នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ស្ពានមិត្តភាពកម្ពុជា-ចិន មេគង្គក្រចេះ នឹងបើកជូនពលរដ្ឋឆ្លងកាត់ចាប់ពីថ្ងៃទី១មេសា ឆ្នាំ​២០២៦​តទៅ
សម្តេចតេជោ ហ៊ុន សែន ដឹកនាំកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា ដើម្បី​សម្រេច​លើ​របៀប​វារៈចំនួន៧
បេក្ខជន និងសកម្មជនគណបក្សភ្លើងទៀនចំនួន៤នាក់នៅស្រុកកណ្តាលស្ទឹង ចូលរួម​ជីវភាពនយោបាយ ជាមួយគណបក្សប្រជាជនកម្ពុជា
ស្ថានីយប្រព្រឹត្តកម្មទឹកកខ្វក់ក្រុងកំពង់ឆ្នាំងតម្លៃជាង ១៩លានដុល្លារ ត្រូវបាន​សម្ពោធ​ដាក់​ឲ្យ​ប្រើ​ប្រាស់​ជាផ្លូ​វការ​នៅថ្ងៃនេះ

នយោបាយ​ និង ការអភិវឌ្ឍន៍

ហ្វីលីពីន ច្រានចោលការចោទប្រកាន់របស់ចិន ពីការបំផ្លាញបរិស្ថាននៅសមុទ្រចិនខាងត្បូង

2024/07/09 09:42:18 am        113
Facebook Telegram Linkin
ហ្វីលីពីន នៅថ្ងៃអង្គារ (០៩ កក្កដា) នេះបានច្រានចោលការចោទប្រកាន់របស់ចិន ដែលថានាវាចម្បាំងចតចោលរបស់ខ្លួនលើដែនទឹក សេខិន ថូម៉ាស ស្ហូល (Second Thomas Shoal) ដ៏ប្រកួតប្រជែងនៅសមុទ្រចិនខាងត្បូង បានធ្វើឱ្យខូចប្រព័ន្ធអេកូឡូស៊ីថ្មប៉ប្រះទឹកនៅតំបន់នោះ ដោយទម្លាក់កំហុសចំពោះការបំផ្លាញបរិស្ថានសមុទ្រនេះលើទីក្រុងប៉េកាំង។ក្រុមការងារហ្វីលីពីន នៅសមុទ្រចិនខាងត្បូង ក្នុងសេចក្តីថ្លែងការណ៍មួយបានអំពាវនាវឱ្យមានការវាយតម្លៃផ្នែកវិទ្យាសាស្ត្រសមុទ្រដោយឯករាជ្យ និងពីភាគីទីបី អំពីមូលហេតុនៃការខូចខាតនៃផ្កាថ្មរបស់ថ្មប៉ប្រះទឹកនៅសមុទ្រចិនខាងត្បូង។ក្រុមការងារនោះបាននិយាយថា «គឺប្រទេសចិនទេដែលបានធ្វើឱ្យមានការខូចខាតដែលមិនអាចជួសជុលបានចំពោះផ្កាថ្មទាំងនោះ។ គឺប្រទេសចិនទេដែលបានធ្វើឱ្យខូចខាតដល់បរិស្ថានសមុទ្រ និងបានធ្វើឱ្យប៉ះពាល់ដល់ជម្រកធម្មជាតិ រួមទាំងការចិញ្ចឹមជីវិតរបស់អ្នកនេសាទហ្វីលីពីនរាប់ពាន់នាក់»។គួររលឹកថា កាលពីថ្ងៃចន្ទ ក្រសួងធនធានធម្មជាតិរបស់ប្រទេសចិន បាននិយាយនៅក្នុងរបាយការណ៍មួយថា នាវាចម្បាំងហ្វីលីពីនបាន «ចូលចតដោយខុសច្បាប់» ជុំវិញតំបន់ថ្មប៉ប្រះទឹក សេខិន ថូម៉ាស ស្ហូល នៅជិតកោះ ណានសា (Nansha) អស់រយៈពេលជាយូរមកហើយ «ហើយបានធ្វើឱ្យខូចខាតយ៉ាងធ្ងន់ធ្ងរដល់ភាពចម្រុះ ស្ថិរភាព និងនិរន្តរភាពនៃប្រព័ន្ធអេកូឡូស៊ីរបស់ដែនទឹកនោះ»៕

លោក Xi អំពាវនាវឱ្យមហាអំណាចពិភពលោកជួយឱ្យរុស្ស៊ី និងអ៊ុយក្រែន បន្តកិច្ចសន្ទនាដោយផ្ទាល់

