BTV NEWS

ធនាគារជាតិ ដាក់ឱ្យប្រើប្រាស់ប្រព័ន្ធវដ្តករសាស្រ្តហិរញ្ញវត្ថុ ដើម្បីបង្កើនការយល់ដឹងដល់ភាគីពាក់ព័ន្ធ

គិតត្រឹមត្រីមាសទី១ឆ្នាំនេះ សហគ្រាស ក្រុមហ៊ុន រោងចក្រនៅកម្ពុជា កើនដល់ជាង ៤៧ ០០០ សហគ្រាស ខណៈចំនួនកម្មករនិយោជិតកើនឡើងដល់ប្រមាណ ២,៣លាននាក់

ត្រីមាសទី១ឆ្នាំនេះ កម្ពុជានាំចេញកង់ មានទឹកប្រាក់ជាង ២០១ លានដុល្លារ កើនឡើងជិត ៤៤%

រោងចក្រ វិរៈ ប៊ុនថាំ ជីកសិកម្ម មានសមត្ថភាពផលិតបានប្រមាណ ២០០តោន ក្នុងមួយថ្ងៃសម្ពោធដាក់ឱ្យដំណើរការជាផ្លូវការ

សេដ្ឋកិច្ច និង កសិកម្ម

សមាគមកាបូប ស្បែកជើង និងអេឡិចត្រូនិចកម្ពុជា ស្នើសុំចូលជាសមាជិក ILO-BFC

ភ្នំពេញ៖ សមាគមកាបូប ស្បែកជើង និងអេឡិចត្រូនិចកម្ពុជា បានស្នើសុំឯកឧត្តមរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ដើម្បីចូលជាសមាជិករបស់គណៈកម្មការគម្រោងរោងចក្រកាន់តែប្រសើរនៅកម្ពុជា ILO-BFC ដើម្បីឲ្យសមាគមមានឱកាសពង្រីកខ្លួនស្របតាមចក្ខុវិស័យរបស់សមាគម។ ក្នុងជំនួបការងារ រវាងឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ កាលពីព្រឹកថ្ងៃទី៥ តុលា ឆ្នាំ២០២២កន្លងទៅ នៅទីស្តីការក្រសួង លោក Cheng Chin Chun ប្រធានសមាគមកាបូប ស្បែកជើង និងអេឡិចត្រូនិចកម្ពុជា បានលើកឡើងថា សមាគមរបស់លោក បានចុះបញ្ជីកាទទួលស្គាល់ដោយក្រសួងការងារ កាលពីខែសីហាកន្លងទៅ ក្នុងគោលបំណងរួមចំណែកធ្វើឲ្យមានសុខដុមរមនានៃទំនាក់ទំនងវិជ្ជាជីវៈ និងចូលរួមចំណែកជាមួយរដ្ឋាភិបាលកម្ពុជា ក្នុងការជំរុញសេដ្ឋកិច្ចឲ្យមានការរីកចម្រើន ទាក់ទាញអ្នកវិនិយោគឲ្យមកបណ្តាក់ទុននៅក្នុងប្រទេសកម្ពុជាឲ្យបានកាន់តែច្រើនបន្ថែមទៀត ដើម្បីផ្តល់ឱកាសការងារជូនដល់ពលរដ្ឋកម្ពុជា ព្រមទាំងចូលរួមគោរពច្បាប់ លក្ខខណ្ឌការងារឲ្យបានល្អប្រសើរ។ ឯកឧត្តមរដ្ឋមន្រ្តី បានអរគុណដល់សមាគមដែលបានធ្វើការវិនិយោគ បង្កើត រោងចក្រសហគ្រាសនៅក្នុងប្រទេសកម្ពុជា ផ្តល់ឱកាសការងារបានយ៉ាងច្រើនជូនដល់កម្មករនិយោជិត ក្នុងការចូលរួមចំណែកអភិវឌ្ឍន៍សេដ្ឋកិច្ចកម្ពុជាមានការរីកចម្រើនជាបន្តបន្ទាប់។ ពាក់ព័ន្ធនិងសំណើរភាគីសមាគម ឯកឧត្តមរដ្ឋមន្ត្រី លើកឡើងថា បើតាមការគោលការណ៍ណែនាំរួមរបស់ក្រសួងការងារ និងបណ្តុះបណ្តាលវិជ្ជាជីវៈ និងក្រសួងពាណិជ្ជកម្ម រាល់ប្រភេទរោងចក្រសហគ្រាស ផលិតផលស្បែកជើង និងកាបូប មានសិទ្ធិចូលក្នុងគម្រោងនេះបាន តែត្រូវចូលរួមបង់ភាគទានទ្រទ្រង់គម្រោង និងឆ្លងកាត់ការចុះត្រួតពិនិត្យវាយតម្លៃពីអធិការកិច្ចរបស់គម្រោងរោងចក្រកាន់តែប្រសើរនៅកម្ពុជា និងក្រុមអធិការកិច្ចរបស់ក្រសួង។ ចំណែកអត្ថប្រយោជន៍ដែលសមាជិករបស់គម្រោងទទួលបាន គឺមានការគាំទ្របញ្ជាទិញផលិតផលពីរោងចក្រ សហគ្រាសរបស់ខ្លួនពីអ្នកបញ្ជាទិញល្បីៗនៅក្រៅប្រទេស។ ឯកឧត្តម គូសបញ្ជាក់ថា អាទិភាពចំបងរបស់រាជរដ្ឋាភិបាលកម្ពុជា គឺរក្សាឲ្យបាននូវសន្តិភាព ស្ថេរភាពនយោបាយ ដែលជាគន្លឹះនៃការអភិវឌ្ឍសង្គមសេដ្ឋកិច្ចជាតិ។ សន្តិភាព និងការអភិវឌ្ឍ ជាបំណងប្រាថ្នារបស់មនុស្សគ្រប់ៗរូប បើគ្មានសន្តិភាព អស្ថេរភាពនយោបាយ នោះអ្នកវិនិយោគ គេក៏មិនហ៊ានចូលមកវិនិយោគនៅក្នុងប្រទេសដែលពោរពេញដោយសង្រ្គាមនោះដែរ៕ អត្ថបទ ៖ឈិត បូរ៉ាវី

