នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្តេចធិបតីរំពឹងថាក្នុងឆ្នាំ២០២៧ កម្ពុជានឹងអស់បញ្ហាអាក្រក់ មានតែសេចក្តីសុខ និងភាពរីកចម្រើន
សម្ដេចតេជោ សង្ឃឹម យុវជនកម្ពុជា-ឡាវ រួមសាមគ្គី និងបន្តចែករំលែកផ្លាស់ប្ដូរទស្សនៈគ្នា គ្រប់វិស័យ
សម្ដេច​តេជោចាត់ទុកពាក្យស្លោក «បរាជ័យក្នុងសាលាប្រសើរជាងបរាជ័យក្នុងជីវិត» របស់សម្ដេច​ធិបតី​មានតម្លៃ​មិនសាបសូន្យ
សម្ដេចធិបតីអញ្ជើញចុះត្រួតពិនិត្យ និងសួរសុខទុក្ខពលរដ្ឋរងគ្រោះដោយទឹកជំនន់នៅបន្ទាយមានជ័យ

នយោបាយ​ និង ការអភិវឌ្ឍន៍

ប្រធាន គ.ជ.ប៖ ការចុះឈ្មោះ និងពិនិត្យឈ្មោះបោះឆ្នោតទូទាំងប្រទេសចាប់ផ្ដើមនៅថ្ងៃនេះ

2022/10/20 08:47:27 pm        1203
Facebook Telegram Linkin
ភ្នំពេញ៖ ឯកឧត្តម ប្រាជ្ញ ចន្ទ ប្រធានគណៈកម្មាធិការជាតិរៀបចំការបោះឆ្នោត (គជប) បានបញ្ជាក់ថា គ្រប់ឃុំសង្កាត់ទូទាំងប្រទេស ចាប់ផ្ដើមបើកដំណើរការ ​ការចុះឈ្មោះបោះឆ្នោត និងពិនិត្យឈ្មោះបោះឆ្នោតចាប់ពីថ្ងៃទី ២០ ខែតុលាឆ្នាំ ២០២២នេះ។ រយៈពេលកំណត់នៃ ការងារនេះ គឺមានរយៈពេលចំនួន ៥០ថ្ងៃ។ឯកឧត្តម ប្រាជ្ញ ចន្ទ ប្រធានគជប នៅថ្ងៃទី២០ ខែតុលានេះ ក្នុងអំឡុង​អញ្ជើញចុះពិនិត្យមើលការិ​យាល័យ​ចុះឈ្មោះបោះឆ្នោត នៅសង្កាត់តាខ្មៅ ក្រុងខ្មៅ ​ដែលសម្តេចតេជោ ហ៊ុន សែន អញ្ជើញ​ចុះឈ្មោះនិងប្តូរព័ត៌មានក្នុងបញ្ជីឈ្មោះបោះឆ្នោតនៅការិយាល័យនោះ លើកឡើងបញ្ជាក់ថា គ្រប់ឃុំសង្កាត់ទូទាំងប្រទេសកម្ពុជា ​ចាប់ផ្ដើមការចុះឈ្មោះបោះឆ្នោត និងពិនិត្យឈ្មោះបោះឆ្នោត​ជ្រើសរើស​​តំណាងរាស្រ្តនៅថ្ងៃនេះ។ ដំណើរការការងារនេះ គឺប្រព្រឹត្តិទៅក្នុងរយៈពេល ៥០ថ្ងៃ ​ដើម្បីឱ្យប្រជាពលរដ្ឋទើបគ្រប់អាយុ ១៨ឆ្នាំ អាចទៅចុះឈ្មោះបោះឆ្នោត ​និងអ្នកដែលមានឈ្មោះបោះឆ្នោតរួចហើយ​ អាចទៅពិនិត្យជាថ្មី ក្នុងករណីមានការខុសឆ្គង។ ​ចំពោះអ្នកពិនិត្យឈ្មោះបោះឆ្នោតក៏អាចពិនិត្យឈ្មោះដោយខ្លួនឯង តាមរយៈវេបសាយ VOTER LIST បានដែរ។ករណីចុះឈ្មោះបោះឆ្នោតថ្មី និងផ្លាស់ទីតាំងបោះឆ្នោត គឺទាមទារនូវឯកសារចាំបាច់មួយចំនួន​ផងដែរ។ ​នេះជាការបញ្ជាក់បន្ថែម របស់ឯកឧត្តម ប្រាជ្ញ ចន្ទ ប្រធានគជប។ ​ឯកឧត្តម បញ្ជាក់ដែរថា តាមការប៉ាន់ស្មានអ្នកចុះឈ្មោះបោះឆ្នោតថ្មី ​គឺស្ថិតក្នុងរង្វង់ ៤០ម៉ឺននាក់នៅទូទាំងប្រទេស។ឯកឧត្តម ប្រធានគជប បញ្ជាក់ដែរថា ​គ្រប់ប្រជាពលរដ្ឋកម្ពុជាទាំងអស់ដែលមានអាយុចាប់ពី ១៨ឆ្នាំ​ឡើងទៅ ដោយមិនប្រកាន់និន្នាការគណបក្សនយោបាយ ​គឺមានសិទ្ធិក្នុងការចុះឈ្មោះបោះឆ្នោត ជ្រើសរើសថ្នាក់ដឹកនាំគណបក្សដែលខ្លួនគាំទ្រ។ ឯកឧត្តម ក៏បានសំណូមពរគ្រប់ពលរដ្ឋទាំងអស់ មកបំពេញសិទ្ធិរបស់ខ្លួន ក្នុងការចូលរួមបោះឆ្នោត នាពេលខាង​មុខផងដែរ៕ អត្ថបទ៖ គឹមហុក

