ញានេះ​ សម្ដេចតេជោ ​ហ៊ុន សែន បានឆ្លៀតថ្លែងលើកឡើងពីបញ្ហានយោបាយ និងបញ្ហាលោក ខឹម វាសនា ដែលបានបង្កើត​ព្រឹត្តិការណ៍ ​កៀរគរអ្នកគាំទ្រទៅរស់នៅប្រមូលផ្តុំនៅចម្ការក្បែរជើងភ្នំគូលែន​ ក្នុងស្រុកបន្ទាយស្រី កាលពីពេលកន្លងទៅថ្មីៗនេះ។ពាក់ព័ន្ធនឹងករណីនេះ សម្តេចតេជោ បានផ្តាំទៅលោក ខឹម វាសនា គួរចេញឆ្លើយតបចំពោះ ការ លើកឡើងថា​ ការបង្កើតព្រឹត្តិការណ៍ជើងភ្នំគូលែន ​របស់លោក ខឹម វាសនា គឺធ្វើតាមបញ្ជា​របស់​សម្តេច ដើម្បី​បន្សាប​បញ្ហា​ភ្នំតាម៉ៅ ​ដូច្នេះដើម្បីកុំឱ្យក្លាយជាអាយ៉ង​សម្ដេច ​គឺលោក ខឹម វាសនា ត្រូវតែចេញបកស្រាយចំពោះបញ្ហានេះ ។លោក ខឹម វាសនា កាលពីចុងខែមុន បានឃោសនាកៀរគរឱ្យអ្នកគាំទ្រខ្លួនទៅប្រមូលផ្ដុំគ្នានៅដី ចម្ការ​របស់ខ្លួន​ នៅក្បែរជើងភ្នំគូលែន ​ដោយបាននិយាយថា នឹងមានទឹកលិចផែនដី តែទោះជាយ៉ាងណា ​ការប្រមូលផ្ដុំនោះ ត្រូវបានរំសាយវិញ​អស់ហើយ បន្ទាប់ពីអាជ្ញាធរ​ព្រមាន​ចាត់វិធានការ៕អត្ថបទ៖ មុត សុទ្ធ

ឧត្តមសេនីយ៍ឯក ហ៊ុន ម៉ាណែត ជួបពិភាក្សាការងារជាមួយឯកអគ្គរាជទូតថៃបញ្ចប់អាណត្តិនៅកម្ពុជា

2022/09/13 01:34:25 pm        325
Facebook Telegram Linkin
ភ្នំពេញ៖ ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការ​កងទ័ពជើងគោក នៅព្រឹកថ្ងៃទី១៣ ខែកញ្ញា ឆ្នាំ២០២២នេះ បានជួបពិភាក្សាការងារមួយ​ចំនួនជាមួយលោក ប៉ាន់យ៉ារ៉ាក់ ភូលថុប (Panyarak Poolthup) ឯកអគ្គរាជទូតនៃព្រះរាជាណាចក្រថៃ ក្រោយបញ្ចប់បេសកកម្មការទូតរបស់លោកនៅព្រះរាជាណាចក្រកម្ពុជា។ថ្លែងនៅក្នុងកិច្ចជំនួននោះលោក ប៉ាន់យ៉ារ៉ាក់ ភូលថុប បានវាយតម្លៃខ្ពស់ចំពោះទំនាក់ទំនង​កិច្ច​សហប្រតិបត្តិការ​ដ៏ល្អរវាងកម្ពុជា-ថៃ​ ដែលបានអនុវត្តកន្លងមក ទោះបីនៅក្នុងកាលៈទេសៈនៃការ​រីករាល​ដាលនៃជំងឺកូវីដ-១៩ ដោយសកម្មភាពពាណិជ្ជកម្មដោះដូរទំនិញរវាងប្រទេសទាំងពីរនៅ​តែមានដំណើរការឥតអាក់ខាន ហើយភាព​ជិតស្និទ្ធ​នេះក៏នឹងបន្តពង្រឹង ​និងពង្រីកបន្ថែមទៀត ជាលំដាប់តទៅអនាគត។ជាមួយគ្នានោះលោក ឯកអគ្គរាជទូតក៏បានសម្តែងនូវការកោតសរសើរដល់ការអភិវឌ្ឍ​រីកចម្រើន​ដ៏ឆាប់រហ័សលើគ្រប់វិស័យរបស់ប្រទេសកម្ពុជា​ រួមទាំងវិស័យការពារជាតិ ​នៅក្រោមការដឹកនាំដ៏​ប៉ិនប្រសប់​របស់រាជរដ្ឋាភិបាលកម្ពុជា ក្នុងរយៈកាលកន្លងមកនេះផងដែរ។ថ្លែងនៅក្នុងកិច្ចជំនួបនោះដែរ លោកឧត្តមសេនីយ៍ឯក ហ៊ុន ម៉ាណែត បានលើកទ្បើងអំពី​ទំនាក់​ទំនង​មិត្តភាព​រឹងមាំ​រវាងប្រទេស​ និងប្រជាជនទាំងពីរ (កម្ពុជា-ថៃ) ​ទាំងក្នុងទំនាក់ទំនងទ្វេភាគី ក៏ដូចជា​កិច្ចសហប្រតិបត្តិការល្អក្នុងវេទិកាតំបន់ និងអន្តរជាតិជាដើម។នៅក្នុងកិច្ចជំនួបនោះដែរលោកឧត្តមសេនីយ៍ឯក ហ៊ុន ម៉ាណែត ​ក៏បានថ្លែងអំណរគុណ លោក​ឯកអគ្គ​រាជទូតចំពោះកិច្ចខិតខំប្រឹងប្រែង​ និង​សមិទ្ធផល​ការងារ​ជាច្រើនក្នុងការពង្រឹង និងលើក​កម្ពស់​ទំនាក់ទំនងរវាងប្រទេស​ កងទ័ព ​និងប្រជាជនទាំងពីរ ព្រមជាមួយនឹងការអរគុណ​រាជ​រដ្ឋាភិបាល​ និងប្រជាជនថៃ​ ចំពោះជំនួយអភិវឌ្ឍន៍ដែលបានផ្តល់ដល់កម្ពុជា និងការជួយ​ឧបត្ថម្ភ​គាំទ្រគ្នាទៅវិញទៅមកក្នុងវិបត្តិជំងឺកូវីដ-១៩ ក៏ដូចជាការគាំទ្ររបស់ប្រទេសថៃ​ដល់ការបំពេញ​តួនា​ទី​ជាប្រធានអាស៊ានឆ្នាំ២០២២ របស់កម្ពុជា ដោយរាប់ទាំងវិធានការនៅក្នុងការ​ដោះស្រាយ​វិបត្តិ​នៅមីយ៉ាន់ម៉ាជាដើមនោះ។ ទាំងនេះ​គឺបាន​ឆ្លុះបញ្ចាំង​អំពីស្មារតីមិត្តភាព, ការគោរព និងការជឿទុកចិត្តគ្នាទៅវិញទៅមក​រវាង​ប្រទេស ​និងប្រជាជនយើងទាំងពីរ​ ក្នុងនាមជាប្រទេសជិតខាងភូមិផងរបង​ជាមួយគ្នា និងជា​សមាជិក​អាស៊ានដូចគ្នា៕អត្ថបទ៖បាន ចក់

