នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រធានសហព័ន្ធស្រូវអង្ករ៖ ការនំាចេញកម្ពុជាក្នុងឆ្នាំ២០២៦នេះ នឹងអាចសម្រេចបាន ១ លានតោន
ឆមាសទី១ឆ្នាំ២០២៦ កម្ពុជានាំចេញគ្រាប់ស្វាយចន្ទី មានទឹកប្រាក់ជាង ១,១ ពាន់លានដុល្លារអាមេរិក
មូលនិធិអភិវឌ្ឍន៍ EDFមើលឃើញថា ធុរកិច្ចបណ្តុះបណ្ដាលថ្មី និងSME ជាក្បា​ល​ម៉ាស៊ីន​ជំរុញ​កំណើន​សេដ្ឋកិច្ច​កម្ពុជា
លំហូរទឹកប្រាក់វិនិយោគចូលកម្ពុជានៅឆមាសទី១ ឆ្នាំ២០២៦ មាន ៤.៣ ប៊ីលានដុល្លារ កើនឡើង ៧ដង

សេដ្ឋកិច្ច និង កសិកម្ម

រដ្ឋបាលខេត្តកំពតត្រៀមទុរេនទុំ ២តោន សម្រាប់ទទួលទេសចរចូលរួមព្រឹត្តិការណ៍ «មរតកផ្លែឈើ និងនំចំណីកំពត»

2026/05/31 08:10:56 pm        301
Facebook Telegram Linkin
រដ្ឋបាលខេត្តកំពត បានត្រៀមទុរេនទុំប្រមាណ ២តោន ដើម្បីទទួលស្វាគមន៍ និងជូន​ភ្ញៀវទេសចរ​ជាតិ-អន្តរជាតិ និងប្រជាពលរដ្ឋដែលចូលរួមក្នុងព្រឹត្តិការណ៍ «មរតកផ្លែឈើ និងនំចំណីកំពត» ក្រោម​ប្រធានបទ «រសជាតិទុរេនកំពត និងកិត្យានុភាពទេសចរណ៍រដូវកាលបៃតង» ដែល​នឹង​ប្រព្រឹត្ត​ទៅ​នៅថ្ងៃទី១ ខែមិថុនា ឆ្នាំ២០២៦ ចាប់ពីម៉ោង ២រសៀលតទៅ នៅបរិវេណ​សួន​ច្បារ​ទល់​មុខ​ផ្សារ​វិថីម្ហូបអាហារ ខេត្តកំពត។លោក សយ ស៊ីណុល ប្រធានមន្ទីរទេសចរណ៍ខេត្តកំពត បានឱ្យដឹងថា ការរៀបចំព្រឹត្តិការណ៍នេះ ទទួល​បានការជំរុញលើកទឹកចិត្តពីក្រសួងទេសចរណ៍ ជាពិសេសក្រោមការយកចិត្តទុកដាក់ និង​ការ​ចង្អុល​បង្ហាញ​ពី​សំណាក់ ឯកឧត្តមបណ្ឌិត ម៉ៅ ធនិន អភិបាលខេត្តកំពត ក្នុងគោលបំណង​លើក​កម្ពស់​វិស័យទេសចរណ៍ កសិកម្ម និងផ្សព្វផ្សាយអត្តសញ្ញាណ​ផលិតផល​ក្នុង​ស្រុក​របស់​ខេត្ត​កំពត​ឱ្យ​កាន់​តែទូលំទូលាយ។ លោកបានបញ្ជាក់ថា ភ្ញៀវទេសចរ និងប្រជាពលរដ្ឋដែលចូលរួមក្នុងព្រឹត្តិការណ៍នេះ នឹង​មាន​ឱកាស​ភ្លក់​រសជាតិទុរេនកំពតដ៏ល្បីល្បាញ ដែលរដ្ឋបាលខេត្តបានត្រៀមទុកចំនួន ២តោន ព្រម​ទាំង​អាច​ទស្សនា និងទិញផលិតផលកសិកម្ម ផ្លែឈើតាមរដូវ នំចំណីប្រពៃណី និង​ផលិត​ផល​សហគមន៍​ជា​ច្រើន​ប្រភេទ ដែលជាមរតកវប្បធម៌ និងសេដ្ឋកិច្ចរបស់ប្រជាពលរដ្ឋក្នុងខេត្ត។ព្រឹត្តិការណ៍នេះក៏ជាផ្នែកមួយនៃការជំរុញ ទេសចរណ៍រដូវកាលបៃតង ដែលក្រសួងទេសចរណ៍ និង​រដ្ឋបាលខេត្តកំពុងផ្តោតសំខាន់ ដើម្បីទាក់ទាញភ្ញៀវទេសចរមកកម្សាន្តក្នុងអំឡុងរដូវវស្សា។ រដូវកាលនេះ ខេត្តកំពតមានសម្រស់ធម្មជាតិខៀវស្រងាត់ ខ្យល់អាកាសបរិសុទ្ធ ទេសភាពភ្នំ ទឹក​ជ្រោះ ​សមុទ្រ និងចម្ការផ្លែឈើកាន់តែស្រស់ស្អាត ដែលផ្តល់បទពិសោធន៍ថ្មីដល់ភ្ញៀវទេសចរ និង​ជួយ​ជំរុញ​ចំណូលដល់សហគមន៍មូលដ្ឋាន។ តាមរយៈការរៀបចំព្រឹត្តិការណ៍ «មរតកផ្លែឈើ និងនំចំណីកំពត» នេះ រដ្ឋបាលខេត្តកំពតរំពឹងថា នឹង​រួមចំណែកលើកកម្ពស់កេរ្តិ៍ឈ្មោះទុរេនកំពត ផ្សព្វផ្សាយ​សក្តានុពល​ទេសចរណ៍​រដូវកាល​បៃតង ​និង​ជំរុញការចូលរួមគាំទ្រផលិតផលក្នុងស្រុក ស្របតាមគោល​នយោបាយ​អភិវឌ្ឍន៍​ទេសចរណ៍​ប្រកប​ដោយ​ចីរភាព និងបរិយាបន្ន៕

មន្ត្រីជំនាញ ស្នើដល់កសិករ សហគមន៍ និងអ្នកពាក់ព័ន្ធរួមគ្នាលើកកម្ពស់វិស័យកសិកម្មខេត្តកែប

