នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ធនាគារជាតិ ដាក់ឱ្យប្រើប្រាស់ប្រព័ន្ធវដ្តករសាស្រ្តហិរញ្ញវត្ថុ ដើម្បីបង្កើនការយល់ដឹងដល់ភាគីពាក់ព័ន្ធ
គិតត្រឹមត្រីមាសទី១ឆ្នាំនេះ សហគ្រាស ក្រុមហ៊ុន រោងចក្រនៅកម្ពុជា កើនដល់ជាង ៤៧ ០០០ សហគ្រាស ខណៈចំនួនកម្មករនិយោជិតកើនឡើងដល់ប្រមាណ ២,៣លាននាក់
ត្រីមាសទី១ឆ្នាំនេះ កម្ពុជានាំចេញកង់ មានទឹកប្រាក់ជាង ២០១ លានដុល្លារ កើនឡើងជិត ៤៤%
រោងចក្រ វិរៈ ប៊ុនថាំ ជីកសិកម្ម មានសមត្ថភាពផលិតបានប្រមាណ ២០០តោន ក្នុង​មួយ​ថ្ងៃ​សម្ពោធ​ដាក់​ឱ្យដំណើរការជាផ្លូវការ

សេដ្ឋកិច្ច និង កសិកម្ម

អ្នកទេសចរជិត១ម៉ឺននាក់ មកសម្រាកលំហែរកាយនៅខេត្តមណ្ឌលគិរី អំឡុងពេលភ្ជុំបិណ្ឌ

2022/09/27 03:00:24 pm        515
Facebook Telegram Linkin
មណ្ឌលគិរី៖ រយៈពេល៣ថ្ងៃ គិតចាប់ពីថ្ងៃទី២៤ ដល់ថ្ងៃទី២៦ ខែកញ្ញា ជាថ្ងៃឈប់សម្រាកឱកាស​បុណ្យ​ភ្ជុំបិណ្ឌ ​ខេត្តមណ្ឌលគិរីដែលជាគោលដៅទេសចរណ៍ដ៏ល្បីមួយរបស់ប្រទេសកម្ពុជា ដែលមានយ៉ាងច្រើនចូលមកលេងកម្សាន្ត ស្របពេលដែលអាកាសធាតុមិនសូវអំណោយផល ដោយមានភ្លៀងធ្លាក់ច្រើន ​អំឡុងពេលទេសចរដើរកម្សាន្ត ។លោកស្រី ម៉ី សារឹម ប្រធានស្ដីទី មន្ទីរទេសចរណ៍ខេត្តមណ្ឌលគិរី ​បានប្រាប់BTVថា ៣ថ្ងៃឱកាស​បុណ្យភ្ជុំបិណ្ឌ មណ្ឌលគិរីទាក់ទាញអ្នកទេសចរណ៍បានជិត ១ម៉ឺននាក់ ​ក្នុងនោះ ទេសចរជាតិ ៩,៦២៧នាក់ (ឆ្នាំ២០២១ ទេសចរជាតិសរុប ២៣,០២០នាក់) ចំណែកទេសចរបរទេស សរុប ២២២នាក់ (ឆ្នាំ២០២១ ទេសចរបរទេសសរុប ៣០៣នាក់) ។ តួលេខនេះ ទេសចរជាតិ ថយចុះ ៥៨,១៧% រីឯទេសចរបរទេសថយចុះ ២៦,៧៣% ។លោកស្រី ម៉ី សារឹម បញ្ជាក់ថា​ មូលហេតុនៃការថយចុះ ដោយសារឆ្នាំនេះនៅរដូវវស្សា​មាន​ភ្លៀង​ធ្លាក់​ច្រើន​នៅទូទាំង​ប្រទេសភ្ញៀវទេសចរ​ពិបាកដើរកំសាន្ត ​ភ្ញៀវភាគច្រើន​ទៅលេងស្រុកកំណើត​ដែល​មានចម្ងាយផ្លូវជិត ​អាចពាក់ព័ន្ធនឹងការចំណាយច្រើន ​និង​កត្តា​ផ្សេងៗ​ទៀត ។ ចំណែកស្ថានភាពសន្តិសុខសណ្តាប់ធ្នាប់គឺមានភាពល្អប្រសើរជាធម្មតា ។គួរ​រម្លឹក​ដែរ​ថា​ ទោះបី​ជា​អាកាសធាតុមិនសូវអំណោយ​ផល​ល្អដល់​ភ្ញៀវទេសចរ ក្នុង​ដំណើរ​កម្សាន្ត​អំឡុង​ពេលភ្ជុំបិណ្ឌនេះ​ ប៉ុន្តែសម្រាប់ខេត្តមណ្ឌលគិរីចាប់ពីថ្ងៃទី២៤ កញ្ញា ​បាន​សម្គាល់ឃើញថា មាន​អ្នកទេសចរមួយចំនួនបានធ្វើដំណើរ​មក​ដល់ក្រុងសែម​នោរម្យ ​និងបាន​ទៅទស្សនា​តាម​រមណីយដ្ឋាន​ទេសចរណ៍នានា ​ស្របពេលកំពុងមានភ្ញៀងរលឹមផងដែរ ។រមណីយដ្ឋានដែលភ្ញៀវបានធ្វើដំណើរទៅទស្សនាច្រើន​ មានដូចជាទឹកជ្រោះប៊ូស្រា ​ភ្នំដោះក្រមុំ និងសមុទ្រជាដើម ​ហើយផ្អែកតាមការសង្កេតជាក់ស្ដែង ចំនួនភ្ញៀវទេសចរមិនសូវច្រើនប៉ុន្មានទេ បើធៀប​និងអំឡុងពេលមុនៗដែលភ្ញៀវសម្រុកចូលមកលេងច្រើននា​ឱកាស​បុណ្យទាន ប៉ុន្តែ​ចំនួននេះអាចវាយតម្លៃល្អប្រសើរហើយ ​បើធៀបក្នុងអំឡុងពេលប៉ុន្មានឆ្នាំចុងក្រោយ ដែល​ខេត្តមណ្ឌលគិរី​ និងប្រទេសកម្ពុជា​បានរងគ្រោះព្រោះកូវីដ១៩ ៕ អត្ថបទ៖ អ៊ិត ភីរុណ

World Bank ព្យាករណ៍កំណើនសេដ្ឋកិច្ចកម្ពុជា ៤.៨ភាគរយ ក្នុងឆ្នាំ២០២២ និង ៥.២ ភាគយឆ្នាំក្រោយ