កម្ពុជា-ក្វាតេម៉ាឡា បង្កើនកិច្ចសហប្រតិបតិ្តការលើវិស័យវប្បធម៌ ផ្តោតលើការអភិរក្សប្រាសាទ

2022/09/13 12:27:18 pm        239
Facebook Telegram Linkin
ភ្នំពេញ៖ ឯកឧត្តម សោម សុគន្ធ រដ្ឋលេខាធិការតំណាងលោកជំទាវបណ្ឌិតសភាចារ្យ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ បាន​ជួបសម្តែង​ការគួរសម និងពិភាក្សាការងារ​ជាមួយ​ឯកឧត្តម Carlos Humberto Jiménez Licona ឯកអគ្គរដ្ឋទូតតែងតាំងថ្មី នៃសាធារណរដ្ឋក្វាតេម៉ាឡា ប្រចាំព្រះរាជាណាចក្រកម្ពុជា ដែលមាននិវេសនដ្ឋាន​នៅទីក្រុងបាងកក, នាទីស្តីការក្រសួងព្រឹកថ្ងៃទី១៣ ខែកញ្ញា ឆ្នាំ២០២២នេះ។ជាកិច្ចចាប់ផ្តើមឯកឧត្តម Carlos Humberto Jiménez Licona ​បានជម្រាបជូនថា សាធារណរដ្ឋក្វាតេម៉ាឡា ស្ថិតនៅអាមេរិកខាងត្បូង គឺមានអារ្យធម៌មួយដែលហៅថា​ វប្បធម៌ម៉ាយ៉ា ដែលមានអាយុកាលជាង ២០០០ឆ្នាំមកហើយ។ ជួបទ្វេភាគីថ្ងៃនេះ ឯកឧត្តម ឯកអគ្គរដ្ឋទូត មានបំណងធ្វើកិច្ចសហប្រតិបតិ្តការលើវិស័យវប្បធម៌ ដូចជា​ការផ្លាស់ប្តូរអ្នកជំនាញលើការជួសជុល និងអភិរក្សប្រាសាទ ​ដោយសារសម្បតិ្តបេតិកភណ្ឌ របស់​សាធារណរដ្ឋក្វាតេម៉ាឡា មានទំហំធំ។ ដូច្នេះឯកឧត្តម ចាប់អារម្មណ៍លើសម្បតិ្តបេតិកភណ្ឌរបស់កម្ពុជា ជាពិសេសប្រាសាទនៅតំបន់អង្គរ ដែលនាពេលថ្មីៗនេះ​ ឯកឧត្តម រួមនិងក្រុមការងារ បានធ្វើទស្សនកិច្ច​ និងចង់បញ្ជូនអ្នកជំនាញ​បច្ចេកទេស​ជួសជុល ​មកផ្លាស់ប្តូរបទពិសោធន៍រវាងប្រទេសទាំងពីរ។ ទន្ទឹមនឹងនោះក្រសួងវប្បធម៌​នៃសាធារណរដ្ឋក្វាតេម៉ាឡា ក៏សុំឲ្យមានកិច្ចសហប្រតិបតិ្តការ​ជាមួយ​ក្រសួងវប្បធម៌ ​និងវិចិត្រសិល្បៈ ​នៃព្រះរាជាណាចក្រកម្ពុជា ដើម្បីធ្វើកិច្ចសហប្រតិបតិ្តការរួមគ្នា​ក្នុងថ្ងៃអនាគត។ឯកឧត្តម ឯកអគ្គរដ្ឋទូត បានសង្កត់ធ្ងន់ថា ​សម្បតិ្តបេតិកភណ្ឌ​ នៅសាធារណរដ្ឋក្វាតេម៉ា មាន​ការ​ជីកកកាយ​រកវត្ថុ​បុរាណ ដ៏សំបូរបែបនាសម័យម៉ាយ៉ា ​នេះជា​ចំណុច​មួយដែលត្រូវធ្វើការរួមគ្នា ដើម្បី​ទប់ស្កាត់នូវការលួចជួញដូរវត្ថុបុរាណដោយខុសច្បាប់ ដែលជាឧក្រិដ្ឋកម្មខុសច្បាប់។ វប្បធម៌ ពិតជា​មានអត្ថន័យ​ធំធេង ​សម្រាប់ពិភពលោក ​និងសម្រាប់មនុស្សទាំងអស់គ្នាក្នុងជីវិត និងមានអ្នកខ្លះមិនទទួលនោះទេ ​ក៏ប៉ុន្តែត្រូវមានទំនាក់ទំនងគ្នា ​នេះជាអ្វីដែលវប្បធម៌មាន។ជាការឆ្លើយតបឯកឧត្តម សោម សុគន្ធ ​សូមស្វាគមន៍ចំពោះគំនិតនៃការលើកឡើងរបស់ឯកឧត្តម ឯកអគ្គរដ្ឋទូត​ ហើយថ្នាក់ដឹកនាំក្រសួង​ និងត្រៀមធ្វើការជាមួយគ្នា ​ជាពិសេសលើវិស័យវប្បធម៌ ពាក់ព័ន្ធលើការងារអភិរក្ស ​ថែរក្សាវប្បធម៌របស់ប្រទេសរៀងៗខ្លួន៕អត្ថបទ រដ្ឋា 

