BTV NEWS

កម្ពុជាមានសុទិដ្ឋិនិយមថាទោះបិទការនាំចូលប្រេងឥន្ធនៈ និងឧស្ម័នពីថៃ ក៏អាចរក្សាការផ្គត់ផ្គង់តម្រូវការបាន

តំបន់សេដ្ឋកិច្ចពិសេសកម្ពុជាដើរតួនាទីយ៉ាងសំខាន់ ក្នុងការជំរុញកំណើននាំចេញវិស័យឧស្សាហកម្ម

ឯកឧត្តម ឌិត ទីណា បន្តក្រើនរម្លឹកមន្រ្តីកសិកម្មឃុំឱ្យចុះផ្សព្វផ្សាយផែនការ "មានហូប មានប្រើ មានបាន និងមានរហូត"

ក្រសួងកសិកម្មត្រូវការមន្រ្តីកសិកម្មឃុំចំនួន ៣៥០នាក់បន្ថែមទៀត ដើម្បីលើកស្ទួយផលិតកម្មកសិករ

សេដ្ឋកិច្ច និង កសិកម្ម

អាជីវកម្មហាងអាហារ និងភេសជ្ជៈនៅភ្នំពេញ រំពឹងថា អាជីវកម្មនឹងដំណើរធម្មតាឡើងវិញឆាប់ៗ

ភ្នំពេញ ៖ ការអនុវត្តការលក់វេចខ្ចប់ ដោយមិនអនុញ្ញាតអតិថិជនអង្គុយក្នុងហាង កំពុងធ្វើឱ្យអាជីវកម្មអាហារ និងភេសជ្ជៈកាហ្វេ ប្រឈមនឹងការលក់ធ្លាក់ចុះ។ ជាមួយនឹងការកាត់បន្ថយបុគ្គលិកខ្លះផង ចំណូលនេះ គឺបានត្រឹមតែទប់ការចំណាយប្រតិបត្តិការប៉ុណ្ណោះ។ ទោះយ៉ាងណា ម្ចាស់អាជីវកម្មទាំងនោះ រំពឹងថា នឹងអាចដំណើរការអាជីវកម្មធម្មតាឡើងវិញ ក្នុងពេលឆាប់ៗខាងមុខ។ក្នុងកិច្ចសម្ភាសន៍ជាមួយទូរទស្សន៍ព័ត៌មាន ប៊ីធីវី កាលពីល្ងាចថ្ងៃទី១៨ ឧសភា ឆ្នាំ២០២១កន្លងទៅ លោក ជ័យ ពិសិដ្ឋ ម្ចាស់ហាងកាហ្វេ មេឌាកាហ្វេ បាននិយាយថា ប្រសិនបើករណីជំងឺឆ្លងកូវីដ១៩នៅតែបន្តអូសបន្លាយ និងចំនួនអ្នកឆ្លងថ្មីច្រើនទៀតនោះ នឹងធ្វើចំនួននៃការលក់ធ្លាក់ចុះជាបន្តបន្ទាប់ ដោយសារខាតបង់ប្រាក់ចំណូល និងគ្មានប្រាក់គ្រប់គ្រាន់សម្រាប់ទប់ថ្លៃចំណាយនានា ដូចជាថ្លៃទឹក ភ្លើង និងថ្លៃបុគ្គលិកជាដើម ខណៈដែលក្នុងមួយថ្ងៃអាចរកប្រាក់ចំណូលប្រមាណពី ២០ ទៅ២៥%ប៉ុណ្ណោះ។លោក ពិសិដ្ឋ បន្ថែមថា អ្វីដែលលោកចង់បាន និងចង់ឃើញនាពេលដ៏ខ្លីខាងមុខ គឺការវិលត្រឡប់មករកភាពប្រក្រតីឡើងវិញ និងអំពាវនាវទៅដល់ប្រជាពលរដ្ឋទាំងអស់ សូមចូលរួមទប់ស្កាត់ និងអនុវត្តន៍តាមការណែនាំរបស់រាជរដ្ឋាភិបាល៣ការពារ និង៣កុំ ពោលធ្វើយ៉ាងណាកុំឲ្យវីរុសកូវីដ១៩បន្តរាលដាលថែមទៀតនៅកម្ពុជា។ម្ចាស់ភោជនីយដ្ឋានមួយកន្លែង ស្ថិតនៅក្បែរផ្សារអូឡាំពិក យីហោ១៩៩៩ កញ្ញា រចនា បានប្រាប់ឲ្យដឹងដែរថា ការលក់ដូរធ្លាប់តែមានសភាពអ៊ូអរតាំងពីពេលល្ងាច រហូតដល់ពេលរាត្រី ដោយសារហាងលោកបណ្តុំទៅដោយម្ហូបអាហារជាច្រើនប្រភេទ។ ប៉ុន្តែក្នុងរយៈពេលប្រមាណ៣ខែមកនេះ ប្រែជាស្ងប់ស្ងាត់ ហើយការលក់សម្រាប់តែការវេចខ្ចប់ ក៏មិនសូវមានច្រើនទេ ដោយសារហាងតម្រូវបិទទ្វារមុនម៉ោង៨យប់។ចំណែកលោកស្រី ធីតា ម្ចាស់ហាងសាច់អាំង ហេង មែន បានប្តូរពីអាជីវកម្មលក់សាំងអស់សម្រាប់អតិថិជនចូលអង្គុយក្នុងហាង ទៅលក់សាច់ទារអាំងសម្រាប់តែវេចខ្ចប់។ លោកស្រី បន្តថា ការប្តូរអាជីវកម្មទៅលក់សាច់ទារអាំងខ្ទប់នេះ គឺមិនទទួលបានចំណូលច្រើននោះទេ ដោយចំណូលគឺសម្រាប់ចំណាយតែលើបុគ្គលិក៕អត្ថបទ ៖ ឈិត បូរ៉ាវី

រដ្ឋមន្ត្រីពាណិជ្ជកម្មកម្ពុជា និងអូស្ត្រាលី ពិភាក្សាគ្នាពីជំរុញការអភិវឌ្ឍវិស័យពាណិជ្ជកម្ម