ក្រសួងកសិកម្ម អង្គការ UNIDO សហការលើកកម្ពស់គុណភាពផលិតផលជលផល ដើម្បីនាំចេញទៅអឺរ៉ុប

ភ្នំពេញ៖ ក្រសួងកសិកម្មរុក្ខាប្រមាញ់ និងនេសាទ និងអង្គការ UNIDO នឹងបន្តកិច្ចសហប្រតិបត្តិការ លើការលើកកម្ពស់ផលិតផលជលផល មានគុណភាព និងសុវត្ថិភាព របស់កម្ពុជា និងអាចនាំមកពីផ្សារអឺរ៉ុប នាពេលអនាគត។ឯកឧត្តម វេង សាខន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងលោក Ali Badarneh នាយកផ្នែកសុវត្ថិភាពចំណីអាហារ និងប្រព័ន្ធស្បៀងអាហារនៃអង្គការ UNIDO បានពិភាក្សាលើគម្រោងពង្រឹងគុណភាព និងសុវត្ថិភាពផលិតផលជលផលនេះ នៅក្នុងជំនួបមួយ កាលពីថ្ងៃទី៤ ខែតុលា នាទីក្រុងវីយ៉ែន ប្រទេសអូទ្រីស (Austria)។ ក្នុងជំនួបខាងលើនេះ ឯកឧត្តមរដ្ឋមន្ដ្រី បានវាយតម្លៃខ្ពស់ លើការអនុវត្តគម្រោងនានាគាំទ្រដោយ UNIDO។ឯកឧត្តមរដ្ឋមន្ដ្រី បានស្នើដល់អង្គការ UNIDO ពិនិត្យលទ្ធភាពជួយគាំទ្រ និងសហការលើការអភិវឌ្ឍអាជីវកម្មកសិកម្ម កសាងសមត្ថភាពលើផ្នែកសុវត្ថិភាពអាហារ ការគាំទ្រដល់ការកែលម្អហេដ្ឋារចនាសម្ព័ន្ធ គុណភាពសេវាមន្ទីរពិសោធន៍ និងវិញ្ញាបនប័ត្រគាំទ្រ។ជាការឆ្លើយតប លោក Ali Badarneh បានថ្លែងអំណរគុណ និងវាយតម្លៃខ្ពស់ចំពោះកិច្ចសហប្រតិបត្តិការដ៏ល្អប្រសើររវាងភាគីទាំងពីរ ឈានទៅសម្រេចបាននូវលទ្ធផលជាផ្លែផ្កាគួរជាទីមោទនៈ។ លោកបន្ថែមថា លក្ខណៈពិសេសនៃគម្រោង CAP FISH នេះគឺផ្តោតសំខាន់ទៅលើសុវត្ថិភាពនៃផលិតផលជលផល និងការគាំទ្រដល់ផ្នែកហិរញ្ញប្បទានដល់កសិករលើការកែច្នៃ វេចខ្ចប់ ប្រកបដោយគុណភាពនិងសុវត្ថិភាព។លោក បន្តថា អង្គការ UNIDO ពិតជារីករាយក្នុងការពង្រីកគម្រោងនេះថែមមួយកម្រឹតទៀត ដោយបានចាប់ផ្តើមជជែកការងារលម្អិតជាមួយគ្រប់ភាគីពាក់ព័ន្ធដូចជាសហភាពអឺរ៉ុប និងដៃគូអភិវឌ្ឍន៍ដទៃទៀតផងដែរ។ លោក Ali Badarneh សង្ឃឹមថា ផលិតផលជលផលប្រកបដោយគុណភាព និងសុវត្ថិភាពរបស់កម្ពុជានឹងអាចនាំមកពីផ្សារអឺរ៉ុបនាពេលអនាគត។ ចំពោះសំណើររបស់ឯកឧត្តមរដ្ឋមន្ត្រី អង្គការ UNIDO នឹងជជែកលម្អិតជាមួយមន្ត្រីជំនាញនៃរដ្ឋបាលជលផលក្នុងកិច្ចប្រជុំផ្នែកបច្ចេកទេសនារសៀលនេះ៕ អត្ថបទ៖ វណ្ណៈ

ខេត្តកំពង់ស្ពឺនឹងក្លាយជាតំបន់ទាក់ទាញអ្នកវិនិយោគ និងជាតំបន់ឧស្សាហកម្មដ៏ធំ

កំពង់ស្ពឺ៖ ខេត្តកំពង់ស្ពឺ នឹងកា្លយជាតំបន់ឧស្សាហកម្មធំមួយ និងអាចស្រូបយកសក្តានុពលវិនិយោគកាន់តែច្រើន ស្របពេលកម្ពុជាមានផ្លូវល្បឿនលឿន ជាពិសេសខេត្តមួយនេះ ជាចំណុចកណ្តាលរវាងរាជធានីភ្នំពេញ និងខេត្តព្រះសីហនុ ងាយដល់ការចរាចរណ៍ទំនិញចុះឡើង។ឯកឧត្តមបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា ថ្លែងលើកឡើងក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន ស្របពេលកម្ពុជាមានផ្លូវល្បឿនលឿន ភ្នំពេញ-ព្រះសីហនុ ដែលជាផ្នែកមួយយ៉ាងសំខាន់ សម្រាប់សេវាដឹកជញ្ជូន កាន់តែលឿន និងមានទំនុកចិត្ត ក្នុងនោះចំពោះការវិនិយោគលើវិស័យឧស្សាហកម្ម វិនិយោគិននឹងអាចសម្លឹងមើល អំពីសក្តានុពលវិនិយោគរបស់ខ្លួននៅខេត្តកំពុងស្ពឺ ដោយសារខេត្តមួយនេះមានថ្លៃដីទាប អាចសង់រោងចក្របានច្រើន សម្រាប់ផលិតបម្រើទីផ្សារនាំចេញ ដែលរំពឹងថា នៅពេលខាងមុខ កម្ពុជានឹងទទួលបានរបាយនៃការវិនិយោគតាមតំបន់ផ្សេងៗកាន់ច្រើន ។ទាក់ទងការអភិឌ្ឍន៍នេះ, ឯកឧត្តម វ៉ី សំណាង អភិបាលនៃគណៈអភិបាលខេត្តកំពង់ស្ពឺ លើកឡើងថា អ្វីដែលកម្ពុជា កំពុងទទួលបាន ជាពិសេសអ្វីដែលខេត្តកំពង់ស្ពឺកំពុងមានបច្ចុប្បន្ន គឺបានកើតចេញពីសុខសន្តិភាព ក្នុងនោះមានសុខសន្តិភាពទើបមានការអភិវឌ្ឍលើគ្រប់វិស័យ ជាពិសេសការអភវិឌ្ឍហេដ្ឋារចនាសម្ព័ន្ធជាដើម។ ជាក់ស្តែងហេដ្ឋរចនាសម្ព័ន្ធនៅខេត្តកំពង់ស្ពឺ បានកំពុងគ្រប់ដណ្តប់កាន់តែល្អប្រសើរ គឺមានផ្លូវ មានទឹក មានភ្លើង នឹងស្របពេលផ្លូវល្បឿនលឿនបានកើតឡើងជាបន្តបន្ទាប់ទៀតនេះ វិនិយោគិនអាចសម្លឹងឃើញ អំពីឱកាសវិនិយោគនៅក្នុងខេត្តកំពង់ស្ពឺ។ឯកឧត្តម អភិបាល បានបញ្ជាក់ថា រដ្ឋបាលសាលាខេត្ត តែងតែចូលរួមផ្សព្វផ្សាយ ជាពិសេសចាប់តាំងពីរការបើកសម្ពោធសាងសង់ផ្លូវល្បឿនលឿន អំពីទីតាំង ភូមិសាស្រ្ត ធ្វើឲ្យអ្នករកស៊ីទទួលទានទទួលបានព័ត៌មានគ្រប់ជ្រុងជ្រោយ ដោយកន្លងមកនេះ ខេត្តកំពង់ស្ពឺទទួលបានឱកាសវិនិយោគជាបន្តបន្ទាប់៕អត្ថបទ៖ សុន រ៉ាឌី

