BTV NEWS

TOP STORY | សម្ដេចធិបតី បានចាត់វិធានការចាំបាច់ជាបន្តបន្ទាប់ចំពោះការវិលត្រឡប់ទ្រង់ទ្រាយធំរបស់ពលករខ្មែរ និងជនភៀសសឹក

TOP STORY | សម្ដេចតេជោ៖ ពេលនេះ ខ្ញុំកំពុងតែរួមចំណែកបញ្ជាទ័ព តាមប្រព័ន្ធវីដេអូ និងប្រព័ន្ធផ្សេងទៀតជាមួយនាយករដ្ឋមន្ត្រី, រដ្ឋមន្ត្រីក្រសួងការពារជាតិ អគ្គមេបញ្ជាការកងទ័ព និងបញ្ជាការកងកម្លាំងប្រដាប់អាវុធគ្រប់លំដាប់ថ្នាក់

TOP STORY |សម្ដេចធិបតី ហ៊ុន ម៉ាណែត ដាក់លិខិតស្នើសុំកោះប្រជុំក្រុមប្រឹក្សាសន្តិសុខជាបន្ទាន់ ដើម្បីសុំការអន្តរាគមន៍បញ្ចប់ការឈ្លានពានរបស់កងទ័ពថៃមកលើដែនអធិបតេយ្យភាពរបស់កម្ពុជា

TOP STORY | សម្ដេចធិបតី៖ កងទ័ពថៃបានបើកការវាយប្រហារមកលើទីតាំងឈរជើងរបស់កងទ័ពកម្ពុជា នៅប្រាសាទតាមាន់ធំ តាក្របី និងបានពង្រីកភូមិសាស្ត្រវាយប្រហារទៅដល់តំបន់មុំបី

នយោបាយ និង ការអភិវឌ្ឍន៍

សម្តេចតេជោ បានអញ្ជើញទៅដល់ក្រុងព្រះសីហនុ ដើម្បីបើកវេទិកាទេសចរណ៍អាស៊ាន នៅរសៀលថ្ងៃនេះ

ព្រះសីហនុ៖ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានអាស៊ានឆ្នាំ២០២២ បានអញ្ជើញទៅដល់ក្រុងព្រះសីហនុហើយ នៅព្រឹកថ្ងៃទី១៨ ខែមករានេះ ដើម្បីអញ្ជើញជាអធិបតីបើក វេទិកាទេសចរណ៍អាស៊ាន លើកទី៤០ (ATF 2022) នៅរសៀលថ្ងៃនេះ។វេទិកាទេសចរណ៍អាស៊ានលើកទី៤០ ដែលកម្ពុជាធ្វើជាម្ចាស់ផ្ទះ ត្រូវបានរៀបចំចាប់ពីថ្ងៃទី១៦-២២ ខែមករានេះ។ វេទិកានេះ មានសារសំខាន់ ក្នុងការជំរុញផ្សព្វផ្សាយវិស័យទេសចរណ៍របស់ប្រទេស ទាំង១០ ដែលជាសមាជិកអាស៊ាន។ វេទិកាទេសចរណ៍អាស៊ានឆ្នាំនេះ ដែលត្រូវរៀបចំឡើងនៅកម្ពុជា គឺជាការបង្ហាញឱ្យឃើញនូវកិច្ចខិតខំប្រឹងប្រែងរបស់កម្ពុជា ក៏ដូចជាប្រទេសសមាជិកអាស៊ានដទៃទៀត ក្នុងការធ្វើឱ្យវិស័យទេសចរណ៍មានដង្ហើមឡើងវិញ ក្រោយរងការវាយប្រហារយ៉ាងខ្លាំងពីវិបត្តិជំងឺកូវីដ-១៩ រយៈពេលប្រមាណ ២ឆ្នាំកន្លងទៅនេះ។មុនពេលមកដល់នៃវិបត្តិកូវីដ-១៩ ក្នុងឆ្នាំ២០១៩ ប្រទេសសមាជិកអាស៊ាន គឺជាទីតាំងសម្រាប់ លម្ហែកាយ និងដំណើរកម្សាន្តដ៏ទាក់ទាញមួយ។ អ្នកទេសចរអន្តរជាតិចូលមកអាស៊ាន ចំនួនជាង ១៣៦ លាននាក់ និងបង្កើតការងារផ្ទាល់ប្រមាណ ៣០លាននាក់។ វិស័យទេសចរណ៍នេះ បានផ្តល់ចំណូលប្រមាណ ១០ភាគរយ នៃផលិតផលសរុបរបស់អាស៊ាន។ តែនៅឆ្នាំ២០២០ ទេសចរអន្តរជាតិ ចូលមក ទស្សនាអាស៊ាន មានត្រឹមប្រមាណជាង ២៥លាននាក់ប៉ុណ្ណោះ ធ្លាក់ចុះប្រមាណជាង៨០ភាគរយ។ ចំណូលពីទេសចរណ៍ ធ្លាក់ចុះរហូតដល់ជាង៧៥ភាគរយ។វេទិកាទេសចរណ៍អាស៊ានលើកទី៤០ នឹងភ្ជាប់ជាមួយកិច្ចប្រជុំស្ថាប័នជាតិទេសចរណ៍អាស៊ាន (ASEAN NTO) កិច្ចប្រជុំរដ្ឋមន្ត្រីទេសចរណ៍អាស៊ាន និងកិច្ចប្រជុំពាក់ព័ន្ធ ព្រឹត្តិការណ៍អម និងការតាំង ពិព័រណ៍ទេសចរណ៍ (Travel Exchange/ Travex) ខ្នាតតូចល្មម។ ព្រឹត្តិការណ៍នេះ ក៏មានការចូលរួមពី ដៃគូសន្ទនា ដូចជា អង្គការទេសចរណ៍ពិភពលោក (UNWTO), សមាគមទីភ្នាក់ងារទេសចរណ៍អាស៊ីប៉ាស៊ីហ្វិក (PATA) និងសមាគមទេសចរណ៍អាស៊ាន (ASEANTA) ។ វេទិកានេះ ក៏មានការដាក់លក់ទំនិញ ផ្សេងៗរហូតដល់ទៅ១៨៧ស្តង់ ក្នុងនោះស្តង់អន្តរជាតិ ចំនួន៦១ និងស្តង់ក្នុងស្រុក ចំនួន១២៦ មកពី ឥណ្ឌូនេស៊ី ម៉ាឡេស៊ី ភូមា ហ្វីលីពីន និងថៃ ។ល។ឯកឧត្ដម ថោង ខុន រដ្ឋមន្ត្រីក្រសួងទេសចរណ៍ បានបង្ហាញក្តីសង្ឃឹមថា វេទិកាទេសចរណ៍អាស៊ាន ឆ្នាំនេះនឹងក្លាយជាព្រឹត្តិការណ៍ដ៏សំខាន់ក្នុងការប្រកាសបើកគោលដៅទេសចរណ៍ក្នុងតំបន់អាស៊ានឡើង វិញជាផ្លូវការ។ ព្រឹត្តិការណ៍អន្តរជាតិនេះ នឹងជួយផ្សព្វផ្សាយពីប្រទេសកម្ពុជា ជាគោលដៅទេសចរណ៍ សុវត្ថិភាពមួយក្នុងតំបន់អាស៊ាន៕ អត្ថបទ៖ មុត សុទ្ធ

