BTV NEWS

គិតត្រឹមត្រីមាសទី១ឆ្នាំនេះ សហគ្រាស ក្រុមហ៊ុន រោងចក្រនៅកម្ពុជា កើនដល់ជាង ៤៧ ០០០ សហគ្រាស ខណៈចំនួនកម្មករនិយោជិតកើនឡើងដល់ប្រមាណ ២,៣លាននាក់

ត្រីមាសទី១ឆ្នាំនេះ កម្ពុជានាំចេញកង់ មានទឹកប្រាក់ជាង ២០១ លានដុល្លារ កើនឡើងជិត ៤៤%

រោងចក្រ វិរៈ ប៊ុនថាំ ជីកសិកម្ម មានសមត្ថភាពផលិតបានប្រមាណ ២០០តោន ក្នុងមួយថ្ងៃសម្ពោធដាក់ឱ្យដំណើរការជាផ្លូវការ

រយៈពេល៣ខែដំបូង ការដោះដូរពាណិជ្ជកម្មកម្ពុជា-វៀតណាម សម្រេចបាន ៣,៤៤ ពាន់លានដុល្លារកើនឡើង ៤,៣%

សេដ្ឋកិច្ច និង កសិកម្ម

កម្ពុជានិងដៃគូពាក់ព័ន្ធ រួមគ្នាជំរុញការនាំចេញវិស័យកាត់ដេរឲ្យកាន់តែប្រសើរបន្ថែមទៀត

ភ្នំពេញ៖ រាជរដ្ឋាភិបាលកម្ពុជា សមាគមរោងចក្រកាត់ដេរនៅកម្ពុជា (GMAC) និងអង្គការអន្តរជាតិខាងការងារ (ILO) បានបន្តចុះហត្ថលេខាលើអនុស្សរណៈនៃការយោគយល់រយៈពេល ៥ឆ្នាំបន្ថែមទៀត ដើម្បីអនុវត្តគម្រោងរោងចក្រកាន់តែប្រសើរនៅកម្ពុជា សំដៅជំរុញការនាំចេញវិស័យឧស្សាហកម្មកាត់ដេរនៅកម្ពុជាកាន់តែប្រសើរថែមទៀត។ពិធីចុះហត្ថលេខាលើអនុស្សរណៈនៃការយោគយល់គ្នា ស្តីពីគម្រោងរោងចក្រកាន់តែប្រសើរនៅកម្ពុជា សម្រាប់ឆ្នាំ ២០២៣-២០២៧ បានប្រារព្ធធ្វើឡើង នៅថ្ងៃទី១០ ខែតុលា រវាងឯកឧត្តមបណ្ឌិត អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ, ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម, លោកឧកញ៉ា គង់ សាង ប្រធានសមាគមរោងចក្រកាត់ដេរនៅកម្ពុជា និងលោក Graeme Buckley នាយកការិយាល័យអង្គការអន្តរជាតិខាងការងារប្រចាំប្រទេសថៃ កម្ពុជា ឡាវ កាលពីរសៀលថ្ងៃទី១០ ខែតុលា ឆ្នាំ២០២២ នៅរាជធានីភ្នំពេញ។ឯកឧត្តមបណ្ឌិត អ៊ិត សំហេង បានមានប្រសាសន៍ថា គម្រោងរោងចក្រកាន់តែប្រសើរនៅកម្ពុជា ពិតជាបានចូលរួមចំណែកយ៉ាងសំខាន់ក្នុងការជំរុញការនាំចេញក្នុងឧស្សាហកម្មកាត់ដេររបស់កម្ពុជា ដែលជាផ្នែកមួយក្នុងការជំរុញកំណើនសេដ្ឋកិច្ចជាតិ។ ឯកឧត្តម បន្តថា កម្មករនិយោជិត និងនិយោជកនៃរោងចក្រកាត់ដេរ ដែលធ្វើការនាំចេញផលិតផលទៅក្រៅប្រទេសបានទទួលនូវអត្ថប្រយោជន៍ជាច្រើនអំពីការអនុវត្តគម្រោងនេះ ដោយអាចរក្សាបាននូវការងារ ដែលមានលក្ខខណ្ឌល្អប្រសើរ និងទទួលប្រាក់ចំណេញអាជីវកម្ម តាមរយៈការទទួលបានការបញ្ជាទិញពីអ្នកបញ្ជាទិញអន្តរជាតិ ដែលមានកំណើនជាប្រចាំជាមួយនឹងអនុលោមភាពតាមច្បាប់មានកម្រិតខ្ពស់។នៅក្នុងពិធីនេះ ភាគីអង្គការអន្តរជាតិខាងការងារ បានលើកឡើងថា ក្នុងរយៈពេល ២០ឆ្នាំចុងក្រោយនេះឃើញថា ការអនុលោមតាមច្បាប់ជារួមនៅក្នុងប្រទេសកម្ពុជាមានភាពប្រសើរឡើងមួយផ្នែកដោយសារការរាយការណ៍ប្រកបដោយតម្លាភាពរបស់ គម្រោងរោងចក្រកាន់តែប្រសើរនៅកម្ពុជា លើបញ្ហាសំខាន់ៗ។ គម្រោងរោងចក្រកាន់តែប្រសើរនៅកម្ពុជា នឹងបន្តដើរតួជាអ្នកសម្របសម្រួលនៃភាគីពាក់ព័ន្ធក្នុងឧស្សាហកម្ម រួមទាំងអ្នកទិញអន្តរជាតិ ដែលដើរតួយ៉ាងសំខាន់ផងដែរក្នុងការកែលម្អវិស័យនេះ តាមរយៈការអនុវត្តអាជីវកម្មប្រកបដោយការទទួលខុសត្រូវរបស់ពួកគេ៕អត្ថបទ៖ ឈិត បូរ៉ាវី

ក្រុមហ៊ុននាំចេញអង្ករសរីរាង្គធំៗចំនួន២ បានចុះកិច្ចសន្យាបញ្ជាទិញស្រូវសរីរាង្គពីសហគមន៍កសិកម្មចំនួន១០ នៃខេត្តព្រះវិហារ

