BTV NEWS

សម្ដេចតេជោជំរុញឱ្យសិង្ហបុរីមានជើងហោះហើរកាន់តែច្រើនមកកាន់កម្ពុជាបន្ទាប់ពីដាក់ឱ្យដំណើរការព្រលានយន្តហោះអន្តរជាតិតេជោ

សម្ដេចតេជោ បន្តប្រាប់ការពិតទៅសមាជិករដ្ឋសភាជប៉ុន ករណីថៃបាញ់សម្លាប់យោធិនកម្ពុជា និងបិទព្រំដែនជាឯកតោភាគី

TOP STORY | សម្ដេចតេជោចេញសារដាស់តឿនដល់ជនរួមជាតិកម្ពុជាត្រៀមខ្លួនវាយចោរឈ្លានពានទឹកដី ខណៈថៃនៅតែចិញ្ចឹមចិត្ត និងមហិច្ឆតាចង់បានទឹកដីកម្ពុជា

ឯកឧត្តម ប៉េង ពោធិ៍នា៖ «យើងត្រូវរួបរួមគ្នាជាធ្លុងមួយទប់ស្កាត់ និងបំផ្លាញមហិច្ឆតានយោបាយរបស់ក្រុមជ្រុលនិយមមួយក្តាប់តូច ដែលតែងតែបញ្ឆេះកំហឹងជាតិសាសន៍»

នយោបាយ និង ការអភិវឌ្ឍន៍

គណៈរដ្ឋមន្ត្រីអនុម័តទាំងស្រុង លើសេចក្តីព្រាងច្បាប់ការពាររុក្ខជាតិ និងភូតគាមអនាម័យ

ភ្នំពេញ៖ នៅព្រឹកថ្ងៃទី០៤ ខែកុម្ភៈ ឆ្នាំ២០២២ នៅវិមានសន្តិភាព បើកកិច្ចប្រជុំពេញអង្គ គណៈរដ្ឋមន្ត្រី ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាដើម្បីពិភាក្សា និងឆ្លងរបៀបវារៈ៖១. សេចក្តីព្រាងច្បាប់ស្តីពីការការពាររុក្ខជាតិ និងភូតគាមអនាម័យ។២.បញ្ហាផ្សេងៗ។បើតាមឯកឧត្តម ផៃ ស៊ីផាន រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល បានឱ្យដឹងថា សេចក្តីព្រាងច្បាប់នេះត្រូវបានរៀបចំឡើងដោយផ្អែកលើគោលនយោបាយ និងយុទ្ធសាស្រ្តរបស់រាជរដ្ឋាភិបាល និងអនុលោមតាមមូលដ្ឋានគតិយុត្តិពាក់ព័ន្ធជាធរមាននៅក្នុងព្រះជាណាចក្រកម្ពុជា ព្រមទាំងកិច្ចព្រៀងនិងអនុសញ្ញាក្នុងតំបន់ និងអន្តរជាតិស្តីពីការការពាររុក្ខជាតិ និងភូតគាមអនាម័យ ដើម្បីឆ្លើយតបទៅនឹងនិន្នាការរីកចម្រើនរបស់វិស័យកសិកម្មក្នុងក្របខណ្ឌសុវត្ថិភាពស្បៀង ការលើកកម្ពស់គុណភាពផលិតផលកសិកម្ម ការបង្កើនការនាំចេញកសិផល និងធានាចីរភាពអភិវឌ្ឍន៍ក្នុងបរិការណ៍សមាហរណកម្មសេដ្ឋកិច្ចពិភពលោកប្រកបដោយការប្រកួតប្រជែងដ៏ស្រួចស្រាវ។សេចក្តីព្រាងច្បាប់នេះ កំណត់អំពីការគ្រប់គ្រងសុខភាពរុក្ខជាតិ ការអនុវត្តវិធានការការពាររុក្ខជាតិ និងវិធានការភូតគាមអនាម័យ ការពារធនធានរុក្ខជាតិគ្រប់ប្រភេទ ការទប់ស្កាត់ការបង្ក ការរាលដាលឆ្លងនិងការរាតត្បាតពីសំណាក់សមាសភាពចង្រៃ ការលើកកម្ពស់ផលិតភាពកសិកម្ម សន្តិសុខស្បៀងអនាម័យគុណភាព និងសុវត្ថិភាពផលិតផលកសិកម្ម ព្រមទាំងសន្តិសុខភូតគាមអនាម័យនៃរុក្ខជាតិ ផលិតផលរុក្ខជាតិ និងទំនិញជាកម្មវត្ថុនៃការត្រួតពិនិត្យភូតគាមអនាម័យ ការសម្រួលការធ្វើពាណិជ្ជកម្ម ការនាំចេញ ការនាំចូល ការដឹកជញ្ជូនឆ្លងកាត់នូវផលិតផលដំណាំ រុក្ខជាតិ និងផលិតផលរុក្ខជាតិ ព្រមទាំងការរួមចំណែកការអភិវឌ្ឍសេដ្ឋកិច្ចសង្គមជាតិ និងការលើកកម្ពស់សុខុមាលភាពនិងសុខភាពសាធារណៈប្រកបដោយនិរន្តរភាពធនធានធម្មជាតិ និងប្រព័ន្ធក្សេត្របរិស្ថាន ដើម្បីធានាការគ្រប់គ្រង ការការពាររុក្ខជាតិ និងភូតគាមអនាម័យនៅក្នុងព្រះរាជាណាចក្រកម្ពុជា។ រួមចំណែកផ្តល់នូវសារៈប្រយោជន៍ក្នុងការអភិវឌ្ឍវិស័យកសិកម្មដូចជា៖ - ការពារផលប្រយោជន៍របស់ប្រជាកសិករ តាមរយៈការគ្រប់គ្រង ការការពាររុក្ខជាតិ និងការអនុវត្តវិធានការភូតគាមអនាម័យ ដើម្បីកាត់បន្ថយការខាតបង់ដែលអាចបង្កឡើងដោយសមាសភាពចង្រៃចំពោះធនធានរុក្ខជាតិ និងផលិតផលដំណាំនៅក្នុងប្រព័ន្ធផលិតកម្មកសិកម្ម។- គាំទ្រគោលនយោបាយ និងយុទ្ធសាស្រ្តជំរុញផលិតកម្មកសិកម្ម ពិពិធភាវូបនីយកម្ម និងពាណិជ្ជូបនីយកម្មកសិកម្ម ដើម្បីរួមចំណែកជំរុញកំណើនសេដ្ឋកិច្ច ជួយកាត់បន្ថយភាពក្រីក្រ និងលើកកម្ពស់ជីវភាពប្រជាកសិករ- ផ្តល់នូវឧបករណ៍បទដ្ឋានគតិយុត្តិដ៏រឹងមាំ និងយន្តការគ្រប់ជ្រុងជ្រោយក្នុងការអនុវត្តវិធានការការពាររុក្ខជាតិ និងភូតគាមអនាម័យ ដើម្បីទប់ស្កាត់ការបង្ក ការរាលដាលឆ្លង និងការរាតត្បាតបំផ្លាញពីសំណាក់សមាសភាពចង្រៃគ្រប់ប្រភេទ- ផ្តល់នូវវិធានការច្បាស់លាស់ក្នុងការការពារធនធានរុក្ខជាតិ គ្រប់គ្រងសុខភាពរុក្ខជាតិ លើកកម្ពស់ផលិតភាព គុណភាព និងសុវត្ថិភាពផលិតផលកសិកម្មប្រកបដោយភាតរបរិស្ថាន និងនិរន្តរភាព ដើម្បីរួមចំណែកលើកកម្ពស់សុខភាពសាធារណៈ និងធ្វើឱ្យមាននិរន្តរភាពធនធានធម្មជាតិ និងប្រព័ន្ធក្សេត្របរិស្ថាន-រក្សាអធិបតេយ្យភាព និងសន្តិសុខភូតគាមអនាម័យតាមរយៈការទប់ស្កាត់ការហូរចូលផលិតផលកសិកម្មគ្រប់ប្រភេទដែលមានផ្ទុកនូវសមាសភាពចង្រៃ និងសារធាតុបង្កផលប៉ះពាល់ចំពោះសុខភាព (សំណល់ថ្នាំកសិកម្ម សារធាតុគីមី សំណល់ជីវសាស្រ្ត និងលោហៈធ្ងន់)។ជាពិសេសទប់ស្កាត់ការនាំចូល ឬការផ្ទុះឡើងនូវប្រភេទសមាសភាពចង្រៃរាតត្បាតឈ្លានពាន ដែលបង្កមហន្តរាយដល់ដំណាំកសិកម្ម បំផ្លាញជីវចម្រុះ និងបរិស្ថានក្នុងព្រះរាជាណាចក្រកម្ពុជា។ជាក់ស្តែងការផ្ទុះឡើងនូវសមាសភាពចង្រៃដូចជា ខ្យងមាស ខ្នងដូង ជំងឺស្លឹកប្រាក់លើដំណាំក្រូច ឆៃផ្កាឈូកលើដំណាំដំឡូងមី ជំងឺស្រពោនលឿងស្លឹកលើដំណាំដំឡូងមី និងដង្កូវហ្វូងប្រភេទថ្មីលើដំណាំពោតជាដើម ពិតជាបានបង្កឱ្យមានផលប៉ះពាល់ដល់ផលិតកម្មកសិកម្ម និងសេដ្ឋកិច្ចជាតិគួរឱ្យកត់សម្គាល់ ដែលបណ្តាលមកពីការរាតត្បាតសមាសភាពចង្រៃខាងលើនេះ។បំពេញបាននូវលក្ខខណ្ឌតម្រូវ និងស្តង់ដារភូតគាមអនាម័យ ដោយមានសង្គតិភាពនឹងអនុសញ្ញាអន្តរជាតិស្តីពីការការពាររុក្ខជាតិ អង្គការពាណិជ្ជកម្មពិភពលោក ក្របខ័ណ្ឌអាស៊ានជាដើម ។- ផ្តល់នូវជំនឿចិត្តជាមួយប្រទេសដៃគូពាណិជ្ជកម្ម និងកម្លាំងពេញលេញក្នុងការចរចាបើកទីផ្សារនាំចេញកសិផលកម្ពុជាជាមួយបណ្តាប្រទេសដែលមានទីផ្សារធំៗក្នុងពិភពលោក ជាពិសេសបន្ទាប់ពីសម្រេចបាននូវកិច្ចព្រមព្រៀងពាណិជ្ជកម្មសេរី ក្នុងក្របខ័ណ្ឌទ្វេភាគី និងពហុភាគី និងជួយសម្រួលការនាំចេញ ការនាំចូល ការដឹកជញ្ជូនឆ្លងកាត់នូវទំនិញជារុក្ខជាតិ និងផលិតផលរុក្ខជាតិនានា៕ អត្ថបទ មុត សុទ្ធ

