នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រធានសហព័ន្ធស្រូវអង្ករ៖ ការនំាចេញកម្ពុជាក្នុងឆ្នាំ២០២៦នេះ នឹងអាចសម្រេចបាន ១ លានតោន
ឆមាសទី១ឆ្នាំ២០២៦ កម្ពុជានាំចេញគ្រាប់ស្វាយចន្ទី មានទឹកប្រាក់ជាង ១,១ ពាន់លានដុល្លារអាមេរិក
មូលនិធិអភិវឌ្ឍន៍ EDFមើលឃើញថា ធុរកិច្ចបណ្តុះបណ្ដាលថ្មី និងSME ជាក្បា​ល​ម៉ាស៊ីន​ជំរុញ​កំណើន​សេដ្ឋកិច្ច​កម្ពុជា
លំហូរទឹកប្រាក់វិនិយោគចូលកម្ពុជានៅឆមាសទី១ ឆ្នាំ២០២៦ មាន ៤.៣ ប៊ីលានដុល្លារ កើនឡើង ៧ដង

សេដ្ឋកិច្ច និង កសិកម្ម

សហគមន៍កសិកម្មទំនើបនឹងកើនឡើងដល់៦០ នៅចុងឆ្នាំ២០២៦ ខណៈបច្ចុប្បន្នមានចំនួន៣៨

2026/07/21 10:31:14 pm        371
Facebook Telegram Linkin
ក្រសួងកសិកម្ម រុក្ខាប្រមាញ់ និងនេសាទ បានដាក់ក្តីរំពឹងទុកថា នៅចុងឆ្នាំ២០២៦នេះ ចំនួនសហគមន៍កសិកម្មទំនើប អាចនឹងរត់ទៅដល់ចំនួនប្រហែល៦០ ដោយសារអនាគតនឹងមានគម្រោងថ្មីមួយទៀត ដើម្បីជួយទៅដល់ប្រជាពលរដ្ឋក្រីក្រ និងងាយរងហានិភ័យ និងខណៈបច្ចុប្បន្នសហគមន៍កសិកម្មទំនើបមានចំនួន៣៨រួចហើយ។ នៅក្នុងកិច្ចសម្ភាសន៍កម្មវិធី “ពីកម្ពុជា” ជាមួយ ប៊ីធីវី កាលពីកន្លងទៅថ្មីៗនេះ ឯកត្តម ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ឱ្យដឹងថា គិតក្នុងរយៈពេលជាង២ឆ្នាំ នៃការបង្កើតគម្រោងសហគមន៍កសិកម្មទំនើប រាជរដ្ឋាភិបាលកម្ពុជាតាមរយៈក្រសួងកសិកម្ម កំពុងបន្តពន្លឿនការរៀបចំ ដើម្បីលើកកម្ពស់សេដ្ឋកិច្ចកសិករ និងកែប្រែទម្រង់កសិកម្មពីបែបប្រពៃណី ទៅជាសហគ្រាសកសិកម្មដ៏រឹងមាំ។ ហើយគិតមកដល់ពេលនេះ សហគមន៍កសិកម្មទំនើបមានចំនួន៣៨ ក្នុងខេត្តចំនួន១៤ ដោយគ្របដណ្តប់លើដំណាំ និងកសិផលសំខាន់ៗចំនួន ៦ ប្រភេទ រួមមាន៖ ស្រូវ ស្វាយចន្ទី បន្លែ ម្រេច មាន់ស្រែ និងមៀនប៉ៃលិន។ ឯកឧត្តមអ្នកនាំពាក្យ បានបញ្ជាក់ជាថ្មីទៀតថា ការបង្កើតសហគមន៍កសិកម្មទំនើបនេះឡើង ក្នុងគោលដៅសំខាន់ៗ គឺដើម្បីជួយដល់ប្រជាកសិករតូចៗដែលមិនមានលទ្ធភាពធ្វើកសិកម្មប្រកបដោយប្រសិទ្ធិភាពសេដ្ឋកិច្ច អាចថា ខ្វះទុន ខ្វះបច្ចេកទេស ខ្វះទីផ្សារ ខ្វះការគាំទ្រ ថ្លៃផលិតខ្ពស់ជាដើម ជាពិសេស ដើម្បីដោះស្រាយបញ្ហាប្រឈមជាប្រព័ន្ធក្នុងវិស័យកសិកម្ម និងជំរុញសេដ្ឋកិច្ចជាតិ។ ដើម្បីបង្កើនការគាំទ្រដល់ការអភិវឌ្ឍសហគមន៍កសិកម្មទំនើប ក្រសួងកសិកម្ម រុក្ខាប្រមាញ់ និងនេសាទ បានពង្រីកកិច្ចសហការជាមួយដៃគូពាក់ព័ន្ធជាច្រើនជាមួយវិស័យឯកជននានា ដើម្បីធ្វើផលិតកម្មកសិកម្មតាមកិច្ចសន្យាទិញកសិផលពីសហគមន៍កសិកម្មទំនើបនៅកម្ពុជាផងដែរ។ លើសពីនេះ ក្រសួងក៏បានកៀរគរធនធានពីប្រភពផ្សេងៗជួយដល់សហគមន៍កសិកម្មទំនើប ដោយបានសម្រប សម្រួលស្វែងរកដៃគូពាក់ព័ន្ធ និងគម្រោងជាច្រើនផងដែរ។ សូមជំរាបជូនទៀតថា ក្រៅពីសហគមន៍កសិកម្មទំនើបនេះ កាលពីថ្ងៃទី១ ខែកក្កដា ឆ្នាំ២០២៦កន្លងទៅ រាជរដ្ឋាភិបាលកម្ពុជា បានប្រកាសទទួលស្គាល់ «សហភាពសហគមន៍កសិកម្មទំនើបកម្ពុជា» ដែលជាយន្តការថ្មីមួយទៀត ដើម្បីពង្រឹងបន្ថែមលើរចនាសម្ព័ន្ធដែលមានស្រាប់ឱ្យកាន់តែមានភាពរឹងមាំ ក្នុងគោលបំណងធានាបាននូវការតភ្ជាប់ទីផ្សារ ការគ្រប់គ្រងហិរញ្ញវត្ថុ ការសម្របសម្រួលបច្ចេកទេស និងការរៀបចំផែនការយុទ្ធសាស្ត្រវិនិយោគ។ ជាពិសេស ការដឹកនាំប្រកបដោយសមត្ថភាពវិជ្ជាជីវៈ និងតម្លាភាពខ្ពស់៕ អត្ថបទ៖ ឈិត បូរ៉ាវី  

ឆមាសទីមួយឆ្នាំនេះ គយប្រមូលចំណូលជូនជាតិបានចំនួនជាង ៦ពាន់ប៊ីលានរៀល មានការកើនឡើង ៤,៥ភាគរយ