ព្រះវិហារ៖ ក្រុមហ៊ុនស៊ីកនេតឈ័រ អហ្វអេស៊ា និងក្រុមហ៊ុនហ្គោលដិនរ៉ាយស៍ ដែលជាក្រុមហ៊ុនកែច្នៃនាំចេញអង្ករទៅទីផ្សារអន្ដរជាតិ មានផែនការទិញស្រូវសរីរាង្គ ឱ្យបានចំនួន ២៥០០តោន ក្នុងឆ្នាំ២០២២នេះ ពីសហគមន៍ចំនួន១០ ក្នុងខេត្តព្រះវិហារ តាមរយៈការធ្វើផលិតកម្មកសិកម្ម តាមកិច្ចសន្យា។ ការចុះកិច្ចសន្យាទិញ-លក់ស្រូវសរីរាង្គ រវាងក្រុមហ៊ុនបញ្ជាទិញ និងសហគមន៍ កសិករក្នុងខេត្តព្រះវិហារនេះ ត្រូវបានធ្វើឡើង នាថ្ងៃទី១០ ខែតុលា ឆ្នាំ២០២២ ម្សិលមិញនេះ នៅមន្ទីរកសិកម្ម រុក្ខាប្រមាញ់ និងនេសាទខេត្ត ក្រោមអធិបតីភាព ឯកឧត្តម គីម រិទ្ធី អភិបាលនៃគណៈអភិបាល ខេត្តព្រះវិហារ។ក្នុងនោះដែរប្រធានមន្ទីរកសិកម្ម រុក្ខាប្រមាញ់ និងនេសាទខេត្តលោក ពឹង ទ្រីដា បានឱ្យដឹងថា ការ អនុវត្តន៍ផលិតកម្មកសិកម្មតាមកិច្ចសន្យា លើកសិផលសរីរាង្គក្នុងឆ្នាំ២០២២នេះ សរុបជិត ៨ម៉ឺនតោន ក្នុងនោះមានស្រូវសរីរាង្គ ១៥,៣៥០តោន, ដំឡូងមីសរីរាង្គ ៥៥,០០០តោន ស្វាយ ចន្ទីសរីរាង្គ ៥០០តោន និងសណ្ដែកដីសរីរាង្គ ៣០តោន ដែលធ្វើឡើងរវាងសហគមន៍កសិកម្ម ចំនួន ៣២ក្នុងខេត្តព្រះវិហារ និងក្រុមហ៊ុនដៃគូរសហការទាំងអស់។ លោក បន្ថែមថាសម្រាប់ ក្រុមហ៊ុនចំនួន២នាពេលនេះផ្ទាល់ បានបន្ដកិច្ចសន្យាបញ្ជាទិញ ស្រូវសរីរាង្គពីសហគមន៍ កសិកម្ម១០ ដែលមានអ្នកផលិត ១,៥១៤គ្រួសារ លើកសិផលសរីរាង្គសរុប ២,៥០០តោន។ជាមួយនោះដែរលោកស្រី សៅ សុនិតា អគ្គនាយករង ក្រុមហ៊ុនហ្គោលដិនរ៉ាយស៍ ដែលជាក្រុមហ៊ុននាំ ចេញអង្ករសរីរាង្គទៅទីផ្សារអន្ដរជាតិ បានបញ្ជាក់ថា នេះជាឆ្នាំទី៤ហើយ ដែលក្រុមហ៊ុនបាន ចាប់ដៃគូរសហការជាមួយកសិករខេត្តព្រះវិហារ ក្នុងការបញ្ជាទិញស្រូវសរីរាង្គសម្រាប់កែច្នៃនាំ ចេញទៅទីផ្សារអន្ដរជាតិ ដែលក្នុងនោះមានទាំងទីផ្សារក្នុងប្រទេសអាស៊ី ទីផ្សារអឺរ៉ុប និងអាមេរិកជាដើម។ ពោលគឺនៅឆ្នាំទី១ ក្រុមហ៊ុនបានចុះកិច្ចសន្យាទិញក្នុងបរិមាណ ៤,០០០តោន, ឆ្នាំទី២ ចំនួន ៣៥០០តោន ឆ្នាំទី៣ ១៥០០តោន និងឆ្នាំទី៤នេះ ក្រុមហ៊ុននៅតែបន្ដបញ្ជាទិញក្នុងបរិមាណមិនប្រប្រួល ក្នុង១៥០០តោនដដែល ហើយសម្រាប់ឆ្នាំ២០២៣ខាងមុខ ក្រុមហ៊ុនមាន ផែនការថានឹងពង្រីកបរិមាណឱ្យបានកាន់តែខ្ពស់ជាងនេះបន្ថែមទៀត។ក្នុងឱកាសនោះឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ បានធ្វើការវាយតម្លៃខ្ពស់ ចំពោះកិច្ចខិតខំប្រឹងប្រែងសហការគ្នាបានយ៉ាងល្អ ពីគ្រប់ភាគីពាក់ព័ន្ធ ដោយមានការសម្របសម្រួលពីមន្ទីរកសិកម្ម រហូតឈានដល់ការសម្រេចបានជាបន្ដបន្ទាប់នូវកិច្ចសន្យាមួយដែល អាចចាត់ទុកថាជាខ្សែបន្ទាត់ ឬជានិតិវិធីសម្រាប់ឲ្យភាគីអ្នកផលិត និងអ្នកបញ្ជាទិញដើរព្រម គ្នាឆ្ពោះទៅទិសដៅមួយយ៉ាងជាក់លាក់ ពិតប្រាកដ តម្លាភាព សច្ចភាព និងជំនឿទុកចិត្តគ្នា ដោយឈរលើគោលការណ៍សំខាន់ ៣គឺ៖ ធានាបាននូវបរិមាណផ្គត់ផ្គង់ប្រកបដោយនិរន្តរភាព គុណភាពផលិតផល ធានាបាននូវតម្លៃ សាមគ្គីភាព កិច្ចសហការ ជំនឿទុកចិត្ត និងផ្ដល់ផល ប្រយោជន៍ឱ្យគ្នាទៅវិញទៅមក ដោយសេចក្ដីរំពឹងទុកសម្រាប់ពេលអនាគត វិស័យកសិកម្ម នៅ ក្នុងខេត្តព្រះវិហារ នឹងក្លាយជាកសិកម្មបែបសរីរាង្គចាប់ពីមូលដ្ឋាន រហូតដល់ទីផ្សារចរាចរ ផលិតផល៕អត្ថបទ៖ សាវី

កម្ពុជានាំចេញទំនិញក្រោមប្រព័ន្ធអនុគ្រោះពាណិជ្ជកម្មទៅបរទេសកើនជាង ២៤ភាគរយ រយៈពេល៩ខែ

