នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
TOP STORY | សម្ដេចធិបតី បានចាត់វិធានការចាំបាច់​ជាបន្ត​បន្ទា​ប់ចំ​ពោះកា​រ​វិល​ត្រឡប់​ទ្រង់ទ្រាយ​ធំរ​បស់​ពលករ​ខ្មែរ និងជនភៀសសឹក
TOP STORY | សម្ដេចតេជោ៖ ពេលនេះ ខ្ញុំកំពុងតែរួមចំណែកបញ្ជាទ័ព តាមប្រព័ន្ធវីដេអូ និងប្រព័ន្ធផ្សេងទៀតជាមួយនាយករដ្ឋមន្ត្រី, រដ្ឋមន្ត្រីក្រសួងការពារជាតិ អគ្គមេបញ្ជាការកងទ័ព និងបញ្ជាការកងកម្លាំងប្រដាប់អាវុធគ្រប់លំដាប់ថ្នាក់
TOP STORY |សម្ដេចធិបតី ហ៊ុន ម៉ាណែត ដាក់លិខិតស្នើសុំ​​កោះប្រជុំក្រុមប្រឹក្សាសន្តិសុខជាបន្ទាន់ ដើម្បី​សុំ​ការ​អន្ត​រាគមន៍​បញ្ចប់​ការ​ឈ្លាន​ពាន​របស់​កង​ទ័ព​ថៃមក​លើដែនអធិបតេយ្យភាពរបស់កម្ពុជា
TOP STORY | សម្ដេចធិបតី៖ កងទ័ពថៃបានបើកការ​វាយប្រហារ​មក​លើ​ទីតាំង​ឈរ​ជើង​របស់​កង​ទ័ព​កម្ពុជា​ នៅប្រាសាទតាមាន់ធំ តាក្របី និងបានពង្រីកភូមិសាស្ត្រវាយប្រហារទៅដល់តំបន់មុំបី

នយោបាយ​ និង ការអភិវឌ្ឍន៍

ចិនផ្តល់ឱសថព្យាបាលជំងឺកូវីដ-១៩ ចំនួនជាង១តោន ដល់គណៈកម្មាធិការ​សម្រប​សម្រួល អន្តររដ្ឋាភិបាលកម្ពុជា-ចិន

2022/01/28 12:01:57 pm        482
Facebook Telegram Linkin
ភ្នំពេញ៖ រដ្ឋាភិបាលនៃសាធារណរដ្ឋប្រជាមានិតចិន បានផ្តល់ឱសថព្យាបាលជំងឺកូវីដ-១៩ ចំនួនជាង១តោន ដែលមានចំនួន២៣១កេស ទម្ងន់ ១១២៥គីឡូក្រាម ដល់គណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន។ក្នុងពិធីប្រគល់-ទទួលខាងលើនេះ ប្រារព្ធឡើងក្រោមអធិបតីភាពដ៏ខ្ពង់ខ្ពស់របស់ឯកឧត្តម ឧបនាយករដ្ឋមន្រី្ត ហោ ណាំហុង សហប្រធានគណៈកម្មាធិការសម្របសម្រួល​អន្តររដ្ឋាភិបាល​កម្ពុជា-ចិន ឯកឧត្តម វាង វិនធាន ឯកអគ្គរដ្ឋទូតចិន ប្រចាំព្រះរាជាណាចក្រកម្ពុជា ជាមួយឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល ​ដើម្បីចាត់ចែងព្យាបាលអ្នកកើតជំងឺកូវីដ-១៩ ​ជាពិសេសក្នុងពេលដែលមានមេរោគបំប្លែងថ្មី អូមីក្រុងនេះ ​នាទីសី្តការក្រសួង ព្រឹកថ្ងៃទី២៨ ខែមករា ឆ្នាំ២០២២នេះ។ឯកឧត្តម ឧបនាយករដ្ឋមន្រី្ត ហោ ណាំហុង បានថ្លែងថា ទោះជាមានការរាតត្បាតជំងឺកូវីដ-១៩ ដោយ​មានការណែនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត ដែល​មានក្រសួងសុខាភិបាល​ ជាសេនាធិការកម្ពុជា ​បានទប់ស្កាត់ការរាតត្បាតនូវជំងឺកូវីដ-១៩ ព្រមទាំង​ការចាក់វ៉ាក់សាំងការពារជំងឺកូវីដ-១៩នេះ​ បានចំនួន៨៩,៦៦ភាគរយ។ ភាពជោគជ័យ​នៃការទប់ស្កាត់ជំងឺកូវី-១៩ នៅព្រះរាជាណាចក្រកម្ពុជា ក៏មានការរួមចំណែក​របស់​រដ្ឋាភិបាលនៃសាធារណរដ្ឋប្រជាមានិតចិន ​នូវវ៉ាក់សាំងជាច្រើនលានដូសមកកម្ពុជា ព្រមទាំង​បរិក្ខារពេទ្យ​ទំនើបៗផ្សេងៗទៀតជាច្រើន។ឯកឧត្តម វាង វិនធាន ឯកអគ្គរដ្ឋទូតចិន ប្រចាំព្រះរាជាណាចក្រកម្ពុជា បានលើកឡើងថា ចាប់តាំង​ពី​ប្រទេសកម្ពុជា ​មាន​ករណី​ដំបូង​នៃមេរោគកូវីដ-១៩មក​ គឺភាគីចិន និងកម្ពុជា បាន​ជួយគ្នា​ទៅវិញទៅមកពួតដៃគ្នា។ បច្ចុប្បន្នប្រទេសកម្ពុជាបានគ្រប់គ្រងជំងឺកូវីដ-១៩ល្អប្រសើរ អត្រានៃការចាក់វ៉ាក់សាំងបង្ការជំងឺកូវីដ-១៩ ​ជាលំដាប់ឈានមុខគេ​ ក្នុងបណ្តាប្រទេសលើពិភពលោក។ សេដ្ឋកិច្ច និងការអភិវឌ្ឍន៍​រីក​ចម្រើន នៅក្នុងវិស័យសេដ្ឋកិច្ច ​ត្រូវបានស្តារឡើងវិញជាលំដាប់ គឺប្រទេសចិន ដែល​ជាមិត្តដែក​ថែប​របស់កម្ពុជា ពិតជាមានទឹកចិត្តសប្បាយរីករាយមែនទែន។ឆ្លៀតក្នុងឱកាសនោះដែរ ឯកឧត្តម សាស្រ្តាចារ្យ ម៉ម ប៊ុនហេង ​រដ្ឋមន្រី្តក្រសួងសុខាភិបាល បាន​ថ្លែង​អំណរ​គុណ​យ៉ាងជ្រាល​ជ្រៅ​ជូនចំពោះឯកឧត្តម ​ឧបនាយករដ្ឋមន្រី្ត ហោ ណាំហុង ដែល​បាន​សម្របសម្រួលជាមួយភាគីចិន ​ដែលមានឯកឧត្តម​ ឯកអគ្គរដ្ឋទូតចិន​ ប្រចាំព្រះរាជាណាចក្រកម្ពុជា បានផ្តល់ជាថ្មីម្តងទៀត​ នូវឱសថព្យាបាលជំងឺកូវីដ-១៩​ ជាពិសេសក្នុង​ឱកាស​ចូលឆ្នាំថ្មី​ប្រពៃណីចិន សូមប្រសិទ្ធពរជូនឯកអគ្គរដ្ឋទូតចិន ​ប្រចាំព្រះរាជាណាចក្រកម្ពុជា​ ព្រមទាំងសហការរីកទាំងអស់ ទទួល​បាន​ជោគ​ជ័យ​គ្រប់ភារកិច្ច៕ អត្ថបទ៖ រដ្ឋា

