BTV NEWS

ប្រធានសហព័ន្ធស្រូវអង្ករ៖ ការនំាចេញកម្ពុជាក្នុងឆ្នាំ២០២៦នេះ នឹងអាចសម្រេចបាន ១ លានតោន

ឆមាសទី១ឆ្នាំ២០២៦ កម្ពុជានាំចេញគ្រាប់ស្វាយចន្ទី មានទឹកប្រាក់ជាង ១,១ ពាន់លានដុល្លារអាមេរិក

មូលនិធិអភិវឌ្ឍន៍ EDFមើលឃើញថា ធុរកិច្ចបណ្តុះបណ្ដាលថ្មី និងSME ជាក្បាលម៉ាស៊ីនជំរុញកំណើនសេដ្ឋកិច្ចកម្ពុជា

លំហូរទឹកប្រាក់វិនិយោគចូលកម្ពុជានៅឆមាសទី១ ឆ្នាំ២០២៦ មាន ៤.៣ ប៊ីលានដុល្លារ កើនឡើង ៧ដង

សេដ្ឋកិច្ច និង កសិកម្ម

អ្នកស្រាវជ្រាវជំរុញឱ្យធុរកិច្ច និងម្ចាស់ SMEs ចាប់យកបច្ចេកវិទ្យា និងនវានុវត្តន៍បម្រើក្នុងអាជីវកម្ម

អ្នកស្រាវជ្រាវជំនាញកម្ពុជា ជំរុញឱ្យធុរកិច្ចដែលកំពុងប្រតិបត្តិការអាជីវកម្ម ជាពិសេសម្ចាស់សហគ្រាសធុនតូច និងមធ្យម ត្រូវចាប់ យកបច្ចេកវិទ្យាសម្រាប់ការប្រើប្រាស់នៅក្នុងវិស័យរបស់ខ្លួន និងការជំរុញពង្រីកនូវនវានុវត្តន៍ ដើម្បីការប្រកួតប្រជែង និងភាពរីកចម្រើន ក្នុងអាជីវកម្ម។ មន្ត្រីរាជការ អ្នកសិក្សា ស្ថាប័នអប់រំ បច្ចេកទេស និងតំណាងវិស័យឯកជន នៅក្នុងវគ្គបណ្តុះបណ្តាលមូលដ្ឋានគ្រឹះ ស្តីពីការ សម្របសម្រួលក្នុងវិស័យវិទ្យាសាស្រ្ត បច្ចេកវិទ្យា និងនវានុវត្តន៍ នៅថ្ងៃទី១១ ខែមិថុនា ម្សិលមិញនេះ បានពិភាក្សាវែកញែក និងរួមគ្នា ស្វែងដោះស្រាយលើបញ្ហាជាក់ស្តែង សម្រាប់សហគ្រាសធុនតូច និងមធ្យម (SMEs) ដែលតម្រូវឱ្យមានការកែលម្អលទ្ធភាពទទួល បានឥណទាន កាត់បន្ថយថ្លៃដើមផលិត បង្រួមនីតិវិធីរដ្ឋបាល និងការធ្វើឌីជីថលូបនីយកម្ម ខណៈដែលរដ្ឋាភិបាលកម្ពុជាចាត់ទុក វិស័យនេះជាឆ្អឹងខ្នងសេដ្ឋកិច្ច ដោយដាក់ចេញនូវយន្តការគាំទ្រជាច្រើនផងដែរ។ កញ្ញា កែវ សុផានិត អ្នកស្រាវជ្រាវ និងគ្រូបង្រៀននៅសាកលវិទ្យាពុទ្ធិសាស្រ្ត លើកឡើងថា ទាក់ទិនការប្រមូលផ្តុំមន្ត្រីរាជការ អ្នកសិក្សា ស្ថាប័នអប់រំ បច្ចេកទេស និងតំណាងវិស័យឯកជន ពិតជាមានសារៈសំខាន់ណាស់ ដើម្បីរួមគ្នាដោះស្រាយ ពិភាក្សា និង ចែករំលែកនូវចំណេះដឹងគន្លឹះថ្មីៗ ដើម្បីគាំទ្រដល់សហគ្រាសធុនតូច និងមធ្យម (SMEs) ការរួមលើកកម្ពស់ដល់វិស័យនេះ ឱ្យរីកធំ ធាត់ឆ្លើយតបទៅនិងតម្រូវការទីផ្សារ ដើម្បីឈានទៅប្រកួតប្រជែងទំនិញរបស់កម្ពុជា។ ចំណែកកញ្ញា សេង រ៉ានីកា ផ្នែក Technical and Business Support.VP.Start Technology លើកឡើងថា បច្ចុប្បន្ន កម្ពុជាបាននិងកំពុងចាប់យកបច្ចេកវិទ្យាថ្មីៗបម្រើដល់វិស័យឧស្សាហកម្ម និងសហគ្រាសធុនតូច និងមធ្យមផងដែរ ដែលនេះបាន បង្ហាញនូវការផ្លាស់ប្តូររបត់អាជីវកម្មជាបណ្តើរៗ លើកកម្ពស់ឧត្តមភាពប្រកួតប្រជែងរបស់កម្ពុជា តាមរយៈការអភិវឌ្ឍវិស័យឧស្សាហ- កម្មដែលមានសក្តានុពល ពង្រឹងគុណភាពស្ថាប័នសេដ្ឋកិច្ច និងពង្រឹកការចាប់យកដៃគូពាណិជ្ជកម្ម ព្រោះវិស័យនេះគឺជាស្នូលជួយ ដល់ប្រតិបត្តិការអាជីវកម្ម។ឯកឧត្តមបណ្ឌិត ហ៊ុល សៀងហេង អនុរដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើង ថា ជុំវិញវគ្គបណ្តុះបណ្តាលខាងលើនេះ គឺជាកិច្ចការចាំបាច់មួយដែលក្រសួងបានគិតគូរ គាំទ្រដោយដៃគូជប៉ុន ផ្តល់ជាទស្សនទាន ដល់ភាគីពាក់ព័ន្ធ ដើម្បីរួមគ្នាលើកកម្ពស់ការយល់ដឹង ក្នុងគោលដៅផ្សារភ្ជាប់ទំនាក់ទំនងរវាងអ្នកវិទ្យាសាស្រ្ត អ្នករៀបចំគោលនយោបាយ វិស័យឯកជន និងសាធារណជន ដែលមានគោលបំណងជំរុញឧស្សាហកម្ម និងសហគ្រាសធុនតូច និងមធ្យមដែលពឹងផ្អែក បច្ចេកវិទ្យា និងនវានុវត្តន៍។ សូមបញ្ជាក់ថា រាជរដ្ឋាភិបាលកម្ពុជាបានដាក់ចេញនូវចក្ខុវិស័យប្រកបដោយកាលានុត្តន៍ សម្រាប់ការអភិវឌ្ឍជាតិ ដោយមានគោលដៅក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។ ចក្ខុវិស័យនេះផ្អែក យ៉ាងសំខាន់លើ «ផែនទីបង្ហាញផ្លូវវិស័យវិទ្យាសាស្រ្ត បច្ចេកវិទ្យា និងនវានុវត្តន៍រៀបចំឡើង (វ.ប.ន.) ២០៣០ របស់កម្ពុជា» ដែលជា ក្របខណ្ឌដ៏ទូលំទូលាយសម្រាប់ការបម្លែងសេដ្ឋកិច្ចជាតិ ពីឧស្សាហកម្មដែលមានតម្លៃបន្ថែមទាប ទៅកាន់វិស័យផ្អែកលើបច្ចេកវិទ្យា និងចំណេះដឹងជាចម្បង៕ អត្ថបទ៖ សុន រ៉ាឌី

កម្ពុជាមានសមត្ថភាពផលិតសាច់ស្រស់គ្រប់គ្រាន់ ខណៈផលិតកម្មក្នុងស្រុកអាចផ្គត់ផ្គង់បាន ៩៨% លើទីផ្សារ

