BTV NEWS

ប្រតិបត្តិការការទូទាត់តាម QR Code នៅកម្ពុជា កំពុងពេញនិយមសម្រាប់អ្នកប្រើប្រាស់

ឯកឧត្តម ឌិត ទីណា លើកទឹកចិត្តសហគមន៍ និងក្រុមហ៊ុនបន្តស្មារតីសាមគ្គីភាព ដើម្បីទទួលផលចំណេញទាំងអស់គ្នាថែមទៀត

កម្ពុជា និងកូរ៉េ រួមគ្នាជំរុញការកាត់បន្ថយឧស្ម័នផ្ទះកញ្ចក់តាមរយៈការវិនិយោគមធ្យោបាយដឹកជញ្ជូន-អគ្គិសនី ឆ្ពោះទៅគោលដៅអព្យាក្រឹតកាបូនឆ្នាំ២០៥០

កសិករខេត្តកំពង់ធំជិតពីររយគ្រួសារទទួលផលចំណេញច្រើនក្រោយចងក្រងជាសហគមន៍កសិកម្មទំនើប

សេដ្ឋកិច្ច និង កសិកម្ម

កម្ពុជាទទួលចំណូលជាង ៩៩លានដុល្លារ ពីការនាំចេញជ័រកៅស៊ូ និងឈើកៅស៊ូ នៅត្រីមាសទី១ ឆ្នាំ២០២២

ភ្នំពេញ៖ នៅត្រីមាសទី១ ឆ្នាំ២០២២នេះ កម្ពុជាទទួលបានចំណូលជាង ៩៩លានដុល្លារ ពីការនាំចេញជ័រកៅស៊ូ និងឈើកៅស៊ូ។របាយការណ៍អគ្គនាយកដ្ឋានកៅស៊ូ ចេញផ្សាយនៅថ្ងៃទី១៨ ខែមេសា ឆ្នាំ២០២២ បានបញ្ជាក់ថា ចំណូលសរុបគិតត្រឹមត្រីមាសទី១ ឆ្នាំ២០២២ ពីការនាំចេញជ័រកៅស៊ូ និងឈើកៅស៊ូ មានចំនួន ៩៩,១៤៦,៩៧០ដុល្លារ ក្នុងនោះ ចំណូលពីការនាំចេញជ័រកៅស៊ូ ចំនួន៩៨,៥៦០,២៧០ដុល្លារ និងចំណូលពីការនាំចេញឈើកៅស៊ូ ចំនួន៥៨៦,៧០០ដុល្លារ។ចំពោះបរិមាណនៃការនាំចេញគិតត្រឹមត្រីមាសទី១ ឆ្នាំ២០២២ កម្ពុជាបាននាំចេញជ័រកៅស៊ូ ចំនួន ៦១,៨៣៩តោន កើនឡើងចំនួន៧៨៣តោន ស្មើនឹង១% ធៀបនឹងរយៈពេលដូចគ្នានៃឆ្នាំមុន។ រីឯការនាំចេញឈើកៅស៊ូវិញ សម្រេចបានចំនួន៨៣៦ម៉ែត្រគូប កើនឡើង៣.៤៧%។សម្រាប់តម្លៃលក់ជ័រកៅស៊ូមធ្យម គិតត្រឹមត្រីមាសទី១ ឆ្នាំ២០២២ ថ្លៃ១,៥៩៤ដុល្លារ ក្នុងមួយតោន បានថយចុះចំនួន៤២ដុល្លារ ក្នុងមួយតោន ស្មើនឹង០.៣% ធៀបនឹងរយៈពេលដូចគ្នានៃឆ្នាំមុន។គិតត្រឹមត្រីមាសទី១ ឆ្នាំ២០២២ ផ្ទៃដីកៅស៊ូសរុបមានចំនួន ៤០៤,០៤៤ហិកតា ក្នុងនោះ ផ្ទៃដីចៀរជ័រមានចំនួន ៣១០,១៩៣ហិកតា ស្មើនឹង៧៧% និងផ្ទៃដីថែទាំមានចំនួន ៩៣,៨៥១ហិកតា ស្មើនឹង២៣%។ គូសបញ្ជាក់ថា នៅឆ្នាំ២០២១ កម្ពុជារកចំណូលបានជាង ៦១១លានដុល្លារ ពីការនាំចេញជ័រកៅស៊ូ និងឈើកៅស៊ូ ។ ក្នុងនោះ នាំចេញជ័រកៅស៊ូ ចំនួន៣៦៦,៣០០តោន និងនាំចេញឈើកៅស៊ូ ចំនួន ៤៥៤ម៉ែត្រគូប៕