2024/07/09 09:09:10 am        91
Facebook Telegram Linkin
ប្រធានាធិបតីចិន លោក ស៊ី ជីនពីង (Xi Jinping) បានប្រាប់នាយករដ្ឋមន្ត្រីហុងគ្រី លោក វីកទ័រ អ័របាន (Viktor Orban) កាលពីថ្ងៃចន្ទ (០៨ កក្កដា) ក្នុងអំឡុងដំណើរទស្សនកិច្ចទៅកាន់ទីក្រុងប៉េកាំង ដែលហៅថា «បេសកកម្មសន្តិភាព» ដោយមេដឹកនាំអឺរ៉ុបរូបនេះថា បណ្ដាមហាអំណាចពិភពលោកគួរតែជួយឱ្យរុស្ស៊ី និងអ៊ុយក្រែន ចាប់ផ្តើមការចរចាដោយផ្ទាល់ឡើងវិញ។ដំណើរទៅកាន់ប្រទេសចិន របស់លោក Orban ធ្វើឡើងមួយថ្ងៃមុនពេលសម្ព័ន្ធយោធា ណាតូ (NATO) រៀបចំកិច្ចប្រជុំកំពូលមួយដើម្បីប្រារព្ធខួបលើកទី៧៥ របស់ខ្លួន ដែលសង្រ្គាមអ៊ុយក្រែន នឹងក្លាយជាប្រធានបទសំខាន់ក្នុងការពិភាក្សា ហើយបន្ទាប់ពីដំណើរទស្សនកិច្ចដ៏គួរឱ្យភ្ញាក់ផ្អើលរបស់នាយករដ្ឋមន្ត្រីហុងគ្រីរូបនេះទៅកាន់ប្រទេសរុស្ស៊ី និងអ៊ុយក្រែនកាលពីសប្តាហ៍មុន។លោក Orban បាននិយាយមុននេះថា ដំណើរដែលមិនមានការប្រកាសជាមុនទៅទីក្រុងប៉េកាំងមួយនេះគឺជា «បេសកកម្មសន្តិភាព 3.0»។ ទូរទស្សន៍រដ្ឋចិន CCTV បានដកស្រង់សម្តីលោក Xi ដោយនិយាយថា «សហគមន៍អន្តរជាតិគួរតែបង្កើតលក្ខខណ្ឌ និងផ្តល់ជំនួយសម្រាប់ភាគីទាំងពីរដើម្បីបន្តការសន្ទនា និងការចរចាដោយផ្ទាល់ឡើងវិញ»។បន្ទាប់ពីកិច្ចពិភាក្សា លោក Orban បានសរសេរនៅលើបណ្ដាញសង្គម X ថា ប្រទេសចិនគឺជា «មហាអំណាចសំខាន់ក្នុងការបង្កើតលក្ខខណ្ឌសម្រាប់សន្តិភាព» នៅក្នុងសង្គ្រាមរុស្ស៊ី-អ៊ុយក្រែន។ លោក Orban បានជួបពិភាក្សាជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) កាលពីថ្ងៃសុក្រសប្ដាហ៍មុន អំពីសង្គ្រាមនៅអ៊ុយក្រែន ក្នុងដំណើរទស្សនកិច្ចដែលត្រូវបានរិះគន់ដោយទីក្រុងគីវ និងសហភាពអឺរ៉ុប។ លោក Putin បានប្រាប់លោក Orban ថាអ៊ុយក្រែនត្រូវតែដកកងទ័ពរបស់ខ្លួនចេញពីតំបន់ដែលទីក្រុងមូស្គូបានដាក់បញ្ចូល ប្រសិនបើខ្លួនចង់បានសន្តិភាព៕

លោក Biden បញ្ជាក់ប្រាប់សមាជិកបក្សប្រជាធិបតេយ្យ ថាលោកមិនបោះបង់យុទ្ធនាការបោះឆ្នោតឡើយ

2024/07/09 09:04:49 am        67
Facebook Telegram Linkin
ប្រធានាធិបតីអាមេរិក លោក ចូ បៃដិន (Joe Biden) បានប្តេជ្ញាជាថ្មីម្ដងទៀតក្នុងការបន្តកិច្ចប្រឹងប្រែងបោះឆ្នោតឡើងវិញរបស់ខ្លួនកាលពីថ្ងៃចន្ទ (០៨ កក្កដា) ដោយច្រានចោលការព្រួយបារម្ភរបស់សមាជិកបក្សប្រជាធិបតេយ្យមួយចំនួននៅវិមាន កាពីតូល (Capitol) និងម្ចាស់ជំនួយ ដែលថាការរឹងទទឹងរបស់លោកអាចធ្វើឱ្យគណបក្សពួកគេបាត់បង់តំណែងសេតវិមាន និងសភា ក្នុងការបោះឆ្នោតសហរដ្ឋអាមេរិក នៅថ្ងៃទី០៥ ខែវិច្ឆិកា ខាងមុខនេះ។លោក Biden វ័យ ៨១ ឆ្នាំបាននិយាយថា បេក្ខជនណាម្នាក់ដែលសង្ស័យសមត្ថភាពរបស់លោកអាចទៅប្រកួតប្រជែងនឹងលោកបាន នៅក្នុងសន្និបាតជាតិប្រជាធិបតេយ្យក្នុងខែសីហា ដោយនោះជាកិច្ចប្រឹងប្រែងដែលមិនមានឱកាសជោគជ័យទេ លុះត្រាតែលោកអនុញ្ញាតឱ្យគណៈប្រតិភូដែលលោកបានឈ្នះនៅក្នុងការបោះឆ្នោតបឋមនៅឆ្នាំនេះ ពិចារណាបេក្ខជនផ្សេងទៀត។លោក Biden បាននិយាយនៅក្នុងការហៅទូរសព្ទដែលលោកបញ្ជូនឱ្យទៅកម្មវិធី «អរុណសួស្ដីប្រធានាធិបតី» (Morning Joe) របស់ទូរទស្សន៍ MSNBC ថា៖ «ចំណុចសំខាន់នៅទីនេះគឺថាខ្ញុំមិនចេញទៅណាទេ»។ លោកបានបញ្ជូនសារនោះបន្តទៅប្រាប់ម្ចាស់ជំនួយ តាមការហៅទូរសព្ទផ្ទាល់ខ្លួននៅពេលល្ងាចថ្ងៃដដែល នេះបើយោងតាមប្រភពពីរដែលដឹងពីបញ្ហានោះ។លោក Biden ប្រឈមមុខនឹងសប្តាហ៍ដ៏តានតឹងមួយ ខណៈលោកព្យាយាមបន្តយុទ្ធនាការបោះឆ្នោត ដែលរងភាពង្គោះរង្គើ ចាប់តាំងពីការជជែកដេញដោលដ៏រអាក់រអួលកាលពីថ្ងៃទី២៧ ខែមិថុនា ប្រឆាំងនឹងលោក ដូណាល់ ត្រាំ (Donald Trump) ដោយនោះបានចោទជាសំណួរអំពីសមត្ថភាពរបស់លោកក្នុងការបន្តតំណែងសម្រាប់រយៈពេល ៤ ឆ្នាំកន្លះទៀត៕