សហគមន៍ទេសចរណ៍ និងអង្គការក្រៅរដ្ឋាភិបាល នាំគ្នាដាំកូនឈើនៅតំបន់ព្រៃលិចទឹកបឹងទន្លេសាប

ភ្នំពេញ៖ សហគមន៍ទេសចរណ៍វប្បធម៌ ធម្មជាតិបឹងពារំាង និងអង្គការអហ្វហ្វាម ព្រមទាំងអង្គការសម្ព័ន្ធភាពដើម្បីអភិរក្សធនធានជលផល បានរួមទាំងស្ថាប័នពាក់ព័ន្ធជាច្រើនទៀត បាននាំគ្នាដាំកូនឈើស្ដារព្រៃឈើឡើងវិញ នៅតំបន់៣នៃតំបន់ព្រៃលិចទឹកបឹងទន្លេសាប ស្ថិតនៅសង្កាត់ជ្រាវ ក្រុងសៀមរាប ខេត្ដសៀមរាប ។លោក គង់ មង្គល ប្រធានសមាគមសហគមន៍ទេសចរណ៍វប្បធម៌ធម្មជាតិបឹងពារាំង លោកមានប្រសាសន៍នៅថ្ងៃទី៣ខែកុម្ភៈឆ្នាំ២០២២នេះថា កូនឈើព្រៃលិចទឹកនេះ មានជាង១ពាន់ដើម បានដាក់ដាំនៅលើផ្ទៃដីជាង៣ហិកតា ដែលបានដកហូតពីជនខិលខូចកន្លងមក ក្នុងគោលបំណងដើម្បីស្ដារព្រៃលិចទឹកឡើងវិញ ។លោក បានបន្ដថា កូនឈើទាំងនោះមានជាច្រើប្រភេទ រួមមានដើមរាំងទឹក ដើមឬស្សី ដើមម្ដេញ ដើមសណ្ដាន់ដែលបាជំនួយពីអង្គការអហ្វហ្វាមផង និងជារបស់សហគមន៍ទេសចរណ៍ផង។លោក បានបន្ដថា សហគមន៍ទេសចរណ៍មួយនេះ នឹងបន្ដបណ្ដុះកូនឈើព្រៃលិចទឹករាប់ពាន់ដើមទៀត ដើម្បីយកទៅដាក់ដាំក្នុងតំបន់៣នៃព្រៃកិចទឹកនៅតំបន់ទេសចរណ៍ធម្មជាតិបឹងពារំាងបន្ថែមទៀតនៅលើផ្ទៃដីប្រមាណ៥០ហិកតា ដែលរងការឆាបឆេះកាលពីឆ្នាំទៅមិញ។ដោយឡែក លោក មិញ ប៊ុនលី អ្នកសម្របសម្រួលអង្គការសម្ព័ន្ធភាពដើម្បីអភិរក្សធនធានជលផល ហៅកាត់ថា (Fact ហ្វេក) លោកមានប្រសាសន៍ថា ការដាំព្រៃលិចទឹកនេះមានសារៈសំខាន់ខ្លាំងណាស់ ព្រោះព្រៃលិចទឹកជាជម្រកត្រីពងកូន កាត់បន្ថយការប្រែប្រួលអាកាសធាតុ កាត់កន្ថយការហូរច្រោះដីចូលបឹងទន្លេសាប ជម្រកសត្វស្លាប ជាពិសេសព្រៃលិចទឹកមានភាពទាក់ទាញអ្នកទេសចរផងដែរ។លោក បានបន្ដថា អង្គការFact មានការគាំទ្រយ៉ាងខ្លាំងដែលបានសម្ដេចតេជោ ហ៊ុន សែន នាយករដ្ឋមន្ដ្រី ដកហូតដីព្រៃលិចទឹកពីជនខិលខូច ហើយធ្វើការដាំកូនឈើដើម្បីស្ដារព្រៃឈើឡើងវិញនេះ។លោក ស្នើឱ្យអាជ្ញាធរមានសមត្ថកិច្ច ចូលរួមទប់ស្កាត់ការនេសាទខុសច្បាប់ និងការកាប់បំផ្លាញព្រៃលិចទឹក ហើយរួមគ្នាដាំដើមឈើលិចទឹកឡើងវិញផងដែរ។លោក បូ ម៉េងទ្រី អភិបាលរងក្រុងសៀមរាប មានប្រសាសន៍ថា ដីព្រៃលិចទឹកក្នុងតំបន់៣ដែលបានដកហូតពីជនខិលខូចកន្លងមកនៅទូទាំងខេត្ដសៀមរាប មានចំនួនជាង២ពាន់៤រយហិកតា ប៉ុន្ដែរដ្ឋបាលក្រុងមានផែនការដាំស្ដារឡើងវិញ ជាបន្ដបន្ទាប់ នូវដើមឬស្សី ដើមរាំង គ្រាប់ត្នោត ក្នុងតសង្កាត់ទាំង៧សង្កាត់ នៅលើទីតាំងជាប់បឹងទន្លេសាបដែលបានទន្ទ្រានឈូសឆាយកាន់កាប់កន្លងមក។លោក បន្ដថា នៅពេលដែលទឹកទន្លេសាបស្រក នឹងបន្ដដាំកូនឈើលិចទឹកបន្ថែមទៀតរហូតដល់គ្រប់ផែនការដែលរាជរដ្ឋាភិបាលបានកំណត់៕