2026/05/31 07:50:22 pm        268
Facebook Telegram Linkin
មន្ត្រីជំនាញបានបញ្ជាក់ថា ផ្ទៃដីកសិកម្មខេត្តកែបមានទំហំជាង៩ពាន់ហិកតា ដីស្រែជាង ៣ពាន់​ហិកតា និងដីចម្ការជាង៦ពាន់ហិកតា ដែលអាច​បំពេញ​តម្រូវ​ការ​ពលរដ្ឋ​សរុបជាង ៤ម៉ឺននាក់​ក្នុង​ខេត្ត។ តែយ៉ាងណាក៏ដោយបច្ចុប្បន្នមន្ត្រីជំនាញកំពុងខិតខំជំរុញលើកទឹកចិត្ត ដល់កសិករ សហគមន៍​កសិកម្ម អាជ្ញាធរ និងអ្នកពាក់ព័ន្ធ រួមគ្នាលើកកម្ពស់វិស័យកសិកម្មខេត្ត ពោលគឺ​ធ្វើ​កសិកម្ម​ឲ្យ “មានហូប មានបាន មានប្រើ និងមានជារៀងរហូត”។ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកែប លោក ថឹង បូរិន បានបញ្ជាក់ថា វិស័យកសិកម្មក្នុងខេត្តកែប បានដើរតួនាទីសំខាន់ ក្នុងការធានាដល់សុវត្ថិភាពស្បៀង ឆ្លើយតបបាននូវតម្រូវការរបស់ប្រជាពលរដ្ឋក្នុងខេត្ត និងភ្ញៀវទេសចរផង ទាំងលើផ្នែកស្រូវអង្ករ ត្រីសាច់ និងបន្លែផ្លែឈើជាដើម។ ទាំងនេះគឺកើតចេញពីការយកចិត្តទុកដាក់ និងការខិតខំរួមគ្នារវាងកសិករ អាជ្ញាធរ មន្ត្រីជំនាញពាក់ព័ន្ធ អង្គការដៃគូ និងវិស័យឯកជនផ្សេងៗ។ លោកប្រធានមន្ទីរបានបញ្ជាក់ទៀតថា ដោយអនុវត្តតាមគោលនយោបាយដ៏ត្រឹមត្រូវរបស់រាជរដ្ឋាភិបាល ការយកចិត្តទុកដាក់ពីក្រសួងកសិកម្ម ពិសេសការចុះពិនិត្យ ចង្អុលបង្ហាញដោយផ្ទាល់ របស់ឯកឧត្តមបណ្ឌិត សោម ពិសិដ្ឋ អភិបាលខេត្តកែប បានធ្វើឲ្យវិស័យកសិកម្មខេត្តកែប មិនត្រឹមតែអាចគ្រប់គ្រាប់សម្រាប់ហូបនោះទេ ថែមទាំងអាចសល់នាំចេញទៅក្រៅប្រទេសទៀតផង។ ទទ្ទឹមគ្នានេះ មន្ទីរកំពុងតែខិតខំសិក្សា ស្រាវជ្រាវ និងស្វែងរកបច្ចេកទេសថ្មី ដើម្បីធ្វើយ៉ាងណាឲ្យការដាំដុះ ការចិញ្ចឹមសត្វរបស់ប្រជាកសិករ ទទួលបានទិន្នផលកាន់តែច្រើន គុណភាពកាន់តែល្អ ទីផ្សារកាន់តែទូលំទូលាយ ពោលគឺធ្វើកសិកម្មឲ្យ “មានហូប មានបាន មានប្រើ និងមានជារៀងរហូត” ។ លោកប្រធានមន្ទីរក៏បានណែនាំដល់កសិករទាំងអស់ បើមានចម្ងល់ ឬបញ្ហាលើការងារដាំដុះ ឬចិញ្ចឹមសត្វ បញ្ហាទីផ្សារ សូមទាក់ទងទៅមន្ត្រីកសិកម្មឃុំ ហើយសូមសហគមន៍កសិកម្មក្នុងខេត្តខិតខំប្រែក្លាយ ខ្លួនឲ្យទៅជាសហគមន៍កសិកម្មទំនើប និងព្យាយាមចែករំលែងបទពិសោធន៍ និងរបបគំហើញថ្មីៗ ដល់កសិករ ដើម្បីឲ្យពួកគាត់មានភាពកក់ក្តៅ និងជឿជាក់ ថាពួកគាត់អាចផ្ញើជីវិត និងអនាគតក្រុមគ្រួសារ ជាមួយនឹងរបរកសិកម្មបាន៕

អ្នកដាំទុរេនស្រុកចម្ការលើ​ចង់ឲ្យអ្នកលក់ប្រកាន់ភាពស្មោះត្រង់លើអតិថិជន

2026/05/31 07:11:50 pm        356
Facebook Telegram Linkin
ម្ចាស់ចំការទុរេនក្នុងស្រុកចម្ការលើ​ ខេត្ត​កំពង់ចាម​ ចង់ឲ្យឈ្មួញយកទៅលក់បន្តត្រូវប្រកាន់ខ្ជាប់នូវភាពស្មោះត្រង់​ និងបន្លំអត្តសញ្ញាណ​ ខណៈ​រសជាតិទុរេនស្រុកចម្ការលើមិនចាញ់ស្រុកដ៍ទៃឡើយ។ម្ចាស់ចំការទុរេន​ឃុំចំការអណ្តូង​ លោកស្រី​ ហ៊ុន​ សុខភា​ បានឲ្យដឹង​ថា ចម្ការទុរេនលោកស្រីដាំដុះពូជរី៦​ មូលសាំងឃីង​និងម៉ាន់ថង់ទឹកដោះគោ​ ដែលគេពេលនិយមបរិភោគ​ ហើយសម្រាប់ទិន្នផលឆ្នាំនេះ ចម្ការលោកស្រីទទួលបានផលទាបជាងឆ្នាំមុន​ ដោយសារកត្តាអាកាសធាតុ។ ជាមួយគ្នានេះ​ លោកស្រី​ ហ៊ុន​ សុខភា​ ក៏ដូចម្ចាស់ចម្ការទុរេនស្រុកដ៏ទៃ​ គឺចង់ឲ្យម្ចាស់ចម្ការ​ប្រកាន់ខ្ជាប់នូវភាពស្មោះត្រង់ជូនអតិថិជន​ និងស្នើសុំឲ្យឈ្នួលកណ្តាលទាំងអស់ដែលទិញពីចម្ការផ្ទាល់យកទៅលក់បន្តធ្វើយ៉ាងណាចេះរក្សានូវគុណភាព​ និងកុំបន្លំអត្តសញ្ញាណទុរេន​ចម្ការអណ្តូងស្រុកចំការលើ​ខេត្ត​កំពង់ចាម​ ពោលគឺដើម្បីកុំឲ្យមហាជនយល់ច្រលំថាទុរេនអ្នកស្រុកតំបន់មិនល្អឆ្ងាញ់ដូចមុន។​សូមជំរាបជូនថា នៅក្នុងខេត្តកំពង់ចាម ទុរេនដែលល្បីល្បាញ់មានរសជាតិឆ្ញាញ់ជាងគេនោះគឺ ទុរេនរបស់អ្នកស្រុកចម្ការលើ​ និងស្រុកស្ទឹងត្រង់ ដែលម្ចាស់ចម្ការនីមួយដាំដុះបែបធម្មជាតិ ដីអំណោយផល​ មិនប៉ះពាល់ដល់សុខភាពរបស់បរិភោគឡើយ ខណៈ​នៅតំបន់នោះគេនិយមដាំទុរេនដែលមានរសជាតិឆ្ងាញ់និងពេញនិយមជាងគេនោះ គឺទុរេនប្រភេទម៉ាន់ថង៕​