ក្រសួងសេដ្ឋកិច្ចផ្សព្វផ្សាយច្បាប់ ស្តីពីការគ្រប់គ្រងល្បែងពាណិជ្ជកម្ម និងលិខិតបទដ្ឋានគតិយុត្តិពាក់ព័ន្ធ

ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ បើកសិក្ខាសាលាមួយដើម្បីផ្តល់នូវពុទ្ធិ និងព័ត៌មានស៊ីជម្រៅគ្រប់ជ្រុងជ្រោយ អំពីច្បាប់ស្តីពីការគ្រប់គ្រងល្បែងពាណិជ្ជកម្ម និងលិខិតបទដ្ឋានគតិយុត្តពាក់ព័ន្ធ ដល់អាជ្ញាធរមានសមត្ថកិច្ចគ្រប់ជាន់ថ្នាក់ ដើម្បីជាមូលដ្ឋានគ្រឹះ ក្នុងការសហការអនុវត្តរវាង គ.ល.ក. និងអាជ្ញាធរសាធារណៈពាក់ព័ន្ធ លើការគ្រប់គ្រងវិស័យល្បែងពាណិជ្ជកម្មនេះប្រកបដោយប្រសិទ្ធភាព និងស្មារតីទទួលខុសត្រូវខ្ពស់ ។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មការគ្រប់គ្រងល្បែងពាណិជ្ជកម្មកម្ពុជា ថ្លែងក្នុងពិធីបើកសិក្ខាសាលាផ្សព្វផ្សាយច្បាប់ ស្តីពីការគ្រប់គ្រងល្បែងពាណិជ្ជកម្មជូនដល់អាជ្ញាធរសាធារណៈពាក់ព័ន្ធ នៅថ្ងៃទី ៤ខែតុលា ឆ្នាំ ២០២២នេះថា ជាទិដ្ឋភាពគតិយុត្តិ, ច្បាប់ស្តីពីការបង្ក្រាបល្បែងស៊ីសង នៅកម្ពុជាដែលត្រូវបានអនុម័ត និងដាក់ឱ្យប្រើប្រាស់នៅថ្ងៃទី ២៦ ខែមករា ឆ្នាំ ១៩៩៦ បានបើកផ្លូវជូនរាជរដ្ឋាភិបាល ក្នុងការផ្តល់ការអនុញ្ញាតឱ្យមានល្បែងពាណិជ្ជកម្មនៅក្នុងប្រទេសកម្ពុជា ។ នៅក្នុងការអនុវត្តជាក់ស្ដែងនាពេលកន្លងមក, មុនពេលដែលច្បាប់ស្តីពីការគ្រប់គ្រងល្បែងពាណិជ្ជកម្មចូលជាធរមាន, រាជរដ្ឋាភិបាលមានយន្តការគ្រប់គ្រងវិស័យនេះ ដោយផ្អែកលើលិខិតបទដ្ឋានគតិយុត្តិមួយចំនួនដូចជា៖ ច្បាប់ស្តីពីការបង្ក្រាបល្បែងស៊ីសង, សេចក្តីសម្រេច និងសារាចរណែនាំរបស់រាជរដ្ឋាភិបាល, ប្រកាសអន្តរក្រសួង និង សៀវភៅបន្ទុក ជាដើម ។ច្បាប់ស្តីពីការគ្រប់គ្រងល្បែងពាណិជ្ជកម្ម និងលិខិតបទដ្ឋានគតិយុត្តពាក់ព័ន្ធ បានអនុញ្ញាតឱ្យមានការគ្រប់គ្រងលើវិស័យកាស៊ីណូ និងល្បែងពាណិជ្ជកម្មដទៃទៀតយ៉ាងតឹងរ៉ឹង និងប្រកបដោយប្រសិទ្ធភាពខ្ពស់ ។ ជាមួយគ្នានេះដែរ, ដើម្បីធានាភាពរឹងមាំ, តម្លាភាព, សុចរិតភាព និងគណនេយ្យភាព របស់ប្រតិបត្តិការមណ្ឌលល្បែងពាណិជ្ជកម្ម, ច្បាប់នេះក៏បានកំណត់អំពីលក្ខណៈសម្បត្តិ របស់បុគ្គលជាកម្មសិទ្ធិករ ឬប្រតិបត្តិករ ដោយផ្តោតសំខាន់លើធនធានហិរញ្ញវត្ថុ, សមត្ថភាពធុរកិច្ច, គុណវុឌ្ឍរបស់អ្នកកាន់កាប់អាជ្ញាបណ្ណ, ការពង្រឹងសមត្ថភាពស្ថាប័ន,ការកំណត់អំពីប្រភេទអាជ្ញាបណ្ណ, ដែនកំណត់នៃការលេងល្បែង, ការកំណត់អំពីចំណូលកាតព្វកិច្ច, វិធានការនៃការផ្សះផ្សារ និងដោះស្រាយវិវាទ, និងការដាក់ទណ្ឌកម្មជាដើម ៕ អត្ថបទ៖ សុន រ៉ាឌី