អាជ្ញាធរជាតិអប្សរា ធ្វើកំណាយនៅទួលឡដុតកុលាលភាជន៍ នៅក្រុមឡទ្វារដីឆ្នាំង

ភ្នំពេញ៖ នៅដើមខែកុម្ភៈ ឆ្នាំ២០២២នេះ អាជ្ញាធរជាតិអប្សរា តាមរយៈមជ្ឈមណ្ឌលអន្ដរជាតិស្រាវជ្រាវ និងតម្កល់ឯកសារអង្គរ បានចាប់ផ្តើមធ្វើកំណាយស្រាវជ្រាវនៅទួលឡដុតកុលាលភាជន៍មួយទៀត នៅក្រុមឡទ្វារដីឆ្នាំង ស្ថិតនៅពាយព្យខ្លោងទ្វារដីឆ្នាំង ក្រុងអង្គរធំ។លោក ទិន ទីណា អនុប្រធានមជ្ឈមណ្ឌលអន្ដរជាតិស្រាវជ្រាវ និងតម្កល់ឯកសារអង្គរ មានប្រសាសន៍ នៅថ្ងៃទី៣ខែកុម្ភៈ ឆ្នាំ២០២២នេះថា កាលពីចុងឆ្នាំ២០១៩ កន្លងមក ក្រុមការងាររបស់លោកបានធ្វើកំណាយជាលើកដំបូងនៅទួលបុរាណមួយ ដែលមានឈ្មោះថា ទួលត្រពាំងបុស្ស ដោយរកឃើញឡដុតកុលាលភាជន៍មួយកន្លែង ស្ថិតនៅពាយព្យខ្លោងទ្វារដីឆ្នាំង។លោកបន្តថា ការធ្វើកំណាយដែលចាប់ផ្តើមនៅខែវិច្ឆិកា ឆ្នាំ២០១៩ និងបញ្ចប់នៅខែ កុម្ភៈ ឆ្នាំ២០២០ អ្នកស្រាវជ្រាវបានរកឃើញ ជារចនាសម្ព័ន្ធឡបុរាណមួយដែលចាប់ផ្តើមផលិតកុលាលភាជន៍នៅពាក់កណ្ដាលសតវត្សរ៍ទី១២ និងបញ្ចប់នៅពាក់កណ្ដាលសតវត្សរ៍ទី១៣។លោក បន្ថែមថា ការធ្វើកំណាយនៅត្រពាំងទួលបុស្ស ដែលអ្នកស្រាវជ្រាវឱ្យឈ្មោះថា TDCK1 ឃើញមានរចនាសម្ព័ន្ធខុសពីឡដុតកុលាលភាជន៍នៅតំបន់អង្គរ ដូចជានៅតានី ខ្នារពោធិ៍ សសិ និងអន្លង់ធំ ដែលឡទាំងនោះមានប្រវែងវែង តែឡបុរាណនៅត្រពាំងទួលបុស្សនេះ មានទំហំស្ទើរមូល ដោយមានមុខកាត់២ម៉ែត្រ និងបណ្ដោយ៣ម៉ែត្រ។ ហើយការធ្វើកំណាយនៅទួលថ្មីនេះ គឺដើម្បីប្រៀបធៀបលទ្ធផលស្រាវជ្រាវនៅនឹងទីតាំងឡទី១ ដោយចង់បញ្ជាក់ថា តើរចនាសម្ព័ន្ធទីតាំងទាំង២ដូចគ្នា ឬយ៉ាងណា ដ្បិតថា គេឃើញទួលតូចធំចំនួន ២៤កន្លែង ដោយមានមន្ទិល ក្រែងឡទាំងនោះមានមុខងារផ្សេងគ្នាជាដើម៕

កម្ពុជា-ថៃ ចុះហត្ថលេខារួមគ្នាលើ«លក្ខខណ្ឌស្តីពីកិច្ចសហប្រតិបត្តិការ» រវាងកងទ័ពជើងគោកនៃប្រទេសទាំងពីរ