ប្រទេសប្រេស៊ីល អនុម័តពាណិជ្ជកម្មសេរីជាមួយអាជ្ញាធរប៉ាឡេស្ទីន ក្នុងការបង្ហាញពីការគាំទ្រ

2024/07/09 08:49:05 am        92
Facebook Telegram Linkin
ប្រទេសប្រេស៊ីល បានដាក់ចូលជាធរមាននូវកិច្ចព្រមព្រៀងពាណិជ្ជកម្មសេរីជាមួយអាជ្ញាធរប៉ាឡេស្ទីនដែលកំពុងរង់ចាំការផ្តល់សច្ចាប័នអស់រយៈពេលជាងមួយទសវត្សរ៍មកហើយ នៅក្នុងការបង្ហាញពីការគាំទ្រសម្រាប់ពលរដ្ឋប៉ាឡេស្ទីន។ប្រធានាធិបតី លោក លូអ៊ីស អ៊ីណាស៊ីញ៉ូ លូឡា ដា ស៊ីលវ៉ា(Luiz Inacio Lula da Silva) បានលើកឡើងពីកិច្ចព្រមព្រៀងនេះក្នុងអំឡុងសុន្ទរកថារបស់លោក នៅក្នុងកិច្ចប្រជុំកំពូលក្រុមសេដ្ឋកិច្ចប្រទេសអាមេរិកឡាទីនលើកទី៦៤ នៅប្រទេសប៉ារ៉ាហ្គាយកាលពីថ្ងៃចន្ទ។ មេដឹកនាំរូបនេះ បាននិយាយថា លោកសោកស្ដាយចំពោះកិច្ចព្រមព្រៀង ដែលបានកើតឡើងក្នុងពេលបរិបទនៃសង្គ្រាម។ក្រសួងការបរទេស បាននិយាយនៅក្នុងសេចក្តីថ្លែងការណ៍ថា ប្រទេសប្រេស៊ីល ដែលបានទទួលស្គាល់រដ្ឋប៉ាឡេស្ទីន និងបានអនុញ្ញាតឱ្យដាក់ស្ថានទូតប៉ាឡេស្ទីននៅក្នុងរដ្ឋធានីប្រទេសប្រេស៊ីលក្នុងឆ្នាំ២០១០ បានផ្តល់សច្ចាប័នលើកិច្ចព្រមព្រៀងកាលពីថ្ងៃសុក្រ រវាងប្លុកសេដ្ឋកិច្ចប្រទេសអាមេរិកឡាទីននៃប្រទេសអាមេរិកខាងត្បូង ជាមួយអាជ្ញាធរប៉ាឡេស្ទីន ដែលត្រូវបានចុះហត្ថលេខាកាលពីឆ្នាំ២០១១។វានៅមិនទាន់ច្បាស់នៅឡើយទេថាតើសមាជិកប្លុកសេដ្ឋកិច្ចប្រទេសអាមេរិកឡាទីនផ្សេងទៀត នឹងធ្វើតាមដែរឬយ៉ាងណា។ រដ្ឋាភិបាលស្តាំនិយមរបស់ប្រទេសអាហ្សង់ទីនរបស់ប្រធានាធិបតី លោក ចាវីយ័រ មីឡេ(Javier Milei) មិនត្រូវបានគេរំពឹងថានឹងព្រមព្រៀងឡើយ។ ក្រសួងការបរទេសអ៊ុយរ៉ាហ្គាយ និងប៉ារ៉ាហ្គាយ មិនបានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ។

សហរដ្ឋអាមេរិកនិយាយថា ខ្លួនបានបង្កើនការព្រួយបារម្ភចំពោះទំនាក់ទំនងរបស់ឥណ្ឌាជាមួយនឹងរុស្ស៊ី

2024/07/09 08:22:10 am        158
Facebook Telegram Linkin
អ្នកនាំពាក្យក្រសួងការបរទេសអាមេរិកបានប្រាប់អ្នកសារព័ត៌មានកាលពីថ្ងៃចន្ទក្នុងការឆ្លើយតបទៅនឹងសំណួរអំពីជំនួបរវាងនាយករដ្ឋមន្ត្រីឥណ្ឌា លោក Narendra Modi និងប្រធានាធិបតីរុស្ស៊ីលោក Vladimir Putin ថា សហរដ្ឋអាមេរិកមានក្ដីបារម្ភកាន់តែខ្លាំងចំពោះទំនាក់ទំនងរបស់ឥណ្ឌាជាមួយរុស្ស៊ី ស្របពេលការវាយលុករបស់ក្រុងមូស្គូលើអ៊ុយក្រែននៅតែបន្ត ។ ឥណ្ឌាបានប្រឈមសម្ពាធពីលោកខាងលិចឲ្យឃ្លាតឆ្ងាយពីក្រុងមូស្គូ បន្ទាប់ពីរុស្ស៊ីបានលុកលុយអ៊ុយក្រែន។ មកទល់ពេលនេះ ក្រុងញូវដែលីបានទប់ទល់នឹងសម្ពាធនោះ ដោយលើកឡើងពីទំនាក់ទំនងដ៏យូរអង្វែងរបស់ខ្លួនជាមួយរុស្ស៊ី និងតម្រូវការសេដ្ឋកិច្ចរបស់ខ្លួន។លោក Modi បានជួបលោក Putin នៅប្រទេសរុស្ស៊ីកាលពីថ្ងៃចន្ទក្នុងដំណើរទស្សនកិច្ចរយៈពេល២ថ្ងៃលើកដំបូងរបស់នាយករដ្ឋមន្រ្តីចាប់តាំងពីប្រទេសរុស្ស៊ីបានវាយប្រហារចូលអ៊ុយក្រែនក្នុងខែកុម្ភៈឆ្នាំ២០២២។ នៅក្នុងការបង្ហោះនៅលើប្រព័ន្ធផ្សព្វផ្សាយសង្គម X លោកនាយករដ្ឋមន្ត្រីបាននិយាយថាការពិភាក្សារបស់លោកជាមួយលោក Putin ប្រាកដជានឹងមានវិសាលភាពធំក្នុងការពង្រឹងចំណងមិត្តភាពបន្ថែមទៀតរវាងប្រទេសទាំងពីរ។ ក្នុងប៉ុន្មានឆ្នាំថ្មីៗនេះទីក្រុងវ៉ាស៊ីនតោន បានសម្លឹងមើលទៅទីក្រុង New Delhi ដោយមានក្រុមអ្នកវិភាគនយោបាយនិយាយថា សហរដ្ឋអាមេរិកមើលឃើញថាឥណ្ឌាជាអ្នកប្រឆាំងចិននៅតំបន់ អាស៊ី-ប៉ាស៊ីហ្វិក៕