កម្ពុជានាំចេញវិស័យកាត់ដេរ មានទំហំទឹកប្រាក់ជាង ៣,១ ប៊ីលានដុល្លារអាមេរិក

ភ្នំពេញ៖ ទំហំនៃការនាំចេញផលិតផលកាត់ដេរ ក្នុងត្រីមាសដំបូងឆ្នាំ ២០២២ មានចំនួនទឹកប្រាក់ប្រមាណជា ៣ ១៥៥ លានដុល្លារអាមេរិក កើនឡើងជាង ៦២៧ លានដុល្លារអាមេរិក ស្មើនឹង ២៤.៨% បើធៀបរយៈពេលដូចគ្នានៅឆ្នាំ ២០២១។ អគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ បានបង្ហាញតួរលេខបានឲ្យដឹងថា នៅក្នុងត្រីមាសទី១ ឆ្នាំ២០២២នេះ ការពាណិជ្ជកម្មក្រៅប្រទេស ក្នុងនោះទំហំនៃការនាំចេញផលិតផលកាត់ដេរ ស្បែកជើង និងផលិផលការបូប គិតជាទឹកប្រាក់សរុប មានចំនួន ៣ ១៥៥ លានដុល្លារអាមេរិក ដោយបានកើនឡើងប្រមាណជាង ៦២៧ លានដុល្លារអាមេរិក បើប្រៀបធៀបទៅរយៈពេលដូចគ្នាក្នុងឆ្នាំ ២០២១ ចំនួននេះបានកើនឡើងជិត ២៥%។ជុំវិញការនាំចេញផលិតផលកាត់ដេរ, លោកកាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជា GMAC លើកឡើងឲ្យដឹងថា នៅក្នុងរយៈពេលកន្លងមកនេះ ការបញ្ជាទិញពីទីផ្សារខាងក្រៅ បានកើនឡើងគួរជាទីកត់សម្គាល់ ក្នុងនោះទីផ្សារដែលលេចធ្លោជាងគេ គឺការនាំចេញនាំទៅកាន់ទីផ្សារអាមេរិក ។ ទាក់ទងនឹងការនាំចេញនេះដែរ លោក បានរំពឹងថា ការនាំចេញផលិតផលកាត់ដេរ នឹងមាននិន្នាការបន្តល្អប្រសើររហូតដល់ដំណាច់ឆ្នាំ។លោក បានបន្តថា បន្ទាប់ពីស្ថានភាពនៃការរីលរាលដាលជំងឺកូវីដ ១៩ នៅកម្ពុជា មានស្ថិរភាពល្អជាបណ្តើរៗ នឹងស្របពេលកម្ពុជាទទួលបានទទួលបានក្រុមហ៊ុនវិនិយោគលើវិស័យកាត់ដេរជាបន្តបន្ទាប់ ក្នុងនោះសម្រាប់ការផលិតនៅទីផ្សារក្នុងស្រុក អាចឆ្លើយតបទៅនិងតម្រូវការនាំចេញបាន តែទោះបីយ៉ាងណា យើងបានជួបបញ្ហាបន្តិចបន្តួច ក្នុងការរើសកម្មករថែម ជាពិសេសសម្រាប់តំបន់ភ្នំពេញជាដើម។ចំណែកលោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ថ្លែងថា ស្របពេលដែលរាជរដ្ឋាភិបាលបានដាក់ចេញច្បាប់ស្តីពីគារវិនិយោគរបស់ព្រះរាជាណាចក្រកម្ពុជា នឹងថ្មីៗនេះ រាជរដ្ឋាភិបាលបាននូវយុទ្ធសាស្រ្តអភិវឌ្ឍន៍វិស័យកាត់ដេរ ផលិតស្បែកជើង និងកាបូបកម្ពុជាបន្ថែមទៀតនោះ, ដែលផែនការសកម្មភាពទាំងអស់នេះ គឺជាផែនទីបង្ហាញផ្លូវ សម្រាប់ជម្រុញអភិវឌ្ឍន៍លើកវិស័យកាត់ដេរ ស្បែកជើង និងកាបូបនៅកម្ពុជា ដែលវិស័យនេះបានផ្តល់អត្ថប្រយោជន៍យ៉ាងសំខាន់ សម្រាប់វិស័យការងារ និងកំណើនសេដ្ឋកិច្ច។សូមបញ្ជាក់ថា យុទ្ធសាស្រ្តអភិវឌ្ឍន៍វិស័យកាត់ដេរ ផលិតស្បែកជើង និងកាបូបកម្ពុជា២០២២-២០២៧ មានចក្ខុវិស័យអភិវឌ្ឍវិស័យកាត់ដេរ, ផលិតស្បែកជើង និងកាបូបនៅកម្ពុជា ឱ្យទៅជាឧស្សាហកម្មដែលមានចីរភាពបរិស្ថាន, មានភាពធន់, មានតម្លៃបន្ថែមខ្ពស់, ផ្តោតលើផលិតផលដែលលក់បានថ្លៃ មានភាពប្រកួតប្រជែងខ្ពស់ និងជាមូលដ្ឋានគាំទ្រពិពិធកម្មសេដ្ឋកិច្ចនៅឆ្នាំ២០២៧។យុទ្ធសាស្រ្ត នេះក៏មានគោលបំណងកំណត់ទិសដៅអភិវឌ្ឍន៍រួម, បង្កើនភាពឯករាជ្យ, ពង្រឹងភាពប៉ាន់ប្រមាណបាន និងស្ថិរភាព ដើម្បីបន្តលើកកម្ពស់ការអភិវឌ្ឍវិស័យនេះ ប្រកបដោយចីរភាព និងបរិយាប័ន្ន ៕អត្ថបទ៖ សុន រ៉ាឌី

ទំហំពាណិជ្ជកម្មកម្ពុជា-វៀតណាម មានចំនួន ៩ប៊ីលានដុល្លារក្នុងឆ្នាំ២០២១

ភ្នំពេញ៖ ទោះបីមានផលប៉ះពាល់ពីជំងឺរាតត្បាតសកលកូវីដ-១៩ ក្ដី ទំហំពាណិជ្ជកម្មនៃប្រទេសកម្ពុជា និងប្រទេសវៀតណាម ក្នុងឆ្នាំ២០២១ មានទំហំជាង៩ ប៊ីលានដុល្លារអាម៉េរិក កើនឡើងប្រមាណ៨០ភាគរយ ប្រៀបធៀបនឹងឆ្នាំ២០២០។ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងឯកឧត្តម ផាម ម៉ិញជីង នាយករដ្ឋមន្ត្រីនៃសាធារណរដ្ឋសង្គមនិយមវៀតណាម បានសម្តែងនូវក្តី សោមនស្សរីករាយ អំពីដំណើរវិវត្ដន៍ជាវិជ្ជ មានក្នុងទំនាក់ទំនងសហប្រតិបត្តិ ការរវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម ក្នុងរយៈពេលកន្លងមក។ទំហំពាណិជ្ជកម្មទ្វេភាគីនេះ នៅបន្តរក្សាបាននូវសន្ទុះកំណើន ជាវិជ្ជមានក្នុងត្រីមាសទី១ ឆ្នាំ២០២២។ សាធារណរដ្ឋសង្គមនិយមវៀតណាម បន្តឈរលំដាប់ទី១ ក្នុងចំណោមប្រទេសអាស៊ាន ចំពោះការវិនិយោគ ដោយផ្ទាល់ ក្នុងព្រះរាជាណាចក្រកម្ពុជា។នេះបើយោងតាមសេចក្តីព័ត៌មាន ចេញផ្សាយកាលពីថ្ងៃទី១២។សម្តេចអគ្គមហាសេនាបតីតេជោ ហ៊ុន សែន និងឯកឧត្តម ផាម ប៊ិញជីង បានសម្តែងនូវក្តី សោមនស្សរីករាយ អំពីដំណើរវិវឌ្ឍជាវិជ្ជមានក្នុងទំនាក់ទំនងសហប្រតិបត្តិការរវាងព្រះរាជាណាចក្រកម្ពុជា និងសាធារណៈរដ្ឋសង្គមនិយមវៀតណាម ក្នុងរយៈពេលកន្លងមក ជាពិសេសទោះបីមានផល ប៉ះពាល់ពីជំងឺរាតត្បាតសកលកូវីដ-១៩ ក្តីក៏ទំហំពាណិជ្ជកម្មនៃប្រទេសទាំងពីរក្នុងឆ្នាំ២០២១ មានទំហំជាង ៩ កោដដុល្លារសហរដ្ឋអាមេរិក កើនឡើងប្រមាណ ៨០ភាគរយ ប្រៀបធៀបនឹងឆ្នាំ២០២០ និងបន្តរក្សាបាននូវសន្ទុះកំណើនជាវិជ្ជមានក្នុងត្រីមាសទី១ ឆ្នាំ ២០២២។ សាធារណៈសង្គមនិយម វៀតណាម បន្តឈរលំដាប់ទី១ ក្នុងចំណោមប្រទេសអាស៊ាន ចំពោះការវិនិយោគដោយផ្ទាល់ ក្នុងព្រះរាជាណាចក្រកម្ពុជា៕ អត្ថបទ៖ វណ្ណៈ