ជើងហោះហើរកម្ពុជា-ចិន មានការកើនឡើង ខណៈរុញច្រានជើងហោះហើរកម្ពុជាកើនដល់៣៣ភាគរយ

ភ្នំពេញ៖ ក្រុមហ៊ុនអាកាសចរណ៍របស់ប្រទេសចិនជាង១០ក្រុមហ៊ុន ដែលបានដាក់ពាក្យស្នើបើកជើងហោះហើរត្រង់មកកម្ពុជា ចាប់តាំងពីដើមឆ្នាំ២០២២ មកដល់ពេលនេះ ក្រុមហ៊ុនអាកាសចរណ៍ចិនទាំងនោះ ចាប់ផ្តើមមានជើងហោះហើរពីចិនមកកម្ពុជាជាបណ្តើរៗហើយ និងបានរុញច្រានឱ្យចំនួនជើងហោះហើរកម្ពុជា ក្នុងរយៈពេល៩ខែមានកំណើនដល់៣៣% នៃជើងហោះហើរសរុបឆ្នាំ២០១៩។បើតាមឯកឧត្តម ជា អូន រដ្ឋលេខាធិការ និងជាអ្នកនាំពាក្យនៃលេខាធិការដ្ឋានអាកាសចរណ៍ស៊ីវិល ប្រាប់BTV នៅថ្ងៃទី៤ ខែតុលានេះថា ចាប់តាំងពីពាក់កណ្តាលខែកញ្ញាឆ្នាំ២០២២នេះ ក្រុមហ៊ុនអាកាសចរណ៍របស់ប្រទេសចិនមួយចំនួន បានបើកជើងហោះហើរត្រង់ទៅមកពីបណ្តាខេត្តចំនួន៨នៅប្រទេសចិន មកកាន់កម្ពុជា បានចំនួន៣០ជើងក្នុងមួយសប្តាហ៍ ហើយការមានជើងហោះហើរត្រង់កម្ពុជាចិននេះ បានធ្វើឡើងក្នុងខណៈរដ្ឋាភិបាលចិន កំពុងបន្ធូរបន្ថយលក្ខខ័ណ្ឌរឹត បន្តឹងគោលនយោបាយ Zero Covidនៅក្នុងប្រទេសចិន។ឯកឧត្តម ជា អូន ប៉ាន់ប្រមាណថា ក្នុងខែកញ្ញានេះ ចំនួនជើងហោះហើរសរុបមានកំណើនប្រមាណ ៣៣%នៃចំនួនជើងហោះហើរសរុប ១០ម៉ឺន៤៧៧០ជើងក្នុងឆ្នាំ២០១៩នោះ ក្នុងនោះ អ្នកដំណើរអន្តរជាតិមកកម្ពុជា នឹងមានកំណើន២៦%បន្ថែមទៀត ហើយក្រៅពីនេះជាចំនួនជើងហោះហើរយន្តហោះដឹកទំនិញ។អគ្គនាយកដ្ឋានអន្តោប្រវេសន៍ក្រសួងមហាផ្ទៃ នៅថ្ងៃស្អែកនេះ នឹងចេញផ្សាយតួលេខផ្លូវការនៃអ្នកដំណើរអន្តរជាតិមកកម្ពុជាសរុប ប៉ុន្តែបើតាមតួលេខដែលក្រសួងទេសចរណ៍ប្រមូលបានមកពីតាមបណ្តាច្រកទា្វរអន្តរជាតិផ្លូវអាកាស ផ្លូវគោក និងផ្លូវទឹក ចំនួន២៦ច្រកទ្វារអន្តរជាតិ បានឲ្យដឹងជាបណ្តោះអាសន្នថា ក្នុងរយៈពេល៩ ខែឆ្នាំ២០២២ ទូទាំងប្រទេសទទួលអ្នកដំណើរអន្តរជាតិ និងភ្ញៀវទេសចរអន្តរជាតិប្រមាណ ១លាន២សែន៥ម៉ឺននាក់ ក្នុងនោះអ្នកដំណើរអន្តរជាតិចូលកម្ពុជាតាមច្រកទ្វារអន្តរជាតិផ្លូវគោកមានចំនួនច្រើនជាងគេ៕ អត្ថបទ ស៊ុម សុខជា

សម្តេចតេជោ ហ៊ុន សែន៖ ចំណូលពន្ធដារ មានស្ថិរភាព ក្នុងរយៈពេល៩ខែ

ភ្នំពេញ៖ សម្តេចតេជោ ហ៊ុន សែន បានបញ្ជាក់ថា បច្ចុប្បន្ននេះ ចំណូលពន្ធផ្ទៃក្នុងរបស់កម្ពុជា យ៉ាងហោចណាស់ប្រមូលបាន ២០០លានដុល្លារសហរដ្ឋអាមេរិកក្នុងមួយខែ ដែលរយៈពេល៩ខែមកនេះ ការប្រមូលពន្ធសម្រេចបានជាង ៩៥ភាគរយ ស្មើនឹងជាង ៣ពាន់លានដុល្លារអាមេរិក។ថ្លែងក្នុងពិធីប្រគល់សញ្ញាបត្រដល់និស្សិតវិទ្យាស្ថានវ៉ាន់ដា ថ្នាក់បរិញ្ញាបត្ររង ថ្នាក់បរិញ្ញាបត្រ ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត នៅថ្ងៃទី៣ ខែតុលា សម្តេចជោ ហ៊ុន សែន នាយករដ្ឋមន្រ្តីកម្ពុជា ចំណូលពន្ធផ្ទៃក្នុងប្រមូលដោយអគ្គនាយកដ្ឋានពន្ធដារ ជាមធ្យម ២៥០លានដុល្លារ ក្នុងមួយខែ ក្នុងរយៈពេល៩ខែឆ្នាំនេះ។សម្តេចតេជោ ហ៊ុន សែន នាយករដ្ឋមន្រ្តីកម្ពុជា មានប្រសាសន៍ថា វិស័យឯកជន គឺជាក្បាលម៉ាស៊ីននៃកំណើនសេដ្ឋកិច្ច ដោយផ្តល់ការងារដល់ប្រជាពលរដ្ឋ សិស្សនិសិត្សបញ្ចប់ការសិក្សា និងចំណូលពន្ធចូលថវិកាជាតិ ដែលត្រូវបានប្រើសម្រាប់ការកសាងហេដ្ឋារចនាសម្ព័ន្ធនានា។សម្តេចតេជោ ហ៊ុន សែន បានបញ្ជាក់ថា កម្ពុជាបានប្រឹងប្រែងទប់នឹងវិបត្តិនានា ដែលបណ្តាលមកពីបញ្ហាសកល ក្នុងនោះមានការគិតគូរលើការចំណាយរបស់រដ្ឋ ខណៈដែលប្រទេសមួយចំនួនបានរងនូវវិបត្តិនេះយ៉ាងធ្ងន់ធ្ងរជាទីបំផុត។ទន្ទឹមនឹងនេះ សម្តេចតេជោ ហ៊ុន សែន បានប្រកាសពីចេតនារបស់រាជរដ្ឋាភិបាល ក្នុងការប្រឹងប្រែងធ្វើឱ្យវិស័យឯកជនបានរីកចម្រើន ដែលជាចំណែកមួយដ៏ធំ នៃការបង់ពន្ធចូលរដ្ឋ ខុសពីទស្សនៈនយោបាយ និងចេតនារបស់បុគ្គលខ្លះ ដែលចង់ឱ្យវិស័យឯកជនធ្លាក់ចុះ ឬអន់ថយ៕ អត្ថបទ៖ វណ្ណៈ