ក្ដីបារម្ភពីវត្តមានរបស់លោក Trump កើនឡើងកាន់តែខ្លាំង ជុំវិញជំនួបកំពូលសម្ព័ន្ធយោធាណាតូ

2024/07/09 07:58:08 am        189
Facebook Telegram Linkin
រដ្ឋមន្ត្រីការពារជាតិអាមេរិក លោក Lloyd Austin បានស្វាគមន៍វត្តមានអគ្គលេខាធិការអង្គការណាតូ លោក Jens Stoltenberg នៅមន្ទីរបញ្ចកោណកាលពីថ្ងៃចន្ទសប្ដាហ៍នេះ នៅមុនកិច្ចប្រជុំកំពូលរបស់សម្ព័ន្ធយោធាណាតូ នៃមេដឹកនាំពិភពលោកនៅទីក្រុងវ៉ាស៊ីនតោនក្នុងសប្តាហ៍នេះ។កិច្ចប្រជុំកំពូលដែលចាប់ផ្តើមនៅថ្ងៃអង្គារនេះ គឺជាខួបលើកទី ៧៥ឆ្នាំ របស់សម្ព័ន្ធភាពនៃយុគសម័យសង្រ្គាមត្រជាក់។ ជំនួបនេះក៏មានបំណងបង្ហាញពីការដឹកនាំរបស់ប្រធានាធិបតីអាមេរិក លោក Joe Biden ដែលបានប្រមូលផ្តុំសម្ព័ន្ធមិត្តណាតូដើម្បីបង្ហាញពីការរួបរួម និងគោលបំណងថ្មីចំពោះមុខនៃការឈ្លានពានរបស់លោកប្រធានាធិបតីរុស្ស៊ី Vladimir Putin លើអ៊ុយក្រែន។លោក BIDEN និយាយថា សហរដ្ឋអាមេរិក និងអង្គការណាតូ និងក្រុមចម្រុះជាង៥០ប្រទេស ដែលកំពុងឈរយ៉ាងរឹងមាំជាមួយអ៊ុយក្រែន នឹងមិនដើរចោលឡើយ។ ប៉ុន្តែការលេចចេញអំពីអ្វីដែលមានន័យថាជានិមិត្តរូបនៃការរួបរួមដឹកនាំដោយអាមេរិកគឺលទ្ធភាពនៃការវិលត្រឡប់របស់អតីតប្រធានាធិបតីមកពីគណបក្សសាធារណរដ្ឋ លោក Donald Trump ដែលអាចកែប្រែគោលនយោបាយការបរទេសរបស់សហរដ្ឋអាមេរិក។ ការព្រួយបារម្ភក្នុងចំណោមសម្ព័ន្ធមិត្តណាតូបានកើនឡើងចាប់តាំងពីលោក Biden ធ្វើមិនបានល្អក្នុងការជជែកដេញដោលកាលពីថ្ងៃទី ២៧ ខែមិថុនា ដោយបានរុញឱ្យលោក Trump កាន់តែមានប្រជាប្រិយភាពខ្លាំងមុនការបោះឆ្នោតនៅថ្ងៃទី ៥ ខែវិច្ឆិកាឆ្នាំ២០២៤នេះ ៕

សម្តេចធិបតី៖ ប្រទេសកម្ពុជាស្ថិតក្នុងចំណោមប្រទេសដែលមានសេដ្ឋកិច្ចសេរីបំផុត ក្នុងពិភពលោក