ឧត្តមសេនីយ៍ឯក ហ៊ុន ម៉ាណែត ជួបពិភាក្សាការងារមួយចំនួនជាមួយប្រធានាធិបតីទីម័រខាងកើត

2022/10/20 07:41:28 pm        484
Facebook Telegram Linkin
ភ្នំពេញ៖ ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជា​ការ​កងទ័ពជើងគោក នៅល្ងាចថ្ងៃទី១៩ ខែតុលា ឆ្នាំ២០២២នេះ បានជួបពិភាក្សាការងារ​មួយ​ចំនួន​ជាមួយ ឯកឧត្តម Jose Ramos Horta ប្រធានាធិបតី នៃសាធារណរដ្ឋប្រជាធិបតេយ្យទីម័រ​ខាងកើត ក្នុងឱកាសដែល ឯកឧត្តម ប្រធានាធិបតី កំពុងបំពេញទស្សនកិច្ចផ្លូវរដ្ឋនៅព្រះរាជាណាចក្រកម្ពុជា។នៅក្នុងជំនួបនេះលោកឧត្តមសេនីយ៍ឯក ហ៊ុន ម៉ាណែត បានសម្តែងនូវ​ការស្វាគមន៍យ៉ាងកក់ក្តៅ​ចំពោះ​ដំណើរបំពេញទស្សនកិច្ចផ្លូវរដ្ឋជាលើកទី២ ​របស់ឯកឧត្តម ប្រធានាធិបតី Jose Ramos Horta មកកាន់ព្រះរាជាណាចក្រកម្ពុជា ​ដែលពិតជាបានឆ្លុះបញ្ចាំងឱ្យឃើញអំពីចំណងមិត្តភាពដ៏ជិតស្និទ្ធ និងទំនាក់ទំនងកិច្ចសហប្រតិបត្តិការល្អរវាងប្រទេស រដ្ឋាភិបាល និងប្រជាជនទាំងពីរ កម្ពុជា-ទីម័រខាងកើត។ ក្នុងឱកាសនោះផងដែរ លោកឧត្តមសេនីយ៍ ក៏បានចូលរួមអបអរសាទរចំពោះ ឯកឧត្តម Jose Ramos Horta ដែល​ទទួលបានជោគជ័យដ៏ត្រចះត្រចង់​ក្នុងការបោះឆ្នោត​ប្រធានាធិបតីនៅ​ប្រទេសទីម័រ​ខាងកើត ​កាលពីខែមេសា ឆ្នាំ២០២២ កន្លងទៅ ដែលជាការចូលកាន់តំណែង​ប្រមុខរដ្ឋលើកទីពីរ របស់ ឯកឧត្តម Jose Ramos Horta។ថ្លែងនៅក្នុងកិច្ចជំនួបនោះដែរ ឯកឧត្តម ប្រធានាធិបតីទីម័រខាងកើត បានសម្តែងនូវការពេញចិត្ត​ចំពោះ​ឱកាសដ៏មានអត្ថន័យសម្រាប់ជំនួបសំណេះសំណាលជាមួយ ​លោក ហ៊ុន ម៉ាណែត និង​បានរំឭកអំពីភាពជាអ្នកដឹកនាំរបស់សម្តេចអគ្គមហាសេនាបតីតេជោ ហ៊ុន សែន នៅក្នុងកិច្ចខិតខំ​ប្រឹងប្រែងចូលរួមដោះស្រាយបញ្ហាតំបន់ និងអន្តរជាតិ ជាពិសេសមនោសញ្ចេតនាស្រឡាញ់រាប់​អាន​ដ៏ស្មោះស្ម័គ្រ ដែលសម្តេចតេជោ មានចំពោះប្រទេស និងប្រជាជនទីម័រខាងកើត។ ជាមួយគ្នានេះ ឯកឧត្តម ប្រធានាធិបតី បានកត់សម្គាល់អំពីស្ថានភាពនៃការអភិវឌ្ឍរីកចម្រើន​ដ៏ឆាប់​រហ័សរបស់ប្រទេសកម្ពុជា ​នៅក្រោយការបញ្ចប់ទាំងស្រុងនៃជម្លោះរុំារ៉ៃរាប់ទសវត្សរ៍ ​ដោយ ឯកឧត្តម ​បានវាយតម្លៃថា ជាការអភិវឌ្ឍដែលមានលក្ខណៈជាក់ស្តែង​ និងប្រាកដនិយម។ក្រៅពីនេះ ​ឯកឧត្តម ប្រធានាធិបតី ​និងលោកឧត្តមសេនីយ៍ហ៊ុន ម៉ាណែត ក៏បានផ្លាស់ប្តូរ​យោបល់​គ្នា​ផងដែរ​អំពីទំនាក់ទំនងប្រកប​ដោយ​សក្តានុពល​រវាងប្រទេសទាំងពីរ ជាពិសេសអំពីទស្សនវិស័យ​នៃ​កិច្ចសហប្រតិបត្តិការលើវិស័យសំខាន់ៗមួយចំនួនជាអាទិ៍ ​វិស័យវិនិយោគពាណិជ្ជកម្មនាំចេញ-នាំចូល ​កសិកម្ម អប់រំ ថាមពល ​និងការបើកជើងហោះហើរត្រង់ជាដើម៕អត្ថបទ៖ បាន ចក់

សម្តេចតេជោ ហ៊ុន សែន៖ ចោរក្បត់ជាតិ សម រង្ស៊ី ល្ងង់ពេក និងបានបង្កើតកំហុសធំចំនួនពីរ រហូតនាំទុក្ខដល់អ្នកគាំទ្ររបស់ខ្លួនជាច្រើន