សិស្សជាប់បាក់ឌុប កំពុងស្វែងរកព័ត៌មាន និងចុះឈ្មោះចូលរៀននៅតាមបណ្តាសាកលវិទ្យាល័យ

ភ្នំពេញ៖ សិស្សដែលទើបប្រឡងជាប់បាក់ឌុបក្នុងឆ្នាំសិក្សា ២០២០-២០២១ ថ្មីនេះៗ បាននិងកំពុងស្វះស្វែងរកព័ត៌មានពីកម្មវិធីសិក្សា និងចុះឈ្មោះចូលរៀននៅតាមសាកលវិទ្យាល័យនានា ក្នុងរាជធានីភ្នំពេញ។ ក្រោយពីប្រកាសលទ្ធផលប្រឡងបាក់ឌុប ទូទាំងប្រទេសកាលពីសប្ដាហ៍មុននេះ សិស្សមធ្យមសិក្សាទុតិយភូមិដែលបានប្រឡងជាប់បានធ្វើដំណើរចាកចេញពីស្រុកកំណើត មកកាន់រាជធានីភ្នំពេញ ដើម្បីសាកសួរព័ត៌មាន និងចុះឈ្មោះចូលរៀននៅតាមសាកលវិទ្យាល័យ។ ជាក់ស្ដែងនៅថ្ងៃនេះ មានវត្តមានសិស្សជាច្រើនបានចុះឈ្មោះចូលរៀន នៅសាកលវិទ្យាល័យជាតិគ្រប់គ្រង។ សម្រាប់ការមកចុះឈ្មោះចូលរៀននៅថ្ងៃនេះ ពួកគាត់លើកឡើងថា ពួកគាត់មានការពិចារណាច្រើន និងមានគោលដៅច្បាស់លាស់ ក្នុងជ្រើសរើសមុខជំនាញសិក្សា និងសាកលវិទ្យាល័យដែលត្រូវសិក្សាក្នុងរយៈពេល ៤ឆ្នាំ។ពាក់ព័ន្ធនឹងការជ្រើសរើសមុខវិជ្ជា និងសាកលវិទ្យាល័យដែលត្រូវសិក្សា ក្នុងថ្នាក់ឧត្តមសិក្សា គឺជារឿងសំខាន់សម្រាប់អនាគត។ នេះជាការលើកឡើងរបស់ លោកបណ្ឌិត លី សុខហេង សាកលវិទ្យាធិការរង នៃសាកលវិទ្យាល័យជាតិគ្រប់គ្រង។ លោកបណ្ឌិតណែនាំថា ការជ្រើសរើសមុខវិជ្ជាសិក្សា ត្រូវស្របតាមចំណង់ចំណូលចិត្តរបស់ខ្លួន និងសមស្របទៅតាមទីផ្សារការងារ ជាពិសេស ការជ្រើសរើសសាកលវិទ្យាល័យសិក្សា ក៏ត្រូវជ្រើសរើសសាកលវិទ្យាល័យដែលមានគុណភាព និងមាននិរន្តរភាព។លទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ២៧ ធ្នូ ២០២១ ចាប់រាប់ពី ដំណើរការសំណេរ, កំណែ, ស្រង់ បូកពិន្ទុដោយកុំព្យូទ័រ, និងផ្ទៀងផ្ទាត់ពិន្ទុ បានប្រព្រឹត្តទៅប្រកបដោយជោគជ័យ និងពុំមានឧបទ្ទវហេតុអ្វីគួរឱ្យកត់សម្គាល់ឡើយ។ ការប្រឡងនេះ មានសិស្សប្រឡងជាប់ចំនួន ៧២០១៦ នាក់ ត្រូវជា ៦៥.៦៥% (បើប្រៀបធៀបនឹងឆ្នាំ២០១៩ចំនួន ៦៨.៦២%) ក្នុងនោះបេក្ខជនដែលទទួលបាននិទ្ទេស A មានចំនួន ១ ៧៥៣ នាក់ (ឆ្នាំ២០១៩ ចំនួន ៤៤៣ នាក់)៕ អត្ថបទ៖ គឹមហុក