គយនិងរដ្ឋាករ ប្រមូលចំណូលបានជាង ៥៩៧ លានដុល្លារអាមេរិក ក្នុងរយៈពេលបីខែនេះ

ភ្នំពេញ៖ ក្នុងរយៈពេល ៣ខែដើមឆ្នាំនេះ អគ្គនាយកដ្ឋានគយ និងរដ្ឋាករកម្ពុជា ប្រមូលចំណូលបានជាង ២ ៤២៨ ប៊ីលានរៀល ស្មើជាង ៥៩៧ លានដុល្លារអាមេរិក ត្រូវជាប្រមាណ ២៣ ភាគរយ នៃផែនការកំណត់ដោយច្បាប់ ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២២ ។ អគ្គនាយកដ្ឋានគយ និងរដ្ឋាករកម្ពុជា បានបង្ហាញតួរលេខឲ្យដឹង នៅកិច្ចប្រជុំបូកសរុបលទ្ធផលការងារគយ និងរដ្ឋាករប្រចាំត្រីមាសទី១ ឆ្នាំ២០២២ ថ្ងៃទី១២ ខែមេសា ឆ្នាំ២០២២នេះ, សម្រាប់ការប្រមូលចំណូល ក្នុងរយៈពេល ៣ខែ ដើមឆ្នាំ២០២២នេះ អគ្គនាយកដ្ឋានគយ និងរដ្ឋាករកម្ពុជា ប្រមូលចំណូលបានចំនួនជាង ២ ៤២៨ ប៊ីលានរៀល ស្មើនឹងជាង ៥៩៧ លានដុល្លារអាមេរិក ត្រូវប្រមាណ ២៣.២% នៃផែនការកំណត់ដោយច្បាប់ ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២២ ក្នុងនោះបើប្រៀបធៀបនឹងរយៈពេលដូចគ្នាក្នុងឆ្នាំ ២០២១ លទ្ធផលនៃការចំណូលនេះ បានថយចុះជាង ៦១ ប៊ីលានរៀល ដែលត្រូវជាប្រមាណ ២.៥% ។ចំណែកចំណូលតាមប្រភេទពន្ធ និងអាករ ដែលគយ និងរដ្ឋាករប្រមូលបានវិញ រួមមាន៖ អាករលើតម្លៃបន្ថែម មានចំនួនជាង ៩៤៣ ប៊ីលានរៀល ត្រូវជិត ៣៩% នៃចំណូលសរុប, អាករពិសេសមានចំនួនជិត ៨៩៥ ប៊ីលានរៀល ត្រូវជិត ៣៧%, ពន្ធគយមានជាង ៤៣៦ ប៊ីលានរៀល ត្រូវ ១៨%, អាករបន្ថែមលើផលិតផលប្រេងជិត១០១ ប៊ីលានរៀល ត្រូវជាង ៤%, និងអាករនាំចេញ និងកម្រៃផ្សេងៗ មានចំនួនជិត ៥៣ ប៊ីលានរៀល ត្រូវជាង ២% នៃចំណូលសរុប។ ដោយឡែកតួលេខទំហំពាណិជ្ជកម្មរបស់កម្ពុជា៖ ក្នុងរយៈពេល ៣ខែនេះដែរ ធៀបនឹងរយៈពេលដូចគ្នា ក្នុងឆ្នាំ២០២១ មានបម្រែបម្រួលខ្លះៗដូចជា៖ ការនាំចេញផលិតផលកាត់ដេរ មានចំនួន ៣ ១៥៥ លានដុល្លារអាមេរិក កើនឡើងប្រមាណជិត ៦២៧ លានដុល្លារអាមេរិក ស្មើ ២៤.៨%, ការនាំចេញផលិតផលវិនិយោគមិនមែន កាត់ដេរដូចជា៖ កង់ គ្រឿងបំណែកអេឡិចត្រូនិច បង្គុំខ្សែភ្លើង គ្រឿងបន្លាស់រថយន្ត អំពូលលម្អ ផលិតផលពីឈើ ផលិតផលប្លាស្ទិក ស្បែកសត្វកែច្នៃ និងផលិតផលផ្សេងៗទៀត មានចំនួនជិត ១ ២១៣ លានដុល្លារអាមេរិក កើនឡើងជាង ៣៣៥ លានដុល្លារអាមេរិក ស្មើជាង ៣៨%, ការនាំចេញកសិផលសរុបមានតម្លៃជាង ១ ១២៣ លានដុល្លារអាមេរិក កើនឡើងជាង ១០៧ លានដុល្លារអាមេរិក ៕អត្ថបទ៖ សុន រ៉ាឌី