សម្ដេចតេជោ ហ៊ុន សែន ជំរុញប្រែក្លាយតំបន់រុនតាឯកជាក្រុងមួយរបស់ខេត្តសៀមរាប

2022/09/13 12:16:58 pm        210
Facebook Telegram Linkin
សៀមរាប៖ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានប្រកាស​ពី​ទស្សនវិស័យជំរុញប្រែក្លាយតំបន់អភិវឌ្ឍន៍រុនតាឯក ទៅជាក្រុងមួយរបស់ខេត្តសៀមរាប និងបាន​បញ្ជាឲ្យក្រសួង ស្ថាប័ន ពាក់ព័ន្ធ ​និងអាជ្ញាធរខេត្ត កសាងហេដ្ឋារចនាសម្ព័ន្ធនានា​សម្រាប់បម្រើ​ប្រយោជន៍​របស់ប្រជាពលរដ្ឋ។ក្នុងពេលថ្លែងសំណេះសំណាលជាមួយប្រជាពលរដ្ឋ ដែលបានផ្លាស់ទីពីក្នុងតំបន់ទី១ និងទី២ នៃ រមណីយដ្ឋានអង្គរ មករស់នៅក្នុងភូមិតានី ឃុំរុនតាឯក ស្រុកបន្ទាយស្រី នៅថ្ងៃទី១៣ ខែកញ្ញា នេះ សម្ដេចតេជោ ហ៊ុន សែន នាយករដ្ឋមន្ត្រី បានណែនាំឲ្យក្រសួង ​ស្ថាប័នពាក់ព័ន្ធ និងអាជ្ញាធរខេត្ត​ធ្វើការ​អភិវឌ្ឍផ្លូវ រៀបចំប្រព័ន្ធទឹកស្អាត បណ្ដាញអគ្គិសនី ​សាងសង់មន្ទីរពេទ្យ សាលារៀនពីបឋម​សិក្សា ដល់វិទ្យាល័យ រៀបចំឲ្យមានផ្សារ ​រៀបចំប្រព័ន្ធសេវាទូរស័ព្ទ រួមទាំងការកសាង​នូវហេដ្ឋា​រចនា​សម្ព័ន្ធ​ចាំបាច់ផ្សេងៗទៀត។ជាមួយនេះសម្ដេចតេជោ ហ៊ុន សែន ក៏បានជំរុញឱ្យពលរដ្ឋរស់នៅទីតាំងថ្មីនេះ ខិតខំប្រែក្លាយ​តំបន់​អភិវឌ្ឍន៍រុនតាឯក ​ឱ្យទៅជាតំបន់ទេសចរណ៍ ​ដែលមានភាពទាក់ទាញ ​ដើម្បីបង្កើតជាប្រាក់ចំណូល សម្រាប់ផ្គត់ផ្គង់គ្រួសារ ។តាមរបាយការណ៍គិតចាប់ពីថ្ងៃទី១៨ ខែសីហា ដល់ថ្ងៃទី១០ ខែកញ្ញា នេះ ​បាន​បញ្ចប់​ការវាស់ វែងក្បាលដី និងស្រង់ព័ត៌មានអ្នកកាន់កាប់ដី នៅភូមិគោលដៅទាំង១១៤ភូមិ ក្នុងឃុំចំនួន១៧ សង្កាត់ចំនួន៧ ក្រុងចំនួន១ ​និងស្រុកចំនួន៤ ដោយវាស់វែងក្បាលដីបានសរុប ៩៣,៣៥១ក្បាលដី ទំហំ ១០,៩៤៥ហិកតា។ ក្នុងនោះក្បាលដីមាន​សំណង់​ ចំនួន៣៩,០៤០ក្បាលដី, ក្បាលដីគ្មាន​សំណង់​ចំនួន ៤៧,៣៤០ក្បាលដី ​និងក្បាលដីស្រែចម្ការ ចំនួន ៦,៩៩១ក្បាលដី ៕ អត្ថបទ៖ បាន សុខរិទ្ធិ

សម្ដេចតេជោ៖ បក្សនយោបាយនានា គួរកុំយកបញ្ហាដូរលំនៅពលរដ្ឋចេញពីអង្គរ ទៅឃោសនារកសន្លឹកឆ្នោត

2022/09/13 12:05:20 pm        207
Facebook Telegram Linkin
សៀមរាប៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាស​អំពាវនាវ​ដល់គ្រប់បក្សនយោបាយទាំងអស់ កុំយកអ្វីដែលសម្តេច និង​រាជរដ្ឋាភិបាល​បានធ្វើដើម្បី​ជាតិ និងប្រជាជននៅតំបន់រុនតាឯក ធ្វើជាអាវុធសម្រាប់​វាយប្រហារ​សម្តេច​យកសន្លឹកឆ្នោត ក្នុងពេលបោះឆ្នោតនាពេលខាងមុខនេះ ។ក្នុងពិធិជួបសំណេះសំណាលជាមួយប្រជាពលរដ្ឋ ដែលបានផ្លាស់ទីពីក្នុងតំបន់ទី១ និងទី២ នៃរមណីយដ្ឋានអង្គរ មករស់នៅក្នុងភូមិតានី ឃុំរុនតាឯក នៅថ្ងៃទី១៣ ខែកញ្ញា ឆ្នាំ២០២២ សម្ដេចតេជោ នាយករដ្ឋមន្ត្រី មានប្រសាសន៍ថា ​ការដោះស្រាយរបស់សម្ដេចនាពេលនេះ គឺជា​តម្រូវការរបស់ជាតិ មិនមែនដោះស្រាយបញ្ហាគណបក្ស ហើយបង្កឲ្យបក្សដទៃ យកធ្វើជាអាវុធនោះទេ ។សម្ដេចតេជោ បានបន្តថា ក្នុងចំណោមពលរដ្ឋស្ម័គ្រចិត្តមករស់នៅតំបន់រុនតាឯកនេះ ពីមុនមាន​ចំនួន១៨គ្រួសារ អត់ព្រមចេញ ​ដែលគាំទ្រដោយគណបក្សយុវជនកម្ពុជា ដោយសម្ដេច​បានប្រាប់​ទៅប្រធានគណបក្សមួយនេះ​ ឲ្យបញ្ឈប់សកម្មភាពនយោបាយ ព្រោះថារឿងនេះមិនមែនរឿង​គណបក្ស រឿងនយោបាយទេ ​គឺរឿងទាក់ទិននឹងការរៀបចំសណ្ដាប់ធ្នាប់ នៅក្នុងតំបន់សៀមរាប ។ជាមួយនេះ សម្ដេចតេជោ ហ៊ុន សែន បានអរគុណពលរដ្ឋ ដែលបានស្ម័គ្រចិត្តចាក់ចេញ ពី​តំបន់អង្គរ មករស់នៅតំបន់អភិវឌ្ឍន៍រុនតាឯក ​ដើម្បីការពារនូវបេតិកភណ្ឌរបស់ជាតិ ៕អត្ថបទ៖ បាន សុខរិទ្ធិ