ភ្នំពេញ ៖ ឯកឧត្តម ប៉ាន សូរស័ក្ដិ រដ្ឋមន្ដ្រីក្រសួងពាណិជ្ជកម្មកម្ពុជា បានទទួលជួបពិភាក្សាការងារជាមួយ ឯកឧត្តម Pablo Kang ឯកអគ្គរាជទូតអូស្ត្រាលីប្រចាំកម្ពុជា ផោ្តតលើការពង្រឹងកិច្ចសហប្រតិបត្តិការលើវិស័យពាណិជ្ជកម្មអន្តរជាតិ រវាងប្រទេសទាំងពីរ និងការបន្តជួយគាំទ្ររបស់អូស្ត្រាលីក្នុងការអភិវឌ្ឍពាណិជ្ជកម្មកម្ពុជា ក្នុងបរិបទទ្វេភាគី តំបន់ និងពហុភាគី។ក្នុងជំនួបការងារតាមរយៈប្រព័ន្ធវីដេអូ កាលពីថ្ងៃទី១៨ ឧសភា ឆ្នាំ២០២១នេះ ក្នុងក្របខ័ណ្ឌទ្វេភាគី ភាគីទាំងពីរ (កម្ពុជា-អូស្ត្រាលី) បានធ្វើការផ្លាស់ប្តូរយោបល់ និងពិភាក្សាលើការបន្តអនុវត្តគម្រោងអភិវឌ្ឍន៍ពាណិជ្ជកម្មក្រោមជំនួយរបស់អូស្រាលី រួមមាន ការពង្រឹង និងការកសាងសមត្ថភាពមន្ត្រីពាណិជ្ជកម្ម ការអភិវឌ្ឍ និងកសាងបទដ្ឋានគតិយុត្តិពាក់ព័ន្ធវិស័យពាណិជ្ជកម្ម ការបន្តអនុវត្តកម្មវិធីខ្សែសង្វាក់តំលៃកសិកម្មកម្ពុជា-អូស្ត្រាលី និងការជំរុញការធ្វើពាណិជ្ជកម្មតាមប្រព័ន្ធអេទ្បិចត្រូនិកជាដើម។ភាគីទាំងពីរ បានបញ្ជាក់សារជាថ្មីនូវការប្ដេជ្ញាចិត្ត បង្កើនទំហំពាណិជ្ជកម្មទ្វេភាគី លើកម្ពស់កិច្ចសហប្រតិបត្តិ លើវិស័យពាណិជ្ជកម្ម និងគ្រប់វិស័យពាក់ព័ន្ធ ជាពិសេសទំនាក់ទំនងជិតស្និទ្ធរវាងប្រទេសទាំងពីរ។ ភាគីទាំងពីរ បានផ្លាស់ប្តូរយោបល់លើការវិវត្តនានាក្នុងបរិបទពាណិជ្ជកម្មពហុភាគីក្រោមក្របខ័ណ្ឌអង្គការពាណិជ្ជកម្មពិភពលោក ជាពិសេសការត្រៀមចូលរួមសន្និសីទថ្នាក់រដ្ឋមន្ត្រីអង្គការពាណិជ្ជកម្មពិភពលោក លើកទី១២ នាពេលខាងមុខផងដែរ។ជាមួយគ្នានេះ ឯកឧត្តមរដ្ឋមន្ដ្រី ប៉ាន សូរស័ក្តិ បានថ្លែងអំណរគុណភាគីអូស្ត្រាលី ដែលបានបន្តគាំទ្រ និងចូលរួមចំណែកយ៉ាងសំខាន់ក្នុងការអភិវឌ្ឍវិស័យពាណិជ្ជកម្មកម្ពុជា និងវិស័យពាក់ព័ន្ធនានា។ សូមបញ្ជាក់ជូនថា ការដោះដូរពាណិជ្ជកម្មទ្វេភាគីរវាងប្រទេសកម្ពុជា និងអូស្ត្រាលី មានទំហំ២៩០លានដុល្លារ ក្នុងឆ្នាំ២០១៩ កើនឡើង ៣២ភាគរយធៀបនឹងឆ្នាំ២០១៨។ ក្នុងនោះកម្ពុជានាំចេញទៅអូស្ត្រាលីមានតម្លៃ ២០២លានដុល្លារ និងនាំចូលពីអូស្ត្រាលីមានតម្លៃ៩០លានដុល្លារ៕អត្ថបទ ៖ ឈិត បូរ៉ាវី

ពាណិជ្ជកម្មទ្វេភាគីកម្ពុជា-កូរ៉េខាងត្បូង មានទំហំទឹកប្រាក់ជាង៣១៩លានដុល្លារក្នុងរយៈពេលបួនខែដើមឆ្នាំ

ភ្នំពេញ ៖ ការដោះដូរពាណិជ្ជកម្មទ្វេភាគី រវាងប្រទេសកម្ពុជា និងកូរ៉េខាងត្បូង មានទំហំទឹកប្រាក់សរុប ៣១៩ លានដុល្លារ ក្នុងរយៈពេលបួនខែឆ្នាំ២០២០ កើនឡើង ៧,២ភាគរយធៀបនឹងរយៈពេលដូចគ្នាកាលពីឆ្នាំ២០២០។យោងតាមរបាយការណ៍ពីសមាគមពាណិជ្ជកម្មអន្តរជាតិកូរ៉េ (KOTRA) ចាប់ពីខែមករា ដល់ខែមេសា ការនាំចេញទំនិញរបស់ប្រទេសកម្ពុជា ទៅទីផ្សារកូរ៉េខាងត្បូង មានទំហំទឹកប្រាក់ ប្រមាណ ១២៤ លានដុល្លារ មានកំណើន ៨,៩ភាគរយ ធៀបនឹងរយៈពេលបួនខែឆ្នាំមុន។ ដោយឡែក កម្ពុជានាំចូលទំនិញពីកូរ៉េខាងត្បូង មានទំហំទឹកប្រាក់សរុប ១៩៤ លានដុល្លារ កើនឡើង ៦,២ ភាគរយ។យោងតាមរបាយការណ៍ពីក្រសួងពាណិជ្ជកម្ម ទំនិញដែលកម្ពុជា នាំចេញទៅទីផ្សារកូរ៉េខាងត្បូង មាន ដូចជា សំលៀកបំពាក់ ផលិតផលស្បែកជើង ផលិតធ្វើដំណើរ គ្រឿងបង្គំអគ្គិសនី និងផលិតផលកសិកម្ម។ ចំណែកផលិតផលដែលកូរ៉េខាងត្បូងនាំចូលមកកម្ពុជាវិញ មានដូចជា រថយន្ត ឧបករណ៍អេឡិចត្រូនិក ភេសជ្ជៈ ថ្នាំពេទ្យ និងផលិតផលបា្លស្ទិក។គួរបញ្ជាក់ថា ប្រទេសកម្ពុជា និងកូរ៉េខាងត្បូង រំពឹងថា នឹងកើនឡើងបន្ថែមទៀត បន្ទាប់ពីកិច្ចព្រមព្រៀងពាណិជ្ជកម្មសេរីទ្វេភាគី រវាងប្រទេសទាំងពីរ ចូលជាធរមាន។ កិច្ចព្រមព្រៀងពាណិជ្ជកម្មទ្វេភាគីនេះ គ្រោងនឹងប្រកាសដាក់ឱ្យអនុវត្តនៅក្នុងឆ្នាំ២០២១នេះ។ក្នុងឆ្នាំ២០២០កន្លងទៅ ទំហំពាណិជ្ជកម្មទ្វេភាគីរវាងប្រទេសទាំងពីរ កម្ពុជា កូរ៉េខាងត្បូង ធ្លាក់ចុះ ១៤ភាគរយ មកត្រឹម ៨៨៤លានដុល្លារ ដោយសារការរីករាលដាលជំងឺកូវីដ១៩។ ក្នុងនោះ កម្ពុជា នាំចេញទៅកូរ៉េខាងត្បូង មានទឹកប្រាក់សរុប ៣១៧ លានដុល្លារ ធ្លាក់ចុះ១៨ភាគរយ៕