ឯកឧត្តម ហ៊ុន ម៉ាណែត លើក​ទឹកចិត្តសិស្សឱ្យប្រឹងប្រែងរៀនសូត្រ ​ដើម្បីយកចំណេះ​ដឹង​ជួយ​កសាង​អភិវឌ្ឍន៍​ប្រទេស

2022/01/27 04:28:22 pm        967
Facebook Telegram Linkin
កំពង់ចាម៖ ឯកឧត្ដម ហ៊ុន ម៉ាណែត បានជំរុញលើកទឹកចិត្តសិស្សឱ្យខិតខំប្រែងរៀនសូត្រ ដើម្បីទៅពេលអនាគត ប្រើប្រាស់ចំណេះវិជ្ជាជួយកសាងអភិវឌ្ឍន៍ប្រទេសជាតិ ជាមួយរាជរដ្ឋាភិបាល ក្រោមម្លប់សន្តិភាព។ក្នុងពិធីសម្ពោធអគាសិក្សា១ខ្នង ២ជាន់ ១២បន្ទប់ អគារទីចាត់ការ១ខ្នង និងសមិទ្ធផលនានា នៅវិទ្យាល័យ ហ៊ុន សែន ព្រៃទទឹង ស្រុកព្រៃឈរ ខេត្តកំពង់ចាម នៅថ្ងៃទី២៧ ខែមករានេះ ឯកឧត្ដម ហ៊ុន ម៉ាណែត តំណាងសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណា​ចក្រ​កម្ពុជា បានលើកឡើងថា ខណៈប្រទេសជាតិ ​មានសុខសន្តិភាព​ និងការអភិវឌ្ឍរីកចម្រើនជាហូរហែ ជាឱកាសដ៏ល្អសម្រាប់សិស្សក្នុងការខិតខំប្រឹងប្រែងរៀនសូត្រ ក្រេបយកចំណេះវិជ្ជា ដើម្បី​ប្រើ​ប្រាស់​នៅពេលអនាគត​ ក្នុងការចូលរួមជាមួយរាជរដ្ឋាភិបាល ក្នុងការជួយ​កសាង​អភិវឌ្ឍន៍​ប្រទេសជាតិ ឱ្យកាន់តែមានការរីកចម្រើនជឿនលឿន។ឯកឧត្ដម ​បានអំពាវនាវដល់យុវវជនឱ្យចូលរួមបន្តថែរក្សាសន្តិភាព ​ដែលមានពេលនេះជារៀងរហូត ដើម្បីជាឱកាសសម្រាប់ធ្វើការអភិវឌ្ឍប្រទេសជាតិ ។អគារសិក្សា នៃវិទ្យាល័យ ហ៊ុន សែន ព្រៃទទឹង ត្រូវបានកសាងឡើងដោយសប្បុរសជន​អតីត​សិស្សវិទ្យាល័យនេះ ក្រោមគំនិត​ផ្ដួចផ្ដើម​របស់​ឯកឧត្ដមបណ្ឌិត ​ហ៊ុន ម៉ាណែត ដើម្បីជួយសម្រួល​ដល់​ការសិក្សារៀនសូត្ររបស់សិស្ស​ឲ្យ​បានគ្រប់គ្រាន់ ​ដើម្បីទទួលបានចំណេះដឹងជ្រៅជ្រះ។លោកគ្រូ អ្នកគ្រូ សិស្សានុសិស្ស នៃវិទ្យាល័យ ហ៊ុនសែន ព្រៃទទឹង ​បានសម្តែងភាពសប្បាយរីករាយ នៅ​ពេលឃើញការអភិវឌ្ឍរីកចម្រើននៅក្នុងវិទ្យាល័យ ។ឯកឧត្ដម ហ៊ុន ម៉ាណែត បានថ្លែងថា ​ទង្វើដែលសប្បុរសជនជាអតីតសិស្សវិទ្យាល័យ​ ហ៊ុន សែន ព្រៃទទឹង ​បានធ្វើនៅពេលនេះ​ គឺជាគំរូដ៏ល្អប្រសើរសម្រាប់អ្នកជំនាន់ក្រោយ។លោកគ្រូ អ្នកគ្រូ បានបញ្ជាក់ថា អគាសិក្សាថ្មី បណ្ណាល័យថ្មី ​នឹងមានសៀវភៅជាច្រើន ដើម្បីទុកជា​ឃ្លាំង​ក្រេបយកចំណេះដឹង៕អត្ថបទ៖ ថុង សីហា