ភ្នំពេញ៖ ស្របពេលសម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី នៃព្រះរាជាណាចក្រកម្ពុជា បានណែនាំឱ្យអាជ្ញាធរពាក់ព័ន្ធធ្វើការរឹតបណ្តឹងការនាំចូលសាច់បង្កកពីប្រទេសថៃ ក្រសួងកសិកម្ម រុក្ខាប្រមាញ់ និងនេសាទ និង ប្រធានសមាគមអ្នកចិញ្ចឹមសត្វ បានធានាអះអាងពីសមត្ថភាពផលិតសាច់ស្រស់ពីសត្វនៅកម្ពុជាគ្រប់គ្រាន់តាមតម្រូវការទីផ្សារក្នុងស្រុកដែលមានចំនួន ៣៣៨ ពាន់តោន កាលពីឆ្នាំ២០២៥កន្លងទៅ។ ការអះអាងនេះ ក៏ព្រោះតែ ផលិតកម្មសត្វក្នុងស្រុកអាចផ្គត់ផ្គង់សាច់ បានរហូតដល់ ៩៨%នៃតម្រូវការសរុបនៅទូទាំងប្រទេស។ របាយការណ៍ក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ក្នុងឆ្នាំ២០២៥ កន្លងទៅ តម្រូវការសាច់ពីសត្វនៅកម្ពុជាមានចំនួនសរុបជាង ៣៣៨,២៦ពាន់តោន។ ក្នុងនោះ សាច់គោ-ក្របី មានតម្រូវការចំនួន ៩៣,៧១ពាន់តោន, សាច់ជ្រូកចំនួន ១៦៩,៦៨ពាន់តោន, សាច់បក្សីចំនួន ៧៣,៣៦ពាន់តោន និងសាច់ចៀម-ពពែចំនួន ១ ៥០៩តោន។ របាយការណ៍នេះ បញ្ជាក់ទៀតថា ផលិតកម្មសត្វក្នុងស្រុកអាចផ្គត់ផ្គង់សាច់បានប្រមាណ ៣៣១,៥ពាន់តោន ស្មើនឹង ៩៨% នៃតម្រូវការសរុប ហើយក្រៅពីនោះ បរិមាណសាច់ដែលខ្វះខាតត្រូវបាននាំចូលពីបរទេសបមកបំពេញតម្រូវការបន្ថែមសម្រាប់ម្ហូបអាហារ និងធ្វើជាវត្ថុធាតុដើមផលិតចំណីសត្វលម្អ ដែលបាននាំចូលសាច់សរុបចំនួន ២៩ពាន់តោនប៉ុណ្ណោះ។ លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានគាំទ្រពេញទំហឹងចំពោះវិធានការរបស់រាជរដ្ឋាភិបាលក្នុងការរឹតបណ្តឹងការនាំចូលសាច់បង្កកពីប្រទេសថៃ ដែលវិធានការនេះ គឺបង្ហាញពីការយកចិត្តទុកដាក់ខ្ពស់មកលើសុខភាពរបស់ប្រជាពលរដ្ឋ។ ពាក់ព័ន្ធនឹងការផ្គត់ផ្គង់សាច់សត្វក្នុងស្រុក លោកបានធានាការផ្គត់ផ្គង់មិនឱ្យខ្វះខាត ដែលលោកជឿថា មិនចាំបាច់នាំចូលសាច់បង្កកពីប្រទេសជិតខាងនោះទេ ព្រោះផលិតផលក្នុងស្រុកអាចជំនួសបាន។ជាក់ស្តែង នៅរាជធានីភ្នំពេញ សមាជិករបស់សមាគម អាចផ្គត់ផ្គង់សាច់សត្វតាមតម្រូវការទីផ្សារបានគ្រប់ចំនួន ដោយតម្រូវការសាច់ជ្រូក មានចំនួនប្រមាណ ៩ពាន់ក្បាលក្នុងមួយថ្ងៃ, សាច់មាន់មានត្រូវការប្រមាណ ២០ម៉ឺនក្បាល ក្នុងមួយថ្ងៃ ខណៈ ស៊ុតមាន់-ទា មានសម្រូវការសរុបប្រមាណ ១១លានគ្រាប់ក្នុងមួយថ្ងៃ ក្នុងនោះ ស៊ុតមាន់មានចន្លោះពី ៤ ទៅ ៥ លានគ្រាប់ និងស៊ុតទា ៦ ទៅ ៧ លានគ្រាប់។ បើតាមរបាយការណ៍របស់ក្រសួងកសិកម្ម បានបង្ហាញទៀតថា តាមការវាយតម្លៃស្ថានភាពប្រចាំ២០២៥ កន្លងមក ការបរិភោគសាច់សត្វនៅកម្ពុជាសម្រាប់មនុស្សម្នាក់ក្នុងមួយឆ្នាំហូបសាច់អស់ជាមធ្យម ១៨,៥គីឡូក្រាម ។ ក្នុងនោះ សាច់គោ-ក្របី មានចំនួន ៥,១៥គីឡូក្រាម, សាច់ជ្រូកចំនួន ៩,៣៥គីឡូក្រាម, សាច់បក្សីចំនួន ៣,៩៥គីឡូក្រាម និងសាច់ចៀម-ពពែ មានចំនួន ០,០៥គីឡូក្រាម៕ អត្ថបទ៖ ធូ វិរៈ

អគ្គនាយកគយ និងសម្ព័ន្ធ FASMEC បើកវេទិកាជំរុញផលិតកម្មក្នុងស្រុក និងសមត្ថភាពប្រកួតប្រជែង