កម្ពុជារំពឹងទាក់ទាញវិនិយោគបន្ថែមពីសហរដ្ឋអាមេរិកលើវិស័យឧស្សាហកម្មធុនមធ្យម

ភ្នំពេញ ៖ អ្នកជំនាញសេដ្ឋកិច្ច រំពឹងថា នាពេលអនាគតវិនិយោគិនមកពីសហរដ្ឋអាមេរិក នឹងវិនិយោគលើផ្នែកអេឡិចត្រូនិច និងផ្នែកឧស្សាហកម្មធុនមធ្យមនៅកម្ពុជា។លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ច នៃរាជបណ្ឌិត្យសភាកម្ពុជា បានថ្លែងលើកឡើងក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន BTV ស្តីពីការវិនិយោគក្នុងពេលបច្ចុប្បន្ន និងអនាគត របស់ក្រុមហ៊ុនមកពីសហរដ្ឋអាមេរិកនៅកម្ពុជា ថា កម្ពុជាគឺជាប្រទេសដែលមានទីផ្សារតូច ក្នុងនោះកម្ពុជាក៏បានដើរក្រោយគេបន្តិចនៅក្នុងតំបន់អាស៊ានដូចជា ប្រទេសវៀតណាម និងប្រទេសថៃជាដើម។ នៅពេលខាងមុខ វិនិយោគិនសហរដ្ឋអាមេរិក ត្រូវបានរំពឹងថា នឹងមកវិនិយោគនៅកម្ពុជាកាន់តែច្រើន ជាពិសេសរុញការវិនិយោគលើវិស័យអេឡិចត្រូនិច នឹងឧស្សាហកម្មធុនមធ្យមដូចជា ផ្នែកដំឡើងរថយន្ត និងការដំឡើងគ្រឿងចក្រផ្សេងៗទៀតនៅកម្ពុជា គឺស្របតាមរបត់នៃចរន្តសេដ្ឋកិច្ច។ បើតាមរបាយការណ៍ក្រសួងពាណិជ្ជកម្ម បានបង្ហាញឲ្យដឹងថា គិតមកដល់បច្ចុប្បន្ន ចំនួនក្រុមហ៊ុន និងសហគ្រាសរបស់សហរដ្ឋអាមេរិក ដែលបានចុះបញ្ជីនៅក្រសួងពាណិជ្ជកម្មសរុបមានចំនួន ៤២៧ ក្នុងនោះ ក្រុមហ៊ុនមានចំនួន ៣៨៧ និងសហគ្រាសមានចំនួន ៤០ សហគ្រាស ។ឯកឧត្តម W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា បានលើកក្នុងពិរព័ណ៍តាមអនឡាញថា ក្រុមហ៊ុនធំៗរបស់សហរដ្ឋអាមេរិកដូចជា ៖ ក្រុមហ៊ុន Ford, Facebook, Coca-Cola និងក្រុមហ៊ុន Pizza ជាដើម បច្ចុប្បន្នកំពុងទទួលបានជោគជ័យនៅកម្ពុជា ក្នុងនោះ ឯកឧត្តមសង្ឃឹមថា នឹងមានក្រុមហ៊ុនសហរដ្ឋអាមេរិកផ្សេងៗទៀត អាចទទួលបានភាពរីកចម្រើនកាន់តែច្រើននៅក្នុងមុខរបរផងដែរ។សូមបញ្ជាក់ថា រាជរដ្ឋាភិបាល បានបញ្ចប់សេចក្តីព្រាងច្បាប់ស្តីពីច្បាប់វិនិយោគថ្មី ដើម្បីសម្រួលការវិនិយោគ ទាក់ទាញវិនិយោគបន្ថែមចូលមកកម្ពុជា ។ ច្បាប់ស្តីពីវិនិយោគថ្មីនេះ គ្រោងនឹងប្រកាសដាក់ឱ្យប្រើប្រាស់នៅក្នុងឆ្នាំ២០២១នេះ៕អត្ថបទ ៖ សុន រ៉ាឌី

ទេសចរក្នុងស្រុកចាប់ផ្តើមងើបឡើងវិញបន្តិច ដោយការប្រុងប្រយ័ត្នខ្ពស់ ក្រោយរមណីយដ្ឋានទេសចរណ៍ខ្លះបើកឡើងវិញ

ភ្នំពេញ ៖ នៅក្នុងរយៈពេល២សប្តាហ៍ចុងក្រោយ បន្ទាប់ពីរាជរដ្ឋាភិបាលបានបញ្ចប់បិទការធ្វើដំណើរ និងបើករមណីយដ្ឋានទេសចរឡើងវិញនេះ លំហូរអ្នកដំណើរតាមផ្លូវជាតិពីខេត្តមួយទៅខេត្តមួយបានចេញដើរមានកំណើនឡើងច្រើន រហូតធ្វើឱ្យកន្លែងខ្លះមានកកស្ទះ ហើយបានធ្វើអោយចរន្តទេសចរចេញដើរកម្សាន្ត ក៏បានចាប់ផ្តើមមានកម្រើកឡើងវិញផងដែរ ប៉ុន្តែនៅក្នុងកម្រិតមួយទាប។បើតាមលោកស្រី ឆាយ សៀវលីន ប្រធានសមាគមទីភា្នក់ទេសចរណ៍កម្ពុជាហៅកាត់ CATA បានថ្លែងប្រាប់ BTV នៅថ្ងៃទី១៣ ខែឧសភានេះថា ចរន្តទេសចរក្នុងរយៈពេល២សប្តាហ៍ បន្ទាប់ពីរាជរដ្ឋាភិបាលបើកការធ្វើដំណើរឡើងវិញនេះ ចំនួនភ្ញៀវទេសចរបានចេញដើរកម្សាន្តទៅតាមគោលដៅទេសចរណ៍នានា នៅក្នុងមានកម្រិត ហើយភាគច្រើននៃអ្នកចេញដើរទាំងនោះមិនទាន់ហ៊ានចូលប្រើប្រាស់សេវាអាជីវកម្មនៅក្នុងវិស័យទេសចរណ៍ច្រើននោះទេ ជាពិសេសសេវាកម្មរមណីយដ្ឋានទេសចរណ៍ រីស៊ត ភោជនីយដ្ឋាន អាហារដ្ឋាន និងផ្ទះស្នាក់ជាដើម។លោកស្រី បន្តថា ទោះយ៉ាងណាចាប់ពីសប្តាហ៍ក្រោយនេះតទៅ បណ្តាអាជីវកម្មទេសចរណ៍ផ្តល់សេវាកម្មនៅនឹងកន្លែង មានរមណីយដ្ឋាន រីស៊ត ភោជនីយដ្ឋាន ផ្ទះស្នាក់ជាដើមនឹងចាប់ផ្តើមបើកដំណើរការឡើងវិញខ្លះៗបន្ថែមទៀត ខណៈបច្ចុប្បន្ននេះ អាជីវកម្មសេវាទាំងនោះ មួយចំនួនគេកំពុងរៀបចំកែលំអរដើម្បីបើក និងខ្លះទៀត កំពុងប្រមូលបុគ្គលិកដែលឈប់កន្លងមកចូលមកបំរើការឡើងវិញ។លោកជំទាវ ឆាយ សៀវលីន បន្តថា ដោយឡែកសម្រាប់អាជីវកម្មការីទេសចរវិញ មកដល់ពេលនេះ មិនទាន់បានត្រៀមរៀបចំខ្លួនឡើងវិញទេ ដោយខ្លះកំពុងចាំមើលការងើបឡើងវិញនៃទីផ្សារទេសចរអន្តរជាតិ ខណៈការកំពុងងើបឡើងវិញនៃភ្ញៀវទេសចរក្នុងស្រុកនៅក្នុងដំណាក់កាលនេះ គឺមិនទាន់ប្រើប្រាស់សេវាកម្មការីទេសចរនេះច្រើនផុលផុសទេ ។បើតាម ឯកឧត្តម តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍ បានថ្លែងថា នៅក្នុងអំឡុងពេលរយៈពេល២សប្តាហ៍កន្លងមកនេះ តំបន់គោលដៅទេសចរណ៍មួយចំនួនបានបើកដំណើរការ ហើយគោលដៅទេសចរណ៍ខ្លះទៀតនៅមិនទាន់បានបើកដំណើរការ ដោយសារគេនៅបន្តធ្វើការស្ទាបស្ទង់ចំនួនភ្ញៀវចេញដើរ ហើយតំបន់រមណីយដ្ឋានទេសចរណ៍កែច្នៃខ្លះទៀតគឺគាត់នៅបន្តការជួសជុល រៀបចំការរក្សាគន្លាត រៀបចំប្រព័ន្ធបង្ការការពារ តាមវិធានការណែនាំរបស់ក្រសួងសុខាភិបាល និងវិធានសុវត្ថិភាពទេសចរណ៍ជាដើម។ឯកឧត្តម តុប សុភ័ក បញ្ជាក់ថា សម្រាប់ភ្ញៀវទេសចរចេញដើរកម្សាន្តក្នុងរយៈពេល២សប្តាហ៍កន្លងមកនេះ គឺភាគច្រើនគេចេញដើរដោយប្រើមធ្យោបាយខ្លួនឯង និងជាលក្ខណៈគ្រួសារ ហើយគេមិនទាន់ចេញដើរជាលក្ខណៈក្រុមធំៗ ដែលមានសភាពអ៊ូអរកកកុញនោះទេ៕អត្ថបទ ស៊ុម សុខជា