កសិករនៅឃុំត្រពាំងរូង កំពុងទទួលបានការគាំទ្រពីអតិថិជនក្នុងស្រុកលើទិន្នផលទុរេន

2026/05/29 10:43:49 pm        576
Facebook Telegram Linkin
ប្រជាកសិករដាំដុះដំណាទុរេនៅឃុំត្រពាំងរូង ស្រុកកោះកុង ខេត្តកោះកុង កំពុង​ទទួល​បាន​ការ​គាំទ្រ​ពី​ក្រុម​អតិថិននៅក្នុងស្រុក ដោយប្រមូលផល​ជា​បន្ត​បន្ទាប់​លក់​ទៅ​កាន់​ទីផ្សារ​តាម​ការ​បញ្ជា​ទិញ​។ទោះបីជាប្រឈមនឹងកត្តាអាកាសធាតុផងក្តី ក៏កសិករនៅឃុំត្រពាំងរូង បានពុះពារ​បង្ក​បង្កើន​ផល​ទុរេន​របស់ខ្លួនរហូតដល់ពេលប្រមូលផលលក់ទៅជូនប្រជាពលរដ្ឋ និងអតិថិជនក្នុងស្រុក ព្រោះ​តែ​គុណភាពទុរេល្អមិនប្រើជីគីមីដូចបណ្តាប្រទេសជិតខាង។តំណាងកសិករ លោក អ៊ឹង បឺត បានរៀបរាប់ឱ្យBTVដឹងនៅរសៀលថ្ងៃទី២៧ ខែឧសភា ឆ្នាំ​២០២៦​ថា វាយតម្លៃបឋមទិន្នផលទុរេរបស់លោក កើនជាង១០ភាគរយ បើធៀបនឹងឆ្នាំមុន ដោយ​កំពុងមមាញឹកកាត់លក់ជូនអតិថិជនក្នុងស្រុក ខ្លះបញ្ជាទិញពីរាជធានីភ្នំពេញ និង​ខ្លះ​ទៀត​នៅ​តាម​បណ្តាខេត្តផ្សេងៗ។ឃុំត្រពាំងរូង ស្រុកកោះកុង ចាត់ទុកថា ឃុំមួយដែលមានសក្តានុពលផ្នែកដំាំដុះកសិកម្មហូបផ្លែ ក្នុង​នោះ​មានទុរេ សាវម៉ៅ មង្ឃុត ម្នាស់ និងការនេសាទសមុទ្រជាដើម។ គ្រប់អតិ​ថិជន​ដែល​មក​ទិញ​ទិន្ន​ផលកសិកម្មទាំងនេះ សុទ្ធតែបានកោតសរសើរពីគុណភាព និងរសជាតិមិនដាច់ពីមាត់ ចង់​ទិញ​ហើយចង់ទិញទៀត។ទន្ទឹមនោះ តំណាងប្រជាកសិករ ក៏ស្នើដល់ប្រជាពលរដ្ឋកម្ពុជា បន្តជួយ​គាំទ្រ​ផលិត​ផល​ខ្មែរ​ដែល​ស្នាដៃ​របស់កសិករយើងពិត ដើម្បីផ្តល់ប្រាក់ចំណូល និងលើកកម្ពស់សេដ្ឋកិច្ចជីវភាពគ្រួសារ ពិសេស​លើកស្ទួយផលិតផលកសិកម្មរបស់ជាតិទៅនិរន្តរភាព៕

ស្មារតីគាំទ្រទំនិញក្នុងស្រុករបស់ពលរដ្ឋ​នាំឱ្យការផលិតមានការកើនឡើងទ្វេដង ដើម្បីបំពេញ​តម្រូវ​ការ​ទីផ្សារ​

2026/05/26 09:26:19 pm        1156
Facebook Telegram Linkin
សហគ្រាសធុនតូច និងមធ្យម (SME) បាន​ដើរតួនាទីយ៉ាងសំខាន់ចូលរួមដាស់​ស្មារតី​ឱ្យ​ប្រ​ជា​ពលរដ្ឋ​ប្រើប្រា​ស់ផលិតផលក្នុងស្រុក តាមរយៈយុទ្ធនាការប្រើប្រាស់ទំនិញ​ក្នុងស្រុក​ដែល​គាំទ្រ​ដោយ​រដ្ឋាភិបាល។ ​ដោយស្មារតីសាមគ្គីពីប្រជាពលរដ្ឋ បាន​ងាកមកប្រើប្រាស់​ផលិត​ផល​ក្នុង​ស្រុក​នាំ​ឱ្យ​​កា​រផលិតទំនិញក្នុងស្រុក​របស់សហគ្រាស​មួយបានកើនឡើង៣ដង ដើម្បី​បំពេញ​តម្រូវ​ការ​ទីផ្សារ​​ដែ​លកំពុងតែហក់ឡើង បន្ទាប់ពីប្រជាពលធ្វើពហិការទំនិញនាំចូល​ពីប្រទេស​ថៃ។ លោកស្រី ហុក ស្រីហួរ អគ្គនាយិកា សហគ្រាស PPF Yummy, Khmer Food Manufacturer បាន​ប្រាប់ BTV ថា សហគ្រាសរបស់លោក​ស្រី មានផលិតផលជាច្រើនប្រភេទ ដូចជា បុកត្រីឆ្អើ, កា​ពិឆាបាត់ដំបង, ប្រហុកអង្រ្កង, ប្រហុកឦសាន, ប្រហុកអប់ក្រូចឆ្មា,​ និងប្រហុកខ្ទិះ​ ហើយមាន ផលិត​ផលប្រភេទ ទឹកឆាអំពិលទុំ, ទឹកប្រហុក, និងទឹកជ្រលក់ជូរអែម​ ព្រមទាំង​ គ្រឿងសម្លរកកូ, ឆាគ្រឿង​, សម្លរការី, ម្ជូរគ្រឿង​, ម្ជួរស្លឹកថ្នឹង, ម្ជូរសណ្តាន់, អាម៉ុក​ និងប្រហុកខ្មែរ​។ ផលិត​ផល​ទាំង​អស់​នេះបាន​​ប្រើប្រាស់គ្រឿងផ្សំក្នុងស្រុក ៩៥% ផលិត ដោយ​ប្រជាកសិករ នៅតាមមូលដ្ឋាន។ លោក​ស្រី ហុក ស្រីហួរ បានបញ្ជាក់ថា សព្វថ្ងៃប្រជាពលរដ្ឋខ្មែរបានងាកមក​ប្រើប្រាស់​ផលិតផល​ក្នុង​ស្រុក​ ជាពិសេស យុវជនការគាំទ្រផលិតផលជាតិកាន់តែច្រើន​ គឺជាការ​ជំរុញ​ដល់ក​ម្លាំង​សេដ្ឋកិច្ច​ជាតិ​ ហើយក៏នឹងជួយកាត់បន្ថយការនាំចូលទំនិញពីខាងក្រៅ និងបង្កើតការងារ និងទី​ផ្សារ​កាន់​ល្អប្រសើរឡើង។ លោកស្រីថា បន្ទាប់ពីប្រជាពលរដ្ឋធ្វើពហិការទំនិញថៃ គឺមានសន្ទុះខ្លាំងក្លា​នូវការគាំទ្រ​នូវ​ផលិត​ផល​ខ្មែរ ​ដែលនាំឱ្យ​សហគ្រាសរបស់លោកស្រីបានបង្កើនការផលិត៣ដង បើធៀបនឹងមុនការធ្វើ​ពហិការ​។ ការកើនឡើងនេះគឺ ដោយសារមា​ន​ការ​ជួយ​ជ្រោម​ជ្រែង​មិន​អាច​ខ្វះ​បាន​ពី​រាជ​រដ្ឋាភិបាល​ និងក្រសួង-ស្ថាប័ន​ ពាក់ព័ន្ធនានា ក្នុងជួយជំរុញ​ការ​ផលិត​ឱ្យ​ស្រប​តាម​ស្តង់​ដារ​អនាម័យ និងសុវត្ថិភាពចំណីអាហារ​។ សហគ្រាសនេះ​ ទទួលបាន​វិញ្ញាបនបត្របញ្ជាក់ចំណីអាហារ HACCP និង GMP ដែលធានា​គុណ​ភាព​ខ្ពស់​​ ព្រមទាំង ទទួលបានវិញ្ញាបនបត្រ FDA សម្រាប់ការនាំចេញទៅទីផ្សារសហរដ្ឋអាមេរិក ផង​ដែរ​។ ដោយ​មានសន្ទុះគាំទ្រពីប្រជាពលរដ្ឋ ទាំងក្នុង និងក្រៅប្រទេស សព្វថ្ងៃសហគ្រាស​កំពុង​មមា​ញឹក​ខ្លាំង​ក្នុង​ការផលិតដោយយកចិត្តទុកដាក់ផ្តោតជាចម្បងលើគុណភាព និងសុវត្ថិភាព​សម្រាប់​អ្នក​ទទួល​ទាន​។ បច្ចុប្បន្ន ផលិតផលរបស់សហគ្រាស PPF Yummy បាននាំចេញទៅកាន់ទីផ្សារ សហរដ្ឋអាមេរិក, នូវែលសេឡង់, អូស្ត្រាលី, កូរ៉េខាងត្បូង និង​ជប៉ុន។ ដោយឡែក ទីផ្សារ​ក្នុង​ស្រុក​វិញ គឺមានលក់ទៅតាមផ្សារទំនើបនានា​ជាង ២៥០កន្លែងរាជធានីភ្នំពេញ​៕ អត្ថបទ៖ ធូ វិរៈ  