អគ្គនាយកដ្ឋានគយ និងរដ្ឋាករកម្ពុជា និងសម្ព័ន្ធសមាគមសហគ្រាសធុនតូចនិងមធ្យមកម្ពុជា ហៅកាត់ ហ្វាសមិច (FASMEC) បានសហការគ្នារៀបចំវេទិកាគយ និងសម្ព័ន្ធ FASMEC លើកទី១ ក្រោមប្រធានបទ “ការគាំពារសហគ្រាសធុនតូចនិងមធ្យម ដើម្បីជំរុញផលិតកម្មក្នុងស្រុក និងសមត្ថភាពប្រកួតប្រជែង” ដែលប្រព្រឹត្តិទៅក្រោមអធិបតីភាព ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ។នៅក្នុងវេទិកានាព្រឹកថ្ងៃទី១១ ខែមិថុនានេះ ឧកញ៉ា តែ តាំងប៉ ប្រធានក្រុមប្រឹក្សាភិបាលសម្ព័ន្ធសមាគមសហគ្រាសធុនតូចនិងមធ្យមកម្ពុជា បានលើកឡើងឱ្យដឹងថា នេះជាព្រឹត្តការណ៍ប្រវត្តិសាស្រ្តថ្មីមួយទៀតនៃកិច្ចសហការ រវាងគយ និង ហ្វាសមិច ក្នុងគោលបំណងបង្កើតការយល់ដឹងអំពីនីតិវិធីគយ ការលើកទឹកចិត្តផ្នែកពន្ធដារ និងការសម្របសម្រួលពាណិជ្ជកម្មនានា ដូចដឹងហើយថា សហគ្រាសធុនតូចនិងមធ្យមគឺជាឆ្អឹងខ្នងនៃសេដ្ឋកិច្ចជាតិដែលមានតួនាទីយ៉ាងសំខាន់ក្នុងការគាំទ្រកំណើនសេដ្ឋកិច្ច ការបង្កើតការងារ បង្កើតប្រាក់ចំណូលដល់ប្រជាពលរដ្ឋ ជំរុញផលិតផលក្នុងស្រុក ការបង្កើតតម្លៃបន្ថែម និងការពង្រឹងមូលដ្ឋានសេដ្ឋកិច្ចកម្ពុជាឱ្យកាន់តែរឹងមាំ និងមានសមត្ថភាពប្រកួតប្រជែង ខណៈដែលសហគ្រាសធុនតូចនិងមធ្យម នៅតែប្រឈមនឹងបញ្ហាឧបសគ្គមួយចំនួន ដូចជាកង្វះខាតព័ត៍មានជុំវិញនិងការចុះបញ្ជីនិងកាតព្វកិច្ចសារពើពន្ធ កង្វះបច្ចេកវិទ្យានិងនវានុវត្តន៍ ព្រមទាំងតម្រូវការបច្ចេកទេស ដើម្បីលើកកម្ពស់ស្តង់ដារផលិតផលខ្មែរជាដើម។នៅក្នុងពិធីបើកវេទិកានាឱកាសនេះ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានសម្តែងការកោតសសើរ និងវាយតម្លៃខ្ពស់ចំពោះការផ្តួចផ្តើមសហការរៀបចំកម្មវីធីនេះឡើង ដែលបានបង្ហាញជ្រាបច្បាស់ពីការបន្តប្តេជ្ញាចិត្តរវាងវិស័យរដ្ឋ និងឯកជន ក្នុងការបង្កើតវេទិកា ការសន្ទនាដ៏រស់រវើក ការផ្លាស់ប្តូរមតិយោបល់និងទស្សនៈ ព្រមទាំងការស្វែងរកដំណោះស្រាយរួមគ្នាសំដៅអភិវឌ្ឍជំរុញ និងលើកកម្ពស់សហគ្រាសធុនតូចនិងមធ្យមកម្ពុជា ដែលជាប្រភពដ៏សំខាន់មួយនៃការបង្កើតការងារនិងមុខរបរ និងជាកម្លាំងចលករដ៏ចម្បងនៃកំណើនសេដ្ឋកិច្ចជាតិ។ឯកឧត្តម ឧបនាយករដ្ឋមន្រ្តី បានមានប្រសាសន៍បន្តទៀតថា ច្បាស់ណាស់ថា វេទិកាដ៏ពិសេសនេះមិនត្រឹមតែជាឱកាសដ៏ប្រសើរសម្រាប់ផ្សព្វផ្សាយព័ត៍មាន និងចំណេះដឹងអំពីបទប្បញ្ញត្តិ និងនីតិវិធីគយប៉ុណ្ណោះទេ ប៉ុន្តែថែមទាំងជាយន្តការដ៏មានសារៈសំខាន់មួយសម្រាប់ការកសាងភាពជាដៃគូ រវាងស្ថាប័នរដ្ឋ និងវិស័យឯកជន ការលើកកម្ពស់ការយល់ដឹងអំពីការវិនិយោគ និងការធ្វើពាណិជ្ជកម្ម និងការពង្រឹងសមត្ថភាពប្រកួតប្រជែងរបស់ក្រុមហ៊ុន សហគ្រាសគ្រប់ប្រភេទ ជាពិសេសសហគ្រាសធុនតូចនិងមធ្យម។សូមជំរាបជូនទៀតថា ក្នុងវេទិកានេះ ក៏មានរៀបចំពិធីចុះហត្ថលេខាលើអនុស្សរណៈនៃការយោគយល់គ្នាស្តីពី កិច្ចសហប្រតិបត្តិការក្នុងការគាំទ្រការអភិវឌ្ឍសហគ្រាសធុនតូចនិងមធ្យម រវាង ឯកឧត្តមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយក នៃអគ្គនាយកដ្ឋានគយនិងរដ្ឋាករកម្ពុជា និង ឧកញ៉ា តែ តាំងប៉ ប្រធានក្រុមប្រឹក្សាភិបាលសម្ព័ន្ធសមាគមសហគ្រាសធុនតូចនិងមធ្យមកម្ពុជា ដែលត្រូវបានសង្ឃឹមទុកថា នឹងក្លាយជាក្របខ័ណ្ឌ សហប្រតិបត្តិការដ៏មានសារៈសំខាន់ក្នុងការលើកកម្ពស់ការយល់ដឹងអំពីនីតិវិធីគយ ការកសាងសមត្ថភាព និងការទាញយកអត្ថប្រយោជន៍ពីវិធានការលើកទឹកចិត្ត និងកិច្ចសម្រួលនានារបស់រាជរដ្ឋាភិបាល ដើម្បីរួមគ្នាកែលម្អរបរិយាកាសធុរកិច្ច កិច្ចសម្រួលពាណិជ្ជកម្ម និងពង្រឹងសមត្ថភាពប្រកួតប្រជែងរបស់សហគ្រាសធុនតូចនិងមធ្យមកម្ពុជាឱ្យកាន់តែរឹងមាំ៕ អត្ថបទ៖ ឈិត បូរ៉ាវី

រយៈពេល៥ខែឆ្នាំនេះ កម្ពុជានាំចេញទៅអាមេរិកមានទឹកប្រាក់ជាង ៥,៧ ពាន់លានដុល្លារ កើនជាង ៣១%

ទីផ្សារសហរដ្ឋអាមេរិកបានស្រូបយកមុខទំនិញរបស់កម្ពុជា នៅក្នុងយៈពេល៥ខែ ក្នុងឆ្នាំ២០២៦នេះ មានទឹកប្រាក់សរុបជាង ៥,៧ ពាន់លានដុល្លារអាមេរិក កើនជាង ៣១ ភាគរយ ធៀបរយៈពេលដូចគ្នាឆ្នាំ២០២៥ ដែលជាទីផ្សារធំបំផុតជួយគាំទ្រដល់ការនាំចេញ ទំនិញរបស់កម្ពុជា។ជុំវិញទីផ្សារនាំចេញទំនិញរបស់កម្ពុជាឃើញថា នៅក្នុងរយៈពេលប៉ុន្មានឆ្នាំចុងក្រោយនេះ ការនាំចេញរបស់កម្ពុជាមានកំណើនកើន ឡើងជាបន្តបន្ទាប់ គាំទ្រដល់ការរីកលូតលាស់សេដ្ឋកិច្ចជាតិ និងបានបង្ហាញឱ្យឃើញពីកិច្ចដំណើរការអាជីវកម្មក្នុងស្រុក នៃការរីកលូតលាស់ នៃសេដ្ឋកិច្ច និងក៏ជាការបង្ហាញដល់ទំនុកចិត្តរបស់វិនិយោគិនជាតិនិងអន្តរជាតិ ក្នុងការបណ្តាក់ទុនវិនិយោគនៅព្រះរាជាណាចក្រកម្ពុជា ទោះបី ការដាក់ចេញនូវពន្ធបដិកាគយសរបស់សហរដ្ឋអាមេរិកមិនទាន់មានច្បាស់លាស់ក៏ដោយ។ជាក់ស្តែងការនាំទំនិញរបស់កម្ពុជាទៅកាន់ទីផ្សារអាមេរិក នៅក្នុងរយៈពេល ៥ ខែ ឆ្នាំ២០២៦ នេះ មានទឹកប្រាក់សរុបជាង ៥,៧ ពាន់លានដុល្លារអាមេរិក កើនឡើងជាង ៣១% ធៀបរយៈពេលដូចគ្នាឆ្នាំ២០២៥ (ដែលមានទឹកប្រាក់ជាង ៤,៣ ពាន់លានដុល្លារប៉ុណ្ណោះ) ចំណែកការនាំចូលពីសហរដ្ឋអាមេរិកវិញ នៅក្នុងរយៈពេលនេះដែរ មានទឹកប្រាក់ជាង ២៣១ លានដុល្លាអាមេរិក កើន ៩២% ធៀបរយៈពេល ដូចគ្នាឆ្នាំ២០២៥។ ចំពោះទំនិញដែលគាំទ្រដល់ការនាំចេញរបស់កម្ពុជារួមមាន៖ សម្លៀកបំពាក់, ស្បែកជើង ការបូប សម្ភារៈសម្រាប់ការធ្វើ ដំណើរ ការនាំចេញផលិតផលពី កសិកម្ម និងផ្សេងៗទៀត ពោលគឺទីផ្សារសហរដ្ឋអាមេរិកបានកំពុងជួយជ្រោមជ្រែងដល់ការនាំចេញ និងឈរ ក្នុងលំដាប់ទី១ នៃការនាំចេញទំនិញសរុបរបស់កម្ពុជា។ ក្រៅពីការនាំចេញទៅទីផ្សារអាមេរិក, កម្ពុជានៅមានទីផ្សារសំខាន់ៗផ្សេងទៀតដូចជា នៅក្នុងរយៈពេល ៥ ខែនេះ កម្ពុជានាំចេញទៅ វៀតណាមមានទឹកប្រាក់ជាង ២,៣ ពាន់លានដុល្លារ កើនជិត ១៤%, ជប៉ុនជាង ៧៦៦ លានដុល្លារ កើនជាង ២០%, ចិន ៧៥៣ លានដុល្លារ កើនជិត ១៩%, កាណាដាជិត ៥០០ លានដុល្លារ កើនជាង ១%, អេស្បាញ ជិត ៤៧០ លានដុល្លារ កើន ១៣%, ហូឡង់ ៤០៨ លានដុល្លារ កើន ១៤% បើធៀបរយៈពេលដូចគ្នាឆ្នាំ២០២៥, ក្រៅពីនេះកម្ពុជាក៏មានទីផ្សារផ្សេងៗទៀតដែលជួយគាំទ្រដល់ការនាំចេញផងដែរ។សូមបញ្ជាក់ថា ការដោះដូរពាណិជ្ជកម្មលើទីផ្សារអន្តរជាតិរបស់កម្ពុជា នៅក្នុងរយៈពេល ៥ខែ ឆ្នាំ២០២៦នេះ មានទំហំទឹកប្រាក់សរុបជាង ៣០ ពាន់លានដុល្លារអាមេរិក កើនឡើងជិត ១៩% ក្នុងនោះការនាំចេញទំនិញរបស់កម្ពុជា មានទឹកប្រាក់សរុបជាង ១៤ ពាន់លានដុល្លារ កើនឡើង ១៩% ខណៈការនាំចូលពីអាមេរិកមានចំនួនជាង ១៦ ពាន់លានដុល្លារអាមេរិក កើនជាង ១៩% ធៀបរយៈពេលដូចគ្នាឆ្នាំ២០២៥៕ អត្ថបទ៖ សុន រ៉ាឌី