2026/07/21 09:30:17 pm        354
Facebook Telegram Linkin
យោងតាមអគ្គនាយកដ្ឋានគយ និងរដ្ឋាករកម្ពុជា បានឱ្យដឹងថា គិតក្នុងឆមាសទី១ ឆ្នាំ២០២៦ បានសម្រេចចំណូលចំនួនជាង ៦ពាន់ប៊ីលានរៀល (៦ ២៧៨,២ ប៊ីលានរៀល) កើនឡើងប្រមាណ ៤,៥% បើធៀបរយៈពេលដូចគ្នាទៅនឹងឆ្នាំ២០២៥ ដែលលើសផែនការកំណត់ដោយច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២៦។ក្នុងកិច្ចប្រជុំបូកសរុបការងារប្រចាំឆមាសទី១ ឆ្នាំ២០២៦ និងទិសដៅអនុវត្តបន្ត ក្រោមអធិបតីភាពដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ កាលពីព្រឹកថ្ងៃទី២១ ខែកក្កដានេះ ឯកឧត្ដមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី ជាអគ្គនាយកនៃអគ្គនាយកដ្ឋានគយនិងរដ្ឋាករ​កម្ពុជា បានរាយការណ៍ឱ្យដឹងថា សមាសភាគចំណូលពីទំនិញចម្រុះមានប្រមាណ៣៩%, យានយន្តនិងគ្រឿងចក្រមានប្រមាណ ៣៥%, ប្រេងឥន្ធនៈនិងថាមពលមានប្រមាណ ១៨,៥%, និងសម្ភារសំណង់និងកម្រៃផ្សេងៗ មានប្រមាណ ៧,៥% នៃចំណូលសរុប។ ឯកឧត្តម បានគូសរំលេច​នូវ​ការ​ប្រែប្រួលរចនាសម្ព័ន្ធចំណូលប្រមូលដោយគយ ជាពិសេស គឺការថយចុះចំណូលពីប្រេងឥន្ធនៈនិងឧស្ម័ន បណ្តាលមកពីការដាក់ពន្ធនិងអាករជាបន្ទុករដ្ឋលើការនាំចូលមុខទំនិញនេះ ដែលបានអនុវត្តចាប់ពីខែមីនា ឆ្នាំ២០២៦កន្លងមក និងការកើនឡើងនៃចំណូលពីក្រុមទំនិញចម្រុះ ដែលជាលទ្ធផល​នៃការ​អនុវត្តវិធានការមុតស្រួចស្តីពីការបង្ការនិងបង្ក្រាបអំពើរត់គេចពន្ធ និងការពង្រឹងអភិបាលកិច្ច​របស់អគ្គនាយកដ្ឋានគយនិងរដ្ឋាករកម្ពុជា។ ក្រៅពីការងារប្រមូលចំណូល ឯកឧត្ដមបណ្ឌិត បានបញ្ជាក់ថា ក៏សម្រេច​បាននូវលទ្ធផលល្អប្រសើរលើការងារផ្សេងទៀត ជាពិសេសពាក់ព័ន្ធកិច្ចសម្រួលពាណិជ្ជកម្ម មាន​ដូចជា ការបន្តពង្រីកមុខងារប្រព័ន្ធស្វ័យប្រវត្តិកម្ម, ការធ្វើសាមញ្ញកម្មនីតិវិធីគយដើម្បីសម្រួលដល់​វិស័យបញ្ញើឆាប់រហ័ស និង SMEs, ការបង្កើនចំនួនប្រតិបត្តិករសេដ្ឋកិច្ចបានទទួលការអនុញ្ញាត, ការបង្កើនកិច្ចសហការជាមួយរដ្ឋបាលគយនៃបណ្តាប្រទេសជាដៃគូ និងកិច្ចសហការជាមួយវិស័យឯកជន ព្រមទាំងការកាត់បន្ថយចំណាយក្នុងការបំពេញបែបបទគយ ជាដើម។ ជាមួយគ្នានេះ អគ្គនាយកដ្ឋានគយនិងរដ្ឋាករកម្ពុជាក៏បានធ្វើជាម្ចាស់ផ្ទះរៀបចំកិច្ចប្រជុំអគ្គនាយកគយអាស៊ានលើកទី៣៥ និងកិច្ចប្រជុំពាក់ព័ន្ធនៃក្រុមការងារបច្ចេកទេសអាស៊ាន ផងដែរ។ ក្នុងពិធីបើកកិច្ចប្រជុំនេះ ឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន បានកោតសរសើរ និងវាយតម្លៃខ្ពស់ចំពោះលទ្ធផលការងារដែលអគ្គនាយកដ្ឋានសម្រេចបាន ជាពិសេសក្នុងកាលៈទេសៈ នៃបញ្ហាប្រឈមធំៗមួយចំនួនដែលប៉ះពាល់ដល់ការប្រមូលចំណូលគយ។ ឯកឧត្ដមអគ្គបណ្ឌិតសភាចារ្យ ក៏បានលើកទឹកចិត្តដល់ថ្នាក់ដឹកនាំ និងមន្ត្រីគយនិងរដ្ឋាករគ្រប់ជាន់ថ្នាក់ ឱ្យបន្តយកចិត្តទុកដាក់ខិតខំប្រឹងប្រែងអនុវត្តតួនាទី ភារកិច្ចរបស់ខ្លួនប្រកបដោយស្មារតីទទួលខុសត្រូវ ក្នុងការអនុវត្តវិធានការនានាពាក់ព័ន្ធនឹងការងារគយ ដែលក្រសួងសេដ្ឋកិច្ចនិងហិរញ្ញវត្ថុ ក៏ដូចជារាជរដ្ឋាភិបាលបានដាក់ចេញ ជាពិសេសវិធានការមុតស្រួចក្នុងការបង្ការនិងបង្ក្រាប​អំពើរត់គេចពន្ធ និងការពង្រឹងអភិបាលកិច្ច ដើម្បីឈានទៅសម្រេចបានលទ្ធផលល្អប្រសើរទាំងលើការងារប្រមូល​ចំណូល ក៏ដូចជាការងារគាំទ្រផ្សេងទៀត សំដៅកែលម្អបរិយាកាសធុរកិច្ច និងវិនិយោគឱ្យកាន់​តែ​ប្រសើរ៕ អត្ថបទ៖ ឈិត បូរ៉ាវី

គិតត្រឹមខែមិថុនាឆ្នាំនេះ ជប៉ុន​បានផ្តល់ហិរញ្ញប្បទានជាង ៣,៥ ពាន់លាន​ដុល្លារ​អនុវត្ត​គម្រោង​នានា​នៅកម្ពុជា