2024/07/08 03:26:25 pm        152
Facebook Telegram Linkin
ក្នុងឱកាសអញ្ជើញជាអធិបតីដ៏ខ្ពង់ខ្ពស់វេទិកាធុរកិច្ចកម្ពុជា-បារាំងលើកទី២នៅព្រឹកថ្ងៃទី៨ ខែកក្កដា ឆ្នាំ២០២៤នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា មានប្រសាសន៍ ប្រទេសកម្ពុជា ស្ថិតក្នុងចំណោមប្រទេសដែលមានសេដ្ឋកិច្ចសេរីបំផុតនៅក្នុងពិភពលោក ដែលវិនិយោគិនបរទេសអាចបង្កើតគម្រោងវិនិយោគជាមួយនឹងកម្មសិទ្ធបរទេស ១០០ ភាគរយ នៅក្នុងវិស័យភាគច្រើនដោយមិនមាន​លក្ខខណ្ឌ​តម្រូវឱ្យចូលរួមពីវិនិយោគិនក្នុងស្រុក។ សម្ដេចធិបតី នាយករដ្ឋមន្រ្ដី ​បានបញ្ជាក់ថា ​រាជរដ្ឋាភិបាលកម្ពុជា តែងតែ​ប្រកាន់ភ្ជាប់នូវ​អភិក្រម​គាំទ្រធុរកិច្ច ​ដោយផ្ដល់ការគាំទ្រ និងជំនួយដល់វិស័យឯកជន​នូវគ្រប់ដំណាក់កាល​នៃ​ប្រតិបត្តិការ​អាជីវកម្ម។ ជាមួយគ្នានេះ រាជរដ្ឋាភិបាលបាន​នឹងកំពុងអនុវត្តនូវគោលនយោបាយ​យុទ្ធសាស្រ្ដ​គ្រប់ជ្រុងជ្រោយ ដើម្បីលើកកម្ពស់ទិដ្ឋភាពធុរកិច្ច និងការធ្វើការវិនិយោគយ៉ាងច្រើនលើហេដ្ឋា​រចនាសម្ព័ន្ធគន្លឹះ ​លទ្ធភាពចូលទៅក្នុងទីផ្សារតំបន់ ​ការងារសមរម្យ កិច្ចគាំពារសង្គម ឌីជីថលូបណីយកម្ម ​និងចីរភាពបរិស្ថានសម្រាប់វិស័យឯកជនផងដែរ។ សូមជម្រាបថា រាជជរដ្ឋាភិបាលកម្ពុជាក្នុងអាណត្តិទី៧ ​នៃរដ្ឋសភា បាននិងកំពុងបន្តនូវការទាក់ទាញ​វិនិយោគិនបរទេសនិយាយជារួម ​និងវិនិយោគិនបារាំង ​និយាយដោយឡែក។ តាមរយៈវេទិកាធុរកិច្ចកម្ពុជា-បារាំង​ថ្ងៃនេះត្រូវបានរៀបចំឡើងក្នុងគោលបំណងពង្រឹង​ទំនាក់ទំនង​សេដ្ឋកិច្ចនិងសង្គម រ​វាងប្រទេសកម្ពុជា​ និងបារាំងតាមរយៈការជំរុញឱកាសពាណិជ្ជកម្ម និងការវិនិយោគ ដោយមានការសម្របសម្រួលប្រកបដោយអត្ថន័យរវាងក្រុមហ៊ុន​បារាំង​ទាំងក្នុងតំបន់ និងក្រុមហ៊ុនដែលកំពុងប្រតិបត្តិការនៅកម្ពុជាជាមួយសមភាគីកម្ពុជា។ បន្ថែមពីនេះទំនាក់ទំនងដ៏រឹងមាំ ​និងយូរអង្វែងរវាងប្រជាជាតិទាំងពីរ ហើយក្នុងអំឡុងពេលនោះ​សភាពាណិជ្ជកម្មកម្ពុជាបានចុះហត្ថលេខាលើអនុស្សារណៈនៃការយោគយល់ (MOU) ដ៏សំខាន់មួយ​ជាមួយសម្ព័ន្ធអង្គការនិយោជកបារាំង (APF) ​ដើម្បីជួយសម្រួលដល់ការផ្លាស់ប្តូរ និង​ភាពជាដៃគូរវាងសហគ្រិននៅក្នុងសហគមន៍​សេដ្ឋកិច្ចនិយាយភាសាបារាំងផងដែរ៕អត្ថបទ៖ វ៉ន ដារ៉ា