ភ្នំពេញ៖ ក្នុងជំនួបពិភាក្សាទ្វេភាគីរវាងមេបញ្ជាការកងទ័ពជើងគោកកម្ពុជា-ថៃ ភាគីទាំងពីរ បានសម្រេចចុះហត្ថលេខារួមគ្នាលើ «លក្ខខណ្ឌស្តីពីកិច្ចសហប្រតិបត្តិការ (Terms of Reference - ToR) រវាងកងទ័ពជើងគោកនៃកងយោធពលខេមរភូមិន្ទ និងកងទ័ពជើងគោកភូមិន្ទថៃ» ក្នុងគោលបំណង ដើម្បីពង្រឹងនិងពង្រីកនូវទំនាក់ទំនងមិត្តភាព និងកិច្ចសហប្រតិបត្តិការទ្វេភាគី ព្រមទាំងការជំរុញឱ្យមានកិច្ចពិភាក្សាដោយបើកចំហលើប្រធានបទដែលផ្តល់ផលប្រយោជន៍រួម។តបតាមការអញ្ជើញរបស់កងទ័ពជើងគោកនៃកងយោធពលខេមរភូមិន្ទ ឯកឧត្តម នាយឧត្តមសេនីយ៍ ណារ៉ុងផាន់ ជិតកែវធែ (Narongpan Jittkaewtae) អគ្គមេបញ្ជាការកងទ័ពជើងគោកភូមិន្ទថៃ បានអញ្ជើញមកបំពេញទស្សនកិច្ចជាផ្លូវការរយៈពេល ២ថ្ងៃ នៅព្រះរាជាណាចក្រកម្ពុជាជាលើកដំបូង។នៅក្នុងអំឡុងពេលនៃដំណើរទស្សនកិច្ចនេះ នាព្រឹកថ្ងៃទី៣ ខែកុម្ភៈ ឆ្នាំ២០២២ ឯកឧត្តម បានដឹកនាំគណៈប្រតិភូជាន់ខ្ពស់នៃកងទ័ពជើងគោកភូមិន្ទថៃ ចូលជួបពិភាក្សាការងារទ្វេភាគីជាមួយឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក នៅបញ្ជាការដ្ឋានកងទ័ពជើងគោក។ក្នុងជំនួបនេះ ភាគីទាំងពីរក៏បានសម្តែងមោទនភាពចំពោះទំនាក់ទំនងមិត្តភាពជាប្រពៃណីភាពជា អ្នកជិតខាងល្អ និងកិច្ចសហប្រតិបត្តិការជិតស្និទ្ធលើគ្រប់វិស័យរវាងប្រទេសទាំងពីរកម្ពុជា-ថៃ ដែលនាំមកនូវផលប្រយោជន៍ទៅវិញទៅមក និងការអភិវឌ្ឍរីកចម្រើនរួមគ្នាទាំងក្នុងពេលបច្ចុប្បន្ន និងសក្តានុពលបន្តទៅមុខ ជាពិសេសកិច្ចខិតខំប្រឹងប្រែងជួយគ្នា និងឧបត្ថម្ភគាំទ្រគ្នាទៅវិញទៅមក ក្នុងពេលជួបគ្រោះយថាហេតុផ្សេងៗ ដូចជា៖ កិច្ចសហការទប់ស្កាត់ការរាតត្បាតនៃជំងឺកូវីដ-១៩ ក្នុងរយៈកាលកន្លងមកនេះជាដើម។ភាគីទាំងពីរ ក៏បានធ្វើការវាយតម្លៃខ្ពស់ចំពោះកិច្ចសហប្រតិបត្តិការយោធា កម្ពុជា-ថៃ ដែលបានដំណើរការបោះជំហានរីកចម្រើនទៅមុខ និងសម្រេចបានលទ្ធផលផ្លែផ្កាជាច្រើនទាំងនៅក្នុងក្របខ័ណ្ឌជារួម និងក្នុងកម្រិតកងទ័ពជើងគោកជាអាទិ៍ ការអប់រំបណ្តុះបណ្តាលធនធានមនុស្ស ការអនុវត្តលំហាត់ហ្វឹកហ្វឺន និងការផ្លាស់ប្តូរគណៈប្រតិភូទៅវិញទៅមក ក៏ដូចជាការរក្សាបានទំនាក់ទំនងការងារជាប់ជាប្រចាំរវាងបណ្តាអង្គភាពសំខាន់ៗចំណុះកងទ័ពជើងគោកទាំងពីរ ដែលនៅឈរជើងនៅតាមបណ្តោយព្រំដែន ដើម្បីបន្តរួមគ្នាសហការ អនុវត្តតាមបទបញ្ជា និងទិសដៅរបស់រាជរដ្ឋាភិបាលនៃប្រទេសទាំងពីរ ក្នុងការថែរក្សាសន្តិភាព សន្តិសុខ និងការទប់ស្កាត់បង្ក្រាបបទល្មើសឆ្លងដែននានា។ទន្ទឹមគ្នានេះ កងទ័ពជើងគោកនៃប្រទេសទាំងពីរ បានប្តេជ្ញាខិតខំចូលរួមចំណែកក្នុងការកសាង និង ពង្រឹងតំបន់ព្រំដែនមិត្តភាព សន្តិភាព សហប្រតិបត្តិការ និងការអភិវឌ្ឍ ដោយឈរលើស្មារតីអត់ធ្មត់ និងសម្របសម្រួលដោះស្រាយបញ្ហាតាមយន្តការគ្រប់កម្រិត ក្នុងគោលការណ៍គោរពឯករាជ្យ អធិបតេយ្យ និងបូរណភាពទឹកដីទៅវិញទៅមក។ សន្តិភាព សន្តិសុខ និងស្ថិរភាពនៅតាមបណ្តោយព្រំដែន គឺពិតជាបានបង្កនូវលក្ខណៈអំណោយផលដល់ការដោះដូរពាណិជ្ជកម្មឆ្លងដែន ដែលជាការចូលរួមចំណែកយ៉ាងសំខាន់ ក្នុងការបង្កើតឱកាសការងារ និងការលើកកម្ពស់ជីវភាពរបស់ប្រជាជននៃប្រទេសទាំងពីរ។នៅក្នុងឱកាសនោះផងដែរ ភាគីទាំងពីរក៏បានផ្លាស់ប្តូរទស្សនៈគ្នាទៅវិញទៅមកលើបញ្ហាសន្តិសុខសាកល និងតំបន់ ដែលកំពុងកើតមានឡើង និងបានបង្ហាញឆន្ទៈក្នុងការគាំទ្រ ជំរុញ និងលើកកម្ពស់ដល់កិច្ចសហប្រតិបត្តិការរវាងកងទ័ពជើងគោកនៃប្រទេសទាំងពីរ ទាំងក្នុងក្របខ័ណ្ឌទ្វេភាគី និងតំបន់ ដើម្បីបន្ត ចូលរួមចំណែកថែរក្សាសន្តិភាព ស្ថិរភាព និងវិបុលភាពក្នុងតំបន់ ក្រោមធ្លុងសាមគ្គីភាពនៃកងទ័ពជើងគោក បណ្តាប្រទេសសមាជិកអាស៊ាន។ឯកឧត្តម អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក ក៏បានថ្លែងអំណរគុណដល់រាជរដ្ឋាភិបាលថៃ ចំពោះការគាំទ្រលទ្ធផលដំណើរទស្សនកិច្ចរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងនាមភាពជាប្រធានអាស៊ានឆ្នាំ២០២២ ទៅកាន់ប្រទេសមីយ៉ាន់ម៉ា ក្នុងគោលបំណងដើម្បីចូលរួមចំណែកបញ្ចៀសអំពើហិង្សា សង្គ្រាមស៊ីវិល និងវិបត្តិមនុស្សធម៌ ក៏ដូចជាដើម្បីធ្វើយ៉ាងណារកមធ្យោបាយធ្វើឱ្យអាស៊ានអាចរក្សាបាននូវមជ្ឈិមភាពរបស់ខ្លួន និងអាចពង្រឹងសាមគ្គីភាពល្អឡើងវិញ ដោយឈរលើគោលការណ៍នានាដែលមានចែងនៅក្នុងធម្មនុញ្ញអាស៊ាន ជាអាទិ៍ការគោរពអធិបតេយ្យ ការមិនជ្រៀតជ្រែកចូលកិច្ចការផ្ទៃក្នុង និងគោលការណ៍កុងសង់ស៊ីស៕

រាជធានីភ្នំពេញព្រមានផាកពិន័យ និងដាក់ពន្ធនាគារ ចំពោះអ្នកវិជ្ជមានកូវីដដែលមិនរាយការណ៍ជូនអាជ្ញាធរ