2026/07/16 09:50:00 pm        386
Facebook Telegram Linkin
គិតដល់ត្រឹមខែ មិថុនា ឆ្នាំ២០២៦, រដ្ឋាភិបាលជប៉ុន​បានផ្តល់ហិរញ្ញប្បទានដល់ការអនុវត្ត គម្រោង/កម្មវិធី មានចំនួន ២៥ គិតជា ទឹកប្រាក់សរុបប្រមាណ ៣ ៥១៥ លានដុល្លារអាម៉េរិក ក្នុងនោះគម្រោងកំពុងដំណើរការ មានចំនួន ១២ និងគម្រោងត្រូវបានបញ្ចប់មាន ចំនួន១៣។ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្រ្តីក្រសួងសេដ្ឋកិច្ច ​និងហិរញ្ញវត្ថុ នៅថ្ងៃទី១៥ ខែកក្កដា ឆ្នាំ២០២៦, បានទទួលជួបសម្តែងការគួរសមជាមួយ ឯកឧត្តម UENO Atsushi ក្នុងឱកាសដែលឯកឧត្តមបញ្ចប់អាណត្តិដ៏ឧត្តុង្គឧត្តម ជាឯកអគ្គរាជទូតវិសាមញ្ញ និងពេញសមត្ថភាពនៃប្រទេសជប៉ុន ប្រចាំនៅព្រះរាជាណាចក្រកម្ពុជា, ក្នុងនោះឯកឧត្តមអគ្គបណ្ឌិតសភា- ចារ្យ បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលជប៉ុន ដែលតែងតែគាំទ្រ និងរួមចំណែកយ៉ាងធំធេងដល់ការកសាងឡើងវិញ ព្រះរាជាណាចក្រកម្ពុជា ចាប់តាំងពីដំណើរការស្វែងរកសន្តិភាពសម្រាប់កម្ពុជា រួមចំណែកដល់សកម្មភាពអភិវឌ្ឍន៍ដល់សេដ្ឋកិច្ច និង សង្គមកម្ពុជារហូតដល់បច្ចុប្បន្ន។ ជប៉ុនបានផ្តល់ហិរញ្ញប្បទានអភិវឌ្ឍន៍ផ្លូវការ ដោយផ្តោតអាទិភាព ក្នុងការផ្តល់ឥណទានសម្បទាន ស្របតាមយុទ្ធសាស្រ្ត, ផែនការយុទ្ធសាស្ត្រអភិវឌ្ឍន៍ជាតិរបស់រាជរដ្ឋាភិបាលកម្ពុជា និងកម្មវិធីអភិវឌ្ឍន៍អាទិភាពនានា។ ជាក់ស្តែងតាមរយៈទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ដែលជាភ្នាក់ងារអនុវត្ត, គិតដល់ត្រឹម ខែ មិថុនា ឆ្នាំ២០២៦នេះ, មានកិច្ចព្រមព្រៀងឥណទានសម្បទានពីជប៉ុនចំនួន ៣៩ ក្នុងនោះការផ្តល់ហិរញ្ញប្បទានដល់គម្រោងចំនួន ២៥ មានទឹកប្រាក់សរុបជាង ៤២២ ប៊ីលានយ៉េនជប៉ុន ត្រូវជាប្រមាណ ៣ ៥១៥ លានដុល្លារអាម៉េរិក ដោយគម្រោងកំពុងដំណើរ ការមានចំនួន១២ និងគម្រោងត្រូវបានបញ្ចប់មានចំនួន១៣។ ឯកឧត្តមអគ្គបណ្ឌិតសភាចារ្យឧបនាយករដ្ឋមន្ត្រី ក៏បានថ្លែងអំណរគុណចំពោះឯកឧត្តម UENO Atsushi ដែលបានខិតខំប្រឹង ប្រែងអស់ពីកំលាំងកាយចិត្ត និងសម្រេចបានស្នាដៃដ៏ធំ នៅក្នុងការបំពេញភារៈកិច្ចជាឯកអគ្គរាជទូតវិសាមញ្ញា និងពេញសមត្ថភាពនៃ ប្រទេសជប៉ុន ប្រចាំនៅព្រះរាជាណាចក្រកម្ពុជា នៅក្នុងអាណត្តិរបស់ឯកឧត្តម ចាប់ពីឆ្នាំ២០២៣ ដល់ដំណាច់ឆ្នាំ២០២៦នេះ ដោយ ក្នុងនោះកម្ពុជាទទួលបានហិរញ្ញប្បទានសរុបចំនួន ២៦ គម្រោង/កម្មវិធី ដែលមានឥណទានសម្បទានសរុបចំនួន ១៤ គម្រោង/កម្មវិធី និងហិរញ្ញប្បទានឥតសំណងសរុបចំនួន ១២ គម្រោង/កម្មវិធី មានទឹកប្រាក់សរុបប្រមាណ ១ ៦៥២ លានដុល្លារអាម៉េរិក។  ចំណែកនៅឆ្នាំ២០២៦នេះ, ឥណទានសម្បទានសរុបចំនួន ៦ គម្រោង/កម្មវិធី មានទឹកប្រាក់សរុបប្រមាណ ៧០០ លានដុល្លារ អាម៉េរិក និងហិរញ្ញប្បទានឥតសំណងចំនួន ៣ គម្រោង/កម្មវិធី មានទឹកប្រាក់សរុប​ប្រមាណ ១១ លានដុល្លារអាម៉េរិក។ ជាមួយគ្នានេះ, រដ្ឋាភិបាលជប៉ុនក៏បានសម្រេចផ្តល់កញ្ចប់ឥណទានសម្បទានថ្មី ចំនួន ១ កម្មវិធីបន្ថែមទៀត មានទឹកប្រាក់ចំនួន ១៨៨ លានដុល្លារ អាម៉េរិក ដែលគ្រោងនឹងចុះហត្ថលេខាក្នុងឆ្នាំ២០២៦ នេះផងដែរ៕ អត្ថបទ៖ សុន រ៉ាឌី

កម្ពុជាទទួលបានគម្រោងវិនិយោគ ២៧៦ ទំហំទុនវិនិយោគ ៤,៧ប៊ីលាន​ដុល្លារ​ក្នុង​ឆមាសទី១​ឆ្នាំ​នេះ

2026/07/15 07:21:25 pm        284
Facebook Telegram Linkin
ភ្នំពេញ៖ ក្នុងឆមាសទី១ ឆ្នាំ២០២៦ គម្រោងវិនិយោគ ត្រូវបាន​ចុះ​បញ្ជី​ដោយ​ក្រុម​ប្រឹក្សា​អភិវឌ្ឍន៍​កម្ពុជា​ (ក.អ.ក.) និងអនុគណៈកម្មាធិការវិនិយោគរាជធានី-ខេត្ត (អ.គ.វ.រ.ខ.) មានចំនួនសរុប ២៧៦ ដែលមានដើមទុនវិនិយោគសរុបប្រមាណ ៤,៧ ប៊ីលានដុល្លារអាមេរិក ដែលនឹង​អាច​បង្កើត​ការងារបានប្រមាណ១៦០ពាន់កន្លែង។ ក្នុងអំឡុងពេលនេះ ការបោះទុន​វិនិយោគ​ក្នុង​ស្រុក​កើន​ឡើង​គួរឱ្យកត់សម្គាល់​ ដោយកាន់កាប់ចំណែកជាង ៤១% នៃដើមទុនវិនិយោគសរុប។​ សេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា បញ្ជាក់ថា​ ក្នុងចំណោម​គម្រោង​វិនិយោគ​ទាំង ២៧៦ មានគម្រោងវិនិយោគចំនួន១៨១ ក្នុងទំហំទុនវិនិយោគប្រមាណ ៤,៤ប៊ីលាន​ដុល្លារ​អាមេរិក និងអាចបង្កើតការងារបានប្រមាណជាង ១២០ពាន់កន្លែង ត្រូវបានចុះបញ្ជីដោយ ក្រុម​ប្រឹក្សា​អភិវឌ្ឍន៍កម្ពុជា។ ក្នុងនោះ គម្រោងវិនិយោគ​នៅ​ក្រៅតំ​បន់​សេដ្ឋកិច្ច​ពិសេស​មាន​ចំនួន​១០៥​ និងគម្រោងវិនិយោគនៅក្នុងបណ្តាតំបន់សេដ្ឋកិច្ចពិសេសចំនួន៦៩។ ដោយឡែក គម្រោង​វិនិយោគ​ដែលត្រូវបានចុះបញ្ជីដោយ អនុគណៈកម្មាធិការវិនិយោគរាជធានី-ខេត្ត មានចំនួន ៩៥ ក្នុង​ទំហំទុនវិនិយោគប្រមាណ ២៩១លានដុល្លារអាមេរិក និងអាចបង្កើតការងារបានប្រមាណ ៣៥​ពាន់កន្លែង។ ឯកឧត្តម លឹម វិសាល អគ្គលេខាធិការរងគណៈកម្មាធិការវិនិយោគកម្ពុជា នៃក្រុម​ប្រឹក្សា​អភិវឌ្ឍ​ន៍​កម្ពុជា ​(CDC) កត់សម្គាល់ថា ក្នុងឆមាសទី១ ឆ្នាំនេះ កម្ពុជា​ទទួលបាន​គម្រោង​វិនិយោគ​ថម​ថយ​ល្បឿន​ប​ន្តិច បើធៀបនឹងឆ្នាំទី១ ឆ្នាំ ២០២៥។ ​ ឯកឧត្តមបន្តថា ការធ្លាក់ចុះនេះ ដោយសារកត្តាភាពមិនប្រាកដប្រជានៃសេដ្ឋកិច្ចពិភពលោក ដោយ​សារកត្តាសង្រ្គាមនៅមជ្ឈឹមបូព៌ា រួមផ្សុំនឹងបញ្ហាជម្លោះព្រំដែនកម្ពុជា-ថៃ ជាដើម។​ ទោះ​បី​យ៉ាង​ណា ការបោះទុនវិនិយោគពីវិនិយោគិនក្នុងស្រុកបានឈានមុខគេ ដោយកាន់កាប់ចំណែក ៤១, ៧៤%នៃទុនវិនិយោគ ហើយ​វិនិយោគផ្ទាល់ពីបរទេស (FDI) ពីប្រទេសចិន បាន​ឈរ​នៅ​លំដាប់​ទី២ មានចំនួន ៣៥,៧៥%, សិង្ហបុរី ១៥,៣៥% , ម៉ាឡេស៊ី ៤,២៦% , ហូឡង់ ០,៨៥​% ​និង ជប៉ុន និងសហរដ្ឋអាមេរិក ០,១៧% ដូចគ្នា។ សូមបញ្ជាក់ថា ក្នុងរយៈពេល ៦ខែឆ្នាំ២០២៦នេះ វិស័យឧស្សាហកម្ម​របស់​កម្ពុជា​ទទួល​បាន​ទុន​វិនិយោគ​ឈាន​មុខគេរហូតដល់ ២,៥៦ប៊ីលានដុល្លារអាមេរិក តាមពីក្រោយដោយ វិស័យហេដ្ឋា​រចនា​សម្ព័ន្ធ​ និងផ្សេងៗ ទទួលបាន​ដើមទុនវិនិយោគចំនួន ១,៧២ ប៊ីលាន​ដុល្លារអាមេរិក ខណៈ វិស័យ​កសិកម្ម និង កសិ-ឧស្សាហកម្ម ទទួលបានទុនវិនិយោគចំនួន ១១៣លានដុល្លារអាមេរិក និង​​វិស័យទេសចរណ៍ទទួលបានចំនួន ៣០០លានដុល្លារអាមេរិក៕ អត្ថបទ៖ ធូ វិរៈ