ឯកឧត្តម ហ៊ុន ម៉ាណែត៖ គណបក្សប្រជាជនកម្ពុជា បានជួយសង្រ្គោះជីវិតប្រជាជន៤ដងធំៗ

កំពង់ចាម៖ ឯកឧត្តមបណ្ឌិត ហ៊ុន ម៉ាណែត សមាជិកគណៈអចិន្ត្រៃយ៍នៃគណៈកម្មាធិការកណ្តាល និងជាប្រធានយុវជនគណបក្សប្រជាជនកម្ពុជាថ្នាក់កណ្តាល បានបញ្ជាក់ថា គណបក្សប្រជាជនកម្ពុជា បានស្រោចស្រង់ជីវិតប្រជាជនពីសោដនាធកម្មធំៗចំនួន ៤ដង។ឯកឧត្តមបណ្ឌិត បានថ្លែងបែបនេះ នៅក្នុងពិធីប្រកាសទទួលស្គាល់ ឯកឧត្តម ហេង សួរ ជាប្រធានក្រុមការងារជនបង្គោលយុវជនថ្នាក់កណ្តាលចុះជួយស្រុកបាធាយ និងលោក ឡូញ សារ៉ូ ជាប្រធានក្រុមការងារយុវជនស្រុកបាធាយ។ឯកឧត្តមបណ្ឌិត ហ៊ុន ម៉ាណែត បានបញ្ជាក់ថា សមាជិកគណបក្សប្រជាជនកម្ពុជាត្រូវមានមោទនភាពចំពោះគណបក្សប្រជាជនកម្ពុជា ពីព្រោះក្រោមការដឹកនាំរបស់សម្តេចតេជោ ហ៊ុន សែន គណបក្សប្រជាជនបាន ទី១.ផ្តួលរំលំរបបប្រល័យពូជសាសន៍ ប៉ុល ពត ដោយបញ្ចប់ភ្លាមៗនូវការកាប់សម្លាប់ជីវិតប្រជាជនខ្លួនឯងយ៉ាងរង្គាល នាថ្ងៃ៧ ខែមករា ឆ្នាំ១៩៧៩។ ប្រសិនជារបបនេះបន្តបាន១ថ្ងៃនោះប្រជាជនកម្ពុជារាប់ម៉ឺននាក់នឹងត្រូវពួកឃាតករនេះយកទៅសម្លាប់ចោលដោយមិនរើសមុខ។ ទី២.ក្រោយការផ្តួលរំលំរបបប៉ុលពតភ្លាម គណបក្សបានខិតខំកសាងប្រទេសជាតិពីបាតដៃទទេ ពីសេសបានកសាងឡើងវិញ នូវខឿនសេដ្ឋកិច្ច និងកសិកម្ម ដោយសង្រ្គោះប្រជាជនឱ្យរួចផុតពីគ្រោះធម្មជាតិ និងស្លាប់ដោយការខ្វះស្បៀងអាហារ។ ទី៣. បានសង្រ្គោះជីវិតខ្មែរ ពីការច្បាំងសម្លាប់ខ្មែរគ្នាឯង តាមរយៈនយោបាយឈ្នះ-ឈ្នះ នាំមកនូវខុសសន្តិភាព១០០% ពេញផ្ទៃប្រទេស នាឆ្នាំ១៩៩៨។ និងទី៤. បានជួយសង្រ្គោះជីវិតប្រជាជនពីការស្លាប់ដោយសារជំងឺកូវីដ-១៩ ដ៏កាចសាហាវប្រចាំសតវត្ស តាមរយៈការសម្រេចចិត្តយ៉ាងត្រឹមត្រូវក្នុងការស្វែករកវ៉ាក់សាំងកូវីដ-១៩ ចាក់ជូនប្រជាពលរដ្ឋដោយឥតគិតថ្លៃ យ៉ាងសំបូរបែប និងទាន់ពេលវេលា ព្រមទាំងបានទិញថ្នាំ សម្ភារៈ បរិក្ខារពេទ្យសម្រាប់ព្យាបាលជំងឺកូវីដ-១៩ ប្រកបដោយប្រសិទ្ធភាព។ ប្រសិនជាគ្មានវ៉ាក់សាំង ថ្នាំព្យបាល និងការចាត់វិធានការទាន់ពេលវេលាក្នុងការគ្រប់គ្រង និងទប់ស្កាត់ការរីករាលដាលជំងឺកូវីដ-១៩ នោះជីវិតប្រជាពលរដ្ឋច្រើនម៉ឺននាក់ថែមទៀតអាចនឹងត្រូវបាត់បង់ ហើយក៏គ្មានទេ ការបើកនិងស្តាសេដ្ឋកិច្ច មុខរបរ និងការងារឡើងវិញ។ក្នុងការប្រយុទ្ធប្រឆាំងជំងឺកូវីដ-១៩នេះ សម្តេចតេជោ បានយកជីវិតកូន និងចៅរបស់ខ្លួនធ្វើជាគំរូ ដើម្បីបង្ហាញអំពីភាពជឿជាក់ទៅលើវ៉ាក់សាំងនានា និងវិធីសាស្ត្រព្យាបាលនានាដល់មហាជន។ឯកឧត្តមបណ្ឌិត ហ៊ុន ម៉ាណែត ក៏បានស្នើសុំឱ្យប្រជាជនកត់សំគាល់ផងដែរថា ក្នុងអំឡុងពេល កូវីដ-១៩ នេះ មានអ្នកនយោបាយមួយចំនួនមិនត្រឹមតែមិនបានស្នើសុំឱ្យបរទេសជួយផ្តល់វ៉ាក់សាំងកូវីដ-១៩ ដើម្បីចាក់ជូនប្រជាជនខ្លួនឯងនោះទេ គឺថែមទាំងបានស្នើសុំឱ្យបរទេសផ្តាច់ជំនួយ ឬដាក់ទណ្ឌកម្មលើកម្ពុជា ក្នុងគោលបំណងធ្វើឱ្យប្រជាជនដែលកំពុងតែរងផលប៉ះពាល់ខ្លាំង ដោយសារកូវីដ-១៩ហើយនោះ កាន់តែរងផលប៉ះពាល់បន្ថែម។ អ្នកនយោបាយបែបនេះ គឺជាអ្នកនយោបាយដែលគ្មានគុណធម៌ និងសុជីវធម៌ចំពោះប្រជាជន និងជាតិខ្លួនឯង ដោយស្រេកឃ្លានចង់ឃើញតែប្រជាជនខ្លួនឯងរងទុក្ខវេទនា។ក្នុងឱកាសនោះ ឯកឧត្តមបណ្ឌិត ក៏បានណែនាំឱ្យក្រុមការងារយុវជនគ្រប់ជាន់ថ្នាក់ ត្រូវចូលរួមជួយការងារគណបក្សថ្នាក់ខ្លួនឱ្យបានល្អ ជាពិសេសគឺត្រូវខិតខំជួយបំរើប្រជាជនឱ្យបានល្អ ពីព្រោះគណបក្សប្រជាជនកម្ពុជាយើងរក្សាបានប្រៀបឈ្នះកន្លងមកនេះ គឺដោយសារតែមន្ត្រីគណបក្សយើងមានគុណធម៌ សុជីវធម៌ កសាងអំពើល្អ មានសាមគ្គីភាព និងតែងតែចាត់ទុកប្រយោជន៍ប្រជាជនជាធំ។ សូមមន្ត្រីគណបក្សគ្រប់ជាន់ថ្នាក់ចូលរួមយ៉ាងសកម្មជាមួយអាជ្ញាធរមាន សមត្ថកិច្ចសហការរៀបចំការចាក់វ៉ាក់សាំងដូសជំរុញឱ្យបានទាន់ពេល និងសូមរួមគ្នាបំផុស និងបន្តអនុវត្តឱ្យបាន នូវវិធានការ ៣កុំ ៣ការពារ របស់រាជរដ្ឋាភិបាល៕

ការប្រឡងជ្រើសរើសសិស្សមន្ត្រីជាន់ខ្ពស់លើកទី១២ របស់សាលាភូមិន្ទរដ្ឋបាល ឈានដល់ការប្រឡងផ្ទាល់មាត់

ភ្នំពេញ៖ ការប្រឡងប្រជែងជ្រើសរើសសិស្សមន្ត្រីជាន់ខ្ពស់លើកទី១២ របស់សាលាភូមិន្ទរដ្ឋបាល បានឈានដល់វិញ្ញាសាសួរផ្ទាល់មាត់ហើយ នាថ្ងៃទី១៦-១៧ ខែមករា ឆ្នាំ២០២២នេះ បន្ទាប់ពីបញ្ចប់រួចរាល់នូវការប្រឡងសម្រាប់វិញ្ញាសាសរសេរទី១ កាលពីចុងឆ្នាំកន្លងទៅ និងវិញ្ញាសាសរសេរលើកទី២ កាលពីថ្ងៃទី១០ ខែមករា។តាមការឲ្យដឹងរបស់សាលាភូមិន្ទរដ្ឋបាលបានបង្ហាញបញ្ជីរាយនាមបេក្ខជនចំនួន ១២៦នាក់ ដែលប្រឡងជាប់វិញ្ញាសាសរសេរលើកទី២ សម្រាប់ការប្រឡងប្រជែងជ្រើសរើសសិស្សមន្ត្រីជាន់ខ្ពស់លើកទី១២ ក្នុងនោះជំនាញរដ្ឋបាលសាធារណៈ, ជំនាញសេដ្ឋកិច្ចនិងហិរញ្ញវត្ថុ និងជំនាញទំនាក់ទំនងអន្តរជាតិ។សម្រាប់ការបើកការប្រឡងវិញ្ញាសាសួរផ្ទាល់មាត់ កាលពីថ្ងៃទី១៦ ខែមករាកន្លងទៅនេះ ត្រូវបានធ្វើឡើងក្រោមអធិបតីភាពឯកឧត្តម យក់ ប៊ុនណា រដ្ឋលេខាធិការប្រចាំការនៃក្រសួងមុខងារសាធារណៈ នាយកសាលាភូមិន្ទរដ្ឋបាល និងជាប្រធានមណ្ឌលប្រឡងសម្រាប់ដំណើរការនៃការប្រឡងនេះផងដែរ។មិនខុសពីការប្រឡងលើកមុនឡើយក្នុងការប្រឡងវិញ្ញាសាសួរផ្ទាល់មាត់នេះ ក្រសួងមុខងារសាធារណៈ និងសាលាភូមិន្ទរដ្ឋបាលបានយកចិត្តទុកដាក់យ៉ាងហ្មត់ចត់ និងត្រឹមត្រូវបំផុត ក្នុងនោះមានការចូលរួមពីអង្គភាពប្រឆាំងអំពើពុករលួយ និងប្រធាន-អនុប្រធាន សមាជិក-សមាជិកានៃអនុគណៈកម្មការនានា សម្រាប់ការប្រឡងប្រជែងជ្រើសរើសសិស្សមន្ត្រីជាន់ខ្ពស់លើកទី១២ នៃសាលាភូមិន្ទរដ្ឋបាល មកពីក្រសួង-ស្ថាប័នពាក់ព័ន្ធ និងមកពីបណ្តាសាកលវិទ្យាល័យនានាផងដែរ៕អត្ថបទ៖ ឈិត បូរ៉ាវី