ភ្នំពេញ៖ រាជធានីភ្នំពេញ បានប្រកាសប្រើប្រាស់វិធានការក្ដៅចំពោះជនគ្រប់រូប ដែលវិជ្ជមានកូវីដ-១៩ លួចព្យាបាលនៅផ្ទះ ដោយមិនបានរាយការណ៍ជូនដំណឹងមក អាជ្ញាធរមានសមត្ថកិច្ច ឬមន្ត្រីសុខាភិបាល ។ នេះបើយោងតាម សេចក្ដីណែនាំបន្ថែម ស្ដីពី ការពង្រឹងប្រសិទ្ធភាពនៃការគ្រប់គ្រង ថែទាំ និងព្យាបាលអ្នកជំងឺកូវីដ-១៩ នៅតាមផ្ទះក្នុងភូមិសាស្រ្តរាជធានីភ្នំពេញ ដែលចេញផ្សាយកាលពីម្សិលម៉ិញ។ស្របពេលដែលករណីវិជ្ជមានវីរុសបំប្លែងថ្មី អូមីក្រុងក្នុងសហគមន៍ត្រូវបានរកឃើញជាបន្តបន្ទាប់ រដ្ឋបាលរាជធានីភ្នំពេញ បានចេញសេចក្ដីណែនាំបន្ថែម ស្ដីពី ការពង្រឹងប្រសិទ្ធភាពនៃការគ្រប់គ្រង ថែទាំ និងព្យាបាលអ្នកជំងឺកូវីដ-១៩ នៅតាមផ្ទះក្នុងភូមិសាស្រ្តរាជធានីភ្នំពេញ។ សេចក្ដីណែនាំនេះ ជាវិធានការក្ដៅក្នុងការទប់ស្កាត់ការរីករាលដាលកូវីដ-១៩ ជាពិសេសវីរុសបំប្លែងថ្មី អូមីក្រុង ដោយបញ្ជាក់ពីការផាកពិន័យ តាមមាត្រា២ នៃប្រកាសអន្តរក្រសួង ចុះថ្ងៃទី ១៩ ខែមីនា ឆ្នាំ២០២១របស់ក្រសួងសេដ្ឋកិច្ច និងក្រសួងសុខាភិបាល ស្ដីពីការពិន័យជាប្រាក់ចំពោះបុគ្គល ឬនីតិបុគ្គលដែលប្រព្រឹត្តិអំពើល្មើស នឹងវិធានការសុខាភិបាល ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត។ លើសពីនេះគឺការដាក់ពន្ធនាគារ ស្របតាមមាត្រា ១០មាត្រា ១១ នៃច្បាប់ស្ដីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត។លើសពីនេះ រដ្ឋបាលរាជធានីភ្នំពេញលើកទឹកចិត្ត ឱ្យប្រជាពលរដ្ឋជួយរាយការណ៍ ចំពោះករណីសង្ស័យថា មានអ្នកជំងឺកូវីដ-១៩ ដែលកំពុងលួចលាក់ព្យាបាលដោយខ្លួនឯង ដោយគ្មានការវាយតម្លៃពីអាជ្ញាធរ រឺមន្រ្តីជំនាញសុខាភិបាល។ អាជ្ញាធរនឹងរក្សាការសម្ងាត់ជូន ចំពោះអ្នករាយការណ៍។ ការធ្វើបែបនេះ គឺដើម្បី អាជ្ញាធរអាចចាត់វិធានការបានទាន់ពេលវេលា ចៀសវាងការចម្លងបន្ត ជាពិសេសវីរុសបំប្លែងថ្មី អូមីក្រុង ចូលទៅក្នុងមូលដ្ឋានភូមិ សង្កាត់ដែលខ្លួនរស់នៅ។សម្រាប់ការងារនេះ លោក ជា សុខៃ ជាចៅសង្កាត់ចាក់អង្រែក្រោម លើកឡើងថា សង្កាត់ជាអាជ្ញាធរមូលដ្ឋានដែលនៅជាមួយពលរដ្ឋដោយផ្ទាល់ ក្នុងជំហ៊ានដំបូងនេះ គឺធ្វើការផ្សព្វផ្សាយដល់ពលរដ្ឋឱ្យបានទំលូទំលាយជាមុនសិន។ រីឯជំហ៊ានបន្ទាប់គឺបង្កើតក្រុមតាមដាន ដើម្បីធានាថា ពលរដ្ឋក្នុងមូលដ្ឋានរបស់ខ្លួនមិនប្រព្រឹត្តិខុស។ស្ថានភាពបច្ចុប្បន្ននៃការឆ្លងវីរុសបំប្លែងថ្មី អូមីក្រុង កម្ពុជាមានការរកឃើញទាំងករណីនាំចូល និងករណីឆ្លងក្នុងសហគមន៍។ ចំពោះករណីឆ្លងក្នុងសហគមន៍ គឺបានកើនលើសពី ៥០០ករណី ទៅហើយ។ ពាក់ព័ន្ធនឹងករណីវិជ្ជមានវីរុសបំប្លែងថ្មី អូមីក្រុង រាជរដ្ឋាភិបាលកម្ពុជា ក៏បានអនុញ្ញាតឱ្យមានការសម្រាកព្យាលបាលនៅតាមផ្ទះបានដែរ តែត្រូវផ្អែកលើស្ថានភាពជំងឺជាក់ស្ដែង៕ អត្ថបទ៖ គឹមហុក

ព្រះមហាក្សត្រយាងទៅក្រុងប៉េកាំង ដើម្បីចូលរួមបើកព្រឹត្តិការណ៍កីឡាអូឡាំពិក រដូវរងា

ភ្នំពេញ៖ ព្រះករុណាព្រះបាទសម្តេចព្រះរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជាបានយាងទៅទីក្រុងប៉េកាំង ប្រទេសចិន ដើម្បីយាងចូលរួមបើកព្រឹត្តិការណ៍កីឡាអូឡាំពិករដូវរងា។នៅព្រឹកថ្ងៃទី៣ ខែកុម្ភៈនេះ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា រួមជាមួយសម្តេច ថ្នាក់ដឹកនាំកំពូល នៃស្ថាប័នរដ្ឋសភា ព្រឹទ្ធសភា និងឥស្សរជនសំខាន់ៗមួយចំនួនទៀត នៃស្ថាប័នរាជរដ្ឋាភិបាល បានអញ្ជើញថ្វាយព្រះរាជដំណើររបស់ព្រះករុណាព្រះបាទសម្តេចព្រះរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា យាងទៅកាន់ទីក្រុងប៉េកាំង ដើម្បីចូលរួមបើកព្រឹត្តិការណ៍កីឡាអូឡាំពិក រដូវរងា ឆ្នាំ២០២២ ដែលនឹងប្រព្រឹត្តទៅចាប់ពីថ្ងៃទី០៤ ដល់ថ្ងៃទី២០ ខែកុម្ភៈនេះ។យោងតាមព្រះរាជសារ កាលពីថ្ងៃទី៨ ខែមករា ឆ្នាំ២០២២ ព្រះករុណា នឹងអវត្តមានពីមាតុប្រទេស ចាប់ពីថ្ងៃទី០៣ ដល់ថ្ងៃទី០៥ ខែកុម្ភៈ នេះ ដើម្បីចូលរួមក្នុងពិធីបើកសម្ពោធព្រឹត្តិការណ៍កីឡា អូឡាំពិក រដូវរងា នៅទីក្រុងប៉េកាំង នៃសាធារណរដ្ឋប្រជាមានិតចិន ។នៅក្នុងឱកាសអវត្តមានព្រះអង្គនេះ សម្តេចវិបុលសេនា ភក្តី សាយ ឈុំ ប្រធានព្រឹទ្ធសភា នឹងទទួល ជួយព្រះអង្គក្នុងឋានៈជាប្រមុខរដ្ឋស្តីទី នៃព្រះរាជាណាចក្រកម្ពុជា ។ប្រទេសចិន បានទទួលធ្វើជាម្ចាស់ផ្ទះក្នុងការរៀបចំកីឡាអូឡាំពិករដូវក្តៅ និងរដូវរងារឆ្នាំ២០២២ ចាប់ពីថ្ងៃទី០៤ ដល់ថ្ងៃទី២០ ខែកុម្ភៈ ឆ្នាំ២០២២។ ការរៀបចំកម្មវិធីដ៏មានន័យជាប្រវត្តិសាស្រ្តនេះ សម្រាប់ មនុស្សជាតិ ក្នុងពេលដែលពិភពលោកទាំងមូល បាននឹងកំពុងប្រឈមមុខនឹងវិបត្តិ នៃជំងឺកូវីដ-១៩។ ប្រទេសចិន កំពុងស្ថិតនៅក្នុងដំណាក់កាលថ្មីមួយទៀត ក្នុងការធានាទាំងសុវត្ថិភាពសន្តិសុខ ទាំងសុវត្ថិភាព សុខាភិបាលសាធារណៈ សម្រាប់គណៈប្រតិភូកីឡា និងសម្រាប់វេទិកាកីឡាអន្តរជាតិនេះ។ការប្រកួតកីឡាអូឡាំពិករដូវរងា ក្រុងប៉េកាំង ដែលរៀបចំឡើងក្នុងបរិបទ នៃជំងឺកូវីដ-១៩នេះ នឹង ក្លាយជាការប្រកួតដ៏ឱឡារិក និងជារឿងមង្គលជាសកលដ៏កម្រមាន។ បណ្តាទីក្រុងនៅប្រទេសចិន បានដាក់ចេញចំណាត់ការតឹងរ៉ឹង ដើម្បីគ្រប់គ្រងការឆ្លងរាលដាលថ្មីៗ នៃកូវីដ-១៩៕អត្ថបទ៖ មុត សុទ្ធ