2022/10/20 06:23:39 pm        364
Facebook Telegram Linkin
ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានចង្អុលប្រាប់ទណ្ឌិត សម រង្ស៊ី ដែលសម្តេចបានហៅថាជាចោរក្បត់ជាតិនោះ ថា បានបង្កើតកំហុសយុទ្ធសាស្រ្តធំ២ ដើម្បីឱ្យទណ្ឌិតរូបនេះចេះរៀនសូត្រលើកក្រោយ កុំឱ្យល្ងង់ពេក។ថ្លែងក្នុងឱកាសអញ្ជើញចុះឈ្មោះបោះឆ្នោតថ្មី និងប្តូរព័ត៌មានថ្ងៃខែឆ្នាំកំណើត ក្នុងបញ្ជីឈ្មោះបោះឆ្នោត នៅសង្កាត់តាខ្មៅ ក្រុងតាខ្មៅ ខេត្តកណ្តាល នាថ្ងៃទី២០ ខែតុលា ឆ្នាំ២០២២ សម្ដេចតេជោនាយករដ្ឋមន្ត្រីបានបញ្ជាក់ថា កំហុសទាំងពីរនោះរួមមាន ទី១ គឺការប្រមូលមនុស្សរត់ចេញទៅក្រៅប្រទេស ធ្វើឱ្យក្បាលម៉ាស៊ីនដឹកនាំដាច់ និងកំហុសទី២ គឺ ការដកខ្លួនចេញពីគណៈកម្មាធិការជាតិរៀបចំការបោះឆ្នោត។សម្តេចតេជោ ហ៊ុន សែន ក៏បានដាស់តឿនទៅក្រុមប្រឆាំងទាំងអស់ថា មេដឹកនាំទន់ខ្សោយរបស់ខ្លួនដែលបានបង្កើតកំហុសធំៗទាំងនោះ សក្តិសមជាមេដឹកនាំយុទ្ធសាស្រ្តសម្រាប់បក្សនយោបាយមួយនេះដែរឬទេ៕

សម្តេចតេជោ ហ៊ុន សែន ៖ ការចុះជួបប្រជាពលរដ្ឋ មិនមែនជាយុទ្ធនាការឃោសនាបោះឆ្នោតទេ

2022/10/20 06:01:21 pm        286
Facebook Telegram Linkin
ភ្នំពេញ៖ សម្តេចតេជោ ហ៊ុន សែន បានប្រកាសថា ចំពោះគម្រោងបេសកកម្ម អញ្ជើញចុះជួបពលរដ្ឋនៅជុំវិញបឹងទន្លេសាបប៉ុន្មានថ្ងៃខាងមុខនេះ មិនមែនជាយុទ្ធនាការឃោសនាបោះឆ្នោតទេ គឺជាការចុះជួប ផ្តល់ការឧបត្ថម្ភគាំទ្រដល់ប្រជាពលរដ្ឋ ដែលរងគ្រោះដោយទឹកជំនន់។ថ្លែងក្នុងឱកាសអញ្ជើញចុះឈ្មោះបោះឆ្នោតថ្មី និងប្តូរព័ត៌មានថ្ងៃខែឆ្នាំកំណើត ក្នុងបញ្ជីឈ្មោះបោះឆ្នោត នៅសង្កាត់តាខ្មៅ ក្រុងតាខ្មៅ ខេត្តកណ្តាល នាថ្ងៃទី២០ ខែតុលា ឆ្នាំ២០២២ សម្ដេចតេជោនាយករដ្ឋមន្ត្រី មានប្រសាសន៍ថា ចាប់ពីថ្ងៃទី២១ ដល់ថ្ងៃទី២៥តុលា ឆ្នាំ២០២២ សម្តេចតេជោ ហ៊ុន សែន នឹងមានបេសកកម្មអញ្ជើញទៅកាន់ខេត្តចំនួន៤ ជុំវិញបឹងទន្លេសាប ដើម្បីជួយដោះស្រាយការលំបាកជូនប្រជាជន ជាពិសេសដោះស្រាយឆ្លើយតបទៅនឹងការរៀបចំលំនៅដ្ឋានថ្មីជូនអ្នករុនតាឯក និងពាក់ស្នែង ដែលបានស្ម័គ្រចិត្តចាកចេញពីតំបន់រមណីដ្ឋានអង្គរ និងមួយផ្នែកទៀតអញ្ជើញចុះជួបសួរសុខទុក្ខ និងដោះស្រាយចែកស្រូវពូជជូនកសិករដែលរងគ្រោះខូចដំណាំស្រូវ និងផលដំណាំដោយសារគ្រោះទឹកជំនន់ រួមទាំងកិច្ចការសំខាន់ៗជាច្រើនទៀត។សម្តេច ហ៊ុន​ សែន បានថ្លែងថា «ប្រជាពលរដ្ឋកំពុងតែវេទនា អ៊ីចឹងទុកឱ្យប្រជាជនរងគ្រោះ ហើយនាយករដ្ឋមន្ត្រីនៅស្ងៀមឬយ៉ាងម៉េច? ទេសរដ្ឋមន្ត្រីនានា កំពុងតែធ្វើដំណើរជុំវិញប្រទេស ដើម្បីចែកស្រូវពូជ ចែកស្បៀងអាហារដល់ពលរដ្ឋកំពុងតែជួបបញ្ហា»៕

សម្ដេចតេជោ ហ៊ុន​ សែន ជំរុញមន្ត្រីពន្លឿនការធ្វើអត្តសញ្ញាណប័ណ្ណដល់ពលរដ្ឋ អាចឲ្យពលរដ្ឋចុះឈ្មោះបោះឆ្នោតទាន់ពេលវេលា