ឯកឧត្ដម លី ធុជ៖ កម្ពុជានឹងបន្តជំរុញទំនាក់ទំនងកិច្ចសហប្រតិបត្តិការជាមួយអូស្ដ្រាលី

2022/01/27 03:37:06 pm        452
Facebook Telegram Linkin
ភ្នំពេញ៖ ឯកឧត្តមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានលើកឡើងពីការប្ដេជ្ញាចិត្តជាថ្មីដ៏មុតមាំ របស់ម្ពុជា ក្នុងការជំរុញទំនាក់ទំនងកិច្ចសហប្រតិបត្តិការប្រកបដោយផ្លែផ្កា ទៅពេលអនាគត។ក្នុងទិវាជាតិអូស្ត្រាលី រំលឹកខួបលើកទី៧០ នៃការបង្កើតទំនាក់ទំនងការទូតជាផ្លូវការរវាងកម្ពុជា និងអូស្ត្រាលី កាលពីយប់ថ្ងៃទី២៦ ខែមករានេះ ក្នុងនាមរាជរដ្ឋាភិបាលកម្ពុជា ឯកឧត្តមទេសរដ្ឋមន្រ្តី លី ធុជ បានបញ្ជាក់ជាថ្មីនូវការប្តេជ្ញាចិត្តដ៏មុតមាំរបស់កម្ពុជា ក្នុងការធ្វើការយ៉ាង​ជិតស្និទ្ធ​ជាមួយ​ប្រទេស​អូស្ត្រាលី ក្នុងក្របខ័ណ្ឌទ្វេភាគី ​និងពហុភាគី ​ដើម្បី​ជំរុញ​ទំនាក់ទំនង​ស្និទ្ធស្នាល និង​កិច្ចសហប្រតិបត្តិការប្រកប ដោយផ្លែផ្កា​រវាងប្រទេសទាំងពីរ ដែលនាំមកនូវផលប្រយោជន៍​ទៅវិញ​ទៅមក​សម្រាប់ប្រជាជាតិទាំងពីរនិងតំបន់។ឯកឧត្ដម បានបញ្ជាក់ថា ក្នុងនាមកម្ពុជាជាប្រធានអាស៊ានឆ្នាំ២០២២ កម្ពុជា បានត្រៀមខ្លួនរួចជា​ស្រេច​ ដើម្បីធ្វើការយ៉ាង​ជិតស្និទ្ធ​ជាមួយរដ្ឋសមាជិកអាស៊ាន ​និងអូស្ត្រាលី ក្នុងការពង្រឹងភាព​ជា​ដៃគូយុទ្ធសាស្ត្រ​គ្រប់ជ្រុងជ្រោយ​រវាងអាស៊ាន​ និងអូស្ត្រាលី ដើម្បីជំរុញទំនាក់ទំនងកាន់​តែ​ទូលំទូលាយ​ និងផ្តល់ផលប្រយោជន៍ទៅវិញទៅមក ​ក៏ដូចជាថែរក្សាសន្តិភាព​ សន្តិសុខ វិបុលភាព និង​ការអភិវឌ្ឍប្រកបដោយចីរភាពក្នុងតំបន់។ឯកឧត្តម បានរំលឹកអំពីទំនាក់ទំនងការទូតជាប្រវត្តិសាស្រ្ត ភាពជាដៃគូ និងកិច្ចសហប្រតិបត្តិការ​យ៉ាង​ជិតស្និទ្ធ ​រវាងប្រទេសទាំងពីរ ​ដែលបានកសាងឡើងតាំងពីឆ្នាំ១៩៥២ និងបានរំលឹកអំពីការ​តស៊ូ​មតិដ៏មោះមុតរបស់អូស្ត្រាលី​ សម្រាប់ដំណើរការស្វែងរកសុខសន្តិភាពនៅកម្ពុជា នៅ​ចុង​ទសវត្សរ៍៨០ ​និងដើមទសវត្សរ៍៩០ រួមទាំងការដើរតួនាទីនាំមុខក្នុងអំឡុង​ពេលបេសកកម្ម​របស់​អង្គការសហប្រជាជាតិនៅកម្ពុជា (UNTAC)។ ចាប់តាំងពីពេលនោះមក អូស្ត្រាលី បានបន្តផ្តល់ជំនួយ​សប្បុរសធម៌ដល់កម្ពុជា ដើម្បីគាំទ្រដល់​ការ​អភិវឌ្ឍលើវិស័យផ្សេងៗដូចជា ការអប់រំ សុខាភិបាល អភិបាលកិច្ច ​ហេដ្ឋារចនាសម្ព័ន្ធ ​និងកសិកម្ម ដែលជាការរួមចំណែកដល់ការគាំទ្រសន្តិភាព ស្ថិរភាព និងការអភិវឌ្ឍប្រកបដោយចីរភាព​របស់​កម្ពុជា។ឯកឧត្ដម ក៏បានសម្រាប់ប្រយុទ្ធប្រឆាំងនឹងជំងឺកូវីដ-១៩នៅកម្ពុជា ​ប្រទេសអូស្ត្រាលី បានផ្តល់​ជំនួយ​ប្រមាណ ៦០លានដុល្លារក្នុងមួយឆ្នាំ ដើម្បីពង្រឹងសន្តិសុខ សុខភាព ​ការការពារសង្គម ហេដ្ឋា​រចនាសម្ព័ន្ធ និង​ការស្តារសេដ្ឋកិច្ចឡើងវិញ។ អូស្ត្រាលី បានជួយបង្កើតផែនការឆ្លើយ​តបនឹងកូវីដ-១៩នៅកម្ពុជា ​ឆ្នាំ២០២០-២០២២​ ក្នុងគោលបំណងកាត់បន្ថយផលប៉ះពាល់សង្គម និងសេដ្ឋកិច្ច ព្រមទាំងបានផ្តល់វ៉ាក់សាំង Pfizer-BioNTech ចំនួន២.៣៥លានដូស។ សម្រាប់វិស័យសកម្មភាពមីន អូស្ត្រាលី គឺជាដៃគូអភិវឌ្ឍន៍ដ៏លេចធ្លោមួយ ដែលបានបរិច្ចាគថវិកា​ប្រមាណ​ជាង ១០០លានដុល្លារអូស្ត្រាលី ចាប់តាំងពីឆ្នាំ១៩៩៤ ដែលទឹកចិត្តសប្បុរសរបស់​រដ្ឋា​ភិបាល និងប្រជាជនអូស្ត្រាលី​ រួមជាមួយនឹងម្ចាស់ជំនួយផ្សេងទៀត បានចូលរួមជួយ​សង្រ្គោះ​អាយុជីវិត​ប្រជាជន​កម្ពុជា​ជាច្រើន ​កាត់​បន្ថយចំនួនពិការភាព ​និងកាត់បន្ថយ​ផ្ទៃដីមាន​ការ​គំរាមកំហែង​ដោយសារមីន៕ អត្ថបទ៖ បាន សុខរិទ្ធ 

កម្ពុជាស្នើរដល់ប្រទេសឆែក អនុវត្តកិច្ចព្រមព្រៀងលើវិស័យរ៉ែឡើងវិញ បន្ទាប់ពី​អាក់ខាន​ដោយ​សារកូវីដ