តំណាងធុរជនជាតិ-អន្តរជាតិ៖ វិស័យទេសចរណ៍កម្ពុជា នឹងងើបឡើងវិញក្រោយATFលើកទី៤០

ភ្នំពេញ៖ តំណាងធុរជនជាតិ និងអន្តរជាតិ បានសម្ដែងនូវសុទិដ្ឋិនិយមថា វិស័យទេសចរណ៍កម្ពុជា នឹងងើបឡើងវិញ ក្រោយពេលវេទិកាទេសចរណ៍អាស៊ាន (AFT) លើកទី៤០ ដែលកម្ពុជាធ្វើជាម្ចាស់ផ្ទះ ចាប់ពីថ្ងៃ ទី១៦ដល់ថ្ងៃទី២២ ខែមករានេះ។នៅថ្ងៃទី១៧ ខែមករានេះ បណ្តាក្រុមហ៊ុន ដៃគូជាតិ អន្តរជាតិ បាននឹងកំពុងរៀបចំស្តង់ និងការដាក់ តាំងផលិតផលទេសចរណ៍របស់ខ្លួន ចូលរួមកម្មវិធីពិព័រណ៍ទេសចរណ៍អន្តរជាតិ (Travel Exchang) ឬហៅថា (ត្រាវិច) (Travex) នៅក្នុងព្រឹត្តិការណ៍វេទិការទេសចរណ៍អាស៊ាន ATF លើកទី៤០ នៅសណ្ឋាគារសុខា ខេត្តព្រះសីហនុ។ ខណៈដែលក្រុមហ៊ុនទេសចរណ៍ជាតិ-អន្តរជាតិ កំពុងរៀបចំដាក់តាំងបង្ហាញផលិតផលទេសចរណ៍របស់ខ្លួននោះ តំណាងធុរជនក្នុងស្រុក និងក្រៅស្រុកមួយចំនួន បានបង្ហាញនូវក្ដីសង្ឃឹមចំពោះការ ងើបឡើងវិញ នៃវិស័យទេសចរណ៍ ខណៈដែលកម្ពុជា រៀបចំព្រឹត្តិការណ៍ទេសចរណ៍អាស៊ាន ដែលវេទិកា នេះ នឹងជាការជំរុញឱ្យវិស័យទេសចរណ៍នៅក្នុងតំបន់អាស៊ាន បើកដំណើរការឡើងផងដែរ។នៅក្នុងព្រឹត្តិការណ៍ATFនេះ ក៏មានការរៀបចំការតាំងពិព័រណ៍ទេសចរណ៍អន្តរជាតិ ឬហៅថា Travel Exchange ឬហៅTravex(ត្រាវិច) ដែលមានបណ្តាក្រុមហ៊ុនធុរជនទេសចរណ៍ជាតិ-អន្តរជាតិ ចូលរួមសរុប៣៥០នាក់ មកពីបណ្តាប្រទេសចំនួន២៧ ក្នុងនោះ អ្នកលក់ (Sellers) សរុបចំនួន១៨៧ ស្តង់ អ្នកទិញ (Buyers) ចំនួន១៥០ក្រុមហ៊ុន ក្នុងនោះមកផ្ទាល់ ចំនួន៤០ និងតាមប្រព័ន្ធអនឡាញ ចំនួន១១០៕អត្ថបទ៖ ស៊ុម សុខជា

រដ្ឋមន្ត្រីទេសចរណ៍អាស៊ាន និងភាគីពាក់ព័ន្ធបានមកដល់ក្រុងព្រះសីហនុ ដើម្បីចូលរួមATF លើកទី៤០