លោក ហ៊ុន ម៉ាណែត អញ្ជើញសម្ពោធរោងចក្រផលិតស្រោមដៃពេទ្យនៅក្រុងបាវិត

ស្វាយរៀង៖ លោកបណ្ឌិត ហ៊ុន ម៉ាណែត តំណាងដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្រ្តី នៅព្រឹកថ្ងៃទី៣០ ខែកញ្ញានេះ អញ្ជើញសម្ពោធរោងចក្រ RMKH Glove (Cambodia) Co. Ltd. ដែលជារោងចក្រផលិតស្រោមដៃពេទ្យ នៅក្រុងបាវិតខេត្តស្វាយរៀង ។នៅក្នុងពិធីសម្ពោធនោះ លោក ហ៊ុន ម៉ាណែត បានលើកឡើងថា លោកសូមវាយតម្លៃខ្ពស់ចំពោះការសម្រេចចិត្តបណ្តាក់ទុនយ៉ាងមោះមុតពីសំណាក់ក្រុមហ៊ុន Medtecs Manhattan Group ជាពិសេស ក្នុងការសាងសង់រោងចក្រផលិតស្រោមដៃពេទ្យបែបទំនើបខ្នាតធំនៅក្នុងទីក្រុងបាវិត ដោយចាប់ផ្តើមនៅក្នុងឆ្នាំ២០២១ គឺអំឡុងពេលដែលប្រទេសកម្ពុជាកំពុងទទួលរងនូវការឆ្លងរាលដាលនៃជំងឺកូវីដ-១៩ ក្នុងទ្រង់ទ្រាយធំ និងមិនទាន់បានងើបចេញពីវិបត្តិនៃជំងឺនេះនៅឡើយ។លោកបន្តថា ទង្វើនេះគឺជាសក្ខីភាពឆ្លុះបញ្ចាំងឱ្យឃើញថាក្រុមហ៊ុន ពិតជាមានការជឿជាក់ និងការប្តេជ្ញាចិត្តខ្ពស់ក្នុងការរួមសុខរួមទុក្ខជាមួយរាជរដ្ឋាភិបាល និងប្រជាជនកម្ពុជា។មួយវិញទៀត ការបណ្តាក់ទុននេះ ក៏ជាការចូលរួមចំណែកយ៉ាងសំខាន់របស់ក្រុមហ៊ុននៅក្នុងការអភិវឌ្ឍសង្គម-សេដ្ឋកិច្ចកម្ពុជា ជាពិសេសនៅក្នុងការជំរុញកំណើនសេដ្ឋកិច្ចឡើងវិញក្រោយពីវិបត្តិនៃជំងឺកូវីដ-១៩។លោក ហ៊ុន ម៉ាណែត បានលើកឡើងទៀតថា ទីក្រុងបាវិត ជាមជ្ឈមណ្ឌលផលិតកម្ម ដែលបានស្រូបយកកម្លាំងពលកម្មដ៏ច្រើនសន្ធឹកសន្ធាប់ និងគ្រប់ផ្នែកគ្រប់វិស័យ ហើយក៏អាចត្រូវបានចាត់ទុកជានិមិត្តរូបនៃការអភិវឌ្ឍរីកចម្រើននៅក្នុងប្រទេសកម្ពុជាផងដែរ ខណៈក្រុងបាវិតនេះមានតំបន់សេដ្ឋកិច្ចពិសេសជាច្រើន ដោយក្នុងនេះមានរោងចក្រសរុបចំនួន១៧៨ និងបានផ្តល់ការងារជូនដល់ប្រជាពលរដ្ឋប្រមាណជាង៩ម៉ឺននាក់ ដែលពិតជាខុសស្រឡះពីការភ័ន្តច្រឡំមួយចំនួនដែលយល់ថា ទីក្រុងបាវិតជាទីក្រុងនៃសេវាកម្មកាស៊ីណូ។ជាមួយគ្នានោះដែរលោកបណ្ឌិត ហ៊ុន ម៉ាណែត បានលើកឡើងផងដែរថាក្នុងរយៈពេលប្រមាណជាងពីរទសវត្សរ៍ចុងក្រោយនេះ កម្ពុជាបានក្លាយជាគោលដៅសំខាន់មួយនៃការវិនិយោគផ្ទាល់ពីបរទេស (FDI)ដែលជាកត្តានាំឱ្យកម្ពុជាស្ថិតក្នុងចំណោមប្រទេសដែលមានកំណើនសេដ្ឋកិច្ចលឿនជាងគេនៅក្នុងសកលលោក ជាមួយនឹងអត្រាកំណើនជាមធ្យមប្រមាណជាង ៧% ក្នុងមួយឆ្នាំ។ អត្រាកំណើនដ៏ខ្ពស់នេះ បានធ្វើឱ្យកម្ពុជាផ្លាស់ប្តូរឋានៈពីប្រទេសចំណូលទាប ទៅជាប្រទេសចំណូលមធ្យមកម្រិតទាបចាប់តាំងពីឆ្នាំ២០១៥ និងបានជួយឱ្យប្រជាជនកម្ពុជាបានងើបចេញពីភាពក្រីក្រ ដោយអត្រាភាពក្រីក្រនៅកម្ពុជាបានធ្លាក់ចុះពីប្រមាណ ៥៣% ក្នុងឆ្នាំ២០០៤ មកត្រឹម ១៧,៨ % ប៉ុណ្ណោះក្នុងឆ្នាំ២០២០។ ជោគជ័យដ៏ត្រចះត្រចង់នេះ គឺមិនមែនបានមកដោយចៃដន្យនោះទេ ប៉ុន្តែជាលទ្ធផលនៃកិច្ចខិតខំប្រឹងប្រែង និងការសម្រេចចិត្តដ៏ត្រឹមត្រូវជាពិសេសការដាក់ចេញនូវគោលនយោបាយឈ្នះ-ឈ្នះ របស់រាជរដ្ឋាភិបាលកម្ពុជា ក្រោមការដឹកនាំប្រកបដោយចក្ខុវិស័យវែងឆ្ងាយ និងភាពប្រាកដនិយម របស់ សម្តេចតេជោ នាយករដ្ឋមន្ត្រីដែលបានបញ្ចប់សង្គ្រាមស៊ីវិល និងសម្រេចបាននូវសន្តិភាពពេញលេញនៅទូទាំងផ្ទៃប្រទេស។ លោក បន្ថែមទៀតថា សម្រាប់ពេលបច្ចុប្បន្ន និងបន្តទៅមុខ រាជរដ្ឋាភិបាល បាននិងកំពុងបង្កើនកិច្ចខិតខំប្រឹងប្រែងបង្កើតលក្ខខណ្ឌអំណោយផលបន្ថែមទៀតសម្រាប់ការនាំចេញ និងការទាក់ទាញការវិនិយោគផ្ទាល់ពីបរទេស ជាពិសេសមកកាន់តំបន់សេដ្ឋកិច្ចពិសេស ដោយដាក់ចេញនូវវិធានការសំខាន់ៗមួយចំនួនរួមមាន៖ ការអនុម័តច្បាប់វិនិយោគថ្មីសំដៅលើកកម្ពស់ការប្រកួតប្រជែង និងលើកទឹកចិត្តដល់វិនិយោគិនឱ្យបណ្តាក់ទុន និងធ្វើប្រតិបត្តិការអាជីវកម្មនៅកម្ពុជា តាមរយៈការផ្តល់នូវការលើកទឹកចិត្តជាច្រើនជាពិសេសការអនុគ្រោះផ្នែកសារពើពន្ធ និងការពង្រឹងភាពធន់នៃសេដ្ឋកិច្ចជាតិតាមរយៈការបង្កើនសមត្ថភាព និងជំនាញបច្ចេកទេសវិជ្ជាជីវៈរបស់កម្លាំងពលកម្ម ក៏ដូចជាសហគ្រាសក្នុងស្រុក ដើម្បីឱ្យក្លាយជាសសរទ្រូង និងមូលដ្ឋានគ្រឹះដ៏រឹងមាំនៃការអភិវឌ្ឍសង្គម-សេដ្ឋកិច្ច ហើយកិច្ចការទាំងនេះ ពិតជាត្រូវការជាចាំបាច់នូវការចូលរួមរបស់តំបន់សេដ្ឋកិច្ចពិសេស, ក្រុមហ៊ុនជាតិ និងអន្តរជាតិ រួមទាំងបងប្អូនកម្មករ-និយោជិត ដែលសុទ្ធសឹងជាដៃគូដ៏សំខាន់បម្រើឱ្យគោលដៅនេះ៕អត្ថបទ៖ បាន ចក់