ទីផ្សារអាមេរិកកំពុងស្រូបយកទំនិញសក្តានុពលថ្មីៗបន្ថែមគាំទ្រដល់កំណើនការនាំចេញរបស់កម្ពុជា

2026/07/14 08:26:44 pm        343
Facebook Telegram Linkin
ធុរកិច្ចអាមេរិកបង្ហាញនូវសុទិដ្ឋិនិយមខ្ពស់ លើការធ្វើពាណិជ្ជកម្មទ្វេភាគីកម្ពុជា-អាមេរិក នឹងរំពឹងថា ការធ្វើពាណិជ្ជកម្មនៃប្រទេសទាំងពីរ នឹងមានកំណើនហក់ឡើងកាន់តែខ្ពស់បន្ថែមទៀត ជាពិសេសការនាំចេញទំនិញរបស់កម្ពុជា ខណៈទីផ្សារអាមេរិកបានកំពុងស្រូបយក ទំនិញដែលមានសក្តានុពលថ្មីៗបន្ថែមពីកម្ពុជា។ លោក ខេស៊ី បាណេត ប្រធានក្រុមប្រឹក្សាភិបាលសភាពាណិជ្ជកម្មអាម៉េរិកប្រចាំនៅកម្ពុជា (AmCham) លើកឡើងក្នុងកិច្ច សម្ភាសន៍ជាមួយ BTV ស្តីពីការធ្វើពាណិជ្ជកម្មទ្វេភាគីកម្ពុជា-សហរដ្ឋអាមេរិក នេះថា កម្ពុជានិងសហរដ្ឋអាមេរិក មានទំនាក់ទំនង និង កិច្ចសហប្រតិបត្តិការទ្វេភាគីយ៉ាងរឹងមាំ ក្នុងនោះសម្រាប់ការធ្វើពាណិជ្កម្ម, កម្ពុជាបានទទួលប្រព័ន្ធអនុគ្រោះពន្ធទូទៅ (GSP) ពីសហរដ្ឋ អាមេរិកនៅឆ្នាំ១៩៩៧ (ដោយទទួលការអនុគ្រោះមិនយកពន្ធ ០% លើទំនិញខ្លះ) តែបានផុតកំណត់សុពលភាពនៅដំណាច់ឆ្នាំ ២០២០។ តែទោះបីយ៉ាងណា, ទីផ្សារសហរដ្ឋអាមេរិក នៅតែបន្តគាំទ្រដល់ការនាំចេញ និងបច្ចុប្បន្នបានក្លាយជាទីផ្សារនាំចេញដ៏ធំ បំផុតរបស់កម្ពុជាផងដែរ។ លោក បន្តថា ជុំវិញការការធ្វើពាណិជ្ជកម្មទ្វេភាគីនេះឃើញថា ការនាំចូលទំនិញរបស់សហរដ្ឋអាមេរិកចូលមកទីផ្សារកម្ពុជា, ចាប់តាំងពីពាក់កណ្តាលឆ្នាំ២០២៥ មកដល់បច្ចុប្បន្នបាននិងកំពុងបន្តកើនឡើង ខណៈការនាំចេញរបស់កម្ពុជាទៅអាមេរិក ក៏បានកើន ឡើងគួរកត់សម្គាល់ផងដែរ ជាក់ស្តែងការនំាចេញទំនិញរបស់កម្ពុជា ក្នុងនោះក្រៅពីទំនិញដែលមានស្រាប់ដូចជា ការនាំចេញសម្លៀក បំពាក់ កាបូប ស្បែកជើង និងសម្ភារៈធ្វើដំណើរ បច្ចុប្បន្នទីផ្សារអាមេរិកក៏បាននិងកំពុងស្រូបយកទំនិញដែលមានសក្តានុពលថ្មីៗបន្ថែម ទៀតពីកម្ពុជាដូចជា សំបកកង់ឡាន ទោចក្រយាន គ្រឿងអេឡិចត្រូនិច ខ្សែភ្លើងនិងគ្រឿងបង្គុំខ្សែភ្លើង និងបន្ទះសូឡាជាដើម ដែល ប្រភេទទំនិញបានកំពុងគាំទ្រដល់ការនាំចេញរបស់កម្ពុជាទៅកាន់ទីផ្សារអាមេរិក។    សូមបញ្ជាក់ថា ការធ្វើពាណិជ្ជកម្មទ្វេភាគីកម្ពុជា-សហរដ្ឋអាមេរិក បើយោងតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ, នៅក្នុងរយៈពេល ៦ខែ ឆ្នាំ២០២៦នេះ ការធ្វើពាណិជ្ជកម្មនៃប្រទេសទាំងពីរ មានទំហំទឹកប្រាក់សរុប ជាង ៧,៤៨០ លានដុល្លារអាមេរិក កើនឡើងជាង ៣០ ភាគរយ, ក្នុងនោះកម្ពុជាបាននាំចេញ មានទឹកប្រាក់ជាង ៧,១៧២ លានដុល្លារ អាមេរិក កើនឡើងជិត ៣០ ភាគរយ ខណៈការនាំចូលពីអាមេរិកមកកម្ពុជាមានទឹកប្រាក់ ៣០៧ លានដុល្លារអាមេរិក កើន ៨៦ ភាគរយ ធៀបទៅនិងរយៈពេលដូចគ្នាឆ្នាំ២០២៥៕អត្ថបទ៖ សុន រ៉ាឌី