រាជរដ្ឋាភិបាលកម្ពុជា ដាក់ដំណើរការប្រព័ន្ធទិន្នន័យតភ្ជាប់ទំនាក់ទំនងវិនិយោគិនក្នុងស្រុកនិងបរទេស

ភ្នំពេញ ៖ ក្រុមប្រឹក្សាអភិវឌ្ឍន៍កម្ពុជា សហការជាមួយវេទិកាសេដ្ឋកិច្ចពិភពលោក (World Economic Forum) នៅថ្ងៃទី១២ ខែឧសភា ឆ្នាំ២០២១នេះ បានដាក់ឲ្យដំណើរការនូវប្រព័ន្ធទិន្នន័យ ស្តីពីសន្ធានកម្មខ្សែច្រវាក់ផ្គត់ផ្គង់សំដៅ ផ្តល់កិច្ចសម្រួលវិនិយោគ សម្រាប់អភិវឌ្ឍន៍ចីរភាព ដើម្បីផ្ដល់ព័ត៌មានស្ដីពីប្រតិបត្តិការប្រកបដោយនិរន្តរភាពនៃក្រុមហ៊ុនក្នុងស្រុក និងបម្រើជាវេទិកាដ៏សំខាន់មួយក្នុងការតភ្ជាប់ទំនាក់ទំនងរវាងក្រុមហ៊ុនបរទេស និងក្រុមហ៊ុនក្នុងស្រុក អាចស្វែងរកភាពជាដៃគូណាមួយ ឬការធ្វើការវិនិយោគនៅក្នុងប្រទេសកម្ពុជាបាន។ឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជា បានលើកឡើងនៅក្នុងវេទិកាសេដ្ឋកិច្ចពិភពលោក (World Economic Forum) នៃការរៀបចំពិធីដាក់ឱ្យដំណើរការនូវប្រព័ន្ធទិន្នន័យ ស្តីពីសន្ទានកម្មខ្សែច្រវាក់ផ្គត់ផ្គង់សំដៅផ្តល់កិច្ចសម្រួលវិនិយោគ សម្រាប់អភិវឌ្ឍន៍ចីរភាព តាមប្រព័ន្ធវីដេអូ នៅថ្ងៃទី១២ ខែឧសភា ថា ប្រព័ន្ធទិន្នន័យនេះមានសារៈសំខាន់ណាស់ ដើម្បីផ្តល់នូវថ្នាលបច្ចេកវិទ្យាព័ត៌មានសម្រាប់សម្រួលដល់ការធ្វើសន្ទានកម្ម ខ្សែច្រវាក់ផ្គត់ផ្គង់ រវាងអ្នកផ្គត់ផ្គង់ក្នុងស្រុក និងអ្នកវិនិយោគ ដោយផ្តោតលើការផ្តល់កិច្ចសម្រួលវិនិយោគសម្រាប់អភិវឌ្ឍន៍ចីរភាព ។ឯកឧត្តមរដ្ឋមន្ត្រីប្រតិភូ បានស្នើសុំឱ្យតួអង្គពាក់ព័ន្ធទាំងអស់ចូលរួមប្រើប្រាស់ប្រព័ន្ធទិន្នន័យនេះឱ្យបានទូលំទូលាយ និងសង្ឃឹមយ៉ាងមុតមាំថា អ្នកវិនិយោគ និងក្រុមហ៊ុនបរទេស នឹងមើលឃើញថា កម្ពុជាកំពុងបង្កើតនូវបរិស្ថានវិនិយោគ ដែលស្វាគមន៍វត្តមានរបស់ពួកគេ ខណៈកម្ពុជាបានខិតខំជំរុញការវិនិយោគ ដែលមានទង្វើធុរកិច្ចប្រកបដោយការទទួលខុសត្រូវ និងមានចីរភាព។លោកបណ្ឌិត ម៉ាធូ ស្តេហ្វិនសុន (Matthew Stephenson) នាយកគោលនយោបាយ និងសហគមន៍នៃនាយកដ្ឋានវិនិយោគ និងពាណិជ្ជកម្មអន្តរជាតិ ថ្លែងថា ក្រុមហ៊ុនបរទេសដែលស្វែងរកការវិនិយោគ អនុលោមតាមគោលការណ៍បរិស្ថាន, សង្គម, និងអភិបាលកិច្ច អាចដាក់ការវិនិយោគនៅកម្ពុជា ជាមួយក្រុមហ៊ុនក្នុងស្រុក ដែលកំពុងប្រតិបត្តិការប្រកបដោយចីរភាព ហើយក្រុមហ៊ុនកម្ពុជាដទៃទៀត អាចបង្វែរការតម្រង់ទិសប្រតិបត្តិការធុរកិច្ចរបស់ខ្លួន ទៅរកការអភិវឌ្ឍប្រកបដោយចីរភាពកាន់តែច្រើនទៀត ដើម្បីទាក់ទាញការធ្វើធុរៈកិច្ច រួមគ្នាជាមួយនឹងក្រុមហ៊ុនបរទេស សំដៅលើកកម្ពស់ការធ្វើសន្ទានកម្មខ្សែច្រវាក់ផ្គត់ផ្គង់តំបន់ និងសកលលោក។ការជ្រើសរើសកម្ពុជា ជាដៃគូពិភាក្សារបស់វេទិកាសេដ្ឋកិច្ចពិភពលោក លើការផ្តល់កិច្ចសម្រួលវិនិយោគសម្រាប់ការអភិវឌ្ឍប្រកបដោយចីរភាព គឺឈរលើមូលដ្ឋានរឹងមាំរបស់កម្ពុជា ដែលមានគោលនយោបាយបើកចំហរដ៏ប្រសើរចំពោះការវិនិយោគ។វេទិកាសេដ្ឋកិច្ចពិភពលោកនិងកម្ពុជា បានធ្វើការរួមគ្នាដើម្បីចែករំលែកនូវរបកគំហើញ និងឧត្តម្មានុវត្តស្តីពីការផ្តល់កិច្ចសម្រួលវិនិយោគ ជាពិសេសដំណើរការនៃការរៀបចំប្រព័ន្ធទិន្នន័យស្តីពីសន្ធានកម្មខ្សែច្រវាក់ផ្គត់ផ្គង់ សំដៅផ្តល់កិច្ចសម្រួលវិនិយោគសម្រាប់អភិវឌ្ឍន៍ចីរភាពជាមួយប្រទេសដទៃទៀតក្នុងក្របខណ្ឌអង្គការពាណិជ្ជកម្មពិភពលោក និងក្របខណ្ឌតំបន់ដទៃទៀត។សូមបញ្ជាក់ថា កាលពីឆ្នាំ ២០១៩ ការអនុម័តគម្រោងវិនិយោគដោយ ក្រុមប្រឹក្សាអភិវឌ្ឍន៍កម្ពុជា បានកត់ត្រា ៩,៤០ ពាន់លានដុល្លារអាមេរិកក្នុងចំណោមនោះប្រទេសចិន បានវិនិយោគ ២,៧៥ ពាន់លានដុល្លារអាមេរិក បន្ទាប់មកទីក្រុងហុងកុង ៩១២,៥៥ លានដុល្លារអាមេរិក និងជប៉ុន ២៩៨,៨៤ លានដុល្លារ៕អត្ថបទ ៖ សុន រ៉ាឌី