អ្នកដំណើរអន្តរជាតិមកកម្ពុជាមានកំណើនឡើង ក្រោយអាស៊ានប្រកាសបើកទេសចរណ៍ក្នុងតំបន់

ភ្នំពេញ៖ គិតចាប់តាំងពីរដ្ឋមន្ត្រីទេសចរណ៍អាស៊ាន បានប្រកាសបើកទេសចរណ៍អាស៊ានឡើងវិញ នៅឯខេត្តព្រះសីហនុ កាលពីអំឡុងថ្ងៃទី១៩ ខែមករា ឆ្នាំ២០២២នេះមក រហូតមកដល់ពេលនេះ ចំនួនអ្នកដំណើរអន្តរជាតិធ្វើដំណើរតាមផ្លូវអាកាសចូលមកកម្ពុជា មានកំណើនឡើងជាង១៦% ដែលមានចំនួនជើងហោះហើរកើនពី៧ជើងទៅដល់១២ជើងក្នុងមួយថ្ងៃ។បើតាមឯកឧត្តម ជា អូន រដ្ឋលេខាធិការ និងជាអ្នកនាំពាក្យនៃរដ្ឋលេខាធិការដ្ឋានអាកាសចរណ៍ស៊ីវិល បានថ្លែងប្រាប់BTV នៅថ្ងៃទី៣ ខែកុម្ភៈ ឆ្នាំ២០២២នេះថា ជារួមចាប់តាំងពីប្រទេសកម្ពុជាប្រកាសបើកប្រទេសវិញ កាលពីអំឡុងថ្ងៃទី១៥ ខែ វិច្ឆិកា ឆ្នាំ២០២១ ធៀបនឹងចាប់ពីអាស៊ានប្រកាសបើកទេសចរណ៍អាស៊ានវិញមក អ្វីដែលប្លែកគឺ ខេត្តសៀមរាប ចាប់ផ្តើមមានភ្ញៀវទេសចរអន្តរជាតិទៅទស្សនាឡើងវិញ ដោយក្នុងមួយថ្ងៃនៅអាកាសយានដ្ឋានអន្តរជាតិខេត្តសៀមរាបគឺបានទទួលភ្ញៀវក្នុងកម្រិតពី ៥០នាក់ទៅ២០០នាក់ ។ ដោយឡែកអាកាសដ្ឋានអន្តរជាតិនៅរាជធានីភ្នំពេញគឺមានកំណើនតិចតួចជាង ១០០០នាក់ ក្នុងមួយថ្ងៃ ខណៈអាកាសដ្ឋានអន្តរជាតិនៅខេត្តព្រះសីហនុ ក៏ចាប់ផ្តើមមានកម្រើកវិញដែរ។តាមតួលេខពីអគ្គនាយកដ្ឋានអន្តោប្រវេសន៍ បានឲ្យដឹងដែរថា គិតត្រឹមកម្ពុជារៀបចំវេទិកាទេសចរណ៍អាស៊ានAFTថ្ងៃទី១៦ ខែមករា រហូតដល់ថ្ងៃទី៣១ ខែមករា ឆ្នាំ២០២២ អ្នកដំណើរអន្តរជាតិចូលតាមអាកាសយានដ្ឋានអន្តរជាតិ មានចំនួន១៧,៣៤១នាក់ ជាមធ្យមមានប្រមាណជាង១,០០០នាក់ក្នុង១ថ្ងៃ ពោលគឺកើនឡើង១៦.៤៥% បើធៀបនឹងរយៈពេលដូចគ្នាមុនវេទិកាទេសចរណ៍អាស៊ាន។ឯកឧត្តម ជា អូន បញ្ជាក់ថា នៅពេលនេះ មានក្រុមហ៊ុនអាកាសចរណ៍ជាតិអន្តរជាតិប្រមាណ ៧ក្រុមហ៊ុន បានចុះបញ្ជីបើកជើងហោះហើរមកកម្ពុជា ក្នុងក្រុមហ៊ុនដែលសកម្ម ហោះហើរច្រើនប្រចាំថ្ងៃគឺមានក្រុមហ៊ុន Singapore Airline, Jetstar, Malaysia Airline, bankok airline,និង Air asia, ជាដើម ។ ដោយឡែកក្រុមហ៊ុនASEANA ដែលហោះមកពីប្រទេសកូរ៉េក្នុង១សប្តាហ៍គឺមានអ្នកប្រមាណ ៥០០ទៅ ៦០០នាក់ ខណៈហោះមកពីប្រទេសចិន ក៏ចាប់ផ្តើមមានដែរ តែលក់សំបុត្រមានតំលៃថ្លៃ។បើតាមលោក ធូន ស៊ីណាន ប្រធានសមាគមទេសចរណ៍អាស៊ីប៉ាភិច PATAប្រចាំនៅកម្ពុជា បានថ្លែងថា ចាប់តាំងពីអាស៊ានបើករនាំងទេសចរណ៍អាស៊ានមក បានជម្រុញការលក់កក់ទិញកញ្ចប់ទេសចរណ៍ក្នុងតំបន់អាស៊ាន មានកំណើនឡើង មកទស្សនាកម្ពុជាដោយចាប់ផ្តើមពីខែមីនាតទៅ ខណៈបណ្តាប្រទេសនៅអឺរ៉ុប ក៏មានកក់ដែរតែត្រូវការពេលវេលារៀបចំប្រមាណពី ៨ខែទៅ ១២ខែទើបអាចធ្វើដំណើរបាន៕ អត្ថបទ៖ ស៊ុម សុខជា

ឯកឧត្តម ឈិន កេតនា ជំរុញអាជ្ញាធរមូលដ្ឋានបន្តផ្សព្វផ្សាយពីការចាក់វ៉ាក់សាំងកូវីដ១៩ ដល់ពលរដ្ឋ