ភ្នំពេញ៖ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានបញ្ជាក់ថា គិតក្នុងរយៈពេល ៩ខែ ឆ្នាំ២០២២ កម្ពុជាបាននាំចេញទំនិញក្រោមប្រព័ន្ធអនុគ្រោះពាណិជ្ជកម្មទៅកាន់ទីផ្សារបរទេសមានទំហំទឹកប្រាក់សរុបជាង ១៧ពាន់លានដុល្លារអាម៉េរិក កើនជាង ២៤ភាគរយ ប្រៀបធៀបនឹងរយៈពេលដូចគ្នា នៅឆ្នាំ២០២១កន្លងទៅ។នៅក្នុងពិធីចុះហត្ថលេខាលើអនុស្សារណៈនៃការយោគយល់គ្នាស្តីពី កម្មវិធីគម្រោងរោងចក្រកាន់តែប្រសើរនៅកម្ពុជា សម្រាប់ឆ្នាំ២០២៣-២០២៧ កាលពីរសៀលថ្ងៃទី១០ ខែតុលាកន្លងទៅនេះ នៅរាជធានីភ្នំពេញ ឯកឧត្តមរដ្ឋមន្រ្តីពាណិជ្ជកម្ម មានប្រសាសន៍ថា ការនាំចេញរបស់កម្ពុជាក្រោមប្រព័ន្ធអនុគ្រោះពាណិជ្ជកម្មទៅបរទេសនៅឆ្នាំ២០០១ មានត្រឹមតែជាង ១ ១៨០លានដុល្លារ ចំនួននេះ មានការកើនឡើងដល់ជាង ១៩ពាន់លានដុល្លារអាមេរិក នៅឆ្នាំ២០២១ ក្នុងនោះការនាំចេញសំលៀកបំពាក់វាយនភណ្ឌ មានទឹកប្រាក់ចំនួនជាង ៦ ៧០០លានដុល្លារអាមេរិក និងការនាំចេញផលិតផលធ្វើដំណើរ និងកាបូប មានទឹកប្រាក់ចំនួនជាង ១ ១៨០លានដុល្លារអាមេរិក។ឯកឧត្តមរដ្ឋមន្រ្តី បានលើកឡើងបន្តថា ក្នុងរយៈពេល៩ខែ ឆ្នាំ២០២២នេះ ការនាំចេញរបស់កម្ពុជាក្រោមប្រព័ន្ធអនុគ្រោះពាណិជ្ជកម្មទៅបរទេសមានទំហំទឹកប្រាក់ជាង ១៧ ៥០០ លានដុល្លារអាមេរិក កើនឡើងជាង ២៤ភាគរយ បើធៀបទៅនឹងរយៈពេល៩ខែដូចគ្នា ឆ្នាំ២០២១ ក្នុងនោះការនាំចេញសំលៀកបំពាក់វាយនភណ្ឌ កើនឡើងជាង ២៣ភាគរយ និងការនាំចេញផលិតផលធ្វើដំណើរ និងកាបូបមានការកើនឡើងជាង ៣៦ភាគរយ។ឯកឧត្តម ប៉ាន សូរស័ក្តិ បានបញ្ជាក់បន្ថែមថា ក្រសួងពាណិជ្ជកម្ម ក្នុងនាមជាសេនាធិការមួយរបស់រដ្ឋាភិបាលកម្ពុជា បានខិតខំប្រឹងប្រែងដោយស្មារតីទទួលខុសត្រូវខ្ពស់ និងបន្តធ្វើសមាហរណកម្មសេដ្ឋកិច្ចនៅក្នុងតំបន់ និងពិភពលោក ជាពិសេសតាមរយៈការចចារពាណិជ្ជកម្មសេរីពហុភាគី ទ្វេរភាគី និងប្រទេសជាដៃគូផ្សេងៗទៀត។ ចុងក្រោយនេះ ក្រសួងពាណិជ្ជកម្មសម្រេចបាននូវកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) កិច្ចព្រមព្រៀងពាណិជ្ជកម្មសេរីកម្ពុជា-ចិន និងកិច្ចព្រមព្រៀងពាណិជ្ជកម្មសេរីរវាងកម្ពុជា-កូរ៉េ៕អត្ថបទ៖ឈិត បូរ៉ាវី