កិច្ចព្រមព្រៀងពាណិជ្ជកម្មសេរី កម្ពុជា-កូរ៉េ អាចចូលជាធរមាននៅខែវិច្ឆិកា

ភ្នំពេញ៖ ក្រសួងពាណិជ្ជកម្ម បញ្ជាក់ថា កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ នឹងអាចចូលជាធរមាននៅ៦០ថ្ងៃ ពោលគឺនៅខែវិច្ឆិកាខាងមុខ បន្ទាប់ពីរដ្ឋាភិបាលកូរ៉ ជូនដំណឹងផ្លូវការមកកម្ពុជា។កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ ត្រូវបានរដ្ឋសភាកូរ៉េផ្តល់សច្ចាប័នរួចរាល់ហើយ កាលពីថ្ងៃទី ២៧ ខែកញ្ញា ឆ្នាំ ២០២២។ ឯកឧត្តម ប៉ែន សុវិជាតិ អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម លើកឡើងនៅថ្ងៃទី៣០ ខែកញ្ញានេះថា បន្ទាប់ពីសភាកូរ៉េផ្តល់សច្ចាប័នរួចហើយ រដ្ឋាភិបាលកូរ៉េនឹងធ្វើការជូនដំណឹង (Notification) ដល់កម្ពុជា។ ៦០ ថ្ងៃបន្ទាប់ពីការជូនដំណឹងនេះ កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ នឹងត្រូវចូលជាធរមាន។បច្ចុប្បន្នការនាំចេញទំនិញរបស់កម្ពុជាទៅកាន់សាធារណរដ្ឋកូរ៉េ រួមមានផលិតផលកសិផលដូចជា ម្រេច, ចេក, គ្រាប់ស្វាយចន្ទី, ដំឡូង, ម្នាស់, ដូង, កាហ្វេ, ផ្លែឈើ, ពោត, ,មៀន, ថ្នាំជក់, សាច់, ទំនិញវារីវប្បកម្ម កសិផលកែច្នៃដូចជា ស្ករស, ស្ករអំពៅ, សំបុកត្រចៀកកាំ, អាហារកែច្នៃពីអង្ករ កៅស៊ូធម្មជាតិ, សំលៀកបំពាក់, វាយនភណ្ឌ, ស្បែកជើង, កង់, សម្ភារៈធ្វើដំណើរ - កាបូបយួរ, គ្រឿងបង្គុំ, គ្រឿងបន្លាស់, និងទំនិញឧស្សាហកម្មមួយចំនួនទៀត។ចំណែកទំនិញដែលកម្ពុជានាំចូលពីកូរ៉េវិញរួមមាន សម្ភារៈអេឡិចត្រូនិក, រថយន្ត, គ្រឿងចក្រសំរាប់បម្រើឱ្យវិស័យសំណង់ និងវិស័យកសិកម្ម, វត្ថុធាតុដើមក្រណាត់ និង ស្បែកកែច្នៃ, ផលិតផលរក្សាសម្ផស្ស, អាហារ- គ្រឿងទេស, សម្ភារៈសំណង់, គ្រឿងបន្លាស់ ជាដើម។ កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ នេះ ត្រូវបានចុះហត្ថលេខាជាផ្លូវការ កាលពីថ្ងៃទី២៦ ខែតុលា ឆ្នាំ២០២១ ហើយជាកិច្ចព្រមព្រៀងពាណិជ្ជកម្មសេរីទ្វេភាគីទីពីរ បន្ទាប់ពីកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ចិន បានចូលជាធរមាន កាលខែមករា ឆ្នាំ២០២២ ស្របពេលកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ដែលមានការចូលរួមប្រទេសចំនួន១៥ ។ សូមជម្រាបថា ទំហំពាណិជ្ជកម្មទ្វេភាគីកម្ពុជា-កូរ៉េមានប្រមាណ ៥៥០លានដុល្លារ ក្នុងរយៈពេល ៨ខែដំបូងឆ្នាំ ២០២២នេះ។ ក្នុងនោះការនាំចេញទំនិញកម្ពុជា ទៅប្រទេសកូរ៉េ មានតម្លៃជាង ១៥៦លានដុល្លារ ខណៈកូរ៉េនាំទំនិញចូលកម្ពុជាវិញមានតម្លៃជាង ៣៩៣លានដុល្លារ។ នេះបើតាមស្ថិតិជញ្ជីងពាណិជ្ជកម្មរបស់អគ្គនាយកដ្ឋាយគយ និងរដ្ឋាករកម្ពុជា៕អត្ថបទ៖ វណ្ណៈ