កំពង់ឆ្នាំង៖ ឯកឧត្តម ឈិន កេតនា អនុប្រធានក្រុមការងារចុះជួយស្រុកបរិបូរណ៍ និងជាប្រធានក្រុមការងារចុះមូលដ្ឋានឃុំមេលំ និងឃុំផ្សារ បានជំរុញដល់អាជ្ញាធរឃុំទាំងពីរនេះ ត្រូវបន្តផ្សព្វផ្សាយ ពីការចាក់វ៉ាក់សាំងកូវីដ១៩ ដល់ប្រជាពលរដ្ឋ ខណៈកម្ពុជាបន្តរកឃើញអ្នកវិជ្ជមានប្រភេទថ្មីអូមីក្រុងជាបន្ដបន្ទាប់ ។ ក្នុងឱកាសចុះលើកស្លាកគណបក្សដាក់តាមផ្ទះពលរដ្ឋតាមផ្លូវ និងនាំយកអំណោយរបស់សម្ដេចចៅហ្វាវាំង គង់ សំអុល ចែកជូនពលរដ្ឋមានជីវភាពខ្វះខាត ក្នុងស្រុកបរិបូរណ៍ កាលពីថ្ងៃទី២ ខែកុម្ភៈ ឆ្នាំ២០២២ ឯកឧត្តម ឈិន កេតនា មានប្រសាសន៍ថា ស្ថិតក្នុងបរិបទប្រឈម នឹងបញ្ហាកូវីដ១៩ មិនទាន់ឃ្លាតចេញឆ្ងាយពីលើសកលលោក សូមពលរដ្ឋទាំងអស់ ត្រូវបន្តអនុវត្តន៍ឱ្យបានទៀងទាត់តាមការណែនាំរបស់ក្រសួងសុខាភិបាល និងការណែនាំរបស់រាជរដ្ឋាភិបាល «៣កុំ និង៣ការពារ» ដើម្បីកុំឱ្យឆ្លងជំងឺកូវីដ-១៩ទាំងទម្រង់ចាស់ និងថ្មី ។ឯកឧត្តម បន្តថា ជាមួយគ្នានេះ អាជ្ញាធរត្រូវជំរុញមូលដ្ឋាននីមួយៗ ពិនិត្យមើលចំពោះប្រជាពលរដ្ឋ ដែលពុំទាន់បានចាក់វ៉ាក់សាំងដូសទី១ ហើយផ្សព្វផ្សាយបន្ថែមទៀត សម្រាប់ការចាក់ដូសទី៣ ឲ្យបានឆាប់រហ័ស ដើម្បីមានភាពសាំជាមួយជំងឺកូវីដ១៩ នៅក្នុងសហគមន៍ ។ឯកឧត្តម ប្រធានក្រុមការងារ បានផ្តាំផ្ញើការសាកសួរសុខទុក្ខ ពីសំណាក់សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងសម្តេចចៅហ្វាវាំង គង់ សំអុល ដល់សមាជិក សមាជិកាគណបក្ស នៅក្នុងមូលដ្ឋានឃុំមេលំ និងឃុំផ្សារ ជានិច្ចកាលតែងតែយកចិត្តទុកដាក់ចំពោះសមាជិក សមាជិកាគណបក្ស និងបានដោះស្រាយទុក្ខលំបាកនានា ជាពិសេសក្នុងគ្រាដែលប្រទេសកម្ពុជារងផលប៉ះពាល់ដោយសារជំងឺកូវីដ-១៩ ។គួរបញ្ជាក់ថា ពលរដ្ឋមានជីវភាពខ្វះខាត ដែលទទួលអំណោយពីសម្ដេចចៅហ្វាវាំង សរុបចំនួន ២៤គ្រួសារ ក្នុង១គ្រួសារ ទទួលបានអង្ករ, ទឹកត្រី, ទឹកស៊ីអ៊ីវ, ទឹកដោះគោ, ស្កសរ, ត្រីខ, សារុង, ក្រម៉ា និងថវិកា ៥០ ០០០ រៀល ៕

អភិបាលខេត្តឧត្តរមានជ័យ ចុះពិនិត្យទីតាំងសាងសង់ស្តូបអនុស្សាវរីយ៍នយោបាយ ឈ្នះ ឈ្នះ តេជោសែនអន្លង់វែង

ឧត្តរមានជ័យ៖ ឯកឧត្តមប៉ែន កុសល្យ អភិបាលខេត្តឧត្តរមានជ័យ រួមទាំងក្រុមការងារមន្ទីរស្ថាប័នពាក់ព័ន្ធនានា ក្នុងខេត្ត បានអញ្ជើញចុះត្រួតពិនិត្យទីតាំងប្រវត្តិសាស្រ្ត សំរាប់សាងសងស្ទូបអនុស្សាវរីយ៍ នយោបាយឈ្នះ ឈ្នះ តេជោសែន ដែលមានទីតាំងស្ថិតលើចំណុចភ្នំ២០០ ជាំសាងាំ ស្រុកអន្លង់វែង ខេត្តឧត្តរមានជ័យ នាថ្ងៃទី២ ខែកុម្ភៈ ម្សិលមិញនេះ ។ក្នុងការចុះត្រួតពិនិត្យទីតាំងប្រវត្តិសាស្រ្តនេះដែរ ឯកឧត្តម ប៉ែន កុសល្យ អភិបាលខេត្តឧត្តរមានជ័យ បានឲ្យដឹងថា ទឹកដីស្រុកអន្លង់វេង គឺជាទឹកដីប្រវត្តិសាស្រ្តមួយដ៏ជូចត់ ដែលបានបន្សល់ទុកកាលពីសម័យសង្រ្គាម ហើយតំបន់នេះ បច្ចុប្បន្នកំពុងតែមានការអភិវឌ្ឍរីកចម្រើនច្រើននូវលើគ្រប់វិស័យរាល់ហេដ្ឋារចនាសម្ព័ន្ធនានា ក្នុងមូលដ្ឋាននេះ។ឯកឧត្តម បានបញ្ជាក់ថា ការសាងសង់ស្តូបអនុស្សាវរីយ៍ នយោបាយឈ្នះ ឈ្នះ តេជោសែន នៅលើចំណុចភ្នំ២០០ ច្រកជាំសាងាំនេះ នៅពេលខាងមុខអាចធ្វើការទាក់ទាញការចាប់អារម្មណ៍បានច្រើនផងដែរ ពីផ្នែកលើវិស័យទេសចរ សំរាប់ភ្ញៀវជាតិ និងអន្តរជាតិ មកទស្សនា និងសិក្សាស្វែងយល់ស្រាវជ្រាវពីរឿងប្រវត្តិសាស្រ្តនានា ក្នុងតំបន់នេះផងដែរ៕អត្ថបទ៖ ឃិន សារិទ្ធ

កម្ពុជាបញ្ជូនទ័ពមួកខៀវទៅកាន់ប្រទេសលីបង់តាមបែបថ្មី ដើម្បីទប់ស្កាត់ការរាតត្បាតអូមីក្រុង