រដ្ឋមន្ត្រីក្រសួងរ៉ែ៖ រាជរដ្ឋាភិបាលកំពុងតាមដាន និងពិនិត្យ​លទ្ធភាព​ការ​អនុវត្ត​ពន្ធ​ជួយ​លើ​ការ​ធ្វើ​ពាណិជ្ជ​កម្ម

2026/05/26 05:37:33 pm        661
Facebook Telegram Linkin
រដ្ឋមន្ត្រីក្រសួងរ៉ែ និងថាមពល ថ្លែងថា ក្នុងស្ថានភាពមិនទាន់មានភាពប្រាកដប្រជានេះ រាជ​រដ្ឋាភិបាល​បាន​កំពុងតាមដាន និងការពិនិត្យលទ្ធភាពលើការអនុវត្តពន្ធ ដើម្បីសម្រួល​ដល់​ការ​ធ្វើ​ពាណិជ្ជ​កម្ម ​គាំទ្រដល់សកម្មភាពភាពនៃវិស័យចម្បងៗក្នុងស្រុក ក្នុងគោលដៅ​ជំរុញ​សេដ្ឋកិច្ច​ឱ្យ​ងើប​ឡើង​វិញ។ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល លើកឡើង​នៅ​ក្នុង​ពិធី​សំណេះ​សំណាល​សាក​សួរ​សុខ​ទុក្ខដល់ថ្នាក់ដឹកនាំ នាយទាហាន យោធាចារ្យនាយទាហានរង និងសិក្ខា​កាម​ពល​ទាហាន​ថ្មី​វ​គ្គ​៧ នៅមជ្ឈមណ្ឌលហ្វឹកហ្វឺនកងទ័ពជើងគោក នៅថ្ងៃទី២៥ ខែឧសភា ម្សិលមិញនេះថា នៅ​ក្នុង​បរិការណ៍មិនទាន់មានភាពប្រាកដប្រជា, កំណើនសេដ្ឋកិច្ចកម្ពុជាដែលបានគ្រោងប្រមាណ ៥% នៅដើមឆ្នំា ត្រូវបានរាជរដ្ឋាភិបាលទម្លាក់មកនៅត្រឹម ៤,២% ដោយ​សារ​កម្ម​វិបា​ក​នៃ​ឥទ្ធិពល​សាយ​ភាយ​បញ្ហាជម្លោះព្រំដែនកម្ពុជា-ថៃ, ការបង្រ្កាបការឆបោកតាមប្រព័ន្ធបច្ចេកវិទ្យា និង​ការ​កើន​ឡើងដោ​យសារបញ្ហាថ្លៃប្រេងឥន្ធនៈ ដែលធ្វើឱ្យមានសម្ពោធអតិផរណា និងបានជះ​ឥទ្ធិពល​ដល់​វិស័យ​សំខាន់ៗផងដែរ។ ឯកឧត្តមរដ្ឋមន្ត្រី បន្តថា ជុំវិញបញ្ហាខាងលើនេះ សម្តេចមហាបវរធិបតី ហ៊ុន ម៉ាណែត នាយករដ្ឋ​មន្រ្តី ​និងស្ថាប័នទាំងអស់ របស់រាជរដ្ឋាភិបាល បាននិងកំពុងខិតខំប្រឹងប្រែងយ៉ាងខ្លាំង ដើម្បី​ការ​លើក​កម្ពស់​ជីវភាព និងសុខុមាលភាពប្រជាជន និងជំរុញការ វិនិយោគសាធារណៈនានា ក្នុង​គោល​ដៅ​ទប់​លំនឹងនៃសេដ្ឋកិច្ច និងឱ្យសេដ្ឋកិច្ចកម្ពុជាឈានទៅងើបឡើងវិញ ដែលមាន​កំណើន​ខ្ពស់ ​ដូចមុនវិបត្តិជំងឺកូវីដ-១៩ ក្នុងនោះទាក់ទងការវិនិយោគ, រាជរដ្ឋាភិបាល​ក៏បា​ន​យក​ចិត្ត​ទុក​ដាក់​ផង​ដែរ តាមរយៈជំនួបធុរកិច្ចនៅតាម បណ្តាប្រទេសនានា បង្ហាញពីសក្តានុពល និង​ភាព​អំណោយ​ផល​របស់កម្ពុជា ដើម្បីស្រូបយកឱកាសវិនិយោគបន្ថែម។ យោងតាមក្របខ័ណ្ឌហិរញ្ញវត្ថុសាធារណៈរយៈពេលមធ្យមឆ្នាំ២០២៧-២០២៩ បានបង្ហាញថា ក្រៅ​ពី​ការ​អនុវត្តពន្ធគយបដិការបស់ សហរដ្ឋអាមេរិក និងជម្លោះព្រំដែនកម្ពុជ-ថៃ នៅ​ក្នុង​ឆ្នាំ​២០២៥​, កម្ពុជាបានទទួលរងនូវព្យុះកំបុតត្បូងថ្មីមួយទៀត គឺសង្គ្រាមនៅ មជ្ឈិមបូព៌ា ដែល​បង្កើន​ភាព​មិន​ប្រាកដ​ប្រជា និងហានិភ័យដល់កំណើនសេដ្ឋកិច្ចកម្ពុជាមួយកម្រិតបន្ថែមទៀត។ កម្មវិ​បាក​ធំ​ៗ​ទាំង៣ នេះបានធ្វើឱ្យកម្ពុជាប្រឈមនឹងការលំបាកទ្វេដង ក្នុងការបត់បែ​ន​គោល​នយោ​បាយ​របស់​ខ្លួនទាំងផ្នែកសេដ្ឋកិច្ច ផ្នែកការទូត និងផ្នែក សង្គម។ ដើម្បីបញ្ចៀស​និង​កាត់​បន្ថយ​នូវ​កម្ម​វិបាក​នានា, ទាំងផ្ទាល់និងប្រយោលមកលើសង្គម និងសេដ្ឋកិច្ច នៅក្នុងបរិការណ៍នេះ, កំណើន​សេដ្ឋ​កិច្ចកម្ពុជា ដែលគ្រោងក្នុងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៦ ថា​អាច​សម្រេចបាន ៥% ត្រូវបានវាយ តម្លៃថា នឹងអាចសម្រេចបានត្រឹម ៤,២% ដោយ​សារ​កម្ម​វិបាក​និង​ឥទ្ធិពលសាយភាយពីបញ្ហាជម្លោះព្រំដែនកម្ពុជា-ថៃផង, ការបង្ក្រាប ការឆបោក​តាម​ប្រព័ន្ធ​បច្ចេក​វិទ្យាផង និងការកើនថ្លៃថាមពលដែលធ្វើឱ្យមានសម្ពាធអតិផរណា និងបន្ត​ជះ​ឥទ្ធិពល​ដល់​វិស័យសំខាន់ៗ តួយ៉ាងកសិកម្ម, ដឹកជញ្ជូន, ទេសចរណ៍ និងលក់ដុំ-រាយ ជាដើម៕ អត្ថបទ៖ សុន រ៉ាឌី

មន្រ្តីជាន់ខ្ពស់ក្រសួងសេដ្ឋកិច្ច ចាត់ទុកធនធានផ្នែកគណនេយ្យ ជាកាតាលីករ​ជួយរុញ​កំណើន​សេដ្ឋកិច្ច