2022/10/20 05:20:31 pm        683
Facebook Telegram Linkin
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានជំរុញទៅមន្ត្រីអត្រានុកូលដ្ឋាន ត្រូវពន្លឿនការធ្វើអត្តសញ្ញាណប័ណ្ណដល់ប្រជាពលរដ្ឋ ដើម្បីឲ្យពលរដ្ឋដែល គ្រប់អាយុឈ្មោះបោះឆ្នោតបាន និងអាចចុះឈ្មោះបោះឆ្នោតបានទាន់ពេលវេលា ។ ក្នុងឱកាសអញ្ជើញចុះឈ្មោះបោះឆ្នោតថ្មី និងប្តូរព័ត៌មានថ្ងៃខែឆ្នាំកំណើត ក្នុងបញ្ជីឈ្មោះបោះឆ្នោត នៅសង្កាត់តាខ្មៅ ក្រុងតាខ្មៅ ខេត្តកណ្តាល នាថ្ងៃទី២០ ខែតុលា ឆ្នាំ២០២២ សម្ដេចតេជោនាយករដ្ឋមន្ត្រី មានប្រសាសន៍ថា ការធ្វើអត្តសញ្ញាណប័ណ្ណ មិនមែនជាបញ្ហារបស់គណៈកម្មាធិការជាតិរៀបចំការបោះឆ្នោតនោះទេ (គ.ជ.ប) ប៉ុន្តែជាការងាររបស់មន្ត្រីអត្រានុកូលដ្ឋាន ។ សម្ដេចតេជោ បានបន្តថា ដូចនេះ មន្ត្រីអត្រានុកូលដ្ឋាន ត្រូវពន្លឿនការធ្វើអត្តសញ្ញាណប័ណ្ណ ឬឯកសារពាក់ព័ន្ធនឹងការបោះឆ្នោត ឲ្យបានឆាប់រហ័ស ដើម្បីឲ្យពលរដ្ឋអាចចុះឈ្មោះបោះឆ្នោត ឬការផ្ទេរទីតាំងបោះឆ្នោតជាដើម ឲ្យបានទាន់ពេលតាមការកំណត់របស់ គ.ជ.ប ។ គណៈកម្មាធិការជាតិរៀបចំការបោះឆ្នោត បានប្រកាសថា ការពិនិត្យឈ្មោះ និងការចុះឈ្មោះបោះឆ្នោតឆ្នាំ២០២២ ចាប់ពីថ្ងៃទី២០ ខែតុលា រហូតដល់ថ្ងៃទី៨ ខែធ្នូ ឆ្នាំ២០២២ មានរយៈពេលចំនួន ៥០ថ្ងៃ ។ គិតត្រឹមឆ្នាំ២០២២ ប្រជាពលរដ្ឋខ្មែរ មានឈ្មោះក្នុងបញ្ជីបោះឆ្នោតមានចំនួន ជាង ៩លាន ២សែននាក់ ៕ (អត្ថបទ៖ បាន សុខរិទ្ធិ)

សម្តេចតេជោ​ ហ៊ុន សែន ប្រកាសគាំទ្រសាលក្រមតុលាការដែលដាក់អតិបរមាដល់បុគ្គលឈ្មោះ សម រង្ស៊ី(ជាប់គុកមួយជីវិត)

2022/10/20 04:47:58 pm        643
Facebook Telegram Linkin
ភ្នំពេញ៖ សម្តេចតេជោ ហ៊ុន សែន បានប្រកាសគាំទ្រសាលក្រមតុលាការ ដែលកាត់ទោសឱ្យជនម្នាក់ ឈ្មោះ សម រង្ស៊ី ជាប់ពន្ធនាគារអស់មួយជីវិត ក្នុងសំណុំរឿងចុះកិច្ចព្រមព្រៀងរវាង សម រង្ស៊ី និងកុក សរ កាត់ដីកម្ពុជាចំនួន ៤ខេត្តឱ្យជនជាតិភាគតិចម៉ុងតាញ៉ា(វៀតណាម)។ថ្លែងប្រាប់ក្រុមអ្នកសារព័ត៌មានក្រោយពេលសម្តេច អញ្ជើញប្តូរព័ត៌មានថ្ងៃខែឆ្នាំកំណើត ក្នុងបញ្ជីឈ្មោះបោះឆ្នោតថ្មី នៅព្រឹកថ្ងៃទី២០ ខែតុលា ឆ្នាំ២០២២នេះ នៅក្រុងតាខ្មៅខេត្តកណ្តាល សម្តេចបានប្រកាសប្រឆាំងដាច់ណាត់នឹងនយោបាយអមិត្តជាមួយបុគ្គល សម រង្ស៊ី ដែលធ្វើនយោបាយបំផ្លាញជាតិ និងផលប្រយោជន៍ប្រជាពលរដ្ឋកម្ពុជា។សម្តេចតេជោ ហ៊ុន សែន បានប្រកាសដល់គ្រប់បក្សនយោបាយទាំងអស់ សូមកុំភ្ជាប់ខ្លួនជាមួយបុគ្គលទណ្ឌិតសម រង្ស៊ី បើមិនចង់មានបញ្ហាប្រឈមដល់ខ្លួនឯង នៃវិធានការតាមផ្លូវច្បាប់។ សម្តេចតេជោ ហ៊ុន សែន ប្រកាសថា ទណ្ឌិតសម រង្ស៊ី គ្មានផ្លូវដើរនៅកម្ពុជាទៀតទេ ហើយអ្នកដែលងើបប្រឆាំងជាមួយរាជរដ្ឋាភិបាល ឬអាជ្ញាធរសាធារណៈ ដោយគាំទ្របុគ្គលជាទណ្ឌិតរូបនោះ ក៏នឹងមានវិធានការដូចគ្នា«ងើបមួយ វាយមួយ, ងើបពីរ វាយពីរ»។សម្តេចតេជោ ហ៊ុន សែនបញ្ជាក់ថា «ក្នុងប្រវត្តិសាស្ត្រជាង ៥០០ឆ្នាំរបស់កម្ពុជា មានតែជនក្បត់ជាតិ ៣ជំនាន់ ឈ្មោះទណ្ឌិត សម រង្ស៊ី ប៉ុណ្ណោះ ដែលខូច និងពុតត្បុតជាងគេ»។សូមបញ្ជាក់ថា តុលាការរាជធានីភ្នំពេញ កាលពីថ្ងៃទី១៩ តុលានេះ បានប្រកាសសាលក្រមផ្តន្ទាទោសកំបាំងមុខទណ្ឌិត សម រង្ស៉ី មេក្រុមឧទ្ទាមក្រៅច្បាប់ និងជាពូជក្បត់ជាតិ ៣ជំនាន់ជាប់ពន្ធនាគារ អស់មួយជីវិត និងហាមឃាត់មិនឱ្យធ្វើនយោបាយអស់មួយជីវិតផងដែរ ក្នុងសំណុំរឿងចុះហត្ថលេខាលើកិច្ចព្រមព្រៀងមួយជាមួយឈ្មោះ កុក សរ ប្រធានមូលនិធិជនជាតិដើមភាគតិចម៉ុងតាញ៉ា។សម្តេចតេជោ ហ៊ុន សែន ប្រកាសដាច់ណាត់ថា គ្មានផ្លូវចុះហត្ថលេខាដើម្បីស្នើទៅព្រះមហាក្សឲ្យលើកលែទោសដល់ទណ្ឌិតក្រៅច្បាប់នេះម្តងទៀតនោះឡើយ ផ្ទុយទៅវិញសម្តេចមានតែបំផុសចលនាដើម្បីនឹងកំចាត់ចោលនូវមនោគម វិជ្ជាជ្រុលនិយមរបស់ជនក្បតិជាតិបីជំនាន់នេះថែមទៀត៕