សម្តេចតេជោ ៖ លោក ហ៊ុន ម៉ាណែត​មានលក្ខណៈសម្បត្តិគ្រប់គ្រាន់​ក្នុងការដឹកនាំ​ប្រទេស​ និង​គណបក្សប្រជាជន

2022/09/13 10:06:03 am        504
Facebook Telegram Linkin
សៀមរាប៖ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បាន​លើក​ឡើង​ថា ទោះបីជាលោកហ៊ុន ម៉ាណែត ជាកូន​អ្ន​កណា​ក៏​ដោយ​ក៏​សម្តេច​គាំទ្រ​ឲ្យ​ធ្វើ​ជា​បេក្ខ​ភាព​នាយករដ្ឋម​ន្ត្រីនាពេលអនាគតដែរ ពីព្រោះថា លោកហ៊ុន ម៉ាណែត ជាមនុស្ស​មាន​លក្ខណៈ​សម្បត្តិ​គ្រប់គ្រាន់​សមនឹងធ្វើជាអ្នកដឹកនាំប្រទេស និងសមជាអ្នក​ដឹក​នាំ​របស់​គណបក្ស​ប្រជាជន​កម្ពុជា​។ការលើកឡើងរបស់សម្តេចតេជោ ហ៊ុន សែន បែប​នេះ​គឺ​ជា​ការ​ឆ្លើយ​តប​បន្ទាប់​ពី​ក្រុម​អ្នក​វិភាគ​ច្រំ​ដែល​ៗ​មួយចំនួន ដែលបានលើកឡើងម្តងហើយម្តងទៀតថា ការដាក់លោកហ៊ុន ម៉ាណែត ជា​បេក្ខភាពនាយករដ្ឋមន្រ្តីនាពេលខាងមុខ គឺជាបក្សពួកនិយម និងលើក​បន្ទុក​ដល់​កូន​ខ្លួន​ឯង​នោះ។ថ្លែងនៅក្នុងឱកាសអញ្ជើញជួបសំណេះសំណាលជាមួយប្រជាពលរដ្ឋដែលបានស្ម័គ្រចិត្តរើលំនៅឋាន និងសំណង់ផ្សេងៗចេញពីតំបន់រមណីយដ្ឋានអង្គរ និងតំបន់ដទៃទៀត ស្ថិត​ក្រោម​ការ​គ្រប់​គ្រង​របស់​អាជ្ញាធរជាតិអប្សរា ស្ថិតនៅឃុំរុនតាឯក ស្រុកបន្ទាយស្រី ខេត្តសៀមរាប នាព្រឹក​ថ្ងៃ​ទី​១៣ ខែកញ្ញា ឆ្នាំ២០២២នេះ សម្តេចតេជោ ហ៊ុន សែន បានបញ្ជាក់ថាបើលោកហ៊ុន ម៉ាណែត គ្មាន​សមត្ថភាព និងគ្មានភាពជាអ្នកដឹកនាំទេនោះ ក៏សម្តេចមិនគាំទ្រឲ្យដឹកនាំដែរ ពីព្រោះ​ថា​សម្តេច​មិន​អនុញ្ញាតឱ្យនរណាម្នាក់ មកបំផ្លាញគណបក្សប្រជាជនកម្ពុជា និងរាជ​រដ្ឋាភិបាល​នោះ​ទេ ខណៈគណបក្សប្រជាជនកម្ពុជាបានដឹកនាំប្រទេសឲ្យមានសុខសន្តិភាព និង​ការ​អភិវឌ្ឍ​រហូត​ដល់​សព្វ​ថ្ងៃ។សូមជម្រាបថា លោក ហ៊ុន ម៉ាណែត កូនប្រុសច្បងរបស់សម្តេចតេជោហ៊ុន សែន កាល​ពី​ថ្ងៃ​ទី​២៤​ ខែធ្នូ  ឆ្នាំ២០២១ កន្លង​ទៅ​ត្រូវ​បាន​សន្និបាត​គណៈកម្មាធិការ​កណ្តាល​របស់​គណបក្ស​ប្រជាជន​កម្ពុជា បានបោះឆ្នោតជ្រើសតាំងជាបេក្ខជននាយករដ្ឋមន្ត្រី។ ការ​បោះឆ្នោត​ជ្រើស​តាំង​លោក ហ៊ុន ម៉ាណែត ជាបេក្ខភាពនាយកររដ្ឋមន្រ្តីបន្តវេនពីសម្តេចតេជោនេះ គឺមានសមាជិក-សមាជិកា គណៈកម្មាធិការកណ្តាលចំនួន៧៧៥នាក់៕ អត្ថបទ៖ បាន ចក់

ប្រសាសន៍សំខាន់ៗរបស់សម្ដេចតេជោ​ ហ៊ុន​ សែន​ ក្នុងពិធីសំណេះសំណាល​​ជាមួយ​ពលរដ្ឋ​ដែល​បាន​ស្ម័គ្រចិត្តរើលំនៅឋាន និង​សំណង់​ផ្សេង​ៗ​ចេញ​ពីតំបន់​រមណីយដ្ឋានអង្គរ