តម្លៃរថយន្តឈ្នួលចាប់ផ្តើមឡើងថ្លៃ ខណៈពិធីបុណ្យចូលឆ្នាំខ្មែរជិតឈានមកដល់

ភ្នំពេញ៖ នៅសល់តែ២ថ្ងៃទៀតប៉ុណ្ណោះ ពិធីបុណ្យចូលឆ្នាំប្រពៃណីជាតិខ្មែរនឹងឈានមកដល់ ។ ក្រុមប្រកបរបររថន្តឈ្នួល រវាងភ្នំពេញ និងបណ្តាខេត្តនានា បានឲ្យដឹងថា តម្លៃឈ្នួលនឹងចាប់ផ្តើមឡើង ចាប់ពីថ្ងៃនេះទៅ ប៉ុន្តែឡើងក្នុងកម្រិតអាចទទួលយកបានចន្លោះពី ៥ពាន់ ដល់១ម៉ឺនរៀល ក្នុងម្នាក់ ដោយសារប្រេង/ហ្គាសឡើងថ្លៃ និងមនុស្សចេញពីភ្នំពេញច្រើន ជាងត្រឡប់មកវិញនៅមុនពិធីឈានដល់។លោក ម៉េង ម្ចាស់រថយន្តឈ្នួលរវាងភ្នំពេញ និងខេត្តកំពង់ធំ បានឲ្យទូរទស្សន៍ព័ត៌មាន ប៊ីធីវី ដឹងនៅព្រឹកថ្ងៃទី១១ ខែមេសានេះថា ជារៀងរាល់ពិធីបុណ្យជាតិធំៗ តម្លៃរថយន្តឈ្នួលតែងតែមានការឡើងថ្លៃ ប៉ុន្តែមិនច្រើនណាស់ណាទេ ជាក់ស្តែងសម្រាប់លោក គឺឡើងថ្លៃចំនួនតែ ១ម៉ឺនរៀល ក្នុងម្នាក់ ដោយសារប្រេងឡើងថ្លៃ និងមូលហេតុមួយទៀតគឺ នៅមុនពិធីឈានដល់ អ្នកធ្វើដំណើរចាកចេញពីភ្នំពេញច្រើនជាងអ្នកត្រឡប់ចូល ហើយក្រោយចប់ពិធីបុណ្យ អ្នកធ្វើដំណើរចូលក្រុងវិញ មានចំនួនច្រើនជាងអ្នកចេញពីក្រុង។ស្រដៀងគ្នានេះ ក្រុមអ្នករត់រថយន្តឈ្នួល (តាក់ស៊ី) ដទៃផ្សេងទៀតស្ថិតនៅម្តុំផ្សារថ្មី រាជធានីភ្នំពេញ បានលើកឡើងថា ការឡើងថ្លៃឈ្នួល មិនមែនចេះតែមាន និងហួសហេតុទេ ជាពិសេសក្នុងអំឡុងនៃវិបត្តិជំងឺឆ្លងកូវីដ១៩នេះ ត្រូវកាត់បន្ថយចំនួនអ្នកជិះ ដើម្បីរក្សាគម្លាត និងទប់ស្កាត់ការឆ្លងរាលដាលជាដើម បន្ទាប់ពីតម្លៃប្រេងកើនឡើង។ពលរដ្ឋដែលត្រៀមចាកចេញពីភ្នំពេញ ទៅស្រុកកំណើតដើម្បីជួបជុំគ្រួសារ សាច់ញាតិ និងដើម្បីប្រារព្ធពិធីបុណ្យចូលឆ្នាំខាងមុខនេះ បាននិយាយថា ការឡើងថ្លៃឈ្នួលរថយន្តក្នុងពិធីបុណ្យទានម្តងៗ គឺអាចទទួលយកបាន ដោយសារការតម្លើងថ្លៃនោះ មិនលើសពី ១ម៉ឺន ឬ ២ម៉ឺនរៀលនោះទេ។សូមបញ្ជាក់ថា បុណ្យចូលឆ្នាំប្រពៃណីជាតិខ្មែរឆ្នាំ២០២២នេះ នឹងប្រព្រឹត្តទៅរយៈពេល ៣ថ្ងៃជាប់គ្នាដូចបណ្តាឆ្នាំមុនៗដែរ គិតចាប់ពីថ្ងៃទី១៤ ១៥ និង១៦ ខែមេសាខាងមុខ៕ អត្ថបទ៖ ឈិត បូរ៉ាវី

អាស៊ានគ្រោងនឹងពង្រីកការតភ្ជាប់ប្រព័ន្ធទូទាត់ឆ្លងដែន មានតម្លៃទាប និងសុវត្ថិភាពខ្ពស់