សម្តេចតេជោ ហ៊ុន សែន អញ្ជើញប្តូរព័ត៌មានថ្ងៃខែឆ្នាំកំណើត ក្នុងបញ្ជីឈ្មោះបោះឆ្នោតថ្មី

2022/10/20 04:29:43 pm        700
Facebook Telegram Linkin
 ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៅព្រឹកថ្ងៃទី២០ ខែតុលា ឆ្នាំ២០២២នេះ បានអញ្ជើញប្តូរព័ត៌មានថ្ងៃខែឆ្នាំកំណើតក្នុងបញ្ជីឈ្មោះបោះឆ្នោត ដោយប្តូរពីថ្ងៃទី០៤ ខែមេសា ឆ្នាំ១៩៥១ ទៅថ្ងៃទី០៥ ខែសីហា ឆ្នាំ១៩៥២ វិញ។គួររំលឹកថា កន្លងទៅនេះ សម្តេចតេជោ ហ៊ុន សែន បានយកថ្ងៃទី០៤ ខែមេសា ឆ្នាំ១៩៥១ ប្រើប្រាស់ជាថ្ងៃខែឆ្នាំកំណើតក្នុងឯកសារផ្សេងៗចាប់តាំងពីក្រោយថ្ងៃរំដោះប្រទេសចេញពីរបបប្រល័យពូជសាសន៍ ប៉ុល ពត។ ថ្ងៃទី៤ ខែមេសា ជាថ្ងៃដែលសម្តេចចូលព្រៃតស៊ូវាយផ្តួលរបបសាធារណរដ្ឋខ្មែរ តាមការអំពាវនាវរបស់សម្តេច នរោត្តម សីហនុ។ ទើបតែឆ្នាំ២០២២នេះ សម្តេចតេជោ ហ៊ុន សែន បានស្នើទៅតុលាការ ដើម្បីផ្លាស់ប្តូរថ្ងៃខែឆ្នាំកំណើត មកថ្ងៃខែឆ្នាំកំណើតពិតវិញ គឺថ្ងៃទី០៥ ខែសីហា ឆ្នាំ១៩៥២។ នៅថ្ងៃទី២០ ខែមិថុនា ឆ្នាំ២០២២ លោក តាំង ស៊ុនឡាយ ប្រធានសាលាដំបូង និងជាចៅក្រមសាលាដំបូងរាជធានី សម្រេចឱ្យប្រើប្រាស់ថ្ងៃខែឆ្នាំកំណើតពិត និងបង្គាប់ឱ្យមន្ត្រីអត្រានុកូលដ្ឋានមានសមត្ថកិច្ច ព្រមទាំងអាជ្ញាធរ និងស្ថាប័នមានសមត្ថកិច្ចពាក់ព័ន្ធកែតម្រូវគល់បញ្ជីសំបុត្របញ្ជាក់កំណើតលេខ២៤១ ចុះថ្ងៃទី០៣ ខែសីហា ឆ្នាំ២០០៦ ក្នុងសៀវភៅបញ្ជាក់កំណើតលេខ០៣/២០០៦ ចេញដោយមន្ត្រីអត្រានុកូលដ្ឋានសង្កាត់ចតុមុខ ខណ្ឌដូនពេញ រាជធានីភ្នំពេញ ព្រមទាំងឯកសារបញ្ជាក់អត្តសញ្ញាណពាក់ព័ន្ធផ្សេងទៀតរបស់សម្តេចតេជោ ហ៊ុន សែន៕

បណ្តាញស្ត្រីដើម្បីសន្តិភាពអន្តរជាតិ និងពលរដ្ឋថ្កោលទោសទណ្ឌិត សម រង្ស៊ី ដែលចង់ផ្តួលរំលំរដ្ឋាភិបាល