កម្ពុជាទទួលបានក្រុមហ៊ុនមួយទៀតហើយ កំពុងចាប់ផ្តើមធ្វើអាជីវកម្មរ៉ែមាសនៅខេត្តក្រចេះ

ក្រចេះ៖ ក្រុមហ៊ុន Xing Yuan Kanng Yeak Co., Ltd ជាក្រុមហ៊ុនថ្មីមួយទៀត បានបើកដំណើរការអាជីវកម្មស្ល និងចាក់ចេញជាដុំមាសជាលើកដំបូងរបស់ខ្លួននៅកម្ពុជា ដោយមានផែនការផលិតឱ្យបាន ៦០គីឡូក្រាម នៅក្នុងជំហាន៣ខែដំបូងនេះ។ឯកឧត្តម ស៊ុយ សែម រដ្ឋមន្រ្តីក្រសួងរ៉ែ និងថាមពល នៅថ្ងៃទី ១០ ខែ តុលា ឆ្នាំ ២០២២ បានអញ្ជើញចូលរួមក្នុងដំណើរការកត់ត្រាទិន្នន័យស្លរ៉ែមាសលើកទី១ របស់ក្រុមហ៊ុន Xing Yuan Kanng Yeak Co., Ltd នៅខេត្តក្រចេះ ក្នុងនោះ គឺបើកដំណើរការកត់ត្រាទិន្នន័យស្លរ៉ែមាសរបស់ខ្លួន ដោយបានកត់ត្រាថ្លឹងកំហាប់រ៉ែមាស មានទម្ងន់ជាង ៧,៨ ពាន់ក្រាម និងបានយកកំហាប់រ៉ែមាសនោះទៅស្ល និងចាក់ចេញជាដុំមាស បានចំនួន ៧ដុំ ដោយមានទម្ងន់សរុបជាង ៨,២ ពាន់ក្រាម ដែលមានអត្រាភាពសុទ្ធប្រមាណ ៩៩.៩% ។ ជុំវិញការធ្វើអាជីវកម្មស្ល និងចាក់ចេញជាដុំមាស សម្រាប់គម្រោងសាកល្បង ៣ខែដំបូងនេះ ក្រុមហ៊ុន Xing Yuan Kanng Yeak គ្រោងផលិតឱ្យបាន ៦០ គីឡូក្រាម គិតត្រឹមខែធ្នូ ឆ្នាំ២០២២ ខាងមុខ ពោលគឺក្នុងមួយខែៗ ក្រុមហ៊ុន នឹងជម្រុញផលិតឲ្យបានក្នុងរង្វង់ប្រមាណ ២០ គីឡូក្រាម។ក្រុមហ៊ុន Xing Yuan Kanng Yeak Co., Ltd ទទួលបានអាជ្ញាបណ្ណឧស្សាហកម្មអាជីវកម្មរ៉ែមាស ពីក្រសួងរ៉ែ និងថាមពល កាលពីខែសីហា ឆ្នាំ២០១៨ លើទំហំដីចំនួន ២៨ គីឡូម៉ែត្រក្រឡា ដើម្បីប្រតិបត្តិការអាជីវកម្មរ៉ែមាសរបស់ខ្លួនចនៅស្រុកសំបូរ ខេត្តក្រចេះ។ ក្រោយពីទទួលបានអាជ្ញាបណ្ណ ក្រុមហ៊ុនបានតម្លើងខ្សែសង្វាក់ផលិតកម្មអាជីវកម្មរបស់ខ្លួន តែដោយសារតែបញ្ហាកូវីដ-១៩ ក្រុមហ៊ុនទើបតែបានបញ្ចប់ការសាងសង់ និងរៀបចំខ្សែសង្វាក់ផលិតកម្មរបស់ខ្លួននៅក្នុងខែ តុលា ឆ្នាំ២០២២ នេះ។សូមបញ្ជាក់ថា ជុំវិញការធ្វើអាជីវកម្មរ៉ែមាស កម្ពុជាទទួលបានការធ្វើអាជីវកម្មចម្រាញរ៉ែមាសមានចំនួន ៣ ក្រុមហ៊ុន, ក្នុងនោះ ក្រុមហ៊ុន រឺនីសង់ Renaissance Minerals (Cambodia) Ltd ទទួលបានអាជ្ញាបណ្ណរុករករ៉ែមាសពីក្រសួងរ៉ែ និងថាមពល ស្ថិតនៅក្នុងតំបន់អូរខ្វាវ ក្នុងស្រុកកែវសីមា ខេត្តមណ្ឌលគីរី, ក្រុមហ៊ុន ឌែលខម (Delcom Cambodia ) ជាក្រុមហ៊ុនខ្នាតមធ្យម បានធ្វើអាជីវកម្ម នៅក្នុងស្រុករវៀង ខេត្តព្រះវិហារ និងក្រុមហ៊ុន Xing Yuan Kanng Yeak Co., Ltd ដែលជាក្រុមហ៊ុនទី៣ បានចាប់ផ្តើមធ្វើអាជីវកម្មស្ល និងចាក់ចេញជាដុំមាស នៅក្នុងស្រុកសំបូរ ខេត្តក្រចេះ៕អត្ថបទ៖ សុន រ៉ាឌី

កម្ពុជាទទួលបានចំណូលលើការនាំចេញស្រូវ-អង្ករ ៨៥០លានដុល្លារ ក្នុងរយៈពេល៩ខែ

ភ្នំពេញ៖ កម្ពុជាបាននាំចេញអង្ករ មានបរិមាណសរុប ៤៤៩ ៣២៥តោន និងស្រូវមានបរិមាណសរុប ២.៣៥លានតោន ក្នុងរយៈពេល៩ខែឆ្នាំ២០២២នេះ ទទួលចំណូលជិត ៨៥០ លានដុល្លារ ។របាយការណ៍របស់សហព័ន្ធស្រូវអង្ករកម្ពុជា ចេញផ្សាយនៅថ្ងៃទី១០ ខែតុលា បានបញ្ជាក់ថា នៅរយៈពេល៩ខែ ឆ្នាំ២០២២នេះ កម្ពុជាបាននាំចេញស្រូវ និងអង្ករ ទទួលចំណូលជិត ៨៥០លានដុល្លារ។សហព័ន្ធស្រូវអង្ករកម្ពុជា បានបញ្ជាក់ថា ការនាំចេញអង្ករទៅកាន់ទីផ្សារអន្តរជាតិ សម្រាប់រយៈពេល ៣ត្រីមាសកើនបាន១០ ភាគរយ ដែលមានបរិមាណសរុបចំនួន ៤៤៩ ៣២៥ តោន ដែលគិតជាទឹកប្រាក់មានចំនួន ២៨៦ លានដុល្លារសហរដ្ឋអាមេរិក។ក្នុងរយៈពេល៩ខែនៃឆ្នាំ២០២២ ប្រទេសកម្ពុជា បាននាំចេញអង្ករគ្រប់ប្រភេទបានចំនួន ៤៤៩ ៣២៥តោន ទៅកាន់គោលដៅចំនួន៥៥ ក្នុងនោះ នាំចេញទៅកាន់ប្រទេសចិន រួមចំណែក ៤៤.០៩ ភាគរយ ប្រទេសបារាំង ១៤.៨៣ ភាគរយ ប្រទេម៉ាឡេស៊ី ៥.៥៨ ភាគរយ ប្រទេសហូឡង់ ៤.៦៥ ភាគរយ ប្រទេសអ៊ីតាលី ២.៦៥ ភាគរយ ប្រទេសហ្កាប៊ុង ២.៦៣ ភាគរយ ប្រទេសព្រុយណេ ២.៤៤ ភាគរយ ចក្រភពអង់គ្លេស ២.៤៥ ភាគរយ និងប្រទេសអាល្លឺម៉ង់ ២.០៨ភាគរយ។ក្នុងចំណោមនៃអង្គរនាំចេញសរុប អង្ករក្រអូបប្រណិត រូមចំណែក ៣៩ ភាគរយ ឬ ១៧៧ ៤៨១ តោន អង្ករសែនក្រអូបចំនួនជិត២៩ ភាករយ ឬ១២៨ ៧៥៣ តោន អង្ករសគ្រាប់វែងចំនួនជិត ២៨ភាគរយ ឬ ១២៣ ៣១៨ តោន អង្ករចំហុយជាង ២ ភាគរយ ឬ ១០ ៦៨០ តោន និងអង្ករសរីរាង្គចំនួនជិត ២ ភាគរយ ឬ ៨ ១០៦ តោន។ចំណែក ការនាំចេញស្រូវ បានចំនួន ២,៣៥ លានតោន ដែលមានតម្លៃប៉ាន់ស្មានប្រមាណចំនួន ៥៦៣ លាន ដុល្លារសហរដ្ឋអាមេរិក ត្រូវបាននាំចេញវចេញទៅប្រទេសវៀតណាម ៕អត្ថបទ៖ វណ្ណៈ