ស្ថាប័នរាជរដ្ឋាភិបាល កំពុងពង្រឹងសមត្ថភាពជំនាញ ដើម្បីឈានទៅរកសេដ្ឋកិច្ចឌីជីថល ឱ្យរស់រវើក

ស្ថាប័នរបស់រាជរដ្ឋាភិបាល បាននិងកំពុងពង្រឹងសមត្ថភាព និងជំនាញ ជាពិសេសប្រព័ន្ធបច្ចេកវិទ្យា ដើម្បីជំរុញការទទួលយក និងបរិវត្តកម្មដល់គ្រប់តួអង្គពាក់ព័ន្ធ ទាំងរដ្ឋ និងវិស័យឯកជន ដើម្បីឈានទៅរកសេដ្ឋកិច្ចឌីជីថលឱ្យរស់រវើក ជំរុញសម្ទុះកំណើនសេដ្ឋកិច្ច តាមគន្លងប្រក្រតីភាពថ្មី។ជុំវិញសេដ្ឋកិច្ចឌីជីថល គឺជាសកម្មភាពសេដ្ឋកិច្ចទាំងឡាយណា ដែលពឹងផ្អែកលើបច្ចេកវិទ្យាព័ត៌មាន (ICT) និងអ៊ីនធឺណិត ដោយរួមបញ្ចូលទាំងការផលិត ការចែកចាយ និងការប្រើប្រាស់ទំនិញ សេវាកម្មតាមរយៈប្រព័ន្ធអនឡាញដូចជា ពាណិជ្ជកម្មតាម ប្រព័ន្ធអេឡិចត្រូនិក (E-commerce) ការទូទាត់សាច់ប្រាក់ឌីជីថល និងការបង្កើតគំរូធុរកិច្ចថ្មីៗ។ បញ្ហានេះរាជរដ្ឋាភិបាលត្រូវដើរ តួនាទីជាស្នូលឈានមុខគេ តាមរយៈការអនុវត្តក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ ក្នុង គោលដៅកសាងប្រព័ន្ធអេកូឡូស៊ីរស់រវើក លើកកម្ពស់ផលិតភាព និងពង្រឹងសុខុមាលភាពសង្គម។ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ លើកឡើងនៅក្នុងដាក់ឱ្យដំណើរការជាផ្លូវការនូវ "មិត្ត ហ្វូនអិចប្រេស" ដែលជាសេវាកម្មភស្តុភារកម្ម (Logistics) ថា ខណៈពេលដែលពាណិជ្ជកម្មតាមបែបឌីជីថលបន្តកើនឡើងជាលំដាប់ សេវាកម្មភស្តុភារកម្មដែលមានប្រសិទ្ធភាព និងសេវាកម្មឌីជីថលដែលមានទំនុកចិត្ត មានសារៈសំខាន់ណាស់ក្នុងការសម្របសម្រួល ការផ្លាស់ទីទំនិញឆ្លងកាត់ព្រំដែន។ ឯកឧត្តមបន្ថែមថា ដើម្បីឱ្យពាណិជ្ជកម្មឌីជីថលអាចរីកចម្រើនទៅមុខបាន បណ្ដាញសំខាន់ៗចំនួន ត្រូវការជាចាំបាច់ ដើម្បីជំរុញដល់ការរីកលូតលាស់នៅក្នុងសេដ្ឋកិច្ចឌីជីថលនេះ។ ឯកឧត្តមបណ្ឌិត ហ៊ុល សៀងហេង អនុរដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើង ថា ជុំវិញវិស័យវិទ្យាសាស្ត្រ បច្ចេកវិទ្យា និងនវានុវត្តន៍ ក៏ជាកម្លាំងចលករស្នូលដែលជំរុញសេដ្ឋកិច្ចឌីជីថលផងដែរ ជួយពន្លឿនកំណើន តាមរយៈការធ្វើទំនើបកម្មហេដ្ឋារចនាសម្ព័ន្ធ បង្កើតផលិតភាពខ្ពស់ លើកកម្ពស់បរិយាប័ន្នហិរញ្ញវត្ថុ ជំរុញសហគ្រិនភាព និងជួយ សម្រួលដល់ជីវភាពរស់នៅប្រចាំថ្ងៃរបស់ប្រជាពលរដ្ឋ។ ការជួយដល់សេដ្ឋកិច្ចឌីជីថលមានទម្រង់ជាក់ស្តែងដូចជា ការបង្កើនផលិត- ភាព និងភាពច្នៃប្រឌិត, ការលើកកម្ពស់អក្ខរកម្ម និងធនធានមនុស្ស, ភាពងាយស្រួលក្នុងជីវភាពប្រចាំថ្ងៃ ការតភ្ជាប់ និងហេដ្ឋារចនា សម្ព័ន្ធជាដើម។ ពាក់ព័ន្ធការកសាងសេដ្ឋកិច្ច និងសង្គមឌីជីថលនេះ រាជរដ្ឋាភិបាលបានដាក់ក្របខណ្ឌគោលនយោបាយសេដ្ឋកិច្ច និងសង្គមឌីជីថល កម្ពុជា ២០២១-២០៣៥ ក្នុងគោលដៅកសាងប្រព័ន្ធអេកូឡូស៊ីរស់រវើក លើកកម្ពស់ផលិតភាព និងពង្រឹងសុខុមាលភាពសង្គម។ ដើម្បីចាប់យកសេដ្ឋកិច្ចឌីជីថល រាជរដ្ឋាភិបាលកម្ពុជាត្រូវផ្តោតលើសសរស្តម្ភសំខាន់ៗទាំង៥រួមមាន៖ ការអភិវឌ្ឍហេដ្ឋារចនាសម្ព័ន្ធ, ការកសាងពលរដ្ឋឌីជីថល, ការកសាងរដ្ឋាភិបាលឌីជីថល, ការជំរុញធុរកិច្ចឌីជីថល និងការកសាងទំនុកចិត្ត និងភាពជឿជាក់ ដើម្បី ជំរុញការទទួលយកគ្រប់តួអង្គ ទាំងរដ្ឋ ទាំងពលរដ្ឋ និងទាំងធុរជន ដើម្បីជំរុញសម្ទុះកំណើនសេដ្ឋកិច្ច តាមគន្លងប្រក្រតីភាពថ្មី៕ អត្ថបទ៖ សុន រ៉ាឌី