2022/09/27 02:44:41 pm        618
Facebook Telegram Linkin
ភ្នំពេញ៖ ធនាគារពិភពលោក (World Bank) ព្យាករណ៍ថា កំណើន GDP ​ពិតប្រាកដ​របស់​កម្ពុជា​ត្រូវបាន​ព្យាករណ៍​ថា នឹងឈានដល់ ៤.៨ ភាគរយនៅឆ្នាំ ២០២២។ កត្តា​ជំរុញ​កំណើន​ដែលផ្តោត​លើការនាំចេញតាមបែបប្រពៃណី​ ជាពិសេសវិស័យកាត់ដេរ ​ស្បែកជើង ផលិតផលធ្វើដំណើរ និងឧស្សាហកម្មផលិតកង់ ​ក៏ដូចជាកសិកម្ម ​នៅតែបន្តគាំទ្រការងើបឡើងវិញនៃសេដ្ឋកិច្ច។នៅឆ្នាំ ២០២៣ កំណើនសេដ្ឋកិច្ចត្រូវបានគេរំពឹងថា នឹងប្រសើរឡើងដល់ ៥.២ភាគរយ​ដែល​ត្រូវបាន​គាំទ្រ​ដោយការស្ទុះងើបឡើងវិញ នៃការប្រើប្រាស់ក្នុងស្រុក ខណៈដែលអត្រាការងារមានភាព​ប្រសើរឡើង​រួមជាមួយការប្រើប្រាស់របស់រដ្ឋាភិបាលខ្លាំងក្នុងអំឡុងពេលបោះឆ្នោត ហើយ​អតិផរណាបានធ្លាក់ចុះ។នេះបើយោងតាមរបាយការណ៍ធនាគារពិភព​លោកចេញផ្សាយ​នៅថ្ងៃទី២៧ ខែកញ្ញានេះ។​វិស័យទេសចរណ៍ និង​បដិសណ្ឋារកិច្ច​ ត្រូវ​បាន​គេ​រំពឹង​ថា ​នឹង​មាន​ការ​ជំរុញ​ដោយ​ការ​ងើប​ឡើង​វិញ​នៃ​តម្រូវ​ការ​ក្នុង​ស្រុក ​និង​ទេសចរណ៍។ សមតុល្យសារពើពន្ធត្រូវបាន​ព្យាករណ៍​ថា នឹងបន្តធ្វើឱ្យ​មាន​លក្ខណៈធម្មតានៅលើផ្ទៃខាងក្រោយនៃកំណើនដ៏រឹងមាំ​ ស្ថិរភាព និងកម្រិតបំណុល។ភាពក្រីក្រ ត្រូវបានគេរំពឹង ថានឹងធ្លាក់ចុះដោយសារតែការស្តារសេដ្ឋកិច្ច​ដែលបានព្យាករណ៍ និង​អតិផរណាកម្រិតមធ្យម។ទោះជាយ៉ាងណាក៏ដោយ ទស្សនវិស័យរយៈពេលមធ្យម​គឺស្ថិតនៅក្រោមហានិភ័យ​នៃការធ្លាក់ចុះ​នៃបរិស្ថានពិភពលោក។​ការផលិតដែលផ្តោតលើការនាំ​ចេញរបស់កម្ពុជាគឺងាយរងគ្រោះទៅ​​នឹង​ការធ្លាក់ចុះជាបន្តបន្ទាប់នៅក្នុងសហរដ្ឋអាមេរិក ​និងការធ្លាក់ចុះនៃរចនាសម្ព័ន្ធនៅក្នុងប្រទេសចិន។ដូចគ្នានេះដែរ ប្រសិនបើតម្លៃថាមពលកើនឡើងកាន់តែយូរ ភាពយ៉ាប់យ៉ឺននៃលក្ខខណ្ឌ​ពាណិជ្ជកម្ម​នឹងធ្វើឱ្យប៉ះពាល់ដល់ទំនុក​ចិត្តអ្នកប្រើប្រាស់ ​ប្រាក់ចំណេញសាជីវកម្ម និងអាចរារាំងសេដ្ឋកិច្ចមិន​យឈាន​ដល់​កំណើន​សក្តានុពលនៅ​ឆ្នាំ ២០២៤ ៕ អត្ថបទ៖ វណ្ណៈ 

ភ្ញៀវទេសចរអន្តរជាតិ លើកឡើងថា កម្ពុជាជាប្រទេសមានភាពទាក់ទាញក្នុងតំបន់អាស៊ាន

2022/09/27 01:00:21 pm        531
Facebook Telegram Linkin
ភ្នំពេញ៖ ក្នុងឱកាសបណ្តាប្រទេសលើពិភពលោក ប្រារព្ធ​ទិវាទេសចរណ៍ពិភពលោកឆ្នាំ ២៧ កញ្ញា ឆ្នាំ២០២២នេះ ភ្ញៀវទេសចរអន្តរជាតិដែលទស្សនានៅកម្ពុជា លើកឡើងថា កម្ពុជា ជាប្រទេសទេសចរណ៍ មានភាពទាក់ទាញខ្លាំងនៅក្នុងតំបន់អាស៊ាន។ក្រុមភ្ញៀវទេសចរអន្តរជាតិ ដែលបានដើរកម្សាន្តតាមតំបន់ឆ្នេរនៅកម្ពុជា បានថ្លែងថា ប្រទេសកម្ពុជា មានគោលដៅទេសចរណ៍ជាច្រើន មានភាពទាក់ទាញខ្លាំងដែលទេសចរបរទេសចង់ទស្សនា។ លើសពីនេះ ​មិនត្រឹមតែមានវប្បធម៍ចំណាស់នោះទេ​ ប្រជាជននៅកម្ពុជា គឺមានភាពរួសរាយ​រាក់ទាក់ ​ចេះជួយគ្នា ​និងធ្វើឲ្យទេសចរមកទស្សនាកម្ពុជា មានភាពកក់ក្តៅ។ឯកឧត្តម តុប សុភ័ក រដ្ឋលេខាធិការដ្ឋាន​ និងជាអ្នកនាំពាក្យក្រសួងទេសចរណ៍ បានថ្លែងថា ទិវា​ទេសចរណ៍ពិភពលោក២៧ កញ្ញា ឆ្នាំ២០២២នេះ មានការ​ប្រារព្ធ​ធំនៅប្រទេសឥណ្ឌូនេស៊ី ហើយរដ្ឋមន្ត្រីទេសចរណ៍កម្ពុជា កំពុងអញ្ជើញចូលរួមកម្មវិធីនោះដែរ។ យ៉ាងណាក៏ដោយតាមរយៈការ​ប្រារព្ធ​ទិវា​នេះ ឯកឧត្តម តុប សុភ័ក បានលើកឡើងថា កម្ពុជាបាន​និង​កំពុងប្តេជ្ញាចិត្តជម្រុញអភិវឌ្ឍគោលដៅទេសចរណ៍ឲ្យមានគុណភាព​ មានសុវត្ថិភាព មាន​ជំនឿទុកចិត្ត និងមានភាពទាក់ទាញប្រកបដោយភាពច្នៃប្រឌិត។នៅថ្ងៃនេះដែរ សម្តេចតេជោ ហ៊ុន សែន ​នាយករដ្ឋមន្ត្រីព្រះរាជាណាចក្រកម្ពុជា បានចេញសារ​លិខិត​អបអរសាទរទិវាទេសចរណ៍ពិភពលោក​ ២៧កញ្ញានេះដែរ​ ដោយបានកំណត់ថា ឆ្នាំ២០២២នេះ ​ជាឆ្នាំដំបូង ​ស្ថិតក្នុងដំណាក់កាលនៃការងើបឡើងវិញ នៃវិស័យទេសចរណ៍កម្ពុជា ។ព្រមជាមួយគ្នានេះសម្តេចតេជោ ហ៊ុន សែន បាន​អំពាវនាវឱ្យមានការចូលរួមឱ្យបានផុសផុល​បន្ថែមទៀត​ ដើម្បីស្តារវិស័យទេសចរណ៍កម្ពុជា​ ទាំងទៅលើទិដ្ឋភាពគុណភាព ​និងបរិមាណ ប្រកប​ដោយនិរន្តរភាព ប​រិយាប័ន្ន ដើម្បីឱ្យការអភិវឌ្ឍបានជាផ្លែផ្កាទៅគ្រប់ភាគីពាក់ព័ន្ធ៕ អត្ថបទ៖ ស៊ុមសុខជា 