2022/09/13 09:52:25 am        529
Facebook Telegram Linkin
សៀមរាប៖ សម្ដេចតេជោ ហ៊ុន សែន នាយករដ្ឋមន្ត្រីនៅព្រឹកថ្ងៃទី១៣​កញ្ញានេះ បានអញ្ជើញ​ជួប​សំណេះ​សំណាល​​ជាមួយ​ប្រជាពលរដ្ឋដែលបានស្ម័គ្រចិត្តរើលំនៅឋាន និង​សំណង់​ផ្សេង​ៗ​ចេញ​ពីតំបន់​រមណីយដ្ឋានអង្គរ និងតំបន់ដទៃទៀត ស្ថិតក្រោមការគ្រប់គ្រងរបស់អាជ្ញាធរជាតិអប្សរា។ ខាងក្រោមនេះជាប្រសាសន៍សំខាន់ៗរបស់សម្ដេចតេជោ ហ៊ុន​ សែន៖- សម្តេចតេជោ ហ៊ុន សែន ប្រកាសថ្លែងអំណរគុណដល់ប្រជាពលរដ្ឋ ដែល​បាន​យល់​ពី​ភាព​ចាំ​បាច់ និងករណីកិច្ច បម្រើឱ្យផលប្រយោជន៍រួមរបស់ជាតិ ដែល​បាន​ចាក​ចេញ​ពី​តំបន់​រមនីយដ្ឋានអង្គរ និងតំបន់ហាមឃាត់មករស់នៅតំបន់អភិវឌ្ឍន៍រុនតាឯក។- សម្តេចតេជោ ហ៊ុន សែន ប្រកាសថ្លែងអំណរគុណដល់ឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់, ក្រសួងវប្បធម៌ និងវិចិត្រសិល្បៈ ក្រសួង​បរិស្ថាន និងអាជ្ញាធរខេត្តសៀមរាប និងព្រមទាំងផ្នែកពាក់ព័ន្ធ ដែលបានរួមគ្នា ដោះ​ស្រាយ​បញ្ហា​លំនៅ​ដ្ឋានប្រជាពលរដ្ឋនៅតំបន់រមនីយដ្ឋានអង្គរ បានដោយជោគជ័យ និងស្នាមញញឹម។- សម្តេចតេជោ ហ៊ុន សែន រំលឹកពីស្នាព្រះរាជរបស់ព្រះវររាជបិតាជាតិខ្មែរ សម្តេច ព្រះ​បរមរតន​កោដ្ឋ ដែលជំនះ រហូតដល់មានការយល់ព្រម ដាក់តំបន់ប្រាសាទអង្គរវត្ត ចូល​ជា​សម្បត្តិ​បេតិក​ភណ្ឌពិភពរបស់អង្គការយូណេស្កូ។- សម្តេចតេជោ ហ៊ុន សែន រំលឹកពីអតីតកាលប្រទាញប្រទង់គ្នា ក្នុងគ្រា​កម្ពុជា​មាន​តំបន់​ត្រួត​ត្រា​ច្រើន និងមានសង្គ្រាមផ្ទុះអាវុធស្ទើររៀងរាល់ថ្ងៃ ដែលពេលនោះ ការគិតពីផលប្រយោជន៍ជាតិ និងប្រជាជននៅមានកម្រិតនៅឡើយ។- សម្តេចតេជោ ហ៊ុន សែន បញ្ជាក់ថា ការដោះស្រាយ​បញ្ហា​លំ​នៅ​ដ្ឋាន​ចេញ​ពី​តំបន់​រមនីយដ្ឋាន​អង្គរ និងតំបន់ហាមឃាត់នានា គឺដើម្បីរក្សា​និរន្តរភាព​តំបន់​រមនីយ​ដ្ឋាន​អង្គរ​ជា​សម្បត្តិ​បេតិកភណ្ឌពិភពលោក ។- សម្តេចតេជោ ហ៊ុន សែន បញ្ជាក់ថា មិនថាប្រទេសតូច ឬប្រទេសធំ ,ប្រទេសអ្នកមាន ឬ​ប្រទេស​អ្នកក្រទេ ឱ្យតែខុសលក្ខន្តិកៈរបស់UNISCO គឺគេដកចេញ ដោយ​គ្មាន​ការ​យោគ​យល់​ទេ​។ សម្តេចបញ្ជាក់ថា «បើគេដកអង្គរយើងចេញ ពី​បញ្ជី​បេតិក​ភណ្ឌ​ពិភព​លោក​ដោយ​សារ​ខុស​លក្ខន្តិកៈ​នោះ ដែលជាការបាត់បង់ដ៏ធំធេងណាស់របស់ជាតិទាំងមូល»។- សម្តេចតេជោ ហ៊ុន សែន ប្រកាសពីលក្ខណៈ នៃភាពជាអ្នកដឹកនាំរបស់លោក ហ៊ុន ម៉ាណែត ដែលជាបេក្ខភាពនាយករដ្ឋមន្ត្រីអនាគត សម្រាប់កម្ពុជា។ សម្តេចបញ្ជាក់ថា «វា​ខុស​ត្រង់​ហ៊ុន ម៉ាណែត ជាកូននាយករដ្ឋមន្ត្រី, ទោះជា ហ៊ុន ម៉ាណែត ជាកូន ជា សុផារ៉ា ឬកូន ចម ប្រសិទ្ធ ក៏ខ្ញុំគាំទ្រ ហ៊ុន ម៉ាណែត ជាបេក្ខភាពនាយករដ្ឋមន្ត្រីអនាគត សម្រាប់​គណបក្ស​ប្រជាជន​កម្ពុជា​ដែរ​»។- សម្តេចតេជោ ហ៊ុន សែន បញ្ជាក់ថា «បើហ៊ុន ម៉ាណែត គ្មានសមត្ថភាព និងគ្មាន​ភាព​ជា​អ្នក​ដឹកនាំ ក៏ខ្ញុំមិនគាំទ្រដែរ, ខ្ញុំមិនអនុញ្ញាតឱ្យនរណាម្នាក់ មកបំផ្លាញគណបក្សប្រជាជន និង​រាជ​រដ្ឋាភិបាលទេ»។- សម្តេចតេជោ ហ៊ុន សែន បញ្ជាក់ថា ចាប់ពីថ្ងៃទី១៨ ខែសីហា ដល់ថ្ងៃទី១០ ខែកញ្ញា ឆ្នាំ​២០២២ ក្រុមការងារចម្រុះបានបញ្ចប់ការវាស់វែងក្បាលដី និងស្រង់​ព័ត៌មាន​អ្នក​កាន់​កាប់​ដី​នៅ​ភូមិ​គោលដៅទាំង ១១៤ភូមិ ក្នុងឃុំចំនួន១៧ សង្កាត់ចំនួន៧ ក្រុងចំនួន១ និងស្រុកចំនួន៤ ដោយ​វាស់វែងក្បាលដីបានសរុប ៩៣.៣៥១ក្បាលដី ទំហំ ១០.៩៤៥ហិកតា។- សម្តេចតេជោ ហ៊ុន សែន បញ្ជាក់ថា កិច្ចខិតខំ​ប្រឹង​ប្រែង​ទាំ​ង​នោះ​បាន​កំណត់​ក្បាល​ដី​មាន​សំណង់​ចំនួន ៣៩.០៤០ក្បាលដី, ក្បាលដីគ្មានសំណង់ចំនួន ៤៧.៣៤០ក្បាលដី និងក្បាល​ដី​ស្រែ​ច​ម្ការចំនួន ៦.៩៩១ក្បាលដី។- សម្តេចតេជោ ហ៊ុន សែន បញ្ជាឱ្យកងពលទទួលទិសសៀមរាប ទទួល​បន្ទុក​ដឹក​ប្រជា​ពលរដ្ឋ​​ចេញ​ពីតំបន់រុះរើ ក្នុងតំបន់រមនីយដ្ឋានអង្គរ និងតំបន់ហាមឃាត់ ម​ក​ទី​តាំង​ថ្មី​នៅ​តំបន់​រុនតាឯក ដោយយកតែប្រជាពលរដ្ឋណា ដែលមានក្បាលដីដែលឈូសឆាយរួចតែប៉ុណ្ណោះ ដើម្បី​ឱ្យពួកគាត់សាង់លំនៅឋាន និងដាំដុះ។- សម្តេចតេជោ ហ៊ុន សែន ប្រកាសឧបត្ថម្ភដល់ប្រជាពលរដ្ឋ ដែលមក​តាំង​លំ​នៅ​ឋាន​ថ្មី​នៅ​តំបន់​រុនតាឯកក្នុងមួយគ្រួសារ ១លានរៀល ដើម្បីសាងសង់លំនៅឋាន និងឧបត្ថម្ភ​សម្ភារៈ​(សាង​សង់​ផ្ទះមួយចំនួន) ព្រមទាំងគ្រឿងឧបភោគបរិភោគជាច្រើនផង។- សម្តេចតេជោ ហ៊ុន សែន ប្រកាសផ្តល់ប័ណ្ណស្ត្រីមានផ្ទៃពោះ និងប័ណ្ណក្រីក្រ ដែលត្រូវ​ទទួ​ល​បាន​ប្រាក់​ឧបត្ថម្ភ សម្រាប់ជួយក្នុងវិបត្តិកូវីដ-១៩ ដល់ប្រជាពលរដ្ឋដែលមកតាំងទីលំនៅឋានថ្មី នៅតំបន់​រុនតាឯក បន្ថែមលើការឧបត្ថម្ភ ដែលរដ្ឋបានកំណត់កន្លងមក។- សម្តេចតេជោ ហ៊ុន សែន ប្រកាសថា ប្រពលរដ្ឋដែលរស់នៅតំបន់អភិវឌ្ឍន៍រុនតាឯក