សិប្បករខ្មែរ ជំរុញផ្សព្វផ្សាយផលិតផលផលិតក្នុងស្រុក តាមផ្សារទំនើបទាក់ទាញការគាំទ្រពីអ្នកប្រើប្រាស់

ភ្នំពេញ ៖ ផលិតផលខ្មែរជាច្រើនមុខ រាប់ចាប់ពី បន្លែ, ផ្លែឈើ, ទំនិញវេចខ្ចប់ និងសម្ភារៈសម្រាប់ប្រើប្រាស់ប្រចាំថ្ងៃ កំពុងមានវត្តមាននៅលើទីផ្សារទំនើបៗ ដើម្បីផ្សព្វផ្សាយដល់អ្នកប្រើប្រាស់។ សិប្បករក្នុងស្រុក លើកឡើងថា ផលិតផលក្នុងស្រុក កំពុងទទួលបានការគាំទ្រពីអតិថិជនជាបន្តបន្ទាប់។អតិថិជនក្នុងផ្សារទំនើប បានលើកឡើងនៅក្នុងកិច្ចសម្ភាសន៍ជាមួយអ្នកយកព័ត៌មាន នៅផ្សារទំនើបអ៊ីអនសែនសុខ ២ នៅថ្ងៃទី១២ ខែឧសភា ឆ្នាំ ២០២១ បានលើកឡើងស្រដៀងគ្នាថា ពួកគាត់សង្កេតឃើញផលិតផលខ្មែរ មានដាក់តាំងលក់នៅតាមផ្សារទំនើបជាបណ្តើរៗ ជាពិសេសនៅក្នុងផ្សារទំនើបអឺអននេះជាដើម។ មិនត្រឹមតែបានទិញ ផលិតផលរបស់ខ្មែរ សម្រាប់យកទៅផ្គត់ផ្គង់ការហូបចុក ពួកគាត់លើកឡើងថា នៅពេលបានឃើញផលិត ផលរបស់ខ្មែរមានដាក់លក់នៅតាមផ្សារទំនើបៗ បានន័យថា ផលិតផលខ្មែរមានការផលិតដោយអនុវត្តតាមបច្ចេកទេសនិងអនាម័យយ៉ាងត្រឹមត្រូវ ទើបផលិតផលទាំងនេះអាចជ្រៀតចូលក្នុងទីផ្សារទំនើបបាន ។ជុំវិញនិងការដាក់លក់ផលិតផលខ្មែរ, លោក រ័ត្ន ចន្នី អនុប្រធានផ្សារទំនើបអឺអន សែខសុខ ២ លើកឡើងថា ចំពោះកិច្ចសហការរវាងក្រសួងសេដ្ឋកិច្ច និងហិរញ្ញវត្ថុ ជាមួយផ្សារទំនើបអឺអន ក្នុងការដាក់តាំងលក់ផលិតផលនេះឡើង គឺជាការចូលរួមលើកកម្ពស់ផលិតផលក្នុងស្រុក ឲ្យប្រជាជនមានការទទួលស្គាល់ខ្លាំងជាងមុន, ការលើកទឹកចិត្តដល់អ្នកវិនិយោគ និងប្រជាកសិករ ឲ្យមានការដាំដុះកាន់តែច្រើន និងជាការរួមចំណែករកទីផ្សារជូនពួកគាត់ ដើម្បីជំរុញដល់កសិករផលិតចេញជាផលិតផលសម្រេចមានគុណភាព និងមានទីផ្សារសម្រាប់ការលក់ដូរ ។លោក បន្តថា នៅក្នុងរយៈពេលកន្លងមកនេះ ផលិតផលខ្មែរ ទាំងផលិតផលវិច ខ្ចប់ បន្លែផ្លែឈើ និងមុខទំនិញសម្រាប់ការប្រើប្រាស់ផ្សេងៗ កំពុងមានវត្តមាននៅលើទីផ្សារទំនើបអ៊ីអនជាបណ្តើរៗ។ ទន្ទឹមនេះ លោកបានលើកទឹកចិត្ត អ្នកផលិត កសិករ និងសហគមន៍កសិកម្ម អនុវត្តន៍ការចុះបញ្ជីឲ្យបានត្រឹមត្រូវ នៅតាមក្រសួងស្ថាប័នពាក់ព័ន្ធ ដើម្បីមានឱកាសនាំយកផលិតផលរបស់ខ្លួនចូលផ្សារទំនើប ជាពិសេសការនាំចូលផ្សារទំនើបអ៊ីអនជាដើម។សូមបញ្ជាក់ថា ចំពោះផលិតផលដែលកំពុងមានវត្តមានដាក់តាំងលក់នៅ ក្នុងពិព័រណ៍ផលិតក្នុងស្រុក ក្នុងផ្សារទំនើបអ៊ីអនរួមមាន ៖ ផ្លែស្រកានាគ, ផ្លែត្រសក់ផ្អែមលឿង, ផ្លែត្រសក់សំណាញ់, ត្រសក់ទឹកក្រូច, ស្វាយកែវរមៀត, ផ្លែប័រ, ធុរេន, សាវម៉ាវ, ម្នាស់ទឹកឃ្មុំ, ស្វាយកែវចិន, ត្រកួន, ខាត់ណា, ស្ពៃខ្មៅ, ស្ពៃតឿ, ត្រឡាច, ត្រសក់ជាដើម ។ ចំណែកផលិតវេចខ្ចប់មាន, ទឹកស៊ីអ៊ីវ, ទឹកម្ទេស, ទឹកត្រី, ស្ករត្នោត, ម្រេច, ការហ្វេ, ទឹកឃ្មុំ, មី, អង្ករ, ពង់មាន់, ពង់ទា និងទំនិញវេចខ្ចប់ជាច្រើនទៀត រួមជាមួយផលិតផលសម្រាប់ការប្រើប្រាស់ប្រចាំថ្ងៃជាច្រើនមុខផងដែរ ៕អត្ថបទ៖ សុន រ៉ាឌី