2022/01/27 03:22:49 pm        670
Facebook Telegram Linkin
ភ្នំពេញ៖ រដ្ឋមន្រ្តីក្រសួងរ៉ែ និងថាមពល ស្នើរតាមរយៈឯកឧត្តមឯកអគ្គរដ្ឋទូតឆែក ជួយជំរុញការអនុវត្តកិច្ចព្រមព្រៀងអនុស្សារណៈយោគយល់គ្នា លើកិច្ចសហប្រតិបត្តិការវិស័យរ៉ែ, ការស្រាវជ្រាវភូគព្ភសាស្រ្ត និងជំនួយផ្នែកបច្ចេកទេសវាយតម្លៃផលប៉ះពាល់បរិស្ថាន នៃគម្រោងអាជីវកម្មរ៉ែជាដើម បន្តអនុវត្តកិច្ចព្រមព្រៀងឡើងវិញ បន្ទាប់ពីមានការអាក់ខាន នៃការរីករាលដាលជម្ងឺកូវីដ១៩ នេះ។ឯកឧត្តម ស៊ុយ សែម រដ្ឋមន្រ្តីក្រសួងរ៉ែ និងថាមពល បានលើកឡើងនៅក្នុងជំនួបពិក្សាការងារ​ជា​មួយឯកឧត្តម Martin Vavra ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋឆែក ប្រចាំកម្ពុជា នៅថ្ងៃទី ២៦ ខែមករានេះថា នៅក្នុងឆ្នាំ២០១៩ កន្លងមកនេះ ក្រសួងរ៉ែ និថាមពល និងក្រសួងឧស្សាហកម្ម និងពាណិជ្ជកម្មឆែក បានចុះកិច្ចព្រមព្រៀងអនុស្សារណៈយោគយល់គ្នា ស្តីពី“កិច្ចសហប្រតិបត្តិការវិស័យរ៉ែ លើការស្រាវជ្រាវភូគព្ភសាស្រ្ត ការធ្វើឧស្សាហកម្មរ៉ែ និង​ការ​ប្រើប្រាស់ធនធានរ៉ែ ដែលគិតគូពីបញ្ហាបរិស្ថាន និងជំនួយផ្នែកបច្ចេកទេសលើការ​វាយ​តម្លៃ​ផលប៉ះពាល់បរិស្ថាន នៃគម្រោងអាជីវកម្មរ៉ែជាដើម”។ជុំវិញកិច្ចព្រមព្រៀងខាងលើនេះ, ឯកឧត្តមរដ្ឋមន្រ្តី បានស្នើរតាមរយៈឯកឧត្តម ឯកអគ្គរដ្ឋទូតឆែក ជួយជំរុញការអនុវត្តកិច្ចព្រមព្រៀងអនុស្សារណៈយោគយល់គ្នានេះឡើងវិញ ដើម្បីបន្តការអនុវត្ត​តាម​ចំណុចមួយចំនួននៃកិច្ចព្រមព្រៀង ​បន្ទាប់ពីមានការអាក់ខាន ដោយសារការរីករាលដាល​នៃ​រោគរាតត្បាតជម្ងឺកូវីដ ១៩ ។ក្រៅពីកិច្ចសហប្រតិបត្តិការលើវិស័យរ៉ែ, ឯកឧត្តម ស៊ុយ សែម បានលើកឡើងអំពីបច្ចុប្បន្នភាព នៃការអភិវឌ្ឍវិស័យថាមពល ដែលមកដល់ពេលនេះ កម្ពុជាបានកំពុងរៀបចំផែនការ​មេ​អភិវឌ្ឍន៍ថាមពលថ្មីឆ្នាំ ២០២២-២០៤០ ក្នុងនោះចំណុចសំខាន់ដែល កម្ពុជា កំពុងអនុវត្ត គឺ​ការបង្កើនសមាមាត្រនៃប្រភពថាមពលស្អាត​ ក្នុងប្រភពថាមពលចម្រុះសរុបរបស់កម្ពុជា ដើម្បី​ចូលរួម​ដោះស្រាយ ​គោលដៅបរិស្ថាន ​នឹងការយកចិត្តទុកដាក់បំពេញតម្រូវការ នៃកំណើន​សេចក្តីត្រូវការប្រើប្រាស់ថាមពលនាពេលអនាគតឱ្យបានគ្រប់គ្រាន់ ការធានាសន្តិសុខ​ថាមពល​ដែល​អាច​ទុក​ចិត្តបាន ​និង​មាន​តម្លៃ​សមរម្យ​ព្រមទាំង​លើកទឹកចិត្ត​ការ​ប្រើ​ប្រាស់​ធនធាន​ថាមពល ក្នុង​ស្រុក​ជា​ដើម ។ ​ចំណែក​កត្តា​សំខាន់​មួយទៀត ​ចំពោះ​អាំងតង់ស៊ីតេ​នៃ​ការ​បញ្ចេញ​ឧស្ម័ន​ផ្ទះ​កញ្ចក់ ​ធៀបទៅ​នឹង​សេណារី​យ៉ូចាស់ ​តាម​ទម្លាប់​ដែល​កម្ពុជា​ធ្វើការ​អភិវឌ្ឍន៍​ពីមុនមក គឺ​នឹងបន្ថយអាំងតង់ស៊ីតេ​នៃ​ការ​បញ្ចេញ​ឧស្ម័ន​ផ្ទះ​កញ្ចក់​ច្រើន​ ធៀប​ទៅ​នឹងការអភិវឌ្ឍ តាម​ទម្លាប់ចាស់ ។សូមបញ្ជាក់ថា៖ នៅក្នុង​ជំនួប​រវាងឯកឧត្តម ស៊ុយ សែម រដ្ឋមន្រ្តីក្រសួងរ៉ែ ​និងថាមពល​ និងឯកឧត្តម Martin Vavra ឯកអគ្គរដ្ឋទូត នៃសាធារណរដ្ឋឆែក​ប្រចាំកម្ពុជា ​ដោយភាគីទាំងពីរ​ បេ្តជ្ញា​បន្តពង្រឹង និង​ពង្រីកសក្តានុពលកិច្ចសហប្រតិបត្តិការលើវិស័យរ៉ែ និងវិស័យ ​ថាមពល នាពេលខាង​មុខ​បន្ថែមទៀត៕ អត្ថបទ៖ សុន រ៉ាឌី

អ្នកសារព័ត៌មាន៖ ចាក់វ៉ាក់សាំងដូសទី៤រួច កាន់តែមានទំនុកចិត្តពេលចេញ​បំពេញការងារ​ក្នុង​បរិបទកូវីដ