សម្តេចធិបតី៖ រាជរដ្ឋាភិបាលបង្កើតគណៈកម្មការជាន់ខ្ពស់ចំនួនពីរដើម្បីពង្រឹងនូវធុរកិច្ច និងការវិនិយោគ

2024/07/08 03:15:17 pm        130
Facebook Telegram Linkin
ក្នុងឱកាសអញ្ជើញជាអធិបតីដ៏ខ្ពង់ខ្ពស់ វេទិកាធុរកិច្ចកម្ពុជា-បារាំង លើកទី២ នៅព្រឹកថ្ងៃទី៨ ខែ កក្កដា ឆ្នាំ២០២៤នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា មានប្រសាសន៍​បញ្ជាក់ថា ​ដើម្បីគិតគូរពីភាពងាយស្រួល និងសុខុមាលភាពរបស់វិនិយោគិន​ទាំងអស់ ជាពិសេស​វិនិយោគិនបរទេស រាជរដ្ឋាភិបាលបានបង្កើតគណៈកម្មការជាន់ខ្ពស់ចំនួនពីរ ដើម្បីពង្រឹងនូវធុរកិច្ច និងការវិនិយោគនៅក្នុងប្រទេសកម្ពុជា។ សម្ដេចធិបតី នាយករដ្ឋមន្រ្ដី មានប្រសាសន៍បញ្ជាក់ថា រាជរដ្ឋាភិបាលតែងតែគិតគូរពីសុខទុក្ខ​របស់​វិនិយោគិនទាំងអស់ដោយយកចិត្តទុកដាក់ស្ដាប់ទាំងអស់រាល់បញ្ហាប្រឈម ដែលវិនិយោគិនលើក​ឡើង និងពង្រឹងទំនាក់ទំនងរវាងរាជរដ្ឋាភិបាល និងវិស័យឯកជន ដើម្បីដោះស្រាយបញ្ហាដែល​កើតឡើងថ្មីៗ ប្រកបដោយប្រសិទ្ធភាព និងសក្ដិសិទ្ធភាព ដោយប្រកាន់ភ្ជាប់នូវគោលការណ៍ គិតរួម ធ្វើសកម្មភាពរួម និងទទួលខុសត្រូវរួម។ សម្ដេចបន្ថែមថា រាជរដ្ឋាភិបាល ក៏កំពុងបង្កើត និងអនុវត្តជាបន្តបន្ទាប់នូវយន្តការ ដែលផ្ដល់​មធ្យោបាយងាយស្រួលបំផុតសម្រាប់វិស័យឯកជន ក្នុងការបញ្ជេញមតិ ​កង្វល់ និងសូមណូមពរ ក្នុងនោះយន្តការដែលលេចធ្លោជាងគេ គឺវេទិការរដ្ឋាភិបាលផ្នែកឯកជន ដែលសម្ដេចធិបតី​ផ្ទាល់តែង​តែអញ្ជើញ​ចូលរួម​ធ្វើជាធិបតីក្នុងវេទិការនេះ ដើម្បីស្ដាប់មតិយោបល់របស់វិនិយោគិន​ទាំងក្នុង និងក្រៅប្រទេសដែលមានកង្វល់ និងសូមណូមពរ។ សូមជម្រាបថា ដើម្បីលើកទឹកចិត្ត និងផ្ដល់ភាពងាយស្រួលដល់វិនិយោគិនទាំងក្នុង និងក្រៅ​ប្រទេស​រាជរដ្ឋាភិបាលបានសម្រាលបន្ទុករបស់វិស័យឯកជនពាក់ព័ន្ធនឹងការចុះបញ្ជីអាជីវកម្ម ការស្នើសុំ​អាជ្ញាបណ្ណ អនុលោមភាពការងារ និងអនុលោមភាពគណនេយ្យ និងសវនកម្មជាដើម។ ក្រៅពីនេះរាជរដ្ឋាភិបាលបាននឹងកំពុងផ្ដល់អាទិភាពខ្ពស់ដល់ការកែទម្រង់ពន្ធដារគ្រប់ជ្រុងជ្រោយតាមរយៈការរៀបចំ និងអនុវត្តនីតិវិធីប្រតិបត្តិស្ដង់ដាដើម្បីដោះស្រាយកង្វល់​របស់វិស័យ​ឯកជនជាពិសេសពាក់ព័ន្ធនឹងសវនកម្ម និងការវាយតម្លៃពន្ធឡើងវិញ៕ អត្ថបទ៖ វ៉ន ដារ៉ា