សកម្មភាពអាជីវកម្មនៅរាជធានីភ្នំពេញ ចាប់ផ្តើមលក់ដូរឡើងវិញ បន្ទាប់ពីឈប់សម្រាក៣ថ្ងៃមក

2022/09/27 12:51:13 pm        458
Facebook Telegram Linkin
ភ្នំពេញ៖ ក្រុមអាជីវករតាមបណ្តាផ្សារតូច ធំៗ នៅរាជធានីភ្នំពេញ បានចាប់ផ្តើមប្រកបរបរ​អាជីវកម្ម​លក់​ដូរឡើងវិញហើយ បន្ទាប់ពីឈប់សម្រាករយៈពេល ​៣ថ្ងៃ​ ក្នុងឱកាសភ្ជុំបិណ្ឌ ហើយពួកគាត់រំពឹង​លក់ដាច់ដូចមុន ​បន្ទាប់ពីប្រជាពលរដ្ឋបានត្រឡប់មករាជធានីភ្នំពេញ​អ៊ូអរ​ដូចមុន។ក្រុមអាជីវករជាច្រើននៅរាជធានីភ្នំពេញ ​លើកឡើងនៅក្នុងកិច្ចសម្ភាសន៍​ជាមួយភ្នាក់ងារអ្នក​យក​ព័ត៌មាន BTV នៅថ្ងៃទី ២៧ ខែកញ្ញា ឆ្នាំ២០២២នេះថា ​នៅក្នុងឱកាសឆ្លងភ្ជុំបិណ្ឌ ពួកគាត់បាន​សម្រាក​លក់ដូរ រយៈពេល ៣ថ្ងៃ ដើម្បីចូលរួមអបអរសាទ ​ក្នុងឱកាសភ្ជុំបិណ្ឌប្រពៃណីជាតិ បន្ទាប់​ការបញ្ចប់រយៈពេលបីថ្ងៃមកនេះ ​ ពួកគាត់​បានផ្តើមបើកអាជីវកម្មឡើងវិញ ខណៈដែលប្រពលរដ្ឋ​បានកំពុងវិលត្រឡប់មកពីស្រុកកំណើត​ ចូលមករាជធានីភ្នំពេញវិញ ​នៅក្នុងថ្ងៃនេះ។ពួកគាត់រំពឹងថា ​ការលក់ដូរនឹងលក់ដាច់ជាធម្មតាដូចមុនរដូវភ្ជុំបិណ្ឌ​ ឬអាចលក់ដាច់ល្អប្រសើរជាង ខណៈបច្ចុប្បន្នប្រជាពលរដ្ឋទទួលបានប្រាក់​ចំណូល​សមរម្យ សម្រាប់ជីវភាពរស់នៅ​ប្រចាំថ្ងៃ​របស់ពួកគាត់។ក្នុងរដូវបុណ្យភ្ជុំឆ្នាំនេះ ប្រជាពលរដ្ឋបានចាប់ផ្តើមដើរលេងដូចមុនការរីករាលដាលជំងឺកូវីដ ១៩ ចំណែកសកម្មភាពនៅក្នុងខ្សែច្រវ៉ាក់ផលិតកម្ម ​តាមបណ្តារោងចក្រ ​សហគ្រាសនានា ក៏បាន​កំពុង​ដំណើរការទៅដោយរលូន ឆ្លុះបញ្ចាំង​ពី​ សកម្មភាពក្នុងសេដ្ឋកិច្ចនៅព្រះរាជាណាចក្រកម្ពុជា បានកំពុងងើបរស់រវើកឡើងវិញ៕អត្ថបទ៖ សុន រ៉ាឌី

ប្រព័ន្ធសន្តិសុខសង្គមរបស់រាជរដ្ឋាភិបាល នឹងផ្តល់ទំនុកចិត្តដល់អ្នកដែលស្ថិតនៅក្រោមការគាំពារ