ព្រះសីហនុ៖ រដ្ឋមន្ត្រីទេសចរណ៍អាស៊ាន និងភាគីពាក់ព័ន្ធនានា បានមកដល់ក្រុងព្រះសីហនុ ដើម្បីចូលរួមវេទិកា ទេសចរណ៍អាស៊ាន (ATF) លើកទី៤០ ដែលកម្ពុជាធ្វើជាម្ចាស់ផ្ទះ ចាប់ពីថ្ងៃទី១៦-២២ ខែមករានេះ។នៅថ្ងៃនេះ រដ្ឋមន្ត្រីថ្នាក់ដឹកនាំទេសចរណ៍អាស៊ាន ថ្នាក់ដឹកនាំអង្គការសមាគមទេសចរណ៍អាស៊ាន អង្គការទេសចរណ៍ពិភពលោក នៃអង្គការសហប្រជាជាតិ (UNWTO) និងអ្នកវិនិយោគទុនជាតិអន្តរជាតិ បានអញ្ជើញមកដល់ខេត្តព្រះសីហនុ ជាបន្តបន្ទាប់ ដើម្បីត្រៀមខ្លួនចូលរួមការបើកវេទិកាទេសចរណ៍អាស៊ាន (ATF) លើកទី៤០ ឆ្នាំ២០២២ និងកិច្ចប្រជុំរដ្ឋមន្ត្រីទេសចរណ៍អាស៊ាន អាស៊ានបូក និងកិច្ចប្រជុំជាច្រើនទៀតព្រមទាំងរៀបចំដំឡើងផលិតផលទេសចរណ៍ នៅតាមបណ្តាស្តង់តាំងពិព័រណ៍ទេសចរណ៍ អន្តរជាតិ (Travex) ផងដែរ។លោក ទី្រ ឈីវ ប្រធាននាយកដ្ឋានសហប្រតិបត្តិការអន្តរជាតិ និងអាស៊ាន នៃក្រសួងទេសចរណ៍ បានឱ្យដឹងថា នៅក្នុងព្រឹត្តិការណ៍វេទិកាទេសចរណ៍អាស៊ាន (ATF) លើកទី៤០នេះ គឺមានកិច្ចប្រជុំធំៗ នៃថ្នាក់ដឹកនាំទេសចរណ៍ ចំនួន៤ រួមមាន៖ កិច្ចប្រជុំរដ្ឋមន្ត្រីទេសចរណ៍អាស៊ានលើកទី២៥ កិច្ចប្រជុំរដ្ឋ មន្ត្រីទេសចរណ៍អាស៊ានបូកបី (កូរ៉េខាងត្បូង ជប៉ុន ចិន) កិច្ចប្រជុំរដ្ឋមន្ត្រីទេសចរណ៍អាស៊ានបូករុស្ស៊ី និង អាស៊ានបូកឥណ្ឌានិងកិច្ចប្រជុំថ្នាក់ដឹកនាំស្ថាប័នទេសចរណ៍អាស៊ាន ជាមួយបណ្តាដៃគូអន្តរជាតិជាច្រើនទៀត។លោក បានឱ្យដឹងបន្ថែមថា នៅក្នុងវេទិកាATF ក៏មានកិច្ចប្រជុំថ្នាក់ប្រធានស្ថាប័នទេសចរណ៍អា ស៊ាន អាស៊ានបូកបី អាស៊ានបូករុស្ស៊ី អាស៊ានបូកឥណ្ឌា និងកិច្ចប្រជុំប្រធានស្ថាប័នទេសចរណ៍ជាអាស៊ាន ជាមួយបណ្តាដៃគូអន្តរជាតិជាច្រើនទៀត ហើយក្នុងនោះ ក៏មានកិច្ចប្រជុំថ្នាក់ធុរជនទេសចរណ៍អាស៊ាន ជាមួយបណ្តាប្រទេសជាដៃគូជាច្រើនទៀត។នៅក្នុងកិច្ចប្រជុំនេះ អាស៊ាន បានរៀបចំរបៀបវារៈពិភាក្សាជាច្រើន ក្នុងនោះអាស៊ានក៏នឹងធ្វើការ ពិភាក្សា ការអនុម័តយកឯកសារផែនទីចង្អុលផ្លូវ សម្រាប់ការស្ដារវិស័យទេសចរណ៍ឡើងវិញក្នុងអំឡុង និងក្រោយវិបត្តិកូវីដ-១៩ ដែលរាជរដ្ឋាភិបាលកម្ពុជារៀបចំឡើង ដើម្បីអនុវត្តទទួលបានជោគជ័យ ក្នុងអំឡុងពេល ដែលកម្ពុជាកំពុងជួបវិបត្តិនៃការរាតត្បាតជំងឺកូវីដ-១៩នេះ ដើម្បីយកឯកសារផែនទីនេះ រៀបចំ ធ្វើជាផែនការសម្រាប់ស្តារទេសចរណ៍អាស៊ានឡើងវិញក្រោយវិបត្តិកូវីដ-១៩។ដោយមានការគាំទ្រពីរដ្ឋមន្ត្រីទេសចរណ៍អាស៊ាន កាលពីថ្ងៃទី២១ ខែកញ្ញា ឆ្នាំ២០២១ និងត្រូវ បានកិច្ចប្រជុំកំពូលអាស៊ានលើកទី៣៨ និង៣៩ កម្ពុជា នឹងដឹកនាំសម្របសម្រួលរៀបចំគោលកាណ៍ណែ នាំ ស្ដីពីវិធានសុខភាព និងអនាម័យរួមអាស៊ាន សម្រាប់សេវាកម្មទេសចរណ៍ចំនួន៨ ដែលនឹងត្រូវអនុម័ត ដាក់ឱ្យប្រើប្រាស់ដោយកិច្ចប្រជុំរដ្ឋមន្ត្រីទេសចរណ៍អាស៊ានលើកទី២៥ នៅក្នុងព្រឹត្តិការណ៍ATFនេះ៕ អត្ថបទ៖ ស៊ុម សុខជា

សម្តេចប្រធានរដ្ឋសភា អំពាវនាវពលរដ្ឋ ទៅចាក់វ៉ាក់សាំងដូសជំរុញទប់ស្កាត់ការឆ្លងរាលដាលក្នុងសហគមន៍

ភ្នំពេញ៖ សម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា បានអំពាវនាវដល់ប្រជាពលរដ្ឋទៅចាក់វ៉ាក់សាំងដូសជំរុញឲ្យបានគ្រប់ៗគ្នា ដើម្បីទប់ស្កាត់ការឆ្លងរាលដាលជំងឺកូវីដ១៩ បំប្លែងថ្មីអូមីក្រុងក្នុងសហគមន៍។ការអំពាវនាវរបស់សម្តេចអគ្គមហាពញាចក្រី ហេង សំរិន ប្រធានរដ្ឋសភាធ្វើឡើងក្នុងពេលអញ្ជើញទទួលការចាក់វ៉ាក់សាំងដូសជំរុញ ឬដូសទី៤ នៅថ្ងៃទី១៧ ខែមករា ឆ្នាំ២០២២នេះ នៅវិមានរដ្ឋសភា ដែលមានការអញ្ជើញចូលរួមពីសមាជិក-សមាជិកានៃរដ្ឋសភា។ សម្តេចប្រធានរដ្ឋសភា មានប្រសាសន៍ថា ការផ្អាកសង្គម និងសេដ្ឋកិច្ចរបស់សកលលោក ក៏ដូចជាប្រទេសកម្ពុជានាពេលកន្លងមក ពិតជាបានបង្កការលំបាកទំាងក្នុងការរស់នៅ និងជីវភាព ដូចនេះដើម្បីជៀសផុតពីការលំបាកទំាងនោះម្តងទៀត សូមជនរួមជាតិចូលរួមចាក់វ៉ាក់សំាងនិងអនុវត្តវិធានការសុខាភិបាលឱ្យបានហ្មត់ចត់ និងគ្រប់ៗគ្នា មិនត្រូវធ្វេសប្រហែសឡើយ។ សម្តេចប្រធានរដ្ឋសភា បន្តថា មានតែការចូលរួមរបស់បងប្អូនជនជាតិគ្រប់គ្នាប៉ុណ្ណោះទើបគ្រួសារ និងសង្គមជាតិអាចឈ្នះនឹងជំងឺកូវីដ-១៩បាន។នាឱកាសនោះ សម្តេចប្រធានរដ្ឋសភា បានអំពាវនាវដល់ប្រជាពលរដ្ឋទាំងអស់ទៅចាក់វ៉ាក់សំាងដូសជំរុញឱ្យបានគ្រប់ៗគ្នា និងបន្តអនុវត្តវិធានការសុខាភិបាលឱ្យបានខ្ជាប់ខ្ជួនដើម្បីការពារជំងឺកូវីដ-១៩ ពិសេសទប់ស្កាត់វីរុសបំប្លែងថ្មីអូមីក្រុងបញ្ចៀសពីកាឆ្លងរីករាលដាលក្នុងសង្គមជាតិ។បន្ថែមលើសពីនេះ សម្តេចប្រធានរដ្ឋសភា បានបញ្ជាក់ថា ទោះបីបងប្អូនប្រជាពលរដ្ឋបានចាក់វ៉ាក់សំាងដូសជំរុញ ឬដូសទី៣ និងទី៤ហើយយ៉ាងណាក្តី សូមបន្តអនុវត្តវិធានការសុខាភិបាល “៣ការពារ ៣កុំ” ឱ្យបានខ្ជាប់ខ្ជួនជាប្រចាំ ទើបអាចទប់ស្កាត់កុំឱ្យជំងឺកូវីដ-១៩នេះមិនឲ្យរីករាលដាលនៅក្នុងសង្គមជាតិបានសារជាថ្មីបាន។ឯកឧត្តម ម៉ា ឈឿន និងឯកឧត្តម ឈាង វុន សមាជិករដ្ឋសភា បានចាត់ទុកវ៉ាក់សាំងដូសជំរុញនេះជាមធ្យោបាយសំខាន់ ដើម្បីទប់ស្កាត់ការឆ្លងរាលដាលក្នុងសហគមន៍ និងធានាសេដ្ឋកិច្ចជាតិផងដែរ។នាឱកាសនោះដែរ សម្តេចប្រធានរដ្ឋសភា បានសម្តែងការកោតសរសើរចំពោះរាជរដ្ឋាភិបាល ដែលបានខិតខំប្រឹងប្រែងការពារអាយុជីវិតប្រជាពលរដ្ឋពីជំងឺដ៏កាចសាហាវនេះ ជាពិសេសការអនុវត្តគោលនយោបាយវ៉ាក់សំាងបានយ៉ាងជោគជ័យរហូតអាចឈានដល់ការបើកសង្គម និងសេដ្ឋកិច្ចបានឡើងវិញ៕ អត្ថបទ៖ សេក ឧត្តម