2022/01/27 03:11:03 pm        665
Facebook Telegram Linkin
ភ្នំពេញ៖ ស្ថិតក្នុងបរិបទជំងឺកូវីដ-១៩ អ្នកសារព័ត៌មានបំរើសការងារនៅរាជធានីភ្នំពេញ នាថ្ងៃទី២៧ ខែមករានេះ បន្តទៅទទួលការចាក់វ៉ាក់សាំងដូសទី៤ ប្រភេទPfizer ដើម្បីបង្កើនកងការពារទប់ទល់ នឹងការវាយលុកពីជំ ងឺកូវីដ-១៩ ជាពិសេសមេរោគបំប្លែងថ្មី អូមីក្រុង។អ្នកសារព័ត៌មានមកទទួលការចាក់វ៉ាក់សាំងកូវីដដូសទី៤ នៅមន្ទីរពេទ្យកុមារជាតិ នាថ្ងៃទី២៧ ខែមករានេះ បានប្រាប់BTVឲ្យដឹងថា ការចាក់វ៉ាក់សាំងបង្ការជំងឺកូវីដ-១៩ ដូសទី៤ គឺមាន​សារសំខាន់ណាស់ ដើម្បីបង្កើនកងការពារទប់ទល់នឹងការវាយលុកពីជំងឺកូវីដ-១៩ ជាពិសេសមេរោគបំប្លែងថ្មី អូមី ក្រុង។ លើសពីនេះ ពួកគេបានបន្តថា បន្ទាប់ពីចាក់វ៉ាក់សាំងដូសទី៤រួច ជួយបង្កើនទំនុកចិត្តបន្ថែមទៀត ពេលបំពេញការងារ ក្នុងបរិបទជំងឺកូវីដ-១៩។កន្លងទៅសម្តេចតេជោ បាន​គូសបញ្ជាក់ថា ​ដំណើរការចាក់ដូសទី៤ ឬដូសជំរុញ ​ត្រូវប្រើប្រាស់ វ៉ាក់សាំងប្រភេទ Pfizer ដែលបច្ចុប្បន្នមាននៅក្នុងដៃប្រមាណជាង២.៣លានដូស ត្រូវចាក់​ក្រុម​អាទិភាពមុនគេ ដែលមានប្រមាណត្រឹមតែជាង ៧០ម៉ឺននាក់ប៉ុណ្ណោះ។ ក្រុម​អាទិភាព ​ដែលត្រូវចាក់វ៉ាក់សាំងដូស ​ទី៤នោះ ​មានដូចជា​ នគរបាល អាវុធហត្ថ កងទ័ព គ្រូពេទ្យ​មន្ដ្រីរាជការ ​សិល្បករ សិល្បការិនី និងអ្នកសារព័ត៌មាន ។ល។បច្ចុប្បន្នយុទ្ធនាការចាក់វ៉ាក់សាំងកូវីដ-១៩ ប្រភេទPfizer ដូសទី៤ ជូនក្រុម​អាទិភាព​ និងពលរដ្ឋ គឺ អនុវត្តនៅ​តែរាជធានីភ្នំពេញប៉ុណ្ណោះ ​ព្រោះវ៉ាក់សាំងនេះ ត្រូវផ្ទុកក្នុងសីតុណ្ហភាព​ត្រជាក់ដក​៨០អង្សាសេ។ សម្រាប់បណ្តាខេត្តផ្សេងទៀត​ នឹងចាប់ផ្តើមអនុវត្តនៅពេលខាងមុខ​ បន្ទាប់ពី​ទទួល​បាន​ប្រព័ន្ធ ត្រជាក់​ពីអង្គការUnicef ជាផ្គត់ផ្គង់៕អត្ថបទ៖ ទូច សោភ័ណ

ខេត្ត​ព្រះសីហនុ​ក្រើន​រំលឹក​សាធារណជន និង​សមត្ថកិច្ច​ឱ្យ​អនុវត្ត​តាម​វិធានការ​សុខាភិបាល​អំឡុង​ពិធី​បុណ្យ​ចូល​ឆ្នាំ​ថ្មី​ប្រពៃណី​ចិន និង​វៀតណាម​ខាង​មុខ

2022/01/27 03:04:54 pm        183
Facebook Telegram Linkin
ព្រះសីហនុ៖ រដ្ឋបាល​ខេត្ត​ព្រះសីហនុ បាន​ក្រើន​រំលឹក​ទៅ​សមត្ថកិច្ច​ និង​ប្រជា​ពលរដ្ឋ​ទាំង​អស់ ឱ្យ​អនុវត្ត​តាម​វិធាន​សុខាភិបាល​ ​អំឡុង​ពិធី​បុណ្យ​ចូល​ឆ្នាំ​ថ្មី​ប្រពៃណី​ចិន និង​វៀតណាម​ខាង​មុខ​នេះ ដើម្បី​ទប់​ស្កាត់​ការ​ឆ្លង​រីក​រាល​ដាល​នៃ​មេរោគ​កូវីដ-១៩ ​ប្រភេទ​អូមីក្រុង​នៅ​ក្នុង​សហគមន៍។ក្នុង​សេចក្ដី​ណែនាំ​ចេញ​នៅ​ថ្ងៃ​នេះ រដ្ឋបាល​ខេត្ត​ព្រះសីហនុ បាន​ហាម​ឃាត់​នូវ​សកម្មភាព​មួយ​ចំនួន ដូចជា ការ​ដាក់​លក់​​ជាតិ​ផ្ទុះ​គ្រប់​ប្រភេទ ដោយ​ថា ធាតុ​ផ្ទុះ​ទាំង​នោះ​អាច​បង្ក​ជា​អគ្គិភ័យ​ជា​យថា​ហេតុ។រដ្ឋបាល​ខេត្ត​នេះ ក៏​ហាម​ឃាត់​ការ​លេង​ល្បែង​ស៊ី​សង​គ្រប់​ប្រភេទផង​ដែរ​នៅ​អំឡុង​ពេល​ប្រារព្ធ​ពិធី​បុណ្យ​ចូល​ឆ្នាំ​ថ្មី​ប្រពៃណី​ចិន និង​វៀតណាម ដែល​នឹង​ធ្វើ​ឡើង​នៅ​ចន្លោះ​ថ្ងៃ​ទី​៣១ ខែ​មករា រហូត​ដល់​ថ្ងៃទី​០២ ខែ​កុម្ភៈ​ខាង​មុខ​នេះ។ខណៈ​ដែល​មេរោគ​កូវីដ-១៩​ប្រភេទ​អូមីក្រុង​កំពុង​ឆ្លង​ចូល​ក្នុង​សហគមន៍​នោះ រដ្ឋបាល​ខេត្ត​ព្រះសីហនុ ក៏​បាន​ក្រើន​រំលឹក​ផង​ដែរ​អំពី​ការ​អនុវត្ត​ឱ្យ​បាន​ត្រឹម​ត្រូវ​ទៅ​តាម​វិធានការ​សុខាភិបាល ដើម្បី​ទប់​ស្កាត់​ការ​ឆ្លង​រាល​ដាល​នៃ​ជំងឺ​នេះ។រដ្ឋបាល​ខេត្ត​ព្រះសីហនុ ក៏​បាន​ណែនាំ​ផង​ដែរ​ទៅ​អាជ្ញាធរ​មូលដ្ឋាន និង​កង​កម្លាំង​ប្រដាប់​អាវុធ ឱ្យ​ពង្រឹង​សន្តិសុខ សុវត្ថិភាព និង​សណ្ដាប់​ធ្នាប់​សាធារណៈ​នៅ​តាម​មូលដ្ឋាន ដើម្បី​ទប់​ស្កាត់​គ្រោះ​ថ្នាក់​នានា ជាពិសេស​គ្រោះ​អគ្គិភ័យ​អំឡុង​ពេល​ប្រារព្ធ​ពិធី​បុណ្យ​នេះ។រដ្ឋបាល​ខេត្ត​មួយ​នេះ ក៏​បាន​ក្រើន​រំលឹក​ទៅ​នគរបាល​ឱ្យ​ពង្រឹង​សុវត្ថិភាព​ចរាចរណ៍ ដើម្បី​ទប់​ស្កាត់​ការ​បើក​បរ​ទាំង​ស្រវឹង និង​លើសល្បឿន​កំណត់ ដែល​នាំ​ឱ្យ​មាន​គ្រោះ​ថ្នាក់​ដល់​អាយុ​ជីវិត។ប្រជា​ពលរដ្ឋ​កម្ពុជា​ខ្សែ​ស្រឡាយ​ចិន និង​វៀតណាម​នៅ​ក្នុង​ប្រទេស​កម្ពុជា នឹង​ប្រារព្ធ​ពិធី​បុណ្យ​ចូល​ឆ្នាំ​ថ្មី​ប្រពៃណី​របស់​ពួកគេ​​ចាប់​ពី​ថ្ងៃទី​៣១ ខែ​មករា ដល់​ថ្ងៃ​ទី​០២ ខែ​កុម្ភៈ៕