2026/05/26 05:18:24 pm        314
Facebook Telegram Linkin
មន្រ្តីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ បានចាត់ទុកការអភិវឌ្ឍធនធាន​មនុស្ស​ផ្នែក​គណ​នេយ្យ ​គឺជាធនធានដ៏មានសារៈសំខាន់ គាំទ្រកម្មវិធីកំណែទម្រង់សេដ្ឋកិច្ច និងហិរញ្ញវត្ថុ ការ​អភិវឌ្ឍ​វិស័យ​ហិរញ្ញវត្ថុ និងការចូលរួមជំរុញកំណើនសេដ្ឋកិច្ចជាតិនៅកម្ពុជាផងដែរ។ ឯកឧត្តមបណ្ឌិត ងី តាយី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និង​ជា​ប្រធាន​គណៈ​កម្មា​ធិការ​គ្រប់គ្រងកម្ពុជាសិក្សា គណនេយ្យជំនាញកម្ពុជា លើកឡើងបែបនេះ ក្នុងពិធី​ប្រគល់​សញ្ញា​បត្រ​បញ្ចប់​ការសិក្សា បរិញ្ញាបត្រជាន់ខ្ពស់ជំនាញវិទ្យាសាស្រ្តគណនេយ្យ និង ហិរញ្ញវត្ថុ និង​សញ្ញា​បត្រ​ជំនាញ​គណនេយ្យអន្តរជាតិ ACCA ថា កម្ពុជាបាននិងកំពុងជំរុញជំនាញអភិវឌ្ឍន៍ជំនាញ វិជ្ជា​ជីវៈ​មានចំនួន កើនឡើង ជាក់ស្តែងជំនាញលើផ្នែកគណនេយ្យ បានកំពុង​កើន​ឡើង​ជា​បន្ត​បន្ទាប់​ តែទោះបីយ៉ាងមិនទាន់ឆ្លើយតបនិងត្រូវការទីផ្សារក្នុង ស្រុកនៅឡើយ ខណៈ​កម្ពុជា​មាន​ក្រុម​ហ៊ុន​សហគ្រាសជាច្រើន ដែលបានកើនឡើងពីមួយឆ្នាំទៅមួយឆ្នាំ ដែល​សហ​គ្រាស​ទាំង​​នោះ​សុទ្ធ តែតម្រូវឱ្យកាន់បញ្ជីការ។  ឯកឧត្តមបណ្ឌិត បន្តថា តាមរយៈនៃការបណ្តុះបណ្តាលនេះ យើង​បាន​កំពុង​ឆ្លើយ​តប​ទៅ​នឹង​វិស័យ​ការ​ងារជាបណ្តើរៗ ប៉ុន្តែក៏ ទាមទារឱ្យមានការពង្រឹងសមត្ថភាពបន្ថែមផងដែរ ក្នុង​នោះ​អ្នក​ដែល​មានចំណេះ ជំនាញ គឺជាកាតាលីករដ៏សំខាន់ ក្នុងការចូលរួមទាំង សកម្មភាពការងារ ការ​បង្កើត​អាជីវកម្ម និងក៏ជាអ្នកដែលជួយអូសទាញ និង​បង្កើត​ទំនុក​ចិត្ត​ដល់​វិនិយោគិន​ឱ្យ​មក​វិនិយោគ​នៅ​កម្ពុជាផងដែរ, ដូច្នេះធនធានមនុស្សពិតជាមានសារៈសំខាន់ សម្រាប់គាំទ្រដល់​កំណើន​សេដ្ឋ​កិច្ច និងការអភិវឌ្ឍវិស័យហិរញ្ញវត្ថុនៅកម្ពុជា។  លោកបណ្ឌិត ព្រំ វីរៈ ប្រធានក្រុមប្រឹក្សាភិបាលនៃវិទ្យាស្ថានខេមអេដ លើកឡើងថា ជុំវិញ​ការ​កាន់​បញ្ជី​គណនេយ្យពិតជាមាន សារៈសំខាន់ណាស់ ដើម្បីបង្កើតទំនុកចិត្តដល់ម្ចាស់រោងចក្រ និង​សហ​គ្រាស ​ឬអាជីវកម្មដែលអនុវត្តបានដោយខ្លួនឯង គឺមិនត្រូវឱ្យ របាយការណ៍​ហិរញ្ញ​វត្ថុ​លាត​ត្រដាង ​ឬបែកធ្លាយ ជាពិសេសព័ត៌មានសម្ងាត់របស់អតិថិជន ឬអ្នកធ្វើការជាមួយនោះឡើយ ​ទោះ​បី​បច្ចុប្បន្ន យើងពុំទាន់មានច្បាប់ស្តីអំពីការថែរក្សាអាថ៌កំបាំងពាណិជ្ជកម្ម តែអ្នក​កាន់​បញ្ជី​របាយការណ៍ហិរញ្ញវត្ថុ គឺត្រូវយកចិត្តទុកដាក់និងនុវត្តឱ្យ បានគត់មាត់ ខណៈ​បច្ចុប្បន្ន​កម្ពុជា​បាន​និងកំ​ពុងរៀបចំសេចក្តីព្រាងរួចហើយ ដែលមិនយូរមិនឆាប់ច្បាប់នេះនឹងចូលជាធរមាន។ លោក នូវ រតនា នាយក​ការិយាល័យ​តំណាងសមាគមគណនេយ្យករជំនាញ (ACCA, អេ​ស៊ី​ស៊ី​អេ​) ​ប្រចាំ​កម្ពុជា និងប្រទេស ឡាវ ក៏បាន​លើក​ទឹក​ចិត្ត​ដល់​និស្សិត​ដែល​បញ្ចប់​វគ្គ​សិក្សា​បរិញ្ញា​បត្រ​ជាន់​ខ្ពស់​ជំនាញ​វិទ្យាសាស្រ្តគណនេយ្យ និងហិរញ្ញវត្ថុ ឱ្យពង្រីក ចំណេះដឹងបន្ថែម ជាពិសេស​ការ​ចាប់​យក​ជំនាញ​គណនេយ្យអន្តរជាតិ ACCA (Association of Chartered Certified Accountants) ដែល​ជា​ស្ថាប័ន​គណនេយ្យករ​ជំនាញ​អន្តរជាតិ​ឈាន​មុខ​គេ​មួយ​នៅ​លើ​ពិភព​លោក ​មានដើមកំណើតនៅចក្រភពអង់គ្លេស ដែល ACCA ត្រូវបាន​ទទួល​ស្គាល់​ជា​សញ្ញា​បត្រ​គណ​នេយ្យ ​និងហិរញ្ញវត្ថុដ៏មានឥទ្ធិពល។ ដូច្នេះនៅពេលយើងបានបញ្ចប់ ACCA វាជា​មោទន​ភាព​របស់កម្ពុជា និងធ្វើឱ្យកម្ពុជាមានគណនេយ្យករជំនាញអន្តរជាតិកាន់តែច្រើន ដើម្បី​រួម​គ្នា​បង្កើត​ទំនុក​វិនិយោគិន និងការស្រូបយកឱកាស វិនិយោគបន្ថែម៕ អត្ថបទ៖ សុន រ៉ាឌី

ភ្ញៀវទេសចរបរទេសចាប់អារម្មណ៍ប្រើប្រាស់ Bakong Tourist ដើម្បី​ទូទាត់តាមប្រព័ន្ធ​ឌីជីថល​នៅកម្ពុជា