កម្ពុជានាំចេញទំនិញជាង១៧ពាន់លានដុល្លារ កើនឡើងជាង ២២ភាគរយ ក្នុងរយៈពេល៩ខែ

ភ្នំពេញ៖ កម្ពុជាបាននាំចេញទំនិញ សម្រេចបានក្នុងទំហំទឹកប្រាក់ជាង ១៧,៥២ពាន់លានដុល្លារអាមេរិក ក្នុងរយៈពេលបីត្រីមាស ឆ្នាំ២០២២នេះ កើនឡើង២២.១% បើធៀបនឹងរយៈពេលដូចគ្នា កាលពីឆ្នាំ២០២១។ នេះបើយោងតាមរបាយការណ៍ របស់អគ្គនាយកដ្ឋានគយ និងរដ្ឋាករកម្ពុជា។ទិន្នន័យដដែលនេះបង្ហាញថា ពីខែមករាដល់ខែកញ្ញា ឆ្នាំ២០២២ ការនាំចេញទំនិញទៅក្រៅប្រទេស មានតម្លៃ ១៧,៥២ពាន់លានដុល្លារ កើនឡើង ២២.១% បើធៀបនឹងរយៈពេលដូចគ្នា កាលពីឆ្នាំ២០២១។ ដោយឡែក ការនាំចូលទំនិញមកកម្ពុជាវិញ មានតម្លៃ ២៣.៧៦ ពាន់លានដុល្លារអាមេរិក កើនឡើង១៥.២ភាគរយ ដែលធ្វើឱ្យទំហំពាណិជ្ជកម្មរបស់កម្ពុជា ជាមួយទីផ្សារអន្តរជាតិ ក្នុងរយៈពេល៩ខែនេះ កើនដល់ ៤១.០២ពាន់លានដុល្លារ កើនឡើង១៨ ភាគរយ។ទំនិញដែលកម្ពុជានាំចេញទាំងនោះ រួមមាន សំលៀកបំពាក់ក្នុងទំហំទឹកប្រាក់ជាង ៦.៤ពាន់លានដុល្លារ, ម៉ាស៊ីន និងឧបករណ៍អគ្គិសនី, ផលិតផលស្បែកជើង សម្ភារធ្វើពីស្បែកសត្វ យានក្រៅពីអយស្ម័យយាន, គ្រាប់ធញ្ញជាតិ គ្រឿងសង្ហារឹម កៅស៊ូ, រួមនឹងផលិតផលផ្សេងទៀត ដូចជាផ្លែឈើ បន្លែ គុជខ្យង ប្រដាប់ក្មេងលេង វត្ថុវាយនភណ្ឌកែច្នៃផ្សេងជាដើម។អ្នកជំនាញសេដ្ឋកិច្ច លើកឡើងថា ការកើនឡើងនូវការចេញទំនិញគ្រប់ប្រភេទរបស់កម្ពុជានេះ ដោយសារកម្ពុជា បានអនុវត្តពេញលេញនូវកិច្ចព្រមព្រៀងពាណិជ្ជកម្មសេរី (RCEP) ដែលតាមរយៈទីផ្សារទាំង១៥ ប្រទេសជាសមាជិករបស់ RCEP បានស្រូបយកទំនិញយ៉ាងច្រើនពីកម្ពុជាក្រោមអត្រាពន្ធទាប។ ជាមួយគ្នាតាមរយៈកិច្ចព្រមព្រៀងពាណិជ្ជកម្មសេរីរវាងកម្ពុជា និងចិន ដែលបានចូលជាធរមាន ក៏ត្រូវបានអ្នកនាំចេញប្រើប្រាស់អត្ថប្រយោជន៍កិច្ចព្រមព្រៀងនេះ គួរឱ្យកត់សម្គាល់ផងដែរ។តាមអគ្គយកដ្ឋាន និងរដ្ឋាករកម្ពុជា អាមេរិក គឺជាទីផ្សារធំបំផុតរបស់កម្ពុជា ដែលកម្ពុជាបាននាំទំនិញទៅសហរដ្ឋអាមេរិក ក្នុងតម្លៃ ៧,០៤ ពាន់ដុល្លារ ខណៈវៀតណាម បាននាំចូលទំនិញពីកម្ពុជាក្នុងតម្លៃ ១,៥៩ពាន់ដុល្លារ, ជប៉ុននាំចូលទំនិញពីកម្ពុជា ក្នុងតម្លៃ ៨៩៧ លានដុល្លារ, និងចិន ក្នុងតម្លៃ៨៩៥ លានដុល្លារ៕ អត្ថបទ៖ វណ្ណៈ

រាជរដ្ឋាភិបាលសម្រេចបង្កើតសហព័ន្ធស្វាយចន្ទីកម្ពុជា ដើម្បីលើកកម្ពស់ការដាំដុះកែច្នៃ និងនាំចេញ