ឯកឧត្តម ហ៊ុន ម៉ានី ជួបជាមួយគណៈកម្មការផលិតភាពយន្ត «កូនប្រុសក្រោមពន្លឺព្រះចន្ទពេញបូណ៌មី»

2022/01/27 01:35:03 pm        620
Facebook Telegram Linkin
ភ្នំពេញ៖ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ព្រឹកថ្ងៃទី២៧ ខែមករា ឆ្នាំ២០២២នេះ បានអញ្ជើញជួបជាមួយគណៈកម្មការផលិតភាពយន្ត «កូនប្រុសក្រោមពន្លឺព្រះចន្ទពេញបូណ៌មី» និងបានស្តាប់នូវបទបង្ហាញអំពីគម្រោង នៃដំណើរការផលិតភាពយន្តភាគនេះ ដែលមានលក្ខណៈប្រវត្តិសាស្ត្រផ្អែកទៅលើដំណើររឿងពិតនៃថ្នាក់ដឹកនាំដ៏ឆ្នើមរបស់កម្ពុជា គឺសម្តេចតេជោ ហ៊ុន សែន នាយករដ្ឋមន្រី្ត ។តាមរយៈភាពយន្តដែលនឹងត្រូវផលិតឡើងនេះ នឹងផ្តល់ជាភាពងាយស្រួលសម្រាប់សាធារណជន​ជា​ទស្សនិកជនទាំងក្នុង និងក្រៅប្រទេស ក្នុងការទស្សនា និងស្វែងយល់ដឹងកាន់តែស៊ីជម្រៅ​អំពី​ដំណើរពលិកម្មរបស់​ឥស្សរជនជំនាន់​មុន​ដែលជាប្រមុខថ្នាក់ដឹកនាំកម្ពុជាបច្ចុប្បន្ន ក្នុងការ​ស្វែករកសុខ​សន្តិភាពជូនប្រទេសជាតិ ​ដោយការដាក់ជីវិតជាដើមទុន។ឆ្លៀតក្នុងឱកាសនេះ ឯកឧត្តម ហ៊ុន ម៉ានី បានថ្លែង​អំណរគុណ​គណៈកម្មការផលិតភាពយន្ត «កូនប្រុសក្រោមពន្លឺព្រះចន្ទពេញបូណ៌មី» ចំពោះការធ្វើបទបង្ហាញ ​និងសូមជូនពរឱ្យដំណើរ ប្រព្រឹត្តទៅ​នៃការផលិតភាពយន្ដដ៏មានអត្ថន័យជ្រាលជ្រៅនេះ ​ប្រកបដោយភាពរលូន និង​ទទួលបានជោគជ័យ៕

សម្តេចតេជោ៖ សន្តិភាពបានធ្វើឲ្យរាជធានីភ្នំពេញផ្លាស់ប្តូរមុខមាត់យ៉ាងលឿន តាមរយៈវត្តមាន​អគារខ្ពស់ៗ​កប់ពពក

2022/01/27 06:24:51 am        575
Facebook Telegram Linkin
ភ្នំពេញ៖ ប្រមុខ​រាជ​រដ្ឋាភិបាល​កម្ពុជា សម្ដេច​តេជោ ហ៊ុន សែន បាន​បញ្ជាក់​ជា​ថ្មី​ថា សន្តិភាព​មាន​តម្លៃ​កាត់​ថ្លៃ​មិន​បាន ដែល​ជា​កត្តា​ជំរុញ​ឱ្យ​រាជ​ធានី​ភ្នំពេញ ផ្លាស់​ប្ដូរ​មុខ​មាត់​យ៉ាង​លឿន​ជាមួយ​នឹង​កំណើន​នៃ​អគារ​ខ្ពស់ៗ និង​ហេដ្ឋា​រចនា​សម្ព័ន្ធ​ខ្វាត់​ខ្វែង។សម្ដេច​តេជោ ហ៊ុន សែន បាន​លើកឡើង​បែប​នេះ​ នៅ​លើ​ទំព័រ​ហ្វេសប៊ុក​ផ្លូវការ​របស់​សម្ដេច​នៅ​ថ្ងៃទី​២៧ ខែ​មករា​នេះ ជាមួយ​នឹង​ការ​បង្ហោះ​រូបថត​​បង្ហាញ​ទិដ្ឋភាព​ពី​លើ​អាកាស​នៃ​សំណង់​អគារ​ខ្ពស់​ និង​ហេដ្ឋា​រចនា​សម្ព័ន្ធ​ខ្វាត់​ខ្វែង​នៅ​រាជ​ធានី​ភ្នំពេញ។សម្តេចតេជោ ហ៊ុន សែន បានបញ្ជាក់​ថា៖ «តាមរយៈទិដ្ឋភាពនេះ បានបង្ហាញឱ្យ​ឃើញថា ប៉ុន្មាន​ឆ្នាំចុង​ក្រោយ​នេះ ទីក្រុងភ្នំពេញបាន ​និងកំពុងផ្លាស់ប្តូរមុខមាត់យ៉ាងលឿនតាមរយៈវត្តមាន​អគារខ្ពស់ៗ​កប់ពពក ហេដ្ឋារចនាសម្ព័ន្ធ ស្ពាន ស្ពានអាកាស ផ្លូវថ្នល់​ កាន់តែច្រើននៅក្នុងទីក្រុង​នៃប្រទេស​កំពុងមានការអភិវឌ្ឍមួយនេះ»។ប្រមុខ​រាជ​រដ្ឋាភិបាល​កម្ពុជា បាន​រៀបរាប់​បន្ត​ថា​៖ «ការបង្ហាញវត្តមានអគារខ្ពស់ៗ ហេដ្ឋារចនាសម្ព័ន្ធ ស្ពាន ស្ពានអាកាស ផ្លូវថ្នល់ បានកើតឡើង​ជាបន្តបន្ទាប់​កាន់តែច្រើនទាំងអស់នេះ គឺបាន​ឆ្លុះបញ្ចាំង​ពីសមិទ្ធផលធំៗរបស់កម្ពុជាដែលសម្រេចបាន​ និងមិនធ្លាប់​មានពីមុនមក ក្នុងខណៈពេលដែល​កម្ពុជា​កំពុងទទួលបានសុខសន្តិភាពពេញលេញទូទាំងប្រទេស ​ក្រោមការដឹកនាំដ៏ឈ្លាសវៃ របស់​សម្ដេចតេជោ​នាយករដ្ឋមន្ត្រី»។ជាមួយនឹងការបង្ហាញនូវរូបភាព​នៃទិដ្ឋភាពរាជធានីភ្នំពេញចំនួន៧សន្លឹក នៅក្នុងផេកហ្វេស​បុកផ្ទាល់​របស់​សម្តេច នាព្រឹកថ្ងៃទី២៧ ខែមករា ​ឆ្នាំ២០២២នេះ សម្តេចតេជោ​ ហ៊ុន សែន បានរៀប​រាប់​ថា នេះគឺទិដ្ឋភាពមួយចំនួននៃរាជធានីភ្នំពេញ ដែលជាបេះដូងរបស់កម្ពុជាយើង ថតពីលើ​អាកាស​នៅក្នុងខែមករា ឆ្នាំ២០២២នេះ។ បច្ចុប្បន្ននេះ ​វាពិតជាខុសគ្នាដាច់ស្រឡះពីអតីតកាល ហើយទៅអនាគត​ ក៏នឹងកាន់តែរីកដុះដាលច្រើន និងល្អៗជាងនេះថែមទៀត។សម្តេចតេជោ​ បានសង្កត់ធ្ងន់ទៀតថា៖ «ការរីកចម្រើនទាំងអស់នេះ ​មិនអាចកើតឡើងបានឡើយ បើប្រទេស​យើងមិនមានសន្តិភាព។ ដូច្នេះ សន្តិភាព​ គឺជាតម្លៃដែលមិនអាចកាត់ថ្លៃបានឡើយ ហើយ​ប្រជាពលរដ្ឋគ្រប់រូបត្រូវតែរួមគ្នាថែរក្សាការពារសន្តិភាព ដើម្បី​ទទួលបានការអភិវឌ្ឍ​ប្រទេសជាតិ​របស់យើងអរគុណសន្តិភាព!»៕