ភ្នំពេញ៖ ប្រទេសសមាជិកអាស៊ាន គ្រោងនឹងពង្រីកការតភ្ជាប់ប្រព័ន្ធទូទាត់ឆ្លងដែន ជាលក្ខណៈពហុភាគី សម្រាប់តំបន់ដែលអាចធ្វើឱ្យការទូទាត់ ឆ្លងដែន មានប្រតិបត្តិការឆាប់រហ័ស តម្លៃទាប និងសុវត្ថិភាពខ្ពស់។ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា បានធ្វើជាប្រធាននៃកិច្ចប្រជុំរវាងទេសាភិបាលធនាគារកណ្តាល និងនាយកប្រតិបត្តិគ្រឹះស្ថានហិរញ្ញវត្ថុអាស៊ាន តាមរយៈប្រព័ន្ធអនឡាញ នៅថ្ងៃទី ៧ ខែមេសា ឆ្នាំ២០២២ ក្នុងនោះកិច្ចប្រជុំនេះ បានផ្តល់ឱកាសសម្រាប់គ្រឹះស្ថានហិរញ្ញវត្ថុអាស៊ាន បានជួបពិភាក្សា និងផ្លាស់ប្តូរមតិយោបល់ជាមួយអាជ្ញាធររូបិយវត្ថុ និងធនាគារកណ្តាលអាស៊ាន អំពីវឌ្ឍនភាព គំនិតផ្ដួចផ្ដើមថ្មីៗ ក៏ដូចជាបញ្ហាប្រឈមនានា ដើម្បីរួមចំណែកសម្រេចបានសមាហរណកម្មហិរញ្ញវត្ថុនៅក្នុងតំបន់។ចំណែកនៅក្នុងឆ្នាំនេះ កិច្ចប្រជុំបានពិភាក្សាលើប្រធានបទដូចជា៖ ការបច្ចុប្បន្នកម្មការបង្កើតក្របខ័ណ្ឌអន្តរប្រតិបត្តិការ ការទូទាត់ឆ្លង ដែនតាម QR កូត អាស៊ាន និងការលើកកម្ពស់ការតភ្ជាប់ហិរញ្ញវត្ថុក្នុងតំបន់អាស៊ាន ក្នុងគោលដៅរួមចំណែកពង្រឹងកិច្ចសហប្រតិបត្តិការ ហិរញ្ញវត្ថុក្នុងតំបន់ឱ្យកាន់តែស៊ីជម្រៅ។ ការបង្កើតក្របខ័ណ្ឌអន្តរប្រតិបត្តិការ ត្រូវបានអនុម័តដោយទេសាភិបាលធនាគារកណ្តាលអាស៊ាន នៅ ឆ្នាំ២០២១ កន្លងមក និងត្រូវធ្វើឡើងជាដំណាក់កាល ដើម្បីគាំទ្រដល់ការអភិវឌ្ឍសេវាហិរញ្ញវត្ថុថ្មីៗ លើកកម្ពស់ការគ្រប់គ្រងហានិភ័យ និងបង្កើនប្រសិទ្ធភាពនៃការចែករំលែកទិន្នន័យនៅក្នុងតំបន់។បច្ចុប្បន្នដំណាក់កាលទី១ ត្រូវបានបញ្ចប់, ចំណែកដំណាក់កាលទី២ ដែលនឹងចាប់ផ្តើមនៅត្រីមាសទី ២ និងបញ្ចប់ចុងឆ្នាំ ២០២២ នេះ នឹងផ្តោតលើការបង្កើតក្របខ័ណ្ឌអន្តរប្រតិបត្តិការធនាគារអាស៊ាន, ការរៀបចំក្របខ័ណ្ឌគោលការណ៍ណែនាំពាក់ព័ន្ធផ្សេងៗ និងការជ្រើសរើសករណី សិក្សា ដើម្បីធ្វើការសាកល្បង ដោយផ្តោតលើការទូទាត់ឆ្លងដែន និងការវាយតម្លៃឥណទានមិនដំណើរការជាដើម។ ជាមួយគ្នានេះ ការអភិវឌ្ឍ ការទូទាត់ឆ្លងដែនតាម QR កូត ក៏សម្រេចបាននូវវឌ្ឍនភាពគួរឱ្យកត់សម្គាល់ និងបានដើរតួនាទីកាន់យ៉ាងសំខាន់ សម្រាប់ប្រទេសសមាជិក អាស៊ានទាំងអស់ ក្នុងការសម្រួល និងលើកកម្ពស់ការផ្ញើប្រាក់របស់ពលករនៅក្រៅប្រទេស ពាណិជ្ជកម្មអេឡិចត្រូនិក និងទេសចរណ៍ សំដៅឈានទៅរកសេដ្ឋកិច្ចឌីជីថលូបនីយកម្មនិងលើកកម្ពស់បរិយាបន្នហិរញ្ញវត្ថុ។ គួររំលេចថា ប្រទេសសមាជិកអាស៊ាន ភាគច្រើនបានភ្ជាប់ប្រព័ន្ធទូទាត់ឆ្លងដែនជាលក្ខណៈទ្វេភាគីរួចហើយដូចជា កម្ពុជានិងម៉ាឡេស៊ី កម្ពុជា និងថៃ សិង្ហបុរី និងថៃ សិង្ហបុរីនិងម៉ាឡេស៊ី វៀតណាមនិងថៃ ជាដើម។ លើសពីនេះប្រទេសសមាជិកគ្រោងនឹងពង្រីក ការតភ្ជាប់ប្រព័ន្ធទូទាត់ ឆ្លងដែនជាលក្ខណៈពហុភាគីសម្រាប់តំបន់ ដែលអាចធ្វើឱ្យការទូទាត់ឆ្លងដែនមានប្រតិបត្តិការឆាប់រហ័ស តម្លៃទាប និងសុវត្ថិភាពខ្ពស់៕ អត្ថបទ៖ សុន រ៉ាឌី

អ្នកជំនាញសេដេ្ឋកិច្ច លើកឡើងថា កម្ពុជា មានមូលដ្ឋានរឹងមាំ ដើម្បីជំរុញកំណើនសេដ្ឋកិច្ច

ភ្នំពេញ៖ អ្នកជំនាញសេដ្ឋកិច្ចថា នៅក្នុងឆ្នាំ២០២២នេះ កម្ពុជា អាចសម្រេចបានកំណើនសេដ្ឋកិច្ចល្អ ខណៈមូលដ្ឋានដែលជាជំហរ របស់កម្ពុជាបានត្រួសត្រាយផ្លូវរួចជាស្រេច នៅក្នុងដំណើរការអភិវឌ្ឍន៍សម្រាប់បម្រើការនាំចេញ។ឯកឧត្តមបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា ថ្លែងលើកឡើងនៅក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន BTV នៅថ្ងៃទី៧ខែមេសា ឆ្នាំ២០២២ នេះថា បើផ្អែកទៅលើការនាំចេញរបស់កម្ពុជា ការនាំចេញផលិតផលលើវិស័យកសិកម្មអាចងើបឡើងល្អ ខណៈដែលកម្ពុជា បានចុះកិច្ចព្រមព្រៀងពាណិជ្ជកម្មសេរីជាមួយចិន, កិច្ចព្រមព្រៀងស្ដីពីភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងកិច្ចព្រមព្រៀងជាមួយពាណិជ្ជកម្មសេរីជាមួយកូរ៉េ ដែលនឹងចូលជាធរមានក្នុងពេលឆាប់ៗ រួមជាមួយកម្ពុជាគឺជាប្រធានអាស៊ាន ដែលធ្វើឲ្យគេចាប់អារម្មណ៍ពីកម្ពុជា។ឯកឧត្តមបណ្ឌិត បន្តថា ចំពោះវិស័យកាត់ដេរ បានកំពុងមានឱកាសនៃការនាំចេញ គឺបានកើតឡើងពីគោលនយោបាយនៅក្នុងការជ្រើសរើសយកវ៉ាក់សាំង បានជម្រុញបង្កើតភាពស៊ាំនៅក្នុងសហគមន៍ ដែលធ្វើឲ្យឧស្សាហកម្មកាត់ដេរនៅដំណើរការ ខណៈប្រទេសផ្សេងៗបានបិទ។ ដូច្នេះវាក្លាយជាឱកាសរបស់កម្ពុជា នៅពេលដែលឧស្សាហកម្មកាត់ដែរនៅលើពិភពលោកមានការថមថយ។សូមបញ្ជាក់ថា៖ ថ្មីៗនេះ ធនាគារពិភពលោក (WB) បានបង្ហាញរបាយការណ៍ពីស្ថានភាពកំណើនសេដ្ឋកិច្ចកម្ពុជា ឆ្នាំ២០២២ ដោយព្យាករណ៍ថា កំណើនសេដ្ឋកិច្ចកម្ពុជាឆ្នាំ ២០២២ ស្ថិតក្នុងអត្រា ៤,៥ ភាគរយ ដោយពឹងផ្អែកលើសកម្មភាពសេដ្ឋកិច្ចក្នុងស្រុក និងការនាំចេញផលិតផលកសិកម្ម ស្របពេលកម្ពុជាលុបចោលនូវការដាក់កំហិតលើការធ្វើដំណើរ និងស្របពេលដែលកម្ពុជាមានអត្រាចាក់វ៉ាក់សាំងកូវីដ-១៩ ខ្ពស់៕ អត្ថបទ៖ សុន រ៉ាឌី