ដែលបានចាកចេញពីតំបន់រុះរើ នៃមរនីយដ្ឋានអង្គរ នឹងទទួលបានប័ណ្ណសមធម៌ និងការ​ឧបត្ថម្ភ​ដល់​ស្រ្តី​មានផ្ទៃពោះ រយះពេល១០ឆ្នាំ ទោះថ្ងៃក្រោយពួកគាត់ មានជីវភាពធូរធាក៏ដោយ។- សម្តេចតេជោ ហ៊ុន សែន ប្រកាសទស្សនវិស័យធ្វើយ៉ាងណា ឱ្យតំបន់អភិវឌ្ឍន៍រុនតាឯក ក្លាយទៅជា កូនក្រុងមួយរបស់ខេត្តសៀមរាប ដោយទឹកស្អាតប្រើប្រាស់, ផ្លូវកៅស៊ូងាយ​ស្រួល​ធ្វើ​ដំណើរ និងភ្លើងរដ្ឋប្រើប្រាស់បានតម្លៃសមរម្យ ព្រមទាំងមានអភិវឌ្ឍន៍លើគ្រប់វិស័យ។- សម្តេចតេជោ ហ៊ុន សែន ប្រកាសឱ្យតំបន់អភិវឌ្ឍន៍រុនតាឯក មានអនុវិទ្យាល័យ និងវិទ្យាល័យ សម្រាប់​ផ្តល់ការអប់រំបណ្តុះបណ្តាលដល់សិស្សានុសិស្សនៅតំបន់នោះ ដោយមិន​ឱ្យ​សិស្សា​នុសិស្ស​ធ្វើ​ដំណើរទៅរៀនសូត្រឆ្ងាយនោះទេ។- សម្តេចតេជោ ហ៊ុន សែន ប្រកាសអំពាវនាវដល់គ្រឹះស្ថានមីក្រូហិរញ្ញវត្ថុនានា ពិចារណា យោគយល់ និងផ្តល់ឱកាស សម្រាប់​ការ​ផ្តល់​ប្រាក់​កំចី​ដល់​ប្រជា​ពលរដ្ឋ​ដែល​មក​តាំង​ទីលំ​នៅ​ថ្មី​នៅ​តំបន់អភិវឌ្ឍន៍រុនតាឯក ដោយមានអត្រាកាប្រាក់ទាប និង​លក្ខណ​ពិសេស​តាម​ដែល​អាច​ធ្វើ​ទៅ​បាន។- សម្តេចតេជោ ហ៊ុន សែន ប្រកាសអំពាវនាវដល់គ្រប់បក្សនយោបាយទាំងអស់ សូម​កុំ​យក​អ្វី​ដែល​សម្តេច និងរាជរដ្ឋាភិបាលបានធ្វើដើម្បីជាតិ និងប្រជាជន ធ្វើជាអាវុធ​សម្រាប់​វាយ​ប្រហារ​សម្តេច​យក​សន្លឹកឆ្នោត ក្នុងពេលបោះឆ្នោតនាពេលខាងមុខនេះ។- សម្តេចតេជោ ហ៊ុន សែន ប្រកាសថា ទោះជា​សម្តេច​ចាក​ចេញ​ពី​តំណែង​នាយករដ្ឋ​មន្ត្រី​នា​ពេល​អនាគត​ក៏ដោយ ក៏នាយករដ្ឋមន្ត្រីថ្មី ដែលកើតចេញពីគណបក្សប្រជាជនកម្ពុជា នៅ​​តែ​បន្ត​គោល​នយោបាយ​គាំពារសង្គម និងប្រជាពលរដ្ឋដដែល ដោយរដ្ឋបានចំណាយច្រើនណាស់ក្នុង១ខែៗ ដើម្បី​រឿង​នេះ ដែលជាគោលនយោបាយជាតិរយៈពេលវែង។- សម្តេចតេជោ ហ៊ុន សែន ប្រកាសថា «ចំណុចខ្លាំងរបស់ ហ៊ុន សែន គឺអ្នកឯងវិភាគរឿង ហ៊ុន សែន ខុសទាំងអស់...[]..នេះចំណុចខ្លាំងលើចំណុចខ្លាំងរបស់ ហ៊ុន សែន»។- សម្តេចតេជោ ហ៊ុន សែន ប្រកាសជាថ្មីថា ឆ្នាំនេះ សម្តេចមិនបានចូលរួមបុណ្យភ្ជុំបិណ្ឌទេ ដោយសម្តេចជាប់បេសកកម្មនៅក្រៅប្រទេស រួមមាន៖ ចូលរួមមហាសន្និបាតUN នៅញូយ៉ក ពីថ្ងៃទី២១-២៣ ខែកញ្ញា, ទស្សនកិច្ចផ្លូវការនៅគុយបា ពីថ្ងៃទី២៣-២៥ ខែកញ្ញា និងចូលរួមគោរពវិញ្ញាណក្ខន្ធសពឯកឧត្តម ស៊ីន ហ្សូអាបេ អតីតនាយករដ្ឋមន្ត្រីជប៉ុន ទៅទីក្រុងតូក្យូ ពីថ្ងៃទី២៦-២៨ ខែកញ្ញា ឆ្នាំ២០២២។- សម្តេចតេជោ ហ៊ុន សែន បន្តអំពាវនាវដល់ប្រជាពលរដ្ឋ ឱ្យប្រុងប្រុងប្រយ័ត្នពីការឆ្លងរីករាលដាលជំងឺកូវីដ-១៩ ក្នុងឱកាសកាន់បិណ្ឌ និងភ្ជុំបិណ្ឌ ដោយរក្សាវិធានការសុខាភិបាល និងវិធានការ ៣ការពារ និង៣កុំ ឱ្យបានខ្ជាប់ខ្ជួន។ សម្តេចតេជោ ហ៊ុន សែន បញ្ជាក់ថា «ការពារជិវិតបាន ទើបយើងមានឱកាសធ្វើអ្វីៗនៅថ្ងៃនេះ»។- សម្តេចតេជោ ហ៊ុន សែន បញ្ជាក់ថា បុណ្យកាន់បិណ្ឌឆ្នាំនេះ ខុសដាច់ស្រលះពីបុណ្យកាន់បិណ្ឌកាលពីឆ្នាំមុន ដែលយើងអាចកាន់បិណ្ឌបានតែបិណ្ឌទី១ និងទី២ប៉ុណ្ណោះ ហើយក៏ត្រូវផ្អាកទៅវិញ ដើម្បីទប់ស្កាត់ការឆ្លងរីករាលដាលនៃជំងឺកូវីដ-១៩ និងការពារអាយុជីវីតប្រជាពលរដ្ឋពីការវាយប្រហារដោយកូវីដ-១៩។- សម្តេចតេជោ ហ៊ុន សែន បានប្រកាសជាឱឡារិកជាសាធារណៈ មិនឱ្យព្រះករុណា ព្រះមហាក្សត្រ និងប្រជាពលរដ្ឋ ខកព្រះទ័យ និងខកចិត្ត ដែលបានគាំទ្ររាជរដ្ឋាភិបាល ដែលកើតចេញពីគណបក្សប្រជាជនកម្ពុជានោះទេ។- សម្តេចតេជោ ហ៊ុន សែន បញ្ជាក់ថា កម្ពុជាមានអត្រាឆ្លងកូវីដ-១៩កម្រិតសូន្យរយៈពេល៥២ថ្ងៃ និងគ្មានករណីស្លាប់ថ្មីដោយជំងឺកូវីដ-១៩ តាំងពីខែមេសា ឆ្នាំ២០២២មកម្លេះ(រយៈ៦ខែ) ដែលជាភាពជោគជ័យដ៏ធំធេងរបស់កម្ពុជា និងជាការចាប់ផ្តើម នៃដំណើរការសេដ្ឋកិច្ច-សង្គម ដោយសារនយោបាយវ៉ាក់សាំងដ៏ត្រឹមត្រូវរបស់កម្ពុជា។- សម្តេចតេជោ ហ៊ុន សែន ប្រកាសដល់លោក ខឹម វាសនា ប្រធានគណបក្ស LDP ឱ្យចេញមុខបកស្រាយទៅកាន់សាធារណជន ដែលមានការចោទថា សម្តេចនៅពីក្រោយ ការតាំងខ្លួនជាព្រះព្រហ្ម និងការប្រមូលផ្តុំរបស់លោក ខឹម វាសនា និងអ្នកគាំទ្រគណបក្សLDP នៅចំការម្រេចក្បែរជើងភ្នំគូលែន ខេត្តសៀមរាប។- សម្តេចតេជោ ហ៊ុន សែន បានប្រកាសមិនប្រើកម្លាំងប្រដាប់អាវុធ ទប់នឹងកម្លាំងអបិយជំនឿឥតសមហេតុផល របស់ក្រុម លោក ខឹម វាសនា នោះទេ ព្រោះមិនមានភាពចាំបាច់ និងមិនមែនជារឿងសមហេតុផលនោះឡើយ។- សម្តេចតេជោ ហ៊ុន សែន បានប្រកាសអំពាវនាវដល់អ្នកចាញ់ការឃោសនារបស់លោក ខឹម វាសនា រឿងទឹកលិចពិភពលោក បែកបាក់ប្តី-ប្រពន្ធ-កូន សូមមេត្តាយោគយល់គ្នាឱ្យបានកម្រិតខ្ពស់បំផុត និងទទួលយកគ្នា ឬជាគ្នាវិញ ដោយស្មារតីអាណិតស្រលាញ់គ្នា។សង្កថាសម្តេចតេជោ ហ៊ុន សែន ចប់នៅវេលាម៉ោង១០ និង២០នាទី