ប្រជាពលរដ្ឋ ទៅចាក់វ៉ាក់សាំងដូសទី៤ ដោយភាពសប្បាយរីករាយ

ភ្នំពេញ៖ ចាប់ពីថ្ងៃទី ១៤ ខែមករា ឆ្នាំ ២០២២មកន វត្តមានមន្រ្តីរាជការ និងប្រជាពលរដ្ឋជាច្រើន បានទៅទទួលការ ចាក់វ៉ាក់សាំងដូសទី៤ ដោយបង្ហាញនូវភាពសប្បាយរីករាយ ដែលអាចទទួលបានវ៉ាក់សាំងបន្ថែមដើម្បី ការពារខ្លួនពីកូវីដ-១៩។ចាប់ពីថ្ងៃទី ១៤ខែមករាមកនេះ មន្ទីរពេទ្យរដ្ឋ និងមណ្ឌលសុខភាពដែលផ្ដល់ការចាក់វ៉ាក់សាំង គឺកំពុងមានភាពមមាញឹកជាខ្លាំង ដោយមានកំណើនការចាក់វ៉ាក់សាំងដូសទី៤ ជាច្រើន។ ជាក់ស្ដែងមន្ទីរពេទ្យបង្អែកដង្កោនៅថ្ងៃច័ន្ទនេះ គឺមានវត្តមាន មន្រ្តីរាជការ ជាពិសេសវត្តមាន ប្រជាពលរដ្ឋជាច្រើនកំពុងអង្គុយរង់ចាំ ការចាក់វ៉ាក់សាំងដូសទី៤ និង ប្រជាជនជាច្រើនផ្សេងទៀត រង់ចាំការចាក់វ៉ាក់សាំងដូសទី១ ដូសទី២ និងដូសទី ៣។សម្រាប់ប្រជាពលរដ្ឋដែលទទួលបានការចាក់វ៉ាក់សាំងដូសទី៤នាថ្ងៃនេះ លើកឡើងថា ពួកគាត់មានភាពរីករាយជាខ្លាំង ដែលអាចទទួលបានការចាក់វ៉ាក់សាំងជាបន្តបន្ទាប់ដើម្បីការពារខ្លួន។ ពួកគាត់ ថ្លែងអរគុណដល់រាជរដ្ឋាភិបាលកម្ពុជា ដែលបានស្វះស្វែងរកវ៉ាក់សាំងចាក់ជូនប្រជាពលរដ្ឋគ្រប់រូប រហូតដល់ដូសទី ៤នាពេលនេះ។សម្រាប់ការចាក់វ៉ាក់សាំងដូសទី ៤នាពេលនេះ ប្រជាពលរដ្ឋ គឺគ្រាន់តែបង្ហាញកាតចាក់វ៉ាក់សាំង ដោយកំណត់ថា មានគម្លាតរយៈពេល ៤ខែបន្ទាប់ពីការចាក់វ៉ាក់សាំងដូសទី ៣។ កម្ពុជាជាប្រទេសដែលមានការឈានមុខ ក្នុងយុទ្ធនាការចាក់វ៉ាក់សាំង ដែលអាចមានលទ្ធផលចាក់វ៉ាក់សាំងដូសទី ៤ជូនប្រជាពលរដ្ឋ ខណៈពេលដែលប្រទេសជាច្រើនមិនទាន់មានលទ្ធភាពចាក់វ៉ាក់សាំងដូសទី ៤ ជូនប្រជាពលរដ្ឋនៅឡើយ។ផ្អែកតាមទិន្នន័យក្រសួងសុខាភិបាល គិតត្រឹមថ្ងៃទី ១៦ ខែមករា ឆ្នាំ ២០២២ម្សិលម៉ិញនេះ កម្ពុជាសម្រេចបានការចាក់វ៉ាក់សាំងជូនប្រជាពលរដ្ឋចំនួន ៨៩,៤៣% នៃចំនួនប្រជាពលរដ្ឋសរុប ១៦លាននាក់ ៕ អត្ថបទ៖ គឹមហុក