អាជ្ញាធរខេត្តបន្ទាយមានជ័យ ចុះដាំកូនឈើនៅចំណុចព្រៃលិចទឹកតំបន់៣ ជាប់បឹងទន្លេសាប

2022/01/27 06:02:31 am        679
Facebook Telegram Linkin
បន្ទាយមានជ័យ៖ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងជាប្រធានគណៈបញ្ជាការឯកភាពខេត្ត បានដឹកនាំកម្លាំងចំរុះ ចុះដាំកូនឈើឡើងវិញ នៅចំណុចតំបន់៣ ព្រៃលិចទឹកជាប់ដែនបឹងទន្លេសាប ស្ថិតនៅបរិវេណភូមិក្របៅចាស់ ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ នាថ្ងៃទី២៧ មករាឆ្នាំ២០២២។ក្នុងឱកាសនោះ ឯកឧត្តម អ៊ុំ រាត្រី បានឲ្យដឹងថា៖ ការចូលរួមនាំគ្នាដាំកូនឈើឡើងវិញនៅចំណុច​តំបន់៣ នៃព្រៃលិចទឹកជាប់តំបន់បឹងទន្លេសាបនេះ គឺជាតំបន់​មួយដ៏​ មាន​សារៈសំខាន់​ជា​ដែនជម្រក​សំរាប់ពពួកសត្វត្រីគ្រប់ប្រភេទបង្កាត់ពូជពងក្នុងភូមិសាស្រ្តនេះផងដែរ។ឯកឧត្តមអភិបាលខេត្ត បានបន្តថា៖ ការដាំកូនឈើគ្រប់ប្រភេទឡើងវិញ​ នៅចំណុចតំបន់៣​ជាប់​ដែន​ទន្លេសាបនេះដែរ ​គឺជាលើកទី៦ ​ហើយ​របស់​ខេត្ត​ដែល​បាននាំគ្នាបង្កើនការដាំកូនឈើនៅ​ចំណុច​ភូមិ​សាស្រ្ត​ខាងលើនេះ ព្រោះវាមានសារៈសំខាន់​នឹង​អត្ថប្រយោជន៍​ច្រើន​សំរាប់តំបន់​ព្រៃលិច​ទឹកនឹង​ជា​ជម្រក​ដ៏​សំខាន់សំរាប់ត្រីពងផងដែរ។យ៉ាងណាម៉ិញប្រភេទកូនឈើដែលត្រូវយកមកដាំនៅចំណុចភូមិសាស្រ្តខាងលើនេះ រួមមាន៖ ប្រភេទ កូនត្នោត កូនឬក្សី នឹងដើមរាំងទឹក ជាដើម ​ដើម្បី​បង្កើន​សោភ័ណភាព ​បរិស្ថាន​ល្អ នៅ​តំបន់ខាងនេះ ​នៅថ្ងៃខាងមុខឲ្យមានភាព​ស្រស់ស្អាត ​ប្រកប​ដោយ​ពណ៌ប៉ៃតង​នឹងមានការ​ទាក់ទាញ ​នឹង​ជា​ជម្រក​ត្រី​បង្កាត់​ពូជត្រីពងផងដែរ ​កុំឲ្យ​មាន​ការបាត់បង់​ នៅថ្ងៃខាងមុខ។ ដូច្នេះយើង​ត្រូវនាំ​គ្នាចូលរួមធ្វើការការពារនឹងអភិរក្ស​ តំបន់នេះ​ឲ្យបានល្អប្រសើរ៕អត្ថបទ​៖ ឃិនសារិទ្ធ

ក្រុមប្រឹក្សាធម្មនុញ្ញ​ ច្រានចោលបណ្តឹងរបស់ពលរដ្ឋ​ដែល​ស្នើ​រក្សា​ទុក​ឈ្មោះ​ក្នុង​បញ្ជី​បោះឆ្នោត​ឆ្នាំ២០២១