ភ្នំពេញ៖ នៅល្ងាចថ្ងៃទី២ ខែកុម្ភៈនេះ កងទ័ពមួកខៀវកម្ពុជាចំនួន១៨៤នាក់ ក្នុងនោះមានស្រីចំនួន ៣០នាក់ បានចេញដំណើរទៅបំពេញបេសកកម្មថែរក្សាសន្តិភាពអង្គការសហប្រជាជាតិ នៅប្រទេសលីបង់។ ក្នុងពិធីជូនដំណើរនាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិគ្រងគ្រងកម្លាំងថែរក្សាសន្តិភាព ថ្លែងថា នៅបញ្ជូនកងទ័ពថែរក្សាសន្តិភាពទៅប្រទេសលីបង់ គឺត្រូវបានធ្វើការបញ្ជូនតាមរបៀបថ្មីនឹងអាចទប់ស្កាត់បានការរាតត្បាតមេរោគកូវីដ១៩។ បើតាមនាយឧត្តមសេនីយ៍ សែម សុវណ្ណនី អនុប្រធានគណៈកម្មាធិការជាតិសម្របសម្រួលការបញ្ជូនកងកម្លាំង ថ្លែងថា សម្រាប់ការបញ្ជូនកងកម្លាំងនៅក្នុងអំឡុងពិភពលោកកំពុងជួបការរាតត្បាតមេរោគកូវីដ១៩ និងកូវីដអូមីក្រុងនេះ កម្ពុជាបានបានធ្វើការផ្លាស់ប្តូររបៀបគ្រប់គ្រងនិងការបញ្ជូនកងកម្លាំងតាមគន្លងថ្មី ក្នុងនោះគ្រប់កងកម្លាំង គឺត្រូវចាក់វ៉ាក់សាំងអោយបាន៤ដូស ហើយការបំពេញបេសកកម្មត្រូវធ្វើការរឹតបន្តឹង ដោយត្រូវបានអនុវត្តតាមបទបញ្ជាថ្មីរបស់អង្គភាព និងគោលការណ៍ថ្មីនានាជាច្រើនរបស់រាជរដ្ឋាភិបាលសំដៅ ពង្រឹងប្រសិទ្ធភាពការបំពេញបេសកកម្ម និងការទប់ស្កាត់ការចម្លងមេរោគកូវីដ១៩ និងមេរោគកូវីដប្រភេទថ្មីទៅកាន់ប្រទេសគេ។បើតាមវរៈសេនីយ៍ឯក ចក់ ស៊ីថល មេបញ្ជាការកងវិស្វកម្មពហុជំនាញ លេខ៨២៩ថ្លែងថា ជារួមការអនុវត្តវិន័យ និងការអនុវត្តបញ្ជានៅក្នុងអង្គភាពត្រូវបានរឹតបន្តឹងដាច់ខាត ដោយសារការបំពេញបេសកកម្មដោះមីន និងសង់សំណង់ដេក និងសំណង់បញ្ឈរនានានៅក្នុងប្រទេសលីបង់ ជាប់ព្រំដែនប្រទេសអ៊ីស្រាអែល ក៏មានការរាតត្បាតមេរោគកូវីដ១៩ ដែរ។បើតាមកងពេទ្យនៃកងវិស្វកម្មពហុជំនាញលេខ៨២៩នេះបានថ្លែងថា សម្រាប់ការបំពេញបេសកកម្មរក្សាសន្តិភាពនៅប្រទេសលីបង់នេះ ថ្នាក់ដឹកនាំក្រសួងការពារជាតិ ជាពិសេសប្រមុខថ្នាក់ដឹកនាំរាជរដ្ឋាភិបាល បានផ្តល់សំភារៈបរិក្ខារពេទ្យគ្រប់គ្រាន់ដើម្បីបង្ការ និងត្រៀមព្យាបាលនូវរាល់ជំងឺនានា ជាពិសេសការការពារទប់ស្កាត់ និងការព្យាបាលជំងឺកូវីដ១៩។គិតចាប់តាំងពីឆ្នាំ២០០៦ រហូតមកដល់ពេលនេះ កម្ពុជាបានបញ្ជូនកងកម្លាំងរក្សាសន្តិភាព ជាង ៧ពាន់នាក់ ទៅបំពេញបេសកកម្ម មនុស្សធម៌ជាមួយអង្គការសហប្រជាជាតិ នៅក្នុងប្រទេសចំនួន៩ រួមមាន៖ ស៊ូដង់ ស៊ូដង់ខាងត្បូង, ឆាដ, លីបង់, ស៊ីរី, ម៉ាលី, អាហ្វ្រិកកណ្តាល សាយប្រឺស និងយេមែនជាដើម។ បច្ចុប្បន្នកម្ពុជាមានកម្លាំងកងទ័ពមួកខៀវជិត៨០០នាក់ ក្នុងនោះមាននារីជិត៨០នាក់ បាននឹងកំពុងបំពេញបេសកកម្មរក្សាសន្តិភាពក្រោមឆត្រអង្គការសហប្រជាជាតិនៅប្រទេសលីបង់ ស៊ូដង់ ស៊ូដង់ខាងត្បូង ម៉ាលី និងសាធារណរដ្ឋអាហ្វ្រិកកណ្តាល៕អត្ថបទ៖ ស៊ុម សុខជា

បណ្ដាញសង្គម

ព័ត៌មានថ្មីៗ

ឧទ្ធម្ភាគចក្រយោធាសហភាពអាហ្វ្រិក ១គ្រឿង ធ្លាក់នៅរដ្ឋធានីរបស់សូម៉ាលី បណ្ដាលឲ្យមនុស្សយ៉ាងតិច ៣នាក់សា្លប់

ក្រុមហាម៉ាសបញ្ជាមេដឹកនាំកុលសម្ព័ន្ធហ្កាហ្សាឲ្យព្រមចុះចាញ់ ដោយចោទលោកថា ក្បត់ជាតិ

អ៊ីរ៉ង់ផ្អាកកិច្ចសហប្រតិបត្តិការជាមួយអង្គការឃ្លាំមើលនុយក្លេអ៊ែរ IAEA

ស្ថានអគ្គកុងស៊ុលកិត្តិយសនៃសាធារណរដ្ឋស៊ីបប្រចាំព្រះរាជាណាចក្រកម្ពុជា និងវិទ្យាស្ថានបណ្តុះបណ្តាលសម្លៀកបំពាក់កម្ពុជា (CGTI) រួមគ្នាផ្តល់ជំនួយមនុស្ស ធម៌ដល់សិស្សនិងកុមារដែលសិក្សារនិងកំពុងស្នាក់នៅក្នុងអង្គការអរុណរះកម្ពុជា (Sunrise Cambodia)

កងកម្លាំងការពារអ៊ីស្រាអែល ចាប់ខ្លួនក្រុមសកម្មប្រយុទ្ធដែលមានទំនាក់ទំនងជាមួយអ៊ីរ៉ង់ ក្នុងអំឡុងពេលប្រតិបត្តិការនៅស៊ីរី

រដ្ឋមន្ត្រីក្រសួងមហាផ្ទៃ៖ នគរបាលទួរគី បានចាប់ខ្លួនមនុស្ស ៣០នាក់ និងរឹបអូសហេរ៉ូអ៊ីន ៨២៥គីឡូក្រាម

រញ្ជួយដីកម្រិត ៥,៥រ៉ិចទ័រ កើតមាននៅម្ដុំកោះ Tokara របស់ជប៉ុន

មានអ្នកស្លាប់ ២នាក់ នៅអេស្ប៉ាញ ខណៈរលកកម្តៅវាយលុកអឺរ៉ុប

សម្ដេចតេជោ ហ៊ុន សែន អញ្ជើញចុះពិនិត្យច្រកទ្វារព្រំដែនអន្តរជាតិ ម៉ឺនជ័យ ស្ថិតក្នុងភូមិម៉ឺនជ័យ ឃុំក្របៅ ស្រុកកំចាយមារ ខេត្តព្រៃវែង

យុទ្ធសាស្ត្រអភិវឌ្ឍន៍គណនេយ្យនិងសវនកម្ម ជាផែនទីបង្ហាញផ្លូវធានាដល់ការរីកចម្រើននៅកម្ពុជា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ​ និង ការអភិវឌ្ឍន៍

គណៈរដ្ឋមន្ត្រីអនុម័តទាំងស្រុង លើសេចក្តីព្រាងច្បាប់ការពាររុក្ខជាតិ និង​ភូតគាម​អនាម័យ

សហគមន៍ទេសចរណ៍ និងអង្គការក្រៅរដ្ឋាភិបាល នាំគ្នាដាំកូនឈើ​នៅ​តំបន់ព្រៃលិច​ទឹកបឹង​ទន្លេសាប

អាជ្ញាធរជាតិអប្សរា ធ្វើកំណាយនៅទួលឡដុត​កុលាលភាជន៍​ នៅក្រុមឡទ្វារដីឆ្នាំង

កម្ពុជា-ថៃ ចុះហត្ថលេខារួមគ្នាលើ«លក្ខខណ្ឌស្តីពីកិច្ចសហប្រតិបត្តិការ» រវាង​កង​ទ័ពជើង​គោក​នៃប្រទេសទាំងពីរ

រាជធានីភ្នំពេញព្រមានផាកពិន័យ និងដាក់ពន្ធនាគារ ចំពោះអ្នកវិជ្ជមានកូវីដ​ដែល​មិនរាយការណ៍​ជូន​អាជ្ញាធរ