ចំនួនកុងតឺន័រឆ្លងកាត់កំពង់ផែស្វយ័តភ្នំពេញ កើនឡើងជាង ៣១% ក្នុងឆមាសទី១

2026/07/09 09:46:11 pm        323
Facebook Telegram Linkin
កុងតឺន័រឆ្លងកាត់កំពង់ផែស្វយ័តភ្នំពេញ (ក.ស.ភ.) ក្នុងឆមាសទី១ ឆ្នាំ២០២៦ មាន​ប្រមាណ​ជិត​ ៣៤ម៉ឺន ធីអ៊ីយូ(TEU) កើនឡើងជាង ៣១% បើធៀបនឹងរយៈពេលដូចគ្នាក្នុងឆ្នាំ២០២៥ ខណៈ​ចំនួនអ្នកដំណើរឆ្លងកាត់មានប្រមាណជាង ២ម៉ឺននាក់។ សេចក្តីប្រកាសព័ត៌មានរបស់ ក. ស. ភ. ដែលជាអង្គភាពចុះបញ្ជីនៅផ្សារមូលបត្រកម្ពុជា(CSX) បាន​ឱ្យ​ដឹងថា ចាប់ពីខែមករា-មិថុនា ឆ្នាំ២០២៦ កំពង់ផែស្វយ័តភ្នំពេញ​បាន​ទទួល​នាវាដឹក​ទំនិញ​ឆ្លង​កាត់​ចំនួន ១ ៨៩១ គ្រឿង កើនឡើង ៦,៦៦% បើធៀបនឹងរយៈពេលដូចគ្នាក្នុងឆ្នាំ២០២៥។ សម្រាប់​កុងតឺន័រឆ្លងកាត់មានចំនួន ៣៣៩ ៦០៦ ធីអ៊ីយូ កើន ៣១,៥៦%, និងបរិមាណទំនិញ-ប្រេង​ឥន្ទនៈ ឆ្លងកាត់ ២ ៨៩៧ ០០០ តោន កើន ១០,០១%។ រីឯនាវាដឹកអ្នកដំណើរ មានចំនួន ២០៩ គ្រឿង កើន ៨,២៩% និងអ្នកដំណើរ ឆ្លងកាត់ ២១ ៤២៦ នាក់ កើនឡើង ៦,៦៧%។ដោយឡែក សម្រាប់ខែមិថុនា ឆ្នាំ២០២៦ នាវាចូលចតមានចំនួន ៣០៩ គ្រឿង កើន ៤,៧៥% បើ​ធៀបខែមិថុនា ឆ្នាំ២០២៥, កុងតឺន័រ ៦៣ ៤៥៥ ធីអ៊ីយូ កើន ២១,៨៣%, ទំនិញ​ប្រេង​ឥន្ទនៈ​ឆ្លង​កាត់ ៤៨៩ ៤១៣ តោន កើន ៦,៧២%, នាវាដឹកអ្នកដំណើរ ៩ គ្រឿង រក្សាចំនួននៅដដែល និង​អ្នកដំណើរមានចំនួន ៥០១ នាក់ កើន ២៨,១៣%។កាលពីឆ្នាំ២០២៥ កំពង់ផែស្វយ័តភ្នំពេញ បានទទួលនាវាដឹកទំនិញឆ្លងកាត់ ៣ ៧៤៦ គ្រឿង កើន​ឡើង ១,៣៥% បើធៀបនឹងឆ្នាំ២០២៤ ដោយឡែក បរិមាណកុងតឺន័រឆ្លងកាត់ ៦០០ ០២៣ ធីអ៊ីយូ កើន ២៤,៩៥% និងបរិមាណទំនិញ-ប្រេងឥន្ទនៈឆ្លងកាត់ ៥ ៦០៦ ៤៩៥ តោន កើន ១៥,៥៩%។ សម្រាប់នាវាដឹកអ្នកដំណើរមានចំនួន ៤១៣ គ្រឿង កើន ៥,៩% និង​អ្នក​ដំណើរ​ឆ្លង​កាត់ ៣៩ ៨០៤ នាក់ កើនឡើង ១០,១១%%៕ អត្ថបទ៖ ធូ វិរៈ

ផ្សារខ្មែរ MSME HUB គឺជាមជ្ឈមណ្ឌលតភ្ជាប់ដ៏សំខាន់​រវាងអ្នកផលិតទៅកាន់អ្នកប្រើប្រាស់​

2026/07/04 10:37:38 pm        447
Facebook Telegram Linkin
ផលិតផលក្នុងស្រុកប្រមាណ ៧០០ មុខ ត្រូវបានយកទៅប្រមូលផ្តុំដាក់លក់នៅក្នុង​“ផ្សារខ្មែរ MSME HUB(ទួលពង្រ)” ដែលវានឹងក្លាយជាមជ្ឈមណ្ឌល​តភ្ជាប់យ៉ាងសំខាន់រវាងអ្នកផលិតទៅកាន់អ្នកប្រើប្រាស់​។ ​ផ្សារខ្មែរ MSME Hub ទួលពង្រ ត្រូវបានសម្ពោធដាក់ឱ្យដំណើរការជាផ្លូវការនៅថ្ងៃទី៣ ខែកក្កដា ឆ្នាំ២០២៦ ក្រោមអធិបតីភាព​លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម។ថ្លែងទៅកាន់អង្គពិធី លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានវាយតម្លៃខ្ពស់ចំពោះសភាមុខរបរ និងមីក្រូសហគ្រាសកម្ពុជា (CPMEC) ដែលបានផ្តួចផ្តើមបង្កើត ផ្សារខ្មែរ MSME Hub ទួលពង្រ ដើម្បីជួយឱ្យផលិតផលខ្មែរអាចចែកចាយដល់ដៃអ្នកប្រើប្រាស់កាន់តែលឿនរហ័ស ដែលនេះជាការចូលរួមចំណែកយ៉ាងសំខាន់ជា ជាមួយរាជរដ្ឋាភិបាល ពិសេសជាមួយក្រសួងពាណិជ្ជកម្មក្នុងការលើកកម្ពស់ការតភ្ជាប់ទីផ្សារ និងជំរុញការប្រើប្រាស់ផលិតផលក្នុងស្រុក។ ជាមួយគ្នានេះ លោកជំទាវរដ្ឋមន្រ្តីបាន​លើកទឹកចិត្ត និងអំពាវនាវដល់សាធារណជនទាំងអស់ បន្ត​ចូលរួមគាំទ្រយុទ្ធនាការផលិតផលជាតិ និងប្រែក្លាយការទិញផលិតផលខ្មែរ ទៅជាទម្លាប់ប្រចាំថ្ងៃ ដើម្បីចូលរួមកសាងកម្លាំងសេដ្ឋកិច្ចជាតិឱ្យកាន់តែរឹងមាំ។លោកជំទាវឧកញ៉ាបណ្ឌិត កែវ មុំ ប្រធានសភាមុខរបរ និងមីក្រូសហគ្រាសកម្ពុជា (CPMEC)បាន​ថ្លែងថា ផ្សារខ្មែរ MSME Hub ទួលពង្រ ត្រូវបានបង្កើតឡើងក្រោមផ្តួចផ្តើមបង្កើតសភាមុខរបរ និងមីក្រូសហគ្រាសកម្ពុជា (CPMEC) ដើម្បីជួយឱ្យផលិតផលខ្មែរអាចចែកចាយដល់ដៃអ្នកប្រើប្រាស់កាន់តែលឿនរហ័ស។បច្ចុប្បន្ន ផ្សារនេះ ដមានផលិតផលក្នុងស្រុកចម្លោះពី៦០០ ដល់ ៧០០ មុខ ត្រូវបានដាក់លក់ដុំនិងរាយ ហើយ​ CPMEC នៅតែបន្តទទួលយកផលិតផលក្នុងស្រុកមកតាំងលក់បន្ថែម​ទៀត​។ចំណែក តំណាងឱ្យសហគ្រាសផលិតផលក្នុងស្រុក​បាន​បង្ហាញក្តីរីករាយ ដែលមានឱកាសនាំយកផលិតរបស់ខ្លួនមកលក់នៅ“ផ្សារខ្មែរ MSME HUB (ទួលពង្រ)” ដោយ​ពួកគេរំពឹងថា ផលិតផលរបស់ពួកគេកាន់តែមានទីផ្សារទូលំទូលាយជាងមុន និងទទួលបានសន្ទុះគាំទ្រកាន់តែខ្លាំងពីប្រជាពលរដ្ឋ។​ក្នុងឱកាសសម្ពោធដាក់ឱ្យប្រើប្រាស់ជាផ្លូវការ មជ្ឈមណ្ឌលចែកចាយផលិតផលខ្មែរ “ផ្សារខ្មែរ MSME HUB (ទួលពង្រ)” នឹងបន្តដំណើរតាំងពិព័រណ៌ផលិតផលខ្មែរ រយៈពេល ៣ថ្ងៃ ចាប់ពីថ្ងៃទី ៣ ដល់ ថ្ងៃទី ៥ ខែកក្កដា ឆ្នាំ ២០២៦ ដោយមានការប្រគុំតន្រ្តីសម័យ និង​មានការសម្តែងសិល្បៈបុរាណខ្មែរ។ “ផ្សារខ្មែរ MSME HUB (ទួលពង្រ)” មានទីតាំងស្ថិតក្នុងសង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ៕ អត្ថបទ៖ ធូ វិរៈ