រោងចក្រសហគ្រាសបើកដំណើរការឡើងវិញ ជាបន្តបន្ទាប់ជាមួយនឹងការអនុវត្តវិធានសុខាភិបាល

ភ្នំពេញ ៖ ចំនួនរោងចក្រសហគ្រាសបានបើកដំណើរការឡើងវិញជាបន្តបន្ទាប់ ក្រោយផ្អាកការងារមួយរយៈពេល ដោយសារការរាលដាលនៃជំងឺឆ្លងកូវីដ១៩។ កម្មករ កម្មការិនី និងរោងចក្រសហគ្រាស អះអាងថា នឹងចូលរួមគោរពតាមការណែនាំរបស់រាជរដ្ឋាភិបាល ៣ការពារ និង៣កុំ ដើម្បីប្រឆាំង និងទប់ស្កាត់ការឆ្លងវីរុសកូវីដ១៩។ក្នុងកិច្ចសម្ភាសន៍ជាមួយទូរទស្សន៍ព័ត៌មាន ប៊ីធីវី នៅព្រឹកថ្ងៃ១៣ ឧសភា ឆ្នាំ២០២១នេះ ក្រុមកម្មករ កម្មការិនីនៅរោងចក្រផលិតស្បែកជើង ដ្រាហ្គន វីនស៊ូ ស្ថិតនៅផ្លូវវេងស្រេង ខណ្ឌមានជ័យ រាជធានីភ្នំពេញ បានរៀបរាប់ទាំងអារម្មណ៍សប្បាយរីករាយ និងសង្ឃឹមថា ការត្រឡប់ចូលធ្វើការវិញនេះ នឹងបន្តជារៀងរហូត ព្រោះថា ការឈប់សម្រាកនៅផ្ទះកន្លងមក ធ្វើឲ្យជួបការលំបាកជាច្រើន ដូចជាគ្មានប្រាក់ចំណូល និងមិនអាចដើរទៅណាបាន ដោយសារការព្រួយបារម្ភពីជំងឺឆ្លងកូវីដ១៩។កម្មករ កម្មការិនីខាងលើ ក៏បានអំពាវនាវទៅដល់ពលរដ្ឋទាំងអស់ ចូលរួមអនុវត្តតាមការណែនាំនូវវិធានការណ៍នានា ដែលរាជរដ្ឋាភិបាលដាក់ចេញ ជាពិសេសនៅពេលចេញក្រៅផ្ទះ គប្បីពាក់ម៉ាស់ លាងដៃឲ្យបានញឹកញាប់ និងរក្សាគម្លាតសង្គម ដើម្បីចៀសវាងពីការកើតមាន និងឆ្លងជំងឺដ៏កាចសាហាវកូវីដ១៩នេះ។លោក ស៊ីរ វុត្តី តំណាងរោងចក្រផលិតស្បែកជើង ដ្រាហ្គន វីងស៊ូ បានលើកឡើងថា ការសម្រេចបើកអាជីវកម្មឡើងវិញនេះ គឺមានការត្រួតពិនិត្យយ៉ាងត្រឹមត្រូវពីអាជ្ញាធរមូលដ្ឋាន និងបាញ់ថ្នាំសម្លាប់មេរោគ ដើម្បីធានាសុវត្ថិភាពដល់កម្មករនិយោជិត និងរោងចក្រទាំងមូលឲ្យមាននិរន្តរភាព ពោលមិនមែនបើក ដើម្បីបិទទៅវិញទេ។សូមបញ្ជាក់ថា រោងចក្រសហគ្រាសស្ថិតក្នុងតំបន់លឿងប៉ុណ្ណោះ ត្រូវបានអនុញ្ញាតឱ្យបើកដំណើរការឡើងវិញ។ ទន្ទឹមនឹងការកែសម្រួលវិធានការរបស់រដ្ឋបាលរាជធានីភ្នំពេញ តំបន់លឿងទុំ និងក្រហម បានរួមតូច ហើយចំនួនរោងចក្រសហគ្រាសបន្តបើកដំណើរការឡើងវិញជាបន្តបន្ទាប់៕អត្ថបទ ៖ ឈិត បូរ៉ាវី

ផ្សារទាំងអស់ក្នុងរាជធានីភ្នំពេញ អាចបន្តរយៈពេលបិទបន្ថែមទៀត ក្រោយថ្ងៃទី១៤ឧសភា

ភ្នំពេញ ៖ លោក មេត មាសភក្ដី អ្នកនាំពាក្យសាលារាជធានីភ្នំពេញ បានបញ្ជាក់ខ្លី នៅព្រឹកនេះថា មកទល់ពេលនេះ ពុំទាន់មានការសម្រេចឱ្យបើកដំណើរការផ្សារជាថ្មីវិញនោះទេ។ គិតមកត្រឹមថ្ងៃទី ១២ខែឧសភាឆ្នាំ ២០២១ នេះ សាលារាជធានីភ្នំពេញ ពុំទាន់មានការសម្រេចក្នុងការបើកដំណើរការផ្សារទូទាំងរាជធានីភ្នំពេញវិញនោះទេ។ នេះជាការបញ្ជាក់របស់ លោក មេត មាសភក្ដី ជាអ្នកនាំពាក្យរបស់សាលារាជធានីភ្នំពេញ នៅព្រឹកនេះ។ លោក បានបន្តថា ផ្សារទាំងអស់អាចបន្តបិទ តែក្នុងរយៈពេលប៉ុន្មានទៀត ក៏មិនទាន់មានការសម្រេចនោះទេ។ ចំពោះលក្ខខណ្ឌ រឺ ការកំណត់ជាវិធានការតឹង រឹងបែបណា ចំពោះការបើកដំណើរការផ្សារជាថ្មី ក៏មិនទាន់មានការបញ្ជាក់ច្បាស់លាស់បន្ថែមនោះទេ។ ការបញ្ជាក់បែបនេះ គឺស្របពេលដែលការសម្រេចកន្លងទៅរបស់រដ្ឋបាលរាជធានីភ្នំពេញ ជុំវិញការផ្អាកដំណើរការផ្សារ គឺបន្តបិទរហូតដល់ថ្ងៃទី ១៤ខែឧសភាឆ្នាំ ២០២១។កំឡុងពេលនៃការផ្អាកផ្សារជាបណ្ដោះអាសន្នមួយរយៈមកនេះ គណៈកម្មការផ្សារនីមួយបានបំពេញសកម្មភាពមួយចំនួន ដើម្បីត្រៀមសម្រាប់ការបើកដំណើរការជាថ្មី បើសិនមានការអនុញ្ញាតពីសាលារាជធានីភ្នំពេញ។ ជាការងារសកម្មភាពរបស់ ផ្សារបឹងកេងកង តាមការលើកឡើងរបស់លោក ឯក និមល ជាប្រធានផ្សារបានបញ្ជាក់ប្រាប់នៅព្រឹកនេះថា គណៈកម្មការផ្សារបានរៀបចំការងារសណ្ដាប់ធ្នាប់ទូទៅជាប្រចាំ និងលើកទឹកចិត្តឱ្យអាជីវករបន្តការពារខ្លួន និងទទួលយកការចាក់វ៉ាក់សាំងកូវីដ-១៩ ដើម្បីសុវត្ថិភាពផងដែរ។សម្រាប់ផ្សារ ច្បារអំពៅវិញ នៅព្រឹកនេះគណៈកម្មការផ្សារកំពុងរៀបចំកន្លែងលក់ឱ្យមានរបៀប និងរៀបចំផ្លូវជុំវិញផ្សារឱ្យមានគម្លាត ដោយទុកទំហំផ្លូវឱ្យបាន ៤ម៉ែត្រ ដោយកន្លងមកផ្លូវជុំវិញផ្សារគឺមានភាពចង្អៀត សល់ទំហំត្រឹមតែប្រមាណ១ម៉ែត្រកន្លះតែប៉ុណ្ណោះ។ លើកពីនេះផ្សារ ក៏បានលាងសម្អាត និងបាញ់ថ្នាំសម្លាប់មេរោគរួចរាល់ផងដែរ។ ក្នុងកំឡុងពេលបន្តបិទនេះ លោកជាប្រធានផ្សារសំណូមពរឱ្យអាជីវករ បន្តការអត់ធ្មត់ និងលើកទឹកចិត្តឱ្យអាជីវករគ្រប់គ្នាទទួលការចាក់វ៉ាក់សាំងឱ្យបានមុនបើកដំណើរការផ្សារជាថ្មី។ផ្អែកតាមសេចក្ដីជូនដំណឹងរបស់សាលារាជធានីភ្នំពេញ កាលពីថ្ងៃទី ៦ឧសភា បង្ហាញថា ផ្សាររដ្ឋក៏ដូចជាផ្សារមិនរៀបរយទាំងអស់ក្នុងរាជធានីភ្នំពេញ គឺត្រូវបន្តផ្អាកជាបណ្ដាអាសន្នចាប់ពីថ្ងៃទី ៨ ខែឧសភាដល់ថ្ងៃទី ១៤ ខែឧសភា ឆ្នាំ២០២១ ដើម្បីប្រយុទ្ធប្រឆាំងនឹងការឆ្លងរាលដាលជំងឺកូវីដ-១៩។ យ៉ាងណាម៉ិញ លោក មេត មាសភក្ដី អ្នកនាំពាក្យសាលារាជធានីភ្នំពេញ បានបញ្ជាក់ខ្លីនៅព្រឹកនេះថា ផ្សារទាំងអស់នៅរាជធានីភ្នំពេញ អាចបន្តរយៈពេលបិទបន្ថែមទៀត តែពុំទាន់មានការកំណត់រយៈពេលច្បាស់លាស់នោះទេ។ ចំពោះលក្ខខណ្ឌ រឺការកំណត់ជាវិធានការតឹងរឹងបែបណា ចំពោះការបើកដំណើរការផ្សារជាថ្មី ក៏ពុំទាន់មានការបញ្ជាក់ច្បាស់លាស់ផងដែរ៕អត្ថបទ ៖ គឹមហុក