2026/05/22 08:04:20 pm        322
Facebook Telegram Linkin
ភ្នំពេញ៖ ធនាគារជាតិនៃកម្ពុជា(NBC) បានតភ្ជាប់កម្មវិធីទូទាត់បាគងទេសចរ (Bakong Tourist) ជាមួយក្រុមហ៊ុន បណ្តាញប័ណ្ណទូទាត់អន្តរជាតិ Mastercard និង VISA ដើម្បី​សម្រួល​ដល់​ការ​ទូទាត់​របស់ភ្ញៀវទេសចរអន្តរជាតិដែលធ្វើដំណើរកម្សាន្តនៅប្រទេសកម្ពុជា ដោយផ្តល់​លទ្ធភាព​ក្នុង​ការស្កេន KHQR ទូទាត់បែបឌីជីថលបានងាយស្រួលដូចប្រជាជនក្នុងស្រុក។ ជាក់​ស្តែង ភ្ញៀវទេសចរបរទេសមកដើរលេងនៅផ្សារធំថ្មីក្នុងរាជធានីភ្នំពេញ បានចាប់អារម្មណ៍​ប្រើ​ប្រាស់​​ កម្មវិធីទូទាត់បាគងទេសចរ (Bakong Tourist) ដើម្បីទូទាត់ទំនិញ និងសេវាកម្ម​តាម​ប្រព័ន្ធ​ឌីជីថល ដែលមានភាព​ងាយស្រួល រហ័ស និង​សុវត្ថិភាព។​កម្មវិធី Bakong Tourists គឺជាកម្មវិធីទូទាត់ប្រាក់ឌីជីថល ដែលបង្កើត​ឡើង​ដោយ​ធនាគារ​ជាតិ​នៃ​កម្ពុជា ​(NBC) ដែល​អនុញ្ញាតឱ្យអ្នកទេសចរអន្តរជាតិ​ស្កេន​បង់​ប្រាក់​នៅ​តាម​ទីតាំង​លក់​រាយ​រាប់​លាន​កន្លែងទូទាំងប្រទេសកម្ពុជា ដោយលុបបំបាត់តម្រូវការយកសាច់ប្រាក់ ឬការ​ប្តូរប្រាក់ សម្រាប់​ភ្ញៀវទេសចរ។​ភ្ញៀវទេសចរបរទេសដែលមកពីប្រទេស អេស្បាញ់ និងអូស្ត្រាលី បាន​មកដើរកម្សាន្ត និងទិញ​ទំនិញ​នៅ​ផ្សារ​ធំថ្មី រាជធានីភ្នំពេញ​ បានផ្តល់បទសម្ភាសន៍ជាមួយ BTV ថា ជាធម្មតា ពួកគេ​បាន​បង់​ប្រាក់​ជាសាច់ប្រាក់សុទ្ធ​ទៅកាន់អាជីវករ និងពេលខ្លះគឺបង់ប្រាក់តាមរយៈការឆូតកាត់។​ នៅ​ពេល​ណែ​នាំអំពីការប្រើប្រាស់​​កម្មវិធី Bakong Tourists គឺពួកគេបានចាប់អារម្មណ៍ជាខ្លាំង ដោយ​ពួក​គេ​នឹងសាងល្បងប្រើប្រាស់កម្មវិធីនេះ ដើម្បី​ងាយស្រួលដល់ការទូទាត់របស់ពួកគេ​ក្នុង​អំឡុង​ពេលដំណើរកម្សាន្ត​នៅកម្ពុជា​។​សូមជម្រាបថា ធនាគារជាតិនៃកម្ពុជាបានរួមចំណែកលើកស្ទួយវិស័យ ទេសចរណ៍នៅកម្ពុជា ដោយ​បានដាក់ឱ្យដំណើរការជាបឋមកម្មវិធីទូទាត់បាគងទេចរ កាលពីថ្ងៃទី១៩ ខែវិច្ឆិកា ឆ្នាំ​២០២៤ ដោយភ្ញៀវទេសចរដែលមកកម្ពុជា អាចទាញយកកម្មវីធីបាគងទេសចរ និង ភ្ជាប់​ជា​មួយ​ប័ណ្ណទូទាត់អន្តរជាតិ ដូចជា Mastercard និង VISA ដើម្បីទូទាត់ទំនិញនិងសេវាផ្សេងៗ ជាមួយ KHQR របស់ពាណិជ្ជករទូទាំងប្រទេសកម្ពុជាប្រកបដោយភាពងាយស្រួល និង សុវត្ថិភាពខ្ពស់។ធនាគារជាតិនៃកម្ពុជាបានអភិវឌ្ឍនិងតភ្ជាប់ហេដ្ឋារចនាសម្ព័ន្ធប្រព័ន្ធទូទាត់ឆ្លងដែនផ្លូវការ និង​ជំរុញការទូទាត់ឌីជីថល ក្នុងគោលបំណងរួមចំណែកជំរុញវិស័យទេសចរណ៍ ពាណិជ្ជកម្ម និង​លើក​កម្ពស់ការប្រើប្រាស់រូបិយវត្ថុជាតិ ដោយបាន​ដាក់​ឱ្យ​ដំណើរ​កា​រគម្រោង​ទូទាត់​ឆ្លង​ដែន​ទ្វេភាគី​តាម ហ្សូអរកួត (QR) ជាមួយប្រទេសថៃ ឡាវ វៀតណាម ម៉ាឡេស៊ី កូរ៉េខាងត្បូង ចិន ជប៉ុន និងសិង្ហបុរី ហើយគ្រោងនឹងដាក់ឱ្យដំណើរការគម្រោងទូទាត់​ឆ្លងដែន​ទ្វេភាគី​ជាមួយ​ប្រទេសឥណ្ឌា នាពេលឆាប់ៗខាងមុខ និងបានចុះអនុស្សរណៈយោគយល់ជាមួយឥណ្ឌូណេស៊ី ព្រមទាំង កំពុងពិភា​ក្សា​តភ្ជាប់ការទូទាត់ឆ្លងដែន ជាមួយប្រទេសហ្វីលីពីនផងដែរ៕ អត្ថបទ៖ ធូ វិរៈ 

អគ្គនាយកដ្ឋានពន្ធដារបានកំណត់នូវទិសដៅកែទម្រង់សំខាន់ៗពីរ គឺការកែទម្រង់​គោល​នយោបាយ ​និងរដ្ឋបាលសារពើពន្ធ