ប្រធាន គ.ល.ក. ណែនាំដល់​អគ្គលេខាធិការដ្ឋាន​បន្តសហការជាមួយ​អាជ្ញាធរ​គ្រប់គ្រង​ល្បែង​ពាណិជ្ជកម្ម​ឱ្យមានប្រសិទ្ធភាព

2026/06/25 09:14:20 pm        502
Facebook Telegram Linkin
ប្រធានគណៈកម្មការគ្រប់គ្រងល្បែងពាណិជ្ជកម្មកម្ពុជា (គ.ល.ក.) ណែនាំដល់អគ្គលេខាធិការដ្ឋាន គ.ល.ក. សហការជាមួយក្រសួង មហាផ្ទៃ និងអាជ្ញាធរពាក់ព័ន្ធ បន្តគ្រប់គ្រងសន្តិសុខនៅតាមគ្រឹះស្ថានល្បែងពាណិជ្ជកម្ម និងចាត់វិធានការទប់ស្កាត់ឱ្យបានជាអតិបរមា និងចូលរួមយុទ្ធនាការប្រឆំាងការឆោកតាមប្រព័ន្ធបច្ចេកវិទ្យា ដើម្បីគ្រប់គ្រងវិស័យនេះឱ្យមានប្រសិទ្ធភាព។ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រីរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈ កម្មការគ្រប់គ្រងល្បែងពាណិជ្ជកម្មកម្ពុជា (គ.ល.ក.) លើកឡើងនៅក្នុងសិក្ខាសាលាផ្សព្វផ្សាយ ក្រោមប្រធានបទ “ការពង្រឹងការគ្រប់គ្រង វិស័យល្បែងពាណិជ្ជកម្មនៅកម្ពុជាក្នុងបរិការណ៍នៃការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា” នៅថ្ងៃទី២៥ ខែមិថុនា ឆ្នាំ២០២៦ នេះថា ស្របតាមនិន្នាការនៃការគ្រប់គ្រង់វិស័យល្បែងពាណិជ្ជកម្មទាំងក្នុងតំបន់ និងលើសកលលោក ក្នុងនោះសម្រាប់កម្ពុជាវិស័យនេះ ត្រូវបានគ្រប់គ្រងដោយច្បាប់ ស្តីពីការគ្រប់គ្រងល្បែងពាណិជ្ជកម្ម ក្នុងគោលបំណងធានាឱ្យបានល្អ លើការគ្រប់គ្រងមណ្ឌលល្បែង ពាណិជ្ជកម្ម សមាហ័រណ និងល្បែងពាណិជ្ជកម្ម ដើម្បីរួមចំណែកជំរុញកំណើនសេដ្ឋកិច្ច លើកកម្ពស់វិស័យទេសចរណ៍ បង្កើតការងារ ប្រមូលចំណូលជូនរដ្ឋ និងការរក្សាសុវត្ថិភាពនិងសន្តិសុខសង្គម។ ឯកឧត្តមអគ្គបណ្ឌិតសភាចារ្យ ក៏បានណែនាំដល់អគ្គលេខាធិការដ្ឋាន គ.ល.ក. ត្រូវបង្កើនកិច្ចសហប្រតិបត្តិការជាមួយក្រុម ការងារចម្រុះ ចំណុចលេខាធិការដ្ឋាន គ.ប.ច.ប. គណៈបញ្ហាការឯកភាពរាជធានី-ខេត្ត និងស្ថាប័នមានសមត្ថកិច្ចពាក់ព័ន្ធនានា ដើម្បីរឹង បណ្តឹងការគ្រប់គ្រង ត្រួតពិនិត្យ និងការវាយតម្លៃទីតាំងកាស៊ីណូ និងទីតាងមណ្ឌលល្បែងពាណិជ្ជកម្មទាំងអស់។ ត្រូវបន្តចុះពិនិត្យ និង វាយតម្លៃគុណភាពកាស៊ីណូនៅទូទាំងប្រទេសតាមផែនការកំណត់ ដោយផ្អែកលើលក្ខខណ្ឌវិនិច្ឆ័យច្បស់លាស់ ដើម្បីមាន មូលដ្ឋានរឹងមាំ សម្រាប់បន្ត ឬលុបអាជ្ញាប័ណ្ណការស៊ីណូណាមួយ។ អគ្គលេខាធិការដ្ឋាននៃ គ.ល.ក. ត្រូវពិនិត្យឱ្យបានលម្អិតនិងម៉ត់ចត់បំផុត ដើម្បី ធានាថា ទីតាំងឬបរិវេណកាស៊ីណូទាំងអស់ មិនជាប់ពាក់ព័ន្ធនឹងសកម្មភាពឆបោកតាមប្រព័ន្ធបច្ចេកវិទ្យា។ ក្រៅពីនេះ អគ្គលេខាធិការ ដ្ឋាននៃ គ.ល.ក. ក៏ត្រូវយកចិត្តទុកដាក់លើការអភិវឌ្ឍ និងការបំពាក់នូវប្រព័ន្ធបច្ចេកវិទ្យាឌីជីថលសម្រាប់គ្រប់គ្រងល្បែងពាណិជ្ជកម្ម ដើម្បី បង្កើនតម្លាភាព និងប្រសិទ្ធភាពនៃការគ្រប់គ្រង ពោលគឺត្រូវអភិវឌ្ឍ និងតភ្ជាប់ប្រព័ន្ធគ្រប់គ្រងប្រតិបត្តិការកាស៊ីណូពីចម្ងាយ ភ្ជាប់ជាមួយ ប្រព័ន្ធបច្ចេកវិទ្យាព័ត៌មាន សម្រាប់គ្រង់គ្រងកាស៊ីរបស់ប្រតិបត្តិករ និងក៏ត្រូវបំពាក់ប្រព័ន្ធកាមេរ៉ាសុវត្ថិភាព ដើម្បីតាមដានសកម្មភាព ប្រតិបត្តិការល្បែងពាណិជ្ជកម្ម និងគ្រប់គ្រងរំហូរភ្ញៀវចេញ-ចូលទីតាំង និងបរិវេណកាស៊ីណូនីមួយៗ ។ ឯកឧត្តមអគ្គបណ្ឌិតសភាចារ្យ បានជំរុញឱ្យអគ្គលេខាធិការដ្ឋាននៃ គ.ល.ក. ត្រូវរៀបចំនិងជំរុញដាក់ឱ្យអនុវត្តនូវលិខិតបទដ្ឋាន គតិយុត្ត នីតិវិធីប្រតិបត្តិស្តង់ដារ និងប្រព័ន្ធបច្ចេកវិទ្យាឌីជីថលនានា ដើម្បីពង្រឹងប្រសិទ្ធភាព គុណភាព និងសមត្ថភាពនៃការគ្រប់គ្រង ល្បែងពាណិជ្ជកម្មស្របតាមនិន្នាការ បច្ចុប្បន្ននៃការវិវត្តយ៉ាងរហ័ស ក្នុងផ្នែកបច្ចេកវិទ្យាឌីជីថល ដើម្បីពង្រឹងប្រសិទ្ធភាព និងស័ក្តសិទ្ធភាព នៃការផ្តល់សេវាសាធារណៈ លើកកម្ពស់បរិយាកាសនៃការវិនិយោគ និងជំរុញការប្រមូលចំណូលជូនរដ្ឋថែមទៀត និងយកចិត្តទុកដាក់ ស្តាប់ និងទទួលយកនូវសំណូមពរ និងកង្វល់នានារបស់ប្រតិបត្តិករកាស៊ីណូ ដើម្បីដាក់ចេញជាវិធានការ និងផែនការសកម្មភាពជាក់ល័ក្ខ សម្រាប់ជំរុញបំពេញលក្ខខណ្ឌអាជ្ញាបណ្ណឱ្យបានពេញលេញ។ ទន្ទឹមនេះក្រសួងមហាផ្ទៃ និងអាជ្ញាធរមានសមត្ថកិច្ចនៅតាមមូលដ្ឋាន ក៏ ត្រូវបន្តចូលរួមទប់ស្កាត់សកម្មភាពអាជីវកម្ម និងការលេងល្បែងស៊ីសងខុសច្បាប់ឱ្យមានប្រសិទ្ធភាព ដែលជាផ្នែកមួយនៃគោលនយោបាយ ភូមិឃុំសង្កាត់មានសុវត្ថិភាពរបស់រាជរដ្ឋាភិបាលផងដែរ៕ អត្ថបទ៖ សុន រ៉ាឌី