2022/09/23 12:45:10 pm        647
Facebook Telegram Linkin
​ភ្នំពេញ៖ រាជរដ្ឋាភិបាលបង្កើតប្រព័ន្ធសន្តិសុខសង្គម សម្រាប់ជាបង្គោលតម្លាភាព និងប្រសិទ្ធភាព ដើម្បីធានា​ប្រាក់ចំណូលដល់អ្នកដែលស្ថិតនៅក្រោមការគាំពារ ដែលវិសាលភាពនេះ​អាច​ពង្រីក​កាន់ធំឡើងៗ​ ទៅដល់មនុស្សគ្រប់គ្នា ​ក្រោមគម្រោងថវិកា​នៃការចូលរួមបង់វិភាគទាន។ឯកឧត្តមបណ្ឌិត ចន ណារិទ្ធ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និង​ជា​អគ្គនាយក​នៃនិយ័តករសន្តិសុខសង្គម ​លើកឡើងក្នុងសិក្ខាសាលាស្តីពី និយ័តកម្មប្រព័ន្ធសន្តិសុខ​សង្គម​នៅកម្ពុជា នៅថ្ងៃទី ២២ ខែកញ្ញា ឆ្នាំ២០២២ នេះថា ប្រព័ន្ធសន្តិសុខសង្គមនៅកម្ពុជាបានបែងចែក​ជាពីរប្រភេទ គឺប្រព័ន្ធសន្តិសុខសង្គមសម្រាប់កម្មករនិយោជិត ដែលស្ថិតនៅក្រោម​បទប្បញ្ញត្តិ​នៃ​ច្បាប់ការងារ (សម្រាប់វិស័យឯកជន) ​និងប្រព័ន្ធសន្តិសុខសង្គមសម្រាប់មន្រ្តីរាជការ ឬបុគ្គល​ដែល​ស្ថិត​នៅក្នុងវិស័យសាធារណៈ (រដ្ឋបាលសាធារណៈ) ​ក្នុងនោះសម្រាប់វិស័យឯកជន គឺជា​ប្រព័ន្ធ​ឈរលើមូលដ្ឋានបង់វិភាគទានពីនិយោជិកផង ​និងពីនិយោជកផង។ដោយឡែក សម្រាប់របរសន្តិសុខសង្គមថែទាំសុខភាព ​និងផ្នែកហានីភ័យការងារ រាជរដ្ឋាភិបាល​បាន​សម្រេច ដើម្បីជួយសម្រាលបន្ទុកបងប្អូននិយោជិក ​តាមរយៈការបង់វិភាគទាន ដែលជាការ​កត្តាសំខាន់ ​ដើម្បីឲ្យរបរនានានៅក្នុងប្រព័ន្ធសន្តិសុខសង្គមអាចដំណើរការទៅបាន។ឯកឧត្តម ​បន្តឲ្យដឹងថា ​ប្រព័ន្ធសន្តិសុខសង្គម ​មានលក្ខណៈខុសគ្នាពីប្រព័ន្ធជំនួយសង្គម ដោយ​ប្រព័ន្ធ​សន្តិសុខសង្គម ​គឺបានបង្កើតឡើងធ្វើជាបង្គោល​ នៃទំនុកចិត្តដល់ភាគីពាក់ព័ន្ធ ដើម្បីធានា​ប្រាក់​ចំណូលដល់អ្នកដែលស្ថិតនៅក្រោមការគាំពារ ដែលវិសាលភាពនេះអាចពង្រីកកាន់​ធំឡើងៗ​ទៅដល់មនុស្សគ្រប់គ្នា ​ក្រោមថវិកា​នៃការចូលរួមបង់វិភាគទាន ​ដោយការបង់វិភាគទាននេះ គឺជា​បន្ទុករួមគ្នារវាងនិយោជិក និងនិយោជកផង។សូមបញ្ជាក់ថា សិក្ខាសាលា ស្តីពីនិយ័តកម្មប្រព័ន្ធសន្តិសុខសង្គមនៅកម្ពុជា គឺមានសារៈសំខាន់​ណាស់ ដើម្បីផ្សព្វផ្សាយដល់ភាគីពាក់ព័ន្ធ អំពីនិយ័តករសន្តិសុខសង្គម ​ដែលជាផ្នែកមួយនៃអាជ្ញាធរ​សេវាហិរញ្ញវត្ថុមិនមែន​ធនាគារ​ ដល់និយោជក ​និងកម្មករនិយោជិក ​ស្វែងយល់ឲ្យកាន់តែស៊ីជម្រៅ ក៏ដូចជា​ការផ្សព្វផ្សាយអនុក្រិត្យ ​ស្តីពីការធ្វើនិយ័តកម្មប្រព័ន្ធ​សន្តិសុខសង្គម ដែលនឹងត្រូវ​អនុវត្ត​ដោយនិយ័តករសន្តិសុខសង្គម ​ឲ្យបានកាន់តែទូលាយជូនដល់ភាគីពាក់ព័ន្ធ អំពីកិច្ចដំណើរ​នៃ​និយ័តករ​សន្តិសុខសង្គមនេះ៕អត្ថបទ៖ សុន រ៉ាឌី

វិនិយោគិន​កូរ៉េ ​សម្លឹង​ឃើញ​កាលានុវត្តភាព​នៃ​ការវិនិយោគ និង​នាំចេញ​ទំនិញ​ពី​កម្ពុជា​កាន់តែច្រើន​