កសិករដាំដុះបន្លែ កំពុងជំរុញផលិតកម្ម ដើម្បីពង្រឹងភាពធន់ផ្នែកសេដ្ឋកិច្ច និងកាត់បន្ថយការពឹងផ្អែកលើការនាំចូល

ភ្នំពេញ៖ ប្រជាកសិករ នៅភូមិគគីធំ ២ ឃុំគគីធំ ស្រុកកៀនស្វាយ ខេត្តកណ្តាល កំពុងជំរុញផលិតកម្មក្នុងស្រុកយ៉ាងសកម្ម ដើម្បីពង្រឹងភាពធន់ផ្នែកសេដ្ឋកិច្ច និងកាត់បន្ថយការពឹងផ្អែកលើការនាំចូល។ ភូមិគគីធំ ២ គឺជាតំបន់មួយដែលមានសក្តានុពលខ្ពស់លើការដាំបន្លែសុវត្ថិភាព និងបន្លែទូទៅដោយសារដីល្បាប់មាត់ទន្លេដ៏មានជីជាតិ។ សព្វថ្ងៃ តំបន់នេះ មានប្រជាពលរដ្ឋប្រមាណ ១ពាន់គ្រួសារ កំពុងប្រកបរបរកសិកម្មនៅផ្ទៃដីដាំដុះសរុបជាង ៤០០ ហិកតា។ ប្រជាកសិករ ដាំដុះបន្លែនៅតំបន់នេះ បានប្រាប់ BTV ថា នាពេលនេះជារដូវប្រមូលផលម្ទេស, ត្រសក់, ត្រប់ស្រួយ, ពោត, និង ដំណាំរួមផ្សំជាច្រើនមុខទៀត ខណៈកសិករមួយចំនួនទៀត ក៏កំពុងចាប់ការដាំដុះសារជាថ្មីឡើងវិញ ផងដែរ។ ប្រជាកសិករនៅតំបន់នេះ បានអនុវត្តការដាំដុះបន្លែឆ្លាស់គ្នា ដើម្បីកុំឱ្យទិន្នផលលើសតម្រូវការ ដែលនាំឱ្យប៉ះពាល់ដល់តម្លៃនៅលើទីផ្សារ។ នៅថ្ងៃទី០៨ ខែមិថុនា ឆ្នាំ២០២៦នេះ ប្រជាកសិករ បានលក់បោះដុំបន្លែត្រសក់ និងម្ទេស ពីចម្ការផ្ទាល់ បានតម្លៃចំនួន ៣ ០០០ រៀល ដែលនេះជាតម្លៃខ្ពស់ជាងឆ្នាំមុន ខណៈតម្លៃត្រប់ស្រួយបានធ្លាក់ថ្លៃយ៉ាងគំហុកគឺមានតម្លៃត្រឹម ៣០០ រៀលប៉ុណ្ណោះ។ នាពេលនេះ ប្រជាកសិករកំពុងមមាញឹកក្នុងការផលិតកម្មបន្លែក្នុងស្រុក បង្កើនប្រាក់ចំណូលចិញ្ចឹមគ្រួសារ និងកាត់បន្ថយការពឹកផ្អែកលើបន្លែនាំចូល។ ចំណែក លោក ប៊ុន ចាន់តូនី អនុប្រធានការិយាល័យកសិកម្ម ស្រុកកៀនស្វាយ ខេត្តកណ្តាល បានបញ្ជាក់ថា នៅឃុំគគីធំ ស្រុកកៀនស្វាយ ខេត្តកណ្តាល គឺជាតំបន់ដាំដុះបន្លែ និងជាប្រភពផ្គត់ផ្គង់បន្លែដ៏សំខាន់មួយសម្រាប់ទីផ្សាររាជធានីភ្នំពេញ និងបណ្តាខេត្តជិតខាង ដែលប្រជាកសិករនៅទីនេះភាគច្រើនប្រកបរបរធ្វើកសិកម្មជាលក្ខណៈគ្រួសារ ដែលកំពុងដើរតួជាកោសិកាគាំទ្រយ៉ាងសំខាន់ដល់សន្តិសុខស្បៀងក្នុងស្រុក។ លោក បានឱ្យដឹងថា ដំណាំត្រប់ ផ្តល់ទិន្នផលប្រមាណ ៥០ តោនក្នុងមួយរដូវ ខណៈម្ទេស ឱ្យផលប្រមាណចន្លោះពី ១២ ទៅ ១៥ តោនក្នុងមួយហិកតា។ លោកអះអាងថា ប្រជាកសិករទាំងអស់នៅតំបន់នេះ បានដាំដុះបន្លែតាមបច្ចេកទេសណែនាំពីមន្រ្តីជំនាញ និងមន្រ្តីកសិកម្មឃុំនៃក្រសួងកសិកម្ម រុក្ខាប្រមាញ់ និងនេសាទ។ បច្ចុប្បន្ន នៅឃុំគគីធំ ស្រុកកៀនស្វាយ ខេត្តកណ្តាល មានប្រជាពលរដ្ឋសរុបចំនួន ១០០៩ គ្រួសារ កំពុងប្រកបរបរកសិកម្ម នៅលើផ្ទៃសរុបចំនួន ៤១២ ហិកតា ក្នុងនោះមានផ្ទៃដីដាំដុះបន្លែ និងដំណាំរួមផ្សំចំនួន ២៤២ ហិកតា និងប្រភេទដំណាំហូបផ្លែដាំដុះលើផ្ទៃដីចំនួន ១៥១ហិកតា ហើយក្រៅពីនោះគឺផ្ទៃដីដាំដុះស្រូវ។ ភូមិគគីរធំ២ ឃុំគគីរធំ ស្រុកកៀនស្វាយ ខេត្តកណ្តាល មានចម្ងាយប្រហែល ២៥ ទៅ ៣០ គីឡូម៉ែត្រ ពីរាជធានីភ្នំពេញ៕ អត្ថបទ៖ ធូ វិរៈ

កម្ពុជា-ជប៉ុន ពិភាក្សាការបង្កើត (BCT) និងការទាក់ទាញក្រុមហ៊ុនសាជីវកម្មធំៗមកវិនិយោគនៅកម្ពុជា