ក្រសួងកសិកម្ម ប្រកាសផ្សព្វផ្សាយច្បាប់ស្តីពីជលផល និងអនុក្រឹត្យ​ពិន័យអន្តរការណ៍​ចំពោះ​បទល្មើស​ច្បាប់ស្តីពីជលផល

2026/06/25 07:13:38 pm        215
Facebook Telegram Linkin
ក្រសួងកសិកម្មរុក្ខាប្រមាញ់ និងនេសាទ តាមរយៈអគ្គនាយកដ្ឋានជលផល នៃក្រសួងកសិកម្ម បាន​រៀបចំសិក្ខាសាលាថ្នាក់ជាតិស្តីពីការផ្សព្វផ្សាយច្បាប់ស្តីពីជលផល និង​អនុក្រឹត្យ​ស្តីពី​ការ​ពិន័យ​អន្តរការណ៍ចំពោះបទល្មើសនិងច្បាប់ស្តីពីជលផល ដែលប្រកាសផ្សព្វផ្សាយដោយ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។ ឯកឧត្តម ឌិត ទីណា បានប្រកាសថា ច្បាប់ស្តីពីជលផលនេះ មានតាំងពីឆ្នាំ២០០៦ ប៉ុន្តែច្បាប់នោះ នៅមានចន្លោះប្រហោង ដូចនេះហើយ ទើបរៀបចំច្បាប់ជលផលសារជាថ្មី ដោយច្បាប់ជលផលថ្មី បានសម្រេចកាលពីថ្ងៃទី២៨ ខែមិថុនា ឆ្នាំ២០២៥ ច្បាប់ស្តីពីជលផល ត្រូវបានប្រកាសឱ្យប្រើតាមព្រះរាជក្រមលេខនស/រកម/ ០៦២៥/០២៨ចុះថ្ងៃទី២៨ខែមិថុនាឆ្នាំ២០២៥ជំនួសច្បាប់ស្តីពីជលផលឆ្នាំ២០០៦។ ហើយច្បាប់ថ្មីនេះមានគោលបំណងគ្រប់គ្រង អភិរក្ស និងអភិវឌ្ឍវិស័យជលផលឱ្យមានប្រសិទ្ធភាព សំដៅបន្តធានាសន្តិសុខស្បៀង ប្រកបដោយនិរន្តរភាពសេដ្ឋកិច្ចនិងបរិស្ថាន ព្រមទាំងការពារសិទ្ធិនិងផលប្រយោជន៍របស់ប្រជានេសាទសហគមន៍នេសាទ វារីវប្បករ និងអាជីវករ ស្របតាម បរិបទនៃការរីកចម្រើនសេដ្ឋកិច្ចសង្គមនិងបច្ចេកវិទ្យា និងចូលរួមក្នុងការ គ្រប់គ្រងនិងអភិរក្សធនធានជលផលប្រកបដោយនិរន្តរភាពក្នុងក្របខ័ណ្ឌតំបន់និងអន្តរជាតិ។ ច្បាប់ស្តីពីជលផល មាន១៥ជំពូក ១០៤មាត្រា និងឧបសម្ព័ន្ធចំនួន។ ឯកឧត្តមរដ្ឋមន្ត្រីបានបន្តថា ជាលទ្ធផល កាលពីឆ្នាំ២០២៥ ផលនេសាទសរុប មានចំនួនជាង៦សែន៥ម៉ឺនតោន ក្នុងនោះផលនេសាទទឹកសាប មានជាង៥សែនតោន និងផលនេសាទសមុទ្រជាង១សែន៤ម៉ឺនតោន ដែលមានការកើនឡើងគួរឱ្យកត់សម្គាល់ ហើយការកើនឡើងនេះ ដោយមានការខិតខំប្រឹងប្រែងទប់ស្កាត់និងបង្ក្រាបបទល្មើសនេសាទ ពីសមត្ថកិច្ចជំនាញជលផល រួមជាមួយកង កម្លាំងប្រដាប់អាវុធ រដ្ឋបាលថ្នាក់ក្រោមជាតិ សមត្ថកិច្ចពាក់ព័ន្ធ និងសហគមន៍នេសាទ ព្រមទាំង មានការចូលរួមផ្ដល់ ព័ត៌មានពីមហាជនអំពីសកម្មភាពនៃការធ្វើនេសាទខុសច្បាប់។ ទន្ទឹមនេះ ក៏ទទួលបានជោគជ័យ គួរជាទីមោទនៈ ក្នុងការការពារនិងអភិរក្សសត្វផ្សោតទន្លេមេគង្គ ដែលក្នុងឆ្នាំ២០២៥ កន្លងទៅថ្មីៗនេះ កូនផ្សោតកើតថ្មីបាន៨ក្បាល ដោយពុំ មានស្លាប់នោះឡើយ។ នេះជាលើកទី១នៅក្នុងប្រវត្តិសាស្ត្រ ដែលពុំមានសត្វផ្សោតស្លាប់ក្នុងរយៈពេលពេញ១ឆ្នាំ ហើយរយៈពេល៦ខែដើមឆ្នាំ២០២៦នេះ មានកូនផ្សោតកើត៦ក្បាលថែមទៀត នាំឱ្យសត្វផ្សោត ទន្លេមេគង្គកើនឡើងរហូត ដល់១១៧ក្បាល។ សូមបញ្ជាក់ថា ច្បាប់ស្តីពីជលផលថ្មីនេះ ស្ថិតក្នុងដំណាក់កាលផ្សព្វផ្សាយ ហើយឈានដល់ខែសីហាឆ្នាំ២០២៦នេះ នឹងចាប់ផ្តើមអនុវត្តន៍ច្បាប់ស្តីពីជលផលថ្មីនេះតែម្តង ហើយយោងតាមច្បាប់ថ្មីនេះ បទល្មើសជលផល ក៏ចាប់ផ្តើមថយចុះជាបណ្តើរៗដែរ នេះបើយោងតាមការបញ្ជាក់ពីឯកឧត្តម ពុំ សុថា អគ្គនាយក នៃអគ្គនាយកដ្ឋានជលផល៕ អត្ថបទ៖ គង់ រ៉េន

កម្ពុជា និងស្ថាប័ន DFC ពិភាក្សាផ្លាស់ប្តូរយោបល់លើយុទ្ធសាស្ត្រសំខាន់ៗ នៃវិស័យអាទិភាព​នៅកម្ពុជា