សម្តេចតេជោ ហ៊ុន សែន ប្រកាសផ្ដល់ប័ណ្ណក្រីក្រ និងប័ណ្ណស្ត្រីមានផ្ទៃពោះ ដល់ពលរដ្ឋដែលស្ម័គ្រចិត្តមកតាំងលំនៅឋានថ្មី នៅរុនតាឯក

2022/09/13 09:24:54 am        473
Facebook Telegram Linkin
សៀមរាប៖ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសផ្ដល់ប័ណ្ណក្រីក្រ និងប័ណ្ណស្ត្រីមានផ្ទៃពោះ ដល់ពលរដ្ឋដែលស្ម័គ្រចិត្តមកតាំងលំនៅឋានថ្មី នៅតំបន់រុនតាឯក។សម្ដេចតេជោ ហ៊ុន សែន បានប្រកាសយ៉ាងដូច្នេះក្នុងឱកាសសម្តេច អញ្ជើញជួបសំណេះសំណាលជាមួយប្រជាពលរដ្ឋដែលបានស្ម័គ្រចិត្តរើលំនៅឋាន និងសំណង់ផ្សេងៗចេញពីតំបន់រមណីយដ្ឋានអង្គរ និងតំបន់ដទៃទៀត ស្ថិតក្រោមការគ្រប់គ្រងរបស់អាជ្ញាធរជាតិអប្សរា នាព្រឹកថ្ងៃទី១៣ ខែកញ្ញា ឆ្នាំ២០២២នេះ។សម្ដេចតេជោបានបញ្ជាក់ថា ប្រពលរដ្ឋដែលរស់នៅតំបន់អភិវឌ្ឍន៍រុនតាឯក ដែលបានចាកចេញពីតំបន់រុះរើ នៃមរនីយដ្ឋានអង្គរ នឹងទទួលបានប័ណ្ណសមធម៌ និងការឧបត្ថម្ភដល់ស្រ្តីមានផ្ទៃពោះ រយៈពេល១០ឆ្នាំ ទោះថ្ងៃក្រោយពួកគាត់ មានជីវភាពធូរធាក៏ដោយ។ជាមួយគ្នានេះដែរសម្ដេចតេជោក៏បានប្រកាសឧបត្ថម្ភដល់ប្រជាពលរដ្ឋ ដែលមកតាំងលំនៅឋានថ្មីនៅតំបន់រុនតាឯក ក្នុងមួយគ្រួសារ ១លានរៀល ដើម្បីសាងសង់លំនៅឋាន និងឧបត្ថម្ភសម្ភារៈ(សាងសង់ផ្ទះមួយចំនួន) ព្រមទាំងគ្រឿងឧបភោគបរិភោគជាច្រើនផងដែរ។សូមជម្រាបថា ចាប់ពីថ្ងៃទី១៨ ខែសីហា ដល់ថ្ងៃទី១០ ខែកញ្ញា ឆ្នាំ២០២២ ក្រុមការងារចម្រុះបានបញ្ចប់ការវាស់វែងក្បាលដី និងស្រង់ព័ត៌មានអ្នកកាន់កាប់ដីនៅភូមិគោលដៅទាំង ១១៤ភូមិ ក្នុងឃុំចំនួន១៧ សង្កាត់ចំនួន៧ ក្រុងចំនួន១ និងស្រុកចំនួន៤ ដោយវាស់វែងក្បាលដីបានសរុប ៩៣.៣៥១ក្បាលដី ទំហំ ១០.៩៤៥ហិកតា៕