ក្រុមយុវជនសង្គមស៊ីវិល អំពាវនាវដល់ក្រុមប្រឆាំងជ្រុលនិយមបញ្ឈប់យករូបលោកបណ្ឌិត កែម ឡី ដើម្បីកេងចំណេញនយោបាយ និងបំផ្លើសបំភ្លៃការពិត

2024/07/08 03:07:07 pm        152
Facebook Telegram Linkin
ភ្នំពេញ៖ លោក ហេង សំណាង ដែលជាអតីតកូនសិស្ស និងលោក ធូវី សុវណ្ណដារ៉ា ត្រូវ​ក្មួយ​បង្កើត​​លោក​បណ្ឌិត កែម ឡី និងជាប្រធានសមាគមយុវជនខ្មែរមហានគរ នៃបណ្ដុំអង្គការ​សង្គម​ស៊ីវិល​សាខា​ខេត្តតាកែវ បានអំពាវនាវដល់ក្រុមប្រឆាំងជ្រុលនិយម គណបក្សនយោបាយ អង្គការ​សង្គម​ស៊ីវិល និងសារព័ត៌មានបរទេសជាខេមរៈភាសាមួយចំនួន បញ្ឈប់​យក​គ្រប់​រូបភា​ពរ​បស់​លោក​បណ្ឌិត កែម ឡី ដើម្បីកេងចំណេញ នយោបាយ និងប្រើប្រាស់រូបភាព​ដើម្បី​បំផ្លើស​បំភ្លៃ​ការ​ពិត។ ក្រុមយុវជនបានអំពាវនាវនេះស្របពេលដែលខួប៨ឆ្នាំ នៃការស្លាប់របស់លោកបណ្ឌិត កែម ឡី ឈាន​ជិតមកដល់នៅថ្ងៃទី១០ ខែកក្កដា ឆ្នាំ២០២៤ ហើយមាន​ក្រុម​ប្រឆាំង​ជ្រុលនិ​យមមួ​យ​ចំនួន​កំពុងយករូបភាពលោកបណ្ឌិត ដើម្បីកេញចំណេញនយោបាយរបស់ពួកគេ។លោក ធូវី សុវណ្ណដារ៉ា បានអំពាវនាវ និងទទូចម្តង​ហើយ​ម្តង​ទៀត​ដល់​ក្រុម​ប្រឆាំង​ជ្រុលនិយម​សុំកុំយ​ក​រូបភាពលោកពូរបស់ខ្លួន គឺលោកបណ្ឌិត កែម ឡី និងក្រុមគ្រួសាររបស់​លោក​ដើម្បី​យក​ទៅ​ធ្វើ​ជា​ឈ្នាន់នយោបាយ និងដើម្បីកេងចំណេញនយោបាយ។ ជាពិសេសនាពេលបច្ចុប្បន្ននេះ លោក អាឡិចហ្សង់ដ្រូ ហ្គន់សាឡេស ដេវិនសុន មេក្លោងចលនា​ខុសច្បាប់​បាន​យករូបភា​ព​លោក​បណ្ឌិត កែម ឡី ដើម្បីយកទៅផ្សព្វផ្សាយក្នុងការកេងចំណេញ និងវាយប្រ​ហារ​មក​លើ​រាជរដ្ឋាភិបាល។ សារព័ត៌មាន ឌឹ ខេមបូឌាដេលី និងវិទ្យុអាស៊ីសេរី ដែលតែងតែ​យករូបភាព​លោក​បណ្ឌិត កែម ឡី យកទៅវាយប្រហារមកលើរាជរដ្ឋាភិបាល។លោក ធូវី សុវណ្ណដារ៉ា បានអះអាងថា៖«កន្លងមកលោកពូ កែម ឡី មិនដែលមាន​គំនិត​ទៅ​ប្រឆាំ​ង​ជាមួ​យរដ្ឋាភិបាលទេ ហើយក៏មិនដែលមានគំនិតផ្តួចផ្តើមក៏ដូចជាចង់ផ្តួលរំលំរដ្ឋាភិបាលដែរ។ ជាមួយគ្នានេះ ខ្ញុំសូមអរគុណសម្តេចអគ្គមហាសេនាបតីតេជោ ហ៊ុន សែន និងក្រុម​គ្រួសារ​ដែល​តែង​តែ​ឧបត្ថម្ភដល់ក្រុមគ្រួសាររបស់ខ្ញុំបាទក្នុងការធ្វើបុណ្យរម្លឹកខួបលោកពូ កែម ឡី កន្លងមកជា​រឿយ​ៗ និងបានឧបត្ថម្ភថវិកាជាច្រើនដើម្បីកសាងចេតីយបង្ហើយជូនលោកបណ្ឌិត កែម ឡី»។លោក ហេង សំណាង ជាកូនសិស្ស និងជាប្រធានក្រុមយុវជនសង្គមស៊ីវិល បានអំពាវនាវ​ទៅដ​ល់​គណបក្ស​នយោបាយក្រុមប្រឆាំងជ្រុលនិយម អង្គការសង្គមស៊ីវិល វិទ្យុអាស៊ីសេរី និងខេមបូឌា​ដេលី ដែលតែងតែយករូបភាពលោកបណ្ឌិត កែម ឡី និងក្រុមគ្រួសារ ដើម្បីកេងចំណេញ​នយោបាយ សូមបញ្ឈប់យករូបភាពលោកបណ្ឌិត កែម ឡី មកផ្សព្វផ្សាយចាប់ពីពេលនេះតទៅ។ឆ្លើយតបទៅនឹងក្រុមប្រឆាំងជ្រុលនិយមលោក ហេង សំណាង បានអះអាងថា លោកគ្រូបណ្ឌិត កែម ឡី មិនដែលលម្អៀតទៅគណបក្សនយោបាយណាមួយទេ គឺគាត់នៅកណ្តាល គាត់វិភាគ​បើក​វាំង​នននៃសង្គម ហើយក៏មិនដែលមានគំនិតនៅក្នុងការផ្តួចផ្តើមផ្តួលរំលំរដ្ឋាភិបាលនោះទេ ដែលពួកក្រុមប្រឆាំងតែងតែលើកឡើងកន្លងមកនោះជាពាក្យចចាមអារាម។លោកបញ្ជាក់ថា៖«ពិសេសការដាក់ការសន្និដ្ឋាន យើងខ្លាំងបំផុតក្រុមជនទី៣ជ្រុលនិយម ដែលធ្វើ​នយោបាយ (ស្វាស៊ីបាយ លាបមាត់ពពែ) ព្រោះជនទីបីជ្រុលនិយម គឺតែងតែឆ្លៀតឱកាស វាយ​ប្រហារដើម្បីគេហចំណេញនយោបាយរបស់ពួកគេ»។សូមជម្រាប​ថា លោកបណ្ឌិត កែម ឡី ត្រូវបានខ្មាន់កាំភ្លើងបាញ់សម្លាប់ នៅហាងស្តាម៉ាត​ក្នុង​ស្ថានីយ​ប្រេង ឥន្ធនៈកាល់តិច ជិតស្តុបបូកគោ កាលថ្ងៃទី១០ ខែកក្កដា ឆ្នាំ២០១៦។ ចំណែក​ឃាតករ​ត្រូវបានសមត្ថកិច្ចតាមចាប់បានភ្លាមៗ បន្ទាប់ពីបានព្យាយាមរត់គេចខ្លួន។ ឃាតករត្រូវ​បាន​តុលាការផ្តន្តាទោសដាក់ពន្ធនាគារអស់មួយជីវិត៕ 