2022/09/22 01:08:16 pm        729
Facebook Telegram Linkin
ភ្នំពេញ៖ វិនិយោគិន​កូរ៉េ​ ​ចាប់អារម្មណ៍​កាន់តែ​ច្រើន​ចំពោះ​កាលានុវត្តភាព​នៃ​ការ​វិនិយោគ និង​នាំចេញ​ទំនិញ​ពី​កម្ពុជា​ទៅ​ទីផ្សារ​ប្រទេស​កូរ៉េ បាន​កាន់តែ​ច្រើន។គណៈប្រតិភូសមាគមន៍អ្នកនាំចូលកូរ៉េ (Korea Importers Association - KOIMA) ​ដឹកនាំដោយ លោក KIM Byung Kwan, ប្រធានសមាគមន៍អ្នកនាំចូលកូរ៉េ និងជាប្រធានអគ្គនាយកក្រុមហ៊ុន Bronte Family Ltd បាន​ស្វែងយល់ពីឱកាសពាណិជ្ជកម្ម និងធុរកិច្ចនៅកម្ពុជា។ឯកឧត្តម កឹម ស៊ីថន រដ្ឋលេខាធិការប្រចាំការ ក្រសួងពាណិជ្ជកម្ម បានអញ្ជើញទទួលជួប​គណៈប្រតិភូ​សមាគមន៍អ្នកនាំចូលកូរ៉េ (Korea Importers Association - KOIMA) ដឹកនាំដោយ លោក KIM Byung Kwan, ប្រធានសមាគមន៍អ្នកនាំចូលកូរ៉េ ​និងជាប្រធានអគ្គនាយកក្រុមហ៊ុន Bronte Family Ltd. នៅព្រឹកថ្ងៃទី១៩ ខែកញ្ញា ឆ្នាំ២០២២។ថ្លែងក្នុងមតិស្វាមគមន៍ ឯកឧត្តម កឹម ស៊ីថន រដ្ឋលេខាធិការប្រចាំការ ​បានគូសបញ្ជាក់ថា ចំពោះការ​អញ្ជើញ​មកទស្សនកិច្ចស្វែងយល់ និងចាប់យកនូវកាលានុវត្តភាពសេដ្ឋកិច្ច ​និងពាណិជ្ជកម្ម របស់ លោក Kim Byung Kwan ប្រធានសមាគម​អ្នកនាំចូលកូរ៉េ និងគណៈប្រតិភូ នៅព្រះរាជាណាចក្រ​កម្ពុជា និយាយជារួម​ នឹងជួយឱ្យ គណៈប្រតិភូ ជ្រាបច្បាស់ថែមទៀតពីសក្តានុពលរបស់កម្ពុជា នាពេលបច្ចុប្បន្ន។ឯកឧត្តម លើកទឹកចិត្តដល់គណៈប្រតិភូសមាគមន៍អ្នក​នាំចូលកូរ៉េ ប្រើប្រាស់នូវកិច្ចព្រមព្រៀង​ពាណិជ្ជកម្ម​សេរីតំបន់ ​និងដៃគូសេដ្ឋកិច្ច ដែលកម្ពុជាជាសមាជិក ​ជាពិសេស កិច្ចព្រមព្រៀងភាព​ជាដៃគូសេដ្ឋកិច្ចគ្រប់ជ្រុងជ្រោយតំបន់ RCEP, កិច្ចព្រមព្រៀងពាណិជ្ជកម្មសេរីអាស៊ាន-កូរ៉េ និង​កិច្ចព្រមព្រៀង​ពាណិជ្ជកម្មសេរីទ្វេភាគីកម្ពុជា-កូរ៉េ (CKFTA) ជាដើម។លោក KIM Byung Kwan បានជម្រាបជូនថា ​សហគមន៍​អ្នកនាំចូលកូរ៉េ ​បង្កើតឡើងនៅឆ្នាំ១៩៧២ គិតមកទល់ពេលនេះ​មានអាយុកាល៥២ ឆ្នាំ ហើយមានក្រុមហ៊ុនជាសមាជិកចំនួន ៨៣០០ ក្រុមហ៊ុន​ ដែលកំពុងធ្វើប្រតិបត្តិការអាជីវកម្មលើវិស័យចំណីអាហារ ​គ្រឿងបន្លាស់ Software គ្រឿងសម្អាង វត្ថុធាតុដើម វាយនភណ្ឌ កសិកម្ម និងសេវាកម្មជាដើម។ សហគមន៍អ្នកនាំចូលកូរ៉េ ក៏បានប្រទេសជាដៃគូចំនួន ៦៩ និងមានទំនាក់ទំនងជិតស្និទជាមួយស្ថាទូតនៃ​ប្រទេសនានា​ប្រចាំសាធារណរដ្ឋកូរ៉េ ចំនួន១០៤ ផងដែរ៕អត្ថបទ៖ វណ្ណៈ 

ការផលិត និងវេចខ្ចប់ទំនិញក្នុងស្រុក កំពុងមមាញឹកឡើងវិញ បន្ទាប់ពីវិបត្តិកូវីដកាន់តែធូស្រាល

2022/09/21 01:47:58 pm        582
Facebook Telegram Linkin
ភ្នំពេញ៖ ប្រធានក្រុមប្រឹក្សាភិបាល (FASMEC) ថា បន្ទាប់ពីស្ថានភាពជំងឺកូវីដ-១៩ កាន់តែមាន​ភាព​ល្អប្រសើរ សម្រាប់ការផលិត និងវេចខ្ចប់​ នៅក្នុងសហគ្រាសធុនតូច និងមធ្យម បានកំពុង​ដំណើរការ​ខ្សែច្រវ៉ាក់ផលិតកម្មប្រព្រឹត្តទៅដោយរលូន ​ខណៈការផ្គត់ផ្គង់ និងចែកចាយផលិតផល​ទាំងនេះ កំពុងមានតម្រូវការនៅលើទីផ្សារ។លោកឧកញ៉ា តែ តាំងប៉ ប្រធានក្រុមប្រឹក្សាភិបាលនៃសម្ព័ន្ធសមាគម​សហគ្រាសធុនតូច និងមធ្យម​កម្ពុជា (FASMEC) លើកឡើងក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន​ BTV ស្តីពីការ​អភិវឌ្ឍ​ខ្សែច្រវ៉ាក់ផលិតកម្មនៅក្នុងសហគ្រាសធុនតូច​ និងមធ្យម និងការ​ផ្គត់ផ្គង់​ផលិតផល​វេចខ្ចប់​នៅតាមទីផ្សារថា, នៅក្នុងស្ថានភាពនៃវិបត្តិជម្ងឺកូវីដ ១៩​ ស្របពេលប្រទេសមានការបិទខ្ទប់ អាជីវកម្ម​ជាច្រើនត្រូវបានផ្អាក ស្របពេលជីវភាពរស់នៅរបស់ប្រជាជន​ក៏មានកម្រិត ក្នុងនោះ​សម្រាប់ការផលិត និងវេចខ្ចប់ ​នៅក្នុងខ្សែច្រវ៉ាក់ផលិតកម្ម ​សហគ្រាសធុនតូច ​និងមធ្យមវិញ ក៏បាន​ថមថយចុះផងដែរ ខណៈការចែកចាយ ​និងលក់ដូរនៅតាមទីផ្សារមានការធ្លាក់ចុះ។លោកឧកញ៉ា លើកឡើងបន្តថា ​រាជរដ្ឋាភិបាលកម្ពុជាបានចាត់ទុកវិស័យសហគ្រាសធុនមីក្រូ តូច និងមធ្យម ជាមូលដ្ឋានដ៏សំខាន់មួយសម្រាប់អភិវឌ្ឍន៍​សេដ្ឋកិច្ចជាតិ និងសង្គម ​ពី​ព្រោះវិស័យនេះ​ មាន​ លក្ខណៈអន្តរសកម្មភាពច្រើន ងាយបត់បែន និងសម្របខ្លួនបានយ៉ាងឆាប់រហ័ស ទៅ​តាមកាលៈទេសៈនៃការអភិវឌ្ឍបច្ចេកវិទ្យា ជាក់ស្តែងបន្ទាប់ពីស្ថានភាពវិបត្តិជំងឺកូវីដ ១៩ បានធូរស្រាល, មកដល់ពេលនេះ ផលិតកម្មនៅក្នុងសហគ្រាសធុនតូច ​និងមធ្យម បានកំពុង​ដំណើរនៅក្នុងខ្សែច្រវ៉ាក់ផលិតកម្មយ៉ាងមមាញឹក​ សម្រាប់ការផលិត ​និងវេចខ្ចប់។ ចំណែក​ការផ្គត់ផ្គង់ទំនិញតាមទីផ្សារវិញ ​មកដល់បច្ចុប្បន្ន ផលិតផលដែលវេចខ្ចប់ក្នុងស្រុក បាន​កំពុងហូរចូលទៅកាន់ទីផ្សារកាន់តែច្រើនឡើងៗ​ ដោយបានធ្វើឲ្យចំនួននៃការលក់ ​ក៏បានកើនឡើង និងមានប្រសើរជាងមុន។ជុំវិញវិស័យ SME, បើតាមរបាយការណ៍ក្រសួងឧស្សាហកម្ម វិទ្យាសាស្ត្រ បច្ចេកវិទ្យា ​និងនវានុវត្តន៍ បានបង្ហាញឲ្យដឹងថា, គិតត្រឹមខែ កក្កដា ក្នុងឆ្នាំ ២០២២ នេះ ​សហគ្រាសធុនតូច មធ្យម និង​សិប្បកម្ម បានចុះបញ្ជីនៅក្រសួង មានចំនួនប្រមាណជិត ​៤៤ ពាន់មូលដ្ឋាន ដោយ​មានទុនវិនិយោគជាង ៧៥៦ ​លានដុល្លាអាមេរិក ​និងបានបង្កើតការងារជិត ​៥០ម៉ឺនកន្លែង។ ចំពោះបញ្ហានេះ ក្រសួងឧស្សាហកម្ម​ វិទ្យាសាស្ត្រ ​បច្ចេកវិទ្យា និងនវានុវត្តន៍ បានកំពុង​ជម្រុញ​លើកទឹកចិត្ត ឲ្យមានការកែច្នៃផលិផលកសិកម្ម ​ឬផលិតផលផ្សងៗទៀត ដើម្បី​បង្កើត​តម្លៃបន្ថែមនៅក្នុងផលិតផលឲ្យកាន់តែច្រើន៕អត្ថបទ៖ សុន រ៉ាឌី