2026/05/21 09:46:19 pm        289
Facebook Telegram Linkin
ឯកឧត្តម គង់ វិបុល អគ្គនាយកនៃអគ្គនាយកដ្ឋានពន្ធដារ បាន​បញ្ជាក់ថា ស្របគ្នាជាមួយ​នឹង​ការ​រីក​ចម្រើន​នៃ​សេដ្ឋកិច្ចកម្ពុជា អគ្គនាយកដ្ឋានពន្ធដារ​បាន​កំណត់​នូវ​ទិសដៅ​កែ​ទម្រង់​សំខាន់​ៗ​ចំនួន​ពីរ​ គឺការកែទម្រង់គោលនយោបាយ និងរដ្ឋបាលសារពើពន្ធ ដើម្បី​ពង្រឹងគុណភាព ប្រសិទ្ធ​ភាព ​ស័ក្តិសិទ្ធិភាព និងតម្លាភាព ក្នុងការផ្តល់សេវាជូនអ្នកបង់ពន្ធឱ្យកាន់តែងាយស្រួល និង​ប្រសើរ​ឡើង។​ ឯកឧត្តម គង់ វិបុល បានបញ្ជាក់ថា ការកែទម្រង់រដ្ឋបាលសារពើពន្ធ ទាំងពីរនេះ គឺ​ តាមរយៈ​ការ​ធ្វើ​ទំនើប​កម្ម​នៃរដ្ឋបាលសារពើពន្ធកម្ពុជា ជាពិសេសការធ្វើបរិវត្តកម្ម និងទំនើបកម្មផ្នែក​បច្ចេក​វិទ្យា​ព័ត៌មាន​ឌីជីថល ដែលបានប្រែក្លាយពីការបំពេញភារកិច្ចការងារដោយដៃ (Manual) ទាំង​ស្រុង​មក​ធ្វើតាមប្រព័ន្ធឌីជីថលស្ទើរតែទាំងស្រុងវិញ។ ឯកឧត្តម បន្តថា ការកែទម្រង់ការគ្រប់គ្រងធនធានមនុស្ស ក៏ជាមុខព្រួញមួយដ៏សំខាន់ ក្នុង​ការ​ពង្រឹង​ចំណេះ​ដឹង របស់មន្ត្រី និងការពង្រឹងក្រមសីលធម៌ ព្រមទាំង ពង្រឹងគុណភាពនៃការ​ផ្តល់​សេវា​ពន្ធ​ដារ​នានាជូន អ្នកជាប់ពន្ធឱ្យបានកាន់តែប្រសើរឡើង និងមានប្រសិទ្ធភាពខ្ពស់, ការ​បង្កើត​អង្គភាពសវនកម្មពន្ធដារពិសេស ចំណុះអគ្គនាយកដ្ឋានពន្ធដារ ស្រប​តាម​អនុសាសន៍​ដ៏​ខ្ពង់​ខ្ពស់​របស់សម្តេចធិបតី នាយករដ្ឋមន្ត្រី ដើម្បីគាំទ្រនិងជាយន្តការពន្លឿនការងារសវនកម្ម ពន្ធដារ​ជូន​ដល់​អ្នកជាប់ពន្ធដែលមានអនុលោមភាពខ្ពស់។ ទន្ទឹមគ្នានេះ ការកែទម្រង់​នីតិ​វិធី​នៃ​កា​រ​អនុវត្ត​ការ​ងារ​ដោយ​បានរៀបចំនូវនិយាមនីតិវិធីប្រតិបត្តិ ការងារ (SOP) នូវរាល់គ្រប់មុខងារ​ស្នូល​ក្នុង​ការ​បម្រើ​សេវា​អ្នកជាប់ពន្ធនានា។ ឯកឧត្តម បានអះអាងថា ផ្អែកតាមលទ្ធផលនៃកំណែទម្រង់ដូចបានរៀបរាប់ខាងលើ ជាលទ្ធ​ផល​គឺ​ សម្រេចបានជោគ​ជ័យ ក្នុងការប្រមូលចំណូលពន្ធផ្ទៃក្នុងជាបន្តបន្ទាប់ ដែលមាន​ការ​កើន​ឡើង​ដល់​កម្រិត​ខ្ពស់ និងបានក្លាយជា​អង្គភាព​ប្រមូល​ចំណូល​ខ្ពស់​ជាង​គេ​ក្នុង​ចំណោម​អង្គ​ភាព​ប្រមូល​ចំណូល​នានា។​ ការប្រមូលចំណូលដោយជោគជ័យនេះ គឺជាសមិទ្ធផលនៃការកែទម្រង់របស់ រដ្ឋបាល​សារពើពន្ធកម្ពុជា ដើម្បីប្រមូលពន្ធឱ្យអស់សក្តានុពល និងប្រកបដោយតម្លាភាព បើទោះ​បី​ជា​ស្ថិតក្នុងបរិការណ៍ដែលមិនមានការបង្កើតប្រភេទពន្ធថ្មី, មិនដំឡើងអត្រាពន្ធ និងអាករ និង​មាន​ការ​បន្តការផ្តល់ការលើកទឹកចិត្តពន្ធដារជាច្រើនជាបន្តបន្ទាប់ក៏ដោយ។ បើតាម ឯកឧត្តម គង់ វិបុល ការកែទម្រង់​រដ្ឋបាល​សារ​ពើពន្ធ​ដោយ​ជោគជ័យ​បាន​ធ្វើ​ឱ្យ​លទ្ធ​ផល​នៃ​ការ​ប្រមូល​ចំណូលពន្ធមានភាពល្អប្រសើរ អាចឆ្លើយតបបានគ្រប់​គ្រាន់​នឹង​តម្រូវ​ការ​ហិរញ្ញ​វត្ថុ​សាធារណៈ​។ លើសពីនេះការប្រមូលចំណូលបានលើសផែនការនាពេលកន្លងមកក៏ផ្តល់លទ្ធភាពដល់រាជរដ្ឋាភិបាល​ បំពេញបន្ថែមនូវកញ្ចប់ថវិកាសន្សំ ដើម្បីអភិវឌ្ឍ និងអនុវត្ត​គោល​នយោបាយ​នានា​បន្ថែម​ទៀត​ ជាពិសេសការចាត់វិធានការដោះស្រាយដើម្បីឆ្លើយតបយ៉ាងសមស្រប និងទាន់​ពេល​វេលា​ជា​មួយ​នឹង​វិបត្តិនៃការរីករាលដាលនៃជំងឺកូវីដ-១៩ និងវិធានការអន្តរាគម​ន៍​ចាំបា​ច់​នានា​កន្ល​ង​មក​៕ ​អត្ថបទ៖ ធូ វិរៈ

ការប្រមូលចំណូលពន្ធដារបានកើនពី ៧៣៨ ដល់ ៣ ៥៧៧ លានដុល្លារអាមេរិក ក្នុង​រយៈពេល​១៣​ឆ្នាំ​ចុងក្រោយ