បណ្ដាញសង្គម

ព័ត៌មានថ្មីៗ

រដ្ឋមន្រ្តីសុខាភិបាល អនុញ្ញាតឱ្យគណៈកម្មការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម ជួបសម្តែងការគួរសម និងពិភាក្សាការងារ
09/10/2025 08:09 PM
Facebook Telegram Linkin
រ៉្វាន់ដា៖ ការអំពាវនាវរបស់កុងហ្គោឲ្យ UN ទទួលស្គាល់មាន «អំពើប្រល័យពូជសាសន៍» គឺជាទង្វើ «ល្ងង់ខ្លៅ»
09/10/2025 08:09 PM
Facebook Telegram Linkin
វិមានក្រឹមឡាំងបដិសេធមិនធ្វើអត្ថាធិប្បាយ ជុំវិញឧប្បត្តិហេតុយានដ្រូន នៅប៉ូឡូញ
09/10/2025 07:09 PM
Facebook Telegram Linkin
ក្រុមបារាំងកៀរគរគ្នាដើម្បីបេតិកភណ្ឌកម្ពុជា
09/10/2025 07:09 PM
Facebook Telegram Linkin
នាយករដ្ឋមន្ត្រីអង់គ្លេស៖ ការរំលោភរបស់រុស្ស៊ីលើដែនអាកាសប៉ូឡូញ គឺជា «ធ្វេសប្រហែសខ្លាំងណាស់»
09/10/2025 07:09 PM
Facebook Telegram Linkin
សមាជិកព្រឹទ្ធសភាអូស្ត្រាលីស្តាំនិយម ត្រូវបណ្តេញចេញពីក្រសួងស្រមោល ជុំវិញការអត្ថាធិប្បាយប្រឆាំងឥណ្ឌា
09/10/2025 06:09 PM
Facebook Telegram Linkin
ក្រុងច្បារមន និងខេត្តកំពង់ស្ពឺ ទទួលបាន ជ័យលាភី “ទីក្រុងទេសចរណ៍គ្មានផ្សែងបារី”
09/10/2025 06:09 PM
Facebook Telegram Linkin
ក្រុមហ៊ុនអាកាសចរណ៍ JAL រងការព្រមានជាលើកទី២ ពាក់ព័ន្ធនឹងអ្នកបើកបរយន្តហោះស្រវឹង
09/10/2025 06:09 PM
Facebook Telegram Linkin
ប្រមុខគណៈកម្មការ EU បញ្ជាក់ថា លោកស្រីនឹងស្នើវិធានការថ្មីផ្ដោតលើអ៊ីស្រាអែល
09/10/2025 06:09 PM
Facebook Telegram Linkin
សំឡេងផ្ទុះបន្លឺឡើង ក្រោយរថយន្តផ្លូវដែកផ្ទុកដោយឥន្ធនៈ មានអគ្គិភ័យ នៅលីទុយអានី
09/10/2025 06:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.