ភ្នំពេញ៖ អន្តរក្រសួងបានចាប់ផ្តើមប្រជុំអនុម័តសេចក្តីព្រាងចុងក្រោយ ដើម្បីបង្កើតរចនាសម្ព័ន្ធដឹកនាំ និងគ្រប់គ្រងដើម្បីជួយលើកកម្ពស់ផលិតផល ស្វាយចន្ទីនៅកម្ពុជា ខណៈផលិតផលនេះ គឺជាផលិតផលមានសក្តានុពលសម្រាប់សេដ្ឋកិច្ច។សន្និបាតកំណើតដំបូងនៃសហព័ន្ធស្វាយចន្ទីកម្ពុជា ត្រូវបានធ្វើឡើង នៅថ្ងៃទី១០ ខែតុលានេះដើម្បីពិភាក្សា និងអនុម័តសេចក្តីព្រាងចុងក្រោយនៃលក្ខន្តិកៈសហព័ន្ធស្វាយចន្ទីកម្ពុជាដែលត្រូវបានរៀបចំ និងកែលម្អដោយក្រុមការងារ បន្ទាប់ពីបានប្រមែប្រមូល និងបញ្ចូលធាតុចូលដែលទទួលបានពីសិក្ខាសាលាណែនាំ និងប្រឹក្សាយោបល់ថ្នាក់តំបន់ មានចំនួនពីរលើក ដែលបានធ្វើឡើងនៅក្នុងខែធ្នូ ឆ្នាំ២០២១ កន្លងមកនេះ។ ចំណែកទាក់ទងនឹងការបង្កើតរចនាសម្ព័ន្ធដឹកនាំ និងគ្រប់គ្រង គឺធ្វើឡើងតាមរយៈដំណើរការបោះឆ្នោតដោយសន្និបាត ដើម្បីពិភាក្សា និងអនុម័តលើផែនការការងារ របស់សហព័ន្ធស្វាយចន្ទីកម្ពុជា សម្រាប់ឆ្នាំខាងមុខ។ លទ្ធផលនៃសន្និបាតកំណើតដំបូងនេះ នឹងត្រូវបានចងក្រងជាឯកសារ និងរៀបចំជារបាយការណ៍ដែលជាឯកសារចាំបាច់សម្រាប់ការចុះបញ្ជី ជាផ្លូវការនៅទៅក្រសួងមហាផ្ទៃ។សន្និបាតកំណើតដំបូងនសហព័ន្ធស្វាយចន្ទីកម្ពុជា គឺមានការចូលរួមពីកសិករផលិតស្វាយចន្ទីប្រមាណពី ៤០-៥០នាក់ ដែលជាអ្នកដឹកនាំ ឬតំណាងមកពីសមាគមស្វាយចន្ទីកម្ពុជា សហគមន៍កសិកម្ម ឬក្រុមអ្នកផលិតស្វាយចន្ទីនៅក្នុងខេត្តទាំង ១០ ដែលផលិតស្វាយចន្ទីធំជាងគេនៅកម្ពុជា គឺខេត្តកំពង់ធំ ព្រះវិហារ សៀមរាប ស្ទឹងត្រែង រតនគិរី មណ្ឌលគិរី ក្រចេះ ឧត្តរមានជ័យ កំពង់ចាម និងត្បូងឃ្មុំ។ តំណាងក្រុមហ៊ុនឯកជន មកពីក្រុមហ៊ុនកែច្នៃ និងក្រុមហ៊ុនពាណិជ្ជកម្មស្វាយចន្ទី និងអ្នកផ្គត់ផ្គង់ធាតុចូលកសិកម្ម ប្រមាណពី២៥ ទៅ៣០នាក់ ដែលជាតួអង្គនៃខ្សែច្រវាក់តម្លៃស្វាយចន្ទីនឹងត្រូវបានអញ្ជើញឱ្យចូលរួមក្នុងអង្គសន្និបាតកំណើតដំបូងនេះ៕

ភ្ញៀវទេសចរចូលមកលេងក្រុងព្រះសីហនុច្រើនកុះករ ដោយសារការបើកល្បឿនលឿនមិនគិតលុយ

ព្រះសីហនុ៖ ភ្ញៀវទេសចរច្រើនកុះករចូលមកលេងកម្សាន្ដក្រុងព្រះសីហនុ ធ្វើឱ្យមានការកកស្ទះចរាចរណ៍នៅតាមផ្លូវឆ្នេរ តែអាជីវករលក់ដូរនៅតាមតំបន់ឆ្នេរមានការសប្បាយចិត្តក្នុងការផ្ដល់សេវាកម្មទេសចរណ៍ (លក់ដូរចំណីអាហារ) នៅថ្ងៃឈប់សម្រាកចុងសប្តាហ៍ ថ្ងៃទី៨-៩ ខែតុលា ឆ្នាំ២០២២។អាជីវករលក់ដូរនៅឆ្នេរអូរឈើទាលក្រុងព្រះសីហនុ បានលើកឡើងថា ពួកគាត់សប្បាយរីករាយដែលឃើញភ្ញៀវទេសចរ មកលេងកម្សាន្ដច្រើនកុះករនៅចុងសប្ដាហ៍នេះ។ចំពោះតម្លៃសេវាកម្មហូបចុក គឺលក់ដូចថ្ងៃធម្មតាទៅតាមសៀវភៅបញ្ជីមុខម្ហូប ដែលបានកំណត់ចាប់ពី ៥ដុល្លារ រហូតជាង ១០ដុល្លារ ឬលើសពីនេះ ទៅតាមតម្រូវការរបស់ភ្ញៀវ។ កន្លងមក ពួកគាត់ បានទទួលការបណ្ដុះបណ្ដាលវគ្គខ្លីពីបដិសណ្ឋាកិច្ចល្អ និងការផ្ដល់គុណភាពសេវាកម្មជូនភ្ញៀវទេសចរ ដែលត្រូវបានរៀបចំ ឡើងដោយមន្ទីរទេសចរណ៍ខេត្ដព្រះសីហនុ ដូច្នេះពួកគាត់យល់ដឹងច្បាស់អំពីការរាក់ទាក់ភ្ញៀវ ឬការទទួលភ្ញៀវ ធ្វើយ៉ាងម៉េច ទាក់ទាញភ្ញៀវឱ្យមកលេងច្រើន។ ភ្ញៀវខ្លះ ពួកគាត់ មកមុជទឹកលេងលម្ហែនៅតាមឆ្នេរ ហូបចុកចំណីអាហារហើយ ក៏ត្រឡប់ទៅភ្នំពេញវិញ ព្រោះគេជិះតាមផ្លូវល្បឿនលឿន ដោយមិនបង់ប្រាក់ហើយផ្លូវល្អ។ពិតណាស់នៅសប្ដាហ៍នេះ មានភ្ញៀវទេសចរចូលមកលេងលម្ហែកម្សាន្ដច្រើនកុះករ ដោយសារផ្លូវល្បឿនលឿនបានបើកឱ្យ ពលរដ្ឋប្រើប្រាស់សាកល្បងមិនគិតលុយរយៈពេល១ខែ ដែលងាយស្រួលដល់ភ្ញៀវក្នុងការធ្វើដំណើរមកលេងកម្សាន្ដនៅ ខេត្ដព្រះសីហនុច្រើនបែបនេះ។ចំពោះទិន្នន័យទូរលេខចំនួនភ្ញៀវ ដែលបានចូលមកលេងកម្សាន្ដនៅខេត្ដព្រះសីហនុ ចំនួនប៉ុន្មាន មិនទាន់មាននៅឡើយ ដោយលោក តាំង សុចិត្រគ្រឹះស្នា ប្រធានមន្ទីរទេសចរណ៍ខេត្តព្រះសីហនុ បានប្រាប់ថា “មិនធ្វើការបូកសរុបចុងសប្ដាហ៍ទេ តែលោកធ្វើការបូកសរុបភ្ញៀវប្រចាំសប្ដាហ៍”។