កម្ពុជារកចំណូលបាន ៣០០លានដុល្លារពីការនាំចេញកៅស៊ូ ក្នុងរយៈពេល៨ខែដំបូង

2022/09/21 01:28:57 pm        556
Facebook Telegram Linkin
ភ្នំពេញ៖ កម្ពុជា​រក​ចំណូល​សរុបបាន ៣០០លាន​ដុល្លារ​ពី​ការ​នាំ​ចេញ​កៅស៊ូ​ស្ងួត ​អំឡុង​ពេល ៨ខែ​ដើម​ឆ្នាំ២០២២ នេះ​បើ​តាម​របាយការណ៍​ផ្លូវការ​កាលពី​ថ្ងៃ​ទី២០ ខែកញ្ញានេះ ។របាយការណ៍ពីអគ្គនាយកដ្ឋានកៅស៊ូ បានបង្ហាញថា កម្ពុជាបាននាំចេញកៅស៊ូស្ងួតចំនួន ១៩៤,០១៤ តោនក្នុង អំឡុងខែមករាដល់ខែសីហាឆ្នាំនេះ ពោលគឺកើនឡើង ១ភាគរយធៀបនឹងរយៈពេលដូចគ្នាកាលពីឆ្នាំមុន។របាយការណ៍ បានបន្តថា ប្រទេសកម្ពុជា រកចំណូលបាន ៣០០ លានដុល្លារពីការនាំចេញ​ទំនិញ​ក្នុងរយៈពេល ៨ខែឆ្នាំនេះ ធ្លាក់ចុះ ៦.៤ ភាគរយបើធៀបនឹងឆ្នាំមុន។ឯកឧត្តម ហ៊ឹម អូន អគ្គនាយកនៃអគ្គនាយកដ្ឋាន​កៅស៊ូ​ បាននិយាយនៅក្នុងរបាយការណ៍ថា កៅ​ស៊ូ​ស្ងួត​មួយតោនមានតម្លៃជាមធ្យម $១,៥៥៣ ក្នុងអំឡុងពេល៨ខែដំបូងនៃឆ្នាំ២០២២ ​ប្រហែល ១១៩ដុល្លារ ​ទាបជាងរយៈពេលដូចគ្នាកាលពីឆ្នាំមុន ។យោង​តាម​អគ្គនាយកដ្ឋាន​កៅស៊ូ នៅ​កម្ពុជា​បច្ចុប្បន្ន​មាន​ដី​ដាំ​កៅស៊ូ​សរុប ៤០៤ ០៤៤​ ហិកតា ក្នុង​នោះ​ផ្ទៃដី​កំពុង​ចៀរជ័រ ​ចំនួន ៣១០ ១៩៣ ​ហិកតា ​និង​​ផ្ទៃដី​ថែទាំ​​ចំនួន ៩៣ ៨៥១ ​​ហិកតា​។ ជ័រ​កៅស៊ូ​ពី​ខែ​មករា-ខែ​សីហា ឆ្នាំ​ ២០២២ មាន​តម្លៃ​ជា​មធ្យម​​ ១ ៥៥៣​ ដុល្លារ​ក្នុង​ ១​ តោន​ ថយចុះ ១១៩ ​​​ដុល្លារ​ ឬ​​ស្មើ​នឹង -៧ ​ភាគរយ​ធៀប​រយៈពេល​ដូចគ្នា​ឆ្នាំ​ ២០២១។កាលពី​ឆ្នាំ​ ២០២១ កម្ពុជា​ប្រមូល​ផល​ជ័រ​កៅស៊ូ​បាន​ចំនួន ៣៦៨ ០០០ ​តោន ក្នុង​នោះ​នាំចេញ​ទៅ​ទីផ្សារ​អន្តរជាតិ ​៣៦៦ ០០០ ​តោន ​រក​​​​ចំណូល​បាន ៦១០ ២៥៥ ៨០០ ​ដុល្លារ។​នេះ​​បើ​​តាម​ទិន្នន័យ​អគ្គនាយកដ្ឋាន​កៅស៊ូ៕អត្ថបទ៖ វណ្ណៈ 

និយ័តករបរធនបាលកិច្ច លើកកម្ពស់ការយល់ដឹងដល់ SME សម្រាប់ការធ្វើធុរកិច្ច និងការវិនិយោគ