2022/10/19 08:45:33 pm        544
Facebook Telegram Linkin
ភ្នំពេញ៖ គណៈកម្មាធិការស្ត្រីដើម្បីសន្តិភាពអន្តរជាតិប្រចាំនៅកម្ពុជា ​និងពលរដ្ឋ បានលើកឡើង​ប្រឆាំងដាច់ខាត និងថ្កោលទោសយ៉ាងដាច់អហង្ការចំពោះទណ្ឌិត សម រង្ស៉ី ដែល​អំពាវនាវ​ឱ្យ​កងកម្លាំងប្រដាប់អាវុធ ​និងប្រជាពលរដ្ឋ​ ផ្តួលរំលំរដ្ឋាភិបាលស្របច្បាប់ ប្រាស់​ចាក​ពីរដ្ឋធម្មនុញ្ញ។ប្រធានគណៈកម្មាធិការស្ត្រីដើម្បីសន្តិភាពអន្តរជាតិប្រចាំនៅកម្ពុជា ​លោកស្រី ហូយ សុជីវណ្ណនី បានថ្លែងប្រាប់BTV នៅថ្ងៃទី១៩ ខែតុលានេះថា ​ការអំពាវនាវរបស់ទណ្ឌិត សម រង្ស៉ី ​ពីក្រៅប្រទេស ដែល​ឱ្យកងកម្លាំងប្រដាប់អាវុធ ​និងប្រជាពលរដ្ឋ ​ងើបឡើងផ្តួលរំលំរាជរដ្ឋាភិបាលស្របច្បាប់នោះ គឺជា​សម្តីដែលមានចេតនាចង់ឲ្យបណ្តាអ្នកគាំទ្រខ្លួន ​បង្ករបាតុភាពអសន្តិសុខ​ បំផ្លាញសុខសន្តិភាព បំផ្លាញការរស់នៅភាពសុខស្រួល និងការប្រកបរបររកស៊ីនានារបស់ប្រជាពលរដ្ឋនៅកម្ពុជា ។ជាមួយគ្នា ​អាជីវករលក់ដូរនៅតាមផ្សារ ​បានចាត់ទុកទណ្ឌិត សម រង្ស៉ី ថាជាអ្នកនយោបាយ​ប្រជាភិថុតិ ដែលមានតែស្រមោល ​ហើយការអំពាវនាវរបស់បុគ្គលរូបនេះ រឹតតែជំរុញ​ឲ្យ​ពលរដ្ឋ​ទូទាំង​ប្រទេស ​មិនពេញចិត្តកាន់ខ្លាំងថែមទៀត ​ចំពោះគំនិតទុច្ចរិតនយោបាយពិតប្រាកដ​របស់​ជនក្បត់ជាតិរូបនេះ។ជុំវិញការអំពាវនាវរបស់ទណ្ឌិត សម រង្ស៊ី ឲ្យកងកម្លាំងប្រដាប់អាវុធ​ងើបឡើងប្រឆាំង​រដ្ឋាភិបាល​ស្របច្បាប់​ជាថ្មីម្តងនេះ ​ត្រូវបានសម្តេចតេជោ ​ហ៊ុន សែន​ ចាត់ទុកថា ជា​ទង្វើផ្ទុយ​ពី​លទ្ធិប្រជាធិបតេយ្យ ​និងរដ្ឋធម្មនុញ្ញ ​ហើយសម្តេច​បានហៅ​បុគ្គលរូបនេះថា ជាពូជក្បត់ជាតិ​បីជំនាន់។ សម្តេចតេជោ ថែមទាំង​ប្រកាស​នូវគោលការណ៍​ម៉ឺងម៉ាត់​កម្ចាត់ចោល​នូវ​មនោគមវិជ្ជា​នយោបាយ​ជ្រុល​និយមរបស់ពូជក្បត់ជាតិនេះផងដែរ។ ការលើកឡើងរបស់​សម្តេចតេជោ ​បែបនេះ នៅ​ក្នុង​ពិធីចែកសញ្ញាបត្រដល់និស្សិតសកលវិទ្យាល័យជាតិគ្រប់គ្រង ​កាលពីថ្ងៃទី ១៧ ខែតុលា កន្លងទៅ៕អត្ថបទ ស៊ុម សុខជា

ប្រធានាធិបតីទីម័រឡេស្តេ អញ្ជើញមកដល់រាជធានីភ្នំពេញហើយ ដើម្បីបំពេញទស្សនកិច្ចផ្លូវរដ្ឋនៅកម្ពុជា