តូក្យូ: កម្ពុជា-ជប៉ុនផ្លាស់ប្តូរទស្សនៈ និងពិភាក្សាលើការបង្កើតក្រុមការងារសហបង្កើតធុរកិច្ច (BCT) ដែលផ្តោតលើការលើកកម្ពស់ បរិយាកាសវិនិយោគ ការស្វែងរកកាលានុវត្តភាពធុរកិច្ចថ្មីៗ និងការទាក់ទាញក្រុមហ៊ុនសាជីវកម្មធំៗ ក៏ដូចជាសហគ្រាសធុនតូច និង មធ្យមរបស់ជប៉ុនឱ្យមកបណ្តាក់ទុននៅកម្ពុជា។ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅថ្ងៃទី៩ ខែមិថុនា ឆ្នាំ២០២៦ បានដឹកនាំគណៈប្រតិភូជាន់ខ្ពស់កម្ពុជា ជួបសម្តែងការគួរសម និងពិភាក្សាការងារកម្រិតខ្ពស់ជាមួយ លោក Norihiko ISHIGURO ប្រធាន និងជានាយកប្រតិបត្តិនៃអង្គការពាណិជ្ជកម្មក្រៅប្រទេសជប៉ុន (JETRO) នៅទីស្នាក់ការកណ្តាលរបស់ JETRO នៅក្រុងតូក្យូ ប្រទេសជបប៉ុន ក្រោមកិច្ចសម្របសម្រួល និងរៀបចំយ៉ាងយកចិត្តទុកដាក់ពី JETRO ប្រចាំនៅរាជធានីភ្នំពេញ។ ជំនួបរវាងកម្ពុជា-ជប៉ុននេះ បានឆ្លុះបញ្ចាំងពីទំនាក់ទំនងមិត្តភាពជាប្រពៃណី និងភាពជាដៃគូយុទ្ធសាស្ត្រ គ្រប់ជ្រុងជ្រោយ រវាងប្រទេសទាំងពីរ ក្នុងនោះភាគីទាំងពីរក៏បានផ្លាស់ប្តូរទស្សនៈ និងពិភាក្សាយ៉ាងស៊ីជម្រៅ លើទិដ្ឋភាពសំខាន់ៗជាច្រើនដូចជា ការ បង្កើតក្រុមការងារសហបង្កើតធុរកិច្ច (BCT) និងការទាក់ទាញក្រុមហ៊ុនសាជីវកម្មធំៗក៏ដូចជា សហគ្រាសធុនតូច និងមធ្យម (SMEs) របស់ជប៉ុនឱ្យមកបណ្តាក់ទុននៅកម្ពុជាជាដើម។ ឯកឧត្តមឧបនាយករដ្ឋមន្ត្រី ក៏បានជំរុញឲ្យភាគីជប៉ុនចាប់ផ្តើមជាវិញ នូវ ជើងហោះហើរត្រង់រវាងប្រទេសជប៉ុននិងកម្ពុជាឡើងវិញ ដើម្បីចូលរួមជុំវិញកិច្ចសហប្រតិបត្តិការវិនិយោគរវាងប្រទេសទាំងពីរ។ ក្នុងស្មារតីនេះ ភាគីទាំងពីរបានឯកភាពគ្នាយ៉ាងមុតមាំ ប្តេជ្ញាពង្រឹងសកម្មភាពការងាររួមគ្នាឱ្យកាន់តែសកម្ម និងមុតស្រួចថែម ទៀត ជាពិសេសគឺការយកចិត្តទុកដាក់ខ្ពស់ក្នុងការសម្របសម្រួល និងដោះស្រាយរាល់បញ្ហាប្រឈម ឬកង្វល់នានារបស់វិនិយោគិន ជប៉ុនផ្អែកលើការផ្តល់អនុសាសន៍ណែនាំ និងកញ្ចប់ដំណោះស្រាយប្រកបដោយយន្តការយុទ្ធសាស្ត្រពីរាជរដ្ឋាភិបាលកម្ពុជា។ ការប្តេជ្ញា ចិត្តរួមគ្នាក្នុងការដោះស្រាយបញ្ហានេះ គឺដើម្បីធានាឱ្យបាននូវសេវាគាំទ្រវិនិយោគមួយប្រកបដោយភាពកក់ក្តៅ តម្លាភាព និងមាន ប្រសិទ្ធភាពខ្ពស់ ដែលជាគន្លឹះដ៏សំខាន់ក្នុងការរក្សាវិនិយោគិនចាស់ និងទាក់ទាញវិនិយោគិនថ្មីៗបន្ថែមទៀតពីជប៉ុន៕ អត្ថបទ៖ សុន រ៉ាឌី

កម្ពុជា និងចិន ចុះហត្ថលេខា ដើម្បីជួយសម្រួលវិស័យធុរៈកិច្ចពាណិជ្ជកម្មអន្តរជាតិនៃប្រទេសទាំងពីរ

អគ្គនាយកដ្ឋានគយ និងរដ្ឋាករកម្ពុជា បានរៀបចំពិធីចុះហត្ថលេខាទទួលស្គាល់គ្នាទៅវិញទៅមក នៃកម្មវិធីប្រតិបត្តិករសេដ្ឋកិច្ចបានទទួលការអនុញ្ញាត របស់អគ្គនាយកដ្ឋានគយនិងរដ្ឋាករកម្ពុជា និង រដ្ឋបាលគយចិន (Cambodia-China Authorized Economic Operator Mutual Recognition Arrangement : Cambodia-China AEO MRA) ។ ពិធីនេះចុះហត្ថលេខានេះ បានដឹកនាំរៀបចំនិងចុះហត្ថលេខាដោយ ឯកឧត្តមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា ជាមួយលោកជំទាវ Sun Meijun រដ្ឋមន្ត្រីនៃអគ្គរដ្ឋបាលគយនៃសាធារណៈរដ្ឋប្រជាមានិតចិន កាលពីរសៀលថ្ងៃទី ៤ ខែមិថុនា ឆ្នាំ២០២៦ នៅរាជធានីភ្នំពេញ។ តាមការលើកឡើងរបស់ ឯកឧត្តមបណ្ឌិត គុណ ញឹម បានមានប្រសាសន៍ឱ្យដឹងថា ការរៀបចំទទួលស្គាល់គ្នាទៅវិញទៅមក នៃកម្មវិធីប្រតិបត្តិករសេដ្ឋកិច្ចបានទទួលការអនុញ្ញាតកម្ពុជា-ចិន នឹងជួយគាំទ្រសម្រួលដល់វិស័យធុរៈកិច្ចពាណិជ្ជកម្មអន្តរជាតិ នៃប្រទេសទាំងពីរ នូវភាពសាមញ្ញនីតិវិធីគយ តាមរយៈការកាត់បន្ថយការត្រួតពិនិត្យរូបវន្តទំនិញ និងការពន្លឿនការបំពេញបែបបទគយ សម្រាប់ក្រុមហ៊ុនដែលមានអនុលោមភាពខ្ពស់។ បច្ចុប្បន្ន កម្ពុជាមានក្រុមហ៊ុនជា AEO ចំនួន ១១ ហើយកម្ពុជាមានគោលដៅបង្កើនក្រុមហ៊ុន AEO ឲ្យបានចំនួន៣០ មុនបញ្ចប់ឆ្នាំ២០២៦នេះ។ ឯកឧត្តម បានបន្តថា ការរៀបចំយន្តការទទួលស្គាល់គ្នាទៅវិញទៅមកលើកម្មវិធី AEO នាពេលនេះ គឺមានសារៈសំខាន់ជាយុទ្ធសាស្ត្រ ក្នុងការបន្តជំរុញទំហំពាណិជ្ជកម្ម និងការវិនិយោគឱ្យកាន់តែរីកចម្រើនបន្ថែមទៀត តាមរយៈការកាត់បន្ថយពេលវេលានិងថ្លៃដើម, ការពង្រឹងភាពប្រកួតប្រជែងរបស់ធុរជន, និងការធានាសុវត្ថិភាពខ្សែច្រវាក់ផ្គត់ផ្គង់នៃប្រទេសទាំងពីរ។ ព្រឹត្តិការណ៍ខាងលើនេះ គឺជាសក្ខីភាពមួយទៀត ដែលឆ្លុះបញ្ចាំងពីស្មារតីនៃ «មិត្តភាពដែកថែប» និងកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយរវាង កម្ពុជានិងចិន ជាពិសេសការជំរុញសហគមន៍វាសនារួម កម្ពុជា-ចិន ក្នុងយុគសម័យថ្មី ឱ្យកាន់តែរឹងមាំ និងមានផ្លែផ្កា។ ស្របតាមស្មារតីនៃកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយនេះ សាធារណរដ្ឋប្រជាមានិតចិន មិនត្រឹមតែជាមិត្តដ៏ល្អនោះទេ ប៉ុន្តែគឺជាដៃគូពាណិជ្ជកម្ម និងជាប្រភពទុនវិនិយោគផ្ទាល់ពីបរទេស (FDI) ដ៏ធំបំផុត និងសំខាន់បំផុតរបស់កម្ពុជា ដែលបាននិងកំពុងរួមចំណែកយ៉ាងធំធេង ដល់ការអភិវឌ្ឍសេដ្ឋកិច្ច និងហេដ្ឋារចនាសម្ព័ន្ធនៅកម្ពុជា៕ អត្ថបទ៖ ឈិត បូរ៉ាវី