ពលករខ្មែរជាង ២០០នាក់បានវិលត្រឡប់ពីប្រទេសថៃ ចូលតាមច្រកខេត្តបាត់ដំបង នៅថ្ងៃនេះ

បាត់ដំបង៖ ពលករខ្មែរចំនួន ២៣០នាក់បានវិលត្រឡប់មកពីប្រទេសថៃចូលតាមច្រកតំបន់អូរអន្លក់ ស្ថិតក្នុងភូមិអូរអន្លក់ ឃុំតាសែន ស្រុកកំរៀង ខេត្តបាត់ដំបង នៅថ្ងៃទី១៧ ខែមករា ឆ្នាំ ២០២២នេះ។ដោយអនុវត្តន៍តាមបទបញ្ជារបស់លោកឧត្តមសេនីយ៍ទោ សាត គឹមសាន ស្នងការនគរបាលខេត្តបាត់ដំបង ជាប់ជាប្រចាំស្ដីពីការការពារសន្តិសុខតាមខ្សែបន្ទាត់ព្រំដែនកម្ពុជា-ថៃ ត្រួតពិនិត្យពលរដ្ឋឆ្លងដែន និងស្រាវជ្រាវរកមុខសញ្ញា មេខ្យល់នាំពលករចេញដោយមិនស្របច្បាប់ក្នុងភូមិសាស្រ្ត ក្រោមការបញ្ជាផ្ទាល់របស់លោកវរសេនីយ៍ឯក ម៉ង់ ស៊ី មេបញ្ជាការវរៈ៨១៩ បានចាត់កម្លាំងប៉ុស្តិ៍អូរអន្លក់សហការជាមួយកម្លាំងកងយោធពលខេរភូមិន្ទ និងក្រុមគ្រូពេទ្យ បានទទួលពលករវិលត្រឡប់មកស្រុកវិញ ដែលភាគីថៃបានបញ្ជូនមកតាមច្រកតំបន់អូរអន្លក់ ។បន្ទាប់ពីសាកសួរ កត់ឈ្មោះ ចុះកំណត់ហេតុនិងអប់រំណែនាំអំពីវិធានការការពារការឆ្លងជំងឺកូវី-១៩ ក្រុមគ្រូពេទ្យធ្វើតេស្តរហ័សលើពលករ ជាលទ្ធផលអវិជ្ជមានកូវីដ១៩ទាំងអស់។ពលករចំនួន ៤៤នាក់ ស្រី២២នាក់ និងក្មេង ៥នាក់ត្រូវបានបញ្ជូនទៅធ្វើចត្តាឡីស័កនៅមណ្ឌលគីឡូ៩ ស្រុកសំពៅលូន។ ចំណែកពលករដែលមានកាតចាក់វ៉ាក់សាំង ចំនួន ១៨៦នាក់ ក្រុមគ្រូពេទ្យអនុញ្ញាតឱ្យត្រឡប់ទៅស្រុកកំណើតរៀងៗខ្លួនវិញ៕

សម្ដេចតេជោ ស្នើអគ្គលេខាធិការអាស៊ាន ចូលរួមសហការពាក់ព័ន្ធបញ្ហាមីយ៉ាន់ម៉ា និងសមុទ្រចិនខាងត្បូង

ភ្នំពេញ៖ នៅវិមានសន្តិភាពព្រឹកថ្ងៃទី១៧មករា សម្តេចតេជោ ហ៊ុន សែន នាយក រដ្ឋមន្ត្រីនៃព្រះ រាជាណាចក្រកម្ពុជា បានអនុញ្ញាតឱ្យឯកឧត្តម លឹម ចុកហ៊ុយ អគ្គលេខាធិការអាស៊ាន ចូលជួបសំដែងការគួរសម និងពិភាក្សាការងារ។ឯកឧត្តម កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បានឱ្យដឹងថា នៅក្នុង ជំនួបព្រឹកនេះ សម្តេចតេជោ បានលើកនូវចំណុចមួយចំនួនដោយបានស្វាគមន៍វត្តមានអញ្ជើញមកចូលរួមរបស់ឯកឧត្តម អគ្គលេខាធិការអគ្គលេខាធិការរងអាស៊ាន ដែលមកចូលរួមវេទិកាទេសចរណ៍អាស៊ានផងនឹងមានជំនួបជាមួយសហគមន៍ផ្សេងទៀត នៃសសរស្ដម្ភទាំង៣ របស់អាស៊ានគឺនយោបាយសន្តិសុខអាស៊ាន សហគមន៍សេដ្ឋកិច្ចអាស៊ាន និងសហគមន៍សង្គមវប្បធម៌អាស៊ាននៅក្នុងប្រទេសកម្ពុជា។សម្ដេចតេជោ បានបញ្ជាក់អំពីការងារសំខាន់ៗដូចជាការងារប្រឈមមួយចំនួនដែលអាស៊ានកំពុងតែមាននៅពេលនេះ ហើយសម្ដេច មានប្រសាសន៍ថា ការប្រឈមមួយចំនួនគឺមិនធម្មតាទេដូច្នេះគឺត្រូវការការខិតខំដើម្បីជំរុញការងារនេះ ជាពិសេសការតភ្ជាប់អាស៊ានដោយសារការតភ្ជាប់បានរំខានដោយកូវីដ-១៩នៅឆ្នាំ ២០២១ និង២០២២ដូចដែលយើងបានឃើញ ជាក់ស្ដែងហើយអំពីវិធានការដែលសមាជិកអាស៊ាននីមួយៗ មានចំណាត់ការពាក់ព័ន្ធនឹងការឆ្លើយតបទៅ នឹងការរាតត្បាតជំងឺកូវីដ-១៩នេះ។សម្ដេចថា យើងត្រូវខិតខំធ្វើយ៉ាងណាជំរុញរៀបចំការអនុវត្តរបាំងការធ្វើដំណើរទេសចរណ៍អាស៊ាននេះ ដើម្បីឱ្យក្របខណ្ឌអាស៊ានអាចជំរុញជាពិសេសប្រជាពលរដ្ឋអាចធ្វើដំណើរទៅវិញទៅមកនៅក្នុងតំបន់អាស៊ានក៏ដូចជាធុរកិច្ចពាណិជ្ជកម្មនៅក្នុងអាស៊ានផងដែរ ហើយសម្ដេចមានប្រសាសន៍ថា នៅដើមឆ្នាំខែមករានេះ សំខាន់ណាស់គឺកិច្ចព្រមព្រៀងដៃគូសេដ្ឋកិច្ចគ្រប់ជ្រុងជ្រោយនៅក្នុងតំបន់នេះត្រូវបានចូលជាធរមានដូច្នេះធ្វើយ៉ាងម៉េចត្រូវខិតខំជាមួយការងារនេះ។សម្ដេច បានមានប្រសាសន៍ផងដែរអំពីកូវីដ-១៩ នៅប្រទេសកម្ពុជាដែលមានការធូរស្រាលបើទោះបីមានការនាំចូលអូមីក្រុងក៏ពិតមែន ប៉ុន្តែទោះជាយ៉ាងណាក៏ដោយនឹងខិតខំតទៅទៀត។សម្តេច បានគូសបញ្ជាក់អំពីចំណុចក្តៅដែលពាក់ព័ន្ធស្ថានភាពនៅមីយ៉ាន់ម៉ាដោយបានមានប្រសាសន៍អំពីលទ្ធផលនៃទស្សនកិច្ចរបស់សម្តេចទៅកាន់មីយ៉ាន់ម៉ាដែលមានគោលបំណងគឺជួយប្រទេសមីយ៉ាន់ម៉ាជាពិសេសគោលបំណងបីសំខាន់ៗ គឺធ្វើយ៉ាងណាឲ្យមានបទឈប់បាញ់បញ្ឈប់ហិង្សា និងផ្ដល់ជំនួយមនុស្សធម៌ឱ្យដល់មានណាដែលត្រូវការជាចាំបាច់និងបើកច្រកទ្វារនៃការធ្វើការសម្រាប់ប្រេសិតពិសេសរបស់ប្រធានអាស៊ានដែលនេះជាគោលបំណងសុទ្ធរបស់កម្ពុជា។សម្ដេច ក៏បានគួរបញ្ជាក់ផងដែរអំពីគំនិតផ្ដួចផ្ដើមរបស់សម្ដេចក្នុងការជំរុញតទៅមុខទៀតជាពិសេសជំរុញយន្តការក្នុងការជួយដល់មីយ៉ាន់ម៉ា ទី១.គឺអាស៊ានត្រយការ.ទី២យន្តការធ្វើយ៉ាងណាដើម្បីផ្ដល់ជំនួយដល់មីយ៉ាន់ម៉ាក្នុងស្ថានភាពដ៏លំបាកនេះ។យន្តការអាស៊ានត្រយកានេះ ចាំបាច់ត្រូវតែមានប្រធានអាស៊ានបច្ចុប្បន្នប្រធានអាស៊ានកាលពីឆ្នាំមុននិងប្រធានអាស៊ានដែលនឹងចូលមកកាន់តំណែងនៅឆ្នាំបន្ទាប់ពីកម្ពុជាបូកនិងអគ្គលេខាធិការអាស៊ានដើម្បីធ្វើការជាមួយគ្នាសំដៅធ្វើយ៉ាងណាជំរុញតាមដានបទឈប់បាញ់នៅមីយ៉ាន់ម៉ា នៅពេលខាងមុខជាបន្តទៀតជាពិសេសវាយតម្លៃអំពីវឌ្ឍនភាពនៃការវិវត្តតាមកុងសុងស៊ីសទាំង៥ចំណុចដែលប្រមុខរដ្ឋាភិបាលអាស៊ានបានឯកភាពគ្នាតាំងពីខែ មេសាឆ្នាំ ២០២១។ឆ្លៀតឱកាសនេះ សម្ដេចក៏បានលើកឡើងអំពីសមុទ្រចិនខាងត្បូងដោយសារឆ្នាំនេះជាខួបលើកទី ២០ នៃDOCទោះបីជាមាន កូវីដ-១៩ក៏ដោយ គឺមិនត្រូវភ្លេចអំពីការងារនេះឡើយ ត្រូវបង្កើនល្បឿននៃការចរចាដោយសារការងារនេះជាការងារចាំបាច់សម្រាប់តំបន់ហើយឆ្នាំនេះសម្ដេចតេជោក៏បានអរគុណអគ្គលេខាធិការអាស៊ាន និងភាគីពាក់ព័ន្ធទាំងអស់ដែលបានឯកភាពគ្នាក្នុងការរៀបចំឲ្យមានការប្រារព្ធខួបលើកទី ២០នៃ DOC។សម្ដេចបានស្នើសុំឲ្យអគ្គលេខាធិការអាស៊ានជួយចូលរួមចំណែកក្នុងការលើកទឹកចិត្តក្នុងការចរចា បញ្ហាសមុទ្រចិនខាងត្បូងបានដំណើរការទៅមុខ។សម្តេចក៏មានប្រសាសន៍ពាក់ព័ន្ធទៅនឹងឥណ្ឌូប៉ាស៊ីហ្វិកដោយសារនៅក្នុងតំបន់យើងមានគំនិតផ្ដួចផ្ដើមច្រើន និងចូលរួមដូចជាអាមេរិក អឺរ៉ុប ជប៉ុន អូស្រ្តាលី ឥណ្ឌា កូរ៉េចិនជាដើម ដូច្នេះចំណុចសំខាន់សម្ដេចបានស្នើធ្វើយ៉ាងណាឲ្យអគ្គលេខាធិការអាស៊ានជួយជំរុញការរៀបចំផែនការសកម្មភាពនៃការអនុវត្តនូវអ្វីដែលជាទស្សនទានរបស់អាស៊ានស្ដីពីឥណ្ឌូប៉ាស៊ីហ្វិក ហើយកន្លងមកយើងមានគំនិតផ្តួចផ្តើមច្រើនប៉ុន្តែ។សម្ដេច បានជំរាបអគ្គលេខាធិការអាស៊ានថា យើងធ្វើយ៉ាងណាឱ្យគំនិតផ្ដើមពីបណ្ដាប្រទេសគាំទ្រនូវសន្តិភាពនិងការអភិវឌ្ឍក្នុងតំបន់ដោយមិនប្រើប្រាស់ឥណ្ឌូប៉ាស៊ីហ្វិកប្រឆាំងនឹងប្រទេសណាមួយឡើយនិងទី៣ ធ្វើយ៉ាងណាឲ្យសកម្មភាពទាំងឡាយនៃឥណ្ឌូប៉ាស៊ីហ្វិកគាំទ្រដល់មជ្ឈភាពអាស៊ានក៏ដូចជាទស្សនៈវិស័យរបស់អាស៊ានស្ដីពីឥណ្ឌូប៉ាស៊ីហ្វិក៕