រាជរដ្ឋាភិបាល នឹងបន្ថែមថវិកាក្នុងគម្រោងសហហិរញ្ញប្បទាន ដើម្បីទ្រទ្រង់សហគ្រាសក្នុងស្រុក

ភ្នំពេញ៖ ធនាគារសហគ្រាសធុនតូច និងមធ្យមកម្ពុជា នឹងបន្តអនុវត្តគម្រោងសហហិរញ្ញប្បទានជាមួយធនាគារដៃគូ ដើម្បីជួយទ្រទ្រង់ដល់សហគ្រាសក្នុងស្រុក ពង្រឹងនិងពង្រីកខ្លួនក្នុងអាជីវកម្មបន្ថែម ។លោក នៀវ សុគន្ធ នាយកប្រតិបត្តិប្រតិបត្តិការនៃធនាគារសហគ្រាសធុនតូច និងមធ្យមកម្ពុជា លើកថា SME Bank សង្កេតឃើញថា ខ្សែច្រវ៉ាក់ផលិតកម្មនៅក្នុងស្រុក មានការរីកចម្រើនច្រើន សម្រាប់ការផលិតចែកចាយនៅលើទីផ្សារ ដោយធ្វើឲ្យផលិតកម្មរបស់ពួកគាត់ដំណើរដោយរលូន ជាពិសេសតាមរយៈនៃវិស័យនេះផងដែរ បានស្រូបយកកំលាំងពលកម្មជាច្រើន ដែលជាផ្នែកមួយជួយលើកកម្ពស់ ផលិតភាព នៃផលិតផលក្នុងស្រុក និងវិស័យការងារផងដែរ។លោក បន្តថា កន្លងមកនេះ ធនាគារសហគ្រាសធុនតូច និងមធ្យមកម្ពុជា បានអនុវត្តគម្រោងសំខាន់ចំនួនពីរគឺ ក្នុងនោះគម្រោងសហហិរញ្ញប្បទានជាមួយធនាគារដៃគូរ មានចំនួន ៣គម្រោងរួចហើយ ។ ចំណែកគម្រោងទី២ គឺការផ្តល់ឥណទានដោយផ្ទាល់ពីធនាគារសហគ្រាសធុនតូច និងមធ្យមកម្ពុជា ជូនដល់អតិថិជនគោលដៅ ជាពិសេសអតិថិជនស្ថិតនៅក្នុងវិស័យកែច្នៃម្ហូបអាហារ ការកែច្នៃសម្ភារៈប្រើប្រាស់ផ្សេងៗ នឹងទៅពេលខាងមុខ គម្រោងទាំងពីរនេះនឹងបន្ត ផ្តល់ថវិកាបន្ថែម ដើម្បីទ្រទ្រងផល់ផលិតកម្មក្នុងស្រុកឲ្យកាន់តែរីកចម្រើន។សូមបញ្ជាក់ថា ជាង២ឆ្នាំមកនេះ ធនាគារសហគ្រាសធុនតូច និងមធ្យមកម្ពុជា បានអនុវត្តគម្រោង៣ រួចមកហើយ មានទំហំទឹកប្រាក់សរុប ៣៩០ លានដុល្លារអាមេរិក ក្នុងនោះគម្រោងសហហិរញ្ញប្បទានទី១ មានទំហំទឹកប្រាក់ ១០០ លានដុល្លារ ចំណែកគម្រោងទី២ មានទំហំទឹកប្រាក់ ១៤០ លានដុល្លារ និងគម្រោងទី៣ បានកំពុងអនុវត្ត មានទំហំទឹកប្រាក់ ១៥០ លានដុល្លារ ដើម្បីជួយគាំទ្រ និងស្តារសម្មភាពអាជីវកម្មនៅក្នុងវិស័យទេសចរណ៍ គិតមកដល់បច្ចុប្បន្ន គម្រោងនេះទើបទម្លាក់ថវិការអស់ប្រមាណ ១៦ ទៅ ១៧% ៕អត្ថបទ៖ សុន រ៉ាឌី