2022/09/20 12:48:26 pm        558
Facebook Telegram Linkin
ភ្នំពេញ៖ និយ័តករបរធនបាលកិច្ចផ្សព្វផ្សាយ និងលើកកម្ពស់ការយល់ដឹងជាសាធារណៈ ដល់សហគ្រាសធុនតូច និងមធ្យម និងជម្រុញការចូលរួមក្នុងវិស័យបរធនបាលកិច្ច សម្រាប់ការធ្វើធុរកិច្ច និងការចាប់គូរជាវិនិយោគិនមានសក្តានុពលនានា តាមយន្តការនៃបរធនបាលកិច្ច។ឯកឧត្តម សុខ ដារ៉ា អគ្គនាយកនិយ័តករបរធនបាលកិច្ច នៃអាជា្ញធរសេវាហិរញ្ញវត្ថុមិនមែនធនាគារ លើកឡើងនៅក្នុងកម្មវិធីចុះអនុស្សរណៈយោគយល់គ្នា រវាងនិយ័តករបរធនបាលកិច្ច និង​សម្ព័ន្ធសមាគម​សហគ្រាសធុនតូច ​និងមធ្យមកម្ពុជា (FASMEC) ស្តីពីកិច្ចសហប្រតិបត្តិការ​លើកកម្ពស់ការយល់ដឹងជាសាធារណៈ និងជំរុញការចូលរួមក្នុងវិស័យបរធនបាលកិច្ច នៅព្រះរាជាណាចក្រកម្ពុជា នៅថ្ងៃ១៩ ខែកញ្ញា ឆ្នាំ ២០២២ ។អនុស្សារណៈយោគយល់គ្នានៅពេលនេះ មានសារៈសំខាន់ណាស់ សម្រាប់ការពង្រឹងកិច្ច​សហប្រតិបត្តិការ ​ដើម្បីត្រឹមខ្លួនទាញយកផលប្រយោជន៍នៅក្នុងបរធនបាលកិច្ច ក្នុងនោះ​សម្រាប់ជំហាន​ដំបូង គឺការជម្រុញបណ្តុះបណ្តាល ​និងផ្សព្វផ្សាយ ក៏ដូចជាការឆ្លើយតបរាល់​សំណូមពរពាក់ព័ន្ធ ​នៃដំណើរចុះបញ្ជីបរធនបាលកិច្ច ក្នុងគោលដៅសម្រេចឱ្យបាននូវការយល់​ដឹងកាន់តែទូលំទូលាយ​ នៅក្នុងវិស័យបរធនបាលកិច្ច ក៏ដូចជាវិស័យមូលបត្រទាំងមូល។ លោកឧកញ៉ា តែ តាំងប៉ ប្រធានក្រុមប្រឹក្សាភិបាល នៃសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) លើកឡើងថា ​មានម្ចាស់សហគ្រាសធុនតូច ​និងមធ្យមកម្ពុជាជាច្រើន មិនទាន់យល់អំពីវិស័យបរធនបាលកិច្ច ដូច្នេះតាមរយៈសម្ពន្ធ័សហគ្រាសធុនតូច និងមធ្យមកម្ពុជា គឺចង់ឲ្យSME​ទាំងអស់គ្នាបានយល់ និងចូលរួម ​ព្រោះវិស័យបរធនបាលកិច្ច និងតាមរយៈសេវា​ហិរញ្ញវត្ថុមិនមែនធនាគារ មានតួនាទីគ្រប់គ្រង មើលថែរក្សា ​ឬចាត់ចែកទ្រព្យសម្បត្តិរបស់បុគ្គល ឬក្រុមហ៊ុនណាមួយ​ សម្រាប់ជាប្រយោជន៍ដល់យើងទាំងអស់គ្នា ។ឯកឧត្តម សុខ ដារ៉ា អគ្គនាយកនៃនិយ័តករបរធនបាលកិច្ច ថ្លែងឲ្យដឹងថា គិតត្រឹមចុងឆ្នាំនេះ ឬដើមឆ្នាំក្រោយ ​បរធនបាលកិច្ច នឹងមានទំហំបរធន កើនឡើងក្នុងរង្វង់ប្រមាណជា ​៦០០ លានដុល្លារ​អាមេរិក ខណៈបច្ចុប្បន្ននិយ័តករបរធនបាលកិច្ច កំពុងពិនិត្យ ​និងវាយតម្លៃ នៃការ​ចុះបញ្ជីបរធនបាលកិច្ច មានចំនួនប្រមាណជាង​ ៥០០ សំណើរបន្ថែមទៀត៕ អត្ថបទ៖ សុន រ៉ាឌី