ទុរេនឆ្នាំនេះនៅតែមានតម្លៃខ្ពស់ ខណៈតម្រូវការទុរេនដាំក្នុងស្រុកកើនឡើង

ភ្នំពេញ ៖ ក្រុមអាជីវករលក់ផ្លែទុរេននៅរាជធានីភ្នំពេញ បានលើកឡើងស្រដៀងគ្នាថា តម្លៃទុរេននៅតែខ្ពស់ប្រហាក់ប្រហែល នឹងតម្លៃឆ្នាំមុន ស្របពេលដែលតម្រូវការទុរេនដាំក្នុងស្រុកក្នុងមួយរដូវៗ កើនឡើង។លោក សួស គន្នី អាជីវករលក់ផ្លែឈើជាច្រើនប្រភេទ នៅតំបន់ភ្នំពេញថ្មី ខណ្ឌសែនសុខ បានប្រាប់ទូរទស្សន៍ព័ត៌មាន ប៊ីធីវីថា តម្លៃទុរេនលក់រាយឆ្នាំនេះ ប្រៀបធៀបនឹងឆ្នាំកន្លងទៅគឺមានតម្លៃប្រហាក់ប្រហែល ទៅតាមប្រភេទផ្លែទុរេនដែលយកពីតំបន់ខុសៗគ្នា។ ទុរេនមកពីខេត្តកំពង់ចាមថ្លៃ ២៨,០០០រៀល ក្នុង១គីឡូ ទុរេនមកពីខេត្តកោះកុង ប្រហែល ៣០,០០០ម៉ឺនរៀល ក្នុង១គីឡូ ដោយឡែក ទុរេនមកពីខេត្តកំពត ថ្លៃ៣៣,០០០រៀល ក្នុង១គីឡូ។ ចំណែកអ្នកស្រី ប៊ុន វ៉ា ដែលបាននាំយកផ្លែទុរេនដោយផ្ទាល់ពីចំការរបស់ខ្លួនផង និងទិញបន្ថែមពីចំការផ្សេងទៀតនៅខេត្តកំពត ដើម្បីយកមកលក់នៅទីក្រុងភ្នំពេញ បានប្រាប់ឱ្យដឹងថា ទុរេនដាំនៅខេត្តកំពត គឺមិនបានធ្លាក់ថ្លៃ ដោយសារពិបាកថែទាំ និងខូចខាតដោយសារកត្តាអាកាសធាតុក្តៅ ដែលផ្តល់ទិន្នផលធ្លាក់ចុះ។ សព្វថ្ងៃ ដំណាំទុរេនត្រូវបានដាំដុះច្រើនជាងគេនៅខេត្តកំពត កំពង់ចាម ត្បូងឃ្មុំ បាត់ដំបង កោះកុង មណ្ឌលគិរី និងខេត្តពោធិ៍សាត់ ។ ចំពោះរសជាតិនៃទុរេនវិញ គឺទុរេនខេត្តកំពត ត្រូវបានគេទទួលស្គាល់ថា ផ្អែមឈ្ងុយ លើទុរេនដែលដាំនៅខេត្តផ្សេងទៀត ឬទុរេននាំចូលពីប្រទេសជិតខាង។ ទោះបីមានចំការទុរេន នៅតាមបណ្តាខេត្តមួយចំនួនក៏ដោយ កម្ពុជានៅតែនាំចូលទុរេនពីប្រទេសជិតខាង មាន វៀតណាម និងថៃ ដើម្បីផ្គត់ផ្គង់ក្នុងស្រុក។ ការនាំចូលទុរេនពីក្រៅប្រទេសនេះ មិនបានទាញតម្លៃទុរេនក្នុងស្រុកធ្លាក់ចុះនោះទេ ដោយសារតម្រូវការទុរេនដាំក្នុងស្រុកកើនឡើង ជាពិសេសទិន្នផលទុរេនដាំក្នុងស្រុកនៅទាបជាតម្រូវការ។គួរបញ្ជាក់ថា ក្រសួងកសិកម្ម រុក្ខាប្រមាញ់ និងនេសាទ និងក្រសួងពាណិជ្ជកម្ម ធ្លាប់បានលើកឡើងពីគម្រោងបង្កើតសមាគមទុរេនខេត្តកំពត និងសិក្សានិងពិនិត្យលទ្ធភាពចុះបញ្ជីម៉ាកទុរេន ដើម្បីជំរុញការដាំទុរេនក្នុងស្រុក មិនត្រឹមតែសម្រាប់ផ្គត់ផ្គង់ក្នុងស្រុកនោះទេ ប៉ុន្តែថែមទាំងសម្រាប់នាំចេញទៅក្រៅប្រទេស៕អត្ថបទ ៖ ឈិត បូរ៉ាវី

បណ្ដាញសង្គម

ព័ត៌មានថ្មីៗ

កម្ពុជា-អូស្រ្តាលី ប្រកាសផ្លូវការនូវផែនការភាពជាដៃគូសម្រាប់ការអភិវឌ្ឍ ដើម្បីជំរុញកំណើនសេដ្ឋកិច្ច