2026/06/22 11:02:49 pm        298
Facebook Telegram Linkin
កម្ពុជានិងស្ថាប័ន DFC ផ្លាស់ប្តូរយោបល់លើរបៀបវារៈយុទ្ធសាស្ត្រសំខាន់ៗ ដែលរំពឹងថា នឹងក្លាយជាកិច្ចសហប្រតិបត្តិការដ៏រឹងមាំ លើការពិនិត្យលទ្ធភាពសហការសិក្សាស្រាវជ្រាវហេដ្ឋារចនាសម្ព័ន្ធថាមពល និងអន្តរកាលបៃតង និងការអភិវឌ្ឍហេដ្ឋារចនាសម្ព័ន្ធ អាទិភាពមួយចំនួននៅកម្ពុជា។ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) នៅថ្ងៃទី២២ ខែមិថុនា ឆ្នាំ២០២៦ បានទទួលជួបសម្តែងការគួរសម និងពិភាក្សាការងារជាមួយ គណៈប្រតិភូសាជីវកម្មហិរញ្ញវត្ថុសម្រាប់ការអភិវឌ្ឍអន្តរជាតិ (DFC) របស់សហរដ្ឋអាម៉េរិក ដឹកនាំដោយ លោកស្រី Caroline Vik ប្រធានផ្នែកគោលនយោបាយនៃ DFC ក្នុងឱកាសដែល គណៈប្រតិភូកំពុងបំពេញបេសកកម្មផ្លូវការនៅព្រះរាជាណាចក្រកម្ពុជា។ ឯកឧត្តមឧបនាយករដ្ឋមន្ត្រី បានសម្តែងនូវការស្វាគមន៍យ៉ាងកក់ក្តៅបំផុតចំពោះ លោកស្រី Caroline Vik និងសហការីទាំង អស់ ដែលមកបំពេញបេសកកម្មផ្លូវការនៅព្រះរាជាណាចក្រកម្ពុជា និងបានថ្លែងអំណរគុណយ៉ាងជ្រាលជ្រៅជូនចំពោះស្ថាប័ន DFC ដែលបានសម្រេចចិត្តជាយុទ្ធសាស្ត្រ ក្នុងការអនុម័តកញ្ចប់ហិរញ្ញប្បទានគាំទ្រដល់ការអភិវឌ្ឍហេដ្ឋារចនាសម្ព័ន្ធ នៅក្នុងអាកាសយាន- ដ្ឋានអន្តរជាតិតេជោនាពេលកន្លងមក និងបានបញ្ជាក់ជាថ្មីពីជំហររបស់រាជរដ្ឋាភិបាលកម្ពុជា ក៏ដូចជា ក.អ.ក. ផ្ទាល់ ក្នុងការត្រៀម លក្ខណៈជាស្រេច ដើម្បីផ្តល់កិច្ចសម្របសម្រួលចំពោះការប្រមូលព័ត៌មានពាក់ព័ន្ធ សម្រាប់ជាមូលដ្ឋានក្នុងការសិក្សាសមិទ្ធិលទ្ធភាព របស់ DFC ។ ជាការឆ្លើយតប លោកស្រី Caroline Vik បានសម្តែងនូវការកោតសរសើរយ៉ាងខ្លាំងចំពោះចក្ខុវិស័យដ៏ច្បាស់លាស់ និងភាព ម៉ឺងម៉ាត់របស់រាជរដ្ឋាភិបាលកម្ពុជា ក្នុងការកែទម្រង់ និងការអភិវឌ្ឍហេដ្ឋារចនាសម្ព័ន្ធគន្លឹះដើម្បីលើកកម្ពស់សេដ្ឋកិច្ចជាតិ។ លោកស្រី បានបញ្ជាក់ថា វិស័យដែលកម្ពុជាបានលើកឡើងទាំងអស់ខាងលើ គឺពិតជាមានភាពស្របគ្នា ទៅនឹងបេសកកម្មស្នូលរបស់ DFC ក្នុងការគាំទ្រដល់ហេដ្ឋារចនាសម្ព័ន្ធយុទ្ធសាស្ត្រ និងការការពារខ្សែច្រវាក់ផ្គត់ផ្គង់សកល។ លោកស្រីបានបង្ហាញឆន្ទៈក្នុងការនាំយកនូវ របៀបវារៈដែលបានពិភាក្សា ទៅពិនិត្យលទ្ធភាពក្នុងការសិក្សាសមិទ្ធិលទ្ធភាព មុននឹងឈានដល់ដំណាក់កាលនៃកិច្ចសហប្រតិបត្តិការ ណាមួយ នាពេលអនាគតផងដែរ។ សូមបញ្ជាក់ថា នៅក្នុងកិច្ចពិភាក្សានេះ ថ្នាក់ដឹកនាំកម្ពុជា និងគណៈប្រតិភូ DFC បានផ្លាស់ប្តូរយោបល់យ៉ាងផុសផុស លើរបៀបវារៈ យុទ្ធសាស្ត្រសំខាន់ៗ ដែលរំពឹងថានឹងក្លាយជាកិច្ចសហប្រតិបត្តិការដ៏រឹងមាំនាពេលអនាគតរួមមាន៖ (១)-ការពិនិត្យលទ្ធភាពសហការ លើការសិក្សាស្រាវជ្រាវហេដ្ឋារចនាសម្ព័ន្ធថាមពល និងអន្តរកាលបៃតង, និង (២)- ការអភិវឌ្ឍហេដ្ឋារចនាសម្ព័ន្ធគន្លឹះដូចជា បណ្តាញ ផ្លូវល្បឿនលឿន, ការពង្រីងវិសាលភាពកំពង់ផែ, និងផែនការមេគ្រប់ជ្រុងជ្រោយស្តីពី ប្រព័ន្ធដឹកជញ្ជូនអន្តរមធ្យោបាយ និងភស្តុភារកម្ម កម្ពុជា ២០២៣-២០៣៣ ដែលទាំងអស់នេះគឺជាសរសៃឈាមនៃសេដ្ឋកិច្ចជាតិដ៏សំខាន់៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

រលកកម្ដៅដ៏ក្ដៅគគុកកំពុងគ្របដណ្ដប់ពាសពេញឧបទ្វីបកូរ៉េ ដែលបង្ខំឲ្យមានការឆ្លើយតបបន្ទាន់
08/03/2026 05:08 PM
Facebook Telegram Linkin
សមាជិកព្រឹទ្ធសភារុស្ស៊ីថា ជម្លោះរវាងអាមេរិក និងអ៊ីរ៉ង់ អាចនឹងបញ្ចប់នៅត្រឹមចុងឆ្នាំ
08/03/2026 05:08 PM
Facebook Telegram Linkin
ប្រធានាធិបតីលីបង់ជំរុញឲ្យតុលាការចេញសេចក្តីចោទប្រកាន់ពាក់ព័ន្ធនឹងការផ្ទុះនៅកំពង់ផែបេរូត
08/03/2026 05:08 PM
Facebook Telegram Linkin
កម្មករនិយោជិតបម្រើការងារផ្គុំ និងដំឡើងរថយន្តនៅក្រុមហ៊ុន តូយ៉ូតា ស៊ុយស៊ូ មេនូហ្វេកឆឺរីង ប្រមាណជិត ៨០% ជាអតីតសិស្សបញ្ចប់ការសិក្សាពីគ្រឹះស្ថាន TVET
08/03/2026 05:08 PM
Facebook Telegram Linkin
អ៊ីរ៉ង់ ប្រហារជីវិតមនុស្សពីរនាក់ដែលត្រូវបានចោទប្រកាន់ពីបទចារកម្មឱ្យអ៊ីស្រាអែល
08/03/2026 04:08 PM
Facebook Telegram Linkin
មកដល់ពេលនេះ លេខាធិការដ្ឋានកិច្ចការព្រំដែនកម្ពុជាបានផ្ញើកំណត់ទូតទៅថៃ១០លើកដើម្បីស្នើសុំបើកកិច្ចប្រជុំ
08/03/2026 04:08 PM
Facebook Telegram Linkin
ប្រទេសគុយបា ទទួរងការដាច់ចរន្តអគ្គិសនីនៅទូទាំងប្រទេសជាថ្មីទៀត
08/03/2026 04:08 PM
Facebook Telegram Linkin
ការវិភាគ៖ កិច្ចព្រមព្រៀងស្តីពីច្រកសមុទ្រ Hormuz អាចធ្វើទៅបាន ប៉ុន្តែកិច្ចព្រមព្រៀងនុយក្លេអ៊ែរនៅឆ្ងាយ
08/03/2026 04:08 PM
Facebook Telegram Linkin
ធនាគារ៣ ដែលមិនសូវមានភាពសកម្មក្នុងសេដ្ឋកិច្ច ត្រូវបានដាក់ឱ្យជម្រះបញ្ជី
08/03/2026 04:08 PM
Facebook Telegram Linkin
មនុស្សប្រហែល ៦ម៉ឺន​នាក់ត្រូវបានបញ្ជាឱ្យជម្លៀសចេញពីចំហេះ​ព្រៃ នៅទី​ក្រុង​ Spokane របស់អាមេរិក​
08/03/2026 04:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.