ទំនាក់ទំនងការទូត និងប្រព័ន្ធអនុគ្រោះពន្ធ ធ្វើឲ្យការនាំចេញទៅអាមេរិកមានកំណើនល្អ

2022/09/16 03:16:17 pm        533
Facebook Telegram Linkin
ភ្នំពេញ៖ អ្នកជំនាញសេដ្ឋកិច្ច ថា គោលនយោបាយការបរទេសរបស់កម្ពុជា ដែលមានទំនាក់​ទំនង​ការ​ទូតល្អជាមួយ សហរដ្ឋអាមេរិក បានកំពុងធ្វើឲ្យសហរដ្ឋអាមេរិកបានដើរតួនាទីយ៉ាងសំខាន់ សម្រាប់ទីផ្សារនាំចេញរបស់កម្ពុជា ​និងស្របពេលដែលប្រទេសមួយនេះ ​បានបន្តផ្តល់ GSP លើមុខទំនិញមួយចំនួន ​នៃការនាំចេញរបស់កម្ពុជា។ ឯកឧត្តមបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា ថ្លែងលើកឡើង នៅ​ថ្ងៃទី ១៦ ខែកញ្ញា ឆ្នាំ២០២២ នេះថា ការធ្វើពាណិជ្ជកម្មរវាងប្រទេសទាំងពីរ មានលក្ខណៈខុស​គ្នា ខណៈទីផ្សារអាមេរិក ​បានផ្តោតសំខាន់លើផលិតកម្មនៃឧស្សាហកម្មធុនធ្ងន់ និងការផលិតទំនិញ​ដែលមានបច្ចេកវិទ្យាខ្ពស់ជាដើម​ ខណៈកម្ពុជាផលិតនូវសម្លៀកបំពាក់ ស្បែកជើង និងកាបូប​សម្រាប់​ធ្វើដំណើរ ​និងផលិតផលកសិកម្មជាដើម​ ដែលបច្ចុប្បន្នធ្វើឲ្យផលិតផលទាំងនេះ កំពុង​ហូរចូល​ទៅកាន់ទីផ្សារអាមេរិកមានកំណើនល្អប្រសើរ។ឯកឧត្តម បន្តថា ចំពោះកត្តាដែលធ្វើឲ្យទំនិញកម្ពុជា​ នាំចេញទៅកាន់សហរដ្ឋអាមេរិកមានកំណើន គួរជាទីកត់សម្គាល់នេះ ​គឺបានកើតចេញពីទំនាក់ទំនង​រវាងប្រទេសទាំងពីរ ជាពិសេស​គោល​នយោបាយ ការបរទេស​ របស់កម្ពុជា ​ដែលមានទំនាក់ទំនងការទូតល្អជាមួយសហរដ្ឋអាមេរិក ក្នុងនោះ​ចំពោះការធ្វើពាណិជ្ជកម្ម, ​សហរដ្ឋអាមេរិកបានដើរតួនាទីយ៉ាងសំខាន់ និងបានកំពុង​បន្តផ្តល់ GSP ដល់ ​ទំនិញមួយចំនួន ​សម្រាប់ទីផ្សារ ​នាំចេញរបស់កម្ពុជា។លោក លឹម តុង ប្រធានសមាគមផលិតផលធ្វើដំណើរ ​និងស្បែកនៅកម្ពុជា ​ថ្លែងឲ្យដឹងថា នៅ​ក្នុងឆមាសទី១ ឆ្នាំ ២០២២​ ខ្សែច្រវ៉ាក់ផលិតកម្មនៅក្នុងស្រុក ​បាន​មមាញឹក​យ៉ាងខ្លាំង និង​បាន​ស្រូប​យក​កំលាំង​ពលកម្មបន្ថែមយ៉ាង ​ច្រើន​នៅតាមរោងចក្រនីមួយៗ ​ខណៈដែល​មាន​ការបញ្ជា​មាន​ចំនួនច្រើន ជាពិសេសពីផ្សារសហរដ្ឋអាមេរិក ​និងសហគមន៍អឺរ៉ុបជាដើម ​ប៉ុន្តែនៅក្នុងឆមាសទី២ នេះ ចំណែកការផលិតហាក់ដូចជានៅទ្រឹង​ នឹងមិនមានការថែមម៉ោងច្រើនដូចមុនឡើយ ស្រប​ពេលការបញ្ជាទិញមានចំនួនថមថយចុះ។សូមបញ្ជាក់ថា គិតត្រឹមរយៈពេល ៨ ខែ ឆ្នាំ ២០២២ ការធ្វើពាណិជ្ជកម្មនាំចេញទំទិញ​របស់កម្ពុជា មាន​ទំហំទឹកប្រាក់ប្រមាណជាង ១៥,៦ ​ពាន់លានដុល្លារ កើនឡើងជាង ២៦% បើធៀបរយៈពេល​ដូចគ្នា​ទៅឆ្នាំ ២០២១ ក្នុងនោះសម្រាប់ការនាំចេញទៅកាន់ទីផ្សារអាមេរិក ​មានទំហំជាង ៦,៤ ពាន់លានដុល្លារ កើនឡើងជាង ៣៧% ខណៈការនាំចូលពីសហរដ្ឋអាមេរិក មានត្រឹម ២២៤ លានដុល្លារ ថយចុះជាង ៣% ​បើធៀបរយៈពេលដូចគ្នាទៅឆ្នាំ ២០២១៕អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

ផែនការបញ្ចប់សង្គ្រាមរបស់អ៊ីរ៉ង់ មាន ៣ដំណាក់កាល ខណៈភាពតានតឹងនៅច្រកសមុទ្រ Hormuz កើនឡើង
04/27/2026 04:04 PM
Facebook Telegram Linkin
លោក Trump ពិពណ៌នាអំពីការបាញ់ប្រហារថា ជាភស្តុតាងនៃអំណាចប្រធានាធិបតីរបស់លោក
04/27/2026 04:04 PM
Facebook Telegram Linkin
ក្រសួងការងារ ចុះដោះស្រាយភ្លាមៗនូវការទាមទាររបស់បងប្អូនកម្មករ រោងចក្រ អឹមអិល ដោយគិតគូរពីអត្ថប្រយោជន៍របស់បងប្អូនកម្មករជាអាទិភាព
04/27/2026 04:04 PM
Facebook Telegram Linkin
ហេសបូឡា៖ កងទ័ពអ៊ីស្រាអែល នៅភាគខាងត្បូងលីបង់ ត្រូវបានវាយប្រហារដោយមីស៊ីលប្រឆាំងរថក្រោះ
04/27/2026 04:04 PM
Facebook Telegram Linkin
មេដឹកនាំអ៊ុយក្រែន រិះគន់ការវាយប្រហាររបស់រុស្ស៊ីនៅឆ្នាំ២០២៥ លើរោងចក្រថាមពលនុយក្លេអ៊ែរ Chornobyl
04/27/2026 04:04 PM
Facebook Telegram Linkin
របាយការណ៍៖ អ៊ីរ៉ង់ផ្តល់ឲ្យអាមេរិកនូវសំណើបើកច្រកសមុទ្រ Hormuz និងពន្យារការចរចានុយក្លេអ៊ែរ
04/27/2026 04:04 PM
Facebook Telegram Linkin
ប្រជាជនអ៊ីរ៉ង់សង្ឃឹមសម្រាប់សន្តិភាព ប៉ុន្តែទទូចឱ្យការពារផលប្រយោជន៍ជាតិ ខណៈការចរចាជាមួយអាមេរិកជាប់គាំង
04/27/2026 04:04 PM
Facebook Telegram Linkin
អ៊ីរ៉ង់៖ អ្នកស្លាប់ជាជនស៊ីវិលមានដល់៤៥ភាគរយក្នុងសង្គ្រាមរយៈពេល៤០ថ្ងៃជាមួយអ៊ីស្រាអែល និងអាមេរិក
04/27/2026 03:04 PM
Facebook Telegram Linkin
សារព័ត៌មាន៖ អ៊ីរ៉ង់និយាយថា សហរដ្ឋអាមេរិកត្រូវតែបញ្ឈប់ការគំរាមកំហែង ដើម្បីបន្តកិច្ចចរចាឡើងវិញ
04/27/2026 03:04 PM
Facebook Telegram Linkin
រដ្ឋមន្ត្រីការបរទេសអ៊ីរ៉ង់៖ ជំនួបជាមួយលោក Putin «នឹងជាឱកាសល្អដើម្បីពិភាក្សាពីការវិវឌ្ឍនៃសង្គ្រាម»
04/27/2026 03:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.