2022/10/19 07:33:28 pm        665
Facebook Telegram Linkin
ភ្នំពេញ៖ នៅព្រឹកថ្ងៃទី១៩ ខែតុលា ឆ្នាំ ២០២២នេះ ឯកឧត្តម បណ្ឌិត ចូហ្សេ ម៉ានូអែល រ៉ាមូស អរតា (Jose Ramos-Horta) ប្រធានាធិបតីទីម័រឡេស្តេ ដឹកនាំគណៈប្រតិភូជាន់ខ្ពស់ បានអញ្ជើញមកដល់រាជធានីភ្នំពេញហើយ ដើម្បីបំពេញទស្សនកិច្ចផ្លូវរដ្ឋនៅកម្ពុជា ចាប់ពីថ្ងៃទី ១៩ ដល់ថ្ងៃទី២១ ខែតុលា ឆ្នាំ២០២២។ ដំណើរទស្សនកិច្ចធ្វើឡើងតបតាមការអញ្ជើញរបស់ព្រះករុណា ព្រះបាទសម្តេច នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។ក្នុងអំឡុងពេលទស្សនកិច្ចផ្លូវរដ្ឋនេះ ឯកឧត្តម បណ្ឌិត Jose Ramos-Horta នឹងចូលក្រាបបង្គំគាល់​ព្រះករុណាជាអម្ចាស់ជីវិតលើត្បូង នៅព្រះបរមរាជវាំង។ ឯកឧត្តម ប្រធានាធិបតី ក៏នឹងមាន​ជំនួបដោយឡែកពីគ្នាជាមួយ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា, សម្តេចពញាចក្រី ហេង សំរិន ប្រធានរដ្ឋសភា និងសម្តេចតេជោ ហ៊ុន សែន នាយករដ្ឋមន្ត្រីកម្ពុជា។សម្តេចតេជោ នាយករដ្ឋមន្ត្រី និងឯកឧត្តមប្រធានាធិបតីទីម័រខាងកើត នឹងអញ្ជើញជាអធិបតីដ៏​ខ្ពង់ខ្ពស់​ក្នុងពិធីចុះហត្ថលេខា លើឯកសារទ្វេភាគីដ៏មានសារសំខាន់ចំនួនពីរ រួមមាន៖ កិច្ច​ព្រមព្រៀងសេវាកម្មអាកាសចរណ៍ និងអនុស្សរណៈនៃការយោគយល់ ស្តីពីពាណិជ្ជកម្មស្រូវរវាង​ប្រទេសទាំងពីរ។ឯកឧត្តម បណ្ឌិត Jose Ramos-Horta នឹងអញ្ជើញដាក់កម្រងផ្កាគោរពវិញ្ញាណក្ខន្ធ ​នៅវិមានឯករាជ្យ និងកន្រ្តកផ្កានៅមណ្ឌបព្រះបរមរូប ព្រះករុណា ព្រះបាទសម្តេច ព្រះនរោត្តម សីហនុ «ព្រះបរមរតនកោដ្ឋ» ​អតីតព្រះមហាក្សត្រនៃព្រះរាជាណាចក្រកម្ពុជាផងដែរ។ដំណើរទស្សនកិច្ចផ្លូវរដ្ឋរបស់ ​ឯកឧត្តម បណ្ឌិត ចូហ្សេ ម៉ានូអែល រ៉ាមូស អរតា ​មកកាន់កម្ពុជា នឹង​បន្តពង្រឹង និងធ្វើឱ្យកាន់តែស៊ីជម្រៅបន្ថែមទៀតនូវទំនាក់ទំនង ​និងកិច្ចសហប្រតិបត្តិការ ទាំងនៅ​ក្នុងក្របខ័ណ្ឌទ្វេភាគី និងពហុភាគី ​ដើម្បីផលប្រយោជន៍ទៅ​វិញទៅមក​នៃ​ប្រទេសទាំងពីរ៕

ប្រធានាធិបតីទីម័រខាងកើត ចាប់ផ្តើមបំពេញទស្សនកិច្ចផ្លូវរដ្ឋនៅកម្ពុជា

2022/10/19 05:07:25 pm        860
Facebook Telegram Linkin
ភ្នំពេញ៖ ឯកឧត្តមបណ្ឌិត ចូហ្សេ ម៉ានូអែល រ៉ាមូស អរតា ប្រធានាធិបតីនៃសាធារណរដ្ឋប្រជាធិបតេយ្យទីម័រខាងកើត ចាប់ផ្តើមដឹកនាំគណៈប្រតិភូជាន់ខ្ពស់បំពេញទស្សនកិច្ចផ្លូវរដ្ឋនៅព្រះរាជាណាចក្រកម្ពុជា នាព្រឹកថ្ងៃទី ១៩ ដល់ថ្ងៃទី២១ ខែតុលា ឆ្នាំ២០២២នេះ តបតាមការអញ្ជើញរបស់ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។យោងតាមសេចក្ដីជូនដំណឹងរបស់ក្រសួងការបរទេសកម្ពុជា បានឱ្យដឹងថា ក្នុងអំឡុងពេល​ទស្សនកិច្ចផ្លូវរដ្ឋនេះ ឯកឧត្ដម​ប្រធានាធិបតី នឹងចូលក្រាបបង្គំគាល់​ព្រះករុណា ព្រះបាទសម្តេច នរោត្តម សីហមុនី ព្រះមហាក្សត្រខ្មែរ នៅព្រះបរមរាជវាំង។ឯកឧត្ដមប្រធានាធិបតី ក៏នឹងមានជំនួបដោយឡែកពីគ្នាជាមួយ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា, សម្តេចពញាចក្រី ហេង សំរិន ប្រធានរដ្ឋសភា និងសម្តេចតេជោ ហ៊ុន សែន នាយករដ្ឋមន្ត្រីកម្ពុជា។សម្តេចតេជោនាយករដ្ឋមន្ត្រី និងលោកប្រធានាធិបតីទីម័រខាងកើត នឹងអញ្ជើញ​ជា​អធិបតី​ភាព​ដ៏​ខ្ពង់​ខ្ពស់​ក្នុងពិធីចុះហត្ថលេខា លើឯកសារទ្វេភាគី​ដ៏​មាន​សារៈ​សំខាន់​ចំនួន​ពីរ រួមមាន៖ កិច្ចព្រម​ព្រៀង​សេវាកម្មអាកាសចរណ៍ និងអនុស្សរណៈនៃការយោគយល់ ស្តីពីពាណិជ្ជកម្មស្រូវរវាងប្រទេសទាំងពីរ។ឯកឧត្ដមប្រធានាធិបតីទីម័រឡេស្ដេ ក៏​នឹងអញ្ជើញដាក់កម្រងផ្កាគោរពវិញ្ញាណក្ខន្ធ នៅ​វិមាន​ឯករាជ្យ និងកន្រ្តកផ្កានៅមណ្ឌបព្រះបរមរូប ព្រះករុណា ព្រះបាទសម្តេច ព្រះនរោត្តម សីហនុ «ព្រះបរមរតនកោដ្ឋ» អតីតព្រះមហាក្សត្រនៃព្រះរាជាណាចក្រកម្ពុជាផងដែរ។ក្នុងអំឡុងពេលស្នាក់នៅភ្នំពេញ ឯកឧត្ដមបណ្ឌិត ចូហ្សេ ម៉ានូអែល រ៉ាមូស អរតា នឹងទទួល​ការ​ចូល​ជួប​សម្តែងការគួរសមរបស់លោកបណ្ឌិត ហ៊ុន ម៉ាណែត អគ្គមេបញ្ជាការរង នៃកង​យោធពល​ខេមរ​ភូមិន្ទ និងជាមេបញ្ជាការកងទ័ពជើងគោក, អញ្ជើញ​ធ្វើ​បាឋកថា​សាធារណៈ​នៅ​សាកល​វិទ្យាល័យល្បីៗ នៅរាជធានីភ្នំពេញ, ផ្តល់បទសម្ភាសន៍ដល់ស្ថាប័នព័ត៌មានក្នុងប្រទេស ក៏ដូចជា ថ្លែង​សុន្ទរកថានៅក្នុងវេទិកាកម្ពុជា-ទីម័រខាងកើតលើកទី១ ស្តីពីទេសចរណ៍ និងធុរកិច្ច ដើម្បី​ការ​អភិវឌ្ឍ និងសន្តិភាពប្រកបដោយចីរភាពផងដែរ។ដំណើរទស្សនកិច្ចផ្លូវរដ្ឋរបស់ឯកឧត្ដមបណ្ឌិត ចូហ្សេ ម៉ានូអែល រ៉ាមូស អរតា មកកាន់កម្ពុជា នឹងបន្តពង្រឹង និងធ្វើឱ្យ​កាន់​តែ​ស៊ីជម្រៅ​បន្ថែម​ទៀត​នូវ​ទំនាក់​ទំនង និងកិច្ចសហប្រតិបត្តិការ ទាំងនៅក្នុងក្របខ័ណ្ឌទ្វេភាគី និងពហុភាគី ដើម្បី​ផល​ប្រយោជន៍ទៅវិញទៅមកនៃប្រទេសទាំងពីរ៕