ទេសចរអន្តរជាតិមកទស្សនាកម្ពុជា តាមកញ្ចប់ទេសចរណ៍កើនជាង៣០% ក្នុងរយៈពេល២ខែកន្លងមកនេះ

ភ្នំពេញ៖ ចាប់តាំងពីរាជរដ្ឋាភិបាលកម្ពុជា បានប្រកាសបើកប្រទេសបើកទេសចរណ៍ ហើយចុងក្រោយនេះកម្ពុជាដកចេញវិធានការប្រកាសសុខភាពលើអ្នកដំណើរអន្តរជាតិ និងបណ្ណវ៉ាក់សាំងកូវីដ១៩ ក្រសួងទេសចរណ៍សំគាល់ឃើញថា ចាប់ពីខែសីហាដល់ខែកញ្ញាកន្លងមកនេះ ទេសចរអន្តរជាតិមកទស្សនាកម្ពុជាតាមកញ្ចប់ទេសចរណ៍គឺមានការកើនឡើងល្អជាងបណ្តាខែមុនៗ។បើតាមលោក ឈុន មករា ប្រធាននាយកដ្ឋានទីភ្នាក់ទេសចរណ៍ ដឹកជញ្ជូន និងមគ្គុទ្ទេសក៍ទេសចរណ៍ បានថ្លែងនៅថ្ងៃទី៦ ខែកញ្ញាឆ្នាំ២០២២នេះថា នៅក្នុងកំណើនភ្ញៀវទេសចរអន្តរជាតិមកកម្ពុជា ក្នុងរយៈពេល៩ខែឆ្នាំ២០២២ មានប្រមាណជាង១លាន២សែននាក់នោះ សំគាល់ឃើញថា មានតែក្នុងរយៈពេល២ខែចុងក្រោយនេះពោលគឺខែសីហា និងខែកញ្ញានេះ ដែលកម្ពុជាបានទទួលភ្ញៀវទេសចរអន្តរជាតិបានមកទស្សនាកម្ពុជា តាមកញ្ចប់ទេសចរណ៍មានកំណើនល្អប្រសើរជាងបណ្តាខែមុនៗកន្លងមក ហើយយើងរំពឹងថា ក្នុងឆ្នាំ២០២២នេះ នឹងមានភ្ញៀវអន្តរជាតិមកទស្សនាកម្ពុជា តាមកញ្ចប់ទេសចរណ៍ប្រមាណ៤០% បើប្រៀបធៀបនឹងឆ្នាំ២០១៩ដែលឆ្នាំមិនទាន់មានកូវីដរាតត្បាត។បើតាមលោក រឿន ភូមិរ៉ា ប្រធានក្រុមហ៊ុនទេសចរណ៍ តាខ្មៅ ហូលីដេ បានថ្លែងថា សម្រាប់ក្រុមហ៊ុនការីទេសចរណ៍លោកក្នុងនៅក្នុងខែកញ្ញានេះ មានទេសចរអន្តរជាតិបានកក់ទិញដើរកញ្ចប់ទេសចរណ៍មានកំណើនប្រមាណ៣០%ធៀបឆ្នាំ២០១៩ ។លោកស្រី ឆាយ សៀវលីន ប្រធានសមាគមន៍ទីភ្នាក់ទេសចរណ៍កម្ពុជា CATA ថ្លែងថា ចាប់តាំងពីរាជរដ្ឋាភិបាលប្រកាសបើកប្រទេសមក ភ្ញៀវទេសចរអន្តរជាតិបានកក់ទិញកញ្ចប់ទេសចរណ៍មកទស្សនាកម្ពុជានៅក្នុងអំឡុងខែកញ្ញានេះមានចំនួនច្រើន ហើយចំនួននេះនឹងកើនជាបន្តបន្ទាប់ទៀតរហូតខែមេសាឆ្នាំ២០២៣។លោកស្រី ឆាយ សៀវលីន បន្តថា យ៉ាងណាក៏ដោយ ក្នុងចំណោមក្រុមហ៊ុនការីទេសចរណ៍ដែលបានព្យួរអាជីវកម្ម មកដល់ពេលនេះ មានក្រុមហ៊ុនការីទេសចរណ៍ប្រមាណជាង ២០០ក្រុមហ៊ុនបានបើកដំណើរការអាជីវកម្មឡើងវិញ ហើយគេកំពុងមានភាពមមាញឹកខ្លាំងក្នុងទំនាក់ទំនងភ្ញៀវអន្តរជាតិ និងរៀបចំកញ្ចប់ទេសចរណ៍តម្លៃសមរម្យជូនភ្ញៀវទេសចរអន្តរជាតិមកទស្សនាកម្ពុជា នៅក្នុងខែបន្តបន្ទាប់នេះទៀតផងដែរ៕អត្ថបទ ស៊ុម សុខជា