បណ្ដាញសង្គម

ព័ត៌មានថ្មីៗ

វិមានក្រឹមឡាំង៖ លោក Putinអាចជួបប្រេសិតពិសេសអាមេរិកក្នុងសប្តាហ៍នេះ

ជំនន់ទឹកភ្លៀងបានសម្លាប់មនុស្ស ១៥នាក់នៅប្រទេសហ្គីណេ

សាកសពជនប៉ាឡេស្ទីនស្វែងរកជំនួយនាំយកទៅកាន់មន្ទីរពេទ្យនៅទីក្រុងហ្កាហ្សា

ព័រ៊ទុយហ្គាល់រឹតត្បិតការចូលដល់តំបន់ព្រៃឈើ ស្របពេលកើតមានរលកកម្តៅ និងហានិភ័យភ្លើងឆេះព្រៃ

ព្យុះ Floris បោកបក់ខិតជិតតំបន់ឆ្នេរអង់គ្លេស និងអៀរឡង់

អ្នកនាំពាក្យ៖ យោធារបស់ប្រទេសចិន បានធ្វើការល្បាត នៅក្នុងសមុទ្រចិនខាងត្បូង

ក្រុមសប្បុរសធម៌ក្នុងស្រុក បង្កើនការផ្តល់ជំនួយ ស្របពេលយេម៉ែនជួបវិបត្តិមនុស្សធម៌

កសិករវិលត្រឡប់ទៅកាន់វាលខ្សាច់វិញ ដើម្បីដាំដើមលម៉ើ ស្របពេលវិបត្តិទឹកកាន់តែធ្ងន់ធ្ងរនៅភាគខាងត្បូងអ៊ីរ៉ាក់

វិមានក្រឹមឡាំង៖ គ្រប់គ្នាគួរតែប្រយ័ត្នប្រយែងវោហាសាស្ត្រនុយក្លេអ៊ែរ ក្រោយមានការបញ្ជារបស់លោក Trump

អេស្ប៉ាញបំបែកក្រុមរត់ពន្ធជនអន្តោប្រវេសន៍យេម៉ែន ទៅកាន់ចក្រភពអង់គ្លេស និងកាណាដា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ​ និង ការអភិវឌ្ឍន៍

សម្តេចតេជោ បានអញ្ជើញទៅដល់ក្រុងព្រះសីហនុ ដើម្បីបើក​វេទិកា​ទេសចរណ៍​អាស៊ាន នៅ​រសៀលថ្ងៃនេះ