កម្ពុជានាំចេញអង្ករជាង ៥៦ម៉ឺនតោន គិតជាទឹកប្រាក់ជាង ៣២៧លានដុល្លាររយៈពេល៥ខែ ឆ្នាំ ២០២៦នេះ

ភ្នំពេញ៖ កម្ពុជាបាននាំចេញអង្ករសម្រេចបានក្នុងបរិយមាណជាង ៥៦ម៉ឺនតោន កើឡើង ៦៥,២៨% គិតជាប្រាក់ចំនួនជាង ៣២៧ កើនឡើង ២៩,៧៦% បើធៀបនឹងរយៈពេលដូចគ្នាកាលពីឆ្នាំមុន ខណៈ តំបន់អឺរ៉ុប, ចិន, និងបណ្តាប្រទេសតំបន់អាស៊ាន នៅតែជាទីផ្សារចម្បងជាងគេសម្រាប់អង្ករកម្ពុជានាពេលនេះ។របាយការណ៍សហព័ន្ធស្រូវអង្ករកម្ពុជា បានបង្ហាញថា ក្នុងរយៈពេល៥ខែ នៃឆ្នាំ២០២៦ កម្ពុជាបាននាំចេញអង្ករបានចំនួន ៥៦៨ ៩១២ តោន គិតជាប្រាក់ជាង ៣២៧,៤៣ លានដុល្លារអាម៉េរិក។ ការនាំចេញអង្ករនេះ តាមរយៈក្រុមហ៊ុននាំចេញអង្ករចំនួន ៦១ ក្រុមហ៊ុន ទៅកាន់ទីផ្សារគោលដៅចំនួន ៦៣ ជុំវិញពិភពលោក។ ក្នុងនោះ បណ្តាប្រទេសនៅក្នុងតំបន់អឺរ៉ុបចំនួន ៣១ គឺជាទីផ្សារធំលំដាប់ទី១ សម្រាប់កម្ពុជា ដែលបានទិញអង្ករចំនួន ១៥៤ ២៥៤ តោន គិតជាទឹកប្រាក់ចំនួន ១០៥,១២លានដុល្លារសហរដ្ឋអាមេរិក។បន្ទាប់មកប្រទេសចិន និងហុងកុង ដែលជាទីផ្សារធំលំដាប់ទី២ សម្រាប់អង្ករកម្ពុជា ដែលបានបញ្ជាទិញចំនួន ១៦២ ១២៥តោន គិតជាទឹកប្រាក់ចំនួន ៩៤,៩២ លានដុល្លារសហរដ្ឋអាមេរិក។ បណ្តាប្រទេសក្នុងអាស៊ាន ចំនួន ៥ ក៏ជាទីផ្សារចម្បងសម្រាប់អង្ករកម្ពុជា ផងដែរ ដែលបានបញ្ជាទិញអង្ករចំនួន ២០៨ ៥៩៣តោន គិតជាទឹកប្រាក់ចំនួន ៨៧,៣២ លានដុល្លារសហរដ្ឋអាមេរិក និងទៅកាន់គោលដៅចំនួន ២៤ ប្រទេសផ្សេងទៀតមាន អាហ្វ្រិក និងមជ្ឈឹមបូព៌ា។ល។ មានចំនួន ៤៣ ៩៤០ តោន គិតជាទឹកប្រាក់ចំនួន ៤០,០៧ លានដុល្លារសហរដ្ឋអាមេរិក។កម្ពុជាបាននាំចេញអង្ករក្រអូបគ្រប់ប្រភេទចំនួន ៥៩,២០% ប្រភេទអង្ករសគ្រាប់វែង ២២,២៨% អង្ករចំហ៊ុយ ១,៧២% អង្ករសរីរាង្គចំនួន ១.០៤%, អង្ករបាក់គ្រប់ប្រភេទ ១៥,៥៨% និងអង្ករផ្សេងៗចំនួន ០,១៨%%។ប្រទេសកម្ពុជាក៏បាននាំចេញស្រូវចំនួន ២ ៧៥៣ ៨១៦ តោន ស្រូវសើម ដែលគិតជាទឹកប្រាក់បានប្រមាណ ៥៩១,៤១ លានដុល្លារសហរដ្ឋអាមេរិក៕ អត្ថបទ៖ ធូ វិរៈ

ត្រីមាសទី១ឆ្នាំនេះ កម្ពុជាប្រមូលថវិកាពីដៃគូ និងការបោះលក់មូលបត្រមានទំហំជាង ៥៦១ លានដុល្លារ សម្រាប់តម្រូវការអភិវឌ្ឍ

នៅក្នុងត្រីមាសទី១ ឆ្នាំ២០២៦នេះ រាជរដ្ឋាភិបាលដកសាច់ប្រាក់ពីឥណទានសម្បទាន ដែលបានចុះកិច្ចព្រមព្រៀងសរុបជាង ១៩២ លានដុល្លារអាម៉េរិក និងការបោះផ្សាយលក់មូលបត្ររដ្ឋប្រមាណជាង ៣៦៩ លានដុល្លារអាម៉េរិក ដើម្បីបំពេញតម្រូវការហិរញ្ញប្បទាន ទ្រទ្រង់ដល់វិស័យអាទិភាព។ក្រសួងសេដ្ឋកិច្ច និងហិរញ្ញវត្ថុ ចេញផ្សាយព្រឹត្តិបត្រស្ថិតិបំណុលសាធារណៈកម្ពុជា ដោយបង្ហាញឱ្យដឹងថា ស្ថានភាពបំណុល សាធារណៈបច្ចុប្បន្នរបស់កម្ពុជា ត្រូវបានវាយតម្លៃថា ស្ថិតក្នុងភាពអាចគ្រប់គ្រងបាន ពោលគឺនៅតែមាន «ចីរភាព» និង «ហានិភ័យ កម្រិតទាប»។ ការរក្សាបាននូវចីរភាពបំណុលសាធារណៈនេះ គឺអាស្រ័យដោយកម្ពុជាមានប្រព័ន្ធគ្រប់គ្រងបំណុលសាធារណៈមួយដ៏រឹងមាំរួមមាន៖ ១) ក្របខ័ណ្ឌគតិយុត្ត, ២) គោលនយោបាយ, យុទ្ធសាស្ត្រ, និងនីតិវិធីគ្រប់គ្រងប្រតិបត្តិការគ្រប់ជ្រុងជ្រោយ, ៣) សមត្ថភាពស្ថាប័ន និងធនធានមនុស្សគ្រប់គ្រាន់, និង ៤) ប្រព័ន្ធព័ត៌មានវិទ្យាសម្រាប់គ្រប់គ្រងប្រតិបត្តិការ និងរក្សាទុកទិន្នន័យ ដើម្បីជាមូលដ្ឋាននៃការវិភាគ និងតាមដានហានិភ័យបំណុល។ ជាក់ស្តែងបើគិតទាំងបំណុលមរតក ត្រឹមដំណាច់ត្រីមាសទី១ ឆ្នាំ២០២៦, កម្ពុជាមានសន្និធិបំណុលសាធារណៈសរុបចំនួន ជាង ១៣ ប៊ីលានដុល្លារអាម៉េរិក ក្នុងនោះ ៩៦% ត្រូវនឹងប្រមាណជាង ១២ ប៊ីលានដុល្លារអាម៉េរិក ជាបំណុលសាធារណ:ក្រៅប្រទេស (ក្របខ័ណ្ឌទ្វេភាគី ៥៩% និងក្របខ័ណ្ឌពហុភាគីប្រមាណ ៤១%) និង ៤% ត្រូវនឹងប្រមាណជាង ៥៩៦ លានដុល្លារអាម៉េរិក ជាបំណុលសាធារណៈក្នុងប្រទេស។ ដោយឡែកការចុះកិច្ចព្រមព្រៀងឥណទាន នៅក្នុងត្រីមាសទី១ ឆ្នាំ២០២៦នេះវិញ រាជរដ្ឋាភិបាល បានចុះកិច្ចព្រមព្រៀងឥណទានសម្បទានថ្មី ជាមួយដៃគូអភិវឌ្ឍនានាមានចំនួនសរុបជិត ៩២ លានដុល្លារអាម៉េរិក សមមូលជាង ៦៧ លានអេសដេអ៊ែ ស្មើនឹងប្រមាណ ៣% នៃពិតានដែលច្បាប់អនុញ្ញាត (២.២៥០ លានអេសដេអ៊ែ) ក្នុងនោះក្របខ័ណ្ឌទ្វេភាគី ៧៥% និងក្របខ័ណ្ឌពហុភាគី ២៥% បើធៀបនឹងត្រីមាសទី១ឆ្នាំ២០២៥ មានកំណើនប្រមាណ ១៧%។ ចំណែកការបោះផ្សាយលក់មូលបត្ររដ្ឋនៅក្នុងត្រីមាសទី១នេះដែរ រាជរដ្ឋាភិបាលបានបោះផ្សាយលក់មូលបត្ររដ្ឋ ក្នុងទំហំទឹក ប្រាក់សរុបប្រមាណ ១,៤៨ ទ្រីលានរៀល សមមូលប្រមាណជាង ៣៦៩ លានដុល្លារអាម៉េរិក ក្នុងនោះមូលបត្ររដ្ឋដែលបោះផ្សាយជា ប្រាក់រៀលមានចំនួន ១៩៨ ប៊ីលានរៀល ខណៈដែលមូលបត្ររដ្ឋជាប្រាក់ដុល្លារអាម៉េរិក មានជាង ៣១៩ លានដុល្លារអាម៉េរិក។ ជារួម, ការបោះផ្សាយមូលបត្ររដ្ឋខាងលើនេះ មានទំហំស្មើនឹងប្រមាណ ៧០% នៃទំហំសរុបដែលច្បាប់អនុញ្ញាត (២.១១៤ ប៊ីលានរៀល) ជាហិរញ្ញប្បទានគាំទ្រគម្រោងវិនិយោគសាធារណៈ ការអនុវត្តវិធានការ គោលនយោបាយគន្លឹះរបស់រាជរដ្ឋាភិបាល និងរក្សាតុល្យភាព ថវិកាជាតិ សំដៅលើកស្ទួយកំណើន និងផលិតភាពសេដ្ឋកិច្ចជាតិ។ ចំណែកការដកសាច់ប្រាក់ នៅក្នុងត្រីមាសទី១នេះ, រាជរដ្ឋាភិបាលបានដកសាច់ប្រាក់ពីឥណទានសម្បទាន ដែលបានចុះកិច្ច ព្រមព្រៀងកន្លងមកមានចំនួនសរុបជាង ១៩២ លានដុល្លារអាម៉េរិក ក្នុងនោះក្របខ័ណ្ឌទ្វេភាគីមានប្រមាណ ៤០% និងក្របខ័ណ្ឌពហុ ភាគីមានប្រមាណ៦០%។ សាច់ប្រាក់ទាំងនេះ ត្រូវបានប្រើប្រាស់ជាក់ស្តែងទៅលើវិស័យហេដ្ឋារចនាសម្ព័ន្ធ ៨២% និងវិស័យអាទិភាព ចំពោះមុខផ្សេងទៀត (មិនមែនហេដ្ឋារចនាសម្ព័ន្ធ) ១៨%៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