ធនាគារពិភពលោក ព្យាករណ៍កំណើនសេដ្ឋកិច្ចកម្ពុជាឆ្នាំ ២០២២ ៤,៥ ភាគរយ

ភ្នំពេញ៖ ធនាគារពិភពលោកព្យាករណ៍ថា កំណើនសេដ្ឋកិច្ចកម្ពុជាឆ្នាំ ២០២២ ស្ថិតក្នុងអត្រា ៤,៥% ដោយពឹងផ្អែកលើសកម្មភាពសេដ្ឋកិច្ចក្នុងស្រុក និងការនាំចេញផលិតផលកសិកម្ម ស្របពេលកម្ពុជាលុបចោលនូវការដាក់កំហិតលើការធ្វើដំណើរ និងស្របពេលដែលកម្ពុជា មានអត្រាចាក់វ៉ាក់សាំងកូវីដ-១៩ ខ្ពស់ ។ធនាគារពិភពលោក (WB) បានបង្ហាញរបាយការណ៍ពីស្ថានភាពកំណើនសេដ្ឋកិច្ចកម្ពុជា ឆ្នាំ ២០២២ កំណើន ៤,៥% គាំទ្រដោយការស្តារសេដ្ឋកិច្ចក្នុងស្រុកល្អប្រសើរ គាំទ្រដោយការដកចេញនូវការហាមឃាត់ធ្វើដំណើរ ការធ្លាក់ចុះនៃតម្រូវការជាសកល, និងការកើនឡើងនៃថ្លៃទំនិញជាដើម។គេរំពឹងថា ការស្ដារកំណើនសេដ្ឋកិច្ចឡើងវិញ គឺនៅតែសង្កត់ធ្ងន់លើសកម្មភាពសេដ្ឋកិច្ចក្នុងស្រុក និងការនាំចេញផលិតផលកសិកម្ម ខណៈការនាំចេញផលិតផលកម្មន្តសាល នឹងជួបការលំបាក។ សម្រាប់បញ្ហាប្រឈមសម្រាប់សេដ្ឋកិច្ចកម្ពុជា ធនាគារពិភពលោក លើកឡើងថា ការកើនឡើងនៃអត្រាឆ្លងអូមេក្រង់ ឬមេរោគប្រភេទថ្មីៗដែលគេមិនអាចគ្រប់គ្រងបាន អាចបង្អាក់ដំណើរការស្តារសេដ្ឋកិច្ចឡើងវិញ។ ចំណែកការកើនឡើងនៃតម្លៃថាមពល និងស្បៀង អាចប៉ះពាល់ដល់ទំនុកចិត្តរបស់អ្នកប្រើប្រាស់និងធ្វើឲ្យសុខុមាលភាពប្រជាជនធ្លាក់ចុះ ប៉ះពាល់ជាអវិជ្ជមានដល់ការកាត់បន្ថយភាពក្រីក្រ។ ម៉្យាងវិញទៀតកំណើនឥណទានខ្ពស់ និងការផ្តោតអារម្មណ៍លើឥណទានក្នុងស្រុក ក្នុងវិស័យសំណង់ និងអចលនទ្រព្យ នៅតែជាហានិភ័យមួយ ចំពោះស្ថិរភាពហិរញ្ញវត្ថុនៅកម្ពុជា។ជាចក្ខុវិស័យ, ទោះជាមានការធ្លាក់ចុះជាទូទៅនៃតម្រូវការសកលយ៉ាងណាក៏ដោយ ក៏ការព្យាករណ៍កំណើនសម្រាប់កម្ពុជា គឺស្មើ ៤,៥ភាគរយ ក្នុងឆ្នាំនេះ ដោយផ្អែកលើសេណារីយ៉ូដើមគ្រា ដោយសារមានការលុបចោលនូវការដាក់កំហិតលើការធ្វើដំណើរ ព្រោះកម្ពុជាមានអត្រាចាក់វ៉ាក់សាំងកូវីដ-១៩ ខ្ពស់ ដូច្នេះយើងរំពឹងថា ការស្តារសេដ្ឋកិច្ចឡើងវិញ នៅតែពឹងផ្អែកលើសកម្មភាពសេដ្ឋកិច្ចក្នុងស្រុក និងការនាំចេញផលិត ផលកសិកម្ម៕អត្ថបទ៖ សុន រ៉ាឌី