បណ្ដាញសង្គម

ព័ត៌មានថ្មីៗ

ក្រុមប្រឆាំងឥណ្ឌា តវ៉ាប្រឆាំង​វិធានការរបស់នគរបាល​លើសមាជិកសភា និងជំរុញ​ឱ្យប្រមុខ​បោះឆ្នោតចុះ​ពីតំណែង
10/08/2026 07:10 PM
Facebook Telegram Linkin
ទីក្រុង Liege របស់បែលហ្ស៊ិក ហាមជួបជុំគ្នាតាមដងផ្លូវលើសពី ៣នាក់ ស្រប​ពេលមានការតវ៉ារបស់សិស្ស-និស្សិត
10/08/2026 07:10 PM
Facebook Telegram Linkin
ប្រធានាធិបតីហ្វីលីពីន៖ ការចរចាលើក្រមប្រតិបត្តិ នៅសមុទ្រចិនខាងត្បូង កំពុងមាន «វឌ្ឍនភាពល្អ»
10/08/2026 07:10 PM
Facebook Telegram Linkin
សម្ដេចតេជោ បង្ហាញចំណាប់អារម្មណ៍ទៅលើអត្ថបទរបស់អ្នកវិភាគថៃ ក្រោមចំណងជើងថា ​«ពិនិត្យមើលបញ្ហាជាតិនិយម និងលាតត្រដាងបញ្ហាសំខាន់ៗដែលមិនអាចដោះស្រាយបាន ហើយក៏មិនអាចគេចផុតបាន»
10/08/2026 06:10 PM
Facebook Telegram Linkin
CNN, MS NOW និង Politico នឹងស្នើឱ្យចៅក្រមរារាំងការហាមឃាត់របស់សេតវិមានរយៈពេលវែង
10/08/2026 06:10 PM
Facebook Telegram Linkin
មន្ត្រី៖ ការវាយប្រហារដោយ​រុស្ស៊ីចំ​​រថយន្តក្រុង សម្លាប់មនុស្ស ៣៣នាក់ ខណៈប្រតិបត្តិការ​លើអ៊ុយក្រែន កើនឡើង
10/08/2026 06:10 PM
Facebook Telegram Linkin
ការបិទផ្លូវសាលារៀន នៅបារាំង នៅតែបន្តមាន​ ក្រោយ​នាយករដ្ឋមន្ត្រីផ្ដល់​ការ​សន្យាមិន​ច្បាស់លាស់​
10/08/2026 06:10 PM
Facebook Telegram Linkin
ទូរទស្សន៍៖ កិច្ចខិតខំប្រឹងប្រែងសម្របសម្រួលក្នុងកិច្ចចរចាអ៊ីរ៉ង់-អាមេរិក ឈានដល់ភាពជាប់គាំង
10/08/2026 06:10 PM
Facebook Telegram Linkin
បេក្ខជនជាប់ប្រមុងការប្រឡងគ្រូបឋមកាលពីឆ្នាំមុន បន្តទទួលបានឱកាសចាប់ប៉ុស្តិ៍បង្រៀននៅឆ្នាំសិក្សាថ្មី
10/08/2026 05:10 PM
Facebook Telegram Linkin
ពេទ្យរដ្ឋ ពង្រឹងសមត្ថភាពវិនិច្ឆ័យជំងឺ ទប់ស្កាត់ជំងឺធ្ងន់ លើកកម្ពស់សុខភាពពលរដ្ឋតាមចក្ខុវិស័យរដ្ឋាភិបាល
10/08/2026 05:10 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.