ប្រព័ន្ធផ្សព្វផ្សាយ៖ អាមេរិក និងអ៊ីរ៉ង់នឹងផ្តោតលើច្រកសមុទ្រហ័រមូស និងការដកការបិទខ្ទប់អំឡុងកិច្ចចរចា

ក្រសួងដឹកជញ្ជូន និងក្រសួងការពារជាតិរុស្ស៊ី បង្កើនការការពារនាវានៅតំបន់អាងសមុទ្រ Azov-សមុទ្រខ្មៅ

អតីតមេដឹកនាំកំពុងជាប់ពន្ធនាគា លោក Maduro ស្វាគមន៍ផ្លូវឆ្ពោះទៅរកការសន្ទនា នៅវ៉េណេស៊ុយអេឡា

ទូរទស្សន៍៖ យោធាអាមេរិកកំពុងស្វែងរកជម្រើសមិនធម្មតា ដើម្បីដាក់ទណ្ឌកម្មលើអ៊ីរ៉ង់

ICRC បញ្ជាក់ពីការជួបជាមួយលោកស្រី អ៊ុងសាន ស៊ូជី ក្នុងអំឡុងពេលបន្តឃុំខ្លួន

រលកកម្ដៅដ៏ក្ដៅគគុកកំពុងគ្របដណ្ដប់ពាសពេញឧបទ្វីបកូរ៉េ ដែលបង្ខំឲ្យមានការឆ្លើយតបបន្ទាន់

សមាជិកព្រឹទ្ធសភារុស្ស៊ីថា ជម្លោះរវាងអាមេរិក និងអ៊ីរ៉ង់ អាចនឹងបញ្ចប់នៅត្រឹមចុងឆ្នាំ

ប្រធានាធិបតីលីបង់ជំរុញឲ្យតុលាការចេញសេចក្តីចោទប្រកាន់ពាក់ព័ន្ធនឹងការផ្ទុះនៅកំពង់ផែបេរូត

កម្មករនិយោជិតបម្រើការងារផ្គុំ និងដំឡើងរថយន្តនៅក្រុមហ៊ុន តូយ៉ូតា ស៊ុយស៊ូ មេនូហ្វេកឆឺរីង ប្រមាណជិត ៨០% ជាអតីតសិស្សបញ្ចប់ការសិក្សាពីគ្រឹះស្ថាន TVET

អ៊ីរ៉ង់ ប្រហារជីវិតមនុស្សពីរនាក់ដែលត្រូវបានចោទប្រកាន់ពីបទចារកម្មឱ្យអ៊ីស្រាអែល

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

សេដ្ឋកិច្ច និង កសិកម្ម

អ្នកស្រាវជ្រាវជំរុញឱ្យធុរកិច្ច និងម្ចាស់ SMEs ចាប់យកបច្ចេកវិទ្យា និង​នវានុវត្តន៍​បម្រើ​ក្នុង​អាជីវកម្ម

កម្ពុជា​មានសមត្ថភាពផលិតសាច់ស្រស់គ្រប់គ្រាន់ ខណៈផលិតកម្មក្នុងស្រុកអាច​ផ្គត់ផ្គង់បាន ៩៨% លើទីផ្សារ

អគ្គនាយកគយ និងសម្ព័ន្ធ FASMEC បើកវេទិកាជំរុញផលិតកម្មក្នុងស្រុក និងសមត្ថភាពប្រកួតប្រជែង

រយៈពេល៥ខែឆ្នាំនេះ កម្ពុជានាំចេញទៅអាមេរិកមានទឹកប្រាក់ជាង ៥,៧ ពាន់លានដុល្លារ កើនជាង ៣១%

ស្ថាប័នរាជរដ្ឋាភិបាល កំពុងពង្រឹងសមត្ថភាពជំនាញ ដើម្បីឈានទៅរកសេដ្ឋកិច្ចឌីជីថល ឱ្យរស់រវើក

កម្ពុជា-ជប៉ុន ពិភាក្សាការបង្កើត (BCT) និងការទាក់ទាញ​ក្រុមហ៊ុនសាជីវកម្មធំៗ​មកវិនិយោគនៅកម្ពុជា

កម្ពុជា និងចិន ចុះហត្ថលេខា ដើម្បីជួយសម្រួល​វិស័យ​ធុរៈកិច្ច​ពាណិជ្ជកម្ម​អន្តរជាតិ​នៃ​ប្រទេសទាំងពីរ

កម្ពុជានាំចេញអង្ករជាង ៥៦ម៉ឺនតោន គិតជាទឹកប្រាក់ជាង ៣២៧លានដុល្លារ​រយៈពេល៥ខែ ឆ្នាំ ២០២៦នេះ