អាជ្ញាធរពាក់ព័ន្ធប្តេជ្ញាចូលរួមទប់ស្កាត់ការនាំចូលសត្វខុសច្បាប់នៅតាមព្រំដែន

សំណើរសុំអន្តរាគមន៍ពីសមាគមអ្នកចិញ្ចឹមសត្វកម្ពុជា ជួយទប់ស្កាត់ការលួចនាំចូលសត្វរស់ និងផលិតផលធ្វើពីសាច់សត្វនៅតាមព្រំដែន ទៅកាន់ខេត្តចំនួន ៤ ត្រូវបានអាជ្ញារគាំទ្រពេញទំហឹង ក្នុងការជួយទប់ស្កាត់ និងរឹតបន្តឹងនៅតាមបណ្តាច្រកព្រំដែនឲ្យបានជាអតិបរមា។លោក ស្រ៊ុន ពៅ ប្រធានសមាគមអ្នកចិញ្ចឹមសត្វនៅកម្ពុជា បានថ្លែងប្រាប់ភ្នាក់ងារអ្នកយកព័ត៌មាន BTV នៅថ្ងៃទី៤ ខែ មេសា ឆ្នាំ២០២២នេះថា ពាក់ព័ន្ធករណីស្នើដល់អាជ្ញាធរជួយអន្តរាគមន៍ទប់ស្កាត់ការលួចនាំចូលសត្វរស់ និងផលិតផលមានដើមកំណើតពីសត្វ និងសាច់បង្កក សមាគមបានដាក់ទៅកាន់ខេត្តចំនួន៤ មានខេត្តព្រៃវែង ត្បូងឃ្មុំ, តាកែវ និងខេត្តស្វាយរៀង ដើម្បីស្នើរសុំអន្តរាគមន៍ និងជួយទប់ស្កាត់ នៃការនាំចូលដោយខុសច្បាប់នេះ។ លោក ស្រ៊ុន ពៅ បន្តថា ជុំវិញករណីដាក់សំណើរជួយអន្តរាគមន៍នេះ ត្រូវបានអាជ្ញាធរ ពិសេសមន្រ្តីពាក់ព័ន្ធ បានគាំទ្រពេញទំហឹងក្នុងការស្វែងរក និងជួយទប់ស្កាត់ រឹតបន្តឹងថែមទៀត។ តាមរយៈនៃការប្តេជ្ញាជួយទប់ស្កាត់របស់អាជ្ញាធរនេះ ធ្វើឲ្យលោកក្នុងនាមតំណាងឲ្យប្រជាពលរដ្ឋ ក៏ដូចជាសមាគម មានភាពកក់ក្តៅ និងជឿជាក់ចំពោះវិធានការណ៍របស់អាជ្ញាធរ មន្រ្តីពាក់ព័ន្ធ ក្នុងការចូលរួមសកម្មភាពនេះ ប្រកបដោយប្រសិទ្ធភាព។សូមបញ្ជាក់ថា កាលពីថ្ងៃទី២៩ ខែមីនា ឆ្នាំ២០២២កន្លងមកនេះ សមាគមអ្នកចិញ្ចឹមសត្វនៅកម្ពុជា បានដាក់សំណើរចំនួនពីរច្បាប់ទៅកាន់សាលាខេត្តតាកែវ និងមួយច្បាប់ទៀតទៅសាខាគយ និងរដ្ឋាករខេត្តតាកែវ និងបានបន្តការដាក់សំណើរនេះនៅខេត្តស្វាយរៀង, ព្រៃវែង និងខេត្តត្បូងឃ្មុំ។ ទាក់ទងការដាក់សំណើរនេះ, លោក ថៃ លី ប្រធានការិយាល័យបសុសត្វ នៃមន្ទីរកសិកម្ម រុក្ខាប្រមាញ់ និងនេសាទ ខេត្តតាកែវ ថ្លែងឲ្យដឹងថា ចំពោះសំណើររបស់សមាគមអ្នកចិញ្ចឹមសត្វនៅកម្ពុជានេះ មន្ទីរទទួលយកមកពិនិត្យរួចហើយ និងបានបញ្ជូនទៅសាលាខេត្ត ដែលកិច្ចការនេះ សាលាខេត្តនឹងគ្រោងបើកការប្រជុំក្នុងពេលឆាប់ៗ។ ចំណែកនៅខេត្តស្វាយរៀងវិញ មន្រ្តីរដ្ឋបាលសាលាខេត្ត បានឲ្យដឹងថា ចំពោះសំណើររបស់សមាគមនេះ សាលាខេត្តបានទទួលយកសំណើរនេះរួចហើយ បច្ចុប្បន្នកំពុងរង់ចាំថ្នាក់ដឹកនាំ ពិនិត្យ និងសម្រេច ក្នុងការបន្តចុះអន្តរាគមន៍ចំពោះបញ្ហាទាំងនេះ៕ អត្ថបទ៖ សុន រ៉ាឌី

កម្ពុជាចាប់ផ្តើមប្រមូលអាករលើតម្លៃបន្ថែម លើពាណិជ្ជកម្មតាមប្រព័ន្ធអេឡិចត្រូនិកពីខែនេះតទៅ