2022/01/27 12:40:40 pm        586
Facebook Telegram Linkin
ភ្នំពេញ៖ នៅថ្ងៃនេះក្រុមប្រឹក្សាជំនុំជម្រះនៃក្រុមប្រឹក្សាធម្មនុញ្ញ បានសម្រេចច្រានចោលបណ្តឹង របស់ប្រជាពលរដ្ឋចំនួន៥រូបជុំវិញការលុបឈ្មោះចេញពីបញ្ជីបោះឆ្នោតដំបូងឆ្នាំ២០២១។ឯកឧត្តមនីតិកោសលបណ្ឌិត អ៊ឹម ឈុនលឹម ប្រធានក្រុមប្រឹក្សាធម្មនុញ្ញ និងជាប្រធានជំនុំជម្រះ នាថ្ងៃទី២៧ ខែមករា ឆ្នាំ២០២២ បានអញ្ជើញបើកសវនាការជំនុំជម្រះជាសាធារណៈ ដើម្បីពិនិត្យ និងសម្រេចលើបណ្តឹងតវ៉ារបស់ប្រជាពលរដ្ឋចំនួន៥រូប ស្នើសុំរក្សាទុកឈ្មោះរបស់ខ្លួនក្នុងបញ្ជី បន្ទាប់​ពីគណៈកម្មាធិការជាតិរៀបចំការបោះឆ្នោត (គ.ជ.ប) បាន​លុបឈ្មោះចេញពីបញ្ជីបោះឆ្នោត​ដំបូងឆ្នាំ២០២១។ឯកឧត្តម ព្រហ្ម វិចិត្រអក្ខរា អគ្គលេខាធិការរង និងជាអ្នកនាំពាក្យក្រុមប្រឹក្សាធម្មនុញ្ញ​ប្រាប់BTV​ឲ្យដឹងថា យោងតាមការអវត្តមានរបស់ដើមបណ្តឹងជាប្រជាពលរដ្ឋចំនួន៥រូប តាម​នីតិវិធី​របស់​ក្រុមប្រឹក្សាធម្មនុញ្ញមិនពិនិត្យ ​ឬពិចារណាឡើយ ដោយសារការអវត្តមានរបស់ដើមបណ្តឹង​ស្មើ​នឹងបោះបង់បណ្តឹងតវ៉ា។ឯកឧត្តម ព្រហ្ម វិចិត្រអក្ខរា បានបញ្ជាក់ថា​ ជាទូទៅតាមនីតិវិធីរបស់ គ.ជ.ប បន្ទាប់ពីប្រជាពលរដ្ឋ​បាន​បម្លាស់ទីលំនៅរបស់ខ្លួន គ.ជ.ប ត្រូវលុបឈ្មោះចេញពីបញ្ជីបោះឆ្នោតក្នុងទីតាំងទីលំ​នៅ​ចាស់របស់ពួកគាត់ ដើម្បីឲ្យពួកគាត់អាចចុះឈ្មោះបោះឆ្នោតថ្មីបាននៅទីតាំងទីលំនៅថ្មីវិញ។ ឯកឧត្តម បន្ថែមថា ​ដោយហេតុថាដើមបណ្តឹងតវ៉ាបានអវត្តមាន ដូចនេះ​ក្រុមប្រឹក្សាជំនុំជម្រះ សម្រេចច្រានចោនបណ្តឹង និងបិទផ្លូវតវ៉ា ហើយចាត់ទុកដើមបណ្តឹងបោះបង់​សិទ្ធិ​ទាមទារ​របស់ខ្លួន។គួរបញ្ជាក់ថា កាល​ពីសប្តាហ៍មុន គ.ជ.ប ​បានសម្រេច​បដិសេធ​ចោល​ការ​ប្តឹង​តវ៉ា​ចំពោះ​ការលុប​ឈ្មោះ​ចេញពីបញ្ជីឈ្មោះបោះឆ្នោតរបស់ប្រជាពលរដ្ឋចំនួន៥រូប ​ចេញពី​សង្កាត់ផ្សារចាស់ ខណ្ឌដូនពេញ ​រាជធានីភ្នំពេញ ​ដោយសារខុស​នឹង​ទម្រង់គតិច្បាប់៕អត្ថបទ៖ ឧត្តម

បណ្ដាញសង្គម

ព័ត៌មានថ្មីៗ

សហគ្រាសក្នុងស្រុកកំពុងជំរុញផលិតយ៉ាងផុលផុស ផ្គត់ផ្គង់លើទីផ្សារ ខណៈកម្ពុជាកំពុងជួបវិបត្តិ
08/04/2025 08:08 PM
Facebook Telegram Linkin
ជនសង្ស័យស្ថិតក្នុងដំណើរការកាត់ទោស ពាក់ព័ន្ធនឹងការវាយប្រហារកន្លែងប្រគុំតន្ត្រីសម្លាប់មនុស្ស ១៤៩នាក់ នៅមូស្គូ
08/04/2025 08:08 PM
Facebook Telegram Linkin
អ៊ីរ៉ង់៖ ការទទួលខុសត្រូវរបស់អាមេរិក ចំពោះការវាយប្រហារលើទីតាំងនុយក្លេអ៊ែរ គឺជាផ្នែកនៃកិច្ចពិភាក្សា នាពេលអនាគត
08/04/2025 08:08 PM
Facebook Telegram Linkin
សម្តេចព្រះមហាក្សត្រី ព្រះវររាជមាតាជាតិខ្មែរ ប្រោសព្រះរាជទានព្រះរាជទ្រព្យ​១៥.០០០​ដុល្លារ រួមជាមួយស្បៀង​ និងសម្ភារមួយចំនួនទៀត ចំពោះកាកបាទក្រហមកម្ពុជា ​សម្រាប់ជួយដល់ប្រជារាស្ត្រភៀសសឹក...!!
08/04/2025 08:08 PM
Facebook Telegram Linkin
កងកម្លាំងអ៊ុយក្រែនវាយប្រហារមូលដ្ឋានអាកាសរុស្ស៊ី នៅគ្រីម៉ា ដោយយន្តហោះ ១គ្រឿង ត្រូវបានបំផ្លាញ ខណៈ ៤គ្រឿងខូចខាត
08/04/2025 07:08 PM
Facebook Telegram Linkin
ក្រសួងការងារនាំយកឱកាសការងារជាង ៧ពាន់កន្លែង សម្រាប់ប្រជាពលរដ្ឋនៅក្នុងខេត្តសៀមរាប
08/04/2025 07:08 PM
Facebook Telegram Linkin
ភាពអត់ឃ្លានកើនឡើង ហើយទីបញ្ចុះសពមានកាន់តែច្រើន នៅទីក្រុង Al-Fashir របស់ស៊ូដង់
08/04/2025 07:08 PM
Facebook Telegram Linkin
TOP STORY | សម្ដេចតេជោ៖«សូមកុំភ្លេចថា ខ្ញុំជានាយឧត្តមសេនីយ៍ផុតលេខផ្កាយមាស៥, នៅកម្ពុជាគ្មានការប្រជែងអំណាចរវាងរដ្ឋាភិបាលជាមួយកងទ័ពនោះឡើយ»!
08/04/2025 07:08 PM
Facebook Telegram Linkin
វិមានក្រឹមឡាំង៖ លោក Putinអាចជួបប្រេសិតពិសេសអាមេរិកក្នុងសប្តាហ៍នេះ
08/04/2025 07:08 PM
Facebook Telegram Linkin
ជំនន់ទឹកភ្លៀងបានសម្លាប់មនុស្ស ១៥នាក់នៅប្រទេសហ្គីណេ
08/04/2025 07:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.