រូបភាពចក្រវាលលើកដំបូងរបស់តេឡេស្កូបអង្កេត Rubin បង្ហាញពីយុគសម័យនៃរបកគំហើញហ្វូងដួងតារាមិននឹកស្មានដល់

ជនប៉ាឡេស្ទីននាំគ្នាស្វែងរកជំនួយស្បៀងអាហារនៅតំបន់ហ្កាហ្សា ខណៈវិបត្តិស្រេកឃ្លានកើនឡើង

ភាពស្ងប់ស្ងាត់បានវិលត្រឡប់មកកាន់កាតាវិញ ក្រោយការវាយប្រហារអ៊ីរ៉ង់លើមូលដ្ឋានទ័ពអាមេរិក

លោកស្រី von der Leyen៖ វិស័យការពារជាតិអឺរ៉ុប នៅទីបំផុតបានងើបឡើងហើយ

ពលរដ្ឋហ្កាហ្សារងរបួសដោយសារបាញ់ប្រហាររបស់អ៊ីស្រាអែលនិយាយថា នេះគឺជាអាហារមានរសជាតិឈាម

រដ្ឋមន្ត្រីការពារជាតិឥណ្ឌា នឹងធ្វើដំណើរទៅចិន ដើម្បីចូលរួមកិច្ចប្រជុំកំពូល ក្នុងតំបន់

រដ្ឋអាជ្ញាពិសេសកូរ៉េខាងត្បូង ស្វែងរកដីកាចាប់ខ្លួនអតីតប្រធានាធិបតី លោក Yoon

ការវាយប្រហារមីស៊ីលរុស្ស៊ីសម្លាប់មនុស្ស ៩នាក់ បណ្តាលឲ្យខូចខាតវិហារ និងសាលារៀនៅតំបន់ Dnipropetrovsk

ឯកឧត្តម គួច ចំរើន៖ប្រជាពលរដ្ឋខ្មែរគ្រប់ទិសទីគាំទ្រយ៉ាងខ្លាំងក្លាចំពោះវីរៈភាពរបស់កងកម្លាំងជួរមុខ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

សេដ្ឋកិច្ច និង កសិកម្ម

អាជីវកម្មហាងអាហារ និងភេសជ្ជៈនៅភ្នំពេញ រំពឹងថា អាជីវកម្មនឹងដំណើរធម្មតាឡើងវិញឆាប់ៗ

រដ្ឋមន្ត្រីពាណិជ្ជកម្មកម្ពុជា និងអូស្ត្រាលី ពិភាក្សាគ្នាពីជំរុញការអភិវឌ្ឍវិស័យពាណិជ្ជកម្ម

ពាណិជ្ជកម្មទ្វេភាគីកម្ពុជា-កូរ៉េខាងត្បូង មានទំហំទឹកប្រាក់ជាង៣១៩លានដុល្លារក្នុងរយៈពេលបួនខែដើមឆ្នាំ

កម្ពុជារំពឹងទាក់ទាញវិនិយោគបន្ថែមពីសហរដ្ឋអាមេរិកលើវិស័យឧស្សាហកម្មធុនមធ្យម

ទេសចរក្នុងស្រុកចាប់ផ្តើមងើបឡើងវិញបន្តិច ដោយការប្រុងប្រយ័ត្នខ្ពស់ ក្រោយរមណីយដ្ឋានទេសចរណ៍ខ្លះបើកឡើងវិញ

រាជរដ្ឋាភិបាលកម្ពុជា ដាក់ដំណើរការប្រព័ន្ធទិន្នន័យតភ្ជាប់ទំនាក់ទំនងវិនិយោគិនក្នុងស្រុកនិងបរទេស

សិប្បករខ្មែរ ជំរុញផ្សព្វផ្សាយផលិតផលផលិតក្នុងស្រុក តាមផ្សារទំនើបទាក់ទាញការគាំទ្រពីអ្នកប្រើប្រាស់

រោងចក្រសហគ្រាសបើកដំណើរការឡើងវិញ ជាបន្តបន្ទាប់ជាមួយនឹងការអនុវត្តវិធានសុខាភិបាល

ផ្សារទាំងអស់ក្នុងរាជធានីភ្នំពេញ អាចបន្តរយៈពេលបិទបន្ថែមទៀត ក្រោយថ្ងៃទី១៤ឧសភា

ទុរេនឆ្នាំនេះនៅតែមានតម្លៃខ្ពស់ ខណៈតម្រូវការទុរេនដាំក្នុងស្រុកកើនឡើង

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

សេដ្ឋកិច្ច និង កសិកម្ម

អាជីវកម្ម​ហាង​អាហារ ​និង​ភេសជ្ជៈ​នៅ​ភ្នំពេញ ​រំពឹងថា​ អាជីវកម្ម​នឹង​ដំណើរ​ធម្មតា​ឡើងវិញ​ឆាប់ៗ

រដ្ឋមន្ត្រី​ពាណិជ្ជកម្ម​កម្ពុជា ​និង​អូស្ត្រាលី ​ពិភាក្សាគ្នា​ពី​ជំរុញ​ការ​អភិវឌ្ឍ​វិស័យ​ពាណិជ្ជកម្ម

កម្ពុជា​រំពឹង​ទាក់ទាញ​វិនិយោគ​បន្ថែម​ពី​សហរដ្ឋអាមេរិក​លើ​វិស័យ​ឧស្សាហកម្ម​ធុន​មធ្យម​

រោងចក្រ​សហគ្រាស​បើក​ដំណើរការ​ឡើងវិញ ​ជា​បន្តបន្ទាប់​ជា​មួយនឹង​ការអនុវត្ត​វិធាន​សុខាភិបាល​

ផ្សារ​ទាំងអស់​ក្នុង​រាជធានី​ភ្នំពេញ ​អាច​បន្ត​រយៈពេល​បិទ​បន្ថែមទៀត​ ក្រោយ​ថ្ងៃទី១៤​ឧសភា​

ទុរេន​ឆ្នាំនេះ​នៅ​តែមាន​តម្លៃ​ខ្ពស់ ​ខណៈ​តម្រូវការ​ទុរេន​ដាំ​ក្នុងស្រុក​កើនឡើង

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

អាជីវកម្មហាងអាហារ និងភេសជ្ជៈនៅភ្នំពេញ រំពឹងថា អាជីវកម្មនឹងដំណើរធម្មតាឡើងវិញឆាប់ៗ

រដ្ឋមន្ត្រីពាណិជ្ជកម្មកម្ពុជា និងអូស្ត្រាលី ពិភាក្សាគ្នាពីជំរុញការអភិវឌ្ឍវិស័យពាណិជ្ជកម្ម

កម្ពុជារំពឹងទាក់ទាញវិនិយោគបន្ថែមពីសហរដ្ឋអាមេរិកលើវិស័យឧស្សាហកម្មធុនមធ្យម

រោងចក្រសហគ្រាសបើកដំណើរការឡើងវិញ ជាបន្តបន្ទាប់ជាមួយនឹងការអនុវត្តវិធានសុខាភិបាល

ផ្សារទាំងអស់ក្នុងរាជធានីភ្នំពេញ អាចបន្តរយៈពេលបិទបន្ថែមទៀត ក្រោយថ្ងៃទី១៤ឧសភា

ទុរេនឆ្នាំនេះនៅតែមានតម្លៃខ្ពស់ ខណៈតម្រូវការទុរេនដាំក្នុងស្រុកកើនឡើង