ភ្នំពេញ៖ រាជរដ្ឋាភិបាលនឹងអនុវត្តការប្រមូលអាករលើតម្លៃបន្ថែម (VAT) ចំពោះប្រតិបត្តិការពាណិជ្ជកម្ម តាមប្រព័ន្ធអេឡិចត្រូនិក (E-Commerce ដោយចាប់ផ្តើមអនុវត្តពីដើមខែ មេសា ឆ្នាំ២០២២ នេះតទៅ ។ឯកឧត្តម អេង រតនា ប្រធាននាយកដ្ឋានគ្រប់គ្រងអ្នកជាប់ពន្ធធំ នៃអគ្គនាយកដ្ឋានពន្ធដារ លើកឡើងនៅក្នុងសិក្ខាផ្សព្វផ្សាយ ស្តីពីការអនុវត្តអាករលើតម្លៃបន្ថែម ចំពោះប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក (E-Commerce) ថា ពាក់ព័ន្ធនឹងការ អនុវត្តអាករលើតម្លៃបន្ថែម ចំពោះប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក អគ្គនាយកដ្ឋាពន្ធដារ បាននឹងកំពុងរៀបចំអភិវឌ្ឍ ន៍ប្រព័ន្ធដាក់លិខិតប្រកាសពន្ធតាមប្រព័ន្ធ E-Filing ដើម្បីផ្តល់ភាពងាយស្រួលដល់អ្នកជាប់ពន្ធ អនុវត្តឱ្យមានតម្លាភាព ប្រសិទ្ធភាព និងស័ក្តិសិទ្ធិភាពស្របតាមច្បាប់ និងបទប្បញ្ញត្តិស្តីពីពន្ធដារ ក្នុងគោលដៅប្រមូលចំណូលពន្ធឱ្យបានគ្រប់ និងលើសផែនការដែល កំណត់ដោយច្បាប់។ឯកឧត្តម បន្តថា ចំពោះការអនុវត្តអាករលើតម្លៃបន្ថែមនេះ អគ្គនាយកដ្ឋានពន្ធដារចាប់ផ្តើមអនុវត្តចាប់ពីថ្ងៃទី០១ ខែមេសា ឆ្នាំ ២០២២ នេះតទៅ គឺដើម្បីឆ្លើយតបទៅនឹងយុទ្ធសាស្ត្រកៀរគរចំណូល ២០១៩-២០២៣ ដែលរាជរដ្ឋាភិបាលមានគោលនយោបាយ មិនបង្កើនអត្រាពន្ធ ឬបង្កើតពន្ធថ្មី ដោយត្រូវពង្រឹង ច្បាប់និងបទប្បញ្ញត្តិស្តីពីពន្ធដារ ដែលមានស្រាប់ និងពង្រឹងការគ្រប់គ្រងប្រមូល ចំណូលពន្ធឱ្យអស់សក្តានុពល។ទាក់ទងការអនុវត្តអាករលើតម្លៃបន្ថែមនេះ, លោកឧកញ៉ា ឈិន កេន ប្រធានសមាគមបច្ចេកវិទ្យាឌីជីថលនៃកម្ពុជា បានថ្លែង នូវការគាំទ្រ ១០០ ភាគរយ នៃវិធានការកៀរគរចំណូលពន្ធជាតិរបស់រាជរដ្ឋាភិបាល ដើម្បីយកថវិការទាំងនោះទៅអភិវឌ្ឍប្រទេសឲ្យកាន់ តែរីកចម្រើន ប៉ុន្តែចំពោះការប្រមូលអាករលើតម្លៃបន្ថែមលើផ្នែកនេះ អាចនឹងមានផលលំបាក២យ៉ាងគឺ ធ្វើឲ្យអ្នកលក់បង្កើនតំលៃលក់ លើសមុន ១០% ដែលចំណាយនេះជាបន្ទុកចំណាយបន្ថែមលើអ្នកប្រើប្រាស់ និងទី២ ចំពោះការប្រមូលអាករនេះ គឺបានតែក្រុមអាជីករ ចុះបញ្ជីប៉ុណ្ណោះ ចំណែកឯអាជីវករមិនបានចុះបញ្ជី នៅតែមិនអាចប្រមូលពន្ធបានឡើយ ដោយសាច្បាប់គ្រប់គ្រងអាជីវកម្មតាម អនឡាញមិនសូវតឹងរឹង ដែលបញ្ហានេះ នាំឲ្យមានប្រកួតប្រជែងមិនស្មើរភាពគ្នាលើទីផ្សារ។សូមបញ្ជាក់ថា ពាក់ព័ន្ធការអនុវត្តអាករលើតម្លៃបន្ថែម ចំពោះប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក E-Commerce នាពេល កន្លងមក ក្រសួងសេដ្ឋកិច្ច និងហិរញ្ញវត្ថុ បានសម្រេចពន្យារកាលបរិច្ឆេទកំណត់ដាក់ឱ្យអនុវត្តវិធាន និងនីតិវិធីនៃការអនុវត្តអាករលើ តម្លៃបន្ថែម ចំពោះប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក ដើម្បីទុកពេលវេលាឲ្យបានគ្រប់គ្រាន់ដល់អ្នកជាប់ពន្ធ ក្នុងការស្វែង យល់ឱ្យកាន់តែច្បាស់លាស់ និងត្រៀមខ្លួនចូលរួមអនុវត្តប្រកាសនេះឱ្យមានភាពរលូន ដើម្បីចូលរួមអនុវត្តផែនការនេះ ចាប់ពីថ្ងៃទី ០១ ខែមេសា ឆ្នាំ២០២២ តទៅ៕អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

ក្រសួងការងារ ព្រមានចាត់វិធានការម៉ឺងម៉ាត់បំផុត ចំពោះបុគ្គលណាទារប្រាក់ពីពលរដ្ឋជាថ្នូរនឹងការទទួលបានការងារ

កោះ Solomon Islands មិនអញ្ជើញអាមេរិក ចិន និងកោះតៃវ៉ាន់ ចូលរួមកិច្ចប្រជុំនយោបាយរបស់ប៉ាស៊ីហ្វិក

ការិយាល័យនៃក្រុមហ៊ុនអាកាសចរណ៍អ៊ីស្រាអែល El Al នៅក្រុងប៉ារីស ត្រូវបានបំផ្លាញទ្រព្យសម្បត្តិ

សម្ដេចធិបតី៖ស្របតាមសំណូមពរពលរដ្ឋខ្មែរគាំទ្របេក្ខភាពឯកឧត្តម Donald Trump សម្រាប់ពានរង្វាន់ណូបែលសន្តិភាព រាជរដ្ឋាភិបាលផ្ញើលិខិតជាផ្លូវការទៅគណៈកម្មការពានរង្វាន់ណូបែលសន្តិភាព

សារព័ត៌មាន Ifax៖ លោក Putin នឹងទៅបំពេញទស្សនកិច្ច នៅឥណ្ឌា នាចុងឆ្នាំ២០២៥

អាល្លឺម៉ង់នឹងពង្រីកការគ្រប់គ្រងព្រំដែន ពាក់ព័ន្ធនឹងវិធានការបង្ក្រាបជនអន្តោប្រវេសន៍

សេចក្ដីរាយការណ៍៖ អគ្គិភ័យនៅរោងចក្រចម្រាញ់ប្រេង Afipsky របស់រុស្ស៊ី ត្រូវបានពន្លត់ ក្រោយត្រូវយានដ្រូនវាយប្រហារ

ប្រព័ន្ធផ្សព្វផ្សាយរដ្ឋ៖ បុរសដែលត្រូវបានអ៊ីរ៉ង់ប្រហារជីវិតពីបទចារកម្ម គឺជាអ្នកវិទ្យាសាស្ត្រនុយក្លេអ៊ែរ

មន្ត្រីជាន់ខ្ពស់ EU៖ ការសម្លាប់ នៅហ្កាហ្សា មើលទៅដូចអំពើប្រល័យពូជសាសន៍ខ្លាំងណាស់

នាយករដ្ឋមន្ត្រីស៊ូដង់ ទៅបំពេញទស្សនកិច្ចអេហ្ស៊ីប ជាលើកដំបូង ចាប់តាំងពីឡើងកាន់តំណែង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877