អ្នកនយោបាយ៖ ក្រុមសកម្មជនបរិស្ថានដែលត្រូវផ្តន្ទាទោស គឺជាឈ្នាន់របស់ជនក្បត់ជាតិ​នៅក្រៅស្រុក

2024/07/08 03:02:08 pm        89
Facebook Telegram Linkin
អ្នកនយោបាយមួយចំនួននៅកម្ពុជា បានចាត់ទុក ការសម្រេចផ្តន្ទាទោសក្រុមសកម្មជនបរិស្ថាន គឺជាការអនុវត្តផ្លូវច្បាប់ត្រឹមត្រូវដោយសារពួកគេនោះជាឈ្នាន់របស់ជនក្បត់ជាតិបង្កើតព្រឹត្តិការណ៍​វិទ្ធង្សនា ដើម្បីវាយប្រហារលើរាជរដ្ឋាភិបាលតែប៉ុណ្ណោះ។ ថ្លែងប្រាប់ BTV នៅថ្ងៃទី៨ ខែកក្កដា ឆ្នាំ២០២៤ ស្រប​ពេល​គណបក្ស​នយោបាយ​មួយ​ចំនួន​បាន​ចេញ​សេចក្តី​ថ្លែងការណ៍គាំទ្រ និងថ្កោលទោសលើ​អំពើ​របស់​ក្រុម​សកម្មភាព​បរិស្ថាន​ដែល​ត្រូវ​សាលា​ដំបូង​រាជ​ធានីភ្នំពេញសម្រេចផ្តន្ទាទោសកាលពីថ្មីៗនេះ លោក អ៊ុន វិសិទ្ធគុន ប្រធាន​គណបក្ស​កម្លាំង​ប្រជាធិបតេយ្យ បានឱ្យដឹងថា ក្នុងនាមអ្នក​នយោបាយ​មួយ​រូប​ដែល​បាន​តាម​ដាន​ជុំវិញ​សំណុំ​រឿងនេះ បានចាត់ទុកសកម្មភាព​របស់​ក្រុម​សកម្មជន​បរិស្ថាន​ជា​ចេតនា​បង្កើត​ព្រឹត្តិការណ៍​វិទ្ធង្សនា ក្នុងការទាញយកមជ្ឈដ្ឋាន​ពី​បរទេស​ឱ្យ​ដាក់​សម្ពាធ​លើ​ការ​អនុវត្ត​របស់​តុលាការ​។ ប្រធានគណបក្ស​រូបនេះ បញ្ជាក់ថា ចេតនានៃការបង្កើតព្រឹត្តិការណ៍ទាំងអស់នេះ គឺសុទ្ធតែឈ្នាន់​របស់​ជន​ក្បត់ជាតិ៣ជំនាន់នៅពីក្រោយ ដើម្បីបោកប្រាស់ប្រជាពលរដ្ឋតែប៉ុណ្ណោះ។ជាមួយគ្នា លោក អ៊ុន ជឹម ប្រធានគណបក្សឯកភាពជាតិខ្មែរ លើកឡើងថា តាមរយៈ​ការ​ផ្តន្ទា​ទោស​ក្រុម​សកម្មជនបរិស្ថាននេះកំពុងត្រូវបានអ្នក​នយោបាយ​ក្បត់​ជាតិ​យក​ធ្វើ​ជា​ចំណី​នយោបាយ​របស់​ខ្លួន ដើម្បីធ្វើឱ្យប្រជាពលរដ្ឋលែងទុកចិត្តចំពោះអង្គព្រះមហាក្សត្រ និងផ្លូវច្បាប់​របស់​កម្ពុជា​។ សូមជម្រាបថា សាលាដំបូងរាជធានីភ្នំពេញកាលពីថ្ងៃទី២ ខែកក្កដា ឆ្នាំ២០២៤ បាន​ប្រកាស​សាល​ក្រមផ្តន្ទាទោសមេក្លោង និងសកម្មជនមាតាធម្មជាតិចំនួន ១០នាក់ ដាក់ពន្ធនាគារពី៦ឆ្នាំ ទៅ​៨ឆ្នាំ និងពិន័យជាប្រាក់ចំនួន ១០លានរៀល ពាក់ព័ន្ធការប្រមាថអង្គព្រះមហាក្សត្រ និង​រួម​គំនិតក្បត់។ ការសម្រេចផ្តន្ទាទោសលើក្រុមសកម្មជនបរិស្ថាននេះ ដោយសារកាលពីឆ្នាំ២០២១ ក្រុម​សកម្មជនមាតាធម្មជាតិ បានជាប់ចោទពីបទប្រមាថព្រះមហាក្សត្រ និងបទរួមគំនិតក្បត់ ក្រោយ​ពី​បែកធ្លាយវីដេអូកិច្ចប្រជុំមួយដែលពួកគេជជែកគ្នានាពេលនោះ៕ អត្ថបទ សេក ឧត្តម 

បណ្ដាញសង្គម

ព័ត៌មានថ្មីៗ

ម៉ិកស៊ិក ដាក់ពង្រាយកម្លាំងសន្តិសុខទៅកាន់រដ្ឋ Michoacan ក្នុងការបង្ក្រាបក្រុមឧក្រិដ្ឋជន
11/11/2025 12:11 PM
Facebook Telegram Linkin
សកម្មជនអាកាសធាតុ បង្ហាញសារប្រាប់ទៅក្រុមប្រទេសអ្នកមានដែលបង្កភាពកខ្វក់ថា «ត្រូវទទួលខុសត្រូវ»
11/11/2025 12:11 PM
Facebook Telegram Linkin
សន្និសីទបម្រែបម្រួលអាកាសធាតុ បើកក្នុងប្រទេសប្រេស៊ីលដោយអំពាវនាវឱ្យមានការរួបរួមដើម្បីដោះស្រាយវិបត្តិអាកាសធាតុ
11/11/2025 12:11 PM
Facebook Telegram Linkin
អឺរ៉ុប មានចំណាត់ការការពារប្រព័ន្ធផ្សព្វផ្សាយនិងការបោះឆ្នោតពី «ការវាយប្រហារកូនកាត់» របស់រុស្ស៊ី
11/11/2025 12:11 PM
Facebook Telegram Linkin
សមាគមមិត្តភាពកម្ពុជា-ចិន ក្រុមបញ្ញវន្តជាន់ខ្ពស់ និងក្រុមអ្នកសារព័ត៌មានកម្ពុជា-ចិន ធ្វើបាថកថាពីផែនការអភិវឌ្ឍរបស់ចិនក្នុងយុគសម័យថ្មី ដើម្បីបង្កើតឱកាសថ្មីដល់កម្ពុជា
11/11/2025 12:11 PM
Facebook Telegram Linkin
UN៖ ពិភពលោកត្រូវតែមានចំណាត់ការឥឡូវនេះ ដើម្បីបញ្ឈប់ «អំពើឃោរឃៅដ៏គួរឱ្យព្រួយបារម្ភ» នៅស៊ូដង់
11/11/2025 12:11 PM
Facebook Telegram Linkin
លោក Trump៖ អាមេរិក ខិតកាន់តែជិតដល់កិច្ចព្រមព្រៀងពាណិជ្ជកម្មជាមួយប្រទេសឥណ្ឌា
11/11/2025 12:11 PM
Facebook Telegram Linkin
លោក Trump គំរាមប្តឹងប្រព័ន្ធផ្សព្វផ្សាយអង់គ្លេស BBC ជុំវិញកំហុសឆ្គងក្នុងការកាត់តសុន្ទរកថាឆ្នាំ២០២១
11/11/2025 12:11 PM
Facebook Telegram Linkin
ឯកឧត្តមរដ្ឋមន្រ្តី ជា វ៉ាន់ដេត អនុញ្ញាតជូនប្រធាន​សមាគម​ជប៉ុន-កម្ពុជាចូលជួបសម្តែងការគួរសម និងពិភាក្សាការងារ
11/11/2025 11:11 AM
Facebook Telegram Linkin
ប្រទេសអេត្យូពី ត្រៀមទទួលតំណែងម្ចាស់ផ្ទះនៃកិច្ចប្រជុំកំពូលអាកាសធាតុ COP32 ឆ្នាំ២០២៧
11/11/2025 11:11 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.