កោះទន្សាយទាក់ទាញទេសចរទៅកម្សាន្តច្រើនជាងមុន ក្រោយពេលមានកំពង់ផែថ្មី

ខេត្តកែប៖ រមណីយដ្ឋានកោះទន្សាយ របស់ខេត្តកែប កាន់តែទាក់ទាញភ្ញៀវទេសចរ ឱ្យទៅសម្រាកលម្ហែកម្សាន្ត ច្រើនជាងមុន ក្រោយពេលកំពង់ផែថ្មី ត្រូវបានដាក់ឲ្យប្រើប្រាស់។ អ្នកលក់សំបុត្រទូក បានឱ្យដឹងថា ចាប់តាំងពីថ្ងៃកាន់បិណ្ឌ រហូតដល់ថ្ងៃភ្ជុំបិណ្ឌ ភ្ញៀវជាតិ ពិសេសភ្ញៀវបរទេសទៅកម្សាន្តច្រើនជាងមុន។អ្នកលក់សំបុត្រទូកជូនភ្ញៀវទេសចរ ទៅលេងរមណីយដ្ឋានកោះទន្សាយ លោក សុគន្ធ បានប្រាប់ឲ្យដឹងថា ចាប់តាំងពីមានមកំពង់ផែកោះទន្សាយថ្មីមក ភ្ញៀវបានទៅកម្សាន្តកោះ មិនដែលដាច់ទេ ហើយយ៉ាងហើយណាស់ ភ្ញៀវឆៀងចូលមកថតរូបនៅកំពង់ផែកោះទន្សាយនេះដែរ ធ្វើឲ្យកិត្តិនាមតំបន់រមណីយដ្ឋានកោះទន្សាយកាន់តែល្បី មានគេស្គាល់ច្រើន។ ជាក់ស្ដែងសម្រាប់ពិធីបុណ្យ កាន់បិណ្ឌ និងភ្ជុំបិណ្ឌ ហើយរហូតមកដល់ព្រឹកថ្ងៃទី ២៧ ខែកញ្ញានេះ ក៏នៅតែមានភ្ញៀវមកលេងច្រើនដែរ។ ភ្ញៀវទេសចរមកពីខេត្តតាកែវ លោក ប៊ុន ថា បានប្រាប់ឲ្យដឹងថា លោកទើបបានស្គាល់ និងទៅលេងរមណីយដ្ឋានកោះទន្សាយបានម្តងគត់ ពេលបានទៅហើយ ក៏ជាប់ចិត្ត ទើបថ្ងៃនេះនាំក្រុមគ្រួសារទៅកម្សាន្តទាំងអស់គ្នា។ លោក បានបញ្ជាក់ថា ទីនោះមានទេសភាពស្អាត ការរៀបចំបរិស្ថានអនាម័យល្អ ឆ្នេរស្អាតមានទឹកថ្លា មានខ្ជុះ មានគ្រែដេកលើមាត់ឆ្នេរជាដើម ចំណែកតម្លៃសមរម្យ មិនថាថ្ងៃធម្មតា ឬថ្ងៃបុណ្យទាន់ គ្មានការដំឡើងតម្លៃទេ។កោះទន្សាយត្រូវបានរាជរដ្ឋាភិបាលផ្តល់សិទ្ធិវិនិយោគឲ្យទៅក្រុមហ៊ុនទ្រីភាពធ្វើការអភិវឌ្ឍលើវិស័យទេសចរណ៍មួយភាគធំ ប៉ុន្តែនៅរក្សាទុកតំបន់ឆ្នេរកម្សាន្តចាស់ សម្រាប់ឲ្យប្រជាពលរដ្ឋ និងភ្ញៀវទេសចរទៅលំហែកម្សាន្តដដែល ហើយគេជឿថា ក្រោយពេលក្រុមហ៊ុនបើកឲ្យដំណើរការសេវាកម្មរបស់ខ្លួន ភ្ញៀវមានជីវភាពកម្រិតល្អបង្គួរ និងកម្រិតខ្ពស់ កាន់តែទៅកម្សាន្តច្រើនជាងនេះទៅទៀត៕អត្ថបទ៖ អន សារឹម

បណ្ដាញសង្គម

ព័ត៌មានថ្មីៗ

សហភាពអឺរ៉ុបថ្កោលទោស «ការវាយប្រហារភេរវកម្ម» នៅក្នុងប្រទេសម៉ាលី

សាធារណជនគាំទ្រគំនិតផ្ដួចផ្ដើមរបស់សម្តេចធិបតីឱ្យបញ្ជូនក្រុមក្មេងទំនើងទៅជួយការងារសមរភូមិមុខ

បារាំងជួយសង្គ្រោះជនអន្តោប្រវេសន៍ចំនួន ១១៩នាក់ ដែលកំពុងព្យាយាមឆ្លងសមុទ្រទៅកាន់អង់គ្លេស

UN៖ រថយន្តដឹកជំនួយនៅស៊ូដង់ ត្រូវរងការវាយប្រហារដោយយានដ្រូន

មនុស្សយ៉ាងតិច ៤០នាក់ បានស្លាប់ ក្នុងអំពើហិង្សាសហគមន៍ នៅប្រទេសឆាដ

កម្ពុជា-ចិន ពង្រឹងកសាងសមត្ថភាពវិស័យទេសចរណ៍ ដើម្បីសែ្វងរកគំនិតច្នៃប្រឌិតអភិវឌ្ឍន៍ទីផ្សារទេសចរណ៍ចិនមកកម្ពុជា

ក្រសួងទេសចរណ៍ និងមជ្ឈមណ្ឌលអាស៊ាន-ចិន បញ្ជាក់ពីឆន្ទៈសហការរួមគ្នាជំរុញកំណើនភ្ញៀវទេសចរចិនមកកម្ពុជា ឱ្យកាន់តែច្រើនឡើង

យុវជនគាំទ្រការដាក់ឱ្យអនុវត្តច្បាប់កាតព្វកិច្ចយោធា ដែលជាមូលដ្ឋានគ្រឹះកសាងកម្លាំងស្នេហាជាតិ ការអប់រំ និងវិន័យ

រដ្ឋសភាកម្ពុជា បង្ហាញសមិទ្ធផល «បរិវត្តកម្មយេនឌ័រ» ក្នុងកិច្ចប្រជុំគណៈកម្មាធិការសម្របសម្រួលសមាជិកសភាស្ត្រីអាយប៉ា (WAIPA) លើកទី៥

កម្ពុជាចូលរួមអនុម័ត «សេចក្តីថ្លែងការណ៍ទីក្រុងមែលប៊ន» ដើម្បីពង្រឹងសិទ្ធិសុខភាពបន្តពូជ និងសមភាពយេនឌ័រ ក្នុងវេទិកាកម្រិតខ្ពស់រវាងរដ្ឋមន្ត្រី និងសមាជិកសភា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877