សមាគមកាបូប ស្បែកជើង និងអេឡិចត្រូនិចកម្ពុជា ស្នើសុំចូលជាសមាជិក ILO-BFC

ភ្នំពេញ៖ សមាគមកាបូប ស្បែកជើង និងអេឡិចត្រូនិចកម្ពុជា បានស្នើសុំឯកឧត្តមរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ដើម្បីចូលជាសមាជិករបស់គណៈកម្មការគម្រោងរោងចក្រកាន់តែប្រសើរនៅកម្ពុជា ILO-BFC ដើម្បីឲ្យសមាគមមានឱកាសពង្រីកខ្លួនស្របតាមចក្ខុវិស័យរបស់សមាគម។ ក្នុងជំនួបការងារ រវាងឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ កាលពីព្រឹកថ្ងៃទី៥ តុលា ឆ្នាំ២០២២កន្លងទៅ នៅទីស្តីការក្រសួង លោក Cheng Chin Chun ប្រធានសមាគមកាបូប ស្បែកជើង និងអេឡិចត្រូនិចកម្ពុជា បានលើកឡើងថា សមាគមរបស់លោក បានចុះបញ្ជីកាទទួលស្គាល់ដោយក្រសួងការងារ កាលពីខែសីហាកន្លងទៅ ក្នុងគោលបំណងរួមចំណែកធ្វើឲ្យមានសុខដុមរមនានៃទំនាក់ទំនងវិជ្ជាជីវៈ និងចូលរួមចំណែកជាមួយរដ្ឋាភិបាលកម្ពុជា ក្នុងការជំរុញសេដ្ឋកិច្ចឲ្យមានការរីកចម្រើន ទាក់ទាញអ្នកវិនិយោគឲ្យមកបណ្តាក់ទុននៅក្នុងប្រទេសកម្ពុជាឲ្យបានកាន់តែច្រើនបន្ថែមទៀត ដើម្បីផ្តល់ឱកាសការងារជូនដល់ពលរដ្ឋកម្ពុជា ព្រមទាំងចូលរួមគោរពច្បាប់ លក្ខខណ្ឌការងារឲ្យបានល្អប្រសើរ។ ឯកឧត្តមរដ្ឋមន្រ្តី បានអរគុណដល់សមាគមដែលបានធ្វើការវិនិយោគ បង្កើត រោងចក្រសហគ្រាសនៅក្នុងប្រទេសកម្ពុជា ផ្តល់ឱកាសការងារបានយ៉ាងច្រើនជូនដល់កម្មករនិយោជិត ក្នុងការចូលរួមចំណែកអភិវឌ្ឍន៍សេដ្ឋកិច្ចកម្ពុជាមានការរីកចម្រើនជាបន្តបន្ទាប់។ ពាក់ព័ន្ធនិងសំណើរភាគីសមាគម ឯកឧត្តមរដ្ឋមន្ត្រី លើកឡើងថា បើតាមការគោលការណ៍ណែនាំរួមរបស់ក្រសួងការងារ និងបណ្តុះបណ្តាលវិជ្ជាជីវៈ និងក្រសួងពាណិជ្ជកម្ម រាល់ប្រភេទរោងចក្រសហគ្រាស ផលិតផលស្បែកជើង និងកាបូប មានសិទ្ធិចូលក្នុងគម្រោងនេះបាន តែត្រូវចូលរួមបង់ភាគទានទ្រទ្រង់គម្រោង និងឆ្លងកាត់ការចុះត្រួតពិនិត្យវាយតម្លៃពីអធិការកិច្ចរបស់គម្រោងរោងចក្រកាន់តែប្រសើរនៅកម្ពុជា និងក្រុមអធិការកិច្ចរបស់ក្រសួង។ ចំណែកអត្ថប្រយោជន៍ដែលសមាជិករបស់គម្រោងទទួលបាន គឺមានការគាំទ្របញ្ជាទិញផលិតផលពីរោងចក្រ សហគ្រាសរបស់ខ្លួនពីអ្នកបញ្ជាទិញល្បីៗនៅក្រៅប្រទេស។ ឯកឧត្តម គូសបញ្ជាក់ថា អាទិភាពចំបងរបស់រាជរដ្ឋាភិបាលកម្ពុជា គឺរក្សាឲ្យបាននូវសន្តិភាព ស្ថេរភាពនយោបាយ ដែលជាគន្លឹះនៃការអភិវឌ្ឍសង្គមសេដ្ឋកិច្ចជាតិ។ សន្តិភាព និងការអភិវឌ្ឍ ជាបំណងប្រាថ្នារបស់មនុស្សគ្រប់ៗរូប បើគ្មានសន្តិភាព អស្ថេរភាពនយោបាយ នោះអ្នកវិនិយោគ គេក៏មិនហ៊ានចូលមកវិនិយោគនៅក្នុងប្រទេសដែលពោរពេញដោយសង្រ្គាមនោះដែរ៕ អត្ថបទ ៖ឈិត បូរ៉ាវី

បណ្ដាញសង្គម

ព័ត៌មានថ្មីៗ

កំណើនប្រាក់ចំណេញឧស្សាហកម្មរបស់ចិនកើនឡើងយ៉ាងឆាប់រហ័ស ទោះសង្គ្រាមអ៊ីរ៉ង់បង្កើនហានិភ័យក៏ដោយ

អតីតរដ្ឋមន្ត្រីការពារជាតិ៖ ការដាក់ឱ្យអនុវត្តកាតព្វកិច្ចយោធាសមស្របតាមសភាពការណ៍តម្រូវ

រដ្ឋបាលខេត្តប៉ៃលិនប្រកាសបដិសេធ និងច្រានចោលការផ្សាយព័ត៌មានបំភ្លៃដែលចោទថា «ថៃបានឈ្លានពានចូលទឹកដីខ្មែរនៅខេត្តប៉ៃលិន»

ជប៉ុនផ្តល់រថយន្តដឹកសំរាមបន្ថែម ១០គ្រឿងទៀតដល់កម្ពុជា ដើម្បីពង្រឹងការគ្រប់គ្រងសំរាម

ក្រសួងការពារជាតិ កែសម្រួលការហ្វឹកហ្វឺនកងទ័ពតាមបែបទំនើបកម្ម និងមានលក្ខណៈយុទ្ធសាស្ត្រយូរអង្វែង

លោក Trump៖ ខ្មាន់វាយប្រហារមានចរឹតប្រឆាំងគ្រិស្តសាសនា និងពោពេញដោយការស្អប់ខ្ពើមនៅក្នុងចិត្តរបស់គេ

ធនាគារអឺរ៉ុប៖ ថវិកា៣០លានអឺរ៉ូ ត្រូវបានអនុម័តសម្រាប់ផែនការជួសជុលរបងសុវត្ថិភាពរោងចក្រនុយក្លេអ៊ែរ Chornobyl

នគរបាលបាញ់ឧស្ម័នបង្ហៀរទឹកភ្នែក ដើម្បីបំបែកក្រុមបាតុករនៅរដ្ឋ Manipur ប្រទេសឥណ្ឌា

អ្នកនាំពាក្យរាជរដ្ឋាភិបាល៖ កម្ពុជា បន្តបង្ហាញអំពីទង្វើឈ្លានពានរបស់ថៃ ទៅកាន់បណ្ដាប្រទេសជាមិត្ត និងអន្តរជាតិ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877