2026/05/21 09:38:32 pm        1138
Facebook Telegram Linkin
ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្ដី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានថ្លែងក្នុងវិធីសម្ពោធអគារទីស្នាក់ការកណ្តាលនៃអគ្គនាយកដ្ឋានពន្ធដារថ្មី នៅព្រឹកថ្ងៃទី ២១ ខែឧសភា ឆ្នាំ២០២៦នេះថា ក្នុងរយៈពេល ១៣ឆ្នាំចុងក្រោយ ការប្រមូលចំណូលពន្ធដារ បានកើនឡើងជិត៤ដង ពីប្រមាណ ៧៣៨ លានដុល្លារអាមេរិកក្នុងឆ្នាំ២០១២ ដល់ ៣ ៥៧៧ លានដុល្លារអាមេរិក ក្នុងឆ្នាំ២០២៥ ទោះបីកម្ពុជា​ប្រឈមនឹង​សត្រូវ​ឈ្លានពាន វិបត្តិប្រេង និងវិបត្តិសកលក្ដី។ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន បានថ្លែងទៀត ជាក់ស្ដែងចំណូលដែលត្រូវបានប្រមូលដោយអគ្គនាយកដ្ឋានពន្ធដារ បានកើនគួរឱ្យគត់សម្គាល់ ពីចំនួនត្រឹមតែប្រមាណ ៧៣៨ លានដុល្លារអាមេរិកក្នុងឆ្នាំ២០១២ កើនដល់ ៣៥៧៧ លានដុល្លារអាមេរិក ក្នុងឆ្នាំ២០២៥ កន្លងទៅ ពោលគឺមានកំណើនជិត ៤ដង ក្នុងរយៈពេល ១៣ឆ្នាំចុងក្រោយនេះ។ឯកឧត្តមអគ្គបណ្ឌិតសភាចារ្យ បានឱ្យដឹងទៀតថា ក្នុងរយៈពេលជាងមួយទសវត្សរ៍នេះអគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ បានសម្រេចបាននូវសមិទ្ធផលចម្បងជាច្រើន ជាអាទិ៍ ការធ្វើទំនើបកម្មកម្មវិធី និងប្រព័ន្ធបច្ចេកវិទ្យាឌីជីថលជាច្រើន តាមរយៈការធ្វើសមាហរណកម្ម និងសន្ធានកម្មប្រព័ន្ធបច្ចេកវិទ្យាព័ត៌មានឱ្យបានពេញលេញជា ប្រព័ន្ធអេកូឡូស៊ីឌីជីថលមួយ ដើម្បីបង្កលក្ខណៈងាយស្រួល និងផ្តល់សេវាកាន់តែ ប្រសើរជូនអ្នកជាប់ពន្ធក្នុងការបំពេញកាតព្វកិច្ចសារពើពន្ធ និងការពង្រឹងអភិបាលកិច្ច និងការអភិវឌ្ឍមូលធនមនុស្ស តាមរយៈការវិភាគមុខងារ អង្គភាពក្រោមឱវាទ, ការកែសម្រួលរចនាសម្ព័ន្ធការងារក្នុងករណីចាំបាច់, ការពង្រីក ចំណេះដឹង និងការជំរុញអនុវត្តនូវក្រមប្រតិបត្តិវិជ្ជាជីវៈរបស់មន្ត្រី។ឯកឧត្តម អគ្គបណ្ឌិតសភាចារ្យ បានបញ្ជាក់ថា ក្រោមដំបូល នៃសន្តិភាព និងស្ថិរភាពនយោបាយកម្ពុជាបានសម្រេចនូវការអភិវឌ្ឍ និងបន្តរក្សាបាននូវស្ថិរភាពម៉ាក្រូសេដ្ឋកិច្ចនិង ហិរញ្ញវត្ថុសាធារណៈ។ កត្តាទាំងនេះបានក្លាយជាមូលដ្ឋានគ្រឹះដ៏រឹងមាំដែលផ្តល់លទ្ធភាពឱ្យមានការរីកចម្រើននៃវិស័យពន្ធដារ និងភាពជោគ​​​ជ័យនៃការប្រមូលចំណូលបើទោះបីជាការប្រមូល គឺក្នុងក្របខណ្ឌ “មិនបង្កើតប្រភេទពន្ធថ្មី និងមិនដំឡើងអត្រាពន្ធ និងអាករ” ក៏ដោយ។បើតាមឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន តាមរយៈលទ្ធផលប្រមូលពន្ធបានល្អប្រសើររាជរដ្ឋាភិបាលមានលទ្ធភាពសន្សំនូវថវិកាដើម្បីជាទុន ក្នុងការដោះស្រាយបញ្ហាប្រឈមនានាក្នុងគ្រប់កាលៈទេសៈលំបាកទាំងឡាយកន្លងមក រួមទាំងវិបត្តិនៃជំងឺកូវីដ-១៩ ជាសកល និងភាពមិនប្រាកដប្រជាខ្ពស់នៃវិបត្តិសកលនានាព្រមទាំងបានផ្តល់លទ្ធភាពឱ្យសេដ្ឋកិច្ចកម្ពុជាស្ទុះងើបឡើងវិញបានយ៉ាងរហ័ស និងប្រកប ដោយភាពធន់។សូមបញ្ជាក់ថា តាមរយៈកំណើនសេដ្ឋកិច្ចដ៏រឹងមាំប្រកបដោយចីរភាព និងការប្រមូលចំណូលប្រកបដោយ ប្រសិទ្ធភាព និងស័ក្តិសិទ្ធិភាពរបស់កម្ពុជា ពិតជាបានរួមចំណែកយ៉ាងសំខាន់ក្នុងការផ្តល់លទ្ធភាពជូនដល់រាជរដ្ឋាភិបាល ក្នុងការបង្កើនការវិនិយោគសាធារណៈលើហេដ្ឋារចនាសម្ព័ន្ធគ្រប់ប្រភេទ ដូចជាផ្លូវថ្នល់ ស្ពាន សាលារៀន មន្ទីរពេទ្យ ប្រព័ន្ធធារាសាស្ត្រ ប្រព័ន្ធទឹកស្អាត បណ្តាញអគ្គិសនី ។ល។ និងក្នុងការដំឡើងប្រាក់បៀវត្ស ប្រាក់បំណាច់មុខងារ និងរបបសន្តិសុខសង្គម ជូនមន្ត្រីរាជការ ស៊ីវិល កងកម្លាំងប្រដាប់អាវុធ និវត្តជន និងមន្ត្រីបុគ្គលិកគ្រប់ប្រភេទ ទន្ទឹមនឹងការបង្កើន ប្រាក់សោធនប្រចាំខែសម្រាប់អតីតមន្ត្រីរាជការស៊ីវិល និងអតីតយុទ្ធជនផងដែរ៕ អត្ថបទ៖ ធូ វិរៈ 

បណ្ដាញសង្គម

ព័ត៌មានថ្មីៗ

ឥណ្ឌា និងចិន ចាប់ផ្តើមពាណិជ្ជកម្មព្រំដែនឡើងវិញ ក្រោយផ្អាកអស់រយៈពេល ៦ឆ្នាំ
08/03/2026 07:08 PM
Facebook Telegram Linkin
អ្នកឡើងភ្នំ ១០នាក់ បានស្លាប់នៅក្នុងបំណាក់ផ្ទាំងទឹកកកនៅប្រទេសប៉ាគីស្ថាន
08/03/2026 07:08 PM
Facebook Telegram Linkin
រថយន្តយោធាអេស្ប៉ាញដឹកជនអន្តោប្រវេសន៍ត្រឡប់ទៅកាន់ព្រំដែនម៉ារ៉ុក
08/03/2026 07:08 PM
Facebook Telegram Linkin
យានដ្រូនវាយប្រហារឃ្លាំងស្តុកទំនិញមួយកន្លែងរបស់ក្រុមហ៊ុន Wildberries នៅតំបន់ Vladimir ប្រទេសរុស្ស៊ី
08/03/2026 07:08 PM
Facebook Telegram Linkin
យន្តហោះទម្លាក់ទឹក ចាប់​ផ្ដើម​​ប្រតិបត្តិការឡើង​វិញ​​ ខណៈក្រិកកំពុងប្រយុទ្ធប្រឆាំងនឹងចំហេះ​ព្រៃ
08/03/2026 07:08 PM
Facebook Telegram Linkin
នាយករដ្ឋមន្រ្តីជប៉ុន ធ្វើដំណើរទៅកាន់ខេត្ត Kumamoto ដែលរងគ្រោះដោយសារការរញ្ជួយដី
08/03/2026 07:08 PM
Facebook Telegram Linkin
អ៊ីស្រាអែលផ្គើនផែនការសន្តិភាពរបស់លោក Trump ពេលដែលពួកគេបង្កើនការវាយប្រហារនៅតំបន់ហ្កាហ្សា
08/03/2026 07:08 PM
Facebook Telegram Linkin
តម្លៃប្រេងធ្លាក់ចុះ ក្រោយលោក Trumpលុបចោលការវាយប្រហារអ៊ីរ៉ង់ ដើម្បីស្វែងរកិច្ចព្រមព្រៀងនុយក្លេអ៊ែរ
08/03/2026 07:08 PM
Facebook Telegram Linkin
អ៊ីរ៉ង់៖ គ្មាន​ការ​ចរចាជាមួយអាមេរិកទេ ខណៈ​ពិភាក្សា​ជាមួយអូម៉ង់ សម្រាប់​ផ្លូវបណ្ដោះអាសន្ន តាមច្រកសមុទ្រ Hormuz
08/03/2026 07:08 PM
Facebook Telegram Linkin
កងទ័ពអ៊ីស្រាអែលធ្វើ​សមយុទ្ធកងទ័ពជើងទឹក និងគោក ស្រប​ពេលមានភាពតានតឹងខ្លាំងឡើងៗ រវាងអាមេរិក និងអ៊ីរ៉ង់
08/03/2026 07:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.